Wp/lzz/lat/Mtuti

Mtutepe dido bundo oz’iramoni skindinape renan. Mara ar saat’is sumeneçi k’ilomet’roni k’ap’inerobaten ank’ap’inenan. Dido menceloni na renan namtini mtutepek, jur varna sum met’roni xura mutepeşiten ncalepeşi dudepes yulunan do ekonaşis ora goloçkumernan. Generalurot mzguda na imxornan mtutepek oç’k’omale oz’iru şeni eçidovit met’roni mağalobapeşati yalenan. Oz’iru do ognuşi gagnapa mutepeşi dido sap’ara na ren mtutepes k’ai aşurenan.

Eçidovit varna jurneçi 3’anaşi morgvalis na skidunan mtutepes sum 3’aneri iqvanşi, seksiuri mordinoba aqven. Maartani seksiuri ge3adu şeni, jur-sum 3’ana çkva oçumu dvaç’irnan. 3’unaşi mancobaşi ok’ok’idinus gecgineri oqopinu şeni, menceloni ar mtuti oqoponi dvaç’irs. Majura mtutepes didiloba muşişen oşkurinu do gza meçamu şeni anşi varna şkviti 3’aneri iqvaşakis na çumers mtutepek 3’anas ar, dido bedineri renan na, jur fara 3’una k’ala iqvenan.

Taseri nanas k’ai oskedinu dvaç’irs. Jurşuronobaşi p’eriodi muşi juroşdojurneç ndğa k’onari ren. Xutoşi grami k’onari na iqvenan ağani dobaderi motalepeşi tolepe ar tutaşk’ule guin3’k’en. Nana mutepeşi k’ala skidala oguruşi p’eriodi jur varna jurdogverdi 3’ana k’onari aqvenan. Sum 3’anaşk’ule nanak mtelot motalepe muşi naşkumers. Generalurot sum motali na dorinaps mtutepek entepe mjaten oskedinaps pukiroraşakis. Ağani dobaderi motalişi t’ani eçidovit sant’imet’ro k’onari do monk’anoba muşiti şkvitoşi grami k’onari iqven. Motalepe dibadaşi, utole, uk’ibironi do ubundğoni iqvenan. Motalapek ğormaşen gamaxtanşi, nana muşis entepeşi oçvu dvaç’irs. Varna meavepe do majura mtutepeşk’elen iğurinenan.

Yebargoras qinoraşi nciraşa na gyoç’k’apan mtutepek pukiroraşakis xomula qa do tipepeten 3’opxineri, k’ap’et’i ğorma mutepeşişen çkar var gamulunan. Qinoraşi nciraş 3’oxle, dido oç’k’omale imxornan. T’k’ebi mutepeşişi tudeni yağoni t’abak’aşi monz’inapu şeni, 3’ipelişi xili do ç’uburi dido ç’k’omupan. Xura mutepeşis yaği oşinaxu dvaç’irnan. Muşeni do pukiroras ğorma mutepeşişen gamaxtanşi, k’ilo mutepeşi didopeten meçameri iqvenan. Mtutepek qinoraş nciraşi morgvalis, normalurot ar dek’ik’es jureneç varna sumeneç na iqven guriluri patkala mutepeşi, ovro-vitojurişa gyoçkumernan. Xura mutepeşişi t’u3anobati sumi-şkviti derece k’onari dvark’inen. Qinoraş nciraşi morgvalis, pseli do k’undi var oziyanapan. Pseli xolo na ixmarinen p’rot’einişa goktiruşi mek’anizma arxvala mtutepes uğun. Oşişen met’i monk’anoba na uğun mtutepes, qvilişi sap’araloba qinoraş nciraşi morgvalis var aqven. Qinoraş nciraşi morgvalis, mtutepeşi di3xirişi 3irk’ula3ia oşis otxoneçi varna otxoneçidoviti k’onari iç’it’anen mara a3’işakis gurişk’rizi na ağodu ar mtutis çkar var muixvadinu.