Wp/lzz/lat/Menenjit’i

Menenjit’i ren kunişi zarepeş otxomuruten na yeçkindun ar zabunoba. Tişqvilişi ozararu varna oşkenduri qucişi zabunobaşi sebebiten kunişi zarepe itxomuren. Di3xirik na tirups mik’robepekti xususurot ç’it’a berepes menenjit’i oğodaps. Menenjit’işa mik’roorganizmapek gza meçaps. İrişen dido na iz’iren Meningokok coxoni mik’robik di3xirişi ozehiruşati sebebi meçaps. Menenjit’is bakt’eriuli do viraluri yado jur ç’eşidi uğun. Bakt’eriuli menenjit’işi irişen beciti sebebi ren Hib coxoni bakt’eri. Viraluri menenjit’i generalurot umosi dido iz’iren do umosi perpu goliçkvinen. Viraluri menenjit’is ant’ibiotik’aş oxmarinu mutu var nargen. Nişanepe muşi ren; t’u3anoba, ontxoru, tişi 3’k’uni, cinikişi ok’ap’et’u, cinikişi 3’k’uni, tolişi motvalaş monk’anoba, otirtinu do oqinu. Manişa oçkinu dido beciti ren. Şvela şeni şkaşen 3’k’ari ezdimu uk’ors.

Menenjit’ik geç’k’alas monk’a grip’i steri o3’onapaps. Generalurot cinikişi k’ap’et’obati naqonops mara na var iz’iren xalepeti iqven. Zabunişi xali ar-jur dğaş doloxe imonk’anen. Menenjit’i varna di3xirişi ozehiruşa sebebi na meçaps mik’robepe normalurot adamepeşi xurxis skidun. Dido adamik zabunoba uoğodamuten am mik’robepeşi matirale steri skidun. Am mik’robepe adamepeşi şkas oxvalu, oçindinu, ocundinu do oquruşi gzaten nak’limen. 0- 5 3’aneri berepe, 15- 20 3’aneri ağanmordalepe do badi-xçinepe risk’işi grubi 3’opxupan. Menenjit’i na goloçkvu dido adamik am zabunobaşen mtelot muçitun mara na oğurinapsti koiz’iren. Varna zabunobaş k’ule sak’at’obape kodoskidun. Mağali t’u3anoba, tişi 3’k’uni, ontxoru, obunduru, te do xonarişa hasasiet’i, adaleşi 3’k’uni, bereş tude oktiruş oras t’rik’epe e3’uzdapt’aşi o3’k’unu do amuşeni omgaru, cinikişi ok’ap’et’u steri nişanepe artotti yeçkindun tito titoti. Zabunoba generalurot ar-jur dğaş doloxe imonk’anen. Çiçku berepes na iz’iren nişanepe normalişen çkvaneri iqven. Cinikişi ok’ap’et’u var iz’iren, xuraşi t’u3anobaş normalişen otapalu, bingildağişi obaru, ok’onağureli o3’k’omilu, onciruşi xali, monk’a zabuni do uperoni oz’iramu, hasasiet’i, uiştağoba, eliçinaşi varna tude ipağinaşi uxuzuroba, omgarinu, o3’in3’inu steri nişanepe o3’iraps.

Dido adamik menenjit’işen mtelot komuçitun do ar-jur tutaş doloxe normaluri oskedinus naqononi xali komogaps. Mara namtini adamepes ginz’e oraloni sak’at’obape kodoskidun. Menenjit’ik sebebi na iqven sak’at’obape: nduroba, aksionişi ok’oxvoba, k’onsant’rasionişi ok’oxvoba, k’oordinasionişi ok’oxvoba, doç’k’indinoba, aksionişi dork’inoba. Namtini şikaet’epe oraş doloxe in3’uranen mara namtinepe var ik’aen. Nduroba skidalaşi morgvalis naqonops. Menenjit’i adamişi skidala mtelot oktiraps. Mesela, berepes menenjit’iş k’ule dido aksioneroba, ogoruşi meç’iroba iz’iren. 3’anerepek sosialuri do oxanduri skidala mutepeşis na notesiraps p’roblemape n3’irupan. Namtini adamepesti zabunobaş 3’oxleni steri dulyape k’ai var axvenenan. Naqononi meç’iroba yeçkindaşi sp’esialist’epeşa na uk’ors k’onari ordoşen oxtimu ren dido beciti.