Wp/mui/Seni

Lókésan Mona Lisa karya Léonardó da Vinci, secaro rinci nampilke teknik Sfumató (gradién)

Seni (asal katonyo dari baso latin ars, yunani téchne) itu bikinan manusio secaro sadar dari apo bae yang indah apo dak bemakno dengen bantuan kepacakan, persepsi, intuisi, samo imajinasi yang bikinnyo, dengen idak punyo fungsi praktis yang ditentuke. Seni iolah gawéan tangan manusio yang pacak digawéke déwé'an atawa bekelompok termasók diantaranyo seni grafis, lókésan, patóng, téater, tari, musik, fotografi, film, arsitektur, sastra, samo puisi. Wong yang lihai ngawéke seni apo dak punyo kepacakan di bidang seni dinamoke seniman.

Definisi umum

Seni punyo arti yang luas, singgonyo dak katék definisi yang disepakati secaro umum atawa universal. Di jeru maknanyo yang paléng tinggi, seni iolah éksprési éstétika dari jiwa manusio yang mencerminke pendapat, perasoan, samo pemikiran seniman di bidang sosial, moral, budaya, étika, atawa agama yang sesuai dengen periode sejarahnyo. Jadi seni pacak disebut jugo sebagé bahasa, retinyo kepacakan untuk nyampéke emosi samo pesan.

Dari segi budayo gagasan tentang seni terós bekembang seéréng waktu, yang muncul genre baru, bentuk seni baru, yang pacak be ngubah gagasan tentang fungsi samo hakikat seni, tapi apo bae seni pasti punyo tradisinyo maséng-maséng, punyo aturannyo déwék. Konsep dasar mak itu la yang harus dituruti atawa dipatuhi olé setiap seniman.

Asal Kato

Beberapo teori yang nyubo nerangke asal mulo kato "seni" diantaranyo itu;

1. Seni diambek dari baso Melayu Riau "sonik" yang asal dari kato "so" atau "se", retinyo iolah sikok, serapan dari baso Sanskerta "swa" (sikok), yang digabungke dengen kato "nik" (kecik nian atawa alus). Kato sonik, sonit, atawa seni berati sikok hal yang alus bentuk rupa apo dak sifatnyo.
2. Kato seni dari baso Sansekerta "sani" yang retinyo sesembahan, pelayanan samo enjukan yang tulus.
3. Kato seni dari baso Belando "genie", retinyo kepacakan yang digawa dari lahér.

Mpukla cak itu, istilah seni suda ado dalam baso Melayu umum. Teori-teori di pucuk tadi kemóngkénan cuman anggapan baru bae.

Sejarah seni

Bentuk kesenian tetuo yang ditemuke iolah seni rupa gambar. Bentuk seni cak patung, lókésan gua, lókésan batu, dan pétroglif dari Paléolitikum Ahir suda ado sejak dari 40.000 taun yang lalu. Lókésan gua di Sulawesi disebót sebagé salah sikok seni tetuo di dunio, meski myampe mak ini ari masi dak ado yang tau maknonyo keno kurangnyo wawasan tentang kebudayoan yang ngawéke lókésan tadi. Di gua Lubang Jeriji Saleh, Kalimantan Timu, wong-wong arkeolog nemuke gambar cak binatang sapi yang berasal dari 40 sampe 52 ribu taun yang lalu (periode Paléolitik Awal dan ahir jaman es), lebih tuo 5000 taun dari yang ditemuke di Sulawesi tadi. Benda seni yang disebót-sebót tetuo laénnyo berasal dari gua di Afrika Selatan, berumur 75.000 tahun, bebentuk sósónan cangkang keong kecik-kecik yang ditebok'i.