Wp/mnc/ᠰᡠᠨ ᡩᡯᡳ ᡳ ᠴᠣᡠᡥᠠᡳ ᡩᠣᡵᠣ

Sun Zi bingfa (Pinyin: Sūn​zǐ​ bīng​ fǎ)

da Victor H. Mair jia H.T. Toh, “Soldierly Methods: Vade Mecum for an Iconoclastic Translation of Sun Zi bingfa|[1]” (Appendix IV) Sino-Platonic Papers, 178 (February, 2008)

(263) sun dz i coohai doro bithe. sucungga bodoro ujui fiyelen. sun dz hendume. cooha serengge. gurun i amba baita. bucere banjire ba. taksire gukure doro. kimcirakūci ojorakū. tuttu ofi sunja baita be wekjime gamambime. teisulebume (264) bodofi. terei gūnin be sibkimbi. uju de doro sembi. jai de abka sembi. ilaci de na sembi. duici de jiyanggiyūn sembi. sunjaci de kooli sembi. doro serengge. irgen be dergi i emgi emu gūnin obufi. tuttu sasa buceci ojoro. sasa banjici (265) ojoro be dahame. irgen tuksicuke de gelerakū be kai. abka serengge. a e šahūrun halhūn de acabume gamara be kai. na serengge. goro hanci haksan necin onco hafirahūn bucere banjire be kai. jiyanggiyūn serengge. mergen akdun gosin baturu cira be kai. kooli (266) serengge. meyen. durun. hafan. jugūn. da. baitalan be kai. uheri ere sunja be. jiyanggiyūn ofi donjihakūngge akū. sahangge etembi. sarkūngge eterakū [.] tuttu teisulebume bodofi. terei gūnin be sibkire de ya ergi ejen de doro bi. ya ergi jiyanggiyūn de (267) muten bi. ya ergi abka na de acanambi. ya ergi fafun šajin be yabubumbi. ya ergi agūra cooha etuhun ohobi. ya ergi uksin cooha urehebi ya ergi šangnahan erun getuken ohobi seme bi ede etere anabure be sambi. coohai data mini arga be (268) gaici. baitalafi urunakū etere be dahame. bibumbi. coohai data mini arga be gaijarakū oci. baitalafi urunakū gaibure be dahame unggimbi arga sain dade gaiha de. tereci horon arame tulergi de aisilambi. horon serengge. aisi be dahame. tooselame gamarangge. cooha serengge. koimali (269) doro. tuttu mutembime muterakū be tuwabumbi. baitalambime baitalarakū be tuwabumbi. hanci bime goro be tuwabumbi. goro bime hanci be tuwabumbi. aisi i yarkiyambi. facuhūrabufi gaimbi. akdun oci belhembi. etuhun oci jailambi. nukibume kūthūmbi. fusihūn arame coktolobumbi. (270) teyehun oci suilabumbi. haji oci jakanabumbi. terei belhehekū be afambi. terei gūnihakū ci tucimbi. ere coohalame eterengge. doigonde firgembuci ojorakū. afara onggolo juktehen de bodofi eterengge bodome bahanahangge ambula ofi kai. afara onggolo juktehen de bodofi eterakūngge. (271) bodome bahanahangge arsari ofi kai. bodorongge ambula oci etere. bodorongge arsari oci eterakū bade. bodoro ba akū be ai hendure. bi erebe tuwaha de etere anaburengge iletu ombikai: (273) afara be deribure jai fiyelen. sun dz hendume. yaya cooha baitalara kooli. feksire sejen emu minggan. sukūngge sejen emu minggan. uksin i cooha juwan tumen. minggan baci jeku juweme ofi. dorgi tulergi i fayabun. antaha sa i baitalan. amdun šugin i (274) jaka sejen uksin i belhen de. inenggidari minggata yan be fayabuha manggi. teni juwan tumen cooha ilimbi. ede uthai afaci etembi. goidabuci agūra moyombi. dacun bukdabumbi. hecen be afaci. hūsun mohombi. cooha be tule goidabuci. gurun i baitalan tesurakū ombi. (275) yala agūra moyoro dacun bukdabure. hūsun mohoro ulin wajire ohode. goloi beise terei cukure be tuwame necinjimbi. udu mergen urse bihe seme. amala hocikon obume muterakū. tuttu cooha moco hūdun be donjiha. faksidame goidabure be sabuhakū. cooha goidaha bime. (276) gurun de aisi ojorongge akū kai. tuttu ofi cooha baitalara jobolon be akūmbume sarkūngge. uthai cooha baitalara aisi be akūmbume same muterakū. cooha baitalara mangga urse. cooha be dasame tuciburakū. jeku be ilanggeri juweburakū. gurun de baitalan gaime. (277) bata de jeku tabcilame ofi. tuttu coohai jeku be tesubuci ombi. cooha de gurun yadarangge. goro juwere haran. goro juweci. tanggū halai irgen yadambi. cooha de hanci ningge. mangga hūda de uncambi. mangga hūda de uncaci. tanggū halai irgen i (278) ulin wajimbi. ulin wajici. ekšeme junihin usin de tomilambi. hūsun mohoro ulin wajire oci. bigan i niyalmai boode untuhun ofi. tanggū halai irgen i fayabun. juwan ubu de nadan ubu ekiyembi. siden booi fayabun. sejen garjara. morin macure. uksin. saca. beri (279) sirdan. gijun. kalka. dalikū. amba kalka. junihin usin ihan amba sejen. juwan ubu de ninggun ubu ekiyembi. tuttu ofi mergen jiyanggiyūn bata ningge be jetere be kicembi. bata i emu jungkengge be jeci. musei orin jungkengge de teherembi. muya orho be emu gingnehen (280) oci. musei orin gingnehen de teherembi. tuttu ofi bata be warangge. jili banjibure de kai. bata i aisi be gaijarangge. ulin bahabure de kai. tuttu ofi sejen i afara de. sejen be juwan sejengge ci wesihun bahaci. neneme baha urse de šangnambi. terei temgetun kiru be (281) halambi. sejen be suwaliyaganjame baitalambi. cooha be sain i ujimbi. erebe bata be etembime ele etuhun ombi. sembi. tuttu ofi cooha etere be wesihun obumbi. goidabure be wesihun oburakū. tuttu cooha be sara jiyanggiyūn. irgen i ergen be jafahabi. gurun booi elhe (282) tuksicuke de dalahabi: afara be bodoro ilaci fiyelen. sun dz hendume. yaya cooha baitalara doro. gurun be yooni oburengge wesihun. gurun be efulerengge ilhi. giyūn cooha be yooni oburengge wesihun. giyūn cooha be efulerengge