ᠮᠠᠨᠵᡠ ᡤᡠᡵᡠᠨ ᡳ ᡩᠠ᠈ ᡤᠣᠯᠮᡳᠨ ᡧᠠᠩᡤᡳᠶᠠᠨ ᠠᠯᡳᠨ ᡳ ᡧᡠᠨ ᡩᡝᡴᡩᡝᡵᡝ ᡝᡵᡤᡳ ᠪᡠᡴᡡᡵᡳ ᡤᡝᠪᡠᠩᡤᡝ ᠠᠯᡳᠨ᠈ ᠪᡠᠯᡥᡡᡵᡳ ᡤᡝᠪᡠᠩᡤᡝ ᠣᠮᠣᠴᡳ ᡨᡠᠴᡳᡴᡝ᠉ ᡨᡝᡵᡝ ᠪᡠᡴᡡᡵᡳ ᠠᠯᡳᠨ ᡳ ᡩᠠᡩᡝ ᠪᡳᠰᡳᡵᡝ ᠪᡠᠯᡥᡡᡵᡳ ᠣᠮᠣᡩᡝ ᠠᠪᡴᠠᡳ ᠰᠠᡵᡤᠠᠨ ᠵᡠᡳ ᡝᠩᡤᡠᠯᡝᠨ᠈ ᠵᡝᠩᡤᡠᠯᡝᠨ᠈ ᡶᡝᡴᡠᠯᡝᠨ ᡳᠯᠠᠨ ᠨᠣᡶᡳ ᡝᠪᡳᡧᡝᠮᡝ ᠵᡳᡶᡳ ᠮᡠᡴᡝ ᠴᡳ ᡨᡠᠴᡳᡶᡳ ᡝᡨᡠᡴᡠ ᡝᡨᡠᡴᡳ ᠰᡝᡵᡝ ᡩᡝ᠈ ᡶᡳᠶᠠᠩᡤᡡ ᠰᠠᡵᡤᠠᠨ ᠵᡠᡳ ᡝᡨᡠᡴᡠᡳ ᡩᡝᠯᡝ ᡝᠨᡩᡠᡵᡳ ᠰᠠᡴᠰᠠᡥᠠ ᡳ ᠰᡳᠨᡩᠠᡥᠠ ᡶᡠᠯᡤᡳᠶᠠᠨ ᡨᡠᠪᡳᡥᡝ ᠪᡝ ᠪᠠᡥᠠᡶᡳ ᠨᠠ ᡩᡝ ᠰᡳᠨᡩᠠᠴᡳ ᡥᠠᡳᡵᠠᠮᡝ ᠠᠩᡤᠠ ᡩᡝ ᠠᡧᡠᡶᡳ ᡝᡨᡠᡴᡠ ᡝᡨᡠᡵᡝ ᡩᡝ᠈ ᠠᡧᡠᡴᠠ ᡨᡠᠪᡳᡥᡝ ᠪᡳᠯᡥᠠ ᡩᡝ ᡧᡠᠸᡝ ᡩᠣᠰᡳᡶᡳ᠈ ᡤᠠᡳᡨᠠᡳ ᠠᠨᡩᠠᠨᡩᡝ ᠪᡝᠶᡝ ᡩᡝ ᠣᡶᡳ᠈ ᠸᡝᠰᡳᡥᡠᠨ ᡤᡝᠨᡝᠴᡳ ᠣᠵᠣᡵᠠᡴᡡ᠉ ᡥᡝᠨᡩᡠᠮᡝ᠈ ᠮᡳᠨᡳ ᠪᡝᠶᡝ ᡴᡠᡧᡠᠨ ᠣᡥᠣᠪᡳ᠈ ᠠᡩᠠᡵᠠᠮᡝ ᡨᡠᡨᠠᡵᠠ ᠰᡝᡥᡝ ᠮᠠᠩᡤᡳ᠈ ᠵᡠᠸᡝ ᡝᠶᡠᠨ ᡥᡝᠨᡩᡠᠮᡝ᠈ ᠮᡠᠰᡝ ᠯᡳᠩᡩᠠᠨ ᠣᡴᡨᠣ ᠵᡝᡴᡝᠪᡳᡥᡝ᠈ ᠪᡠᠴᡝᡵᡝ ᡴᠣᠣᠯᡳ ᠠᡴᡡ᠈ ᠰᡳᠨᡩᡝ ᡶᡠᠯᡳᠩᡤᠠ ᠪᡳᡶᡳ ᡴᡠᡧᡠᠨ ᠣᡥᠣᠪᡳᡩᡝᡵᡝ᠈ ᠪᡝᠶᡝ ᠸᡝᡳᡥᡠᡴᡠᠨ ᠣᡥᠣ ᠮᠠᠩᡤᡳ᠈ ᠵᡳᠣ ᠰᡝᠮᡝ ᡥᡝᠨᡩᡠᡶᡳ ᡤᡝᠨᡝᡥᡝ᠉ ᡶᡝᡴᡠᠯᡝᠨ ᡨᡝᡵᡝᠴᡳ ᡠᡨᡥᠠᡳ ᡥᠠᡥᠠ ᠵᡠᡳ ᠪᠠᠨᠵᡳᡥᠠ᠈ ᠠᠪᡴᠠ ᡳ ᡶᡠᠯᡳᠩᡤᠠᡳ ᠪᠠᠨᠵᡳᠪᡠᡥᠠ ᠵᡠᡳ ᠣᡶᡳ ᡠᡨᡥᠠᡳ ᡤᡳᠰᡠᡵᡝᠮᠪᡳ᠈ ᡤᠣᡳᡩᠠᡥᠠ ᠠᡴᡡ ᠠᠮᠪᠠᡴᠠᠨ ᠣᡥᠣ ᠮᠠᠩᡤᡳ ᡝᠮᡝ ᡥᡝᠨᡩᡠᠮᡝ᠈ ᠵᡠᡳ ᠰᡳᠮᠪᡝ ᠠᠪᡴᠠ ᡶᠠᠴᡠᡥᡡᠨ ᡤᡠᡵᡠᠨ ᠪᡝ ᡩᠠᠰᠠᠮᡝ ᠪᠠᠨᠵᡳᡴᡳᠨᡳ ᠰᡝᠮᡝ ᠪᠠᠨᠵᡳᠪᡠᡥᠠᠪᡳ᠈ ᠰᡳ ᡤᡝᠨᡝᡶᡳ ᡶᠠᠴᡠᡥᡡᠨ ᡤᡠᡵᡠᠨ ᠪᡝ ᡩᠠᠰᠠᠮᡝ ᡨᠣᡴᡨᠣᠪᡠᠮᡝ ᠪᠠᠨᠵᡳ ᠰᡝᠮᡝ ᡥᡝᠨᡩᡠᡶᡳ ᠠᠪᡴᠠ ᡳ ᡶᡠᠯᡳᠩᡤᠠᡳ ᠪᠠᠨᠵᡳᠪᡠᡥᠠ ᡨᡠᡵᡤᡠᠨ ᠪᡝ ᡤᡳᠶᠠᠨ ᡤᡳᠶᠠᠨ ᡳ ᡨᠠᠴᡳᠪᡠᡶᡳ ᠸᡝᡳᡥᡠ ᠪᡠᡶᡳ ᡝᡵᡝ ᠪᡳᡵᠠ ᠪᡝ ᠸᠠᠰᡳᠮᡝ ᡤᡝᠨᡝ ᠰᡝᡶᡳ᠈ ᡝᠮᡝ ᡠᡨᡥᠠᡳ ᠠᠪᡴᠠ ᡩᡝ ᠸᡝᠰᡳᡴᡝ᠉
ᡨᡝᡵᡝᠴᡳ ᡨᡝᡵᡝ ᠵᡠᡳ ᠸᡝᡳᡥᡠ ᡩᡝ ᡨᡝᡶᡳ ᡝᠶᡝᠨ ᠪᡝ ᡩᠠᡥᠠᠮᡝ ᠸᠠᠰᡳᠮᡝ ᡤᡝᠨᡝᡥᡝᡳ᠉ ᠮᡠᡴᡝ ᠵᡠᠸᡝᡵᡝ ᡩᠣᡤᠣᠨ ᡩᡝ ᡳᠰᡳᠨᠠᡶᡳ᠈ ᡩᠠᠯᡳᠨ ᡩᡝ ᠠᡴᡡᠨᠠᡶᡳ᠈ ᠪᡠᡵᡥᠠ ᠪᡝ ᠪᡠᡴᡩᠠᡶᡳ᠈ ᠰᡠᡳᡥᠠ ᠪᡝ ᠰᡠᠵᠠᡶᡳ ᠮᡠᠯᠠᠨ ᠠᡵᠠᡶᡳ᠈ ᠮᡠᠯᠠᠨ ᡳ ᡩᡝᠯᡝ ᡨᡝᡶᡳ ᠪᡳᠰᡳᡵᡝ ᡩᡝ᠈ ᡨᡝᡵᡝ ᡶᠣᠨᡩᡝ᠈ ᡨᡝᡵᡝ ᠪᠠᡳ ᡳᠯᠠᠨ ᡥᠠᠯᠠᡳ ᠨᡳᠶᠠᠯᠮᠠ ᡤᡠᡵᡠᠨ ᡩᡝ ᡝᠵᡝᠨ ᠣᠵᠣᡵᠣ ᠪᡝ ᡨᡝᠮᡧᡝᠨᡠᠮᡝ ᡳᠨᡝᠩᡤᡳ ᡩᠠᡵᡳ ᠪᡝᠴᡝᠨᡩᡠᠮᡝ ᠠᡶᠠᠨᡩᡠᠮᡝ ᠪᡳᠰᡳᡵᡝᡩᡝ᠈ ᡝᠮᡠ ᠨᡳᠶᠠᠯᠮᠠ ᠮᡠᡴᡝ ᡤᠠᠨᠠᠮᡝ ᡤᡝᠨᡝᡶᡳ᠈ ᡨᡝᡵᡝ ᠵᡠᡳ ᠪᡝ ᠰᠠᠪᡠᡶᡳ ᡶᡝᡵᡤᡠᠸᡝᠮᡝ ᡨᡠᠸᠠᡶᡳ᠈ ᠠᠮᠠᠰᡳ ᠵᡳᡶᡳ ᠪᡝᠴᡝᠨᡩᡠᡵᡝ ᠪᠠᡩᡝ ᡳᠰᠠᡥᠠ ᡤᡝᡵᡝᠨ ᡳ ᠪᠠᡵᡠ ᠠᠯᠠᠮᡝ᠈ ᠰᡠᠸᡝ ᠪᡝᠴᡝᠨᡩᡠᡵᡝ ᠪᡝ ᠨᠠᡴᠠ᠈ ᠮᡠᠰᡝᡳ ᠮᡠᡴᡝ ᡤᠠᠨᠠᡵᠠ ᡩᠣᡤᠣᠨ ᡩᡝ ᡩᡝᠮᠪᡝᡳ ᡶᡝᡵᡤᡠᠸᡝᠴᡠᡴᡝ ᡶᡠᠯᡳᠩᡤᠠ ᠪᠠᠨᠵᡳᡥᠠ ᡝᠮᡠ ᡥᠠᡥᠠ ᠵᡠᡳ ᠵᡳᡶᡳ ᡨᡝᡥᡝᠪᡳ ᠰᡝᠮᡝ ᠠᠯᠠᡥᠠ ᠮᠠᠩᡤᡳ᠈ ᠪᡝᠴᡝᠨᡩᡠᡵᡝ ᠪᠠᡩᡝ ᡳᠰᡳᡥᠠ ᡤᡝᡵᡝᠨ ᠨᡳᠶᠠᠯᠮᠠ ᡤᡝᠮᡠ ᡤᡝᠨᡝᡶᡳ ᡨᡠᠸᠠᠴᡳ᠈ ᠶᠠᠯᠠ ᡶᡝᡵᡤᡠᠸᡝᠴᡠᡴᡝ ᡶᡠᠯᡳᠩᡤᠠ ᠵᡠᡳ ᠮᡠᠵᠠᠩᡤᠠ᠈ ᡤᡝᡵᡝᠨ ᡤᡝᠮᡠ ᡶᡝᡵᡤᡠᠸᡝᠮᡝ ᡶᠣᠨᠵᡳᠮᡝ᠈ ᡝᠨᡩᡠᡵᡳᠩᡤᡝ ᠵᡠᡳ ᠰᡳ ᠠᡳᠨᠠᡥᠠ ᠨᡳᠶᠠᠯᠮᠠ᠈ ᡨᡝᡵᡝ ᠵᡠᡳ ᡳᠨᡳ ᡝᠮᡝᡳ ᡨᠠᠴᡳᠪᡠᡥᠠ ᡤᡳᠰᡠᠨ ᡳ ᠰᠣᠩᡴᠣᡳ ᠠᠯᠠᠮᡝ᠈ ᠪᡳ ᠠᠪᡴᠠᡳ ᡝᠨᡩᡠᡵᡳ ᠪᡳᡥᡝ᠈ ᠪᡠᡴᡡᡵᡳ ᠠᠯᡳᠨ ᡳ ᡩᠠᡩᡝ ᠪᡳᠰᡳᡵᡝ ᠪᡠᠯᡥᡡᡵᡳ ᠣᠮᠣ ᡩᡝ ᠠᠪᡴᠠᡳ ᠰᠠᡵᡤᠠᠨ ᠵᡠᡳ ᡝᠩᡤᡠᠯᡝᠨ᠈ ᠵᡝᠩᡤᡠᠯᡝᠨ᠈ ᡶᡝᡴᡠᠯᡝᠨ ᡳᠯᠠᠨ ᠨᠣᡶᡳ ᡝᠪᡳᡧᡝᠮᡝ ᠵᡳᡥᡝ ᠪᡳᡥᡝ᠈ ᠠᠪᡴᠠᡳ ᡥᠠᠨ ᠰᡠᠸᡝᠨᡳ ᡶᠠᠴᡠᡥᡡᠨ ᠪᡝ ᠰᠠᡶᡳ ᡤᡠᡵᡠᠨ ᠪᡝ ᡨᠣᡴᡨᠣᠪᡠᡴᡳᠨᡳ ᠰᡝᠮᡝ ᠮᡳᠨᡳ ᠪᡝᠶᡝ ᠪᡝ ᡶᡠᠯᡤᡳᠶᠠᠨ ᡨᡠᠪᡳᡥᡝ ᠣᠪᡠᡶᡳ ᡝᠮᡠ ᡝᠨᡩᡠᡵᡳ ᠪᡝ ᠰᠠᡴᠰᠠᡥᠠ ᡳ ᠪᡝᠶᡝ ᡠᠪᠠᠯᡳᠶᠠᠮᠪᡠᡶᡳ ᡶᡠᠯᡤᡳᠶᠠᠨ ᡨᡠᠪᡳᡥᡝ ᠪᡝ ᡤᠠᠮᠠᡶᡳ᠈ ᠪᡠᠯᡥᡡᡵᡳ ᠣᠮᠣ ᡩᡝ ᡝᠪᡳᡧᡝᠮᡝ ᡤᡝᠨᡝᡥᡝ᠈ ᡶᡳᠶᠠᠩᡤᡡ ᠰᠠᡵᡤᠠᠨ ᠵᡠᡳ ᡝᡨᡠᡴᡠ ᡩᡝ ᠰᡳᠨᡩᠠᡶᡳ ᠵᡳᠣ ᠰᡝᠮᡝ ᡨᠠᡴᡡᡵᠠᡶᡳ᠈ ᡨᡝᡵᡝ ᡝᠨᡩᡠᡵᡳ ᠰᠠᡴᠰᠠᡥᠠ ᡶᡠᠯᡤᡳᠶᠠᠨ ᡨᡠᠪᡳᡥᡝ ᠪᡝ ᠰᠠᡳᡶᡳ ᡤᠠᠵᡳᡶᡳ ᡶᡳᠶᠠᠩᡤᡡ ᠰᠠᡵᡤᠠᠨ ᠵᡠᡳ ᡝᡨᡠᡴᡠᡳ ᡩᡝᠯᡝ ᠰᡳᠨᡩᠠᡶᡳ᠈ ᡶᡳᠶᠠᠩᡤᡡ ᠰᠠᡵᡤᠠᠨ ᠵᡠᡳ ᠮᡠᡴᡝ ᠴᡳ ᡨᡠᠴᡳᡶᡳ ᡝᡨᡠᡴᡠ ᡝᡨᡠᡴᡳ ᠰᡝᡵᡝᡩᡝ᠈ ᡨᡝᡵᡝ ᡨᡠᠪᡳᡥᡝ ᠪᡝ ᠪᠠᡥᠠᡶᡳ ᠨᠠ ᡩᡝ ᠰᡳᠨᡩᠠᠴᡳ ᡥᠠᡳᡵᠠᠮᡝ ᠠᠩᡤᠠ ᡩᡝ ᠠᡧᡠᡶᡳ᠈ ᠪᡳᠯᡥᠠ ᡩᡝ ᡩᠣᠰᡳᡶᡳ ᠪᡳ ᠪᠠᠨᠵᡳᡥᠠ᠈ ᠮᡳᠨᡳ ᡝᠮᡝ ᠠᠪᡴᠠᡳ ᠰᠠᡵᡤᠠᠨ ᠵᡠᡳ᠈ ᡤᡝᠪᡠ ᡶᡝᡴᡠᠯᡝᠨ᠈ ᠮᡳᠨᡳ ᡥᠠᠯᠠ ᠠᠪᡴᠠ ᠴᡳ ᠸᠠᠰᡳᡴᠠ ᠠᡳᠰᡳᠨ ᡤᡳᠣᡵᠣ᠈ ᡤᡝᠪᡠ ᠪᡠᡴᡡᡵᡳ ᠶᠣᠩᡧᠣᠨ ᠰᡝᠮᡝ ᠠᠯᠠᡥᠠ ᠮᠠᠩᡤᡳ᠈ ᡤᡝᡵᡝᠨ ᡤᡝᠮᡠ ᡶᡝᡵᡤᡠᠸᡝᠮᡝ ᡝᡵᡝ ᠵᡠᡳ ᠪᡝ ᠶᠠᡶᠠᡥᠠ ᡤᠠᠮᠠᡵᠠ ᠵᡠᡳ ᠸᠠᡴᠠ ᠰᡝᠮᡝ᠈ ᠵᡠᠸᡝ ᠨᡳᠶᠠᠯᠮᠠᡳ ᡤᠠᠯᠠ ᠪᡝ ᡳᠰᡥᡠᠨᡩᡝ ᠵᠣᠣᠯᠠᠮᡝ ᠵᠠᡶᠠᡶᡳ ᡤᠠᠯᠠᡳ ᡩᡝᠯᡝ ᡨᡝᠪᡠᡶᡳ ᠪᠣᠣ ᡩᡝ ᡤᠠᠮᠠᡶᡳ᠈ ᡳᠯᠠᠨ ᡥᠠᠯᠠᡳ ᠨᡳᠶᠠᠯᠮᠠ ᠠᠴᠠᡶᡳ ᡥᡝᠪᡩᡝᠮᡝ ᠮᡠᠰᡝ ᡤᡠᡵᡠᠨ ᡩᡝ ᡝᠵᡝᠨ ᠣᠵᠣᡵᠣ ᠪᡝ ᡨᡝᠮᡧᡝᡵᡝᠩᡤᡝ ᠨᠠᡴᠠᡴᡳ᠈ ᡝᡵᡝ ᠵᡠᡳ ᠪᡝ ᡨᡠᡴᡳᠶᡝᡶᡳ ᠮᡠᠰᡝᡳ ᡤᡠᡵᡠᠨ ᡩᡝ ᠪᡝᡳᠯᡝ ᠣᠪᡠᡶᡳ ᠪᡝᡵᡳ ᡤᡝᡤᡝ ᠪᡝ ᠰᠠᡵᡤᠠᠨ ᠪᡠᡴᡳ ᠰᡝᠮᡝ ᡤᡳᠰᡠᡵᡝᡶᡳ᠈ ᡠᡨᡥᠠᡳ ᠪᡝᡵᡳ ᡤᡝᠪᡠᠩᡤᡝ ᠰᠠᡵᡤᠠᠨ ᠵᡠᡳ ᠪᡝ ᠰᠠᡵᡤᠠᠨ ᠪᡠᡶᡳ ᡤᡠᡵᡠᠨ ᡩᡝ ᠪᡝᡳᠯᡝ ᠣᠪᡠᡥᠠ᠈ ᠪᡠᡴᡡᡵᡳ ᠶᠣᠩᡧᠣᠨ ᡧᠠᠩᡤᡳᠶᠠᠨ ᠠᠯᡳᠨ ᡳ ᡧᡠᠨ ᡩᡝᡴᡩᡝᡵᡝ ᡝᡵᡤᡳ ᠣᠮᠣᡥᠣᡳ ᡤᡝᠪᡠᠩᡤᡝ ᠪᡳᡤᠠᠨ ᡳ ᠣᡩᠣᠯᡳ ᡤᡝᠪᡠᠩᡤᡝ ᡥᡝᠴᡝᠨ ᡩᡝ ᡨᡝᡶᡳ ᡶᠠᠴᡠᡥᡡᠨ ᠪᡝ ᡨᠣᡴᡨᠣᠪᡠᡶᡳ᠈ ᡤᡠᡵᡠᠨ ᡳ ᡤᡝᠪᡠ ᠪᡝ ᠮᠠᠨᠵᡠ ᠰᡝᡥᡝ᠈ ᡨᡝᡵᡝ ᠮᠠᠨᠵᡠ ᡤᡠᡵᡠᠨ ᡳ ᡩᠠ ᠮᠠᡶᠠ ᡳᠨᡠ᠉ ᡨᡝᡵᡝᠴᡳ ᡠᡩᡠᡩᡠ ᠵᠠᠯᠠᠨ ᠣᡥᠣ ᠮᠠᠩᡤᡳ᠈ ᠠᠮᠠᠯᠠ ᠪᠠᠨᠵᡳᡵᡝ ᠵᡠᠰᡝ ᠣᠮᠣᠰᡳ ᡤᡠᡵᡠᠨ ᡳᡨᡤᡝᠨ ᠪᡝ ᠵᠣᠪᠣᠪᡠᡵᡝ ᠵᠠᡴᠠᡩᡝ᠈ ᡤᡠᡵᡠᠨ ᡳᡵᡤᡝᠨ ᡤᡝᠮᡠ ᡠᠪᠠᡧᠠᡶᡳ ᠨᡳᠩᡤᡠᠨ ᠪᡳᠶᠠ ᡩᡝ ᡨᡝᡥᡝ ᠣᡩᠣᠯᡳ ᡥᡝᠴᡝᠨ ᠪᡝ ᡴᠠᡶᡳ ᠠᡶᠠᡶᡳ ᠪᡠᡴᡡᡵᡳ ᠶᠣᠩᡧᠣᠨ ᡳ ᡠᡴᠰᡠᠨ ᠮᡠᡴᡡᠨ ᠪᡝ ᠰᡠᠨᡨᡝᠪᡠᠮᡝ ᠸᠠᡵᠠ ᡩᡝ᠈ ᠪᡠᡴᡡᡵᡳ ᠶᠣᠩᡧᠣᠨ ᡳ ᡝᠨᡝᠨ ᡶᠠᠨᠴᠠ ᡤᡝᠪᡠᠩᡤᡝ ᠵᡠᡳ ᡨᡠᠴᡳᡶᡳ ᡧᡝᡥᡠᠨ ᠪᡳᡤᠠᠨ ᠪᡝ ᠪᡠᡵᡠᠯᠠᠮᡝ ᡤᡝᠨᡝᡵᡝ ᠪᡝ᠈ ᠪᠠᡨᠠᡳ ᠴᠣᠣᡥᠠᡳ ᠨᡳᠶᠠᠯᠮᠠ ᠠᠮᠴᠠᡵᠠ ᡩᡝ᠈ ᡝᠮᡠ ᡝᠨᡩᡠᡵᡳ ᠰᠠᡴᠰᠠᡥᠠ ᡩᡝᠶᡝᠮᡝ ᠵᡳᡶᡳ᠈ ᡨᡝᡵᡝ ᡶᠠᠨᠴᠠ ᡤᡝᠪᡠᠩᡤᡝ ᠵᡠᡳ ᡠᠵᡠᡳ ᡩᡝᠯᡝ ᡩᠣᡥᠠ᠈ ᠠᠮᠴᠠᡵᠠ ᠴᠣᠣᡥᠠᡳ ᠨᡳᠶᠠᠯᠮᠠ ᡤᡡᠨᡳᠮᡝ ᠨᡳᠶᠠᠯᠮᠠ ᡩᡝ ᡤᡝᠯᡳ ᠰᠠᡴᠰᠠᡥᠠ ᡩᠣᠮᠪᡳᠣ᠈ ᠮᡠᡴᡩᡝᡥᡝᠨ ᠠᡳᠰᡝ ᠰᡝᠮᡝ ᡥᡝᠨᡩᡠᠮᡝ ᡤᡝᠮᡠ ᠠᠮᠠᠰᡳ ᠪᡝᡩᡝᡵᡝᡥᡝ᠈ ᡨᡝᡵᡝᠴᡳ ᡶᠠᠨᠴᠠ ᡴᡠᠸᡝᡶᡳ ᡨᡠᠴᡳᡴᡝ᠈ ᡨᡠᡨᡨᡠ ᠣᡶᡳ ᠮᠠᠨᠵᡠ ᡤᡠᡵᡠᠨ ᡳ ᠠᠮᠠᡤᠠ ᠵᠠᠯᠠᠨ ᡳ ᠵᡠᠰᡝ ᠣᠮᠣᠰᡳ ᡤᡝᠮᡠ ᠰᠠᡴᠰᠠᡥᠠ ᠪᡝ ᠮᠠᡶᠠ ᠰᡝᠮᡝ ᠸᠠᡵᠠᡴᡡ ᠪᡳᡥᡝ᠈ ᡶᠠᠨᠴᠠ ᡨᡠᠴᡳᡶᡳ ᠪᡝᠶᡝ ᠪᡝ ᠰᠣᠮᡳᠮᡝ ᠪᠠᠨᠵᡳᡥᠠ᠉
ᡶᠠᠨᠴᠠᡳ ᠠᠮᠠᡤᠠ ᠵᠠᠯᠠᠨ ᡳ ᠣᠮᠣᠯᠣ ᡩᡠᡩᡠ ᡝᡵᡩᡝᠮᡠᠩᡤᡝ ᠪᠠᠨᠵᡳᡶᡳ ᡳᠨᡳ ᠨᡝᠨᡩᡠᡥᡝ ᠮᠠᡶᠠᡵᡳ ᠪᡝ ᠸᠠᡥᠠ ᡴᡳᠮᡠᠩᡤᡝ ᠨᡳᠶᠠᠯᠮᠠᡳ ᠵᡠᠰᡝ ᠣᠮᠣᠰᡳ ᡩᡝᡥᡳ ᠨᡳᠶᠠᠯᠮᠠ ᠪᡝ ᡳᠨᡳ ᠮᠠᡶᠠᡳ ᡨᡝᡥᡝ ᠣᠮᠣᡥᠣᡳ ᠪᡳᡤᠠᠨ ᡳ ᠣᡩᠣᠯᡳ ᡥᡝᠴᡝᠨ ᠴᡳ᠈ ᡧᡠᠨ ᡨᡠᡥᡝᡵᡝ ᡝᡵᡤᡳ ᡩᡝ ᡝᠮᡠ ᠮᡳᠩᡤᠠᠨ ᠰᡠᠨᠵᠠ ᡨᠠᠩᡤᡡ ᠪᠠᡳ ᡩᡠᠪᡝ ᡩᡝ ᠰᡠᡴᠰᡠᡥᡠ ᠪᡳᡵᠠ᠈ ᡥᡡᠯᠠᠨ ᡥᠠᡩᠠ᠈ ᡥᡝᡨᡠ ᠠᠯᠠ ᡤᡝᠪᡠᠩᡤᡝ ᠪᠠ ᡩᡝ ᠵᠠᠯᡳᡩᠠᠮᡝ ᡤᠠᠵᡳᡶᡳ ᡩᡠᠯᡳᠨ ᠪᡝ ᡳᠨᡳ ᠮᠠᡶᠠᡵᡳ ᡴᡳᠮᡠᠨ ᠪᠠᡨᠠ ᠰᡝᠮᡝ ᠸᠠᡥᠠ᠈ ᡩᡠᠯᡳᠨ ᠪᡝ ᠵᠠᡶᠠᡶᡳ ᡳᠨᡳ ᠠᡥᡡᠨ ᡩᡝᠣ ᡳ ᠪᠣᡳᡤᠣᠨ ᠪᡝ ᠵᠣᠯᡳᠮᡝ ᡤᠠᡳᡶᡳ ᠰᡳᠨᡩᠠᡶᡳ ᡠᠩᡤᡳᡥᡝ᠈ ᡨᡝᡵᡝᠴᡳ ᡩᡠᡩᡠ □□ ᡨᡝᡵᡝ ᡥᡡᠯᠠᠨ ᡥᠠᡩᠠ ᡥᡝᡨᡠ ᠠᠯᠠ ᡳ ᠪᠠ ᡩᡝ ᡠᡨᡥᠠᡳ ᡨᡝᡥᡝ᠉ ᡩᡠᡩᡠ □□ ᡩᡝ ᠪᠠᠨᠵᡳᡥᠠᠩᡤᡝ □□ ᠴᡠᠶᠠᠨ᠈ □□ ᡩᡝ ᠪᠠᠨᠵᡳᡥᠠᠩᡤᡝ ᡨᠣᠯᠣ᠈ ᡨᠣᡳᠮᠣ᠈ □□ □□ □□□□ ᡩᡝ ᠪᠠᠨᠵᡳᡥᠠᠩᡤᡝ ᡩᡠᡩᡠ □□ ᡩᡠᡩᡠ □□ ᡩᡝ ᠪᠠᠨᠵᡳᡥᠠᠩᡤᡝ ᡩᡝᠰᡳᡴᡠ᠈ ᠯᡳᠣᠴᠠᠨ᠈ ᠰᠣᠣᠴᠠᠩᡤᠠ᠈ □□ ᠪᠣᠣᠯᠠᠩᡤᠠ᠈ ᠪᠣᠣᠰᡳ᠈ ᡩᡝᠰᡳᡴᡠ ᡤᡳᠣᡵᠴᠠ ᡤᡝᠪᡠᠩᡤᡝ ᠪᠠᡩᡝ ᡨᡝᡥᡝ᠈ ᠯᡳᠣᠴᠠᠨ ᠠᡥᠠ ᡥᠣᠯᠣ ᡤᡝᠪᡠᠩᡤᡝ ᠪᠠᡩᡝ ᡨᡝᡥᡝ ᠰᠣᠣᠴᠠᠩᡤᠠ ᡥᠣᠯᠣ ᡤᠠᡧᠠᠨ ᡤᡝᠪᡠᠩᡤᡝ ᠪᠠ ᡩᡝ ᡨᡝᡥᡝ᠈ □□ ᠮᠠᡶᠠᡳ ᠰᡠᠰᡠ ᡥᡝᡨᡠ ᠠᠯᠠ ᡩᡝ ᡨᡝᡥᡝ᠈ ᠪᠣᠣᠯᠠᠩᡤᠠ ᠨᡳᠮᠠᠯᠠ ᡤᡝᠪᡠᠩᡤᡝ ᠪᠠ ᡩᡝ ᡨᡝᡥᡝ᠈ ᠪᠣᠣᠰᡳ ᠵᠠᠩᡤᡳᠶᠠ ᡤᡝᠪᡠᠩᡤᡝ ᠪᠠ ᡩᡝ ᡨᡝᡥᡝ᠈ ᠨᡳᠩᡤᡠᠨ ᠨᡳᠶᠠᠯᠮᠠ ᠨᡳᠩᡤᡠᠨ ᠪᠠ ᡩᡝ ᡥᠣᡨᠣᠨ ᠠᡵᠠᡶᡳ ᡨᡝᡥᡝ ᠮᠠᠩᡤᡳ᠈ ᡨᡝᡵᡝᠴᡳ ᠨᡳᠩᡤᡠᡨᠠᡳ ᠪᡝᡳᠰᡝ ᠰᡝᡥᡝ᠈ ᡨᡝᡵᡝ ᠨᡳᠩᡤᡠᠨ ᠮᠠᡶᠠ ᡳᠨᡠ᠈ ᡥᡝᡨᡠ ᠠᠯᠠᡳ ᡥᡝᠴᡝᠨ ᠴᡳ ᠵᠠᡳ ᠰᡠᠨᠵᠠ ᡥᠣᡨᠣᠨ ᡤᠣᡵᠣᠩᡤᡝ ᠣᡵᡳᠨ ᠪᠠ᠈ ᡥᠠᠨᠴᡳᠩᡤᡝ ᠰᡠᠨᠵᠠ ᠪᠠ ᠪᡳ᠉ ᠠᠮᠪᠠ ᠮᠠᡶᠠ ᡩᡝᠰᡳᡴᡠ ᡩᡝ ᠪᠠᠨᠵᡳᡥᠠᠩᡤᡝ ᠰᡠᡥᡝᠴᡝᠨ ᡩᠠᡳᡶᡠ᠈ ᡨᠠᠨᡨᡠ᠈ ᠨᡳᠶᠠᠩᡤᡠ ᡶᡳᠶᠠᠩᡤᡡ᠈ ᠵᠠᠴᡳᠨ ᠮᠠᡶᠠ ᠯᡳᠣᠴᠠᠨ ᡩᡝ ᠪᠠᠨᠵᡳᡥᠠᠩᡤᡝ ᠯᡠᡥᡠᠴᡝᠨ᠈ ᠮᠠᠨᡳᠩᡤᡝ᠈ ᠮᡝᠨᡨᡠ᠈ ᡳᠯᠠᠴᡳ ᠮᠠᡶᠠ ᠰᠣᠣᠴᠠᠩᡤᠠ ᡩᡝ ᠪᠠᠨᠵᡳᡥᠠᠩᡤᡝ ᠯᡳᡨᠠᡳ᠈ ᡠᡨᠠᡳ᠈ ᠴᠣᡴᡳ ᠠᠵᡠᡤᡠ᠈ ᠯᠣᠩᡩᠣᠨ᠈ ᡶᡳᠣᠩᡩᠣᠨ᠈ ᡩᡠᡳᠴᡳ ᠮᠠᡶᠠ □□ ᡩᡝ ᠪᠠᠨᠵᡳᡥᠠᠩᡤᡝ ᠯᡳᡩᡠᠨ ᠪᠠᡨᡠᡵᡠ᠈ ᡝᡵᡤᡠᠸᡝᠨ᠈ ᠵᠠᡳᡴᠠᠨ᠈ □□ ᡨᠠᠴᠠ ᡶᡳᠶᠠᠩᡤᡡ᠈ ᠰᡠᠨᠵᠠᠴᡳ ᠮᠠᡶᠠ ᠪᠣᠣᠯᠠᠩᡤᠠ ᡩᡝ ᠪᠠᠨᠵᡳᡥᠠᠩᡤᡝ ᡩᡠᡳᠴᡳᠨ᠈ ᠯᡝᠩᡩᡝᠨ᠈ ᠨᡳᠩᡤᡠᠴᡳ ᠮᠠᡶᠠ ᠪᠣᠣᠰᡳ ᡩᡝ ᠪᠠᠨᠵᡳᡥᠠᠩᡤᡝ ᡴᠠᠩᡤᡳᠶᠠ᠈ ᠠᡥᠠᠨᠠ᠈ ᠠᡩᡠᠴᡳ᠈ ᡩᠣᡵᡥᠣᠴᡳ᠈ ᡨᡝᡵᡝ ᡶᠣᠨᡩᡝ᠈ ᡧᠣᠰᡝᠨᠠ ᡤᡝᠪᡠᠩᡤᡝ ᠨᡳᠶᠠᠯᠮᠠᡳ ᡠᠶᡠᠨ ᡥᠠᡥᠠ ᠵᡠᡳ ᡤᡝᠮᡠ ᡥᡡᠰᡠᠩᡤᡝ ᡝᡨᡠᡥᡠᠨ᠈ ᠵᠠᡳ ᡤᡳᠶᠠᡥᡡ ᡤᡝᠪᡠᠩᡤᡝ ᠨᡳᠶᠠᠯᠮᠠᡳ ᠨᠠᡩᠠᠨ ᡥᠠᡥᠠ ᠵᡠᡳ ᡤᡝᠮᡠ ᡤᠠᠪᠰᡳᡥᡳᠶᠠᠨ ᡥᡡᠰᡠᠩᡤᡝ ᠣᡶᡳ ᡠᠶᡠᠨ ᡳᡥᠠᠨ ᠪᡝ ᡳᠯᡳᠪᡠᡶᡳ ᡠᡴᠰᡳᠨ ᡝᡨᡠᡥᡝᡳ ᡩᠠᠪᠠᠯᡳ ᡩᠠᠪᠠᠯᡳ ᡨᡝᡵᡴᡳᠮᡝ ᡶᡝᡴᡠᠮᠪᡳᡥᡝ᠈ ᡨᡝᡵᡝ ᠵᡠᠸᡝ ᠮᡠᡴᡡᠨ ᠴᡝᠨᡳ ᡥᡡᠰᡠᠨ ᡩᡝ ᡝᡵᡨᡠᡶᡳ ᠪᠠᠪᠠ ᠪᡝ ᠨᡠᠩᠨᡝᠮᡝ ᡤᡳᡩᠠᡧᠠᠮᠪᡳᡥᡝ᠈ ᠨᡳᠩᡤᡠᡨᠠᡳ ᡩᡠᡳᠴᡳᠨ ᡝᡵᡩᡝᠮᡠᠩᡤᡝ ᠮᡝᡵᡤᡝᠨ᠈ ᠵᡠᡳ ᠯᡳᡩᡠᠨ ᡤᡝᠯᡳ ᠪᠠᡨᡠᡵᡠ ᠮᠠᠩᡤᠠ ᠣᡶᡳ᠈ ᠨᡳᠩᡤᡠᡨᠠᡳ ᠪᡝᡳᠰᡝ ᠪᡝ ᡤᠠᡳᡶᡳ ᡩᠠᡳᠯᠠᠮᡝ ᡧᠣᠰᡝᠨᡳ ᠵᡠᠰᡝ ᡠᠶᡠᠨᡨᠠᡳ ᠮᡠᡴᡡᠨ ᠪᡝ ᡝᡶᡠᠯᡝᡶᡳ᠈ ᡤᡳᠶᠠᡥᡡᡳ ᠵᡠᠰᡝ ᠨᠠᡩᠠᠨ ᡨᠠ ᠪᡝ ᠰᡠᠨᡨᡝᠪᡠᡶᡳ᠈ ᠰᡠᠨᠵᠠ ᡩᠠᠪᠠᡤᠠᠨ ᠴᡳ ᠸᡝᠰᡳᡥᡠᠨ᠈ ᠰᡠᡴᠰᡠᡥᡠ ᠪᡳᡵᠠᡳ ᠰᡝᡴᡳᠶᡝᠨ ᠴᡳ ᠸᠠᠰᡳᡥᡡᠨ ᠵᡠᠸᡝ ᡨᠠᠩᡤᡡ ᡴᡝᡳ ᡩᠣᡵᡤᡳ ᠠᡳᠮᠠᠨ ᠪᡝ ᡩᠠᡥᠠᠪᡠᡶᡳ᠈ ᡨᡝᡵᡝᠴᡳ ᠨᡳᠩᡤᡠᡨᠠᡳ ᠪᡝᡳᠰᡝ ᡝᡨᡝᠩᡤᡳ ᠣᡥᠣ᠈ ᠨᡳᠩᡤᡠᡨᠠᡳ ᠪᠣᠣᠰᡳ ᠨᡳᠩᡤᡠᠴᡳᠨ ᡳ ᠵᡠᡳ ᠠᡥᠠᠨᠠ᠈ ᠸᡝᠵᡳᡤᡝ ᠰᠠᡴᡩᠠ ᡤᡝᠪᡠᠩᡤᡝ ᠪᠠᡩᡝ ᡨᡝᡥᡝ ᡤᠣᠯᠣᡳ ᠠᠮᠪᠠᠨ ᠪᠠᠰᡥᠠᠨ ᠪᠠᡨᡠᡵᡠ ᡳ ᠨᠣᠨ ᠪᡝ ᠶᠠᠪᡠᡴᡳ ᠰᡝᠮᡝ ᡤᡝᠨᡝᡶᡳ ᡤᡳᠰᡠᡵᡝᠴᡳ᠈ ᠪᠠᠰᡥᠠᠨ ᠪᠠᡨᡠᡵᡠ ᡥᡝᠨᡩᡠᠮᡝ᠈ ᠰᡳ ᠨᡳᠩᡤᡠᡨᠠᡳ ᠪᡝᡳᠰᡝ ᠮᡠᠵᠠᠩᡤᠠ᠈ ᠰᡳᠨᡳ ᠪᠣᠣ ᠶᠠᡩᠠᠮᠪᡳ᠈ ᠮᡳᠨᡳ ᠨᠣᠨ ᠪᡝ ᠪᡠᡵᠠᡴᡡ ᠰᡝᡵᡝ ᠵᠠᡴᠠᡩᡝ᠈ ᠠᡥᠠᠨᠠ ᠪᡳ ᠰᡳᠨᠴᡳ ᠠᡳᠨᠠᡥᠠ ᠰᡝᠮᡝ ᡥᠣᡴᠣᡵᠠᡴᡡ ᠰᡝᠮᡝ ᡥᡝᠨᡩᡠᡶᡳ ᡳᠨᡳ ᡠᠵᡠᡳ ᡶᡠᠨᡳᠶᡝᡥᡝ ᠪᡝ ᡶᠠᡳᡨᠠᡶᡳ ᠸᠠᡵᡳᡶᡳ ᠵᡳᡥᡝ᠈ ᡨᡝᡵᡝᡳ ᠠᠮᠠᠯᠠ ᠪᠠᠰᡥᠠᠨ ᠪᠠᡨᡠᡵᡠ ᡳᠨᡳ ᠨᠣᠨ ᠪᡝ ᡩᠣᠩᡤᠣᡳ ᠠᡳᠮᠠᠨ ᡳ ᡝᠵᡝᠨ ᡴᡝᠴᡝ ᠪᠠᠶᠠᠨ ᡳ ᠵᡠᡳ ᡝᠯᡤᡳ ᠸᠠᡵᡴᠠ ᡩᡝ ᠪᡠᡥᡝ᠈ ᡝᠯᡤᡳ ᠸᠠᡵᡴᠠ ᠰᠠᡴᡩᠠ ᡩᡝ ᡩᠠᠨᠴᠠᠯᠠᠮᡝ ᡤᡝᠨᡝᡶᡳ᠈ ᠠᠮᠠᠰᡳ ᡳᠨᡳ ᠪᠣᠣ ᡩᡝ ᠵᡳᡩᡝᡵᡝ ᡩᡝ᠈ ᡨᠣᠮᠣᡥᠣ ᡤᡝᠪᡠᠩᡤᡝ ᠪᠠ ᡩᡝ ᡨᡝᡥᡝ᠈ ᡝᡨᡠ ᠠᡵᡠ ᡤᡝᠪᡠᠩᡤᡝ ᠠᠮᠪᠠᠨ ᡳ ᡥᠠᡵᠠᠩᡤᠠ ᡠᠶᡠᠨ ᡥᡡᠯᡥᠠ ᠠᠪᡩᠠᡵᡳ ᡤᡝᠪᡠᠩᡤᡝ ᡩᠠᠪᠠᡤᠠᠨ ᡩᡝ ᡩᠣᠰᠣᡶᡳ ᡝᠯᡤᡳ ᠸᠠᡵᡴᠠ ᠪᡝ ᠸᠠᡥᠠ᠈ ᡨᡝᡵᡝ ᡨᠣᠰᠣᡥᠣ ᡠᠶᡠᠨ ᡥᡡᠯᡥᠠ ᡩᡝ ᡝᠨᠴᡠ ᠠᡥᠠᠨᠠ ᡤᡝᠪᡠᠩᡤᡝ ᠨᡳᠶᠠᠯᠮᠠ ᠪᡳᡶᡳ ᡥᡡᠯᡥᠠᡳ ᡥᠣᡴᡳ ᠠᡥᠠᠨᠠ ᠰᡝᠮᡝ ᡥᠣᠯᡥᠠ ᠪᡝ ᠨᡳᠶᠠᠯᠮᠠ ᡩᠣᠨᠵᡳᡶᡳ ᡤᡳᠰᡠᡵᡝᡵᡝ ᠪᡝ᠈ ᡴᡝᠴᡝ ᠪᠠᠶᠠᠨ ᡩᠣᠨᠵᡳᡶᡳ ᡥᡝᠨᡩᡠᠮᡝ᠈ ᠨᡳᠩᡤᡠᡨᠠᡳ ᠠᡥᠠᠨᠠ ᠸᡝᠵᡳᡤᡝ ᠶᠠᠪᡠᡴᡳ ᠰᡝᡥᡝ ᠰᠠᡵᡤᠠᠨ ᠵᡠᡳ ᠪᡝ ᠮᡳᠨᡳ ᠵᡠᡳ ᡤᠠᡳᡥᠠ᠈ ᡨᡝᡵᡝ ᡴᡳᠮᡠᠨ ᡩᡝ ᠨᡳᠩᡤᡠᡨᠠᡳ ᠪᡝᡳᠰᡝ ᠸᠠᡥᠠᠪᡳ ᡩᡝᡵᡝ ᠰᡝᠮᡝ ᡤᡳᠰᡠᡵᡝᡥᡝ ᠪᡝ᠈ ᡥᠠᡩᠠᡳ ᡤᡠᡵᡠᠨ ᡳ ᠸᠠᠨ ᡥᠠᠨ ᡩᠣᠨᠵᡳᡶᡳ ᡩᠣᠩᡤᠣᡳ ᡴᡝᠴᡝ ᠪᠠᠶᠠᠨ ᡩᡝ ᡝᠯᠴᡳᠨ ᡨᠣᡴᡡᡵᠠᠮᡝ ᠰᡳᠨᡳ ᠵᡠᡳ ᠪᡝ ᠨᡳᠩᡤᡠᡨᠠᡳ ᠨᡳᠶᠠᠯᠮᠠ ᠸᠠᡥᠠᡴᡡᠪᡳ᠈ ᡝᡨᡠ ᠠᡵᡠ ᡳ ᡠᠶᡠᠨ ᡥᠣᠯᡥᠠ ᠸᠠᡥᠠᠪᡳ᠈ ᡨᡝᡵᡝ ᡠᠶᡠᠨ ᡥᡡᠯᡥᠠ ᠪᡝ ᠪᡝ ᠵᠠᡶᠠᡶᡳ ᠪᡠᡵᡝ᠈ ᠰᡳ ᠮᡳᠨᡩᡝ ᡩᠠᡥᠠ ᠰᡝᠮᡝ ᡨᠠᡴᡡᡵᠠᡥᠠ ᠮᠠᠩᡤᡳ ᡴᡝᠴᡝ ᠪᠠᠶᠠᠨ ᡥᡝᠨᡩᡠᠮᡝ᠈ ᠮᡳᠨᡳ ᠵᡠᡳ ᠸᠠᠪᡠᡥᠠ ᡩᡝᠯᡝ ᡤᡝᠯᡳ ᠮᡳᠮᠪᡝ ᠠᡳᠨᡠ ᠰᡳᠨᡩᡝ ᡩᠠᡥᠠ ᠰᡝᠮᠪᡳ᠈ ᠨᡳᠩᡤᡠᡨᠠᡳ ᠨᡳᠶᠠᠯᠮᠠ ᠰᡠᠸᡝ ᡝᡨᡠ ᠠᡵᡠ ᠪᡝ ᠪᠠᡳ ᡤᠣᡵᠣ ᠰᡝᠮᡝ ᠵᠣᡵᡨᠠᡳ ᡨᡝᡩᡝ ᠠᠨᠠᠮᡝ ᡤᡳᠰᡠᡵᡝᠮᠪᡳᡩᡝᡵᡝ᠈ ᠮᡠᠰᡝ ᡤᡝᠮᡠ ᡝᠮᡠ ᡥᠠᠯᠠᡳ ᠠᡥᡡᠨ ᡩᡝᠣ ᡴᠠᡳ᠈ ᠨᡳᠩᡤᡠᡨᠠᡳ ᠨᡳᠶᠠᠯᠮᠠ ᡨᠣᠨᡩᠣ ᠰᡝᠴᡳ ᡥᠠᡩᠠᡳ ᠨᡳᠶᠠᠯᠮᠠ ᡩᡝ ᡠᠯᡳᠨ ᠠᡳᠰᡳᠨ ᠮᡝᠩᡤᡠᠨ ᠪᡠᡶᡳ᠈ ᡝᡨᡠ ᠠᡵᡠᡳ ᡠᠶᡠᠨ ᡥᠣᠯᡥᠠ ᠪᡝ ᡤᠠᡳᡶᡳ ᠮᡳᠨᡩᡝ ᡤᠠᠵᡳ ᠪᡳ ᡶᠣᠨᠵᡳᡵᡝ᠈ ᡨᡝᡵᡝ ᡠᠶᡠᠨ ᡥᠣᠯᡥᠠ ᠨᡳᠩᡤᡠᡨᠠᡳ ᠨᡳᠶᠠᠯᠮᠠ ᠪᡝ ᠸᠠᡥᠠᡴᡡ ᠰᡝᠴᡳ᠈ ᡥᠠᡩᠠᡳ ᠨᡳᠶᠠᠯᠮᠠ ᡩᡝ ᠰᡠᠸᡝᠨᡳ ᠪᡠᡥᡝ ᡠᠯᡳᠨ ᠮᡝᠩᡤᡠᠨ ᠠᡳᠰᡳᠨ ᡩᡝ ᠪᡳ ᡥᠣᠯᠪᠣᠮᡝ ᡨᠣᠣᡩᠠᡵᠠ ᠰᡝᠮᡝ ᡤᡳᠰᡠᡵᡝᡥᡝ ᠪᡝ ᠨᡳᠩᡤᡠᡨᠠᡳ ᠰᠣᠣᠴᠠᠩᡤᠠ ᡳᠯᠠᠴᡳᠨ ᡳ ᠪᠣᠣ ᡳ ᡝᡴᠴᡳᠨ ᡤᡝᠪᡠᠩᡤᡝ ᠨᡳᠶᠠᠯᠮᠠ ᡩᠣᠨᠵᡳᡶᡳ ᡳᠨᡳ ᡝᠵᡝᠨ ᡩᡝ ᠠᠯᠠᠨᠵᡳᡵᡝ ᠵᠠᡴᠠᡩᡝ᠈ ᠰᠣᠣᠴᠠᠩᡤᠠ ᡳᠯᠠᠴᡳᠨ᠈ ᡩᠣᠩᡤᠣᡳ ᡴᡝᠴᡝ ᠪᠠᠶᠠᠨ ᡩᡝ ᡩᠣᡵᡤᡳᡩᡝᡵᡳ ᠨᡳᠶᠠᠯᠮᠠ ᡨᠣᡴᡡᡵᠠᠮᡝ ᠰᡳᠨᡳ ᠵᡠᡳ ᠪᡝ ᠮᡳᠨᡳ ᡝᠯᠪᡝᠩᡤᡝ᠈ ᡝᡴᠴᡳᠩᡤᡝ ᠸᠠᡥᠠᠪᡳ᠈ ᠮᡳᠨᡳ ᠨᡳᠶᠠᠯᠮᠠ ᠪᡝ ᠪᡳ ᠸᠠᡵᠠ᠈ ᠮᡳᠨᡩᡝ ᡠᠯᡳᠨ ᡤᠠᠵᡳ ᠰᡝᡵᡝ ᠵᠠᡴᠠᡩᡝ᠈ ᡴᡝᠴᡝ ᠪᠠᠶᠠᠨ ᡥᡝᠨᡩᡠᠮᡝ ᡥᠠᡩᠠᡳ ᡤᡠᡵᡠᠨ ᡳ ᠸᠠᠨ ᡥᠠᠨ ᠣᠴᡳ ᡝᡨᡠ ᠠᡵᡠᡳ ᡠᠶᡠᠨ ᡥᡡᠯᡥᠠ ᠪᡝ ᠸᠠᡥᠠ ᠰᡝᠮᠪᡳ᠈ ᠰᠣᠣᠴᠠᠩᡤᠠ ᠰᡳ ᡤᡝᠯᡳ ᠰᡳᠨᡳ ᡝᠯᠪᡝᠩᡤᡝ ᡝᡴᠴᡳᠩᡤᡝ ᠪᡝ ᠸᠠᡥᠠ ᠰᡝᠮᠪᡳ᠈ ᡤᡝᠮᡠ ᠰᡠᠸᡝᠨᡳ ᠨᡳᠩᡤᡠᡨᠠᡳ ᠨᡳᠶᠠᠯᠮᠠ ᡝᡳᡨᡝᡵᡝᠮᠪᡳ ᠨᡳᡴᠠᡳ ᠰᡝᠮᡝ ᡠᡨᡥᠠᡳ ᡩᠠᡳᠨ ᠣᡶᡳ᠈ ᡴᡝᠴᡝ ᠪᠠᠶᠠᠨ ᠨᡳᠩᡤᡠᡨᠠᡳ ᠪᡝᡳᠰᡝᡳ ᡥᠠᡵᠠᠩᡤᠠ ᡩᡝᡵᡤᡳ ᠵᡠᠯᡝᡵᡤᡳ ᠵᡠᠸᡝ ᡤᠣᠯᠣ ᠪᡝ᠈ ᠰᡠᠴᡠᡥᠠ᠈ ᠨᡳᠩᡤᡠᡨᠠᡳ ᠪᡝᡳᠰᡝ ᠠᠨᠠᠪᡠᡵᡝ ᡳᠰᡳᡶᡳ ᡥᡝᠪᡩᡝᠮᡝ᠈ ᠮᡠᠰᡝ ᡝᠮᡠ ᠮᠠᡶᠠ ᡩᡝ ᡶᡠᠰᡝᡴᡝ ᠪᡝᡳᠰᡝ ᠵᡠᠸᠠᠨ ᠵᡠᠸᡝ ᡤᠠᡧᠠᠨ ᡩᡝ ᡨᡝᠴᡳ ᡶᠠᠴᡠᡥᡡᠨ᠈ ᡝᠮᡠ ᡤᠠᡧᠠᠨ ᡩᡝ ᠠᠴᠠᡶᡳ ᡨᡝᡴᡳ ᠰᡝᠮᡝ ᡤᡳᠰᡠᡵᡝᠮᡝ ᠸᠠᠵᡳᡥᠠ ᡥᡝᠪᡝ ᠪᡝ᠈ ᡳᠨᡝᡴᡠ ᠰᠣᠣᠴᠠᠩᡤᠠ ᡳᠯᠠᠴᡳᠨ ᡳ ᠵᡠᡳ ᡠᡨᠠᡳ ᡝᡶᡠᠯᡝᠮᡝ ᡥᡝᠨᡩᡠᠮᡝ᠈ ᡝᠮᡠ ᡤᠠᡧᠠᠨ ᡩᡝ ᠠᠴᠠᡶᡳ ᠠᡩᠠᡵᠠᠮᡝ ᡨᡝᠮᠪᡳ᠈ ᡠᠯᡥᠠ ᡠᠵᡳᡵᠠᡴᡡ ᠪᠠᠨᠵᡳᠮᠪᡳᠣ᠈ ᡝᠮᡠ ᡤᠠᡧᠠᠨ ᡩᡝ ᠠᠴᠠᡶᡳ ᡨᡝᡵᡝ ᠪᡝ ᠨᠠᡴᠠᡶᡳ᠈ ᠮᡳᠨᡳ ᠠᠮᡥᠠ ᡥᠠᡩᠠᡳ ᠸᠠ ᡥᠠᠨ ᡩᡝ ᠴᠣᠣᡥᠠ ᠪᠠᡳᡴᡳ ᠰᡝᠮᡝ ᡥᡝᠨᡩᡠᡶᡳ᠈ ᠸᠠᠨ ᡥᠠᠨ ᡩᡝ ᠴᠣᠣᡥᠠ ᠪᠠᡳᡶᡳ ᡩᠣᠩᡤᠣᡳ ᠠᡳᠮᠠᠨ ᠪᡝ ᠵᡠᠸᡝ ᠵᡝᡵᡤᡳ ᠰᡠᠴᡠᡶᡳ ᡠᡩᡠᡩᡠ ᡤᠠᡧᠠᠨ ᠪᡝ ᡤᠠᡳᡥᠠ ᡨᡝᡵᡝ ᠴᠣᠣᡥᠠ ᠪᠠᡳᡵᡝ ᠣᠩᡤᠣᠯᠣ᠈ ᠨᡳᠩᡤᡠᡨᠠᡳ ᠪᡝᡳᠰᡝ ᡥᠠᡩᠠᡳ ᡤᡠᡵᡠᠨ ᡳ ᠸᠠᠨ ᡥᠠᠨ ᡩᡝ ᠵᡠᡳ ᠪᡠᠮᡝ ᡠᡵᡠᠨ ᡤᠠᡳᠮᡝ ᡳᠰᡥᡠᠨᡩᡝ ᠰᠠᡩᡠᠨ ᠵᠠᡶᠠᠮᡝ ᠪᠠᠨᠵᡳᡥᠠ᠈ ᡥᠠᡩᠠᡳ ᠴᠣᠣᡥᠠ ᠪᡝ ᠪᠠᡳᡥᠠᠴᡳ᠈ ᠨᡳᠩᡤᡠᡨᠠᡳ ᠠᡳᠮᠠᠨ ᠮᠠᠵᡳᡤᡝ ᡝᠪᡝᡵᡝᡴᡝ᠈ ᠨᡳᠩᡤᡠᡨᠠᡳ □□ ᡩᡠᡳᠴᡳᠨ ᡳ ᡩᡠᡳᠴᡳ ᠵᡠᡳ □□ -ᡳ ᡤᠠᡳᡥᠠ ᠠᠮᠪᠠ ᡶᡠᠵᡳᠨ ᡳ ᡥᠠᠯᠠ ᡥᡳᡨᠠᡵᠠ᠈ ᡤᡝᠪᡠ □□ ᠠᡤᡠ ᡩᡠᡩᡠ ᡤᡝᠪᡠᠩᡤᡝ ᠠᠮᠪᠠᠨ ᡳ ᠰᠠᡵᡤᠠᠨ ᠵᡠᡳ᠈ ᡨᡝᡵᡝ ᡶᡠᠵᡳᠨ ᡩᡝ ᠪᠠᠨᠵᡳᡥᠠᠩᡤᡝ ᡳᠯᠠᠨ ᠵᡠᡳ᠈ ᠠᠮᠪᠠ ᠵᡠᡳ ᡤᡝᠪᡠ □□ ᡨᡝᡴᡳᠶᡝᡥᡝ ᡤᡝᠪᡠ ᠰᡠᡵᡝ ᠪᡝᡳᠯᡝ᠈ ᡨᡝᡵᡝ ᠮᠠᠨᠵᡠ ᡥᠠᠨ ᡳᠨᡠ᠈ ᠵᠠᠴᡳᠨ ᠵᡠᡳ ᡤᡝᠪᡠ ᡧᡠᡵᡤᠠᠴᡳ᠈ ᡨᡠᡤᡳᠶᡝᡥᡝ ᡤᡝᠪᡠ ᡩᠠᡵᠠᡥᠠ ᠪᠠᡨᡠᡵᡠ᠈ ᡳᠯᠠᠴᡳ ᠵᡠᡳ ᡤᡝᠪᡠ ᠶᠠᡵᡤᠠᠴᡳ᠈ ᠵᠠᡳ ᡶᡠᠵᡳᠨ ᡳ ᡥᠠᠯᠠ ᠨᠠᡵᠠ᠈ ᡤᡝᠪᡠ ᡴᡝᠨᠵᡝ᠈ ᡥᠠᡩᠠᡳ ᡤᡠᡵᡠᠨ ᡳ ᠸᠠᠨ ᡥᠠᠨ ᡳ ᡤᠠᡳᡶᡳ ᡠᠵᡳᡥᡝ ᡠᡴᠰᡠᠨ ᡳ ᠰᠠᡵᡤᠠᠨ ᠵᡠᡳ ᡨᡝᡵᡝ ᡶᡠᠵᡳᠨ ᡩᡝ ᠪᠠᠨᠵᡳᡥᠠᠩᡤᡝ ᠪᠠᠶᠠᡵᠠ᠈ ᡨᡠᡴᡳᠶᡝᡥᡝ ᡤᡝᠪᡠ ᠵᠣᡵᡳᡴᡨᡠ ᠪᡠᠶᠠ ᡶᡠᠵᡳᠨ ᡩᡝ ᠪᠠᠨᠵᡳᡥᠠᠩᡤᡝ ᠮᡠᡵᡥᠠᠴᡳ᠈ ᡨᡠᡴᡳᠶᡝᡥᡝ ᡤᡝᠪᡠ ᠴᡳᠩ ᠪᠠᡨᡠᡵᡠ᠈ ᡨᠠᡳᡯᡠ □□ ᡥᠠᠨ ᠣᠵᠣᡵᠣ ᡶᡠᠯᡳᠩᡤᠠ ᠪᡳᡶᡳ ᡝᠮᡝ ᠠᠮᠪᠠ ᡶᡠᠵᡳᠨ □□ ᠪᡝᠶᡝ ᡩᡝ ᠣᡶᡳ ᠵᡠᠸᠠᠨ ᡳᠯᠠᠴᡳ ᠪᡳᠶᠠ ᡩᡝ ᠨᡳᡴᠠᠨ ᡳ ᡩᠠᡳᠮᡳᠩ ᡤᡠᡵᡠᠨ ᡳ ᡤᡳᠶᠠ ᠵᡳᠩ ᡥᠠᠨ ᡳ ᡤᡡᠰᡳᠨ ᠵᠠᡴᡡᠴᡳ ᠰᠣᡥᠣᠨ ᡥᠣᠨᡳᠨ ᠠᠨᡳᠶᠠ ᠪᠠᠨᠵᡳᡥᠠ᠈ ᡨᡝᡵᡝ ᡶᠣᠨᡩᡝ ᠰᠠᡵᠠ ᠨᡳᠶᠠᠯᠮᠠ ᡤᡳᠰᡠᡵᡝᠮᡝ᠈ ᠮᠠᠨᠵᡠ ᡤᡠᡵᡠᠨ ᡩᡝ ᡶᡠᠯᡳᠩᡤᠠ ᠨᡳᠶᠠᠯᠮᠠ ᡨᡠᠴᡳᡶᡳ ᠪᠠᠪᠠᡳ ᡶᠠᠴᡠᡥᡡᠨ ᠪᡝ ᡨᠣᡴᡨᠣᠪᡠᠮᡝ ᡤᡠᡵᡠᠨ ᠪᡝ ᡩᠠᡥᠠᠪᡠᡶᡳ ᡥᠠᠨ ᡨᡝᠮᠪᡳ ᠰᡝᡥᡝ᠈ ᡨᡝᡵᡝ ᡤᡳᠰᡠᠨ ᠪᡝ ᠨᡳᠶᠠᠯᠮᠠ ᡠᠯᠠᠮᡝ ᡩᠣᠨᠵᡳᡶᡳ ᠪᡳ ᠪᡳ ᡥᠠᠨ ᠣᠮᠪᡳᡩᡝᡵᡝ ᠰᡝᠮᡝ ᠮᡠᠵᠠᡴᡡ ᠨᡳᠶᠠᠯᠮᠠ ᡝᡵᡝᠨᡠᠮᡝ ᡤᡡᠨᡳᡥᠠ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠮᡠᡨᡠᡥᠠ ᠮᠠᠩᡤᡳ᠈ ᠪᡝᠶᡝ ᡩᡝᠨ ᠠᠮᠪᠠᠨ᠈ ᡤᡳᡵᠠᠩᡤᡳ ᠮᡠᠸᠠ᠈ ᡩᡝᡵᡝᡳ ᡶᡳᠶᠠᠨ ᡤᡝᠩᡤᡳᠶᡝᠨ ᡤᡠ ᡳ ᠠᡩᠠᠯᡳ᠈ ᡶᡠᠴᡳᡥᡳ ᡧᠠᠨ᠈ ᡶᡠᠩᡥᡡᠸᠠᠩ ᠨᡳ ᠶᠠᠰᠠ ᡤᡳᠰᡠᡵᡝᡵᡝ ᠵᡳᠯᠠᡤᠠ ᡨᠣᠮᠣᡵᡥᠣᠨ ᠪᡳᠮᡝ ᠶᠠᡵᡤᡳᠶᠠᠨ ᡤᡝᡨᡠᡴᡝᠨ ᡝᠮᡤᡝᡵᡳ ᡩᠣᠨᠵᡳᡥᠠ ᠪᡝ ᠣᠩᡤᠣᡵᠠᡴᡡ ᡩᠠᡵᡨᠠᡳ ᠰᠠᡥᠠ ᠪᡝ ᡨᠠᡴᠠᠮᠪᡳ ᡨᡝᡵᡝ ᡳᠯᡳᡵᡝ ᡩᡝ ᡠᠵᡝᠨ ᠵᡳᠩᠵᡳ᠈ ᠠᡵᠪᡠᠨ ᡤᡳᡵᡠ ᡤᡝᡵᡝᠨ ᠴᡳ ᡨᡝᠮᡤᡝᡨᡠ᠈ ᠮᡠᡩᡠᡵᡳ ᡨᡠᠸᠠᡵᠠ᠈ ᡨᠠᠰᡥᠠ ᠶᠠᠪᡠᡵᡝ ᠠᡩᠠᠯᡳ ᡥᠣᡵᠣᠨ ᠮᠠᠩᡤᠠ᠈ ᠮᡠᠵᡳᠯᡝᠨ ᡨᠣᠨᡩᠣ᠈ ᡴᡝᠩᠰᡝ ᠯᠠᠰᡥᠠ᠈ ᠰᠠᡳᠨ ᠪᡝ ᠰᠠᡥᠠ ᡩᡝ ᡨᡠᡴᡳᠶᡝᡵᡝ ᠪᡝ ᡴᡝᠨᡝᡥᡠᠨᠵᡝᡵᠠᡴᡡ᠈ ᡝᡥᡝ ᠪᡝ ᠰᠠᡥᠠ ᡩᡝ ᠪᡝᡩᡝᡵᡝᠪᡠᡵᡝ ᠪᡝ ᠵᡳᠪᡤᡳᡧᡝᡵᠠᡴᡡ᠈ ᠴᠣᠣᡥᠠᡳ ᡝᡵᡩᡝᠮᡠ᠈ ᡤᠠᠪᡨᠠᡵᠠ ᠨᡳᠶᠠᠮᠨᡳᠶᠠᡵᠠ ᠪᠠᡨᡠᡵᡠ ᡥᡡᠰᡠᠨ ᠵᠠᠯᠠᠨ ᠴᡳ ᠯᠠᡴᠴᠠᡥᠠᠪᡳ᠈ ᠠᡵᡤᠠ ᠪᠣᡩᠣᡤᠣᠨ ᡧᡠᠮᡳᠨ᠈ ᠴᠣᠣᡥᠠ ᠪᠠᡳᡨᠠᠯᠠᡵᠠᠩᡤᡝ ᡝᠨᡩᡠᡵᡳ ᡤᡝᠰᡝ᠈ ᡨᡠᡨᡨᡠ ᠣᡶᡳ ᡤᡝᠩᡤᡳᠶᡝᠨ ᡥᠠᠨ ᠰᡝᡥᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠵᡠᠸᠠᠨ ᠰᡝ ᡩᡝ᠈ ᠪᠠᠨᠵᡳᡥᠠ ᡝᠮᡝ ᠠᡴᡡ ᠣᡶᡳ᠈ ᠰᡳᡵᠠᠮᡝ ᡝᠮᡝ ᠣᠰᡥᠣᠨ ᡝᡥᡝ᠈ ᠠᠮᠠ □□ ᠠᡵᡤᠠᠨ ᡳ ᡤᡳᠰᡠᠨ ᡩᡝ ᡩᠣᠰᡳᡶᡳ ᠵᡠᡳ ᠪᡝ ᠵᡠᠸᠠᠨ ᡠᠶᡠᠨ ᠰᡝ ᠪᠠᡥᠠ ᠮᠠᠩᡤᡳ ᡩᡝᠯᡥᡝᠪᡠᡵᡝ ᡩᡝ ᠠᡥᠠ ᡠᠯᡥᠠ ᠪᡝ ᠠᠮᠪᡠᠯᠠ ᠪᡠᡥᡝᡴᡡ᠈ ᠠᠮᠠᠯᠠ ᠵᡠᡳ ᡝᡵᡩᡝᠮᡠᠩᡤᡝ ᠰᠠᡳᠨ ᠪᡝ ᠰᠠᡶᡳ ᠨᡝᠨᡝᠮᡝ ᠪᡠᡥᡝᡴᡡ ᠠᡥᠠ ᡠᠯᡥᠠ ᠪᡝ ᡤᠠᡳᠰᡠ ᠰᡝᠴᡳ᠈ ᠰᡠᡵᡝ ᠪᡝᡳᠯᡝ ᡤᠠᡳᡥᠠᡴᡡ᠈ ᡨᡝᡵᡝ ᡶᠣᠨᡩᡝ ᠪᠠᠪᠠᡳ ᡤᡠᡵᡠᠨ ᡶᠠᠴᡠᡥᡡᠨ ᠣᡶᡳ᠈ ᠮᠠᠨᠵᡠ ᡤᡠᡵᡠᠨ ᡳ ᠰᡠᡴᠰᡠᡥᡠ ᠪᡳᡵᠠᡳ ᡤᠣᠯᠣᡳ ᠠᡳᠮᠠᠨ᠈ ᡥᡠᠨᡝᡥᡝ ᠪᡳᡵᠠᡳ ᡤᠣᠯᠣᡳ ᠠᡳᠮᠠᠨ᠈ ᠸᠠᠩᡤᡳᠶᠠᡳ ᡤᠣᠯᠣᡳ ᠠᡳᠮᠠᠨ᠈ ᡩᠣᠩᡤᠣᡳ ᡤᠣᠯᠣᡳ ᠠᡳᠮᠠᠨ᠈ ᠵᡝᠴᡝᠨ ᡳ ᠪᠠᡳ ᠠᡳᠮᠠᠨ ᡧᠠᠩᡤᡳᠶᠠᠨ ᠠᠯᡳᠨ ᡳ ᡤᠣᠯᠣᡳ ᠨᡝᠶᡝᠨ᠈ ᠶᠠᠯᡠ ᡤᡳᠶᠠᠩ ᠨᡳ ᠠᡳᠮᠠᠨ᠈ ᡩᡝᡵᡤᡳ ᠮᡝᡩᡝᡵᡳ ᡤᠣᠯᠣᡳ ᠸᡝᠵᡳ ᠸᠠᡵᡴᠠ ᡴᡡᡵᡴᠠᡳ ᠠᡳᠮᠠᠨ᠈ ᡥᡡᠯᡠᠨ ᡤᡠᡵᡠᠨ ᡳ ᡠᠯᠠᡳ ᡤᡠᠯᠣᡳ ᠠᡳᠮᠠᠨ᠈ ᡥᠠᡩᠠᡳ ᡤᠣᠯᠣᡳ ᠠᡳᠮᠠᠨ᠈ ᠵᡝᡥᡝᡳ ᡤᠣᠯᠣᡳ ᠠᡳᠮᠠᠨ᠈ ᡥᠣᡳᡶᠠᡳ ᡤᠣᠯᠣᡳ ᠠᡳᠮᠠᠨ ᠪᠠᠪᠠᡩᡝ ᡥᡡᠯᡥᠠ ᡥᠣᠯᠣ ᡥᡳᠪᠰᡠᡳ ᡝᠵᡝᠨ ᡳ ᡤᡝᠰᡝ ᡩᡝᡵ ᠰᡝᠮᡝ ᡩᡝᡴᡩᡝᡶᡳ ᠮᡝᠨᡳ ᠮᡝᠨᡳ ᠪᡝᠶᡝ ᠪᡝ ᡨᡠᡴᡳᠶᡝᡶᡳ ᡥᠠᠨ᠈ ᠪᡝᡳᠯᡝ᠈ ᠠᠮᠪᠠᠨ ᠰᡝᠮᡝ ᡤᠠᡧᠠᠨ ᡨᠣᠮᡝ ᡝᠵᡝᠨ᠈ ᠮᡠᡴᡡᠨ ᡨᠣᠮᡝ ᡠᠵᡠ ᠣᡶᡳ ᡳᠰᡥᡠᠨᡩᡝ ᡩᠠᡳᠯᠠᠮᡝ ᠠᡶᠠᠮᡝ ᠠᡥᡡᠨ ᡩᡝᠣ ᡳ ᡩᠣᠯᠣ ᠸᠠᠮᡝ᠈ ᡠᡴᠰᡠᠨ ᡤᡝᡵᡝᠨ᠈ ᡥᡡᠰᡠᠨ ᡝᡨᡠᡥᡠᠨ ᠨᡳᠶᠠᠯᠮᠠ᠈ ᠶᠠᡩᠠᠯᡳᠩᡤᡡ ᠪᡠᡩᡠᠨ ᠪᡝ ᡤᡳᡩᠠᡧᠠᠮᡝ ᡩᡠᡵᡳᠮᡝ ᠴᡠᠸᠠᠩᠨᠠᠮᡝ᠈ ᠠᠮᠪᡠᠯᠠ ᡶᠠᠴᡠᡥᡡᠨ ᠪᡳᡥᡝ᠈ ᡨᡝᡵᡝ ᠪᠠᠪᠠᡳ ᡶᠠᠴᡠᡥᡡᠨ ᡤᡠᡵᡠᠨ ᠪᡝ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᡤᡝᠩᡤᡳᠶᡝᠨ ᡥᠠᠨ ᡶᡠᡩᠠᠰᡳᡥᡡᠨ ᠨᡳᠩᡤᡝ ᠪᡝ ᠴᠣᠣᡥᠠᡳ ᡥᠣᡵᠣᠨ ᡳ ᡩᠠᡳᠯᠠᠮᡝ᠈ ᡳᠵᡳᠰᡥᡡᠨ ᠨᡳᠩᡤᡝ ᠪᡝ ᡝᡵᡩᡝᠮᡠᡳ ᡩᠠᡥᠠᠪᡠᠮᡝ ᡠᡥᡝ ᠣᠪᡠᡶᡳ᠈ ᡩᠠᡳᠮᡳᠩ ᡤᡠᡵᡠᠨ ᠪᡝ ᡩᠠᡳᠯᠠᠮᡝ ᡩᡝᡵᡳᠪᡠᡶᡳ ᠯᡳᠶᠣᠣᡩᡠᠩ᠈ ᡤᡠᠸᠠᠩᠨᡳᠩ ᠨᡳ ᠪᠠᠪᡝ ᠪᠠᡥᠠ᠉ ᡨᡝᡵᡝ ᠪᠠᠪᠠᡳ ᡶᠠᠴᡠᡥᡡᠨ ᡤᡠᡵᡠᠨ ᡳ ᠪᠠᠨᠵᡳᡥᠠᠩᡤᡝ᠈ ᡠᠯᠠᡳ ᠠᡳᠮᠠᠨ ᡳ ᡩᠠ ᡤᡝᠪᡠ ᡥᡡᠯᡠᠨ᠈ ᡥᠠᠯᠠ ᠨᠠᡵᠠ᠈ ᠠᠮᠠᠯᠠ ᡠᠯᠠᡳ ᠪᡳᡵᠠᡳ ᡩᠠᠯᡳᠨ ᡩᡝ ᡤᡠᡵᡠᠨ ᡨᡝᡥᡝ ᠰᡝᠮᡝ ᡤᡠᡵᡠᠨ ᡳ ᡤᡝᠪᡠ ᠪᡝ ᡠᠯᠠ ᠰᡝᡥᡝ᠈ ᡠᠯᠠᡳ ᡤᡠᡵᡠᠨ ᡳ ᡩᠠ ᠮᠠᡶᠠ ᠨᠠᠴᡳᠪᡠᠯᡠ᠈ ᠨᠠᠴᡳᠪᡠᠯᡠ ᡩᡝ ᠪᠠᠨᠵᡳᡥᠠᠩᡤᡝ ᡧᠠᠩᡤᡳᠶᠠᠨ ᡩᠣᡵᡥᠣᠴᡳ᠈ ᡧᠠᠩᡤᡳᠶᠠᠨ ᡩᠣᡵᡥᠣᠴᡳ ᡩᡝ ᠪᠠᠨᠵᡳᡥᠠᠩᡤᡝ ᡤᡳᠶᠠᠮᠠᡴᠠ ᡧᠣᠵᡠᡤᡡ᠈ ᡤᡳᠶᠠᠮᠠᡴᠠ ᡧᠣᠵᡠᡤᡡ ᡩᡝ ᠪᠠᠨᠵᡳᡥᠠᠩᡤᡝ ᠰᡠᡳᡨᡠᠨ᠈ ᠰᡠᡳᡨᡠᠨ ᡩᡝ ᠪᠠᠨᠵᡳᡥᠠᠩᡤᡝ ᡩᡠᠯᡤᡳ᠈ ᡩᡠᠯᡤᡳ ᡩᡝ ᠪᠠᠨᠵᡳᡥᠠᠩᡤᡝ ᡴᡝᠰᡳᠨᡝ ᡩᡠᡩᡠ ᡤᡠᡩᡝᡳ ᠵᡠᠶᠠᠨ᠈ ᡴᡝᠰᡳᠨᡝ ᡩᡠᡩᡠ ᡩᡝ ᠪᠠᠨᠵᡳᡥᠠᠩᡤᡝ ᠴᡝᠴᡝᠮᡠ᠈ ᠴᡝᠴᡝᠮᡠ ᡩᡝ ᠪᠠᠨᠵᡳᡥᠠᠩᡤᡝ ᠸᠠᠨ᠈ ᡤᡠᡩᡝᡳ ᠵᡠᠸᠠᠨ ᡩᡝ ᠪᠠᠨᠵᡳᡥᠠᠩᡤᡝ ᡨᠠᡳᡵᠠᠨ᠈ ᡨᠠᡳᡵᠠᠨ ᡩᡝ ᠪᠠᠨᠵᡳᡥᠠᠩᡤᡝ ᠪᡠᠶᠠᠨ᠈ ᠪᡠᠶᠠᠨ ᡠᠯᠠᡳ ᠠᡳᠮᠠᠨ ᠪᡝ ᡤᡝᠮᡠ ᡩᠠᡥᠠᠪᡠᡶᡳ᠈ ᡠᠯᠠᡳ ᡤᡳᡵᠠᡳ ᡩᠠᠯᡳᠨ ᡳ ᡥᠣᠩᠨᡳ ᡤᡝᠪᡠᠩᡤᡝ ᠪᠠᡩᡝ ᡥᠣᡨᠣᠨ ᠠᡵᠠᡶᡳ ᡨᡝᡶᡳ ᠠᠴᡠᠯᡝᠮᡝ ᠪᡝᡳᠯᡝ ᠰᡝᡥᡝ᠈ ᠪᡠᠶᠠᠨ ᡩᡝ ᠪᠠᠨᠵᡳᡥᠠᠩᡤᡝ ᠪᡠᡤᠠᠨ᠈ ᠪᠣᡴᡩᠣ᠈ ᠪᡠᠶᠠᠨ ᠪᡝᡳᠯᡝ ᠠᡴᡡ ᠣᡥᠣ ᠮᠠᠩᡤᡳ ᠵᡠᡳ ᠪᡠᡤᠠᠨ ᠰᡳᡵᠠᡥᠠ᠈ ᠪᡠᡤᠠᠨ ᠪᡝᡳᠯᡝ ᠠᡴᡡ ᠣᡥᠣ ᠮᠠᠩᡤᡳ ᠵᡠᡳ ᠮᠠᠨᡨᠠᡳ ᠰᡳᡵᠠᡥᠠ᠉ ᡥᠠᡩᠠᡳ ᡤᡠᡵᡠᠨ ᡳ ᠸᠠᠨ ᡥᠠᠨ ᡳ ᡥᠠᠯᠠ ᠨᠠᡵᠠ᠈ ᡤᡠᡵᡠᠨ ᡳ ᡩᠠ ᡤᡝᠪᡠ ᡥᡡᠯᡠᠨ᠈ ᠠᠮᠠᠯᠠ ᡥᠠᡩᠠ ᡤᡝᠪᡠᠩᡤᡝ ᠪᠠ ᡩᡝ ᡤᡠᡵᡠᠨ ᡨᡝᡥᡝ ᠰᡝᠮᡝ ᡤᡠᡵᡠᠨ ᡳ ᡤᡝᠪᡠ ᠪᡝ ᡥᠠᡩᠠ ᠰᡝᡥᡝ᠈ ᡠᠯᠠᡳ ᡤᡠᡵᡠᠨ ᡳ ᠪᡝᡳᠰᡝᡳ ᡩᠠ ᠮᠠᡶᠠ ᠨᠠᠴᡳᠪᡠᠯᡠᡳ ᠨᠠᡩᠠᠴᡳ ᠵᠠᠯᠠᠨ ᡳ ᠣᠮᠣᠯᠣ᠈ ᠸᠠᠨ ᡳ ᠮᠠᡶᠠ ᡴᡝᠰᡳᠨᡝ ᡩᡠᡩᡠ ᠪᡝ ᡳᠨᡳ ᡠᡴᠰᡠᠨ ᡳ ᠪᠠᡩᠠᡳ ᡩᠠᡵᡥᠠᠨ ᠸᠠᡵᠠ ᠵᠠᡴᠠᡩᡝ᠈ ᠸᠠᠨ ᠪᡠᡵᡠᠯᠠᠮᡝ ᡨᡠᠴᡳᡶᡳ᠈ ᠰᡳᠪᡝᡳ ᠠᡳᠮᠠᠨ ᡳ ᡥᠠᠨᠴᡳ ᠰᡠᡳᡥᠠ ᡤᡝᠪᡠᠩᡤᡝ ᡥᠣᡨᠣᠨ ᡩᡝ ᡨᡝᡥᡝ᠈ ᠸᠠᠨ ᡳ ᡝᠰᡥᡝᠨ ᠸᠠᠩᠵᡠ ᠸᠠᡳᠯᠠᠨ ᡤᡝᠯᡳ ᠪᡠᡵᡠᠯᠠᠮᡝ ᡤᡝᠨᡝᡶᡳ ᡥᠠᡩᠠᡳ ᠠᡳᠮᠠᠨ ᡩᡝ ᡝᠵᡝᠨ ᠣᡥᠣ᠈ ᠠᠮᠠᠯᠠ ᡥᠠᡩᠠᡳ ᠠᡳᠮᠠᠨ ᡶᠠᠴᡠᡥᡡᡵᠠᡶᡳ ᠸᠠᠩᠵᡠ ᠸᠠᡳᠯᠠᠨ ᠪᡝ ᠸᠠᡥᠠ ᠮᠠᠩᡤᡳ᠈ ᠸᠠᠩᠵᡠ ᠸᠠᡳᠯᠠᠨ ᡳ ᠵᡠᡳ ᠪᠣᠯᡴᠣᠨ ᡧᡝᠵᡳᠨ ᠠᠮᠠᡳ ᠪᠠᡨᠠ ᠪᡝ ᠸᠠᡶᡳ ᠠᡥᡡᠨ ᠸᠠᠨ ᠪᡝ ᠰᡠᡳᡥᠠ ᡥᠣᡨᠣᠨ ᡩᡝ ᡤᠠᠨᠠᡶᡳ ᡠᡨᡥᠠᡳ ᠠᡳᠮᠠᠨ ᡩᡝ ᡝᠵᡝᠨ ᠣᠪᡠᡥᠠ᠈ ᠸᠠᠨ ᡥᠠᠨᠴᡳᡴᡳ ᠪᡝ ᡩᠠᡳᠯᠠᠮᡝ ᡤᠣᡵᠣᡴᡳ ᠪᡝ ᡩᠠᡥᠠᠪᡠᠮᡝ ᡝᡨᡝᠩᡤᡳ ᠣᡥᠣ ᠮᠠᠩᡤᡳ᠈ ᠸᠠᠨ ᡝᠨᠴᡠᠯᡝᠮᡝ ᡥᠠᠨ ᠣᡶᡳ᠈ ᡤᡠᡵᡠᠨ ᡳ ᡤᡝᠪᡠ ᠪᡝ ᡥᠠᡩᠠ ᠰᡝᡥᡝ᠈ ᡨᡝᡵᡝ ᡶᠣᠨᡩᡝ ᠸᠠᠨ ᡥᠠᠨ ᡩᡝ ᠶᡝᡥᡝ᠈ ᡠᠯᠠ᠈ ᡥᠣᡳᡶᠠ᠈ ᠮᠠᠨᠵᡠ ᡤᡠᡵᡠᠨ ᡳ ᡥᡠᠨᡝᡥᡝ ᡤᠣᠯᠣᡳ ᠠᡳᠮᠠᠨ ᡩᠠᡥᠠᡶᡳ᠈ ᠶᠠᠶᠠ ᠸᡝᡳᠯᡝ ᠪᡝ ᠸᠠᠨ ᡥᠠᠨ ᡩᡝ ᡥᠠᠪᡧᠠᠨᠠᠮᡝ ᠠᡳᠰᡳᠨ ᠮᡝᠩᡤᡠᠨ᠈ ᡠᠯᡳᠨ ᠵᠣᡩᠣᠨ ᠪᡝᠨᡝᡥᡝ ᠨᡳᠶᠠᠯᠮᠠᡳ ᠸᡝᡳᠯᡝᠨ ᠶᠠᡵᡤᡳᠶᠠᠨ ᡳ ᠸᠠᡴᠠ ᠪᡳᠴᡳᠪᡝ ᡠᡵᡠᠨᠠᡴᡡ ᡠᡵᡠ ᠣᠪᡠᠮᡝ᠈ ᠠᡳᠰᡳᠨ ᠮᡝᠩᡤᡠᠨ᠈ ᡠᠯᡳᠨ ᠵᠣᡩᠣᠨ ᠪᡝᠨᡝᡥᡝᡴᡡ ᠨᡳᠶᠠᠯᠮᠠᡳ ᠸᡝᡳᠯᡝ ᡠᡩᡠ ᡠᡵᡠ ᠪᡳᠴᡳᠪᡝ ᡠᡵᡠᠨᠠᡴᡡ ᠸᠠᡴᠠ ᠣᠪᡠᠮᡝ ᠪᡝᡳᡩᡝᠮᡝ᠈ ᡠᠯᡳᠨ ᡩᡝ ᡩᠣᠣᠰᡳ᠈ ᡝᡥᡝ ᠣᠰᡥᠣᠨ ᠣᡶᡳ᠈ ᠠᠮᠪᠠᠰᠠ ᡤᡝᠮᡠ ᠠᠯᡥᡡᡩᠠᠮᡝ ᡤᠣᠯᠣ ᡤᠣᠯᠣ ᡩᡝ ᡨᠠᡴᡡᡵᠠᡥᠠ ᠪᠠᡩᡝ ᡩᠠᠪᠠᡧᠠᠮᡝ ᡤᠠᡥᠣᡩᠣᠮᡝ ᡠᠯᡤᡳᠶᠠᠨ ᠴᠣᡴᠣ ᠪᡝ ᡤᠠᠪᡨᠠᠮᡝ ᠸᠠᠮᡝ᠈ ᠰᠠᡳᠨ ᡠᠯᡳᠨ᠈ ᠰᠠᡳᠨ ᡤᡳᠶᠠᡥᡡᠨ ᡳᠨᡩᠠᡥᡡᠨ ᠪᡝ ᠰᠠᡥᠠ ᡩᡝ ᡠᡨᡥᠠᡳ ᡤᠠᡳᠮᡝ ᡠᠯᡳᠨ ᠪᡠᡥᡝ ᠨᡳᠶᠠᠯᠮᠠ ᠪᡝ ᠰᠠᡳᠨ᠈ ᠪᡠᡥᡝᡴᡡ ᠨᡳᠶᠠᠯᠮᠠ ᠪᡝ ᡝᡥᡝ ᠰᡝᠮᡝ ᠠᠯᠠᡥᠠ ᡩᡝ ᠸᠠᠨ ᡥᠠᠨ᠈ ᡩᠠ ᡩᡠᠪᡝ ᠪᡝ ᡩᠠᠴᡳᠯᠠᡵᠠᡴᡡ ᡤᡳᠰᡠᠨ ᠪᡝ ᡤᠠᡳᠮᡝ ᡤᡠᡵᡠᠨ ᠪᡝ ᠵᠣᠪᠣᠪᡠᠮᡝ ᠣᡶᡳ ᡳᠨᡳ ᠪᠠᡥᠠ ᡩᠣᡵᠣ ᡳᠨᡳ ᠪᡝᠶᡝ ᡩᡝ ᡩᡶᡠᠵᡝᠮᡝ ᡩᡝᡵᡳᠪᡠᡶᡳ ᡳᡵᡤᡝᠨ ᠠᠮᠪᡠᠯᠠ ᡠᠪᠠᡧᠠᡶᡳ ᠶᡝᡥᡝᡳ ᡤᡠᡵᡠᠨ ᡩᡝ ᡩᠣᠰᡳᡴᠠ᠈ ᠨᡝᠨᡝᠮᡝ ᡩᠠᡥᠠᡥᠠ ᡤᡠᡵᡠᠨ ᡤᡝᠮᡠ ᡥᡡᠸᠠᠯᡳᠶᠠᡴᠠ᠈ ᠸᠠᠨ ᡥᠠᠨ ᠠᡴᡡ ᠣᡥᠣ ᠮᠠᠩᡤᡳ᠈ ᠵᡠᡳ ᡥᠣᡵᡤᠠᠨ ᠰᡳᡵᠠᡶᡳ ᡤᠣᡳᡩᠠᡥᠠᡴᡡ ᠵᠠᡴᡡᠴᡳ ᠪᡳᠶᠠ ᡩᡝ ᠠᡴᡡ ᠣᡥᠣ᠈ ᡥᠣᡵᡤᠠᠨ ᠪᡝᡳᠯᡝ ᠠᡴᡡ ᠣᡥᠣ ᠮᠠᠩᡤᡳ᠈ ᡩᡝᠣ ᡴᠠᠩᡤᡡᡵᡠ ᠰᡳᡵᠠᡥᠠ᠈ ᡴᠠᠩᡤᡡᡵᡠ ᠪᡝᡳᠯᡝ ᠠᡴᡡ ᠣᡥᠣ ᠮᠠᠩᡤᡳ᠈ ᡩᡝᠣ ᠮᠠᠩᡤᡝᠪᡠᠯᡠ ᠰᡳᡵᠠᡥᠠ᠉ ᠶᡝᡥᡝᡳ ᠠᡳᠮᠠᠨ ᡳ ᡩᠠ ᠮᠠᡶᠠ ᠮᠣᠩᡤᠣ ᡤᡠᡵᡠᠨ ᡳ ᠨᡳᠶᠠᠯᠮᠠ᠈ ᡥᠠᠯᠠ ᡨᡠᠮᡤᠣᠨ᠈ ᠵᠠᠩ ᡤᡝᠪᡠᠩᡤᡝ ᠪᠠᡩᡝ ᡨᡝᡥᡝ ᡥᡡᠯᡠᠨ ᡳ ᠨᠠᡵᠠ ᡥᠠᠯᠠᡳ ᠠᡳᠮᠠᠨ ᠪᡝ ᡝᡶᡠᠯᡝᡶᡳ᠈ ᡨᡝᡵᡝᡳ ᠪᠠᠪᡝ ᠰᠠᠯᡳᡶᡳ ᠨᠠᡵᠠ ᡥᠠᠯᠠ ᠣᡥᠣ᠈ ᠠᠮᠠᠯᠠ ᠶᡝᡥᡝ ᡤᡝᠪᡠᠩᡤᡝ ᠪᡳᡵᠠᡳ ᡩᠠᠯᡳᠨ ᡩᡝ ᡤᡠᡵᡠᠨ ᡨᡝᡥᡝ ᠰᡝᠮᡝ ᡤᡠᡵᡠᠨ ᡳ ᡤᡝᠪᡠ ᠪᡝ ᠶᡝᡥᡝ ᠰᡝᡥᡝ᠈ ᡩᠠ ᠮᠠᡶᠠ ᠰᡳᠩᡤᡝᠨ ᡩᠠᡵᡥᠠᠨ᠈ ᠰᡳᠩᡤᡝᠨ ᡩᠠᡵᡥᠠᠨ ᡩᡝ ᠪᠠᠨᠵᡳᡥᠠᠩᡤᡝ ᠰᡳᡵᡴᡝ ᠮᡳᠩᡤᠠᡨᡠ᠈ ᠰᡳᡵᡴᡝ ᠮᡳᠩᡤᠠᡨᡠ ᡩᡝ ᠪᠠᠨᠵᡳᡥᠠᠩᡤᡝ ᠴᡳᡵᡤᠠᠨᡳ᠈ ᠴᡳᡵᡤᠠᠨᡳ ᡩᡝ ᠪᠠᠨᠵᡳᡥᠠᠩᡤᡝ ᠴᡠᡴᡠᠩᡤᡝ᠈ ᠴᡠᡴᡠᠩᡤᡝ ᡩᡝ ᠪᠠᠨᠵᡳᡥᠠᠩᡤᡝ ᡨᠠᡳᠴᡠ᠈ ᡨᠠᡳᠴᡠ ᡩᡝ ᠪᠠᠨᠵᡳᡥᠠᠩᡤᡝ ᠴᡳᠩᡤᡳᠶᠠᠨᡠ᠈ ᠶᠠᠩᡤᡳᠨᡠ᠈ ᠴᡳᠩᡤᡤᡳᠶᠠᠨᡠ᠈ᠶᠠᠩᡤᡳᠨᡠ ᠶᡝᡥᡝ ᠠᡳᠮᠠᠨ ᠪᡝ ᡤᡝᠮᡠ ᡩᠠᡥᠠᠪᡠᡶᡳ᠈ ᠠᡥᡡᠨ ᡩᡝᠣ ᡝᠮᡨᡝ ᡥᠣᡨᠣᠨ ᡩᡝ ᡨᡝᡥᡝ ᠮᠠᠩᡤᡳ᠈ ᡤᠠᡩᠠᡠ ᡤᡠᡵᡠᠨ ᡳ ᠨᡳᠶᠠᠯᠮᠠ ᠠᠮᠪᡠᠯᠠ ᡩᠠᡥᠠᠮᡝ ᠵᡳᡥᡝ᠈ ᡨᡝᡵᡝᠴᡳ ᠴᡳᠩᡤᡳᠶᠠᠨᡠ᠈ ᠶᠠᠩᡤᡳᠨᡠ ᠠᠴᡠᠯᡝᠮᡝ ᠪᡝᡳᠯᡝ ᠣᡥᠣ᠈ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨ ᠯᡳᡳ ᡥᠠᠨ ᡳ ᡨᠠᡳᡯᡳ ᡨᠠᡳᠪᠣᠣ ᡥᡝᡵᡤᡝᠨ ᡳ ᠯᡳᠴᡝᠩᠯᡳᠶᠠᠩ ᡤᡝᠪᡠᠩᡤᡝ ᠠᠮᠪᠠᠨ᠈ ᡥᠠᡩᠠᡳ ᠨᡳᠶᠠᠯᠮᠠ ᡧᡠᠰᡳᡥᡳᠶᡝᠮᡝ ᠪᡝᠨᡝᡥᡝ ᠪᠣᡵᠣ ᡩᠣᠪᡳᡥᡳ ᠰᠠᡥᠠᠯᡳᠶᠠᠨ ᠰᡝᡴᡝ᠈ ᠠᡳᠰᡳᠨ ᠮᡝᠩᡤᡠᠨ ᠪᡝ ᠠᠯᡳᠮᡝ ᡤᠠᡳᡶᡳ᠈ ᠶᡝᡥᡝᡳ ᡤᡠᡵᡠᠨ ᡳ ᠴᡳᠩᡤᡳᠶᠠᠨᡠ᠈ ᠶᠠᠩᡤᡳᠨᡠ ᠵᡠᠸᡝ ᠪᡝᡳᠯᡝ ᠪᡝ ᠺᠠᡳ ᠵᡠᠸᠠᠨ ᡥᡝᠴᡝᠨ ᡩᡝ ᠵᡳᠣ᠈ ᡝᠵᡝᡥᡝ ᡠᠯᡳᠨ ᠪᡠᡵᡝ ᠰᡝᠮᡝ ᠵᠠᠯᠠᡩᠠᠮᡝ ᡤᠠᠮᠠᡶᡳ᠈ ᠸᠠᠨ ᠯᡳᡳ ᡥᠠᠨ ᡳ ᠵᡠᠸᠠᠨ ᠵᡠᠸᡝ ᠴᡳ ᠨᡳᠣᠸᠠᠩᡤᡳᠶᠠᠨ ᠪᠣᠨᡳᠣ ᠠᠨᡳᠶᠠ ᠴᡳᠩᡤᡳᠶᠠᠨᡠ ᠶᠠᠩᡤᡳᠨᡠ᠈ ᠵᡠᠸᡝ ᠪᡝᡳᠯᡝ ᡩᠠᡥᠠᠮᡝ ᡤᡝᠨᡝᡥᡝ ᡳᠯᠠᠨ ᡨᠠᠩᡤᡡ ᠴᠣᠣᡥᠠ ᠪᡝ ᡤᡠᠸᠠᠨ ᠶᡝᡳ ᠮᡳᠶᠣ ᡳ ᡩᠣᠯᠣ ᡥᠣᡵᡳᡶᡳ ᡤᡝᠮᡠ ᠸᠠᡥᠠ᠈ ᡨᡝᡵᡝ ᠵᡠᠸᡝ ᠪᡝᡳᠯᡝ ᡶᠠᠪᡠᡥᠠ ᠮᠠᠩᡤᡳ᠈ ᠴᡳᠩᡤᡳᠶᠠᠨᡠ᠈ ᠪᡝᡳᠯᡝᡳ ᠵᡠᡳ ᠪᡠᠵᠠᡳ᠈ ᠶᠠᠩᡤᡳᠨᡠ ᠪᡝᡳᠯᡝᡳ ᠵᡠᡳ ᠨᠠᡵᡳᠮᠪᡠᠯᠣ ᡤᡠᡵᡠᠨ ᠪᡝ ᡝᠵᡳᠯᡝᡶᡳ ᠪᡝᡳᠯᡝ ᠣᡥᠣ᠈ ᡨᡝᡵᡝᠴᡳ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨ ᠯᡳᡳ ᡥᠠᠨ ᡳ ᠯᡳᠴᡝᠩᠯᡳᠶᠠᠩ᠈ ᠶᡝᡥᡝᡳ ᡤᡠᡵᡠᠨ ᡳ ᠵᡠᠸᡝ ᠪᡝᡳᠯᡝ ᠪᡝ ᠸᠠᡶᡳ᠈ ᡠᡨᡥᠠᡳ ᠴᠣᠣᡥᠠ ᡤᠠᡳᡶᡳ ᠶᡝᡥᡝᡳᡳ ᡤᡠᡵᡠᠨ ᠪᡝ ᡩᠠᡳᠯᠠᠮᡝ ᡤᡝᠨᡝᡶᡳ ᡩᡠᡴᠠ᠈ ᠨᡳᠶᠠᡥᠠᠨ ᡤᡝᠪᡠᠩᡤᡝ ᠵᡠᠸᡝ ᡤᠠᡧᠠᠨ ᠪᡝ ᠠᡶᠠᠮᡝ ᡤᠠᡳᡥᠠ᠈ ᡨᡝᡵᡝ ᠠᡶᠠᡵᠠ ᡩᡝ ᠴᠣᠣᡥᠠᡳ ᠨᡳᠶᠠᠯᠮᠠ ᠠᠮᠪᡠᠯᠠ ᡥᠣᡵᠣ ᠪᠠᡥᠠᡵᠠ ᠵᠠᡴᠠᡩᡝ ᡠᡨᡥᠠᡳ ᠴᠣᠣᡥᠠ ᠪᡝᡩᡝᡵᡝᡥᡝ᠈ ᠸᠠᠨ ᠯᡳᡳ ᠵᡠᠸᠠᠨ ᠨᡳᠣᠸᠠᠩᡤᡳᠶᠠᠨ ᠰᡠᠸᠠᠶᠠᠨ ᠰᡳᠩᡤᡝᡵᡳ ᠠᠨᡳᠶᠠ᠈ ᠯᡳᡳ ᠴᡝᠩ ᠯᡳᠶᠠᠩ ᡤᡝᠯᡳ ᠴᠣᠣᡥᠠ ᡤᠠᡳᡶᡳ ᠶᡝᡥᡝᡳ ᡤᡠᡵᡠᠨ ᠪᡝ ᡩᠠᡳᠯᠠᠮᡝ ᡤᡝᠨᡝᡩᡳ ᠨᠠᡵᡳᠮᠪᡠᠯᠣ ᠪᡝᡳᠯᡝ ᡨᡝᡥᡝ ᡩᡝᡵᡤᡳ ᡥᡝᠴᡝᠨ ᠪᡝ ᡴᠠᡶᡳ ᠠᡶᠠᠮᡝ ᠴᠣᠣᡥᠠᡳ ᠨᡳᠶᠠᠯᠮᠠ ᠠᠮᠪᡠᠯᠠ ᡴᠣᡵᠣ ᠪᠠᡥᠠᡶᡳ ᠠᡶᠠᠮᡝ ᠮᡠᡨᡝᡵᠠᡴᡡ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᡥᠣᡳᡶᠠ ᡳ ᡤᡠᡵᡠᠨ ᡳ ᡥᠠᠯᠠ ᡳᡴᡩᡝᡵᡳ᠈ ᠰᠠᡥᠠᠯᡳᠶᠠᠨ ᡠᠯᠠ ᠰᠠᡥᠠᠯᡳᠶᠠᠨ ᡠᠯᠠ ᡥᡝᠯᡠᠩ ᡤᡳᠶᠠᠩ ᡳᠨᡠ᠈ ᡨᡝᡵᡝᡳ ᡩᠠ ᡧᠠᠩᡤᡳᠶᠠᠨ ᠠᠯᡳᠨᠴᡳ ᡨᡠᠴᡳᡴᡝᠪᡳ᠉ ᡩᠠᠯᡳᠨ ᡩᡝ ᡨᡝᡥᡝ ᠨᡳᠮᠠᠴᠠᠨ ᠠᡳᠮᠠᠨ ᡳ ᠨᡳᠶᠠᠯᠮᠠ ᡩᠠ ᠮᠠᡶᠠ ᠠᠩᡤᡡᠯᡳ᠈ ᠰᡳᠩᡤᡡᠯᡳ᠈ ᠰᠠᡥᠠᠯᡳᠶᠠᠨ ᡩᡝ ᡠᠯᠠ ᠴᡳ ᡤᡠᡵᡳᠮᡝ ᠰᠣᡴᡳ ᠸᡝᠴᡳᡴᡠ ᠪᡝ ᡤᠠᠵᡳᠮᡝ ᠵᡳᡶᡳ ᠵᠠᡵᡠ ᡤᡝᠪᡠᠩᡤᡝ ᠪᠠᡩᡝ ᡨᡝᡶᡳ᠈ ᠵᠠᠩ ᡤᡝᠪᡠᠩᡤᡝ ᠪᠠᡩᡝ ᡨᡝᡥᡝ ᡥᠣᠯᡠᠨ ᡳ ᡤᠠᠶᠠᠩᡤᠠ ᡨᡠᠮᡝᡨᡠ ᡤᡝᠪᡠᠩᡤᡝ ᠨᡳᠶᠠᠯᠮᠠ ᡩᡝ ᠨᠠᡩᠠᠨ ᡳᡥᠠᠨ ᠮᡝᡨᡝᠮᡝ ᠨᠠᡵᠠ ᡥᠠᠯᠠ ᠣᡥᠣ᠈ ᠰᡳᠩᡤᡡᠯᡳ ᡩᡝ ᠪᠠᠨᠵᡳᡥᠠᠩᡤᡝ ᠯᡳᠣᠴᡝᠨ᠈ ᠪᡝᡳᠴᡝᠨ᠈ ᠪᡝᡳᠴᡝᠨ ᡩᡝ ᠪᠠᠨᠵᡳᡥᠠᠩᡤᡝ ᠨᠠᠯᡳᠩᡤᠠ᠈ ᠨᠠᡳᡴᡡᠸᠠᠨ᠈ ᠨᠠᠯᡳᠩᡤᠠ ᡩᡝ ᠪᠠᠨᠵᡳᡥᠠᠩᡤᡝ ᠯᠠᡥᠠ ᡩᡠᡩᡠ᠈ ᠯᠠᡥᠠ ᡩᡠᡩᡠ ᡩᡝ ᠪᠠᠨᠵᡳᡥᠠᠩᡤᡝ ᡤᠠᡥᠠᠴᠠᠨ ᡩᡠᡩᡠ᠈ ᡤᠠᡥᠠᠴᠠᠨ ᡩᡠᡩᡠ ᡩᡝ ᠪᠠᠨᠵᡳᡥᠠᠩᡤᡝ ᠴᡳᠨᡝᡤᡝᠨ ᡩᠠᡵᡥᠠᠨ᠈ ᠴᡳᠨᡝᡤᡝᠨ ᡩᠠᡵᡥᠠᠨ ᡩᡝ ᠪᠠᠨᠵᡳᡥᠠᠩᡤᡝ ᠸᠠᠩᡤᡳᠨᡠ᠈ ᠸᠠᠩᡤᡳᠨᡠ ᡥᠣᡳᡶᠠ ᡳ ᠠᡳᠮᠠᠨ ᠪᡝ ᡩᠠᡥᠠᠪᡠᡶᡳ ᡥᠣᡳᡶᠠ ᠪᡳᡵᠠᡳ ᡩᠠᠯᡳᠨ ᡳ ᡥᡡᡵᡴᡳ ᡤᡝᠪᡠᠩᡤᡝ ᡥᠠᡩᠠ ᡩᡝ ᡥᠣᡨᠣᠨ ᠠᡵᠠᡶᡳ ᡨᡝᡶᡳ ᡤᡠᡵᡠᠨ ᡳ ᡤᡝᠪᡠ ᠪᡝ ᡥᠣᡳᡶᠠ ᠰᡝᡥᡝ᠉ ᡨᡝᡵᡝ ᡶᠣᠨᡩᡝ ᠮᠣᠩᡤᠣ ᡤᡠᡵᡠᠨ ᡳ ᠴᠠᡥᠠᡵᠠᡳ ᠵᠠᠰᠠᡴᡨᡠ ᡨᡠᠮᡝᠨ ᡥᠠᠨ᠈ ᡳᠨᡳ ᠪᡝᠶᡝ ᠴᠣᠣᡥᠠ ᠵᡳᡶᡳ ᠸᠠᠩᡤᡳᠨᡠ ᠪᡝᡳᠯᡝᡳ ᡨᡝᡥᡝ ᡥᠣᡳᡶᠠᡳ ᡥᠠᡨᠣᠨ ᠨᡝ ᡴᠠᡶᡳ ᠠᡶᠠᡶᡳ ᠪᠠᡥᠠᡴᡡ ᠴᠣᠣᡥᠠ ᠪᡝᡩᡝᡵᡝᡥᡝ᠈ ᠸᠠᠩᡤᡳᠨᡠ ᠪᡝᡳᠯᡝ ᠠᡴᡡ ᠣᡥᠣ ᠮᠠᠩᡤᡳ᠈ ᠣᠮᠣᠯᠣ ᠪᠠᡳᠨᡩᠠᡵᡳ ᡳᠨᡳ ᠨᠠᡩᠠᠨ ᡝᠰᡥᡝᠨ ᠮᠠᠩᡤᡳ᠈ ᡤᡝᠮᡠ ᠸᠠᡶᡳ ᡥᠣᡳᡶᠠᡳ ᡤᡠᡵᡠᠨ ᠪᡝ ᡝᠮᡥᡠᠨ ᡝᠵᡳᠯᡝᡶᡳ ᠪᡝᡳᠯᡝ ᠣᡥᠣ᠉ ᠨᡳᡴᠠᠨ ᡳ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨᠯᡳ ᡥᠠᠨ ᡳ ᠵᡠᠸᠠᠨ ᡝᠮᡠᠴᡳ ᠰᠠᡥᠠᡥᡡᠨ ᡥᠣᠨᡳᠨ ᠠᠨᡳᠶᠠ ᠨᡳᠶᡝᠩᠨᡳᠶᡝᡵᡳ ᡩᡠᠯᡳᠮᠪᠠᡳ ᠪᡳᠶᠠ ᡩᡝ ᠮᠠᠨᠵᡠ ᡤᡠᡵᡠᠨ ᡳ ᠰᡠᡴᠰᡠᡥᡠ ᠪᡳᡵᠠᡳ ᠠᡳᠮᠠᠨ ᡳ ᡵᡠᠨ ᡳ ᡥᠣᡨᠣᠨ ᡳ ᠨᡳᡴᠠᠨ ᠸᠠᡳᠯᠠᠨ ᡤᡝᠪᡠᠩᡤᡝ ᠨᡳᠶᠠᠯᠮᠠ᠈ ᠸᠠᠨ ᠯᡳᡳ ᡥᠠᠨ ᡳ ᡨᠠᡳᡯᡳ ᡨᠠᡳᠪᠣᠣ ᡥᡝᡵᡤᡝᠨ ᡳ ᠯᡳᠴᡝᠩᠯᡳᠶᠠᠩ ᡤᡝᠪᡠᠩᡤᡝ ᠠᠮᠪᠠᠨ ᠪᡝ ᡧᡠᠰᡳᡥᡳᠶᡝᡶᡳ᠈ ᡤᡠᡵᡝ ᡤᡝᠪᡠᠩᡤᡝ ᡥᠣᡨᠣᠨ ᡳ ᡝᠵᡝᠨ ᠠᡨᠠᡳ ᠵᠠᠩᡤᡳᠨ᠈ ᡧᠠᠵᡳ ᡤᡝᠪᡠᠩᡤᡝ ᡥᠣᡨᠣᠨ ᡳ ᡝᠵᡝᠨ ᠠᡥᠠᡳ ᠵᠠᠩᡤᡳᠨ ᠪᡝ ᡩᠠᡳᠯᠠᠮᡝ ᠨᡳᡴᠠᠨ ᠸᠠᡳᠯᠠᠨ ᠪᡝ ᡨᡝᠮᡤᡝᡨᡠᠯᡝᠮᡝ ᡤᡠᠸᠠᡶᡠᠯᠠᡶᡳ ᠯᡳᠴᡝᠩᠯᡳᠶᠠᠩ ᡤᡠᠸᠠᠩᠨᡳᠩ ᠯᡳᠣᡩᡠᠩ ᠨᡳ ᠴᠣᠣᡥᠠ ᠪᡝ ᡤᠠᡳᡶᡳ ᠵᡠᠸᡝ ᠵᡠᡤᡡᠨᡳ ᡩᠣᠰᡳᠮᡝ ᠵᡳᡶᡳ ᠯᡳᠴᡝᠩᠯᡳᠶᠠᠩ ᡳᠨᡳ ᠪᡝᠶᡝ ᠠᡨᠠᡳ ᠵᠠᠩᡤᡳᠨ ᡳ ᡤᡠᡵᡝᡳ ᡥᠣᡨᠣᠨ ᠪᡝ ᡴᠠᡥᠠ᠈ ᠯᡳᠣᡩᡠᠩ ᠨᡳ ᡶᡠᠵᡳᠶᠠᠩ ᠠᡥᠠᡳ ᠵᠠᠩᡤᡳᠨ ᡳ ᡨᡝᡥᡝ ᡧᠠᠵᡳ ᡥᠣᡨᠣᠨ ᠪᡝ ᡴᠠᠮᡝ ᠵᡳᡩᡝᡵᡝ ᠪᡝ᠈ ᡥᠣᡨᠣᠨ ᡳ ᠨᡳᠶᠠᠯᠮᠠ ᠰᠠᠪᡠᡶᡳ ᡩᡠᠯᡤᠠ ᠪᡠᡵᠯᠠᠮᡝ ᠨᡠᡴᡝᠴᡳᡴᡝ᠈ ᡩᡠᠯᡤᡝ ᠨᡳᠶᠠᠯᠮᠠ ᡶᠠᡳᡨᠠᠪᡠᡶᡳ ᡥᡥᠣᡨᠣᠨ ᡩᡝ ᡴᠠᠪᡠᡥᠠ᠈ ᠯᡳᠣᡩᡠᠩ ᠨᡳ ᡶᡠᠵᡳᠶᠠᠩ ᠨᡳ ᠴᠣᠣᡥᠠ ᡨᡝᡵᡝ ᡧᠠᠵᡳ ᡥᠣᡨᠣᠨ ᠪᡝ ᠠᡶᠠᠮᡝ ᡤᠠᡳᡶᡳ ᠠᡥᠠᡳ ᠵᠠᠩᡤᡳᠨ ᠪᡝ ᠸᠠᡶᡳ ᠯᡳᠴᡝᠩᠯᡳᠶᠠᠩ ᡩᡝ ᠠᠴᠠᠨᠵᡳᡶᡳ ᠠᡨᠠᡳ ᠵᠠᠩᡤᡳᠨ ᡳ ᡶᡠᡵᡝᡳ ᡥᠣᡨᠣᠨ ᠪᡝ ᡴᠠᡥᠠ᠈ ᡨᡝᡵᡝ ᡥᠣᡨᠣᠨ ᡳ ᡝᠵᡝ ᠠᡨᠠᡳ ᠵᠠᠩᡤᡳᠨ ᡩᡝ ᠈ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠮᠠᡶᠠ □□ ᡳ ᠵᡠᡳ ᠯᡳᡩᡠᠨ ᠪᠠᡨᡠᡵᡠ ᡳ ᠰᠠᡵᡤᠠᠨ ᠵᡠᡳ ᠪᡝ ᠪᡠᡥᡝ ᠪᡳᡥᡝ᠈ ᡨᡝᡵᡝ ᠴᠣᠣᡥᠠ ᠵᡳᡥᡝ ᠮᡝᡩᡝᡤᡝ ᠪᡝ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠮᠠᡶᠠ □□ ᡩᠣᠨᠵᡳᡶᡳ ᡳᠨᡳ ᠣᠮᠣᠯᠣ ᠰᠠᡵᡤᠠᠨ ᠵᡠᡳ ᠪᡝ ᡩᠠᡳᠮᡳᠩ ᠨᡳ ᠴᠣᠣᡥᠠ ᡩᡝ ᡤᠠᡳᠪᡠᡵᠠᡴᡡ ᠰᡝᠮᡝ ᡳᠨᡳ ᡩᡠᡳᠴᡳ ᠵᡠᡳ □□ ᠪᡝ ᡤᠠᠮᠠᠮᡝ ᡤᡝᠨᡝᡶᡳ᠈ ᡤᡠᡵᡝᡳ ᡥᠣᡨᠣᠨ ᡩᡝ ᡳᠰᡳᠨᠠᡶᡳ ᠯᡳᠴᡝᠩᠯᡳᠶᠠᠩ ᠨᡳ ᠴᠣᠣᡥᠠ ᠵᡳᡳᠩ ᠠᡶᠠᡵᠠ ᡩᡠᠯᡳᠮᠪᠠ ᡩᡝ᠈ ᠵᡠᡳ □□ ᠪᡝ ᡥᠣᡨᠣᠨ ᡳ ᡩᡝᠯᡝ ᡳᠯᡳᠪᡠᡶᡳ ᡳᠨᡳ ᠪᡝᠶᡝ ᡥᠣᡨᠣᠨ ᡩᡝ ᡩᠣᠰᡳᡶᡳ ᠣᠮᠣᠯᠣ ᠰᠠᡵᡤᠠᠨ ᠵᡠᡳ ᠪᡝ ᡨᡠᠴᡳᠪᡠᡶᡳ ᡤᠠᠵᡳᡴᡳ ᠰᡝᠴᡳ᠈ ᠠᡨᠠᡳ ᠵᠠᠩᡤᡳᠨ ᡠᠩᡤᡳᡵᠠᡴᡡ ᠪᡳᠰᡳᡵᡝ ᡩᡝ᠈ ᠵᡠᡳ □□ ᠠᠮᠠ ᠪᡝ ᡤᠣᡳᡩᠠᠮᠪᡳ ᠰᡝᠮᡝ ᡤᡝᠯᡳ ᡥᠣᡨᠣᠨ ᡩᡝ ᡩᠣᠰᡳᡴᠠ᠈ ᡨᡝᡵᡝᠴᡳ ᠯᡳᠴᡝᠩᠯᡳᠶᠠᠩ ᡤᡠᡵᡝᡳ ᡥᠣᡨᠣᠨ ᠪᡝ ᡴᠠᡶᡳ ᠠᡶᠠᠴᡳ᠈ ᡨᡝᡵᡝ ᡥᠣᡨᠣᠨ ᠠᠯᡳᠨ ᡳ ᠨᡳᠩᡤᡠ ᡩᡝ ᠰᠠᡥᠠᡶᡳ ᠠᡴᡩᡠᠨ ᠣᡶᡳ᠈ ᠠᡨᠠᡳ ᠵᠠᠩᡤᡳᠨ ᠴᠣᠣᡥᠠ ᡤᠠᡳᡶᡳ ᠪᡝᡴᡳᠯᡝᠮᡝ ᡨᡠᠸᠠᡴᡳᠶᠠᡶᡳ ᡩᡠᡴᠠ ᡨᡠᠴᡳᡶᡳ᠈ ᡥᠣᡨᠣᠨ ᠪᡳᡨᡠᠮᡝᠨ ᠠᡶᠠᡵᠠ ᠴᠣᠣᡥᠠ ᠪᡝ ᠰᠠᠴᡳᠮᡝ ᡠᡩᡠ ᡠᡩᡠ ᠵᡝᡵᡤᡳ ᠸᠠᡥᠠ᠈ ᠯᡳᠴᡝᠩᠯᡳᠶᠠᠩ ᠠᡶᠠᠮᡝ ᠮᡠᡨᡝᡵᠠᡴᡡ᠈ ᠴᠣᠣᡥᠠ ᠠᠮᠪᡠᠯᠠ ᡴᠣᡴᡳᡵᠠᠪᡠᡵᡝ ᠵᠠᡴᠠᡩᡝ᠈ ᠨᡳᡴᠠᠨ ᠸᠠᡳᠯᠠᠨ ᠪᡝ ᡥᠠᡶᡳᡵᠠᠮᡝ ᠰᡳ ᡧᡠᠰᡳᡥᡳᠶᡝᡶᡳ ᡤᠠᠵᡳᡶᡳ᠈ ᠮᡳᠨᡳ ᠴᠣᠣᡥᠠ ᡴᠣᡳᡴᡳᡵᠠᡥᠠ ᠰᡝᠮᡝ ᠵᠠᡶᠠᡴᡳ ᠰᡝᡵᡝ ᡩᡝ᠈ ᠨᡳᡴᠠᠨ ᠸᠠᡳᠯᠠᠨ ᡤᠣᠯᠣᡶᡳ ᡥᡝᠨᡶᡠᠮᡝ᠈ ᠪᡳ ᡥᡡᠯᠠᠮᡝ ᡩᠠᡥᠠᠪᡠᠮᡝ ᡨᡠᡶᡳᡵᠠ ᠰᡝᡶᡳ᠈ ᡥᠣᡨᠣᠨ ᡳ ᠨᡳᠶᠠᠯᠮᠠ ᡳ ᠪᠠᡵᡠ ᠵᠠᡶᡳᡩᠠᠮᡝ ᡥᡡᠯᠠᠮᡝ ᡝᡵᡝ ᠠᠮᠪᠠ ᡤᡠᡵᡠᠨ ᡳ ᠴᠣᠣᡥᠠ ᡶᡳ ᠰᡠᠸᡝᠮᠪᡳ ᠰᡳᠨᡩᠠᡶᡳ ᡤᡝᠨᡝᠮᠪᡳᠣ᠈ ᠴᠣᠣᡥᠠᡳ ᠨᡳᠶᠠᠯᠮᠠ ᠰᡠᠸᡝ ᠠᡨᠠᡳ ᠪᡝ ᠸᠠᡶᡳ ᡩᠠᡥᠠ᠈ ᠵᡳᡥᡝ ᠴᠣᠣᡥᠠᡳ ᡝᠵᡝᠨ ᡳ ᡥᡝᠨᡩᡠᡵᠠᠩᡤᡝ᠈ ᠠᡨᠠᡳ ᠪᡝ ᠸᠠᡥᠠ ᠨᡳᠶᠠᠯᠮᠠ ᠪᡝ ᡠᡨᡥᠠᡳ ᡝᡵᡝ ᡥᡝᠴᡝᠨ ᡩᡝ ᡝᠵᡝᠨ ᠣᠪᡠᡵᡝ ᠰᡝᠮᠪᡳ ᠰᡝᠮᡝ ᡥᡡᠯᠠᡵᠠ ᠵᠠᡴᠠ ᡩᡝ᠈ ᡥᠣᡨᠣᠨ ᡳ ᡩᡝᡵᡤᡳ ᠨᡳᠶᠠᠯᠮᠠ ᠠᡴᡩᡠᡶᡳ ᡳᠨᡳ ᡝᠵᡝᠨ ᠠᡨᠠᡳ ᠵᠠᠩᡤᡳᠨ ᠪᡝ ᠸᠠᡶᡳ ᠯᡳᠴᡝᠩᠯᡳᠶᠠᠩ ᡩᡝ ᡩᠠᡥᠠᡥᠠ᠈ ᠯᡳᡳ ᠴᡝᠩ ᠯᡳᠶᠠᠩ ᡥᠣᡨᠣᠨ ᡳ ᠨᡳᠶᠠᠯᠮᠠ ᠪᡝ ᡩᠠᠯᡳᡩᠠᠮᡝ ᡨᡠᠴᡳᠪᡠᡶᡳ ᡥᡝᡥᡝ ᠵᡠᠰᡝ ᠴᡳ ᠠᠨᠠᠮᡝ ᡤᡝᠮᡠ ᠸᠠᡵᠠ ᡩᡝ᠈ ᠨᡳᡴᠠᠨ ᠸᠠᡳᠯᠠᠮ ᡩᠠᡳᠮᡳᠩ ᠨᡳ ᠴᠣᠣᡥᠠ ᠪᡝ ᡧᡠᠰᡳᡥᡳᠶᡝᡶᡳ᠈ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠮᠠᡶᠠ □□᠈ ᠮᠠᡶᠠ □□ ᠪᡝ ᡝᠮᡤᡳ ᠰᡠᠸᠠᠯᡳᠶᠠᠮᡝ ᠸᠠᡥᠠ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᠠᡳᠮᡳᠩ ᡤᡠᡵᡠᠨ ᡳ ᠠᠮᠪᠠᠰᠠᡳ ᠪᠠᡵᡠ ᠮᡳᠨᡳ ᠮᠠᡶᠠ ᠠᠮᠠ ᠪᡝ ᡠᠮᠠᡳ ᠸᡝᡳᠯᡝ ᠠᡴᡡ ᠠᡳ ᡨᡠᡵᡤᡠᠨᡩᡝ ᠸᠠᡥᠠ ᠰᡝᠮᡝ ᡤᡳᠰᡠᡵᡝᡵᡝ ᠵᠠᡴᠠᡩᡝ᠈ ᡩᠠᡳᠮᡳᠩ ᠸᠠᠨ ᠯᡳᡳ ᡥᠠᠨ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ᠈ ᠰᡳᠨᡳ ᠮᠠᡶᠠ ᠠᠮᠠ ᠪᡝ ᠴᠣᠣᡥᠣᠮᡝ ᠸᠠᡥᠠ ᠸᡝᡳᠯᡝ ᠸᠠᡴᠠ ᠠᡩᡝᠪᡠᡥᡝ ᠰᡝᠮᡝ ᠮᠠᡶᠠ ᠠᠮᠠ ᡳ ᡤᡳᡵᠠᠨ᠈ ᡤᡡᠰᡳᠨ ᡝᠵᡝᡥᡝ᠈ ᡤᡡᠰᡳᠨ ᠮᠣᡵᡳᠨ ᠪᡝᠨᠵᡳᡥᡝ᠈ ᠵᠠᡳ ᡤᡝᠯᡳ ᠨᡝᠮᡝᠮᡝ ᡩᡠᡩᡠ ᡝᠵᡝᡥᡝ ᠪᡝᠨᠵᡳᡥᡝ ᠮᠠᠩᡤᡳ᠈ ᠰᡠᡵᡝ ᠪᡝᡳᠯᡝ ᡥᡝᡩᡠᠮᡝ᠈ ᠮᡳᠨᡳ ᠮᠠᡶᠠ ᠠᠮᠠ ᠪᡝ ᠸᠠ ᠰᡝᠮᡝ ᡧᡠᠰᡳᡥᡳᠶᡝᡥᡝ ᠨᡳᡴᠠᠨ ᠸᠠᡳᠯᠠᠨ ᠪᡝ ᠵᠠᡶᠠᡶᡳ ᠮᡳᠨᡩᡝ ᡤᠠᠵᡳ ᠰᡝᠮᡝ ᠵᠠᡴᠠᡩᡝ᠈ ᡩᠠᡳᠮᡳᠩ ᡤᡠᡵᡠᠨ ᡳ ᠨᡳᠶᠠᠯᠮᠠ ᡥᡝᠨᡩᡠᠮᡝ᠈ ᠰᡳᠨᡳ ᠮᠠᡶᠠ ᠠᠮᠠ ᠪᡝ ᠴᠣᡥᠣᠮᡝ ᡩᡝᡵᡳᠪᡠᡥᡝ ᠸᡝᡳᠯᡝ ᠸᠠᡴᠠ᠈ ᡝᡩᡝᠪᡠᡥᡝ ᠰᡝᠮᡝ ᠨᡝᠨᡝᠮᡝ ᡤᡡᠰᡳᠨ ᡝᠵᡝᡥᡝ᠈ ᡤᡡᠰᡳᠨ ᠮᠣᡵᡳᠨ ᠪᡠᡥᡝ᠈ ᡨᡝ ᡤᡝᠯᡳ ᡩᡠᡩᡠ ᡝᠵᡝᡥᡝ ᠪᡠᡥᡝ᠈ ᠸᡝᡳᠯᡝ ᡝᠮᡤᡝᡵᡳ ᠸᠠᠵᡳᡥᠠ ᡴᠠᡳ᠈ ᡠᡨᡨᡠ ᡶᡠᡩᠠᡵᠠᡶᡳ᠈ ᠪᡝ ᠨᡳᡴᠠᠨ ᠸᠠᡳᠯᠠᠨ ᡩᡝ ᡩᠠᡶᡳ᠈ ᡤᡳᠶᠠᠪᠠᠨ ᡤᡝᠪᡠᠩᡤᡝ ᠪᠠᡩᡝ ᡥᠣᡨᠣᠨ ᠠᡵᠠᡶᡳ ᠪᡠᡶᡳ ᠨᡳᡴᠠᠨ ᠸᠠᡳᠯᠠᠨ ᠪᡝ ᠰᡠᠸᡝᠨᡳ ᠮᠠᠨᠵᡠ ᡤᡠᡵᡠᠨ ᡩᡝ ᡥᠠᠨ ᠣᠪᡠᠮᠪᡳ ᠰᡝᠮᡝ ᠵᠠᡴᠠᡩᡝ᠈ ᡨᡝᡵᡝ ᡤᡳᠰᡠᠨ ᡩᡝ ᠮᠠᠨᠵᡠ ᡤᡠᡵᡠᠨ ᡳ ᠨᡳᠶᠠᠯᠮᠠ ᡤᡝᠮᡠ ᠠᡴᡩᡠᡶᡳ ᠨᡳᡴᠠᠨ ᠸᠠᡳᠯᠠᠨ ᡩᡝ ᡩᠠᡥᠠᡥᠠ᠈ ᠰᡠᡵᡝ ᠪᡝᡳᠯᡝ ᡝᠮᡠ ᡠᡴᠰᡠᠨᡳ ᠨᡳᠩᡤᡠᡨᠠᡳ ᠰᡠᠨᠵᠠ ᠮᠠᡶᡳᠠ ᠵᡠᠰᡝ ᠣᠮᠣᠰᡳ ᠰᡠᡵᡝ ᠪᡝᡳᠯᡝ ᠪᡝ ᠸᠠᡶᡳ᠈ ᡤᡝᠯᡳ ᠨᡳᡴᠠᠨ ᠸᠠᡳᠯᠠᠨ ᡩᡝ ᡩᠠᡥᠠᡴᡳ ᠰᡝᠮᡝ ᡩᠠᠩᠰᡝ ᡩᡝ ᡤᠠᠰᡥᡡᡥᠠ᠈ ᠨᡳᡴᠠᠨ ᠸᠠᡳᠯᠠᠨ᠈ ᡤᡝᠯᡳ ᠰᡠᡵᡝ ᠪᡝᡳᠯᡝ ᠪᡝ ᡳᠨᡩᡝ ᡩᠠᡥᠠ ᠰᡝᡵᡝ ᠵᠠᡴᠠᡩᡝ᠈ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠨᡳᡴᠠᠨᠸᠠᡳᠯᠠᠨ ᠰᡳ ᠮᡳᠨᡳ ᠠᠮᠠ ᡳ ᠵᡠᡧᡝᠨ ᡳ ᡨᠣᠨ ᠪᡳᡥᡝ᠈ ᠰᡳᠨᡩᡝ ᡩᠠᡥᠠᡶᡳ ᡨᠠᠩᡡ ᠠᠸ ᠪᠠᡥᠠᠮᠪᡳᠣ ᠰᡝᠮᡝ ᡴᠣᡵᠰᠣᠮᡝ ᠪᡳᠰᡳᡵᡝ ᡩᡝ᠈ ᠨᡳᡴᠠᠨ ᠸᠠᡳᠯᠠᠨ ᡩᠠᡳᠮᡳᠩ ᡤᡠᡵᡠᠨ ᡳ ᡶᡠᡧᡠᠨ ᠰᠣᠣ ᡥᡝᠴᡝᠨ ᡳ ᡥᠠᡶᠠᠨ ᡩᡝ ᠪᡝᠯᡝᠮᡝ ᠠᠯᠠᡶᡳ ᠰᡠᡴᠰᡠᡥᡠ ᠪᡳᡵᠠᡳ ᠠᡳᠮᠠᠨ-ᠣ ᠰᠠᡵᡥᡠᡳ ᡥᠣᡨᠣᠨ ᡳ ᡝᠵᡝᠨ ᠨᠣᠮᡳᠨᠠᡳ ᠠᡥᡡᠨ ᡤᡡᠸᠠᡵᠠ ᡤᡝᠪᡠᠩᡤᡝ ᠨᡳᠶᠠᠯᠮᠠ ᠪᡝ ᡠᡵᠠ ᡩᡠᡵᡝ ᠵᠠᡴᠠᡩᡝ᠈ ᡩᡝᠣ ᠨᠣᠮᡳᠨᠠ ᠰᡠᡴᠰᡠᡥᡠ ᠪᡳᡵᠠᡳ ᠠᡳᠮᠠᠨ ᡳ ᡤᡳᠶᠠᠮᡠᡴᡡ ᡤᠠᡧᠠᠨ ᡳ ᡝᠵᡝᠨ ᡤᠠᡥᠠᡧᠠᠨ ᡥᠠᠰᡥᡡ᠈ ᠵᠠᡳ ᠨᡳ ᠪᡳᡵᠠᡳ ᡤᠠᡧᠠᠨ ᡳ ᡝᠵᡝᠨ ᠴᠠᠩᡧᡠ᠈ ᠶᠠᠩᡧᡠ ᠠᡥᡡᠨ ᡩᡝᠣ ᡤᡝᠮᡠ ᡴᠣᡵᠰᠣᡶᡳ ᡥᡝᠪᡧᡝᠮᡝ ᠮᡠᠵᠠᡴᡡ ᠨᡳᠶᠠᠯᠮᠠ ᠪᡝ ᡨᡠᡶᡳᠮᡝ ᠪᠠᠨᠵᡳᡵᡝ ᠠᠩᡤᠠᠯᠠ᠈ ᠠᡳᠰᡳᠨ ᡤᡳᠣᡵᠣ ᡥᠠᠯᠠᠩᡤᠠ ᠨᡳᠩᡤᡠᡨᠠᡳ ᠪᡝᡳᠰᡝ ᠪᡝ ᡨᡠᡶᡳᠮᡝ ᠪᠠᠨᠵᡳᡴᡳ ᠰᡝᠮᡝ ᡤᡳᠰᡠᡵᡝᡶᡳ᠈ ᠰᡠᡵᡝ ᠪᡝᡳᠯᡝ ᡩᡝ ᡩᠠᡥᠠᠮᡝ ᠵᡳᡶᡳ ᡳᡥᠠᠨ ᠸᠠᠮᡝ ᠠᠪᡴᠠ ᡩᡝ ᡤᠠᠰᡥᡡᡵᠠᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠪᠠᡵᡠ ᡩᡠᡳᠨ ᠠᠮᠪᠠ ᡥᡝᠨᡩᡠᠮᡝ᠈ ᠨᡝᠨᡡᡝ ᠶᠠᠶᠠᠴᡳ ᠨᡝᠨᡝᠮᡝ ᡩᠠᡥᠠᠮᡝ ᠵᡳᡥᡝᠪᡝ ᡤᡡᠨᡳᠴᡳ ᠵᡠᡧᡝᠨ ᡠᠮᡝ ᠣᠪᡠᡵᡝ᠈ ᠠᡥᡡᠨ ᡩᡝᠣᡳ ᡤᡝᠰᡝ ᡤᠣᠰᡳᠮᡝ ᡠᠵᡳ ᠰᡝᠮᡝ ᡥᡝᠨᡩᡠᡶᡳ ᡤᠠᠰᡥᡡᡥᠠ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ᠈ ᠮᠠᡶᠠ ᠠᠮᠠ ᡳ ᡴᠠᡵᡠ ᠪᡝ ᡤᠠᡳᠮᡝ᠈ ᡳᠨᡳ ᠠᠮᠠ ᡳ ᠸᡝᡵᡳᡥᡝ ᠵᡠᠸᠠᠨ ᡳᠯᠠᠨ ᡠᡴᠰᡳᠨ ᡳ ᠨᡳᡴᠠᠨ ᠸᠠᡳᠯᠠᠨ ᠪᡝ ᡩᠠᡳᠯᠠᠮᡝ ᡩᡝᡵᡳᠪᡠᡥᡝ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠣᡵᡳᠨ ᠰᡠᠨᠵᠠ ᠰᡝ ᡩᡝ ᠰᠠᡥᠠᡥᡡᠨ ᡥᠣᠨᡳᠨ ᠠᠨᡳᠶᠠ ᠵᡠᠸᠠᡵᡳ ᡩᡠᠯᡳᠮᠪᠠᡳ ᠪᡳᠶᠠ ᡩᡝ ᠨᡳᡴᠠᠨ ᠸᠠᡳᠯᠠᠨ ᠪᡝ ᡩᠠᡳᠯᠠᠮᡝ ᠴᠣᠣᡥᠠ ᠵᡠᡵᠠᡶᡳ ᡤᡝᠨᡝᠴᡳ ᠨᡝᠨᡝᠮᡝ ᡤᠠᠰᡥᡡᠮᡝ ᡩᠠᡥᠠᡥᠠ ᠰᠠᡵᡥᡡᡳ ᡥᠣᡨᠣᠨ ᡳ ᡝᠵᡝᠨ ᠨᠣᠮᡳᠨᠠ ᡤᡝᠪᡠᠩᡤᡝ ᠠᠮᠪᠠᠨ ᡳ ᡩᡝᠣ ᠮᠠᡳᡴᠠᡩᠠ ᠪᡝ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡳᠯᠠᡡᡳ ᠮᠠᡶᠠ ᠰᠣᠣᠴᠠᠩᡤᠠ ᡳᠯᠠᠴᡳᠨ ᡳ ᠵᡠᡳ ᠯᠣᠩᡩᡠᠨ᠈ ᡧᡠᠰᡳᡥᡳᠶᡝᠮᡝ ᠨᡳᡴᠠᠨ ᠸᠠᡳᠯᠠᠨ ᡩᡝ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨᠯᡳ ᡥᠠᠨ ᡩᠠᡶᡳ ᡤᡳᠶᠠᠪᠠᠨ ᡳ ᡤᡝᠪᡠᠩᡤᡝ ᠪᠠᡩᡝ ᡥᠣᡨᠣᠨ ᠠᡵᠠᡶᡳ ᠪᡠᡶᡳ ᠮᠠᠨᠵᡠ ᡤᡠᡵᡠᠨ ᡩᡝ ᡥᠠᠨ ᠣᠪᡠᠮᠪᡳ᠈ ᡥᠠᡩᠠᡳ ᡤᡠᡵᡠᠨ ᡳ ᠸᠠᠨ ᡥᠠᠨ ᡤᡝᠯᡳ ᡩᠠᡥᠠᠪᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᠠᡳᠨᡠ ᡩᠠᡥᠠᡥᠠ ᠰᡝᠮᡝ ᡧᡠᠰᡳᡥᡳᠶᡝᡥᡝ ᡤᡳᠰᡠᠨ ᠪᡝ ᠨᠠᡳᡴᠠᡩᠠ ᡳᠨᡳ ᠠᡥᡡᠨ ᠨᠣᠮᡳᠨᠠ ᡩᡝ ᠠᠯᠠᠨᠠᡶᡳ᠈ ᠨᠣᠮᡳᠨᠠ ᡤᠠᠰᡥᡡᡥᠠ ᡤᡳᠰᡠᠨ ᠪᡝ ᡠᠪᠠᠯᡳᠶᠠᡶᡳ᠈ ᡨᠠᡳzᡩᡠ ᠰᡠᡵᡝ ᠪᡝᡳᠯᡝᡳ ᠴᠣᠣᡥᠠ ᠪᠣᠯᠵᠣᡤᠣᠨ ᡳ ᠪᠠᡩᡝ ᠵᡳᡥᡝᡴᡡ᠈ ᡨᡝᡵᡝᠴᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠨᡳᡴᠠᠨ ᠸᠠᡳᠯᠠᠨ ᡳ ᡨᡠᡵᡠᠨ ᡳ ᡥᠣᡨᠣᠨ ᠪᡝ ᡤᠠᡳᠮᡝ ᡤᡝᠨᡝᡵᡝ ᡩᡝ᠈ ᠨᡳᡴᠠᠨ ᠸᠠᡳᠯᠠᠨ ᠰᡝᡵᡝᡶᡳ᠈ ᠴᠣᠣᡥᠠ ᡳᡵᡤᡝᠨ ᠪᡝ ᠸᡝᡵᡳᡶᡳ᠈ ᠵᡠᠰᡝ ᠰᠠᡵᡤᠠᠠᠨ ᠪᡝ ᡤᠠᠮᠠᠮᡝ ᡤᡳᠶᠠᠪᠠᠨ ᡤᡝᠪᡠᠩᡤᡝ ᠪᠠᡩᡝ ᡤᡝᠨᡝᡥᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡨᡝᡵᡝ ᡨᡠᡵᡠᠨ ᡳ ᡥᠣᡨᠣᠨ ᠪᡝ ᠠᡶᠠᠮᡝ ᡤᠠᡳᡶᡳ ᠪᡝᡩᡝᡵᡝᡥᡝ᠈ ᡨᡝᡵᡝ ᡶᠣᠨᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡳ ᠴᠣᠣᡥᠠ ᡝᠮᡠ ᡨᠠᠩᡤᡡ ᠈ ᡠᡴᠰᡳᠨ ᡤᡡᠰᡳᠨ ᠪᡳᡥᡝ᠈ ᠪᠣᠯᠣᡵᡳ ᡩᡠᠯᡳᠮᠪᠠᡳ ᠪᡳᠶᠠᡩᡝ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡤᡝᠯᡳ ᠴᠣᠣᡥᠠ ᡳᠯᡳᡶᡳ᠈ ᠨᡳᡴᠠᠨ ᠸᠠᡳᠯᠠᠨ ᠪᡝ ᡩᠠᡳᠯᠠᠮᡝ ᡤᡳᠶᠠᠪᠠᠨ ᡩᡝ ᡤᡝᠨᡝᡵᡝ ᡩᡝ᠈ ᠰᠠᡵᡥᡳ ᡥᠣᡨᠣᠨ ᡳ ᠨᠣᠮᡳᠨᠠ᠈ ᠨᠠᡳᡴᠠᡩᠠ ᡤᡝᠯᡳ ᡩᠣᡵᡤᡳᡩᠠᡵᡳ ᠨᡳᠶᠠᠯᠮᠠ ᡩᠠᡴᡡᡵᠠᡩᡳ ᠨᡳᡴᠠᠨ ᠸᠠᡳᠯᠠᠨ ᡩᡝ ᠠᠯᠠᠨᠠᡶᡳ᠈ ᠨᡳᡴᠠᠨ ᠸᠠᡳᠯᠠᠨ ᡤᠠᡧᠠᠨ ᠪᡝ ᠸᠠᠯᡳᠶᠠᡶᡳ ᡩᠠᡳᠮᡳᠩ ᡤᡠᡵᡠᠨ ᡳ ᡶᡠᡧᡡᠨ ᠰᠣᠣ ᡥᡝᠴᡝᠨ ᡳ ᡧᡠᠨ ᡩᡝᡴᡩᡝᡵᡝ ᡝᡵᡤᡳ ᡥᠣᠣ ᠺᠣ ᡨᠠᡳ ᠪᠠᡵᡠ ᠵᠠᠰᡝ ᡩᠣᠰᡳᠮᡝ ᠪᡠᡵᠯᠠᠮᡝ ᡤᡝᠨᡝᡵᡝ ᠪᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠴᠣᠣᡥᠠ ᡩᠠᡥᠠᠯᠠᠮᡝ ᡤᡝᠨᡝᡶᡳ᠈ ᡩᠠᡳᠮᡳᠩ ᡤᡠᡵᡠᠨ ᡳ ᠵᠠᠰᡝ ᡨᡠᠸᠠᡴᡳᠶᠠᡥᠠ ᠴᠣᠣᡥᠠ ᡨᡠᠴᡳᡶᡳ ᠨᡳᡴᠠᠨ ᠸᠠᡳᠯᠠᠨ ᠪᡝ ᡥᠠᠯᠪᡠᡵᠠᡴᡡ ᡨᠠᠨᡨᠠᡵᠠ ᠪᡝ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠴᠣᠣᡥᠠ ᠰᠠᠪᡠᡶᡳ᠈ ᡩᠠᡳᠮᡳᠩ ᡤᡠᡵᡠᠨ ᡳ ᠴᠣᠣᡥᠠ ᡩᠠᡶᡳ ᠨᡳᡴᠠᠨ ᠸᠠᡳᠯᠠᠨ ᠪᡝ ᠠᡶᠠ ᠰᡝᠮᡝ ᡥᡝᠨᡩᡠᠯᡝᠮᡝ ᠠᡳᠰᡝ ᠰᡝᠮᡝ ᠪᡝᡩᡝᡵᡝᡥᡝ ᡳᠩ ᡳᠯᡳᡥᠠ᠈ ᡨᡝᡵᡝ ᡩᠣᠪᠣᡵᡳ ᠨᡳᡴᠠᠨ ᠸᠠᡳᠯᠠᠨ ᡳ ᡝᠮᡤᡳ ᠠᡳᠨᡠ ᠠᡶᠠᡥᠠ ᠠᡴᡡ᠈ ᠨᡳᡴᠠᠨ ᠸᠠᡳᠯᠠᠨ ᠪᡝ ᡩᠠᡳᠮᡳᠩ ᡤᡠᡵᡠᠨ ᡳ ᠴᠣᠣᡥᠠ ᡥᠠᠯᠪᡠᡵᠠᡴᡡ ᡨᠠᠨᡨᠠᡵᠠ ᠰᡝᠮᡝ ᠠᠯᠠᡥᠠ ᠮᠠᠩᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠴᠣᠣᡥᠠ ᠪᡝᡩᡝᡵᡝᠮᡝ ᠵᡳᡶᡳ᠉ ᡨᡝᡵᡝᠴᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠨᠣᠮᡳᠨᠠ᠈ ᠨᡳᠠᡴᠠᡩᠠ ᠠᠯᠠᠨᠠᡵᠠᡴᡡ ᠪᡳᡥᡝ ᠪᡳᠴᡳ ᠨᡳᡴᠠᠨ ᠸᠠᡳᠯᠠᠨ ᠪᡝ ᠪᠠᡥᠠᠮᠪᡳᡥᡝ ᠰᡝᠮᡝ ᡴᠣᡵᠰᠣᠮᡝ ᠪᡳᠰᡳᡵᡝ ᡩᡝ᠈ ᠨᠣᠮᡳᠨᠠ᠈ ᠨᠠᡳᡴᠠᡩᠠ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡝ᠈ ᠰᡳ ᡥᡠᠨᡝᡥᡝ ᠠᡳᠮᠠᠨ ᡳ ᡥᠠᠩᡤᡳᠶᠠᡳ ᡤᠣᠯᠣ᠈ ᠵᠠᡴᡡᠮᡠᡳ ᡤᠣᠯᠣ ᠪᡝ ᡠᠮᡝ ᠨᡝᠴᡳᡵᡝ᠈ ᠮᡳᠨᡩᡝ ᡩᠠᡳᠨ ᡩᡠᠩᡤᡳᠶᠠ ᠪᠠᡵᡨᠠᡳ ᡥᠣᡨᠣᠨ ᠪᡝ ᡝᡶᡠᠯᡝᡶᡳ ᡤᠠᠵᡳ ᡩᡠᠩᡤᡳᠶᠠ ᠪᠠᡵᡩᠠ ᠪᡝ ᡝᡶᡠᠯᡝᡵᠠᡴᡡ ᠣᠴᡳ᠈ ᠰᡳᠮᠪᡝ ᠵᠠᡳ ᠵᡝᠴᡝᠨ ᡳ ᠪᠠᡵᡠ ᠴᠣᠣᡥᠠ ᠶᠠᠪᡠᠪᡠᡵᠠᡴᡡ ᠰᡝᡥᡝ ᠠᠩᡤᡳ᠈ ᡨᡝᡵᡝ ᡤᡳᠰᡠᠨ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡧᠣᡵᠰᠣᠮᡝ ᠪᡳᠰᡳᡵᡝ ᡩᡝ᠈ ᡤᠠᡥᠠᡧᠠᠨ᠈ ᡥᠠᠰᡥᡡ᠈ ᠴᡳᠩᡧᡠ᠈ ᡤᡝᠪᡠᠩᡤᡝ ᡳᠯᠠᠨ ᠠᠮᠪᠠᠨ ᠵᡳᡶᡳ ᠪᠠᠨᠵᡳᡶᡳ ᡥᡝᠨᡩᡠᠮᡝ᠈ ᡝᡵᡝ ᠨᠣᠮᡳᠨᠠ ᠪᡝ ᠨᡝᠨᡝᠮᡝ ᡝᡩᡠᠯᡝᡵᠠᡴᡡ ᠣᡥᠣ ᡩᡝ᠈ ᠪᡝ ᡤᡝᠮᡠ ᠨᠣᠮᡳᠨᠠ ᡩᡝ ᡩᠠᡥᠠᠮᠪᡳ ᠰᡝᡥᡝ ᠮᠠᠩᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡤᡳᠰᡠᠨ ᡤᠠᡳᡶᡳ᠈ ᠨᠣᠮᡳᠨᠠ ᠪᡝ ᡝᡶᡠᠯᡝᡵᡝ ᠠᡵᡤᠠ ᠪᡝ ᡨᠣᡴᡨᠣᠪᡠᡶᡳ ᠨᠣᠮᡳᠨᠠ ᡳ ᡝᠮᡤᡳ ᠠᠴᠠᡶᡳ ᠪᠠᡵᡩᠠᡳ ᡥᠣᡨᠣᠨ ᠪᡝ ᡩᠠᡳᠯᠠᡴᡳ ᠰᡝᠮᡝ ᠴᠣᠣᡥᠠ ᡤᡝᠨᡝᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠠᡝᡤᠠᡩᠠᠮᡝ ᠨᠣᠮᡳᠨᠠ ᡳ ᠪᠠᡵᡠ ᠰᡠᠸᡝ ᠨᡝᠨᡝᠮᡝ ᠠᡶᠠ ᠰᡝᠴᡳ ᠨᠣᠮᡳᠨᠠ ᠣᠵᡳᡵᠠᡴᡡ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡤᡝᠯᡳ ᡥᡝᠨᡩᡠᠮᡝ᠈ ᠰᡠᠸᡝ ᠠᡩᠠᡵᠠᡴᡡ ᠣᠴᡳ᠈ ᠪᡝ ᠵᡠᠯᡝᡵᡳ ᠠᡶᠠᡵᠠ ᠰᡠᠸᡝᠨᡳ ᡤᡳᡩᠠ ᠵᠠᠩᡴᡡ ᠪᡝ ᠮᡝᠨᡩᡝ ᡤᠠᠵᡳ ᠰᡝᡥᡝ ᠮᠠᠩᡤᡳ᠈ ᠨᠣᠮᡳᠨᠠ ᠠᡵᡤᠠ ᡩᡝ ᡩᠣᠰᡳᡶᡳ ᡳᠨᡳ ᠴᠣᠣᡥᠠᡳ ᠨᡳᠶᠠᠯᠮᠠ ᡥᡤᡳᡩᠠ ᠵᠠᠩᡴᡡ ᠪᡝ᠈ ᡤᡝᠮᡠ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠴᠣᠣᡥᠠ ᡩᡝ ᠪᡠᡶᡳ᠈ ᠰᡠᡵᡝ ᠪᡝᡳᠯᡝᡳ ᠴᠣᠣᡥᠠᡳ ᠨᡳᠶᠠᠯᠮᠠ ᡨᡝᡝᡵᡝ ᡤᡳᡩᠠ ᠵᠠᠩᡴᡡ ᠪᡝ ᠪᠠᡥᠠᡶᡳ᠈ ᡠᡨᡥᠠᡳ ᠨᠣᠮᡳᠨᠠ᠈ ᠨᠠᡳᡴᠠᡩᠠ ᠠᡥᡡᠨ ᡩᡝᠣ ᠴᠣᠣᡥᠠᡳ ᠨᡳᠶᠠᠯᠮᠠ ᠪᡝ ᡤᡝᠮᡠ ᠸᠠᡶᡳ ᠰᠠᡵᡥᡡᡳ ᡥᠣᡨᠣᠨ ᠪᡝ ᡤᠠᡳᡶᡳ ᠴᠣᠣᡥᠠ ᠪᡝᡩᡝᡵᡝᡥᡝ ᠮᠠᠩᡤᡳ᠈ ᠰᠠᡵᡥᡡᡳ ᡥᠣᡨᠣᠨ ᡳ ᠪᡝᡩᡝᡵᡝᠮᡝ ᡨᡠᠴᡳᡴᡝ ᠨᡳᠶᠠᠯᠮᠠ ᡩᠠᡥᠠᠮᡝ ᠵᡳᡩᡝᡵᡝ ᠵᠠᡴᠠᡩᡝ᠈ ᡨᡝᠰᡝᡳ ᠵᡠᠰᡝ ᠰᠠᡵᡤᠠᠨ ᠪᡝ ᡤᡝᠮᡠ ᠪᡠᡶᡳ ᠣᠩᡤᡳᡥᡝ ᠮᠠᠩᡤᡳ᠈ ᠰᠠᡵᡥᡡᡳ ᡥᠣᡨᠣᠨ ᠪᡝ ᡩᠠᠰᠠᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠴᡳ ᡤᡝᠯᡳ ᡠᠪᠠᡧᠠᡥᠠ᠈ ᡨᡝᡵᡝᠴᡳ ᠨᡳᡴᠠᠨ ᠸᠠᡳᠯᠠᠨ ᡳ ᡠᡴᠰᡠᠨᡳ ᠨᡳᠶᠠᠯᠮᠠ᠈ ᡩᠠᡥᠠᡥᠠ ᡤᡠᡵᡠᠨ ᡤᡝᠮᡠ ᡩᠠᡳᠮᡳᠩ ᡤᡠᡵᡠᠨ ᡳ ᡥᠠᠨ ᠨᡳᡴᠠᠨ ᠸᠠᡳᠯᠠᠨ ᠪᡝ ᠮᠠᠨᠵᡠ ᡤᡠᡵᡠᠨ ᡩᡝ ᡝᠵᡝᠨ ᠣᠪᡠᡶᡳ ᡤᡳᠶᠠᠪᠠᠨ ᡳ ᠪᠠᡩᡝ ᡥᠣᡨᠣᠨ ᠠᡵᠠᡶᡳ ᠪᡠᡵᡝ ᠠᠩᡤᠠᠯᠠ᠈ ᡩᠠᡳᠨ ᠵᡳᡶᡳ ᠪᡠᠴᡝᡵᡝ ᡳᠰᡳᡶᡳ ᠵᠠᠰᡝ ᡩᠣᠰᡳᠴᡳ ᡥᠣᠨᠣ ᡥᠠᠯᠠᠪᡠᡵᠠᡴᡡ ᠠᠮᠠᠰᡳ ᡨᠠᡨᠠᠮᡝ ᠪᠣᡧᠣᡥᠣ ᠰᡝᠮᡝ ᡥᡝᠨᡩᡠᠮᡝ ᡤᡝᠮᡠ ᡠᠪᠠᡧᠠᡥᠠ᠈ ᡨᡝᡵᡝᠴᡳ ᠨᡳᡴᠠᠨ ᠸᠠᡳᠯᠠᠨ ᡤᠣᠯᠣᡶᡳ ᡳᠨᡳ ᠵᡠᠰᡝ ᠈ ᡥᠠᠨᠴᡳᡴᡳ ᠠᡥᡡᠨ ᡩᡝᠣ ᡝᠮᡠ ᡠᡩᡠ ᠨᡳᠶᠠᠯᠮᠠ ᠪᡝ ᡤᠠᠮᠠᠮᡝ ᠣᠯᡥᠣᠨ ᡤᡝᠪᡠᠩᡤᡝ ᠪᠠ ᡩᡝ ᡥᠣᡨᠣᠨ ᠠᡵᠠᡶᡳ ᡨᡝᡥᡝ᠈ ᡨᡝᡵᡝᠴᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᡝᠮᡠ ᡝᠮᡝ ᡩᡝ ᠪᠠᠨᠵᡳᡥᠠ ᠨᠣᠨ ᠪᡝ ᡤᠠᡥᠠᡧᠠᠨ ᡥᠠᠰᡥᡡ ᡩᡝ ᠪᡠᡶᡳ ᠮᡝᠶᡝ ᠣᠪᡠᡥᠠ᠉ ᡨᡝᡵᡝᠴᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳ ᡶᡳᠶᠠᠩᡤᡡ ᠮᠠᡶᠠ ᠪᠣᠣᠰᡳ ᠵᡠᡳ ᡴᠠᠩᡤᡳᠶᠠ᠈ ᠴᠣᡴᡳᡨᠠ ᠈ ᡤᡳᠣᡧᠠᠨ ᡝᡵᡝ ᡳᠯᠠᠨ ᠨᠣᡶᡳ ᡥᡝᠪᡝ ᠠᡵᠠᡶᡳ᠈ ᡥᠠᡩᠠᡳ ᠸᠠᠨ ᡥᠠᠨ ᡳ ᠴᠣᠣᡥᠠ ᠪᡝ ᠰᠣᠣᠯᠠᡶᡳ᠈ ᡥᡠᠨᡝᡥᡝ ᠠᡳᠮᠠᠨ ᡳ ᠵᠣᠣᡤᡳᠶᠠ ᡥᠣᡨᠣᠨ ᡳ ᡝᠵᡝᠨ ᡤᡝᠪᡠᠩᡤᡝ ᠠᠮᠪᠠᠨ᠈ ᠵᡠᡤᡡᠨ ᠵᠣᡵᡳᠮᡝ ᡤᠠᠵᡳᡶᡳ ᡥᠠᡩᠠᡳ ᡤᡠᡵᡠᠨ ᡳ ᠴᠣᠣᡥᠠ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡥᠠᡵᠠᠩᡤᠠ ᡥᡡᠵᡳ ᡤᡝᠪᡠᠩᡤᡝ ᡤᠠᡧᠠᠨ ᠪᡝ ᠰᡠᠴᡠᡶᡳ ᡤᠠᠮᠠᡶᡳ ᠣᠯᠵᡳ ᡩᡝᡩᡝᠮᡝ ᡳᠯᡳᡥᠠ ᠪᠠᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠠᠮᠪᠠᠨ ᡧᠣᠩᡴᠣᡵᠣ ᠪᠠᡨᡠᡵᡠ᠈ ᠵᠠᡳ ᠪᠠᠰᡠᠨ ᡳ ᡤᡝᠪᡠᠩᡤᡝ ᠨᡳᠶᠠᠯᠮᠠ ᠵᡠᠸᡝ ᠨᠣᡶᡳ ᡠᠵᡠᠯᠠᡶᡳ ᠵᡠᠸᠠᠨ ᠵᡠᠸᡝ ᠨᡳᠶᠠᠯᠮᠠ ᠪᡝ ᡤᠠᡳᡶᡳ ᠠᠮᠴᠠᠨᠠᡶᡳ ᡥᠣᠯᡴᠣᠨ ᡩᡝ ᡩᠣᠰᡳᡶᡳ， ᡥᠠᡩᠠᡳᠴᠣᠣᡥᠠ ᠪᡝ ᡤᡳᡩᠠᡶᡳ ᡩᡝᡥᡳ ᠨᡳᠶᠠᠯᠮᠠ ᠪᡝ ᠸᠠᡥᠠ᠈ ᡤᠠᠮᠠᡵᠠ ᠣᠯᠵᡳ ᠪᡝ ᡤᡝᠮᡠ ᠠᠮᠠᠰᡳ ᠪᠠᡥᠠ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠠᠮᠪᠠ ᠮᠠᡶᠠ ᡩᡝᠰᡳᡴᡠ᠈ ᠵᠠᠴᡳᠨ ᠮᠠᡶᠠ ᠯᡳᠣᠵᠠᠨ᠈ ᡳᠯᠠᠴᡳᠨ ᠮᠠᡶᠠ ᠰᠣᠣᠴᠠᠩᡤᠠ᠈ ᠨᡳᠩᡤᡠᠴᡳ ᠮᠠᡶᠠ ᠪᠣᠣᠰᡳ᠈ ᡝᡵᡝ ᡩᡠᡳᠨ ᠮᠠᡶᠠ ᡳ ᠵᡠᠰᡝ ᠣᠮᠣᠰᡳ ᠠᠴᠠᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡝ ᠸᠠᡴᡳ ᠰᡝᠮᡝ ᡩᠠᠩᠰᡝ ᡩᡝ ᡤᠠᠰᡥᡡᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡝ ᠸᠠᠮᡝ ᠨᡳᠩᡤᡠᠨ ᠪᡳᠶᠠ ᡩᡝ ᡶᠠᡵᡥᡡᠨ ᡩᠣᠪᠣᡵᡳ ᡠᠯᡤᡳᠶᠠᠨ ᡝᡵᡳᠨ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡨᡝᡥᡝ ᡥᡡᠯᡥᠠᠮᡝ ᡩᠠᡶᠠᠨᠵᡳᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠮᡠᠵᡳᠯᡝᠨ ᡩᡝᠩᠰᡳᡨᡝᠮᡝ ᡩᡝᡩᡠᡥᡝ ᠨᡳᠶᠠᠯᠮᠠ ᠪᠠᠪᡳ ᡳᠯᠠᡶᡳ ᠣᠯᠪᡠ ᡝᡨᡠᡶᡳ ᠪᡝᡵᡳ ᠯᠠᡩᡠ ᠠᠰᡥᠠᡶᡳ᠈ ᠵᠠᠩᡴᡡ ᠵᠠᡶᠠᡶᡳ ᡥᠣᡨᠣᠨ ᡳ ᠨᡳᡤᠩᡠᡨᠠ ᡨᠠᡶᡠᡶᡳ ᡨᡠᠸᠠᠴᡳ᠈ ᡥᡡᠯᡥᠠ ᠸᠠᠨ ᠰᡳᠨᡩᡝᡶᡳ ᡩᠠᡶᡠᡴᡳ ᠰᡝᠮᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡝ ᠰᠠᡶᡳ ᡤᡝᠮᡠ ᠠᠮᠠᠰᡳ ᡶᠠᡴᡠᡶᡳ ᠪᡠᡵᠯᠠᡥᠠ᠈ ᡠᠶᡠᠨ ᠪᡳᠶᠠ ᡩᡝ ᡨᡠᡵᡤᡠᠨ ᡩᠣᠪᠣᡵᡳ ᡥᡡᠯᡥᠠ ᡤᡝᠯᡳ ᡩᠣᠰᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳ ᠪᠣᠣᡳ ᡥᡡᠸᠠᡳ ᠵᡠᡝᡵ ᡥᠠᠰᡥᠠᠨ ᠪᡝ ᡨᡠᡴᡳᠶᡝᡶᡳ ᡩᠣᠰᡳᡴᡳ ᠰᡝᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳ ᠪᠣᠣᡳ ᡨᠠᠩᡡᡥᠠ ᡤᡝᠪᡠᠩᡤᡝ ᡳᠨᡩᠠᡥᡡᠨ ᠪᠣᠣᡳ ᠸᠠᡵᡤᡳᠴᡳ ᡤᡝᡵ ᠰᡝᡶᡳ ᡩᡝᡵᡤᡳ ᡩᡝ ᡤᡝᠨᡝᠮᠪᡳ᠈ ᡩᡝᡵᡤᡳᠴᡳ ᡤᡝᡵ ᠰᡝᡶᡳ ᠸᠠᡵᡤᡳ ᡩᡝ ᡤᡝᠨᡝᠮᠪᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡩᠠᡥᡡᠨ ᡳ ᠠᠰᡠᡴᡳ ᠪᡝ ᡩᠣᠨᠵᡳᡶᡳ ᡩᡝᡩᡠᡥᡝ ᠪᠠ ᠴᡳ ᡳᠯᡳᡶᡳ ᠠᠮᠪᠠ ᠰᠠᡵᡤᠠᠨ ᠵᡠᡳ᠈ ᠵᡠᠸᡝ ᡥᠠᡥᠠ ᠵᡠᡳ ᠪᡝ ᠪᠣᠣᡳ ᡥᠣᡧᠣᠨ ᡥᠣᡵᡥᠣᠨ ᡶᡝᠵᡳᠯᡝ ᠰᠣᠮᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠵᠠᠩᡴᡡ ᠵᠠᡶᠠᡶᡳ ᡝᠰᡠᡴᡳᠶᡝᠮᡝ ᡥᡝᠨᡩᡠᠮᡝ᠈ ᡨᡠᠯᡝ ᠵᡳᡥᡝᠩᡤᡝ ᠨᡳᠶᠠᡥᠠᠨ ᠨᡳᠶᠠᠯᠮᠠ᠈ ᠠᡳᠨᡠ ᡩᠣᠰᡳᡵᠠᡴᡡ᠈ ᠰᡠᠸᡝ ᡩᠣᠰᡳᡵᠠᡴᡡ ᠣᠴᡳ᠈ ᠪᡳ ᡨᡠᠴᡳᠮᠪᡳ᠈ ᠰᡠᠸᡝ ᠠᠯᡳᠮᡝ ᡤᠠᡳᠰᡠ ᠰᡝᠮᡝ ᡥᡝᠨᡩᡠᡶᡳ᠈ ᡶᠠ ᡳ ᠪᡝᡵᡝᠨ ᡩᡝ ᠵᠠᡶᠠᡥᠠ ᠵᠠᠩᡴᡡᡳ ᡶᡝᠰᡳᠨ ᠪᡝ ᡨᡝᠩᡴᡳᡶᡳ ᡶᠠ ᠪᡝ ᡨᡠᠴᡳᡵᡝ ᡩᡝ᠈ ᡥᡡᠯᡥᠠ ᡤᠣᠯᠣᡶᡳ ᠪᡠᡵᠯᠠᠮᡝ ᡤᡝᠨᡝᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠪᠣᠣᡳ ᡦᠠᡥᠠᡳ ᡤᡝᠪᡠᠩᡝ ᠨᡳᠶᠠᠯᠮᠠ ᡳᠨᡳ ᠪᠣᠣᡳ ᡶᠠᡳ ᠸᠠᡴᠠ ᡩᡝ ᡩᡝᡩᡠᡥᡝ ᠪᡝ ᡩᠠᡵᡨᠠᡳ ᡤᡳᡩᠠᠯᠠᠮᡝ ᠸᠠᡶᡳ ᡤᡝᠨᡝᡥᡝ᠉ ᠨᡳᠣᠸᠠᠩᡤᡳᠶᠠᠨ ᠪᠣᠨᡳᠣ ᠠᠨᡳᠶᠠ᠈ ᠠᠨᡳᠶᠠ ᠪᡳᠶᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ᠈ ᠨᡝᠨᡝᠮᡝ ᡥᠣᠠᡩᠠᡳ ᠴᠣᠣᡥᠠ ᠪᡝ ᠵᡠᡤᡡᠨ ᠵᠣᡵᡳᠮᡝ ᡤᠠᠵᡳᡥᠠ᠈ ᠵᠣᠣᡤᡳᠶᠠ ᡥᠣᡨᠣᠨ ᡳ ᠯᡳᡩᠠᠨ ᠪᡝ ᡩᠠᡳᠯᠠᠮᡝ ᠴᠣᠣᡥᠠ ᡤᡝᠨᡝᡵᡝ ᡩᡝ ᠨᡳᠮᠠᠩᡤᡳ ᠠᠮᠪᠠᠨ ᠣᡶᡳ᠈ ᡤᠠᡥᠠ ᡤᡝᠪᡠᠩᡤᡝ ᡩᠠᠪᠠᡩᠠᠨ ᡥᠠᡴᠰᠠᠨ ᠣᡶᡳ ᡩᠠᠪᠠᠴᡳ ᠣᠵᡳᡵᠠᡴᡡ ᠣᡥᠣ ᠮᠠᠩᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡝᠰᡥᡝᡨᡝ᠈ ᡩᡝᠣᡩᡝ ᠴᠣᠣᡥᠠ ᠪᡝᡩᡝᡵᡝᡴᡳ ᠰᡝᠮᡝ ᡨᠠᡶᡠᠯᠠᠴᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠯᡳᡩᠠᠨ ᠮᡠᠰᡝᡳ ᡝᠮᡠ ᡥᠠᠯᠠᡳ ᠠᡥᡡᠨ ᡩᡝᠣ ᠪᡳᠮᡝ᠈ ᠮᡠᠰᡝ ᠪᡝ ᠸᠠᠮᡝ᠈ ᡥᠠᡩᠠᡳ ᠴᠣᠣᡥᠠ ᠪᡝ ᠵᡠᡤᡡᠨ ᠵᠣᡵᡳᠮᡝ ᡤᠠᠵᡳᡥᠠ ᠰᡝᠮᡝ ᠮᠠᡵᠠᠮᡝ ᡩᠠᠪᠠᡤᠠᠨ ᠪᡝ ᠰᠠᠴᡳᠮᡝ ᡨᠠᠩᡴᠠᠨ ᠠᡵᠠᡶᡳ᠈ ᠨᡳᠶᠠᠯᠮᠠ ᠪᡝ ᡳᠯᡥᡳ ᡳᠯᡥᡳ ᡨᠠᡨᠠᠮᡝ ᡩᠠᠪᠠᠪᡠᡶᡳ ᠴᠣᠣᡥᠠ ᠪᠠᡵᡤᡳᠶᠠᡶᡳ ᠯᡳᡩᠠᠨ ᡥᠣᡨᠣᠨ ᡩᡝ ᡳᠰᡳᠨᠠᠴᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡳᠯᠠᠴᡳ ᠮᠠᡶᠠ ᠰᠣᠣᠴᠠᠩᡤᠠ ᡳ ᠵᡠᡳ ᠯᠣᠩᡩᡠᠨ ᠴᠣᠣᡥᠠ ᠵᡠᡵᡴᠠᠨ ᡳᠨᡝᠩᡤᡳ ᡩᠣᡵᡤᡳᡩᡝᡵᡳ ᠨᡳᠶᠠᠯᠮᠠ ᡨᠠᡴᡡᡵᠠᡶᡳ ᠯᡳᡩᠠᠨ ᡩᡝ ᠠᠯᠠᠠᡶᡳ᠈ ᠯᡳᡩᠠᠨ ᠰᡝᡵᡝᡶᡳ ᡥᠣᡨᠣᠨ ᡩᡝ ᠴᠣᠣᡥᠠ ᠪᠠᡵᡤᡳᠶᠠᡶᡳ ᠪᡠᡵᡝᠨ ᠪᡠᡵᡩᡝᠮᡝ ᠠᠯᡳᠮᡝ ᡤᠠᡳᡥᠠ ᠮᠠᠩᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠴᠣᠣᡥᠠ ᠨᡳᠶᠠᠯᠮᠠ ᡥᡝᠨᡩᡠᠮᡝ ᠰᡝᡵᡝᡥᡝ ᠪᠠ ᡩᡝ ᠠᡩᠠᡵᠠᠮᡝ ᠠᡶᠠᠮᠪᡳ ᠪᡝᡩᡝᡵᡝᡴᡳ ᠰᡝᠮᡝ ᡥᡝᠨᡩᡝᡵᡝ ᠵᠠᡴᠠᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᡝᠮ ᠰᡝᡵᡝᡵᡝ ᠪᡝ ᠰᠠᠮᡝ ᠵᡳᡶᡳ ᠠᡳᠨᡠ ᠪᡝᡩᡝᡵᡝᠮᠪᡳ ᠰᡝᠮᡝ ᡠᡨᡥᠠᡳ ᡨᡝᡵᡝ ᡥᠣᡨᠣ ᠪᡝ ᡴᠠᡶᡳ ᠠᡶᠠᠮᡝ ᡤᠠᡳᡶᡳ᠈ ᠯᡳᡩᠠᠨ ᠸᡝᡳᠯᡝ ᠪᡝ ᡤᡠᠸᡝᠪᡠᡶᡳ ᠸᠠᡥᠠᡴᡡ ᡠᠵᡳᡶᡳ ᠴᠣᠣᡥᠠ ᠪᡝᡩᡝᡵᡝᡥᡝ᠈ ᡨᠠᡳᡩᠠzᡠ ᠰᡠᡵᡝ ᠪᡝᡳᠯᡝᡳ ᠪᠠᠨᡳᡵᡝᡴᡝ ᡝᠮᡝ ᡳ ᡩᡝᠣ ᠰᠠᠮᠵᡳᠨ ᡤᡝᠪᡠᠩᡤᡝ ᠨᡳᠶᠠᠯᠮᠠ ᠪᡝ ᡳᠨᡝᡴᡠ ᠯᠣᠩᡩᡠᠨ ᡧᡠᠰᡳᡥᡳᠶᡝᠮᡝ ᠰᡳᠨᡳ ᠨᠣᠨ ᠮᡳᠨᡩᡝ ᠪᡳᡴᠠᡳ᠈ ᠰᡳ ᠮᡳᠨᡳ ᡝᠮᡤᡳ ᡝᠮᡠ ᡥᡝᠪᡝ ᠣᠴᡳᠨᠠ ᠰᡝᡥᡝ ᠮᠠᠩᡤᡳ᠈ ᠰᠠᠮᠵᠠᠨ᠈ ᠯᠣᠩᡩᡠᠨ ᡳ ᡤᡳᠰᡠᠨ ᡩᡝ ᡩᠣᠰᡳᡶᡳ᠈ ᡳᠨᡳ ᡠᡴᠰᡠᠨ ᡳ ᠨᡳᠶᠠᠯᠮᠠ ᠪᡝ ᡤᠠᡳᡶᡳ ᠵᡠᡤᡡᠨ ᡩᠣᠰᠣᡶᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳ ᠮᡝᠶᡝ ᡤᠠᡥᠠᡧᠠᠨ ᡥᠠᠰᡥᡡ ᠪᡝ ᠸᠠᡥᠠ᠈ ᡨᡝᡵᡝ ᠪᡝ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᠣᠨᠵᡳᡶᡳ᠈ ᠮᡝᠶᡝ ᡳ ᡤᡳᡵᡝᠨ ᠪᡝ ᡤᡝᠨᡝᡴᡳ ᠰᡝᠮᡝ ᠴᠣᠣᡥᠠ ᡳᠰᡳᠪᡠᠴᡳ᠈ ᡠᡴᠰᡠᠨ ᡳ ᠠᡥᡡᠨᡩᡝ᠈ ᡩᡝᠣᡩᡝ ᡤᡝᠮᡠ ᡝᠮᡠ ᡥᡝᠪᡝᡳ ᠸᠠᡶᡳ᠈ ᠶᠠᠶᠠ ᡤᡝᠨᡝᡵᠠᡴᡡ ᠣᡥᠣ ᠮᠠᠩᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᡠᡩᡠ ᡤᡠᠴᡠ ᠪᡝ ᡤᠠᡳᡶᡳ᠈ ᡤᡝᠨᡝᡴᡳ ᠰᡝᡵᡝ ᡩᡝ᠈ ᠨᡳᠶᠠᠯᠮᠠ ᡥᠣᡨᠣᠨ ᡳ ᡠᡴᠰᡠᠨ ᡳ ᡝᠰᡥᡝᠨ ᠯᡝᠩᡩᡝᠨ ᡩᠠᡶᡠᠯᠠᠮᡝ ᡥᡝᠨᡩᡠᠮᡝ᠈ ᠮᡠᠰᡝᡳ ᡠᡴᠰᡠᠨ ᡳ ᠨᡳᠶᠠᠯᠮᠠ ᠰᡳᠮᠪᡝ ᡝᡥᡝ ᡤᡡᠨᡳᡵᠠᡴᡡ ᠣᠴᡳ᠈ ᠰᡳᠨᡳ ᠮᡝᠶᡝ ᠪᡝ ᠠᡳᠨᡠ ᠸᠠᠮᠪᡳᡥᡝ᠈ ᠰᡳ ᡤᡡᠨᡳᡥᠠ ᠪᡳ ᠠᠶᠣ ᠰᡝᡥᡝ ᠮᠠᠩᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ᠈ ᡠᡴᠰᡠᠨ ᡝᡨᡠᡶᡳ ᠮᠣᡵᡳᠨ ᠸᠠᠯᡠᡶᡳ᠈ ᡥᡝᠴᡝᠨ ᡳ ᠵᡠᠯᡝᡵᡤᡳ ᡥᡝᡨᡠ ᠠᠯᠠ ᡩᡝ ᡤᡝᠨᡝᡶᡳ ᠪᡝᡵᡳ ᡨᠠᡨᠠᠮᡝ ᠠᠮᠠᠰᡳ ᠵᡠᠯᡝᡩᡳ ᠵᡳᠯᡳᡩᠠᠮᡝ ᠯᡝᠣᡶᡳ ᠠᠮᠠᠰᡳ ᡤᠠᡧᠠᠨ ᡩᡝ ᠵᡳᡶᡳ ᡥᡝᠨᡩᡠᠮᡝ ᠮᡳᠮᠪᡝ ᠸᠠᡴᡳ ᠰᡝᡵᡝ ᠨᡳᠶᠠᠯᠮᠠ ᡨᡝ ᡨᡠᠴᡳᠨᡠ ᠰᡝᠮᡝ ᡥᡝᠨᡩᡠᡶᡳ᠈ ᠮᡝᠶᡝ ᡳ ᡤᡳᡵᡝᠨ ᠪᡝ ᡤᡝᠨᡝᡶᡳ ᡤᠠᠵᡳᠴᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡝ ᠸᠠᡴᡳ ᠰᡝᡥᡝ ᠨᡳᠶᠠᠯᠮᠠ ᠶᠠᠶᠠ ᡤᡝᠨᡝᠮᡝ ᡨᡠᠴᡳᡴᡝᡴᡡ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠰᠠᡩᡠᠨ ᡥᠠᠯᠠᡳ ᠮᡝᠶᡝ ᡳ ᡤᡝᠨᡝᡵᡝ ᠪᡝ ᡳᠨᡳ ᠪᠣᠣ ᡩᡝ ᡩᠣᠰᡳᠮᠪᡠᡶᡳ᠈ ᡳᠨᡳ ᡝᡨᡠᡥᡝ ᡝᡨᡠᡴᡠ ᠮᠠᡥᠠᠯᠠ ᡤᡡᠯᡥᠠ ᠪᡝ ᡝᡨᡠᠪᡠᡶᡳ᠈ ᡤᡳᡵᡝᠨ ᠪᡝ ᡩᠣᡵᠣᠯᠣᠮᡝ ᠰᡳᠨᡩᠠᡥᠠ᠈ ᡨᡝᡵᡝ ᠨᡳᠶᠠᠯᠮᠠ ᠵᡠᠸᠠᡵᡳ ᡠᡥᡠᡳ ᠪᡳᠶᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡝᠮᡠ ᡩᠣᠪᠣᡵᡳ ᡩᡝᡩᡠᡥᡝ ᠮᠠᠩᡤᡳ᠈ ᡨᡠᠯᡝ ᠨᡳᠶᠠᠯᠮᠠᡳ ᠠᠰᡠᡴ ᠪᡝ ᡩᠣᠨᠵᡳᡶᡳ ᠵᡠᠰᡝ ᠪᡝ ᠵᠠᡳᠯᠠᠪᡠᡶᡳ᠈ ᠪᡝᡵᡳ ᠰᡳᡵᡩᠠᠨ ᠵᠠᡶᠠᡶᡳ ᠵᠠᠩᡴᡡ ᠠᠰᡥᠠᡶᡳ ᡶᡠᠵᡳᠨ ᠪᡝ ᡨᡠᠯᡝ ᡤᡝᠨᡝᡵᡝ ᠠᡵᠠᠮᡝ ᡳᠨᡳ ᠪᡝᠶᡝ ᠪᡝ ᡶᡠᠵᡳᠨ ᡩᡝ ᡩᠠᠯᡩᠠᡶᡳ᠈ ᡝᠮᡠ ᠨᡳᠶᠠᠯᠮᠠ ᡤᡝᠰᡝ ᠣᠪᡠᡶᡳ᠈ ᠪᠣᠣ ᡳ ᠸᠠᡵᡤᡳ ᡥᡡᠯᠠᠨ ᡳ ᠵᠠᡴᠠᡩᡝ ᡤᡝᠨᡝᡶᡳ᠈ ᡶᡠᠵᡳᠨ ᠪᡝ ᡨᡠᠯᡝ ᡤᡝᠨᡝᡥᡝ ᡩᡝ ᠠᡵᠠᠮᡝ ᡨᡠᠪᡠᡶᡳ᠈ ᠪᠣᠣ ᡩᡝ ᡠᠩᡤᡳᡶᡳ᠈ ᠰᡠᡵᡝ ᠪᡝᡳᠯᡝ ᡳᠨᡳ ᠪᡝᠶᡝ ᡨᡠᡨᠠᡶᡳ ᡨᡠᠸᠠᠴᡳ᠈ ᠠᠪᡴᠠ ᠯᡡᠰ ᠰᡝᠮᡝ ᡨᡡᠯᡤᡠᠨ ᠣᡩᡳ ᡠᠮᠠᡳ ᠰᠠᠪᡠᡵᠠᡴᡡ ᡳᠯᡳᡥᠠ ᠪᡳᠴᡳ᠈ ᡥᡡᠯᠠᠨ ᡩᠣᠰᡳᠮᡝ ᠵᡳᠮᡝ ᡥᡡᠯᡥᠠ ᡳ ᠵᠠᡴᠠᡩᡝ ᡳᠰᡳᠵᡳᡵᡝᠩᡤᡝ᠈ ᠠᠪᡴᠠ ᡨᠠᠯᡴᡳᠶᠠᠨ ᡨᠠᠯᡴᡳᠶᠠᡶᡳ᠈ ᡨᠠᠯᡴᡳᠶᠠᠨ ᡳ ᡝᠯᡩᡝᠨ ᡩᡝ ᡥᡡᠯᡥᠠᡳ ᡥᠠᠨᠴᡳ ᡳᠰᡳᠨᠵᡳᡥᠠ ᠪᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡨᡝᠨᡳ ᠰᠠᠪᡠᡶᡳ ᠵᠠᠩᡴᡡᡳ ᡤᡝᠴᡝᡥᡝᠯᡝᠮᡝ ᡨᡠᡥᡝᠪᡠᡶᡳ᠈ ᠪᠣᠣᡳ ᠨᡳᠶᠠᠯᠮᠠ ᠪᡝ ᡥᡡᠯᠠᡶᡳ ᡥᡳᡩᠠᠮᡝ ᠵᠠᡶᠠᡥᠠ ᠮᠠᠩᡤᡳ᠈ ᠪᠣᠣᡳ ᡠᡨᡥᠠᡳ ᡤᡝᠪᡠᠩᡤᡝ ᠨᡳᠶᠠᠯᠮᠠ ᡥᡝᠨᡩᡠᠮᡝ᠈ ᡝᡵᡝ ᡥᡡᠯᡥᠠ ᠪᡝ ᠵᠠᡶᠠᡶᡳ ᠠᡳᠨᠠᠮᠪᡳ᠈ ᠸᠠᡴᡳ ᡩᡝᡵᡝ ᠰᡝᡥᡝ ᠮᠠᠩᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᠣᠯᠣ ᡤᡡᠨᡳᠮᡝ᠈ ᡝᡵᡝ ᡥᡡᠯᡥᠠ ᠪᡝ ᠸᠠᠴᡳ᠈ ᡥᡡᠯᡥᠠᡳ ᡝᡥᡝᠨ ᠮᡳᠨᡩᡝ ᡳᠯᡝᡨᡠᠯᡝᠮᡝ ᡩᠠᡳᠨ ᠣᠮᠪᡳ᠈ ᡩᠠᡳᠨ ᠣᠴᡳ᠈ ᠮᡳᠨᡳ ᠴᠣᠣᡥᠠ ᡴᠣᠮᠰᠣ᠈ ᡨᠠᡴᠠ ᡳᠯᡝᡨᡠᠯᡝᡶᡳ ᠠᡳᠨᠠᠮᠪᡳ ᠰᡝᠮᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠵᡠᡵᡨᠠᡳ ᡥᡝᠨᡩᡠᠮᡝ᠈ ᡝᡵᡝ ᡥᡡᠯᡥᠠ ᠠᡳᠨᠴᡳ ᠮᡳᠨᡳ ᡳᡥᠠᠨ ᡥᡡᠯᡥᠠᠮᡝ ᠵᡳᡥᡝᠪᡳᡩᡝᡵᡝ ᠰᡝᠮᡝ ᡥᡝᠨᡩᡠᡥᡝ ᠮᠠᠩᡤᡳ᠈ ᡨᡝᡵᡝ ᡥᡡᠯᡥᠠ ᠶᠠᠪᡠᠮᡝ ᠪᡳ ᡳᡥᠠᠨ ᡥᡡᡥᠠᠵᡳᡥᠠ ᠮᡠᠵᠠᠩᡤᠠ ᠰᡝᡵᡝ ᠵᠠᡴᠠᡩᡝ᠈ ᡠᡨᡥᠠᡳ ᡥᡝᠨᡩᡠᠮᡝ᠈ ᡝᡵᡝ ᡥᡡᠯᡥᠠ ᡥᠣᠯᡨᠣᠮᡝ ᡥᡝᠨᡩᡠᠮᡝ᠈ ᠴᠣᡥᠣᠮᡝ ᠰᡳᠮᠪᡝ ᠸᠠᠮᡝ ᠵᡳᡥᡝᠪᡳᡴᠠᡳ᠈ ᡝᡵᡝ ᠪᡝ ᠸᠠᡴᡳ ᡩᡝᡵᡝ ᠰᡝᠴᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠣᠵᠣᡵᠠᡴᡡ ᡥᡝᠨᡩᡠᠮᡝ ᡳᡳᡥᠠᠨ ᡥᡡᠯᡥᠠᠮᡝ ᠵᡳᡥᡝ ᠮᡠᠵᠠᠩᡤᠠ ᠣᠴᡳ᠈ ᠰᡳᠨᡩᠠᠴᡳ ᡠᠩᡤᡳ ᠰᡝᠮᡝ ᡨᡝᡵᡝ ᡥᡡᠯᡥᠠ ᠪᡝ ᠰᡳᠨᡩᠠᠴᡳ ᡠᠩᡤᡳᡥᡝ᠉ ᠵᡠᠸᠠᡵᡳ ᡩᡠᠯᡳᠮᠪᠠᡳ ᠪᡳᠶᠠ ᡩᡝ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡝᠮᡠ ᡩᠣᠪᠣᡵᡳ ᡩᡝᡩᡠᠴᡳ᠈ ᠪᠣᠣᡳ ᡝᠮᡠ ᡥᡝᡥᡝ ᠵᡠ ᡩᡝ ᡨᡝᡶᡳ ᡥᡳᠶᠠᠪᡝᠨ ᡩᠠᠪᡠᡵᡝ ᠮᡠᡴᡳᠶᡝᡵᡝ ᠯᠠᠮᡝ ᡠᠮᠠᡳ ᡩᡝᡩᡠᡵᠠᡴᡡ ᠣᡥᠣ ᠮᠠᠩᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡤᡡᠨᡳᠮᡝ᠈ ᡝᡵᡝ ᡥᡝᡥᡝ ᠪᠠᠪᡳ ᠠᡳᠨᡠ ᡩᡝᡩᡠᡵᠠᡴᡡ ᡨᡝᡥᡝᠪᡳ᠈ ᠠᡵᠪᡠᠨ ᡶᠠᡳᠵᡳᠮᠠ ᠰᡝᠮᡝ ᡩᡝᡩᡠᡥᡝ ᠪᠠᠴᡳ ᡳᠯᡳᡶᡳ᠈ ᡩᠣᠯᠣ ᡶᠣᡥᠣᠯᠣᠨ ᡠᡴᠰᡳᠨ ᡝᡨᡠᡶᡳ᠈ ᠣᡳᠯᠣ ᡥᡝᡥᡝᠰᡳ ᠴᡠᠪᠠᠨ ᡝᡨᡠᡶᡳ ᠵᠠᠩᡴᡡ ᠠᠰᡥᠠᡶᡳ᠈ ᠪᡝᡵᡳ ᠰᡳᡵᡩᠠᠨ ᠪᡝ ᡤᠠᠯᠠ ᡩᡝ ᠵᠠᡶᠠᡶᡳ ᡨᡠᠯᡝ ᡤᡝᠨᡝᡵᡝ ᡩᡝ ᠠᡵᠠᠮᡝ᠈ ᠪᠣᠣ ᠴᡳ ᡨᡠᠴᡳᡶᡳ ᡥᡡᠯᠠᠨ ᡳ ᠵᠠᡴᠠᡩᡝ ᡳᠯᡳᡶᡳ ᡨᡠᠸᠠᠴᡳ᠈ ᡥᡡᠸᠠᡳ ᡩᡠᡴᠠᡳ ᡩᠠᠯᠪᠠ ᡩᡝ ᡥᠠᠰᡥᠠ ᠠᡴᡡ ᡶᡠᠨᡨᡠᡥᡠ ᠪᠠ ᡩᡝ᠈ ᡥᠠᠰᡥᠠ ᠴᡳ ᠮᠠᠵᡳᡤᡝ ᡩᠠᠴᡳᠯᠠᠮᡝ ᡨᡠᠸᠠᠴᡳ᠈ ᠠᠪᡴᠠ ᡨᡠᠯᠯᡤᡠᠨ ᠣᡶᡳ᠈ ᠶᠠᡳ ᠰᠠᠪᡠᡥᠠᡴᡡ᠈ ᠰᡳᡵᡩᠠᠨ ᠰᠣᠯᠪᡳᡶᡳ ᡳᠯᡳᡥᠠ ᠪᡳᠴᡳ᠈ ᠪᠠᠪᡴᠠ ᡤᡝᠯᡳ ᡨᠠᠯᡴᡳᠶᠠᠨ ᡨᠠᠯᡴᡳᠶᠠᡶᡳ᠈ ᡨᠠᡴᡳᠶᠠᠨ ᡳ ᡝᠯᡩᡝᠨ ᡩᡝ ᡨᡠᠸᠠᡶᡳ ᡥᡡᠯᡥᠠ ᡤᠠᠪᠴᡳ ᡳᠰᡳᠨᠵᡳᡥᠠᠪᡳᠮ ᡨᡝᡵᡝ ᠰᠣᠯᠪᡳᡥᠠ ᠰᡳᡵᡩᠠᠨ ᡳ ᡥᡝᠪᡩᡝᡵᡝ ᠵᠠᡴᠠᡩᡝ᠈ ᡥᡡᠯᡥᠠ ᠮᡝᡥᡠᠮᡝ ᡠᠪᠠᠯᡳᠶᠠᡶᡳ ᠮᡝᡳᡵᡝᠨ ᡳ ᠵᠠᡴᠠᡳ ᡝᡨᡠᡴᡠ ᡴᠠᠯᡠᠮᠠᠮᡝ ᡥᡡᠯᡥᠠ ᠮᠠᠩᡤᡳ᠈ ᡨᡝᡵᡝ ᡥᡡᠯᡥᠠ ᠪᡠᡵᠯᠠᠮᡝ ᠰᡠᠵᡠᡵᡝ ᠪᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᠣᡧᠣᠮᡝ ᠠᠮᠴᠠᠨᠠᡶᡳ ᡥᡝᠪᡩᡝᡵᡝ ᠵᠠᡴᠠᡩᡝ᠈ ᡥᡡᠯᡥᠠᡳ ᠵᡠᠸᡝ ᠪᡝᡨᡥᡝ ᠰᡳᠨᡩᠠᡵᠠᠮᡝ ᡤᠣᡳᡶᡳ ᡨᡠᡥᡝᡴᡝ ᠮᠠᠩᡤᡳ᠈ ᡠᠵᡠ ᠪᡝ ᠵᠠᠩᡴᡡᡳ ᡤᡝᠴᡝᡥᡝᠯᡝᠮᡝ ᠯᡳᠶᡝᠯᡳᠶᡝᠪᡠᡶᡳ ᠵᠠᡶᠠᡶᡳ ᡥᡠᡨᡥᡠᡶᡳ ᡨᠠᠨᡨᠠᡵᠠ ᡩᡝ᠈ ᠪᡠᠶᠠ ᡩᡝᠣᡩᡝ ᡤᡠᠴᡠᠰᡝ ᠪᠣᠣᡳ ᠨᡳᠶᠠᠯᠮᠠ ᡤᡝᠮᡠ ᡝᡵᡝ ᡥᡡᠯᡥᠠ ᠪᡝ ᡨᠠᠨᡨᠠᡶᡳ ᠠᡳᠨᠠᠮᠪᡳ᠈ ᠸᠠᡴᡳ ᡩᡝᡵᡝ ᠰᡝᠴᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠣᠵᡳᡵᠠᡴᡡ ᡥᡝᠨᡩᡠᠮᡝ᠈ ᡝᡵᡝ ᠪᡝ ᠸᠠᡥᠠ ᡩᡝ᠈ ᡝᡵᡝᡳ ᡝᠵᡝᠨ ᡳᠨᡳ ᠨᡳᠶᠠᠯᠮᠠ ᠪᡝ ᠸᠠᡥᠠ ᠰᡝᠮᡝ ᡳᠯᡝᡨᡠ ᡩᠠᡳᠨ ᠣᡶᡳ᠈ ᠮᡠᠰᡝᡳ ᠵᡝᡴᡠᡳ ᡝᡵᡝ ᠪᡝ ᡤᡝᠮᡠ ᡶᡝᡨᠠᡶᡳ ᡤᠠᠮᠠᠮᠪᡳ᠈ ᡤᡝᡨᡝᡵᡝ ᠵᡝᡴᡠ ᠠᡴᡡ ᠣᠴᡳ ᠮᡠᠰᡝᡳ ᠵᡠᡧᡝᠨ ᡤᡝᠮᡠ ᡠᠪᠠᡧᠠᠮᠪᡳ ᡴᠠᡳ᠈ ᠵᡠᡧᡝᠨ ᡤᡝᠮᡠ ᡠᠪᠠᡧᠠᠴᡳ ᠮᡠᠰᡝᡳ ᠪᡝᠶᡝᡳ ᡨᡝᡳᠯᡝ ᠣᡥᠣ ᠮᠠᠩᡤᡳ᠈ ᡥᠣᡨᠣᠨ ᠪᡝ ᡴᠠᡥᠠ ᡩᡝ ᠠᡩᠠᡵᡝᠮᡝ ᡝᠯᠵᡝᠮᠪᡳ᠈ ᠮᠰᡝ ᡩᡝ ᠰᡳᡵᡩᠠᠨ ᡠᡩᡠ ᠪᡳ᠈ ᡝᡵᡝ ᠪᡝ ᠸᠠᡥᠠ ᡩᡝ ᡤᡠᡵᡠᠨ ᡤᡝᠮᡠ ᠮᡠᠰᡝ ᠪᡝ ᠨᡝᠨᡝᠮᡝ ᡩᠠᡳᠨ ᡩᡝᡵᡳᠪᡠᡥᡝ ᠰᡝᠮᠪᡳᡴᠠᡳ ᠰᡝᠮᡝ ᡥᡝᠨᡩᡠᡶᡳ ᠵᠠᡶᠠᡥᠠ ᡳᠰᡠ ᡤᡝᠪᡠᠩᡤᡝ ᡥᡡᠯᡥᠠ ᠪᡝ ᠰᡳᠨᡩᠠᡶᡳ ᡠᠩᡤᡳᡥᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠨᡳᠩᡤᡠᠨ ᠪᡳᠶᠠ ᡩᡝ ᡩᡠᡳᠨ ᡨᠠᠩᡤᡡ ᠴᠣᠣᡥᠠ ᠪᡝ ᡤᠠᡳᡶᡳ ᡳᠨᡳ ᠮᡝᠶᡝ ᠪᡝ ᠸᠠᡥᠠ᠈ ᠨᠠᠮᠵᠠᠨ᠈ ᠰᠠᠮᠵᠠᠨ᠈ ᠨᡝᠰᡳᠨ᠈ ᠸᠠᠨᠵᡳᡤᠠᠨ ᠪᡝ ᡩᠠᡳᠯᠠᠮᡝ ᡤᡝᠨᡝᡶᡳ ᠮᠠᡵᡩᡠᠨ ᡤᡝᠪᡠᠩᡤᡝ ᡧᠠᠨᠴᡳᠨ ᠪᡝ ᠠᡶᠠᡵᠠ ᡩᡝ᠈ ᡨᡝᡵᡝ ᡧᠠᠨᠴᡳᠨ ᠠᠯᡳᠨ ᡳ ᠨᡳᠩᡤᡠᡩᡝ ᠠᡵᠠᡶᡳ ᡥᠠᡴᠰᠠᠨ ᡝᡥᡝ ᠣᡶᡳ᠈ ᠠᡶᠠᡵᠠ ᡩᡝ ᡳᠯᠠᠨ ᡴᠠᠯᡴᠠ ᠪᡝ ᠠᡩᠠᡶᡳ ᡳᠪᠠᠮᡝ ᡤᠠᠮᠠᡶᡳ ᡥᠠᡶᡳᡵᠠᡥᡡᠨ ᠪᠠ ᡩᡝ ᡳᠰᡳᠨᠠᡥᠠ ᠮᠠᠩᡤᡳ᠈ ᡝᠮᡠ ᡴᠠᠯᠠᡴᠠ ᠪᡝ ᠵᡠᠯᡝᡵᡳ ᠣᠪᡠᡶᡳ ᠵᡠᠸᡝ ᡴᠠᠯᡴᠠ ᡝ ᠠᠮᠠᠯᠠ ᠣᠪᡠᡥᠠ᠈ ᡥᠣᡨᠣᠨ ᡳ ᡥᠠᠨᠴᡳ ᠵᡠᠸᡝ ᡩᠠᡳ ᡩᡠᠪᡝ ᡩᡝ ᡳᠰᡳᠨᠠᠮᡝ ᠪᡝ ᡤᡝᠯᡳ ᡥᠠᡶᡳᡵᠠᡥᡡᠨ ᠣᡶᡳ᠈ ᠰᡳᠯᠠᠨ ᡴᠠᠯᡴᠠ ᠪᡝ ᠰᡳᡵᠠᠨ ᠰᡳᡵᠠᠨ ᡳ ᡳᠯᡳᠪᡠᡶᡳ ᠠᡶᠠᡵᠠ ᡩᡝ ᡥᠣᡨᠣᠨ ᡳ ᠨᡳᠶᠠᠯᠮᠠ ᡝᡵᡥᡝ ᠮᠠᡴᡨᠠᡵᠠ᠈ ᠴᠣᠪᠠᠨ ᡳ ᡩᡝᠩᡤᡝᡵᡝ ᡩᡝ ᠵᡠᠯᡝᡵᡤᡳ ᡴᠠᠯᠠᡴᠠ ᡤᠠᡵᠵᡳᡶᡳ᠈ ᠵᡠᠯᡝᡵᡤᡳ ᡴᠠᠯᠠᡴᠠᡳ ᠴᠣᠣᡥᠠ ᠵᠠᡳ ᡴᠠᠯᡴᠠ ᡩᡝ ᠪᡝᡩᡝᡵᡝᡥᡝ᠈ ᠵᠠᡳ ᡴᠠᠯᡴᠠ ᡤᡝᠯᡳ ᡤᡝᡵᠵᡳᡶᡳ ᡳᠯᠠᠴᡳ ᡴᠠᠯᡴᠠ ᡩᡝ ᠪᡝᡩᡝᡵᡝᡶᡳ ᠠᡶᠠᡵᠠ ᠴᠣᠣᡥᠠᡳ ᠨᡳᠶᠠᠯᠮᠠ ᡝᠮᡠ ᡴᠠᠯᡴᠠ ᡩᡝ ᡩᠠᠯᡵᠠᡵᠠ ᡧᠣᠯᠣ ᠠᡴᡡ ᠣᡶᡳ᠈ ᡤᡝᠮᡠ ᡠᠵᡠ ᠰᠣᠮᡳᠮᡝ ᡠᡴᠠᡶᡳ ᠠᡶᠠᠮᡝ ᠮᡠᡨᡝᡵᠠᡴᡡ ᠪᡳᠰᡳᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᠣᡨᠣᠨ ᡳ ᠵᡠᠸᡝ ᠰᡳᡩᡝᠨ ᡥᡳᡩᠠᡳ ᠮᠠᡴᡨᠠᠴᡳ ᡳᠰᡳᠨᠠᡵᠠ ᠪᠠᡩᡝ ᠰᡠᡴᠰᠠᡥᠠ ᡳ ᡥᡝᠰᡝ ᠮᡠᡴᡩᡝᡥᡝ ᡩᡝ ᠪᡝᡨᡥᡝ ᡩᠠᠯᡳᠮᡝ ᡳᠯᡳᡶᡳ ᡤᠠᠪᡨᠠᡵᠠ ᠵᠠᡴᠠᡩᡝ᠈ ᡥᠣᡨᠣᠨ ᡳ ᡝᠵᡝᠨ ᠨᡝᠰᡳᠨ ᡳ ᡩᡝᡵᡝ ᡤᠣᡳᡶᡳ ᡧᠠᠨ ᡩᡝᡵᡳ ᡨᡠᠴᡳᡴᡝ᠈ ᠵᠠᡳ ᡩᡠᡳᠨ ᠨᡳᠶᠠᠯᠮᠠ ᠪᡝ ᡤᠠᠪᡨᠠᠮᡝ ᡨᡠᡥᡝᠪᡠᡥᡝ᠈ ᡨᡝᡵᡝᠴᡳ ᡥᠣᡨᠣᠨ ᡳ ᠴᠣᠣᡥᠠ ᠠᠮᠠᠰᡳ ᠪᡝᡩᡝᡵᡝᡥᡝ ᠮᠠᠩᡤᡳ᠈ ᡨᠠᡳᡯᡠᠰᡠᡵᡝ ᠪᡝᡳᠯᡝ ᡳᠨᡳ ᠴᠣᠣᡥᠠ ᠪᡝ ᠠᠮᠠᠰᡳ ᠪᡝᡩᡝᡵᡝᠪᡠᡶᡳ ᡥᠣᡨᠣᠨ ᠪᡝ ᡴᠠᡶᡳ᠈ ᡥᠣᡨᠣᠨ ᡳ ᡳᠨᡝᠩᡤᡳ ᡴᠠᡶᡳ ᠠᡶᠠᡶᡳ ᡩᡠᡳᠴᡳ ᡩᠣᠪᠣᡵᡳ ᠴᠣᠣᡥᠠᡳ ᠨᡳᠶᠠᠯᠮᠠ ᠪᡝ ᠪᡝᡨᡥᡝ ᠨᡳᡥᡝᡧᡠᠯᡝᠪᡠᡶᡳ ᡥᠠᡩᠠ ᠪᡝ ᡨᡠᡥᠠᡧᠠᠮᡝ ᡩᠣᠰᡳᠮᠪᡳᡶᡳ ᡧᠠᠨᠴᡳᠨ ᠪᡝ ᡤᠠᡳᡥᠠ᠈ ᡨᡝᡵᡝ ᡧᠠᠨᠴᡳᠨ ᡳ ᡝᠵᡝᠨ ᠨᡝᡩᡳᠨ᠈ ᠸᠠᠨᠵᡳᡤᠠᠨ ᠪᡠᡵᠯᠠᠮᡝ ᡨᡠᠴᡳᡶᡳ ᠵᠠᡳᡩᡳᠶᠠᠨ ᡤᡝᠪᡠᠩᡤᡝ ᠪᠠᡩᡝ ᡤᡝᠨᡝᡥᡝ᠈ ᡨᡝᡵᡝ ᡶᠣᠨᡩᡝ ᡩᠣᠩᡤᠣᡳ ᠠᡳᠮᠠᠨ ᡳ ᠪᡝᡳᠰᡝ ᠠᠴᠠᡶᡳ ᡥᡝᠪᡩᡝᠮᡝ᠈ ᠨᡝᠨᡝᠮᡝ ᠨᡳᠩᡤᡠᡨᠠᡳ ᠪᡝᡳᠰᡝ᠈ ᡥᠠᡩᠠᡳ ᠸᠠᠨ ᡥᠠᠨ ᡩᡝ ᠴᠣᠣᡥᠠ ᠪᠠᡳᡶᡳ᠈ ᠮᡠᠰᡝ ᠪᡝ ᡩᠠᡳᠯᠠᡶᡳ ᡠᡩᡠᡩᡠ ᡥᠠᡩᠠᡳ ᡤᡠᡵᡠᠨ ᡩᡝ ᡩᠠᡳᠨ ᠣᡥᠣᠪᡳ᠈ ᡝᡵᡝ ᡠᠴᡠᡵᡳ ᠨᡳᠩᡤᡠᡨᠠᡳ ᠪᡝᡳᠰᡝ ᠪᡝ ᡩᠠᡳᠯᠠᡴᡳ ᠰᡝᠮᡝ ᠰᡳᡵᡩᠠᠨ ᠪᡝ ᠵᠠᠪᠵᠠᠨ ᡩᡝ ᡥᠠᡩᠠᡳ ᠪᡳᠰᡳᡵᡝ ᡩᡝ᠈ ᡩᠣᠩᡤᠣᡳ ᠠᡳᠮᠠᠨ ᡳ ᠨᡳᠶᠠᠯᠮᠠ ᠴᡳᠨᡳ ᡩᠣᠯᠣ ᡶᠠᠴᡠᡥᡡᡵᠠᡥᠠ ᠮᠠᠩᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᠣᠨᠵᡳᡶᡳ᠈ ᠴᡳᠨᡳ ᡩᠣᠯᠣ ᡩᠠᡳᠨ ᠣᡥᠣ ᡠᠴᡠᡵᡳ ᡩᠠᡳᠯᠠᡴᡳ ᠰᡝᠮᡝ ᡥᡝᠨᡧᡝᡵᡝ ᡩᡝ᠈ ᡤᡝᡵᡝᠨ ᠠᠮᠪᠠᠰᠠ ᡩᠠᡶᡠᠯᠠᠮᡝ ᡝᠨᠴᡠ ᡤᠣᠯᠣ ᡩᡝ ᠴᠣᠣᡥᠠ ᡤᡝᠨᡝᠴᡳ ᠣᠵᡳᡵᠠᡴᡡ᠈ ᠵᡳᠪᡧᠠᠴᡳ ᠰᠠᡳᠨ᠈ ᡠᡶᠠᡵᠠᡥᠠ ᡩᡝ ᠠᡳᠨᠠᡵᠠ ᠰᡝᡥᡝ ᠮᠠᠩᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡶᡠᠮᡝ᠈ ᡝᡵᡝ ᡶᠠᠴᡠᡥᡡᠨ ᡳ ᡠᠴᡠᡵᡳ ᠮᡠᠰᡝ ᠨᡝᠨᡩᡝᡵᠠᡴᡡ ᠣᡶᡳ᠈ ᡨᡝᡵᡝ ᠠᡳᡴᠠᠪᡳᡩᡝ ᡥᡝᠪᡝ ᠠᠴᠠᡶᡳ ᡩᠠᠰᠠᠮᡝ ᠰᠠᡳᠨ ᠣᡥᠣ ᡩᡝ᠈ ᠮᡠᠰᡝ ᠪᡝ ᡤᡝᠯᡳ ᡩᠠᡳᠯᠠᠪᡳᡴᠠᡳ ᠰᡝᡥᡝ ᠮᠠᠩᡤᡳ᠈ ᡤᡝᡵᡝᠨ ᠠᠮᠪᠠᠰᠠ ᡤᡝᠮᡠ ᡤᡳᠰᡠᠨᡩᠠᡥᠠᡥᠠ᠈ ᡨᡝᡵᡝᠴᡳ ᡠᠶᡠᠨ ᠪᡳᠶᠠᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠰᡠᠨᠵᠠ ᡨᠠᠩᡡ ᠴᠣᠣᡥᠠ ᠪᡝ ᡤᠠᡳᡩᡳ ᡩᠣᠩᡤᠣᡳ ᠠᡳᠮᠠᠨ ᡳ ᡝᠵᡝᠨ ᠠᡥᠠᡳ ᠪᠠᠶᠠᠨ ᠪᡝ ᡩᠠᡳᠯᠠᠮᡝ ᡤᡝᠨᡝᠴᡳ᠈ ᠠᡥᠠᡳ ᠪᠠᠶᠠᠨ ᡩᡠᡳᠨ ᡨᠠᠩᡤᡡ ᠴᠣᠣᡥᠠ ᠪᡝ ᡤᠠᡳᡶᡳ ᡳᠨᡳ ᡨᡝᡥᡝ ᡥᡝᠴᡝᠨ ᡳ ᡩᡠᡴᠠ ᠶᠠᡴᠰᡳᡶᡳ ᠠᠯᡳᠮᡝ ᡤᠠᡳᡥᠠ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠴᠣᠣᡥᠠ ᠠᡥᠠᡳ ᠪᠠᠶᠠᠨ ᡳ ᡨᡝᡥᡝ ᠴᡳᡤᡳᡩᠠ ᡥᠣᡨᠣᠨ ᠪᡝ ᡴᠠᡶᡳ ᠠᡶᠠᠮᡝ ᡥᠣᡨᠣᠨ ᡳ ᠮᠠᡨᡠᠨ᠈ ᡤᠠᡧᠠᠨ ᡳ ᠪᠣᠣ ᠪᡝ ᡤᡝᠮᡠ ᡨᡠᠸᠠ ᠰᡳᠨᡩᠠᡶᡳ ᠪᠠᡥᠠᡵᠠ ᡳᠰᡳᡴᠠ ᠮᠠᠩᡤᡳ᠈ ᠠᠪᡴᠠ ᠠᠮᠪᠠ ᠨᡳᠮᠠᠩᡤᡳ ᠨᡳᠮᠠᡵᠠᡵᠠ ᠵᠠᡴᠠᡩᡝ᠈ ᠠᡶᠠᡵᠠ ᠪᡝ ᠨᠠᡴᠠᡶᡳ ᠪᡝᡩᡝᡵᡝᠮᡝ ᠵᡳᡩᡝᡵᡝ ᡩᡝ᠈ ᡤᡝᡵᡝᠨ ᠴᠣᠣᡥᠠ ᠪᡝ ᠵᡠᠯᡝᡵᡳ ᠣᠩᡤᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᠪᡝᠶᡝ ᠵᡠᠸᠠᠨ ᠵᡠᠸᡝ ᠨᡳᠶᠠᠯᠮᠠ ᠪᡝ ᡤᠠᡳᡩᡳ ᡨᡠᠸᠠᡳ ᡧᠠᠩᡤᡳᠶᠠᠨ ᡳ ᡩᠣᠯᠣ ᠪᡠᡴᠰᡳᡶᡳ ᠪᡳᠰᡳᡵᡝ ᡩᡝ᠈ ᡥᠣᡨᠣᠨ ᡳ ᠨᡳᠶᠠᠯᠮᠠ ᠵᡳᡥᡝ ᠴᠣᠣᡥᠠ ᠪᡝᡩᡝᡵᡝᡥᡝ ᠰᡝᠮᡝ ᠴᠣᠣᡥᠠ ᡨᡠᠴᡳᡴᡝ᠈ ᡨᡝᡵᡝ ᡨᡠᠴᡳᡴᡝ ᠴᠣᠣᡥᠠ ᠪᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡠᡴᠰᡳᡥᠠ ᠪᠠᠴᡳ ᡥᠣᠯᡴᠣᠨ ᡩᡝ ᡨᡠᠴᡳᡶᡳ ᠠᠮᠠᠰᡳ ᡤᡝᡩᡝᡶᡳ᠈ ᡩᡠᡳᠨ ᠨᡳᠶᠠᠯᠮᠠ ᠪᡝ ᠸᠠᡥᠠ᠈ ᠵᡠᠸᡝ ᡠᡴᠰᡳᠨ ᠪᠠᡥᠠ᠈ ᡨᡝᡵᡝᠴᡳ ᠴᠣᠣᡥᠠ ᠪᡝᡩᡝᡵᡝᠮᡝ ᠵᡳᡩᡝᡵᡝ ᡩᡝ᠈ ᠸᠠᠩᡤᡳᠶᠠᡳ ᠠᡳᠮᠠᠨ ᡳ ᠠᠮᠪᠠᠨ ᠰᡠᠨᠵᠠᠴᡳᠨ ᡤᡠᠸᠠᠩᡤᡠᠨ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᠠᠴᠠᠨᠵᡳᡶᡳ ᡥᡝᠨᡩᡠᠮᡝ᠈ ᠮᡳᠮᠪᡝ ᠣᠩᡤᠣᠯᠣ ᠪᡳ ᠨᡳᠶᠠᠯᠮᠠ ᠠᡶᠠᡥᠠ ᠪᡳᡥᡝ᠈ ᠪᡝᡳᠯᡝ ᠴᠣᠣᡥᠠ ᡳᡳᠰᡳᠯᠠᡶᡳ ᠮᡳᠨᡳ ᠪᠠᡨᠠᠩᡤᠠ ᠣᠩᡤᠣᠯᠣᡳ ᠨᡳᠶᠠᠯᠮᠠ ᠪᡝ ᡝᠵᡠᠯᡝᡴᡳ ᠰᡝᠮᡝ ᠪᠠᡳᡥᠠ ᠮᠠᠩᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡝᠮᡤᡝᡵᡳ ᠵᡳᡥᡝ ᡩᡝ᠈ ᡝᡵᡝ ᡤᠣᠯᠣ ᠪᡝ ᠮᠠᠨᠠᠪᡠᡴᡳ ᠰᡝᠮᡝ ᡤᡡᠨᡳᡶᡳ᠈ ᡠᡨᡥᠠᡳ ᠰᡠᠨᠵᠠᠴᡳᠨ ᡤᡠᠸᠠᠩᡤᡠᠨ ᡩᡝ ᠴᠣᠣᡥᠠ ᡩᠠᡶᡳ ᡩᠣᠪᠣᡵᡳ ᡩᡠᠯᡳᠮᡝ ᡤᡝᠨᡝᠴᡳ᠈ ᠰᡠᠨᠵᠠᠴᡳᠨ ᡤᡠᠸᠠᠩᡤᡠᠨ ᡳ ᠠᡥᡡᠨ ᡳ ᠵᡠᡳ ᡩᠠᡳᡩᡠ ᠮᡝᡵᡤᡝᠨ ᡩᠣᡵᡤᡳᡩᡝᡵᡳ ᠨᡳᠶᠠᠯᠮᠠ ᡨᠠᡴᡡᡵᠠᡶᡳ ᠣᠩᡤᠣᠯᠣ ᡩᡝ ᠠᠯᠠᠨᠠᡶᡳ᠈ ᠣᠩᡤᠣᠯᠣᡳ ᠨᡳᠶᠠᠯᠮᠠ ᠰᡝᡵᡝᠴᡳ ᠴᠣᠣᡥᠠ ᠪᡝ ᡤᡝᠮᡠ ᡥᠣᡨᠣᠨ ᡩᡝ ᠪᠠᡵᡤᡳᠶᠠᡥᠠᠪᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠴᠣᠣᡥᠠ ᡤᠠᡳᡶᡳ ᠣᠩᡤᠣᠯᠣᡳ ᡥᠣᡨᠣᠨ ᠪᡝ ᠠᡶᠠᠮᡝ ᡤᠠᡧᠠᠨ ᡳ ᠪᠣᠣ᠈ ᡥᠣᡨᠣᠨ ᡳ ᠮᠠᡨᡠᠨ ᠪᡝ ᡤᡝᠮᡠ ᡨᡠᠸᠠ ᠰᡳᠨᡩᠠᡶᡳ᠈ ᡨᠠᡳᡯᡠ ᠰᡠᡵᡝᠨ ᠪᡝᡳᠯᡝᡳ ᠪᡝᠶᡝ ᠪᠣᠣ ᡳ ᠨᡳᠩᡤᡠ ᡩᡝ ᡨᠠᡶᠠᡶᡳ ᠮᡠᠯᡠ ᡩᡝ ᠠᡴᡨᠠᠯᠠᠮᡝ ᠶᠠᠯᡠᡶᡳ᠈ ᡥᠣᡨᠣᠨ ᡳ ᡩᠣᡵᡤᡳ ᠨᡳᠶᠠᠯᠮᠠ ᠪᡝ ᡤᠠᠪᡨᠠᡵᠠ ᡩᡝ᠈ ᡥᠣᡨᠣᠨ ᡳ ᡩᠣᡵᡤᡳ ᠣᡵᡤᠣᠨᡳ ᡤᡝᠪᡠᠩᡤᡝ ᠨᡳᠶᠠᠯᠮᠠ ᡥᡝᠪᡩᠠᡥᠠ ᠰᡳᡵᡩᠠᠨ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳ ᡠᠵᡠ ᡤᠠᡳᡩᡳ ᠰᠠᠴᡳ ᡶᠣᠨᡩᠣᠵᡠᡶᡳ ᠶᠠᠯᡳ ᡝᠮᡠ ᡠᡵᡤᡠᠨ ᡩᠠᡥᠠ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠰᡳᡵᡩᠠᠨ ᠪᡝ ᡨᠠᡨᠠᠮᡝ ᡤᠠᡳᡶᡳ᠈ ᡨᡝᡵᡝ ᠰᡳᡵᡩᠠᠨ ᡳ ᠪᠠᡨᠠᡳ ᠨᡳᠶᠠᠯᠮᠠ ᡠᠵᡠᠮᡝ ᡤᡝᠨᡝᡵᡝ ᠪᡝ᠈ ᠪᠣᠣᡳ ᡥᡡᠯᠠᠨ ᡳ ᠵᡠᠸᡝ ᠰᡳᡩᡝᠨ ᡩᡝ ᠰᡳᡵᠴᠠᠮᡝ ᡤᡝᠪᡨᠠᡶᡳ ᠵᡠᠸᡝ ᠰᡠᡴᠰᠠᡥᠠ ᠰᡳᡩᡝᡵᠠᠮᡝ ᡤᠣᡳᡶᡳ ᠰᡳᡵᡩᠠᠨ ᡳ ᠰᠠᠰᠠ ᡨᡠᡥᡝᡴᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡠᠵᡠᡳ ᡶᡝᠶᡝᡳ ᠰᡝᠩᡤᡳ ᡝᠶᡝᠮᡝ ᠪᡝᡨᡥᡝᡳ ᡶᠠᡨᡳᠠ ᡩᡝ ᡳᠰᡳᠨᠠᠴᡳᠪᡝ᠈ ᡤᡝᠯᡳ ᠪᡝᡩᡝᡵᡝᡵᠠᡴᡡ ᠵᡳᠩ ᠠᡶᠠᡵᠠ ᡩᡝ᠈ ᡨᡠᠸᠠᡳ ᡧᠠᠩᡤᡳᠶᠠᠨ ᡳ ᡩᠣᠯᠣᡵᡳ ᠯᠣᡴᠣ ᡤᡝᠪᡠᠩᡤᡝ ᠨᡳᠶᠠᠯᠮᠠ ᡩᠠᠯᡩᠠᠮᡝ ᠵᡳᡶᡳ᠈ ᠰᡠᡵᡝ ᠪᡝᡳᠯᡝ ᠪᡝ ᡤᠠᠪᡨᠠᡵᠠ ᠵᠠᡴᠠᡩᡝ᠈ ᠮᡝᡳᡶᡝᠨ ᡤᠣᡳᡶᡳ ᡴᡳᠶᠠᡴ ᠰᡝᠮᡝ ᡤᡠᠸᡝᠨᠮᡝ ᠰᡳᡵᡶᠠᠨ ᡥᠠᡩᠠᡥᠠ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᠮᡝᡳᡶᡝᠨ ᡩᡝ ᡥᠠᡩᠠᡥᠠ ᠰᡳᡵᡩᠠᠨ ᠪᡝ ᡤᠣᠴᡳᠮᡝ ᡤᠠᡳᠴᡳ᠈ ᠠᠰᡠᡳ ᠮᠣᠩᡤᠣᠨ ᡥᡡᠰᡳᡴᡡ ᡩᡝ ᠰᡳᡵᡩᠠᠨ ᡶᠣᠨᡩᠣᡵᠣᡶᡳ ᠵᡠᠸᡝ ᠸᠠᡨᠠᠨ ᠪᠠᠨᠵᡳᡶᡳ ᠶᠠᠯᡳ ᠵᡠᠸᡝ ᡶᠠᡵᠰᡳ ᡩᠠᡥᠠᠮᡝ ᠵᡳᡥᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡶᡝᠶᡝ ᠪᠠᡥᠠ ᠪᡝ᠈ ᡳᠨᡳ ᠴᠣᠣᡥᠠ ᠨᡳᠶᠠᠯᠮ ᠠᠰᠠᡶᡳ ᡠᡴᡩᠣᠮᡝ ᠵᡳᡶᡳ ᠪᠣᠣᡳ ᠨᡳᠩᡤᡠ ᡩᡝ ᡩᠠᡶᡠᡩᡳ ᠶᠠᡵᡠᠮᡝ ᡤᠠᠮᠠᡴᡳ ᠰᡝᡵᡝᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ ᠰᡠᠸᡝ ᠣᡥᠣ ᠵᡳᡩᡝᡵᡝ᠈ ᠪᠠᡨᠠ ᠰᡝᡵᡝᡵᠠᡴᡡ᠈ ᠪᡳ ᡝᠯᡥᡝᡳ ᡝᠪᡠᡵᡝ ᠰᡝᠮᡝ ᡥᡝᠨᡩᡠᡶᡳ᠈ ᠮᠣᠩᡤᠣᠨ0ᡳ ᠰᡝᠩᡤᡳ ᡤᠠᠪᡨᠠᡵᠠᡳ ᡤᡝᠰᡝ ᡨᡠᠴᡳᡵᡝ ᠪᠠᠪᡝ ᡝᠮᡠ ᡤᠠᠯᠠᡳ ᡧᠣᡶᠣᡵᠣᠮᡝ ᠵᠠᡶᠠᡶᡳ ᠪᡝᡵᡳ ᠨᡳᡴᡝᠮᡝ ᠪᠣᠣ ᡳ ᠨᡳᠩᡤᡠᠴᡳ ᡝᠯᡥᡝᡳ ᡝᠪᡠᡶᡳ ᠵᡠᠸᡝ ᠨᡳᠶᠠᠯᠮᠠ ᠮᡝᡳᡵᡝᠨ ᡩᡝ ᠨᡳᡴᡝᡶᡳ ᠵᡳᡩᡝᡵᡝ ᡩᡝ᠈ ᡴᡡᠸᠠᠯᡳᠶᠠᡧᠠᠮᡝ ᡨᡠᡥᡝᡴᡝ᠈ ᡤᡝᡵᡝᠨ ᠠᠮᠪᠠᠰᠠ ᡤᡝᠮᡠ ᡤᠠᠰᠠᠨᡩᡠᠮᡝ ᠠᡳᡨᡠᡥᠠ ᠮᠠᠩᡤᡳ᠈ ᡶᡝᠶᡝ ᠪᡝ ᡥᡡᠸᠠᡳᡨᠠᠴᡳ ᠰᡝᠩᡤᡳ ᡳᠯᡳᡵᠠᡴᡡ᠈ ᡥᡡᠸᠠᠯᡳᠶᠠᡩᡝᡵᡳ ᠠᡳᡨᡠᡵᡝᠯᠠᠮᡝ᠈ ᠠᡳᡨᡠᡥᠠ ᡩᠠᡵᡳ ᠮᡠᡴᡝ ᠣᠮᡳᠮᡝ᠈ ᡝᠮᡠ ᡳᠨᡝᠩᡤᡳ ᡝᠮᡠ ᡩᠣᠪᠣᡵᡳ ᠣᡨᠣᠯᠣ ᠰᡝᠩᡤᡳ ᡳᠯᡳᡵᠠᡴᡡ᠈ ᠮᠣᠩᡤᠣᠨ ᡳ ᡶᡝᠶᡝ ᠪᡝ ᠰᡝᠨᠴᡝᡥᡝᡳ ᡤᡝᠰᡝ ᡥ ᡡᠸᠠᡳᡨᠠᡶᡳ ᠵᠠᡳ ᡳᠨᡝᠩᡤᡳ ᡥᠣᠨᡳᠨ ᡝᡵᡳᠨ ᡩᡝ ᠰᡝᠩᡤᡳ ᡨᡝᠨᡳ ᡳᠯᡳᡥᠠ᠈ ᡨᡝᡵᡝᠴᡳ ᠪᠠᡥᠠᡵᠠ ᡳᠰᡳᡴᠠ ᡥᠣᡨᠣᠨ ᠪᡝ ᠸᠠᠯᡳᠶᠠᡶᡳ ᠴᠣᠣᡥᠠ ᠪᡝᡩᡝᡵᡝᠮᡝ ᠵᡳᡥᡝ᠉ ᡨᡝᡵᡝᠴᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡶᡝᡵᡝ ᠵᠣᡥᡳᡥᠠ ᠮᠠᠩᡤᡳ᠈ ᠴᠣᠣᡥᠠ ᡤᡝᠨᡝᡶᡳ ᠣᠩᡤᠣᠯᠣ ᡳ ᡥᠣᡨᠣᠨ ᠪᡝ ᠠᡶᠠᠮᡝ ᡤᠠᡳᡥᠠ᠈ ᡤᡝᡵᡝᠨ ᠠᠮᠪᠠᠰᠠ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡠᠵᡠ ᠪᡝ ᡤᠠᠪᡨᠠᡥᠠ ᠣᡵᡤᠣᠨᡳ᠈ ᠮᡝᡳᡶᡝᠨ ᠪᡝ ᡤᠠᠪᡨᠠᡥᠠ ᠯᠣᡴᠣ ᠪᡝ ᠪᠠᡥᠠᡶᡳ ᠸᠠᡴᡳ ᠰᡝᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠣᠨᠴᠣ ᠮᡠᠵᡳᠯᡝᠨ ᡳ ᡥᡝᠨᡩᡠᠮᡝ᠈ ᡩᠠᡳᠨ ᠣᡶᡳ ᠠᡶᠠᡵᠠ ᡩᡝ᠈ ᠪᠠᡨᠠ ᠪᡝ ᡝᡨᡠᡴᡳ ᠰᡝᠮᡝ ᡳᠨᡳ ᡝᠵᡝᠨ ᡳ ᠵᠠᠯᡳᠨ ᡩᡝ ᠮᡳᠮᠪᡝ ᡤᠠᠪᡨᠠᡥᠠᠪᡳᡩᡝᡵᡝ᠈ ᡨᡝ ᠮᡳᠨᡩᡝ ᠣᠴᡳ᠈ ᠮᡳᠨᡳ ᠵᠠᠯᡳᠨ ᡩᡝ ᡤᡡᠸᠠ ᠪᡝ ᡤᡝᠯᡳ ᡤᠠᠪᡨᠠᡵᠠᡴᡡ ᠪᡳᠣ᠈ ᠠᡨᠠᡴᡝ ᠰᠠᡳᠨ ᠮᡳᠩᡤᠠᠨ ᡥᠠᡥᠠ᠈ ᡩᠠᡳᠨ ᠠᡩᠠᡵᠠ ᡩᡝ᠈ ᠮᠣᡥᠣ ᡤᡳᡩᠠ ᠨᡳᡵᡠ ᠰᡳᡵᡩᠠᠨ ᡳ ᡩᡠᠪᡝ ᡩᡝ ᠪᡠᠴᡝᡵᡝ ᠪᡝ ᡥᠣᠨᠣ ᡥᠠᡳᡵᠠᠮᠪᡳᡴᠠᡳ ᠮᡳᠮᠪᡝ ᡤᠠᠪᡨᠠᡥᠠ ᡨᡠᡵᡤᡠᠨᡩᡝ ᠠᡳᠨᡠ ᠸᠠᠮᠪᡳ ᠰᡝᠮᡝ ᡥᡝᠨᡩᡠᡶᡳ᠈ ᠣᡵᡤᠣᠨᡳ᠈ ᠯᠣᡴᠣ ᠪᡝ ᠸᡝᠰᡳᠮᠪᡠᡶᡳ ᡳᠯᠠᡨᠠ ᡨᠠᠩᡤᡡ ᠪᡝ ᡴᠠᡩᠠᠯᠠᡵᠠ ᠨᡳᡵᡠᡳ ᡝᠵᡝᠨ ᡥᠠᡶᠠᠨ ᠣᠪᡠᡥᠠ᠉
ᠨᡳᠣᡥᠣᠨ ᠴᠣᡴᠣ ᠠᠨᡳᠶᠠ᠈ ᠨᡳᠶᡝᡤᠨᡳᠶᡝᡵᡳ ᡩᡠᠯᡳᠮᠪᠠᡳ ᠪᡳᠶᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠣᡵᡳᠨ ᠰᡠᠨᠵᠠ ᡠᡴᠰᡳᠨ᠈ ᠰᡠᠰᠠᡳ ᠨᡳᠶᠠᠯᠮᠠ ᠪᡝ ᡤᠠᡳᡶᡳ᠈ ᠴᠣᠣᡥᠠ ᡤᡝᠨᡝᡶᡳ᠈ ᠵᠠᡳᡶᡳᠶᠠᠨ ᡤᡝᠪᡠᡤᡤᡝ ᡤᠠᡧᠠᠨ ᠪᡝ ᡩᠠᠪᠴᡳᠯᠠᡶᡳ᠈ ᡤᠠᡧᠠᠨ ᡳ ᠨᡳᠶᠠᠯᠮᠠ ᠰᡝᡵᡝᡶᡳ᠈ ᡤᡝᠮᡠ ᠪᠠᡵᡤᡳᠶᠠᡶᡳ᠈ ᡠᠮᠠᡳ ᠪᠠᡥᠠᡴᡡ᠉ ᠠᠮᠠᠰᡳ ᠪᡝᡩᡝᡵᡝᠮᡝ ᠵᡳᡩᡝᡵᡝ ᡩᡝ᠈ ᠰᠠᡵᡤᡡ᠈ ᠵᠠᡳᡶᡳᠶᠠᠨ᠈ ᡩᡠᡤᡤᡳᠶᠠ᠈ ᠪᠠᡵᡩᠠ ᡩᡠᡳᠨ ᡥᠣᡨᠣᠨ ᡳ ᡝᠵᡝᡩᡝ ᠠᠴᠠᡶᡳ᠈ ᡩᡠᡳᠨ ᡨᠠᡤᡡ ᠴᠣᠣᡥᠠ ᠪᡝ ᡤᠠᡳᡶᡳ᠈ ᠠᠮᠴᠠᠮᡝ ᠵᡳᡶᡳ᠈ ᡩᠠᡥᠠᠯᠠᠮᡝ ᡤᠠᠪᡨᠠᠮᡝ ᠠᡶᠠᡥᠠᡳ ᠵᠠᡳᡶᡳᠶᠠᠨ ᡳ ᠵᡠᠯᡝᡵᡤᡳ ᡩᠠᡳᡵᠠᠨ ᡤᡝᠪᡠᡤᡝ ᠠᠯᠠᡳ ᡥᠠᠯᡳ ᠵᠠᡴᠠᡩᡝ ᡳᠰᡳᠨᠵᡳᠮᡝ ᠴᠣᠣᡥᠠᡳ ᡝᠵᡝᠨ ᠨᡝᠰᡳᠨ᠈ ᠪᠠᠮᡠᠨᡳ᠈ ᠵᠠᡶᠠᡥᠠ ᠴᠣᠣᡥᠠ ᠴᡳ ᠵᡠᠯᡝᡵᡳ ᠴᠣᠯᡤᠣᡵᠣᡶᡳ᠈ ᡨᡠᠴᡳᡴᡝ ᠪᡝ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠰᠠᠪᡠᡶᡳ᠈ ᠮᠣᡵᡳᠨ ᠪᡝ ᡩᠠᠪᡤᡳᠮᡝ᠈ ᠠᠮᠠᠰᡳ ᡝᠮᡥᡠᠨ ᡩᠣᠰᡳᡶᡳ᠈ ᠨᡝᠰᡳᠨ ᠪᡝ ᠰᠠᠴᡳᡴᡳ ᠰᡝᡵᡝ ᡩᡝ᠈ ᠨᡝᠰᡳᠨ ᠨᡝᠨᡝᠮᡝ ᠵᠠᠪᡩᡠᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡝ ᠰᠠᠴᡳᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠵᠠᡶᠠᡥᠠ ᡧᡠᠰᡳᡥᠠ ᠯᠠᠰᡥᠠ ᡤᡝᠨᡝᡥᡝ ᠮᠠᡤᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠨᡝᠰᡳᠨ ᡳ ᠮᡝᡳᡵᡝᠨ ᠪᡝ ᠯᠠᠰᡥᠠ ᠰᠠᠴᡳᠮᡝ᠈ ᠮᠣᡵᡳᠨ ᠴᡳ ᡨᡠᡥᡝᠪᡠᡶᡳ᠈ ᡶᠣᡵᡤᠣᡧᠣᠮᡝ ᡠᡨᡥᠠᡳ ᠪᠠᠮᡠᠨᡳ ᠪᡝ ᡤᠠᠪᡨᠠᠮᡝ ᠮᠣᡵᡳᠨ ᠴᡳ ᡨᡠᡥᡝᠪᡠᡥᡝ᠉ ᡨᡝᡵᡝ ᠵᡠᠸᡝ ᠠᠮᠪᠠ ᠸᠠᠪᡠᡵᡝ ᠵᠠᡴᠠᡩᡝ᠈ ᠠᠮᠴᡳᡵᠠ ᠴᠣᠣᡥᠠ ᡠᡨᡥᠠᡳ ᠪᡝᡩᡝᡵᡝᡶᡳ ᡳᠯᡳᡥᠠ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳ ᠴᠣᠣᡥᠠᡳ ᠨᡳᠶᠠᠯᠮᠠ ᠠᠯᠠᠮᡝ᠈ ᠮᡠᠰᡝᡳ ᠴᠣᠣᡥᠠ ᠮᠣᡵᡳᠨ ᡤᡝᠮᡠ ᡧᠠᠨᡩᠠᡥᠠ ᠪᡳ᠈ ᡩᡝ ᠠᡳᠨᠠᠮᠪᡳ᠈ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠰᡠᠸᡝ ᡤᡝᠮᡠ ᠮᠣᡵᡳᠨ ᠴᡳ ᡝᠪᡠᡶᡳ ᠶᠠᡶᠠᡥᠠᠯᠠᡶᡳ᠈ ᡤᠠᠪᡨᠠᡥᠠ ᠰᡳᡵᡩᠠᠨ ᠪᡝ ᠪᠠᡳᡵᡝ ᠠᡵᠠᠮᡝ᠈ ᠪᡝᡵᡳ ᡳᠪᡝᡤᡝᠨ ᡳ ᠨᡳᠮᠠᡤᡤᡳ ᠪᡝ ᡶᡝᡨᡝᠮᡝ᠈ ᠮᠣᡵᡳᠨ ᠪᡝ ᠶᠠᡵᡤᡡᡩᠠᠮᡝ ᡝᠯᡥᡝᡳ ᡤᡝᠨᡝᡶᡳ᠈ ᡝᡵᡝ ᠮᡝᡳᡶᡝᡥᡝ ᠪᡝ ᡩᠠᠪᠠᡥᠠ ᠮᠠᡤᡤᡳ᠈ ᠮᠣᡵᡳᠨ ᡩᡝ ᡩᠠᠪᠰᡠᠨ ᠮᡠᡴᡝ ᠮᡝᠯᡝᠮᡝ᠈ ᠮᡠᡧᡳ ᠣᠮᡳᠪᡠᠮᡝ ᡝᡵᡤᡝᠮᠪᡠ᠉ ᠪᡳ ᡝᡵᡝ ᡠᠪᠠ ᡩᡝ ᠪᠠᡨᠠ ᠪᡝ ᠰᠠᡵᡨᠠᠪᡠᠮᡝ ᠪᡠᡴᠰᡳᡶᡳ᠈ ᠪᡳᠰᡳᡵᡝ ᠰᡝᠮᡝ ᡥᡝᠨᡩᡠᡶᡳ᠈ ᠴᠣᠣᡥᠠᡳ ᠨᡳᠶᠠᠯᠮᠠ ᠪᡝ ᡤᡝᠮᡠ ᠵᡠᠯᡝᡵᡵᡳ ᠣᡤᡤᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᠪᡝᠶᡝ᠈ ᠨᡝᠰᡳᠨ᠈ ᠪᠠᠮᡠᠨᡳ ᡨᡠᠴᡳᠪᡠᡥᡝ ᠪᠠᡩᡝ ᡤᡝᠨᡝᡶᡳ ᡳᠯᡳᡥᠠ ᠮᠠᡤᡤᡳ᠈ ᠨᡝᠰᡳᠨ᠈ ᠪᠠᠮᡠᠨᡳ ᡶᡝᠵᡝᡵᡤᡳ ᠴᠣᠣᡥᠠᡳ ᠨᡳᠶᠠᠯᠮᠠ ᡥᡡᠯᠠᠮᡝ ᡥᡝᠨᡩᡠᠮᡝ᠈ ᠰᡳ ᡨᡝ ᡤᡝᠨᡝᠴᡳᠨᠠ᠈ ᠸᠠᡥᠠ ᠨᡳᠶᠠᠯᠮᠠᡳ ᠶᠠᠯᡳ ᠪᡝ ᠵᡝᠮᠪᡳᠣ᠈ ᠪᡝ ᡤᡝᡵᡝᠨ ᠪᡝ ᡤᠠᡳᡴᡳ ᡩᡝᡵᡝ ᠰᡝᡥᡝ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠮᡳᠮᠪᡝ ᠠᡴᠠᠪᡠᡥᠠ ᠨᡝᠰᡳᠨ ᠪᡝ ᠠᡵᡴᠠᠨ ᠰᡝᠮᡝ ᠪᠠᡥᠠᡶᡳ ᠸᠠᡥᠠ᠈ ᡝᡵᡝᡳ ᠶᠠᠯᡳ ᠪᡝ ᠵᡝᠴᡳ ᡳᠨᡠ᠉ ᠣᠮᠪᡳᡴᠠᡳ ᠰᡝᡶᡳ ᡨᡝᡵᡝᠴᡳ ᠠᠮᠠᠰᡳ ᠪᡝᡩᡝᡵᡝᡶᡳ᠈ ᡧᠠᡩᠠᡥᠠ ᠮᠣᡵᡳᠨ ᡳ ᠴᠣᠣᡥᠠ ᠪᡝ ᡤᠣᡵᠣ ᡤᡝᠨᡝᡴᡳᠨᡳ ᠰᡝᠮᡝ᠈ ᠨᠠᡩᠠᠨ ᠨᡳᠶᠠᠯᠮᠠ ᠪᡝ ᡤᠠᡳᡶᡳ᠈ ᠰᡝᠴᡳ ᠰᠠᠪᡠᠪᡠᠮᡝ ᠪᡠᡴᠰᡳᡥᠠ ᡩᡝ ᠠᡵᠠᠮᡝ ᡳᠯᡳᡥᠠ ᠪᡝ᠈ ᠨᡝᠰᡳᠨ ᡳ ᠴᠣᠣᡥᠠᡳ ᠨᡳᠶᠠᠯᠮᠠ ᠰᠠᠪᡠᡶᡳ ᡥᡡᠯᠠᠮᡝ᠈ ᠰᡳᠨᡳ ᠪᡠᡴᠰᡳᡥᠠ ᠪᡝ ᠰᠠᡥᠠᠪᡳ᠈ ᠸᠠᡥᠠ ᡩᡝᠯᡝ ᠸᠠᠴᡳᡥᡳᠶᠠᠮᡝ ᠸᠠᡴᡳ ᠰᡝᠮᠪᡳᠣ᠈ ᠰᡝᠮᡝ ᡥᡝᠨᡩᡠᡥᡝ ᠮᠠᡤᡤᡳ᠉ ᡨᡝᡵᡝᠴᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡧᠠᠨᡩᠠᡥᠠ ᠮᠣᡵᡳᠨ ᠪᡝ ᡝᠮᡴᡝᠨ ᠸᠠᠯᡳᠶᠠᡥᠠᡴᡡ ᡤᡝᠮᡠ ᡤᠠᠵᡳᠮᡝ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᠵᡠᠸᠠᡵᡳ ᡠᠵᡠᡳ ᠪᡳᠶᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠵᠠᡶᠠᡥᠠᠨ ᠮᠣᡵᡳᠨ ᡳ ᠰᡠᠨᠵᠠ ᡨᠠᡤᡤᡡ ᠴᠣᠣᡥᠠ ᠪᡝ ᡤᠠᡳᡶᡳ᠈ ᠵᡝᠴᡝᠨ ᡳ ᠠᡳᠮᠠᠨ ᠪᡝ ᠰᠠᡳᠯᠠᠮᡝ ᡤᡝᠨᡝᡵᡝ ᡩᡝ᠈ ᠪᡳᠰᠠᠨ ᠪᡳᠰᠠᡶᡳ᠈ ᡤᡝᡵᡝᠨ ᠴᠣᠣᡥᠠ ᠪᡝ ᠪᡝᡩᡝᡵᡝᠪᡠᡶᡳ᠈ ᠣᠯᠪᠣᡳ ᠴᠣᠣᡥᠠ ᠰᡠᠰᠠᡳ᠈ ᡠᡴᠰᡳᠨ ᡳ ᠴᠣᠣᡥᠠ ᡤᡡᠰᡳᠨ ᡠᡥᡝᡵᡝᠮᡝ ᠵᠠᡴᡡᠨᠵᡠ ᠴᠣᠣᡥᠠ ᠪᡝ ᡤᠠᡳᡶᡳ ᡨᠠᠪᠴᡳᠯᠠᠮᡝ ᡤᡝᠨᡝᡵᡝ ᡩᡝ᠈ ᡤᡳᠶᠠᡥᠠᠨ ᡤᡝᠪᡠᡤᡤᡝ ᠪᠠ ᡩᡝ ᡨᡝᡥᡝ᠉ ᠰᡠᡴᡡ ᠯᠠᡳᡥᡡ ᡤᡝᠪᡠᡤᡤᡝ ᠨᡳᠶᠠᠯᠮᠠ ᡩᠣᡵᡤᡳᡩᡝᡵᡳ ᠠᠯᠠᠨᠠᡶᡳ᠈ ᡨᠣᠮᠣᡥᠣ᠈ ᠵᠠᡤᡤᡳᠶᠠ᠈ ᠪᠠᡵᡩᠠ᠈ ᠰᠠᡵᡤᡡ᠈ ᠵᠠᡳᡶᡳᠶᠠᠨ ᡝᡵᡝ ᠰᡠᠨᠵᠠ ᡥᠣᡨᠣᠨ ᡳ ᠴᠣᠣᡥᠠ ᡤᡝᠮᡠ ᡝᠮᡠ ᠪᠠᡩᡝ ᠠᠴᠠᡶᡳ ᠪᡳᠰᡳᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠠᠮᠠᠯᠠ ᡴᠠᡵᡠᠨ ᠰᡳᠨᡩᠠᡥᠠ ᠨᡳᡤᡤᡠᡨᠠ ᠵᠠᡤᡤᡳᠨ ᡩᠠᡳᠨ ᡳ ᠴᠣᠣᡥᠠ ᠪᡝ ᠰᠠᠪᡠᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡝ ᠠᠮᠴᠠᠮᡝ ᠠᠯᠠᠨᠠᡵᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡝ ᠰᠠᡥᠠᡴᡡ ᡩᡠᠯᡝᠮᡝ ᡤᡝᠨᡝᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠠᠮᠠᠯᡝ ᡴᠠᡵᡠᠨ ᠪᡳ ᠰᡝᠮᡝ ᠠᠮᠠᡵᡤᡳ ᠪᡝ ᡨᡠᠸᠠᡥᠠᡴᡡ ᡤᡝᠨᡝᡵᡝ ᡩᡝ᠈ ᡩᠠᡳᠨ ᡳ ᠴᠣᠣᡥᠠ ᡥᠣᠯᡴᠣᠨ ᡩᡝ ᡳᠰᡳᠨᠵᡳᡥᠠ᠉ ᡨᡠᠸᠠᠴᡳ ᠵᠠᡴᡡᠨ ᡨᠠᡤᡤᡡ ᠴᠣᠣᡥᠠ ᠵᠠᡳᡶᡳᠶᠠᠨ ᡳ ᡥᡠᠨᡝᡥᡝ ᠪᡳᡵᠠ ᡩᡝ ᡝᠮᡠ ᡨᡠᠪᡝ ᠵᡠᠯᡝᡵᡤᡳ ᠠᠯᡳᠨ ᡩᡝ ᡝᠮᡠ ᡨᡠᠪᡝ ᡳᠯᡳᡥᠠ ᠪᡳ᠉ ᡨᡝᡵᡝ ᠴᠣᠣᡥᠠ ᠪᡝ ᠰᠠᠪᡠᡶᡳ ᠨᡳᠮᠠᠯᠠᠨ ᡳ ᠰᡠᠨᠵᠠᠴᡳ ᠮᠠᡶᠠ ᠪᠣᠯᠠᡤᡤᠠ ᠣᠮᠣᠯᠣ ᠵᠠᠴᡳᠨ ᠰᠠᡤᡤᡠᡵᡳ ᡤᠣᠯᠣᡶᡳ᠈ ᡝᡨᡠᡥᡝ ᡠᡴᠰᡳᠨ ᠪᡝ ᠰᡠᡶᡳ ᡤᡡᠸᠠ ᡩᡝ ᡝᡨᡠᠪᡠᡥᡝ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠰᡠᠸᡝ ᠠᡥᡡᠨ ᡩᡝᠣᡳ ᡩᠣᠯᠣ ᡤᠠᡧᠠᠨ ᡳ ᠨᡳᠶᠠᠯᠮᠠ ᡩᡝ ᡩᡠᠯᡝ ᠮᠠᡤᡤᠠᠨᡳ᠈ ᡤᡝᡵᡝᠨ ᠴᠣᠣᡥᠠ ᠪᡝ ᠰᠠᡥᠠᡩᡝ ᡤᡝᠯᡝᠮᡝ᠈ ᡝᡨᡠᡥᡝ ᡠᡴᠰᡳᠨ ᠪᡝ ᠰᡠᡶᡳ ᡤᡡᠸᠠ ᡩᡝ ᡝᡨᡠᠪᡠᠮᠪᡳᠨᡳᡴᠠᡳ ᠰᡝᠮᡝ ᠵᡳᡳᠯᡳᡩᠠᠮᡝ ᡥᡝᠨᡩᡠᡶᡳ᠈ ᡳᠨᡳ ᠪᡝᠶᡝ ᡨᡠ ᠵᠠᡶᠠᡶᡳ ᠵᡠᠯᡝᡵᡳ ᡩᠣᠰᡳᡵᡝ ᡩᡝ᠈ ᠪᠠᡨᠠᡳ ᠴᠣᠣᡥᠠ ᠠᠯᡳᠮᡝ ᡤᠠᡳᡶᡳ ᡠᠮᠠᡳ ᠠᡧᠠᡵᠠᡴᡡ ᠣᡥᠣ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠮᠣᡵᡳᠨ ᠴᡳ ᡝᠪᡠᡶᡳ᠈ ᠮᠣᡳᡵᠨ ᠪᡝ ᠠᠮᠠᠰᡳ ᠪᠣᡧᠣᠮᡝ ᡠᡤᡤᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᠪᡝᠶᡝ ᡩᡝᠣ ᠮᡠᡵᡥᠠᠴᡳ᠈ ᠪᠣᠣᡳ ᠶᠠᠮᠪᡠᠯᡠ᠈ ᠣᡵᡳᡤᡤᠠ ᡩᡠᡳᠨ ᠨᠣᡶᡳ ᠵᠠᡶᠠᡥᠠᠯᠠᡶᡳ ᡤᠠᠪᡨᠠᠮᡝ᠈ ᡥᡡᠰᡠᡵᠣᠯᠣᠮᡝ ᡴᠣᡨᡥᡡᠮᡝ ᠠᡶᠠᠮᡝ᠈ ᠪᠠᡨᠠᡳ ᠣᡵᡳᠨ ᡳᠰᡳᠮᡝ ᠨᡳᠶᠠᠯᠮᠠ ᠪᡝ ᡨᡠᡥᡝᠪᡠᡶᡳ᠈ ᡨᡝᡵᡝ ᠵᠠᡴᡡᠨ ᡨᠠᡤᡤᡡ ᠴᠣᠣᡥᠠ ᠪᡝ ᡤᡳᡩᠠᡥᠠ᠉ ᡨᡝᡵᡝ ᠵᠠᡴᡡᠨ ᠴᠣᠣᡥᠠ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡩᡠᡳᠨ ᠨᡳᠶᠠᠯᠮᠠ ᡥᠣᡵᠣᠨ ᠪᡝ ᠠᠯᡳᠴᡳ᠈ ᠣᠵᠣᡵᠠᡴᡡ ᡠᡨᡥᠠᡳ ᠪᡠᡵᠯᡝᡶᡳ᠈ ᠵᠠᡳᡶᡳᠶᠠᠨ ᡳ ᡥᡠᠨᡝᡥᡝ ᠪᡳᡵᠠᡳ ᠮᡠᡴᡝ ᡩᡝ ᡶᡝᡴᡠᡴᡝ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᠠᠯᡥᡡᠨ ᡩᡝ ᡶᠠᠨᠴᠠᡶᡳ ᠰᠠᠴᠠ ᠰᡠᡶᡳ᠈ ᡠᡴᠰᡳᠨ ᡳ ᡨᠣᡥᠣᠨ ᠪᡝ ᠰᡠᠴᡳ ᡤᠣᡳᡩᠠᠮᠪᡳ ᠰᡝᠮᡝ ᡨᠠᡩᡠᠮᡝ ᠯᠠᠰᡥᠠᠯᠠᡶᡳ᠈ ᠪᡝᠶᡝ ᡩᡝ ᡝᡵᡤᡝᠮᠪᡠᠮᡝ ᡨᡝᡥᡝ ᠪᡳᠴᡳ᠉ ᠠᠮᠠᡵᡤᡳ ᠴᠣᠣᡥᠠ ᠠᠮᠪᠠᠰᠠ ᡨᡝᠨᡳ ᡳᠰᡳᠨᠵᡳᡶᡳ᠈ ᡨᡝ ᡩᠣᠰᡳᡶᡳ ᠰᠠᠴᡳᡴᡳ ᠰᡝᡵᡝ ᠵᠠᡴᠠᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠵᡳᠯᡳ ᠪᠠᠨᠵᡳᡶᡳ ᠵᠠᠪᡠᡥᠠᡴᡡ ᠪᡳᡶᡳ᠈ ᠪᠠᡨᠠᡳ ᠴᠣᠣᡥᠠ ᠪᡳᡵᠠ ᡩᠣᠣᠮᡝ ᠪᡠᡵᠯᠠᠮᡝ ᠴᠠᡵᡤᡳ ᠴᡳᡴᡳᠨ ᡩᡝ ᡳᠰᡳᠨᠠᠮᡝ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡝᠶᡝ ᠮᠠᠵᡳᡤᡝ ᡝᡵᡤᡝᡶᡳ᠈ ᠰᠠᠴᠠ ᡝᡨᡠᡶᡳ᠈ ᠴᠣᠣᡥᠠ ᠪᡝ ᡤᠠᡳᡶᡳ ᡤᡝᠯᡳ ᡩᠣᠰᡳᡶᡳ ᡨᡝᡥᡳ᠈ ᠰᡠᠨᠵᠠ ᠨᡳᠶᠠᠯᠮᠠ ᠪᡝ ᠸᠠᡥᠠ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᠪᡝᠶᡝ ᡩᡝᠣ ᠮᡠᡵᡥᠠᠴᡳ ᠵᡠᠸᡝ ᠣᡵᡳᠨ ᠪᠠᡨᠠ ᠪᡝ ᠪᠣᡧᠣᠮᡝ ᡨᡠᠪᡝ ᡨᡠᠴᡳᠮᡝ ᠠᠮᠴᠠᠮᡝ ᡤᡝᠨᡝᡶᡳ᠈ ᠵᠠᡳᡳᡶᡳᠶᠠᠨ ᡳ ᡥᠠᡴᠰᠠᠨ ᡥᠠᡶᡳᡵᠠᡥᡡᠨ ᡤᡳᡵᡳᠨ ᡥᠠᡩᠠᡳ ᠨᡳᡤᡤᡠ ᡩᡝ ᡳᠯᡳᡶᡳ ᡨᡠᠸᠠᠴᡳ᠈ ᠪᠠᡨᠠᡳ ᠪᡠᡵᠯᠠᡥᠠ ᠴᠣᠣᡥᠠ ᡨᠣᡶᠣᡥᠣᠨ ᡳᠰᡳᠮᡝ ᠨᡳᠶᠠᠯᠮᠠ ᡨᡝᡵᡝ ᡤᡳᡵᡳᠨ ᡥᠠᡩᠠ ᠪᡝ ᡨᠠᡶᡠᠮᡝ ᠵᡳᡩᡝᡵᡝ ᠪᡝ ᠰᠠᠪᡠᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᠠᡨᠠ ᠪᡝ ᠰᠠᠪᡠᡵᠠᡴᡡ ᠰᡝᠮᡝ ᠰᠠᠴᠠᡳ ᠰᠣᠨᡨᠠᡨᠣᠨ ᠪᡝ ᡤᠠᡳᡶᡳ᠈ ᠪᡝᠶᡝ ᡩᡝ ᡩᠠᠯᡩᠠᠮᡝ ᡨᡝᡶᡳ ᠠᠯᡳᠮᡝ ᡤᠠᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡝᠮᡠ ᠨᡳᠶᠠᠯᠮᠠ ᠪᡝ ᡳᠰᡥᡠᠨ ᡩᠠᡵᠠ ᠮᠣᡴᠰᠣ ᡤᠠᠪᡨᠠᠮᡝ ᡨᡠᡥᡝᠪᡠᡥᡝ᠈ ᡩᡝᠣ ᠮᡠᡵᡥᠠᠴᡳ ᡤᡝᠯᡳ ᡝᠮᡠ ᡤᡝᠮ ᡥᠠᡩᠠ ᡩᡝ ᡤᡡᠯᠠᠪᡠᠮᡝ ᠸᠠᡥᠠ᠈ ᡨᡝᡵᡝᠴᡳ ᠴᠣᠣᡥᠠ ᠪᠠᡵᡤᡳᠶᠠᡥᠠ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠮᠠᡤᡤᡳ ᡩᡠᡳᠨ ᠨᡳᠶᠠᠯᠮᠠ ᠵᠠᡴᡡᠨ ᡨᠠᡤᡤᡡᠴᠣᠣᡥᠠ ᠪᡝ ᡤᡳᡩᠠᡥᠠᡤᡤᡝ᠈ ᡳᠨᡠ ᠠᠪᡴᠠ ᠠᡳᠰᡳᠯᠠᡶᡳ ᡝᡨᡠᡥᡝ ᡩᡝᡵᡝ ᠰᡝᠮᡝ ᡥᡝᠨᡩᡠᡶᡳ ᠴᠣᠣᡥᠠ ᠪᡝᡩᡝᡵᡝᠮᡝ ᠵᡳᡥᡝ᠉ ᠪᠣᠯᠣᡵᡳ ᡩᡠᠪᡝᡳ ᠪᡳᠶᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠴᠣᠣᡥᠠ ᡤᡝᠨᡝᡩᡳ ᠰᡠᡴᠰᡠᡥᡠ ᠠᡳᠮᠠᠨ ᡳ ᠠᠨᡨᡠ ᡤᡡᠸᠠᠯᡤᡳᠶᠠ ᠪᡝ ᠠᡶᠠᠮᡝ ᡤᠠᡳᡶᡳ᠈ ᡥᠣᡨᠣᠨ ᡳ ᡝᠵᡝᠨ ᠨᠣᡳᠮᠣᡥᠣᠨ ᠪᡝ ᠸᠠᡶᡳ᠈ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᡶᡠᠯᡤᡳᠶᠠᠨ ᡳᠨᡩᠠᡥᡡᠨ ᠠᠨᡳᠶᠠ ᠵᡠᠸᠠᡵᡳ ᡩᡠᠯᡳᠮᠪᠠᡳ ᠪᡳᠶᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠴᠣᠣᡥᠠ ᡤᡝᠨᡝᡶᡳ᠈ ᡥᡠᠨᡝᡥᡝ ᠠᡳᠮᠠᠨ ᡳ ᠪᠣᡳᡥᠣᠨ ᡧᠠᠨᠴᡳᠨ ᠪᡝ ᠠᡶᠠᠮᡝ ᡤᠠᡳᡥᠠ᠉ ᠪᠣᠯᠣᡵᡳ ᡠᠵᡠᡳ ᠪᡳᠶᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠴᠣᠣᡥᠠ ᡤᡝᠨᡝᡶᡳ᠈ ᠵᡝᠴᡝᠨ ᡳ ᠠᡳᠮᠠᠨ ᡳ ᡨᠣᠮᠣᡥᠣᡳ ᡥᠣᡨᠣᠨ ᠪᡝ ᡴᠠᡶᡳ ᠠᡶᠠᡵᠠ ᡩᡝ᠈ ᠠᠪᡴᠠ ᠠᡴᠵᠠᠨ ᡩᠠᡵᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠴᠣᠣᡥᠠᡳ ᠵᡠᠸᡝ ᠨᡳᠶᠠᠯᠮᠠ ᡤᠣᡳᡶᡳ ᠪᡠᠴᡝᡵᡝ ᠵᠠᡴᠠᡩᡝ᠈ ᠠᡶᠠᡵᠠ ᠪᡝ ᠨᠠᡴᠠᡶᡳ ᠴᠣᠣᡥᠠ ᠪᡝᡩᡝᡵᡝᠮᡝ ᠵᡳᡥᡝ᠉ ᠵᠠᡳ ᠮᡠᡩᠠᠨ ᡤᡝᠯᡳ ᠴᠣᠣᡥᠠ ᡤᡝᠨᡝᡶᡳ ᡨᡝᡵᡝ ᡥᠣᡨᠣᠨ ᠪᡝ ᡩᠠᡥᠠᠪᡠᡶᡳ᠈ ᡨᡝᡵᡝᠴᡳ ᡠᡨᡥᠠᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠴᠣᠣᡥᠠ ᡤᠠᡳᡶᡳ᠈ ᠪᠠᡨᠠᡤᡤᠠ ᠨᡳᡴᠠᠨ ᠸᠠᡳᠯᠠᠨ ᠪᡝ ᡩᠠᡳᠯᠠᠮᡝ ᡩᠣᠪᠣᡵᡳ ᠰᡠᠯᡳᠮᡝ ᠠᠨᡩᠠᡵᡤᡳ ᡩᠠᡳᠨ ᡳ ᠠᡳᠮᠠ ᠪᡝ ᡩᡠᠯᡝᠮᡝ ᡤᡝᠨᡝᡶᡳ᠈ ᠨᡳᡴᠠᠨ ᠸᠠᡳᠯᠠᠨ ᡳ ᡨᡝᡥᡝ ᠣᠯᡥᠣᠨ ᡳ ᡥᠣᡨᠣᠨ ᠪᡝ ᠠᠠᡶᠮᡝ ᡤᠠᡳᡥᠠ᠉ ᡨᡝᡵᡝ ᡶᠣᠨᡩᡝ᠈ ᠨᡳᡴᠠᠨ ᠸᠠᡳᠯᠠᠨ ᡥᠣᡨᠣᠨ ᡩᡝ ᠠᡴᡡ ᠪᡳᡥᡝᠪᡳ᠈ ᡨᡝᡵᡝ ᡥᠣᡨᠣᠨ ᡳ ᡨᡠᠯᡝᡵᡤᡳ ᡤᠠᡧᠠᠨ ᡳ ᡩᡝᡥᡳ ᠨᡳᠶᠠᠯᠮᠠ ᡥᠣᡨᠣᠨ ᡩᡝ ᡩᠣᠰᡳᠮᡝ ᠵᠠᠪᡩᡠᡥᠠᡴᡡ ᠣᡶᡳ᠈ ᡥᡝᡥᡝ ᠵᡠᠰᡝ ᠪᡝ ᠪᠠᡵᡤᡳᠶᠠᡶᡳ᠈ ᡝᠮᡠ ᠶᠠᠴᡳᠨ ᠣᠯᠪᡠ ᠵᠠᡶᡠ ᠪᠣᡵᠣ ᡝᡨᡠᡥᡝ ᠨᡳᠶᠠᠯᠮᠠ ᡠᠵᡠᠯᠠᡶᡳ ᡤᡝᠨᡝᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠰᠠᠪᡠᡶᡳ᠈ ᠨᡳᡴᠠᠨ ᠸᠠᡳᠯᠠᠨ ᡩᡝᡵᡝ ᠰᡝᠮᡝ ᡨᠠᡧᠠᡵᠠᠮᡝ ᡨᡝᡥᡝ ᠨᡳᠶᠠᠯᠮᠠ ᡩᡝ ᡠᡨᡥᠠᡳ ᡝᠮᡥᡠᠨ ᡩᠣᠰᡳᡶᡳ᠈ ᠪᠠᡨᠠᡳ ᠨᡳᠶᠠᠯᠮᠠᡳ ᡤᠠᠪᡨᠠᡥᠠ ᠰᡳᡵᡩᠠᠨ ᡩᡝ ᡨᡠᡤᡤᠠᡩᡝᡵᡳ ᡤᠠᡳᡶᡳ᠈ ᡥᠠᠯᠪᠠᡳ ᡶᡝᠵᡝᡵᡤᡳᡩᡝᡵᡳ ᡥᠠᡶᡠ ᡨᡠᠴᡳᡴᡝ᠉ ᡠᡥᡝᡵᡝᠮᡝ ᠠᡶᠠᠮᡝ ᠵᠠᡴᡡᠨ ᠨᡳᠶᠠᠯᠮᠠ ᠪᡝ ᡤᠠᠪᡨᠠᠮᡝ ᠸᠠᡥᠠ᠈ ᡝᠮᡠ ᠨᡳᠶᠠᠯᠮᠠ ᠪᡝ ᠰᠠᠴᡳᠮᡝ ᡨᡠᡥᡝᠪᡠᡶᡳ᠈ ᡤᡝᡵᡝᠨ ᠪᡝ ᠸᠠᠮᡝ ᠰᠠᠮᠰᡳᠪᡠᡶᡳ ᠪᡝᡩᡝᡵᡝᠮᡝ ᠵᡳᡶᡳ᠈ ᡨᡝᡵᡝ ᠣᠯᡥᠣᠨ ᡳ ᡥᠣᡨᠣᠨ ᡩᡝ ᠵᡳᡶᡳ ᠪᡳᡥᡝ᠉ ᠵᡠᠸᠠᠨ ᡠᠶᡠᠨ ᠨᡳᡴᠠᠨ ᠪᡝ ᠸᠠᡥᠠ᠈ ᡶᡝᠶᡝ ᠪᠠᡥᠠᡶᡳ ᠵᡝᡳᡥᡠᠨ ᠵᠠᡶᠠᡥᠠ ᠨᡳᡤᡤᡠᠨ ᠨᡳᡴᠠᠨ ᡩᡝ ᡤᠠᡳᡥᠠ ᠰᡳᡵᡩᠠᠨ ᠪᡝ ᡤᡝᠮᡠ ᡩᠣᠰᡳ ᡨᠠᠨᡨᠠᠮᡝ ᡥᠠᡩᠠᡶᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ ᠨᡳᡴᠠᠨ ᠸᠠᡳᠯᠠᠨ ᡤᡝᠪᡠᡤᡤᡝ ᠨᡳᠶᠠᠯᠮᠠ ᠪᡝ ᠵᠠᡶᠠᡶᡳ ᡤᠠᠵᡳ᠈ ᠨᡳᡴᠠᠨ ᠸᠠᡳᠯᠠᠨ ᠪᡝ ᠵᠠᡶᠠᡶᡳ ᠪᡠᡵᠠᡴᡡᠴᡳ᠈ ᠰᡠᠸᡝᠨᡳ ᡩᠠᡳᠮᡳᡤ ᠪᡝ ᡩᠠᡳᠯᠠᠮᠪᡳ ᠰᡝᠮᡝ ᡥᡝᠨᡩᡠᡶᡳ᠈ ᡠᡤᡤᡳᡶᡳ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᡩᠠᡳᠮᡳᡤ ᡤᡠᡵᡠᠨ ᡳ ᡥᠠᡶᠠᠰᠠ ᡝᠯᠴᡳᠨ ᡩᠠᡴᡡᡵᠠᠮᡝ ᡥᡝᠨᡩᡠᠮᡝ ᡥᠠᠨ ᡩᡝ ᡩᠣᠰᡳᡴᠠ ᠨᡳᠶᠠᠯᠮᠠ ᠪᡝ ᠵᠠᡶᠠᡶᡳ ᠪᡠᡵᡝ ᡴᠣᠣᠯᡳ ᠪᡳᠣ᠈ ᠰᡳ ᠵᡳᡶᡳ ᠸᠠᠴᡳᠨᠠ ᠰᡝᠮᡝ ᡥᡝᠨᡩᡠᠴᡳ᠉ ᡨᠠᡳᡯᡠ ᠰᡠᡵᡝ ᡝᡳᠯᡝ ᡥᡝᠨᡩᡠᠮᡝ᠈ ᠰᡠᠸᡝᠨᡩᡝ ᠸᠠ ᠠᡴᡩᠠᡥᠠᠪᡳ᠉ ᠰᡠᠸᡝ ᠮᡳᠮᠪᡝ ᠵᠠᠯᡳᡩᠠᠮᠪᡳᡴᠠᡳ ᠰᡝᡥᡝ ᠮᠠᡤᡤᡳ᠉ ᡩᠠᡳᠮᡳᡤ ᠨᡳ ᠨᡳᠶᠠᠯᠮᠠ ᡥᡝᠨᡩᡠᠮᡝ᠈ ᠰᡳᠨᡳ ᠪᡝᠶᡝ ᡠᠮᡝ ᠵᡳᡩᡝᡵᡝ ᠴᠣᠣᡥᠠ ᠪᡝ ᡴᠣᠮᠰᠣ ᠮᠠᡤᡤᡳ᠉ ᠪᡝ ᠨᡳᡴᠠᠨ ᠸᠠᡳᠯᠠᠨ ᠪᡝ ᠰᡳᠨᡳ ᠴᠣᠣᡥᠠ ᡩᡝ ᠠᡶᠠᠪᡠᡵᡝ ᠰᡝᡥᡝ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠵᠠᡳᠰᠠ ᡤᡝᠪᡠᡤᡤᡝ ᠨᡳᠶᠠᠯᠮᠠ ᠪᡝ ᡝᠵᡝᠨ ᠠᡵᠠᡶᡳ᠈ ᡩᡝᡥᡳ ᠨᡳᠶᠠᠯᠮᠠ ᠪᡝ ᡠᡤᡤᡳᡥᡝ ᠮᠠᡤᡤᡳ᠉ ᠨᡳᡴᠠᠨ ᠸᠠᡳᠯᠠ ᠰᠠᠪᡠᡶᡳ᠈ ᡨᠠᡳ ᡩᡝ ᡨᠠᡶᡠᡴᡳ ᠰᡝᡵᡝ ᡩᡝ᠈ ᡩᠠᡳᠮᡳᡤ ᠨᡳ ᠨᡳᠶᠠᠯᠮᠠ ᡨᠠᡳ ᡩᡝ ᠰᡳᠨᡩᠠᡥᠠ ᠸᠠᠨ ᠪᡝ ᡤᠠᡳᡶᡳ ᠨᡳᡴᠠᠨ ᠸᠠᡳᠯᠠᠨ ᠪᡝ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠵᠠᡳᠰᠠᡳ ᠴᠣᠣᡥᠠ ᡩᡝ ᠠᡶᠠᠪᡠᡶᡳ ᠸᠠᡥᠠ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᠰᡳᠨᡳ ᠮᠠᡶᠠ ᠠᠮᠠᡳ ᠸᡝᡳᠯᡝ ᠪᡝ ᡝᠨᡩᡝᠪᡠᡥᡝ ᠰᡝᠮᡝ᠈ ᡩᠠᡳᠮᡳᡤ ᡤᡠᡵᡠᠨ ᡳ ᠸᠠᠨᠯᡳ ᡥᠠᠨ ᠠᠨᡳᠶᠠ ᡩᡝᡵᡳ ᠮᡝᡤᡤᡠᠨ ᠵᠠᡴᡡᠨ ᡨᠠᡤᡤᡡ ᠶᠠᠨ᠈ ᡤᡝᠴᡠᡥᡝᡵᡳ ᡨᠣᡶᠣᡥᠣᠨ ᠪᡠᠮᡝ ᠸᡝᡳᠯᡝ ᠸᠠᠵᡳᡥᠠ᠉ ᡶᡠᠯᠠᡥᡡᠨ ᡠᠯᡤᡳᠶᠠᠨ ᠠᠨᡳᠶᠠ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡧᠣᠯᠣ ᠠᡤᡤᠠᠴᡳ ᡥᡡᠯᠠᠨ ᡥᠠᡩᠠᡳ ᡧᡠᠨ ᡩᡝᡴᡩᡝᡵᡝ ᠵᡠᠯᡝᡵᡤᡳ ᡤᡳᠶᠠᡥᠠ ᠪᡳᡵᠠᡳ ᠵᡠᠸᡝ ᠰᡳᡩᠠᠨ ᡳ ᠠᠯᠠ ᡩᡝ ᡳᠯᠠᡵᠰᡠ ᡥᠣᡨᠣᠨ ᠰᠠᡥᠠᡶᡳ᠈ ᠶᠠᠮᡠᠨ ᠯᡝᠣᠰᡝ ᡨᠠᡳ ᠠᡵᠠᡥᠠ᠉ ᠨᡳᡤᡤᡠᠨ ᠪᡳᠶᠠᡳ ᠣᡵᡳᠨ ᡩᡠᡳᠨ ᡳ ᡳᠨᡝᡤᡤᡳ ᡤᡠᡵᡠᠨ ᡳ ᡩᠣᡵᠣᠨ ᠪᡝ ᡨᠣᡴᡨᠣᠪᡠᠮᡝ᠈ ᡝᡥᡝ ᡶᠠᠴᡠᡥᡡᠨ ᡥᡡᠯᡥᠠ ᡥᠣᠯᠣ ᠪᡝ ᠨᠠᡴᠠᠪᡠᠮᡝ ᡧᠠᠵᡳᠨ ᡴᠣᠣᠯᡳ ᠪᡝ ᡳᠯᡳᠪᡠᡥᠠ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠴᠣᠣᡥᠠ ᡤᠠᡳᡶᡳ᠈ ᠵᡝᠴᡝᠨ ᡳ ᠠᡳᠮᠠᠨ ᡳ ᠠᡵᡨᠠᡳ ᠪᡝ ᡩᠠᡳᠯᠠᠮᡝ ᡤᡝᠨᡝᡩᡳ᠈ ᠠᡵᡨᠠᡳ ᡧᠠᠴᡳᠨ ᠪᡝ ᠠᡶᠠᠮᡝ ᡤᠠᡳᡶᡳ᠈ ᡥᠣᡨᠣᠨ ᡳ ᡝᠵᡝᠨ ᠠᡵᡨᠠᡳ ᠪᡝ ᠸᠠᡥᠠ᠉ ᠵᠠᡴᡡᠨ ᠪᡳᠶᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯ ᡝᡳᡩᡠ ᠪᠠᡨᡠᡵᡠ ᡩᡝ ᠴᠣᠣᡥᠠ ᠠᡶᠠᠪᡠᡶᡳ᠈ ᠪᠠᡵᡩᠠᠨ ᡥᠣᡨᠣᠨ ᠪᡝ ᠠᡩᠠᠮᡝ ᡤᠠᡳᠰᡠ ᠰᡝᠮᡝ ᡠᡤᡤᡳᡥᡝ᠉ ᡝᡳᡩᡠ ᠪᠠᡨᡠᡵᡠ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡥᡝᠰᡝ ᠪᡝ ᠠᠯᡳᡶᡳ᠈ ᠴᠣᠣᡥᠠ ᠵᡠᠸᠠᡵᡳ ᡤᡝᠨᡝᠴᡳ᠈ ᡥᡠᠨᡝᡥᡝ ᠪᡳᡵᠠ ᠪᡳᠰᠠᡶᡳ ᡩᠣᠣᠴᡳ ᠣᠵᡳᡵᠠᡴᡡ ᠣᡥᠣ ᠮᠠᡤᡤᡳ᠉ ᠴᠣᠣᡥᠠᡳ ᠨᡳᠶᠠᠯᠮᠠ ᠮᠣᡤᡤᠣᠨ ᡩᡝ ᠰᡳᡵᠠᠨ ᠰᡳᡵᠠᠨ ᡳ ᠵᡠᡩᠠ ᡥᡡᠸᠠᡳᡨᠠᡶᡳ᠈ ᡨᠠᡨᠠᠮᡝ ᠪᡳᡵᠠ ᠪᡝ ᡩᠣᠣᡶᡳ᠈ ᡝᡳᡩᡠ ᠪᠠᡨᡠᡵᡠ ᡩᠣᠰᡳᡶᡳ ᠪᠠᡵᡩᠠᠨ ᡥᠣᡨᠣᠨ ᠪᡝ ᠠᡶᠠᠮᡝ ᠸᠠᠨ ᠰᡳᠨᡩᠠᡶᡳ ᡨᠠᡶᡠᡴᠠ᠉ ᡥᠣᡨᠣᠨ ᡳ ᡩᠣᡵᡤᡳ ᠨᡳᠶᠠᠯᠮᠠ ᡠᡨᡥᠠᡳ ᠣᡴᡩᠣᡶᡳ ᠠᡶᠠᡵᠠ ᡩᡝ᠈ ᡝᡳᡩᡠ ᠪᠠᡨᡠᡵᡠ ᡥᠣᡨᠣᠨ ᡳ ᡴᡝᡵᡝᠮᡝ ᡩᡝ ᠠᡴᡨᠠᠯᠠᠮᡝ ᠶᠠᠯᡠᡶᡳ ᠠᡶᠠᠮᡝ᠈ ᠰᡠᠰᠠᡳ ᡳᠰᡳᠮᡝ ᡶᡝᠶᡝ ᠪᠠᡥᠠᠴᡳᠪᡝ ᠪᡝᡵᡝᡵᡝᡵᠠᡴᡡ᠈ ᠵᡳᡤ ᠪᡠᠴᡝᠮᡝ ᠠᡶᠠᡵᠠ ᠵᠠᡴᠠᡩᡝ᠈ ᡥᠣᡨᠣᠨ ᡳ ᡩᠣᡵᡤᡳ ᠨᡳᠶᠠᠯᠮᠠ ᡤᡝᠮᡠ ᠰᠠᠮᠰᡳᠮᡝ ᠪᡠᡵᠯᠠᡥᠠ᠈ ᡨᡝᡵᡝᠴᡳ ᡝᡨᡝᡥᡝ ᡥᡡᠰᡠᠨ ᡳ ᡠᡨᡥᠠᡳ ᡥᠣᡨᠣ ᠪᡝ ᡤᠠᡳᡶᡳ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠴᠣᠣᡥᠠ ᡤᠠᡳᡶᡳ᠈ ᠵᠠᡥᠠᡳ ᡤᡝᠪᡠᡤᡤᡝ ᠠᠮᠪᠠᠨ ᡩᡝ ᡩᠠᡳᠯᠠᠮᡝ ᡤᡝᠨᡝᡶᡳ᠈ ᡩᡠᡤ -ᠨᡳ ᡥᠣᡨᠣᠨ ᠪᡝ ᠠᡶᠠᠮᡝ ᡤᠠᡳᡶᡳ᠈ ᡥᠣᡨᠣᠨ ᡳ ᡝᠵᡝᠨ ᠵᠠᡥᠠᡳ ᠪᡝ ᡩᠠᡥᠠᠪᡠᡶᡳ ᡤᠠᠵᡳᡥᠠ᠉ ᠰᡠᠸᠠᠶᠠᠨ ᠰᡳᡤᡤᡝᡵᡳ ᠠᠨᡳᠶᠠ ᡩᡠᡳᠨ ᠪᡳᠶᠠ ᡩᡝ᠈ ᡥᠠᡩᠠᡳ ᡤᡠᡵᡠᠨ ᡳ ᠸᠠᠨ ᡥᠠᠨ ᡳ ᠵᡠᡳ ᡥᡡᡵᡤᠠᠨ ᠪᡝᡳᠯᡝᡳ ᠠᠮᡳᠨ ᠵᡝᠵᡝ ᡤᡝᠪᡠᡤᡤᡝ ᠰᠠᡵᡤᠠᠨ ᠵᡠᡳ ᠪᡝ ᡳᠨᡳ ᠠᡥᡡᠨ ᡩᠠᡳᡧᠠᠨ ᠪᡝᡳᠯᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᠰᠠᡵᡤᠠᠨ ᠪᡝᠨᠵᡳᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡠᡤ ᠨᡳ ᡤᡝᠪᡠᡤᡤᡝ ᠪᠠᡩᡝ ᠣᡴᡩᠣᠮᡝ ᡤᡝᠨᡝᡶᡳ᠈ ᠪᡳᡥᠠᠨ ᡩᡝ ᡨᡝᡶᡳ᠈ ᠠᠯᡳᠶᠠᠮᡝ ᠪᡳᠰᡳᡵᡝ ᡩᡝ᠈ ᡝᠮᡠ ᠨᡳᠶᠠᠯᠮᠠ ᠵᡝᠪᡝᠯᡝ ᠠᠰᡥᠠᡶᡳ ᠮᠣᡵᡳᠨ ᠵᠠᠯᡠᡶᡳ᠈ ᠰᡠᡵᡝ ᠪᡝᡳᠯᡝᡳ ᠵᡠᠯᡝᡵᡤᡳ ᠪᡝ ᡩᡠᠯᡝᠮᡝ ᡤᡝᠨᡝᡵᡝ ᠪᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠰᠠᡶᡳ᠈ ᠠᡳᡥᠠᠨ ᡳ ᠠᠮᠪᠠᠰᠠᡳ ᠪᠠᡵᡠ ᡶᠣᠨᠵᡳᠮᡝ᠈ ᡝᡵᡝ ᠠᡳᠨᠠᡥᠠ ᠨᡳᠶᠠᠯᠮᠠ ᠠᠰᡥᠠᠨ ᡳ ᠠᠮᠪᠠᠰᠠ ᠠᠯᠠᠮᡝ ᠵᡠᠯᡝᡵᡤᡳ ᡩᠣᡤᡤᠣᡳ ᡤᠣᠯᠣᡳ ᠠᡳᠮᠠᠨ ᡩᡝ ᡝᡵᡝᠴᡳ ᡤᠠᠪᡨᠠᡵᠠ ᠮᠠᡤᡤᠠ ᠨᡳᠶᠠᠯᠮᠠ ᠠᡴᡡ᠈ ᡤᠠᠪᡨᠠᡵᠠ ᠮᠠᡤᡤᠠ ᠨᡳᠣᠸᠠᡤᡤᡳᠶᠠᠨ ᠰᡝᡵᡝᡤᡤᡝ᠈ ᡝᡵᡝ ᡳᠨᡠ ᠰᡝᠮᡝ ᠠᠯᠠᡥᠠ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠨᡳᠣᠸᠠᡤᡤᡳᠶᠠᠨ ᠪᡝ ᡥᡡᠯᠠᠪᡠᡶᡳ᠈ ᡤᠠᠪᡵᠠ ᠰᡝᡥᡝ ᠮᠠᡤᡤᡳ᠈ ᠨᡳᠣᠸᠠᡤᡤᡳᠶᠠᠨ ᠮᠣᡵᡳᠨ ᠴᡳ ᡝᠪᡠᡶᡳ᠈ ᡳᠨᡳ ᠪᡝᡵᡳ ᠰᡳᡵᡩᠠᠨ ᠪᡝ ᠵᠠᡶᠠᡶᡳ᠈ ᡤᠠᠵᡳᠮᡝ ᠵᡳᡥᡝ᠉ ᡨᠠᡳᡯᡠ ᡳᠨᡳ ᠵᡠᠯᡝᡵᡳ ᠪᡳᠰᡳᡵᡝ ᡶᠣᡩᠣᡥᠣ ᠮᠣᠣ ᠪᡝ ᠨᡳᠣᠸᠠᡤᡤᡳᠶᠠᠨ ᠪᡝ ᡤᠠᠪᡨᠠᠪᡠᡵᡝ ᠵᠠᡴᠠᡩᡝ᠈ ᡤᠠᠪᡨᠠᡥᠠ ᠰᡠᠨᠵᠠ ᠰᡳᡵᡩᠠᠨ ᡩᡝ ᡩᡝᡵᡤᡳ ᡶᡝᠵᡝᡵᡤᡳ ᠪᡝ ᡳᠯᠠᠨ ᡩᠠ ᡤᠣᡳᠪᡠᡥᠠ᠈ ᠵᡠᠸᡝ ᡩᠠ ᡠᡶᠠᡵᠠᡥᠠ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᠪᡝᠶᡝ ᠰᡠᠨᠵᠠ ᠰᡳᡵᡩᠠᠨ ᡤᠠᡳᡶᡳ᠈ ᡤᠠᠪᡨᠠᡵᠠ ᠵᠠᡴᠠᡩᡝ᠈ ᡤᡝᠮᡠ ᡝᠮᡠ ᠪᠠ ᠪᡝ ᡤᠣᡳᠪᡠᡥᠠ᠈ ᡤᡝᡵᡝᠨ ᡤᡝᠮᡠ ᡤᡝᠨᡝᡶᡳ ᡨᡠᠸᠠᠴᡳ᠈ ᠰᡠᠨᠵᠠᠨ ᠰᡳᡵᡩᠠᠨ ᡝᠮᡠ ᡨᠣᠣᡳ ᡧᡠᡵᡩᡝᠮᡝ ᡥᠠᡩᠠᡥᠠᠪᡳ᠈ ᡨᡝᡩᡝ ᠰᡠᠨᠵᠠ ᠰᡳᡵᡩᠠᠨ ᠪᡝ ᡝᠮᡠ ᡨᠠᡳᡵᠠᠨ ᡳ ᠰᠠᠴᡳᠮᡝ ᡤᠠᡳᡥᠠ᠉ ᡤᠠᠪᡨᠠᡥᠠ ᠪᠠᠴᡳ ᡨᡝᡵᡝ ᡶᠣᡩᠣᡥᠣ ᠮᠣᠣ ᡨᠠᡤᡤᡡ ᡠᡴᠰᡠᠨ ᡶᡠᠨᠴᡝᠮᡝ ᠪᡳ᠉ ᡨᡝᡵᡝᠴᡳ ᡩᠠᡳᡧᠠᠨ ᠪᡝᡳᠯᡝ ᡳᠨᡳ ᠨᠣᠨ ᠪᡝ ᠪᠠᠨᠵᡳᡶᡳ ᡩᠣᡵᠣᠯᠣᠮᡝ ᠠᠮᠪᠠ ᠰᠠᡵᡳᠨ ᠰᠠᡵᡳᠯᠠᠮᡝ ᡤᠠᡳᡥᠠ᠉ ᡨᡝᡵᡝ ᡶᠣᠨᡩᡝ᠈ ᠰᡠᠨᠵᠠ ᡳ ᠪᠠᡳ ᡝᠵᡝᠨ ᠰᠣᠯᡤᠣ ᡤᡝᠪᡠᡤᡤᡝ ᠠᠮᠪᠠᠨ ᡳᠨᡳ ᡥᠠᡵᠠᡤᡤᠠ ᠵᡠᡧᡝᠨ ᠪᡝ ᡤᠠᡳᡶᡳ᠈ ᡩᠠᡥᠠᠮᡝ ᠵᡳᡥᡝ ᠮᠠᡤᡤᡳ᠈ ᡨᡝᡵᡝᡳ ᠵᡠᡳ ᡶᡳᠣᡤᡩᠣᠨ ᠪᡝ ᡠᠵᡠ ᠵᡝᡵᡤᡳ ᠠᠮᠨᠠᠨ ᠣᠪᡠᡥᠠ᠉ ᠵᠠᡳ ᡤᡝᠯᡳ ᡩᠣᡤᡤᠣ ᡳ ᠠᡳᠮᠠᠨ ᡳ ᡝᠵᡝᠨ ᡴᡝᠴᡝ ᠪᠠᠶᠠᠨ ᡳ ᠣᠮᠣᠯᠣ ᡥᠣᡥᠣᡵᡳ ᡤᡝᠪᡠᡤᡤᡝ ᠠᠮᠪᠠᠨ ᡳᠨᡳ ᡥᠠᡵᠠᡤᡤᠠ ᠵᡠᡧᡝᠨ ᡳᡵᡤᡝᠨ ᠪᡝ ᡤᠠᡳᡶᡳ᠈ ᡩᠠᡥᠠᠮᡝ ᠵᡳᡥᡝ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᠠᠮᠪᠠ ᠰᠠᡵᡤᠠᠨ ᠵᡠᡳ ᠨᡠᠨᠵᡝ ᡤᡝᡤᡝ ᠪᡝ ᠪᡠᡶᡳ᠈ ᡥᠣᠵᡳᡥᠣᠨ ᠣᠪᡠᡶᡳ ᡠᠵᡠ ᠵᡝᡵᡤᡳ ᠠᠮᠪᠠᠨ ᠣᠪᡠᡥᠠ᠉ ᠶᠠᡵᡤᡡ ᡳ ᡤᠠᡧᠠᠨ ᡳ ᡥᡡᠯᠠᡥᡡ ᡤᡝᠪᡠᡤᡤᡝ ᠠᠮᠪᠠᠨ ᡳᠨᡳ ᠠᡥᡡᠨ ᡩᡝᠣ ᡠᡴᠰᡠᠨ ᡳ ᠨᡳᠶᠠᠯᠮᠠ ᠪᡝ ᠵᡳᡶᡳ᠈ ᠵᡠᡧᡝᠨ ᡳᡵᡤᡝᠨ ᠪᡝ ᡤᠠᡳᡶᡳ ᡩᠠᡥᠠᠮᡝ ᠵᡳᡥᡝ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡨᡝᡵᡝᡳ ᠵᡠᡳ ᡥᡡᡵᡤᠠᠨ ᠪᡝ ᡳᠨᡳ ᡤᡳᠣᡵᠣ ᡥᠠᠯᠠ ᡩᡝ ᡩᠣᠰᡳᠮᠪᡠᡶᡳ᠈ ᠵᡠᡳ ᠰᡝᠮᡝ ᡠᠵᡳᡶᡳ᠈ ᡠᠵᡠ ᠵᡝᡵᡤᡳ ᠠᠮᠪᠠᠨ ᠣᠪᡠᡥᠠ᠉ ᡨᡠᡨᡨᡠ ᡤᠣᠯᠣ ᡤᠣᠯᠣᡳ ᠠᠮᠪᠠᠰᠠ ᠪᡝ ᡝᠯᠪᡳᠮᡝ ᡩᠠᡥᠠᠪᡠᡵᡝ᠈ ᡧᡠᡵᡩᡝᠮᡝ ᡤᡠᡵᡠᠨ ᠪᡝ ᡩᠠᡳᠯᠠᠮᡝ ᠸᠠᠴᡳᡥᡳᠶᠠᡵᠠ᠈ ᡨᡝᡵᡝᠴᡳ ᠮᠠᠨᠵᡠ ᡤᡠᡵᡠᠨ ᡠᠯᡥᡳᠶᡝᠨ ᡳ ᡝᡨᡠᡥᡠᠨ ᡥᡡᠰᡠᡤᡤᡝ ᠣᡥᠣ᠉ ᡨᡝᡵᡝ ᡶᠣᠨᡩᡝ᠈ ᡩᠠᡳᠮᡳᡤ ᡤᡠᡵᡠᠨ ᡳ ᠸᠠᠨᠯᡳ ᡥᠠᠨ ᡩᡝ ᠠᠨᡳᠶᠠ᠈ ᡩᠠᡵᡳ ᡝᠯᠴᡳᠨ ᡩᠠᡴᡡᡵᠠᠮᡝ ᡥᡡᠸᠠᠯᡳᠶᠠᠰᡠᠨ ᡩᠣᡵᠣᡳ ᠰᡠᠨᠵᠠ ᡨᠠᡤᡤᡡ ᡝᠵᡳᡥᡝᡳ ᡠᠯᡳᠨ ᠪᡝ ᡤᠠᡳᠮᡝ᠈ ᡤᡠᡵᡠᠨ ᠴᡳ ᡨᡠᠴᡳᡵᡝ ᡤᡝᡤᡤᡳᠶᡝᠨ ᡨᠠᠨᠠ᠈ ᠣᡵᡥᠣᡩᡝ᠈ ᠰᠠᡥᠠᠯᡳᠶᠠᠨ ᠪᠣᡵᠣ᠈ ᡶᡠᠯᡤᡳᠶᠠᠨ᠈ ᡳᠯᠠᠨ ᡥᠠᠴᡳᠨ ᡳ ᡩᠣᠪᡳᡥᡳ᠈ ᠰᡝᡴᡝ᠈ ᠰᡳᠯᡠᠨ᠈ ᠶᠠᡵᡤᠠ᠈ ᡨᠠᠰᡥᠠ᠈ ᠯᡝᡤᡵᡝᡥᡳ᠈ ᡥᠠᡳᠯᡠᠨ᠈ ᡠᠯᡥᡠ᠈ ᠰᠣᠯᠣᡥᡳ᠈ ᡥᠠᠴᡳᠨ ᡥᠠᠴᡳᠨ ᡳ ᡶᡠᡵᡩᡝᡥᡝ ᠪᡝ ᠪᡝᠶᡝ ᡩᡝ ᡝᡨᡠᠮᡝ᠈ ᠵᡠᡧᡝᠨ ᠰᠣᠣ᠈ ᠴᡳᡤᡥᠣ᠈ ᡴᡠᠸᠠᡳᡩᡳᠶᠠᠨ᠈ ᠠᡳ ᠶᠠᠨ ᡩᡠᡳᠨ ᡩᡠᡴᠠ ᡩᡝ ᡥᡡᡩᡝ ᡥᡡᡩᡝᡧᠠᠮᡝ ᡠᠯᡳᠨ ᠨᠠᡩᠠᠨ ᡤᠠᡳᠮᡝ᠈ ᠮᠠᠨᠵᡠ ᡤᡠᡵᡠᠨ ᠪᠠᠶᠠᠨ ᠸᡝᠰᡳᡥᡠᠨ ᠣᡥᠣ᠉ ᡨᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠶᡝᡥᡝᡳ ᡤᡠᡵᡠᠨ ᡩᡝ ᡤᡝᡥᡝᡥᡝ ᡩᡝ᠈ ᠶᡝᡥᡝᡳ ᠶᠠᡤᡤᡳᠨᡠ ᠪᡝᡳᠯᡝ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠪᠠᠨᠵᡳᡥᠠ ᠠᡵᠪᡠᠨ ᠸᡝᠰᡳᡥᡠᠨ ᡳ ᠴᡳᡵᠠ ᠪᡝ ᡨᠠᡴᠠᡶᡳ᠈ ᡳᠨᡳ ᠠᠵᡳᡤᡝ ᠰᠠᡵᡤᠠᠨ ᠵᡠᡳ ᠪᡝ ᠮᡠᡨᡠᡥᠠ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᠪᡠᡵᡝ ᠰᡝᡵᡝ ᠵᠠᡴᠠᡩᡝ᠈ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠮᡳᠨᡩᡝ ᠪᡠᡴᡳ ᠰᡝᠴᡳ᠈ ᠰᡳᠨᡳ ᠠᠮᠪᠠ ᠰᠠᡵᡤᠠᠨ ᠵᡠᡳ ᠪᡝ ᠪᡳ ᠶᠠᠪᡠᡴᡳ ᠰᡝᡥᡝ ᠮᠠᡤᡤᡳ᠉ ᠶᠠᡤᡤᡳᠨᡠ ᠪᡝᡳᠯᡝ ᡥᡝᠨᡩᡠᠮᡝ᠈ ᠮᡳᠨᡳ ᠠᠮᠪᠠ ᠰᠠᡵᡤᠠᠨ ᠵᡠᡳ ᠪᡝ ᠰᡳᠨᡩᡝ ᡥᠠᡳᡵᠠᠮᡝ ᠪᡠᡵᠠᡴᡡᡤᡤᡝ ᠸᠠᡴᠠ᠈ ᡨᡝᡵᡝ ᠵᡠᡳ ᠮᡠᠵᡳᠯᡝᠨ ᠰᡳᠨᡩᡝ ᠠᠴᠠᡵᠠᡴᡡ᠉ ᠮᡳᠨᡳ ᠠᠵᡳᡤᡝ ᠰᠠᡵᡤᠠᠨ ᠵᡠᡳ ᠠᡵᠪᡠᠨ ᡶᡳᠶᠠᠨ ᡝᠨᠴᡠ᠈ ᠠᡳᠨᠴᡳ ᠰᡳᠨᡳ ᠮᡠᠵᡳᠯᡝᠨ ᡩᡝ ᠠᠴᠠᠪᡠᠮᠪᡳ ᠰᡝᡥᡝ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡨᡝᡵᡝ ᠠᠵᡳᡤᡝ ᠰᠠᡵᡤᠠᠨ ᠵᡠᡳ ᠪᡝ ᠶᠠᠪᡠᠮᡝ ᡨᠣᡴᡨᠣᡥᠣ᠈ ᠶᠠᡤᡤᡳᠨᡠ ᠪᡝᡳᠯᡝ ᠠᡴᡡ ᠣᡥᠣ ᠮᠠᡤᡤᡳ᠉ ᠠᠮᠠᠯᠠ ᠵᡠᡳ ᠨᠠᡵᡳᠮᠪᠣᠯᠣ ᠪᡝᡳᠯᡝ᠈ ᠰᡠᠸᠠᠶᠠᠨ ᠰᡳᡤᡤᡝᡵᡳ ᠠᠨᡳᠶᠠ ᡠᠵᡠᡳ ᠪᡳᠶᠠ ᡩᡝ᠈ ᡳᠨᡳ ᠵᡠᡳ ᠪᡝ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᠰᠠᡵᡤᠠᠨ ᠪᠠᠨᠵᡳᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡝᡳᠰᡝ᠈ ᠠᠮᠪᠠᠰᠠ ᠪᡝ ᡤᠠᡳᡶᡳ ᠣᡴᡩᠣᠮᡝ ᡤᡝᠨᡝᡶᡳ᠈ ᠠᠮᠪᠠ ᠰᠠᡵᡳᠨ ᠰᠠᡵᡳᠯᠠᠮᡝ ᡩᠣᡵᠣᠯᠣᠮᡝ ᡤᠠᡳᡥᠠ᠉ ᡨᡝᡵᡝ ᡶᡠᠵᡳᠨ ᠰᡠᡵᡝ ᡥᠠᠨ ᡳ ᡝᠮᡝ ᡳᠨᡠ᠉ ᡨᡝᡵᡝ ᠠᠨᡳᠶᠠ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠴᠣᠣᡥᠠ ᡤᠠᡳᡶᡳ᠈ ᠸᠠᡤᡤᡳᠶᠠᡳ ᡥᠣᡨᠣᠨ ᠪᡝ ᡩᠠᡳᠯᠠᠮᡝ᠈ ᡩᠣᡤᠰᡳᡤᡤᠠ ᡤᡝᠪᡠᡤᡤᡝ ᠪᠠ ᠪᡝ ᡩᡠᠯᡝᠮᡝ ᠶᠠᠮᠵᡳ ᡤᡝᠨᡝᡵᡝ ᡩᡝ᠈ ᠠᠮᠪᠠᠨ ᠴᡳ ᡨᠣᡳ ᡤᡝᠰᡝ ᠠᠮᠪᠠ ᡠᠰᡳᡥᠠ ᡤᡝᡥᡠᠨ ᡝᠯᡩᡝᡶᡳ ᡨᡠᡥᡝᡵᡝ ᠵᠠᡴᠠᡩᡝ᠈ ᠴᠣᠣᡥᠠᡳ ᠨᡳᠶᠠᠯᠮᠠᡳ ᠮᠣᡵᡳᠨ ᡤᡝᠮᡠ ᡠᡵᡤᡡᡥᠠ᠉ ᡨᡝᡵᡝᠴᡳ ᠴᠣᠣᡥᠠ ᠵᡠᠯᡝᠰᡳ ᡩᠣᠰᡳᠮᡝ ᡤᡝᠨᡝᡶᡳ᠈ ᠸᠠᡤᡤᡳᠶᠠᡳ ᡥᠣᡨᠣᠨ ᠪᡝ ᠠᡶᠠᠮᡝ ᡤᠠᡳᡶᡳ᠈ ᡥᠣᡨᠣᠨ ᡳ ᠵᠠᡴᠠᡩᡝ ᠪᡠᡴᠰᡳᡶᡳ ᠪᡳᠰᡳᡵᡝ ᡩᡝ᠈ ᡨᡝᡵᡝ ᡥᠣᡨᠣᠨ ᡳ ᠴᠣᠣᡥᠠ ᡨᠠᡤᡤᡡ ᠨᡳᠶᠠᠯᠮᠠ ᡨᡠᠴᡳᡴᡝ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠪᡠᡴᠰᡳᡥᠠ ᠴᠣᠣᡥᠠ ᠰᠠᠴᡳᠮᡝ ᡩᠣᠰᡳᡴᠠ ᠠᡴᡡ᠈ ᡤᠠᠪᡨᠠᠮᡝ ᡩᠣᠰᡳᡵᡝ ᡩᡝ᠈ ᡥᠣᡨᠣᠨ ᠴᡳ ᡨᡠᠴᡳᡴᡝ ᡨᠠᡤᡤᡡ ᠨᡳᠶᠠᠯᠮᠠ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡳᠯᡳᡥᠠ ᠪᠠ ᠪᡝ ᠪᡳᡵᡝᠮᡝ ᡥᠣᡨᠣᠨ ᡳ ᠪᠠᡵᡠ ᡩᠣᠰᡳᠮᡝ ᡤᡝᠨᡝᡵᡝ ᠪᡝ᠈ ᠰᡠᡵᡝ ᠪᡝᡳᠯᡝ ᡝᠮᡥᡠᠨ ᡨᠠᡤᡤᡡ ᠨᡳᠶᠠᠯᠮᠠ ᡩᠣᠰᡳᡶᡳ ᡠᠶᡠᠨ ᠨᡳᠶᠠᠯᠮᠠ ᠪᡝ ᠰᠠᠴᡳᠮᡝ ᠸᠠᡶᡳ᠈ ᡨᡝᡵᡝ ᠴᠣᠣᡥᠠ ᠪᡝ ᡶᠠᠴᠠᠪᡠᡶᡳ᠈ ᡥᠣᡨᠣᠨ ᡩᡝ ᡩᠣᠰᡳᠮᠪᡠᡥᠠᡴᡡ᠉ ᡨᡝᡵᡝᠴᡳ ᡥᠣᡨᠣᠨ ᠪᡝ ᡴᠠᡶᡳ ᠠᡶᠠᠮᡝ ᡩᡠᡳᠴᡳ ᡳᠨᡝᡤᡤᡳ ᠪᠠᡥᠠᡵᡝ ᡳᠰᡳᡴᠠ ᠮᠠᡤᡤᡳ᠉ ᠴᠣᠣᡥᠠᡳ ᠨᡳᠶᠠᠯᠮᠠ ᠪᠠᡨᠠ ᠪᡝ ᡨᡠᠸᠠᡵᠠᡴᡡ᠈ ᠣᠯᠵᡳ ᡨᠠᠮᡧᡝᠮᡝ ᠵᠠᠮᠠᡵᠠᡵᠠ ᠪᡝ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠰᠠᡶᡳ᠈ ᡳᠨᡳ ᡝᡨᡠᡥᡝ ᡠᡴᠰᡳᠨ ᠪᡝ ᠰᡠᡶᡳ᠈ ᠨᠠᡳᡥᡡ ᡤᡝᠪᡠᡤᡤᡝ ᠠᠮᠪᠠᠨ ᡩᡝ ᡝᡨᡠᠪᡠᡶᡳ᠈ ᠴᠣᠣᡥᠠᡳ ᠨᡳᠶᠠᠯᠮᠠ ᠣᠯᠵᡳ ᡨᠠᠮᡧᡝᠮᡝ ᠮᡠᠰᡝᡳ ᡩᠣᠯᠣ ᠸᠠᠨᡩᠣᡵᠠᡴᡡ᠈ ᡨᠠᡶᡠᠯᠠᠮᡝ ᠨᠠᡴᠠᠪᡠ ᠰᡝᠮᡝ ᡥᡝᠨᡩᡠᡶᡳ ᡠᡤᡤᡳᡥᡝ᠉ ᠨᠠᡳᡥᡡ ᠪᡝ ᡨᠠᡶᡠᠯᠠᡵᠠᡴᡡ᠈ ᡳᠨᡳ ᠪᡝᠶᡝ ᡤᡝᠯᡳ ᠣᠯᠵᡳ ᡨᡝᠮᡧᡝᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡤᡝᠯᡳ ᠪᠠᡵᡨᠠᡳ ᡤᡝᠪᡠᡤᡤᡝ ᠨᡳᠶᠠᠯᠮᠠ ᡩᡝ ᡳᠨᡳ ᡝᡨᡠᡥᡝ ᠣᠯᠪᡠ ᠪᡝ ᡝᡨᡠᠪᡠᡶᡳ ᠪᠠᡨᠠ ᠨᡠᡴᠴᡳᡵᠠ ᡳᠰᡳᡴᠠ᠈ ᠮᡳᠨᡳ ᡠᡴᠰᡳᠨ ᡤᠠᠨᠠ ᠰᡝᠮᡝ ᠣᡤᡤᡳᡶᡳ᠈ ᠪᠠᡵᡨᠠᡳ ᡤᡝᠯᡳ ᠣᠯᠵᡳ ᡨᡝᠮᡧᡝᠮᡝ ᠪᡳᠰᡳᡵᡝ ᡩᡝ᠈ ᠪᠠᡨᠠᡳ ᠴᠣᠣᡥᠠ ᠵᡠᠸᠠᠨ ᠨᡳᠶᠠᠯᠮᠠ ᡨᡠᠴᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡠᡴᠰᡳᠨ -ᠨᡳ ᡩᡝᠣ ᠸᠠᡤᡧᠠᠨ ᠪᡝ ᠪᠠᡨᠠᡳ ᠴᠣᠣᡥᠠ ᡶᠠᡥᠠᡶᡳ ᠠᡴᡨᠠᠯᠠᠮᡝ ᠶᠠᠯᡠᡶᡳ᠈ ᡤᡳᡩᠠᡳ ᡨᠣᡴᠣᡴᡳ ᠰᡝᡵᡝᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠰᠠᠪᡠᡶᡳ᠈ ᡠᡴᠰᡳᠨ ᠣᠯᠪᡠ ᠠᡴᡡ ᠨᡳᠶᡝᡵᡝᠮᡝ ᡩᠣᠰᡳᡶᡳ᠈ ᠸᠠᡤᡧᠠᠨ ᠪᡝ ᠠᡴᡨᠠᠯᠠᠮᡝ ᠶᠠᠯᡠᡥᠠ ᠨᡳᠶᠠᠯᠮᠠ ᠪᡝ ᠵᡠᠸᡝ ᠶᠠᠰᠠᡳ ᠰᡳᡩᡝᠨ ᠪᡝ ᡤᠠᠪᡨᠠᠮᡝ ᡨᡠᡥᡝᠪᡠᡶᡳ᠈ ᠸᠠᡤᡧᠠᠨ ᠪᡝ ᡨᡠᠴᡳᠪᡠᡥᡝ᠉ ᡨᡝᡵᡝᠴᡳ ᡥᠣᡨᠣᠨ ᠪᡝ ᠠᡶᠠᠮᡝ ᡤᠠᡳᡶᡳ᠈ ᡥᠣᡨᠣᠨ ᡳ ᡝᠵᡝᠨ ᠨᡳᡤᡤᡠᠴᡳᠨ ᠵᠠᡤᡤᡳᠨ ᠪᡝ ᠸᠠᡶᡳ᠈ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᡧᠠᡥᡡᠨ ᡤᡡᠯᠮᠠᡥᡡᠨ ᠠᠨᡳᠶᠠ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡧᠠᡤᡤᡳᠶᠠᠨ ᠠᠯᡳᠨ ᡳ ᠠᡳᠮᠠᠨ ᡳ ᠶᠠᠯᡠ ᡤᡳᠶᠠᡤ -ᠨᡳ ᡤᠣᠯᠣ ᡩᡝ ᠴᠣᠣᡥᠠ ᡠᡤᡤᡳᡶᡳ᠈ ᡨᡝᡵᡝ ᡤᠣᠯᠣ ᠪᡝ ᠸᠠᠴᡳᡥᡳᠶᠠᠮᡝ ᡤᠠᡳᡶᡳ ᡤᠠᠵᡳᡥᠠ᠉ ᡨᡝᡵᡝᠴᡳ ᠶᡝᡥᡝᡳ ᠨᠠᡵᡳᠮᠪᡠᠯᠣ ᠪᡝᡳᠯᡝ ᡳᠨᡳ ᡳᠯᡩᠠᡤᡤᠠ ᠪᠠᡳᠰᠠᡥᠠ᠉ ᠵᡠᠸᡝ ᠠᠮᠪᠠᠨ ᠪᡝ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᡝᠯᠴᡳᠨ ᡨᠠᡴᡡᡵᠠᡶᡳ ᡥᡝᠨᡩᡠᠮᡝ᠈ ᡝᠮᡠ ᡤᡳᠰᡠᡤᡤᡝ ᡤᡠᡵᡠᠨ ᡩᡝ ᡠᠯᠠ᠈ ᡥᠠᡩᠠ᠈ ᠶᡝᡥᡝ᠈ ᡥᠣᡳᡶᠠ᠈ ᠮᠠᠨᠵᡠ ᠰᡠᠨᠵᠠ ᡥᠠᠨ ᡤᡝᠯᡳ ᠪᠠᠨᠵᡳᡵᡝ ᡩᠣᡵᠣ ᠪᡳᠣ᠈ ᡤᡠᡵᡠᠨ ᠰᡳᠨᡩᡝ ᠠᠮᠪᡠᠯᠠ᠈ ᠮᡳᠨᡩᡝ ᡴᠣᠮᠰᠣ᠈ ᠰᡳᠨᡳ ᡝᠯᠮᡳᠨ ᠵᠠᡴᡡᠮᡠ᠈ ᡝᡵᡝ ᠵᡠᠸᡝ ᡤᠣᠯᠣ ᠪᡝ ᡝᠮᡴᡝᠨ ᡤᠠᠵᡳ ᠰᡝᡥᡝ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠪᡳ ᠰᡝᠴᡳ ᠮᠠᠨᠵᡠ ᡤᡠᡵᡠᠨ᠈ ᠰᡠᠸᡝ ᠰᡝᠴᡳ ᡥᡡᠯᡠᠨ ᡤᡠᡵᡠᠨ᠈ ᠰᡠᠸᡝᠨᡳ ᡥᡡᠯᡠᠨ ᡤᡠᡵᡠᠨ ᠠᠮᠪᡠᠯᠠ ᠰᡝᠮᡝ᠈ ᠪᡳ ᡤᠠᠵᡳ ᠰᡝᠴᡳ ᠣᠮᠪᡳᠣ᠈ ᠮᡳᠨᡳ ᠮᠠᠨᠵᡠ ᡤᡠᡵᡠᠨ ᠠᠮᠪᡠᠯᠠ ᠰᡝᠮᡝ ᠰᡳᠨᡩᡝ ᠪᡠᠴᡳ᠈ ᠮᠣᡵᡳᠨ ᡳᡥᠠᠨ ᠸᠠᡴᠠ ᡴᠠᡳ᠈ ᡤᡠᡵᡠᠨ ᠪᡝ ᡤᡝᠯᡳ ᡩᡝᠨᡩᡝᠮᡝ ᠪᡠᡥᡝ ᡩᠣᡵᠣ ᠪᡳᠣ᠈ ᡩᠣᡵᠣ ᠵᠠᡶᠠᡥᠠ ᠠᠮᠪᠠᠰᠠ ᠰᡠᠸᡝ ᠮᡝᠨᡳ ᠮᡝᠨᡳ ᠪᡝᡳᠰᡝ ᠪᡝ ᡨᠠᡶᡠᠯᠠᠮᡝ ᡥᡝᠨᡩᡠᡵᠠᡴᡡ᠈ ᡝᡥᡝ ᡩᡝᡵᠠᡴᡡ ᠨᡳᠶᠠᠯᠮᠠᡳ ᡤᡝᠰᡝ ᠰᡠᠸᡝᠨᡳ ᠪᡝᠶᡝ ᠠᡳᠰᡝᠮᡝ ᠵᡳᡥᡝ ᠰᡝᠮᡝ ᡥᡝᠨᡩᡠᡶᡳ ᡠᡤᡤᡳᡥᡝ᠉ ᠵᠠᡳ ᠶᡝᡥᡝ᠈ ᡥᠠᡩᠠ᠈ ᡥᠣᡳᡶᠠ ᡳᠯᠠᠨ ᡤᡠᡵᡠᠨ ᡳ ᠪᡝᡳᠰᡝ ᠠᠴᠠᡶᡳ᠈ ᠶᡝᡥᡝᡳ ᠨᠠᡵᡳᠮᠪᡠᠯᠣ ᠪᡝᡳᠯᡝᡳ ᠨᡳᡴᠠᡵᡳ᠈ ᡨᡠᠯᡩᡝᡳ᠈ ᡥᠠᡩᠠᡳ ᠮᠠᡤᡤᡝᠪᠣᠯᠣ ᠪᡝᡳᠯᡝᡳ ᡩᠠᡳᠮᠪᡠ᠈ ᡥᠣᡳᡶᠠᡳ ᠪᠠᡳᠨᡩᠠᡵᡳ ᠪᡝᡳᠯᡝᡳ ᠠᠯᠠᠮᡳᠨ ᠵᠠᡤᡤᡳᠨ ᠪᡝ ᡝᠯᠴᡳᠨ ᡨᠠᡴᡡᡵᠠᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠰᠠᡵᡳᠯᠠᠮᡝ ᡩᡠᠯᡳᠮᠪᠠᡩᡝ᠈ ᠶᡝᡥᡝᡳ ᡨᡠᠯᡩᡝᡳ ᡤᡝᠪᡠᡤᡤᡝ ᠨᡳᠶᠠᠯᠮᠠ ᡨᡝᡥᡝ ᠪᠠᠴᡳ ᡳᠯᡳᡶᡳ ᡥᡝᠨᡩᡠᠮᡝ᠈ ᠪᡝᡳᠯᡝ ᠰᡳᠨᡳ ᡝᡶᡠ ᡝᠮᡠ ᡤᡳᠰᡠᠨ ᡥᡝᠨᡩᡠᡶᡳ ᡠᡤᡤᡳᡥᡝ ᠪᡳ᠈ ᠰᡳᠨᡩᡝ ᠠᠯᠠᠴᡳ ᠠᡳᡴᠠᠪᠠᡩᡝ ᠵᡳᠯᡳ ᠪᠠᠨᠵᡳᡶᡳ᠈ ᠮᡳᠮᠪᡝ ᡴᠣᡵᠣ ᠠᡵᠠᠮᠪᡳ ᠠᠶᠣ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠰᡳᠨᡳ ᠮᡠᠵᡳᠯᡝᠨ ᡳ ᡥᡝᠨᡩᡠᡵᡝ ᡤᡳᠰᡠᠨ ᠸᠠᡴᠠ᠈ ᠰᡳᠨᡳ ᡝᠵᡝᠨ -ᠨᡳ ᡤᡳᠰᡠᠨ ᠪᡝ ᠠᠯᠠᠮᠪᡳᡩᡝᡵᡝ᠈ ᡨᡝᡩᡝ ᠠᡳᠨᡠ ᠰᡳᠮᠪᡝ ᡴᠣᡵᠣ ᠠᡵᠠᠮᠪᡳ᠈ ᡝᡥᡝ ᡤᡳᠰᡠᠨ ᠣᠴᡳ᠈ ᠰᡳᠨᡳ ᡤᡝᠰᡝ ᠨᡳᠶᠠᠯᠮᠠ ᠪᡝ ᡠᡤᡤᡳᡶᡳ᠈ ᠰᡳᠨᡳ ᡝᠵᡝᠨ ᡳ ᠵᡠᠯᡝᡵᡳ ᡴᠠᡵᡠ ᡝᡥᡝ ᡤᡳᠰᡠᠨ ᠪᡝ ᡥᡝᠨᡩᡠᠮᠪᡳᡩᡝᡵᡝ ᠰᡝᡥᡝ ᠮᠠᡤᡤᡳ᠉ ᡨᡠᠯᡩᡝᡳ ᡥᡝᠨᡩᡠᠮᡝ᠈ ᠰᡳᠨᡳ ᡝᡶᡠᡳ ᡥᡝᠨᡩᡠᡵᡝᡤᡤᡝ᠈ ᠰᡳᠨᡳ ᡤᡠᡵᡠᠨ ᠪᡝ ᡩᡝᠨᡩᡝᠮᡝ ᡤᠠᠵᡳ ᠰᡝᠴᡳ ᠪᡠᡵᠠᡴᡡ᠈ ᡩᠠᡥᠠ ᠰᡝᠴᡳ ᡩᠠᡥᠠᡵᠠᡴᡡ᠉ ᠮᡠᠰᡝ ᠵᡠᠸᡝ ᡤᡠᡵᡠᠨ ᡩᠠᡳᠨ ᠣᠴᡳ᠈ ᠰᡳᠨᡳ ᡠᠰᡳᠨ ᡳ ᡠᠵᠠᠨ ᡩᡝ᠈ ᠪᡳ ᡤᡝᠨᡝᡶᡳ ᡳᠯᡳᠴᡳ ᠣᠮᠪᡳᡩᡝᡵᡝ᠈ ᠮᡳᠨᡳ ᡠᠰᡳᠨ ᡳ ᡠᠵᠠᠨ ᡩᡝ᠈ ᠰᡳ ᠵᡳᡶᡳ ᡳᠯᡳᠴᡳ ᠣᠮᠪᡳᠣ ᠰᡝᠮᡝ ᡥᡝᠨᡩᡠᠮᠪᡳ᠉ ᡨᡝᡵᡝ ᡤᡳᠰᡠᠨ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠠᠮᠪᡠᠯᠠ ᠵᡳᠯᡳ ᠪᠠᠨᠵᡳᡶᡳ᠈ ᠠᠰᡥᠠᡥᠠ ᠰᡝᠯᡝᠮᡝ ᠪᡝ ᡨᡠᠴᡳᠪᡠᡶᡳ ᠵᡠᠯᡝᡵᡳ ᡨᡠᡴᡳᠶᡝᡥᡝ ᡨᡝᡵᡝ ᠪᡝ ᡨᠠᡴᠰᠠ ᠰᠠᠴᡳᡶᡳ ᡥᡝᠨᡩᡠᠮᡝ᠈ ᠶᡝᡥᡝᡳ ᡝᡶᡠᡨᡝ᠈ ᠰᡠᠸᡝ ᠶᠠ ᡩᠠᡳᠨ ᡩᡝ ᠵᡠᠸᡝ ᠮᠣᡵᡳᠨ ᠵᡠᡵᠴᡝᠮᡝ ᠵᡠᠸᡝ ᠨᡳᠶᠠᠯᠮᠠᡳ ᠰᠠᠴᡳ ᡤᠠᠯᠠᡴᡨᡠᠨ ᠰᡳᡥᠠᡨᠠᠯᠠ ᠰᠠᠴᡳᡵᠠᠮᡝ ᠠᡶᠠᡥᠠ᠉ ᠵᡠᠸᡝ ᠠᠵᡳᡤᡝ ᠵᡠᠰᡝ ᡤᠠᠨᠴᡠᡥᠠ ᡨᡝᠮᡧᡝᠮᡝ ᠪᡝᠴᡠᠨᡠᡵᡝ ᡤᡝᠰᡝ ᡥᠠᡩᠠᡳ ᠮᠠᡤᡤᡝᠯᡠ ᡩᠠᡳᡧᠠᠨ ᡳ ᠴᡝᠨᡳ ᡩᠣᠯᠣ ᡶᠠᠴᡠᡥᡡᡵᠠᡥᠠ ᡶᠣᠨᡩᡝ᠈ ᠰᡳᠨᡳ ᡩᠠᡳᠯᠠᡥᠠ ᡤᡝᠰᡝ ᠣᡳᡥᠣᡵᡳ ᠠᡳᠨᡠ ᡤᡡᠨᡳᠮᠪᡳ᠈ ᠰᡳᠨᡳ ᡠᠰᡳᠨ ᡳ ᡨᡝᡥᡝᡵᡝᠮᡝ ᠵᠠᠰᡝ ᡶᡠᡵᡩᠠᠨ ᠵᠠᡶᠠᡥᠠᠪᡳᠣ᠈ ᠪᡳ ᡳᠨᡝᡤᡤᡳ ᡤᡝᠨᡝᠴᡳ ᠣᠵᠣᡵᠠᡴᡡ ᠣᠴᡳ᠈ ᡩᠣᠪᠣᡵᡳ ᡤᡝᠨᡝᡶᡳ ᠰᡳᠨᡳ ᡠᠰᡳᠨ ᡳ ᡠᠵᠠᠨ ᡩᡝ ᡳᠯᡳᡶᡳ ᠵᡳᡥᡝ ᡩᡝ᠈ ᡤᡝᠯᡳ ᠠᡳᠨᠠᠮᠪᡳ᠈ ᠰᡳᠨᡳ ᠠᡤᡤᠠ ᠠᡳ ᡨᡠᡨᡨᡠ ᠪᠠᡵᡩᠠᡤᡤᡳ᠈ ᠮᡳᠨᡳ ᠠᠮᠠ ᠪᡝ ᠨᡳᡴᠠᠨ ᠸᠠᠴᡳ᠈ ᠮᡳᠨᡩᡝ ᡤᡡᠰᡳᠨ ᡝᠵᡝᡥᡝ᠈ ᡤᡡᠰᡳᠨ ᠮᠣᡵᡳᠨ ᠪᡝ ᡥᠣᠯᠪᠣᡶᡳ᠈ ᡤᡳᡵᠠᠨ ᡳ ᡝᠮᡤᡳ ᠪᡝᠨᠵᡳᡥᡝ᠈ ᠵᠠᡳ ᡤᡝᠯᡳ ᡨᡝᡥᡝᡳ ᡤᠠᡳᠵᠠᡵᠠ zᠣᠣ ᡩᡠᡩᡠ ᡝᠵᡝᡥᡝ ᠪᡝᠨᠵᡳᡥᡝ᠉ ᡨᡝᡵᡝᡳ ᠠᠮᠠᠯᠠ ᠯᡠᡤ ᡥᡡ ᠵᡳᠶᠠᡤᠵᡳᠶᠣᠨ ᠰᡝᡵᡝ ᠠᠮᠪᠠ ᡝᠵᡝᡥᡝ ᠪᡝᠨᠵᡳᡶᡳ᠈ ᠠᠨᡳᠶᠠ ᡩᠠᡵᡳ ᠵᠠᡴᡡᠨ ᡨᠠᡤᡤᡡ ᠶᠠᠨ ᠮᡝᡤᡤᡠᠨ᠈ ᡨᠣᡶᠣᡥᠣᠨ ᡤᡝᠴᡠᡥᡝᡵᡳ ᠪᡝ ᡴᡝᠮᡠᠨᡳ ᡤᠠᡳᠮᠪᡳ᠉ ᠰᡳᠨᡳ ᠠᠮᠠ ᠪᡝ ᠨᡳᡴᠠᠨ ᠸᠠᡥᠠ ᡴᠠᡳ᠈ ᠰᡳᠨᡳ ᠠᠮᠠ ᡳ ᡤᡳᡵᠠᠨ ᠪᡝ ᠰᡳ ᠪᠠᡥᠠᠣ ᠰᡝᠮᡝ ᡥᡝᠨᡩᡠᡶᡳ᠈ ᡨᡝᡵᡝ ᡤᡳᠰᡠᠨ ᠪᡝ ᠪᡳᡨᡥᡝ ᠠᡵᠠᡶᡳ᠈ ᠠᠯᡳᠨᠴᠠ ᠪᠠᡴᠰᡳ ᠪᡝ ᡠᡤᡤᡳᠮᡝ ᡝᡵᡝ ᠪᡳᡨᡥᡝᠪᡝ ᡤᠠᠮᠠᡶᡳ᠈ ᠶᡝᡥᡝᡳ ᠵᡠᠸᡝ ᠪᡝᡳᠯᡝᡳ ᠵᡠᠯᡝᡵᡳ ᡤᡝᠮᡠ ᡥᡡᠯᠠ᠉ ᠰᡳ ᡤᡝᠨᡝᠮᡝ ᡥᡡᠯᠠᡵᠠᡴᡡ ᠣᠴᡳ ᡨᡠᠪᠠᡩᡝ ᠠᡨᠠᡥᡝᠮᡝ ᠪᡳᠰᡠ᠈ ᠮᡳᠨᡳ ᠵᠠᡴᠠᡩᡝ ᡠᠮᡝ ᠵᡳᡩᡝᡵᡝ ᠰᡝᠮᡝ ᡥᡝᠨᡩᡠᡶᡳ ᡠᡤᡤᡳᡥᡝ᠉ ᡨᡝᡵᡝ ᡤᡳᠰᡠᠨ ᠪᡝ ᠶᡝᡥᡝᡳ ᠪᡠᠵᠠᡳ ᠪᡝᡳᠯᡝ ᡩᠣᠨᠵᡳᡶᡳ᠈ ᠠᠯᡳᠨᠴᠠ ᠪᠠᡴᠰᡳ ᠪᡝ ᠣᡴᡩᠣᠮᡝ ᠨᡳᠶᠠᠯᠮᠠ ᡠᡤᡤᡳᡶᡳ᠈ ᡳᠨᡳ ᠪᠣᠣ ᡩᡝ ᡤᠠᠮᠠᡶᡳ᠈ ᠪᡳᡨᡥᡝ ᠪᡝ ᡨᡠᠸᠠᡴᡳ ᠰᡝᡥᡝ ᠮᠠᡤᡤᡳ᠉ ᠠᠯᡳᠨᠴᠠ ᠪᠠᡴᠰᡳ ᠪᡳᡨᡥᡝ ᠪᡝ ᡨᡠᠴᡳᠪᡠᡶᡳ᠈ ᡤᡝᠮᡠ ᡥᡡᠯᠠᡥᠠ ᠮᠠᡤᡤᡳ᠈ ᠪᡠᠵᠠᡳ ᠪᡝᡳᠯᡝ ᡥᡝᠨᡩᡠᠮᡝ᠈ ᡝᡵᡝ ᠪᡳᡨᡥᡝ ᠪᡝ ᠪᡳ ᡨᡠᠸᠠᠴᡳ ᡨᡝᡨᡝᠨᡩᡝᡵᡝ᠈ ᠮᡳᠨᡳ ᡩᡝᠣ ᠨᠠᡵᡳᠮᠪᠣᠯᠣ ᡩᡝ ᡠᠮᡝ ᡨᡠᠸᠠᠪᡠᡵᡝ ᠰᡝᡥᡝ ᠮᠠᡤᡤᡳ᠉ ᠠᠯᡳᠨᠴᠠ ᠪᠠᡴᠰᡳ ᡥᡝᠨᡩᡠᠮᡝ᠈ ᠮᡳᠨᡳ ᠪᡝᡳᠯᡝ᠈ ᡝᡵᡝ ᠪᡳᡨᡥᡝ ᠪᡝ ᡨᡠᠸᠠᠪᡠᡵᠠᡴᡡ ᠣᡥᠣ ᡩᡝ᠈ ᠮᡳᠮᠪᡝ ᡠᠮᡝ ᠵᡳᡩᡝᡵᡝ ᠰᡝᠮᡝ ᡥᡝᠨᡩᡠᡥᡝᠪᡳ᠉ ᠪᡠᠵᠠᡳ ᠪᡝᡳᠯᡝ ᡥᡝᠨᡩᡠᠮᡝ᠈ ᠮᡳᠨᡳ ᡩᡝᠣᡳ ᡤᡳᠰᡠᠨ ᡳ ᡝᡥᡝ ᡩᡝ᠈ ᠰᡳᠨᡳ ᠪᡝᡳᠯᡝ ᡴᠣᡵᠰᠣᡶᡳ ᡥᡝᠨᡩᡠᡥᡝ ᠮᡠᠵᠠᡤᡤᠠ ᡴᠠᡳ᠈ ᠮᡳᠨᡳ ᡩᡝᠣ ᡨᡠᠸᠠᡥᠠ ᡩᡝ᠈ ᠰᡳᠮᠪᡝ ᡴᠣᡵᠣ ᠠᡵᠠᡵᠠᡥᡡ ᠰᡝᠮᡝ ᡥᡝᠨᡩᡠᡶᡳ᠈ ᠪᡳᡨᡥᡝ ᠪᡝ ᡳᠨᡳ ᡤᠠᠯᠠ ᡩᡝ ᡤᠠᡳᡶᡳ ᠪᡠᡥᡝᡴᡡ᠈ ᡨᡝᡵᡝᠴᡳ ᠠᠯᡳᠨᠴᠠ ᠪᠠᡴᠰᡳ ᠪᡝᡩᡝᡵᡝᠮᡝ ᠵᡳᡥᡝ᠉ ᡨᡝᡵᡝ ᡶᠣᠨᡩᡝ᠈ ᡧᠠᡤᡤᡳᠶᠠᠨ ᠠᠯᡳᠨ ᡳ ᠠᡳᠮᠠᠨ ᡳ ᠵᡠᡧᡝᡵᡳ᠈ ᠨᡝᠶᡝᠨ ᠵᡠᠸᡝ ᡤᠣᠯᠣᡳ ᠨᡳᠶᠠᠯᠮᠠ ᠠᠴᠠᡶᡳ᠈ ᠶᡝᡥᡝᡳ ᠴᠣᠣᡥᠠ ᠪᡝ ᡤᠠᠵᡳᡶᡳ᠈ ᠰᡠᡵᡝ ᠪᡝᡳᠯᡝᡳ ᡩᡝᡵᡤᡳ ᡩᡠᠪᡝᡳ ᠵᡝᠴᡝᠨ ᡳ ᡤᡝᠪᡠᡤᡤᡝ ᠠᠮᠪᠠᠨ ᡳ ᡨᡝᡥᡝ ᡩᡠᡤ ᠨᡳ ᡤᡝᠪᡠᡤᡤᡝ ᡤᠠᡧᠠᠨ ᠪᡝ ᠰᡠᠴᡠᡶᡳ ᡤᠠᠮᠠᡥᠠ᠉ ᡨᡝᡵᡝ ᠪᡝ ᡤᡝᡵᡝᠨ ᠠᠮᠪᠠᠰᠠ ᡩᠣᠨᠵᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳ ᠯᡝᠣᠰᡝᡳ ᡩᡝᠯᡝ ᡨᡝᡥᡝ ᠪᠠᡩᡝ ᡩᠣᠰᡳᡶᡳ ᠠᠯᠠᡵᠠ ᠵᠠᡴᠠᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠰᡠᠴᡠᡴᡳᠨᡳ ᠠᠯᠠ ᡳ ᡥᠠᡶᡠ ᠪᡳᡵᠠ ᡝᠶᡝᠮᠪᡳᠣ᠈ ᠪᡳᡵᠠ ᡩᠣᠣᠮᡝ ᡨᡠᡶᡳ ᡩᠠᠮᠪᡳᠣ᠈ ᠮᡠᠰᡝᡳ ᡝᠮᡠ ᡤᡠᡵᡠᠨ ᡳ ᠨᡳᠶᠠᠯᠮᠠ᠈ ᡝᠨᠴᡠ ᡤᡠᡵᡠᠨ ᡳ ᠶᡝᡥᡝ ᡩᡝ ᡩᠠᠶᠠᡶᡳ ᠮᡠᠰᡝᡳ ᠪᡝ ᡩᠠᡳᠯᠠᠮᠪᡳᡩᡝᡵᡝ ᠪᡳᡵᠠᡳ ᠮᡠᡴᡝᠨ ᡳᠨᡠ ᠸᠠᠰᡳᡥᡡᠨ ᡝᠶᡝᠮᠪᡳ᠈ ᠵᡠᡧᡝᡵᡳ᠈ ᠨᡝᠶᡝᠨ ᠵᡠᠸᡝ ᡤᠣᠯᠣᡳ ᠨᡳᠶᠠᠯᠮᠠ ᠠᡨᠠᡤᡤᡳ ᠪᡳᠴᡳᠪᡝ ᠮᡠᠰᡝ ᡩᡝ ᠣᠮᠪᡳᡴᠠᡳ ᠰᡝᠮᡝ ᡥᡝᠨᡩᡠᡥᡝ᠉ ᠰᠠᡥᠠᡥᡡᠨ ᠮᡝᡳᡥᡝ ᠠᠨᡳᠶᠠ᠈ ᠶᡝᡥᡝ ᡤᡠᡵᡠᠨ ᡳ ᠪᡠᠵᠠᡳ ᠪᡝᡳᠯᡝ᠈ ᠨᠠᡵᡳᠮᠪᠣᠯᠣ ᠪᡝᡳᠯᡝ᠈ ᠮᠠᠨᠵᡠ ᡤᡠᡵᡠᠨ ᡳ ᠰᡠᡵᡝ ᠪᡝᡳᠯᡝ ᠪᡝ ᠴᡝᠨᡩᡝ ᡩᠠᡥᠠᡵᠠ ᠠᡴᡡ ᠰᡝᠮᡝ ᡥᠠᡩᠠᡳ ᠮᡝᡤᡴᡝᠪᡠᠯᡠ ᠪᡝᡳᠯᡝ᠈ ᡠᠯᠠᡳ ᠮᠠᠨᡨᠠᡳ ᠪᡝᡳᠯᡝ᠈ ᡥᠣᡳᡶᠠᡳ ᠪᠠᡳᠨᡩᠠᡵᡳ ᠪᡝᡳᠯᡝ᠈ ᡳᠨ ᡤᡠᡵᡠᠨ ᡳ ᠴᠣᠣᡥᠠ ᠠᠴᠠᡶᡳ ᠨᡳᡤᡤᡠᠨ ᠪᡳᠶᠠ ᡩᡝ ᠴᠣᠣᡥᠠ ᠵᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳ ᡥᡡᠪᠴᡳ ᡤᡝᠪᡠᡤᡤᡝ ᡤᠠᡧᠠᠨ ᠪᡝ ᠰᡠᠴᡠᡶᡳ ᡤᠠᠮᠠᡥᠠ ᠮᠠᡤᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡠᡨᡥᠠᡳ ᠴᠣᠣᠣᡥᠠ ᡤᡝᠨᡝᡩᡳ᠈ ᡥᠠᡩᠠᡳ ᠴᠣᠣᡥᠠ ᡳᠨᡳ ᠪᠣᠣ ᡩᡝ ᡳᠰᡳᠨᠠᡥᠠ᠉ ᡩᠣᠪᠣᡵᡳ ᠶᠠᡶᠠᡥᠠ ᠴᠣᠣᡥᠠ ᠪᡝ ᠠᠨᡩᠠᠯᠠ ᠪᡠᡴᠰᡳᠪᡠᡶᡳ᠈ ᡴᠣᠮᠰᠣ ᠴᠣᠣᡥᠠ ᡤᡝᠨᡝᡶᡳ᠈ ᡥᠠᡩᠠᡳ ᡶᡠᠯᡤᡳᠶᠠᠴᡳ ᡤᡝᠪᡠᡤᡤᡝ ᡤᠠᡧᠠᠨ ᠪᡝ ᡴᠠᡵᡠ ᠰᡠᠴᡠᡶᡳ ᡤᠠᠵᡳᡵᡝ ᡩᡝ᠈ ᡥᠠᡩᠠᡳ ᠴᠣᠣᡥᠠ ᡶᡠᠯᡤᡳᠶᠠᠴᡳ ᡤᠠᡧᠠᠨ-ᡳ ᡩᡠᠪᡝᡩᡝ ᠠᠮᠴᠠᠨᠵᡳᡥᠠ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠠᠮᠴᠠᡥᠠ ᠴᠣᠣᡥᠠ ᠪᡝ ᠪᡝᡩᡝᡵᡝᡵᠠᡴᡡ᠈ ᠶᠠᡶᠠᡥᠠ ᡳ ᠴᠣᠣᡥᠠᡳ ᠪᡠᡴᠰᡳᡥᠠ ᠪᠠᡩᡝ ᡤᠠᠮᠠᡴᡳ ᠰᡝᠮᡝ ᡤᡡᠨᡳᡶᡳ᠈ ᡳᠨᡳ ᠴᠣᠣᡥᠠᡳ ᠨᡳᠶᠠᠯᠮᠠ ᠪᡝ ᡤᡝᠮᡠ ᠵᡠᠯᡝᡵᡳ ᡠᡤᡤᡳᡶᡳ᠈ ᡳᠨᡳ ᠪᡝᠶᡝ ᠠᠮᠠᠯᠠ ᡶᡳᠶᠠᠨᠵᡳᠯᠠᡶᡳ ᠶᠠᡵᡴᡳᠶᠠᠮᡝ ᡤᠠᠮᠠᡵᠠ ᡩᡝ᠈ ᠪᠠᡵᠠᡳ ᠴᠣᠣᡥᠠ ᡠᡨᡥᠠᡳ ᠯᠠᡠᡨᠨᠵᡳᡶᡳ ᡳᠯᠠᠨ ᠨᡳᠶᠠᠯᠮᠠ ᠠᡩᠠᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡝ ᠰᠠᠴᡳᠮᡝ ᠵᡳᠮᠪᡳ᠈ ᠵᡠᠯᡝᡵᡤᡳ ᡩᡝ ᡝᠮᡠ ᠨᡳᠶᠠᠯᠮᠠ ᠯᠣᡥᠣ ᡩᠠᡵᡤᡳᡶᡳ᠈ ᠠᠯᡳᠮᡝ ᡤᠠᡳᡥᠠᠪᡳ᠉ ᠰᡠᡵᡝ ᠪᡝᡳᠯᡝ ᡤᡡᠨᡳᠮᡝ᠈ ᠠᠮᠠᡵᡤᡳ ᡳᠯᠠᠨ ᠨᡳᠶᠠᠯᠮᠠ ᠰᠠᠴᡳᠴᡳ ᡥᡡᠸᠠᡤᡤᡳᠶᠠᡵᠠᡴᡡ᠈ ᠵᡠᡝᠯᡵᡤᡳ ᠨᡳᠶᠠᠯᠮᠠ ᡳᠰᡥᡠᠨ ᠰᠠᠴᡳᡥᠠ ᡩᡝ ᡩᡝᡵᡝ ᠶᠠᠰᠠ ᡤᠠᠯᠠ ᡤᠣᡳᠮᠪᡳ ᠰᡝᠮᡝ ᠵᡠᠯᡝᡵᡤᡳ ᠨᡳᠶᠠᠯᠮᠠ ᠪᡝ ᡤᠠᠪᡨᠠᡴᡳ ᠰᠠᠴᡳ᠈ ᠵᡝᠪᡝᠯᡝ ᡝᡵᡤᡳ ᡩᡝ ᠪᡳᡶᡳ ᡳᠴᡳ ᠠᡴᡡ ᠣᡶᡳ᠈ ᠮᠣᡵᡳᠨ ᡳ ᠮᡝᡳᡶᡝᠨ ᡳ ᡩᠠᠪᠠᠯᡳ ᡤᠠᠪᡨᠠᡵᠠ ᠵᠠᡴᠠᡩᡝ᠈ ᠮᠣᡵᡳᠨ ᡳ ᡥᡝᡶᡝᠯᡳ ᡤᠣᡳᡶᡳ ᡨᡠᡳᠯᡝᠮᡝ ᡤᡝᠨᡝᡥᡝ᠉ ᠵᡠᠯᡝᡵᡤᡳ ᠨᡳᠶᠠᠯᠮᠠ ᠪᡝ ᡤᠠᠪᡨᠠᡵᠠ ᡧᠣᠯᠣ ᡩᡝ ᠠᠮᠠᡵᡤᡳᠴᡳ ᡳᠯᠠᠨ ᠨᡳᠶᠠᠯᠮᠠ ᠰᠠᠰᠠᡵᡳ ᠰᠠᠴᡳᠨᠵᡳᡵᡝ ᡩᡝ ᠶᠠᠯᡠᡥᠠ ᠮᠣᡵᡳᠨ ᠪᠠᡴᠴᡳᠯᠠᠮᡝ ᡶᡝᡴᡠᡵᠠ ᡩᡝ᠈ ᠰᡠᡵᡝ ᠪᡝᡳᠯᡝᡳ ᠪᡝᠶᡝ ᡠᡵᡥᡠᡶᡳ ᡳᠴᡳ ᡝᡵᡤᡳ ᠪᡝᡨᡥᡝᡳ ᠵᠠᠯᠠᠨ ᡝᡤᡤᡝᠮᡠ ᡩᡝ ᡨᠠᡶᡳ ᠠᡵᡴᠠᠨ ᠰᡝᠮᡝ ᡨᠣᠮᠰᠣᠮᡝ ᠶᠠᠯᡠᡶᡳ᠈ ᡥᠠᡩᠠᡳ ᠮᡝᡤᡤᡝᠪᡠᠯᡠ ᠪᡝᡳᠯᡝᡳ ᠶᠠᠯᡠᡥᠠ ᠮᠣᡵᡳᠨ ᠪᡝ ᡤᠠᠪᡨᠠᠮᡝ ᡨᡠᡥᡝᠪᡠᡥᡝ ᠮᠠᡤᡤᡳ᠈ ᠮᡝᡤᡤᡝᠪᡠᠯᡠ ᠪᡝᡳᠯᡝᡳ ᠪᠣᠣᡳ ᡨᠠᡳᠮᠪᡠᠯᡠ ᡤᡝᠪᡠᡤᡤᡝ ᠨᡳᠶᠠᠯᠮᠠ ᠮᠣᡵᡳᠨ ᠴᡳ ᡝᠪᡠᡶᡳ᠈ ᡳᠨᡳ ᠶᠠᠯᡠᡥᠠ ᠮᠣᡵᡳᠨ ᠪᡝ ᠮᡝᡤᡤᡝᠪᡠᠯᡠ ᠪᡝᡳᠯᡝ ᡩᡝ ᠪᡠᡶᡳ᠈ ᡳ ᠶᠠᡶᠠᡥᠠ ᠰᡠᠵᡠᠮᡝ ᡨᡠᠴᡳᡴᡝ᠈ ᡨᡝᡵᡝᠴᡳ ᠰᡠᡵᡝ ᠪᡝᡳᠯᡝ ᡳᠯᠠᠨ ᠮᠣᡵᡳᠨ ᡳ ᠨᡳᠶᠠᠯᠮᠠ᠈ ᠮᠣᡵᡳᠨ ᠶᠠᡶᠠᡥᠠ ᡳ ᠨᡳᠶᠠᠯᠮᠠ ᠪᡝ ᡤᠠᡳᡶᡳ ᠠᠮᠠᠰᡳ ᠵᡠᡵᠴᡝᠮᡝ ᡩᠣᠰᡳᡶᡳ᠈ ᡨᡝᡵᡝ ᠴᠣᠣᡥᠠ ᠪᡝ ᡤᡳᡩᠠᡶᡳ ᠵᡠᠸᠠᠨ ᠵᡠᠸᡝ ᠨᡳᠶᠠᠯᠮᠠ ᠪᡝ ᠸᠠᡥᠠ᠈ ᠨᡳᡤᡤᡠᠨ ᡠᡴᠰᡳᠨ᠈ ᠵᡠᠸᠠᠨ ᠵᠠᡴᡡᠨ ᠮᠣᡵᡳᠨ ᠪᠠᡥᠠ᠈ ᡨᡝᡵᡝᠴᡳ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᡨᡝᡵᡝ ᠠᠨᡳᠶᠠ ᡠᠶᡠᠨ ᠪᡳᠶᠠ ᡩᡝ᠈ ᠶᡝᡥᡝᡳ ᡤᡠᡵᡠᠨ ᡳ ᠪᡠᠵᠠᡳ ᠪᡝᡳᠯᡝ᠈ ᠨᠠᡵᡳᠮᠪᠣᠯᠣ ᠪᡝᡳᠯᡝ᠈ ᡥᠠᡩᠠᡳ ᡤᡠᡵᡠᠨ ᡳ ᠮᡝᡤᡤᡝᠪᠣᠯᠣ ᠪᡝᡳᠯᡝ᠈ ᡠᠯᠠᡳ ᡤᡠᡵᡠᠨ-ᡳ ᠮᠠᠨᡨᠠᡳ ᠪᡝᡳᠯᡝᡳ ᡩᡝᠣ ᠪᡠᠵᠠᠨᡨᠠᡳ ᠪᡝᡳᠯᡝ᠈ ᡥᠣᡳᡶᠠᡳ ᡤᡠᡵᡠᠨ ᡳ ᠪᠠᡳᠨᡩᠠᡵᡳ ᠪᡝᡳᠯᡝ᠈ ᠠᠮᠠᡵᡤᡳ ᡠᠨ ᡳ ᡴᠣᡵᠴᡳᠨ ᡳ ᠮᠣᡤᡤᠣ ᡤᡠᡵᡠᠨ ᡳ ᡠᡤᡤᠠᡩᠠᡳ ᠪᡝᡳᠯᡝ᠈ ᠮᠠᡤᡤᡡᠰ ᠪᡝᡳᠯᡝ᠈ ᠮᡳᡤᡤᠠᠨ ᠪᡝᡳᠯᡝ᠈ ᠰᡳᠪᡝᡳ ᠠᡳᠮᠠᠨ᠈ ᡤᡡᠸᠠᠯᠴᠠ ᡳ ᠠᡳᠮᠠᠨ᠈ ᠮᠠᠨᠵᡠ ᡤᡠᡵᡠᠨ ᡳ ᡧᠠᡤᡤᡳᠶᠠᠨ ᠠᠯᡳᠨ ᡳ ᠵᡠᡧᡝᡵᡳ ᡤᠣᠯᠣᡳ ᡝᠵᡝᠨ ᠶᡠᠯᡝᡤᡤᡝ᠈ ᠨᡝᠶᡝᠨ ᡳ ᡤᠣᠯᠣᡳ ᡝᠵᡝᠨ ᠰᡝᠣᠸᡝᠨ ᠰᡝᡴᠰᡳ ᡠᡥᡝᡵᡳ ᡠᠶᡠᠨ ᡥᠠᠯᠠᡳ ᡤᡠᡵᡠᠨ ᠠᠴᠠᡶᡳ ᡳᠯᠠᠨ ᠵᡠᡤᡡᠨ ᡳ ᠴᠣᠣᡥᠠ ᠵᡳᠮᠪᡳ ᠰᡝᠮᡝ ᡩᠣᠨᠵᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡠᡵᡳᡴᠠᠨ ᡤᡝᠪᡠᡤᡝ ᠨᡳᠶᠠᠯᠮᠠ ᠪᡝ ᡩᡝᡵᡤᡳ ᡤᠣᠯᠣ ᡩᡝ ᡴᠠᡵᡠᠨ ᡤᡝᠨᡝ ᠰᡝᠮᡝ ᡠᡤᡤᡳᡥᡝ᠉ ᡠᡵᡳᡴᠠᠨ ᡴᠠᡵᡠᠨ ᡤᡝᠨᡝᠮᡝ᠈ ᠰᡠᡵᡝ ᠪᡝᡳᠯᡝᡳ ᡨᡝᡥᡝ ᡥᡝᠴᡝᠨ ᠴᡳ ᡝᠮᡠ ᡨᠠᡤᡤᠴ ᠪᠠᡳ ᡩᡠᠪᡝᡩᡝ ᡳᠰᡳᠨᠠᡶᡳ᠈ ᡝᠮᡠ ᡩᠠᠪᠠᡤᠠᠨ ᠪᡝ ᡩᠠᠪᠠᡵᡳ ᡩᡝ᠈ ᡤᡝᡵᡝᠨ ᡤᠠᡥᠠ ᡠᡵᡳᡴᠠᠨ ᡳ ᠵᡠᠯᡝᡵᡤᡳ ᠪᡝ ᠯᠠᡨᡠᡵᠠᠮᡝ ᠵᠠᠮᠠᠯᠠᠮᡝ ᠵᡠᠯᡝᠰᡳ ᡠᡤᡤᡳᡵᠠᡴᡡ᠈ ᠠᠮᠠᠰᡳ ᠪᡝᡩᡝᡵᡝᡥᡝ ᡩᡝ᠈ ᡩᠠᡥᠠ ᠮᡝᠨᡳ ᠮᡝᠨᡳ ᡶᠠᡴᠴᡳᡶᡳ ᡝᡴᡳᠰᠠᡴᠠ ᠵᠠᡳᠯᠠᠮᠪᡳ᠉ ᡤᠠᡥᠠ ᠵᠠᡳᠯᠠᡥᠠ ᠰᡝᠮᡝ᠈ ᡤᡝᠯᡳ ᠵᡠᠯᡝᠰᡳ ᡤᡝᠨᡝᡴᡳ ᠰᡝᠴᡳ᠈ ᡤᡝᡵᡝᠨ ᡤᠠᡥᠠ ᡤᡝᠯᡳ ᡨᡝᡵᡝ ᠶᠠᠰᠠ ᠪᡝ ᠯᠠᡨᡠᡵᠠᠮᡝ ᠶᠠᠮᠠᡵᠠᠯᡝ ᡠᡤᡤᡳᡵᠠᡴᡡ ᠣᡶᡳ᠈ ᡠᡵᡳᡴᠠᠨ ᠠᠮᠠᠰᡳ ᠪᡝᡩᡝᡵᡝᡶᡳ᠈ ᡤᠠᡥᠠ ᡥᡝᠨᡩᡠᡵᡝᡥᡝ ᠪᡝ᠈ ᠰᡠᡵᡝ ᠪᡝᡳᠯᡝ ᡩᡝ ᠠᠯᠠᡥᠠ ᠮᠠᡤᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡠᡵᡳᡴᠠᠨ ᠪᡝ ᠵᠠᡴᠠ ᡤᡝᠪᡠᡤᡤᡝ ᠪᠠᡳ ᠵᡠᡤᡡᠨ ᠪᡝ ᡤᡝᠨᡝᡶᡳ᠈ ᡥᡠᠨᡝᡥᡝ ᡤᠣᠯᠣᡳ ᡝᡵᡤᡳᡩᡝ ᡴᠠᡵᡠᠨ ᡨᡠᠸᠠᠨᠠ ᠰᡝᠮᡝ ᡠᡤᡤᡳᡥᡝ᠉ ᡠᡵᡳᡴᠠᠨ ᡴᠠᡵᡠᠨ ᡤᡝᠨᡝᡶᡳ ᠶᠠᠮᠵᡳ ᡨᡠᠸᠠᠴᡳ᠈ ᠪᠠᡨᠠᡳ ᠴᠣᠣᡥᠠ ᡥᡠᠨᡝᡥᡝ ᠪᡳᡵᠠᡳ ᠠᠮᠠᡵᡤᡳ ᡩᡝ ᡳᠰᡳᠨᠵᡳᡶᡳ ᡳᠯᠠᡶᡳ ᡤᡝᡵᡝᠨ ᠴᠣᠣᡥᠠ ᠪᡠᡩᠠ ᠠᡵᠠᠮᡝ ᡩᠠᠪᡠᡥᠠ ᡨᡠᠸᠠᡳ ᡝᠯᡩᠠᠨ ᠠᠪᠠᡴᡳ ᡠᠰᡳᡥᠠᡳ ᠠᡩᠠᠯᡳ ᠰᠠᠪᡠᠮᠪᡳ᠉ ᡨᡝᡵᡝ ᠴᠣᠣᡥᠠ ᠪᡠᡩᠠ ᠵᡝᡶᡳ ᡩᠣᠪᠣᡵᡳ ᡩᡠᠯᡳᠮᡝ᠈ ᡧᠠᠵᡳ ᡤᡝᠪᡠᡤᡤᡝ ᡩᠠᠪᠠᡤᠠᠨ ᠪᡝ ᡩᠠᠪᠠᠮᡝ ᠵᡳᡩᡝᡵᡝ ᠪᡝ ᡨᠣᡴᡨᠣᠮᡝ ᡨᡠᠸᠠᡶᡳ ᡶᡝᡴᠰᡳᠮᡝ ᠵᡳᡶᡳ ᠰᡠᠨᠵᠠᡶᡳ ᡤᡳᡤ ᠨᡳ ᡠᠵᡠ ᡩᡝ ᡳᠰᡳᠨᠵᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᠪᠠᡨᡳᠠ ᠠᠮᠪᠠ ᠴᠣᠣᡥᠠ ᡳᠰᡳᠨᠵᡳᡥᠠ ᠰᡝᠮᡝᠠᠯᠠᡵᠠ ᠵᠠᡴᠠᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠶᡝᡥᡝᡳ ᠴᠣᠣᡥᠠ ᠪᡝ ᡝᠨᡝᡤᡤᡳ ᠵᡳᠮᠪᡳ᠈ ᠴᡳᠮᠠᡵᡳ ᠵᡳᠮᠪᡳ ᠰᡝᠮᡝ ᡩᠣᠨᠵᡳᡥᠠ ᡩᡝ ᡳᠰᡳᠨᠵᡳᡥᠠ ᠨᡳᡴᠠᡳ᠈ ᠮᡠᠰᡝ ᡩᠣᠪᠣᡵᡳ ᡶᠠᡵᡥᡡᠨ ᡩᡝ ᠴᠣᠣᡥᠠ ᠵᡠᡵᠠᠴᡳ᠈ ᡤᡠᡵᡠᠨ ᡩᡠᡵᠪᡝᠮᠪᡳ᠉ ᡤᡝᡵᡝᡴᡝ ᠮᠠᡤᡤᡳ ᠵᡠᡵᠠᡴᡳ᠈ ᠮᡠᠰᡝᡳ ᠴᠣᠣᡥᠠᡳ ᡝᠵᡝᡩᡝ ᡤᡝᡵᡝᠨ ᠠᠮᠪᠠᠰᠠ ᡩᡝ ᠠᠯᠠᠨᠠ ᠰᡝᠮᡝ ᡤᡝᠮᡠ ᠠᠯᠠᠨᠠᡥᠠ᠈ ᡨᡝᡵᡝ ᠰᡳᡩᠠᠨ ᡩᡝ᠈ ᠰᡠᡵᡝ ᠪᡝᡳᠯᡝ ᠠᠮᡥᠠᡥᠠ ᠮᠠᡤᡤᡳ᠈ ᡤᡠᠨᡩᠠᡳ ᡶᡠᠵᡳᠨ ᡤᡝᡨᡝᠪᡠᡶᡳ ᡥᡝᠨᡩᡠᠮᡝ᠈ ᠪᡝᡳᠯᡝ ᠰᡳ ᠯᡳᠶᡝᠯᡳᠶᡝᡥᡝᠪᡳᠣ᠈ ᡤᠣᠯᠣᡥᠣᠪᡳᠣ᠈ ᡠᠶᡠᠨ ᠠᡳᠮᠠᠨ ᡳ ᡤᡠᡵᡠᠨ ᠠᠴᠠᡩᡳ ᠴᠣᠣᡥᠠ ᠵᡳᡥᡝᠪᡳ ᠰᡝᠮ ᡝᠰᡳ ᠠᡳᠨᡠ ᠠᠮᡥᠠᠮᠪᡳ᠈ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᡤᡝᠨᡝᡵᡝ ᠨᡳᠶᠠᠯᠮᠠ ᡩᡝ ᡝᠮᡠ ᡳᠰᡳᠨᠵᡳᠮᠪᡳᠣ᠈ ᡤᡝᠯᡝᠴᡳ ᠪᡳ ᠠᡳᠨᡠ ᠠᠮᡥᠠᠮᠪᡳ᠈ ᠶᡝᡥᡝᡳ ᠴᠣᠣᡥᠠ ᡳᠯᠠ ᡤᠣᠯᠣ ᠪᡝ ᡩᠣᠰᡳᠮᡝ ᠮᠠᡤᡤᡳ ᠵᡳᠮᠪᡳ᠈ ᠴᡳᠮᠠᡵᡳ ᠵᡳᠮᠪᡳ ᠰᡝᠮᡝ ᡶᠣᠨᠵᡳᡶᡳ ᡳᠨᡳ ᡩᠣᠯᠣ ᠵᠣᠪᠣᠮᠪᡳᡥᡝ᠈ ᡨᡝ ᡳᠰᡳᠨᠵᡳᡥᠠ ᠰᡝᠮᡝ ᡩᠣᠨᠵᡳᡶᡳ᠈ ᠮᡳᠨᡳ ᡩᠣᠯᠣ ᠰᡠᠯᡴᠠᠨ ᠣᡥᠣ᠈ ᠶᡝᡥᡝ ᡩᡝ ᠠᡳᡴᠠ ᠪᡠᡵᡝ ᠸᡝᡳᠯᡝ ᠪᡳᡶᡳ ᠪᡠᡵᠠᡴᡡ ᡴᡳᠶᠠᠨᡴᡳᡩᡠᠯᠠᡥᠠ ᠪᡳᠴᡳ᠈ ᠠᠪᡴᠠ ᠮᡳᠮᠪᡝ ᠸᠠᡴᠠᠯᠠᠮᠪᡳ ᠰᡝᠮᡝ ᠵᠣᠪᠣᠮᠪᡳᡩᡝᡵᡝ᠈ ᠮᡝᠨᡳ ᠮᡝᠨᡳ ᡤᡠᡵᡠᠨ ᠪᡝ ᠪᠠᡵᡤᡳᠶᠠᡶᡳ᠈ ᠠᠪᡴᠠᡳ ᡴᡝᠰᡳᡩᡝ ᠪᠠᡳᠪᡳ ᠪᠠᠨᠵᡳᡵᡝ ᠨᡳᠶᠠᠯᠮᠠ ᡩᡝ ᠪᡠᠶᡝᡵᠠᡴᡡ᠈ ᡠᠶᡠᠨ ᠠᡳᠮᠠᠨ ᡳ ᡤᡠᡵᡠᠨ ᠠᠴᠠᡶᡳ ᡠᠮᠠᡳ ᠸᡝᡳᠯᡝ ᠠᡴᡡ ᠨᡳᠶᠠᠯᠮᠠ ᠪᡝ ᡤᡳᡩᠠᡧᠠᠮᡝ ᠸᠠᡴᡳ ᠰᡝᠮᡝ ᠴᠣᠣᡥᠠ ᠵᡳᠴᡳ᠈ ᠠᠪᡴᠠ ᠴᡝᠮᠪᡝ ᠸᠠᡴᠠᠯᠠᡵᠠᠣ ᠰᡝᠮᡝ ᡤᡡᠨᡳᠮᠪᡳ ᡴᠠᡳ ᠰᡝᠮᡝ ᡥᡝᠨᡩᡠᡶᡳ᠈ ᠪᡝᠶᡝ ᠪᡝ ᡝᡵᡤᡝᠮᠪᡠᠮᡝ ᠠᠮᠠᡥᠠᡶᡳ ᡤᡝᡵᡝᡴᡝ ᠮᠠᡤᡤᡳ᠈ ᠪᡠᡩᠠ ᠵᡝᡶᡳ᠈ ᠴᠣᠣᡥᠠ ᠵᡠᡵᠠᠨᡩᡝᡵᡳ ᡩᡝ᠈ ᠪᡝᡳᠰᡝ ᠠᠮᠪᠠᠰᠠ ᠪᡝ ᡤᠠᡳᡶᡳ ᡨᠠᡤᠰᡝ ᡩᡝ ᡥᡝᡤᡴᡳᠯᠠᡵᡝ ᡩᡝ ᠨᡝᠨᡝᠮᡝ ᡝᠮᡠ ᠵᡝᡵᡤᡳ ᠨᡳᠶᠠᡴᡡᡵᠠᡶᡳ ᡥᡝᡤᡴᡳᠯᡝᡵᡝ ᡳᠯᡳᡥᠠ᠉ ᠵᠠᡳ ᠵᡝᡵᡤᡳ ᠨᡳᠶᠠᡴᡡᡵᠠᡶᡳ ᠵᠠᠯᠪᠠᡵᡳᠮᡝ᠈ ᡩᡝᡵᡤᡳ ᠠᠪᡴᠠ ᡩᡝᡴᡩᡝᡵᡝ ᡧᡠᠨ᠈ ᡶᡝᠵᡝᡵᡤᡳ ᠨᠠ᠈ ᡝᡳᡨᡝᠨ ᡝᠨᡩᡠᡵᡳ᠈ ᠸᡝᠴᡝᡴᡠ □□ ᠪᡳ ᡩᠠᠴᡳ ᠶᡝᡥᡝᡳ ᡤᡠᡵᡠᠨ ᡩᡝ ᡠᠮᠠᡳ ᠸᡝᡳᠯᡝ ᠠᡴᡡ ᠪᠠᠨᠵᡳᡥᠠ᠈ ᠪᠠᡳᠪᡳ ᠪᠠᠨᠵᡳᡵᡝ ᠨᡳᠶᠠᠯᠮᠠ ᠪᡝ ᠶᡝᠪᡝᠯᡝᡵᠠᡴᡡ ᠸᠠᡴᡳ ᠰᡝᠮᡝ ᠴᠣᠣᡥᠠ ᠵᡳᡩᡝᡵᡝ ᠪᡝ ᠠᠪᡴᠠ ᠪᡝᡳᡩᡝᠮᡝ ᠰᠠᠮᠪᡳ᠈ ᡨᡝᡵᡝ ᠰᡝᠮᡝ ᠵᠠᠯᠪᠠᡵᡳᡶᡳ ᡥᡝᡤᡴᡳᠯᠠᡶᡳ ᡳᠯᡳᡥᠠ᠉ ᡳᡳᠯᠠᠴᡳ ᠵᡝᡵᡤᡳ ᠨᡳᠶᠠᡴᡡᡵᠠᡶᡳ ᠵᠠᠯᠪᠠᡵᡳᠮᡝ᠈ ᠪᠠᡨᠠᡳ ᡠᠵᡠ ᠪᡝ ᡶᡝᠰᡳᡥᡡᠨ ᠣᠪᡠ᠈ ᠮᡳᠨᡳ ᡠᠵᡠ ᠪᡝ ᠸᡝᠰᡳᡥᡡᠨ ᠣᠪᡠ᠈ ᠮᡳᠨᡳ ᠴᠣᠣᡥᠠᡳ ᠨᡳᠶᠠᠯᠮᠠᡳ ᠶᠠᡶᠠᡥᠠ ᡧᡠᠰᡳᡥᠠ ᠪᡝ ᡠᠮᡝ ᡨᡠᡥᡝᠪᡠᡵᡝ᠈ ᠶᠠᠯᡠᡥᠠ ᠮᠣᡵᡳᠨ ᠪᡝ ᡠᠮᡝ ᠪᡠᡩᡠᡵᡳᠪᡠᡵᡝ᠈ ᡝᡵᡧᡝᠮᡝ ᠸᡝᡥᡳᠶᡝᠮᡝ ᠶᠠᠪᡠᠪᡠ ᠰᡝᠮᡝ ᡳᠯᠠᠨ ᠵᡝᡵᡤᡳ ᡥᡝᡤᡴᡳᠯᡝᡶᡳ᠈ ᡨᡝᡵᡝᠴᡳ ᠴᠣᠣᡥᠠ ᠵᡠᡵᡝᡶᡳ ᡤᡝᠨᡝᠮᡝ ᡨᠣᡴᠰᠣ ᡤᡝᠪᡠᡤᡝ ᡤᠠᡧᠠᠨ ᡳ ᠪᡳᡵᠠᡳ ᡩᠣᠣᡤᠨ ᡩᡝ ᡳᠯᡳᡶᡳ ᠴᠣᠣᡥᠠᡳ ᠨᡳᠶᠠᠯᠮᠠᡳ ᡤᠠᠯᠠᡴᡨᡠᠨ ᠮᠣᡤᡤᠣᠨ ᡥᡡᠰᡳᡴᡡ ᠪᡝ ᠰᡠᡶᡳ ᡤᡝᠮᡠ ᠸᡝᡵᡳ᠈ ᡤᠠᠯᠠ ᠮᠣᡤᡤᠣᠨ ᡤᠣᡳᡶᡳ ᠪᡠᠴᡝᠴᡳ ᠪᡠᠴᡝᡴᡳᠨᡳ᠈ ᠮᡠᠰᡝᡳ ᠪᡝᠶᡝ ᡴᡠᡧᡠᠨ ᠣᠴᡳ ᠪᠠᡨᠠ ᠪᡝ ᠠᡩᠠᡵᠠᠮᡝ ᠪᠠᡥᠠᡶᡳ ᡝᡨᡝᠮᠪᡳ᠈ ᠮᡠᠰᡝᡳ ᠪᡝᠶᡝ ᠰᡠᠯᠠ ᠣᠴᡳ᠈ ᡩᠠᡳᠨ ᠪᡝ ᡝᡨᡝᠮᠪᡳ ᡩᡝᡵᡝ ᠰᡝᠮᡝ ᡥᡝᠨᡩᡠᡶᡳ᠈ ᠴᠣᠣᡥᠠᡳ ᠨᡳᠶᠠᠯᠮᠠ ᡳ ᡤᠠᠯᠠᡴᡨᡠᠨ᠈ ᠮᠣᡤᡤᠣᠨ ᡥᡡᠰᡳᡴᡡ ᠪᡝ ᡤᡝᠮᡠ ᠸᡝᡵᡳᡶᡳ ᡨᡝᡵᡝᠴᡳ ᡤᡝᠨᡝᡶᡳ ᠵᠠᡴᠠ ᡤᡝᠪᡠᡤᡤᡝ ᠪᡳᡥᠠᠨ ᡩᡝ ᡳᠰᡳᠨᠠᡥᠠ ᠮᠠᡤᡤᡳ᠉ ᠵᠠᡴᠠᡳ ᡥᠣᡨᠣᠨ ᡨᡠᠸᠠᡴᡳᠶᠠᡥᠠ ᡝᠵᡝᠨ ᠨᠠᡳᡥᡡ᠈ ᠰᠠᠨᡨᠠᠨ ᡤᡝᠪᡠᡤᡤᡝ ᠵᡠᠸᡝ ᠠᠮᠪᠠᠨ ᠵᡳᡶᡳ ᠠᠯᠠᠮᡝ᠈ ᠴᠣᠣᡥᠠ ᠮᡠᡩᡠᡵᡳ ᡝᡵᡳᠨ ᡩᡝ ᡳᠰᡳᠨᠵᡳᡶᡳ᠈ ᠵᠠᡴᠠᡳ ᡥᠣᡨᠣᠨ ᠪᡝ ᡴᠠᡶᡳ ᠠᡶᠠᠮᡝ ᡨᡠᠸᠠᡶᡳ᠈ ᠠᡶᠠᡵᠠ ᠪᡝ ᠨᠠᡴᠠᡶᡳ ᠪᡝᡩᡝᡵᡝᡶᡳ᠈ ᡥᡝᠵᡳᡤᡝᡳ ᡥᠣᡨᠣᠨ ᡩᡝ ᠠᡶᠠᠨᠠᡥᠠ᠈ ᠵᡳᡥᡝ ᠴᠣᠣᡥᠠ ᡩᡝᠮᠪᡝᡳ ᡤᡝᡵᡝᠨ ᠰᡝᠮᡝ ᠠᠯᠠᡵᠠ ᠵᠠᡴᠠᡩᡝ᠈ ᠴᠣᠣᡥᠠᡳ ᠨᡳᠶᠠᠯᠮᠠ ᡤᡝᠮᡠ ᠴᡳᡵᠠ ᠠᠯᠵᠠᡶᡳ ᠪᡳᠰᡳᡵᡝ ᡩᡝ᠈ ᠵᠠᡴᠠᡳ ᡥᠣᡨᠣᠨ ᡩᡝ ᠪᡳᡥᡝ ᠯᠠᡤᡨᠠᡵᡳ ᡤᡝᠪᡠᡤᡤᡝ ᠨᡳᠶᠠᠯᠮᠠ ᠠᠮᠠᠯᠠ ᠵᡳᡶᡳ᠈ ᠪᡝᡳᠯᡝ ᠠᠮᠪᠠ ᠰᡝᠮᡝ ᡥᡡᠯᠠᡶᡳ ᠮᡠᠰᡝᡳ ᠴᠣᠣᡥᠠ ᡠᡩᡠ ᠪᡳ ᠰᡝᠮᡝ ᡥᡝᠨᡩᡠᡶᡳ᠈ ᠵᡠᡤᡡᠨ ᡳ ᡩᠠᠯᠪᠠᡳ ᠠᠯᡳᠨ-ᡳ ᡩᡝᠯᡝ ᡨᠠᡶᡠᡶᡳ᠈ ᠴᠣᠣᡥᠠᡳ ᠪᠠᡵᠠᠨ ᠪᡝ ᡨᡠᠸᠠᡶᡳ ᡥᡝᠨᡩᡠᠮᡝ᠈ ᠵᡳᡥᡝ ᠴᠣᠣᡥᠠ ᡤᡝᡵᡝᠨ ᠰᡝᠴᡳ᠈ ᠮᡠᠰᡝᡳ ᠴᠣᠣᡥᠠ ᡳᠨᡠ ᡤᡝᡵᡝᠨ᠈ ᠵᡠᠯᡤᡝ ᡩᠠᡳᠮᡳᡤ ᡤᡠᡵᡠᠨ ᠪᡝ ᡩᠠᡳᠯᠠᡵᠠ ᡶᠣᠨᡩᡝ᠈ ᡩᠠᡳᠮᡳᡤ ᡤᡠᡵᡠᠨ ᡳ ᠴᠣᠣᡥᠠ ᠠᠯᡳᠨ ᠪᡳᡥᠠᠨ ᡳ ᠶᠠᠯᡠ ᡳᠯᡳᡥᠠᡤᡤᡝ ᠪᡝ᠈ ᠮᡠᠰᡝᡳ ᠵᡠᠸᡝ ᡳᠯᠠᠨ ᡨᠠᡤᡤᡡ ᠴᠣᠣᡥᠠ ᡠᡨᡥᠠᡳ ᡤᡳᡩᠠᠮᠪᡳᡥᡝ᠉ ᠮᡠᠰᡝᡳ ᡤᡠᡵᡠᠨ ᡳ ᠨᡳᠶᠠᠯᠮᠠ ᠰᡳᠯᡥᡳ ᡝᡥᡝ᠈ ᡶᠠᡥᡡᠨ ᠮᠠᡤᡤᠠ᠈ ᡝᡵᡝ ᠴᠣᠣᡥᠠ ᠪᡝ ᡠᡵᡠᠨᠠᡴᡡ ᡤᡳᡩᠠᠮᠪᡳ᠉ ᡝᡵᡝ ᠴᠣᠣᡥᠠ ᠪᡝ ᡤᡳᡩᠠᡵᠠᡴᡡ ᠣᡥᠣᡩᡝ᠈ ᠯᠠᡤᡨᠠᡵᡳ ᠮᡳᠮᠪᡝ ᠸᠠ ᠰᡝᠮᡝ ᡥᡝᠨᡩᡠᡵᡝ ᠵᠠᡴᠠᡩᡝ᠈ ᡤᡝᡵᡝᠨ ᠴᠣᠣᡥᠠᡳ ᠨᡳᠶᠠᠯᠮᠠ ᡩᠣᠨᠵᡳᡶᡳ ᠮᡠᠵᡳᠯᡝᠨ ᠮᠠᠵᡳᡤᡝ ᡨᠣᡥᠣᡵᠣᡴᠣ᠈ ᡨᡝᡵᡝᠴᡳ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠵᡳᡥᡝ ᠴᠣᠣᡥᠠ ᠪᡝᡩᡝᡵᡝᠮᡝ ᡤᡝᠨᡝᠴᡳ᠈ ᠶᠠᠮᠵᡳ ᠠᡶᠠᡴᡳ᠈ ᡩᡝᡩᡠᠴᡳ ᠴᡳᠮᠠᡵᡳ ᠠᡶᠠᡴᡳ ᠰᡝᠮᡝ ᡴᠠᡵᡠᠨ ᡠᡤᡤᡳᡶᡳ᠈ ᡨᡠᠸᠠᠨᠠᡥᠠ ᠨᡳᠶᠠᠯᠮᠠ ᠵᡳᡶᡳ ᠠᠯᠠᠮᡝ ᠴᠣᠣᡥᠠ ᡩᡝᡩᡠᠮᡝ ᠮᠣᡵᡳᠨ ᡩᡝ ᡠᠯᡝᠪᡠᡵᡝ ᠣᡵᡥᠣ ᠵᡝᡴᡠ ᠵᡠᠸᡝᠮᠪᡳ᠈ ᡳᡤ ᠨᡳ ᡨᡝᡥᡝᡵᡝᠮᡝ ᠵᠠᠰᡝ ᠶᠠᡩᠠᠮᠪᡳ ᠰᡝᠮᡝ ᠠᠯᠠᡥᠠ ᠮᠠᡤᡤᡳ᠉ ᡨᠠᡳᡯᡠ ᠰᡠᡝᡵ ᠪᡝᡳᠯᡝ ᡩᡠᠪᠠᡩᡝ ᡩᡝᡩᡠᠮᡝ ᡳᡤ ᡳᠯᡳᡥᠠ᠈ ᡨᡝᡵᡝ ᠶᠠᠮᠵᡳ ᠶᡝᡥᡝᡳ ᠴᠣᠣᡥᠠᡳ ᡝᠮᡠ ᠨᡳᠶᠠᠯᠠᠮ ᡠᡴᠠᠮᡝ ᠵᡳᡶᡳ ᠠᠯᠠᠮᡝ᠈ ᠶᡝᡥᡝᡳ ᠪᡠᠵᠠᡳ ᠪᡝᡳᠯᡝ᠈ ᠨᠠᡵᡳᠮᠪᡠᠯᡠ ᠪᡝᡳᠯᡝᡳ ᠴᠣᠣᡥᠠ ᡝᠮᡠ ᡨᡠᠮᡝᠨ᠈ ᡥᠠᡩᠠᡳ ᠮᠠᡤᡤᡝᠪᡠᠯᠣ ᠪᡝᡳᠯᡝ᠈ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝ᠈ ᡥᠣᡳᡶᠠᡳ ᠪᠠᡳᠨᡩᠠᡵᡳ ᠪᡝᡳᠯᡝ ᠴᠣᠣᡥᠠ ᡝᠮᡠ ᡨᡠᠮᡝᠨ᠈ ᠮᠣᡤᡤᠣ ᡳ ᡴᠣᡵᠴᡳᠨ ᡳ ᡠᡠᡤᡤᠠᡩᠠᡳ ᠪᡝᡳᠯᡝ᠈ ᠮᠠᡤᡤᡡᠰ ᠪᡝᡳᠯᡝ᠈ ᠮᡳᡤᡤᠠᠨ ᠪᡝᡳᠯᡝ᠈ ᠰᡳᠪᡝ᠈ ᡤᡡᠸᠠᠯᠴᠠ ᠴᠣᠣᡥᠠ ᡝᠮᡠ ᡨᡠᠮᡝᠨ᠈ ᡠᡥᡝᡵᡳ ᡳᠯᠠᠨ ᡨᡠᠮᡝᠨ ᠪᡳ ᠰᡝᠮᡝ ᠠᠯᠠᡥᠠ ᠮᠠᡤᡤᡳ᠉ ᡤᡝᡵᡝᠨ ᠴᠣᠣᡥᠠ ᡤᡝᠯᡳ ᠴᡳᡵᠠ ᡝᡥᡝ ᠣᡥᠣ᠉ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᡤᡝᡵᡝᠨ ᠴᠣᠣᡥᠠᡳ ᠨᡳᠶᠠᠯᠮᠠ ᠰᡠᠸᡝ ᡠᠮᡝ ᠵᠣᠪᠣᡵᠣ᠈ ᠪᡳ ᠰᡠᠸᡝᠮᠪᡳ ᠵᠣᠪᠣᠪᠣᠮᡝ ᠠᡶᠠᠪᡠᡵᠠᡴᡡ᠈ ᠮᡠᠰᡝᡳ ᠪᠠᡳ ᠠᡴᡩᡠᠨ ᠪᡝ ᡤᠠᡳᠮᡝ ᡳᠯᠠᡶᡳ ᠵᡳᡥᡝ ᠴᠣᠣᡥᠠ ᠪᡝ ᠶᠠᡵᡤᡳᠶᠠᠮᡝ ᡤᡝᠨᡝᡶᡳ᠈ ᠴᡝ ᠠᡶᠠᠨᠵᡳᠴᡳ ᠮᡠᠰᡝ ᠠᠯᡳᠮᡝ ᡤᠠᡳᡶᡳ ᠠᡶᠠᡴᡳ᠈ ᠶᠠᡵᡴᡳᠶᠠᡵᠠ ᡩᡝ ᠵᡳᡩᡝᡵᠠᡴᡡ ᠣᠴᡳ᠈ ᠮᡠᠰᡝ ᡨᡝᠮᡠ ᠶᠠᡩᠠᡥᠠᠯᠠᡶᡳ ᡠᡩᡳᠨ ᡩᡝᡵᡝ ᠠᡵᠠᠮᡝ ᡶᠠᡳᡩᠠᡶᡳ ᡝᠯᡥᡝᡳ ᡩᠣᠰᡳᠮᡝ ᠠᡶᠠᠨᠠᡴᡳ᠈ ᡨᡝᡵᡝ ᠠᠴᠠᠨᠵᠠᠮᡝ ᠵᡳᡥᡝ ᠴᠣᠣᡥᠠ ᡠᠵᡠ ᡤᡝᡵᡝᠨ᠈ ᡝᠨᡨᡝᡥᡝ ᠠᠴᠠᠮᠵᡳᡥᠠ ᡠᠵᡠ ᡤᡝᡵᡝᠨ ᠴᠣᠣᡥᠠ ᡩᡝ ᠴᠣᠣᡥᠠᡳ ᠨᡳᠶᠠᠯᠮᠠ ᠠᠨᠠᡥᡡᠨᠵᠠᠮᡝ ᠵᡠᠯᡝᠰᡳ ᠠᡶᠠᡵᠠᡴᡡ᠈ ᡠᡵᡠᠨᠠᡴᡡ ᠪᡝᡳᠰᡝᡳ ᠪᡝᠶᡝ ᠵᡠᠯᡝᡵᡳ ᡤᠠᡳᡶᡳ ᡩᠣᠰᡳᠮᠪᡳ᠈ ᠮᡠᠰᡝ ᡳᠯᡳᡥᠠᡳ ᠠᠯᡳᠮᡝ ᡤᠠᡳᡶᡳ ᠠᡶᠠᡥᠠ ᡩᡝ᠈ ᡳᠨᡳ ᠵᡠᠯᡝᡵᡳ ᡤᠠᡳᡶᡳ ᡩᠣᠰᡳᡴᠠ ᠪᡝᡳᠰᡝ ᡳ ᠪᡝᠶᡝ᠈ ᡝᠮᡴᡳ ᠵᡠᠸᡝ ᡨᡠᡥᡝᡴᡝ ᡩᡝ᠈ ᡨᡝᡵᡝ ᠴᠣᠣᡥᠠ ᡠᡨᡥᠠᡳ ᠪᡠᡵᠯᠠᠮᠪᡳ ᡴᠠᡳ᠉ ᠮᡠᠰᡝᡳ ᠴᠣᠣᡥᠠ ᡠᡩᡠ ᡴᠣᠮᠰᠣ ᠪᡳᠴᡳᠪᡝ᠈ ᡝᠮᡠ ᡥᡡᠰᡠᠨ ᡳ ᠠᡶᠠᡥᠠ ᡩᡝ᠈ ᡠᡵᡠᠨᠠᡴᡡ ᡝᡨᡝᠮᠪᡳ ᠰᡝᠮᡝ ᡥᡝᠨᡩᡠᡶᡳ᠈ ᡨᡝᡵᡝ ᡩᠣᠪᠣᡵᡳ᠈ ᠵᠠᡳ ᠴᡳᠮᠠᡵᡳ ᡝᡵᡩᡝ ᠴᠣᠣᡥᠠ ᠵᡠᡵᡴᠠᠨ᠈ ᠶᡝᡥᡝᡳ ᠴᠣᠣᡥᠠ ᡥᡝᠵᡝᡤᡝᡳ ᡥᠣᡨᠣᠨ ᠪᡝ ᠨᡝᠨᡝᡥᡝ ᡳᠨᡝᡤᡤᡳ ᠠᡶᠠᠴᡳ ᠪᠠᡥᠠᡴᡡ ᠣᡶᡳ᠈ ᠵᠠᡳ ᡳᠨᡝᡤᡤᡳ ᡤᡝᠯᡳ ᠠᡶᠠᡵᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠰᡳᠨᠠᡶᡳ ᡥᠣᡨᠣᠨ ᡳ ᠪᠠᡴᠴᡳᠯᠠᠮᡝ ᡤᡠᡵᡝᡳ ᠠᠯᡳᠨ-ᡳ ᠨᡳᡤᡤᡠᡳ ᠠᡴᡩᡠᠨ ᠰᠠᡳᠨ ᠪᠠ ᡩᡝ ᠴᠣᠣᡥᠠ ᡶᠠᡳᡩᠠᡶᡳ᠈ ᡤᡡᠰᡳᠨ ᡤᡡᠰᠠᡳ ᠴᠣᠣᡥᠠ ᡤᠠᡳᡶᡳ ᠠᡶᠠᡵᠠ ᠪᡝᡳᠰᡝ ᠠᠮᠪᠠᠰᠠ ᠪᡝ ᡨᡝᡳᠰᡠ ᡨᡝᡳᠰᡠ ᠠᡶᠠᠪᡠᡶᡳ ᠪᡝᠯᡥᡝᠮᡝ ᠸᠠᠵᡳᡥᠠ ᠮᠠᡤᡤᡳ᠈ᡝᡳᡩᡠ ᠪᠠᡨᡠᡵᡠ ᡩᡝ ᡨᠠᡤᡤᡡ ᠴᠣᠣᡥᠠ ᠠᡩᠠᠪᡠᡶᡳ ᠶᠠᡵᡴᡳᠶᠠᠮᡝ ᡠᡤᡤᡳᡥᡝ᠉ ᡝᡳᡩᡠ ᠪᠠᡨᡠᡵᡠ ᠶᠠᡵᡴᡳᠶᠠᠮᡝ ᡤᡝᠨᡝᡥᡝ ᠪᡝ᠈ ᠶᡝᡥᡝᡳ ᠴᠣᠣᡥᠠ ᠰᠠᠪᡠᡶᡳ᠈ ᡥᡝᠵᡳᡤᡝ ᡥᠣᡨᠣᠨ ᠪᡝ ᠠᡶᠠᡵᠠ ᠪᡝ ᠨᠠᡴᠠᡶᡳ᠈ ᠴᠣᠣᡥᠠ ᠪᠠᡵᡤᡳᠶᠠᡵᡳ ᠠᡶᠠᠨᠵᡳᡥᠠ ᠮᠠᡤᡤᡳ᠉ ᠮᠠᠨᠵᡠ ᡳ ᠴᠣᠣᡥᠠ ᡳᠯᡳᡥᠠᡳ ᠠᠯᡳᠮᡝ ᡤᠠᡳᡶᡳ᠈ ᡝᠮᡠ ᠵᡝᡵᡤᡳ ᡤᡳᡩᠠᡶᡳ ᡠᠶᡠᠨ ᠨᡳᠶᠠᠯᠮᠠ ᠪᡝ ᠸᠠᡥᠠ᠉ ᠶᡝᡥᡝᡳ ᠴᠣᠣᡥᠠ ᡝᠮᡠ ᠵᡝᡵᡤᡳ ᠪᡝᡩᡝᡵᡝᡶᡳ᠈ ᠵᠠᡳ ᡩᠠᠰᠠᠮᡝ ᠶᡝᡥᡝᡳ ᠪᡠᠵᠠᡳ ᠪᡝᡳᠯᡝ᠈ ᡤᡳᠨᡨᠠᡳᠰᡳ ᠪᡝᡳᠯᡝ᠈ ᡴᠣᡵᠴᡳᠨ ᡳ ᠮᠣᡤᡤᠣᡳ ᡳᠯᠨᠠ ᠪᡝᡳᠯᡝ ᡳ ᠴᠣᠣᡥᠠ ᠪᡝ ᡤᠠᡳᡶᡳ᠈ ᡝᠮᡠ ᠪᠠᠪᡝ ᡧᡠᡵᡤᡳᠶᠠᠮᡝ ᠠᡶᠠᠮᡝ᠈ ᠶᡝᡥᡝᡳ ᠪᡠᠵᠠᡳ ᠪᡝᡳᠯᡝ ᠵᡠᠯᡝᡵᡳ ᡤᠠᡳᡶᡳ ᠠᡶᠠᠮᡝ ᡩᠣᠰᡳᡶᡳ᠈ ᠶᠠᠯᡠᡥᠠ ᠮᠣᡵᡳᠨ ᠮᠣᠣ ᡩᡝ ᠠᡶᠠᡶᡳ ᡨᡝᡥᡝᡴᡝ ᠮᠠᡤᡤᡳ᠉ ᠮᠠᠨᠵᡠ ᡤᡠᡵᡠᠨ ᡳ ᠴᠣᠣᡥᠠᡳ ᡠᡨᠠᡳ ᡤᡝᠪᡠᡤᡤᡝ ᠨᡳᠶᠠᠯᠮᠠ ᠰᡠᠵᡠᡶᡳ᠈ ᠪᡠᠵᠠᡳ ᠪᡝᡳᠯᡳᡝ ᠪᡝ ᠠᡴᡨᠠᠯᠠᠮᡝ ᠶᠠᠯᡠᡶᡳ ᡤᡳᡩᠠᡵᠠᠮᡝ ᠸᠠᡥᠠ ᠮᠠᡤᡤᡳ᠉ ᠶᡝᡥᡝᡳ ᠴᠣᠣᡥᠠ ᡤᡳᡩᠠᠪᡠᡶᡳ᠈ ᠪᡠᠵᠠᡳ ᠪᡝᡳᠯᡝ ᡳ ᠸᠠᠪᡠᡥᠠ ᠪᡝ ᠰᠠᡶᡳ᠈ ᠶᡝᡥᡝᡳ ᠪᡝᡳᠰᡝ ᡤᡝᠮᡠ ᠰᠣᡤᡤᠣᠴᠣᡵᠣ ᠵᠠᡴᠠᡩᡝ᠈ ᠠᠴᠠᡶᡳ ᠵᡳᡥᡝ ᠴᠣᠣᡥᠠᡳ ᠪᡝᡳᠰᡝ ᠠᠮᠪᡠᠯᠠ ᡤᠣᠯᠣᡶᡳ᠈ ᡤᡝᠮᡠ ᠰᡳᠯᡥᡳ ᠮᡝᡳᠵᡝᡶᡳ ᠮᡝᠨᡳ ᠮᡝᠨᡳ ᠴᠣᠣᡥᠠ ᠪᡝ ᡨᡠᠸᠠᡵᠠᡴᡡ᠈ ᠵᡠᡤᡡᠨ ᠵᡠᡤᡡᠨ ᡳ ᠰᠠᠮᠰᡳᠮᡝ ᠪᡠᡵᠯᠠᡥᠠ᠉ ᠮᠣᡤᡤᠣᡳ ᡴᠣᡵᠴᡳᠨ ᡳ ᠮᡳᡤᡤᠠᠨ ᠪᡝᡳᠯᡝ ᡳ ᠶᠠᠯᡠᡥᠠ ᠮᠣᡵᡳᠨ ᠯᡳᡶᠠᡶᡳ ᡨᡠᡥᡝᠨᡝᡶᡳ ᠮᠣᡵᡳᠨ ᡳ ᡝᡤᡤᡝᠮᡠ᠈ ᡝᡨᡠᡥᡝ ᡶᠠᡴᡡᡵᡳ ᠪᡝ ᡤᡝᠮᡠ ᠸᠠᠯᡳᠶᠠᡶᡳ᠈ ᠪᠣᠨᡨᠣᡥᠣ ᠮᠣᡵᡳᠨ ᠶᠠᠯᡠᡶᡳ ᠠᡵᡴᠠᠨ ᠰᡝᠮᡝ ᠪᡠᡵᠯᠠᠮᡝ ᡨᡠᠴᡳᠮᠪᡳ᠉ ᠰᡠᡵᡝ ᠪᡝᡳᠯᡝ ᠴᠣᠣᡥᠠ ᠪᡝ ᠰᡳᠨᡩᠠᠴᡳ ᠰᠠᠴᡳᠮᡝ ᠸᠠᠮᡝ᠈ ᠨᡠᡥᠠᠯᡳᠶᠠᠨ ᠰᠠᡤᡤᠠ ᡩᡝ ᠶᠠᠯᡠᠮᡝ ᠰᠠᡥᠠᠮᡝ ᡨᡠᡥᡝᠪᡠᠮᡝ᠈ ᡥᠠᡩᠠᡳ ᡤᡠᡵᡠᠨ ᡳ ᠴᠠᡳᡥᠠ ᡤᠠᡧᠠᠨ ᡳ ᠵᡠᠯᡝᡵᡤᡳ ᠸᡝᡥᡝ ᠶᡠᠸᠠᠨ ᡩᡝ ᡳᠰᡳᡨᠠᠯᠠ ᠪᠣᡧᠣᠮᡝ ᠵᡳᡶᡳ᠈ ᡨᡝᡵᡝ ᡩᠣᠪᠣᡵᡳ ᠵᡠᡤᡡᠨ ᠪᡝ ᡤᡡᠰᡠ ᡶᡠᡨᠠ ᡤᠣᠴᡳᠮᡝ ᡨᡠᠸᠠᡴᡳᠶᠠᡶᡳ ᠪᡠᡵᠯᠠᠮᡝ ᡤᡝᠨᡝᡵᡝ ᠨᡳᠶᠠᠯᠮᠠ ᠪᡝ ᠠᠮᠪᡠᠯᠠ ᠸᠠᡥᠠ᠉ ᠵᠠᡳ ᡳᠨᡝᡤᡤᡳ ᡝᠮᡠ ᠨᡳᠶᠠᠯᠮᠠ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝ ᠪᡝ ᠸᡝᡳᡥᡠ ᠶᠠᡶᠠᡶᡳ ᡥᡠᡨᡥᡠᡶᡳ ᡤᠠᠵᡳᡶᡳ᠈ ᠰᡠᡵᡝ ᠪᡝᡳᠯᡝ ᡩᡝ ᠠᠯᠠᠮᡝ᠈ ᠪᡳ ᡝᠮᡠ ᠨᡳᠶᠠᠯᠮᠠ ᠪᡝ ᠪᠠᡥᠠᡶᡳ ᠸᠠᡴᡳ ᠰᡝᠴᡳ᠈ ᠮᡳᠮᠪᡝ ᡠᠮᡝ ᠸᠠᡵᠠ ᠵᠣᠯᡳᡤᠠᠨ ᡤᠠᡳᠰᡠ ᠰᡝᠮᡝ ᠵᠠᡴᠠᡩᡝ᠈ ᠪᡳ ᡥᡠᡨᡥᡠᡶᡳ ᡤᠠᠵᡳᡥᠠ ᠰᡝᠮᡝ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠵᡠᠯᡝᡵᡳ ᠨᡳᠶᠠᡴᡡᡵᠠᠪᡠᡥᠠ᠉ ᠰᡠᡵᡝ ᠪᡝᡳᠯᡝ ᡶᠣᠨᠵᡳᠮᡝ᠈ ᠰᡳ ᠠᡳᠨᠠᡥᠠ ᠨᡳᠶᠠᠯᠮᠠ᠈ ᡨᡝᡵᡝ ᠨᡳᠶᠠᠯᠮᠠ ᠶᠠᠪᡠᠮᡝ ᠮᡳᠮᠪᡝ ᠸᠠᡵᠠᡴᡡ ᠰᡝᠮᡝ ᡤᡝᠨᡝᠮᡝ ᠠᠯᠠᡥᠠᡴᡡ᠉ ᠪᡳ ᡠᠯᠠᡳ ᡤᡠᡵᡠᠨ ᡳ ᠮᠠᠨᡨᠠᡳ ᠪᡝᡳᠯᡝᡳ ᡩᡝᠣ ᠪᡠᠵᠠᠨᡨᠠᡳ ᠸᠠᠴᡳ᠈ ᡠᠵᡳᠴᡳ ᠪᡝᡳᠯᡝ ᠰᡳᠨᡳ ᠴᡳᡥᠠ ᠰᡝᠮᡝ ᡥᡝᠨᡩᡠᠮᡝ ᡥᡝᡤᡴᡳᠯᡝᡥᡝ ᠮᠠᡤᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠰᡠᠸᡝᠨᡳ ᡠᠶᡠᠨ ᠠᡳᠮᠠᠨ ᡳ ᡶᡠᡵᡠᠨ ᠠᠴᠠᡶᡳ ᡠᠮᠠᡳ ᠸᡝᡳᠯᡝ ᠠᡴᡡ ᠨᡳᠶᠠᠯᠮᠠ ᠪᡝ ᠸᠠᡴᡳ ᠰᡝᠮᡝ ᠴᠣᠣᡥᠠ ᠵᡳᡥᡝ᠈ ᠠᠪᡴᠠ ᠰᡠᠸᡝᠮᠪᡳ ᠸᠠᡴᠠᠯᠠᡶᡳ ᠰᡳᡴᠰᡳ ᡳᠨᡝᡤᡤᡳ ᠪᡠᠵᠠᡳ ᠪᡝᡳᠯᡝ ᠪᡝ ᠪᠠᡥᠠᡶᡳ ᠸᠠᡥᠠ᠉ ᡨᡝᡵᡝ ᡳᠨᡝᡤᡤᡳ ᠪᠠᡥᠠ ᠪᡳᠴᡳ ᠰᡳᠮᠪᡝ ᠸᠠᠮᠪᡳᡥᡝ ᠮᡳᠮᡩᡝ ᡝᠮᡤᡝᡵᡳ ᡨᡝᡵᡝ ᠠᠴᠠᡥᠠ ᠨᡳᠶᠠᠯᠮᠠ ᠪᡝ ᠠᡩᠠᡵᠠᠮᡝ ᠸᠠᡵᠠ᠈ ᠸᠠᡥᠠᠴᡳ ᡠᠵᡳᡥᡝ ᡤᡝᠪᡠ ᡩᡝᠯᡝ ᡤᠠᡳᡥᠠ ᠴᡳ ᠪᡠᡥᡝ ᡤᡝᠪᡠ ᡩᡝᠯᡝ ᠰᡝᡵᡝ ᠰᡝᠮᡝ ᡥᡝᠨᡩᡠᡶᡳ ᡥᡠᡨᡥᡠᡥᡝ ᠵᡠᡨᡝ ᠪᡝ ᠰᡠᡶᡳ ᠰᡳᠯᡠᠨ ᡳ ᡩᠠᡥᡡ ᡝᡨᡠᠪᡠᡶᡳ ᡠᠵᡳᡥᡝ᠉ ᡨᡝᡵᡝ ᠴᠣᠣᡥᠠ ᠪᡝ ᡤᡳᡩᠠᡥᠠ ᡩᡝ ᡩᡠᡳᠨ ᠮᡳᡤᡤᠠᠨ ᠨᡳᠶᠠᠯᠮᠠ ᠸᠠᡥᠠ᠈ ᡳᠯᠠᠨ ᠮᡳᡤᡤᠠᠨ ᠮᠣᡵᡳᠨ᠈ ᡝᠮᡠ ᠨᡳᡤᡤᠠᠨ ᡠᡴᠰᡳᠨ ᠪᠠᡥᠠ᠈ ᡨᡝᡵᡝᠴᡳ ᠮᠠᠨᠵᡠ ᡤᡠᡵᡠᠨ ᡳ ᡥᠣᡵᠣᠨ ᡨᡠᠮᡝᠨ ᠪᠠᡩᡝ ᠠᠯᡤᡳᡴᠠ᠈ ᡨᡝᡵᡝ ᠴᠣᠣᡥᠠ ᡩᡝ ᠵᡠᡧᡝᡵᡳ ᡤᠣᠯᠣᡳ ᡝᠵᡝᠨ ᠶᡠᠯᡝᡤᡤᡝ ᠵᠠᡤᡤᡳᠨ ᡩᠠᡶᡳ ᠵᡳᡩᡝᡵᡝ ᠵᠠᡴᠠᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠵᡠᠸᡝ ᠪᡳᡨᠠ ᡩᡝ ᠴᠣᠣᡥᠠ ᡠᡤᡤᡳᡶᡳ ᠵᡠᡧᡝᡵᡳ ᡤᠣᠯᠣ ᠪᡝ ᡩᠠᡥᠠᠪᡠᡶᡳ ᡤᠠᠵᡳᡥᠠ᠉ ᡨᡝᡵᡝᠴᡳ ᠨᡝᠶᡝᠨ ᡳ ᡤᠣᠯᠣᡳ ᠰᡝᠣᠸᡝᠨ᠈ ᠰᡝᡴᠰᡳ ᠨᠠᡩᠠᠨ ᡤᠠᡧᠠᠨ ᡳ ᠨᡳᠶᠠᠯᠮᠠ ᠪᡝ ᠪᠠᡵᡤᡳᠶᠠᡶᡳ ᡶᠣᡩᠣᡥᠣ ᡤᡝᠪᡠᡤᡤᡝ ᠠᠯᡳᠨ ᡳ ᡧᠠᠨᠴᡳᠨ ᡩᡝ ᡨᡝᡥᡝ ᠮᠠᡤᡤᡳ᠈ ᠠᠨᠠᡤᠠᠨ ᡳ ᠣᠮᡧᠣᠨ ᠪᡳᠶᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ᠈ ᡝᡳᡩᡠ ᠪᠠᡨᡨᡠᡵᡠ᠈ ᡬᠠᡬᠠᡳ ᠵᠠᡵᡤᡡᠴᡳ᠈ ᡧᠣᡤᠣᡵᠣ ᠪᠠᡨᡠᡵᡠ ᡳᠯᠠᠨ ᠠᠮᠪᠠᠨ ᡩᡝ ᠮᡳᡤᡤᠠᠨ ᠴᠣᠣᡥᠠ ᡠᡤᡤᡳᡶᡳ᠈ ᠨᡝᠶᡝᠨ ᡳ ᡶᠣᡩᠣᡤᠣᡳ ᡧᠠᠨᠴᡳᠨ ᠪᡝ ᡴᠠᡶᡳ ᡳᠨᡝᡤᡤᡳ ᡩᠠᡵᡳ ᠠᡶᠠᠮᡝ ᠠᠯᠠᠮᡝ ᠪᡳᠶᠠ ᡩᡝ ᡥᠣᡨᠣᠨ ᠪᡝ ᠠᡶᠠᠮᡝ ᡤᠠᡳᡶᡳ᠈ ᠰᡝᠣᠸᡝᠨ ᠰᡝᡴᠰᡳ ᠪᡝ ᠸᠠᡶᡳ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᠨᡳᠣᠸᠠᡤᡤᡳᠶᠠᠨ ᠮᠣᡵᡳᠨ ᠠᠨᡳᠶᠠ ᠠᠮᠠᡵᡤᡳ ᡴᠣᡵᠴᡳᠨ ᡳ ᠮᠣᡤᡤᠣ ᡤᡠᡵᡠᠨ ᡳ ᠮᡳᡤᡤᠠᠨ ᠪᡝᡳᠯᡝ᠈ ᠰᡠᠨᠵᠠ ᡨᠠᡨᠠᠨ ᡳ ᡴᠠᠯᠠᡴᡳ ᠯᠣᠣᠰᡳ ᠪᡝᡳᠯᡝᡳ ᠠᠯᠴᡳᠨ ᠶᠠᠪᡠᠮᡝ ᡩᡝᡵᡳᠪᡠᡥᡝ ᠮᠠᡤᡤᡳ᠈ ᡨᡝᡵᡝᠴᡳ ᠪᠠ ᠪᠠᡳ ᠮᠣᡤᡤᠣ ᡤᡠᡵᡠᠨ ᡳ ᠪᡝᡳᠰᡝᡳ ᠠᠯᠴᡳᠨ ᠯᠠᡴᠴᠠᡵᠠᡴᡡ ᠶᠠᠪᡠᡥᠠ᠉ ᠨᡳᠣᡥᠣᠨ ᡥᠣᠨᡳᠨ ᠠᠨᡳᠶᠠ ᠨᡳᡤᡤᡠᠨ ᠪᡳᠶᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠴᠣᠣᡥᠠ ᡤᡝᠨᡝᡶᡳ ᡥᠣᡳᡶᠠᡳ ᠪᠠᡳᠨᡩᠠᡵᡳ ᠪᡝᡳᠯᡝᡳ ᡩᠣᠪᡳ ᡥᠣᡨᠣᠨ ᠪᡝ ᠠᡩᠠᠮᡝ ᡤᠠᡳᡶᡳ᠈ ᡥᠣᡨᠣᠨ ᡳ ᡝᠵᡝᠨ ᡴᡝᠴᡠᡤᡤᡝ᠈ ᠰᡠᠮᡝᡤᡤᡝ ᠵᡠᠸᡝ ᠠᠮᠪᠠᠨ ᠪᡝ ᠸᠠᡶᡳ᠈ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᡶᡠᠯᡤᡳᠶᠠᠨ ᠪᠣᠨᡳᠣ ᠠᠨᡳᠶᠠ ᠵᡠᠸᡝ ᠪᡳᠶᠠ ᡩᡝ᠈ ᡩᠠᡳᠮᡳᡤ ᡤᡠᡵᡠᠨ ᡳ ᠸᠠᠨᠯᠶ ᡥᠠᠨ ᡳ ᠵᡠᠸᡝ ᠪᡳᠶᠠ ᡩᡝ᠈ ᡩᠠᠮᡳᡤ ᡤᡠᡵᡠᠨ ᡳ ᠵᡠᠸᡝ ᡥᠠᡶᠠᠨ᠈ ᠵᡠᠸᡝ ᡨᠠᡤᡤᡡ ᠨᡳᠶᠠᠯᠮᠠ ᠪᡝ ᡤᠠᡳᡶᡳ ᠵᡳᡩᡝᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠴᠣᠣᡥᠠᡳ ᠨᡳᠶᠠᠯᠮᠠ ᡩᡝ ᡠᡴᠰᡳᠨ ᡝᡨᡠᠪᡠᡶᡳ ᠴᡠᠯᡤᡝᠮᡝ ᡨᡠᠴᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠪᡝᠶᡝ ᡝᠮᠶ ᡥᠣᡤᡴᠣ ᡤᡝᠪᡠᡤᡤᡝ ᠪᠠᡩᡝ ᠣᡴᠰᠣᡶᡳ ᠠᠴᠠᡶᡳ ᠠᠮᠪᠠ ᡥᡝᠴᡝᠨ ᡩᡝ ᡤᠠᠵᡳᡶᡳ ᡩᠣᡵᠣᠨ ᡤᡳᠰᡠᠨ ᡤᡳᠰᡠᡵᡝᡤᡳ ᡠᡤᡤᡳᡥᡝ᠉ ᠨᡝᠨᡝᠮᡝ ᡩᠠᡳᠨ ᡩᡝ ᠶᠠᡶᠠᡥᠠ ᡠᠯᠠᡳ ᡤᡠᡵᡠᠨ ᡳ ᠮᠠᠨᡨᠠᡳ ᠪᡝᡳᠯᡝᡳ ᡩᡝᠣ ᠪᡠᠵᠠᠨᡨᠠᡳ ᠪᡝᡳᠯᡝ ᠪᡝ ᡩᡠᡳᠨ ᠠᠨᡳᠶᠠ ᡠᠵᡳᡶᡳ᠈ ᡶᡠᠯᡤᡳᠶᠠᠨ ᠪᠣᠨᡳᠣ ᠠᠨᡳᠶᠠ ᠨᠠᡩᠠᠨ ᠪᡳᠶᠠ ᡩᡝ᠈ ᡳᠨᡳ ᡠᠯᠠᡳ ᡤᡠᡵᡠᠨ ᡩᡝ ᠰᡳᠨᡩᠠᡶᡳ ᡠᡤᡤᡳᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡨᡠᠯᡴᡠᠨ ᡥᡡᠸᠠᡤᠵᡳᠨ᠈ ᠪᠣᠯᡴᠣᠨ ᠸᡳᡤᠵᠠᠨ ᡤᡝᠪᡠᡤᡤᡝ ᠵᡠᠸᡝ ᠠᠮᠪᠠᠨ ᠪᡝᠨᡝᠮᡝ ᡤᡝᠨᡝᡥᡝ᠉ ᠪᡠᠵᠠᠨᡨᠠᡳ ᠪᡝᡳᠯᡝ ᡳᠨᡳ ᡤᡠᡵᡠᠨ ᡩᡝ ᡳᠰᡳᠨᠠᡵᠠ ᠣᡤᡤᠣᠯᠣ ᠪᡠᠵᠠᠨᠠᡳ ᠪᡝᡳᠯᡝ ᠠᡥᡡᠨ ᠮᠠᠨᡨᠠᡳ ᠪᡝᡳᠯᡝ ᠠᠮᠠ ᠵᡠᡳ ᡳᠨᡳ ᡤᡠᡵᡠᠨ ᡳ ᠰᡠᠸᠠᠶᠠᠨ ᠰᡳᡵᡝᠨ ᡤᡝᠪᡠᡤᡤᡝ ᠪᠠᡩᡝ ᠶᠠᠰᠠ ᠶᠠᡶᠠᠮᡝ ᡠᠯᠠᠨ ᡶᡝᡨᡝᠮᡝ ᡤᡝᠨᡝᡶᡳ ᡨᡝᡵᡝ ᡤᠠᡧᠠᠨ ᡳ ᠵᡠᠸᡝ ᡥᡝᡥᡝ ᠪᡝ ᠠᠮᠠ ᠵᡠᡳ ᡝᠯᡨᡝ ᡤᠠᠵᡳᡶᡳ ᡩᡝᡩᡠᡵᡝ ᡩᡝ᠈ ᡨᡝᡵᡝ ᠵᡠᠸᡝ ᡥᡝᡥᡝᡳ ᡝᡳᡤᡝᡨᡝ ᡩᠣᠪᠣᡵᡳ ᡩᠣᠰᡳᡶᡳ᠈ ᠮᠠᠨᡨᠠᡳ ᠪᡝᡳᠯᡝᡳ ᠠᠮᠠ ᠵᡠᡳ ᠪᡝ ᠸᠠᡥᠠ᠉ ᡨᡝᡵᡝᠴᡳ ᠪᡠᠵᠠᠨᡨᠠᡳ ᠪᡝᡳᠯᡝᡳ ᡳᠰᡳᠨᠠᡥᠠ ᡳᠨᡝᡤᡤᡳ᠈ ᠮᠠᠨᡨᠠᡳ ᠪᡝᡳᠯᡝᡳ ᡝᠰᡥᡝᠨ ᡥᡳᡤᠨᡳᠶᠠ ᠪᡳᡝᠯᡝ ᡤᡠᡵᡠᠨ ᡩᡝ ᡝᠵᡝᠨ ᠣᠵᠣᡵᠣ ᠪᡝ ᡨᡝᠮᡧᡝᠮᡝ ᠪᡠᠵᠠᠨᡨᡳᠠ ᠪᡝᡳᠯᡝ ᠪᡝ ᠸᠠᡴᡳ ᠰᡝᠮᡝ ᡩᡝ᠈ ᠪᡠᠵᠠᠨᡨᠠᡳ ᠪᡝᡳᠯᡝ ᠪᡝ ᠪᡝᠨᡝᠮᡝ ᡤᡝᠨᡝᡥᡝ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡨᡠᠯᡴᡠᠨ ᡥᡡᠸᠠᡤᠵᡳᠨ᠈ ᠪᡠᠯᡴᠣᠨ ᠸᡳᡤᠵᠠᠨ᠈ ᠵᡠᠸᡝ ᠠᠮᠪᠠᠨ ᠪᡠᠵᠠᠨᡨᠠᡳ ᠪᡝᡳᠯᡝᡳ ᠪᠣᠣᡳ ᡠᠴᡝ ᡩᡠᡴᠠ ᠪᡝ ᡥᠶᠠᡶᠠᡶᡳ ᡨᡠᠸᠠᡴᡳᠶᠠᠮᡝ ᡨᡝᡥᡝ ᠮᠠᡤᡤᡳ᠈ ᡥᡳᡤᠨᡳᠶᠠ ᠪᡝᡳᠯᡝ᠈ ᠪᡠᠵᠠᠨᡨᠠᡳ ᠪᡝᡳᠯᡝ ᠪᡝ ᡨᡝᡵᡝᠴᡳ ᠪᡠᠵᠠᠨᡨᠠᡳ ᠪᡝᡳᠯᡝ ᡠᠯᠠᡳ ᡤᡠᡵᡠᠨ ᡩᡝ ᡝᠵᡝᠨ ᠣᠮᡝ ᡨᠣᡴᡨᠣᡥᠣ ᠮᠠᡤᡤᡳ᠈ ᡨᡠᠯᡴᡠᠨ ᡥᡡᠸᠠᡤᠵᡳᠨ᠈ ᠪᠣᠯᡴᠣᠨ ᠸᡳᡤᠵᠠᠨ ᠠᠮᠠᠰᡳ ᠵᡳᡥᡝ᠈ ᡨᡝᡵᡝ ᠠᠨᡳᠶᠠ ᠵᠣᡵᡥᠣᠨ ᠪᡳᠶᠠ ᡩᡝ᠈ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡝ ᠵᡠᠸᡝ ᠵᡝᡵᡤᡳ ᡠᠵᡳᡥᡝ ᠠᠮᠠ ᡴᠠᡳ ᠰᡝᠮᡝ ᡥᡝᠨᡩᡠᠮᡝ᠈ ᡳᠨᡳ ᡠᠨ ᡥᡡᠨᠠᡳ ᡤᡝᠪᡠᡤᡤᡝ ᠰᠠᡵᡤᠠᠨ ᠵᡠᡳ ᠪᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡩᡝᠣ ᡧᡠᡵᡤᠠᠴᡳ ᠪᡝᡳᠯᡝ ᡩᡝ ᠪᠠᠨᠵᡳᡵᡝ ᡩᡝ᠈ ᠣᡴᡩᠣᡶᡳ ᠠᠮᠪᠠ ᠰᠠᡵᡳᠨ ᠰᠠᡵᡳᡵᠠᠮᡝ ᡤᠠᡳᡥᠠ᠈ ᡶᡠᠯᠠᡥᡡᠨ ᠴᠣᡴᠣ ᠠᠨᡳᠶᠠ᠈ ᠶᡝᡥᡝ ᠈ ᡥᠠᡩᠠ᠈ ᡠᠯᠠ᠈ ᡥᠣᡳᡶᠠ ᠠᠴᠠᡶᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᠠᠯᠴᡳᠨ ᡨᠠᡴᡡᡵᠠᡶᡳ ᡥᡝᠨᡩᡠᠮᡝ᠈ ᠮᡳᠨᡳ ᠸᠠᡴᠠ ᡩᡝ ᠴᠣᠣᡥᠠ ᡤᡳᡩᠠᠪᡠᡥᠠ ᡤᡝᠪᡠ ᠪᠠᠨᠵᡳᡥᠠ᠈ ᡝᡵᡝᠴᡳ ᠠᠮᠠᠰᡳ ᠮᡠᠰᡝ ᡩᠠᠰᠠᠮᡝ ᠠᠴᠠᡶᡳ ᠵᡠᡳ ᠪᡠᠶᡠᠨ ᡤᠠᡳᠮᡝ ᠰᠠᡳᠨ ᠪᠠᠨᠵᡳᡴᡳ᠈ ᠶᡝᡥᡝᡳ ᠪᡠᠶᠠᡤᡤᡡ ᠪᡝᡳᠯᡝᡳ ᡠᠨ ᠪᡝ᠈ ᡨᠠᡳᡯᡠ ᠰᡠᡵᡝ ᠪᡝᠯᡳᡝ ᠶᠠᠴᡳᠨ ᠵᡠᡳ ᡩᠠᡳᡧᠠᠨ ᠪᡝᡳᠯᡝ ᡩᡝ ᠪᡠᡵᡝ ᠰᡝᡥᡝ ᠮᠠᡤᡤᡳ᠈ ᠮᠣᡵᡳᠨ ᡩᡝ ᡝᡤᡤᡝᠮ᠈ ᡥᠠᡩᠠᠯᠠ ᡨᠣᡥᠣᡶᡳ ᡠᡴᠰᡳᠨ ᠰᠠᠴᡳ ᠠᠴᠠᡶᡳ ᠶᠠᡶᠠᠨ ᠪᡝᠨᡝᠮᡝ ᡳᡥᠠᠨ ᠸᠠᠮᡝ ᡤᡝᠨᡝᡶᡳ᠈ ᠠᠪᡴᠠ ᡩᡝ ᡧᠠᡤᡤᡳᠶᠠᠨ ᠮᠣᡨᡳᠨ ᠸᠠᡶᡳ ᡤᡳᡵᠠᡤᡤᡳ ᠪᡝ ᡧᡠᡶᡳ᠈ ᠰᡝᡤᡤᡳ ᡝᠮᡠ ᠮᠣᡵᠣ᠈ ᠪᠣᡳᡥᠣᠨ ᡝᠮᡠ ᠮᠣᡵᠣ᠈ ᠠᡵᡴᡳ ᡝᠮᡠ ᡥᡡᠨᡨᠠᡥᠠᠨ᠈ ᠶᠠᠯᡳ ᡝᠮᡠ ᠮᠣᡵᠣ ᡩᠣᠪᠣᡶᡳ᠈ ᡠᠯᠠ᠈ ᠶᡝᡥᡝ᠈ ᡥᠣᡳᡶᠠ᠈ ᡥᠠᡩᠠ ᠰᡳᡵᠠᠨ ᠰᡳᡵᠠᠨ ᡳ ᡤᠠᠰᡥᠴᠮᡝ ᡝᡵᡝᠴᡳ ᠠᠮᠠᠰᡳ ᠵᡠᡳ ᠪᡠᠮᡝ᠈ ᡠᡵᡠᠨ ᡤᠠᡳᠮᡝ ᠰᠠᡳᠨ ᠪᠠᠨᠵᡳᡵᠠᡴᡡ ᠣᠴᡳ᠈ ᡝᡵᡝ ᠰᡝᡤᡤᡳ ᡤᡝᠰᡝ ᠰᡝᡤᡤᡳ ᡨᡠᠴᡳᠮᡝ᠈ ᡝᡵᡝ ᠪᠣᡳᡥᠣᠨ ᡳ ᡤᡝᠰᡝ ᠪᠣᡳᡥᠣᠨ ᡩᡝ ᡠᠴᡠᠪᡠᠮᡝ᠈ ᡝᡵᡝ ᡤᡳᡵᠠᡤᡤᡳ ᡤᡝᠰᡝ ᡧᠠᡵᠠᠮᡝ ᠪᡠᠴᡝᡴᡳᠨᡳ᠈ ᡝᡵᡝ ᡤᡳᠰᡠᠨ ᡩᡝ ᡳᠰᡳᠪᡠᠮᡝ ᠵᡠᡳ ᠪᡠᠮᡝ ᡠᡵᡠᠨ ᡤᠠᡳᠮᡝ ᠰᠠᡳᠨ ᠪᠠᠨᠵᡳᠴᡳ᠈ ᡝᡵᡝ ᠶᠠᠯᡳ ᠪᡝ ᠵᡝᠮᡝ᠈ ᠠᡵᡴᡳ ᠪᡝ ᠣᠮᡳᠮᡝ ᠠᠨᡳᠶᠠ ᠰᡝ ᠠᠮᠪᡠᠯᠠ ᠪᠠᡥᠠᠮᡝ ᠪᠠᠨᠵᡳᡴᡳᠨᡳ ᠰᡝᠮᡝ ᡤᠠᠰᡥᡡᡥᠠ ᠮᠠᡤᡤᡳ᠈ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡤᠠᠰᡥᡡᠮᡝ ᠰᡠᡵᡝ ᠵᡠᡳ ᠪᡠᠮᡝ ᡠᡵᡠᠨ ᡤᠠᡳᠮᡝ ᡤᠠᠰᡥᡡᡥᠠ ᡤᡳᠰᡠᠨ ᡩᡝ ᡳᠰᡳᠪᡠᠮᡝ ᠰᠠᡳᠨ ᠪᠠᠨᠵᡳᠴᡳ ᠸᠠᠵᡳᡥᠠ᠈ ᡝᡵᡝ ᡤᡳᠰᡠᠨ ᡩᡝ ᡳᠰᡳᠪᡠᡵᠠᡴᡡ ᠣᡥᠣᡩᡝ᠈ ᠪᡳ ᡳᠯᠠᠨ ᠠᠨᡳᠶᠠ ᠣᡨᠣᠯᠣ ᡨᡠᠸᠠᠮᠪᡳ᠈ ᠰᠠᡳᠨ ᠪᠠᠨᠵᡳᡨᠠᡴᡡ ᠣᠴᡳ᠈ ᡩᠠᡳᠯᠠᠮᠪᡳ ᠰᡝᠮᡝ ᡥᡝᠨᡩᡠᠮᡝ ᡤᠠᠰᡥᡡᡥᠠ᠉ ᡨᡠᡨᡨᡠ ᡤᠠᠰᡥᡡᡥᠠ ᡤᡳᠰᡠᠨ ᠪᡝ ᡠᡝᡥᡝᡳ ᠨᠠᡵᡳᠮᠪᠣᠯᠣ ᠪᡝᡳᠯᡝ ᡤᡡᠸᠠᠯᡳᠶᠠᡶᡳ᠈ ᠰᡠᡵᡝ ᠪᡝᡳᠯᡝ ᡩᡝ ᠸᡝᡳᠯᡝᡤᡤᡝ ᠮᠣᡤᡤᠣ ᡤᡠᡵᡠᠨ ᠴᡳ ᠰᠣᠣᠰᠠᡶᡳ ᠮᡠᡥᠠᠯᡳᠶᠠᠨ ᡳ ᡤᡝᠪᡠᡤᡤᡝ ᠨᡳᠶᠠᠯᠮᠠ ᡩᡝᡥᡳ ᠮᠣᡨᡳᠨ ᠪᡝ ᡩᡠᡵᡳᠮᡝ ᡤᠠᡳᡶᡳ᠈ ᠮᡠᡥᠠᠯᡳᠶᠠᠨ ᠪᡝ ᠶᠠᡶᠠᡶᡳ ᠮᠣᡵᡳᠨ ᡳ ᡝᠵᡝᠨ ᠮᠣᡤᡤᠣ ᡩᡝ ᠪᡠᡥᡝ᠉ ᠵᠠᡳ ᠪᡠᠮᠪᡳ ᠰᡝᠮᡝ ᡤᡳᠰᡠᡵᡝᡥᡝ ᡤᡳᠨᡨᠠᡳᠰᡳ ᠪᡝᡳᠯᡝᡳ ᠰᠠᡵᡤᠠᠨ ᠵᡠᡳ ᠪᡝ ᠮᠣᡤᡤᠣᡳ ᡤᠠᠯᡴᠠᡳ ᡨᠠᡨᠠᠨ ᡳ ᠵᠠᡳᠰᠠᡳ ᠪᡝᡳᠯᡝ ᡩᡝ ᠪᡠᡥᡝ᠉ ᡨᡝᡵᡝᠴᡳ ᠰᡠᡵᡝ ᠪᡝᡳᠯᡝᡳ ᡠᡤᡤᡳᡥᡝ᠈ ᡠᠯᠠ ᡳ ᡤᡠᡵᡠᠨ ᡳ ᠪᡠᠵᠠᠨᡨᡳᠠ ᠪᡝᡳᠯᡝ᠈ ᠮᠠᠨᡨᠠᡳ ᠪᡝᡳᠯᡝ ᠰᠠᡵᡤᠠᠨ ᡩᡠᡩᡠᡥᡠ ᡶᡠᠵᡳᠨ ᡳ ᠶᠠᡩᠠᡥᠠ ᠰᡳᡵᡳᠨ ᡳ ᠮᠠᡳᡨᡠ ᠪᡝ ᠶᡝᡥᡝᡳ ᠨᠠᡵᡳᠮᠪᠣᠯᠣ ᠪᡝᡳᠯᡝ ᡩᡝ ᠪᡝᠨᡝᠮᡝ ᡝᠯᠴᡳᠨ ᡨᠠᡴᡡᡵᠠᡶᡳ᠈ ᠰᡠᡵᡝ ᠪᡝᡳᠯᡝᡳ ᡥᠠᡵᠠᡤᡤᠠ ᠸᠠᡵᡴᠠᡳ ᠠᡳᠮᠠᠨ ᡳ ᠠᠨᠴᡠᠯᠠᡴᡡ᠈ ᡩᠣᡵᡤᡳ ᠪᡳᡵᠠᡳ ᡤᠣᠯᠣᡳ ᠯᠣᡨᡠᠨ᠈ ᡤᠠᠰᡳᡨᡠᠨ᠈ ᠸᠠᡤᡤᡳᠨᡠ ᡝᡵᡝ ᡳᠯᠠᠨ ᡠᠵᡠ ᡳ ᠨᡳᠶᠠᠯᠮᠠ ᠪᡝ ᠪᡠᠮᡝ᠈ ᠶᡝᡥᡝᡳ ᡝᠯᠴᡳᠨ ᠪᡝ ᡤᠠᠮᠠᡶᡳ᠈ ᠠᠨᠴᡠᠯᠠᡴᡡ᠈ ᡩᠣᡵᡤᡳ ᠪᡳᡵᠠᡳ ᡤᠣᠯᠣ ᠪᡝ ᡩᠠᡥᠠᠪᡠᡥᠠ᠉ ᠰᡠᠸᠠᠶᠠᠨ ᡳᠨᡩᠠᡥᡡᠨ ᠠᠨᡳᠶᠠ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᠠᡥᡡᡤᡤᠠ ᠵᡠᡳ ᠴᡠᠶᠠᠨ ᡨᠠᡳᠵᡳ᠈ ᡶᡳᠶᠠᡤᡤᡡ ᡩᡝᠣ ᠪᠠᠠᠶᠠᡵᠠ ᡨᠠᡳᠵᡳ᠈ ᡬᠠᡬᠠᡳ ᠵᠠᡵᡤᡡᠴᡳ᠈ ᡶᡳᠶᠣᡤᡨᠣᠨ ᠵᠠᡵᡤᡡᠴᡳ ᡩᡝ ᡝᠮᡠ ᠮᡳᡤᡤᠠᠨ ᠴᠣᠣᡥᠠ ᠪᡝ ᠠᡶᠠᠪᡠᡶᡳ᠈ ᠠᠨᡳᠶᠠ ᠪᡳᠶᠠ ᡩᡝ ᠸᠠᡵᡴᠠ ᠠᡳᠮᠠᠨ ᡳ ᠠᠨᠴᡠᠯᠠᡴᡡ ᡤᠣᠯᠣ ᠪᡝ ᡩᠠᡳᠯᠠᠮᡝ ᡠᡤᡤᡳᡶᡳ᠈ ᡩᠣᠪᠣᡵᡳ ᡩᡠᠯᡳᠮᡝ ᡤᡝᠨᡝᡶᡳ ᠠᠨᠴᡠᠯᠠᡴᡡ ᡤᠣᠯᠣ ᠪᡝ ᠰᡠᠴᡠᡶᡳ ᡠᡵᡳᠨ ᡶᡠᠨᠴᡝᠮᡝ ᡤᠠᡧᠠᠨ ᠪᡝ ᡤᠠᡳᡶᡳ᠈ ᡨᡝᡵᡝ ᡤᠣᠯᠣᡳ ᠪᠠ ᠪᠠᡳ ᡤᠠᡧᠠᠨ ᠪᡝ ᡤᡝᠮᡠ ᡩᠠᡥᠠᠪᡠᡶᡳ ᡤᠠᠵᡳᡥᠠ᠉ ᠰᡠᡵᡝ ᠪᡝᡳᠯᡝ ᠵᡠᡳ ᠴᡠᠶᠠᠨ ᡨᠠᡳᠵᡳ ᠪᡝ ᡨᡠᡴᡳᠶᡝᠮᡝ ᡥᡡᡤ ᠪᠠᡨᡠᡵᡠ᠈ ᡩᡝᠣ ᠪᠠᠶᠠᡵᠠ ᡨᠠᡳᠵᡳ ᠪᡝ ᡨᡠᡴᡳᠶᡝᠮᡝ ᠵᠣᡵᡳᡴᡨᡠ ᠰᡝᠮᡝ ᡤᡝᠪᡠ ᠪᡠᡥᡝ᠈ ᡨᡝᡵᡝ ᠠᠨᡳᠶᠠ ᡥᠠᡩᠠᡳ ᡤᡠᡵᡠᠨ ᡳ ᠮᡝᡤᡤᡝᠪᡠᠯᡠ ᠪᡝᡳᠯᡝᡳ ᡨᡝᡥᡝ ᡥᡝᠴᡝᠨ ᡳ ᠠᠮᠠᡵᡤᡳ ᠪᡳᡵᡥᠠᠨ ᡩᡝ ᠰᡝᡤᡤᡳ ᡝᠶᡝᡥᡝ᠈ ᠵᠣᡵᡥᠣᠨ ᠪᡳᠶᠠ ᡩᡝ ᡠᠯᠠᡳ ᡤᡠᡵᡠᠨ ᡳ ᠪᡠᠵᠠᠨᡨᠠᡳ ᠪᡝᡳᠯᡝ ᡳᠯᠠᠨ ᡨᠠᡤᡤᡡ ᠨᡳᠶᠠᠯᠮᠠ ᠪᡝ ᡤᠠᡳᡶᡳ᠈ ᡠᠵᡳᡥᡝ ᠠᠮᠠ ᠰᡝᠮᡝ ᡨᠠᡳᡯᡠ ᡩᡝ ᡥᡝᡤᡴᡳᠯᡝᡵᡝ ᠵᡳᡥᡝ ᠮᠠᡤᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᡩᡝᠣ ᡧᡠᡵᡤᠠᠴᡳ ᠪᡝᡳᠯᡝᡳ ᠰᠠᡵᡤᠠᠨ ᠵᡠᡳ ᡳᠰᡳᡨᠠᡳ ᡤᡝᡤᡝ ᠪᡝ ᠰᠠᡵᡤᠠᠨ ᠪᡠᡶᡳ᠈ ᠰᡠᠰᠠᡳ ᡠᡴᠰᡳᠨ᠈ ᠵᡠᠸᠠᠨ ᡝᠵᡝᡥᡝ ᡶᡠᡩᡝᠮᡝ ᠪᡠᡶᡳ ᡩᠣᡵᠣᠯᠣᠮᡝ ᠪᡝᠨᡝᡥᡝ᠉
ᠰᠣᡥᠣᠨ ᡠᠯᡤᡳᠶᠠᠨ ᠠᠨᡳᠶᠠ᠈ ᠠᠨᡳᠶᠠ ᠪᡳᠶᠠ ᡩᡝ᠈ ᡩᡝᡵᡤᡳ ᠮᡝᡩᡝᡵᡳ ᠸᡝᠵᡝᡳ ᠠᡳᠮᠠᠨ ᡳ ᡥᡡᡵᡤᠠᡳ ᡤᠣᠯᠣᡳ ᠸᠠᠩᡤᡝ᠈ ᠵᠠᠩᡤᡝ ᡤᡝᠪᡠᠩᡤᡝ ᠵᡠᠸᡝ ᠠᠮᠪᠠᠨ ᡨᠠᠩᡤᡡ ᠨᡳᠶᠠᠯᠮᠠ ᠪᡝ ᡤᠠᡳᡶᡳ᠈ ᠰᠠᡥᠠᠯᡳᠶᠠᠨ᠈ ᡧᠠᠩᡤᡤᡳᠶᠠᠨ᠈ ᡶᡠᠯᡤᡳᠶᠠᠨ ᡳᠯᠠᠨ ᡥᠠᠴᡳᠨ ᡳ ᡨᠣᠪᡳᡥᡳ᠈ ᠰᠠᡥᠠᠯᡳᠶᠠᠨ᠈ ᡧᠠᠩᡤᡳᠶᠠᠨ ᠰᡝᡴᡝ ᠪᡝᠨᠵᡳᠮᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᡥᡝᠩᡴᡳᠯᡝᠮᡝ ᠵᡳᡥᡝ᠉ ᡨᡝᡵᡝᠴᡳ ᠸᡝᠵᡝᡳ ᠠᡳᠮᠠᠨ ᡳ ᡥᡡᡵᡤᠠᡳ ᠨᡳᠶᠠᠯᠮᠠ ᠠᠨᡳᠶᠠ ᡩᠠᡵᡳ ᡥᡝᠩᡴᡳᠯᡝᠮᡝ ᠵᡳᠮᡝ᠈ ᠪᠣᠵᡳᡵᡳ ᡤᡝᠪᡠᠩᡤᡝ ᠠᠮᠪᠠᠨ ᡠᠵᡠᠯᠠᡶᡳ᠈ ᠰᠠᡵᡤᠠᠨ ᡤᠠᡳᡴᡳ ᠰᡝᡵᡝ ᠵᠠᡴᠠᡩᡝ᠈ ᡤᡠᡵᡠᠨ ᡳ ᠠᠮᠪᠠᠰᠠᡳ ᠨᡳᠩᡤᡠᠨ ᠰᠠᡵᡤᠠᠨ ᠵᡠᡳ ᠪᡝ ᡠᠵᡠᠯᠠᡥᠠ ᠨᡳᠩᡤᡠᠨ ᠠᠮᠪᠠᠨ ᡩᡝ ᠰᠠᡵᡤᠠᠨ ᠵᡠᡳ ᠪᡠᡶᡳ᠈ ᠨᡳᠶᠠᠯᠮᠠᡳ ᠮᡠᠵᡳᠯᡝᠨ ᠪᡝ ᡝᠯᠪᡳᡥᡝ᠉ ᠵᡠᠸᡝ ᠪᡳᠶᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠮᠣᠩᡤᠣ ᠪᡳᡨᡥᡝ ᠪᡝ ᡴᡡᠪᡠᠯᡳᠮᡝ᠈ ᠮᠠᠨᠵᡠ ᡤᡳᠰᡠᠨ ᡳ ᠠᡵᠠᡴᡳ ᠰᡝᠴᡳ᠈ ᡝᡵᡩᡝᠨᡳ ᠪᠠᡴᠰᡳ᠈ ᡤ’ᠠᡤ’ᠠᡳ ᠵᠠᡵᡤᡡᠴᡳ ᡥᡝᠨᡩᡠᠮᡝ᠈ ᠪᡝ ᠮᠣᠩᡤᠣᡳ ᠪᡳᡨᡥᡝ ᠪᡝ ᡨᠠᠴᡳᡥᠠ ᡩᠠᡥᠠᠮᡝ ᠰᠠᠮᠪᡳ᠈ ᡨᡝᡵᡝ ᠵᡠᠯᡤᡝᠴᡳ ᠵᡳᡥᡝ ᠪᡳᡨᡥᡝ ᠪᡝ᠈ ᡨᡝ ᠠᡩᠠᡵᠠᠮᡝ ᡴᡡᠪᡠᠯᡳᠪᡠᠮᠪᡳ ᠰᡝᠮᡝ ᠮᠠᡵᠠᠮᡝ ᡤᡳᠰᡠᡵᡝᠴᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠨᡳᡴᠠᠨ ᡤᡠᡵᡠᠨ ᡳ ᠪᡳᡨᡥᡝᠪᡝ ᡥᡡᠯᠠᠴᡳ᠈ ᠨᡳᡴᠠᠨ ᠪᡳᡨᡥᡝ ᠰᠠᡵᠠ ᠨᡳᠶᠠᠯᠮᠠ᠈ ᠰᠠᡵᡴᡡ ᠨᡳᠶᠠᠯᠮᠠ ᡤᡝᠮᡠ ᡠᠯᡥᡳᠮᠪᡳ᠉ ᠮᠣᠩᡤᠣ ᡤᡠᡵᡠᠨ ᡳ ᠪᡳᡨᡥᡝ ᠪᡝ ᡥᡡᠯᠠᠴᡳ᠈ ᠪᡳᡨᡥᡝ ᠰᠠᡵᡴᡡ ᠨᡳᠶᠠᠯᠮᠠ ᡳᠨᡠ ᡤᡝᠮᡠ ᡠᠯᡥᡳᠮᠪᡳ ᡴᠠᡳ᠉ ᠮᡠᠰᡝᡳ ᠪᡳᡨᡥᡝ ᠪᡝ ᠮᠣᠩᡤᠣᡵᠣᠮᡝ ᡥᡡᠯᠠᠴᡳ᠈ ᠮᡠᠰᡝᡳ ᡤᡠᡵᡠᠨ ᡳ ᠪᡳᡨᡥᡝ ᠰᠠᡵᡴᡡ ᠨᡳᠶᠠᠯᠮᠠ ᡠᠯᡥᡳᡵᠠᡴᡡ ᡴᠠᡳ᠉ ᠮᡠᠰᡝᡳ ᡤᡠᡵᡠᠨ ᡳ ᡤᡳᠰᡠᠨ ᡳ ᠠᡵᠠᠴᡳ ᠠᡩᠠᡵᠠᠮᡝ ᠮᠠᠩᡤᠠ᠈ ᡝᠨᠴᡠ ᠮᠣᠩᡤᠣ ᡤᡠᡵᡠᠨ ᡳ ᡤᡳᠰᡠᠨ ᠠᡩᠠᡵᠠᠮᡝ ᠵᠠ ᠰᡝᠮᡝ ᡥᡝᠨᡩᡠᠴᡳ᠈ ᡤ’ᠠᡤ’ᠠᡳ ᠵᠠᡵᡤᡡᠴᡳ᠈ ᡝᡵᡩᡝᠨᡳ ᠪᠠᡴᠰᡳ ᠵᠠᠪᡠᠮᡝ᠈ ᠮᡠᠰᡝᡳ ᡤᡠᡵᡠᠨ ᡳ ᡤᡳᠰᡠᠨ ᡳ ᠠᡵᠠᠴᡳ ᠰᠠᡳᠨ ᠮᡠᠵᠠᠩᡤᠠ᠈ ᡴᡡᠪᡠᠯᡳᠮᡝ ᠠᡵᠠᡵᠠ ᠪᡝ᠈ ᠮᡝᠨᡳ ᡩᠣᠯᠣ ᠪᠠᡥᠠᠨᠠᡵᠠᡴᡡ ᠣᡶᡳ ᠮᠠᡵᠠᠮᠪᡳ ᡩᡝᡵᡝ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠠ ᠰᡝᡵᡝ ᡥᡝᡵᡤᡝᠨ ᠠᡵᠠ᠈ ᠠ ᡳ ᡶᡝᠵᡳᠯᡝ ᠮᠠ ᠰᡳᠨᡩᠠᠴᡳ᠈ ᠠᠮᠠ ᠸᠠᡴᠠᠣ᠈ ᡝ ᠰᡝᡵᡝ ᡥᡝᡵᡤᡝᠨ ᠠᡵᠠ᠈ ᡝ ᡳ ᡶᡝᠵᡳᠯᡝ ᠮᡝ ᠰᡳᠨᡩᠠᠴᡳ᠈ ᡝᠮᡝ ᠸᠠᡴᠠᠣ᠈ ᠮᡳᠨᡳ ᡩᠣᠯᠣ ᡤᡡᠨᡳᠮᡝ ᠸᠠᠵᡳᡥᠠ᠉ ᠰᡠᠸᡝ ᠠᡵᠠᠮᡝ ᡨᡠᡶᡳ ᠣᠮᠪᡳ ᡴᠠᡳ ᠰᡝᠮᡝ᠈ ᡝᠮᡥᡠᠨ ᠮᠠᡵᠠᠮᡝ ᠮᠣᠩᡤᠣᡵᠣᠮᡝ ᡥᡡᠯᠠᡵᠠ ᠪᡳᡨᡥᡝ ᠪᡝ ᠪᠠᠨᠵᠣ ᡤᡳᠰᡠᠨ ᡳ ᡴᡡᠪᡠᠯᡳᠪᡠᡥᠠ᠉ ᡨᡝᡵᡝᠴᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠮᠠᠨᠵᡠ ᠪᡳᡨᡥᡝ ᠪᡝ ᡶᡠᡴᠵᡳᠨ ᡩᡝᡵᡳᠪᡠᡶᡳ᠈ ᠮᠠᠨᠵᡠ ᡤᡠᡵᡠᠨ ᡩᡝ ᠰᡝᠯᡤᡳᠶᡝᡥᡝ᠉ ᡳᠯᠠᠨ ᠪᡳᠶᠠ ᡩᡝ᠈ ᠠᡳᠰᡳᠨ ᠮᡝᠩᡤᡠᠨ ᡶᡝᡨᠠᠮᡝ ᡠᡵᡝᠪᡠᠮᡝ᠈ ᠰᡝᠯᡝ ᠸᡝᡵᡝᠮᡝ ᡠᡵᡝᠪᡠᠮᡝ ᡩᡝᡵᡳᠪᡠᡥᡝ᠉ ᡨᡝᡵᡝ ᡶᠣᠨᡩᡝ᠈ ᡥᠠᡩᠠᡳ ᡤᡠᡵᡠᠨ ᡳ ᠮᡝᠩᡤᡝᠪᡠᠯᡠ ᠪᡝᡳᠯᡝ᠈ ᠶᡝᡥᡝᡳ ᠨᠠᡵᡳᠨᠪᠣᠯᠣ ᠪᡝᡳᠯᡝ ᡩᡝ ᡩᠠᡳᠨ ᠣᡶᡳ ᡝᠯᠵᡝᠴᡳ ᡝᡨᡝᡵᠠᡴᡡ ᠰᡝᠮᡝ᠈ ᠮᡝᠩᡤᡝᠪᡠᠯᡠ ᠪᡝᡳᠯᡝ ᡳᠨᡳ ᡳᠯᠠᠨ ᠵᡠᡳ ᠪᡝ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᡩᠠᠮᡨᡠᠨ ᠪᡝᠨᠵᡳᡶᡳ᠈ ᠴᠣᠣᡥᠠ ᠪᠠᡳᡥᠠ ᠮᠠᠩᡤᡳ᠉ ᡨᠠᡳᡯᡠ ᠰᡠᡵᡝ ᠪᡳᡝᠯᡝ ᡳᠨᡳ ᡶᡳᠣᠩᡩᠣᠨ ᠵᠠᡵᡤᡡᠴᡳ᠈ ᡤ’ᠠᡤ’ᠠᡳ ᠵᠠᡵᡤᡡᠴᡳ ᠵᡠᠸᡝ ᠠᠮᠪᠠᠨ ᡩᡝ᠈ ᠵᡠᠸᡝ ᠮᡳᠩᡤᠠᠨ ᠴᠣᠣᡥᠠ ᠪᡝ ᠠᡶᠠᡦᡠᡶᡳ᠈ ᡥᠠᡩᠠᡳ ᡤᡠᡵᡠᠨᠨ ᡩᡝ ᡩᠠᠮᡝ᠈ ᠴᠣᠣᡥᠠ ᡨᡝᠪᡠᠮᡝ ᡠᠩᡤᡳᡥᡝ᠉ ᡨᡝᡵᡝᠪᡝ ᠶᡝᡥᡝᡳ ᠨᠠᡵᡳᠮᠪᠣᠯᠣ ᠪᡝᡳᠯᡝ ᡩᠣᠨᠵᡳᡶᡳ᠈ ᡩᠠᡳᠮᡳᠩ ᡤᡠᡵᡠᠨ -ᡳ ᡴ’ᠠᡳ ᠶᡠᠸᠠᠨ ᡥᡝᠴᡝᠨ ᡳ ᡨᡠᠩᠰᡝ ᡩᡝ ᠪᡳᡨᡥᡝ ᠶᠠᡶᠠᠪᡠᡶᡳ᠈ ᡥᠠᡩᠠ ᡩᡝ ᡠᠩᡤᡳᡶᡳ᠈ ᠮᠠᠨᠵᡠ ᡤᡠᡵᡠᠨ ᡳ ᡩᠠᠮᡝ ᠵᡳᡥᡝ ᠴᠣᠣᡥᠠ ᠠᠮᠪᠠᠰᠠ ᠪᡝ ᠵᠠᡶᠠᡶᡳ ᠰᡳᠨᡳ ᡩᠠᠮᡨᡠᠨ ᠪᡝᠨᡝᡥᡝ᠉ ᡳᠯᠨᠠ ᠵᡠᡳ ᠪᡝ ᠵᠣᠣᠯᡳᠮᡝ ᡤᠠᡳᡶᡳ᠈ ᠵᡠᠸᡝ ᠮᡳᠩᡤᠠᠨ ᠴᠣᠣᡥᠠ ᠪᡝ ᡤᡝᠮᡠ ᠸᠠ᠉ ᡨᡠᡨᡨᡠ ᠣᡥᠣ ᡩᡝ᠈ ᠰᡳᠨᡳ ᡤᠠᠵᡳ ᠰᡝᡥᡝ ᠰᠠᡵᡤᠠᠨ ᠵᡠᡳ ᠪᡝ ᠰᡳᠨᡩᠠ ᠰᠠᡵᡤᠠᠨ ᠪᡠᡵᡝ᠈ ᠮᡠᠰᡝᡳ ᠵᡠᠸᡝ ᡤᡠᡵᡠᠨ ᡩᠠᠰᠠᠮᡝ ᠠᠴᠠᡶᡳ ᠰᠠᡳᠨ ᠪᠠᠨᠵᡳᡴᡳ ᠰᡝᡵᡝ ᠵᠠᡴᠠᡩᡝ᠈ ᡥᠠᡩᠠᡳ ᠮᡝᠩᡤᡝᠪᡠᠯᡠ ᠪᡝᡳᠯᡝ ᡨᡝᡵᡝ ᡤᡳᠰᡠᠨ ᡩᡝ ᡩᠣᠰᡳᡶᡳ᠈ ᠶᡝᡥᡝᡳ ᠨᡳᠶᠠᠯᠮᠠ ᠪᡝ ᡩᠠᡳᠮᡳᠩ ᡤᡠᡵᡠᠨ ᡳ ᡴ’ᠠᡳ ᠶᡠᠸᠠᠨ ᡥᡝᠴᡝᠨ ᡩᡝ ᠪᠣᠯᠵᠣᡶᡳ᠈ ᡳᠨᡳ ᠵᡠᠸᡝ ᠰᠠᡵᡤᠠᠨ ᠪᡝ ᡠᠩᡤᡳᡶᡳ ᡤᡳᠰᡠᡵᡝᡥᡝ ᠪᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᠣᠨᠵᡳᡶᡳ᠈ ᡠᠶᡠᠨ ᠪᡳᠶᠠ ᡩᡝ ᡥᠠᡩᠠᡳ ᡤᡠᡵᡠᠨ ᠪᡝ ᡩᠠᡳᠯᠠᠮᡝ ᠴᠣᠣᡥᠠ ᡤᡝᠨᡝᡵᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡩᡝᠣ᠈ ᡧᡠᡵᡤᠠᠴᡳ ᠪᡝᡳᠯᡝ ᡥᡝᠨᡩᡠᠮᡝ᠈ ᠮᡳᠮᠪᡝ ᡝᠮᡠ ᡩᠠᡳᠨ ᡩᡝ ᠵᡠᠯᡝᡵᡳ ᠠᡶᠠᠪᡠᠮᡝ ᡨᡠᠸᠠᠴᡳᠨᠠ ᠰᡝᡥᡝ ᠮᠠᠩᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ᠈ ᡳᠨᡳ ᡩᡝᠣ ᡩᡝ ᠮᡳᠩᡤᠠᠨ ᠴᠣᠣᡥᠠ ᠪᡝ ᠠᡶᠠᠪᡠᡶᡳ ᠵᡠᠯᠸᡝᡳ ᠠᡶᠠᡵᠠ ᡩᡝ ᠣᠪᡠᡶᡳ ᠴᠣᠣᡥᠠ ᡤᡝᠨᡝᠮᡝ᠈ ᡥᠠᡩᠠᡳ ᡤᡠᡵᡠᠨ ᡩᡝ ᡳᠰᡳᠨᠠᡥᠠ ᠮᠠᠩᡤᡳ᠉ ᡥᠠᡩᠠᡳ ᡤᡠᡵᡠᠨ ᡳ ᠴᠣᠣᡥᠠ ᡥᡝᠴᡝᠨ ᡨᡠᠴᡳᡶᡳ ᠣᡴᡩᠣᡴᠣ᠈ ᡨᡝᡵᡝᠪᡝ ᠵᡠᠯᡝᡵᡳ ᠠᡶᠠᡵᠠ ᡩᡝ ᠣᠪᡠᡥᠠ ᡧᡠᡵᡤᠠᠴᡳ ᠪᡝᡳᠯᡝ ᠰᠠᠪᡠᡶᡳ ᠠᡶᠠᡵᠠᡴᡡ ᠴᠣᠣᡥᠠ ᡳᠯᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠪᠠᡵᡠ ᡥᡝᠨᡩᡠᠮᡝ᠈ ᠪᠠᡨᠠᡳ ᠴᠣᠣᡥᠠ ᡨᡠᠴᡳᡶᡳ ᠣᡴᡩᠣᡴᠣ ᠪᡳ ᠰᡝᡥᡝ ᠮᠠᠩᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᡝᡵᡝ ᡥᠠᡩᠠᡳ ᡩᡝ ᠴᠣᠣᡥᠠ ᠠᡴᡡ ᠰᡝᠮᡝ ᠵᡳᡥᡝᠪᡳᠣ᠈ ᠰᡳᠨᡳ ᠴᠣᠣᡥᠠ ᠵᠠᡳᠯᠠ ᠰᡝᠮᡝ ᡥᡝᠨᡩᡠᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠴᠣᠣᡥᠠ ᡤᠠᡳᡶᡳ᠈ ᡩᠣᠰᡳᠮᡝ ᡤᡝᠨᡝᡵᡝ ᡩᡝ᠈ ᡩᡝᠣ ᡳ ᠵᡠᠯᡝᡵᡤᡳ ᠮᡳᠩᡤᠠᠨ ᠴᠣᠣᡥᠠ ᠵᡠᡤᡡᠨ ᠪᡝ ᡩᠠᠯᡳᠮᡝ ᠶᠠᡴᠰᡳᠮᡝ ᡳᠯᡳᡶᡳ ᡧᠣᠯᠣ ᠪᠠᡥᠠᡵᠠᡴᡡ᠉ ᡥᠣᡨᠣᠨ ᡳ ᡥᡳᠰᡥᠠᠮᡝ ᡤᡝᠨᡝᡵᡝ ᡥᠣᡨᠣᠨ ᡳ ᡩᡝᡵᡤᡳ ᠨᡳᠶᠠᠯᠮᠠᡳ ᡤᠠᠪᡨᠠᡵᠠ ᡩᡝ ᠴᠣᠣᡥᠠᡳ ᠨᡳᠶᠠᠯᠮᠠ ᠠᠮᠪᡠᠯᠠ ᡶᡝᠶᡝ ᠪᠠᡥᠠ᠉ ᡨᡝᡵᡝᠴᡳ ᡠᠶᡠᠨ ᠪᡳᠶᠠᡳ ᡳᠴᡝ ᠨᠠᡩᠠᠨ ᡳ ᡳᠨᡝᠩᡤᡳ᠈ ᡥᠠᡩᠠᡳ ᡥᠣᡨᠣᠨ ᠪᡝ ᠠᡶᠠᠮᡝ ᡤᠠᡳᡥᠠ᠉ ᡥᠠᡩᠠᡳ ᡤᡠᡵᡠ ᡳ ᡝᠵᡝᠨ ᠮᡝᠩᡤᡝᠪᡠᠯᡠ ᠪᡝᡳᠯᡝ ᠪᡝ᠈ ᠶᠠᠩᡤᡠᡵᡳ ᡤᡝᠪᡠᠩᡤᡝ ᠠᠮᠪᠠᠨ ᡤᡳᡩᠠᠮᡝ ᠸᡝᡳᡥᡠᠨ ᠵᠠᡶᠠᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᠠᠯᠠᠨᠵᡳᡵᡝ ᠵᠠᡴᠠᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡠᠮᡝ ᠸᠠᡵᠠ ᠰᡝᠮᡝ ᡥᡝᠨᡩᡠᡶᡳ᠈ ᠮᡝᠩᡤᡝᠪᡠᠯᡠ ᠪᡝᡳᠯᡝ ᠪᡝ ᡤᠠᠨᠠᠪᡠᡶᡳ ᠨᡳᠶᠠᡴᡡᡵᠠᠪᡠᡶᡳ ᠠᠴᠠᠮᡝ ᠸᠠᠵᡳᡥᠠ ᠮᠠᠩᡤᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᠪᡝᠶᡝᡩᡝ ᡝᡨᡠᡥᡝ ᠰᡝᡴᡝᡳ ᠮᠠᡥᠠᠯᠠ ᠶᠠᡵᡥᠠᡳ ᡩᡝᡥᡝᠯᡝᠨ ᠪᡝ ᡝᡨᡠᠪᡠᡶᡳ ᡠᠵᡳᡥᡝ᠉ ᡨᡝᡵᡝᠴᡳ ᡥᠠᡩᠠᡳ ᡤᡠᡵᡠᠨ ᡳ ᠪᠠ ᠪᠠᡳ ᡥᡝᠴᡝᠨ ᡥᠣᡨᠣᠨ ᠪᡝ ᡤᡝᠮᡠ ᡩᠠᡥᠠᠪᡠᡶᡳ᠈ ᠴᠣᠣᡥᠠ ᠨᡳᠶᠠᠯᠮᠠᡳ ᡩᠠᡳᠨ ᡳ ᠠᡤᡡᡵᠠ ᠪᡝ ᡠᠮᠠᡳ ᡤᠠᡳᡥᠠᡴᡡ᠈ ᡝᡵᡤᡝᠨ ᡳ ᠠᡳ ᠠᡳ ᠵᠠᡴᠠ ᠪᡝ ᠨᡝᠴᡳᡥᡝᡴᡡ᠈ ᡝᡳᡤᡝᠨ ᠰᠠᡵᡤᠠᠨ ᠪᡝ ᡶᠠᡴᠰᠠᠯᠠᡥᠠᡴᡡ᠈ ᠶᠣᠣᠨᡳ ᠪᠣᡳᡤᠣᠨ ᠠᡵᠠᡶᡳ ᡤᠠᠵᡳᠮᡝ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᡨᡝᡵᡝᠴᡳ ᡥᠠᡩᠠᡳ ᡤᡠᡵᡠᠨ ᡠᠮᡠᠰᡳ ᡤᡠᡤᡠᡥᡝ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ᠈ ᠮᡝᠩᡤᡝᠪᡠᠯᡠ ᠪᡝᡳᠯᡝ ᡩᡝ᠈ ᡳᠨᡳ ᠰᠠᡵᡤᠠᠨ ᠵᡠᡳ ᠪᡝ ᠪᡠᡶᡳ᠈ ᡳᠨᡳ ᠪᠠᡩᡝ ᡠᠩᡤᡳᡴᡳ ᠰᡝᠮᡝ ᠪᡳᠰᡳᡵᡝ ᡩᡝ᠈ ᠮᡝᠩᡤᡝᠪᡠᠯᡠ ᠪᡝᡳᠯᡝ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡥᡡᠸᠠᡳ ᡩᠣᡵᡤᡳ ᠰᡠᠯᠠ ᡥᡝᡥᡝ ᡩᡝ ᠯᠠᡨᡠᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠰᠣᠣᡵᡳᠨ ᠪᡝ ᡩᡠᡵᡳᡴᡳ ᠰᡝᠮᡝ ᡤᡠᡵᡠᠨ ᡳ ᠠᠮᠪᠠᠨ ᡤ’ᠠᡤ’ᠠᡳ ᠵᠠᡵᡤᡡᠴᡳ ᡩᡝ ᡥᡝᠪᡝ ᠠᡵᠠᡥᠠ ᠪᡝ ᠰᡝᡵᡝᠴᡳ᠈ ᠮᡝᠩᡤᡝᠪᡠᠯᡠ ᠪᡝᡳᠯᡝ᠈ ᡤ’ᠠᡤ’ᠠᡳ ᠵᠠᡵᡤᡡᠴᡳ ᠈ ᠯᠠᡨᡠᡥᠠ ᡥᡝᡥᡝ ᠪᡝ ᡤᡝᠮᡠ ᠸᠠᡥᠠ᠉ ᡧᠠᡥᡡᠨ ᡳᡥᠠᠨ ᠠᠨᡳᠶᠠ᠈ ᠠᠨᡳᠶᠠ ᠪᡳᠶᠠ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ᠈ ᠮᡝᠩᡤᡝᠪᡠᠯᡠ ᠪᡝᡳᠯᡝ ᡩᡝ ᠪᡠᠮᠪᡳ ᠰᡝᠮᡝ ᡤᡳᠰᡠᡵᡝᡥᡝ᠉ ᡳᠨᡳ ᠰᠠᡵᡤᠠᠨ ᠵᡠᡳ ᠮᠠᠩᡤᡡᠵᡳ ᡤᡝᡤᡝ ᠪᡝ ᠮᡝᠩᡤᡝᠪᡠᠯᡠ ᠪᡝᡳᠯᡝᡳ ᠵᡠᡳ ᡠᡵᡤᡡᡩᠠᡳ ᡩᡝ ᠪᡠᡶᡳ᠈ ᡥᠣᠵᡳᡤᠣᠨ ᠣᠪᡠᡥᠠ᠉ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨᠯᡳ ᡥᠠᠨ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᠪᠠᠨᠵᡳᡵᡝ ᠪᡝ ᠶᡝᠪᡝᡧᡝᡵᠠᡴᡡ᠈ ᠰᡳ ᡥᠠᡩᠠᡳ ᡤᡠᡵᡠᠨ ᠪᡝ ᠠᡳᠨᡠ ᡝᡶᡠᠯᡝᡶᡳ ᡤᠠᠮᠠᡥᠠ᠈ ᡨᡝ ᠪᡳᠴᡳᠪᡝ ᡠᡵᡤᡡᡩᠠᡳ ᠪᡝ ᡳᠨᡳ ᠪᠠᡩᡝ ᠠᠮᠠᠰᡳ ᡠᠩᡤᡳ ᠰᡝᠮᡝ ᡝᡵᡤᡝᠯᡝᡥᡝ ᠮᠠᠩᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠸᠠᠨᠯᠶ ᡥᠠᠨ ᡳ ᡤᡳᠰᡠᠨ ᡩᡝ ᡝᡨᡝᡵᠠᡴᡡ᠈ ᡳᠨᡳ ᠵᡠᡳ ᡥᠣᠵᡳᡤᠣᠨ ᠵᡠᡧᡝᠨ ᡳᡵᡤᡝᠨ ᠪᡝ ᡥᠠᡩᠠᡳ ᠪᠠᡩᡝ ᡨᡝᠪᡠᠮᡝ ᡠᠩᡤᡳᡥᡝ ᠮᠠᠩᡤᡳ᠈ ᠶᡝᡥᡝᡳ ᡤᡠᡵᡠᠨ ᡳ ᠨᠠᡵᡳᠮᠪᠣᠯᠣ ᠪᡝᡳᠯᡝ ᠮᠣᠩᡤᠣᡳ ᠴᠣᠣᡥᠠ ᠪᡝ ᡤᠠᡳᡶᡳ᠈ ᡠᡩᡠᡩᡠ ᠵᡝᡵᡤᡳ ᠰᡠᠴᡠᡶᡳ ᡤᠠᠮᠠᡵᠠ ᠵᠠᡴᠠᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ᠈ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨᠯᡳ ᡥᠠᠨ-ᡳ ᠪᠠᡵᡠ᠈ ᠰᡳᠨᡳ ᡤᡳᡠᠰᠨ ᡳ ᠮᡳᠨᡳ ᠪᠠᡥᠠ ᡥᠠᡩᠠᡳ ᡤᡠᡵᡠᠨ ᠪᡝ ᡳᠨᡳ ᠪᠠᡩᡝ ᠠᠮᠠᠰᡳ ᡠᠩᡤᡳᡶᡳ ᡨᡝᠪᡠᡥᡝ᠈ ᡥᠠᡩᠠᡳ ᡤᡠᡵᡠᠨ ᠪᡝ ᠶᡝᡥᡝᡳ ᠨᡳᠶᠠᠯᠮᠠ ᡴᡝᠮᡠᠨᡳ ᠰᡠᠴᡠᡶᡳ ᡤᠠᠮᠠᠮᠪᡳ᠉ ᠮᡳᠨᡳ ᠪᠠᡥᠠ ᡤᡠᡵᡠᠨ ᠪᡝ ᠶᡝᡥᡝ ᡩᡝ ᠠᡳᠨᡠ ᠰᠠᠯᡳᠪᡠᠮᠪᡳ ᠰᡝᠮᡝ ᡤᡳᠰᡠᡵᡝᠴᡳ᠈ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨᠯᠶ ᡥᠠᠨ ᡠᠮᠠᡳ ᡩᠣᠨᠵᡳᡵᠠᡴᡡ᠉ ᡨᡝᡵᡝᠴᡳ ᡥᠠᡩᠠᡳ ᠨᡳᠶᠠᠯᠮᠠ ᠵᡝᡴᡠ ᠠᡴᡡ ᠶᡠᠶᡠᠮᡝ᠈ ᡩᠠᡳᠮᡳᠩ -ᠨᡳ ᡴ’ᠠᡳ ᠶᡠᠸᠠᠨ ᡥᡝᠴᡝᠨ ᡳ ᠨᡳᠶᠠᠯᠮᠠ ᡩᡝ ᠵᡝᡴᡠ ᠪᠠᡳᠴᡳ ᠪᡠᡥᡝ ᠠᡴᡡ᠈ ᠵᡠᠰᡝ ᠰᠠᡵᡤᠠᠨ᠈ ᠪᠣᠣᡳ ᠠᡥᠠ᠈ ᠮᠣᡵᡳᠨ ᡳᡥᠠᠨ ᠪᡝ ᡠᠨᠴᠠᡶᡳ ᠵᡝᡴᡠ ᡤᠠᡳᡶᡳ ᠵᡝᡴᡝ᠉ ᡨᡠᡨᡨᡠ ᠣᠵᠣᡵᠣ ᠵᠠᡴᠠᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠮᡳᠨᡳ ᠪᠠᡥᠠ ᡤᡠᡵᡠᠨ ᠪᡝ ᠠᡳᠨᡠ ᡶᠠᠴᠠᠪᡠᠮᠪᡳ ᠰᡝᠮᡝ ᡥᠠᡩᠠᡳ ᡤᡠᡵᡠᠨ ᠪᡝ ᡤᡝᠮᡠ ᠪᠠᡵᡤᡳᠶᠠᡶᡳ ᡤᠠᠵᡳᡥᠠ᠉ ᡨᡝᡵᡝ ᠠᠨᡳᠶᠠ ᠮᠠᠨᠵᡠ ᡤᡠᡵᡠᠨ ᡳ ᡨᡳᠠᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᡳᠰᠠᠪᡠᡥᠠ ᡤᡠᡵᡠᠨ ᠪᡝ ᡩᠠᠰᠠᠮᡝ᠈ ᡳᠯᠠᠨ ᡨᠠᠩᡤᡡ ᡥᠠᡥᠠ ᠪᡝ ᡝᠮᡠ ᠨᡳᡵᡠ ᠣᠪᡠᡶᡳ᠈ ᠨᡳᡵᡠ ᡨᠣᠮᡝ ᡝᠵᡝᠨ ᠰᡳᠨᡩᠠᡥᠠ᠉ ᡨᡝᡵᡝᡳ ᠣᠩᡤᠣᠯᠣ ᡩᠠᡳᠨ ᡩᠠᡳᠯᠠᠮᡝ᠈ ᠠᠮᠪᠠ ᠠᠮᠪᠠᠯᠠᡵᠠ ᡩᡝ ᡤᡝᡵᡝᠨ ᡴᠣᠮᠰᠣ ᠪᡝ ᠪᠣᡩᠣᡵᠠᡴᡡ/ ᡠᡴᠰᡠᠨ ᡠᡴᠰᡠᠨ ᡳ ᡤᠠᡧᠠᠨ ᡤᠠᡧᠠᠨ ᡳ ᠶᠠᠪᡠᠮᠪᡳᡥᡝ᠈ ᡩᡝ ᡨᡝ ᠮᠠᠨᠵᡠ ᡤᡠᡵᡠᠨ ᡳ ᠨᡳᠶᠠᠯᠮᠠ ᠠᠮᠪᠠ ᠠᠪᠠᠯᠠᠮᡝ᠈ ᠠᠮᠪᠠ ᠰᠠᡵᠠᠮᠪᡳᡥᡝ ᡩᡝ᠈ ᠨᡳᠶᠠᠯᠮᠠ ᡨᠣᠮᡝ ᠨᡳᡵᡠ ᠶᠠᡶᠠᡶᡳ᠈ ᠵᡠᠸᡝ ᠨᡳᠶᠠᠯᠮᠠ ᡩᡝ ᡝᠮᡠ ᡝᠵᡝᠨ ᠰᡳᠨᡩᠠᡶᡳ᠈ ᡨᡝᡵᡝ ᠵᡠᠸᠠᠨ ᠨᡳᠶᠠᠯᠮᠠ ᠪᡝ ᡴᠠᡩᠠᠯᠠᠮᡝ ᠮᡝᠨᡳ ᠮᡝᠨᡳ ᡨᡝᡳᠰᡠ ᠪᡝ ᠵᡠᡵᠴᡝᡵᠠᡴᡡ ᠶᠠᠪᡠᠮᠪᡳᡥᡝ᠉ ᡨᡝᡵᡝ ᠰᡳᠨᡩᠠᡥᠠ ᠨᡳᠶᠠᠯᠮᠠ ᠪᡝ ᠨᡳᡵᡠᡳ ᡝᠵᡝᠨ ᠰᡝᠮᠪᡳᡥᡝ᠈ ᡨᡠᡨᡨᡠ ᠣᡶᡳ᠈ ᡴᠠᡩᠠᠯᠠᡵᠠ ᡥᠠᡶᠠᠨ ᡳ ᡤᡝᠪᡠ ᡠᡨᡥᠠᡳ ᠨᡳᡵᡠᡳ ᡝᠵᡝᠨ ᡨᠣᡴᡨᠣᡥᠣ᠉ ᠣᠮᡧᠣᠨ ᠪᡳᠶᠠ ᡩᡝ᠈ ᡠᠯᠠᡳ ᡤᡠᡵᡠᠨ ᡳ ᠮᠠᠨᡨᠠᡳ ᠪᡝᡳᠯᡝᡳ ᠠᠪᠠᡥᠠᡳ ᡤᡝᠪᡠᠩᡤᡝ ᠰᠠᡵᡤᠠᠨ ᠵᡠᡳ ᠪᡝ ᡳᠨᡳ ᡝᠰᡥᡝᠨ ᠪᡠᠵᠠᠨᡨᠠᡳ ᠪᡝᡳᠯᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᠰᠠᡵᡤᠠᠨ ᠪᡝᠨᠵᡳᡵᡝ ᡩᡝ᠈ ᡩᠣᡵᠣᠯᠣᠮᡝ ᠣᡴᡩᠣᡶᡳ ᠠᠮᠪᠠ ᠰᠠᡵᡳᠨ ᠰᠠᡵᡳᠯᠠᠮᡝ ᡤᠠᡳᡥᠠ᠉ ᡠᠯᠠᡳ ᡤᡠᡵᡠᠨ ᡳ ᠪᡠᠵᠠᠨᡨᡳᠠ ᠪᡝᡳᠯᡝ᠈ ᠶᡝᡥᡝᡳ ᠪᡠᠵᠠᡳ ᠪᡝᡳᠯᡝ ᡳ ᠰᠠᡵᡤᠠᠨ ᠵᡳ ᠪᡝ ᡤᠠᡳᡴᡳ ᠰᡝᠮᡝ ᡤᡳᠰᡠᡵᡝᡶᡳ᠈ ᠵᡠᠸᠠᠨ ᠮᠣᡵᡳᠨ ᡩᡝ ᡝᠩᡤᡝᠮᡠ ᡥᠠᡩᠠᡳ ᡨᠣᡥᠣᡶᡳ᠈ ᠵᡠᠸᠠ ᡠᡴᠰᡳᠨ ᠰᠠᠴᠠ ᠠᠴᠠᡶᡳ ᠰᡝᡴᡳ ᠰᡳᠯᡠᠨ ᡳ ᡩᠠᡥᡡ ᠵᡠᠸᠠᠨ᠈ ᠵᡳᠪᠴᠠ ᠵᡠᠸᠠᠨ᠈ ᠨᡳᠩᡤᡠᠨ ᡨᡝᠮᡝᠨ᠈ ᠠᡳᠰᡳᠨ ᠵᡠᠸᠠᠨ ᠶᠠᠨ᠈ ᠮᡝᠩᡤᡠᠨ ᠵᡠᠸᠠᠨ ᠶᠠᠨ ᠶᠠᡶᠠᠨ ᠪᡠᡶᡳ᠈ ᠮᡳᠩᡤᠠᠨ ᠪᡝᡳᠯᡝ ᠪᠠᡥᠠᠮᡝ ᠵᠠᠪᡩᡠᡶᡳ᠈ ᠰᠠᡵᡤᠠᠨ ᠵᡠᡳ ᠪᡝ ᠪᡠᡵᠠᡴᡡ ᠣᠵᠣᡵᠣ ᠵᠠᡴᠠᡩᡝ᠈ ᠪᡠᠵᠠᠨᡨᠠᡳ ᠪᡝᡳᠯᡝ ᡤᡳᡵᡠᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᡤᡝᠯᡳ ᠰᠠᡵᡤᠠᠨ ᡤᠠᡳᡴᡳ ᠰᡝᠮᡝ ᠠᠮᠪᠠᠰᠠ ᠪᡝ ᡠᠩᡤᡳᡶᡳ ᠪᠠᡳᠮᡝ ᡥᡝᠨᡩᡠᠮᡝ᠈ ᠮᡳᠮᠪᡝ ᡩᠠᡳᠨ ᡩᡝ ᠶᠠᡶᠠᡶᡳ ᡠᠵᡳᡶᡳ ᡠᠯᠠᡳ ᡤᡠᡵᡠᠨ ᡩᡝ ᡝᠵᡝᠨ ᠣᠪᡠᡶᡳ᠈ ᠵᡠᡳ ᠪᡝ ᠰᠠᡵᡤᠠᠨ ᠪᡠᡥᡝ᠉ ᠠᠮᠠ ᠠᠮᡥᠠ ᡩᡝ ᡩᠣᠨᠵᡳᠪᡠᡥᠠ ᠠᡴᡡ᠈ ᠶᡝᡥᡝ᠈ ᠮᠣᠩᡤᠣ ᡩᡝ ᠰᠠᡵᡤᠠᠨ ᡤᠠᡳᡴᡳ ᠰᡝᠮᡝ ᡤᡳᠰᡠᡵᡝᡶᡳ᠈ ᠮᠣᠩᡤᠣ ᠶᠠᡩᠠᠨ ᡤᠠᡳᠮᡝ ᠵᠠᠪᡩᡠᡶᡳ ᠵᡠᡳ ᠪᡝ ᠪᡠᡥᡝᡴᡡ ᡴᡳᠶᠠᠩᡩᡠᠯᠠᡥᠠ᠉ ᡠᠵᡳᡥᡝ ᡩᠠᡥᠠᠮᡝ ᠮᡝᠨᡳ ᠸᠠᡴᠠ ᠪᡝ ᡤᡡᠨᡳᡵᠠᡴᡡ᠈ ᡨᡝ ᡝᠮᡠ ᠵᡠᡳ ᠪᡝ ᠪᡠᡥᡝ ᡩᡝ᠈ ᠰᡳᠨᡳ ᠵᡠᠸᡝ ᠵᡠᡳ ᠪᡝ ᡤᠠᡳᡶᡳ ᠠᠨᡳᠶᠠ ᡩᠠᡵᡳ ᠵᡠᡵᠴᡝᠮᡝ ᡥᡝᠩᡴᡳᠯᡝᠮᡝ ᠶᠠᠪᡠᡵᡝ ᠰᡝᠮᡝ ᠪᠠᡳᠮᡝ ᡤᡳᠰᡠᡵᡝᡥᡝ ᠮᠠᠩᡤᡳ᠉ ᠰᠠᡥᠠᡥᡡᠨ ᡤᡡᠯᠮᠠᡥᡡᠨ ᠠᠨᡳᠶᠠ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ᠈ ᡳᠨᡳ ᡩᡝᠣ ᡧᡠᡵᡤᠠᠴᡳ ᠪᡝᡳᠯᡝ ᠰᠠᡵᡤᠠᠨ ᠵᡠᡳ ᡠᠨᠵᡝ ᡤᡝᡤᡝ ᠪᡝ ᡤᡝᠯᡳ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝ ᡩᡝ ᠪᡠᠮᡝ᠈ ᠠᠮᠪᠠᠰᠠ ᠪᡝ ᡨᠠᡴᡡᡵᠠᡶᡳ ᡩᠣᡵᠣᠯᠣᠮᡝ ᠪᡝᠨᡝᡥᡝ᠉ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡳᠨᡳ ᡨᡝᡥᡝ ᡥᡡᠯᠠᠨ ᡥᠠᡩᠠᡳ ᠵᡠᠯᡝᡵᡤᡳ ᠠᠯᠠ ᠴᡳ ᡤᡠᡵᡳᡶᡳ᠈ ᠮᠠᡶᠠᡳ ᡨᡝᡥᡝ ᠰᡠᠰᡠ ᠰᡠᡴᠰᡠᡥᡠ ᠪᡳᡵᠠ᠈ ᡤᡳᠶᠠᡥᠠ ᠪᡳᡵᠠ ᠵᡠᠸᡝ ᠰᡳᡩᠠᠨ ᡳ ᡥᡝᡨᡠ ᠠᠯᠠ ᡩᡝ ᡤᡠᡵᡳᡶᡳ ᡥᡝᠴᡝᠨ ᠰᠠᡥᠠᡶᡳ ᡨᡝᡥᡝ᠉ ᡥᡝᠴᡝᠨ ᠸᡝᡳᠯᡝᡵᡝ ᠠᠯᠪᠠᠨ ᡳ ᠨᡳᠶᠠᠯᠮᠠ ᡩᡝ ᡳᡥᠠᠨ ᡥᠣᠨᡳᠨ ᠠᠮᠪᡠᠯᠠ ᠸᠠᡶᡳ᠈ ᡳᠯᠠ ᠵᡝᡵᡤᡳ ᠰᠠᡵᡳᠯᠠᡥᠠ᠉ ᡨᡝᡵᡝ ᠠᠨᡳᠶᠠ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡩᡠᡠᠯᡳᠮᠪᠠᡳ ᡥᠠᠵᡳ ᠠᠮᠪᠠ ᡶᡠᠵᡳᠨ ᠨᡳᠶᠠᠯᠮᠠ ᠮᠠᠩᡤᠠᠯᠠᡥᠠ ᠮᠠᠩᡤᡳ᠈ ᡶᡠᠵᡳᠨ ᡳᠨᡳ ᡝᠮᡝ ᠪᡝ ᡤᠠᠵᡳᡶᡳ ᠠᠴᠠᡴᡳ ᠰᡝᡵᡝ ᠵᠠᡴᠠᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡶᡠᠵᡳᠨ ᡳ ᡝᠮᡝ ᡝᠮᡥᡝ ᠪᡝ ᠵᡳᡠ ᠰᡝᠮᡝ ᠶᡝᡥᡝ ᡩᡝ ᡝᠯᠴᡳᠨ ᡨᠠᡴᡡᡵᠠᡥᠠ ᠮᠠᠩᡤᡳ᠉ ᠶᡝᡥᡝᡳ ᠨᠠᡵᡳᠮᠪᠣᠯᠣ ᠪᡝᡳᠯᡝ ᡳᠨᡳ ᡝᠮᡝ ᠪᡝ ᡠᠩᡤᡳᡥᡝ ᠠᡴᡡ᠈ ᡳᠨᡳ ᠪᠣᠣᡳ ᠨᠠᡨᠠᡳ ᡤᡝᠪᡠᠩᡤᡝ ᠨᡳᠶᠠᠯᠮᠠ ᠪᡝ ᡠᠩᡤᡳᡥᡝ ᠮᠠᠩᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᠰᡠᠸᡝᠨᡳ ᠶᡝᡥᡝᡳ ᡝᡶᡠᡶᡨᡝ ᡠᠮᠠᡳ ᠸᡝᡳᠯᡝ ᠠᡴᡡ᠈ ᠮᡳᠨᡳ ᡥᡡᠪᠴᠠ ᡤᡝᠪᡠᠩᡤᡝ ᡤᠠᡧᠠᠨ ᠪᡝ ᠰᡠᠴᡠᡶᡳ ᡤᠠᠮᠠᡥᠠ᠉ ᠠᠮᠠᠯᠠ ᡠᠶᡠᠨ ᡥᠠᠯᠠᡳ ᡤᡠᡵᡠᠨ ᠪᡝ ᡤᠠᡳᡶᡳ ᠮᡳᠮᠪᡝ ᠸᠠᡴᡳ ᠰᡝᠮᡝ ᠴᠣᠣᡥᠠ ᠵᡳᡥᡝ᠉ ᠵᠠᡳ ᠶᡝᡥᡝ᠈ ᡥᠠᡩᠠ᠈ ᡠᠯᠠ᠈ ᡥᠣᡳᡶᠠ ᠰᡠᠸᡝᠨᡳ ᠨᡝᠨᡝᠮᡝ ᡩᠠᡳᠨ ᠶᡝᡥᡝ ᠪᡝ ᠰᡠᠸᡝ ᠸᠠᡴᠠᠯᠠᠮᡝ᠈ ᠮᡳᠨᡳ ᠪᠠᡵᡠ ᡠᠶᡠᠨ ᡤᠠᡳᠮᡝ ᠵᡠᡳ ᠪᡠᠮᡝ ᠰᠠᡳᠨ ᠪᠠᠨᠵᡳᡴᡳ ᠰᡝᠮᡝ᠈ ᠠᠪᡴᠠ ᡩᡝ ᡧᠠᠩᡤᡳᠶᠠᠨ ᠮᠣᡵᡳᠨ ᠸᠠᠮᡝ᠈ ᠰᡝᠩᡤᡳ ᠰᠣᠣᠮᡝ᠈ ᡨᡠᡨᡨᡠ ᡤᠠᠰᡥᡡᡥᠠ ᡤᡳᠰᡠᠮᠪᡳ᠈ ᠰᡠᠸᡝᠨᡳ ᠶᡝᡥᡝᡳ ᠪᡝᡳᠰᡝ ᡤᡡᠸᠠᠯᡳᠶᠠᡶᡳ᠈ ᠪᡠᠮᠪᡳ ᠰᡝᠮᡝ ᡤᡳᠰᡠᡵᡝᡥᡝ ᠰᠠᡵᡤᠠᠨ ᠵᡠᠰᡝ ᠪᡝ ᠮᡝᠨᡩᡝ ᠪᡠᡥᡝᡴᡡ᠈ ᡤᡝᠮᡠ ᠮᠣᠩᡤᠣ ᡩᡝ ᠪᡠᡥᡝ᠉ ᡨᡝ ᠵᡠᡳ ᠨᡳᠮᡝᡴᡠ ᠪᠠᡥᠠᡶᡳ ᡨᡝᠯᡥᡝᠮᡝ ᠶᠠᡩᠠᠮᡝ ᡝᠮᡝ ᡩᡝ ᠠᠴᠠᡴᡳ ᠰᡝᠴᡳ ᠠᠴᠠᠪᡠᡵᠠᡴᡡ ᠣᠴᡳ᠈ ᠰᡠᠸᡝ ᠠᡳᠨᠠᡥᠠ ᠰᡝᠮᡝ ᠮᡳᠨᡳ ᠪᠠᡵᡠ ᠰᠠᡳᠨ ᠪᠠᠨᠵᡳᡵᠠᡴᠴ ᠨᡳᡴᠠᡳ᠈ ᡨᡠᡨᡨᡠ ᠰᠠᡳᠨ ᠪᠠᠨᠵᡳᡵᠠᡴᡡᠴᡳ ᠪᡳ ᠰᡠᠸᡝᠨᡩᡝ ᠠᡳᠨᡠ ᠰᡠᠮᡳᠮᡝ ᡤᡳᠰᡠᡵᡝᠮᠪᡳ᠈ ᡨᡝ ᠮᡠᠰᡝᡳ ᠵᡠᠸᡝ ᡤᡠᡵᡠᠨ ᡩᠠᠰᠠᠮᡝ ᡩᠠᡳᠨ ᠣᠮᡝ ᠸᠠᠵᡳᡥᠠ᠈ ᠪᡳ ᠰᡠᠸᡝᠨᡳ ᠶᡝᡥᡝᡳ ᠪᠠᡩᡝ ᡥᠣᡨᠣᠨ ᠠᡵᠠᡶᡳ ᠰᡠᠸᡝᠨᡳ ᡤᡠᡵᡠᠨ ᠪᡝ ᡩᠠᡳᠯᠠᠮᠪᡳ ᠰᡝᠮᡝ ᡥᡝᠨᡩᡠᡶᡳ᠈ ᠨᠠᡨᠠᡳ ᠪᡝ ᠠᠮᠠᠰᡳ ᡠᠩᡤᡳᡥᡝ᠉ ᡨᡝᡵᡝ ᠠᠨᡳᠶᠠ ᠪᠣᠯᠣᡵᡳ ᡠᠶᡠᠨ ᠪᡳᠶᠠ ᡩᡝ᠈ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡩᡠᠯᡳᠮᠪᠠᡳ ᠠᠮᠪᠠ ᡶᡠᠵᡳᠨ ᠨᡳᠮᡝᠮᡝ ᡠᡵᡳᡥᡝ᠉ ᡶᡠᠵᡳᠨ ᡳ ᡥᠠᠯᠠ ᠨᠠᡵᠠ᠈ ᡤᡝᠪᡠ ᠮᠣᠩᡤᠣᠵᡝᠵᡝ᠈ ᠶᡝᡥᡝᡳ ᡤᡠᡵᡠᠨ ᡳ ᠶᠠᠩᡤᡳᠪᡠ ᠪᡝᡳᠯᡝᡳ ᠰᠠᡵᡤᠠᠨ ᠵᡠᡳ᠉ ᠵᡠᠸᠠᠨ ᡩᡠᡳᠨ ᠰᡝ ᡩᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡩᡝ ᡥᠣᠯᠪᠣᡥᠣ᠉ ᠪᠠᠨᠵᡳᠨ ᡶᡳᠶᠠᠨ ᠰᠠᡳᡴᠠᠨ ᠵᠠᠯᡠᡴᠠ ᠪᡳᠶᠠᡳ ᠠᡩᠠᠯᡳ᠈ ᡥᠣᠵᠣ ᠪᡳᠮᡝ ᠪᠠᠨᡳᠨ ᠮᡠᠵᡳᠯᡝᠨ ᠣᠨᠴᠣ᠈ ᡠᡵᡥᡠᠨ ᡠᠵᡝᠨ ᡤᡳᠩᡤᡠᠨ᠈ ᠰᡠᡵᡝ ᠮᡝᡵᡤᡝᠨ᠈ ᡤᡳᠰᡠᠨ ᡩᠠᡥᠠᠰᡠ᠈ ᠰᠠᡳᡧᠠᡥᠠ ᠰᡝᠮᡝ ᠪᠠᠯᠠᡳ ᡠᡵᡤᡠᠨᠵᡝᡵᠠᡴᡡ᠉ ᡝᡥᡝ ᡤᡳᠰᡠᠨ ᠪᡝ ᡩᠣᠨᠵᡳᡥᠠ ᠰᡝᠮᡝ᠈ ᡩᠠ ᠪᠠᠨᡳᠨ ᡳ ᡠᡵᡤᡠᠨ ᡳ ᡶᡳᠶᠠᠨ ᠪᡝ ᡤᡡᠸᠠᠯᡳᠶᠠᠨᡩᠠᡵᠠᡴᡡ᠉ ᠠᠩᡤᠠ ᠴᡳ ᡝᡥᡝ ᡤᡳᠰᡠᠨ ᡨᡠᠴᡳᡵᠠᡴᡡ᠈ ᡥᠠᠯᡩᠠᠪᠠ ᠰᠠᡳᡧᠠᠪᡠᡴᡡ ᠪᡝ ᠶᡝᠪᡝᠯᡝᡵᠠᡴᡡ᠈ ᡝᠨᠴᡠᡥᡳᠶᠠᠨ ᡴᠣᡳᠮᠠᠯᡳ ᠪᡝ ᠰᠠᡳᡧᠠᡵᠠᡴᡡ᠈ ᡥᡝᡨᡠ ᠸᡝᡳᠯᡝ ᡶᠠᠴᡠᡥᡡᠨ ᡤᡳᠰᡠᠨ ᠪᡝ ᡩᠣᠨᠵᡳᡵᠠᡴᡡ᠈ ᠮᡠᠵᡳᠯᡝᠨ ᠪᡝ ᠸᠠᠴᡳᡥᡳᠶᠠᠮᡝ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝᡳ ᡤᡡᠨᡳᠨ ᡩᡝ ᠠᠴᠠᠪᡠᠮᡝ᠈ ᡩᠠᠴᡳ ᡩᡠᠪᡝᠨᡨᠠᠯᠠ ᠰᡳᠠᠨ ᠪᡝ ᠠᡴᡡᠮᠪᡠᡶᡳ᠈ ᡠᡶᠠᡵᠠᡥᠠ ᡝᠨᡩᡝᠪᡠᡥᡝ ᠪᡝ ᠠᡴᡡ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᠠᠵᡳ ᠵᡠᠸᠠᠨ ᠣᡶᡳ ᡩᡝᠯᡥᡝᠮᡝ ᠶᠠᡩᠠᠮᡝ᠈ ᡶᡠᠵᡳᠨ ᡳ ᡨᠠᡴᡡᡵᠠᡥᠠ ᡩᡠᡳᠨ ᠰᠠᡳᠨ ᡥᡝᡥᡝ ᠪᡝ ᡩᠠᡥᠠᠪᡠᡥᠠ᠉ ᠮᠣᡵᡳᠨ ᡨᠠᠩᡤᡡ᠈ ᡳᡥᠠᠨ ᡨᠠᠩᡤᡡ ᠸᠠᠮᡝ᠈ ᠨᠠᡩᠠᠨ ᠸᠠᠯᡳᠶᠠᡥᠠ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡝᠮᡠ ᠪᡳᠶᠠ ᡶᡠᠨᠴᡝᠮᡝ ᠠᡵᡴᡳ ᠨᡠᡵᡝ ᠣᠮᡳᡵᠠᡴᡡ᠈ ᡳᠨᡝᠩᡤᡳ ᡩᠣᠪᠣᡵᡳ ᠠᡴᡡ ᠰᠣᠩᡤᠣᠮᡝ᠈ ᡤᡳᡵᠠᠨ ᠪᡝ ᡥᡡᠸᠠᡳ ᡩᠣᠯᠣ ᠰᡳᠨᡩᠠᡶᡳ᠈ ᠰᡳᠩᠠᠯᠠᠮᡝ ᡳᠯᠠᠨ ᠠᠨᡳᠶᠠ ᠣᡥᠣ ᠮᠠᠩᡤᡳ᠉ ᡤᡳᡵᠠᠨ ᠪᡝ ᡥᡡᠸᠠ ᠴᡳ ᡨᡠᠴᡳᠪᡠᡶᡳ᠈ ᠨᡳᠶᠠᠯᠮᠠ ᠠᠯᡳᠨ ᡤᡝᠪᡠᠩᡤᡝ ᠮᡠᠩᡤᠠᠨ ᡩᡝ ᡝᡳᡶᡠ ᠪᡝ ᠰᡳᠨᡩᠠᡥᠠ᠉ ᡨᡝᡵᡝᠴᡳ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᠠᠵᡳ ᡶᡠᠵᡳᠨ ᡝᠮᡝ ᠪᡝ ᠠᠴᠠᡴᡳ ᠰᡝᠴᡳ᠈ ᡠᠩᡤᡳᡥᡝ ᠠᡴᡡ ᡩᡝ ᡴᠣᡵᠰᠣᡶᡳ᠈ ᠨᡳᠣᠸᠠᠩᡤᡳᠶᠠᠨ ᠮᡠᡩᡠᡵᡳ ᠠᠨᡳᠶᠠ᠈ ᠠᠨᡳᠶᠠ ᠪᡳᠶᠠᡳ ᡳᠴᡝ ᠵᡠᡤᡡᠨ ᡳ ᡳᠨᡝᠩᡤᡳ᠈ ᠶᡝᡥᡝ ᠪᡝ ᡩᠠᡳᠯᠠᠮᡝ ᠴᠣᠣᡥᠠ ᠵᡠᡵᠠᡶᡳ ᠵᡠᠸᠠᠨ ᠨᠠᠮᡠ ᡩᡝ ᠶᡝᡥᡝᡳ ᠵᠠᠩ᠈ ᠠᡴᡳᡵᠠᠨ ᡨᡝᡵᡝ ᡥᠣᡨᠣᠨ ᠪᡝ ᠠᡶᠠᠮᡝ ᡤᠠᡳᡶᡳ᠈ ᡨᡝᡵᡝ ᡤᠣᠯᠣᡳ ᠨᠠᡩᠠᠨ ᡤᠠᡧᠠᠨ ᠪᡝ ᡤᠠᡳᡥᠠ᠉ ᠵᡠᠸᡝ ᠮᡳᠩᡤᠠᠨ ᠣᠯᠵᡳ ᠪᡝ ᠪᠠᡥᠠᡶᡳ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᡨᡠᠯᡝᡵᡤᡳ ᠪᡝ ᡧᡠᡵᡩᡝᠮᡝ ᠠᠮᠪᠠ ᡥᡝᠴᡝᠨ ᠰᠠᡥᠠᡥᠠ᠉ ᠠᠯᠪᠠᠨ ᡳ ᠨᡳᠶᠠᠯᠮᠠ ᡩᡝ ᡳᡥᠠᠨ ᡥᠣᠨᡳᠨ ᠸᠠᡶᡳ᠈ ᠰᡠᠨᠵᠠ ᠵᡝᡵᡤᡳ ᠰᠠᡵᡳᠯᠠᡥᠠ᠉ ᠵᡠᠯᡤᡝ ᡩᠠᠴᡳ ᡩᠠᡳᠮᡳᠩ ᡤᡠᡵᡠᠨ ᡩᡝ ᠣᡵᡥᠣᡩᠠ ᡠᠨᠴᠠᠮᠪᡳᡥᡝ ᡩᡝ᠈ ᠮᠠᡩᠠᠪᡠᡶᡳ ᡠᠰᡳᡥᡳᠨ ᡠᠨᠴᠠᠯᡝᠨ ᡩᠠᠮᡳᠩ ᡤᡠᡵᡠᠨ ᡳ ᡥᡡᡩᠠᡳ ᠨᡳᠶᠠᠯᠮᠠ ᠵᠣᡵᡨᠠᡳ ᡤᠠᡳᠵᠠᡵᠠᡴᡡ ᠣᡥᠣᡩᡝ᠈ ᠣᡵᡥᠣᡩᠠ ᠨᡳᠶᠠᠮᠪᡳ ᠰᡝᠮᡝ ᡝᠪᡧᡝᠮᡝ ᡠᠨᠴᠠᠮᡝ ᠣᡶᡳ᠈ ᡥᡡᡩᠠ ᠠᠮᠪᡠᠯᠠ ᠪᠠᡥᠠᡴᡡ ᠪᡳᡥᡝ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡠᠵᡠᡶᡳ ᠸᠠᠯᡤᡳᠶᠠᡶᡳ᠈ ᡠᠨᠴᡝᡴᡳ ᠰᡝᡡᡳ ᠪᡝᡳᠰᡝ ᠠᠮᠪᠠᠰᠠ ᠮᠠᡵᠠᠮᡝ ᠪᡠᠵᡠᡶᡳ᠈ ᠠᡩᠠᡵᠠᠮᡝ ᠸᠠᠯᡤᡳᠶᠠᠮᠪᡳ ᠰᡝᠴᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡝᠮᡥᡠᠨ ᠮᠠᡵᠠᠮᡝ ᠣᡵᡥᠣᡩᠠ ᠪᡝ ᠪᡠᠵᡠᡶᡳ ᠸᠠᠯᡤᡳᠶᠠᡩᡳ ᠣᡵᡥᠣᡩᠠ ᠮᠠᠩᡤᡳ᠈ ᡝᠯᡥᡝᡳ ᡠᠨᠴᠠᠯᡝᠨ ᡩᡝᡵᡳᠪᡠᡶᡳ ᡥᡡᡩᠠ ᡠᠯᡳᠨ ᠠᠮᠪᡠᠯᠠ ᠪᠠᡥᠠᠮᡝ ᠣᡥᠣ᠉ ᡨᡝᡵᡝ ᠠᠨᡳᠶᠠ ᠮᠣᠩᡤᠣᡳ ᡴᠠᠯᡴᠠᡳ ᠪᠠᡳᠶᠣᡨ ᡨᠠᡨᠠᠨ ᡳ ᡩᠠᡵᡥᠠᠨ ᠪᠠᡨᡨᡠᡵᡠ ᠪᡝᡳᠯᡝᡳ ᠵᡠᡳ ᡝᠩᡤᡝᡩᡝᡵ ᡨᠠᡳᠵᡳ ᠣᡵᡳ ᠮᠣᡵᡳᠨ ᠪᡝᠨᠵᡳᠮᡝ ᡥᡝᠩᡴᡳᠯᡝᠮᡝ ᠵᡳᡥᡝ ᠮᠠᠩᡤᡳ᠉ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᡥᡝᠨᡩᡠᠮᡝ᠈ ᡩᠠᡳᠨ ᡳ ᡤᡠᡵᡠᠨ ᠪᡝ ᡩᡠᠯᡝᠮᡝ ᠪᠠᡥᠠᡴᡳ ᠰᡝᠮᡝ ᠵᡳᡥᡝᠪᡳᡩᡝᡵᡝ ᠰᡝᠮᡝ ᡥᡝᠨᡩᡠᡶᡳ᠈ ᠠᠮᠪᡠᠯᠠ ᡧᠠᠩᡤᠠᠮᡝ ᠪᡠᡶᡳ ᡠᠩᡤᡳᡥᡝ᠉ ᡶᡠᠯᡤᡳᠶᠠᠨ ᠮᠣᡵᡳᠨ ᠠᠨᡳᠶᠠ ᠵᠣᡵᡥᠣᠨ ᠪᡳᠶᠠᡩᡝ᠈ ᡳᠨᡝᡴᡠ ᡝᠩᡤᡝᡩᡝᡵ ᡨᠠᡳᠵᡳ᠈ ᠮᠣᠩᡤᠣ ᡤᡠᡵᡠᠨ ᡳ ᠰᡠᠨᠵᠠ ᡨᠠᡨᠠᠨ ᡳ ᡴᠠᠯᡴᠠᡳ ᡤᡝᡵᡝᠨ ᠪᡝᡳᠰᡝᡳ ᡝᠯᠴᡳᠨ ᠪᡝ ᡤᠠᠵᡳᠮᡝ᠈ ᡨᡝᠮᡝᠨ ᠮᠣᡵᡳᠨ ᠪᡝᠨᠵᡳᠮᡝ ᡥᡝᠩᡴᡳᠯᡝᠮᡝ ᠵᡳᡶᡳ᠈ ᡨᠠᡳᡯᡠ ᠰᡠᡵᡝ ᠪᡝᡳᠯᡝ ᠪᡝ ᡨᡠᡴᡳᠶᡝᠮᡝ ᡴᡠᠨᡩᡠᠯᡝᠨ ᡥᠠᠨ ᠰᡝᡥᡝ᠉ ᡨᡝᡵᡝᠴᡳ ᠪᠠᠪᠠᡳ ᠮᠣᠩᡤᠣ ᠯᠠᡴᠴᠠᡥᠠᡴᡡ ᠠᠨᡳᠶᠠ ᡩᠠᡵᡳ ᡥᡝᠩᡴᡳᠯᡝᡵᡝ ᠶᠠᠪᡠᡥᠠ᠉ ᡶᡠᠯᠠᡥᡡᠨ ᡥᠣᠨᡳᠨ ᠠᠨᡳᠶᠠ᠈ ᡩᡝᡵᡤᡳ ᠮᡠᡩᡠᡵᡳ ᠸᠠᡵᡴᠠᡳ ᠠᡳᠮᠠᠨ ᡳ ᡶᡳᠣ ᡤᡝᠪᡠᠩᡤᡝ ᡥᠣᡨᠣᠨ ᡳ ᡩᠴᡝᠮᡨᡝᡥᡝ ᡤᡝᠪᡠᠩᡤᡝ ᠠᠮᠪᠠᠨ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡩᡝ ᡥᡝᠩᡴᡳᠯᡝᠮᡝ ᠵᡳᡶᡳ ᡥᡝᠨᡩᡠᠮᡝ᠈ ᠪᡝ ᠪᠠᡳ ᡤᠣᡵᠣ ᡩᡝ ᡩᠠᡳᠯᠠᠪᡠᡶᡳ᠈ ᡠᠯᠠᡳ ᡤᡠᡵᡠᠨ ᡩᡝ ᡩᠠᡥᠠᡶᡳ᠈ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝ ᠮᡝᠮᠪᡝ ᠠᠮᠪᡠᠯᠠ ᠵᠣᠪᠣᠪᡠᠮᠪᡳ᠈ ᠮᡝᠨᡳ ᠪᠣᡳᡤᠣᠨ ᠪᡝ ᡤᡝᠨᡝᠮᡝ ᠶᠠᠪᡠ ᠰᡝᡥᡝ ᠮᠠᠩᡤᡳ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳᠨᡳ ᠰᡝᠣ ᡧᡠᡵᡤᠠᠴᡳ ᠪᡝᡳᠯᡝ᠈ ᠠᡥᡡᠩᡤᠠ ᠵᡠᡳ ᡥᠣᠩ ᠪᠠᡨᡠᡵᡠ ᠪᡝᡳᠯᡝ᠈ ᠶᠠᠴᡳᠨ ᠵᡠᡳ ᡩᠠᡳᡧᠠᠨ ᠪᡝᡳᠯᡝ᠈ ᡠᠵᡠ ᠵᡝᡵᡤᡳ ᠠᠮᠪᠠᠨ ᡶᡳᠣᠩᡩᠣᠨ᠈ ᡥᡡᡵᡤᠠᠨ ᡥᡳᠶᠠ ᡩᡝ ᡳᠯᠠᠨ ᠮᡳᠩᡤᠠᠨ ᠴᠣᠣᡥᠠ ᠪᡝ ᠠᡶᠠᠪᡠᡶᡳ᠈ ᡶᡳᠣ ᡥᠣᡨᠣᠨ ᡳ ᠪᠣᡳᡤᠣᠨ ᠪᡝ ᡤᡝᠨᡝᠮᡝ ᡠᠩᡤᡳᡥᡝ᠉ ᡨᡠᠯᡤᡠᠨ ᡩᠣᠪᠣᡵᡳ ᡩᡠᠯᡳᠮᡝ ᡤᡝᠨᡝᡵᡝ ᡩᡝ᠈ ᠠᠮᠪᠠ ᡨᡠᡳ ᠨᡳᠩᡤᡠᡩᡝ ᠠᠪᡴᠠᡳ ᡤᡝᠩᡤᡳᠶᡝᠨ ᠰᡳᡵᡝᠨ ᡤᡝᠯᡨᠠᡥᡡᠨ ᡝᠯᠪᡳᡴᡝ ᠪᡝ ᠰᠠᠪᡠᡶᡳ᠈ ᡤᡝᡵᡝᠨ ᠪᡝᡳᠰᡝ ᠠᠮᠪᠠᠰᠠ ᡶᡝᡵᡤᡠᠸᡝᠮᡝ ᡨᡠ ᠪᡝ ᠶᠠᡶᠠᡶᡳ᠈ ᠪᡳᡧᡠᠮᡝ ᡨᡠᠸᠠᠴᡳ ᡠᠮᠠᡳ ᠠᡴᡡ ᡨᡠᡴᡳᠶᡝᡥᡝ ᠮᠠᠩᡤᡳ᠉ ᡤᡝᠯᡳ ᡤᡝᡥᡠᠨ ᡝᠯᡩᡝᠮᠪᡳ᠈ ᡧᡠᡵᡤᠠᠴᡳ ᠪᡝᡳᠯᡝ ᡥᡝᠨᡩᡠᠮᡝ᠈ ᠠᠵᡳᡤᡝᠨᠴᡳ ᡥᠠᠨ ᠠᡥᡡᠨ ᠪᡝ ᡩᠠᡥᠠᠮᡝ ᡩᠠᡳᠯᠠᠮᡝ ᠶᠠ ᠪᠠᡩᡝ ᠴᠣᠣᡥᠠ ᠶᠠᠪᡠᡥᠠ ᠠᡴᡡ᠉ ᡝᡨᡝᡴᡝ ᠰᠠᠪᡳ ᠪᡝ ᠰᠠᡥᠠᡴᡡ ᡝᡵᡝ ᡝᡥᡝ ᠰᠠᠪᡳ ᠪᡳᡩᡝᡵᡝ᠈ ᠴᠣᠣᡥᠠ ᠠᠮᠠᠰᡳ ᠪᡝᡩᡝᡵᡝᡴᡳ ᠰᡝᡥᡝ ᠮᠠᠩᡤᡳ᠉ ᡥᠠᠨ ᡳ ᠵᡠᠸᡝ ᠵᡠᡳ ᡥᡝᠨᡩᡠᠮᡝ᠈ ᠰᠠᡳᠨ ᡝᡥᡝ ᠣᠴᡳ ᡳᠨᡠ ᡝᠮᡤᡝᡵᡳ ᠰᠠᠪᡳ ᠵᠣᡵᡳᠮᡝ ᠸᠠᠵᡳᡥᠠ᠉ ᠮᡠᠰᡝ ᠠᠯᠪᠠᠪᡝ ᠰᠠᡥᠠ ᠰᡝᠮᡝ ᠴᠣᠣᡥᠠ ᠪᡝᡩᡝᡵᡝᠮᠪᡳ᠈ ᠪᡝᡩᡝᡵᡝᡥᡝ ᡩᡝ ᡥᠠᠨ ᠠᠮᠠ ᠮᡠᠰᡝ ᡩᡝ ᠵᠠᡳ ᠴᠣᠣᡥᠠ ᠠᡶᠠᠪᡠᡶᡳ ᠶᠠᠪᡠᠪᡠᡵᠠᡴᡡ ᡴᠠᡳ ᠰᡝᠮᡝ ᡥᡝᠨᡩᡠᡶᡳ᠈ ᡶᡳᠣ ᡥᠣᡨᠣᠨ ᡳ ᡧᡠᡝᡩᡝᠮᡝ ᠪᠠᠪᠠᡳ ᡤᠠᡧᠠᠨ ᡤᠠᡧᠠᠨ ᠪᡝ ᠵᡠᠯᡝᡵᡳ ᠨᡝᠨᡝᠮᡝ ᠵᡠᡵᠠᠮᠪᡠᠮᡝ᠈ ᡥᡡᡵᡤᠠᠨ ᡥᡳᠶᠠ ᡩᡝ ᡳᠯᠠᠨ ᡨᠠᠩᡤᡡ ᠴᠣᠣᡥᠠ ᠪᡝ ᠠᡩᠠᠪᡠᡶᡳ᠈ ᡥᡡᡵᡤᠠᠨ ᡥᡳᠶᠠ ᠪᠣᡳᡤᠣᠨ ᠪᡝ ᡩᠠᠯᡳᠮᡝ᠈ ᠨᡝᠨᡝᠮᡝ ᠵᡳᡩᡝᡵᡝ ᡩᡝ᠈ ᡠᠯᠠᡳ ᡤᡠᡵᡠᠨ ᡳ ᠪᡠᠵᠠᠨᡨᠠᡳ ᠪᡝᡳᠯᡝ ᡝᠮᡠ ᡨᡠᠮᡝᠨ ᠴᠣᠣᡥᠠ ᠪᡝ ᡠᠩᡤᡳᡶᡳ᠈ ᠵᡠᡤᡡᠨ ᡨᠣᠰᠣᡥᠣ ᠪᡝ ᡥᡡᡵᡤᠠᠨ ᡥᡳᠶᠠ ᠰᠠᠪᡠᡶᡳ᠈ ᠠᠯᡳᠨ ᡳ ᠨᡳᠩᡤᡠᡩᡝ ᠵᠠᠰᡝ ᠶᠠᡶᠠᡶᡳ᠈ ᠰᡠᠨᠵᠠ ᡨᠠᠩᡤᡡ ᠪᠣᡳᡤᠣᠨ ᠪᡝ ᡝᠮᡠ ᡨᠠᠩᡤᡡ ᠴᠣᠣᡥᠠ ᠪᡝ ᡨᠣᠸᠠᡴᡳᠪᡠᡶᡳ᠈ ᠨᡳᠶᠠᠯᠮᠠ ᡨᠠᡴᡡᡵᠠᡶᡳ᠈ ᠠᠮᠠᡵᡤᡳ ᠴᠣᠣᡥᠠᡳ ᠪᡝᡳᠰᡝ ᡩᡝ ᠠᠯᠠᠨᠠᠮᡝ ᡠᠩᡤᡳᡥᡝ᠉ ᡨᡝᡵᡝ ᡩᠣᠪᠣᡵᡳ ᡠᠯᠠᡳ ᡤᡠᡵᡠᠨ ᡳ ᡨᡠᠮᡝ ᠴᠣᠣᡥᠠ ᠮᠠᠨᠵᡠ ᡤᡠᡵᡠᠨ ᡳ ᡥᡡᡵᡤᠠᠨ ᡥᡳᠶᠠ ᠵᡠᠸᡝ ᡨᠠᠩᡤᡡ ᠴᠣᠣᡥᠠ᠈ ᠠᠯᡳᠨ ᡳ ᡝᠮᡨᡝ ᡝᡵᡤᡳ ᡩᡝ ᠪᠠᡴᠴᡳᠯᠠᠮᡝ ᡳᠩ ᡳᠯᡳᡶᡳ ᡩᡝᡩᡠᡥᡝ᠉ ᠵᡳᠠ ᠴᡳᠮᠠᡵᡳ ᠮᠠᠨᠵᡠ ᡤᡠᡵᡠᠨ ᡳ ᠵᡠᠸᡝ ᡨᠠᠩᡤᡡ ᠴᠣᠣᡥᠠ ᡩᡝ᠈ ᡠᠯᠠᡳ ᡤᡠᡵᡠᠨ ᡳ ᡨᡠᠮᡝᠨ ᠴᠣᠣᡥᠠ ᠠᡶᠠᠨᠵᡳᡥᠠ ᠮᠠᠩᡤᡳ᠉ ᠠᠨᠵᡠ ᡤᡠᡵᡠᠨ ᡳ ᠴᠣᠣᡥᠠᡳ ᡳᠩ ᠴᡳ ᠶᠠᠩᡤᡠᡵᡳ ᡤᡝᠪᡠᠩᡤᡝ ᠠᠮᠪᠠᠨ ᠣᡴᠰᠣᠮᡝ ᡨᡠᠴᠴᡳᡶᡳ᠈ ᠵᡠᠯᡝᡵᡳ ᡤᠠᡳᡶᡳ ᡥᡡᠰᡠᡨᡠᠯᡝᠮᡝ ᠠᡶᠠᡶᡳ᠈ ᡠᠯᠠᡳ ᠴᠣᠣᡥᠠ ᠨᠠᡩᠠᠨ ᠨᡳᠶᠠᠯᠮᠠ ᠸᠠᠪᡠᡵᡝ ᠵᠠᡴᠠᡩᡝ᠈ ᠠᠮᠠᠰᡳ ᠪᡝᡩᡝᡵᡝᡶᡳ ᠪᡳᡵᠠ ᠪᡝ ᡩᠣᠣᡶᡳ᠈ ᠠᠯᡳᠨ ᡩᡝ ᡨᠠᡶᠠᡶᡳ ᠣᠯᡥᠣᠮᡝ ᠯᠠᡨᡠᠨᠵᡳᡵᠠᡴᡡ᠉ ᠵᡠᠸᡝ ᠴᠣᠣᡥᠠ ᠪᠠᡴᠴᡳᠯᠠᠮᡝ᠈ ᡳᠩ ᡳᠯᡳᡶᡳ ᠪᡳᠰᡳᡵᡝᡩᡝ᠈ ᠮᠠᠨᠵᡠ ᡤᡠᡵᡠᠨ ᡳ ᠠᠮᠠᡵᡤᡳ ᠠᠯᡳᠨ ᠪᡝᡳᠯᡝᡳ ᠴᠣᠣᡥᠠ ᡨᡝᡵᡝ ᡳᠨᡝᠩᡤᡳ ᡥᠣᠨᡳᠨ ᡝᡵᡳᠨ ᡩᡝ ᡳᠰᡳᠨᠵᡳᡶᡳ᠈ ᡠᠯᠠᡳ ᠴᠣᠣᡥᠠ ᠪᡝ ᠰᠠᠪᡠᡶᡳ᠈ ᡥᠣᠩ ᠪᠠᡨᡠᡵᡠ ᠪᡝᡳᠯᡝ᠈ ᡩᠠᡳᡧᠠᠨ ᠪᡝᡳᠯᡝ ᠠᡥᡡᠨ ᡩᡝᠣ ᠮᠣᡵᡳᠨ ᡧᡠᠰᡳᡥᠠᠯᠠᠮᡝ ᠵᡳᠯᡳᡩᠠᠮᡝ ᡥᡝᠨᡩᡠᠮᡝ ᠪᠠᠪᠠᡳ ᡩᠠᡳᠨ ᠪᡝ ᡩᠠᡳᠯᠠᠮᡝ ᡩᠠᡥᠠᠪᡠᡥᠠ᠉ ᡥᠠᠨ ᠠᠮᠠ ᠪᠣᠣ ᡩᡝ ᡨᡝᡥᡝᠪᡳᡩᡝᡵᡝ᠈ ᡥᠠᠨ ᠠᠮᠠ ᡩᡝ ᠪᠠᠨᠵᡳᡥᠠ ᠵᡠᠸᡝ ᠵᡠᠰᡝ ᠪᡝ ᠵᡳᡥᡝᠪᡳ᠉ ᠮᡠᠰᡝᡳ ᠴᠣᠣᡥᠠᡳ ᠨᡳᠶᠠᠯᠮᠠ ᠰᡠᠸᡝ ᡠᠮᡝ ᠵᠣᠪᠣᡵᠣ᠈ ᡝᡵᡝ ᠪᡠᠵᠠᠨᡨᠠᡳ ᠮᡠᠰᡝ ᡩᡝ ᡩᠠᡳᠨ ᡤᡝᠨᡝᡥᡝ ᡩᡝ᠈ ᠮᡠᠰᡝ ᠶᠠᡶᠠᡶᡳ ᠮᠣᠩᡤᠣᠨ ᡩᡝ ᠰᡝᠯᡝ ᡶᡠᡨᠠ ᡥᡡᠸᠠᡳᡨᠠᡶᡳ ᡠᠵᡳᡶᡳ ᡠᠯᠠᡳ ᡤᡠᡵᡠᠨ ᡩᡝ ᠠᠮᠠᠰᡳ ᠰᡳᠨᡩᠠᡶᡳ ᡠᠩᡤᡳᡶᡳ ᡝᠵᡝᠨ ᠣᠪᡠᡥᠠ ᠨᡳᠶᠠᠯᠮᠠ ᡴᠠᡳ᠉ ᠶᠠᠯᠠ ᡤᠣᡳᡩᠠᡥᠠ ᠠᡴᡡ ᠪᡳ᠈ ᠪᡝᠶᡝ ᡥᠠᠯᠠᡥᠠᡴᡡᠪᡳ᠈ ᠪᡠᠵᠠᠨᡨᠠᡳ ᠮᡠᠰᡝᡳ ᡤᠠᠯᠠ ᠴᡳ ᡨᡠᠴᡳᡴᡳᠪᡳᡩᡝᡵᡝ᠈ ᠠᠪᡴᠠᡳ ᡤᠠᠯᠠᠴᡳ ᡨᡠᠴᡳᡴᡝᠪᡳᠣ᠈ ᡝᡵᡝ ᠴᠣᠣᡥᠠ ᠪᡝ ᡤᡝᡵᡝᠨ ᠰᡝᠮᡝ ᡠᠮᡝ ᡤᡡᠨᡳᡵᡝ ᠈ ᠮᡠᠰᡝ ᡩᡝᠠᠪᡴᠠᡳ ᡤᠣᠰᡳᠮᡝ ᠪᡠᡥᡝ ᠠᠮᠪᠠ ᡥᠣᡵᠣᠨ᠈ ᠠᠮᠠ ᡥᠠᠨ ᡳ ᠠᠯᡤᡳᠮᠪᡠᡥᠠ ᠠᠮᠪᠠ ᡤᡝᠪᡠ ᠪᡳ᠈ ᡝᡵᡝ ᠴᠣᠣᡥᠠ ᠪᡝ ᡠᡵᡠᠨᠠᡴᡡ ᡤᡳᡩᠠᠮᠪᡳ ᠰᡝᠮᡝ ᡥᡝᠩᡠᡥᡝ ᠮᠠᠩᡤᡳ᠉ ᡤᡝᡵᡝᠨ ᡡᠣᠣᡥᠠᡳ ᠨᡳᠶᠠᠯᠮᠠ ᡤᡝᠮᡠ ᡶᠠᡶᡠᡵᡧᠠᠮᡝ ᠵᡳᠯᡳ ᠪᠠᠨᠵᡳᡶᡳ᠈ ᠪᡠᠴᡝᠯᡝᠨ ᠠᡶᠠᡴᡳ ᠰᡝᠮᡝ ᠶᠠᠪᡠᡶᡳ᠈ ᡨᡝᡵᡝ ᠪᡳᡵᠠ ᠪᡝ ᡩᠣᠣᡶᡳ᠈ ᡥᠣᠩ ᠪᠠᡨᡠᡵᡠ ᠪᡝᡳᠯᡝ᠈ ᡩᠠᡳᡧᠠᠨ ᠪᡝᡳᠯᡝ ᠠᡥᡡᠨ ᡩᡝᠣ ᠰᡠᠨᠵᠠᡨᠠ ᡨᠠᠩᡤᡡ ᠴᠣᠣᡥᠠ ᠪᡝ ᡤᠠᡳᡶᡳ᠈ ᠠᠯᡳᠨ ᡳ ᡶᡝᠰᡳᡥᡠᠨ ᠵᡠᠸᡝ ᠵᡠᡵᡤᠠᠨ ᡳ ᠰᠠᠴᡳᠮᡝ ᠠᡶᠠᠮᡝ ᡩᠣᠰᡳᡶᡳ᠈ ᡠᠯᠠᡳ ᠴᠣᠣᡥᠠ ᠪᡝ ᡠᡨᡥᠠᡳ ᡤᡳᡩᠠᡶᡳ ᠰᠠᠴᡳᠮᡝ ᡤᠠᠮᠠᡵᠠ ᡩᡝ᠈ ᡩᠠᡳᡧᠠᠨ ᠪᡝᡳᠯᡝ᠈ ᡠᠯᠠᡳ ᠴᠣᠣᡥᠠ ᠪᡝ ᡤᠠᡳᡶᡳ ᠵᡳᡥᡝ᠉ ᡝᠵᡝᠨ ᠪᠣᡴᡩᠣ ᠪᡝᡳᠯᡝ ᠪᡝ ᠮᠣᡵᡳᠨ ᡳ ᡩᡝᡵᡤᡳᠴᡳ ᡠᡨᡥᠠᡳ ᠰᠠᠵᠠᡳ ᠴᠣᡵᡥᠣ ᠪᡝ ᡥᠠᠰᡥᡡ ᡤᠠᠯᠠᡳ ᡤᡳᡩᠠᠮᡝ ᠶᠠᡶᠠᡶᡳ᠈ ᠰᠠᠴᡳᠮᡝ ᠸᠠᡥᠠ᠉ ᡨᡝᡵᡝ ᡩᠠᡳᠨ ᡩᡝ᠈ ᠪᠣᡴᡩᠣ ᠪᡝᡳᠯᡝᡳ ᠠᠮᠠ ᠵᡠᡳ ᠪᡝ ᠸᠠᡶᡳ ᠴᠠᠩᠵᡠ ᠪᡝᡳᠯᡝᡳ ᠠᠮᠠ ᠵᡠᡳ᠈ ᡥᡡᡵᡳᠪᡠ ᠪᡝᡳᠯᡝ ᡳᠯᠠᠨ ᠨᠣᡶᡳ ᠪᡝ ᡤᡝᠮᡠ ᠸᡝᡳᡥᡠᠨ ᠶᠠᡶᠠᡥᠠ᠈ ᡳᠯᠠᠨ ᠮᡳᠩᡤᠠᠨ ᠨᡳᠠᠶᠯᠠᠮᠠ ᠪᡝ ᠸᠠᡥᠠ᠉ ᠰᡠᠨᠵᠠ ᠮᡳᠩᡤᠠᠨ ᠮᠣᡵᡳᠨ᠈ ᡳᠯᠠᠨ ᠮᡳᠩᡤᠠᠨ ᡠᡴᠰᡳᠨ ᠪᠠᡥᠠ᠉ ᡨᡝᡵᡝ ᠴᠣᠣᡥᠠ ᠪᡝ ᡤᡳᡩᠠᡵᠠ ᡩᡝ᠈ ᡧᡠᡵᡤᠠᠴᡳ ᠪᡝᡳᠯᡝ ᠰᡠᠨᠵᠠ ᡨᠠᠩᡤᡡ ᠴᠣᠣᡥᠠ ᠪᡝ ᡤᠠᡳᡶᡳ᠈ ᠠᠯᡳᠨ ᡳ ᡩᠠᡩᡝ ᡳᠯᡳᡥᠠ᠉ ᠵᡠᠸᡝ ᠪᡝᡳᠯᡝ ᠪᠠᡨᠠ ᠪᡝ ᡤᡳᡩᠠᡶᡳ ᠰᠠᠴᡳᠮᡝ ᡤᡝᠨᡝᡵᡝ ᡩᡝ᠈ ᡧᡠᡵᡤᠠᠴᡳ ᠪᡝᡳᠯᡝ ᡨᡝᠨᡳ ᠠᠮᠠᠯᠠ ᠠᠮᠴᠠᠮᡝ ᠰᡳᡩᡝᠨᡩᡝ ᡝᠮᡠ ᠠᠮᠪᠠ ᠠᠯᡳᠨ ᠪᡝ ᡧᡠᡵᡩᡝᠮᡝ ᠠᡩᠠᠮᡝ ᡤᡝᠨᡝᡶᡳ᠈ ᠪᠠᡨᠠᡳ ᠴᠣᠣᡥᠠ ᠪᡝ ᠠᠮᠪᡠᠯᠠ ᠪᠠᡥᠠᡶᡳ ᠸᠠᡥᠠᡴᡡ᠉ ᡨᡝᡵᡝ ᠴᠣᠣᡥᠠ ᡤᡳᡩᠠᡥᠠ ᡳᠨᡝᠩᡤᡳ ᡤᡝᡥᡠᠨ ᡤᠠᠯᠠᡴᠠ ᠠᠮᠪᠠᠨ ᡳᠯᡳᡥᠠ᠉ ᠠᠨᡩᠠᠨᡩᡝ ᡨᡠᠯᡤᡠᡧᡝᡶᡳ ᠠᠮᠪᠠ ᡳᠨᡝᠩᡤᡳ ᠨᡳᠮᠠᡵᠠᠮᡝ ᠪᡝᡳᡴᡠᠸᡝᡵᡝᡶᡳ᠈ ᡠᠯᠠᡳ ᠴᠣᠣᡥᠠ ᡶᡝᠶᡝ ᠪᠠᡥᠠᡶᡳ᠈ ᡠᡴᠰᡳᠨ ᠰᠠᠴᠠ ᠪᡝ ᠸᠠᠯᡳᠶᠠᡶᡳ ᠪᡠᡵᠯᠠᠮᡝ ᡤᡝᠨᡝᡵᡝ ᠨᡳᠶᠠᠯᠮᠠ ᠠᠮᠪᡠᠯᠠ ᡤᡝᠴᡝᠮᡝ ᠪᡠᠴᡝᡥᡝ᠈ ᡨᡝᡵᡝᠴᡳ ᠴᠣᠣᡥᠠ ᠪᡝᡩᡝᡵᡝᠮᡝ ᡳᠰᡳᠨᠵᡳᡥᠠ ᠮᠠᠩᡤᡳ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡩᡝᠣ ᠪᡝᡳᠯᡝ ᡩᡝ ᡩᠠᡵᡥᠠᠨ ᠪᠠᡨᡠᡵᡠ ᠰᡝᠮᡝ ᡤᡝᠪᡠ ᠪᡠᡥᡝ᠉ ᠠᡥᡡᠩᡤᠠ ᠵᡠᡳ ᡥᠣᠩ ᠪᠠᡨᡠᡵᡠ ᠪᡝᡳᠯᡝ ᠪᡝ ᠠᠮᠪᠠ ᡩᠠᡳᠨ ᡩᡝ ᡠᠵᡠᠯᠠᡶᡳ᠈ ᠵᡠᠯᡝᡵᡳ ᡩᠣᠰᡳᡴᠠ᠉ ᡩᠠᡳᠨ ᠪᡝ ᡤᡳᡩᠠᡥᠠ ᠰᡝᠮᡝ ᠠᡵᡤᠠᠨᡨᡠ ᡨᡠᠮᡝᠨ ᠰᡝᠮᡝ ᡤᡝᠪᡠ ᠪᡠᡥᡝ᠉ ᠶᠠᠴᡳᠨ ᠵᡠᡳ ᡩᠠᡳᡧᠠᠨ ᠪᡝᡳᠯᡝ ᡠᠯᠠᡳ ᠴᠣᠣᡥᠠᡳ ᡝᠵᡝᠨ ᠪᠣᡴᡩᠣ ᠪᡝᡳᠯᡝ ᠪᡝ ᠸᠠᡥᠠ᠈ ᠠᡥᡡᠨ ᡳ ᠰᠠᠰᠠ ᠠᡩᠠᡶᡳ ᡩᠣᠰᡳᡴᠠ᠉ ᡩᠠᡳᠨ ᠪᡝ ᡤᡳᡩᠠᡥᠠ ᠰᡝᠮᡝ ᡤᡠᠶᡝᠩ ᠪᠠᡨᡠᡵᡠ ᠰᡝᠮᡝ ᡤᡝᠪᡠ ᡤᡝᠪᡠ ᠪᡠᡥᡝ᠉ ᡨᡝᡵᡝ ᠴᠣᠣᡥᠠ ᡩᡝ ᠴᠠᠩᡧᡠ ᡤᡝᠪᡠᠩᡤᡝ ᠠᠮᠪᠠᠨ᠈ ᠨᠠᠴᡳᠪᡠ ᡤᡝᠪᡠᠩᡤᡝ ᡥᡳᠶᠠ ᠪᡝ ᠠᡶᠠᠪᡠᡥᠠ᠉ ᠵᡠᠸᡝ ᠪᡝᡳᠯᡝ ᠴᡳ ᡶᠠᡴᠴᡳᡶᡳ᠈ ᡨᠠᠩᡤᡡ ᠴᠣᠣᡥᠠ ᠪᡝ ᡤᠠᡳᡶᡳ᠈ ᡩᠠᡵᡥᠠᠨ ᠪᠠᡨᡠᡵᡠ ᠪᡝᡳᠯᡝᡳ ᡝᠮᡤᡳ ᡳᠯᡳᡥᠠ᠉ ᠵᡠᠯᡝᡵᡳ ᡤᠠᡳᡶᡳ ᠠᡶᠠᡥᠠᡴᡡ᠈ ᠪᠠᡨᠠ ᠪᡝ ᠪᠠᡥᠠᡶᡳ᠈ ᠸᠠᡴᠠ ᠠᡴᡡ ᠰᡝᡴᡝ ᠸᠠᡵᠠ ᠸᡝᡳᠯᡝ ᠠᡵᠠᡥᠠ ᠮᠠᠩᡤᡳ᠉ ᡩᠠᡵᡥᠠᠨ ᠪᠠᡨᡠᡵᡠ ᠪᡝᡳᠯᡝ ᡥᡝᠨᡩᡠᠮᡝ᠈ ᡝᡵᡝ ᠵᡠᠸᡝ ᠠᠮᠪᠠᠨ ᠪᡝ ᠸᠠᠴᡳ᠈ ᠮᡳᠨᡳ ᠪᡝᠶᡝ ᡳᠨᡠ ᠪᡠᠴᡝᡥᡝ ᡤᡝᠰᡝ ᡴᠠᡳ ᠰᡝᠮᡝ ᠪᠠᡳᡵᡝ ᠵᠠᡴᠠᡩᡝ᠈ ᠸᠠᡵᠠ ᠪᡝ ᠨᠠᡴᠠᡶᡳ ᠴᠠᠩᡧᡠ ᡩᡝ ᡨᠠᠩᡤᡡ ᠶᠠᠨ ᡳ ᠸᡝᡳᠯᡝ ᡤᠠᡳᡥᠠ᠉ ᠨᡝᠴᡳᠪᡠ ᡩᡝ ᡴᠠᡩᠠᠯᠠ ᠰᡝᠮᡝ ᠪᡠᡥᡝ ᠵᡠᡧᡝᠨ ᠪᡝ ᡤᡝᠮᡠ ᡤᠠᡳᡥᠠ᠉ ᠰᡠᠨᠵᠠ ᠪᡳᠶᠠ ᡩᡝ᠈ ᡨᠠᡳᡯᡠ ᡴᡠᡩᡠᠯᡝᠨ ᡥᠠᠨ ᡶᡳᠶᠠᠩᡤᡡ ᡩᡝᠣ ᠵᠣᡵᡳᡴᡨᡠ ᠪᡝᡳᠯᡝ᠈ ᡠᠵᡠᠯᠠᡥᠠ ᠠᠮᠪᠠᠨ ᡝᡳᡩᡠ ᠪᠠᡨᡨᡠᡵᡠ᠈ ᡶᡳᠶᠣᠩᡩᠣᠨ ᠵᠠᡵᡤᡡᠴᡳ᠈ ᡥᡡᡵᡤᠠᠨ ᡥᡳᠶᠠ ᡩᡝ ᡝᠮᡠ ᠮᡳᠩᡤᠠᠨ ᠴᠣᠣᡥᠠ ᠪᡝ ᠠᡶᠠᠪᡠᡶᡳ᠈ ᡩᡝᡵᡤᡳ ᠮᡝᡩᡝᡵᡳ ᠸᡝᠵᡝᡳ ᠠᡳᠮᠠᠨ ᠪᡝ ᡩᠠᡳᠯᠠᠮᡝ ᡠᠩᡤᡳᡶᡳ᠈ ᡥᡝᠰᡳᡥᡝ᠈ ᠣᠮᠣᡥᠣ᠈ ᠰᡠᡵᡠ᠈ ᡶᡝᠨᡝᡥᡝ ᡨᠣᡴᠰᠣ᠉ ᡨᡝᡵᡝ ᡳᠯᠠᠨ ᡤᠣᠯᠣ ᠪᡝ ᡤᡝᠮᡠ ᡤᠠᡳᡶᡳ᠈ ᠵᡠᠸᡝ ᠮᡳᠩᡤᠠᠨ ᠣᠯᠵᡳ ᡤᠠᡳᡥᠠ᠉ ᡠᠶᡠᠨ ᠪᡳᠶᠠᡳ ᡳᠴᡝ ᠨᡳᠩᡤᡠᠨ ᡩᡝ᠈ ᡠᠰᡳᡥᠠ ᠴᡳ ᠰᡳᡵᡝᠨ ᡨᡠᠴᡳᡶᡳ ᡧᡠᠨ ᡩᡝᡴᡩᡝᡵᡝ ᡝᡵᡤᡳ ᡥᠣᡳᡶᠠ ᡤᡠᡵᡠᠨ ᡳ ᡨᡝᡳᠰᡠ᠈ ᠰᡠᠮᠠᡦᡳ ᠵᠠᡴᡡᠨ ᡩᠣᠪᠣᡵᡳ ᠰᠠᠪᡠᡶᡳ ᠨᠠᡴᠠᡥᠠ᠉ ᠵᠠᡳ ᡤᡝᠯᡳ ᡧᡠᠨ ᡨᡠᡥᡝᡵᡝ ᡝᡵᡤᡳᡩᡝ ᡠᠰᡳᡥᠠ ᠴᡳ ᠰᡳᡵᡝᠨ ᡨᡠᠴᡳᡴᡳ ᡝᠮᡠ ᠪᡳᠶᠠ ᡶᡠᠨᠴᡝᠮᡝ ᠪᡳᡥᡝ᠉ ᡨᡝᡵᡝ ᡶᠣᠨᡩᡝ᠈ ᡥᠣᡳᡶᠠᡳ ᡤᡠᡵᡠᠨ ᡳ ᠪᠠᡳᠨᡩᠠᡵᡳ ᠪᡝᡳᠯᡝᡳ ᡠᡴᠰᡠᠨ ᡳ ᠠᡥᡡᠨ ᡩᡝᠣ ᡳ ᠨᡳᠶᠠᠯᠮᠠ ᠶᡝᡥᡝᡳ ᡤᡠᡵᡠᠨ ᡳ ᠠᡵᡳᠮᠪᠣᠯᠣ ᠪᡝᡳᠯᡝ ᡩᡝ ᡠᠪᠠᡧᠠᠮᡝ ᡤᡝᠨᡝᡵᡝ ᠵᠠᡴᠠᡩᡝ᠈ ᡤᠠᡧᠠᠨ ᡳ ᠨᡳᠶᠠᠯᠮᠠ ᡤᡝᠯᡳ ᡠᠪᠠᡧᠠᡴᡳ ᠰᡝᠮᡝ ᡤᡳᠰᡠᡵᡝᡵᡝ ᠪᡝ ᠪᠠᡳᠨᡩᠠᡵᡳ ᠪᡝᡳᠯᡝ ᡩᠣᠨᠵᡳᡶᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡩᡝ ᠴᠣᠣᡥᠠ ᠪᠠᡳᠮᡝ᠈ ᡳᠨᡳ ᠨᠠᡩᠠᠨ ᠠᠮᠪᠠᠨ ᡳ ᠵᡠᠰᡝ ᡩᡝ ᡩᠠᠮᡨᡠᠨ ᠪᠠᠨᠵᡳᡵᡝ ᠵᠠᡴᠠᡵᡝ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡝᠮᡠ ᠮᡳᠩᡤᠠᠨ ᠴᠣᠣᡥᠠ ᠪᡝ ᠪᠠᡳᠨᡩᠠᡵᡳ ᠪᡝᡳᠯᡝ ᡩᡝ ᡩᠠᠮᡝ ᡠᠩᡤᡳᡥᡝ ᠮᠠᠩᡤᡳ᠉ ᠶᡝᡥᡝᡳ ᠨᠠᡵᡳᠮᠪᠣᠯᠣ ᠪᡝᡳᠯᡝ ᡤᡝᠯᡳ ᠪᠠᡳᠨᡩᠠᡵᡳ ᠪᡝᡳᠯᡝ ᠪᡝ ᡧᡠᠰᡳᡥᡳᠶᡝᠮᡝ ᠰᡳᠨᡳ ᡩᠠᠮᡨᡠᠨ ᠪᡝᠨᡝᡥᡝ ᠵᡠᠰᡝ ᠪᡝ ᠠᠮᠠᠰᡳ ᡤᠠᡳᠰᡠ᠈ ᠮᡠᠰᡝ ᡠᠪᠠᡧᠠᠮᡝ ᠵᡳᡥᡝ᠈ ᠰᡳᠨᡳ ᠠᡥᡡᠨ ᡩᡝᠣ ᡳ ᠨᡳᠶᠠᠯᠮᠠ ᠪᡝ ᡤᡝᠮᡠ ᠪᡝᡩᡝᡵᡝᠪᡠᡵᡝ ᠰᡝᡵᡝ ᠵᠠᡴᠠᡩᡝ᠈ ᠪᠠᡳᠨᡩᠠᡵᡳ ᠪᡝᡳᠯᡝ ᡨᡝᡵᡝ ᡤᡳᠰᡠᠨ ᡩᡝ ᠠᡴᡩᠠᡶᡳ᠈ ᠪᡳ ᠮᠠᠨᠵᡠ ᠵᡳᡥᡝ᠈ ᠵᡠᠸᡝ ᡤᡠᡠᡵᠨ ᡳ ᠰᡳᡩᡝᠨᡩᡝ ᠪᠠᠨᠵᡳᡵᡝ ᠰᡝᠮᡝ ᡥᡝᠨᡩᡠᡶᡳ᠈ ᡳᠨᡳ ᡩᠠᠮᡨᡠᠨ ᠪᠠᠨᠵᡳᡥᡝ ᠨᠠᡩᠠᠨ ᠠᠮᠠᠪᠨ ᡳ ᠵᡠᠰᡝ ᠪᡝ ᡤᡝᠮᡠ ᠠᠮᠠᠰᡳ ᡤᠠᠮᠠᡶᡳ᠈ ᡳᠨᡳ ᠪᡝᠶᡝ ᡩᡝ ᠪᠠᠨᠵᡳᡥᠠ ᠵᡠᡳ ᠪᡝ ᠶᡝᡥᡝᡳ ᠨᠠᡵᡳᠮᠪᠣᠯᠣ ᠪᡝᡳᠯᡝ ᡩᡝ ᡩᠠᠮᡨᡠᠨ ᡠᠩᡤᡳᡥᡝ᠉ ᠶᡝᡥᡝᡳ ᠨᠠᡵᡳᠮᠪᠣᠯᠣᠣ ᠪᡝᡳᠯᡝ ᡳᠨᡩᡝ ᡠᡴᠠᠮᡝ ᡤᡝᠨᡝᡥᡝ᠈ ᠪᠠᡳᠨᡩᠠᡵᡳ ᠪᡝᡳᠯᡝᡳ ᠠᡥᡡᠨ ᡩᡝᠣᡳ ᠨᡳᠶᠠᠯᠮᠠ ᠪᡝ ᠪᡝᡩᡝᡵᡝᠪᡠᡥᡝᡴᡡ ᠣᡥᠣ ᠮᠠᠩᡤᡳ᠉ ᠪᠠᡳᠨᡩᠠᡵᡳ ᠪᡝᡳᠯᡝ ᡳᠨᡳ ᠠᠮᠪᠠᠰᠠ ᠪᡝ ᡠᠩᡤᡳᡶᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᠪᠠᡵᡠ ᡥᡝᠨᡩᡠᠮᡝ᠈ ᠪᡳ ᠶᡝᡥᡝᡳ ᠨᠠᡵᡳᠮᠪᠣᠯᠣ ᠪᡝᡳᠯᡝ ᡳ ᡥᠣᠯᡨᠣᡥᠣ ᡤᡳᠰᡠᠨ ᡩᡝ ᡩᠣᠰᡳᡴᠠ ᠪᡳᡥᡝ᠉ ᡨᡝᡵᡝ ᠪᡳᠴᡳᠪᡝ ᡥᠠᠨ ᠰᠠᡩᠠ ᠠᡴᡩᠠᡶᡳ ᠪᠠᠨᠵᡳᡴᡳ᠈ ᠰᡳᠨᡳ ᠴᠠᠩᡧᡠᡳ ᠵᡠᡳ ᡩᡝ ᠪᡠᠮᠪᡳ ᠰᡝᡥᡝ᠈ ᠰᠠᡵᡤᠠᠨ ᠵᡠᡳ ᠪᡝ ᠮᡳᠨᡩᡝ ᡤᠠᠵᡳ ᠰᡝᡥᡝ ᠮᠠᠩᡤᡳ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᠴᠠᠩᡧᡠᡳ ᠵᡠᡳ ᡩᡝ ᠪᡠᠮᠪᡳ ᠰᡝᡥᡝ ᠰᠠᡵᡤᠠᠨ ᠵᡠᡳ ᠪᡝ ᠪᡠᡵᡝ ᠪᡝ ᠨᠠᡴᠠᡶᡳ᠈ ᠪᠠᡳᠨᡩᠠᡵᡳ ᠪᡝᡳᠯᡝ ᡩᡝ ᠪᡠᡵᡝ ᠰᡝᡥᡝ᠉ ᠪᠠᡳᠨᡩᠠᠯᡳ ᠪᡝᡳᠯᡝ ᡤᠠᠯᡳ ᡤᡡᠸᠠᠯᡳᠶᠠᡦᡳ ᡤᠠᡳᠮᠪᡳ ᠰᡝᡥᡝ ᠰᠠᡵᡤᠠᠨ ᠵᡠᡳ ᠪᡝ ᡤᠠᡳᠵᠠᡵᠠᡴᡡ ᠣᡥᠣ ᠮᠠᠩᡤᡳ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡝᠯᠴᡳᠨ ᡨᠠᡴᡡᡵᠠᡶᡳ ᡥᡝᠨᡩᡠᠮᡝ᠈ ᠰᡳ ᠨᡝᠨᡝᠮᡝ ᠶᡝᡥᡝ ᡩᡝ ᡩᠠᡶᡳ ᠵᡠᠸᡝ ᠵᡝᡵᡤᡳ ᠴᠣᠣᡥᠠ ᠵᡳᡥᡝ᠈ ᡨᡝ ᠮᡳᠨᡳ ᠵᡠᡳ ᠪᡝ ᡤᠠᡳᠮᠪᡳ ᠰᡝᡶᡳ ᡤᡝᠯᡳ ᠠᡳᠨᡠ ᡤᡡᠸᠠᠯᡳᠶᠠᡴᠠ᠈ ᠪᠠᡳᠨᡩᠠᡵᡳ ᠪᡝᡳᠯᡝ ᠵᠠᠯᡳᡩᠠᠮᡝ᠈ ᠮᡳᠨᡳ ᠶᡝᡥᡝ ᡩᡝ ᠪᡳᠰᡳᡵᡝ ᠵᡠᡳ ᠪᡝ ᠪᠠᡥᠠ ᠮᠠᠩᡤᡳ᠈ ᠰᡳᠨᡳ ᠵᡠᡳ ᠪᡝ ᡤᠠᡳᡶᡳ ᠰᡳᠨᡳ ᡳᠴᡳ ᠣᠵᠣᡵᠣ ᠰᡝᠮᡝ ᡥᡝᠨᡩᡠᠮᡝ᠈ ᠪᠠᠪᡝ ᠪᡝᡴᡳᠯᡝᠮᡝ ᡳᠯᠠᡵᠰᡠ ᡥᠣᡨᠣᠨ ᠠᡵᠠᡥᠠ᠈ ᠶᡝᡥᡝ ᡩᡝ ᡩᠠᠮᡨᡠᠨ ᠪᡝᠨᡝᡥᡝ ᠵᡠᡳ ᠪᡝ ᠠᠮᠠᠰᡳ ᡤᠠᠮᠠᡥᠠ ᠮᠠᠩᡤᡳ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡤᡝᠯᡳ ᡝᠯᠴᡳᠨ ᡨᠠᡴᡡᡵᠠᡶᡳ ᠰᡳᠨᡳ ᠶᡝᡥᡝ ᡩᡝ ᠪᡳᡥᡝ ᠵᡠᡳ ᠪᡝ ᠪᠠᡥᠠ ᡴᠠᡳ᠈ ᡨᡝ ᠠᡳᠨᠠᠮᠪᡳ ᠰᡝᡥᡝ ᠮᠠᠩᡤᡳ᠈ ᠪᠠᡳᠨᡩᠠᡵᡳ ᠪᡝᡳᠯᡝ ᠪᠠᠪᡝ ᠪᡝᡴᡳᠯᡝᠮᡝ ᠵᠠᠪᡩᡠᡶᡳ᠈ ᡠᡨᡥᠠᡳ ᡤᡡᠸᠠᠯᡳᠶᠠᡴᠠ ᠮᠠᠩᡤᡳ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᠴᠣᠣᡥᠠ ᡤᠠᡳᡶᡳ᠈ ᡥᠣᡳᡶᠠ ᡤᡠᡵᡠᠨ ᠪᡝ ᡩᠠᡳᠯᡝᠮᡝ ᡠᠶᡠᠨ ᠪᡳᠶᠠᡳ ᡳᠴᡝ ᡠᠶᡠᠨ ᡩᡝ ᠵᠣᡵᡳᡶᡳ ᠵᡠᠸᠠᠨ ᡩᡠᡳᠨ ᡩᡝ ᡳᠰᡳᠨᠠᡶᡳ᠈ ᡥᠣᡳᡶᠠ ᡥᠣᡨᠣᠨ ᠪᡝ ᡴᠠᡶᡳ ᠠᡶᠠᠮᡝ ᡤᠠᡳᡶᡳ᠈ ᡥᠣᡨᠣᠨ ᡳ ᡝᠵᡝᠨ ᠪᠠᡳᠨᡩᠠᡵᡳ ᠪᡝᡳᠯᡝ ᠠᠮᠠ ᠵᡠᡳ ᡤᡝᡵᡝᠨ ᠴᠣᠣᡥᠠ ᠪᡝ ᠸᠠᡶᡳ᠈ ᡝᡵᡤᡝᠨ ᠪᡝ ᡩᠠᡥᠠᠪᡠᡶᡳ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᡥᠣᡳᡶᠠ ᡤᡠᡵᡠᠨ ᡨᡝᡵᡝᠴᡳ ᡠᠮᡠᠰᡳ ᡤᡠᡴᡠᡥᡝ᠉ ᠰᡠᠸᠠᠶᠠᠨ ᠪᠣᠨᡳᠣ ᠠᠨᡳᠶᠠ᠈ ᡳᠯᠠᠨ ᠪᡳᠶᠠ ᡩᡝ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳᠨᡳ ᠵᡠᡳ ᠠᡵᡤᠠᡨᡠ ᡨᡠᠮᡝᠨ ᠪᡝᡳᠯᡝ᠈ ᡩᡝᠣᡳ ᠵᡠᡳ ᠠᠮᡳᠨ ᡨᠠᡳᠵᡳ ᡩᡝ ᠰᡠᠨᠵᠠ ᠮᡳᠩᡤᠠᠨ ᠴᠣᠣᡥᠠ ᠪᡝ ᠠᡶᠠᠪᡠᡶᡳ ᡠᠩᡤᡳᡶᡳ᠈ ᡠᠯᠠᡳ ᡤᡠᡵᡠ ᡳ ᡳᡥᠠᠨ ᠠᠯᡳᠨ ᡤᡝᠪᡠᠩᡤᡝ ᡥᠣᡨᠣᠨ ᠪᡝ ᡴᠠᡶᡳ ᠠᡶᠠᠮᡝ ᡤᠠᡳᡶᡳ᠈ ᡝᠮᡠ ᠮᡳᠩᡤᠠᠨ ᠨᡳᠶᠠᠯᠮᠠ ᠪᡝ ᠸᠠᡥᠠ᠉ ᡳᠯᠠᠨ ᡨᠠᠩᡤᡡ ᡠᡴᠰᡳᠨ ᠪᠠᡥᠠᡶᡳ᠈ ᠣᠯᠵᡳ ᡤᠠᠵᡳᠮᡝ ᠴᠣᠣᡥᠠ ᠪᡝᡩᡝᡵᡝᠮᡝ ᠵᡳᡵᡝᡩᡝ ᡩᡝ᠈ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝᡳ ᠴᠣᠣᡥᠠ᠈ ᠮᠣᠩᡤᠣᡳ ᡴᠣᡵᠴᡳᠨ ᡳ ᡠᠩᡤᠠᡩᠠᡳ ᠪᡝᡳᠯᡝᡳ ᠴᠣᠣᡥᠠ ᠠᠴᠠᡶᡳ ᡨᡠᠴᡳᡶᡳ᠈ ᡠᠯᠠᡳ ᡥᠣᡨᠣᠨ ᠴᡳ ᠣᡵᡳᠨ ᠪᠠᡳ ᡩᡠᠪᡝᡩᡝ ᡳᠯᡳᡶᡳ᠈ ᠠᠯᡩᠠᠩᡤᠠ ᡨᠣᠸᠠᡶᡳ ᠠᡶᠠᠴᡳ ᠣᠵᠣᡵᠣ ᠴᠣᠣᡥᠠ ᠸᠠᡴᠠ ᠰᡝᠮᡝ ᡤᡳᠰᡠᡵᡝᡶᡳ ᠪᡝᡩᡝᡵᡝᡥᡝ᠉ ᡨᡝᡵᡝ ᠠᠨᡳᠶᠠ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨ ᠯᡳᡳ ᡥᠠᠨ ᡳ ᠪᠠᡵᡠ ᠰᠠᡳᠨ ᠪᠠᠨᠵᡳᡴᡳ ᠰᡝᠮᡝ ᡤᡝᡵᡝᠨ ᠠᠮᠪᠠᠰᠠᡳ ᠪᠠᡵᡠ ᡥᡝᠨᡩᡠᠮᡝ᠈ ᡝᡥᡝ ᠪᡝ ᡤᡡᠨᡳᠴᡳ ᡝᠮᡠ ᡳᠨᡝᠩᡤᡳ ᠠᠨᡩᠠᠨ ᡩᡝ᠈ ᠰᠠᡳᠨ ᡩᠣᡵᠣ ᠪᡝ ᡠᡩᡠ ᡠᡩᡠ ᠶᠠᠯᠠ ᡩᡝ ᠪᠠᡳᠴᡳ ᠪᠠᡥᠠᡵᠠᡴᡡ ᠰᡝᠮᡝ᠈ ᠮᡠᠰᡝ ᡩᠠᡳᠮᡳᠩ ᡤᡠᡵᡠᠨ ᡳ ᡝᠮᡤᡳ ᠠᠮᠪᠠᠨ ᠨᠠ ᡩᡝ ᠠᡴᡩᡠᠯᠠᡶᡳ ᠰᠠᡳᠨ ᠪᠠᠨᠵᡳᡴᡳ ᠰᡝᠮᡝ ᡤᡳᠰᡠᡵᡝᡶᡳ᠈ ᡥᠣᡩᡠᠩ –ᠨᡳ ᠪᠠᡳ ᠯᡳᠣᡩᡠᠩ ᡥᡝᠴᡝᠨ ᡳ ᡶᡠ ᠵᡳᠶᠠᠩ᠈ ᡶᡠᡧᡠᠨ zᠣᠣ ᡥᠣᡨᠣᠨ ᡳ ᠸᠠᠩ ᠪᠠᡳ ᡳᠣᡳ ᡤᡠᠸᠠᠨ ᡳ ᡝᠮᡤᡳ ᠠᠴᠠᡶᡳ ᠵᡳᡥᡝ᠉ ᡩᡝ ᡶᠣᠯᠣᠮᡝ ᠪᡳᡨᡥᡝ ᠠᡵᠠᡶᡳ᠈ ᠠᠮᠪᠠᠨ ᡩᡝ ᡧᠠᠩᡤᡳᠶᠠᠨ ᠮᠣᡵᡳᠨ ᠸᠠᡶᡳ ᡤᠠᠰᡥᡡᡥᠠ᠉ ᡨᡝᡵᡝ ᡤᠠᠰᡥᡡᡥᠠ ᠪᡳᡨᡥᡝ ᡳ ᡤᡳᠰᡠᠨ ᡥᠠᠨ ᡳ ᠵᠠᠰᡝ ᠪᡝ ᠨᡳᡴᠠᠨ᠈ ᠮᠠᠨᠵᡠ ᠶᠠᠶᠠ ᡥᡡᠯᠠᠮᡝ ᡩᠠᠪᠠᠴᡳ᠈ ᡩᠠᠪᠠᡥᠠ ᠨᡳᠶᠠᠯᠮᠠ ᠪᡝ ᠰᠠᡥᠠ ᠨᡳᠶᠠᠯᠮᠠ ᠸᠠᡴᡳ᠈ ᠰᠠᡶᡳ ᡶᠠᡵᡴᡡᠴᡳ᠈ ᠸᠠᡥᠠ ᠠᡴᡡ ᠨᡳᠶᠠᠯᠮᠠ ᡩᡝ ᠰᡠᠨ ᡳᠰᡳᡴᡳᠨᡳ᠈ ᡝᡵᡝ ᡤᡳᠰᡠᠨ ᠪᡝ ᡩᠠᡳᠮᡳᠨ ᡤᡤᡠᡵᡠᠨ ᠠᡳᡶᡠᠴᡳ᠈ ᡩᠠᡳᠮᡳᠩ ᡥᠠᡳ ᡳ ᡤᡠᠸᠠᠩᠨᡳᠩ –ᠨᡳ ᡩᡠᡨᠠᠨ᠈ ᠰᡠᠩᠪᡳᠩ ᡤᡠᠸᠠᠨ᠈ ᠯᡳᠣᡩᡠᠩ –ᠨᡳ ᡩᠣᠣᠯᡳ᠈ ᡶᡠ ᡤᡳᠶᠠᠩ ᠨᡳᠩᡤᡠᠨ ᠠᠮᠪᠠᠨ ᠶᠠᠮᡠᠨ ᡳ ᡥᠠᡶᠠᠰᠠ ᡩᡝ ᡝᡥᡝ ᠰᡠᡳ ᡳᠰᡳᡴᡳᠨᡳᠨᡳ᠉ ᠮᠠᠨᠵᡠ ᠠᡳᡶᡠᠴᡳ᠈ ᠮᠠᠨᠵᡠ ᡩᡝ ᡝᡥᡝ ᠰᡠᡳ ᡳᠰᡳᡴᡳᠨᡳ ᠰᡝᠮᡝ ᠸᡝᡥᡝᡳ ᠪᡳᡨᡥᡝ ᠪᡝ ᠵᠠᠰᡝᡳ ᠵᠠᡴᡵᠠᠮᡝ᠈ ᠪᠠᠪᠠ ᡩᡝ ᡳᠯᡳᠪᡠᠮᡝ ᡤᠠᠰᡥᡡᡥᠠ᠉ ᡨᡝᡵᡝ ᡶᠣᠨᡩᡝ᠈ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝ᠈ ᡳᠨᡳ ᡳᡥᠠᠨ ᠠᠯᡳᠨ ᡳ ᡥᠣᡨᠣᠨ ᠪᡝ ᡤᠠᡳᡥᠠ ᡩᡝ ᡤᠣᠯᠣᡶᡳ ᡝᠯᠴᡳᠨ ᠶᠠᠪᡠᠮᡝ ᡩᡝᡵᡳᠪᡠᡶᡳ᠈ ᡠᠶᡠᠨ ᠪᡳᠶᠠ ᡩᡝ ᠪᡠᠵᠠᠨᡨᠠᡳ ᠪᡝᡳᠯᡝ ᡩᠠᠰᠠᠮᡝ ᠰᠠᡳᠨ ᠣᡶᡳ ᠪᠠᠨᠵᡳᡴᡳ ᠰᡝᠮᡝ ᠶᡝᡥᡝᡳ ᠨᠠᡵᡳᠮᠪᠣᠯᠣ ᠪᡝᡳᠯᡝ ᡳ ᠰᡠᠰᠠᡳ ᠨᡳᠶᠠᠯᠮᠠ ᠪᡝ ᠶᠠᡶᠠᡶᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᡝᠯᠴᡳᠨ ᡩᡝ ᠪᡠᡶᡳ ᡤᡝᠮᡠ ᠸᠠᡥᠠ᠉ ᡨᡝᡵᡝᠴᡳ ᠪᡠᠵᠠᠨᡨᠠᡳ ᠪᡝᡳᠯᡝ ᠠᠮᠪᠠᠰᠠ ᠪᡝ ᡨᠠᡴᡡᡵᠠᡶᡳ ᠪᡝᡳᠯᡝ ᠪᡳ ᡩᡠᡳᠨ ᠰᡠᠨᠵᠠ ᠵᡝᡵᡤᡳ ᡤᠠᠰᡥᡡᡥᠠ ᡤᡳᠰᡠᠨ ᠪᡝ ᡤᡡᠸᠠᠯᡳᠶᠠᡶᡳ᠈ ᡥᠠᠨ ᠠᠮᠠ ᡩᡝ ᡝᡥᡝ ᠣᡶᡳ ᡠᠮᠠᡳ ᡩᡝᡵᡝ ᠠᡴᡡ᠈ ᡥᠠᠨ ᠠᠮᠠ ᡳ ᠪᡝᠶᡝ ᡩᡝ ᠪᠠᠨᠵᡳᡥᠠ ᡝᠮᡠ ᠵᡠᡳ ᠪᡝ ᠮᡳᠨᡩᡝ ᠰᠠᡵᡤᠠᠨ ᠪᡠᠴᡳ᠈ ᠪᡳ ᠠᡨᠠᡥᡝᠮᡝ ᠠᡴᡩᠠᡶᡳ ᠪᠠᠨᠵᡳᡴᡳ ᠰᡝᡥᡝ ᠮᠠᠩᡤᡳ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳᠨᡳ ᠪᡝᠶᡝ ᡩᡝ ᠪᠠᠨᠵᡳᡥᠠ ᠮᡠᡴᡠᠰᡳ ᡤᡝᡤᡝ ᠪᡝ ᡤᡝᠯᡳ ᠰᠠᡵᡤᠠᠨ ᠪᡠᠮᡝ᠈ ᠠᠮᠪᠠᠰᠠ ᠪᡝ ᡨᠠᡴᡡᡵᠠᡶᡳ ᡩᠣᡵᠣᠯᠣᠮᡝ ᠪᡝᠨᡝᡥᡝ᠉ ᠰᠣᡥᠣᠨ ᠴᠣᡴᠣ ᠠᠨᡳᠶᠠ᠈ ᠵᡠᠸᡝ ᠪᡳᠶᠠ ᡩᡝ᠈ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨ ᠯᡳᡳ ᡥᠠᠨ ᡩᡝ ᠪᡳᡨᡥᡝ ᠪᡝ ᡠᠩᡤᡳᠮᡝ᠈ ᠰᠣᠯᡤᠣ -ᡳ ᠵᠠᠰᠠᡳ ᠵᠠᠩᡵᠠᠮᡝ ᡨᡝᡥᡝ ᠸᠠᡵᡴᠠᡳ ᠠᡳᠮᠠᠨ ᡳ ᠨᡳᠶᠠᠯᠮᠠ ᡤᡝᠮᡠ ᠮᡳᠨᡳᠩᡤᡝ ᡴᠠᡳ᠈ ᡨᡝᡵᡝ ᠪᡝ ᠪᠠᡳᠴᠠᡶᡳ ᠮᡳᠨᡩᡝ ᠪᡠ ᠰᡝᠴᡳᠨᠠ ᠰᡝᠮᡝ ᡥᠠᠪᡧᠠᡥᠠ ᠮᠠᠩᡤᡳ᠉ ᠸᠠᠨ ᠯᡳᡳ ᡥᠠᠨ ᠰᠣᠯᡤᠣ ᠸᠠᠩ ᡩᡝ ᡝᠯᠴᡳᠨ ᡨᠠᡴᡡᡵᠠᡶᡳ᠈ ᡤᡝᠮᡠ ᠪᠠᡳᠴᠠᠪᡠᡶᡳ᠈ ᠮᡳᠩᡤᠠᠨ ᠪᠣᡳᡤᠣᠨ ᡨᡠᠴᡳᠪᡠᡶᡳ ᡠᠩᡤᡳᡥᡝ᠉ ᠵᠣᡵᡥᠣᠨ ᠪᡳᠶᠠ ᡩᡝ᠈ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡥᡡᡵᡤᠠᠨ ᡥᡳᠶᠠ ᡩᡝ ᡝᠮᡠ ᠮᡳᠩᡤᠠᠨ ᠴᠣᠣᡥᠠ ᠠᡶᠠᠪᡠᡶᡳ᠈ ᡩᡝᡵᡤᡳ ᠮᡝᡩᡝᡵᡳ ᠸᡝᠵᡝᡳ ᠠᡳᠮᠠᠨ ᡳ ᡥᡠᠶᡝ ᡳ ᡤᠣᠯᠣ ᠪᡝ ᡩᠠᡳᠯᠠᠮᡝ ᡠᠩᡤᡳᡶᡳ᠈ ᡥᡠᠶᡝ ᡳ ᡤᠣᠯᠣ ᠪᡝ ᡤᡝᠮᡠ ᡤᠠᡳᡥᠠ᠉ ᠵᡠᠸᡝ ᠮᡳᠩᡤᠠᠨ ᠣᠯᠵᡳ ᠪᠠᡥᠠᡶᡳ ᡤᠠᠵᡳᡥᠠ᠉ ᡥᡡᡵᡤᠠᠨ ᡥᡳᡥᠶᠠ ᠪᡝ ᡨᡝᡵᡝ ᡥᡡᠶᡝ ᡳ ᡤᠣᠯᠣ ᠪᡝ ᡩᠠᡥᠠᠪᡠᡶᡳ᠈ ᡤᠠᠵᡳᡥᠠ ᠰᡝᠮᡝ ᡠᡴᠰᡳᠨ ᠰᠠᠴᠠ ᠮᠣᡵᡳᠨ ᡧᠠᠩᡤᠠᡶᡳ ᡩᠠᡵᡥᠠᠨ ᡥᡳᠶᠠ ᠰᡝᠮᡝ ᡤᡝᠪᡠ ᠪᡠᡥᡝ᠉ ᡨᡝᡵᡝ ᡶᠣᠨᡩᡝ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡩᡝ ᡩᠠᡥᠠᡥᠠ ᡩᡝᡵᡤᡳ ᠮᡝᡩᡝᡵᡳ ᠸᡝᠵᡝᡳ ᠠᡳᠮᠠᠨ ᡳ ᠨᠠᠮᡩᡠᠯᡠ᠈ ᠰᡠᡳᡶᡠᠨ᠈ ᠨᡳᠩᡤᡠᡨᠠ᠈ ᠨᡳᠮᠠᠴᠠ ᡝᡵᡝ ᡩᡠᡳᠨ ᡤᠣᠯᠣᡳ ᠠᠮᠪᠠᠨ ᡴᠠᠩᡤᡡᡵᡳ᠈ ᡴᠠᡴᡩᡠᡵᡳ᠈ ᠠᠩᡤᡡ᠈ ᠮᡳᠩᡤᠠᠨᡵᡠ᠈ ᡠᠯᡠᡴᠠ᠈ ᠰᡝᠩᡤᡝ᠈ ᠨᡳᡴᠠᡵᡳ᠈ ᡨᠠᠩᠰᡠᠩᡤᠠ᠈ ᠶᡝᠩᡧᡠ ᠪᡝ ᡤᡝᠮᡠ ᡩᠠᡥᠠᠪᡠᡶᡳ ᠪᠣᡳᡤᠣᠨ ᠪᡝ ᠵᡠᠯᡝᡵᡳ ᠵᡠᡵᠠᠮᠪᡠᡶᡳ᠈ ᡝᡳᡩᡠ ᠪᠠᡨᡠᡵᡠ ᠴᠣᠣᡥᠠ ᡤᠠᡳᡶᡳ᠈ ᠠᠮᠠᠰᡳ ᠪᡝᡩᡝᡵᡝᠮᡝ ᡤᠠᡳᡶᡳ᠈ ᠶᠠᡵᠠᠨ ᡳ ᡤᠣᠯ ᠪᡝ ᠰᡠᠴᡠᡶᡳ ᡤᡝᠮᡠ ᡤᠠᡳᡶᡳ᠈ ᡝᠮᡠ ᡨᡠᠮᡝᠨ ᠣᠯᠵᡳ ᡤᠠᠵᡳᠮᡝ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᡧᠠᡥᡡᠨ ᡠᠯᡤᡳᠶᠠᠨ ᠠᠨᡳᠶᠠ᠈ ᠵᡠᠸᡝ ᠪᡳᠶᠠ ᡩᡝ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡤᡠᡵᡤᡠ ᡳ ᡩᠣᡵᡤᡳ ᠰᠠᡵᡤᠠᠨ ᠠᡴᡡ ᠶᠠᡩᠠᡵᠠ ᠵᠣᠪᠣᡵᠣ ᠨᡳᠶᠠᠯᠮᠠ ᡩᡝ ᠰᠠᡵᡤᠠᠨ ᠪᡠᡥᡝ᠉ ᡤᡝᡤᡝ ᡳᠰᡳᡵᠠᡴᡡ ᠣᡶᡳ᠈ ᡴᡠᡳ ᡠᠯᡳᠨ ᠪᡝ ᡨᡠᠴᡳᠪᡠᡶᡳ ᠰᠠᡵᡤᠠᠨ ᠪᠠᡥᠠᡴᡡ ᠨᡳᠶᠠᠯᠮᠠ ᡩᡝ ᠰᠠᡵᡤᠠᠨ ᡤᠠᡳᠰᡠ ᠰᡝᠮᡝ ᠪᡠᡥᡝ᠈ ᡝᡵᡤᡝᠨ ᡤᡝᠮᡠ ᡠᡵᡥᡠᠨᠵᡝᡥᡝ᠉ ᠨᠠᡩᠠᠨ ᠪᡳᠶᠠᠠᡩᡝ᠈ ᡨᠠᡳᡯᡠ ᡴᡠᠨᡩᡠᠯᡝᡥᡝᠨ ᡥᠠᠨ ᡳᠨᡳ ᠵᡠᡳ ᠠᠪᡨᠠᡳ ᡨᠠᡳᠵᡳ᠈ ᡶᡳᠣᠩᡩᠣᠨ ᠵᠠᡵᡤᡡᠴᡳ᠈ ᡧᠣᠩᡴᠣᡵᠣ ᠪᠠᡨᡠᡵᡠ ᡩᡝ ᡝᠮᡠ ᠮᡳᠩᡤᠠᠨ ᠴᠣᠣᡥᠠ ᠠᡶᠠᠪᡠᡶᡳ ᡠᠩᡤᡳᡥᡝ᠉ ᡨᡝᡵᡝ ᠴᠣᠣᡥᠠ ᡤᡝᠨᡝᡶᡳ ᡩᡝᡵᡤᡳ ᡤᠣᠯᠣ ᠪᡝ ᠰᡠᠴᡠᡶᡳ ᡤᡝᠮᡠ ᡤᠠᠵᡳᡥᠠ ᠵᠠᡴᠠᡩᡝ᠈ ᠪᡳᠶᠠᡳ ᠵᡠᠸᠠᠨ ᡠᠶᡠᠨ ᡩᡝ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᡝᠮᡠ ᡝᠮᡝᡳ ᡩᡝᠣ ᡩᠠᡵᡥᠠᠨ ᠪᠠᡨᡠᡵᡠ ᠪᡝᡳᠯᡝ ᠠᡴᡡ ᠣᡥᠣ᠈ ᡨᡝᡥᡳ ᠵᠠᡴᡡᠨ ᠰᡝ ᠪᡳᡥᡝ᠉ ᡩᠠᡨᡥᠠᠨ ᠪᠠᡨᡠᡵᡠ ᠪᡝᡳᠯᡝ ᡩᡝ ᠪᠠᠨᠵᡳᡥᠠᠩᡤᡝ ᠠᠮᡳᠨ᠈ ᠵᠠᠰᠠᡴᡨᡠ᠈ ᡨᡠᠯᡠᠨ᠈ ᠵᠠᡳᠰᠠᠩᡤᡡ᠈ ᠵᡳᡵᡤᠠᠯᠠᠩ᠈ ᡶᡳᠶᠠᠩᡤᡡ ᠨᡳᠩᡤᡠᠨ ᡥᠠᡥᠠ ᠵᡠᡳ᠉ ᡨᡝᡵᡝ ᡶᠣᠨᡩᡝ᠈ ᡩᡝᡵᡤᡳ ᠮᡝᡩᡝᡵᡳ ᡥᡡᡵᡤᠠ ᡳ ᠠᡳᠮᠠᠨ ᡳ ᠵᠠᡴᡡᡨᠠ ᠪᠠᡳ ᠨᡳᠶᠠᠯᠮᠠ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡩᡝ ᡩᠠᡥᠠᡥᠠ ᠮᠠᠩᡤᡳ᠈ ᡤᡡᠰᡳᠨ ᡠᡴᠰᡳᠨ ᠪᡠᡥᡝ᠈ ᡨᡝᡵᡝ ᡠᡴᠰᡳᠨ ᠪᡝ ᡤᠠᠮᠠᡶᡳ ᠸᡝᠵᡝᡳ ᠠᡳᠮᠠᠨ ᡳ ᠰᠠᡥᠠᠯᡳᠶᠠᠨ ᡳ ᠪᠠᡳ ᠨᡳᠶᠠᠯᠮᠠ ᡩᡝ ᠪᡠᡶᡳ᠈ ᠮᠣᠣ ᡩᡝ ᠨᡝᡵᡝᠪᡠᡶᡳ ᡤᠠᠪᡨᠠᠪᡠᡥᠠ᠉ ᠵᠠᡳ ᡤᡝᠯᡳ ᡠᠯᠠᡳ ᡤᡠᡵᡠᠨ ᡳ ᠪᡠᠵᠠᠨᡨᠠᡳ ᠪᡝᡳᠯᡝ ᡳᠨᡩᡝ ᡩᠠᡥᠠ ᠰᡝᠮᡝ ᠪᡝᠨᡝᡥᡝ ᠪᠣᠰᠣ ᠪᡝ ᠠᠯᡳᠮᡝ ᡤᠠᡳᡥᠠ ᠮᠠᠩᡤᡳ᠉ ᠵᠣᡵᡥᠣᠨ ᠪᡳᠶᠠ ᡩᡝ᠈ ᡥᠠᠨ ᡳ ᡥᠣᠵᡳᡥᠣᠨ ᡥᠣᡥᠣᡵᡳ ᡝᡶᡠ᠈ ᡝᡳᡩᡠ ᠪᠠᡨᡠᡵᡠ᠈ ᡩᠠᡵᡥᠠᠨ ᡥᡳᠶᠠ᠈ ᡝᡵᡝ ᡳᠯᠠᠨ ᠠᠮᠪᠠᠨ ᡩᡝ ᠵᡠᠸᡝ ᠮᡳᠩᡤᠠᠨ ᠴᠣᠣᡥᠠ ᠠᡶᠠᠪᡠᡶᡳ᠈ ᠸᡝᠵᡝᡳ ᠠᡳᠮᠠᠨ ᡳ ᡥᡡᡵᡤᠠᡳ ᡤᠣᠯᠣ ᠪᡝ ᡩᠠᡳᠯᠠᠮᡝ ᡤᡝᠨᡝᡶᡳ ᠵᠠᡴᡡᡨᠠᡳ ᡥᠣᡨᠣᠨ ᠪᡝ ᡳᠯᠠᠨ ᡳᠨᡝᠩᡤᡳ ᡴᠠᡶᡳ ᡩᠠᡥᠠ ᠰᡝᠴᡳ᠈ ᡩᠠᡥᠠᡵᠠᡴᡡ ᠣᡶᡳ᠈ ᠠᡶᠠᠮᡝ ᡥᠣᡨᠣᠨ ᡩᡝ ᡩᠣᠰᡳᡤᡳ ᡝᠮᡠ ᠮᡳᠩᡤᠠᠨᠠ ᠨᡳᠶᠠᠯᠮᠠ ᠪᡝ ᠸᠠᡥᠠ᠉ ᠵᡠᠸᡝ ᠮᡳᠩᡤᠠᠨ ᠣᠯᠵᡳ ᠪᠠᡥᠠ᠉ ᡨᡝᡵᡝᡳ ᡧᡠᡝᡩᡝᠮᡝ ᡤᠣᠯᠣ ᠪᡝ ᡩᠠᡥᠠᠪᡠᡶᡳ᠈ ᡨᡠᠯᡝᡧᡝᠨ᠈ ᡝᡵᡝᡧᡝᠨ ᡤᡝᠪᡠᠩᡤᡝ ᠵᡠᠸᡝ ᠠᠮᠪᠠᠨ᠈ ᠰᡠᠨᠵᠠ ᡨᠠᠩᡤᡡ ᠪᠣᡳᡤᠣᠨ ᠪᡝ ᡩᠠᡳᠯᠠᠮᡝ ᡤᠠᠵᡳᡥᠠ᠉ ᠰᠠᡥᠠᠯᡳᠶᠠᠨ ᠰᡳᠩᡤᡝᡵᡳ ᠠᠨᡳᠶᠠ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᠮᠣᠩᡤᠣ ᡤᡠᡵᡠᠨ ᡳ ᡴᠣᡵᠴᡳᠨ ᡳ ᠮᡳᠩᡤᠠᠨ ᠪᡳᡝᠯᡝᡳ ᠰᠠᡵᡤᠠᠨ ᠵᡠᡳ ᠪᡝ ᠰᠠᡳᠨ ᠰᡝᠮᡝ ᡩᠣᠨᠵᡳᡶᡳ᠈ ᡝᠯᠴᡳᠨ ᡨᠠᡴᡡᡵᠠᡶᡳ ᡤᠠᡳᡴᡳ ᠰᡝᡵᡝ ᠵᠠᡴᠠᡩᡝ᠈ ᠮᡳᠩᡤᠠᠨ ᠪᡝᡳᠯᡝ ᡳᠨᡳ ᠰᠠᡵᡤᠠᠨ ᠵᡠᡳ ᠪᡝ ᡩᠠ ᡝᡳᡤᡝᠨ ᠴᡳ ᡥᠣᡴᠣᠪᡠᡶᡳ᠈ ᡳᠨᡳ ᠶᡝᡥᡝ ᡩᡝ ᡩᠠᡶᡳ᠈ ᡠᠶᡠᠨ ᡥᠠᠯᠠᡳ ᡤᡠᡵᡠᠨ ᡳ ᠴᠣᠣᡥᠠ ᠵᡳᡥᡝ ᡶᠣᠨᡩᡝ᠈ ᠪᠣᠨᡨᠣᡥᠣ ᠮᠣᡵᡳᠨ ᠶᠠᠯᡠᡶᡳ ᠪᡠᡵᠯᠠᠮᡝ ᡨᡠᠴᡳᡴᡝ᠈ ᡠᡵᡳᠴᡳ ᠠᠨᡳᠶᠠ ᡳᠨᡳ ᠰᠠᡵᡤᠠᠨ ᠵᡠᡳ ᠪᡝ ᠪᡝᠨᠵᡳᡵᡝ ᡩᡝ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡩᠣᡵᠣᠯᠣᠮᡝ ᠣᡴᡩᠣᡶᡳ ᠠᠮᠪᠠ ᠰᠠᡵᡳᠨ ᠰᠠᡵᡳᠯᠠᠮᡝ ᡤᠠᡳᡥᠠ᠉ ᡨᡝᡵᡝ ᠣᠨᡩᡝ᠈ ᡠᠯᠠᡳ ᡤᡠᡠᡵᠨ ᡳ ᠪᡠᠵᠠᠨᡨᠠᡳ ᠪᡝᡳᠯᡝ ᡤᡝᠯᡳ ᡤᡡᠸᠠᠯᡳᠶᠠᡤᡶᡳ᠈ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡩᡝ ᡩᠠᡥᠠᡥᠠ ᠸᡝᠵᡝᡳ ᠠᡳᠮᠠᠨ ᡳ ᡥᡡᡵᡤᠠᡳ ᡤᠣᠯᠣ ᠪᡝ ᠵᡠᠸᡝ ᠵᡝᡵᡤᡳ ᠰᡠᠴᡠᡶᡳ ᡤᠠᠮᠠᡥᠠ᠈ ᠵᡳᠠ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᠶᠠᠪᡠᡶᡳ ᠶᠠᡶᠠᠨ ᠪᡠᡥᡝ ᠶᡝᡥᡝᡳ ᡤᡠᡵᡠᠨ ᡳ ᠪᡠᠵᠠᡳ ᠪᡝᡳᠯᡝ ᡳ ᠰᠠᡵᡤᠠᠨ ᠵᡠᡳ ᠪᡝ ᡤᠠᡳᠮᠪᡳ ᠰᡝᠮᡝ ᡤᡳᠰᡠᡵᡝᡥᡝ᠉ ᡥᠠᠨ ᡳ ᠪᡠᡥᡝ ᠰᠠᡵᡤᠠᠨ ᠵᡠᡳ ᡠᠨᠵᡝ ᡤᡝᡤᡝ ᠪᡝ ᠶᠣᡵᡩᠣᡥᠣ᠉ ᡨᡝᡵᡝ ᠪᡝ ᡩᠣᠨᠵᡳᡶᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᠠᠮᠪᡠᠯᠠ ᡴᠣᡵᠰᠣᡶᡳ᠈ ᡠᠶᡠᠨ ᠪᡳᠶᠠᡳ ᠣᡵᡳᠨ ᠵᡠᠸᡝ ᡩᡝ᠈ ᡤᡝᡵᡝᠨ ᠴᠣᠣᡥᠠ ᠪᡝ ᡤᠠᡳᡶᡳ᠈ ᡠᠯᠠᡳ ᡤᡠᡵᡠᠨ ᠪᡝ ᡩᠠᡳᠯᠠᠮᡝ ᠵᡠᡵᡴᠠᠨ ᠣᡵᡳᠨ ᡠᠶᡠᠨ ᡩᡝ᠈ ᡠᠯᠠᡳ ᡤᡠᡵᠨ ᡩᡝ ᠴᠣᠣᡥᠠ ᡳᠰᡳᠨᠠᡶᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨᡥᠠᠨ ᠰᡠᠸᠠᠶᠠᠨ ᠰᠠᡵᠠ ᡨᡠᡴᡳᠶᡝᡶᡳ᠈ ᠯᠠᠪᠠ ᠪᡳᠯᡝᡵᡳ ᡶᡠᠯᡤᡳᠶᡝᠮᡝ᠈ ᡨᡠᠩᡴᡝᠨ ᠴᠠᠨ ᡩᡠᠮᡝ᠈ ᠠᠮᠪᠠ ᠴᠣᠣᡥᠠ ᡠᠯᠠᡳ ᠪᡳᡵᠠᡳ ᠪᡳᡨᡠᠮᡝᠨ ᡤᡝᠨᡝᡵᡝᡩᡝ᠈ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝ ᠴᠣᠣᡥᠠ ᡤᠠᡳᡶᡳ᠈ ᡥᡝᠴᡝᠨ ᠴᡳ ᡨᡠᠴᡳᡶᡳ ᠣᡴᡩᠣᠮᡝ ᠵᡳᡶᡳ᠈ ᡠᠯᠠᡳ ᠪᡳᡵᠠᡳ ᡩᠠᠯᡳᠨ ᡩᡝ ᡳᠯᡳᡶᡳ ᡨᡠᠸᠠᠴᡳ᠈ ᠮᠠᠨᠵᡠ ᡤᡠᡵᡠᠨ ᡳ ᠴᠣᠣᡥᠠ ᡠᡴᠰᡳᠨ ᠰᠠᠴᡳ ᡤᡳᠯᡨᠠᡵᠵᠠᠮᡝ᠈ ᠨᡳᠶᠠᠯᠮᠠ ᡨᠠᠰᡥᠠ ᡳ ᠠᡩᠠᠯᡳ᠈ ᠮᠣᡨᡳᠨ ᠮᡠᡩᡠᡵᡳ ᠠᡩᠠᠯᡳ ᡥᠣᡵᠣᠨ ᡥᡡᠰᡠᠨ ᡤᡝᠯᠴᡠᡴᡝ᠉ ᡠᠯᠠᡳ ᠴᠣᠣᡥᠠᡳ ᠨᡳᠶᠠᠯᠮᠠ ᠰᠠᠪᡠᡶᡳ᠈ ᡤᡝᠮᡠ ᡤᠣᠯᠣᡶᡳ ᠠᡶᠠᡵᠠ ᠮᡠᠵᡳᠯᡝᠨ ᠠᡴᡡ᠉ ᡨᡝᡵᡝᠴᡳ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡠᠯᠠᡳ ᠪᡳᡵᠠᡳ ᡩᠠᠯᡳᠨ ᠪᡝ ᠪᡳᡨᡠᠮᡝᠨ ᠸᠠᠰᡳᡶᡳ᠈ ᡝᠪᡝᡵᡤᡳ ᡩᠠᠯᡳᠨ ᡳ ᠰᡠᠨᠵᠠ ᡥᠣᡨᠣᠨ ᠪᡝ ᠠᡶᠠᠮᡝ ᡤᠠᡳᡶᡳ᠈ ᡠᠯᠠᡳ ᡤᡠᡵᡠᠨ ᡳ ᠪᡠᠵᠠᠨᡨᠠᡳ ᠪᡝᡳᠯᡝᡳ ᡨᡝᡥᡝ ᠠᠮᠪᠠ ᡥᡝᠴᡝᠨ ᡳ ᠸᠠᡵᡤᡳᡩᡠᡴᠠᡳ ᡨᡝᡳᠰᡠ ᠵᡠᠸᡝ ᠪᠠᡳ ᡩᡠᠪᡝᡳ ᠪᡳᡵᠠᡳ ᠪᠠᠵᠠᡵᡤᡳ ᡤᠠᡳᡶᡳ᠈ ᡳᠩ ᡳᠯᡳᡥᠠ᠉ ᠵᡠᠸᠠᠨ ᠪᡳᠶᠠᡳ ᡳᠴᡝ ᡳᠨᡝᠩᡤᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᠠᠮᠪᠠᠨ ᡩᡝ ᡳᡥᠠᠨ ᠸᠠᡶᡳ᠈ ᡨᡠ ᠸᡝᠴᡝᠮᡝ ᡨᡠᠸᠠᡶᡳ ᡨᡠᠸᠠᠴᡳ᠈ ᡧᡠᠨ ᡩᡝᡴᡩᡝᡵᡝ ᡝᡵᡤᡳ ᠴᡳ ᠠᠮᠪᠠᠨ ᠴᡳ ᡧᠠᠩᡤᡳᠶᠠᠨ ᠯᠠᠮᡠᠨ ᠰᡳᡵᡝᠨ ᠰᡠᠮᠠᡶᡳ᠈ ᡠᠯᠠᡳ ᠠᠮᠪᠠ ᡥᡝᠴᡝᠨ ᡳ ᠠᠮᠠᡵᡤᡳ ᡩᡝ ᡥᠠᡩᠠᡥᠠᠪᡳ᠉ ᡨᡠᠪᠠᡩᡝ ᡳᠯᠠᠨ ᡩᡝᡩᡠᠮᡝ ᠪᠠᠪᠠᠠᡳ ᠵᡝᡴᡠ ᠪᡝ ᡨᡠᠸᠠ ᠰᡳᠨᡩᠠᠮᡝ ᠮᠠᠨᠠᠪᡠᠮᡝ ᠪᡳᠰᡳᡵᡝ ᡩᡝ᠈ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝ ᡳᠨᡝᠩᡤᡳ ᡠᠯᠠᡳ ᠴᠣᠣᡥᠠ ᡤᠠᡳᡶᡳ ᡥᡝᠴᡝᠨ ᠴᡳ ᡨᡠᠴᡳᡶᡳ᠈ ᠪᡳᡵᠠᡳ ᡩᠠᠯᡳᠨ ᡩᡝ ᠪᠠᡴᠴᡳᠯᠠᠮᡝ ᡳᠯᡳᠮᠪᡳ᠈ ᡩᠣᠪᠣᡵᡳ ᠣᠴᡳ ᡥᡝᠴᡝᠨ ᡩᡝ ᡩᠣᠰᡳᡶᡳ ᡩᡝᡩᡠᠮᠪᡳ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᠵᡠᠸᡝ ᠵᡠᡳ ᠮᠠᠩᡤᡡᠯᡨᠠᡳ ᠪᡝᡳᠯᡝ᠈ □□ ᠪᡝᡳᠯᡝ ᠪᡳᡵᠠ ᠪᡝ ᡩᠣᠣᡶᡳ ᠠᡶᠠᡴᡳ ᠰᡝᠴᡳ᠈ ᡥᠠᠨ ᡥᡝᠨᡩᡠᠮᡝ᠈ ᠰᡠᠸᡝ ᠮᡠᡴᡝ ᠪᡝ ᠣᡳᠯᠣᡵᡳ ᡶᠠᡳᡩᠠᡵᠠ ᠠᡩᠠᠯᡳ᠈ ᡠᠮᡝ ᡤᡳᠰᡠᡵᡝᡵᡝ ᡶᡝᡵᡝ ᠪᡝ ᡥᡝᠴᡝᠮᡝ ᡤᡳᠰᡠᡵᡝ ᠴᡳᠨᠠ᠈ ᠠᠮᠪᠠ ᠮᠣᠣ ᠪᡝ ᡠᡨᡥᠠᡳ ᠪᡳᠯᠠᠴᡳ ᠪᡳᠵᠠᠮᠪᡳᠣ᠈ ᠰᡠᡥᡝᡳ ᠰᠠᠴᡳᠮᡝ ᡴᡳᠶᠠᡨᠠᡵᠠᠮᡝ ᠨᠠᡵᡥᡡᠨ ᠣᠪᡠᡶᡳ ᠪᡳᠯᠠᠴᡳ ᠪᡳᠵᠠᠮᠪᡳ᠈ ᡩᡝᡵᡝ ᡨᡝᡥᡝᡵᡝᡥᡝ ᠠᠮᠪᠠ ᡤᡠᡵᡠᠨ ᠪᡝ ᡝᠮᡠ ᠮᡠᡩᠠᠨ ᡩᡝ ᠸᠠᠴᡳᡥᡳᠶᠠᡴᡳ ᠰᡝᠴᡳ ᠸᠠᠵᡳᠮᠪᡳᠣ᠈ ᡨᡠᠯᡝᡵᡤᡳ ᡤᡠᡵᡠᠨ ᠪᡝ ᡤᡝᠮᡠ ᠠᡵᡤᡳᠶᠠᠮᡝ ᡤᠠᡳᡴᡳ᠈ ᠠᠮᠪᠠ ᡥᡝᠴᡝᠨ ᡳ ᠴᠠᠩᡤᡳ ᡶᡠᠨᠴᡝᡶᡳ ᡨᡠᠯᡝᡵᡤᡳ ᡤᡠᡵᡠᠨ ᡤᡝᠮᡠ ᡤᠠᡳᠪᡠᡶᡳ᠈ ᠠᡥᠠ ᠸᠠᠵᡳᡶᡳ ᠠᡩᠠᡵᠠᠮᡝ ᠪᡳᠮᠪᡳ᠈ ᠵᡠᡧᡝᠨ ᠸᠠᠵᡳᠴᡳ ᠪᡝᡳᠯᡝ ᠠᡩᠠᡵᠠᠮᡝ ᠪᠠᠨᠵᡳᠮᠪᡳ ᠰᡝᠮᡝ ᡥᡝᠨᡩᡠᠮᡝ ᠣᡥᠣ ᠠᡴᡡ᠉ ᡨᡝᡵᡝ ᠨᡳᠩᡤᡠᠨ ᡥᠣᡨᠣᠨ ᠪᡝ ᡤᡝᠮᡠ ᡝᡶᡠᠯᡝᡶᡳ ᠪᠣᠣ ᠵᡝᡴᡠ ᠪᡝ ᡤᡝᠮᡠ ᡨᡠᠸᠠ ᠰᡳᠨᡩᠠᡶᡳ ᠪᡝᡩᡝᡵᡝᠮᡝ ᠵᡳᠮᡝ ᡶᡠᠯᡥᠠ ᡤᡝᠪᡠᠩᡤᡝ ᡩᠣᡥᠣᠨᡩᡝ ᡳᠩ ᡳᠯᡳᡥᠠ ᠮᠠᠩᡤᡳ᠉ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝ ᡠᠪᠠᡥᠠᡳ ᠪᠠᡨᡨᡠᡵᡠ ᠪᡝ ᡠᠩᡤᡳᡶᡳ ᠸᡝᡳᡥᡠᡩᡝ ᡨᡝᡶᡳ᠈ ᠵᡳᡶᡳ ᠸᡝᡳᡥᡠᡳ ᡩᡝᠯᡝ ᡳᠯᡳᡶᡳ ᡥᡡᠯᠠᠮᡝ ᡥᡝᠨᡩᡠᠮᡝ᠈ ᠠᠮᠠᡥ ᠠᠨ ᡴᠣᡵᠰᠣᡶᡳ ᠵᡳᠯᡳ ᠪᠠᠨᠵᡳᡶᡳ ᠴᠣᠣᡥᠠ ᠵᡳᡥᡝᠪᡳᡩᡝᡵᡝ᠈ ᠠᠮᠠ ᡥᠠᠨ ᡳ ᠵᡳᠯᡳ ᠪᠠᠨᠵᡳᡥᠠᠩᡤᡝ ᠪᡝᡩᡝᡵᡝᡥᡝ ᡴᠠᡳ᠈ ᡝᠮᡠ ᡤᡳᠰᡠᠨ ᠪᡝ ᡥᡝᠨᡩᡠᡶᡳ ᡤᡝᠨᡝᡵᡝ ᠪᡳᡥᡝᠣ ᠰᡝᠮᡝ ᡥᡝᠨᡩᡠᡶᡳ᠈ ᡳᠯᠠᠨ ᠮᡠᡩᠠᠨ ᡝᠯᠴᡳᠨ ᡨᠠᡴᡡᡵᠠᡧᠠᠮᡝ ᡤᡳᠰᡠᡵᡝᡶᡳ᠈ ᠪᡠᠵᠠᠨᡨᠠᡳ ᠪᡝᡳᠯᡝ ᠨᡳᠩᡤᡠᠨ ᠠᠮᠪᠠᠨ ᠪᡝ ᡤᠠᡳᡶᡳ᠈ ᡶᡝᡳᡥᡠᡩᡝ ᡨᡝᡶᡳ᠈ ᠪᡳᡵᠠᡳ ᡩᡠᠯᡳᠮᠪᠠᡩᡝ ᠵᡳᡶᡳ ᡳᠯᡳᡶᡳ ᠸᡝᡳᡥᡠᡳ ᡩᡝᠯᡝ ᠨᡳᠶᠠᡴᡡᡵᠠᡶᡳ ᡥᡝᠩᡴᡳᠯᡝᡶᡳ ᡥᡡᠯᠠᠮᡝ ᡥᡝᠨᡩᡠᠮᡝ᠈ ᡠᠯᠠᡳ ᡤᡠᡵᡠᠨ ᠠᠮᠠ ᡥᠠᠨ ᠰᡳᠨᡳ ᡤᡠᡵᡠᠨ ᡴᠠᡳ᠈ ᠵᡝᡴᡠ ᠪᡝ ᡨᡠᠸᠠ ᠰᡳᠨᡩᠠᡵᠠ ᠪᡝ ᠨᠠᡴᠠᡵᠠ ᠪᡳᡥᡝᠣ ᠰᡝᠮᡝ ᡥᡝᠩᡴᡳᠯᡝᠮᡝ ᠪᠠᡳᡥᠠ ᠮᠠᠩᡤᡳ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡴᡳᠯᡨᡝᡵᡳ ᡠᡴᠰᡳᠨ ᡝᡨᡠᡶᡳ᠈ ᠠᠮᠪᠠ ᡧᠠᠩᡤᡳᠶᠠᠨ ᠰᡠᡵᡠ ᠮᠣᡵᡳᠨ ᠶᠠᠯᡠᡶᡳ᠈ ᠪᡝᡳᠰᡝ ᠠᠮᠪᠠᠰᠠ ᠪᡝ ᡤᠠᡳᡶᡳ᠈ ᡤᡝᡵᡝᠨ ᠴᠣᠣᡥᠠ ᠵᡠᠯᡝᡵᡳ ᡨᡠᠸᠠᡶᡳ ᠪᡳᡵᠠ ᡩᡝ ᠮᠣᡵᡳᠨ ᡳ ᡥᡝᡶᡝᠯᡳ ᡩᡝᠯᡳ ᠣᠯᠣᠮᡝ ᡳᠯᡳᡶᡳ᠈ ᡩᡝᠨ ᠵᡳᠯᡤᠠᠨ ᡳ ᠵᡳᠯᡩᠠᠮᡝ ᡥᡝᠨᡩᡠᠮᡝ᠈ ᠪᡠᠵᠠᠨᡨᠠᡳ ᠰᡳᠮᠪᡝ ᡠᠵᡳᡶᡳ ᠰᡳᠨᡩᠠᡶᡳ ᡠᠩᡤᡳᡶᡳ ᡠᠯᠠᡳ ᡤᡠᡵᡠᠨ ᡩᡝ ᡝᠵᡝᠨ ᠣᠪᡠᡥᠠ᠉ ᠮᡳᠨᡳ ᡳᠯᠠᠨ ᠰᠠᡵᡤᠠᠨ ᠵᡠᡳ ᠪᡝ ᠰᡳᠨᡩᡝ ᠰᠠᡵᡤᠠᠨ ᠪᡠᡥᡝ᠈ ᠠᠮᠪᠠᠨ ᠪᡝ ᡩᡝᠨ᠈ ᠨᠠ ᠪᡝ ᠵᡳᡵᠠᠮᡳᠨ ᠰᡝᠮᡝ ᠨᠠᡩᠠᠨ ᠵᡝᡵᡤᡳ ᡤᠠᠰᡥᡡᡥᠠ ᡤᡳᠰᡠᠨ ᠪᡝ ᡤᡡᠸᠠᠯᡳᠶᠠᡶᡳ᠈ ᠮᡳᠨᡳ ᡥᠠᡵᠠᠩᡤᠠ ᡥᡡᡵᡤᠠᡳ ᡤᠣᠯᠣ ᠪᡝ ᠵᡠᠸᡝ ᠵᡝᡵᡤᡳ ᠰᡠᠴᡠᡶᡳ ᡤᠠᠵᡳᡥᠠ᠉ ᠮᡳᠨᡳ ᠶᠠᡶᠠᠨ ᠪᡠᠮᡝ ᠶᠠᠪᡠᡥᠠ ᠶᡝᡥᡝᡳ ᠰᠠᡵᡤᠠᠨ ᠵᡠᡳ ᠪᡝ ᠪᡠᠵᠠᠨᡨᠠᡳ ᠰᡳ ᡩᡠᡵᡳᠮᡝ ᡤᠠᡳᠮᠪᡳ ᠰᡝᠮᡝ ᡤᡳᠰᡠᡵᡝᡥᡝ᠉ ᠵᠠᡳ ᡤᡝᠯᡳ ᠮᡳᠨᡳ ᠰᠠᡵᡤᠠᠨ ᠵᡠᡳ ᠪᡝ ᠶᠣᡵᡩᠣᡥᠣ᠈ ᠮᡳᠨᡳ ᠵᡠᠰᡝ ᠪᡝ ᡝᠨᠴᡠ ᡤᡠᡵᡠᠨ ᡩᡝ ᡤᡝᠨᡝᡶᡳ ᡝᠵᡝᠨ ᡶᡠᠵᡳᠨ ᠣᡶᡳ ᠪᠠᠨᠵᡳᡴᡳᠨᡳ ᠰᡝᠮᡝ ᠪᡠᡥᡝ᠉ ᡨᡝᡵᡝ ᠰᡳᠮᠪᡝ ᠶᠣᡵᡩᠣᡴᡳᠨᡳ ᠰᡝᠮᡝ ᠪᡠᡥᡝ ᠪᡳᡥᡝᠣ᠈ ᠮᡳᠨᡳ ᠵᡠᡳ ᡝᡥᡝ ᠸᡝᡳᠯᡝ ᠠᡵᠠᠴᡳ ᠮᡳᠨᡩᡝ ᠠᠯᠠᠨᠵᡳᠴᡳᠨᠠ᠈ ᠠᠪᡴᠠ ᠴᡳ ᠸᠠᠰᡳᡴᠠ ᠠᡳᠰᡳᠨ ᡤᡳᠣᡵᠣ ᡥᠠᠯᠠᡳ ᠨᡳᠶᠠᠯᠮᠠ ᡩᡝ ᡤᠠᠯᠠ ᡳᠰᡳᡴᠠ ᡴᠣᠣᠯᡳ ᠪᡝ ᠰᡳ ᡨᡠᠴᡳᠪᡠ᠈ ᡨᠠᠩᡤᡡ ᠵᠠᠯᠠᠨ ᠪᡝ ᠰᠠᡵᡴᡡ ᡩᡝᡵᡝ᠈ ᠵᡠᠸᠠᠨ ᠵᠠᠯᠠᠨ ᠴᡳ ᡝᠪᠰᡳ ᠰᡳ ᠰᠠᡵᡴᡡ ᠪᡳᠣ᠈ ᠮᡳᠨᡳ ᠠᡳᠰᡳᠨ ᡤᡳᠣᡵᠣ ᡥᠠᠯᠠᠩᡤᠠ ᠨᡳᠶᠠᠯᠮᠠ ᡩᡝ ᡤᠠᠯᠠ ᡳᠰᡳᡴᠠ ᡴᠣᠣᠯᡳ ᠪᡳᠴᡳ᠈ ᠪᡠᠵᠠᠨᡨᠠᡳ ᠰᡳ ᡠᡵᡠ ᠣᡴᡳᠨᡳ᠈ ᠮᡳᠨᡳ ᠴᠣᠣᡥᠠ ᠵᡳᡥᡝᠩᡤᡝ ᠸᠠᡴᠠ ᠮᡠᠵᠠᠩᡤᠠ᠈ ᡤᠠᠯᠠ ᡳᠰᡳᡴᠠ ᡴᠣᠣᠯᡳ ᠠᡴᡡ ᠣᠴᡳ᠈ ᠪᡠᠵᠠᠨᡨᠠᡳ ᠰᡳ ᠠᡳ ᡨᡠᡵᡤᡠᠨ ᡩᡝ ᠮᡳᠨᡳ ᠵᡠᡳ ᠪᡝ ᠶᠣᡵᡩᠣᡥᠣ᠈ ᡤᡝᠪᡠ ᠪᡝ ᠪᡳ ᡨᡠᠩᡤᡝᠨ ᡩᡝ ᡨᡠᠪᡝᠯᡳᠶᡝᡶᡳ ᡨᡝᠮᠪᡳᠣ᠈ ᠪᡝᠴᡝᠴᡳ ᡤᠠᠮᠠᠮᠪᡳᠣ᠈ ᠵᡠᠯᡤᡝᡳ ᠨᡳᠶᠠᠯᠮᠠᡳ ᡥᡝᠨᡩᡠᡥᡝᠩᡤᡝ᠈ ᡤᡝᠪᡠ ᠪᡳᠵᠠᡵᠠ ᠠᠩᡤᠠᠯᠠ ᡤᡳᡵᠠᠩᡤᡳ ᠪᡳᠵᠠ ᠰᡝᡥᡝᠪᡳ᠈ ᡝᡵᡝ ᡩᠠᡳᠨ ᠪᡝ ᠪᡳ ᠪᡠᠶᡝᠮᡝ ᠰᠠᠪᠵᡝᠯᡝᠮᡝ ᠵᡳᡥᡝᠩᡤᡝ ᠸᠠᡴᠠ᠈ ᠮᡳᠨᡳ ᠵᡠᡳ ᠪᡝ ᠶᠣᡵᡩᠣᡥᠣ ᠰᡝᠮᡝ ᡩᠣᠨᠵᡳᡶᡳ᠈ ᡝᡩᡝ ᡴᠣᡵᡶᠣᡩᡳ ᠮᡳᡳᠨᡳ ᠪᡝᠶᡝ ᠴᠣᠣᡥᠠ ᡳᠯᡳᡶᡳ ᠵᡳᡥᡝᠩᡤᡝ ᡝᡵᡝ ᡳᠨᡠ᠉ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝ ᠵᠠᠪᡠᠮᡝ᠈ ᠮᡠᠰᡝᡳ ᠠᠮᠠ ᠵᡠᡳ ᠪᡝ ᡝᡥᡝ ᠣᡴᡳᠨᡳ ᠰᡝᠮᡝ ᠨᡳᠶᠠᠯᠮᠠ ᠪᡝᠯᡝᠮᠪᡳ ᡩᡝᡵᡝ᠈ ᠰᡳᠨᡳ ᠵᡠᡳ ᠪᡝ ᠶᠣᡵᡩᠣᡵᠣ ᠰᡳᠨᡳ ᠶᠠᠪᡠᡥᠠ ᠰᠠᡵᡤᠠᠨ ᠵᡠᡳ ᠪᡝ ᠪᡳ ᡤᠠᡳᠮᠪᡳ ᠰᡝᠮᡝ ᡤᡳᠰᡠᡵᡝᠮᠪᡳᡥᡝ ᠪᡳᠴᡳ᠈ ᡩᡝᠯᡝ ᠠᠮᠪᠠᠨ ᠪᡳ᠈ ᠪᡳ ᠮᡠᡴᡝᡳ ᡩᡝᠯᡝ ᡳᠯᡳᡥᠠᠪᡳ᠉ ᠮᡠᡴᡝᡳ ᡝᠵᡝᠨ ᠮᡠᡩᡠᡵᡳ ᡥᠠᠨ ᠠᡩᠠᠮᠪᡳᠣ᠈ ᡨᡝᡵᡝ ᡤᡳᠰᡠᠨ ᡤᡝᠮᡠ ᡨᠠᡧᠠᠨ ᡴᠠᡳ᠈ ᠪᡠᠵᠠᠨᡨᠠᡳ ᠪᡝᡳᠯᡝᡳ ᠠᠮᠪᠠᠨ ᠯᠠᠪᡨᠠᡳ ᠵᠠᡵᡤᡡᠴᡳ ᠪᠠ ᠪᡳᠴᡳ᠈ ᡝᠮᡠ ᠨᡳᠶᠠᠯᠮᠠ ᠪᡝ ᡝᠯᠴᡳᠨ ᡨᠠᡴᡡᡵᠠᡶᡳ ᡶᡠᠵᡳᠴᡳᠨᠠ ᠰᡝᡥᡝ ᠮᠠᠩᡤᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡥᡝᠨᡩᡠᠮᡝ᠈ ᠯᠠᠪᡨᠠᡳ ᠰᡳᠨᡳ ᡤᡝᠰᡝ ᠨᡳᠶᠠᠯᠮᠠ ᠮᡳᠨᡩᡝ ᠠᡥᡡᠨ᠈ ᠮᡳᠨᡳ ᠵᡠᡳ ᠪᡝ ᠶᠣᡵᡩᠣᠮᡝ ᠪᡝ ᠰᡳ ᠠᡴᡡ ᠰᡝᠮᠪᡳᠣ᠈ ᠮᡳᠨᡳ ᠶᠠᠪᡠᡥᠠ ᠰᠠᡵᡤᠠᠨ ᠵᡠᡳ ᠪᡝ ᡩᡠᡵᡳᠮᡝ ᡤᠠᡳᡴᡳ ᡤᡳᠰᡠᡵᡝᠩᡤᡝ ᠪᡝ ᡨᠠᡧᠠᠨ ᠰᡝᠮᠪᡳᠣ᠈ ᡨᠠᡧᠠᠨ ᠣᠴᡳ ᠪᡳ ᠶᠠᡵᡤᡳᠶᠠᠯᠠᠮᡝ ᡶᠣᠨᠵᡳᠮᠪᡳ ᡩᡝᡵᡝ᠈ ᠶᠠᡵᡤᡳᠶᠠᠨ ᠪᠠᡩᡝ ᠪᡳ ᠠᡳᠨᡠ ᡶᠣᠨᠵᡳᠮᠪᡳ᠈ ᡝᡵᡝ ᠪᡳᡵᠠ ᡤᡝᠯᡳ ᠵᡠᡥᡝ ᠵᠠᡶᠠᡵᠠᡴᡡ ᡴᠣᠣᠯᡳ ᠪᡳᠣ᠈ ᠪᡳ ᠰᡳᠨᡩᡝ ᡨᡝ ᡝᠮᡤᡝᡵᡳ ᡳᡴᡳᠨᠵᡳᡵᠠᡴᡡ ᡩᠣᡵᠣ ᠪᡳᠣ᠈ ᠯᠠᠪᡨᠠᡳ ᠰᡳ ᠮᡳᠨᡳ ᠯᠣᡥᠣ ᠪᡝ ᠠᠯᡳᠮᡝ ᡤᠠᡳᠮᡝ ᠮᡠᡩᡝᡵᡝᠣ ᠰᡝᠮᡝ ᡥᡝᠨᡩᡠᡥᡝ ᠮᠠᠩᡤᡳ᠉ ᠪᡠᠵᠠᠨᡨᠠᡳ ᠪᡝᡳᠯᡝ ᡤᠣᠯᠣᡶᡳ ᠯᠠᠪᡨᠠᡳ ᠪᡝ ᠵᠠᡳ ᡠᠮᡝ ᠵᠠᠪᡠᡵᡝ ᠰᡝᠮᡝ ᠨᠠᡴᠠᠪᡠᡥᠠ ᠮᠠᠩᡤᡳ᠈ ᠪᡠᠵᠠᠨᡨᠠᡳ ᠪᡝᡳᠯᡝᡳ ᡩᡝᠣ ᡴᠠᡵᡴᠠᠮᡝ ᠪᡝᡳᠯᡝ ᠪᠠᡳᠮᡝ ᡥᡝᠨᡩᡠᠮᡝ᠈ ᡥᠠᠨ ᠣᠨᠴᠣ ᠪᡝ ᡤᡡᠨᡳᠴᡳ ᡝᠮᡠ ᡤᡳᠰᡠᠨ ᡤᡝᠨᡝᡵᡝ ᠪᡳᡥᡝᠣ᠈ ᡥᠠᠨ ᡥᡝᠨᡩᡠᠮᡝ᠈ ᠮᡳᠨᡳ ᠵᡠᡳ ᠪᡝ ᠶᠣᡵᡩᠣᡥᠣ ᠠᡴᡡ᠈ ᠮᡳᠨᡳ ᠶᠠᠪᡠᡥᠠ ᠰᠠᡵᡤᠠᠨ ᠵᡠᡳ ᠪᡝ ᡤᠠᡳᡴᡳ ᠰᡝᡥᡝᠩᡤᡝ ᠠᡴᡡ ᡨᠣᠨᡩᠣ ᠰᡝᠴᡳ ᠪᡠᠵᠠᠨᡨᠠᡳ ᠪᡝᠨᠵᡳᡥᡝ ᡩᡝ᠈ ᠰᡳ ᡨᠣᠨᡩᠣ ᠮᡠᠵᠠᠩᡤᠠ ᠵᡠᠰᡝ ᠪᡝ ᡩᠠᠮᡨᡠᠨ ᠪᡝᠨᠵᡳᡵᠠᡴᡡ ᠣᠴᡳ᠈ ᠪᡳ ᠰᡳᠨᡩᡝ ᠣᡴᡩᠣᡵᠠᡴᡡ ᠰᡝᠮᡝ ᡥᡝᠨᡩᡠᡶᡳ᠈ ᠠᠮᠠᠰᡳ ᠪᡝᡩᡝᡵᡝᠮᡝ ᡳᠩ ᡩᡝ ᠵᡳᡶᡳ᠈ ᡠᠯᠠᡳ ᡤᡠᡵᡠᠨ ᡳ ᡩᠣᠯᠣ ᡠᡥᡝᡵᡳᠮᡝ ᠰᡠᠨᠵᠠ ᡳᠨᡝᠩᡤᡳ ᡳᠨᡩᡝᡶᡳ᠈ ᠴᠣᠣᡥᠠ ᠪᡝᡩᡝᡵᡝᠮᡝ ᠵᡳᡩᡝᡵᡝᡩᡝ᠈ ᡠᠯᠠᡳ ᠪᡳᡵᠠᡳ ᡩᠠᠯᡳᠨ ᡳ ᠣᠯᡥᠣᠨ ᡨᡠᠩ ᡤᡝᠪᡠᠩᡤᡝ ᠪᠠᡳ ᡳᠮᠠᡥᡡ ᡤᡝᠪᡠᠩᡤᡝ ᡥᠠᡩᠠ ᡳ ᠨᡳᠩᡤᡠ ᡩᡝ ᠮᠣᠣ ᡳ ᡥᠣᡨᠣᠨ ᠠᡵᠠᡶᡳ᠈ ᡝᠮᡠ ᠮᡳᠩᡤᠠᠨ ᠴᠣᠣᡥᠠ ᠪᡝ ᠸᡝᡵᡳᡶᡳ ᠴᠣᠣᡥᠠ ᠪᡝᡩᡝᡵᡝᡥᡝ᠉ ᠵᠣᡵᡥᠣᠨ ᠪᡳᠶᠠᡩᡝ᠈ ᠠᠪᡴᠠᡳ ᠰᡳᡵᡝᠨ ᡠᠯᠠᡳ ᡤᡠᡵᡠᠨ ᡳ ᡝᡵᡤᡳᠴᡳ ᡨᡠᠴᡳᡶᡳ᠈ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᡨᡝᡥᡝ ᠪᠣᠣᡳ ᠵᡠᠯᡝᡵᡤᡳ ᠯᡝᠣᠰᡝᡳ ᠵᡠᡝᠯᡵᡤᡳ ᠪᡝ ᡨᡠᠯᡝᠮᡝ ᡥᡡᠯᠠᠨ ᡥᠠᡩᠠᡳ ᠵᡠᠯᡝᡵᡳᡨ ᡳᠰᡳᠨᠠᡥᠠ ᠪᡳᡥᡝ᠈ ᡨᡝᡵᡝᠴᡳ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡝᠮᡠ ᠠᠨᡳᠶᠠ ᠣᡨᠣᠯᠣ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝ ᠪᡝ ᠰᠠᡳᠨ ᠣᠵᠣᡵᠣ ᠰᡝᠮᡝ ᡨᡠᠸᠠᠴᡳ᠈ ᠪᡠᠵᠠᠨᡨᠠᡳ ᠪᡝᡳᠯᡝ ᡳᠨᡳ ᠰᠠᡥᠠᠯᡳᠶᠠᠨ ᡤᡝᠪᡠᠩᡝ ᠰᠠᡵᡤᠠᠨ ᠵᡠᡳ᠈ ᠴᠣᡴᡳᠨᠠᡳ ᡤᡝᠪᡠᠩᡤᡝ ᡥᠠᡥᠠ ᠵᡠᡳ᠈ ᠵᠠᡳ ᠵᡠᠸᠠᠨ ᠨᠠᡩᠠᠨ ᠠᠮᠪᠠᠨ ᡳ ᠵᡠᠰᡝ ᠪᡝ ᠶᡝᡥᡝ ᡩᡝ ᡩᠠᠮᡨᡠᠨ ᠪᡝᠨᡝᡶᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᠶᠠᠪᡠᡥᠠ ᠶᡝᡥᡝᡳ ᠰᠠᡵᡤᠠᠨ ᠵᡠᡳ ᠪᡝ ᡤᠠᡳᠮᠪᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ-ᡳ ᠵᡠᠸᡝ ᠰᠠᡵᡤᠠᠨ ᠵᡠᡳ ᠪᡝ ᡩᡝ ᡥᠠᠰᡥᠠᠨ ᡳ ᠮᠣᠣ ᡥᡡᡵᡳᠮᠪᡳ ᠰᡝᠮᡝ ᡩᠣᠨᠵᡳᡶᡳ᠈ ᠰᠠᡥᠠᡥᡡᠨ ᡳᡥᠠᠨ ᠠᠨᡳᠶᠠ᠈ ᠠᠨᡳᠶᠠ ᠪᡳᠶᠠᡩᡝ᠈ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡤᡝᡵᡝᠨ ᠴᠣᠣᡥᠠ ᠪᡝ ᡤᠠᡳᡶᡳ᠈ ᡠᠯᠠᡳ ᡤᡠᡵᡠᠨ ᠪᡝ ᡩᠠᡳᠯᠠᠮᡝ ᠠᠮᠪᠠ ᠴᠣᠣᡥᠠ ᠵᡠᡵᡴᠠᠨ᠈ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝ ᠵᡠᠸᠠᠨ ᠵᠠᡴᡡᠨ ᡳ ᡳᠨᡝᠩᡤᡳ᠈ ᡳᠨᡳ ᠵᡠᠰᡝ ᠪᡝ ᠶᡝᡥᡝ ᡩᡝ ᡩᠠᠮᡨᡠᠨ ᠪᡝᠨᡝᠮᡝ᠈ ᠵᡠᡵᠠᠮᠪᡳ ᠰᡝᡵᡝᡩᡝ ᠵᡠᠸᠠᠨ ᠨᠠᡩᠠᠨ ᡳ ᡳᠨᡝᠩᡤᡳ᠉ ᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᠠᠮᠪᠠ ᠴᠣᠣᡥᠠ ᡳᠰᡳᠨᠠᡶᡳ᠈ ᠠᡶᠠᠮᡝ ᡤᠠᡳᡶᡳ ᠴᠣᠣᡥᠠ ᠵᡠᠯᡝᠰᡳ ᡩᠣᠰᡳᡶᡳ ᡤᠣᡩᠣᡳ ᡥᠣᡨᠣᠨ᠈ ᠣᠮᠣᡳ ᡥᠣᡨᠣᠨ ᠪᡝ ᡤᠠᡳᡶᡳ᠈ ᡳᠩ ᡳᠯᡳᡥᠠ᠉ ᠵᠠᡳ ᡳᠨᡝᠩᡤᡳ᠈ ᡠᠯᠠᡳ ᠪᡠᠵᠠᠨᡨᠠᡳ ᠪᡝᡳᠯᡝ ᡳᠠᠯᠨ ᡨᡠᠮᡝᠨ ᠴᠣᠣᡥᠠ ᡤᠠᡳᡶᡳ ᠣᡴᡩᠣᠮᡝ᠈ ᡤᡠᠯᡥᠠ ᡤᡝᠪᡠᠩᡤᡝ ᡥᠣᡨᠣᠨ ᠪᡝ ᡩᡠᠯᡝᠮᡝ ᠵᡳᡥᡝ ᠮᠠᠩᡤᡳ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᠴᠣᠣᡥᠠᡳ ᠪᡝᡳᠰᡝ ᠠᠮᠪᠠᠰᠠ ᡤᡝᠨᡝᡶᡳ ᠠᡶᠠᡴᡳ ᠰᡝᠴᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡨᠠᡶᡠᠯᠠᠮᡝ ᠠᠮᠪᠠ ᡤᡠᡵᡠᠨ ᡳ ᡩᠠᡳᠨ ᠪᡝ ᡠᡨᡥᠠᡳ ᠸᠠᠵᡳᡥᡳᠶᠠᡴᡳ ᠰᡝᠴᡳ ᠸᠠᠵᡳᠮᠪᡳᠣ ᠰᡝᠮᡝ ᠨᡝᠨᡝᠮᡝ ᠵᡳᡥᡝ ᠮᡠᡩᠠᠨ ᡩᡝ ᡥᡝᠨᡩᡠᡥᡝ ᡤᡳᠰᡠᠨ ᡳ ᠠᡩᠠᠯᡳ ᡝᡵᡤᡝᠪᡠᠮᡝ ᡥᡝᠨᡩᡠᡥᡝ ᠮᠠᠩᡤᡳ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᠵᡠᡳ ᡤᡠᠶᡝᠩ ᠪᠠᡨᡠᡵᡠ ᠪᡝᡳᠯᡝ᠈ ᡩᡝᠣ ᠵᡠᡳ ᠠᠮᡳᠨ ᠪᡝᡳᠯᡝ᠈ ᠠᠮᠪᠠᠨ ᡶᡳᠣᠩᡩᠣᠨ ᠵᠠᡵᡤᡡᠴᡳ᠈ ᡥᠣᡥᠣᡵᡳ ᡝᡶᡠ᠈ ᡩᠠᡵᡥᠠᠨ ᡥᡳᠶᠠ᠈ ᡝᡳᡩᡠ ᠪᠠᡨᡠᡵᡠ᠈ ᡧᡠᡵᡤᠠᠴᡳ ᠪᠠᡨᡠᡵᡠ᠈ ᡝᡵᡝ ᠰᡠᠨᠵᠠ ᠠᠮᠪᠠᠨ ᡤᡝᡵᡝᠨ ᠪᡝᡳᠰᡝ ᡤᡝᠮᡠ ᡶᠠᡶᡠᡵᠠᡧᠠᠮᡝ ᡥᡝᠨᡩᡠᠮᡝ᠈ ᠠᡳ ᡨᡠᠴᡳᠪᡠᡵᡝ ᠰᡝᡥᡝ ᠪᡳᡥᡝ᠈ ᡝᡵᡝ ᠪᡝᡳᠯᡝᡳ ᡨᠠᠯᠠ ᡩᡝ ᡨᡠᠴᡳᡴᡳ ᠴᠣᠣᡥᠠ ᠪᡝ ᠠᡶᠠᡵᠠᡴᡡ ᠣᠴᡳ᠈ ᠵᠠᡳ ᠪᠣᠣᠴᡳ ᠴᠣᠣᡥᠠ ᡨᡠᠴᡳᡶᡳ ᠠᡳᠨᠠᠮᠪᡳ᠈ ᠵᠠᡳ ᠴᠣᠣᡥᠠ ᠠᡤᡡᡵᠠ ᠪᡝ ᡩᠠᠰᡥᠠᠨ᠈ ᠮᠣᡨᡳᠨ ᠪᡝ ᡨᠠᡵᡤᡡᠪᡠᡥᠠ ᠰᡝᠮᡝ ᠠᡳ ᠪᠠᡳᡨᠠ᠈ ᠪᡠᠵᠠᠨᡨᠠᡳ ᠶᡝᡥᡝᡳ ᠰᠠᡵᡤᠠᠨ ᠵᡠᡳ ᠪᡝ ᡤᠠᡳᠮᡝ ᠵᠠᠪᡩᡠᡥᠠ ᠮᠠᠩᡤᡳ᠉ ᡨᡝᡵᡝ ᡴᠣᡵᠣ ᡤᡝᠴᡠᡴᡝ ᠪᡝ ᠠᡳᠨᠠᠮᠪᡳ᠈ ᠵᠠᡳ ᠠᠮᠠᠯᠠ ᡩᠠᡳᠯᠠᡥᠠ ᠰᡝᠮᡝ ᠠᡳ ᡨᡠᠰᠠ ᠠᡴᡨᠠ ᠪᡝ ᡨᠠᡵᡤᡡᠯᠠᡶᡳ ᠴᠣᠣᡥᠠ ᠪᡝ ᡩᠠᠰᠠᡶᡳ ᠵᡳᡥᡝ ᡩᠠᡥᠠᠮᡝ ᠠᡶᠠᡴᡳ ᡨᡝᡵᡝ ᠰᡝᡥᡝ ᠮᠠᠩᡤᡳ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡥᡝᠨᡩᡠᠮᡝ᠈ ᠵᡠᠸᡝ ᡤᡠᡵᡠᠨ ᡳ ᠠᠮᠪᠠ ᡩᠠᡳᠨ ᠠᠴᠠᡶᡳ ᠠᡶᠠᠴᡳ ᡠᡵᡠᠨᠠᡴᡡ ᠨᡳᠮᡳ ᠪᡝᠶᡝ᠈ ᠮᡳᠨᡳ ᡠᠵᡳᡥᡝ ᠵᡠᠰᡝ᠈ ᠰᡠᠨᠵᠠ ᠠᠮᠪᠠᠨ᠈ ᠮᡠᠰᡝ ᠵᡠᠯᡝᡵᡳ ᡤᠠᡳᡶᡳ ᠠᡶᠠᠮᠪᡳ᠈ ᠠᡳᡴᠠ ᠪᠠᠠᡩᡝ ᠮᡠᠰᡝᡳ ᡠᠵᡠᠯᠠᡥᠠ ᠪᡝᡳᠰᡝ ᠠᠮᠪᠠᠰᠠᡳ ᠪᡝᠶᡝ ᡝᠮᡴᡝ ᠵᡠᠸᡝ ᡨᡠᡥᡝᡵᠠᡴᡡ ᠰᡝᠮᡝ ᡥᠠᡳᡵᠠᠮᠪᡳ ᡩᡝᡵᡝ᠈ ᠮᡳᠨᡳ ᠪᡝᠶᡝ ᡩᡝ ᡤᡝᠯᡝᠮᡝ ᡨᠠᡶᡠᠯᠠᡵᠠᠩᡤᡝ ᠸᠠᡴᠠ᠈ ᠠᠪᡴᠠᡳ ᡴᡝᠰᡳᡩᡝ ᠮᡳᠨᡳ ᠪᡝᠶᡝ ᠠᠵᡳᡤᡝᠨ ᠴᡳ ᡨᠠᠩᡤᡡ ᠮᡳᠩᡤᠠᠨ ᠴᠣᠣᡥᠠ ᡩᡝ ᡝᠮᡥᡠᠨ ᡩᠣᠰᡳᡶᡳ ᡤᠠᠨᡨᠠᠮᡝ ᡥᡝᠨᡩᡠᡶᡳ᠈ ᠠᡶᠠᠴᡳ ᠠᡶᠠᡴᡳ ᠶᠠᠪᡠ᠈ ᠮᡳᠨᡳ ᠮᡠᡴᠰᡳᠨ ᠰᠠᠴᡳ᠈ ᡤᠠᠵᡳ ᠰᡝᠮᡝ ᡤᠠᡳᡶᡳ ᡝᡨᡠᡴᡳ ᠰᡝᠮᡝ ᡳᠯᡳᡵᡝ ᠵᠠᡴᠠᡩᡝ᠈ ᡠᡨᡥᠠᡳ ᠪᡝᡳᠰᡝ ᠠᠮᠪᠠᠰᠠ ᡤᡝᡵᡝᠨ ᠴᠣᠣᡥᠠ ᠨᡳᠶᠠᠯᠮᠠ ᡤᡝᠮᡠ ᠠᡶᠠᡵᠠᡴᡡ ᠠᠶᠣᠣ ᠰᡝᠮᡝ ᡩᠣᠯᠣ ᠵᠣᠪᡠᠮᡝ ᡳᠰᡳᡶᡳ᠈ ᡩᠣᠨᠵᡳᠮᡝ ᠪᡳᡥᡝᠩᡤᡝ ᠠᡶᠠᠮᠪᡳ ᠰᡝᡵᡝ ᠵᠠᡴᠠᡩᡝ ᡩᠣᡵᠰᡝᠮᡝ ᡤᡝᡵᡝᠨ ᡤᡝᠮᡠ ᡠᡵᡤᡠᠨᠵᡝᡵᡝ ᠵᡳᠯᡤᠠᠨ ᠠᠪᡴᠠ ᠠᡴᠵᠠᠨᡩᠠᡵᠠ ᠨᠠ ᠠᡧᡧᠠᡵᠠ ᡤᡝᠰᡝ ᠴᠣᠣᡥᠠᡳ ᠨᡳᠶᠠᠯᠮᠠ ᡤᡝᠮᡠ ᡠᡴᠰᡳᠨ ᠰᠠᠴᡳ ᡝᡨᡠᠮᡝ ᠸᠠᠵᡳᡥᠠ ᠮᠠᠩᡤᡳ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᠪᠠᡨᠠ ᠪᡝ ᡤᡳᡩᠠᡵᠠ ᡥᡝᠴᡝᠨ ᠪᡝ ᡤᡝᡵᡝᠨ ᡠᡨᡥᠠᡳ ᡩᡝ ᡨᠠᠴᡳᠪᡠᠮᡝ ᡥᡝᠨᡩᡠᠮᡝ᠈ ᠠᡳᡴᠠᠪᠠᠠᡩᡝ ᠠᠪᡴᠠᡳ ᡴᡝᠰᡳᡩᡝ ᠪᠠᡨᠠ ᠪᡝ ᡤᡳᡩᠠᡥᠠ ᠮᠠᠩᡤᡳ᠈ ᡝᡨᡝᡥᡝ ᡥᡡᠰᡠᠨ ᡳ ᡠᡨᡥᠠᡳ ᡩᡠᡴᠠ ᠪᡝ ᡩᡠᡵᡳᡶᡳ ᡥᡝᠴᡝᠨ ᠪᡝ ᡤᠠᡳᡴᡳ ᠰᡝᠮᡝ ᡨᠣᡴᡨᠣᠪᡠᡶᡳ᠈ ᡨᡝᡵᡝᠴᡳ ᠴᠣᠣᡥᠠ ᠠᡧᡧᠠᡶᡳ ᡤᡝᠨᡝᠴᡳ᠈ ᠪᡠᠵᠠᠨᡨᠠᡳ ᠪᡝᡳᡳᠯᡝ ᡳᠯᠠᠨ ᡨᡠᠮᡝᠨ ᠴᠣᠣᡥᠠ ᠪᡝ ᡤᠠᡳᡶᡳ ᡶᡠᠯᠠᡥᡳ ᡥᠣᡨᠣᠨ ᠪᡝ ᡩᡠᠯᡝᠮᡝ᠈ ᠵᡳᡶᡳ ᠴᠣᠣᡥᠠᡳ ᠨᡳᠶᠠᠯᠮᠠ ᠪᡝ ᠶᠠᡶᠠᡥᠠᠯᠠᠪᡠᡶᡳ ᡶᠠᡳᡩᠠᡶᡳ ᠠᠯᡳᠮᡝ ᡤᠠᡳᡥᠠ᠉ ᠮᠠᠨᠵᡠᡳ ᠴᠣᠣᡥᠠ ᡠᠯᠠᡳ ᠴᠣᠣᡥᠠᡳ ᡥᠠᠨᠴᡳ ᡨᠠᠩᡤᡡ ᠣᡴᠰᠣᠨ ᡳ ᡩᡠᠪᡝᡩᡝ ᠮᠣᡵᡳᠨ ᠴᡳ ᡝᠪᡠᡶᡳ ᠶᠠᡶᠠᡥᠠᠯᠠᡶᡳ ᡳᠪᡝᠮᡝ ᡤᡝᠨᡝᡶᡳ ᠠᡶᠠᡵᠠ ᡩᡝ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡨᡠᠸᠠᠴᡳ᠈ ᠵᡠᠸᡝ ᠴᠣᠣᡥᠠᡳ ᡤᠠᠪᡨᠠᡵᠠ ᠰᡳᡵᡩᠠᠨ ᡝᡩᡠᠨ ᡶᡠᡵᡤᡳᠮᡝ᠈ ᠨᡳᠮᠠᠩᡤᡳ ᠨᡳᠮᠠᡵᠠᡵᠠ ᠠᡩᠠᠯᡳ ᡥᡳᠪᠰᡠᠨ ᡝᠵᡝᠨ ᡳᠯᡤᠠ ᠵᡠᠸᡝᠮᡝ ᡩᡝᠶᡝᡵᡝᡳ ᡤᡝᠰᡝ᠈ ᠠᡶᠠᠨᡩᡠᡵᡝ ᠰᡠᡴᡩᡠᠨ ᠠᠪᡴᠠ ᡩᡝ ᠰᡠᠴᡠᠨᠠᡥᠠᠪᡳ᠉ ᡥᠠᠨ ᠮᡠᠵᡳᠯᡝᠨ ᡩᠣᠰᠣᡵᠠᡴᡡ᠈ ᡳᠨᡳ ᠪᡝᠶᡝ ᡤᡝᠯᡳ ᠰᠠᠴᡳᠮᡝ ᡩᠣᠰᡳᡴᠠ᠉ ᠮᠠᠨᠵᡠᡳ ᠴᠣᠣᡥᠠᡳ ᠪᡝᡳᠰᡝ ᠠᠮᠪᠠᠰᠠ ᡤᡝᡵᡝᠨ ᠴᠣᠣᡥᠠ ᡥᡡᠰᡠᡨᡠᠯᡝᠮᡝ ᠠᡶᠠᡵᠠ ᠵᠠᡴᠠᡩᡝ᠈ ᡠᠯᠠᡳ ᠴᠣᠣᡥᠠ ᡠᡨᠠᡳᡥᠠᡳ ᡤᡳᠨᡩᠠᠪᡠᡶᡳ ᠵᡠᠸᠠᠨ ᡳ ᡩᠣᠯᠣ ᠨᡳᠩᡤᡠᠨ ᠨᠠᡩᠠᠨ ᠪᡠᠴᡝᡥᡝ᠉ ᡶᡠᠨᠴᡝᡥᡝ ᠴᠣᠣᡥᠠ ᡠᡴᠰᡳᠨ ᠰᠠᠴᡳ ᠴᠣᠣᡥᠠᡳ ᠠᡤᡡᡵᠠ ᠪᡝ ᠸᠠᠯᡳᠶᠠᡶᡳ ᡩᡠᡳᠨ ᡳᠴᡳ ᠰᠠᠮᠰᡳᠮᡝ ᠪᡠᡵᠯᠠᡥᠠ᠈ ᠮᠠᠨᠵᡠ ᡳ ᠴᠣᠣᡥᠠ ᡝᡨᡝᡥᡝ ᡥᡡᠰᡠᠨ ᡳ ᡩᡝᠶᡝᡵᡝᡳ ᡤᡝᠰᡝ ᡤᡝᠨᡝᡶᡳ ᡩᡠᡴᠠ ᠪᡝ ᡩᡠᡵᡳᡶᡳ ᡥᡝᠴᡝᠨ ᠪᡝ ᡤᠠᡳᡶᡳ᠈ ᠮᠠᠨᠵᡠ ᡳ ᡥᠠᠨ ᡥᡝᠴᡝᠨ ᡩᡝ ᡩᠣᠰᡳᡶᡳ᠈ ᡥᡝᠴᡝᠨ ᡳ ᡧᡠᠨ ᡩᡝᡴᡩᡝᡵᡝ ᡝᡵᡤᡳ ᡩᡠᡴᠠᡳ ᠯᡝᠣᠰᡝᡳ ᡩᡝᠯᡝ ᡨᠠᡶᠠᡶᡳ ᡨᡝᡥᡝ ᠪᡳᠴᡳ᠈ ᡠᠯᠠᡳ ᠪᡠᠵᠨᡨᡳᠠ ᠪᡝᡳᠯᡝ ᡨᠠᠩᡤᡡ ᡳᠰᡳᡵᠠᡴᡡ ᡤᡳᡩᠠᠪᡠᡥᠠ ᠴᠣᠣᡥᠠ ᠪᡝ ᡤᠠᡳᡶᡳ᠈ ᡥᡝᠴᡝᠨ-ᡳ ᠪᠠᡵᡠ ᡝᠪᡧᡝᠮᡝ ᠵᡳᠴᡳ᠈ ᡥᡝᠴᡝᠨ ᠪᡝ ᠠᡳᡶᡳᠨᠠ ᡤᠠᡳᡶᡳ ᡨᡠ ᡴᡳᡨᡠ ᡨᡠᡴᡳᠶᡝᡥᡝ ᠪᡳ᠉ ᠪᡠᠵᠠᠨᡨᠠᡳ ᠪᡝᡳᠯᡝ ᠠᠮᠪᡠᠯᠠ ᡤᠣᠯᠣᡳ ᡨᡝᠨᡳ ᠪᡠᡵᠯᠠᡴᡳ ᠰᡝᡵᡝᡩᡝ᠈ ᡤᡠᠶᡝᠩ ᠪᠠᡨᡠᡝᡠ ᠪᡝᡳᠯᡝ ᡝᠮᡠ ᠪᠠᡴᠰᠠᠨ ᡳ ᠰᡳᠯᡳᡥᠠ ᠴᠣᠣᡥᠠ ᠪᡝ ᡤᠠᡳᡶᡳ ᡥᡝᡨᡠᡵᡝᡥᡝ᠉ ᠪᡠᠵᠠᠨᡨᠠᡳ ᠪᡝᡳᠯᡝ ᡨᡝᡵᡝᡳ ᡥᠣᡵᠣᠨ ᠪᡝ ᠠᠯᡳᠴᡳ ᠣᠵᠣᡵᠠᡴᡡ ᡠᡨᡥᠠᡳ ᠪᡠᡵᠯᠠᡶᡳ ᡩᠠᡥᠠᡥᠠ ᠴᠣᠣᡥᠠ ᠠᠮᠪᠠ ᡩᡠᠯᡳᠨ ᠸᠠᠪᡠᡥᠠ᠈ ᡶᡠᠨᠴᡝᡥᡝ ᠴᠣᠣᡥᠠ ᡶᠠᡴᠴᠠᡶᡳ ᠰᠠᠮᠰᡳᠮᡝ ᠪᡠᡵᠯᠠᡥᠠ᠉ ᠪᡠᠵᠠᠨᡨᠠᡳ ᠪᡝᠯᡝ ᠠᡵᡴᠠᠨ ᠰᡝᠮᡝ ᡨᡠᠴᡳᡶᡳ ᠪᡠᡵᠯᠠᠮᡝ᠈ ᠶᡝᡥᡝᡳ ᡤᡠᡵᡠᠨ ᡩᡝ ᡤᡝᠨᡝᡥᡝ᠉ ᠮᠣᡵᡳᠨ ᠮᡠᡴᠰᡳᠨ ᠰᠠᠴᠠ ᠴᠣᠣᡥᠠᡳ ᠠᡤᡡᡵᠠ ᡨᠣᠯᠣᠴᡳ ᠸᠠᠵᡳᡵᠠᡴᡡ ᠪᠠᡥᠠ᠉ ᡨᡝᡵᡝᠴᡳ ᡠᠯᠠᡳ ᡤᡠᡵᡠᠨ ᡳ ᠪᠠᠪᠠᡳ ᡥᡝᠴᡝᠨ ᡥᠣᡨᠣᠨ ᡤᡝᠮᡠ ᡩᠠᡥᠠᡥᠠ᠈ ᠵᡠᠸᠠᠨ ᡳᠨᡝᠩᡤᡳ ᡳᠨᡩᡝᠮᡝ ᡤᡠᠩ ᠪᠠᡥᠠ ᠵᡳᠶᠠᠩᠵᡳᠶᠣᠨ ᠰᡝ᠈ ᡤᡝᡵᡝᠨ ᠴᠣᠣᡥᠠ ᡩᡝ ᡧᠠᠩᡤᠠᠮᡝ ᠪᡠᡶᡳ᠈ ᡠᠯᠠᡳ ᠴᠣᠣᡥᠠ ᠠᡶᠠᡶᡳ ᠪᡠᡵᠯᠠᠮᡝ ᡨᡠᠴᡳᡶᡳ ᠠᠮᠠᠰᡳ ᠵᡠᠰᡝ ᠰᠠᡵᡤᠠᠨ ᠪᡝ ᠪᠠᡳᠮᡝ ᡩᠣᠰᡳᡴᠠ ᠨᡳᠶᠠᠯᠮᠠ ᡩᡝ᠈ ᡳᠨᡳ ᠵᡠᠰᡝ ᠰᠠᡵᡤᠠᠨ ᠠᡥᠠ ᠪᡝ ᠶᠣᠣᠨᡳ ᠪᡠᡶᡳ᠈ ᡨᡠᠮᡝᠨ ᠪᠣᡳᡤᠣᠨ ᠠᡵᠠᡶᡳ᠈ ᡨᡝᡵᡝᠴᡳ ᡶᡠᠨᠴᡝᡥᡝ ᠣᠯᠵᡳ ᠪᡝ ᡤᡝᡵᡝᠨ ᠴᠣᠣᡥᠠ ᡩᡝ ᡩᡝᠨᡩᡝᠮᡝ ᠪᡠᠮᡝ᠈ ᠸᠠᠵᡳᡶᡳ ᠴᠣᠣᡥᠠ ᠪᡝᡩᡝᡵᡝᠮᡝ ᠵᡳᡥᡝ᠉ ᡨᡝᡵᡝᠴᡳ ᡠᠯᠠᡳ ᡤᡠᡵᡠᠨ ᡠᠮᡠᠰᡳ ᡤᡠᡴᡠᡥᡝ᠉
ᡝᡵᡝ
ᠵᡠᠰᡨᠠᠨ
ᡴᡝᠮᡠᠨᡳ
ᠮᡠᠶᠠᡥᡡᠨ
ᠰᠠᡳᠨ
ᠣᠵᠣᡵᠣ
ᡠᠨᡩᡝ᠈
ᡥᠠᠰᠠ
ᠮᡠᠶᠠᡥᡡᠨ
ᠣᠵᠣᠪᡠᡵᡝᠣ᠉
ere justan kemuni muyahūn sain ojoro unde, hasa muyahūn ojobureo.
此页面未完善，需要尽快补充。
ᡝᡵᡝ