Wp/lzz/lat/Kazim Koyuncu

Kazim Koyuncu 1972 3’anas Xopaşi P’anç’oli coxoni oput’es dibadu. Geç’k’apuroni, oşkenoni doguronepe do lise Xopas dotamamu. Musik’aluri sakvaris, oşkenoni doguronişi maartani k’lasis mandolini gelaçamuten gyoç’k’u. Beroba muşi, “Ust’adi çkimi” na u3’umert’u “Makemance Yaşari” coxoten na içinen Yaşar Turnaşi xolos, Lazuri birabape usiminuten golaxtu. Mp’olişa universit’et’is ok’itxu şeni moxtuşk’ule musik’a k’ala dido ora mek’olapus kogyoç’k’u. Mp’olişi Universit’et’işi P’olit’ik’uri Çkinapeşi Fak’ult’etişa amaxtu mara p’olitik’uri sebebiten ok’itxu naşku. 1992 3’anas Ali Elveri k’ala artot “Var İçoden” coxoni rak’uri musik’aluri k’erk’eli k’idu do p’rope3ialurot musik’a oxvenus kogyoç’k’u. Ok’ule Lazuri musik’a oxvenu şeni am k’erk’elişen gamaxtutik’ona, rak’uri st’ili var naşkvinu do Lazuri et’nik’uri musik’a rak’uri st’iliten ibiru.

1993 3’anas, Dinak xolosoni megabre muşi Sarigina do majuranepe k’ala artot “Zuğaşi Berepe” coxoni musik’aluri k’erk’eli k’idu. Lazuri rak’i oxvenu şeni gzas na gyodgites “Zuğaşi Berepe”k “Va Mişkunan” (1995) do “İgzas” (1998) coxoni albumepe gamiğes. “Zuğaşi Berepe” coxoni musik’aluri k’erk’eli 1999 3’anas kogoşibğu. Emuşk’ule Koyuncu xvala doskidu mara Lazuri do Margaluri birabape obirus naqonu.

“Salk’im Soğut’i” coxoni p’roget’epeşen majuranis sumi birapaten mxuci meçu. 2001 3’anas megabre do mt’eris dersi o3’iru do “Viya” coxoni maartani solo albumi muşi gamiğu. Ok’ule D coxoni t’eleviziuri ark’is na gamiçkvinen do p’op’ularuli na rt’u şeni xalk’i k’eleşen dido na itamaşinen “Gulbeyazi” coxoni serialis ar k’ele filmişi musik’ape nuxvenu, majura k’ele namt’ini rolepe doxor3ielinu. Emutenti mteli Turketis p’op’ularuli iqu do içinu.

Ok’ule “Kemal Sahir Gureli” k’ala artot “Sultan Mak’ami” coxoni t’elevizuri serialis muzik’ape duxvenu. Oça Mzoğaşi çinoberi p’op’ularuli gemabirepe, Fuat Saka, Volkan Konak do Bayar Şahin k’ala artot na qves do dido p’op’ularuli na rt’u k’on3ert’uli serialepes go3’ancğoneroba muşi qu. 2004 3’anaşi İgrik’as na gamiğinu “Hayde” coxoni majurani albumi muşitenti p’op’ularoba muşi na rt’uşenti ididanu.

2004 3’anaşi çodinas izabunu do purpuş k’anserişi teşxisi kogidvinu. Ok’aru şeni oxzabunepeşa ulurt’u. 2005 3’anaşi ma-25-ni Mbulobas, 33 3’aneri rt’uşi Mp’olişi Amerik’anuri Oxzabunes şuri muşi Ğormotis meçu. Cenaze muşi Mp’oli do Xopas na i3’ipxu 3eremoniepeşk’ule oput’e muşis let’as niçinu.