Wp/lus/Kawrdumbela

Mizo thạwnthü
Kawrdumbela
lemziak tàrna
Langvète
Changtupâ: Kawrdumbela Langvète: Vazuntei
Thawnthu kalhmang

Kawrdumbela hi hmanlai Mizo thawnthu leh tùanthu pakhata kan hmun, pa hmélchhe em em mai a ni.

A thawnthu

Kawrdumbela hi a hmel a chhe em em mai a. vawikhat chu a vauah thang a kam a, nitin hian a en thin a, nimahsela a awk chu a chang ngai hauh lova, Kawrdumbela chuan a chäng ta a. Nakinah chuan Vazuntei hi a lokal a, thangawk chu a la ta vek a, chutia a lak lai tak chuan Kawrdumbela chuan a man ta a; Vazuntei chuan, 'Min thlah la, i thatna tur ka hrilh ang che,' a ti a. Kawrdumbela chuan, 'Ka thatna tur chu sawi rawh,' a ti a. Vazuntei chuan, 'Nakin zanah lal kawmchhakah kal la, 'Lalpa, lalpa, i fanu Kawrdumbela i neihtir loh chuan ralin an that ang che, i khuate pawh an that vek ang, ti la, chutianga zan thum i tih chuan a tha ang,' a ti a. Kawrdumbela chuan a thlah ta a, inah a haw ta vang vang a.

Zanah chuan vazuntei sawi ang khan lal in kawmchhakah a kal a, 'Lalpa, i fanu Kawrdumbela i neihtir loh chuan ralin an that ang che, i khuate pawh an hal vek ang,' a ti a. Lal chuan a hriat hmasak ber zan chuan tak tak niin a ring lova. Nimahsela zan thum lai a hriat tak avangin a hlau ta hle mai a, nimahsela a fanu chu a hmel a taht em avangin Kawrdumbela, tlangval zinga chhe ber han neihtir chu a ui hle si a. 'Chemte, i pa leh khuate zawng zawng chan vek nge i duh, Kawrdumbela neiha i pa leh i khuate chan loh?' a ti a. Lal fanu chaun thlan ngaihna a hre mang lova, Kawrdumbela chu a duh lo em em si a; a neih loh chuan a khua te leh a pa te chu a chan dawn si a, hreh tak chungin a nei ta a.

Kawrdumbela chu a lawm em em a,nimahsela lal fanu chuan a haw em em thin a, a kianga awm te hi a ning em em thin a.

Tuk khat chu Kawrdumbela chuan, 'I pa len va hawh la, luiah sangha ka zu man ange,' a ti a. Lal fanu chu len hawh tur chuan a kal ta a, Kawrdumbela a hmuh hreh avangin rei tak a awm a. A pa chuan, 'Va haw thuai thuai rawh,' a ti a, hreh tak chuan len chu Kawrdumbela chu a va pe a.

Kawrdumbela chu luiah a kal ta a. Len chu a han deng a, Nghangiai hi a man a. Nghangiai chuan, 'Min thlah rawh, i thatna tur ka hrilh ang che,' a ti a. Kawrdumbela chuan, 'Min hrilh ta che,' a ti a. Nghangiai chuan, 'Zuk inbual la, lung mam takin innawt innawt la a tha e,' a ti a, a zu inbual a, Nghangiai sawi ang chuan lung mamin a innawt a, a inbual zawh chuan a han inen vel a, a lo ngovin a lo tha ta em em mai a.

Inah chuan a han hawng a, a nupui chuan a pasal kha a ni tih a hre hauh lova. A nupui chuan, 'Mi fate tha tak tak hi kan hmu kan hmu a, kan hmelchhepa kha a lo hawng leh awm sia, a hmel hmuh ka ning em mai' a ti a. A pasal chuan, 'Keimah hi Kawrdumbela kha ka ni alawm,' a ti a, a nupui chuan mak a ti em em a, a pasal chu a hmangaih ta em em a. A pate len a hawh kha a va pe leh a, nidanga a thangrei thin nen, kawngka atangin, 'Kha u in len,' a ti a, a paih lut thuai a, a hawng leh thuai a. A pa chuan, 'Engtizia nge ni dangah kan inah a lokalin rei tak tak a awm thin si a, a va hmanhmawh em!' a ti a. An inah a va kal a, a pasal Kawrdumbela chu a va hmu a, chutia a lo that tak dan zawng zawngte chu a zawt a. Ani chuan Nghangiai a man thu te, a inbual thu te kha a hrilh vek a.

Lal chuan hmelthat ve a duh a, luiah a zu kal ve a. Nghahrah hi a zuk man ve a, 'Min thlah rawh, i thatna tur ka hrilh ang che. Zu inbual la lung chikin innawt ang che,' a ti a. Lal chu lawm takin a zu inbual a, lung chikin a innawt a. A inbual zawh chuan a han in en a, a taksa zawng zawng chu a chik chhe ta vek a, hlauhawm khawpin a chik ta a. Inah a hawng ta a. In a thlen chuan a hmel hmu apiang chu, an tlanchhe ta zel a. an hlau em em a, Lal chu a mangang ta em em a. 'Mite chuan, 'Lalpa eng i ti ta nge ni, i hmel a va chhe ta em!' an ti a. Lal chuan Kawrdumbela a mawhchhiat a, 'Kawrdumbela sawi angin luiah ka zuk kal a, Nghahrah ka man a, 'Inbual la, lungchikin innawt rawh,' a ti a. A sawi angin ka ti a, nimahsela that a hnekin ka lo chhe ta em em anih hi,' a ti a.

Thulâkna

• Khiangte, Dr. Laltluangliana, Mizo Songs and Folktales.