ilhi. lioi cooha be yooni oburengge wesihun. (284) lioi cooha be efulerengge ilhi. dzu cooha be yooni oburengge wesihun. dzu cooha be efulerengge ilhi u cooha be yooni oburengge wesihun. u cooha be efulerengge ilhi. tuttu ofi tanggūnggeri afafi tanggūnggeri etecibe. sain dade sain ningge waka. afarakū bime (285) niyalmai cooha be bukdaburengge. sain dade sain ningge kai. tuttu ofi wesihun cooha hebe be efulembi. terei ilhingge haji be efulembi. terei ilhingge cooha be efulembi. tereci fusihūngge hecen be afambi. hecen be afara arga. umainaci ojorakū ofi. amba kalka duin muheren (286) seye <sejen> be dasatara. agūra hajun be weilere de. ilan biya ofi teni šanggara. boihon i keremu be cirgere de. geli ilan biya ofi teni wajire be dahame. jiyanggiyūn alimbaharakū jili banjifi. yerhuwe gese necinefi. cooha urse be ilan ubu de emu ubu wabumbime. hecen be baharakūngge. (287) ere afara sui kai. tuttu ofi cooha baitalara mangga urse. niyalmai cooha be bukdaburengge. afara de akū. niyalmai hecen be gairengge. dailara de akū. niyalmai gurun be efulerengge. goidabure de akū. urunakū yooni obume abkai fejergi de temšeme ofi. tuttu cooha (288) cukurakū bime. aisi be yooni obuci ombi. ere afara be bodoro arga kai. tuttu ofi cooha baitalara doro. juwan ubu fulu oci kambi. sunja ubu fulu oci dailambi. ubui fulu oci faksalambi. tehereci afame mutembi. komso oci tuwakiyame meotembi <mutembi>. (289) isirakū oci jailame mutembi. tuttu ajige bata nukcike de. amba bata de jafabumbi kai. jiyanggiyūn serengge. gurun i aisilarangge. aisilarangge mergen oci gurun urunakū etuhun ombi. aisilarangge eberi oci gurun urunakū yadalinggū ombi. tuttu cooha i ejen de joborongge ilan. cooha dosici (290) ojorakū be sarkū bime dosi sere. cooha bedereci ojorakū be sarkū bime bedere serengge. erebe cooha be siderembi sembi. ilan giyūn coohai baita be sarkū bime. ilan giyūn coohai dasan de danaci. coohai urse hūlimbumbi. ilan giyūn coohai toose be sarkū bime. (291) ilan giyūn coohai tušan de danaci. coohai urse kenehunjembi. ilan giyūn cooha hūlimbure dade kenehunjeci. goloi beisei jobolon isinjimbi kai. erebe cooha be facuhūrabufi. etere be yarumbi sembi. tuttu ofi etere be sarangge sunja. afaci ojoro afaci ojorakū be sarangge etembi. (292) labdu komso be baitalara be ulhirengge etembi. dergi fejergi buyen adalingge etembi. belhefi belhehekū be alime gairengge etembi. jiyanggiyūn mutembime ejen ergelerakūngge etembi. ere sunja serengge. etere be sara doro kai. tuttu ofi cembe sara beyebe sara oci. tanggūnggeri. afaha (293) seme tuksicuke akū. cembe sarkū bime beyebe saci. emgeri etembi emgeri anabumbi cembe sarkū beyebe sarkū oci. afahadari urunakū tuksicuke ombi sehebi: (295) coohai arbun i duici fiyelen sun dz hendume. seibeni afara mangga urse. eteci ojorakū be neneme toktobufi. bata i eteci ojoro be aliyambi. eteci ojorakūngge beye de bi. eteci ojorongge bata de bi. tuttu afara mangga urse. eteci (296) ojorakū be toktobume mutembi. bata be urunakū eteci ojoro de isibume muterakū. tuttu ofi etere be saci ombime toktobuci ojorakū sehebi. eteci ojorakūngge tuwakiyara de kai. eteci ojorongge afara de kai. hamirakū oci tuwakiyambi. etuhun oci afambi. tuwakiyara (297) mangga urse. uyun na i fejile somime. afara mangga urse. uyun abkai dele aššame ofi. tuttu beyebe karmambime yooni eteme mutembi. etere be sarangge. geren niyalmai sarangge ci dulenderakū oci. sain dade sain ningge waka kai. afame etefi. abkai fejergi sain (298) sehengge. sain dade sain ningge waka kai. tuttu ofi beileci i solmin be tukiyerengge be. hūsun mangga seci ojorakū. šun biya be saburengge be. yasa genggiyen seci ojorakū. kiyatar sere akjan be donjirengge be. šan galbi seci ojorakū. julgei afara (299) mangga urse. sehengge. ja i etere be eterengge kai. tuttu ofi afara mangga. ursei eterengge. mergen gebu akū. baturu gungge akū ofi. tuttu terei afame etefi endeburakū ombi. endeburakūngge etere be toktobufi. emgeri gidabuhangge be eteme ofi kai. tuttu afara mangga (300) urse. gaiburakū bade ilifi. bata be gidara be ufaraburakū. tuttu ofi etere cooha oci. neneme etehe manggi teni afara be baimbi. gaibure cooha oci. neneme afaha manggi teni etere be baimbi. cooha baitalara mangga urse. doro be tuwancihiyambime fafun be karmame (301) ofi. tuttu etere gaibure dasan be toktobume mutembi. coohai doro uju de kemun sembi. jai de miyalin sembi. ilaci de ton sembi. duici de toose sembi. sunjaci de eterengge sembi. na ci kemun banjinambi. kemun ci miyalin banjinambi. miyalin ci ton banjinambi (302) ton ci toose banjinambi. toose ci eterengge banjinambi. tuttu etere cooha oci. gintoho i heni be gingnere adali. gaibure cooha oci. heni i gintoho be gingnere adali. etere ursei afara de. minggan jerun i holo de tehe muke be sendelehe adalingge. arbun de kai: (303) coohai horon i sunjaci fiyelen. sun dz hendume. yaya geren be kadalara de. komso be kadalara adali ojorongge. ubu ton de kai. geren be afara de. komso be afara adali ojorongge. arbun jilgan de kai. ilan giyūn cooha i geren be. (304) bata i baru sujame. urunakū gidaburakūngge. iletu somishūn de kai. cooha sucunaha de. wehe gaifi umhan be gidara adali