Wp/lzz/lat/Menç’unaşi geçaçxale

Menç’unaşi geçaçxale, noğa Artvinişi k’eza Arkabis ren. Oput’e P’ap’ilatişi onz’ğoneş doloxe ren. Mara Suxuleturepekti geçaçxale mutepeşi oput’eş onz’ğoneş doloxe renya do k’avuli ikipan. Menç’unaşi geçaçxaleşa, Cgirazenişen olandeyulva k’ele goktinu do K’amiletişi rubas ğaliş kinarişen 4 k’ilomet’re ogzalu do ğalişi omjoreyulva k’ele golaxtimuş k’ule tak’ribi 400 met’re mağalaboni mt’k’aşa eşanç’ute ilinen. Geçaçxales ğalişen tak’ribi 900 met’re mendranoba uğun.

Geçaçxaleşi 3’k’artoli, P’ap’ilatişi germapeşi k’ap’ulas sum ç’it’a arxişen do golaşi poğarepe k’ala ç’it’ağalepeşi ok’oxtimute eçkindun. Geçaçxales jur k’ademoni taraça uğun. Maartani k’ademes 35 met’re mağalobaşen 3’k’arepe çkar sotis umen3’u tude diben do iptineri geçaçxale i3’opxen. 3’k’arepe xolo tude dibaşi 50 met’re mağaloboni majurani geçaçxale i3’opxen. Mendraşen i3’k’omilaşi jur taraçoni geçaçxaleşi 3’k’arepe 85 met’re mağalobaşen do arteri geçaçxaleşen diben steri iz’iren. Geçaçxaleşen diben 3’k’arepek tude 200 met’rek’are k’onari t’iba o3’opxinapan.

Pukrik’aşi do Mbuloraşi tutapes mtvirepe ndğulaşi 3’k’arepeşi debi umosi manz’inen. Didi meç’irute geçaçxaleşa mextaşi z’irapa muşi oşkurnoni do 3’k’omila muşi oxeloni ren. Geçaçxaleşen kvalepunaşa gejat’eri 3’k’arepek şetxis mangaperi 3’ap’ape eçkindinupan. Mjoraşi tete 3’ap’apek run3i eçkindinupan. Menç’unaşi geçaçxaleş gomorgvas moşvacinuşi do o3’k’omiluşi sotepe ren. Geçaçxaleşa eşinç’en patik’a gzaşi jin kvaşi do pi3arişi merdevenepe gesvareli ren. Ğalişen mek’axtimu şeni golak’ideri xinci ixveneren. Geçaçxaleşa moxtimeri mok’itxepe uşkurnoni melen k’ele mek’axtimu ixor3elineren.