Wp/lki/کرم دوستی
زمونه گن شناس[edit | edit source]
چوی طلسمی بسیایه ری نجاتم چه بکم
ای زمون گن‌شناس پر نهاتم چه بکم
یه هماری سردی زمسون تموم بی، اسکه چه
ای وهار هشک بی‌خیر و خلاتم چه بکم
دل خوشی نیرم اگر ار فیل سوارم چوی وزیر
ای گرفتاری شاه کیش و ماتم چه بکم
عقل و دین شکتم توریانه، و گردم نمان
ای رفیق تمل بی‌دسلاتم چه بکم
سیری اژ داول برزت عالمی مرزی، ولی
ای دو چم بی‌تریسک انگلاتم چه بکم
میم بچم، سرسوز و عاشق، کله شق و بی‌خیال
ای جم دشمین فروش لات و پاتم چه بکم
پرچ و پاک و بی‌ریا، ی‌ِ رنگ بمینم چوی خیام
ای بنومی، ای گپ و گر ولاتم چه بکم
وتمه حافظ ایسکه گ خرمن عمرم سزیا
ای خیاطه گیس چوی زلف ذراتم چه بکم
وت «کرم»میم غزلی ار نازنینت بخونم
ای جمال چون هور شاخ نباتم چه بکم
آلوزه[edit | edit source]
اي دل ئه‌ر وختِ سفر آلوزه آوردن چه‌ني لاره‌كيشِ آيْمَلِ رن‌بازِ كورباطن چه‌ني
بيمَسه فرمُن‌برِ هر موسَلِ بي‌خيرتي
طعنه ئه‌ژ لاتِ اِراگيرديِ تيكه‌چِن چه‌ني
نيشتن و عادتْ چوي زَلّ، دوير ئه‌ژ سراوِلِ زلال
اي گُلومِ بوگَنِ پر پِشكلِ ليخِن چه‌ني
اي‌جياي عطر و گُلاو ئه‌ر نارِكِ زردِ عروس
تِك‌تِكْ اسرِ بي‌اَمون، خوينِ جگر گِن‌گِن چه‌ني
خنه اي لِچ توريايه، عينِ ديو ئه‌ژ بسم‌الله
شادي ئه ژ بيخ كَنيا، زويخ و خصه هواردِن چه‌ني
هامه گردِ اَژدها خط خطِ عاشق گول دَري
مِنّت ئه‌ژ ديوِ دل آزا رِ وِژ اير رازِن چه‌ني
بوري زويتر خطِ مظلومم بسزِن چوي پَپي
ئه‌ژ پريسكِ آگرِ تو ، دفتر آشاردِن چه‌ني
ذهنِ هوشياري ني‌يه رازِ درينم بشتوي
نِم‌نمِ شعر و شراو ئه‌ر مَزگِ چوين آهن چه‌ني
مَر «كرم» گيونِ عزيزت و پيازِت خِرّيه
بازي و شوخي و گردِ دُم شير كردِن چه‌ني