Wp/kus/Wina'am Gbauŋ:Nɔnaar Paal:Mak
| Part of | canonical Gospels, Tetraevangelion  |
|---|---|
| Native label | Εὐαγγέλιον κατὰ Μᾶρκον |
| Title | Εὐαγγέλιον κατὰ Μᾶρκον |
| Derivative work | Secret Gospel of Mark |
| Genre | Gospel |
| Has edition or translation | Gospels of Matthew and Mark (CBL W 912) |
| Author | Mark the Evangelist, anonymous |
| Language of work or name | Greek |
| Published in | Bible |
| Entry in abbreviations table | Mark |
Gbauŋ nwa' yɛla
Mak da sɔbi pa'an Yesu yɛla ye o mɔr paŋi na pa'al nidib, ka ti'eb ban'adnam ka kɛ banɛ tʋm tʋʋmbɛ'ɛd la taali bas. O pin'il o sɔb la nɛ Yesu Wina'am ku'om sʋʋb yɛla. O pa'al Yesu nya'andɔlib la da maligim gban'e o pa'alʋg la gbin sʋ'ʋŋa si'em, amaa nidib bɛdegʋ da ki'is o nɛ o pa'alʋg la zug. O naae o sɔb la nɛ Yesu kum nɛ o vʋ'ʋgir la yɛla.
MAK 1
Joon onɛ sʋʋd nidib Wina'am ku'om mɔɔlʋgin la
1 Nɛ'ɛŋa anɛ Yesu Kristo onɛ an Wina'am Biig la labasʋŋ pin'ilʋg.
2† Li sɔb Azaya onɛ an nɔdi'es la gbauŋʋn ye,
“M na tʋmi m tʋmtʋm ka o dɛŋi fʋ tuonnɛ maal suosʋŋi fʋ zug.”
3† Sɔ' bɛ mɔɔgini mɔɔn ye,
“‘Maalimi suori tis Zugsɔb la; maalim suoraugʋ tisi ti Wina'am la, kɛl ka li an sappi mɔɔgin la tis o.’”
4 Joon onɛ da sʋʋd nidib Wina'am ku'om la da bɛ mɔɔgin mɔɔnnɛ tisid nidib ye, “Basimi ya tʋʋmbɛ'ɛd ka di'e Wina'am ku'om sʋʋb, ka Wina'am na yisi ya tʋʋmbɛ'ɛdi bas.”
5 Ka nidib bɛdegʋ yi Juda sʋ'ʋlim nɛ Jerusalem teŋin keŋ Joon san'an ka pɛligi ba pʋʋgʋ yɛl o ba tʋʋmbɛ'ɛd. Ka o sʋʋ ba Wina'am ku'om Joodan mu'arin la.
6 Joon daa yɛnɛ fuud linɛ ka ba maal nɛ yʋgʋm kɔnbid ka nɔk gbauŋʋ lɔɔ o siaa, ka o diib an na'azɔmnam nɛ siind.
7 Ka o mɔɔnnɛ tisid nidib ye, “Ninkanɛ dɔl mam nya'aŋ la anɛ nintita'ari gaad mam. M pʋ nar nɛ mam na sɛbini o tuonnɛ yidig o ta'ada nwiisɛ.
8 Mam sʋʋdi ya nɛ ku'om, amaa ninkanɛ kenna la na sʋʋ ya nɛ Wina'am Siig Kasi.”
Yesu Wina'am ku'om sʋʋb
9 Lin nya'aŋ ka Yesu yi Nazaret linɛ bɛ Galile sʋ'ʋlim la kena. Ka Joon sʋʋ o Wina'am ku'om Joodan mu'arin.
10 Ka on da dʋt ku'omin la, ka nyɛ ka arezana za'anɔɔr yɔ'ɔg, ka Wina'am Siig Kasi sigid o zugin na nwɛnɛ dawan nɛ,
11 ka kʋkɔr yi arezana ni na yɛl ye, “Fʋ anɛ m binɔŋir ka m nini
tigif hali.”
Sʋntaana n da mak Yesu la yɛla
(Mat 4:1-11; Luk 4:1-13)
12 Tɔ'ɔtɔ yim ka Wina'am Siig Kasi daa mɔr Yesu keŋ mɔɔgin.
13 Ka o bɛɛ ani paae dabisa pisnaasi ka Sʋntaana kena mak o. Mɔɔgin bʋnkɔnbid da bɛɛ ani, ka maliaknam kena sʋŋ o.
Yesu buol ziiŋgban'adib anaasi la yɛla
(Mat 4:12-22; Luk 4:14-15; 5:1-11)
14 Ban da yɔ Joon sanrega ni la, li nya'aŋ ka Yesu keŋ Galile
15 mɔɔn Wina'am labasʋŋʋ tisid nidib ka yɛt ye, “Li saŋa paae na. Wina'am sʋ'ʋlim li'el ya. Basimini ya tʋʋmbɛ'ɛd ka siak labasʋŋ la.”
16 Yesu n da dɔl Galile mu'ar nɔɔrin la, o nyɛ ziiŋgban'adib ayi', Simon nɛ o pitʋ Andrew ka ba gban'ad zimi. Li da anɛ ba tʋʋma la.
17 Ka o yɛli ba ye, “Dɔlli nɛ m ka mam na pa'ali ya suor ka ya kɛ ka nidib dɔl man wʋʋ ziiŋgban'adibi gban'ad zimi si'em la.”
18 Ka ba kpɛm basi ba zimi la'ad la, ka dɔl o.
19 Ka o keŋ bi'ela, ka nyɛ nidib ayi' banɛ an Zebedee biis Jemes nɛ Joon. Ka ba bɛ anrʋŋʋn maannɛ ba zimi la'ad.
20 Ka o buoli ba, ka ba basi ba saam Zebedee nɛ o tʋmtʋmnib anrʋŋʋn la ka dɔl o.
Yesu kad kikirig Kapeenum la yɛla
(Luk 4:31-37)
21 Ka ba paae Kapeenum teŋin. Ka Jew dim Vʋ'ʋsʋm Daar ka Yesu kpɛn' Jew dim la'asʋg dɔɔgin pa'an nidib.
22 O da pa'an nidib la nɛ kpi'euŋ, ka li ka' wʋʋ gbauŋmi'idibi pa'an si'em laa. Ka pa'alʋg la lidig nidib la.
23 Saŋkan nɔɔ ka dau sɔ' bɛ la'asʋg dɔɔgin la ka kikirig dɔl o.
24 Ka o tans ye, “Yesu onɛ yi Nazaret na, fʋ ba'a bɔɔ bɛɛ ti ni? Fʋ kena ye fʋ san'ami tii? M mi' fʋn an sɔ'. Fʋ anɛ Wina'am onɛ an kasi la tʋmtʋm.”
25 Ka Yesu tans kikirig la ye, “Kɛl vuud, ka yii o san'an.”
26 Ka kikirig la kɛ ka dau la lu wʋʋ kpisiŋkpi'ir sɔb nɛ, ka kaas nɛ kʋkɔtita'ar ka nyaan yi dau la san'an.
27 Ka li lidigi ba wʋsa, ka ba bu'osid taaba ye, “Nɛ' an bɔ? Li anɛ pa'al paal bɛɛ? Dau kaŋa mɔr kpi'euŋʋ pian'adi tisid kikiris ka ba siakid o nɔɔr.”
28 Nɛ'ɛŋa da kɛnɛ ka Yesu labaar tiig Galile sʋ'ʋlim wʋsa tɔ'ɔtɔ.
Yesu ti'eb ban'adnam bɛdegʋ
(Mat 8:14-17; Luk 4:38-41)
29 Ka ban yi Jew dim la'asʋg dɔɔgin la kpɛn' Simon nɛ Andrew yin la, ka Jemes nɛ Joon mɛ la'am dɔlli ba.
30 Ka nwɛ'ɛdʋg mɔr Simon diem pu'a o ka digi, ka ba yɛl Yesu o yɛla, 31 ka o keŋ gban'e o nu'ugʋ duoe o zi'el. Ka nwɛ'ɛdʋg la bas pu'a la, ka o maali ba saauŋ.
32 Ka winnigi ti sɔbid la ka nidib mɔr ban'adnam bɛdegʋ nɛ banɛ ka kikiris dɔlli baa kɛn Yesu san'an na.
33 Ka teŋ la nidib bɛdegʋ la'as samannin.
34 Ka Yesu ti'eb nidib bɛdegʋ banɛ mɔr wiim kɔn'ɔb-kɔn'ɔb, ka kad kikiris bɛdegʋ yis. Yesu da pʋ siak ka kikiris la yɛl si'ela, bɔzugɔ ba pʋn mi' on an sɔ'.
Yesu keŋ zin'ikanɛ an baanlimm sɔs Wina'am
(Luk 4:42-44)
35 Yesu da duonɛ ka bɛog nam pʋ yɔe nierɛ ka o yi teŋ pʋʋg la yiŋi keŋ mɔɔgin sɔs Wina'am.
36 Ka Simon nɛ o zuanam yii ieed o,
37 ka ban nyɛɛ o la, ba yɛl o ye, “Nidib wʋsa ieedif nɛ.”
38 Ka Yesu yɛli ba ye, “Kɛlli ka ti keŋ tɛɛns banɛ kpi'e la ka m mɛ mɔɔl labasʋŋ la anina ka linzug ka m kena.”
39 Ka o keŋ gilig Galile sʋ'ʋlim wʋsa ka mɔɔn labasʋŋ la Jew dim la'asʋg dɔɔdin ka kad kikirisi yisid.
Yesu ti'eb kʋkɔm la yɛla
(Mat 8:1-4; Luk 5:12-16)
40 Ka kʋkɔm kɛn Yesu san'an naa igini sɔs o ye, “Li ya'a aan fʋ bɔɔdim
fʋ na tun'e kɛ ka m nyɛ laafi ka lieb nyain.”
41 Ka Yesu zɔɔ o nimbaanlig ka si'is o, ka yɛl ye, “M bɔɔd ala, liebim
nyain.”
42 Ka o wiim la kpɛm bas o, ka o niŋgbiŋ lɛbi an nyain.
43–44 Ka Yesu sa'al o nɛ kpi'euŋ ye, “Mid ka fʋ yɛl sɔ' li yɛla. Amaa kem nɔki fʋ mɛŋi pa'al Wina'am maanmaan la, ka maal maannɛ tis Wina'am wʋʋ Moses n da zi'el si'em la fʋ laafi nyɛɛb la zug. Ala ka nidib wʋsa na baŋ ye fʋ mɔr laafi nannanna.”
45 Amaa on yi la, o pin'ili mɔɔnnɛ li paalʋ. Ka li tiig zin'ig wʋsa. Dinzug ka Yesu da pʋ siaki nie o mɛŋ tempʋʋsinɛ, ka kpɛlim teŋkpɛmisin. Ka nidib yi zin'is wʋsa kɛɛn o san'an na.
MAK 2
Yesu ti'eb pɔn'ɔr
(Mat 9:1-8; Luk 5:17-26)
| 2 |
Dabisa bi'ela nya'aŋ ka Yesu lɛb Kapeenum. Ka ba wʋm o labaar ye o bɛ yin la.
2 Ka nidib bɛdegʋ la'as na zu'oe galis, hali ka paalʋ kae ka nidib na kpɛn' ya'asɛ, ka za'anɔɔr la muk. Ka o pa'ali ba Wina'am labasʋŋ la. 3 Ka nidib anaasi zi dau sɔ' onɛ bɛn' hali ti pɔn'ɔlim kɛɛn o san'an na.
4 Ka nidib la la'asi zu'oe ka ba kʋ tun'e paae Yesu san'an na la zug, ka ba dʋ dɔkan ka Yesu bɛ la zugʋ maal vɔɔnr ka sigis ban'ad la digil o tuon. O daa dignɛ sɔŋ zug.
5 Ka Yesu nyɛ ban niŋ o yadda si'em la, ka yɛl ban'ad la ye, “M dapaala, m yisi fʋ tʋʋmbɛ'ɛd la bas.”
6 Ka gbauŋmi'idib sieba, banɛ pa'an nidib Wina'am nɔɔr yɛlʋg la, zi'e ani tɛn'ɛsidi ba sʋnya ni ye,
7 “Bɔ ka dau kaŋa pian'ad ala san'amid Wina'am yʋ'ʋrɛ? Anɔ'ɔn na tun'e yis tʋʋmbɛ'ɛdi bas, ka li ya'a ka'anɛ Wina'am gʋllim nɛ?”
8 Ka Yesu baŋ o pʋtɛn'ɛrin sa ye ba tɛn'ɛsidnɛ ala, ka yɛli ba ye, “Bɔ ka ya tɛn'ɛsid nɛ'ɛnama?
9 Bɔɔ an na'ana? Man na yɛl pɔn'ɔr la ye, ‘M kɛɛ fʋ tʋʋmbɛ'ɛd taali bas bɛɛ mam na yɛl ye duom ka zaŋi fʋ sɔŋʋ keŋɛ?’
10 Ala ka ya na baŋ ye Ninsaal Biig mɔr paŋ dunia nwa' ni na kɛ tʋʋmbɛ'ɛd taali bas.” Ka o yɛl pɔn'ɔr la ye,
11 “Duom zaŋi fʋ sɔŋ la kul.”
12 Ka pɔn'ɔr la kpɛn duoe zaŋ o sɔŋʋ gaadi ba tuonnɛ yi. Ka nɛ' lidigi ba wʋsa, ka ba dʋ'ʋs Wina'am yʋ'ʋr sʋ'ʋŋa yɛt ye, “Ti nan zi' nyɛɛ nwa'.”
MAK 2
Yesu bɛ Levi yin
(Mat 9:9-13; Luk 5:27-32)
13 Ka Yesu lɛn keŋ Galile mu'ar nɔɔrin ya'as. Ka nidib bɛdegʋ la'as o san'an na. Ka o pa'ali ba anina.
14 Ka on gat la, o nyɛ Alfeus biribiŋ Levi, ka o zin' lampɔ dɔɔgin la. Ka Yesu yɛl o ye, “Duom na dɔllim.” Ka o duoe dɔl o.
15 Ka Yesu zin' Levi yinnɛ dit, ka lampɔdi'esidib nɛ tʋʋmbɛ'ɛd dim bɛdegʋ la'am dit nɛ Yesu nɛ o nya'andɔlib, bɔzugɔ ba bɛdegʋ ɛɛnti dɔl o. 16 Ka gbauŋmi'idib nɛ Farisii dim nyɛ Yesu ka o dit nɛ lampɔdi'esidib nɛ tʋʋmbɛ'ɛd dim la, ka ba bu'os o nya'andɔlib la ye, “Bɔ ka o dit nɛ lampɔdi'esidib nɛ tʋʋmbɛ'ɛd dima?”
17 Yesu wʋmi li la, ka yɛli ba ye, “Banɛ mɔr laafi la pʋ bɔɔd ti'ebʋgɔ. Amaa banɛ bɛn'ɛd la bɔɔd ti'ebʋg. M pʋ kena ye m buol tʋʋm sʋma dima, amaa banɛ an tʋʋmbɛ'ɛd dim la.”
Nɔɔr lɔɔb yɛla
(Mat 9:14-17; Luk 5:33-39)
18 Joon nya'andɔlib nɛ Farisii dim la da lɔɔd nɔɔr. Ka nidib kena bu'os Yesu ye, “Bɔ ka Joon nya'andɔlib nɛ Farisii dim nya'andɔlib lɔɔd nɔɔr, ka fʋn nya'andɔlib pʋ lɔɔd nɔɔrɛ?”
19 Ka Yesu lɛbisi bu'osi ba ye, “Pu'apaal sid zuanam na tun'e lɔ nɔɔr, ka pu'apaal sid la nam bɛɛ ba san'anɛɛ? Ayei. Pu'apaal sid la nan kpɛm bɛɛ ba san'an la, ba kʋ tun'e lɔɔd nɔɔrɛ.
20 Amaa Saŋa na ti paae, ka nidib na kena yis pu'apaal sid la ba san'an, ka daakan la ka ba yʋ'ʋn na lɔ nɔɔr.
21 “Nid kʋ zaŋ pien paaligi lig fukʋdʋgɔ. O ya'a niŋ ala, pien paalig la na kɛ ka fukʋdʋg la aaɛn gaad kʋdim la.
22 Nid kʋ zaŋ danpaaligi su waa kʋdiginɛɛ. O ya'a niŋ ala, danpaalig la na kɛ ka waa la tans, ka daam nɛ waa la wʋsa san'am. Amaa li sʋ'ʋm ye ba su danpaal waa paaligin.” MAK 2–3
Vʋ'ʋsʋm dabisir la yɛla
(Mat 12:1-8; Luk 6:1-5)
23 Jew dim Vʋ'ʋsʋm Daar yinne, ka Yesu da buŋid pɔɔd sʋʋgin. Ka ban ken la, o nya'andɔlib pin'ili gisid ki.
24 Ka Farisii dim bu'os o ye, “Gɔsima, bɔ ka ba maan linɛ kis Vʋ'ʋsʋm daare?”
25 Ka Yesu lɛbisi bu'osi ba ye, “Ya pʋ karim David nɛ o nidibi da niŋ si'em kɔ'ɔm da mɔri ba ka li paki ba laa?
26 O da kpɛn' Wina'am Pʋ'ʋsim Yin saŋkan ka Abiata da an Wina'am maanmaan kpɛɛm la, ka ɔnb Wina'am Pʋ'ʋsim Yin bodobodo linɛ pʋ sʋ'ʋm ye nidib ɔnbid yɔɔg-yɔɔg la, asɛɛ
Wina'am maanmaannib gʋllim. Hali ka tis nimbanɛ bɛɛ o san'an la mɛn.”
27 Ka Yesu yɛli ba ye, “Wina'am maal Vʋ'ʋsʋm Daar nɛ ninsaalib zug, ka ka' o maal ninsaalib nɛ Vʋ'ʋsʋm Daar zugɔ.
28 Alazug, Ninsaal Biig la an Zugsɔb ka la'am sʋ'oe Vʋ'ʋsʋm Daar la.”
MAK 3
Yesu ti'eb dau nu'ukpiilʋŋ
(Mat 12:9-14; Luk 6:6-11)
| 3 |
Ka Yesu lɛb Jew dim la'asʋg dɔɔgin la, ka dau bɛɛ anina, ka o nu'ug kpi.
2 Ka ninsieba daa bɛɛ ani ka bɔɔd ye ba bɔ yɛla ziil Yesu. Alazug, ba daa gɔsid ye o na ti'eb ban'ad la Vʋ'ʋsʋm Daar bɛɛ o kʋ ti'eb o.
3 Ka Yesu yɛl dau kanɛ ka o nu'ug kpi la ye, “Yim tuon na.”
4 Ka Yesu bu'os nidib la ye, “Li an sʋ'ʋm ti wada pʋʋgin ye ti sʋŋ nidib ka tʋm tʋʋm sʋma Vʋ'ʋsʋm Daar, bɛɛ ti kʋ nidib ka tʋm tʋʋmbɛ'ɛdɛ?” Ka ba sin.
5 Ka o gɔs nidib la gilig ka o sʋnf duoe. Ka on nyɛ ka ba an zukpi'euŋ dim la, ka li kɛ ka o sʋnf san'am. Ka o yɛl dau la ye, “Tiɛnmi fʋ nu'ug la.” Ka o tiɛn. Ka li niŋ sʋ'ʋŋa wʋʋ nu'ukaŋa la.
6 Ka Farisii dim la yii gban'e nɔɔr yinne nɛ Herod nidib la ban na niŋ si'em kʋ Yesu.
Nidib bɛdegʋ la'as Galile bɛoŋʋn
7 Ka Yesu nɛ o nya'andɔlib yii keŋ Galile mu'arin ka nidib bɛdegʋ yi Galile nɛ Juda
8 nɛ Jerusalem nɛ Idumea nɛ Joodan kɔldaug nya'aŋ nɛ tɛɛns banɛ kpi'e Taya nɛ Sidon la kɛn o san'an na.
9 Ka ban daa galis la zug, ka Yesu yɛl o nya'andɔlib la ye ba ti'ebim anrʋŋʋ gur o, ka nidib la
da ti mik oo.
10 O da ti'eb ban'adnam bɛdegʋ, ka sieba tɛbid taaba bɔɔd ye ba paae si'is o.
11 Ka nimbanɛ ka kikiris dɔlli ba ya'a nyɛɛ o, ba lutnɛ igin o tuon ka tansid ye, “Fʋ anɛ Wina'am Biig la.”
12 Ka o yɛl kikiris la ye, ba mid ka ba na kɛ ka nidib baŋ on an sɔ'.
Yesu gaŋ nya'andɔlib pii nɛ ayi'
(Mat 10:1-4; Luk 6:12-16)
13 Yesu da keŋ zuoya baba ka buol nimbanɛ ka o bɔɔd, ka ba kena.
14 Ka o gaŋ nidib pii nɛ ayi' ka buoli ba ye o tʋmtʋmnib. Ka ba bɛɛ o san'an ka o na tʋmmi ba ka ba mɔɔn labasʋŋ la.
15 Ka na mɔr kpi'euŋʋ kad kikirisi yisid.
16 Ba yʋda da anɛ Simon, ka Yesu pʋd o ye Pita,
17 nɛ Zebedee biis Jemes nɛ Joon, ka o pʋd o ba yʋ'ʋr ye Boaneges. Li gbin anɛ nimbanɛ an satansʋg,
18 nɛ Andrew nɛ Filip nɛ Bartolomew nɛ Mateo nɛ Tomas nɛ Alfeus biig Jemes, nɛ Tadus, nɛ Simon onɛ ka ba buon Zeelot ka li gbin an onɛ zabid Jew dim yɛla la,
19 nɛ Judas Iskariot onɛ da zam Yesu la.
Yesu nɛ Beelzebul
(Mat 12:22-32; Luk 11:14-23; 12:10)
20 Ka Yesu kpɛn' yin, ka nidib la lɛn la'as bɛdegʋ ka on nɛ o nya'andɔlib la pʋ nyɛ ya'a na dii.
21 Ka nidib yɛl ye, “O gɛɛmnɛ,” ka Yesu yidim wʋm ka keŋ ye ba gban'e o.
22 Ka gbauŋmi'idib sieba banɛ yi Jerusalem tempʋʋgin kena la yɛl ye, “Beelzebul n dɔl o.” Ka sieba ye, “Li anɛ kikiris na'ab la tis o paŋ kan ka o mɔri kad kikirisi yisid la.”
23 Ka Yesu buol nidib la la'as ka bu'osi ba ye, “Sʋntaana na nyaŋi kad Sʋntaana?” Ka siilimi ba ye,
24 “Sʋ'ʋlim kanɛ wʋsa ka wɛligir bɛɛ li ni la na san'am.
25 Ala mɛn nɔɔr yinne mɛ ya'a kae yinnɛ, li wa'ae nɛ san'auŋʋn.
26 Ka Sʋntaana sʋ'ʋlim dim ya'a mɔr wɛligir nɛ taaba, ba sʋ'ʋlim la kʋ yuugɛ ka san'am wʋsa.
27 Sɔ' kae na nyaŋi kpɛn' paŋ daan yinnɛ vaae o la'adɛ, ya'a ka' o dɛŋi lɔnɛ paŋ daan la digilɛ, o kʋ nyaŋi vaae la'ad laa.
28 Asida ka m yɛti ya ye, Wina'am na kɛ ninsaal tʋʋmbɛ'ɛd wʋsa bas ka di suguru la'an nɛ o tʋ'ʋd la wʋsa.
29 Amaa sɔ' ya'a tʋ Wina'am Siig Kasi la, o daana kʋ paam suguru. O maal tʋʋmbɛ'ɛd kanɛ ka' suguruu.”
MAK 3–4
30 Ban yɛl ye kikirig dɔl o la zug ka o yɛl ala.
Yesu ma nɛ o pitib la yɛla
(Mat 12:46-50; Luk 8:19-21)
31 Ka Yesu ma nɛ o pitib paae na ka zi'en samannin tʋm buol o.
32 Ka nidib bɛdegʋ zin' gilig o. Ka ba yɛl o ye, “Fʋ ma nɛ fʋ pitib bɛ samannin ka buonif.”
33 Ka Yesu bu'osi ba ye, “Anɔ'ɔnɛ aan m ma, ka anɔ'ɔnamɛ aan m pitiba?”
34 Ka gɔs nimbanɛ zin' la gilig, ka yɛli ba ye, “Bama aan m ma nɛ m pitib.
35 Ninkanɛ tʋm Wina'am bɔɔdim, onɛ aan m pitʋ nɛ m taʋn nɛ m ma.”
MAK 4
Kpaad yɛla
(Mat 13:1-9; Luk 8:4-8)
| 4 |
Yesu lɛm pin'ili pa'annɛ ba mu'ar nɔɔrin ya'as. Ka nidibi da la'as o san'anɛ galis la zug ka o kpɛn' anrʋŋʋn zin'inɛ anina. Ka nidib la wʋsa bɛ mu'ar la nɔɔrin.
