Wp/lus/Hrahsel

Hrahsel hi Lusei hnam pakhat hming a ni.

A lo chhuah dan

Hrahselho chanchin bul hi Tuithang khaw rûn AD 1550 vel atangin a intan a. Seipui khuain Kelchal tlanga Tuithang khua an va rûn tumin Kelchal tlang ramhnuaiah chuan mipa naupang pakhat saza lo zui mek hi an hmu a. An zinga mi pakhat chuan mipa naupang chu a hawn a, fapaah a nei a, a hmingah Hrahsela a sa a.

Hrahsela chanchin

Hrahsela chuan a awmna pa, Chhakchhuak pa chu pa tak takah neiin a hnenah chuan a awm ta zel a. Nupui te neia chhungkua an din hnuah pawh a pa hnam leh tawng leh sakhua chu a tâwm hlen ta zel a. Lusei dangte nen dawi sa kil zaa tawng khat hmang hovin Seipui khuaah chuan thlangtlak thlengin an awm ta a.

A pa chungchanga ngaihdan

Hrangsa upate chuan Hrahsela pa chu Sawnghauva a ni an ti. Hrahsela chuan he’ng — Hrangsa te, Saza te, Selpui te, Sawntlung te, Tochhawng te, Vanchhawng te hi a thlah hlawm a. chu’ng chu chi pengah an lo hmang ta a ni an ti.

Ngaih dan dang

Mi thenkhat chuan Kelchak tlanga an mana chu Hrahsela ni lovin Sawnghauba a ni a, Sawnghauva chuan Hrahsela te, Tochhawnga te, Vanchhawnga te a hring a, anni chuan chi peng tenau zawk tam tak hi an thlah ta a ni an ti thung.

Mahse, chu’ng sawi dan te chu a chianna tak a awm lem loh avangin Tochhawng leh Vanchhawng chu Hrahsel thlahte zingah chhiar tel lovin Lusei hranpa anga dah a ni ta a. Hrahsela thlahte chu —

• Hrangsa
• Saza
• Selpui
• Sawntlung

te ni-ah ngaih a ni ta ber a ni.

Tlipna

Seipui khura Luseiho sa lu invuakthlaksak laiin Hrahselho chu Chhakchhuak te, Chhangte te, Renthlei te, Tochhawng te, Vanchhawng te nen an tang ho va, a huai lam an nih avangin tun thlengin pawnah sa lu an tar thin.

Hnam upa tak ni ve mah se, mahnia chi hlawma belrawhmual an neih loh avangin an hnam bik chanchin chhui tur a tam thei lo a ni.

Thulakna

• Hrangṭhiauva, Mizo History