Wp/lzz/lat/Fahri Kahraman

Fahri Lazoğlu do Fexri Mtanebiva coxotenti çineri Fahri Kahraman, Arkabişi oput’e Asidere/ Sideres dibadu. Geç’k’apuroni n3’opula oput’e muşis, oşkenduri n3’opula Xopas ik’itxu. T’amt’raşi Mamgurapaluri N3’opula notamamu şk’ule, Arkabis nak’otxani 3’anaş morgvalis k’lasişi mamgurapale oqopinot ixandu. 1960-s xolo 3adape meçamuten Ank’araşi Gazi Gamantanaşi İnst’it’ut’işi Turkuli Nç’aralobaşi burme oçodinu; nç’aralobaşi mamgurapale iqu. 1963-s, majurani-leit’enant’işi rutbeten malimobaşi misia notamamu Xopas. 3’oxle Arkabis ok’uleti Mersini, Erzurumi, Arkabi do Rizinis nç’aralobaşi mamgurapale oqopinot ixandu. Fransuli nenati na uçkit’u Fahri Kahramani, namtini p’olit’ik’uri sebebepeten naşkvu dulya muşi ar p’eriodi şeni do çkvadoçkva svalonuri gazetapes maç’aralobati qu.

Lazuri nena do k’ult’uraşa nç’ela muşi kogeç’k’u oşkenduri n3’opulaş oras. Ar k’ele mamgurapale oqopinot ixandu majura k’eleti dido na qoropt’u nananena muşi Lazuri do k’ult’ura oskedinu şeni gza goru. Nananena muşi na rt’u Lazuriten oç’aru şeni çkvadoçkva gzalepe goru. Çinoberi filologi do ak’ademisieni Georges Dumezilik Lazuri p’aramitepe oç’aru şeni na 3adu t’ransk’rip3iak emus gza o3’iru. Artneri speros na ixandept’u Germani filologi Volfgang Feursteini k’ala ok’içinu do ak’ademik’uri oxanduşi gzas gedgites artot. Ti-mutepeşis mxuci na meçapt’u majura şurepe k’ala artot, Latinuri cinconi Turkuli Albonişen gamaxtimeri ar alboni xazires. “Lazuri Alfabe, Parpali- 1, Lazuri Ç’aralepe” coxoten do k’olekt’iuri ar dulyaten xveneri am alboni Fahri Lazoğluşi coxoten gamiçkvinu do içinu. 1984-s, dido mskva Lazuri, Germanuri do Turkuli ar go3’otkvalaten Gulvaşi Germanias gamiçkvineri am albonik gza meçu Lazurişi oç’arus, t’ransk’rip3ia do Kortuli Alboniş galeti.

1997-s mamgurapalobaşen p’ensioneri iqu. Dido mk’ule ora şk’ule, emus na ağodu t’rafik’şi k’azaten, şuri muşi Ğormotis meçu. Fahri Kahramanis uğun uk’ore3xoloni Lazuri leksi do xvenape. Lazuri leksepe muşişen namtinepe gamaçkvineri ren k’ult’uruli jurnali Ognis. Dido 3’anapeşen doni na ikipt’u dulyapeşi dosia, svara oqopinot gamoçkvuşi simada uğut’u emus, p’ensioneroba şk’ule. Murenki var axor3ilenu aya. Fahri Kahramani; ocaği, mzaxali do megabrepe muşi na ak’atu ar cenazeşi 3eromania şk’ule, na dibadu Arkabis let’as niçinu. Uçilu na rt’u Fahri Kahramanik skidala muşi, Lazuri nena do k’ult’uras na nukadu, eya oskedinu, oxampu do Lazepes oqoropapu şeni na ixandu dulyamxvenu ar int’elekt’uali rt’u.