Wp/lzz/lat/Hrant Dink

Hrant Dink, 15 St’aroşina 1954-s Malatias dibadu. Baba muşi Sivasişi ilçe Gurunis, nana muşiti Sivasişi ilçe K’angalis dibaderet’u do irderet’u. Nana do baba muşik 1961 3’anas St’amp’olişa moxtesşk’ule kok’ui3’k’es. Hranti do jur cuma muşik ocaxişi ok’o3’k’uşk’ule Gedikpaşa Armenuri p’rot’estani kiliseşi p’ansionis oskedinus kogeoç’k’es. Sum cumak p’rigurapa mutepeşi am kiliseşa mek’ireli İncirdibi p’ridogurales ezdes do monç’inorasti p’ridoguraleşi Tuzlaşi k’ampis dodgites. Hrant Dinkik oşkadogurale Bezciyanis, liseti Uskudar Surp Haç Tibrevankişi oncironi dogurales ik’itxu. Şişlişi liseşen imezunu.

Dinkik, St’amp’olişi universit’eş feni fak’ult’es zooloji do emuşk’ule felsefe iguru mara hayali muşi kursi “biolojişi felsefe” Turkiaşi omordineri k’vazaluri siaset’iş doloxe akt’ivi ocedelu şeni konaşkvu. Siaset’uri akt’ivit’e muşi Armeni minoba muşi k’ala munasebet’i var ixvenas do cemaat’ik amuşen zarari var z’iras yado coxo muşi omtinaleşi k’ararite “Firat” yado iktiru. Hrant Dinkik p’ridogurales ok’oçineri Silop’is dobaderi Armeni Vartoşi aşiret’işen Rakel Yağbasani k’ala içilu do sum bere aqu. Cumalepe muşi k’ala gamaçkvaşi do k’irtasiyeşi dulyapes naqonopt’esşi çili muşi Rafeli k’ala mutepeşi steri Anatoliaşen moxtimeri umiteli do umuteli berepeşi omordale Tuzlaşi Armeni berepeşi k’amp’i oktalus geoç’k’u. 21 3’anaşk’ule Turkuli oxen3alek k’amp’işa xe kogedvu. Askeroba muşi Denizlişi piyade alayis ovro tutaloni neferi yado qu.

90-oni 3’anapes Armenuri dğaluri gazeta Marmaras “Çutak” rumuzite Armenepeşi tarixiş temas Turkias gamaçkveri svarapeş otenk’iduşi ç’arape oç’arus kogeoç’k’u. Medias gamaxtimeri çilata ambarepe on3’uranute coxo muşi ignapu. Armenuri p’at’rikxanas, “Armenepek dido trageri skidunan, dudi çkini k’aixeşa kovoxo3’onapat na peşini hukmepe koniçoden”ya tku do Turkuli do Armenuri art gazeta gamoçkvu nuteklifu. 5 İgrik’a 1996-s maartani nomera gamaçkvineri gazeta Agosişi mage3’opxaloba, gamaçkvaşi maktaloba do dudmaç’aroba qu. Gazeta Agosik k’vazali, muxalifi minoba muşite ik’un3xu, Turkialuri Armenepeş doloxe mevcudi ok’oxveri xalepes nutenk’idu, osivilu do oşefafuşi becitobas go3’uğaru, bizati Hrant Dinkişi p’icişen alt’ernat’iuri cemiet’uri p’rojepe nuteklifu.

Hrant Dinkik, Agosişi gamaçkvaş doloxe gagnapa omordinuşi ifadepete xalk’işreyis nuk’un3xu, gazeta Yeni Yuzyil do Birgunisti mak’alepe ç’aru. Turkia do Armeniaşi oşkas manz’agerobaşi otesisus, hududişi gon3’k’imus, Turkiaşi odemok’rat’ik’uşi p’rosesis numxvacu. Edo 1915 3’anaşi oğodape, ğurelepeşi guriç’veri muk’onobate vardo genomskidepete, xur xalk’işi şerefi ok’o3aderi emp’at’iuri uslubite iğarğalas, oğodape arxvala resimuri tezepete vardo alt’ernat’iuri gamaçkvapeti goint’alas yado gamognapu. Dinkik Amerik’a, Avust’ralia, Avrop’a do Armenias dido k’onferansişa ak’atu, Armenuri minoba do Turkia-Armeniaşi munasebet’i şeni hemi Armenuri camias hemiti tarixuri rolepeşi tolite çkvadoçkva geulvaluri dobadonapes mak’itxace p’rosesepeş geoç’k’inus vesile iqu. Hrant Dinki, 19 3’anağani 2007-s gazeta Agosişi 3’oxle k’urşumite doqviles.