Wp/lus/Rumliana titi

From Wikimedia Incubator
< Wp‎ | lus
Wp > lus > Rumliana titi

Hnam tin zingah hian mi danglam bik, mi mak sarâng sawi tur hi an awm thin a. Chutiang mi chu a pian pawh an piang zen zen lo, mi vâng an ni. Mizo zinga hetiang mi mak sarâng kan neih pakhat chu Rumliana a ni. A nu leh pa chu Vungkawnga Ralte leh Lianchhingi Ralte an ni a. Rumliana hi kum 1897-ah Lianphunga khua Zawngtah-ah a lo piang a. A naupan laiin Tlungvel khawper Zobawk-ah an pêm a, a pa chu Melveng hotu a ni.

Tleirawl chhuah[edit | edit source]

Rawlthar a nihin vawi khat chu a thiante nen Phulmawi khaw nula zen an rawt a. An pa chu hmeithai inah an lênpui hmasa a, zu an hrai rui a, a muthilh hnuin an chhuahsan a, nula in chu an pan ta a.

Rumliana chuan a thiante hnenah, “Ka lut hmasa ang a, min lo ngaithla rawh u,” a ti a. Sumhmuna a awm laiin an pa kha a muhil a harh a, a lo haw ve chiah a, an indang kawlawk chu a ni ta der a. Rumliana tlanchhiat ngaihna hre tawh si lo chu thingkhawn hnuaiah mawng lang rengin a tawm kuh mai a. An pa chuan, “E he he he… In mi han tih dan vei chuh! Hetiang in tum vang hi a ni maw zu min pêk ruih?” a ti a. Hmawlh a la a, a hawlh ta nghek nghek mai a. Rumliana chu ring zetin a ‘awiah’ vak vak a. Thenawm khawveng an lo tlan khawm thuai a. Zak zetin an haw ta hna hna a. An inah pawh riak ngam lovin a thiante inah a riak ta a.

Tlangval[edit | edit source]

A lo tlangval a, kum 1917 khan French ramah German râl rûnin a kal ve a. Kum 1921-ah Assam Rifles-ah a tang a. Silchar-a a awm laiin Assam Rifles-a Mizote chu in an saktir a. A chung dî an chih laiin an hotupa Holder chuan a hnuai lam atangin a phui leh phui loh a rawn endik a. Hmawlh zum a keng a, a phui lo lai a hmuh chuan, “He lai hi a la phui lo,” tiin a hawlh tlang zawk zawk fo mai a. A chang chuan anmahnite pawh a han hawlh fuh thin a.

A tawpah Rumliana ning chuan a hnuaia an hotupa chu a zunkhum ta vak mai a. An hotupa thinrim chuan Sap hnenah a hêk a. Sap chuan a ko va, “Rumlian, engati nge in Holder i zunkhum?” a ti a. Ani chuan, “Mizovin in chung dî kan chih chuan a phui leh phui loh en nan kan zung thin a. A hnuai lam ka hmu thei si lo alawm,” a ti ve tlat a. Hrem ngaihna an hre ta lo a ni. (chhunzawm tur)

Kum tir lam khan Rumliana chanchin post turin ka tum reng a. Mahse, ka lehkhabu chu ka hmu zo ta lo va, a chanchin ziahna bu a awm tawh bawk si lo nen, ka rawn post lawk thei lo a ni. Vanneihthlak takin ZOlife lamin July issue-ah an rawn chhuah ta hlauh mai a, dil/hrilh lem lovin ka rawn chhuahchhawng ta mai a ni e.

Thulâkna[edit | edit source]