Wp/lus/Thuziak lem pahnihna

From Wikimedia Incubator
< Wp‎ | lus
Wp > lus > Thuziak lem pahnihna

Mizo khawtlang nun hi a mawiin a zahawm a, tlawmngaihna kan neih hi hnam dangten an neih ve loh an awh ngawih ngawih a ni. Tlawmngaihna hi inpekna atanga lo awm a ni a, a chhuanawm hle a ni. Hnatlan, thlan laih, khawharin kal, mitthi in riah etc zawng zawng hi mahni inpekna tlawmngaihna kan tih atanga lo chawr chhuak a ni.

Mahni ah tihtur tam tak kan nei theuh awm e, chungte chu hlawm lian tak 4 ah lo then ta ila, pakhatna ah chuan in chhungkhura kan mawhphurhna (duty) kan hlen a ngai a, a dawtah kan eizawnna (profession). Chutah khawtlangah. (Khawtlangah tih hian YMA, kohhran leh veng chhunga NGO huap ta se) Heta kan sawi tur tul leh pawimawh, a hnam ang zawng pawha kan mamawh ‘khawtlang nunah nu leh pate’ tih hi lo sawrbing chho ta ila a tha awm e.

Péng khatna[edit | edit source]

Thil tihna kawng hrang hrangah mi inhmang bik kan tihte an awm thin a, hetianga mi inhmang tak tak (mi inhmang bik) kan tihte hi awm ta lo se veng tam tak kohhran leh khawtlang inrelbawlna chu a lak tlak loh ve thin ngawt ang, amaherawh chu hetiang mite a vang hian kohhran hlim takin a kal thei a, khawtlang a lo mawi thin a ni. Hetihlaia nu leh pa (a bikin fa nei tawhte) te tan kan ngaihtuah tur pawimawh tak lo awm ta chu kan in chhungkhur nun a ni. In chhungkhur hi nun bul kan tanna, fate tan an hmalam hun hriltu pawimawh tak, engkim kan zirna kan school hmasa ber a ni a, naupang tana pawimawh leh an mamawh hmasa ber chu in chhungkhur nun hi a ni.

Bung khatna[edit | edit source]

Tunlai chhanah mite an lo changkang tawh a. Eng hna emaw tal an thawk a nih loh pawhin office hna lamte thawkin chhun lamah an hun zawng zawng pawn lamah an lo hmang a, zan lamah kohhran thil leh khawtlang thilah an han inham buai leh a. Committee leh thil dang tih ngai tesep tihtur a lo kuh tul bawk nen! Fate kalsan an lo ngai leh thin a, thil tha vek anga lang tho si ah chuan a eng ber hi nge kan ngaihpawimawh tak anga, eng hi nge kan tihtur ni a, eng hi nge kan tih loh tur ni ta ang le?

Nilenga chhuahsan hnu ah pawh zan lam leh zel han chhuah san hi chu thil tha ber a ni ang em? Fate tana hun nei si lovin thil danga tana kan hun kan pe phal leh viau mai si thin hi chu kan khawtlang pawh hian a la chhiatpui thei ang em? Nu leh pa te tan chuan in chhungkhur leh fate nun thlauh thla thak khawpa khawtlang leh kohhrana in hman lutuk hi a pawi thei ang em? Engkimah a mawi tawk a awm a, chin tawk neih thiam erawh a pawimawh fo; inhman lutuk lai khan fate nun a lo zalen a, kan tunlai khawvelah kawng dik lo an lo dai phah mai ang tihte pawh ngaihtuah a ngai ta a nih hi! A malsawmna fanau enkawl hman lo leh nun kawng dik pawh kawhhmuh hman lo khawpa khawtlang thila in hman erawh siamtu pawhin a rem ti chiah lovang.

Bung hnihna[edit | edit source]

Khawtlang thila in hman lutukna hian in chhungkhur dinhmun leh chanvo a phet chhe thei a, fanau enkawlna thlengin hlawhchhamna a thlen thei a ni. Kan thenawmte hian khawtlanga kan inhmanna hmang hian min teh dawn lova, kan khawsazia leh nunphung atang hian min teh zawk dawn a ni.

Fate an tet laia thlahdah taka enkawltute hian an len hnu ah fa fel tak neih an han tum leh a, hei hi chu a dik lo a ni. A tobul ngaihthah in a ler lam siam that an han tum leh thin a, thil har tak, siam that theih tawh loh a lo ni tawh thin si a, hei hi chu a pawi ngawt mai. Tam takin a kan hmaih palh lian tak a ni thei ang em?

Kan hringnun zinkawnga zirna inpui ber kan in chhung hi nunchan kan zirna a ni a, chuta zirtirtu te chu nu leh pate an ni, zirtirtu awm lohna hmunah naupang lehkhathiam an awm ngai lo.

Tlipna[edit | edit source]

Kan Pathian lehkhabu thianghlim thufing bung 22, chang 6 ah pawh- ‘ Naupang chu a kalna awm kawngah chuan zirtir ula, a upat hun pawhin a thlah lovang’ a tih pawh hian nu leh pa mawhphurhna chu a sawi chiang hle a ni. Fate nun a in pek lohna chuan a hnu lamah in chhungkhurah harsatna leh buaina a thlen a, khawtlangah phurrit a thlen a, ram leh hnam a lo ti thuanawp thin a ni.

Thulâkna[edit | edit source]

  • Ringlova, Nuamsa fâte eizawnna kawng käwi, Chhatla, Tuichhiahtlang, Lunglei, kum 1998.
  • Ringpeihvêllova, Hun laihawla Mesopotamiarama incheina, LH Zawhna, kum 1997