Wp/lzz/ge/დანიელ ფიფია

დანიელ ფიფია (Daniel Pipia, 1896-1924)

მარგალი ბაირონი ნა უჯოხოფტეს დანიელ ფიფია 1896 წანაში 1 ბულორას ზუგდიდიშ მაზრაშ ოფუტე ობუჯის დიბადერენ პავლე ფიფია დო ქეთევან კვირკველიაშ კერას. ჩილ დო ქომოჯის დანიელიშაქის ჟურ ბიჭი ბერე დუღურელენან დო დანიელიშ დობადინუ ენთეფეშენი დიდო ოხელუში ტერენ. მარა დანიელიქთი ბერობაშენ ძაბუნი იყუ – მარძგვანი ხე დო კუჩხეს ნუზული გეჩამერი ტერენ. ბაბაქ დიდო ტოხტორეფეშა იყონუ დანიელი, მარა ემუს მუთუქ ვარ უშველუ. ჟურდოგვერდი წანერი რტუში ბაბა დუღურელენ, 7 წანერი რტუში ნანა დო ქოდოსქიდუ აშო დალეფეში ხეს. ემუქ ჟურ კლასონი ნწოფულა ობუჯის დოჩოდინუ, დო მაჟურანი ნწოფულაშა იდუ, მარა ოგურაფუში ფარა ნა ვარ უღუტუ შენი ექ ვარ აგურუ.

ოკულე ემუქ ქუთეშიში გიმნაზია დოჩოდინუ დო ობუჯის მამგურაფალეთენ ოჩალიშუს ქოგჲოჭკუ. ამ ორაფეს ოკიჩინუ ჩქვა დიდი კოლხეფე კალა: კალისტრატე სალია, ლეო ქიაჩელი, ეგნატე ფიფია დო ენთეფე კალა ოფუტე მუშიშენი დიდო შეეფე ყუ.

დანიელი კოლხური ნენათენ ჭარუფტუ. ემუქ ნა ჭარუ პაშურა “ხომულა კოჩი” ყოროფა დო კოჩინობაშ ჰეჲკელი რენ. ჩქვა მარგალური ლექსეფეთი დიდო მსქვა დო მაანონი რენან. დანიელიქ ხოლო 1855-1856 წანაფეს ნა იყუ მარგალური ანტიჶეოდალური თი ეწოზდალუშენი ისტორიული პოემა “ბულათია” ჭარელენ. დანიელ ფიფიაქ მარგალურ-ქორთული ნენაფუნაშენითი მატერიალეფე კორობელენ დო დიდო მსქვა არ ხანდა ოკოდგინერენ, მარა ფიფიას ემუქ ვარ აჩოდინუ.

დანიელ ფიფია სოციალურ-დემოკრატიული პარტიაშ მაკათური რტუ დო ოქორთუე რუსი ბოლშევიკეფექ ბახვათენ ქეჭოფესშკულე, ემუქ ჩქვა პატრიოტეფე კალა დობადონაშ მოშლეთინუშენი ოსიმადუს ქოგჲოჭკუ. 1924-ს ნა იხაზირეტუ ანტიბოლშევიკური თი ეწოზდალუში ცადალას ამუქთი აკათუ – ზუგდიდიშ მაზრას მადუდალე პროპაგანდისტი რტუ. მარა ამ თი ეწოზდალუ ვარ იხვენუ, ბოლშევიკეფექ მთელი რევოლუსიონერეფე ოჭოფეს დო გოხვეს – 28 წანერი დანიელ ფიფიათი ენთეფეში დოლოხე რტუ. კომუნისტური ორაფეს დანიელიშ ჯოხოში ოშინუ ნკილერი რტუ. ემუშ ნოჭარეფეს ჭუფტეს. მარა ჭიტა ხოლო ქოდოსქიდუ დო ენთეფეშენ ჟილე ნა იშინუ სთერი: პოემა “ბულათია”, პაშურა “ხომულა ქ’ოჩი” დო მუკოთხანი ლერსი რენ.