Wp/lzz/lat/K’at’u

From Wikimedia Incubator
< Wp‎ | lzz‎ | lat
Wp > lzz > lat > K’at’u

K’at’u (Felis domesticus), k’at’ugilepeşi (Felidae) familiaşen maave, buz’oni, oxoruli do maxor3e skindinae do mt’k’urepeti kuğun. K’oçepek, k’at’upeşi manebrobaşa do haşerat’i, 3’i3’ila do ak’rep’i oç’opinuşi maaret’işa ğirsi meçapan. K’at’upe irişen mk’ule 9.500 3’anaşen doni k’oçepe k’ala skidunan. İptineri Misirulepeşk’elen oxoruli koniktines yado i3’onen. 2,5 k’iloşen 12 k’iloşakis monk’anoba uğunan, 3’unapes 50 sant’imi, kimolepes 70 sant’imi ginz’enoba uğunan. Çkvadoçkva perepe uğunan nati genet’iuro dido çkvaneri do originali perepeti uğunan. K’at’upe tak’ribi 14 3’ana skidunan. Mara k’aixeşa iskedinanşi 20 3’anaşen dido skidunan. Oxoruli k’at’uşi eçdovitşen dido cinsi koren.

K’at’upe mskvalena, morgvali dudoni, m3’k’ili quconi, ginz’e oşmeşoni skindinape renan. Oşmeşi mutepeşi tudenk’ele xuçeşa mek’irelie. Oşmeşepek otemasuşi hisi meçapan. 3’oxleni k’uçxepes xut, k’ap’ulaşi k’uçxepes otxo k’iti uğun do mok’irk’e bu3xape amanç’enan. Bu3xa mutepeşi capes noxri3kupan do eşote olasirupan. K’aixeşa oşignuşi do oz’iruşi hisi uğunan. K’oçepeşi qucis var aşignasen k’onari mağala frek’ansoni xonarepe doloşinaxupan do eşote tapala frek’ansoni xonarepe aşignenan. Ma3xont’e, mapu3xole do mançvire renan. Avi mutepeşi ekseri seris ç’opupan. Maavoba mutepeşis sap’ri, temkini do surat’i irişen didi xususobapee. Arxvala quci mutepeşişi meşvelute mtugi ç’opupan. Toli mutepeşis irişen m3ika testi az’iren. M3’k’upis k’at’upesti var az’iren. Teşa dido hassasi tolepe muşi monz’ineri teşi mak’vate irisişi diaframişk’elen içven. Monz’ineri tes pupila muşi mç’ipe do gemti ğara konikten. M3’k’upis am diaframi k’aixeşa koguin3’k’en do pupila komoirgvanen edo aşote dork’ineri testi az’iren. Serişi maç’ope çkvaneri skindinape steri k’at’upeşi tolepesti retinaşi k’ap’ulas “tapetelum” coxoni hucreşi t’abak’a iqven. Am k’ismik k’at’upeşi toli seris var oçxant’inaps.

K’at’upes mağala sotepeşen melapt’anşi otxo k’uçxeşi jin dodginuşi reflek’si dido monz’ineri uğunan. Namtinoras iyaralenanti. K’at’upek dido paği skindinape renan do k’undi mutepeşi mpulupan. Ç’angişi tude mindori uğunan, avi mutepeşis uxonare nanç’enan do ejat’k’va3enan. Reşidobaşi ora çkvadoçkva cinsepes 4-10 tuta k’onarie. Xrist’anaşi çodinaşen Mirk’anişi çodinaşakis imzik’enan. Omçinocuşi ora mutepeşi 56-68 dğa k’onarie. Oxorulepek 3’anas jur fara imzik’enan. K’arta faras 4-6 motali dorinapan. Dibadanşi motalepes toli var az’irenan, ndura do t’et’eli iqvenan. Maçxorani dğas toli gvan3’k’enan. Jur tuta k’onari nana mutepeşişi mja şupan. 10 tutas komoirdenan.