Wp/lus/Thanga

From Wikimedia Incubator
< Wp‎ | lusWp > lus > Thanga
Jump to navigation Jump to search
Thanga
Thanga thlalâk i neih chuan rawn thawh la kan läwm hlë ang
Zenit.gif


A chanchin tlangpui
Hming Thanga
Laiah-hming Lalhmingthanga / Thangngúra
Pian kum Kum 1883
Eizawnna Berampu
Sülhnu lam
Kutchhûak Misual ka ni Lalpa ladt.
Hriat hlawhna ṭhenkhatte
Voir aussi En bawk la : Zo Lungthu Pathumte

Thanga hi Zofate zinga hla phuahtu pawimawh leh letlingtu pawimawh tak a ni a. A hming hi Lalhmingthanga emaw Thangthura tia sawi an awm ṭhin. Thanga tih hi a larpui ta ber a, mi tam berin kan hriat dan pawh a ni.

Hun hmasa[edit]

Kum 1883 khan Chaltlang-ah a lo piang a , nausen a nih laiin a pa, Thanglianmanga’n a thihsan avangin Vawngawnah te, Tanhrilah te, Hmunte-ah te, Mualbem-ah te an pem kual a. Chumi hnuah Lalsavunga hovin Zokhawsangah an awm ta a ni.

Sipai bel nawta ṭang chungin lehkha a zir a, Babu Sohon Roy-a hnenah a awm leh a,chumi hnuah Zosap chawm-hote awmna in sak tharah a lut hmasa ber zingah a tel ve a. Lehkha a thiam thei hle a. Kum 1899-a an ekzam ṭum chuan pakhatna a ni a, kum 1903-a Lower Primary ekzam-ah mi 27 zingah pahnihna a ni bawk. Kum 1900, Pawltlâk thlaah Zosapte nen Khasi ram an tlawh a, an haw hnu kum 1901, ramtuk thlaah baptisma a chang ve ta a. Mizoram thim zual laia ringtu hmasa, Zosapte ṭanpuitu a ni.

Zir zawh leh thawh[edit]

Kum 1906-a Mairang inkhawmpuia harhna zu chhimtu leh harhna hmasa ber pawchhuaktute zingah a tel a. Kum 1907-ah Cole Sap-in Scholarship a tihsak avangin Shillong-ah High School a zawm a, kum 1911 khan Mizo zinga Matric zir zo hmasa ber a ni ta a. Zofate zinga lehkhathiam hmasa, sulsutu pawimawh tak a ni. Matric a zawh hnu hian Bawhsap pisa-ah Clerk hna a thawh a, Head Clerk thlenga kaisangin kum 1940 khan a pension ta a ni.

Thih[edit]

Kum 1914-ah Mission Veng Kohhran Upa atan thlan a ni a. Hmarchan Kohhran ban pawimawh tak, Kohhran rawngbawlna bakah Red Cross Society leh Pawnpui Industry lama sulsutu zing a mi niin, YLA dintute zinga pakhat a ni. Kum 1957, April ni 15 khan a boral ta a. Mission Veng thlanmualah phum a ni.

Kutchhuak[edit]

Thanga hian Mizo hnam nunphung tarlanna lehkha bu "Hmanlai Mizo Awm Dan" tih a ziak a. Hei hi tlai khawhnu kum 1992-ah tihchhuah a ni thung. Mizo Kohhran din tirh laia kristian hla siamtu hmasa ber niin a lang a. A tirah chuan Sap hla a letling phawt a. A hla lehlin zawng zawng chu 31 nia hriat a ni. Hla hi a phuah hma ve hle a, a hlaphuah hmasak ber chu ‘Kan Chatuan Pa Rawn Zawng Rawh U’ tih hi a ni. A lehlin ni lo, a hla phuahte chu a hla bul leh phuah hun/kum nen lo tarlang ila:

  1. Kan Chatuan Pa rawn zawng rawh u (1903-04)
  2. Aw Isu ka hmangaih ka rilruah (1906)
  3. Ka Pa, aw ka Pathian (1906)
  4. Misual ka ni (1906)
  5. Vana Jerusalem thar mawi tak (1906)
  6. Mizoram Mizoram ka thlahlel hle che (1907-1911)
  7. Mizo fate u finna zawng ula (1907-1911)
  8. Aw Lalpa chungnungber kan fak hle a che (December, 1910)

Kum 1915 hma lamah khan Mizo hla lehlin dang reng reng Thanga hla aia hmatawng hi a awm lo. Zofate zingah anmahni irawm chhuaka hlate phuah a, Mizo thuhlarila mi hmasa pathum hming lamchhuah loh theih lohte chu: Thanga - Liangkhaia - Awithangpa te hi an ni a. Anni pathum hi Mizo thuhlarila lungthu kimtu, Zo Lungthu Pathum tia vuah tur, sûlsutu pawimawh leh hmasa, ziaka thil vawn ṭhat hnua hmahruaitu pawimawh leh Mizo thuhlarila Innghahna Pate an ni a tih theih ang.

Thanga hian hnamvoh hla hi a lo nei hma hle a. Kum zabi 20-na inṭan lai khan a hnampuite chona hla ṭha tak a lo phuah daih tawh a ni. Pathian fakna hla siamtu a ni a, chhamhlaa chhiar tur a phuah ve bawk a, hla phuahtu leh siamtu nihna chelh kawp a ni.

Thulâkna[edit]

  • Chawngthu, Tluanga, Mizo Thuhlaril Hmasawn Dan - Part 2, misual.com thuziak [[1]]
  • Khiangte, Laltluangliana, Thuhlaril (Literary Trends & History of Mizo Literature), College Text Book (Mizo) Editorial Board Publications, Aizawl, chhuah 2-na, kum 1997.