Wp/lzz/lat/K’uğu

K’uğu ren 3’k’aruli ar k’vinçi. Dido mçxu do xçe ren. Xvalot port’uk’alişperoni k’ik’ili muşiş k’un3’uli do nunk’uşi genguşape uça ren. Amuşen çkva, mtelot xçe ren. Qali muşi “S” oxvenuten varna k’ik’ili muşi tude genç’inuten do qali muşi emti okaçuten inçvirs. K’udeli uğun m3’k’ili k’un3’uloni. K’udeli didopeten yenç’eri aqven. Muşi ti go3’oginz’anuten putxun. Putxaşi, okaçaps msvape muşi arm3ika xut’ali. Aşo putxaşi, muşi msvapes ignapen rit’muli ar xonari. Markvalişen gamaxtaşi, k’uğuşi motali iqven dido umskva. K’aveşperoni varna k’remişperoni iqven. Motalik markvalişen gamaxtaşi, mk’ule qaloni do p’eci tomapeten getrageri iqven. Murenki motalis ank’ap’inen do ançviren nak’otxani saat’işi doloxe. Nana do babak omgvanapan motali mutepeşi, nak’otxani tutaşi morgvalis. Ora mek’ilaşi, am umskva motali konikten mskva ar k’uğuşa.

K’uğu skidun 3’k’aris raxat’obaten dixas na renşen. Muşi perdeloni k’uçxepeş meşveluten, inçvirs astaxolobaten. Hava iqinaşi, putxun do mendulun. Uçvaşi oras, putxun dido mağalobas. Diagonaluri ar ğara oxvenuten putxunan. Ok’oganşi, menceloni ixi oxut’olu şeniti, putxunan “V”-şi ğarate. Aşopetenti putxunan umosi astaxolobaten. Magzalobaşi morgvalis, putxunan udoç’k’indu. K’uğuk ç’anç’axepuna, ğali do t’ibap’inapeşi tude na z’irops mzgudapeten skidun. Muşi qali ginz’e na ren şeniti, aginz’anen perpot. 3’k’aris ant’onen bibik na ikips steri. Am mk’ule ont’onus, var aqven meç’iroba emus. K’uğuk mzgudape 3’ilaşi, feidoniti iqven.