2 Ka o pa'annɛ ba yɛla bɛdegʋ nɛ siilima. Ka o pa'alʋg la pʋʋgin o yɛli ba ye,
3 “Kɛlisimi, kpaad sɔ' da bɛ keŋ ye o waal o bʋmbʋʋda.
4 Ka on waan la, bʋmbʋʋdsieba lu suor zug. Ka niis kena di.
5 Ka sieba lu zin'ikanɛ ka tan pʋ zu'oe, ka an tampiins zut. Ka tanni pʋ zu'oe la zug ka li bul tɔ'ɔtɔ.
6 Ka nintaŋ tʋligi ba, ka ban ka' nya'a la zug ka ba zɛndigi kpi.
7 Ka bʋmbʋʋdsieba lu gɔn'ɔs sʋʋgin. Ka gɔn'ɔs la nɔbigi sianki ba ka ba pʋ wal biilii.
8 Ka bʋmbʋʋdsieba lu teŋ sʋŋ zug, ka buli nɔbig, ka wal biili. Sieba wal pistan' ka sieba wal pisyuobʋ ka sieba wal kɔbiga.”
9 Ka Yesu yɛl ye, “Onɛ mɔr tʋba na wʋm, on wʋm.”
Siiliŋ la gbin
(Mat 13:10-17; Luk 8:9-15)
10 Ka Yesu ti yi kpikpɛŋ la, banɛ gilig o la nɛ o nya'andɔlib pii nɛ ayi' la bu'os o siilima la yɛla.
11 Ka o yɛli ba ye, “Yanam anɛ banɛ di'e Wina'am sʋ'ʋlim yɛlsu'ada la. Amaa banɛ bɛ yiŋ la ba wʋm si'el wʋsa nɛ siilima.
12 Li niŋ ala ye,
“‘Ba na gɔs ka lɛn gɔs, amaa ba kʋ nyɛɛ.
Ba na wʋm, ka lɛn wʋm, la'an nɛ wala ba kʋ baŋi li gbinnɛ.
Li ya'a ka' alaa, ba naan lɛbinɛ m san'an na ka m yisi ba tʋʋmbɛ'ɛdi bas.’”
13 Ka Yesu yɛli ba ye, “Ya pʋ baŋ siiliŋ kaŋa gbinnɛ? Ka ya na niŋ wala baŋ siilima la wʋsa?
14 Kpaad kanɛ waan bʋmbʋʋda la nwɛnɛ onɛ mɔɔn Wina'am labaar la. 15 Ka banɛ lu suorin la nwɛnɛ nimbanɛ wʋm labaar la, ka Sʋntaana kɛn tɔ'ɔtɔ na yis labaar la ba sʋnya nii bas.
16 Ala mɛn banɛ lu tampiing zug la nwɛnɛ banɛ wʋm labaar la ka siaki di'e li tɔ'ɔtɔ nɛ sumalisim.
17 Amaa ban pʋ mɔr nya'a la zug, namisʋg nɛ tɔɔg ya'a paae ba labaar la zug, ba mɔdigidnɛ bi'ela ka nyɔrigi bas.
18 Ka banɛ lu gɔn'ɔs sʋʋgin la nwɛnɛ banɛ wʋm labaar la,
19 ka dunia bɔɔdim pʋtɛn'ɛr nɛ areza'as ya'amlɛog nɛ la'ad kɔn'ɔb-kɔn'ɔb yɛla siank pian'ad la, ka li pʋ wal biilii.
20 Amaa banɛ lu teŋ sʋŋ zug la, nwɛnɛ banɛ wʋm labaar la ka siaki li, ka wal biili, sieba wal pistan' ka sieba wal pisyuobʋ, hali ka sieba wal kɔbiga.”
A-nyu'oe-fitiri pibil nɛ pɛog la yɛla
(Luk 8:16-18)
21 Ka Yesu bu'osi ba ye, “Sɔ' ya'a nyu'oe fitir, o na pibil nɛ pɛog bɛɛ o na zi'el gadʋg lɛuŋʋ nɛ? Ba kʋ zaŋi sʋn'ʋl si'el zugɔɔ?
22 Bɔzugɔ bʋnkanɛ su'a wʋsa na nie, ka bʋnkanɛ ka ba pibil, ba na pibig.
23 Ninkanɛ na wʋm, on wʋm.”
24 Ka o yɛli ba ye, “Gu'usimi nɛ yanamɛ wʋm si'el la, bɔzugɔ bʋn linɛ ka ya maki tis nidib la, ala mɛn ka ba na maki lɛbisi ya; hali ba na mak ka li gaad ala.
25 Bɔzugɔ onɛ mɔr la, ba na lɛm paas o. Ka onɛ pʋ mɔr la, hali on mɔr si'el la, ba na di'e li.”
Bʋmbʋʋda nɔbigir siiliŋ
26 Ka o yɛli ba ye, “Wina'am sʋ'ʋlim nwɛnɛ dau kanɛ bʋd bʋmbʋʋda teŋin.
27 Ka kpɛn' yʋ'ʋŋʋ gbisi yimbɛogʋn duoe ka bʋmbʋʋda la bul ka nɔbig, ka o zi' lin niŋ si'em-si'em ka li bulɛ.
28 Tan la kɛ ka bʋmbʋʋda la duodi li mɛŋ. Li busidnɛ vaand yiiga, ka nyaan wal, ka biili bi'ig.
29 Ka ki la ya'a bi'ig, kpaad la na zaŋ kʋsiigi kie li, bɔzugɔ li bunib saŋa paaeya.”
Kansiing biili linɛ pɔɔd hali la yɛla
(Mat 13:31-32, 34; Luk 13:18-19)
30 Ka Yesu yɛli ba ye, “Bɔ ka m na zaŋi mak nɛ Wina'am sʋ'ʋlim, bɛɛ siiliŋ bɔ ka m na siilim pa'al lin an si'em?
31 Li nwɛnɛ kansiing bielif linɛ pɔɔd hali nɛ. Li pɔɔdi gat bʋmbʋʋda wʋsa dinɛ bɛ dunia ni.
32 Amaa li ya'a yi, li nɔbigidi gat tiig buudi wʋsa ka tɔn wilbɛda ka niimis na tun'e tɛɛ ba tɛɛdi li ma'asim ni.”
33 Yesu daa zaŋ siilima bɛdegʋ nwɛnɛ bama, tu'asi tisi ba wʋʋ ban na nyaŋi baŋi li si'em.
34 O da pʋ pian' ba pian'asi'a ka li ya'a ka'anɛ siilimaa. Amaa o nya'andɔlib la gʋllim ka o tu'asi li gbinni tisi ba.
Yesu n gu'oe sisi'em la yɛla
(Mat 8:23-27; Luk 8:22-25)
35 Daakan la zaam ka Yesu yɛl o nya'andɔlib la ye, “Kɛlli ka ti lɔ'ɔŋi mu'ar la gbɛog.”
36 Ka o nya'andɔlib la bas nidib la ka keŋ kpɛn' anrʋŋ kanɛ ka Yesu pʋn bɛ la ni, ka ba keŋ. Anrinsieba mɛ da dɔl o.
37 Ka sisi'etita'ar da'ad bɛdegʋ, ka ku'om yɛŋimi kpɛn'ɛd anrʋŋʋn la bɔɔd anrʋŋ la pɛ'ɛlʋg.
38 Ka Yesu dig anrʋŋ la nya'aŋi kʋk zugkʋgʋre gbisid. Ka o nya'andɔlib la nie o ka bu'os o ye, “Pa'anna, fʋ pʋ nyɛ tinamɛ bɔɔd ye ti kpi laa?”
39 Ka o nie ka tans sisi'em la ka yɛl ku'opila la ye, “Gu'om, ka an
baanlimm.” Ka sisi'em la nɛ ku'opila kpɛn gu'oe baanlimm.
40 Ka o bu'osi ba ye, “Bɔ ka ya zɔt dabiem? Bɔ ka ya pʋ niŋim yadda?”
41 Ka dabiem kpɛn' ba hali. Ka ba bu'os taaba ye, “Dau kaŋa anwala-wala, hali ka sisi'em nɛ ku'om la'am siakid o nɔɔrɛ?”
MAK 5
Yesu n yis kikiris dau ni la yɛla
(Mat 8:28-34; Luk 8:26-39)
| 5 |
Ka Yesu nɛ o nya'andɔlib kena paae Gerasene teŋin, Galile mu'ar nya'aŋ.
2 Ka Yesu yi anrʋŋʋn la, ka dau onɛ ka kikiris dɔl o yi yaadin naa tʋ'ʋs o.
3 Dau kaŋa daa bɛ nɛ yaadin la, hali ka sɔ' kae na nyaŋi lɔɔ o nɛ banaa. 4 Ba da ɛɛnti nɔknɛ bana lɔɔ o nɔba nɛ o nu'us. Ka o kɛns nu'us bana la ka kɛnsi kɛns nɔba bana la bas. Sɔ' da kae paŋi na nyaŋ oo.
5 Nintaŋ nɛ yʋ'ʋŋ wʋsa o gɔɔndnɛ yaadin nɛ zuoya la ni ka mɔr kuga
nwaad o mɛŋ ka maan tʋkpiidʋg.
6 On da nyɛ Yesu ka o bɛ lalli la, ka o zɔɔ keŋ igin o tuon
7 ka tans ye, “Yesu, Wina'am onɛ ka' tiraan la Biiga, bɔ bɛ man nɛ fʋ sʋʋginɛ? Wina'am sʋ'ʋm zug, m bɛlimnɛ, da namisi ma.”
8 Bɔzugɔ Yesu pʋn yɛl o ye, “Kikiriga yim dau kaŋa san'an na.” Nɛ'ɛŋa kɛ ka o yɛl ala.
9 Ka Yesu bu'os o ye. “Fʋ yʋ'ʋrɛ?”
Ka dau la lɛbis ye, “M yʋ'ʋri buon Babiga, bɔzugɔ, ti galis nɛ.”
10 Ka o bɛllim Yesu nɛ nimmua ye o da kad kikiris la yis teŋ kan la nii.
11 Kukurnam bɛdegʋ da bɛ zuor la babaa dit ka ba kal an wʋʋ tusa ayi'.
12 Ka kikiris la bɛllim o ye, “Kɛl ka ti keŋ kpɛn' kukurnam la ni.”
13 Ka o siak ka kikiris la yi dau la ni kpɛn' kukurnamin la. Ka ba wʋsa zɔɔ sig bɛuŋin ka ku'om dii ba.
14 Dap banɛ da gur kukurnam la da zɔɔ keŋ tempʋʋgin nɛ temkpɛmisin tu'as linɛ maal la wʋsa. Ka nidib yii keŋ ye ba gɔs linɛ maal.
15 Ban da paae Yesu san'an la, ba nyɛ ka dau kanɛ ka kikiris daa dɔl o la zin' anina, ka yɛ fuud ka o ya'am tiaki an sʋ'ʋm. Ka dabiem kpɛn' ba. 16 Ka nimbanɛ da bɛɛ anina ka nyɛ linɛ niŋ dau la nɛ kukurnam la tu'asi ba lin niŋ si'em wʋsa.
17 Ka ba yʋ'ʋn bɛllim Yesu ye o yimi ba teŋin.
18 Yesu n da kpɛn'ɛd anrʋŋʋn la, dau kanɛ ka kikiris daa dɔl o la bɛllim Yesu ye, “Kɛl ka m dɔllif.”
19 Ka Yesu pʋ siakɛ, ka yɛl o ye, “Kulim ka yɛli fʋ yidim ye Zugsɔb zɔɔf nimbaanlig ka maalif ka fʋ lieb sʋ'ʋŋa.”
20 Ka dau la lɛb, ka keŋ gilig Dekapolis sʋ'ʋlim mɔɔn Yesu niŋ bʋnsʋŋ
si'a tis o la. Ka li pak nimbanɛ wʋsa daa wʋmi li la.
Jairus pu'ayua nɛ pu'a sɔ' la yɛla
(Mat 9:18-26; Luk 8:40-56)
21 Ka Yesu lɛn lɔ'ɔŋ mu'ar gʋʋr nɛ anrʋŋ la, ka nidib bɛdegʋ la'asi gilig o mu'ar la nɔɔri
22 Ka dau yinne onɛ an la'asʋg dɔɔg kpɛɛm ka o yʋ'ʋr buon Jairus kena. Ka on nyɛ Yesu la, o igin o tuon,
23 ka yɛl o ye, “M pu'ayua bɛn'ɛdi bɔɔd kum, dinzugɔ kem na zaŋi fʋ nu'ugʋ si'is o, ka o nyɛ laafi.”
24 Ka Yesu dɔl o ken. Ka nidib bɛdegʋ dɔl Yesu gilig o mik o.
25 Pu'a sɔ' da bɛɛ anina bɛn'ɛd ka ziim yuod o yʋma pii nɛ ayi'.
26 O da nyɛ namisʋg bɛdegʋ tima dim san'an, hali ka san'am on mɔr si'el wʋsa ka pʋ nyɛ yɔlisim, ka li kpɛm paasid.
27 Pu'a la da wʋm Yesu yɛla la, o da MAK 5–6
kɛɛn o san'an na ka nidib galis hali ka pu'a la mɔɔ paae Yesu nya'aŋi si'is o fuug.
28 Ka mɔr pʋtɛn'ɛr ye, “Hali m ya'a si'is o fuug la, m na nyɛ laafi.”
29 On si'is fuug la, ka ziim la kpɛn gu'oe. Ka o baŋ o niŋgbina ni ye wiim la bas o, ka o nyɛ laafi.
30 Anina yim ka Yesu baŋ ye paŋ yii o ni tʋm si'el ka gi'e gɔs nidib la
gilig, ka bu'os ye, “Anɔ'ɔnɛ si'isi m fuugɔ?”
31 Ka o nya'andɔlib la lɛbis o ye, “Fʋn nyɛ ka nidib la'as bɛdegʋ miki
fʋ anwa, ka fʋ bu'osid ye, anɔ'ɔnɛ si'isi fɔɔ?”
32 Amaa ka Yesu nan gɔsidi giligid ye o baŋ onɛ niŋi li.
33 Amaa pu'a la pʋn mi' linɛ niŋ o la, o kena kirid nɛ dabiem igin Yesu tuonnɛ tu'as o yɛlmɛŋir la wʋsa.
34 Ka Yesu yɛl o ye, “M pu'ayua, fʋ yadda niŋir kɛ ka fʋ nyɛ laafi. Kulim nɛ sumbʋgʋsʋm, ka mɔr nimma'asim ka wiim la basya.”
35 Ka on nam pian'ad la, ka nidib yi Jairus onɛ an Jew dim la'asʋg dɔɔg kpɛɛm la yin na yɛl o ye, “Fʋ pu'ayua la kpiya. Dinzugɔ, da lɛn kɛ ka pa'an la namisidi kenna ya'asɛ.”
36 Ka Yesu pʋ kɛlis ban yɛl si'el la, ka yɛl Jew dim la'asʋg dɔɔg kpɛɛm
la ye, “Da zɔt dabiem, niŋim yadda gʋllim.”
37 Yesu da pʋ kɛ ka sɔ' dɔl o, asɛɛ Pita nɛ Jemes nɛ Joon onɛ an Jemes ba'abiig la.
38 Ka ban paae Jew dim la'asʋg dɔɔg kpɛɛm yin la, o nyɛ ka nidib bɛdegʋ la'asi vuud ka kaasid, ka fabin hali.
39 Ka on kpɛn' la, o yɛli ba ye, “Bɔɔ sʋ'oe ka ya kum ka kaasida? Bipuŋ la pʋ kpii, amaa o gbisidnɛ.”
40 Ka ba la'ad o.
Ka o yis nidib la wʋsa, ka dɔl biig la ba' nɛ o ma nɛ o nya'andɔlib atan' la kpɛn' bipuŋ la bɛ zin'isi'a la.
41 Ka o gban'e biig la nu'ug ka yɛl o ye, “Talita kumi.” Li gbin anɛ ye, “Bipuŋ bila, m yɛtif ye, duom.”
42 Ka bipuŋ bil la kpɛn duoe ken. O da anɛ yʋʋm pii nɛ ayi'. Ka nɛ'ɛŋa kɛ ka ba lidig hali.
43 Amaa Yesu da yɛli ba ye, ba mid ka ba na yɛl sɔ', ka yɛl ye, “Tisim biig la diib ka o di.”
MAK 6
Ba zan'as Yesu Nazaret teŋin
(Mat 13:53-58; Luk 4:16-30)
| 6 |
Yesu da bas teŋ kan la ka keŋ o mɛŋ teŋin. Ka o nya'andɔlib la dɔl o.
2 Ka Jew dim Vʋ'ʋsʋm Daar ka o kpɛn' la'asʋg dɔɔgin pin'ili pa'an. Ka
li lidig nimbanɛ wʋm o pa'alʋg la wʋsa.
Ka ba bu'os taaba ye, “Dau kaŋa nyɛ pa'alkaŋa yaanɛ? Ka o niŋ wala nyɛ ya'am kaŋa? Ka o niŋ wala mɛ tʋm tʋʋmnyalima bama?
3 O ka'anɛ kampinta? O ka'anɛ Mɛɛri biig ka Jemes nɛ Josef nɛ Judas nɛ Simon aan o pitiba? Ka o tanp pʋ bɛ nɛ ti kpɛla?” Ka ba zan'as o ka pʋ bɔɔd o yɛlaa.
4 Ka o yɛli ba ye, “Zin'ikanɛ wʋsa ka Wina'am nɔdi'es keŋ, ba na'asid o, amaa o mɛŋ teŋ dim nɛ o mɛŋ nidib pʋ na'asid o.”
5 O da pʋ nyaŋi tʋm tʋʋmnyalima anina, ya'a ka ban'adnam bi'ela nwa' ka o da nɔk o nu'ugʋ pa'ali ba zut, ka ba nyɛ laafi.
6 Ban da pʋ niŋ o yadda la zug, ka li lidig o hali.
Ka Yesu keŋ teŋkpɛmis banɛ kpi'e anina pa'al nidib.
Yesu tʋm o nya'andɔlib pii nɛ ayi' la
(Mat 10:5-15; Luk 9:1-6)
7 O da buol o nya'andɔlib pii nɛ ayi' la la'as, ka tʋmi ba ayi', yi, ka tisi
ba paŋ ka ba na kad kikiris.
8 O da yɛli ba ye, “Da mɔri diib bɛɛ kɔlʋg bɛɛ ligidi bɛɛ si'el si'ela; ya'a ka' dansaar ma'aanɛ.
9 Pidimi ta'ada ka yɛ fuug yinne ma'aa.
10 Ka ya ya'a paae teŋ si'a ka nimbanɛ di'e ya ba yin, yanam bɛɛ anina ka naan ti yi.
11 Zin'ikanɛ wʋsa ka nidib pʋ di'e yaa, bɛɛ kɛlisi ya pian'adɛ, yanam yi ka kpa'asi ya nɔba titani bas anina. Ala ka ba na baŋ ye ba pʋ tʋm sʋ'ʋm.”
12 Ka nya'andɔlib la yii keŋ pa'al nidib ye ba basimi ba tʋʋmbɛ'ɛd.
13 Ka kad kikiris bɛdegʋ yis ka nɔk kpaam bi'ela suoɛn ban'adnam bɛdegʋ zut, ka ba nyɛ laafi.
Joon onɛ sʋʋd nidib ku'om la kum yɛla
(Mat 14:1-12; Luk 9:7-9)
14 Yesu labaar la da yadig teŋ kan wʋsa. Ka na'ab Herod wʋmi li. Sieba da yɛl ye, “Joon onɛ daa sʋʋd nidib ku'om la vʋ'ʋg kumin, dinɛ kɛ ka tʋʋm kpi'ema tʋm o san'an.”
15 Ka sieba ye, “O anɛ Elaja.”
Ka sieba ye, “O anɛ Wina'am nɔdi'es wʋʋ Wina'am nɔdi'esidib banɛ da
bɛ kʋdim sa la.”
16 Na'ab Herod da wʋm ala la, ka yɛl ye, “O anɛ Joon, onɛ ka m daa fi'ig o zug la lɛn vʋ'ʋg na.”
MAK 6
17–18 Linɛ zug ka na'ab la da kʋ Joon la anɛ anwa. Herod daa dii o bier Filip pu'a, ka o yʋ'ʋr buon Herodias, ka Joon yɛl o ye, “Li ka' sʋ'ʋm ka fʋ dii fʋ bier pu'a.” Ka pu'a la kisig Joon on yɛl si'el la zug. Linzug ka Herod tʋm nidib ka ba gban'e Joon n lɔ ka yɔɔ o sanrega ni.
19 Ka Herodias sʋnf duoe nɛ Joon, ka o bɔɔd ye o kʋʋ o ka gʋ'ʋŋ.
20 Herod da zɔt Joon, bɔzugɔ o da mi' ye o anɛ pʋpielim sɔb ka mɛ an sida sɔb, dinzug ka o da bas o baanlimm. O da kɛlisid o pian'ad, hali ka li daamid o. Amaa la'an nɛ wala, o da kpɛm bɔɔd ye o kɛlis o pian'ad.
21 Daar yinne ka pu'a la paam suor. Li daa anɛ Herod du'am dabisir ka o maal di'ema ka buol teŋin na'anam nɛ soogia kpɛɛmnam nɛ Galile nimbɛda.
22 Ka Herodias bipuŋ kena wa'a hali, ka Herod nɛ saam la sʋnf ma'ae.
Ka na'ab la bu'os bipuŋ la ye, “Fʋ bɔɔd bɔ ka m tisi fɔ?”
23 Ka pɔɔ zi'el
ye, “M na tisif fʋn bɔɔd si'el wʋsa hali li ya'a aan m sʋ'ʋlim la pʋsʋkɔ.”
24 Ka bipuŋ la yii bu'os o ma ye, “M yɛl o di'e bɔ?”
Ka o ma lɛbis ye, “Yɛlim ye fʋ bɔɔdnɛ Joon onɛ sʋʋd nidib ku'om la zug.”
25 Ka bipuŋ la kpɛn' tɔ'ɔtɔ yɛl na'ab la ye, “Mam bɔɔd ye fʋ nɔk Joon
onɛ sʋʋd nidib ku'om la zugʋ niŋ laan tisim nannanna.”
26 Ka na'ab la sʋnf san'am hali; amaa on pɔ saam la tuon la zug ka o pʋ bɔɔd ye o mɔŋ oo.
27 Ka o tʋm soogia ye o kem mɔr Joon zug na. Ka o yii keŋ sanrega ni fi'ig o zugʋ
28 niŋ laan mɔr na tis bipuŋ la, ka o tis o ma.
29 Ka Joon nya'andɔlib wʋm ka keŋ nɔk o niŋgbiŋ la mum.
Yesu diis nidib tusa anu
(Mat 14:13-21; Luk 9:10-17; Jon 6:1-14)
30 Ka o tʋmtʋmnib la lɛb na la'as taaba o san'an, ka yɛl o ban tʋm ka pa'al si'el wʋsa.
31 Nidib bɛdegʋ da bɛɛ ani, ka sieba kenna, ka sieba lɛbid. Dinzug ka Yesu nɛ o nya'andɔlib la pʋ nyɛ ya'a dii. Ka o yɛli ba ye, “Kɛlli ka ti yi paalʋ keŋ zin'ikanɛ ka nidib kae ka ya vʋ'ʋs bi'ela.”
32 Ka ban gʋllim yii kpɛn' anrʋŋʋn keŋ zin'ikanɛ ka nidib kae.
33 Nidib bɛdegʋ da nyɛ ban yit, ka baŋ ban an sieba, ka yi teŋ kan wʋsa keŋ tɔ'ɔtɔ nɛ nɔbaa dɛŋim paae Yesu nɛ o nya'andɔlib la yiiga.
