Jump to content

Wp/mkn/Perang Sodara Islam II

From Wikimedia Incubator
< Wp‎ | mkn
Wp > mkn > Perang Sodara Islam II


Perang Sodara Islam II, ato biasa dapa omong Fitna Kedua,[1]. itu tu waktu pas politik bakaco deng militer yang timpa orang Islam Kekhalifahan Umayyah pung partama - partama. Ini barang ni jadi abus khalifah partama Umayyah, Muawiyah abis maninggal pas 680 dan dong baperang 12 taon memang. Di ini perang, Dinasti Umayyah bisa kaskala dong pu dua kalompok lawan: yang dukung keluarga Husain bin Ali deng lanjut pi Sulaiman bin Surad ais itu deng Mukhtar ats-Tsaqafi di Irak, ato kekhalifahan dong pu yang lawan Abdullah bin az-Zubair di Meka.

Asal mula ko bisa jadi[edit | edit source]

Ini perang ni mule dari Perang Sodara Islam I (Fitna Partama). Abis khalifah ketiga dapa bunu Utsman bin Affan, orang Islam dong jadi perang sodara ko supaya mo jadi pemimpi n, yang dia pung utama le kaslibat Ali bin Abi Thalib deng Muawiyah bin Abi Sofyan. Abis Ali pung kasus bunu pas 661 deng Hasan bin Ali mundur pas taon yang sama, Muawiyah jadi orang yang pimpin sandiri. Pas Muawiyah belom meninggal, dia tunjuk dia pung anak laki - laki Yazid ko ganti dia. Ini barang ni banyak yang son suka, gara - gara son ada batunjuk iko katurunan di sajara Islam. Ini barang ni picu tegang abis Muawiyah meninggal deng abis kekhalifahan pinda pi Yazid pung tangan. Husain bin Ali dapa ajak dari dia pung kaluarga di Kufah ko kasgeser Dinasti Umayyah, ma dia dapa bunu pas jalan Pi sana pas Perang Karbala pas Oktober 680. Abdullah bin az-Zubair kaslancar dia pung malawan deng Yazid yang dia pu pusat di Mekah deng tamba luas pi Medina sampe samua Hijaz ada di dia pu pangaro. Yazid kirim pasukan pi serang Medina deng Meka, ma dia maninggal pas November 683. Pas Yazid maninggal, samua kekhalifahan (kacuali Syam) kaslepas dong pu diri dari Umayyah pung bapimpin deng amper - amper samua tunduk pi Ibnu az-Zubair. Di Irak, muncul barontak gara - gara son mo yang kasterus kaluarga Ali. Abis dong menyesal gara - gara Husain mati, 4.000 orang Kufah yang dapa pimpim Sulaiman bin Surad mau ko supaya bunu Bani Umayyah sampe mati. Dong dapa bunu pas Perang Ain al-Wardah pas Januari 685. Mukhtar ats-Tsaqafi ambil allih Kufah pas Oktober deng dia pung tentara kaskalah tentara Umayyah di Pertempuran Khazir pas Agustus 686. Mukhtar sandiri abis itu lawan yang dukung Ibnu az-Zubair di berapa perang, ais itu tabunu di Kufah pas April 687. Mukhtar pung kalah kasisa kubu Umayyah deng kubu Ibnu az-Zubair di ini perang. Ais itu, Abdul Malik bin Marwan susun kambali Umayyah pung kuat deng bisa kaskala tentara Ibnu az-Zubair di Irak (Perang Maskin) drng Hijaz (Pengepungan Mekkah) pas taon 692.

Abis baperang[edit | edit source]

Abis ini perang, Abdul Malik kasruba kekhalifahan Umayyah pung pamerintahan deng kastingkat pusat khalifah pung kuasa, deng kasreformasi angkatan tentara deng birokrasi. Ini perkembangan yang jadi abis perang sodara kaskuat sektarian pung pica deng kasbuat ajaran-ajaran dk agama Islam tabagi dua kalompok: Sunni deng Syiah. Sampe ini saat ni ini Peristiwa Karbala yang su jadi perang ni orang Muslim Syiah peringati pas Hari Asyura.

  1. fitnah فتنة, dia pung arti "ulangan" ato "cobaan") di ini konteks ini pung asal dari Al-Qur'an di dia pung arti ulangan Allah pi Orang Islam ato Allah pu hukuman gara - gara dong pu dosa. Di Islam dong pung sajara, ini kata dong pake ko omong perang Sodara ato pemberontakan yang bekin pica barsatu deng iman