Wp/lus/Pamanga bahzar

Hman laia Mizoram thlang tla hmasate zinga Khuanglawi, Khuangchhip, Khuangvum leh Kawmho hnam, Mizoram chhim lam pan tate zinga an hnam peng Bawhmawng hnama Pamanga hi Matu ram depa an awm laia chungho zinga lal a ni a. Lal ropui tak a ni a. In ropui tak a nei a. A inah chuan bahzar a siam a. Bahzar chu inchhungah kawmchar lamah chhuat kang sang bikin an siam a. Chumi chhuata thu chunga khaw hawi theihna tawka sangah chuan tukverh khamphei zawlbuk awkpaka ang siam a ni thin a. Thangchhuah pa lo chuan siam ve ngawt theih pawh a n lo va.

Pamanga chuan a in atanga mel chanve vela hla-ah sumdawnna hmun, dawrpui a siam a. Fur lai chuan chu mi dawrpuia kal a duh chuan a bahzar atang chuan chhim chhak zawn a thlir thin a. Chumi zawn van chu a en chuan khua a tha thin a, a en loh chuan ruah a sur deuh ngei ngei thin a. Chumi zawn kawl a en tuk chuan Pamanga chu dawrpuiah a kal thin a, a en loh chuan ruah a sur ngei dawn tih ringin a kal duh thin lo va. A chhichiahna chu a lo dik thin ta a.

Chu chu hriain khaw that dawn leh dawn loh hriat theih nan Pamanga kawl eng en thin chu an en ve ta thin a. Pamanga’n a bahzar atanga a thlir thin avang chuan a kawl eng chu "Pamanga bahzar" an vuah ta hlauh va. Tun thleng hian fur laiin Mizoram chhim chhak deuh hrat zawna kawl eng thin chu an thlir thin a, a lo en chuan, "Pamanga bahzar a eng a, vawiin chu khua a tha dawn a ni ang," an ti a. Khawchin chhihchhiah nan tak an lo hmang ta a ni.

Thulâkna

• lushai_er, Pamanga bahzar!, misual.com thuziak.
• Hrangṭhiauva & Lalchungnunga, Mizo chanchin.