Wp/liv/Sīezõr

Sīezõr
Vōlikšimi	Jelāid Animalia
Phylum	Arthropoda Arthropoda
Klas	Kukkuzt Insecta
Order	Siphonaptera
Aim	Sīezõr Aphaniptera

Sīezõr um ikš parasītli kukki Siphonaptera seltšõs, kīenta um mōīlmas immõr 2400 zortõ.

Sidām-Eirōpõs um nēḑi immõr 70. Nänt pitkit um 1—5 millimetrõ. Sīezõrdõn pǟ um piški, immõrgouţlimi, vizāstiz vastõ rindõ. Amād sīezõrd um imtijizt ja līndõd parasītõd. Tūoitõg sōmizõks sīezõrd jāmstõbõd perīmīe nōgõ kaţki ja immõbõd sǟld vīerda. Sīezõrd pitklimi kejā laskūb näntõn jõvīst perīmīe karrõd agā tūrgõd vail kǟdõ. Irdistiz jemīņ pidābõd sīezõrd mingizt īd lind- agā jelājd zortõ, bet až õigizt perīmīeztõ äb ūo lieudõ, võibõd ne immõ ka tuoizt lūoimõd vīerda. Nägţõbõks sadābõd rištīngtõ pǟlõ kaš-sīezõr (Ctenocephalides felis) ja piņ-sīezõr (C. canis) . Rištīng-sīezõr (Pulex irritans) um paldīž ōrali. Sīezõrd võibõd pitkõ aigõ nǟlgastõ, pigātagā āigast. Pǟgiņd sīezõrd mūoštabõd kuordiz īekõ. Väggi jõvīst īekõbõd seļļizt sīezõrd, kīnga perīmīed likkõbõd pǟgiņ ja maggõbõd mūndas kūožõs nemē nägţõbõks piņīd ja kašīd. Līndõd ja midžīs jelābõd purrijizt sīezõrd īekõbõd vōjlistiz, sīestõ ku näntõn um perīmīe sōņõ päzzimi kievām. Sīe pierāst, ku sīezõrd võibõd lǟdõ īd jelājt zort kädst tuoizõn, võibõd ne vȱlda väggi fǟrligõd tebīd jeddõpēḑõn kāndajizt. Nägţõbõks äbţiztõ sīezõrd mēr suoŗkõd kädst rištīngdõn kāndõ.

Pǟgiņtõmi

Pierrõ kuoīnimizt kāndab jemmi sīezõr 20 - 500 muņḑi perīmīe pǟlõ. Jemizt võibõd muņḑi kāndõ setmiņ kõrd, kōd muņḑi-kandamiz vail bet näntõn um tegīž vīerda immõmizt. 4—5 pǟva pierrõ tulbõd ulzõ sīezõr-boŗīd (larvād).