34 Ka Yesu paae yi anrʋŋʋn la ka nyɛ nidib la zu'oe si'em la, ka nimbaanlig gban'e o, bɔzugɔ ba daa nwɛnɛ pɛbanɛ ka' pɛ'ɛkemma. Ka pa'ali ba si'elnam bɛdegʋ.
MAK 6
35 Lin ti sɔbid la, ka o nya'andɔlib la keŋ yɛl o ye, “Kpɛla anɛ mɔɔgin, ka li mɛ sɔbid,
36 kɛl ka nidib la keŋ tempʋʋgin nɛ ya' banɛ bɛ yamma la da' diibi di.”
37 Ka o lɛbisi ba ye, “Yanam mɛŋ tisimi ba diib ka ba di.”
Ka ba lɛbisi bu'os ye, “Li na paae nid yinne nwadis anii yɔɔd. Ti nɔkimi
ti ligidi la wʋsa da' diibi tisi ba ka ba dii?”
38 Ka Yesu lɛm bu'osi ba ye, “Ya mɔr bodobodo gbila ala? Kem gɔsi.” Ka ba keŋ gɔs, ka ye, “Bodobodo gbila anu nɛ zimi ayi' bɛ.”
39 Ka Yesu yʋ'ʋn yɛl o nya'andɔlib la ye ba kɛl ka nidib la zin'in mɔma'asa la zug gbila-gbila ka ba pʋdigi tisi ba.
40 Sieba da zin'inɛ kɔbig-kɔbig ka sieba zin'in pisnu nu.
41 Ka Yesu nɔk bodobodo la nɛ zimi la gɔs arezana ni ka pʋ'ʋs Wina'am bareka, ka gbin'es bodobodo la tis o nya'andɔlib la ye ba tis nidib la, ka nɔk zimi ayi' la gbin'esi pʋdigi ba wʋsa.
42 Ka ba wʋsa ɔnbi tig. 43 Ka o nya'andɔlib la vaae bodobodo nɛ zimi linɛ kpɛlim la pɛ'ɛl pɛɛd pii nɛ ayi'.
44 Dap banɛ da bɛ anina di diib la da anɛ tusa anu.
Yesu keŋ ku'om zug la yɛla
(Mat 14:22-33; Jon 6:16-21)
45 Tɔ'ɔtɔ yim ka Yesu kɛ ka o nya'andɔlib kpɛn' anrʋŋ ye ba lɔ'ɔŋ mu'ari keŋ Besaida. Ka on kpɛlim ye o kɛɛs nidib la.
46 On kɛɛsi ba naae la, ka keŋ zuoya ni ye o sɔs Wina'am.
47 Ka zaam ti kena ma'ae ka anrʋŋ la bɛ mu'atita'ar la sʋʋgin. Ka Yesu bɛ gʋʋr o kɔn'ɔkɔn',
48 ka nyɛ ka sisi'em da'ad bɛdegʋ, ka o nya'andɔlib la pʋ tun'e gaad anrʋŋ laa. Ka bɛog ti yɔe nier, ka o ken nɛ nɔba ku'om la zugʋ paae ba ni, ka ye o gaadi ba.
49 Ka ba wʋsa nyɛ on ken ku'om la zug la, ka tɛn'ɛs ye, “Li anɛ silinsiiug.”
s50 Ka dabiem kpɛn' ba ka ba kaas kuŋ.
Tɔ'ɔtɔ yim ka o yɛli ba ye, “Mɔri sʋnkpi'euŋ ka li anɛ man. Da zɔti dabiem!”
51 Ka kpɛn' anrʋŋʋn la, ka sisi'em la lɛbi fɔn baanlimm. Ka li lidigi ba, bɔzugɔ
52 ba sʋnya digilim la zugʋ kɛ ka ba pʋ gban'e bodobodo gbila la tʋʋmnyalima la gbinnɛ.
MAK 6–7
Yesu ti'eb nidib Gennesaret teŋin
(Mat 14:34-36)
53 Ka ba lɔ'ɔŋ mu'ar la paae Gennesaret teŋin ka lɔ anrʋŋ la zi'el.
54 Ban da yi anrʋŋʋn la ka nidib la baŋ ye Yesu la, la,
55 ka zɔ tɔ'ɔtɔ gilig teŋ la wʋsa zi ban'adnamɛ keŋ on bɛ zin'isi'a la.
56 Ka o ya'a keŋ teŋ kpɛŋ bɛɛ tempʋʋgin bɛɛ yaan zin'isi'a, ba nɔkidnɛ ban'adnamɛ keŋ teŋ kan la da'an digili ba, ka bɛlim o ye o kɛ ka ban'adnam la kʋdim si'is o fuug nɔɔr. Ka banɛ wʋsa da si'is o fuug nɔɔr la nyɛ laafi.
MAK 7
Yaanam pa'alʋg la yɛla
(Mat 15:1-9)
| 7 |
Farisii dim nɛ gbauŋmi'idib sieba banɛ yi Jerusalem na la la'asi gilig
Yesu,
2 ka nyɛ ka o nya'andɔlib la sieba dit nɛ nu'udian'ad, ka pʋ pie
ka li an wʋʋ Farisii dimi ɛɛnti pie si'em ka nyaan di laa.
3 Farisii dim la'an nɛ Jew dim wʋsa kʋ di diibɔ, asɛɛ ba pie ba nu'us wʋʋ ba yaanam malima pʋʋginɛ pa'an si'em la.
4 Hali ba ya'a yi da'an na ba kʋ di diibɔ asɛɛ ba pie ba nu'us. Ba mɛ dɔl malimsieba dinɛ ka ba di'e ka li an nwama nɛ yʋya nɛ kʋnt dʋgid piesʋg.
5 Ka Farisii dim nɛ gbauŋmi'idib bu'os Yesu ye, “Bɔ ka fʋ nya'andɔlib la pʋ dɔlli ti yaanam malima, ka dit nɛ nu'udian'adɛ?”
6 Ka Yesu lɛbisi ba ye, “Azaya da di'e Wina'am pian'adi tis nidib la, ka
li an yɛlsida yanam zamdim la yɛla wʋʋ lin sɔb si'em la ye,
“Nimbama na'asid mam nɛ ba nɔɔr pian'ad ma'aa amaa ba sʋnya lal nɛ mam hali.
7 “Ban zun'od mam si'em la pʋ yii ba sʋʋnrin naa, li anɛ zi'ela linɛ ka nidib pa'ali ba gʋllim.”
8 Ya nɔk Wina'am nɔɔr yɛlʋgʋ bas ka dɔl ninsaalib malima.
9 Ka Yesu yɛli ba ye, “Ya zan'as Wina'am nɔɔr yɛlʋg ka lɛɛ siaki dɔlli ya mɛŋ malima.
10 Moses da yɛl ye, ‘Tisimi fʋ saam nɛ fʋ ma girima.’ Ka lɛn yɛl ye, ‘Nid ya'a tʋ o saam bɛɛ o ma, asɛɛ ba kʋʋ o.’
11 Yanam pa'an ye ninkanɛ mɔr si'eli na sʋŋ o ba' bɛɛ o ma, amaa o ya'a yɛl ye, bʋn la anɛ ‘Kɔɔban’ (li gbin anɛ Wina'am bʋn),
12 li ka' tilas ye o zaŋi li sʋŋ o ba' nɛ o ma ya'asɛ.
13 Nɛ' yɛla ka ya dɔlli
ya mɛŋ malima ka gɔs Wina'am nɔɔr yɛlʋg ka li an zaalim. Ya niŋid si'elnam bɛdegʋ nwɛnɛ lin ka ya maal la.”
Dinɛ kɛt ka sɔ' an dian'ad daan la yɛla
(Mat 15:10-20)
14 Ka Yesu buol nidib la ya'as, ka yɛli ba ye, “kɛlisimi, ka gban'e li gbin.
15 Si'el kae kpɛn'ɛd ninsaal nii kɛt ka o an dian'ad daana. Amaa dinɛ yit ninsaal ni naa kɛt ka o an dian'ad daan.
16 Onɛ mɔr tʋba on wʋm.”
17 Ka o yi nidib la san'an kpɛn' yin. Ka o nya'andɔlib la bu'os o siiliŋ la gbin.
18 Ka o lɛbisi bu'osi ba ye, “Ya nam kpɛn anɛ zi'ilim dimaa? Ya ka' ya'am na gban'e m pa'alʋg la gbin wʋʋ bama la bɛɛ? Si'el kae na kpɛn' ninsaal ni sid kɛ ka o an dian'ad daana.
19 Li na kpɛn' o pʋʋgin ka yi o niŋgbiŋin ka lɛɛ kʋ kpɛn' o sʋnfʋnɛ.” (On yɛl si'el la pa'al ye ba da gɔsid ye disieba mɔri dian'adɛ, amaa diib wʋsa an sʋm).
20 Ka o yɛl ye, “Li anɛ dinɛ yi ninsaal ni na kɛt ka o an dian'ad daan. 21 Ninsaal sʋnfʋn ka pʋtɛn'ɛbɛ'ɛd nɛ pu'asan'auŋ nɛ dausan'auŋ nɛ na'ayiigim nɛ ninkʋʋr
22 nɛ fufum nɛ bugusim nɛ dama'am nɛ tʋʋmbɛ'ɛd wʋsa nɛ yʋ'ʋsan'auŋ nɛ tita'alim nɛ yalim tʋʋma yit na.
23 Bʋmbɛ'ɛd bama wʋsa yitnɛ ninsaal sʋnfʋn na, ka kɛt ka o an dian'ad daan.”
Pu'a sɔ' yadda niŋir la yɛla
(Mat 15:21-28)
24 Ka Yesu yi zin'ikan ka keŋ paae Taya teŋin, ka kpɛn' yin, ka pʋ bɔɔd ye sɔ' baŋ ye o bɛɛ anii. Amaa o da kʋ nyaŋi su'a o mɛŋa.
25 Pu'a sɔ' da bɛ mɔr o bipuŋ ka kikirig dɔl o. Ka o wʋm Yesu yɛla, ka keŋ igin o tuon.
26 Ka sɔs Yesu ye o kadim kikirig la yis o biig la ni. Pu'a la da anɛ Girik dim buudi ka ba du'a o Fonisia teŋin linɛ bɛ Siriya sʋ'ʋlim la.
27 Ka Yesu lɛbis o ye, “Li pʋ sʋ'ʋm ye ba nɔk biis diibi tis baasɛ, asɛɛ biis la dii tig yiiga.”
28 Ka pu'a la lɛbis o ye, “Sida, m zugdaana, baas banɛ bɛɛ ba zugdaan tuon la ditnɛ biis dizɔra dinɛ lit la.”
29 Ka Yesu yɛl o ye, “Fʋn lɛbis si'em la zug, kulim, ka kikirig la basi fʋ biig la.”
30 Ka pu'a la lɛbi kuli paae nyɛ ka o biig la dig. Ka kikirig la sid yi ka bas o.
MAK 7–8
Yesu ti'eb dau kanɛ an tʋbkpida nɛ gik
31 Ka Yesu bas Taya teŋin ka dɔlli yi Sidon nɛ Dekapolis tɛɛnsin, ka lɛn lɛbi paae Galile mu'arin. 32 Ka ba mɔr dau na ka o an tʋbkpida ka lɛn an gik. Ka ba bɛllim Yesu ye o nɔk o nu'ugʋ pa'al o zug.
33 Ka o mɔr o yi kpikpɛŋ ka nɔk o nu'ubibisi tʋm o tʋba ni, ka tʋbis nintɔɔnd, ka si'is dau la zilim, 34 ka gɔs arezana ni, ka sin'im, ka yɛl dau la ye, “Effata.” (Li gbin anɛ ye, “yɔ'ɔgim.”) 35 Ka o tʋba la yɔ'ɔg. Ka o zilim la mɛ lak. Ka o pian'ad sʋ'ʋŋa.
36 Ka Yesu yɛl nidib la nɛ kpi'euŋ ye ba da kɛ ka sɔ' baŋi li yɛlaa. Amaa la'annɛ on da yɛl ye ba da yɛl sɔ' li yɛla la, nidib la da kpɛm mɔɔnnɛ li yɛla.
37 Ka li lidigi ba hali ka ba ye, “O niŋid si'el mɛkama sʋ'ʋŋa, ka la'am maan ka tʋbkpida wʋm ka gigis pian'ad.”
MAK 8
Yesu diis nidib tusa anaasi
(Mat 15:32-39)
| 8 |
Saŋkan la ka nidib bɛdegʋ lɛn kena la'as. Ka diib kae ka ba na dii. Ka Yesu buol o nya'andɔlib la, ka yɛli ba ye,
2 “Nidib nwa' mɔr nimbaanlig bɔzugɔ li paae daba atan' ka ba bɛɛ m san'an kpɛ' ka pʋ dii.
3 Ba sieba yinɛ teŋ lalli na, ka m ya'a pʋ tisi ba diibɔ ka ba kul ala, ba na ti vib kɔ'ɔm suorin.”
4 Ka o nya'andɔlib la bu'os o ye, “Ti na nyɛ diib yaanɛ diis nimbama
wʋsa mɔɔgin kpɛla?”
5 Ka o lɛbisi bu'osi ba ye, “Ya mɔr bodobodo gbila ala?”
Ka ba lɛbis ye, “Ayɔpɔi.”
6 Ka o yɛl nidib la ye, ba zin'inim teŋin. Ka o zaŋ bodobodo gbila ayɔpɔi la ka pʋ'ʋs Wina'am bareka, ka gbin'esi li tis o nya'andɔlib la, ka yɛli ba ye ba pʋdigim nidib la. Ka ba pʋdig.
7 Ba da lɛm mɔr zimbibis bi'ela. Ka Yesu pʋ'ʋs Wina'am bareka, ka yɛl o nya'andɔlib la ye, ba nɔkim pʋdigi tis nidib la mɛn.
8 Nidib la da dii tig. Ka o nya'andɔlib la vaae dikanɛ kpɛlim la, ka li pɛ'ɛl pɛɛd ayɔpɔi.
9 Ba da anɛ wʋʋ dap tusa anaasi. Ka on basi ba ka ba kul la,
10 ka on nɛ o nya'andɔlib la kpɛn' anrʋŋʋ keŋ Dalmanuta teŋin.
Farisii dimi bɔɔd ye ba nyɛ bʋnnyalima la yɛla
(Mat 12:38-42; 16:1-4)
11 Ka Farisii dim sieba kena ye ba kpans Yesu, ka bɔɔd ye o maal bʋnnyalima linɛ sid yi Wina'am san'an na.
12 Ka Yesu sin'im hali, ka bu'os ye, “Bɔ ka zʋmaʋŋ kaŋa nidib bɔɔd ye ba nyɛ bʋnnyalima? Sida ka m yɛti ya ye, zʋmaʋŋ kaŋa kʋ nyɛ bʋnnyalimaa.”
13 Ka basi ba ka lɛbi kpɛn' anrʋŋ la lɔ'ɔŋ mu'ar la gbɛog.
Danbin pa'alʋg la yɛla
(Mat 16:5-12)
14 O nya'andɔlib la da tam ka pʋ mɔr bodobodo anrʋŋʋn la. Ba da mɔri yinne ma'aa.
15 Ka Yesu sa'ali ba ye, “Gu'usimi Farisii dim nɛ Herod danbin la.”
16 Ka ba pian'adi tisid taaba ye, “Tinamɛ pʋ mɔr bodobodo la zug ka o yɛl ala la.”
17 Yesu da baŋ ban pian'ad si'el la yɛla, ka bu'osi ba ye, “Bɔ ka ya pian'ad yanamɛ pʋ mɔr bodobodo la yɛla? Ya pʋ baŋ nɛ bɛɛ ya pʋ gban'anɛ li gbinnɛ? Ya ya'am pʋ niee?
18 Ya mɔr nini, ka pʋ nyɛtaa? Ka mɔr tʋba, ka pʋ wʋmmaa? Ya pʋ tɛnraa?
19 Man daa gbin'es bodobodo gbila anu tis nidib tusa anu la, ya daa vaae bodobodo linɛ kpɛlim la pɛ'ɛl pɛɛd ala?” Ka ba lɛbis ye, “pɛɛd pii nɛ ayi'.”
20 Ka o bu'os ye, “Man daa nɔk bodobodo ayɔpɔi pʋdig nidib tusa anaasi la, pɛɛd ala ka ya daa vaae?”
Ka ba lɛbis ye, “pɛɛd ayɔpɔi.”
21 Ka o bu'osi ba ye, “Yanam nam pʋ gban'e li gbinnɛɛ?”
Yesu ti'eb zʋnzɔŋ Besaida teŋin
22 Ka ba paae Besaida. Ka nidib mɔr zʋnzɔŋʋ kena bɛlim Yesu ye o si'is o.
23 Ka Yesu vɛ'ɛg o yi kpikpɛŋ ka tʋbis nintɔɔndi niŋ dau la nini, ka nɔk o nu'usi pa'al o zug, ka bu'os o ye, “Fʋ nyɛt si'ela?”
24 Ka dau la duoe o zug ka ye, “M nyɛt nidib ka ba nwɛnɛ tiis nɛ ka lɛɛ ken.”
MAK 8–9
25 Ka o lɛn nɔk o nu'usi pa'al o nini ni. Ka dau la gɔs kii, ka o nini lak ka o nyɛt si'el mɛkama sʋ'ʋŋa.
26 Ka Yesu yɛl o ye, “Da lɛb tempʋʋgin laa, amaa kulim.”
Pita pa'al Yesu an sɔ'
(Mat 16:13-20; Luk 9:18-21)
27 Ka Yesu nɛ o nya'andɔlib la keŋ Sizerea teŋkpɛmis linɛ bɛ Filipi
sʋ'ʋlim la. Ka o bu'osi ba suorin ye, “Nidib yɛt ye mam aan anɔ'ɔnɛ?”
28 Ka ba lɛbis ye, “Sieba yɛt ye, fʋ anɛ Joon onɛ da sʋʋd nidib ku'om la.
Ka sieba ye, fʋ anɛ Elaja. Ka bam ye, fʋ anɛ Wina'am nɔdi'esidib yinne.”
29 Ka o bu'osi ba ye, “Ka yanam ye mam aan anɔ'ɔnɛ?”
Ka Pita lɛbis ye, “Fʋ anɛ Kristo la.”
30 Ka Yesu yɛli ba ye, “Mid ka ya yɛl sɔ' m yɛla.”
Yesu pian' o namisʋg nɛ o kum yɛla
(Mat 16:21-28; Luk 9:22-27)
31 Ka Yesu pin'ili pa'al o nya'andɔlib la ye, “Asɛɛ Ninsaal Biig la namis bɛdegʋ ka teŋin kpɛɛmnam nɛ Jew dim maanmaannib kpɛɛmnam nɛ gbauŋmi'idib zan'as o, ka kʋʋ o. Amaa li daba atan' daar, o na vʋ'ʋg kumin.”
32 O daa pian'anɛ pa'ali ba nyain nɛ'ɛŋa yɛla. Ka Pita dɔl o yi kpɛŋ, ka yɛl ye, o da yɛt alaa.
33 Ka Yesu gi'e gɔs o nya'andɔlib la ka yɛl Pita ye, “Lɛmmi m nya'aŋ sa, Sʋntaana! Fʋ tɛn'ɛsʋg anɛ ninsaal pʋtɛn'ɛr ka ka' Wina'am dinnɛ.”
34 Ka buol nidib la nɛ o nya'andɔlib la la'as, ka yɛli ba ye, “Sɔ' ya'a bɔɔd ye o dɔl mam, asɛɛ o ki'is o mɛŋ yɛla, ka nɔk o kum dapuudiri zi ka dɔl man.
35 On mɛkama bɔɔd ye o gu' o nyɔvʋr, o nyɔvʋr la na bɔdig. Amaa on mɛkama bas o nyɔvʋr man zug nɛ labasʋŋ la yɛla, na nyɛɛ o nyɔvʋr. 36 Nid ya'a nyɛ dunia nwa' la'ad wʋsa ka kɔ'ɔŋ o nyɔvʋrɛ o nyɔɔd an bɔ?
37 Si'el kae ka nid na zaŋi tiak o nyɔvʋrɛ.
38 Sɔ' ya'a zɔ nyan nɛ man nɛ m pa'alʋg la zʋmaʋŋ kanɛ an pu'asan'auŋ nɛ tʋʋmbɛ'ɛd nwa' la, Ninsaal Biig la mɛ na zɔ on daana nyan saŋkanɛ ka o na ti lɛb na nɛ o Ba' Wina'am na'am nɛ maliak sʋma la.”
Ka o yɛli ba ye, “Sida ka m yɛti ya ye, ninsieba bɛɛ ya sʋʋgin kpɛ' ka kʋ kpii, asɛɛ ba ti nyɛ Wina'am na'am la kenna nɛ kpi'euŋ.”
MAK 9
Yesu tiak ka nyɛɛn la yɛla
(Mat 17:1-13; Luk 9:28-36)
2 Daba ayuobʋ nya'aŋ ka Yesu dɔl Pita nɛ Jemes nɛ Joon n keŋ dʋ zuotita'ar zug ban ma'aa. Ka Yesu tiak.
3 Ka o fuud nyɛɛn pil-pil ka an pielig farr. Sɔ' kae dunia nwa' ni na pie fuug ka li yi ka pɛlig alaa.
4 Ka o nya'andɔlib la nyɛ Elaja nɛ Moses ka ba nie anina, ka pian'ad nɛ Yesu.
5 Ka Pita yɛl Yesu ye, “Pa'anna, li an sʋ'ʋm ka ti bɛ kpɛla. Kɛl ka ti ti' sʋga atan', tis fʋn yinne, Moses yinne, Elaja yinne.”
6 Dabiem daa kpɛn' ba hali ka Pita zi' on na yɛl si'ela.
4 Ka saŋgbauŋ ma'asim kena ligili ba. Ka kʋkɔr yi saŋgbauŋ la ni na yɛl ye, “Oŋa aan m binɔŋir. Kɛlisimi nɛ o pian'ad.”
5 Ka ba gɔsi gilig, ka pʋ nyɛ sɔ' ya'asɛ, ka Yesu ma'aa bɛ nɛ ba.
6 Ban naam zuorin sigid na la, ka Yesu yɛli ba ye, “Mid ka ya yɛl sɔ' yanamɛ nyɛ si'el la, asɛɛ Ninsaal Biig la kum vʋ'ʋgir la nya'aŋ.”
10 Ka ba siak on yɛl si'el la, ka lɛɛ bu'osid taaba ye, “Vʋ'ʋg kumin la gbin an bɔ?”
11 Ka ba bu'os Yesu ye, “Bɔ ka gbauŋmi'idib yɛl ye Elaja na kɛn yiiga na?”
12 Ka o lɛbisi ba ye, “Sida Elaja na kɛn yiiga na maal si'el wʋsa. Ka bɔ ka li sɔb Wina'am gbauŋʋn ye, Ninsaal Biig na namis bɛdegʋ hali ka ba nɛ'ɛs o?
13 Amaa m yɛti ya nɛ ye Elaja pʋn kena ka nidib niŋ o ban bɔɔd si'em. Ka li an wʋʋ ban da sɔb Wina'am gbauŋʋn o yɛla si'em la.”
Yesu kad kikirigi yis biribiŋ ni
(Mat 17:14-21; Luk 9:37-43)
14 Ka ba lɛb o nya'andɔlib banɛ daa kpɛlim la san'an, ka nyɛ nidib bɛdegʋ ka ba giligi ba. Ka gbauŋmi'idib sieba nwa'asid nɛ o nya'andɔlib la.
15 Nidib la da nyɛ Yesu la ka li lidigi ba, ka ba zɔɔ keŋ o san'an pʋ'ʋs o.
16 Ka o bu'os o nya'andɔlib la ye, “Ya nwa'asid bɔ yɛla?”
17 Ka nidib la yinne lɛbis ye, “Pa'anna, m biig ka kikirig dɔl o, ka o gigilim, din ka m dɔl o na.
18 Ka kikirig la ya'a ɛɛnti duo, li lugid o nɛ, ka nintɔnpuud yit, ka o ga'ad nyina, ka tiɛn o mɛŋi an gammire. Din la ka m mɔr o na bɛllimi fʋ nya'andɔlib la ye ba kad kikirig la bas, ka ba pʋ nyaŋɛ.”
MAK 9
19 Ka Yesu yɛli ba ye, “Oo, zʋmaʋŋ kanɛ nidibi pʋ niŋid yadda, m na bɛ nɛ ya daba ala? Ya bɔɔd ye m mɔdignɛ ya hali paae saŋa wala? Mɔri biig la na.”
20 Ka ba mɔr o na. Kikirig la nyɛ Yesu la, ka kpɛn lug biig la. Ka o bilim ka nintɔnpuud yit o nɔɔrin.
21 Ka Yesu bu'os biig la saam ye, “Kikirig la dɔl o la, li yuug yaa?”
Ka o lɛbis ye, “O biilimin sa.
22 Li ɛɛnti lug o bugumin bɛɛ ku'omin ye li kʋʋ o. Fʋ ya'a na nyaŋi sʋŋi ti fʋn zɔmi ti nimbaanlig ka sʋŋi ti.”
23 Ka Yesu lɛbis ye, “Bɔ ka fʋ yɛl ye fʋ ya'a na nyaŋɛ? Fʋ zi' ye si'el mɛkama pʋ tɔi tis onɛ niŋ Wina'am yadda?”
24 Ka biig la saam tans ye, “M niŋ yadda amaa paasimi m yadda ka li pɔɔdnɛ.”
25 Yesu n nyɛ ka nidib la'asid o san'an la, ka o tans kikirig la ye, “Kikirig onɛ an gik nɛ tʋbkpida, yim ka bas biig la, ka da lɛn dɔl o ya'asɛ.”
26 Ka kikirig la kaas kuŋ, ka lug biig la teŋin bɛ'ɛd bɛ'ɛdi ka nyaan yi. Ka biig la nwɛnɛ kum nɛ. Ka nidib la bɛdegʋ yɛl ye, “O kpinɛ.” 27 Ka Yesu gban'e o nu'ugʋ duo o ka o zi'en.
28 Ka Yesu kpɛn' yin. Ka o nya'andɔlib la ba kɔn'ɔkɔn' kena bu'os o ye, “Bɔ ka ti pa'a pʋ nyaŋi kad kikirig la yisɛ?”
29 Ka o lɛbis ye, “Ya'a ka' Wina'am sɔsʋgɔ, si'el kae na nyaŋi kad
kikirbama buudi yisɛ.”
Yesu lɛm pian' o kum la yɛla
(Mat 17:22-23; Luk 9:43-45)
30 Ka ba bas zin'ikan ka bʋŋ Galile gaad. On da pa'annɛ o nya'andɔlib la zug ka o da pʋ bɔɔd ye sɔ' baŋ ban bɛ si'ela.
31 Ka o yɛli ba ye, “Ba na zam Ninsaal Biig la ka zaŋ o niŋ nidib nu'usin. Ka ba na kʋʋ o. Amaa li daba atan' daar o na vʋ'ʋg kumin.” 32 Ba da pʋ gban'e pa'alkaŋa gbinnɛ, ka zɔt dabiem nɛ ban na bu'os o.
Onɛ na lieb kpɛɛm la yɛla
(Mat 18:1-5; Luk 9:46-48)
33 Ka ba keŋ paae Kapeenum, kpɛn' yin. Ka Yesu bu'os o nya'andɔlib la ye, “Bɔzug ka ya pa'a nwa'asid suorin la?”
34 Ka ba sin, bɔzugɔ ba pa'a nwa'asidnɛ taaba onɛ na an kpɛɛm ba sʋʋgin yɛla.
35 Ka Yesu zin'in ka buol o nya'andɔlib pii nɛ ayi' la, ka yɛli ba ye, “Onɛ bɔɔd ye o an kpɛɛm, on nɔkim o mɛŋi lieb biig, ka an sɔ' wʋsa tʋmtʋm.”
36 Ka o nɔk bibili zi'eli ba sʋʋgin, ka nɔk o nu'usi kuak o, ka yɛli ba ye,
37 “On mɛkama di'e bikaŋa tiraan man yʋ'ʋr zug, o di'enɛ mam mɛŋ, ka on mɛkama di'e mam mɛŋ, pʋ di'e mam ma'aa nɛɛ, amaa o di'enɛ onɛ tʋmi m la na.”
Onɛ pʋ zan'asi ti la siaki ti
(Luk 9:49-50)
38 Ka Joon yɛl o ye, “Pa'anna, tinam daa nyɛ dau ka o mɔri fʋ yʋ'ʋri kad kikiris ka on ka' ti dɔllim taa la zug ka ti yɛl o ye o basim.”
39 Ka Yesu yɛli ba ye, “Da kad o, bɔzugɔ onɛ tʋm tʋʋmnyalima man yʋ'ʋr zug kʋ nyaŋi pian' bɛ'ɛd m yɛla li nya'aŋa.
40 Onɛ pʋ zan'asi ti, di'e ti nɛ.
41 Asida ka m yɛti ya ye, on wʋsa tisi ya ku'om ka ya nu man yʋ'ʋr zug, yanamɛ an Kristo nidib la yɛla, on daana kʋ kɔ'ɔŋ o yɔɔdɛ.”
A-pan'as-sɔ' kpɛn'ɛs tʋʋmbɛ'ɛdin la yɛla
(Mat 18:6-9; Luk 17:1-2)
42 “Onɛ kɛ ka bibibis bama nwa' banɛ niŋim yadda la yinne tʋm tʋʋmbɛ'ɛd, li naan aan sʋ'ʋm nɛ ban na nɔk nɛtita'ari lɔɔ kɔl o niŋgɔɔnr ka lɔb o basi atɛuk zuluŋin la.
43–44 Ka fʋ nu'ug ya'a kɛ ka fʋ tʋm tʋʋmbɛ'ɛd, fʋn fi'igimi li bas, bɔzugɔ li an sʋ'ʋm nɛ fʋn na kpɛn' arezana ka vʋe nɛ nu'ug yinne, gat fʋn na mɔr nu'us ayi' ka kpɛn' bugum teŋ ka li dit ka pʋ kpiisida.
45 Ka fʋ nɔbir ya'a kɛ ka fʋ tʋm tʋʋmbɛ'ɛd, fʋn fi'igimi li bas, bɔzugɔ li an sʋ'ʋm nɛ fʋn na kpɛn' arezana ka vʋe nɛ nɔbir yinne gat fʋn na mɔr nɔba ayi' ka ba nɔki fʋ lɔbi bas bugum teŋ.
46 Anina ka ba kʋ kpii ka bugum la mɛ pʋ kpiisida.
47 Ka fʋ nif ya'a kɛ ka fʋ tʋm tʋʋmbɛ'ɛd, fʋn kpidigimi li bas, bɔzugɔ li an sʋ'ʋm nɛ fʋn na kpɛn' Wina'am sʋ'ʋlim nɛ MAK 9–10
nif yinne gat fʋn na mɔr nini ayi' ka ba lɔbi fʋ bas bugum teŋ.
48 Anina ka zʋnzʋnya bɛ ka pʋ kpiida, ka bugum mɛ dit ka pʋ kpiisida. 49 Ba na nɔk bugum yugus nidib wʋsa nwɛnɛ yaarim nɛ.
50 “Yaarim an sʋ'ʋm, amaa yaarim mimilim ya'a yi, sɔ' na niŋ wala
maali li mimiligɔ? Mɔri yaarim ya ni ka mɔr sumbʋgʋsʋm nɛ taaba.”
MAK 10
Pu'a basʋg la yɛla
(Mat 19:1-12)
10
† Ka Yesu bas zin'ikan la ka keŋ Juda sʋ'ʋlimin lɔ'ɔŋ Joodan mu'ar la. Ka nidib bɛdegʋ lɛn la'as na. Ka o pa'annɛ ba wʋʋ on ɛɛnti niŋid si'em la.
2 Ka Farisii dim sieba kena ye ba kpans o gɔs, ka bu'os ye, “Li an sʋm wada pʋʋgin ye dau kad o pu'a?”
3 Ka o lɛbisi bu'osi ba ye, “Moses da tisi ya nɔɔr ye bɔ?”
4 Ka ba yɛl ye, “Moses da siak ye, dau tun'e kad o pu'a ka sɔb gbauŋʋ li yɛla tis o.”
5 Ka Yesu yɛli ba ye, “Ya zuti da kpi'em hali ka ya pʋ siakidi di'ed pa'alʋg la kɛ ka Moses da sɔb nɔkaŋa tisi ya.
6 Amaa saŋkanɛ ka Wina'am da maal dunia la, o da maali ba nɛ dau nɛ pu'a.
7† Ka yɛl ye, ‘Nɛ'ɛŋa yɛla ka dau na bas o ba' nɛ o ma ka la'as nɛ o pu'a. 8 Ka ba lɛn ka' ayi', amaa ba lieb nɛ yinne.’
9 Wina'am la'as si'el la, mid ka ninsaal wɛligi li.”
10 Ka ba kpɛn' yin ka o nya'andɔlib la bu'os o on yɛl si'el la gbin.
11 Ka o yɛli ba ye, “Onɛ bas o pu'a ka tɔɔm di pu'a, o anɛ pu'asan'auŋ sɔb.
12 Ala mɛnɛ pu'a ya'a bas o sid, ka tɔɔm kul dau, o mɛ anɛ pu'agɔɔndir.”
Yesu niŋ biis bareka
(Mat 19:13-15; Luk 18:15-17)
13 Ka ba mɔr biisi kɛn Yesu san'an na ye o zaŋ o nu'ugʋ pa'ali ba zug ka niŋi ba bareka. Ka o nya'andɔlib la kad nidib la.
14 Ka Yesu nyɛ, ka li pʋ niŋ o malisim. Ka o yɛli ba ye, “Kɛlli ka biis la kɛɛn m san'an na ka da kati baa, bɔzugɔ bamanam taab ka Wina'am sʋ'ʋlim la aan ba din.
15 Amɛŋa ka m yɛti ya ye, onɛ pʋ di'e Wina'am sʋ'ʋlim la wʋʋ biiga, o kʋ kpɛn' li nii.”
† 10:1 Luk 16:18 † 10:7 Pin 2:2
16 Ka o di'e biis la nɛ o nu'usi niŋ o tuon, ka pa'al o nu'usi ba zutin ka niŋi ba bareka.
Yesu nɛ arezak daan la yɛla
(Mat 19:16-30; Luk 18:18-30)
17 Ka Yesu lɛn duoe ken. Ka dau sɔ' zɔɔ kɛɛn o san'an na igin o tuon, ka bu'os o ye, “Pa'an sʋŋɔ, m na niŋ wala ka nyɛ nyɔvʋr kanɛ ka' naarɛ?” 18 Ka Yesu lɛbisi bu'os o ye, “Bɔ ka fʋ buonim ninsʋŋɔ? Sɔ' kae an sʋ'ʋm asɛɛ Wina'am gʋllim.
19 Fʋ mi' Wina'am nɔzi'ela la yɛl si'em la ye, ‘Mid ka fʋ kʋ nid bɛɛ san'am pu'a bɛɛ dau. Mid ka fʋ zu bɛɛ di ziri kasɛt bɛɛ zam sɔ'. Tisimi fʋ saam nɛ fʋ ma girima.’”
20 Ka dau la yɛl o ye, “Pa'anna, mam pʋn dɔl nɔzi'ela la wʋsa m biilimin sa.”
21 Ka Yesu gɔs o, ka nɔŋ o, ka yɛl o ye, “Li kpɛlim bʋn yinne. Kem kuosi fʋ la'ad wʋsa ka zaŋ ligidi la tis nɔŋ dim ka nyaan kena dɔl man. Ala ka fʋ na nyɛ kpan'am arezana ni.”
22 Ka on wʋm nɛ'ɛŋa la, o sʋnf san'amnɛ hali ka o lɔ nindaa keŋ, bɔzugɔ o da mɔr kpan'am hali.
23 Ka Yesu gɔs o nya'andɔlib la gilig ka yɛli ba ye, “Li tɔi hali nɛ banɛ mɔr areza'as la na kpɛn' Wina'am sʋ'ʋlimin.”
24 Ka o pian'ad la lidig o nya'andɔlib la. Ka Yesu lɛn yɛli ba ya'as ye, “M biisɛ, li tɔi hali ka sɔ' kpɛn' Wina'am sʋ'ʋlimin.
25 Li anɛ na'ana nɛ yʋgʋme na kpɛn' furipiim vɔɔnrin, gaad arezak daani na kpɛn' Wina'am sʋ'ʋlimin.”
26 Ka ba ya'am iank hali bɛdegʋ. Ka ba bu'os taaba ye, “Ka li ya'a an
ala, anɔ'ɔnɛ na tun'e nyɛ faangirɛ?”
27 Ka Yesu gɔsi ba ka yɛli ba ye, “Li ya'a anɛ ninsaal nɛ'ɛŋa anɛ linɛ tɔi, amaa li pʋ tɔi tis Wina'am. Bɔzugɔ Wina'am san'an si'el mɛkama anɛ na'ana.”
28 Ani ka Pita yɛl o ye, “Gɔsima, tinam basnɛ si'elnam wʋsa ka dɔllif.”
29 Ka Yesu yɛli ba ye, “Amɛŋa ka m yɛti ya ye, sɔ' ya'a bas o yir bɛɛ ba'abiis bɛɛ o ma bɛɛ o ba' bɛɛ biis bɛɛ pɔɔd, man nɛ m labasʋŋ la zug,
30 o na di'e ba nɔɔr babiga saŋkaŋa nwa'. O na di'e yir nɛ ba'abiis nɛ manam nɛ biis nɛ pɔɔd, ka namisʋg mɛ na paas. Amaa saŋa kanɛ kenna la, o na di'e nyɔvʋr kanɛ ka' naarɛ.
31 Nidib bɛdegʋ banɛ dɛŋ tuon na lɛb nya'aŋ ka banɛ bɛ nya'aŋ na gaad tuon.”
MAK 10
Yesu lɛm pian' o kum la
(Mat 20:17-19; Luk 18:31-34)
32 Ban da bɛ suori ken Jerusalem la ka Yesu bɛɛ ba tuon, ka li pak o nya'andɔlib la. Ka dabiem kpɛn' nimbanɛ da dɔlli ba la. Ka Yesu lɛm buol o nya'andɔlib pii nɛ ayi' la lɛb kpikpɛŋ ka tu'asi ba linɛ na niŋ o,
33 ye, “Ti wa'anɛ Jerusalem. Ani ka ba na nɔk Ninsaal Biig la tis Wina'am maanmaannib kpɛɛmnam nɛ gbauŋmi'idib. Ka na pian' kʋʋs o yɛla ye o nari kum, ka na nɔk o tis banɛ ka' Jew dim la.
34 Ka ba na la' o ka tʋbis nintɔɔndi mad o, ka fieb o, hali ka kʋ o. Amaa o na vʋ'ʋg kumin daba atan' daar.”
Jemes nɛ Joon sɔsʋg la yɛla
(Mat 20:20-28)
35 Ka Zebedee biis Jemes nɛ Joon keŋ li'el Yesu san'an yɛl o ye, “Pa'anna
ti bɔɔd ye ti ya'a sɔsif si'el fʋn maali lii tisi ti.”
36 Ka o bu'osi ba ye, “Bɔ ka ya bɔɔd ye m maali tisi ya?”
37 Ka ba lɛbisi yɛl o ye, “Fʋ ya'a ti di'e fʋ sʋ'ʋlim na'am la, ka zin' fʋ na'am gbauŋ zug, siakim ka ti yinne zin'inɛ fʋ datiuŋ, ka ti yinne zin'inɛ fʋ dagɔbʋg.”
38 Ka Yesu lɛbisi ba ye, “Ya zi' yanamɛ sɔsid si'ela. Ya na nyaŋi nu nwam kanɛ an namisʋg ka m ye m nu laa, bɛɛ sʋ Wina'am ku'om kanɛ ka m ye m sʋ la?”
39 Ka ba yɛl o ye, “Ti na tun'e niŋ ala.”
Ka Yesu lɛbisi ba ye, “Amɛŋa, ya na tun'e nu bʋnnuuda kan ka m na nu la ka sʋ Wina'am ku'om kanɛ ka m na sʋ la, ka kpi kum kan ka m na kpi la.
40 Amaa m lɛɛ pʋ mɔr suori na kɛ ka sɔ' zin'ini m datiuŋ bɛɛ m dagɔbʋga. Zin'iban maalnɛ digil banɛ na ti nyɛ li la.”
41 Ka o nya'andɔlib piiga la wʋm nɛ'ɛŋa la, ka gɛn'ɛd Jemes nɛ Joon. 42 Ka Yesu buoli ba la'as ka yɛli ba ye, “Ya mi' ye dunia nwa' na'anam diti ba na'am ka sʋ'oe ba nidib nɛ paŋ ka teŋ la nintitada mɛ mugusid nidib la ka tʋm ban bɔɔd si'el.
43 Amaa li ka' ala nɛ yanama. Ka ninkanɛ bɛ ya sʋʋgin bɔɔd ye o lieb nintita'ar la, li sʋ'ʋm ye o siaki liebi ya tʋmtʋm.
44 Ka onɛ bɔɔd ye o niŋ kpɛɛm ya sʋʋgin la, li sʋ'ʋm ye o siaki liebi ya wʋsa tʋmtʋm.
45 Bɔzugɔ Ninsaal Biig la mɛŋ pʋ kena ye nidib tʋm tis oo, MAK 10–11
amaa ye o lɛɛ tʋm tis nidib, ka zaŋ o nyɔvʋri yɔɔ ba sam, ye nidib bɛdegʋ nyɛ yɔlisim.”
Yesu ti'eb Bartimeus
(Mat 20:29-34; Luk 18:35-43)
46 Ka ba paae Jeriko teŋin. Ka Yesu nɛ o nya'andɔlib nɛ nidib bɛdegʋ yit teŋin la. Ka zʋnzɔŋ zin' suorini sɔsid. O yʋ'ʋri da buon Bartimeus, onɛ an Timeus biribiŋ.
47 Ka on wʋm ye li anɛ Yesu onɛ yi Nazaret la, ka o pin'ili tansid ye, “Yesu, David yaaŋa, zɔmim nimbaanlig.”
48 Ka nidib la bɛdegʋ tans o ye, “Kɛl vuud.” Ka o maligim tans nɛ paŋ
ye, “David yaaŋa, zɔmim nimbaanlig.”
49 Ka Yesu zi'en ka yɛl ye, “Buolim o na.”
Ka ba buol o ka yɛl o ye, “Mɔr sumalisim, duom ka o buonif.”
50 Ka o
duoe pidig o fuugʋ bas, ka iank tɔ'ɔtɔ keŋ Yesu san'an.
51 Ka Yesu bu'os o ye, “Fʋ bɔɔd ye m niŋ bɔɔ tisi fɔ?” Ka zʋnzɔŋ la yɛl o ye, “M Zugsɔba, kɛl ka m nyɛt.”
52 Ka Yesu yɛl o ye, “Kem kul, ka fʋ nyɛ laafi fʋn niŋi m yadda la zug.” Ka zʋnzɔŋ la nini kpɛn lak ka o dɔl Yesu.
MAK 11
Yesu kpɛn' Jerusalem
(Mat 21:1-11; Luk 19:28-40; Jon 12:12-19)
11
Ka ba kena paae Befage nɛ Betani, tɛɛns banɛ bɛ Olif zuorin ka pʋ lal nɛ Jerusalem la. Ka Yesu tʋm o nya'andɔlib ayi'
2 ka yɛli ba ye, “Kemi teŋ kanɛ bɛ tuon la, ka ya ya'a paae ya na nyɛ bʋŋsia'asiŋ ka ba lɔɔ zi'el ka sɔ' nam pʋ ban' oo. Yidigim o na.
3 Ka sɔ' ya'a bu'osi ya ye, ‘Bɔ yɛla ka ya yidigid oo?’ Yanam yɛlim o ye, ‘Zugsɔb la bɔɔd o; amaa o na lɛbis o na.’”
4 Ka ba keŋ sid nyɛ ka ba lɔ li sɔ' za'anɔɔrin, suor kpikpɛŋ. Ka ban yidigid o la,
5 ka nidib zi'e anina, ka bu'osi ba ye, “Wala ka ya yidigid bʋŋ la?”
6 Ka ba lɛbis wʋʋ Yesu yɛli ba si'em la. Ka ba kɛ ka ba mɔr o keŋ.
7 Ka ba mɔr o paae Yesu san'an, ka nɔki ba fuudi pa'al bʋŋ la zug. Ka Yesu ban'a o.
8 Ka nidib bɛdegʋ yadigi ba fuud suor zug. Ka sieba keŋ pɔɔginɛ ans tiis vaandi yadig suorin la.
9 Ka nimbanɛ bɛ tuon nɛ banɛ bɛ nya'aŋ la tansidi yɛt ye,
“Hosaana!
Albareka bɛ nɛ onɛ kenna nɛ Zugsɔb la yʋ'ʋr zug la.
10 Albareka bɛɛ ti yaab David sʋ'ʋlim nɛ onɛ kenna nɛ Zugsɔb la yʋ'ʋr la.
Hosaana! Na'am tita'ar anɛ Wina'am onɛ bɛ arezana ni la din.”
11 Ka Yesu paae Jerusalem kpɛn' Wina'am Pʋ'ʋsim Yinnɛ giligi gɔs si'el wʋsa. Ka lin daa an zaam la zug, ka on nɛ o nya'andɔlib pii nɛ ayi' la yii keŋ Betani.
Yesu pɔ nɔɔri niŋ kekaŋ
(Mat 21:18-19)
12 Ka li yimbɛog, ka ba yi Betani lɛbid Jerusalem, ka Yesu kɔ'ɔm zabid.
13 Ka o nyɛ kekaŋ ka li zi'e lalli. Ka mɔr vaandi ma'ae siaa. Ka o keŋ ye o gɔs ye li wal kekama, ka paae nyɛnɛ vaand ma'aa, lin da ka' kekama saŋa la zug.
14 Ka o yɛl tiig la ye, “Sɔ' kʋ lɛn dii fʋ wala ya'asɛ.” Ka o nya'andɔlib la wʋmi li.
Yesu kpɛn' Wina'am Pʋ'ʋsim Yin
(Mat 21:12-17; Luk 19:45-48; Jon 2:13-22)
15 Ka ban paae Jerusalem la, ka Yesu kpɛn' Wina'am Pʋ'ʋsim Yin ka nyɛ banɛ kuosid nɛ banɛ da'ad la ka o kadi ba yis. Ka tɛbig banɛ ti'akid ligidi la teebulnamɛ bas, la'an nɛ banɛ kuosid dawana la kʋgis mɛn.
16 O daa pʋ siak ye sɔ' lɛn gaadi kpɛn' yin la nɛ la'adɛ,
17 ka yʋ'ʋn pa'an nidib la ye, “Li pʋ sɔb Wina'am gbauŋʋn ye, ‘M yir na anɛ buudi wʋsa pʋ'ʋsim yirɛ’? Amaa yanam nɔki li maal faaung dim suak yir.”
18 Ka Wina'am maanmaannib kpɛɛmnam nɛ gbauŋmi'idib wʋm ala la, ka pin'ili ieed suoya ye ba kʋʋ o, amaa ka zɔt o dabiem, bɔzugɔ o pa'alʋg la da lidig nidib bɛdegʋ.
19 Ka zaam ti ma'ae, ka Yesu nɛ o nya'andɔlib yi teŋ kan la ni.
Kekaŋ pa'alʋg la yɛla
(Mat 21:20-22)
20 Ka bɛogʋ nie la bɛkɛung asuba ka ba dɔl suor la ken ka nyɛ kekaŋ la ka li kpi nɛ li nya'a.
21 Ka Pita tiɛn ka yɛl Yesu ye, “Pa'anna, gɔsima, tikanɛ ka fʋ sa pɔ nɔɔri niŋ la kpiya.”
22 Ka Yesu yɛli ba ye, “Niŋimi Wina'am yadda.
23 Ka asida ka m yɛti ya ye, sɔ' ya'a yɛl zuokaŋa ye, li vuom keŋ basi li mɛŋ atɛukʋn, ka siak o sʋnfʋn ye on yɛl si'el la na niŋ, ka pʋ bi'esɛ, li sid na niŋ.
