Wp/pdt/Albert Einstein

Albert Einstein (* 14. Moaz 1879 en Ulm; † 18. Aprell 1955 en Princeton, USA) we een dietscha Fisitj-Weetenschauftla mett judsche Veafoadasch. Sien Biedroage to dee teoreetische Fisitj habe daut fisikaulische Weltbilt von Grunt opp ve'endat.

Einstein sien Hauptwoatj es dee Teorie vonne Relativitet, woone daut Vestentnis von Rum en Tiet revolutionet haft. Aune 1905 word siene Oabeit mettem Titel „Zur Elektrodynamik bewegter Körper“ publizet. Dee Ennhault woat vondoag aus Spezielle Teorie vonne Relativitet jenant. Aune 1916 publized Einstein dee Auljemeene Teorie vonne Relativitet. Uck to dee Kwauntefisitj droch hee seea vel bie: Fe sien Vetale ewa dem fotoelektrischem Effekt, waut hee uck aune 1905 publizet haud, word ahm em Novamba 1922 dee Nobelpries fe Fisitj fe 1921 aunvetrut. Siene teoreetische Oabeide spejle – aundasch aus dee Lied jeweenlich dentje – biem Bu vonne Atoombomb en vonne Entwetjlung vonne Kornenergie bloos eene nich direkte Roll.

Albert Einstein talt aus Enbejreff von eenem Forscha en aus Zhenie. Hee bruckd siene groote Bekauntheit nich moa enne Natuaweetenschauft; hee sad sich uck seea fe Fred en Veltja-Frindschauft en. En disem Kontatjst vestund hee sich selwst aus Pazifist, Sozialist en Zionist.