Wp/lzz/lat/Fethi Gemuhluoğlu

Fethi Gemuhluoğlu, Turki şairi, maç’are do aktivist’i ren. Cinci muşi Elazizişi ilçe Ağinişi oput’e Gemuhu ren. St’amp’olişa moxtimeri art ocaxişi skiri ren. Goztepes 1922 3’anas dibadu. Fethi Gemuhluoğluk Haydarpaşaşi lise oçodinu do Huk’uk’işi fak’ult’eşa geoç’k’u. Halkevleri (Xalk’işoxorepe)-şen met’a faalietepe ikipan namut arteri p’art’iaşi devres ağanmordobaşi aktivit’epe do resimuri organizasionepeş go3’oncğoneri. Bilasa mamgurepeşi p’ansionepes ok’oik’atenan. Ağanmordepek Xalk’işoxorepeşi ok’oxtalapeşa ak’atet’es do mağarğalepes eşok’itxupt’es.

Am ağanmordepeş ok’ok’atineri p’ansionepe do k’avexanepe dogurale niktu. Ağanmordepe Beyazitis Kulluk k’avexanes ok’oxtept’es. 1946 3’anas, Turkuli K’ult’uraşi Ocaxi geidginu. Gemuhluoğlu, am ocaxişi gedginuş oras askerişa mendaxtu. Askerobaşen uk’uniktuşi ocaxişi faalietepes go3’vancğonu. Uk’ule Turkuli K’ult’uraşi Ocaxi k’ala sum cemieti ok’oinç’uşi Nasionalist’epeşi Cemieti geidginu. Em devres ağanmordepeşi k’arta ok’obğalas emuk go3’vancğonept’u. 10 İgrik’a 1950-s Mareşal Fevzi Çakmaki ğuruşi radioşen xeleberi birapape do osteruşi melodepete ixelinuşi, nasionalist’i ağanmordepes gurpatkaleri nuğarğalu do radioşi maktaloba p’rot’esto qu. Harbiyeşi k’umandanobaşa mextu do bandara gverdişakis geonç’apu. Beyazitişi cames mareşalişi tabuti resimuri k’oçepes var meçapu do Eyup Sultanişakis ogzalapu. Am k’oçepeşi doloxe Turgut Ozaliti kort’u.

St’amp’olişi çkvadoçkva lisepes mamgurapoba, St’amp’olişi sp’orti do merçapaşi doxoreş mudiroba, Mileturi Gamantanaşi Nazirobaş katibiş mudiroba, Turkiaşi Odapeş do Borsapeş Artobaşi p’resaş muşaviroba steri vazifepe aqu. 1969 3’anaşen doni Turkiaşi P’et’rol Vak’ifişi umumi sekret’eroba, Gamantanerepeşi Ocaxi k’ala Turkuli Ç’aralobaşi Cemietişi istişareş heyetis do Bank’a Anatoliaşi idare heyetiş mak’aturoba do dido xeirişi cemietepesti maktaloba qu. Gemuhluoğlu, 5 Gimua 1977 tarixis doğuru. Gendğanis Fatihişi cameş avluşen nazirepek, mebusepek, valepek, k’umandanepek, p’rofesorepek, şairepek, maç’arepek, magazetepek, imamepek do muşi gamantaneri k’adropek elvaqones.