Wp/mui/Évolusi
Évolusi itu sikok konsép biologis yang nunjukke prosés berobanyo segalo makhluk idup dari generasi ke generasi. Perobahannyo tu betahap dari sikok populasi léwat pewarésan sifat dengen kombinasi variasi samo seléksi alam. Mak mano évolusi itu pacak ado atau apo penyebabnyo spésiés pacak beroba dijelaske samo sikok cabang ilmu biologi, iolah biologi évolusioner.
Sikok organisme ngewaréske karakteristik atau ciri-ciri yang dio punyo (dari induk ke anaknyo) secaro turun-temurun léwat adonyo gén. Mutasi (perobahan génom) pacak ngasilke sifat-sifat baru yang dio punyo olé sikok organisme. Aman karakteristik tadi nguntungke olé sikok organisme (keturunannyo), mako dio punyo peluang besak pacak betahan idup jadi spésiés baru.
Selamo beberapo generasi, sikok populasi pacak ngasilke banyak karakteristik baru sampé dio jadi spesiés yang baru lagi. Keanékaragaman hayati yang pacak dijingok mak ini ari ni ngambarke aman tiap organisme punyo sifat-sifat berbéda-béda keno adonyo évolusi tadi.
Pewarésan sifat[edit | edit source]
Pewarésan sifat dari sikok generasi ke generasi selanjutnyo dijelaske olé ahli botani, Grégor Méndel dari hasél gawéannyo dengen taneman kacang-kacangan. Mak ini ari dikenal dengen Hukum Méndel. Sikok organisme nerimo separo dari sifat penórónan (herediter) secaro acak dari tiap induknyo, yang dibawa olé sikok faktor namonyo "gén". Gén ini ujinyo berisi informasi yang pacak nentuke cak mano sikok organisme bekembang. Galo-galo organisme umumnyo mewarérske sifat ke ketórónannyo lewat gén ini la. Gén dibentók olé DNA, molekul organik panjang yang berisi nukléotida. nukléotida yang muncul di jeru molekul DNA ini bawak banyak informasi ketórónan sikok organisme. DNA ado di segalo sél organisme yang bebentók kromosom.
Proses yang disebót mutasi ini, pacak ngubah órótan nukléotida di jeru molekul DNA, jugo ngubah informasi sifat-sifat organisme. Mutasi itu prosesnyo acak, singgonyo kombinasi baru yang muncul biasonyo idak langsung ngasilke sifat baru yang nguntungke. Seleksi alam sebaliknyo, dio idak bekerjo secaro acak. Organisme dengen karakteristik yang idak nguntungke punyo peluang ketórónan yang lebéh kecik. Mutasi iolah sumbernyo variasi samo adaptasi baru. Seleksi alam yang nentuke variasi baru mano yang pacak nyebar ke sikok populasi samo mano yang bakal ilang.