Wp/lus/Hmuichukchuruduninu

From Wikimedia Incubator
< Wp‎ | lusWp > lus > Hmuichukchuruduninu
Jump to: navigation, search
Mizo thạwnthü
Hmuichukchuruduninu

lemziak tàrna

Langvète

Changtunû: Hmuichukchuruduninu
Langvète: Nuchhimi te unau.

Thawnthu kalhmang

Misual laka phuba lâkna.

Hmuichukchuruduninu hi Mizo thawnthua thilnung pakhat a ni.

Nuchhimi[edit]

Hmanlai chuan Nuchhimi te unau hi an awm a. Ni khat chu Nuchhimi nu chuan, 'Nuchhim, vawiin chu i nau nen i ni vawksa va pe ang che u,' a ti a. Ani chuan, 'Ka ni in kawng ka hre lovang e,' a ti a. A nu chuan, 'Va kal zel ula, kawng peng a lo awm ang a. Lehlam chu a fai hliu hliau anga, lehlam erawh chu a hnawk niai nuai ang. A fai lam chu i ni kawng a ni a, a hnawk lam chu Hmuichukchuriduni kawng a ni a, a fai lam zelah in kal dawn nia,' a ti a.

Chutia an sawi lai chuan bang chhakah Hmuichukchuriduninu chuan a lo ngaithla reng a. A tlanhaw a, ama kawng chu a lo phiatfai sawk sawk a, Nuchhimi ni kawng chu a lo tihnawk vek a. Nuchhimi leh a nau chu a ni sa pe tur chuan an chhuak ta a. A fai lam apiang chu a ni te kawng nia ringin an zawh zel a, a tawpah chuan Hmuichukchuriduninu inah chuan an lut ta hlawl mai a, vawksate chu an pe a.

Nuchhimi chuan a ni chu ni lo chuan a hre hle mai a, mak a ti rilru hle a. Hmuichukchuriduninu chuan a ni ang takin a lo be si a: 'Ekhai, in lo zin a ni maw, innghat rawh u, in hah dawn tehlul nen,' te a lo ti vei chul a. Khua a lo thim a, mut a lo hun dawn chuan Hmuichukchuriduninu chuan, 'Nuchhim, i nau hi a te deuh va, ka mutpui ang a, nang zawng nula i ni a, khumaiah khan mu ang che,' a ti a, tichuan an mu ta a.

Zàn[edit]

An han muhil dawn ser ser a, Hmuichukchuriduninu chuan Nuchhimi nau chu ei a tum a, a hmui zum pui mai chu a kher ta ngur ngur mai a. A na ti chuan, 'Ka u, ka u,' a ti tuar tuar a. Nuchhimi chuan, 'Enge ni bawihte?' a ti a, Hmuichukchuriduninu chuan, 'Engmah a ni hlei nem maw le, sùhàngin a seh mai a ni e, mu hle hle rawh,' a tihsan mai a. Zanlaiah chuan a kher hlum a, Nuchhimi nau chu a ei zo ta vek mai a. A lu ruh leh a ngal ruh te, a ban ruhte chu a lungthuah a tungkhawm rum mai a.

Khawvàr[edit]

Khua a lo var a, Hmuichukchuriduninu chuan, vin deuh mai hian, 'Nuchhim, mei va chhem rawh' a ti a. Nuchhimi chu a tho va, mei a han chhem dawn a, a nau ruh chu a hmu a, a tap a tap ta a.

Hmuichukchuriduninu chuan, 'Nuchhim, engnge i hriata i tah kerh kawrh ni, mei kha chhem alh reng reng rawh,' a rawn ti leh a. Ani chuan, 'Ka ṭap love, mei a khu em a, ka mittui a tla mai a nia,' a ti a.

Tukthuan eikhamah chuan Hmuichukchuriduninu chuan Nuchhimi chu a phuar a, bawmrangah a chilh tlat a, khanchhukah a khai a, chhung lam leh pawn lamah kawng a kalh khum a, a fehsan ta a. Nuchhimi chu chhuak thei lovin mangang takin a awm a, chutihlai chuan Chaite hian englo a rawn tihtlak er er a. Nuchhimi chuan, 'Chima, bawlhhlawh mi tihtlak khum lo chuan ka bawm khaina hrui hi han sehchat la, ka chhuak daih ange,' a ti a. Tichuan, chaichimte chuan a sehchah sak ta vek a, Nuchhimi chu an in lamah a tlan haw ta vang vang a.

Phuba[edit]

A nu te hnenah chuan Hmuichukchuriduninu in a lo nghaisak dan zawng zawng chu a hrilh vek a, an thin a rim em em mai a, 'Phuba kan la ang,' tiin Hmuichukchuriduninu nghaisak dan tur an ngaihtuah ta a. A inah an va kal a, a lo awm lo hlauh mai a. A thukah artui an phum a, a pawnpui karah taivang bu an dah a, a tuium chhungah rultuha an dah a, a bang laiah tlahthi an thiat khat thung a, a sahriak burah sihsen an dah a, a tungchawah thiltenawm an tat luai bawk a. Kawngka-lam-chhak-ah suk an tung a, a kailawn hnuaiah ui kawlh leh kel kawlh an thlung a.

Chaichim hnenah, 'Chima, Nuchhimi lemah lo chang la, a chhan ai lo chhansak zel ang che,' an ti a, an kalsan ta a.

Tlaiah chuan Hmuichukchuriduninu feh chu a lo hawng a. Sakhi puar hi a nung chungin a man a, a rawn phur ut ut a; haw kawngah chuan ruahpui vanawnin a nan nek bawk si a, a sumhmun lo lut chuan, 'Si si si, Nuchhim, kawng mi va hawn thuai rawh,' a rawn ti a, Chaichim te khan, 'Engtinnge ka hawn theih ang, khanchhukah mi khai daih alawm' a lo ti a. Hmuichukchuriduninu thinrim chuan kawngkhar a bawhthla a, a lut ta a. Chaichim lah chu a rukin maukaw chhungah a lut ta zeuh mai si a, Nuchhimi awzawng a lo awm tawh bawk si lo chu a hrilh hai a, 'Si si si' ti hloh hloh chung chuan mei a han chhem dawn a. Artui chu a lo puak keh thawr a, a mitah a per ta chiam mai a. Tuium hunna lamah a tlan a, tui a han in dawn a, rultuha chuan a lo chuk a, 'Awi awi awi, a va na kher em, a vawh tehlul nen, ka pawnpuiah tal ka inthawlh teh ang,' a ti a, a han tlan lut a. Taivang bu a tidarh a, an lo seh huai huai a, a na ti lutuk chuan Tungchaw a han vuan a, bawlhhlawh a khawih pherh leh a. Bang laiah a tat dawn a, tlahthiin a lo at a. Sahriak a han hnawih dawn a, sihsenin a lo seh noh noh bawk si a. A mangang lutuk chuan, 'Ka inchhung chu thaksip thaksap a tam mang kher e, tlanbo daih tur anih hi,' a ti a, a tlanchhuak a, kawngka lam chhaka suk chuan a lo vaw vak a.

A leikaah chuan hrilh hai em em hian, 'Ka Nuchhimi chhuak ta bawk, ka sakhi man chhuak ta bawk,' a ti a, a tum vei ulh ulh a. A leika chu a tum chim a, ui kawlh leh kelkawlh chuan an lo si a, an lo seh hut hut a, a thi ta der a. Chutichuan Nuchhimi te chhung chu thlamuang takin an awm ta a ni.

Thulâkna[edit]

  • Laltluangliana Khiangte, Mizo Songs and Folktales.