ojorongge. kumdu yargiyan de kai. yaya afarangge. iletu i bakcilabumbi. somishūn i etembi. tuttu somishūn be baitalara mangga urse. abka na i adali mohon akū. ula mederi i adali (305) farakū. dubefi dahūme deriburengge. šun biyai adali. bucefi dahūme banjirengge. duin erin i adali. jilgan sunja be dulenderakū. sunja jilgan i kūbulirengge be. donjiha seme wajirakū. boco sunja be dulenderakū. sunja boco i kūbulirengge be. tuwaha seme wajirakū. amtan sunja be (306) dulenderakū. sunja amtan i kūbulirengge be. amtalaha seme wajirakū. afara horon. somishūn iletu be dulenderakū. somishūn iletu i kūbulirengge be. sibkiha seme wajirakū. somishūn iletu i ishunde banjinarangge. muheren forgošoro gese da dube akū be dahame. we sibkime (307) mutembini. cirgabuha mukei hūsun de. wehe dekdere de isinarangge. horon de kai. dasihire gasha i hūsun de. meirere <meijere> bijara de isinarangge. kemun de kai. tuttu afara mangga urse. terei horon gelecuke. terei kemun hakcin. horon uthai dabuha fitheku beri i adali. kemun (308) uthai gabtaha selmin i adali. burgin bargn i šašabume. afara de facuhūn. gojime facuhūraci ojorakū bur bar seme. arbun muheliyen gojime gidaci ojorakū. facuhūn. teksin ci banjinambi. oliha baturu ci banjinambi. yadalinggū etuhun ci banjinambi. teksin facuhūn ojorongge. (309) ton de kai. baturu oliha ojorongge horon de kai. etuhun yadalinggū ojorongge arbun de kai. tuttu ofi bata be aššabure mangga urse. arbun tuwabure de. bata urunakū necinjimbi. bure de bata urunakū gaimbi. aisi i aššabumbi. bekilefi alime gaimbi. tuttu afara (310) mangga urse. horon de baimbi. niyalma de nikeburakū ofi. tuttu [n]iyalma be sonjome horon de akdame mutembi. horon de akdaha urse. niyalmai baru afara de. moo wehe be fuhešebure adali. moo wehe i banin. elhe oci cibsen ombi. tuksicuke oci aššambi. (311) hošonggo oci ilimbi. muheliyen oci fuhešembi. tuttu ofi afara mangga niyalmai horon. minggan jerun alin ci muheliyen wehe be fuhešebure adali ojorongge. horon de kai: (313) kumdu yargiyan i ningguci fiyelen. sun dz hendume. yaya afara bade neneme bifi. bata be alime gairengge ergembi. afara bade amala sitafi. afame dosirengge suilambi. tuttu afara mangga urse. niyalma be jibumbime niyalma de yarkiyaburakū. batai (314) niyalma be ini cisui jibume muterengge. aisi be tuwabume ofi kai. batai niyalma be bahafi jiderakū obume muterengge. jobolon be tuwabume ofi kai. tuttu ofi bata ergeci suilabume mutembi. ebici omiholobume mutembi. elhe oci aššabume mutembi. ceni (315) dosinjirakūci tucimbi. ceni gūnihakūci dosimbi. minggan ba be yabumbime suilarakūngge. niyalma akū babe yabume ofi kai. afara de urunakū gaijarangge. ceni tuwakiyahakū babe afame ofi kai. tuwakiyara de urunakū akdun ojorongge. ceni afarakū babe tuwakiyame ofi kai. tuttu ofi (316) afara mangga urse. bata ceni tuwakiyara babe sarkū. tuwakiyara mangga urse. bata ceni afara babe sarkū. somishūn kai. somishūn kai. arbun akū de isinambi. ferguwecuke kai. ferguwecuke kai. jilgan akū de isinambi. tuttu bata i ergen be jafame mutembi. dosire de (317) dalici ojorakūngge. ceni kumdu be fondoloro de kai. bederere de fargaci ojorakūngge. hūdun ofi amcaci ojorakū de kai. tuttu muse afaki seci. bata udu den keremu šumin yohoron seme. umainaci ojorakū musei baru afarangge. ceni urunakū aitubure babe afara de kai. (318) muse afarakū oki seci. udu na be jijufi tuwakiyaha seme. bata musei baru bahafi afarakūngge. ceni jidere ici be farfabuha de kai tuttu ofi niyalma de arbun be tuwabumbime. muse de arbun akū oci. muse uhei bime bata faksalambi. muse (319) uhei ofi emu ombi. bata faksalafi juwan ombi. ere juwan be gaifi. emke be afaci. muse geren ombi. bata komso ombi. geren i komso be gidame muteci. musei afanarangge boljonggo kai. musei afanara babe ulhici ojorakū. ulhici ojorakū oci. bata i belherengge (320) labdu ombi. bata i belherengge labdu oci. musei afanarangge komso ombi. tuttu ofi julergi be belheci amargingge komso ombi. amargi be belheci. julergingge komso ombi. hashū ergi be belheci ici ergingge komso ombi. ici ergi be belheci hashū ergingge komso (321) ombi. belherakūngge akū oci. komso akūngge akū ombi. komso ojorongge. niyalma be belherengge kai. geren ojorongge niyalma de belheburengge kai. tuttu ofi afara ba be same. afara inenggi be same ohode. minggan baci acanjifi afaci ombi. afara ba be sarkū. afara inenggi be (322) sarkū ohode. hashū ergingge. ici ergi be aitubume muterakū. ici ergingge. hashū ergi be aitubume muterakū. julergingge amargi be aitubume muterakū. amargingge julergi be aitubume muterakū bade. gorokingge ududu juwan be. hancikingge ududu babe ai hendure. u gurun be jafafi bodoki. yuwei gurun i niyalmai (323) cooha udu labdu seme. inu etere de ai tusa ni. tuttu ofi etere be toktobuci ombi. bata udu geren seme eljeburakū oci ombi sehebi. tuttu ofi bodoho de jabšara ufarara arga be sambi. nukibuhe de. aššara cibsere giyan be sambi. (324) arbun be tuwabuha de bucere banjire ba be sambi. meljebuhe de. fulu eberi babe sambi. tuttu ofi coohai arbun be tuwabure ten. arbun akū de isinambi. arbun akū oci. jakanabure manggangge hiracame muterakū. mergen urse bodome muterakū. arbun be