Jump to content

Wp/mui/Anatomi

From Wikimedia Incubator
< Wp‎ | mui
Wp > mui > Anatomi
Ilustrasi anatomi palak manusio, yang dijingokke secaro lateral

Anatomi itu sikok cabang ilmu biologi yang nerangke tentang struktur bagian jeru organisme. Bentuk, posisi, struktur bagian tubuh pecak organ,jaringan, apo dak sél, diperikso léwat ilmu anatomi ini. Dio diambék dari baso Yunani anatomia (άνατομία), dari asal anatemnein (άνατέμνειν), yang retinyo netak atawa motong. Definisi umumnyo iolah ilmu yang ngambarke bentók teko struktur idup organisme, termasók nganalisis segalo morfologi, posisi macem-macem bagian tubuh, samo hubungan antara organ dengen jaringan yang nyósónnyo. Anatomi beda dengen fisiologi atawa biokimia, studinyo idak ado hubungannyo dengen fungsi bagian-bagian organ atawa prosés kimiawi yang masók disano. Singgonyo studi anatomi ni fokusnyo ke bentók, ókóran, posisi, struktur, suplai darah samo persarafan ati, sedengke fisiologi ni lebéh ke fungsi tubuh semisal apo yang dikeluarke olé ati, empedu, atawa fungsi ati dalem nutrisi samo regulasi tubuh.[1][2]

Sejarah samo perkembangannyo

[edit | edit source]

Salah sikok studi Anatomi paléng awal pacak dijingok di téks médis Mesir Kuno, Papirus Edwin Smith. Ringkasnyo disano ado catetan yang ngasi tau perna ado operasi médis organ manusio, diantaranyo jantóng, artéri koronér, ati, limpa, ginjal, hipotalamus, rahém, kandóng kemih, samo pembuluh darah. Selaén itu ditemuke jugo dari Papirus Ebers yang suda ado sejak kiro-kiro abad ke-16 SM. Papirus itu berisi catetan tentang organ jantóng, samo pembuluh darah.

Anatomi secaro sistematis mulai diperhatike dan dikembangke sejak jaman Babilonia Kuno. Terós mulai ado sekolah kusus anatomi yang pertamo muncul di Alexandria kiro-kiro masók abad ke-2 M. Disano prakték anatominyo suda diizinke langsóng maké mayat asli sebagé sarana studi yang lebéh rinci. Di abad keduo ini jugo lahér buku yang katonyo buku teks paléng tuo yang nerangke tentang nomenklatur anatomi. Buku itu ditulis olé Rufus dari Efesus.

Cabang

[edit | edit source]

Belajar anatomi dipisahke jadi duo kelompok kalo dijingok dari ókóran objék yang nak digawéke, anatomi makróskopis samo mikróskopis. Anatomi makróskopis bahasannyo ngenoi struktur badan yang kejingokan dengen kasat mato, jugo apo bae yang ado di anatomi superfisial atau permukaan, semisal studi tentang bagian-bagian di luar badan, anatomi sistemik, atawa anatomi pekembangan. Sementaro aman anatomi mikróskopis nerangke tentang struktur yang ókóran objeknyo punyo skala mikróskopis, dan ado cabangnyo lagi pecak histologi (studi tentang jaringan) samo embriologi.

Rujukan

[edit | edit source]
  1. Bio Differences. Difference Between Anatomy and Physiology.[1].diakses pada 17 Agustus 2021.
  2. .ThoughtCo. Difference Between Anatomy and Physiology[2].diakses pada 17 Agustus 2021.

Bacoan lanjutan

[edit | edit source]
  1. Jacob, Sam. (2007). Human Anatomy: A Clinically-Orientated Approach[3]. Elsevier Health Sciences. 9780443103735
  2. Dickison, William. C. (2000). Integrative Plant Anatomy[4]. Elsevier. 9780080508917