24 Linzug ka m yɛti ya ye, ya ya'a pʋ'ʋsid ka sɔsid si'el, yanam niŋim Wina'am yadda ye ya di'e li, ka ya sid na di'e.
25–26 Ya ya'a zi'e pʋ'ʋsid, ka mɔr taal nɛ sɔ' ya sʋʋnrin, yanam kɛlli li bas, ka ya saam Wina'am onɛ bɛ arezana ni la mɛ na kɛɛ ya tʋʋmbɛ'ɛdi bas.”
Ba bu'os Yesu o paŋ la yɛla
(Mat 21:23-27; Luk 20:1-8)
27 Ka ba lɛm paae Jerusalem. Ka Yesu keŋ Wina'am Pʋ'ʋsim Yin, ka Wina'am maanmaannib kpɛɛmnam nɛ gbauŋmi'idib nɛ kpɛɛmnam kɛɛn o san'an na
28 ka bu'os o ye, “Anɔ'ɔn paŋ ka fʋ mɔri tʋm tʋʋm bama? Ka anɔ'ɔnɛ tisif suor ye fʋ tʋm tʋʋm bama?”
29 Ka Yesu lɛbisi ba ye, “M na bu'osi ya bu'osʋg yinne, ka ya ya'a lɛbisi li, m mɛ na yɛli ya paŋ kanɛ ka m mɔri tʋm la.
30 Joon Wina'am ku'om sʋʋb la da yinɛ Wina'am san'an na bɛɛ ninsaalib san'anɛ? Gandigimini ma.”
31 Ka ba nwa'asid taaba ye, “Ti ya'a ye, ‘Li yinɛ Wina'am san'an’ o na yɛl ye, ‘Ka bɔzug ka ya da pʋ niŋ o yadda?’
32 Ti mɛ ya'a yɛl ye, ‘Li yinɛ ninsaalib san'an na,’ li na daam nidib la sʋnya.” (Ba daa zɔtnɛ nidib la dabiem, bɔzugɔ ba wʋsa daa mi' ye Joon da anɛ Wina'am nɔdi'es.)
33 Ka ba lɛbis Yesu ye, “Ti zi'.”
Ka Yesu yɛli ba ye, “Mam mɛ kʋ yɛli ya paŋ kan ka m mɔri tʋm tʋʋm
bamaa.”
MAK 12
Pɔgu'udib siiliŋ la yɛla
(Mat 21:33-46; Luk 20:9-19)
12
Ka Yesu pa'ali ba nɛ siilima ye, “Dau da bɛɛ maal vain tiis pɔɔg ka sɛ tiis ka mɛ' pɔgu'udib dɔwɔk. O da maal garuŋ ye ba ɛɛnti tu'al tikanɛ ka ba buon ye vain la wala yisi li ku'om la. Ka basi tis pɔgu'udib la ka nwiɛn.
2 Ka vain wala bi'igir saŋa paae ka o tʋm o tʋmtʋm ye o keŋ pɔgu'udib la san'an ka ba pʋdig wala la ka tis o, o din na.
3 Ka ba gban'e o bʋ' ka o lɛbi kul zaalim.
4 Ka o lɛn tʋm nid yinne ba san'an. Ka ba nwɛ' o zug hali ka diis o nyan. 5 Ka o lɛn tʋm nid yinne ya'as. Ka ba kʋ on. Ala mɛn ka o tʋm nidib bɛdegʋ, ka ba bʋ' sieba ka kʋ sieba.
6 “Nid yinne daa kpɛlim, ka onɛ daa an o mɛŋ binɔŋir. O da tʋm o pɔgu'udib la san'an ka yɛl ye, ‘On aan m biig la, ba na na'as o.’
7 “Amaa pɔgu'udib nwa' yɛl taaba ye, ‘Oŋa sʋ'oe faar la. Kɛlli ka ti kʋʋ o, ka faar la liebi ti din.’”
8 Ka ba gban'e o kʋ, ka lɔb o yis o pɔɔgin la bas.
9 “Dinzugɔ lɔmbɔn'ɔg nwa' daana yʋ'ʋn na niŋ wala? O na kena kʋ pɔgu'udib la, ka di'e lɔmbɔn'ɔg la tiaki tis sieba.
10 Ya pʋ karim lin sɔb lɔsi'a Wina'am gbauŋʋn si'em laa?
“Li sɔb ye, ‘Tampigkanɛ ka tanmɛɛdib daa nɛ'ɛs la lieb lɔdigin tampigir.
11 Nwa' anɛ Zugsɔb la niŋi li ka ti nyɛ ka li an nyalimaa ti nini ni.’”
12 Ba da ieednɛ suor ye ba gban'e Yesu. Amaa ka zɔt nidib la la'as bɛdegʋ la dabiem, bɔzugɔ ba mi' ye o siilimnɛ ban siiliŋ kaŋa. Ka ba bas o ka keŋ.
Ba bu'os o lampɔ yɔɔb yɛla
(Mat 22:15-22; Luk 20:20-26)
13 Ka ba tʋm Farisii dim nɛ Na'ab Herod nidib ye ba zam Yesu o pian'ad pʋʋgin.
14 Ka ba kena yɛl o ye, “Pa'anna, ti mi' ye fʋ anɛ yɛlmɛŋir sɔb, ka pʋ zɔt nidib la ninii. Fʋ pʋ gaansid nidiba, ka pa'an nidib amɛŋa mɛŋa Wina'am suori an si'em. Li dɔl suor ye ti yɔ lampɔɔ tis Na'ab Siiza bɛɛ li pʋ dɔl suorɛ?
15 Ti yɔɔm bɛɛ ti da yɔ?”
Ka Yesu baŋi ba zam tʋʋma la yɛla, ka bu'osi ba ye, “Bɔɔ niŋ ka ya makidi ma? Mɔri la'af na ka m gɔs.”
16 Ka ba mɔr la'af la na tis o. Ka Yesu bu'osi ba ye, “Anɔ'ɔn footo nɛ anɔ'ɔn yʋ'ʋri sɔbi tabil li ni?”
Ka ba lɛbis ye, “Li anɛ Na'ab Siiza.”
17 Ka Yesu yɛli ba ye, “Tisimi Na'ab Siiza linɛ an o din ka mɛ tis Wina'amlinɛ an Wina'am din.” Ka Yesu pian'ad la lidigi ba.
Kum vʋ'ʋgir la yɛla
(Mat 22:23-33; Luk 20:27-40)
18 Ka Sadusii dim banɛ ye kum vʋ'ʋgir kae la kɛn Yesu san'an na, ka bu'os o ye,
19 “Pa'anna, Moses da sɔb ye, nid ba'abiig ya'a kpi ka bas o pu'a, ka o ka' biisɛ, on dim pʋkɔɔnr la du'a biisi tis o ba'abiig la.
20 Tɔ', ba'abiis ayɔpɔi da bɛ. Ka onɛ an kpɛɛm la di pu'a ka kpi ka pʋ bas biiga.
21 Ka onɛ tia'al la di pʋkɔɔnr la, ka mɛ kpi. Ka biig kae. Ka onɛ paas atan' la mɛ niŋ ala.
22 Ka babayɔpɔi la wʋsa di pu'a la yinne-yinne, ka kpi ka pʋ du'a biiga. Ka pu'a la mɛ yʋ'ʋn kpi.
23 Nannanna, ba ya'a ti vʋ'ʋg kuminɛ, anɔ'ɔn na an pu'a nwa' sida? Bɔzugɔ babayɔpɔi la wʋsa di pu'a la.”
24 Ka Yesu lɛbisi ba ye, “Nwa' ka'anɛ yidigirɛ? Ya yidig nɛ, yanamɛ zi' Wina'am gbauŋ la gbin nɛ o paŋ la zug.
25 Kum vʋ'ʋgir daar la, nidib kʋ ti dit pu'ab bɛɛ kun sidiba. Bɔzugɔ ba wʋsa na nwɛnɛ maliaknam banɛ bɛ arezana nii an si'em la.
26 Li ya'a anɛ kum vʋ'ʋgir yɛla, ya pʋ karim Moses n sɔb si'em saŋkanɛ ka o nyɛ ka bugum dit tituudin ka Wina'am yɛl o ye, ‘Manɛ an Abraham Wina'am nɛ Isaak Wina'am nɛ Jakob Wina'am.’
27 Wina'am la ka'anɛ banɛ kpi Wina'am, amaa o anɛ nimbanɛ vʋe la Wina'am. Ya yidigya bɛdegʋ.”
Nɔɔr yɛlʋg tita'ar la yɛla
(Mat 22:34-40; Luk 10:25-28)
27 Ka gbauŋmi'idib la nid yinne wʋm ban nwa'asid nɔŋgbannwa'ar la, ka o baŋ ye Yesu lɛbis Sadusii dim la nɛ ya'am pian'ad la, ka o mɛ li'el o bu'os o ye, “Wina'am nɔɔr yɛlʋg wʋsa ni linɛ san'an gaadi ba wʋsa?”
28 Ka Yesu lɛbisi yɛl o ye, “Linɛ an yɛlkpannɛ gaadi ba wʋsa anɛ ye, ‘Israel dima, kɛlisimi. Ti Zugsɔb Wina'am anɛ Zugsɔb yinne.
30 Nɔŋim Wina'am onɛ aan fʋ Zugsɔb la nɛ fʋ sʋʋnr wʋsa nɛ fʋ siig wʋsa nɛ fʋ ya'am wʋsa nɛ fʋ paŋ wʋsa.’
31 Ka linɛ paas ayi' mɛn anɛ ye, ‘Nɔŋimi fʋ tiraan nwɛnɛ fʋ mɛŋ nɛ.’ Nɔzi'elʋg lɛn kae gaad bama ya'asɛ.”
32 Ka gbauŋmi'id la yɛl o ye, “Pa'anna, li anɛ amɛŋa ka fʋ yɛl. Wina'am anɛ yinne. Ka sɔ' lɛn kae paas o zugɔ.
33 Fʋ ya'a nɔŋ o nɛ fʋ sʋʋnr wʋsa nɛ fʋ ya'am wʋsa, nɛ fʋ paŋ wʋsa, ka nɔŋi fʋ tiraan nwɛnɛ fʋ mɛŋ, nɛ'ɛŋa gaad maana wʋsa.”
34 Ka Yesu nyɛ ka o lɛbis nɛ ya'am la, ka yɛl o ye, “Fʋ pʋ lal nɛ Wina'am sʋ'ʋlim.” Ka lin yi saŋkan la sɔ' pʋ mɔr sʋnkpi'euŋʋ na lɛm bu'os Yesu bu'osʋgɔ.
Yesu bu'osi ba Kristo la yɛla
(Mat 22:41-46; Luk 20:41-44)
35 Yesu n da pa'an nidib Wina'am Pʋ'ʋsim Yin la, ka o bu'osi ba ye, “Wala ka gbauŋmi'idib yɛl ye, Kristo anɛ David yaaŋa?”
36 Wina'am Siig
Kasi paŋ kɛ ka David mɛŋ yɛl ye, Zugsɔb la yɛli m Zugsɔb ye, “Zin'inimi m datiuŋ, hali ka m ti kɛ ka fʋ bi'emnam bɛ fʋ nɔba teŋir.”
37 David mɛŋ ya'a buol o ye, “Zugsɔba” wala ka o na an David yaaŋa? Ka nidib bɛdegʋ kɛlisid o pian'ad nɛ sumalisim.
Yesu n sa'al nidib gbauŋmi'idib pa'alʋg la yɛla
(Mat 23:1-36; Luk 20:45-47)
38 O pa'alʋg la pʋʋgin ka o yɛl nidib la ye, “Gu'usiminɛ ya mɛŋ nɛ gbauŋmi'idib banɛ bɔɔd ye ba gɔɔnd nɛ fubɛda di'ed nidib pʋ'ʋsim da'an la.
39 Ba bɔɔdnɛ na'am zin'is la'asʋg dɔɔdin nɛ di'ema ni,
40 ka faand pʋkɔnya ya', ka ma' pʋ'ʋsid pʋ'ʋswa'a tisid Wina'am. Ba na kadi ba saria ka ba nyɛ kʋʋsbɛ'ɛd hali.”
MAK 12–13
Pʋkɔɔnr piini la yɛla
(Luk 21:1-4)
41 Ka Yesu zin' kpi'enɛ Wina'am Pʋ'ʋsim Yir ligidi daka, ka gɔsid nidib ka ba niŋid ligidi. Ka arezak dim niŋid ligidi bɛdegʋ.
42 Ka pʋkɔɔnr nɔŋdaan kena niŋ kɔbayi' ma'aa.
43 Ka Yesu buol o nya'andɔlib la, ka yɛli ba ye, “Asida ka m yɛti ya ye, pʋkɔɔnr nɔŋdaan nwa' niŋ ligidi bɛdegʋ gaad nidib la wʋsa,
44 bɔzugɔ arezak dim yis nɛ ba ligidi niŋ ka kɛ bɛdegʋ. Ka on, onɛ an nɔŋdaan la, nɔk o zan'a-zan'a tis ka kɛ zaalim.”
MAK 13
Yesu pian' Wina'am Pʋ'ʋsim Yir san'auŋ la yɛla
(Mat 24:1-2; Luk 21:5-6)
13
Yesu n da yit Wina'am Pʋ'ʋsim Yin la, ka o nya'andɔlib la yinne yɛl ye, “Pa'anna, gɔsim ban nɔk kugbɛda mɛ dɔɔd la ka ba vɛnl si'em.”
2 Ka Yesu lɛbis o ye, “Fʋ nyɛ dɔbɛdbama? Hali kugir yinne kʋ ti kpɛlim
li tiraan zuginɛɛ. Ba na lɔbi li wʋsa bas teŋin.”
Wina'am nidib namisʋg la yɛla
(Mat 24:3-14; Luk 21:7-19)
3 Yesu da zin'inɛ Olif zuor zugʋ gɔsid Wina'am Pʋ'ʋsim Yir. Ka Pita nɛ Jemes nɛ Joon nɛ Andrew ma'aa kɛɛn o san'an na.
4 Ka bu'os o ye, “Yɛlimi ti saŋkanɛ ka nɛ'ɛnam na niŋ? Ka zanbin bɔɔ na pa'al ye li saŋa paae ya ka si'el wʋsa na niŋɛ?”
5 Ka Yesu pin'ili sa'ali ba ye, “Gu'usimi, ka sɔ' da pan'asi ya ka ya dɔl suobɛ'ɛdɛ.
6 Nidib bɛdegʋ na ti nɔki m yʋ'ʋri kena ma'ad ye, ‘Manɛ an Kristo la,’ ka kɛ ka nidib bɛdegʋ dɔl suobɛ'ɛd.
7 Ya ya'a ti wʋm tanp vuud, bɛɛ tanp labaar, da kɛ ka dabiem kpɛn' yaa, bɔzugɔ asɛɛ li wʋsa niŋ. Amaa li pʋ pa'al ye dunia naar saŋa laa.
8 Buudi na zab nɛ buudi. Ka sʋ'ʋlim yinne mɛ na zab nɛ o tiraan. Ka teŋ na dam zin'is bɛdegʋ, ka kɔ'ɔm na bɛ. Nɛ'ɛŋa anɛ namisʋg la pin'ilʋg.”
9 “Gu'usimi ya mɛŋ, ka nidib na gban'e ya keŋ banɛ kad saria tuon. Ba na bʋ' ya la'asʋg dɔɔdin. Man yɛla, ya na zi'en gɔmenanam nɛ na'anam
tuon, ka tu'asi m labasʋŋ la.
10 Li anɛ tilas ye labasʋŋ la mɔɔl buudi wʋsa ni.
11 Ka ba ya'a ti gban'e ya mɔri keŋ banɛ kad saria tuon, yanam da dɛŋi fabin yanamɛ na yɛl si'ela. Amaa ya pian'ad saŋa ya'a ti paae, yanam pian'am dinɛ kɛɛn ya pʋtɛn'ɛrin na. Bɔzugɔ pian'akanɛ ka ya ye ya pian' la pʋ yiti ya mɛŋ nii, li yitnɛ Wina'am Siig Kasi la ni na.
12 “Ba'abiig na zam o ba'abiig ka ba kʋʋ o. Ka saamnam mɛ na niŋi ba biisi ala. Biis na ki'isi ba saamnam nɛ ba manam nɔya, ka kɛ ka ba kʋʋ ba.
13 Nidib bɛdegʋ na kisi ya m yʋ'ʋr zug. Ka ninkanɛ mɔdigi paae li naar la na nyɛ faangir.”
Bʋn kisa la yɛla
(Mat 24:15-28; Luk 21:20-24)
14 Ya na ti nyɛ bʋnkisa linɛ san'amid si'elnam wʋsa, ka li bɛ zin'ikanɛ pʋ nar ye li bɛɛ. (Kɛlli ka onɛ karimi li gban'e li gbin.) Banɛ bɛ Juda teŋin zɔm dʋ zuoya ni.
15 Ka ninkanɛ bɛ mɔpil zug da sigid ye o kpɛn' yinnɛ nɔk si'ela.
16 Ka ninkanɛ bɛ pɔɔgin da kun yin ye o nɔk o fuugɔ.
17 Ka dabisban la na anɛ tɔɔgʋ tis pu'apʋʋs nɛ bimanam.
18 Sɔsimi Wina'am ka li da ti niŋ waad saŋaa.
19 Tɔtita'ar na bɛ dunia ni; hali Wina'am maal dunia pin'ilʋgʋn ti paae zina, li nan zi' bɛɛ, ka kʋ maligim bɛ ya'asɛ.
20 Amaa Zugsɔb la ya'a pʋ sien dabisa la kallɛ, sɔ' naan kʋ tiliginɛɛ. Amaa nimbanɛ ka o gaans la zugʋ kɛ ka o sie dabisa la.
21 Ka sɔ' ya'a yɛl ye, “Gɔsimi ka Kristo nwa'!” bɛɛ, “Gɔsimi ka onɛ bɛ kpɛ'ɛsa la!” Yanam da siakɛ.
22 Nidib na ma' ziri ye banɛ an Kristo la ka ziri nɔdi'esidib mɛ na kena, ba na maal zanbina nɛ tʋʋmnyalima ye ba kɛ ka nimbanɛ ka Wina'am gaŋ la dɔl suobɛ'ɛd, ba ya'a na nyaŋ.
23 M dɛŋin yɛli ya si'el wʋsa. Alazug, gu'usimi.
Ninsaal Biig la lɛbig na yɛla
(Mat 24:29-31; Luk 21:25-28)
24 “Amaa tɔɔg nwa' dabisa ya'a ti gaad, winnig na lieb zibisʋg ka nwadig mɛ kʋ nie.
25 Ka nwadbibis na naan agɔla lit teŋin na. Paŋ dim banɛ bɛ agɔl na mi'im.
26 “Ka dunia nidib na nyɛ Ninsaal Biig la ka o kenna nɛ saŋgbana, nɛ paŋ tita'ar nɛ o na'am ka li nyɛɛn pil-pil.
27 O na tʋm maliaknam ka ba MAK 13–14
la'as nimbanɛ ka Wina'am gaŋ la, banɛ bɛ dunia lʋga anaasi la ni, tuon nɛ nya'aŋ nɛ dagɔbʋg nɛ datiuŋ la wʋsa.”
Kekaŋ n pa'an si'em la yɛla
(Mat 24:32-35; Luk 21:29-33)
28 “Kpansimi kekaŋ ka zamisi ya'am. Li wila ya'a ti busid vanpɔla la, ya mi' ye sigir li'el ya.
29 Ala mɛn ya ya'a nyɛ nɛ'ɛnam wʋsa ya na baŋ ye Ninsaal Biig la lɛbig li'elnɛ, hali li kʋ lɛn yuugɛ.
30 Asida ka m yɛti ya ye, zʋmaʋŋ kaŋa nwa' nidib kʋ gaadɛ, asɛɛ nɛ'ɛnam wʋsa naam.
31 Saazug nɛ dunia na gaad, amaa man pian'ad la kʋ maligim gaadɛ.
Sɔ' kae mi' Yesu lɛbig dabisir nɛ li saŋa la
(Mat 24:36-44)
32 “Nid baa yinne kae mi' dabisir la bɛɛ saŋa la. Baa maliaknam banɛ bɛ arezana ni bɛɛ Biig laa, asɛɛ Ba' la gʋllim.
33 Gu'usimi sʋ'ʋŋa ka guri bɔzugɔ, ya zi' dabisir la nɛ saŋa laa.
34 Li nwɛnɛ dau na nwiɛnd ka zaŋ o yiri gu'ul o tʋmtʋmnib ka pʋdig sɔ' wʋsa nɛ o tʋʋma, ka yɛl za'anɔgur la ye o gur.
35 “Alazug asɛɛ ka ya gur sʋ'ʋŋa bɔzugɔ ya zi' saŋkanɛ ka yidaan la na lɛb naa. O ya'a na lɛbnɛ zaam bɛɛ yʋ'ʋntisʋʋs bɛɛ nɔrakukuma win bɛɛ bɛogʋnɛɛ, sɔ' zi'.
36 Gu'usim, ka yidaan la da ti gbirigi kena nyɛ ka ya gbisida.
37 Mam yɛti ya si'el la, lin ka m yɛt nidib wʋsa, ye, ya gu'usim.”
MAK 14
Ban ieed suor ye ba gban'e Yesu la yɛla
(Mat 26:1-5; Luk 22:1-2; Jon 11:45-53)
14
Li da kpɛlimnɛ daba ayi' nɛ Kum Maliak Gaadʋg malʋŋ dabisir la, nɛ bodobodo linɛ ka ba pʋ niŋ danbin la malʋŋ dabisa la pin'ilʋg. Ka Wina'am maanmaannib kpɛɛmnam nɛ gbauŋmi'idib ieed suoya ye ba su'a gban'e Yesu kʋʋ o.
2 Ka ba yɛl ye, “Ti kʋ tʋmi li malʋŋ tiɛnr saŋa laa, ya'a ka' ala nidib na ti zabid o zug.”
Pu'a onɛ bu'oe malʋŋ kpaam niŋ Yesu zug la yɛla
(Mat 26:6-13; Jon 12:1-8)
3 Yesu da bɛ nɛ Simon onɛ an kʋkɔm la yin Betani teŋin. Ban da bɛ anina dit la, ka pu'a kena mɔr alabasta kɔlibir ka li pɛ'ɛl nɛ naad tudaari ka li ligidi zu'oe bɛdegʋ. Ka o nwa'ae kɔlibir la ka bu'oe malʋŋ kpaam la niŋ Yesu zugin.
4 Ka ninsieba banɛ bɛ anina la sʋnf duoe. Ka ba yɛl taaba ye, “Bɔ ka pu'a la san'am tudaari la wala?
5 Ba naan nyaŋi kuosini li, ka li ligidi gaadin tʋmtʋm yʋʋm mum yɔɔd, ka nɔkin ligidi la tisin nɔŋ dim.” Ka ba zɛrig pu'a la hali.
6 Ka Yesu yɛli ba ye, “Kɛllinɛ o baanlimm. Bɔ ka ya daamid o? O maalnɛ bʋnsʋŋʋ tis mam.
7 Nɔŋ dim bɛɛ ya san'an saŋa wʋsa. Dinzug saŋkan wʋsa ka ya bɔɔd ya tun'e sʋŋi ba, amaa mam kʋ bɛ nɛ ya saŋa wʋsaa.
8 On tun'e si'eli la ka o maal, o kpa'ae tudaari la niŋim ye o dɛŋi ti'ebi m niŋgbina ka ba ti mumim.
9 Asida ka m yɛti ya ye, dunia nwa' zin'ikanɛ wʋsa ka ba na ti mɔɔl labasʋŋ la, ba mɛ na yɛl pu'a la niŋ si'el la, ka li tiɛn o yɛla.”
Judas gban'e ye o na zam Yesu
(Mat 26:14-16; Luk 22:3-6)
10 Ka Judas Iskariot, onɛ an Yesu nya'andɔlib pii nɛ ayi' la nid yinne, keŋ Wina'am maanmaannib kpɛɛmnam san'an ye o zam Yesu.
11 Ban daa wʋm on yɛl si'el la ka ba sʋnf ma'ae. Ka ba siak ye ba na tis o ligidi. Ka Judas yʋ'ʋn ieed suokanɛ ka o na zam o.
