Wp/lzz/lat/Msursu

Msursu varna lepra, Hansen basili (Mycobacterium leprae) na itkven mik’roorganizmak gza na meçaps, xuçeşi sist’ema do t’k’ebi k’ala çkva sist’ema do organepes na notesiraps nak’limoni infek’sionuri zabunoba ren. Mcveşorapes “Miskinepeşi zabunoba” yadoti icoxineren. Oş3’anurapeşen doni dido na işkurinen zabunoba na ren msursu, çkvadoçkva noç’are do sinemaşi filmişa tema iqveren. Msursuşi zabunoba maarta fara mundes na yeçkindu mtinuri var içkinen nati zabunoba şeni iptineri ç’arape İ.3’. 600-oni 3’anapes iz’iren. Hinduri, Misiruli do Çinuri noğarobapeş k’elen am tariğişen 3’oxleni İ.3’. 16- 13. oş3’anurapes zabunoba içinopt’es yado itahminen. Am p’eriodişa na itariğinen Misiris z’ireri namtini genomskidepek am hip’otezis numxvacups. Antik’uri Yunanepe do Arabepekti am zabunoba içinopt’es yado isimadinen.

Zabunobaşi sebebi na ren basili 1873 3’anas Gerhard Armauer Hanseniş k’elen itarifinu. Hansen basili namtini xususoba muşite çixot’k’aş sebebi na ren Koch basilişa nungaps. Zabunobaşi fakt’oriş bakt’eri xuraşa amaxtuş k’ule nişanepeş yeçkindu, nodgituş sist’emaşi nuxondinuş z’irapate 2- 20 3’ana k’onari iqopen. Msursu arxvala adamepeşen nak’limen. Basili, zabuni k’oçişi xuraşen çkvadoçkva yarapeşi lejveri do xususurot çxvindiş 3’ap’ate gamulun do goşibğen. Adamepeş şkas muç’o na nak’limen k’atiurot var içkinen nati, didote otemasute nak’limen do otemasus ginz’e oras noqonu unon yado isimadinen. Berepeşa nana mutepeşişi mjate nak’limen. Zabunoba 3- 5 3’aneri berepes umosi dido ağoden.

Zabunobaşi oteşhisu arxvala mik’rosk’obiuri goşogorute ixvenen. Mik’rosk’obiuri goşogoru şeni çxvindişi muk’ozaşen ezdimeri maddes Neelsen metodite peri isven do goşi3’k’omilen. Grup’i do mxeşi xalis ok’obğeri namtinepe serbest’i varna hucreş doloxe basilepe iz’iren. Edoxolo t’k’ebişi lezyonepes biopsite parça eizden do oçistute goşigorinen. Msursu, andğanerdğas oşkurnoni zabunoba va ren. Oteşhisuş k’ule k’atiurot işvelen. Çkvadoçkva zabunoba steri ordoşen oteşhisu beciti ren. Ordoneri teşhisi na ixvenen xalepes çkar sak’at’oba var doskidun do mtelot ik’aen. Oşvelu, bakt’eris na nutesiraps ant’ibiot’ik’epete ixvenen. Zabunobaşen berepeşi oçu şeni, lemşi geçamu do zabunoboni gomorgvaşen omendranu ren irişen moxva tedbiri. Msursuşi medik’aluri şvela k’onari ceraxuri, fizik’uri do psikiat’uri şvelati dido beciti ren.