Wp/lzz/lat/Guguli

Guguli ren gugulepeşi (cuculidae) familiaşen. Ginz’e do m3’k’ili msvalepe do ginz’e k’udeli uğun. K’ailot puxtun. Mcveşi do Ağani Kianaşi k’ont’inent’epes na ren mt’k’alepuna varna çkvaneri sotxanepes skidun. Emigrant’i na ren gugulepeti koren. 3’una gugulik gecginu şeni menceli na dubağun ar k’vinçiş obğes oxosars. Mk’ule ar ora rt’as tina, em k’vinçiş obğe muşişen yeputxinu z’iraşi gugulik emuşi obğes geputxun. Am obğes na gez’in markvalepeşen ar teri imxors. Ok’uleti muşi markvalepeşen ar teri ekonaşis geskups. Gugulişi motalik 12 ndğa şk’ule do generalurotti şant’i korbamşinepe muşişen 3’oxle dibaden. Maartani otxo ndğaş morgvalis, tolepe muşi odveri iqven. Mara ak’robat’ik’uri k’ank’alapeten, şant’i korbamşinepe muşi obğeşen get’k’oçups. Sumi doloni diçodaşi, nanaşant’i muşişen umosi didi iqven. Anşi doloniş morgvalis, akonaşis skidun. Ok’uleti obğe doloxvups. Kimoli oz’iru şeni yeputxun. Emigrant’i gugulis, Ğormotişk’elen niçineri doloxeni ar gagnapaten, oşepe k’ilomet’ro mendralobaşa aputxinen. Umçanepe muşişa nunç’işun.

Mtel gugulepe var renan monç’vaşi p’arazit’i. P’arazit’epe skidunan Mcveşi Kianas didopeten. Gugulişi xura ren didi. Murenki markvali muşi iqven ç’it’a. Na dvaç’irs orapes, atiren muşi markvali qali muşis. Markvali muşişi peri do didinobati ren, obğeş manceşi markvalepe steri. Obğeşmance k’vinçis a3’onen gugulişi markvali ti-muşişi markvali oqopinot. Namtini orapes, gugulik oinsp’ekt’iraps markvali muşi na gedu obğe. Obğemance, maxare ar k’vinçişk’elen iç’opinen na, markvali muşi ekolen ezdips manişa. Çkvaneri obğeşa gedumers. Amuşen met’i sebebepetenti, ok’oxveri obğeşen markvali muşi ezdips. Edo k’ap’et’i ar çkva obğeşa gedumers.

Ağani Kianas na skidun gugulik didopeten ti-muşiş obğe muk ikips. Motalepe muşisti o3’k’en. Peri muşi moxva ren na skidun sotxanişa. Aşopeten ti-muşi k’ailot impulaps. Xonari muşiten so na rt’as, onişanaps. Gugulepe renan k’aveşperoni didopeten. Gexçaneri gurp’icepe uğunan ğvaroni. K’uçxe muşi ren mamemxu3’ale do na guikten k’itiloni. Jur k’iti 3’oxle do jur k’ititi k’ap’ulas uğun. Didopeten skidun bobonç’va do munt’urepe oç’k’omuten. K’arta sotxanis na skidun didi sort’epek txalari, 3’i3’ila, k’vinçi do ç’it’a maxvat’alepe oç’k’omuten skidunan.