Wp/lzz/lat/Mixail Xvit’ia

Mixail Xvit’ia dibadu 1924-s. Doçodinu Tbilisişi Xeşnoxvenuri Ak’ademia (1942- 1948). Muşi xeşnoxvenuri go3’oncğoneri rt’u P’rofesori Aleksandre 3imak’uriz’e, namuk na işinen iptineri coxoçinoberi p’eizajişi art’ist’i. Mixail Xvit’iaşi maxant’elobaşi k’olek3ias iz’iren Okorturaş Ğormotonobaşi p’eizajişi onç’oba gon3’k’imerot: ndğaşi çkvadoçkva orapes, t’aroni do drope. Mixail Xvit’iak goxtu Okorturaşi k’arta ğoci. Aya k’aixeşa iz’iren t’et’eli toliten: “Vadi Borcomi”, “Yebargora Raç’as”, “Xçe ncalepe Kartlis” do çkvalepe. Muşi dobadona, Samargaloşen ğaperi xeşnoxvenepe çinoberi ren.

1949-s geç’k’uten skidala muşişi çodinaşakis, Mixail Xvit’ias aqu uvadoni merçapa muşi dobadona do majura dobadonapes. Okorturaşi Na3ionaluri Muzeumi, Okorturaşi Moderni Xeşnoxveneşi Muzeumi, Mosk’ovaşi T’retiak’ovişi Yulvaluri Xeşnoxveneşi Galeria do Muzeumi do majura galeriapek konumances muşi t’ablopes. Mixail Xvit’iaşenti çkinape niçinen Okorturaşi En3ik’lop’edia (k’orta 11) do Soviyeturi Xeşnoxvenes (gamiçkvineri Mosk’ovas 1965-şen doni). Mixail Xvit’iak na yoçkindu vitoar yağoniğapa xeşnoxvene 1950-şen 1970-şakis ren Okorturaşi Na3ionaluri Xeşnoxvenuri Muzeumis. Entepeşen ar teri na ren “Ok’ilept’usi” (1952) ren muşi 3’oxleni dulyapeşen, namupes na nuxmaru mç’ipe t’eknik’a do gverdi t’ransp’arant’uri perepe. Brest’i-jvari do zambak’uri perepe xmareri ren muşi 3’oxleni p’eriodişi dulyapes. Muşi k’olek3iapes iz’iren mtel dobadonaşen ğocepe: “K’axeti”, “Bak’uriani”, “İmeretişi xçe germape”… Muşi ok’uleni dulyapes iz’iren xampa do gurami peri do t’oni o3xunoba. Muşi t’ablopeşi tema do mot’ivepe renan lirik’uli, namtini orapes p’ast’orali, namtini orapes romant’izmaten opşa do irorasti çkvadoçkva mskvanoba do t’ilisimoni perepeten opşot originaluri.

Muşi noxant’epeşen namtinepe ren dido beciti: “Tipişbardi”, “Yebargora”, “Tbilisi”. Entepes iz’iren didopeten k’ut’ali mç’itanoba, skit’a, k’aveşperi do jvari. Mixail Xvit’iaşi t’ablopek suratups artneri ğara na uğun lirizma do romant’izma. Entepek oxomo3’onapan Ğormotonoba do emuşi gomorgva. Aşopeten “kok’oik’aten şurognoba do gurpatkaloba. Mixail Xvit’ia işinen Okorturaşi xçetomoni art’ist’i. Mixail Xvit’iaşi amagi didi ren p’eizajişi ğarapeşi rdalas. Muşi t’ablope renan ğirsoni k’ata şeni. Mixail Xvit’iak komeçu şuri muşi Ğormotis 1994-s.