Wp/kus/asumbul nɛ namis

Asumbul nɛ namis

Na’abi da pʋ’ʋs o kuob ka nidib wʋsa keŋ ye ba kua sʋŋ o ka Asumbul nɛ namis nɛ sian’arin bʋnkɔnbid bɛdegʋ mɛ bɛ. Ba da kua kuob la ka nintaŋ ti mu’oe bi’ela ka na’ab kɛ ka ba mɔr zɔ’ɔm na tisi ba. Ban keŋ ye ba di zɔ’ɔm la ka Asumbul nyɛ ka li pʋ zu’oe ka o gban’e ye asɛɛ on maal si’el ka paam zɔ’ɔm la dii gaad o taaba la. O da ianki keŋ digin passi ka midig o nini ka kpaadib la zɔ ka o duoe di zɔ’ɔm la o kɔn’ɔkɔn’. Kpaadib la zɔɔ paae na’ayin ka na’ab bu’osi ba dinɛ maal ka ba ta’an duoe kuobin la ka ba lɛbis ye amidig-nifʋ kadi ba ka na’ab ye ba lɛm kua ka on zi’ amidig-nifɔ. Ba da lɛbi paae nyɛ ka Asumbul bɛ anii kuod ka ba mɛ kpɛn pin’il kuob ya’as. Na’ab da kɛya ka ba mɔr walisa keŋ ka Asumbul lɛn niŋ ala ka ba zɔ ka o lɛn di o kɔn’ɔkɔn’. Ba da lɛn lɛbi kua ka zaam ma’ae ka ba yʋ’ʋn duoe kuobin la ka ba tisi ba sa’ab nɛ ni’im bɛdegʋ ka ba wʋsa di sa’ab la naae; ban yʋ’ʋn ye ba pʋdig ni’im la ka Asumbul lɛn midig nini ka ba duoe ka bas ka o ɔnbi li ya’as. Tɔ, na’ab yʋ’ʋn da yɛli ba ye asɛɛ ka ba gbɛn ka bɛog ka ba saa lɛb. Ban keŋ digini ti gbisid la ka Asumbul keŋ digini kpi’en nɛ na’ab pu’abil la ka ti duoe yʋ’ʋŋ tisʋʋs ye o bɔ na’ab pu’abil la ka o pʋ siakɛ ka o midig nini ka pu’a la zɔ dabiem ka o bɔ o. Naŋ da pʋ gbisɛ ka baŋ dinɛ maal la wʋsa ka Asumbul yʋ’ʋn ti gbis ka naŋ keŋ kpɛn’ Asumbul tʋbirin ka dam ka Asumbul nie gbɛɛmin ka ye o yim ka o ye Asumbul ya’a di’emmaa o na tɔn o. Bɛog da nieya ka ba keŋ ye ba pʋ’ʋs na’ab ka nyaan lɛb kuobil la ka naŋ yɛl Asumbul ye o yɛlim na’ab ye on sa pʋ bas o pu’abil la ka on sa san’am o; ka Asumbul ye oh, fʋ bɔɔdi na’ab kʋʋ maa? Naŋ da naan tʋbirin la yɛl Asumbul ye alaa m tɔɔnfɔ? Asumbul da gʋ’ʋŋ ya ka yɛl na’ab ye naa, tinamɛ sa kpɛn’ gbɛɛm la man sa pʋ basi fʋ pu’abil la, man sa san’am o. Na’ab la sʋnf da duoya hali ka o tans ye na’akim diya? Ye ba da kɛ ka Asumbul pɔnsɛ. Ka ba niŋ Asumbul kadib diin ka o zɔ hali ti gɛn ka nyɛ mɔgbɛuŋ ka ianki kpɛn’ ani lɛbigi digin ka midig o nini la ka biis la zɔɔ paae na ka bu’os ye, “ya pʋ nyɛ amidig-nif kpɛlaa”? Ka naŋ yɛl o ye o yɛlim ye manɛ nwana; ka o ye oi, fʋ bɔɔdi ba kʋʋ maa? Ka naŋ ye alaa m tɔɔnfɔ? Ka Asumbul gʋ’ʋŋ ka ye manɛ nwana yei ka va zuaa ka mɔr o kadib ka o ti lɛn zɔɔ keŋ su’a ka ba lɛn paae na ka bu’os ka naŋ la lɛn yɛl o ye o yɛlim ye onɛ nwana ka o ye ow, fʋ bɔɔd ye ba kʋʋ maa? Ka naŋ ye alaa m tɔɔnfɔ? Ka o gʋ’ʋŋ ka yɛl ka lɛn va zuaa. Asumbul da zɔnɛ alaa yʋ’ʋn ti lɛ’ɛgi kpɛn luu kpi ka naŋ la sɔligi yi ka bas o ka biis la paae na nyɛ ka o digi ka ba nɔk o. Din ka nidib pʋ nyɛt Asumbul nifɔ ka naŋ mɛ labisidi su’ad sa’adin la.