Wp/nij/Kaharingan

Kaharingan iete agama tatu hiang Uluh Dayak hong Pulau Kalimantan. Agama Kaharingan jadi bara bihin tege hong Kalimantan bahkan sahindai agama-agama je beken tame guang Kalimantan. Kaharingan tuh kejau rima ah dengan kare animisme atawa dinamisme je inyurat melai buku pelajaran Sejarah Indonesia. Wayah tuh Kaharingan manjari ije bara sakuyan agama tatu hiang hong Indonesia je masih ihaga tuntang ilalus awi kapire-pire bitin uluh Dayak, khusus ah melai Kalimantan Tengah tuntang Kalimantan Selatan.

Kaharingan te rimae belum, kilau huang istilah nyalung kaharingan (danum pambelum). Umat Kaharingan percaya akan Hatalla atawa Tamparan Taluh Handiai je inyewut hapan sewutan beda-beda huang genep daerah Kalimantan (Ranying Hatalla Langit / Suwara / Yustu Ha Latalla). Kutak salam sewut hasundau huang agama Kaharingan iete "Tabe Salamat Lingu Nalatai, Salam Sahujud Karendem Malempang" je induan bara istilah hong basa Sangiang, je rimae "Salamat hasundau, semoga huang kahanjak atei tuntang karigas". Tapi dia tawan kanampi kisah ah wayah tuh kutak sewut salam jite salenga inyala-arti ah awi uluh are, manjari kutak salam adat uluh Dayak. Agama Kaharingan tuh kea tege simbol kabuat ah je inyewut Batang Garing, je rimae batang pambelum bara basa Sangiang. Simbol Batang Garing jituh rancak tagitan melai kakare human uluh atawa gedung bahkan ihapan akan motif baju batik uluh Dayak. Awi pemerintah Indonesia je maharus uras penduduk Indonesia akan menganut tuntang mamintih ije bara kapire agama resmi je kana akui pemerintah metuh te, maka bara 20 April 1980 agama Kaharingan kana pahinje dengan agama Hindu (sewutan ah manjari Hindu Kaharingan ndai). Makanya metuh katika manampa KTP, umat Kaharingan akan mintih agama Hindu mangat patame huang kolom agama ah. Sama kilau agama Tollotang ayun Uluh Bugis je tege kea persamaan ah kilau Hindu huang malalus ritual pengorbanan metu suci je melai agama Hindu inyewut Yadnya, limbah te resmi manjari Hindu Tollotang.