Wp/nr/16 JUNE 1976
16 kuMgwengweni 1976
Ilanga labantu abatjha
Ilanga lange 16 kuMgwengweni 1976 lilanga lapho kwatjhuguluka khona izinto ezinengi eSewula Afrika. Ngelangeli abantu abatjha abahlukeneko eenarheni ezinengi babuthelelana bese balwisana negandelelo lombuso wangaphambilini. Lokho azange kwahlala kuhle embusweni egade ubusa ngaleso sikhathi. Lokho-ke, kwabanga ukutjhayisana.
ESoweto ukutjhayisanokhu kwaba kukhulu hlangana nabentwana besikolo sabantu bombala onzima. Ezinye zezinto ebebalila ngazo mthetho wezefundo obizwa bona ngeBantu Education Act ka-1953. Iinlilo lezi zabangela umbuso wegandelelo ukuthi uphendule ngokuthumela amajoni namapholisa endaweni leyo. Amapholisa namajoni la bekahlome ngeengidi nezinye iinkhali. Ngemva kwalokhu kwaba khona umguruguru hlangana namajoni la nabentwana besikolo la. Abafundi abanengi laba bazithola balinyazwa. Omunye wabongazimbi kwaba ngu-Hector Peterson loyo owadutjulwa mapholisa.
U-Hector Peterson wabengomunye wabafundi egade balwela ikululeko yokungafundiswa ngelimi lesibhunu i-Afrikaans eenkolweni. Ngaleso sikhathi bekaneminyaka elitjhumi nambili nakadutjulwako. Wayiswa esibhedlela kodwana wathi nabatjhejako abodorhodere ebebasebenza ngaleso sikhathi bamfumana sele umoyakhe uhlukene nenyama.
Kusukela ngelanga leli, woke umuntu wathoma ukulwisana nebandlululo lombuso wangaphambilini lo. Ilangeli nesehlakalo esenzeka ngeSewoto lesi sasetjenziswa njengekhuthazo. Ilangeli lathiywa bonyana lilanga lelutjha.