Wp/lus/Sigmund Freud-a

Sigmund Freud-a, kum 1921-ah.

Sigmund Freud-a (laiah hming: Sigismund Schlomo Freud) hi Austria mi, Psychoanalysis din chhuaktu a ni a.

A pian leh murna

Freud-a hi kum 1856, ţomir thla ni 6 khan Moravia rama khaw pakhat Pribor an tih, tuna Czech Republic ram chhunga awm ta, -ah Juda chhungkuaah a lo piang a. A pa Jacob Freud-a hi sahmul zuarmi niin a nupui hmasa pakhat nen fa pahnih an nei a ni. Sigmund Freud-a nu, Amalié-i hi a nupui pathumna niin Sigmund Freud-a pian lai hian kum 21 mi chauh a la ni a, Jacob Freud-a erawh chu kum 41 mi a ni thung.

Freud-a pian lai hian Moravia hi Austria Lalram chhungah a awm a ni.

A naupan lai

Kum 1857 tlâkchhiatna (Panic of 1857), New York-a inţan khawvel sum leh pai dinhmun tlâkchhiatna nasa tak nghawngah Freud-a pa chuan a eizawnna a chan a. Mahsé rethei chung pawhin Freud-a hi lehkha an zirtir hram hram a.

Freud-a hian thuhlaril a ngaina em em a, Zerman ţawng, Feren ţawng, Itali ţawng, Spanish, Sap ţawng, Hebrai, Latin leh Grik ţawngte pawh a thiam hle. William Shakespearea thuziak phei chu a dam chhung khan a tuipui reng nghe nghe a ni.

Zirna lam

Kum 17 a nihin Vienna zirna in sang (Universität Wien)-ah a lut a. Dan zir tum ţhin rilru mah sé damdawi lam zirin Finrilna, Physiology leh Biology te a zir tel ta zâwk a. Kum 1881-ah hlawhtling takin a damdawi lam zir chu zovin a kum lehah chuan Vienna Vantlang Damdawi In (Wiener Allgemeinen Krankenhaus)-ah psychiatry clinic a hawng zui a.

A hnathawhte

Kum 1886 khan a dawmdawi in hna chu bansanin thisenzam dik lohna lam enkawlna a buaipui ta zawk a. Hetih lai hian Ersten Öffentlichen Kinder-Krankenhaus (naupang damdawi in)-a a thawk a. Hetih hun lai chho hian a ţhianpa Josef Breuer-a tihphungin hypnosis a hmang ţan a ni. Kum 1886 mimkut thla khan kum li a lo zui tawh Martha Bernays-i (1861-1951) nen chuan an innei a.

A thil hmuhchhuah inţanna

Kum 1885, khuangchawi thla khan Paris-a Jean-Martin Charcot-a, khatih hun laia thisenzam lam zirmi (neurologist) lar tak hnena zir theihna tur Scholarship a dawng a. (chhunzawm tur)