Yesu di malʋŋ diib nɛ o nya'andɔlib
(Mat 26:17-25; Luk 22:7-14, 21-23; Jon 13:21-30; 1Ko 11:23-26)
12 Bodobodo Linɛ Kae Danbin Malʋŋ pin'ilʋg daar; saŋa kanɛ ka ba kɔdigid Kum Maliak Gaadʋg malʋŋ pɛ'og la, ka Yesu nya'andɔlib bu'os o ye, “Fʋ bɔɔd ye ti keŋ yaanɛ ti'eb, ka fʋ di dabisir nwa' diibɔ?”
13 Ka Yesu tʋm o nya'andɔlib ayi' ka yɛli ba ye, “Kem tempʋʋgin la, ka ya na tʋ'ʋs dau ka o ziid yʋʋr nɛ ku'om, dɔlli nɛ o.
14 Kpɛn'ɛmi yikanɛ ka o kpɛn'ɛd la, ka yɛl yidaan la ye, ‘Pa'an la ye, saam dɔɔg la bɛ yaanɛ ka mam nɛ m nya'andɔlib na di Kum Maliak Gaadʋg malʋŋ la dabisir diibɔ?’
15 O na pa'ali ya dɔtita'ar girimbisa zug. Ka si'el mɛkama bɛ anina. Ti'ebimi anina guri ti.”
16 Ka o nya'andɔlib la yii keŋ tempʋʋgin la nyɛ ka si'el mɛkama an wʋʋ Yesu yɛli ba si'em la. Ka ba ti'eb malʋŋ la ani.
17 Zaam ma'ae la, ka Yesu nɛ o nya'andɔlib pii nɛ ayi' la kena.
18 Ban zin' dit la, ka Yesu yɛli ba ye, “Asida ka m yɛti ya ye ya nid yinne onɛ dit nɛ man kpɛla na zam mam.”
19 Ka ba sʋnya san'am. Ka ba bu'osid o yinne-yinne ye, “Li anɛ mam?”
20 Ka o lɛbis ye, “Li anɛ ya nidib pii nɛ ayi' la ni yinne, onɛ nu'ugʋ tʋm sia'al man nu'ug laan la.
21 Ninsaal Biig la na kpi wʋʋ lin da sɔb Wina'am gbauŋʋn si'em la. Amaa yɛl tɔɔg bɛ onɛ zam Ninsaal Biig la zugin. Dinzug ba ya'a pʋ du'an dau kaŋaa li aan sʋm.”
Zugsɔb diib la yɛla
(Mat 26:26-30; Luk 22:14-20; 1Ko 11:23-25)
22 Ka ban daa dit la, ka Yesu nɔk bodobodo ka pʋ'ʋs Wina'am bareka ka gbin'esi tis o nya'andɔlib la, ka yɛli ba ye, “Di'em nwa' di, ka li anɛ m mɛŋ niŋgbiŋ.”
23 Ka nɔk nwam, ka pʋ'ʋs Wina'am bareka, ka tisi ba, ka ba wʋsa nuu li.
24 Ka o yɛli ba ye, “Nwa' anɛ m ziim linɛ an nɔnaari na yi nidib bɛdegʋ zug.
25 Asida ka m yɛti ya ye, m kʋ lɛn nu daam nwa' ya'asɛ, asɛɛ daakan ka li na an bʋn paal Wina'am sʋ'ʋlim ni ka m na lɛn nuu li.”
26 Ka ba yʋ'ʋm yʋʋma zun'od Wina'am, ka yi keŋ Olif zuorin.
Yesu dɛŋim pian' Pita ki'isʋg la yɛla
(Mat 26:31-35; Luk 22:31-34; Jon 13:36-38)
27 Ka Yesu yɛli ba ye, “Ya wʋsa na zɔ ka basim. Li sɔb Wina'am gbauŋʋn ye, “‘Wina'am na kʋ kɔnbkem la, ka kɔnbid la widig.’
28 Ka m ya'a ti vʋ'ʋg kumin, m na dɛŋi ya tuonnɛ keŋ Galile.”
29 Ka Pita yɛl o ye, “Hali baa ba wʋsa ya'a zɔ ka basif, man kʋ basi fɔɔ.”
30 Ka Yesu lɛbis ye, “Asida ka m yɛtif ye, yʋ'ʋŋ kaŋa, fʋ na ki'is man nɔɔr atan' ka nɔraug nyaan kaas nɔɔr ayi'.”
31 Amaa Pita lɛbis o ye, “Li ya'a pʋn anɛ ye mam nɛ fʋ la'am kpi, m kʋ maligim ki'isi fɔ.” Ka ba wʋsa mɛ yɛl ala.
Yesu n sɔs Wina'am Gesemane la yɛla
(Mat 26:36-46; Luk 22:39-46)
32 Ka ba paae zin'isi'a ka li yʋ'ʋr buon Gesemane. Ka Yesu yɛl o nya'andɔlib la ye, “Zin'inimi kpɛla ka m sɔs Wina'am.”
33 Ka dɔl Pita nɛ Jemes nɛ Joon n keŋ. Ka o sʋnf san'am bɛdegʋ. 34 Ka o yɛli ba ye, “M sʋnf san'amnɛ hali, ka li nwɛnɛ m ye m kpi nɛ. Alazug, kpɛlimmi kpɛla ka gu'usi.”
35 Ka o keŋ tuon bi'ela, ka igin teŋinɛ sɔs Wina'am ye, “Yɛl kaŋa ya'a na nyaŋi gaad ka basim, fʋn kɛl ka li gaad.”
36 Ka yɛl ye, “M Ba'a, si'el wʋsa anɛ na'ana fʋ san'an. Yisim namisʋg kaŋa bas ka kɛɛ m. La'an nɛ wala li ka'anɛ man bɔɔd si'ela, kɛl ka fʋ bɔɔdim gʋllim niŋ.”
37 Ka o lɛbi nyɛ ka o nya'andɔlib atan' la gbisid, ka o bu'os Pita ye, “Simon, fʋ gbisidnɛɛ? Fʋ kʋ nyaŋi nɛi ka li yuug bi'elaa?”
38 Ka yɛli ba ye, “Nɛi ka sɔs Wina'am, ka makir da nyaŋi yaa. Siig la bɔɔd, amaa niŋgbiŋ la ka' paŋa.”
39 Ka o lɛn lɛb ye o sɔs Wina'am, ka yɛl wʋʋ on pa'a pian' si'em la.
40 Ka lɛn lɛb na nyɛ ka o nya'andɔlib la gbis, bɔzugɔ gbɛn'um da mɔri ba hali. Ka ba zi' ban na lɛbis o si'el la.
41 Ka o keŋ ka lɛn lɛb nɔɔr atan' daan na, ka bu'osi ba ye, “Ya kpɛn vʋ'ʋsid ka gbisidaa? Li saŋa paae ya, ba zam Ninsaal Biig la ka zaŋ o niŋ tʋʋmbɛ'ɛd dim nu'usin.
42 Duomi ka ti keŋi. Gɔsimi, onɛ zam man la nwa'.”
Ba gban'e Yesu
(Mat 26:47-56; Luk 22:47-53; Jon 18:2-11)
43 On da nam pian'ad la, ka Judas onɛ an o nya'andɔlib pii nɛ ayi' la nid yinne la kpɛn paae na. Ka nidib bɛdegʋ dɔl o mɔr sʋ'ʋraad nɛ balaya. Ba da anɛ banɛ ka Wina'am maanmaannib kpɛɛmnam nɛ gbauŋmi'idib nɛ kpɛɛmnam la tʋm na.
44 Onɛ da zam o la pʋn dɛŋi pa'ali ba ye, “On ka m muak o nɔɔr la, onɛ la. Gban'ami nɛ o mɔri keŋ ka gur o.”
45 Ka Judas paae na ka kpɛn keŋ Yesu san'an yɛl o ye, “Pa'anna!” Ka muak o nɔɔr. 46 Ka ba gban'e o nɛ paŋ. 47 Ka nimbanɛ da zi'e kpi'e o la yinne fuoe o sʋ'ʋraugʋ kie Wina'am maanmaan kpɛɛm tʋmtʋm yinne tʋbiri fi'ig.
48 Ka Yesu bu'osi ba ye, “Ya kena nɛ sʋ'ʋraad nɛ balaya ye ya gban'am wʋʋ onɛ an na'ayiiga?
49 Daar wʋsa m daa bɛ nɛ ya Wina'am pʋ'ʋsim Yin, pa'annɛ ya ka ya daa pʋ gban'e ma. Amaa lin da sɔb Wina'am gbauŋʋn si'em la, sɛɛ li niŋ amɛŋa.”
50 Ka o nya'andɔlib la wʋsa zɔ ka bas o.
51 Dasaŋ sɔ' da yɛ fuug yinne ma'aa dɔl Yesu ka ba ye ba gban'e o.
52 Ka
o bas o fuug la ka zɔ biel.
Yesu bɛ maanmaannib kpɛɛmnam tuon
(Mat 26:57-68; Luk 22:54-55, 63-71; Jon 18:12-14, 19-24)
53 Ka ba mɔr Yesu keŋ Wina'am maanmaan kpɛɛm la yin. Ka Wina'am maanmaannib kpɛɛmnam nɛ kpɛɛmnam nɛ gbauŋmi'idib wʋsa la'as na. 54 Ka Pita bɛ nya'aŋi dɔlli paae Wina'am maanmaan kpɛɛm la yinne kpɛn' zakin, ka zin' nɛ tʋmtʋmnib la ʋʋsid bugum.
55 Ka maanmaannib kpɛɛmnam nɛ kpi'emnam banɛ ɛɛnti gban'ad Jew dim yɛla la wʋsa ieed nimbanɛ na ma' ye Yesu tʋm tʋʋmbɛ'ɛd, ka ba nyɛ suori kʋʋ o, amaa ba da pʋ nyɛɛ o tʋʋmbɛ'ɛdɛ.
56 Ka ziri kasɛtib bɛdegʋ ma' tis Yesu. Ka ban ma' si'el la pʋ dɔl taabaa.
57 Ka ninsieba duoe ma' ye, 58 “Ti wʋm ka o ye, ‘M na nwa'ae Wina'am pʋ'ʋsim yikan ka ninsaal mɛ' la bas, ka mɛɛ li daba atan' pʋʋgin. Ka li kʋ an ninsaal mɛɛbɔ.’”
59 Hali ban mɛŋi yɛl si'el la pʋ dɔl taabaa.
60 Ka Wina'am maanmaan kpɛɛm duoe zi'enɛ ba tuon ka bu'os Yesu ye, “Fʋ pʋ mɔr lɛbisʋgi na lɛbis ban yɛti fʋ yɛla si'em laa?”
61 Ka o sin ka pʋ lɛbis si'ela.
Ka kpɛɛm la lɛm bu'os o ye, “Fʋnɛ an Kristo onɛ an Wina'am kanɛ an Albareka Sɔb la Biig laa?”
62 Ka Yesu lɛbis ye, “Ɛɛn manɛ la.” Ka ye, “Ya na nyɛ Ninsaal Biig la ka o zin' Wina'am onɛ sʋ'oe paŋ la datiuŋ, ka kenna nɛ saŋgbana.”
63 Ka kpɛɛm la aaɛn o mɛŋ fuug ka yɛl ye, “Ti lɛm bɔɔd kasɛtib ye ti niŋ bɔ?
64 Ya wʋm on tʋ Wina'am si'em.” Ka bu'osi ba ye, “Ya gban'e li wala?” MAK 14–15
Ka ba wʋsa gban'e ye o nar nɛ kum.
65 Ka ba sieba tʋbis nintɔɔndi mad o ka ligil o nindaa ka nwɛ' o ka yɛl o ye, “Yɛlim onɛ nwɛ'ɛf la.” Ka tʋmtʋmnib banɛ gur o la di'e o, ka bʋ' o.
Pita ki'is ye o zi' Yesu la yɛla
(Mat 26:69-75; Luk 22:56-62; Jon 18:15-18, 25-27)
66 Pita da nam bɛ zakin ka Wina'am maanmaan kpɛɛm tʋmtʋm pu'ak kena
67 nyɛɛ o ka o ʋʋsid bugum, ka o gɔs o kii, ka yɛl o ye, “Fʋ mɛ daa bɛ nɛ Yesu onɛ yi Nazaret la.”
68 Ka Pita ki'is ye, “M zi' o, ka mɛ pʋ gban'e fʋ pian'ad la gbinnɛ.” Ka Pita yi zi'en za'anɔɔrin. Ka nɔraug kaas.
69 Ka bipuŋ la lɛn nyɛɛ o, ka yɛl banɛ zi'e ani la ye, “Dau kaŋa anɛ Yesu nid yinne.”
70 Ka Pita lɛn ki'is. Ka li pʋ yuugɛ, ka nimbanɛ zi'e la yɛl Pita ye, “Sida fʋ anɛ ba nid yinne. Fʋ mɛ yinɛ Galile na.”
71 Ka Pita yɛl ye, “M pɔya ye m zi' dau kanɛ ka ya pian'ad o yɛla nwaa.”
72 Ani yim, ka nɔraug lɛn kaasi paas nɔɔr ayi'. Ka Pita tiɛn Yesu pa'a yɛl o si'el la ye, “Fʋ na ki'is ye fʋ zi'ima nɔɔr atan' ka nɔraug nyaan kaas nɔɔr ayi'.” Ka o mɔdigi gʋ'ʋŋ, ka kaas.
MAK 15
Yesu n lɛbis si'em Pailet tuon la yɛla
(Mat 27:1-2, 11-14; Luk 23:1-5; Jon 18:28-38)
15
Bɛogʋ nie la, ka Wina'am maanmaannib kpɛɛmnam la nɛ teŋ la kpɛɛmnam nɛ gbauŋmi'idib nɛ nimbanɛ da la'am bɛ la'asʋg la pʋʋgin la, gban'e nɔɔr yinne. Ka ba lɔ Yesu nɛ nwiisi mɔr o keŋ Pailet san'an.
2 Ka Pailet bu'os Yesu ye, “Fʋnɛ an Jew dim na'ab laa?”
Ka o lɛbis ye, “Li anɛ wʋʋ fʋn yɛl si'em la.”
3 Ka maanmaannib kpɛɛmnam nɔk yɛla bɛdegʋ ziil o.
4 Ka Pailet lɛm bu'os Yesu ya'as ye, “Fʋ kʋ lɛbis si'elaa? Gɔsim yɛlbama wʋsa ka ba ziilif nwa'.”
5 La'an nɛ wala Yesu pʋ lɛbis si'ela. Ka li lidig Pailet.
Ban daa kʋʋs Yesu kum la yɛla
(Mat 27:15-26; Luk 23:13-35; Jon 18:39–19:16)
6 Kum Maliak Gaadʋg malʋŋ tiɛnr saŋa wʋsa, Pailet da ɛɛnti yis sanrega nid yinne, onɛ ka nidib la bɔɔd.
7 Saŋkan la, nid yinne da bɛ sanrega ni ka o yʋ'ʋr buon Barabbas. On nɛ ninsieba da la'as taaba dam teŋ, ka kʋ nid, alazug ka ba gban'e ba.
8 Ka nidib bɛdegʋ duoe kɛn Pailet san'an na sɔs o ye, “Niŋim nwɛnɛ fʋn ɛɛnti niŋid si'em la tisi ti.”
9 Ka o bu'osi ba ye, “Ya bɔɔd ye m yis Jew dim na'ab la tisi yaa?”
10 Bɔzugɔ, o baŋ ye li anɛ nɛnnim zug ka ba gban'e o na.
11 Amaa maanmaannib kpɛɛmnam la nya'as nidib bɛdegʋ ka ba yɛl Pailet ye, “Yisim Barabbas n tisi ti, ka kɛ Yesu.”
12 Ka Pailet lɛm bu'osi ba ya'as ye, “Dinzugɔ m na niŋ dau kanɛ ka ya buon Jew dim na'ab la wala?”
13 Ka ba tans ye, “Kpan'am o tabil dapuudir zug!”
14 Ka Pailet bu'osi ba ye, “O niŋ bɔ ka li an tʋʋmbɛ'ɛdɛ?” Ka ba kpɛn tansidi paasid ye, “Kpan'am o tabil dapuudir zug!”
15 Ka Pailet n bɔɔd ye o niŋ linɛ na malis nidib la sʋnya la zug ka o yis Barabbas n tisi ba. Ka kɛ ka ba fieb Yesu, ka tisi ba nɔɔr ye ba kpa' o tabil dapuudir zug.
Ban yaal Yesu la yɛla
(Mat 27:27-31; Jon 19:2-3)
16 Ka soogianam mɔr Yesu n kpɛn' gɔmena la zakin, ka buol soogianam banɛ kpɛlim la, ka ba wʋsa la'as.
17 Ka ba nɔk fuzɛn'ugʋ yɛɛl o, ka nɔk gɔn'ɔsi ʋg na'am zupibigi pid o. 18 Ka pin'ili pʋ'ʋsid o, ka yɛt ye, “Naa, Jew dim na'aba.”
19 Ka ba zaŋ balaari nwɛ' o zug, ka tʋbis nintɔɔndi mad o, ka igin o tuon.
20 Ka ban yaal o naae la, ka yɛɛg fuzɛn'ug la ka lɛbis o mɛŋ fuudi yɛɛl o. Ka mɔr o yii keŋ ye ba kpa' o tabil dapuudir zug.
Ba kpa' Yesu kum dapuudir zug
(Mat 27:32-44; Luk 23:26-43; Jon 19:17-27)
21 Dau sɔ' da bɛ Sairene teŋin ka o yʋ'ʋr buon Simon. Ka o biis an Alekzanda nɛ Rufus. O da yinɛ teŋkpɛŋi ken tempʋʋgin. On ka ba da
mugus ye o zi Yesu kum dapuudir la.
22 Ka ba mɔr Yesu keŋ zin'ikanɛ ka ba buon Golgota, li gbin anɛ zuwauŋ zin'ig.
23 Ka ba tis o daam ka li gɛndig nɛ mir, ka o zan'as nuub.
24 Ka ba kpa' o tabil dapuudir zug. Ka pʋdig o fuud la, ka bʋgʋlʋm ye ba baŋ sɔ' wʋsa na di'e fusi'a.
25 Li da anɛ bɛogʋn, kɛref awai saŋa, ka ba kpa' o.
26 Ka ba sɔb linɛ zug ka kpa' o la ye, “Jew dim na'ab.”
27 Ba mɛ da kpa' na'ayiis ayi' paas o zug. Ka yinne bɛɛ o datiuŋ. Ka yinne mɛ bɛɛ o dagɔbʋg.
28 Ka Wina'am gbauŋ yɛlʋg la niŋ amɛŋa ye, “Ba gɛlig o paas tʋʋmbɛ'ɛd dimin la.”
29 Ka banɛ gat wʋsa tʋ'ʋd o ka giridi ba zut ka yɛt ye, “Ha haa, fʋ yɛt ye, fʋ na nwa'ae Wina'am Pʋ'ʋsim Yir la, ka lɛm mɛɛ li daba atan' pʋʋgin.
30 Tiligimi fʋ mɛŋ, ka sig dapuudir la zug na.”
31 Ala mɛn ka maanmaannib kpɛɛmnam nɛ gbauŋmi'idib la mɛ pɔ'ɔg o yɛt taaba ye, “O daa tilig sieba, ka kʋ nyaŋi tilig o mɛŋa.
32 Fʋ ya'a anɛ Kristo onɛ an Israel dim na'ab la, fʋn sigim dapuudir la zug nannanna na, ka ti nyɛ ka siak.” Ka banɛ ka ba mɛ kpa' ba dapuuda zug la, mɛ tʋ'ʋd o.
Yesu kum la yɛla
(Mat 27:45-56; Luk 23:44-49; Jon 19:28-30)
33 Ka lin ti paae nintaŋ tisʋʋs la, ka zin'ig wʋsa lieb zibisʋg, hali ti paae nintaŋ gbɛligir.
34 Saŋkan ka Yesu tans nɛ kʋkɔtita'ar ye, “Eloi, Eloi lammaa sabaktani.” Li gbin anɛ, “M Wina'am, m Wina'am bɔ ka fʋ basi ma?”
35 Ka banɛ zi'e ani la sieba, wʋm ka yɛl ye, “Kɛlisimi! O buoni Elaja.”
36 Dau yinne zɔɔ keŋ zaŋ sʋʋsʋ lɔs danmi'isʋgʋn niŋ kikan'ar zugʋ ʋki
tis Yesu ye, o num, ka yɛt ye, “Guri ka ti gɔs ye Elaja na kena sigis oo.” 37 Ka Yesu tans nɛ kʋkɔtita'ar ya'as ka nyaan kpi.
38 Ka fuug linɛ bɛŋ Wina'am pʋ'ʋsim Yin la buak zugin hali ti paae teŋin zin'isa ayi'.
39 Ka soogia kpɛɛm onɛ zi'e Yesu tuon la, nyɛ on kpi si'em la, o yɛl ye, “Li anɛ amɛŋa ye dau nwa' sid anɛ Wina'am Biig.”
40 Pu'a sieba mɛ da zi'e lallisa gɔsid. Mɛɛri onɛ an Magdalen la da bɛ ba sʋʋgin, nɛ Mɛɛri onɛ an Jemes biig la nɛ Joses ma, nɛ Salomɛ.
41 Yesu da bɛ Galile la, banɛ da dɔl o ka sʋŋid o. Pu'ab bɛdegʋ banɛ mɛ da biel o keŋ Jerusalem la mɛ da bɛɛ anina.
MAK 15–16
Ban mum Yesu la yɛla
(Mat 27:57-61; Luk 23:50-56; Jon 19:38-42)
42 Zaam da bɔɔd ma'ar ka li an Vʋ'ʋsʋm Daar ti'ebʋg la,
43 ka Josef onɛ yi Arimatea teŋin ka an teŋ la tuongatib la nid yinne, ka mɔr yʋ'ʋsʋŋ ka mɛ an onɛ gu'usid Wina'am na'am la kenna la, kpɛ'ɛŋ o sʋʋnr, ka keŋ Pailet san'anɛ sɔs Yesu niŋgbiŋ la.
44 Ka li lidig Pailet on wʋm ye Yesu pʋn kpi sa la. Ka o buol soogia kpɛɛm la, ye o bu'osi baŋ ye, o sid kpiya.
45 Ka soogia kpɛɛm la yɛl o ye, o kpiya sa, ka Pailet bas Josef nɔɔr, ka o zaŋ niŋgbiŋ la.
46 Ka o da' fupielig, ka sigis niŋgbiŋ la dapuudir la zug, ka nɔk fuug la vil o, ka mɔr o keŋ mum yaʋg kanɛ ka ba da kibig tampiing sakpidirin la. Ka bilig kugtita'ari ligil yaʋg la nɔɔr.
47 Mɛɛri onɛ an Magdalen, nɛ Joses ma Mɛɛri da nyɛ zin'ikanɛ ka ba mum o la.
MAK 16
Yesu kum vʋ'ʋgir la yɛla
(Mat 28:1-8; Luk 24:1-12; Jon 20:1-10)
16
Jew dim Vʋ'ʋsʋm daare da gaad la, Mɛɛri onɛ an Magdalen nɛ Jemes ma Mɛɛri, nɛ Salomɛ da da' bʋnnyubisa dinɛ nwɛnɛ tudaari, ye ba keŋ mis Yesu niŋgbiŋ la.
2 Ka Alasid daar bɛkɛung, ka ba ken yaʋgʋn la,
3 ka bu'osid taaba suorin ye, “Anɔ'ɔnɛ na bilig kugir la yaʋg la nɔɔrin tisi ti?”
4 Ka ba gɔdigi gɔs ka kugir kanɛ daa zu'oe hali la pʋn bilig sa.
5 Ka ba kpɛn' yaʋgʋn la, ka nyɛ dasaŋ, ka o yɛ fupieligi zin' datiuŋ. Ka li lidigi ba.
6 Ka o yɛli ba ye, “Da kɛ ka li lidigi yaa. M mi' ye ya ieednɛ Yesu onɛ yi Nazaret na la, on ka ba daa kpa' dapuudir zug la. O vʋ'ʋg kumin, O ka' kpɛlaa. Gɔsim zin'ikanɛ ka ba daa digil o la.