dahame (325) geren de etere be tuwabucibe. geren same muterakū. niyalma gemu musei etere arbun be sara gojime. musei etere be toktobure arbun be sarkū. tuttu terei afame etere be dahiburakū bime. arbun de acabure de mohon akū. coohai arbun serengge mukei (326) adali. mukei arbun. nuhu ci biyalume wasihūn ici eyembi. coohai arbun. yargiyan ci jailame kumdu be gidambi. muke na be dahame eyen banjinambi. cooha bata be dahame etere be toktobumbi. tuttu cooha de enteheme horon akū. muke de enteheme arbun akū. (327) bata be dahame kūbulifi ubaliyafi eteme muterengge be. ferguwecuke sembi. tuttu ofi sunja feten de enteheme eterengge akū. duin erin de enteheme teisu akū. šun de golmin foholon bi. biya burubumbi banjimbi: (329) giyūn coohai temšen i nadaci fiyelen sun dz hendume. yaya cooha baitalara doro. jiyanggiyūn ejen i hese be alime gaifi. geren cooha be bargiyame isabufi. kūwaran i duka bakcilame tatara be dahame. giyūn coohai temšen ci manggangge akū. giyūn (330) coohai temšen i manggangge. goro be hanci obumbi. jobolon be aisi obumbi. tuttu jugūn be goro obufi. aisi i yarkiyambi. niyalmai amala juracibe. niyalmai onggolo isinambi. ere goro hanci ojoro arga be sarangge kai. tuttu ofi giyūn cooha gaifi temšeneci aisi ombi. (331) geren gaifi temšeneci tuksicuke ombi. giyūn cooha be yooni gaifi temšeneci. amcarakū ombi. giyūn cooha be werifi aisi be temšeneci. ujen aciha waliyabumbi. uttu be dahame. uksin be uhufi dosime. inenggi dobori teyerakū. on gaime hacihiyame yabume. tanggū ba (332) surteme aisi be temšeneci. ilan coohai data jafabumbi. silin cooha juleri. eberhun cooha amala be dahame. toktofi juwan ubu de emu ubu isinambi. susai ba surteme aisi be temšeneci. dergi coohai data kokirambi. toktofi dulin isinambi. gūsin ba surteme aisi be (333) temšeneci. ilan ubu de juwe ubu isinambi. uttu be dahame. giyūn cooha de ujen aciha akū oci gukumbi. jeku jufeliyen akū oci gukumbi. iktambuha isabuhangge akū oci gukumbi. tuttu ofi goloi beisei hebe be sarkūngge. doigonde hajilame muterakū. (334) alin weji haksan hafirhūn hali omo i arbun be sarkūngge. cooha gaifi yabume muterakū. jugūn jorire gajaraci <gajarci> be baitalarakūngge. na i aisi be bahame muterakū. tuttu cooha be koimalidame mutebumbi. aisi i aššabumbi. faksalame acabume kūbulibumbi. tuttu terei (335) hahilarangge edun i adali. terei elhešerengge bujan i adali sucunara tabcilarangge tuwa i adali. aššarakūngge alin i adali. ulhire de manggangge butu i adali. aššarangge kiyatar sere akjan i adali. gašan be tabcilafi geren be faksalambi. ba na be fesheleci arbungga be (336) tuwakiyambi. tooselame aššame. goro hanci i arga be doigonde sarangge etembi. ere giyūn coohai temšen i doro kai. coohai dasan de henduhengge gisun be ishunde donjirakū ojoro jakade. tuttu tungken can be ilibuhabi. yasa ishunde saburakū ojoro jakade tuttu (337) temgetun kiru be ilibuhabi sehebi. tungken can temgetun kiru serengge. cohome niyalmai šan yasa be emu oburengge kai. niyalma emgeri cohotoi emu oho manggi. baturu urse emhun dosime muterakū. oliha urse emhun bedereme muterakū. ere geren be baitalara doro kai. (338) tuttu ofi dobori afara de. tuwa tungken be labdu obure. inenggi afara de. temgetun kiru be labdu oburengge. cohome niyalmai šan yasa be farfaburengge kai. ilan giyūn coohai sukdun be durici ombi. jiyanggiyūn i mujilen be durici ombi. uttu ofi erde i sukdun (339) etuhun. inenggi dulin i sukdun šadashūn. yamji i sukdun šoyoshūn. cooha baitalara mangga urse. tesei etuhun sukdun ci jailara. tesei šadashūn šoyoshūn be gidarangge. ere sukdun be dasarangge kai. teksin i facuhūn be alime gaire. ekisaka i curgindure be alime (340) gairengge. ere mujilen be dasarangge kai. hanciki i goroki be alime gaire. teyehun i suilara be alime gaire. ebifi omiholoro be alime gairengge. ere hūsun be dasarangge kai. cak seme teksilehe kiru be ume okdoro. sehehuri faidaha faidan be ume birere. (341) ere kūbulin be dasarangge kai. tuttu ofi cooha baitalara doro. den munggan i baru ume tafara. fisa waliyaha muhu i baru ume okdoro holtome burulara be ume sudalara. dacun coohai baru ume afara welmiyere cooha be ume sekere. bederere cooha be ume (342) heturere. horibuha cooha de jaka bure. mohoho cooha be ume fargara. ere cooha baitalara doro kai: (343) uyun kūbulin i jakūci fiyelen. sun dz hendume. yaya cooha baitalara doro. jiyanggiyūn ejen i hese be alime gaifi. geren cooha be isabume bargiyaha manggi. nuhaliyan ba oci. ume tatara. salja ba oci hūwaliyame acambi. lakcaha ba oci (344) ume indere. horire ba oci bodombi. bucere ba oci afambi. jugūn be yaburakūngge bi. cooha be gidarakūngge bi. hoton be afarakūngge bi. ba be temšerakngge bi. ejen i hese be alime gaijarakūngge bi. tuttu ofi jiyanggiyūn uyun kūbulin i aisi be hafuci. (345) cooha baitalara be sambi. jiyanggiyūn uyun kūbulin i aisi be hafurakū oci. udu na i arbun be sacibe. na i aisi be bahame muterakū ombi. coohalara de uyun kūbulin i arga be hafurakū oci. udu sunja aisi be sacibe. niyalma be (346) bahafi baitalame muterakū ombi. uttu ofi mergen ursei seolerengge. urunakū aisi jobolon be barabumbi. aisi de barabuci. faššan be sidarambuci ombi. jobolon