Wp/nod/ᩈᩯ᩠ᨦ
.jpg)
ᩈᩯ᩠ᨦ, ᩈᩯ᩠ᨦᩈ᩠ᩅ᩻᩵ᩣ᩠ᨦ, ᩈᩯ᩠ᨦᨴᩦ᩵ᨲᩣᩉᩢ᩠ᨶ, ᨣᩤ ᩁᩘᩈᩦᨴᩦ᩵ᨲᩣᩉᩢ᩠ᨶ ᨾᩯ᩠᩵ᨶᨤᩨᩁᩘᩈᩦᨤᩖᩨ᩵ᩁᨾᩯ᩵ᩉᩖᩮᨠᩡᨼᩱᨼ᩶ᩣᨴᩦ᩵ᨠᩯ᩠᩵ᨶᨲᩣᨡᩬᨦᨾᨶᩩᩔ᩼ᨹᩬᩴ᩵ᩉᩢ᩠ᨶ᪩ ᩈᩯ᩠ᨦᨴᩦ᩵ᨲᩣᩉᩢ᩠ᨶᨾᩦᨤ᩠ᩅᩣ᩠ᨾᨿᩣ᩠ᩅᨤᩖᩨ᩵ᩁᩀᩪ᩵ᨶᩲᩉ᩠ᩅ᩶ᨦ ᪄᪀᪀-᪇᪀᪀ ᨶᩣᨶᩰᨾᩮᨲᩕ (nm) ᨪᩮᩥ᩠᩵ᨦᨴᩮᩢ᩵ᩣᨠᩢ᩠ᨷᨤ᩠ᩅᩣ᩠ᨾᨳᩦ᩵ᩉ᩠ᩅ᩶ᨦ ᪇᪅᪀-᪄᪂᪀ ᨵᩮᩁᩌᩮᩥᩁ᩠ᩈ᩼ ᩓᩁᩬ᩶ᨦᩅ᩵ᩤᩈᨻᩮᩢ᩠ᨠᨴᩕᩢ᩠ᨾᨴᩦ᩵ᨲᩣᩉᩢ᩠ᨶ (visible spectrum)᪩ ᩉ᩠ᩅ᩶ᨦᩈᩯ᩠ᨦᨴᩦ᩵ᨲᩣᩉᩢ᩠ᨶᩀᩪ᩵ᨲᩥ᩠ᨯᨠᩢ᩠ᨷᩁᩘᩈᩦᩋᩥ᩠ᨶᨼᩕᩣᩁᩮ᩠ᨯ (ᨤ᩠ᩅᩣ᩠ᨾᨿᩣ᩠ᩅᨤᩖᩨ᩵ᩁᨿᩣ᩠ᩅᩉᩖᩮᩬᩨᩋᩓᨤ᩠ᩅᩣ᩠ᨾᨳᩦ᩵ᨲ᩵ᩣᩴᩉᩖᩮᩬᩨᩋ) ᨠᩢ᩠ᨷᩁᩘᩈᩦᩋᩢ᩠ᩃᨴᩕᩣᩅᩱᩋᩰᩃᩮ᩠ᨲ (ᨤ᩠ᩅᩣ᩠ᨾᨿᩣ᩠ᩅᨤᩖᩨ᩵ᩁᩈᩢ᩠᩶ᨶᩉᩖᩮᩬᩨᩋᩓᨤ᩠ᩅᩣ᩠ᨾᨳᩦ᩵ᩈᩪᨦᩉᩖᩮᩬᩨᩋ)᪩