7 Amaa kem yɛl o nya'andɔlib la nɛ Pita ye, ‘O na dɛŋi ya tuonnɛ keŋ Galile. Ani ka ya na nyɛɛ o, wʋʋ on daa yɛli ya si'em la.’”
8 Li da lidigi pu'ab la nɛ, ka dabiem kpɛn' ba hali ka ba zɔɔ yi yaʋgʋn la, ka pʋ yɛl sɔ' si'ela.
Yesu n nie o mɛŋ ninsieba san'an la yɛla
(Mat 28:9-10; Jon 20:11-18)
9 Yesu da vʋ'ʋg kumin la, Alasid daar bɛkɛung, o da nie o mɛŋi pa'al Mɛɛri Magdalen onɛ ka o da kad kikiris ayɔpɔi o ni la yiiga.
10 Ka o keŋ yɛl nimbanɛ daa dɔl Yesu la. Ka ba fabin ka kaasid.
11 Ban daa wʋm ye Yesu vʋ'ʋg ya ka Mɛɛri onɛ yi Magdalen na la nyɛɛ o la, ba da pʋ siaki lii.
Yesu nie o mɛŋi pa'al nya'andɔlib ayi'
(Luk 24:13-35)
12 Lin nya'aŋ ka Yesu tiak o mɛŋ ka nie pa'al nidib ayi' banɛ ken teŋkpɛŋ la.
13 Ka ba lɛbi yɛli ba taaba. Ka ba pʋ siaki lii.
Yesu nie o mɛŋi pa'al nya'andɔlib pii nɛ yinne la
(Mat 28:16-20; Luk 24:36-49; Jon 20:19-23; Tʋm 1:3-8)
14 Lin nya'aŋ, ka o nya'andɔlib pii nɛ yinne la dit, ka o nie o mɛŋi pa'ali ba. Ka zab nɛ ba, ban daa pʋ niŋ yadda, ka maal zukpi'euŋ ka pʋ siak banɛ daa nyɛɛ o ka o vʋe la pian'ad la.
15 Ka yɛli ba ye, “Kemi dunia zin'ig la wʋsa mɔɔl labasʋŋ la tis nidib wʋsa.
16 Ka on mɛkama niŋ yadda, ka di'e Wina'am ku'om sʋʋb na nyɛ faangir. Amaa on wʋsa pʋ niŋ yadda Wina'am na kʋʋs o yɛla bɛ'ɛd.
17 Banɛ niŋ yadda la na nyaŋi tʋm tʋʋmnyalim bama. Ba na kad kikirisi yisid man yʋ'ʋr zug, ka na pian'ad pian'azʋna.
18 Ba na gban'e wiigi bɛɛ nu yabid ka li kʋ niŋi ba si'ela. Ba na nɔki ba nu'usi pa'al ban'adnam zut, ka ba nyɛ
laafi.”
Yesu n dʋ arezana ni la yɛla
(Luk 24:50-53; Tʋm 1:9-11)
19 Zugsɔb Yesu n da tu'asi ba naae la, ka Wina'am ziank o keŋ arezana ni. Ka o zin'in o datiuŋ.
20 Ka o nya'andɔlib la keŋ mɔɔl labasʋŋ la zin'is wʋsa. Ka Zugsɔb la tʋm nɛ ba, ka kɛ ka ba tʋm tʋʋmnyalima ka li pa'al ye ba mɔɔlʋg la an sida.
Luk
Gbauŋ nwa' yɛla
Luk da di'es labaya bɛdegʋ ye li sʋŋ o ka o nyaŋi sɔb Yesu nyɔvʋr bɛllim nɛ o tʋʋma yɛla. O pa'an ye Yesu an faangid onɛ ka Wina'am da kaanbi zi'el Israel nidib la, ka lɛn an dunia nidib la wʋsa faangid. O pa'an ye Siig Kasi la tʋm nidib bɛllimin, ka Wina'am mɛ sʋŋid nidib nɛ ba bɔɔdim kɔn'ɔb-kɔn'ɔb, ba ya'a anɛ arezak dim bɛɛ nɔŋ dim bɛɛ dau bɛɛ pu'a bɛɛ ninsʋma bɛɛ nimbɛ'ɛdnama.
LUK 1
Gbauŋ la sɔbir yɛla
| 1 |
Naa, ninvʋsʋŋ Teofilus, nidib bɛdegʋ kpɛ'ɛŋi ba mɛŋi sɔb bʋn linɛ wʋsa tʋmi ti san'an
2 nwɛnɛ banɛ daa bɛ pin'ilʋgʋn la nyɛ si'el nɛ ba nini ka mɔɔl labaar la. 3 Ka mam mɛ ma'ae m mɛŋi bu'osi baŋ yɛlbama sʋ'ʋŋa ba pin'ilʋgʋn la zug ka m tɛn'ɛs ka li an sʋm ye m sɔbi tiɛn fʋ li yɛla nwɛnɛ lin nar si'em. 4 M niŋid nɛ'ɛŋa ye fʋ baŋ ye, yɛlbanɛ wʋsa ka ba pa'alif la anɛ sida.
Maliak kɛn Zakaria san'an na
5 Saŋkanɛ ka Herod da di na'am Juda teŋin la, dau sɔ' da bɛɛ anina ka o yʋ'ʋr buon Zakaria. O da anɛ Wina'am maanmaan, ka an Abija nid. Ka o pu'a yʋ'ʋr buon Elizabet ka an Aaron onɛ da an Wina'am maanmaan la tuŋ nid.
6 Ba da anɛ pʋpielim dim Wina'am tuon, ka di'ed Wina'am nɔɔr nɛ o nɔzi'ela wʋsa, ka ka' taala.
7 Ba da pʋ mɔr biiga, bɔzugɔ Elizabet da anɛ kʋndu'ar, ka babayi' la wʋsa mɛ kʋdig hali.
8 Ka Zakaria nɛ o maanmaan taaba saŋa paae ye ba tʋm Wina'am Pʋ'ʋsim Yir tʋʋma.
9 Maanmaannib daa ɛɛnti bʋgʋlʋmnɛ gaŋ onɛ na nyu'oe tudaari la. Ban da bʋgʋlʋm la, ka li lu Zakaria zug ye o kpɛn' Wina'am malʋŋ dɔɔgin nyu'oe tudaari tis Wina'am.
10 Ka tudaari la nyu'or saŋa paae la, ka nidib bɛdegʋ kpɛlim yiŋi sɔsid Wina'am.
11 Ka Zugsɔb maliak nie o mɛŋi pa'al Zakaria maan zin'ikanɛ ka ba nyu'od tudaari la datiuŋ.
12 Ka Zakaria nyɛɛ o la, ka yirig hali, ka dabiem kpɛn' o.
13 Ka maliak la yɛl o ye, “Zakaria, da zɔt dabiem, bɔzugɔ Wina'am wʋmi fʋ sɔsʋg. Fʋ pu'a Elizabet na du'a biribiŋ, ka fʋ na pʋd o yʋ'ʋr ye Joon.
14 O na kɛ ka ya paam sumpielim nɛ sumalisim bɛdegʋ. Ka nidib bɛdegʋ na mɔr sumalisim biig la du'am zug.
15 Ka o na lieb nintita'ar Zugsɔb san'an, ka kʋ nu daam bɛɛ dankpi'euŋɔ. Wina'am Siig Kasi na pɛ'ɛl o, hali o du'am saŋa zaŋi ken sa. 16 Ka o na mɔr Israel nidib bɛdegʋ lɛbi ba Zugsɔb san'an na,
17 ka na dɛŋ Zugsɔb la tuon, ka mɔr Wina'am Siig nɛ paŋ kanɛ ka Wina'am nɔdi'es Elaja da pʋn mɔr la. O na maal saamnam nɛ ba biis yɛla, ka kɛ ka nimbanɛ ki'isid Wina'am nɔɔr la lieb pʋpielim nɛ ya'am dim, ka kɛ ka Zugsɔb nidib la ti'eb ka guri ba Zugsɔb.”
18 Ka Zakaria bu'os maliak la ye, “M na niŋ wala siak nwa'? Bɔzugɔ man nɛ m pu'a wʋsa kʋdignɛ.”
19 Ka maliak la lɛbis o ye, “Man yʋ'ʋri buon Gabirel, onɛ zi'e Wina'am san'an la. Ka onɛ tʋmim na ye m pian' tisif ka yɛlif labasʋŋ nwa'. 20 Gɔsima, fʋ na lieb gik, ka kʋ tun'e pian'ada, asɛɛ lin wʋsa ka m yɛlif la ti niŋi naae, bɔzugɔ fʋ pʋ niŋim pian'ad la yaddaa. Li saŋa ya'a paae li na niŋ amɛŋa.”
21 Nidib la daa gur Zakaria yiib na, ka bɔɔd ye ba baŋ linɛ kɛ ka o yuug Wina'am Pʋ'ʋsim Yin la.
22 Ka on yina la, o pʋ tun'e pian'ada. Ka ba baŋ ye Wina'am nie bʋnsi'a tis o Pʋ'ʋsim Yin la. Ka o gigilim ka pa'annɛ ba nɛ nu'us.
23 Ka o tʋʋma saŋa daa naae la, ka o kul yin.
24 Ka lin nya'aŋ la, o pu'a Elizabet daa tʋk pʋʋg, ka su'a li nwadis anu, ka pʋ yɛl sɔ'. O daa yɛl ye,
25 “Nwa' anɛ Zugsɔb la tʋʋma, onɛ yʋ'ʋn gɔsim yɛla ka yisim nyan nidib sʋʋgin.”
Maliak kɛn Mɛɛri san'an na
26 Ka Elizabet pʋʋg la daa an nwadis ayuobʋ la, Wina'am daa lɛn tʋm maliak Gabirel Nazaret, teŋ kanɛ bɛ Galile sʋ'ʋlimin la,
27 ye o kem pu'asadir onɛ nan zi' dau san'an. O anɛ Josef pu'a-ɛliŋ, ka o yʋ'ʋr buon Mɛɛri. Josef anɛ na'ab David yaaŋ.
28 Ka maliak la keŋ Mɛɛri san'anɛ pʋ'ʋs o ye, “Nɛ fʋ zusʋŋ. Zugsɔb la bɛ nɛf, ka niŋi fʋ zug yɛlsʋm.”
LUK 1
29 Mɛɛri daa wʋm Maliak la yɛl si'el, li daa daam o nɛ ka dabiem kpɛn o, ka o tɛn'ɛsid ye, bɔ pʋ'ʋsim nwa'?
30 Ka maliak la yɛl o ye, “Mɛɛri, da zɔt dabiem, ka fʋ mɔr yɛlsʋm Wina'am san'an.
31 Gɔsima, fʋ na tʋk pʋʋgʋ du'a biribiŋ. Ka fʋ na pʋd o yʋ'ʋr ye Yesu. 32 O na ti an nintita'ar. Ka ba na buol o ye, Wina'am Onɛ Gaad Si'el Wʋsa la Biig. Ka Zugsɔb Wina'am la na tis o, o yaab David na'am gbauŋ.
33 O na niŋ Jakob yaas na'ab, saŋa linɛ ka' naarɛ. Ka o na'am saŋa kʋ mɔr bɛnnɛ.”
34 Ka Mɛɛri bu'os maliak la ye, “Man nan zi' dau la, m ye m niŋ wala tʋk pʋʋga?”
35 Ka maliak la lɛbisi yɛl o ye, “Siig Kasi na sigi fʋ zugin na, ka Wina'am Onɛ Gaad Si'el Wʋsa la paŋ na bɛɛ fʋ ni. Dinzug, pʋpielim bikanɛ ka fʋ na du'a la, ba na buol o ye Wina'am Biig.
36 Gɔsima, fʋ du'ad Elizabet, onɛ ka ba ye o anɛ kʋndu'ar la tʋk biribiŋ pʋʋg nwadis ayuobʋ nwana, la'an nɛ on an pu'anya'aŋ la. 37 Bɔzugɔ si'el kae ka Wina'am kʋ nyaŋi maalɛ.”
38 Ka Mɛɛri lɛbis ye, “Man anɛ Wina'am tʋmtʋm pu'ak. Kɛl ka li niŋ ala tisim wʋʋ fʋn yɛl si'em la.” Ka maliak la bas o ka keŋ.
Mɛɛri keŋ ye o kaae Elizabet
39 Ka dabisban ni, ka Mɛɛri duoe tɔ'ɔtɔ keŋ Juda sʋ'ʋlim linɛ an kʋkʋna teŋ la. 40 Ka o paae kpɛn' Zakaria yinne pʋ'ʋs Elizabet.
41 Ka on wʋm pʋ'ʋsʋg la, ka biig la duoe o pʋʋgin ka Wina'am Siig Kasi pɛ'ɛl Elizabet,
42 ka o tans ye, “Fʋ mɔr albareka pu'ab sʋʋgin. Bikanɛ ka fʋ na du'a la na an albareka biig.
43 Bɔzug ka fʋn onɛ aan m Zugsɔb ma la kena ye fʋ kaae mam?
44 Gɔsima, man wʋmi fʋ pʋ'ʋsʋg la, bikanɛ bɛɛ m pʋʋgin la duonɛ nɛ sumalisim.
45 Albareka bɛ nɛ fʋn onɛ niŋ yadda ye Wina'am yɛl si'el la wʋsa sid na maal.”
Mɛɛri yʋ'ʋm yʋʋma zun'e Wina'am la
46 Ka Mɛɛri yɛl ye,
“M zun'od Wina'am yʋ'ʋr nɛ m sʋʋnr wʋsa.
47 M mɔr sumalisim, Wina'am onɛ aan m faangid la zug,
48 bɔzugɔ o tiɛnd man kanɛ aan o tʋmtʋm pu'ak tadʋŋ la yɛla.
Lin yi nannanna ken sa, zʋmaana wʋsa na buonim ye albareka sɔb.
49 Wina'am onɛ mɔr paŋ la maal bʋnsʋŋ tita'ari tis man.
O yʋ'ʋr anɛ yʋ'ʋsʋŋ.
50 Ka o zɔt nimbaanlig nɛ banɛ zɔt o la zʋmaana wʋsa ni,
51 ka o nu'ug tʋm tʋʋm titada, ka widig nyɛɛsim dim nɛ ba nyɛɛsim pʋtɛnda,
52 ka yis na'abanɛ mɔr paŋi ba na'am gbana zut, ka dʋ'ʋs tadimnam,
53 ka diis banɛ kɔ'ɔm zabid la nɛ disʋma, ka ba tig, ka kɛ ka kpan'am dim lɛb nu'uzaalis.
54–55 O pʋ tam nɔzi'elkanɛ ka o da tisi ti yaanam laa, amaa ka kena ye o sʋŋ o tʋmtʋm Israel, ka tiɛnd o nimbaanlzɔɔr nɛ Abraham nɛ o yaas la wʋsa saŋkanɛ ka' bɛnnɛ.”
56 Ka Mɛɛri daa bɛ nɛ Elizabet paae nwadis atan', ka lɛbi kul o yin.
Joon onɛ sʋʋd nidib Wina'am ku'om la yɛla
57 Elizabet du'am saŋa da paae la, ka o du'a biribiŋ.
58 Ka o kpi'es nɛ o du'adib wʋm ye Zugsɔb la zɔɔ o nimbaanlig bɛdegʋ. Ka ba wʋsa maal sumalisim nɛ o.
59 Ka daba anii daar la, ka ba kena ye ba kpɛn'ɛs biig la baŋʋ, ka gban'e ye ba zaŋ o ba' Zakaria yʋ'ʋri pʋd o.
60 Amaa o ma yɛl ye, “Ayei, o yʋ'ʋr na anɛ Joon.”
61 Ka ba lɛbis ye, “Fʋ du'adib baa yinne kae ka o yʋ'ʋr buon alaa.”
62 Ka ba bu'os biig la ba' nɛ nu'us ye ba baŋ on bɔɔd ye ba pʋd biig la yʋ'ʋsi'a.
63 Ka o pa'ali ba nɛ nu'ug ye ba tis o si'el ka o sɔb. Ka o di'e sɔb ye, “O yʋ'ʋr anɛ Joon.” Ka li lidigi ba wʋsa.
64 Ka anina yim ka o zilim lak, ka o ya'ae o nɔɔri pian'ad Wina'am yʋ'ʋr.
65 Ka dabiem kpɛn' ba kpi'es la wʋsa. Ka labakaŋa yadig Juda kʋkʋna teŋ la wʋsa.
66 Ka banɛ wʋsa daa wʋmi li yɛla la da tɛn'ɛsid ka bu'osid ye, “Bikaŋa na ti aan anɔ'ɔnɛ?
Bɔzugɔ Zugsɔb la nu'ug bɛɛ o ni.”
Zakaria di'e Wina'am pian'adi tis nidib la
67 Ka Wina'am Siig Kasi kpɛn' biig la ba' Zakaria ni. Ka o di'e Wina'am
nɔɔri yɛl ye,
68 “Kɛlli ka ti zun'e Wina'am onɛ an Israel Zugsɔb la yʋ'ʋr,
LUK 1–2
bɔzugɔ o kena ye o faaɛn o nidib ka tisi ba yɔlisim.
69 O tisi ti Faangid tita'ar onɛ yii o tʋmtʋm David gbinnin na la,
70 wʋʋ on da pian' tis o nɔdi'es sʋma banɛ da bɛ kʋdimin sa,
71 ye, o na faaɛn ti, ti bi'emnam nɛ banɛ kisi ti la nu'usin.
72 Ala ka o pa'al o nimbaanlzɔɔr nɛ ti yaanam, ka tiɛn o nɔzi'elʋg nɛ ba.
73 Li anɛ pɔkanɛ ka o daa pɔ nɛ ti yaab Abraham 74 ye o na faaɛn tii ti bi'emnam nu'usin, ka kɛ ka ti tʋm o tʋʋma, ka dabiem kae la.
75 Ala ka ti na bɛɛ o san'an nɛ kasi nɛ pʋpielim ti nyɔvʋr bɛn wʋsa.
76 Ka fʋn onɛ aan m biig nwa', ba na buonif ye, Onɛ Gat Si'el wʋsa la nɔdi'es, bɔzugɔ fʋ na dɛŋ tuon ye fʋ maal suori tis Zugsɔb la.
77 Ka fʋ na yɛl nidib la ye
Wina'am na faaɛn ba, ka yisi ba tʋʋmbɛ'ɛdi bas.
78 Li anɛ Wina'am nimbaanlzɔɔr la zug ka o yɛlsʋm daar na nie nyain
79 tis banɛ bɛ likin nɛ banɛ ka kum kpɛn'ɛsidi ba dabiem la; ka pa'ali ti suokanɛ ka ti na dɔl ka nyɛ sumbʋgʋsʋm.”
80 Ka biig la nɔbig, ka mɔr ya'am nɛ siig la paŋ, ka bɛ mɔɔgin hali ti
paae saŋkanɛ ka o yis o mɛŋ paalʋ ni Israel dim san'an.
LUK 2
Yesu Kristo du'am yɛla
(Mat 1:18-25)
| 2 |
Saŋkan la, Room na'ab Siiza Ogestus da tis nɔɔr ye ba sɔb nidib wʋsa yʋda.
2 Li da anɛ yiiga nidib yʋda sɔb, saŋa kan ka Kuirinius da an Siriya gɔmena.
3 Ka nidib wʋsa kuli ba mɛŋ teŋin ye ba sɔbi ba yʋda.
4 Ka Josef mɛ yi Nazaret, Galile sʋ'ʋlim, keŋ Na'ab David teŋ du'adig linɛ an Betilehem ka bɛ Juda sʋ'ʋlim la, bɔzugɔ o anɛ Na'ab David yaaŋ. 5 On nɛ o pu'a-ɛliŋ Mɛɛri keŋ ye ba sɔbi ba yʋda. Saŋkan la ka Mɛɛri mɔr pʋʋg.
6 Ban nam bɛ Betilehem la, ka o du'am dabisir paae.
7 Ka o du'a o biribiŋ kpɛŋ, ka vil biig la nɛ fuugʋ digil o kɔnbid yam daka pʋʋgin, bɔzugɔ fal daa kae saam yin la ka ba na gbɛɛn.
Kɔnbkemnib nɛ maliaknam la yɛla
8 Ka teŋ kan ni, kɔnbkemnib daa guri ba kɔnbid yʋ'ʋŋ kan la,
9 ka Zugsɔb maliak sigi ba san'an na. Ka Zugsɔb na'am paŋ nie ba san'an nyain,
10 ka dabiem kpɛn' ba hali. Ka maliak la yɛli ba ye, “Da zɔti dabiem, ka m mɔri labasʋŋ ye m yɛli ya. Ka li na malis nidib wʋsa bɛdegʋ.
11 Yʋ'ʋŋ kaŋa nwa', ba du'a faangid onɛ an Zugsɔb Kristo la David teŋin.
12 Bʋn linɛ na kɛ ka ya baŋ biig la anɛ yanamɛ na nyɛɛ o ka ba vil o nɛ fuugʋ digil kɔnbid yam daka pʋʋgin.”
13 Ka maliaknam bɛdegʋ kpɛn sig na paas yinne la zug. Ka ba yʋ'ʋmmi dʋ'ʋsid Wina'am yʋ'ʋsʋŋ
14 ye, “Ti pian'ad Wina'am onɛ bɛɛ agɔl la ka sumbʋgʋsʋm mɛ bɛ nɛ nimbanɛ ka Wina'am sʋnf ma'ae nɛ ba dunia nwa' zug.”
15 Ka maliaknam la lɛb arezana ni la, ka kɔnbkemnib la yɛl taaba ye, “Kɛlli ka ti keŋ Betilehem gɔs linɛ ka Zugsɔb la yɛli ti la.”
16 Ka ba keŋ tɔ'ɔtɔ nyɛ Mɛɛri nɛ Josef nɛ bilia la, ka o dig kɔnbid yam daka pʋʋgin.
17 Ka kɔnbkemnib la nyɛɛ o la, ba pian' biig la yɛla, wʋʋ maliak la pa'a yɛli ba si'em la.
18 Ka ban wʋsa wʋm kɔnbkemnib la yɛli ba si'em la, li lidigi ba nɛ.
19 Ka Mɛɛri tiɛn yɛla nwa' wʋsa tɛn'ɛsid o sʋʋnrin sa. 20 Ka kɔnbkemnib la da lɛbid ka pian'ad Wina'am yʋ'ʋr bɛdegʋ, bɔzugɔ ban wʋm ka nyɛ maliak la pa'a yɛli ba si'em la.
Yesu yʋ'ʋr pʋdib la yɛla
21 Ka daba anii la saŋa daa paae, ka ba na kpɛn'ɛs biig la baŋʋ, ka pʋd o yʋ'ʋr ye Yesu. Yʋ'ʋkan la ka maliak la daa yɛl ye ba ti pʋd o, saŋkan ka Mɛɛri daa nam pʋ tʋk o pʋʋg la.
Ba zaŋ Yesu tis Wina'am la
22 Ka biig la zug zuŋur saŋa daa paae wʋʋ Moses n da zi'el la, ka ba mɔr biig la keŋ Jerusalem ye ba zaŋ o tis Zugsɔb la,
23 nwɛnɛ lin sɔb si'em LUK 2 Wina'am wada ni ye, “Biribiŋ kpɛŋ wʋsa na anɛ Zugsɔb din la.” 24 Ba daa keŋ nɛ ye ba maal maannɛ tis Wina'am nwɛnɛ Zugsɔb wada la yɛl si'em
la ye ba tis “sian'adawan ayi', bɛɛ na'adawanbibis ayi' la.”
25 Saŋkan la ka dau daa bɛ Jerusalem, ka o yʋ'ʋr buon Simeon. O da anɛ pʋpielim daan ka zɔt Wina'am. Ka Wina'am Siig Kasi bɛ nɛ o. Ka o gu'usid Israel faangid la ken na.
26 Ka Siig Kasi la daa pʋn yɛl o ye, o kʋ kpii, asɛɛ o ti nyɛ Zugsɔb Kristo la.
27 Ka Siig Kasi la kɛ ka o keŋ Wina'am Pʋ'ʋsim Yin la daakanɛ ka Yesu ba' nɛ o ma daa mɔr o keŋ ye ba maal Wina'am wada maan la.