de barabuci. kokiran be subuci ombi. uttu ofi goloi beise be bukdarangge. jobolon be (347) isibumbi. goloi beise be takūrarangge. jabšaki be bolibumbi goloi beise be surteburengge. aisi be isibumbi. tuttu ofi cooha baitalara doro. tesei jiderakū seme ume erture. muse cembe alime gaire babi. seme ertumbi. ce afanjirakū seme ume erture. (348) muse de afaci ojorakū babi seme ertumbi. tuttu ofi jiyanggiyūn de sunja tuksicuke bi. urunakū faršarangge be waci ombi. urunakū ergen guwerengge be jafaci ombi. hatan hahingge be gidašaci ombi. hanja bolgongge be girubuci ombi. irgen be gosirengge be (349) kūthūci ombi. ere sunja serengge. jiyanggiyūn i endebuku. cooha baitalara sui kai. cooha kokirara jiyanggiyūn waburengge. urunakū sunja tuksicuke haran. kimcirakūci ojorakū. (351) cooha yabure uyuci fiyelen. sun dz hendume. cooha tatara bata be cincilara de. alin be dabafi holo de nikembi. banjire de forofi deken bade tatambi. afanara ba den oci ume tafara. ere alin de cooha (352) tatarangge kai. muke be dooci urunakū muke ci aldangga obumbi. aikabade bata muke be doome jici. ume mukei dulimba de okdoro. imbe dulin doobufi gidaci aisi ombi. afaki seci. ume muke de latunafi bata be okdoro. (353) antu de forofi deken bade ilimbi. ume mukei eyen be tosoro. ere mukei bade cooha tatarangge kai. hūjuri <=hūjiri> niyo be dulere de. hūdun gene. ume jibgešere. aikabade hūjuri niyo bade cooha acaci. urunakū muke orho de nikeme. (354) mooi bujan be cashūlambi. ere hūjuri niyo de cooha tatarangge kai. šehun olhon de oci necin bade tatambime. ici ergi fisa ergi deken. juleri bucere amala banjire bade tatambi. ere šehun olhon de cooha tatarangge kai uheri ere (355) duin coohai aisi. hūwang di han duin ergi di be etehengge kai. yaya cooha. nuhu de cihangga nuhaliyan de cihakū. antu be wesihun boso be fusihūn obuhabi. luku de ujime muhu de tatame ohode. cooha de eiten nimeku (356) akū ombi. erebe urunakū eterengge sembi. muhu mungga dalan ekcin oci. urunakū antu ergide tatafi. ici ergi be cashūlambi. ere cooha i aisi. na i arbun i aisilan kai. dergi ci aga muke obonggi eyeme jidere de. dooki seci. (357) tohororo be aliyambi. yaya ba de kes sere yohoron. abkai hūcin. abkai gindana. abkai hūrhan. abkai eye. abkai yeru bihede. urunakū ekšeme gene. ume latunara. muse aldangga oci. bata hanci ombi. muse ishun oci. bata cashūn ombi. coohai dalbade (358) haksan hafirhūn omo hūcin. bujan weji šuwe <šuwa> jajuri bihede. urunakū dahūn dahūn i kiceme suwelembi. ere buksire geodelere ba kai. hanci bime cibserengge. ceni haksan de ertuhengge kai. goro bime yarkiyame afanjirengge. niyalma be ibekini serengge kai. ce sulfa bade (359) tatahangge. aisi tuwaburengge kai. geren moo i aššahangge. jiderengge kai. orho fik seme dalihangge. kenehunjeburengge kai. gasha dekdehengge. buksirengge kai. gurgu aksakangge. necinjirengge kai. buraki den bime sucunarangge. sejen i jiderengge kai. fangkala bime toron amba (360) ningge yafahan i jiderengge kai. son son i fakcahangge. moo sacirengge kai. seri bime amasi julesi yabuhangge. kūwaran ilirengge kai. gisun gocishūn bime nememe belhehengge. dosiki serengge kai. gisun etenggi bime surteme dosinjirengge. bedereki serengge kai. weihuken (361) sejen neneme tucifi. dalbade bisirengge. faidan faidarangge kai. boljohakū bime hūwaliyame acaki serengge. argandarangge kai. surtenume yabume cooha faidarangge. bolgoki serengge kai. dulin dosire dulin bedererengge. yarkiyarangge kai. teifun teifulefi ilirengge. omiholohongge kai. muke tatafi (362) neneme omirengge. kangkahangge kai. aisi be sabufi ibeme sarkūngge. suilahangge kai. gasha isarangge. untuhun ohongge kai. dobori hūlarangge. golohongge kai. cooha kūthūrengge. jiyanggiyūn ujen akūngge kai. temgetun kiru aššarangge. facuhūn ohongge kai. hafasa jilidarangge. (363) bandahangge kai. morin wafi yali jeterengge. cooha de jeku akū ohongge kai. mucen be lakiyafi amasi tatan de jiderakūngge. hūlha mohohongge kai. cu cu ca ca seme niyalmai baru elhehen i gisurerengge. geren i gūnin šahūrakangge kai. emdubei šangnarangge. (364) gacilabuhangge kai. emdubei weile ararangge. mohohongge kai. neneme doksirafi amala geren de olhorongge. narhūn akū i ten kai. jifi waka be alirengge. cooha nakaki serengge kai. cooha nukcifi okdonjire de. kejine goidafi acarakū. geli waliyafi generakūngge be. (365) urunakū olhošome kimci. cooha be fulu nonggire de akū. damu baturulame dosirakū bime. cihai hūsun be kamcire. bata be tolbire. niyalma be etere de wajihabi. terei bodohon akū bime bata be oihorilarangge. urunakū niyalma de jafabumbi. cooha hajilame (366) dayanjihakū bime weile araci. daharakū ombi. daharakū oci. baitalara de mangga ombi. cooha hajilame dayanjiha bime weile arame banjinarakū oci. baitalaci ojorakū kai. tuttu ofi šu i fafulambi. horon i teksilembi. erebe urunakū etembi sembi. selgiyen be aifini yabubufi (367) irgen be tacihiyaci irgen dahambi. selgiyen be aifini yabubuhakū bime. irgen be tacihiyaci. irgen daharakū. selgiyen be aifini yabubumbi serengge. geren i emgi gūnin acarangge kai: (369) na i arbun i juwanci fiyelen. sun dz hendume. na i arbun de. hafunurengge bi. tarangge bi. sujanurengge