Wp/mui/Matematika

Matematika itu sikok studi tentang jumlah atau angko, ruang, struktur, samo peritungan. Matematika berasal dari baso Yunani μάθημα ("mathema") diterjemahke jadi "ilmu", "pengetahuan" apo dak "belajar"; samo μαθηματικός: ("mathematikós") yang retinyo "cenderung untuk belajar". Pendekatan pertamo untuk konsep matematika móngkén di ambek dari baso Mesir, Maat, yang penulisannyo make simbol "siku" yang digunoke sebagé alat ókór liniér.

Umumnyo matématika iolah sekómpólan baso formal yang bole digunoke sebagé alat untuk ngajuke masalah secaro idak ambigu di konteks kusus. Contohnyo, pernyatoan kalimat ini bole dituliske dengen duo caro, pertamo: "P lebéh besak dari Q dan Q lebéh besak dari R." atau kalu secao matématika (caro keduo) bentók kalimatnyo pacak ditulis lebéh sederhano (keno make bantuan notasi matématika)jadi: "P > Q > R." Inilah sebabnyo sakéng matématika itu cuman salah sikok baso yang disederhanoke dengen alat untuk tiap masalah.

Ilmu matematika secaro luas dipaké di segalo bidang diantaranyo; fisika, teknik, ekonomi sampe ke ilmu komputer yang banyak gunoke alat analisis, perhitungan, samo pemodelan dan galo-galonyo itu ado di jeru cabang-cabang ilmu matematika pecak aritmatika, aljabar, analisis, geometri, samo logika matematika.

Baso matématika

Baso matématika modérn yang isinyo banyak make simbol-simbol yang ulum ditemuke, sebagian besak mulak'i dikenalke pas abés abad keenam belas. Sebelóm adonyo notasi-notasi itu matématika cuman ditulis make kato-kato, yang nyebabke wong-wong kesusahan untuk ngawéke sikok proses. Upayo penemon notasi-notasi matématika ini yang nyampe mak ini ari dikenal di seluruh dunio, salah sikoknyo iolah olé matématikawan, Leonhard Euler (1707-1783)

Dasar matématika

Géométri

Géométri ado hubungannyo dengen pertanyaan bentók, ókóran, posisi relatif gambar, samo sifat ruang, termasók jugo kesejajaran, tegak lurus, kurva, permukaan, poligon). Banyak dipake untuk ilmu-ilmu laén pecak fisika terapan, mekanika, arsitéktur, géografi, kartografi, astronomi, kelautan, samo topografi).

Probabilitas

Probabilitas atawa ilmu peluang ini nyubo untuk segalo sesuatu yang ado kaetannyo dengen keacakan dibikin formal. Atawa biso jugo nak tau kemóngkénan dari sikok kejadian itu jadi apo idak, terós seberapo besak kemóngkénan kejadian tadi punyo peluang untuk terjadi.

Statistika

Ilmu statistika iolah ilmu yang olé kenonyo pacak ngumpulke, mroses samo bikin sintesis dari sikok set data, kadang datanyo ini ado banyak yang diambek dari populasi.

Matématika terapan

Matématika terapan digunoke untuk mecahke masalah-masalah konkret di budang laén semisal sains apo dak bisnis. Bidang ilmu yang dipake iolah statistik, semisal téori probabilitas deskripsi, analisis, samo prédiksi fénomena acak. Sebagéan besak segalo bentók éksperimen, survei, samo studi obsérvasional pastila merluke alat-alat yang ado di ilmu statistik tadi.