Wp/lzz/lat/Ludvig van Bethoveni

From Wikimedia Incubator
< Wp‎ | lzz‎ | lat
Wp > lzz > lat > Ludvig van Bethoveni

Germani k’omp’ozit’ori, p’ianist’i do rejisori Ludvig van Bethoveni dibadu 16 Xrist’ana 1770 tariğis, Germaniaşi noğa Bonis. Bethovenişi baba Yohani rt’u sarayişi muzisieni. P’ianoşi iptineri dersepe diguru muşi babaşen. Otxo 3’aneri rt’u em oras. 1779 3’anas Krist’iani Gottlobi Nefe k’ala ok’oxandus kogeç’k’u. 1783-s iptineri beste muşi na rt’u Dressepeşi Marşiş Jin Ç’eşidoba gamiçkvinu. Nefek nuşvelu emus. 1786-s idu Vianaşa. Murenki nana muşi doğuruşi, xolo goiktu Bonişa. K’ont’i Valşt’eişa xizmeti meçamuşa geç’k’u. Otxo 3’anaşi morgvalis, k’ont’işi ork’est’ris viola gelaçu. 1794 şakis Vianaşi arist’ok’rat’ia şeni sarayepe do xususi ok’oxtalapes gelaçu. İptineri p’eriodepes mabeste oqopinot var, ar p’ianist’i do mamgurapale oqopinot ignu coxo muşi. Mk’ule ar p’eriodişi doloxeti iqu çinoberi.

1798-s Bethovenis aqu ognuşi p’roblemape. Eçidoar 3’anaş morgvalis, var qu k’ont’akt’i miti k’ala. 1819 3’anaşen geç’k’uten, oç’aruten qu k’ont’akti k’oçepe k’ala. Eçidoar 3’anaş morgvalis, na z’iru xvalanobaşi sebebiten dido gurişç’vini aqu emus. Bethovenik nubestu muşi mtel senfonepe, ognuşi p’roblema na aqu şk’ule. Bethovenik qoropu nak’otxani oxorca. Mara p’ot’e var içilu. İrişen dido na aqoropu ren “Uğuroni Qoropa”. Mi na rt’u var içkinen tina, am oxorca, Frank’furturi ar turcarişi çili na rt’u Ant’oni Brentano rt’u yado icerinen. Bethovenik ç’areet’u Diabellişi variasionepe Uğuroni Qoropa şeni.

1826-s cuma muşi K’arli k’ala artot Gneixendorfis na moşvana şk’ule, Vianaşa goiktuşi, siroziş zabunobaşi sebebiten 26 Mirk’ani 1827 tariğis şuri muşi Ğormotis meçu. Nanç’inerot 30.000 şuri na ak’atu cenazeşi 3eremonia şk’ule Vahringişi oğurunales let’as niçinu. 1888 3’anasti, xura muşi Vianaşi 3ent’raluri Oğurunales Subert’iş sapulaşi xolos kodixvinu.