Wp/lzz/lat/3xeni

Ʒxeni, Equidae ocağişi arteri buʒxoni t̆akimişen tipimç̌ǩomura art bužoni xayvani ren. Oxoruli cinsepe uğunan, Ameriǩaşi st̆epepes “Must̆angi” coxoni do germa Altayişi jur ǩeleni dixapes “Prezevalski” coxoni mt̆ǩuri ʒxenepe cogepete skidunan. İrişen çinoberi ʒxenişi cinsepe Arabuli, İnglisuri do Midilurie. Kimoli muşis aygiri, ǯuna muşis ǩisraği, motali muşis tayi, ikdişi xveneri muşisti beygiri itkven. Ç̌it̆a dudoni do mǩule quconie. Çoçoǩa do ǩudeli muşi ginže tomonie. Tipi ç̌ǩomupan mara var inç̌amurapan. Bužepe muşi ǩuçxepeşi xolos uğun. Masumani ǩitepes “toynaǩi” coxoni mçire buʒxa gudgin. Toynaǩiş jin gebažgeri gulun.

Ǩoçepeşa maxezmet̆e skindinapeşi irişen xemaxvence do ğirsoni ren. ʒxeni, ǩoçepeşi mcveşi limaşi meidanepeşi mameşvele, oğmale otirus maxezmet̆e, oǩoç̌işus, ciritis, oʒxont̆us do onadirus xelebaşi do zevkişi oşkari ren. ʒxenepes artneri oras burgilepe muşi anǩilenan. ʒxeni, gurami do zirmiç̌i ren edo xolo mance muşiş nena ǩaixeşa nusimins. Doç̌ǩindinobas var oǯǩen do ti muşis dido niç̌iras tina xanda do menceli muşi itaati şeni xarcups. Ç̌it̆a oç̌ǩomale dubağun do ǩarta ç̌eşidi t̆aronis nuxondun. ʒxenepe 40-60 ǯana skidunan, namtine ǩisrağepe 15 ǯaneri şakis dorinapan. Mçinocoba mutepeşi vitoart tuta ren do çodinas art motali dorinapan. Motali toli gonǯǩimeri dibaden do art-jur deǩiǩeş ǩule yisels do nana muşiş notxozus geoç̌ǩaps. Oğmale oǯinǯuşi do otiruşi ʒxenepe, mçxu t̆riǩoni do xuroni iqvenan. Gexunuşi do oǩoç̌işuşi ʒxenepe mç̌ipe do ginže ǩuçxoni iqvenan. ʒxenepek artikartişa xaseti var ikipan mara artimajuraşa gipta oxvenuşi tabieti uğunan. Artimajuraşa gipta ikipan, umosi surat̆oni unǩap̌unan do goǯoxtimu unonan. Art saat̆is 60-70 ǩm surat̆ite unǩapun ʒxenepeti koren. İrişen beciti ʒxenişi cinsepe antepe renan:

Arabuli ʒxeni: Ǩaixeşa art gexunuşi do oǩoç̌işuşi ʒxeni ren. Ç̌ǩua, sadaǩati do noxondinu muşite içinen. Cinci muşi iptineri vaxtişa nunç̌uşun. 24-28 saat̆is çkar ǯǩari uşveri agzalen. İnglisuri ʒxeni: Bilasa oǩoç̌işu şeni iskedinen. Arabuli aygiri ǩala İnglisuri sotinuri ǩisrağişi omziǩuşen omraleri cinsi ren. Arabuli ʒxenişen umosi ginže t̆riǩi uğun. Midiluri ʒxeni: Ç̌it̆a, sakini do noxondinoni art ʒxenişi cinsi ren. Txa vana boçi ǩonari iqven. Goxtimuşi arabapes do madenişi ocaxepes ixmarinen. Çinuri ʒxeni: Ťriǩepe muşi İnglisuri ʒxenişen umosi mǩule do Arabuli ʒxenişen umosi ginže ren. Ťriǩepe muşişi ginženobate ginže mesafepes majura ʒxenepeşen umosi dido agzalen.