Wp/lzz/lat/K’ok’i3’a

From Wikimedia Incubator
< Wp‎ | lzz‎ | lat
Wp > lzz > lat > K’ok’i3’a

K’ok’i3’a, k’arta 3’aneri adamepes na notesiraps, manişa oseyroni, nak’limoni oşvanuşi sist’emaş infek’sioni ren. Xususurot berepes dido noç’iraps. Zabunobaşi fakt’ori Bordetella pertussis yado icoxinen. K’ok’i3’a umosi yebargoraşi tutapes iz’irennati 3’anaşi k’arta dros yeçkindun, mara yeçkinduşi temeluri sebebi ren olemşuş nispet’işi dvark’inoba. K’ok’i3’a morderepes oçinu na niç’iren zabunoba ren do generalurot umosi k’ai k’linik’uri z’irapa na o3’iraps şeni jileni oşvanuşi infek’sionepe k’ala oxuiktinen do var oxoi3’oninen. Zabunoba sosio-ek’onomik’urot dork’ineri sosiapes, mtelot oskedinuşi dginalepes, gonç’imeri grup’ot na skidunanpes, umoxva higineuri şart’epes, udobağineri do p’at’i oç’k’ominus ğuraşa umosi dido sebebi na meçaps içkinen. K’ok’i3’a ok’ont’rolu şeni anşi 3’aneri k’arta bereş olemşu dido beciti ren. Berobaşi p’eriodiş olemşuş tak’vimişi toliten; doguronişa geç’k’uşakis otxo fara k’ok’i3’aşi lemşi oxvenu uk’ors. Maartanot jur tuteri rt’aşi ixvenen do emuşk’ule tito tutas jur fara geiçinen. Maotxani farasti 16.- 24. tutapeşi şkas ilemşinen.

İnfek’t’e adamişi oşvanuş sist’emaşi lejverepe 3’ap’ape k’ala imralen do majura adamepes nak’limen. Artneri oxoris na skidun adamepes muk’avemet’i var uğunan na am zabunoba 90% nak’limenan. Ç’it’a berepes zabunoba uxonarot nak’limeri didi cumalepe varna morderepeşen nak’limen. Nak’limobaşi irişen dido na iz’iren p’eriodi oxvaluş geç’k’uşen 3’oxleni ora ren mara sum doloni ok’uleşakisti nak’limoba naqonen. Zabunoba, notesironi ajaniş eç’opinuşen nanç’inerot 4- 21 dğaş k’ule yeçkindun. Zabunobaşi iptineri p’eriodis çxvindiş o3’ap’u, toliş oçalamuru, uxaloba do dido na var imağalen t’u3anoba steri jileni oşvanuşi subuki infek’sionişa mengaperi nişanepe keçkindun. Am p’eriodiş k’ule xomula oxvalu geç’k’aps do dido var golaxtaşakis k’ok’i3’aşi k’arakt’erist’uri oxvaluşi k’ap’et’i nobet’epe yeçkindun. Am p’eriodis şvanupt’aşi t’k’va3ineri oxvalu, t’ip’iuri oşvanuşi xonari işignen. Oxvalus manz’inaşi zabuni imonoğen do antxoren. Am p’eriodis na yeçkindun oxvaluşi nobet’epe ar ndğaş doloxe eçdovit k’onari iqven, didopeten muşebura do seris yeçkindun edo mağalxonari do qini t’aroni steri fakt’orepekti nobet’i yeçkindinuşa sebebi iqven. Am oraşakis zabunis t’u3anoba tapala ren mara çkar var iz’iren. Anşi tuteri berepes am p’eriodi çkvaneri aqvenan, oxvaluşi nobet’epeşen met’a arşvaconi do mk’ule oraloni uoşvanu iz’iren. K’lasik’i k’ok’i3’aşi ora 6- 10 doloni rennati zabunepeşi gverdişen didopes zabunoba 6 dolonişen mk’ule, zabunepeşi naotxanis 3 doloni do umosi mk’ule naqonops. Oxvaluşi şiddet’i do didonobaş dvark’inu k’ala zabuni ok’auşi p’eriodis kamulun.

Generalurot anşi tuterişen ç’it’a berepe do ip’at’inasen yado na isimadinen zabunepeşi oxvaluş nobet’epe, manişa uoşvanu, omonoğu, oç’k’omaluş meç’iroba do majura k’omp’lik’asioni ok’au do omxvaconi şvela otatbik’u şeni oxzabuneşa donciru uk’ors. Zabunepes ant’ibiot’ik’i oxmaru mecburi ren. Zabunobaş nak’limoni oqopinu do xususurot anşi tuterişen ç’it’a bereps ğuraşa sebebi na meçaps şeni çkineri hekimişk’elen oxosarinu do berepeşi lemşi ora muşis oxvenu ren dido beciti.