bi. hafirahūn ningge bi. haksan ningge bi. gorokingge bi. muse geneci ojoro. tese jici ojorongge be. hafunumbi sembi. hafunure (370) arbun serengge. neneme šun goire deken ba be ejelefi. jeku i jugūn be hafumbuha manggi. afaci aisi ombi. geneci ombi. bedereci mangga ningge be tambi sembi. tara arbun serengge. bata belhehekū de. tucici etembi. bata aikabade belhehe de. tucici (371) eterakū bime. bederere de mangga be dahame. aisi akū ombi. muse tucike de aisi akū. tese tucike de aisi akū be. sujanumbi sembi. sujanure arbun serengge. bata udu muse be bolicibe. muse ume tucire. gaifi gene. bata dulin tucike manggi. (372) gidaci. aisi ombi. hafirahūn arbun serengge. muse neneme ejelefi. urunakū funcetele obufi bata be alime gaimbi. aikabade bata neneme ejelefi. beki oci ume latunara. beki akū oci latunambi. haksan arbun serengge. muse neneme ejelembihede. urunakū šun goire (373) deken babe ejelefi. bata be alime gaimbi. aikabade bata neneme ejeleci. gaifi gene. ume latunara. goroki arbun serengge. hūsun tehereci. yarkiyame afara de mangga. afaha de aisi akū ombi. ere ninggun serengge. na i doro. jiyanggiyūn i oyonggo tušan. (374) kimcirakūci ojorakū. tuttu ofi cooha de ukarangge bi. sartaburengge bi. lifanarangge bi. ulejerengge bi. facuhūrarangge bi. burularangge bi. ere ninggun serengge. abka na i gashan waka. jiyanggiyūn i endebuku kai. hūsun teherefi. emken i juwan be gidarangge be. (375) ukambi sembi. cooha etenggi hafan eberhun be. sartabumbi sembi. hafan etenggi cooha eberhun be. lifambi sembi. ambakan hafan jilideme daharakū. bata de nukcifi cisui afanafi. jiyanggiyūn terei muten be sarkūngge be. ulejembi sembi. jiyanggiyūn yadalinggū ofi cira akū. tacibure (376) doro getuken akū. hafan cooha de toktohon akū. cooha be balai ici faidarangge be. facuhūrambi sembi. jiyanggiyūn. bata be tulbime muterakū. komso i geren de bakcilara. yadalinggū i etuhun be gidanara. cooha dacun silin akūngge be. burulambi sembi. ere ninggun serengge. (377) gaibure doro. jiyanggiyūn i oyonggo tušan. kimcirakūci ojorakū kai. na i arbun serengge. cooha de aisilarangge. bata be tulbime etere be toktobure. haksan kamni hanciki goroki be bodorongge. dergi jiyanggiyūn i doro. erebe safi afarangge. urunakū (378) etembi. erebe sarakū bime afarangge. urunakū gaibumbi. tuttu ofi afara muru urunakū etembime. ejen ume afara secibe. urunakū afaci acambi. afara muru eterakū bime. ejen urunakū afa secibe. afarakū oci acambi. tuttu dosicibe gebu gairakū. (379) bederecibe weile ci jailarakū. damu irgen be karmame. ejen de tusa ojorongge. gurun i boobai kai. cooha be ajige jusei adali tuwame ohode. tuttu terei emgi šumin holo de funtuci ombi. cooha be gosire jusei adali tuwame ohode. tuttu (380) terei emgi sasa buceci ombi. gosimbime fafulame muterakū. jiramilambime takūrame muterakū. facuhūn bime dasame muterakū ohode. duibuleci halašara jusei adali. baitalaci ojorakū kai. musei cooha gidanaci ojoro be sara gojime. bata be gidaci ojorakū be sarkū oci. dulin etembi. (381) bata be gidaci ojoro be sara gojime. musei cooha gidanaci ojorakū be sarkū oci. dulin etembi. bata be gidaci ojoro be sara. musei cooha gidanaci ojoro be sara gojime. na i arbun de afaci ojorakū be sarkū oci. dulin etembi. (382) tuttu cooha be sara urse. aššara de farfaburakū. yabure de oitoburakū. tuttu ofi cembe sara beye be sara ohode. eterengge tuksicuke akū. abka be sara na be sara ohode. eterengge yooni ombi sehebi: uyun na i juwan emuci fiyelen. sun dz hendume. cooha baitalara doro. samsire ba bi. weihuken ba bi. temšere ba bi. acara ba bi. salja ba bi. ujen ba bi. efujere ba bi. horire ba bi. bucere ba bi. goloi beise meimeni bade afarangge. (384) samsire ba inu. niyalmai bade dosinafi šumin akūngge. weihuken ba inu muse bahaci inu aisi ojoro. tese bahaci inu aisi ojorongge. temšere ba inu. muse geneci ojoro tese jici ojorongge. acara ba inu. goloi beise i ba ilan ergi de (385) hafunafi. neneme isinjifi abkai fejergi i geren be baharangge. salja ba inu. niyalmai bade šumin dosinafi. hecen hoton be labdu dulerengge. ujen ba inu. alin weji haksan mudangga hali niyo. yaya yabure de mangga jugūn serengge efujere ba inu. (386) dosinarangge hafirahūn. bedererengge gorokon. tesei komso i musei geren be gidaci ojorongge. horire ba inu. ekšeme afaci taksire. ekšeme afarakū oci gukurengge. bucere ba inu. uttu be dahame samsire ba oci ume afara. weihuken ba oci ume ilinjara. (387) temšere ba oci ume dosire. acara ba oci ume lakcara. salja ba oci hūwaliyame acambi. ujen ba oci tabcilambi. efujere ba oci genembi. horire ba oci argadambi. bucere ba oci faršambi. julgei cooha baitalara mangga sehe urse. bata i (388) cooha be julergi amargi ishunde daci ojorakū. komso geren ishunde ertuci ojorakū. wesihun fusihūn ishunde aitubuci ojorakū. dergi fejergi ishunde bargiyataci ojorakū. cooha samsifi isabuci ojorakū. cooha acacibe teksin akū obume mutembi. aisi de (389) acanaci aššambi. aisi de acanarakū oci. nakambi. gelhun akū fonjiki. bata geren teksin bime jiderengge be. adarame alime gaimbi. hendume. ceni buyehe babe neneme durime gaici. dahambi kai coohai muru hahilarangge wesihun. niyalmai jabdurakū