Wp/mfb/Pulau Belitung
Pulau Belitung, Belitong adalah pulau di Bangka Belitung. Pulau ne luas e 7.800 km2, orang yang tinggel di sane lebe dikit dari yang ade di Bangka, yaitu 200 ribu orang. Same la kek Bangka, pulau ne pengasil timah. Ibukota e Tanjung Pandan. Kota lain yang agak ramai orang e antara lain Manggar ke Gantung. Gunung tetinggi di Pulau Belitung ne name e Gunung Tajem, tinggi e lebeh dari 500 meter di tenga-tenga pulau to. Sungai paling panjang di sanen name e Sungai Lenggang. Sungai Lenggang ne agik banyak binatang-binatang yang tinggel kayak ikan-ikan, burung kek ikan duyung. Pulau Belitung ne terkenal karena pantai-pantai e agik bagus-bagus macem pantai Tanjung Kelayang kek Pantai Tanjung Tinggi. Selain tu Pulau ne ge terkenal karene di bawa laut e banyak orang nemu harta karun kapal-kapal tenggelem. Banyak la diangkat kek pencuri harta karun dari negara lain.
Orang Belitung to adalah Orang Melayu yang ngumong Bahasa Melayu Belitong, sedikit beda la kek Bahasa Melayu Bangka. Selain ade puli orang Cin yang tinggel di sane yang datang dulu e kek nambang timah. Pulau Belitung ne makin tekenal gara-gara film Laskar Pelangi yang dibuet kek Mira Lesmana kek Riri Riza berdasarken buku Laskar Pelangi yang ditulis kek Andrea Hirata. Gara-gara film ne banyak orang yang datang ke Belitung kek ngeliet tempet-tempet wisata e kayak yang ade di film to.