ᨶᩲᨴᩣ᩠ᨦᨼᩥᩈᩥᨠ᩠ᩈ᩼ ᨣᩤᩴᩅ᩵ᩤ « ᩈᩯ᩠ᨦ » ᨧᩢᨾᩦᨤ᩠ᩅᩣ᩠ᨾᩉ᩠ᨾᩣ᩠ᨿᨠ᩠ᩅ᩶ᩣ᩠ᨦ ᨯᩰᩫ᩠ᨿᨶᩢ᩠ᨷᩁ᩠ᩅ᩵ᨾᨻᩱᨳᩮᩥ᩠ᨦᩁᩘᩈᩦᨤᩖᩨ᩵ᩁᨾᩯ᩵ᩉᩖᩮᨠᩡᨼᩱᨼ᩶ᩣᨩᩩᨤ᩠ᩅᩣ᩠ᨾᨿᩣ᩠ᩅᨤᩖᩨ᩵ᩁ ᨷᩴᨨᨻᩕᩰᩬᩡᩉ᩠ᩅ᩶ᨦᨴᩦ᩵ᨲᩣᩉᩢ᩠ᨶᨴᩮᩢ᩵ᩣᩋᩢ᩠᩶ᨶ᪩ ᨶᩲᨤ᩠ᩅᩣ᩠ᨾᩉ᩠ᨾᩣ᩠ᨿᨩᩮᩬᩨ᩶ᩋᨶᩦ᩶ ᩁᩘᩈᩦᨠᩯ᩠ᨾᨾᩣ ᩁᩘᩈᩦᩋᩮᩢᨠ᩠ᩈ᩼ ᨾᩱᨣᩕᩰᩅᩮ᩠ᨷᨼ᩼ ᩓᨤᩖᩨ᩵ᩁᩅᩥᨴ᩠ᨿᩩ ᨣᩴᨶᩢ᩠ᨷᩅ᩵ᩤᨾᩯ᩠᩵ᨶᩈᩯ᩠ᨦᨴ᩠ᩅ᩠ᨿ᪩ ᨣᩩᨱᩈᩫᨾ᩠ᨷᩢᨲᩥ᩼ᨣᩮᩢ᩶ᩣᨡᩬᨦᩈᩯ᩠ᨦᨾᩯ᩠᩵ᨶᨤᩨ ᨤ᩠ᩅᩣ᩠ᨾᨡᩮ᩠᩶ᨾ (intensity), ᨴᩥ᩠ᩈᨴᩣ᩠ᨦᨠᩣ᩠ᩁᨻᩖᩯ᩵ᨠᩕᨧᩣ᩠ᨿ (propagation direction), ᩈᨻᩮᩢ᩠ᨠᨴᩕᩢ᩠ᨾᨤ᩠ᩅᩣ᩠ᨾᨳᩦ᩵ᨣᩤᨤ᩠ᩅᩣ᩠ᨾᨿᩣ᩠ᩅᨤᩖᩨ᩵ᩁ, ᩓ ᨽᩰᩃᩣᩁᩱᨪᩮᨫᩢ᩠ᨶ (polarization)᪩ ᩋᩢ᩠ᨲᨲᩕᩣᩅᩮᩥ᩠ᨿᨡᩬᨦᩈᩯ᩠ᨦᨶᩲᩈᩩᨬ᩠ᨬᩣᨠᩣ᩠ᩈᨤᩨ ᪂᪉᪉,᪇᪂᪉,᪄᪅᪈ ᨾᩮᨲᩕᨲᩬᩴ᩵ᩅᩥᨶᩣᨵᩦ ᩓᨶᩢ᩠ᨷᨸᩮ᩠ᨶᨣ᩵ᩤᨤᩫ᩠ᨦᨴᩦ᩵ᨻᩨ᩠᩶ᨶᨮᩣ᩠ᨶᨡᩬᨦᨵᩢᨾ᩠ᨾᨩᩣ᩠ᨲ᪩ ᩈᩯ᩠ᨦᨴ᩠ᩅ᩶ᨦᨻᩱᨯᩰᩫ᩠ᨿᩋᩣᩆᩱ᩠ᨿᩋᨶᩩᨽᩣ᩠ᨣᨾᩪᩃ᩼ᨮᩣ᩠ᨶᨴᩦ᩵ᨷ᩠ᨾᩦᨾ᩠ᩅᩁᩁᩬ᩶ᨦᩅ᩵ᩤ ᨼᩰᨴᩬᨶ᩼ ᨪᩮᩥ᩠᩵ᨦᨸᩮ᩠ᨶᨲ᩠ᩅᩫᨴᩯ᩠ᨶᨡᩬᨦᨤ᩠ᩅᩬᨶᨴᩢ᩠ᨾᨡᩬᨦᩈ᩠ᨶ᩻ᩣ᩠ᨾᨾᩯ᩵ᩉᩖᩮᨠᩡᨼᩱᨼ᩶ᩣ ᩓᨣᩴᨸᩮ᩠ᨶᨯᩱ᩶ᨴᩧ᩠ᨦᨤᩖᩨ᩵ᩁᩓᩋᨶᩩᨽᩣ᩠ᨣ᪩ ᨠᩣ᩠ᩁᩈᩮᩥᩢ᩠ᨠᩈᩣᨠ᩠᩵ᨿᩅᨠᩢ᩠ᨷᩈᩯ᩠ᨦᩁᩬ᩶ᨦᩅ᩵ᩤᩅᩥᨩ᩠ᨩᩣᨴᩢᩆ᩠ᨶᩆᩣᩈ᩠ᨲᩕ᩼ ᨪᩮᩥ᩠᩵ᨦᨸᩮ᩠ᨶᩅᩥᨩ᩠ᨩᩣᨴᩦ᩵ᩈᩣᩴᨤᩢ᩠ᨬᩋᩢ᩠ᨶᨶᩧ᩠᩵ᨦᨶᩲᨴᩣ᩠ᨦᨼᩥᩈᩥᨠ᩠ᩈ᩼᪩
ᩉᩖᩯ᩵ᨦᨠᩣᩴᨶᩮᩥ᩠ᨭᩈᩯ᩠ᨦᩉᩖᩢᨠᨲᩣ᩠ᨾᨵᩢᨾ᩠ᨾᨩᩣ᩠ᨲᨷᩫ᩠ᨶᩃᩰᩫ᩠ᨠᨤᩨᨯ᩠ᩅᨦᨲᩅᩢ᩠ᨶ᪩ ᨶᩲᩈ᩠ᨾ᩻ᩱ᩠ᨿᨷ᩵ᩤᨠᩮᩢ᩵ᩣ ᩉᩖᩯ᩵ᨦᩉᩨ᩶ᩈᩯ᩠ᨦᨴᩦ᩵ᩈᩣᩴᨤᩢ᩠ᨬᨳᩯ᩠ᨾᩀ᩵ᩣ᩠ᨦᨣᩴᨤᩨᨻᩱ ᨲᩢ᩠᩶ᨦᨲᩯ᩵ᨠᩬᨦᨻᩱᨶᩲᩈ᩠ᨾ᩻ᩱ᩠ᨿᨠᩬ᩵ᩁᨧᩫ᩠ᨶᨳᩮᩥ᩠ᨦᨣᩰᩫ᩠ᨾᨻᩱᨶ᩶ᩣᩴᨾᩢ᩠ᨶᨣᩢ᩠ᨯᨶᩲᩈ᩠ᨾ᩻ᩱ᩠ᨿᨷᩢ᩠ᨯᨯ᩠᩵ᨿᩅ᪩ ᨿᩬ᩶ᩁᨠᩣ᩠ᩁᨻᩢᨯ᩠ᨰᨶᩣᩈᩯ᩠ᨦᨼᩱᨼ᩶ᩣᩓᩁᨷᩫ᩠ᨷᩈᩫ᩠᩵ᨦᨧ᩵ᩣ᩠ᨿᨼᩱᨼ᩶ᩣ ᩈᩯ᩠ᨦᨼᩱᨼ᩶ᩣᨣᩴᨯᩱ᩶ᨡᩮᩢ᩶ᩣᨾᩣᨴᩯ᩠ᨶᨴᩦ᩵ᩈᩯ᩠ᨦᨣᩰᩫ᩠ᨾᨼᩱ᪩
