Wp/lzz/lat/Elemit’a

Elemit’a (Morbilli), ar ç’eşidi virusik na nusebebups, generalurot 3- 10 3’anerepeşi oşkendas na iz’iren nak’limoni do gvabğoni ar zabunoba ren. Lemşi ugeçameri do nana muşişk’eleni oçvu na dvark’inen çiçku berepe, doguroniş 3’oxleni p’eriodişi berepe, naxondinuş sist’ema sap’ara na uğun adamepe, elemit’aşi jur dozi lemşi uxvene adamepe renan, zabunoba na nak’limen mağala risk’oni grup’epe. Elemit’a 3’oxle jindoleni oşvanuş infek’sioni steri geç’k’aps, emuşk’ule nunk’u do cinikis na iz’iren do xuraşati na doligzen mç’ita gvabğa yeçkindun. Mik’rop’i nak’limaşi omonç’vuş p’eriodi 10- 12 dğa naqonen.

Zabunoba 3’oxle; t’u3anoba, uxaloba, uiştağoba, tolepeş o3’k’aru do omç’itanu, oxvalu do çxvindiş o3’ap’u k’ala geç’k’aps. Tişi o3’k’unu do çxant’a teşen uraxat’oba iqven. 2- 3 dğaş doloxe nunk’us xçe lekepe, 2 dğaş k’uleti jinşen tudeşakis mç’itanoba guibğen. Am p’eriodis çarbiş oxomu do nenas opasu iz’iren. Elemit’a nak’limeri zabunepes, xususurot k’ai uoskedineri berepes bronşit’i, zaturre, korbaşçxala, oşkenda qucişi infek’sioni, konjonktivit’i, utoloba steri k’omp’lik’asionepe iz’iren. 3’anapeş k’ule na yekçindun nadiri ar k’omp’lik’asioniti, xuçeşi sist’ema na dejeneraps oğurnoni zabunoba na işinen SSPE (Subak’uti Sk’lerozani Pan Ensefalit’i) ren.

Elemit’aşi virusi, zabuni adamişen oşvanu, ocundu, artneri angişen oç’k’omu steri gzapeten nak’limen. İrişen nak’limoni p’eriodi, t’u3anobaş 3’oxleni ora do gvabğa yeçkinduşen 4 dğaş k’uleşakis ora ren. Zabuni beres am p’eriodis izoleş oxvenu do gvabğaş geç’k’uşi oraşen doni 5 dğa doguronişa uoncğonu unon. Viraluri zabunoba na ren şeni, fakt’orişa nodgitoni şvela var uğun. Mara oncires moşvacinu, dido 3’k’ari oşumu, oxvalu şeni qini buxari oşvanuk nuşvels. Zabunişi odas mjoraş oz’iru do dido paği oqopinu uk’ors. Odaşi t’u3anoba 18- 20 derece iqvasunon, dğas jur fara hava amaxtasunon do zabunis qini var aqvas yado dido içvasunon. Edo xolo zabunişi nunk’u, çxvindi do xuraşi pağobaşa ik’un3xinasunon. Hekimişk’elen niçineri t’u3anoba na dork’inaps ç’amepe do vit’aminepe işvasunon. Zabunoba nanç’inerot ar doloni naqonen do skidalaşi morgvalis arçkva var eçkindun. Elemit’a, lemşite na nidgitinen ar zabunoba ren. Mara maartani 3’anaş doloxe na geiçinen ar dozi lemşi na var dubağun do jur dozi geçamu na unon var goiç’k’ondinasunon.