be tuwame. gūnihakū (390) jugūn ci. belhehekū babe afambi. yaya antaha ojoro doro. šumin dosici cohotoi ofi. boigoji cooha eterakū ombi. elgiyen bade tabcilaci. ilan giyūn cooha coohai jeku tesumbi. saikan ujimbime ume suilabure. horon be isabume hūsun be bargiyame. (391) cooha baitalara arga bodogon be. tulbici ojorakū obume. geneci ojorakū bade isibume ohode. buceci bucekini burularakū ombi. buceci adarame baharakū ni. cooha niyalma hūsun akūmbumbi. cooha urse umesi lifanaci. olhorakū ombi. genere ba akū oci. bekilembi. (392) šumin dosici. bargiyambi. umainaci ojorakū oci iselambi <iselembi>. uttu ofi cooha be teksilerakū bime. olhošombi. bairakū bime bahambi. bargiyatarakū bime hajilambi. fafularakū bime akdambi. ganiongga be šajilame buhiyecun be nakabuci. bucetele generakū ombi. musei cooha de ulin funcerakūngge. (393) jaka be hihalarakūngge waka. ergen funcerakūngge. jalgan be hairarakūngge waka. fafun selgiyehe inenggi ci. tecehe cooha oci. yasai muke adasun usihimbi. deducehe urse oci. yasai muke dere de jalumbi. genere ba akū bade isibuci. juwan ju. tsoo gui i (394) baturu ombi. tuttu ofi cooha baitalara mangga urse be. duibuleci šuwai žan i adali. šuwai žan serengge. cang šan alin i meihe ini uju be forici. uncehen danjimbi. ini uncehen be forici. uju danjimbi. ini darama be forici. uju uncehen yooni (395) danjimbi. gelhun akū fonjiki. šuwai žan i adali obuci ombio. hendume ombi. u gurun i niyalma yuwei gurun i niyalmai baru kimuntuhebi. emu jahūdai de tefi. muke doore de edun ucaraci. tese ishunde aituburengge. hashū ici ergi gala i adali ombi. (396) uttu ofi morin be hūwaitaha muheren be umbuha seme. ertuci ojorakū. teksin baturu emu oci. dasan i doro kai. ganggan genggen de yooni acanaci. na i giyan kai. tuttu cooha baitalara mangga urse. gala jafafi emu niyalma be takūrara (397) adali. umainaci ojorakū ombi kai. jiyanggiyūn i baita. cib seme somishūn. tob seme teksin. coohai ursei šan yasa be farfabufi. ulhirakū obume. baita kūbulifi. arga halafi. niyalma de sereburakū obume. tatan gurifi. on mudalifi. niyalma de gūnin bahaburakū obume. (398) mutembi. yuwanšuwai i boljohongge. den de tafambufi wan be ganara adali. yuwanšuwai goloi beise i bade šumin dosifi. songgiha be uksalaburengge. geren honin be bošoro adali. bošofi geneme. bošofi jime. absi ojoro be sarkū. ilan giyūn cooha i geren be (399) gaifi. haksan de isibumbi. ere jiyanggiyūn i baita kai. uyun na i kūbulin. ikūre saniyara aisi. niyalmai gūnin i giyan be kimcirakūci ojorakū. yaya antaha coohai doro. šumin dosici cohotoi ombi. cinggiya dosici samsimbi. gurun ci aljafi jecen be dulefi (400) coohalarangge. lakcaha ba kai. duin ergi de hafunarangge. salja ba kai. šumin dosikangge. ujen ba kai. cinggiya dosikangge. weihuken ba kai fisa ergi beki julergi hafirahūn ningge. horire ba kai. genere ba akūngge. bucere ba kai. uttu ofi samsire ba (401) oci. bi tesei gūnin be emu obumbi. weihuken ba oci. bi tesebe falibumbi. temšere ba oci. bi tesei amargi ci dosimbi. acara ba oci. bi tuwakiyara be olhošombi. salja ba oci. bi hajilame falimbi. ujen ba oci. bi jeku be sirabumbi. (402) efujehe ba oci. bi on gaime dosimbi. horire ba oci. bi funtuhulehe be simbi. bucere ba oci. bi banjirakū be tuwabumbi. tuttu ofi coohai gūnin. hūrbuci <horibuci> fondolombi. oitobuci iselembi. hafirabuci dahambi. uttu ofi goloi beise i hebe be sarkūngge. (403) doigonde hajilame muterakū. alin weji haksan mudangga hali niyo i arbun be sarkūngge. cooha gaifi yabume muterakū. gajarci jugūn jorirengge be baitalarakūngge. na i aisi be baharakū. duin sunja be emke sarkū oci. da ojoro han ojoro cooha waka kai. (404) da ojoro han ojoro cooha amba gurun be dailaci. tesei geren bahafi isarakū. bata de horon tuwabuci. tesei haji bahafi acarakū. uttu ofi abkai fejergi i hajilaha be lashalame. abkai fejergi i toose be durime. beyei gūnin sidarame. bata de horon tuwabure jakade. (405) tuttu hoton be gaici ohobi. gurun be efuleci ohobi. kooli ci tulgiyen šangnahan be isibumbi. dasan ci tulgiyen fafun be ulhibume selgiyembi. ilan giyūn cooha i geren be baitalarangge. emu niyalma be unggire adali. baita i afabumbi. turgun be alarakū. aisi i (406) dosimbumbi. jobolon be alarakū. gukure bade šukiha manggi. teni taksimbi. bucere bade lifabuha manggi. teni banjimbi. geren be jobolon de lifabuha manggi. teni etebume gidabume mutembi. coohalara baita. bata i gūnin de acabure be narhūšafi. uhei hūsun i emgeri ibehe de. (407) minggan ba i jiyanggiyūn be waci ombi. erebe faksikan i baita be mutebuhe sembi. uttu ofi cooha tucire inenggi ci. furdan be yaksifi acangga temgetu be efulefi. mejige be hafumburakū. mafari juktehen de fafulafi. baita be nikebumbi. bata de jaka šolo bici. uthai hūdun (408) dosifi. tesei buyehe babe. inenggi boljorakū neneme gaimbi. kooli be dahame bata be tuwame. afara baita be lashalambi. uttu ofi tuktan de sargan jusei gese oci. bata jaka tucinjimbi. amala ukcaha golmahūn i gese oci. bata sujame jabdurakū ombi: (409) tuwa i afara juwan juweci fiyelen. sun dz hendume. tuwa i afarangge uheri sunja hacin bi. uju de niyalma be deijimbi. jai de isabuhangge be deijimbi. ilaci de aciha be