ᩈᨻᩮ᩠ᨠᨴᩕᩢ᩠ᨾᨾᩯ᩵ᩉᩖᩮᩢᨠᨼᩱᨼ᩶ᩣᩓᩈᩯ᩠ᨦᨴᩦ᩵ᨲᩣᩉᩢ᩠ᨶ
[edit | edit source]
ᨲᩣ᩠ᨾᩉᩖᩢᨠᩓ᩠ᩅᩁᩘᩈᩦᨾᩯ᩵ᩉᩖᩮᩢᨠᨼᩱᨼ᩶ᩣ (Electromagnetic radiation; EMR) ᨧᩢᨷᩯ᩠᩵ᨦᩋᩬᨠᨯᩱ᩶ᨸᩮ᩠ᨶᩉ᩠ᩅ᩵ᩣ᩠ᨦᨤᩖᩨ᩵ᩁᨯᩢ᩠᩵ᨦᨶᩦ᩶ᨤᩨ ᨤᩖᩨ᩵ᩁᩅᩥᨴ᩠ᨿᩩ, ᨤᩖᩨ᩵ᩁᨾᩱᨣᩕᩰᩅᩮᨼ᩼, ᩁᩘᩈᩦᩋᩥ᩠ᨶᨼᩕᩣᩁᩮ᩠ᨯ, ᩈᨻᩮ᩠ᨠᨴᩕᩢ᩠ᨾᨴᩦ᩵ᨲᩣᩉᩢ᩠ᨶ (ᨪᩮᩥ᩠᩵ᨦᩁᩮᩢᩣᩁᩬ᩶ᨦᩅ᩵ᩤᩈᩯ᩠ᨦ), ᩁᩘᩈᩦᩋᩢ᩠ᩃᨴᩕᩣᩅᩱᩋᩰᩃᩮ᩠ᨲ, ᩁᩘᩈᩦᩋᩮᩢᨠ᩠ᩈ᩼, ᩓᩁᩘᩈᩦᨣᩯ᩠ᨾᨾᩣ᪩ ᨯᩰᩫ᩠ᨿᨣᩤᩴᩅ᩵ᩤᩁᩘᩈᩦᨶᩢ᩠᩶ᨶᨷᩴᩃ᩠ᩅᨾᨻᩱᨳᩮᩥ᩠ᨦ ᨼᩱᨼ᩶ᩣᩈᨳᩥ᩠ᨲ, ᨾᩯ᩵ᩉᩖᩮᩢᨠ, ᩓᩈ᩠ᨶ᩻ᩣ᩠ᨾᨾᩯ᩵ᩉᩖᩮᩢᨠᩁᨿᩡᨠᩖᩲ᩶ (near field)᪩
