Wp/phr/فلكیات

فلکیات قدرتی علماں نی ایک اییے جیہی شاخ ہے جس وچ اجرام فلکی تے زمینی کرہ ہوائی تھوں باہر ہون آلے واقعاں نا مشاہدہ کیتا جاݨا ہے۔ فلکیات نے عالمے کی فلکیات داݨ آکھنے ہن۔

پراݨے فلکی جائزے

دوربین نی ایجاد تھوں پہلیں ستاریاں نا مشاہدہ کسے اچی جگہ تھوں ہی ہوئی سکنا سی تے ایہہ مشاہدے حالی اکھاں نے پرالے نال ہی گھندے جاݨے سن۔ دائیں دائیں تہذیباں ترقی کرنیاں گئیاں، انہاں ستاریاں نے مطالعے واسطے باقاعدہ محصوص تھاواں بناݨیاں شروع کری دتیاں۔ بھلیں بھلیں انہاں لوکاں وچ کائنات نی جانچ پڑتال نی اِحی لگنی گئی۔ اس ویلے نے زیادہ تر فلکیاتی انکشاف سیاریاں تے ستاریاں نے نقشیاں تک ہی محدود سن۔ اس علم کی نجوم پیمائی آکھݨے سن۔ جدوں فلسفے نی مدد نال انہاں فلکی اجراماں کی سمجھݨ نی کوشش کیتی گئی تاں اک مرکزی کائنات نا تصور ابھری تہہ باندے ہویا۔ انہاں نے مطابق زمیݨ کائنات نا مرکز سی تے سورج، چاند وغیرہ اس نے اوریاں پشیریاں گھمنے ہوݨے سن۔ اس نظرئیے کی ارض مرکزی نظریہ آکھنے ہن ، جس نی بنیاد دووی صدی عیسوی وچ یونانی فلکیات دان بطلیموس رکھی سی۔