Wp/ljp/Sumatera Selatan
Sumatera Selatan yakdolah salah sai propinsi di pulau Sumatera, Indonesia, Ibukotani di Bandar Palembang, ghik di pertengahan tahun 2024 penduduk propinsi sinji selamon 8.973.168 jiwa. Secagha géograpis, Sumatera Selatan bubatasan jama propinsi Jambi di haguk utara, propinsi Kepulauan Bangka-Belitung di timur, propinsi Lampung di selatan, ghik propinsi Bengkulu di barat. Propinsi sinji kaya jama sumber daya alam, gegoh minyak bumi, gas alam, ghik batu bagha. Selayinni, ibu kota propinsi Sumatera Selatan, Palembang, terkenal anjak tumbai ulih ngenjadi pusat Kedatuan Sriwijaya.
Anjak abad ke-7 togok hujung abad ke-14, propinsi sinji ngeghupako pusat Kerajaan Buddha Sriwijaya, sai nguwasai pepigha bagian wilayah Asia Tenggara. Sriwijaya yakdolah pusat petting guwai pembeghakan agama Buddha di Kepulauan Nusantara pas abad ke-8 togok abad ke-12.
Sejaghah
[edit | edit source]Prasejaghah
[edit | edit source]Sumatera Selatan ghadu dihuni jaghma anjak jaman Paleolitikum. Bukti watni pemukiman sina dibuktiko jama dihaluni baghang-baghang jaman Paleolitikum di lapik way Saling ghik way Kikim di pekon Bungamas, Kabupatén Lahat ghik 78 tulang sai buasal jak 3.000-14.000 tahun sai liwat, diduga buasal jak Austronesia ghik Austromelanesoid digali jak situs Guha Harimau di pekon Padang Bindu, Kabupatén Ogan Komering Ulu. Peninggalan pitu bilik batu sai diyakini buusia dihak 2.500 tahun dihalu di ghedik daghak kupi di Kotaraya Lembak, Kabupatén Lahat. Dihak tahun 300 SM, masyarakat Deutro-Melayu ghatong di wilayah sinji ghik ngejujunko jaghma asli mit pedaloman.