ᨻᩂᨲᩥᨠᩢᨾ᩠ᨾ᩼ᨡᩬᨦᩁᩘᩈᩦᨾᩯ᩵ᩉᩖᩮᩢᨠᨼᩱᨼ᩶ᩣᨡᩨ᩠᩶ᨶᨠᩢ᩠ᨷᨤ᩠ᩅᩣ᩠ᨾᨿᩣ᩠ᩅᨤᩖᩨ᩵ᩁᨡᩬᨦᨾᩢ᩠ᨶ᪩ ᨤᩖᩨ᩵ᩁᨤ᩠ᩅᩣ᩠ᨾᨳᩦ᩵ᩈᩪᨦᨧᩢᨾᩦᨤ᩠ᩅᩣ᩠ᨾᨿᩣ᩠ᩅᨤᩖᩨ᩵ᩁᩈᩢ᩠᩶ᨶ ᩓᨤᩖᩨ᩵ᩁᨤ᩠ᩅᩣ᩠ᨾᨳᩦ᩵ᨲ᩵ᩣᩴᨧᩢᨾᩦᨤ᩠ᩅᩣ᩠ᨾᨿᩣ᩠ᩅᨤᩖᩨ᩵ᩁᨿᩣ᩠ᩅ᪩ ᨿᩣ᩠ᨾᨾᩮᩬᩨ᩵ᩋᩁᩘᩈᩦᨾᩯ᩵ᩉᩖᩮᩢᨠᨼᩱᨼ᩶ᩣᨠᩮᩥ᩠ᨭᨷᨭᩥᨠᩥᩁᩥᨿᩣᨠᩢ᩠ᨷᩋᨴᩬᨾᨣᩤᨾᩰᩃᩮᨣᩩᩃ᩼ᨶᩧ᩠᩵ᨦᨶᩢ᩠᩶ᨶ ᨻᩂᨲᩥᨠᩢᨾ᩠ᨾ᩼ᨡᩬᨦᨾᩢ᩠ᨶᨧᩢᨡᩨ᩠᩶ᨶᩀᩪ᩵ᨠᩢ᩠ᨷᩁᨯᩢ᩠ᨷᨻᩃᩴᨦᩣ᩠ᨶᨲᩬᩴ᩵ᨤ᩠ᩅᩬᩁᨴᩢ᩠ᨾᨴᩦ᩵ᨾᩢ᩠ᨶᨾᩦ᪩
ᩁᩘᩈᩦᨾᩯ᩵ᩉᩖᩮᩢᨠᨼᩱᨼ᩶ᩣᨶᩲᩉ᩠ᩅ᩶ᨦᨴᩦ᩵ᨲᩣᩉᩢ᩠ᨶᨷᩕᨠᩬᨷᨯ᩠ᩅ᩠᩶ᨿᩉ᩠ᨶ᩠ᩅ᩠᩵ᨿᨻᩃᩴᨦᩣ᩠ᨶ (quanta) ᨴᩦ᩵ᩁᩬ᩶ᨦᩅ᩵ᩤᨼᩰᨴᩬᨶ᩼ (photon) ᨴᩦ᩵ᨾᩦᩁᨯᩢ᩠ᨷᨻᩃᩴᨦᩣ᩠ᨶᨴᩦ᩵ᨲ᩵ᩣᩴᨴᩦ᩵ᩈᩩᨯᨴᩦ᩵ᨿᩢ᩠ᨦᩈᩣᨾᩣᩁ᩠ᨳ᩼ᨠᨲᩩ᩶ᩁᩋᩥᩃᩮᩢ᩠ᨠᨴᩕᩬᨶ᩼ᨻᩣ᩠ᨿᨶᩱᨾᩰᩃᩮᨣᩩᩃ᩼ ᩓᨿ᩠ᨿᩮᩡᩉᩨ᩶ᨻᩢᨶ᩠ᨵᨣᩤᩈᨽᩣᩅᨴᩤ᩠ᨦᨥᩮᨾᩦᨡᩬᨦᨾᩰᩃᩮᨣᩩᩃ᩼ᨸᩖ᩠ᨿ᩵ᩁᨷᩕᩯᨻᩱᨯᩱ᩶᪩ ᩁᩘᩈᩦᨾᩯ᩵ᩉᩖᩮᩢᨠᨼᩱᨼ᩶ᩣᨶᩲᩉ᩠ᩅ᩶ᨦᩋᩥ᩠ᨶᨼᩕᩣᩁᩮ᩠ᨯᨶᩢ᩠᩶ᨶᨲᩣᨷᩴᩋᩣ᩠ᨧᩉᩢ᩠ᨶᨯᩱ᩶ ᨿᩬ᩶ᩁᩅ᩵ᩤᨼᩰᨴᩬᨶ᩼ᨷᩴᨾᩦᨻᩃᩴᨦᩣ᩠ᨶᨻᩬᩴᨴᩦ᩵ᨧᩢᨡᩮᩢ᩶ᩣᨻᩱᨸᩖ᩠ᨿ᩵ᩁᨷᩕᩯᩈᨽᩣᩅᨴᩤ᩠ᨦᨥᩮᨾᩦᨡᩬᨦᨾᩰᩃᩮᨣᩩᩃ᩼ (ᩈᩣ᩠ᩁᩁᩮᨲᩥᨶᩬᩃ᩼) ᨶᩲᨪᩮᩃ᩠ᩃ᩼ᩁᩢ᩠ᨷᩈᩯ᩠ᨦᨡᩬᨦᨠᩯ᩠᩵ᨶᨲᩣᨾᨶᩩᩔ᩼ᨯᩱ᩶ᩓ᩠ᩅ᪩
ᩀ᩵ᩣ᩠ᨦᨯᩲᨣᩴᨯᩣ᩠ᨿᨿᩢ᩠ᨦᨾᩦᩈᩢᨲ᩠ᩅ᩼ᨴᩦ᩵ᨾᩦᨷᩈᩣ᩠ᨴᩈᩢᨾ᩠ᨹᩢᩔ᩼ᩁᩢ᩠ᨷᩁᩪ᩶ᨤᩖᩨ᩵ᩁᩋᩥ᩠ᨶᨼᩕᩣᩁᩮ᩠ᨯᨯᩱ᩶ ᨲᩯ᩵ᨣᩴᨷᩴᨾᩯ᩠᩵ᨶᨯ᩠ᩅ᩠᩶ᨿᨠᩫ᩠ᩃᨠᩱᨡᩬᨦᨠᩣ᩠ᩁᨯᩪᨯᨪᩢ᩠ᨷᨻᩃᩴᨦᩣ᩠ᨶᨤ᩠ᩅᩬᩁᨴᩢ᩠ᨾ᪩ ᨷᩈᩣ᩠ᨴᩈᩢᨾ᩠ᨹᩢᩔ᩼ᨤᩖᩨ᩵ᩁᩋᩥ᩠ᨶᨼᩕᩣᩁᩮ᩠ᨯᨶᩲᨦᩪᨠᩮᩥ᩠ᨭᨧᩣ᩠ᨠᨠᩫ᩠ᩃᨠᩱᨠᩣ᩠ᩁᩈ᩶ᩣ᩠ᨦᨽᩣ᩠ᨻᨧᩣ᩠ᨠᨤ᩠ᩅᩣ᩠ᨾᩁ᩶ᩬᩁ (thermal imaging) ᨯᩰᩫ᩠ᨿᨠᩣ᩠ᩁᨹᩯ᩵ᨤ᩠ᩅᩣ᩠ᨾᩁ᩶ᩬᩁᨧᩣ᩠ᨠᨤᩖᩨ᩵ᩁᩋᩥ᩠ᨶᨼᩕᩣᩁᩮ᩠ᨯᨧᩢᨿ᩠ᨿᩮᩡᩉᩨ᩶ᩏᨱ᩠ᩉᨽᩪᨾᩥ᩼ᨡᩬᨦᨳᩩᨦᨶ᩶ᩣᩴᩉ᩠ᨶᩬ᩠᩶ᨿᪧ ᨶᩲᨪᩮᩃ᩠ᩃ᩼ᨷᩈᩣ᩠ᨴᩈᩢᨾ᩠ᨹᩢᩔ᩼ᩈᩪᨦᨡᩨ᩠᩶ᨶᩓᨠᩮᩥ᩠ᨭᨸᩮ᩠ᨶᨠᩕᨷ᩠ᩅᩁᨠᩣ᩠ᩁᩈ᩶ᩣ᩠ᨦᨽᩣ᩠ᨻᨧᩣ᩠ᨠᨤ᩠ᩅᩣ᩠ᨾᩁ᩶ᩬᩁ᪩ ᩁᩘᩈᩦᨾᩯ᩵ᩉᩖᩮᩢᨠᨼᩱᨼ᩶ᩣᨶᩲᩉ᩠ᩅ᩶ᨦᨶᩦ᩶ᨧᩢᨿ᩠ᨿᩮᩡᩉᩨ᩶ᨠᩮᩥ᩠ᨭᨠᩣ᩠ᩁᩈᩢ᩠᩵ᨶᨡᩬᨦᨾᩰᩃᩮᨣᩩᩃ᩼ᩓᨤ᩠ᩅᩣ᩠ᨾᩁ᩶ᩬᩁᨡᩨ᩠᩶ᨶ ᨪᩮᩥ᩠᩵ᨦᩈᩢᨲ᩠ᩅ᩼ᩉ᩠ᨾᩪ᩵ᨶᩦ᩶ᩈᩣᨾᩣᩁ᩠ᨳ᩼ᨠ᩠ᩅᨯᩅᩢ᩠ᨯᨯᩱ᩶᪩
ᩋᩢ᩠ᨲᨲᩕᩣᩅᩮᩥ᩠ᨿᩈᩯ᩠ᨦ
[edit | edit source]ᩋᩢ᩠ᨲᨲᩕᩣᩅᩮᩥ᩠ᨿᩈᩯ᩠ᨦᨶᩲᩈᩩᨬ᩠ᨬᨠᩣ᩠ᩈᨯᩱ᩶ᨶᩥᨿᩣ᩠ᨾᩅᩱ᩶ᨸᩮ᩠ᨶᨣ᩵ᩤᨤᩫ᩠ᨦᨴᩦ᩵ᨴᩮᩢ᩵ᩣᨠᩢ᩠ᨷ ᪂᪉᪉,᪇᪉᪂,᪄᪅᪈ ᨾᩮᨲᩕᨲᩬᩴ᩵ᩅᩥᨶᩣᨵᩦ᪩ ᩉ᩠ᨶ᩠ᩅ᩠᩵ᨿ SI ᨯᩱ᩶ᨶᩥᨿᩣ᩠ᨾᩋᩢ᩠ᨲᨲᩕᩣᩅᩮᩥ᩠ᨿᩈᩯ᩠ᨦᩅᩱ᩶ᨸᩮ᩠ᨶᨣ᩵ᩤᨤᩫ᩠ᨦᨴᩦ᩵ᨲᩣ᩠ᨿᨲ᩠ᩅᩫᨿᩬ᩶ᩁᩅ᩵ᩤᨷᩢ᩠ᨯᨯ᩠ᨿ᩵ᩅᨶᩦ᩶ᩉ᩠ᨶ᩠ᩅ᩠᩵ᨿ « ᨾᩮᨲᩕ » ᨯᩱ᩶ᨳᩪᨠ᩼ᨶᩥᨿᩣ᩠ᨾᨯᩰᩫ᩠ᨿᨩᩲ᩶ᩋᩢ᩠ᨲᨲᩕᩣᩅᩮᩥ᩠ᨿᩈᩯ᩠ᨦ᪩ ᩁᩘᩈᩦᨾᩯ᩵ᩉᩖᩮᩢᨠᨼᩱᨼ᩶ᩣᨩᩩᩀ᩵ᩣ᩠ᨦᨾᩦᩋᩢ᩠ᨲᨲᩕᩣᩅᩮᩥ᩠ᨿᨴᩮᩢ᩵ᩣᨠᩢ᩠ᨷᩋᩢ᩠ᨲᨲᩕᩣᩅᩮᩥ᩠ᨿᩈᩯ᩠ᨦᨶᩲᩈᩩᨬ᩠ᨬᨠᩣ᩠ᩈ᪩