deijimbi. duici de coohai namun be deijimbi. (410) sunjaci de agūra faidan be deijimbi sembi. tuwa sindafi deijire de urunakū ildun bi. tuwa sindara jaka be urunakū doigonde belhebumbi. tuwa sindara de iin <erin> bi. tuwa dekdere de inenggi bi. erin serengge. abkai olhon ucuri be kai. (411) inenggi serengge. biya girha bikita imhe jeten i oron de bisire be kai. ere duin tokdon serengge. edun dekdere inenggi kai. yaya tuwa i afarangge. urunakū sunja tuwa i kūbulika be dahame acabumbi. dorgi de tuwa sindaci. uthai tulergi ci (412) erdeken i acabumbi. tuwa sindaha bime tesei cooha cibsen oci. aliyambi ume afara. tuwa i gūrgin yendeci. dosici oci dosimbi. dosici ojorakū oci nakambi. tulergi de tuwa sindaci ombime. dorgingge be aliyarakū oci. ucuri be tuwame sindambi. edun i (413) dergi ci tuwa daci. edun i fejergi be ume afara. inenggi edun kejine daha de. dobori ome edun nakambi. yaya cooha de urunakū sunja tuwa i kūbulin be safi. ton be tuwame seremšembi. tuttu ofi tuwa i afara de aisilarangge genggiyen. muke i (414) afara de aisilarangge etuhun. muke lashalaci ombi. durici ojorakū. afafi etehe dosifi gaiha bime. ceni gungge be ilgarakūngge ehe. fayambi sirkedembi sembi. tuttu ofi genggiyen ejen seolembi. mergen jiyanggiyūn dasambi sehebi. aisi waka oci aššarakū. (415) baharangge waka oci baitarakū. tuksicukengge waka oci afarakū. ejen jili de cooha tucici ojorakū. jiyanggiyūn korsocun de afanaci ojorakū. aisi de acanaci aššambi. aisi de acanarakū oci nakambi. jili be dahūme urgunjebuci ombi. korsocun be (416) dahūme selabuci ombi. gukuhe gurun be dahūme taksibuci ojorakū. bucehengge be dahūme weijubuci ojorakū. tuttu ofi genggiyen ejen olhošombi. mergen jiyanggiyūn targambi. sehebi. ere gurun be elhe obure cooha be yooni obure doro kai: (417) jakanaburengge be baitalara juwan ilaci fiyelen. sun dz hendume. juwan tumen cooha ilifi. minggan bade tuwancihiyanaci. tanggū halai irgen i fayabure. siden booi baitalara de. inenggidari minggan yan baibumbi. dorgi tulergingge burgišame. jugūn (418) tala de šadame. usin bahafi weilerakūngge. nadanju tumen boo. ududu aniya tuwakiyandufi. emu inenggi i etere be temšembime. tanggū yan menggun i hafan fulun be hairame. bata i turgun be sarkūngge. gosin akū i ten. (419) niyalmai jiyanggiyūn waka. ejen i aisilarangge waka. etere da waka kai. tuttu ofi genggiyen ejen mergen jiyanggiyūn i aššara de niyalma be eteme. gungge be mutebume. geren ci colgorokongge. doigonde saha de kai. doigonde sarangge. hutu (420) enduri de jalbarime bahabuci ojorakū baita de murušenci ojorakū. ton de jargiyalaci ojorakū. urunakū niyalma de akdafi. bata i turgun be sara de kai. tuttu ofi jakanaburengge be baitalara de sunja hacin bi. gašan i jakanaburengge bi. (421) dorgi jakanaburengge bi. fudarame jakanaburengge bi. buceme jakanaburengge bi. banjime jakanaburengge bi. sunja jakanaburengge be yooni deribure de. terei doro be ulhirakū. erebe ferguwecuke hergin. ejen oho niyalmai boobai sembi. gašan i jakanabumbi serengge tesei gašan i niyalmai ildun de (422) baitalara be dorgi jakanabumbi serengge. tesei hafan i ildun de baitalara be. fudarame jakanabumbi serengge. bata i jakanaburengge be baitalara be. buceme jakanabumbi serengge. tulergi de holo baita yabufi. musei jakanaburengge de ulhibufi. bata i gurun de ulame alara be kai. (423) banjime jakanabumbi serengge. amasi boolanjibure be kai. tuttu ofi ilan giyūn i coohai baita oci jakanaburengge ci hajingge akū. šangnaha oci jakanaburengge ci jiramin ningge akū. baita oci jakanaburengge ci somishūn ningge akū. enduringge mergen waka oci. jakanaburengge be (424) baitalame muterakū. gosin jurgan waka oci. jakanaburengge be takūrame muterakū. narhūn ferguwecuke waka oci. jakanaburengge i yargiyan be bahame muterakū. narhūn kai. narhūn kai. jakanaburengge be baitalarakū ba akū. jakanabure baita be deribure unde de firgembuci. donjihangge (425) alahangge be gemu bucebumbi. yaya cooha be gidaki. hecen be gaiki. niyalma be waki seci. urunakū ceni tuwakiyara coohai data. hashū ici ergi urse. boigojilabure niyalma. dukai niyalma takūrabure niyalma i gebu hala be doigonde saci acara be dahame. musei (426) jakanaburengge be unggifi. urunakū fujurulabume sambi. bata i jakanaburengge jifi muse be jakanabure be urunakū fujurulafi. ereci aisi i dosimbume. yarufi tebume ohode. tuttu fudarame jakanaburengge be bahafi takūraci ombi. ede akdafi saha de. tuttu gašan i (427) jakanaburengge dorgi jakanaburengge be bahafi takūraci ombi. ede akdafi saha de. tuttu buceme jakanaburengge holo baita yabufi. bata de alanabuci ombi. ede akdafi saha de. tuttu banjime jakanaburengge be. boljoho songkoi obuci ombi. sunja jakanabure baita be. (428) ejen urunakū saci acambi. urunakū fudarame jakanabure de bisire be safi. tuttu fudarame jakanaburengge be jiramilarakūci ojorakū kai. seibeni yen gurun i mukdekengge. i jy hiya gurun de bihe de kai. jeo gurun i mukdekengge. lioi ya šang gurun de bihe de kai. (429) tuttu ofi genggiyen ejen sain jiyanggiyūn umesi mergen urse be jakanabure de baitalame bahanarangge. urunakū amba gungge be mutebumbi. ere coohai oyonggo. ilan giyūn cooha i akdafi aššarangge kai: