Wp/nr/ukudla

UKUDLA KWESIKHETHU OKUZILWAKO.

Lucia Skhosana

EsiNdebeleni kuvamekile bonyana kube neenkulumo ezithi ukudla thizeni kuyazilwa namkha sithi akudliwa babantu abasezingeni elithileko kule koro yethu yesikhethu. Kanengi kubaneenzathu zokobana kubayini laba bantu bazile lokho kudla, kanti lapho okhunye kuvele kuyikambiso yesikhethu ebegade ilandelwa ngabadala bese thina esiphila esikhathini sanje asinazo iimpendulo zombuzo othi kubayini, ngombana safunyana kunjalo.

Isibonelo: isibindi sekomo.

Kunekulumo esakhula ngayo kuthiwa isibindi sekomo asidliwa bantwana. Irhubhululo lithi hlangana nokhunye, lokho khabe kuyikulumo yabadala nabafuna ukudima abantwana isibindi. Yelela ngokuthi gadesi abantwana bayasidla isibindi begodu akunalitho elimbi elibehlelako.

Sibuya godu sibe nepundu namkha ipundulu. Ipundu yincenye yesbindi ethambileko. Kuthiwa ipundu yona ayidliwa bomalokazana namkha abentazana kodwana idliwa ziinlukazi ezidala. Unobangela walokho kukobana ipundu le nange kheyadliwa mmuntu omutjha angeze abeletha kuhle. Kukholelwa bona ipundu ingahle ikhubaze isibeletho.

Kukhona godu amanyaka. Amanyaka wembuzi (umnyokolo) kanye nomtjaza wona ayarhunulwa aphekelwe abesana namkha amatjathakhande kwaphela. Bese kuthi amanyaka wekomo wona adliwe bobaba namaqhegu.

Okhunye okuzilwako mphala. Umphala mhlobo womrhoru. Isikhethu sithi-ke umphala uzilwa babantu abatjha. Uvumeleke ukudliwa maqhegu amadala neenlukazi.

Amaqanda namkha amadzayi wekukhu wona ayazilwa ukudliwa matlawana kanye namatlawu. Unobangela walokho kukobana ikambiso ithi amaqanda anikela ikanuko yokuzibandakanya kezomseme begodu ayabanothisa namkha ayabavundisa, lokho akusiyo into ekhuthazwako emntwaneni ongakathombi.

Iziso kanye nebende zona ziyazilwa bentazana, abomalokazana kanye namaqhakazana. Kukholelwa bona kunekghonakalo yokubavala imbeleko. Iziso nebende zivumelekile bonyana zingadliwa marhuze kanye neelukazi njengoba bona badlulile kilelo zinga lokubeletha.

wethunga awudliwa ngunanyana ngubani. Uphekelwa abakhethwa ngesikhathi sengoma. Abantu abavumeleke ukudla umdoko lo bogogo abawuphekako kwaphela. Nakwenzeka bona mhlamunye usale, bangawufakela abantwanyana abakhona kodwana abantwanabo kosele bangagudi ehloko nabo basiza abogogo ukuzilela ingoma bese amasokana nakagodukako, kufanele bagudwe abantwana abadle umdoko lowo.

Itlhodlha ayiselwa ngunoma ngubani. Iselwa maqhegu. Kwamaswaphelo, ilimu alidliwa bomma. Ilimu likhamba nehloko yeke kufuze liye ebandla. Kukhona ikolelo yokobana ilimi lenza abafazi namkha abantu bengubo bona bakhulumele futhi. Nange umfazi aphiwa ilimu, ayeliquntwe kancani ihloko phambili bese ingcenye leyo iyalahlwa ngethemba lokubalekela yona ikolelo le.