28 Ka Simeon di'e biig la o nu'usin ka pʋ'ʋs Wina'am yɛt ye,
29 “Nannanna basim suor ka fʋ tʋmtʋm kpi nɛ sumbʋgʋsʋm wʋʋ fʋn daa zi'el nɔɔr si'em la,
30 bɔzugɔ m nini nyɛ faangid onɛ ka fʋ tʋm na la,
31 on ka fʋ ti'eb dunia dim wʋsa nini ni,
32 onɛ na kɛ ka li nie nyain tis buudi wʋsa, ka na kɛ ka Israel dim yʋ'ʋr dʋ.”
33 Ka Simeon tu'as biig la yɛla ka li lidig biig la ba' nɛ o ma.
34 Ka Simeon kaanb nɔsʋŋʋ niŋi ba zug ka yɛl Mɛɛri onɛ an biig la ma la ye, “Gɔsima, Wina'am gaŋ bikaŋa ye o kɛ ka Israel dim bɛdegʋ lu, ka bɛdegʋ mɛ dʋ. Onɛ an zanbin ka Wina'am tis na, ka nidib bɛdegʋ na ti zan'as o,
35 ka linɛ ka ba su'a ba pʋtɛnda ni na nie paalʋ. Ka fʋn mɛŋ na paam sʋnsa'aŋ hali pamm.”
36 Saŋkan la mɛn, ka Wina'am nɔdi'es pu'ak mɛ daa bɛ ka o yʋ'ʋr buon Anna, ka o ba' yʋ'ʋr buon Panuel, onɛ an Aser dɔɔg nid la. On daa an pu'asadir la ka o kul sidi paae yʋma ayɔpɔi ka o sid la kpi.
37 Ka o sid la kpi la, ka o kpɛlim pʋkɔɔnr hali kʋdigi ti paae o du'am yʋma pisnii nɛ anaasi. O daa bɛ nɛ Wina'am Pʋ'ʋsim Yin saŋa wʋsa ka pian'ad Wina'am yɛla nintaŋ nɛ yʋ'ʋŋ wʋsa, ka pʋ basida, ka lɔɔd nɔɔri sɔsid Wina'am.
38 Saŋkan la ka o kena ye o pʋ'ʋs Wina'am bareka, ka tu'asid biig la yɛla tisid banɛ wʋsa gu'usid saŋkanɛ ka Wina'am na lɛn di'e Jerusalem teŋi lɛbisi tisi ba la.
39 Ka Josef nɛ Mɛɛri naae linɛ wʋsa ka Zugsɔb la zi'eli ba la, ba lɛbi kul Nazaret teŋin linɛ bɛ Galile sʋ'ʋlimin la.
40 Ka biig la nɔbig ka mɔr paŋ nɛ ya'am, ka Wina'am yɛlsʋm bɛɛ o zug.
LUK 2–3
Yesu daa an biig ka kpɛlim Jerusalem la
41 Yʋʋm-yʋʋm ka Yesu ba' nɛ o ma ken Jerusalem Kum Maliak Gaadʋg malʋŋ la saŋa.
42 Ka Yesu daa an yʋma pii nɛ ayi' la, ka ba keŋ malʋŋ la wʋʋ ban ɛɛnti niŋid si'em la.
43 Ka malʋŋ la dabisa naae la, ka ba lɛbidi kun. Ka Yesu kpɛlim Jerusalem teŋin ka o ba' nɛ o ma pʋ baŋ ye o kpɛlim yaa.
44 Ba daa tɛn'ɛs ye o dɔlnɛ ba teŋ dim la, ka keŋ dabis mum ken. Ka ban iee o ba du'adib nɛ ba zuanam san'an ka pʋ nyɛɛ o la,
45 ba da lɛb Jerusalem ieed o.
46 Daba atan' daar ka ba nyɛɛ o Wina'am Pʋ'ʋsim Yin la, ka o zin' nɛ pa'annib la kɛlisid ka bu'osidi ba bu'osa.
47 Ka ban wʋsa daa wʋm la daa tɛn'ɛsid hali o baŋir nɛ o ya'am lɛbisa la zug.
48 Ka li lidig o ba' nɛ o ma ban nyɛɛ o la. Ka o ma bu'os o ye, “M biiga, bɔ ka fʋ niŋi ti wala? Man nɛ fʋ ba' ieef hali nɛ sʋnsa'aŋ.”
49 Ka o lɛbisi ba ye, “Bɔ ka ya ieedi ma? Ya zi' ye li sʋ'ʋm ye m bɛɛ m Ba' yinnɛɛ?”
50 Ka ba pʋ baŋ o pian'ad la gbinnɛ.
51 Ka Yesu dɔlli ba kul Nazaret teŋin, ka siaki ba nɔɔr. Ka o ma su'a yɛlbama wʋsa o sʋʋnrin. 52 Ka Yesu nɔbig ka mɔr ya'am ka Wina'am nɛ nidib kaanb sʋŋ bɛɛ o zugin.
LUK 3
Joon onɛ sʋʋd nidib Wina'am ku'om la mɔɔlʋg
| 3 |
Na'ab Tiberius Siiza daa di Room na'am ka li paae yʋʋm pii nɛ anu saŋa la, ka Pontus Pailet mɛ an Juda gɔmena. Ka Herod an Galile na'ab ka o ba'abiig Filip mɛ an Ituria nɛ Trakonitis na'ab. Ka Lisanius an Abilene na'ab.
2 Ka Annas nɛ Kaifas an Wina'am maanmaannib kpɛɛmnam. Saŋa kan la ka Wina'am pian'ad kɛn Joon onɛ an Zakaria biig la san'an mɔɔgin na.
3 O da giligid tembanɛ bɛ Joodan mu'ar bɛn la wʋsa, mɔɔn ye, “Tiakimini ya sʋnya ka di'e Wina'am ku'om sʋʋb, ka Wina'am tisi ya suguru ka yisi ya tʋʋmbɛ'ɛdi bas.”
4 Nwɛnɛ din da sɔb Azaya onɛ an nɔdi'es la gbauŋʋn si'em la ye,
“Sɔ' bɛ mɔɔgini mɔɔn ye,
‘Maalimi suori tis Zugsɔb la;
maalim suoraugʋ tisi ti Wina'am la:
kɛl ka li an sappi mɔɔgin la tis o.
5 Pɛ'ɛlimi bʋmbu'ad wʋsa ka li dʋ.
Birigimi zuoya nɛ kʋkʋna wʋsa ka li sig.
Maalimi suobanɛ ka' sʋm la ka ba lieb sassi, ka maal suogɔnlima nɛ zin'ibanɛ ka' sʋm la ka li an sʋ'ʋŋa.
6 Wina'am faangir pipilim la na nie ka ninsaalib wʋsa nyɛɛ li.’”
7 Ka nidib bɛdegʋ la'asi kɛɛn o san'an na ye o sʋʋ ba Wina'am ku'om. Ka o yɛli ba ye, “Yanam banɛ nwɛnɛ wiigi nwa', anɔ'ɔn yɛli ya ye ya zɔm yi Wina'am sʋnpɛɛn linɛ kenna la ni?
8 Tʋmmi tʋʋm banɛ pa'an ye ya tiaki ya sʋnya, ka da tɛn'ɛsid ye Abraham anɛ ya yaaba. Ka m yɛti ya ye, Wina'am tun'e zaŋ kuga nwa' maal yaasi tis Abraham.
9 Nannanna lieŋ bɛ tiis gbinnin ka tikan wʋsa pʋ wal walsʋmaa, ba na nwaasi lɔb bugumin.”
10 Ka nidib la bɛdegʋ bu'os o ye, “Ti na niŋ wala?”
11 Ka Joon lɛbisi ba ye, “Onɛ mɔr fuud ayi', on pʋdigim tis onɛ pʋ mɔra. Ka onɛ mɔr diib on mɛ niŋim ala.”
12 Ka lampɔdi'esidib mɛ kena ye o sʋʋ ba Wina'am ku'om, ka bu'os o
ye, “Pa'anna, ti na niŋ wala?”
13 Ka o lɛbisi ba ye, “Da di'e ligidi dinɛ gaad ban yɛli ya si'em la.”
14 Ka soogianam mɛ bu'os o ye, “Ka tinama, ti na niŋ wala?”
Ka o yɛli ba ye, “Da di'e sɔ' bʋn nɛ paŋa, bɛɛ gban'e nidib zaalim-zaalim,
ka di'e si'ela. Kɛlli ka ya yɔɔd la siaki ya.”
15 Ka nimbanɛ da gur Kristo onɛ an Faangid la kenna la pin'ili tɛn'ɛsidi ba sʋnya ni ye Joon pa'ati anɛ Kristo la.
16 Ka Joon lɛbisi ba ye, “Man sʋʋdi ya nɛ Wina'am ku'om, amaa sɔ' bɛɛ mɔr paŋi gat man, onɛ kenna ka m pʋ nar ye m pidig o ta'adaa. O na sʋʋ ya nɛ Wina'am Siig Kasi nɛ bugum.
17 O zanl nwam kanɛ yɛligid ki o nu'ugin, ka na yɛlig o ki linɛ bɛ zieŋin la vaae su bʋʋrin ka nyu'oe udug la nɛ bugum linɛ pʋ kpiigida.”
18 Pian'ad bɛdegʋ nwa' ka Joon da zaŋi sa'al nidib on da mɔɔn Wina'am labasʋŋ la.
19 Amaa Joon da pian' zɛrig Na'ab Herod, on da faaɛn o mɛŋ bier pu'a onɛ yʋ'ʋri buon Herodias n di hali ka tʋm tʋʋmbɛ'ɛd sieba bɛdegʋ la zug. 20 Li ba'as bɛ'ɛd anɛ Herod n da gban'e Joon kpɛn'ɛs sanrega ni la.
Yesu Wina'am ku'om sʋʋb la yɛla
21† Joon da sʋʋd nidib wʋsa Wina'am ku'om la, o daa sʋ Yesu Wina'am ku'om mɛn. On da sʋʋ naae la ka sɔsid Wina'am ka arezana yɔ'ɔg,
22 ka
† 3:21 Mat 3:13-17; Mak 1:9-11
Wina'am Siig Kasi la sig o zugin na, ka ba nyɛ ka li nwɛnɛ dawan nɛ. Ka kʋkɔr yi arezana na ye, “Fʋ anɛ m binɔŋir ka m nini tigif hali.”
Yesu Kristo yaanam la yɛla
23† Yesu n da pin'il o tʋʋma la, o da anɛ yʋma pistan', ka nidib da tɛn'ɛs ye o anɛ Josef biig. Josef saam da anɛ Heli,
24 ka Heli saam an Matat, ka Matat saam an Levi, ka Levi saam an Melki, ka Melki saam an Janai, ka Janai saam an Josef,
25 ka Josef saam an Matatias, ka Matatias saam an Amos, ka Amos saam an Nahum, ka Nahum saam an Esili, ka Esili saam an Nagai,
26 ka Nagai saam an Maat, ka Maat saam an Matatias, ka Matatias saam an Semein, ka Semein saam an Josek, ka Josek saam an Joda,
27 ka Joda saam an Joanan, ka Joanan saam an Resa, ka Resa saam an Zerubabɛl.
Ka Zerubabɛl saam da anɛ Sealtiel, ka Sealtiel saam an Neri,
28 ka Neri saam an Melki, ka Melki saam an Addi, ka Addi saam an Kosam, ka Kosam saam an Elmadam, ka Elmadam saam an Er,
29 ka Er saam an Josua, ka Josua saam an Elieza, ka Elieza saam an Jorim, ka Jorim saam an Matat, ka Matat saam an Levi,
30 ka Levi saam an Simeon, ka Simeon saam an Juda, ka Juda saam an Josef, ka Josef saam an Jonam, ka Jonam saam an Eliakim,
31 ka Eliakim saam an Melea, ka Melea saam an Mena, ka Mena saam an Matata, ka Matata saam an Natan, ka Natan saam an David.
32 Ka David saam da anɛ Jese, ka Jese saam an Obɛd, ka Obɛd saam an Boaz, ka Boaz saam an Sala, ka Sala saam an Nason,
33 ka Nason saam an Aminadab, ka Aminadab saam an Admin, ka Admin saam an Ani, ka Ani saam an Heziron, ka Heziron saam an Perez, ka Perez saam an Juda,
34 ka Juda saam an Jakob, ka Jakob saam an Isaak, ka Isaak saam an Abraham.
Ka Abraham saam da anɛ Tera, ka Tera saam an Nahor,
35 ka Nahor saam an Serug, ka Serug saam an Reu, ka Reu saam an Peleg, ka Peleg saam an Eba, ka Eba saam an Sela,
36 ka Sela saam an Keenan, ka Keenan saam an Apaksad, ka Apaksad saam an Sem, ka Sem saam an Noa, ka Noa saam an Lamek,
37 ka Lamek saam an Metusela, ka Metusela saam an Enok, ka Enok saam an Jared, ka Jared saam an Mahalaleel, ka Mahalaleel saam an Keenan,
38 ka Keenan saam an Enos, ka Enos saam an Set, ka Set saam an Adam, ka Adam saam an Wina'am.
LUK 4
Sʋntaana daa mak Yesu la yɛla
(Mat 4:1-11; Mak 1:12-13)
| 4 |
Ka Wina'am Siig Kasi la pɛ'ɛl Yesu ka o naan Joodan kɔldaugin la lɛb na, ka Wina'am Siig Kasi mɔr o keŋ mɔɔgin.
2 Anina ka Sʋntaana mak o dabisa pisnaasi. Ka o pʋ di si'el dabisban nii. Ka lin gaad la ka o kɔ'ɔm zabid.
3 Ka Sʋntaana yɛl o ye, “Fʋ ya'a an Wina'am Biig fʋn yɛlim kuga nwa' ka li kilim diib.”
4 Ka Yesu lɛbis o ye, “Li sɔb Wina'am gbauŋʋn ye, ‘Ninsaal pʋ vʋe diib yɛla ma'aanɛ.’”
5 Ka Sʋntaana mɔr o keŋ dʋ zuor zug ka pa'al o dunia sʋ'ʋlim wʋsa. 6 Ka yɛl o ye, “M na tisif paŋ kaŋa nɛ li kpan'am wʋsa. Ba tis mam nɛ ka mam mɛ na tis on wʋsa ka m bɔɔd.
7 Dinzug fʋ ya'a siaki zun'e man, li wʋsa na niŋi fʋ din.”
8 Ka Yesu lɛbis o ye, “Li sɔb ye, ‘Fʋ zun'omi fʋ Zugsɔb Wina'am gʋllim ka tʋmmi tisid on ma'aa.’”
9 Ka Sʋntaana lɛn dɔl o keŋ Jerusalem dʋ'ʋs o Wina'am Pʋ'ʋsim Yir zug, ka yɛl o ye, “Fʋ ya'a an Wina'am Biig, fʋn basimi fʋ mɛŋi luna;
10 ka li sɔb ye, “‘Wina'am na tis o maliaknam nɔɔr ka ba gurif.’
11 ‘Ba na ʋki fʋ ba nu'usin ka fʋ kʋ tu'ugi fʋ nɔbir nɛ kugirɛ.’”
12 Ka Yesu lɛbis ye, “Wina'am gbauŋ yɛl ye, mid ka fʋ maki fʋ Zugsɔb Wina'am.”
13 Ka Sʋntaana mak o naae la ka bas o saŋa bi'ela.
Yesu pin'il o tʋʋma Galile teŋin
(Mat 4:12-17; Mak 1:14-15)
14 Ka Yesu lɛb Galile nɛ Wina'am Siig Kasi la paŋ. Ka o labaar gilig teŋkpɛmisin wʋsa.
15 Ka o zamisi ba la'asʋg dɔɔdin ka ba wʋsa pian' o yɛla sʋ'ʋm.
Ba zan'as Yesu Nazaret teŋin
(Mat 13:53-58; Mak 6:1-6)
16 Ka Yesu keŋ Nazaret, ban da ugus o teŋ si'a la. Ka Jew dim Vʋ'ʋsʋm Daar, ka o kpɛn' la'asʋg dɔɔgin wʋʋ on ɛɛnti kpɛn'ɛd si'em la, ka duoe zi'en ye o karim.
17 Ka ba tis o gbauŋ kanɛ ka Wina'am nɔdi'es Azaya da sɔb la. Ka o lak gbauŋ la, ka nyɛ zin'ikanɛ ka li sɔb ye,
18 “Zugsɔb Siig la bɛɛ m ni, bɔzugɔ o gaŋim ye m mɔɔl labasʋŋ la tis nɔŋ dim. O tʋmim ye m mɔɔl yɔlisim yɛla tis banɛ bɛ sanrega ni la, ka nie zʋnzɔɔs nini, ka yis banɛ bɛ namisʋg pʋʋgin la bas,
19 ka mɔɔl saŋkan ka Zugsɔb na zɔ nidib nimbaanlig ka di'e ba.”
20 Ka o kpilim gbauŋ la lɛbisi tis onɛ gur gbana la, ka zin'in. Ka nimbanɛ wʋsa bɛ la'asʋg dɔɔgin la gɔsid o kii.
21 Ka o pin'ili yɛti ba ye, “Zina nwa' linɛ ka ba sɔb Wina'am gbauŋʋn ka m karim nwa' la niŋ amɛŋa.”
22 Ka ba pian' taaba o pian'asʋma la yɛla, ka bu'osid ye, “Li ka' Josef biig la nwaa?”
23 Ka Yesu yɛli ba ye, “M mi' ye ya na siilim siiliŋ kaŋa ye, ‘Tiim daana, ti'ebimi fʋ mɛŋ.’ Ka lɛn yɛl ye, ‘Bʋn lin ka fʋ daa niŋ Kapeenum teŋin ka ti wʋm la, niŋimi li fʋ mɛŋ teŋin kpɛla mɛn.’”
24 Ka o yɛl ye, “Amɛŋa ka m yɛti ya ye, Wina'am nɔdi'es baa yinne kʋ nyɛ pian'asʋŋ o mɛŋ teŋinɛ.
25 Amaa li anɛ amɛŋa ka m yɛti ya ye, pʋkɔnya bɛdegʋ da bɛ Israel teŋin Elaja saŋa la, ka saa pʋ nii yʋma atan' nɛ nwadis ayuobʋ, ka kɔ'ɔm tita'ar lu teŋin la wʋsa.
26 Amaa Wina'am pʋ tʋm Elaja ye o keŋ pʋkɔnbama la san'anɛ. Ka lɛɛ tʋm o nɛ pʋkɔɔnr yinne onɛ bɛ Zarefat teŋ linɛ bɛ Sidon sʋ'ʋlimin la. 27 Ka kʋkɔma bɛdegʋ da bɛ Israel teŋin Elasia saŋa la, amaa baa yinne pʋ nyɛ laafi, asɛɛ Naaman onɛ yi Siriya sʋ'ʋlim la gʋllim nyɛ laafi.”
28 Ka ban wʋm nwa' la'asʋg dɔɔgin la, ka ba wʋsa sʋnya pɛlig hali. 29 Ka ba kad o teŋ la pʋʋgin mɔr o keŋ zuor la zug ye ba tɛbig o bas ka o lu. 30 Amaa ka o kpɛn bʋŋ nidib la sʋʋginɛ gaadi keŋ.
Dau kanɛ ka kikirig dɔl o la yɛla
(Mak 1:21-28)
31 Ka Yesu da keŋ Kapeenum teŋ kanɛ bɛ Galile sʋ'ʋlimin la. Ka Vʋ'ʋsʋm Daar paae ka o pin'ili pa'an nidib la.
32 Ka on daa pa'annɛ ba si'em la lidigi ba, bɔzugɔ, pa'alʋg la daa mɔr paŋ hali.
33 Ka dau daa bɛ la'asʋg dɔɔgin la ka kikirig dɔl o. Ka o tans nɛ kʋkɔr tita'ar
34 ye, “Aa! Yesu onɛ an Nazaret nida, fʋ ba'a bɔ bɛ nɛ ti? Fʋ kena ye fʋ san'ami tii? M mi' fʋn an sɔ'. Fʋ anɛ Wina'am pʋpielim sɔb la.”
35 Ka Yesu yɛl kikirig la ye, “Kɛl vuud, ka yii o san'an!” Ka kikirig la
lug o nidib la sʋʋgin ka yii o ni ka lɛɛ pʋ pu'alim oo.
36 Ka ba wʋsa lidigi yɛt taaba ye, “Abɔ pa'alʋgʋ nwa'? Bɔzugɔ o mɔr paŋ nɛ kpi'euŋ ka tansid kikiris ka ba yit.”
37 Ka o labaar gilig teŋkpɛmisin wʋsa.
Yesu ti'eb nidib bɛdegʋ la yɛla
(Mat 8:14-17; Mak 1:29-34)
38 Ka Yesu duoe yi la'asʋg dɔɔgin la kpɛn' Simon yir. Ka Simon diempu'a bɛn'ɛd ka o niŋgbina tʋl. Ka ba pian' o yɛla tis Yesu. 39 Ka o keŋ zi'en o san'an ka tans ban'a la, ka li bas o. Ka pu'a la duoe tɔ'ɔtɔ maali ba saauŋ.
40 Ka winnigi kpɛn'ɛd la ka ba mɔr ban'adnam banɛ wiim an kɔn'ɔb kɔn'ɔbi kɛn Yesu san'an na, ka o pa'al o nu'usi ba yinne-yinne zugin ti'ebi ba.
41 Ka kikiris mɛ yi sieba ni bɛdegʋ na tansid ye, “Fʋ anɛ Wina'am Biig.” Ka Yesu tansi ba ka pʋ siak ye ba pian' si'el si'ela ban da baŋ ye o anɛ Kristo onɛ an Faangid la zug.
Yesu mɔɔn Wina'am labasʋŋ la
(Mak 1:35-39)
42 Ka bɛog nie ka Yesu yi tempʋʋgin la keŋ zin'ikanɛ ka sɔ' kae. Ka nidib la bɛdegʋ iee o hali ti nyɛɛ o, ka mɔɔd ye o da lɛn yii ba san'anɛ.
43 Amaa ka o yɛli ba ye, “Asɛɛ ka m mɔɔl Wina'am labasʋŋ la teŋ sieba ni mɛn, ka lin yɛla ka Wina'am tʋm mam na.”
44 Ala ka o mɔɔn labasʋŋ la
Juda sʋ'ʋlimin la'asʋg dɔɔdin.
LUK 5
Yesu buol o yiiga nya'andɔlib
(Mat 4:18-22; Mak 1:16-20)
| 5 |
Daar yinne ka Yesu zi'e kpi'e Gennesaret bɛuŋ nɔɔrin, ka nidib la'asi gilig muk o bɔɔd ye ba wʋm Wina'am pian'ad la.
2 Ka o nyɛ anrima ayi' ka ba zi'e kpi'e bɛuŋ la ka ziiŋgban'adib yii ba pʋʋgin piesid linɛ ka ba mɔri gban'ad zimi la.
3 Ka o kpɛn' anrʋŋ yinne ni linɛ an Simon din ka yɛl o ye, “Da'ami li ka li keŋ bi'ela.” Ka o niŋ ala. Ka Yesu zin'in anrʋŋ la pʋʋgini pa'an nidib la.
4 Ka on pa'ali ba naae la ka yɛl Simon ye, “Da'am anrʋŋ la keŋ ku'ozuluŋin ka lɔbi fʋ sau la.”
5 Ka o lɛbis ye, “Zugsɔba, ti namisnɛ yʋ'ʋŋ sa ka pʋ gban'e si'ela, amaa fʋn yɛl la zug m na lɔbi m sau la.”
6 Ka ba niŋ ala ka gban'e zimi bɛdegʋ hali ka ba saunam la bɔɔd aansig.
7 Ka ba amisi buoli ba taaba anrʋŋ yinne la ni ye ba kena sʋŋi ba. Ka ba kena sʋŋi ba, ka ba pɛ'ɛl anrima ayi' la wʋsa nɛ zimi hali ka ba bɔɔd simmʋg.
8 Simon Pita n nyɛ nɛ'ɛŋa la, ka o igin Yesu tuonnɛ yɛl o ye, “Zugsɔba, yimim san'an ka man anɛ tʋʋmbɛ'ɛd sɔb.”
9 Bɔzugɔ on nɛ o taaba la daa nyɛ ban gban'e zimi la si'em la ka li lidigi ba.
10 Ala mɛn ka li da lidig Zebedee biis Jemes nɛ Joon banɛ da an Simon tʋmtʋm taaba la.
Ka Yesu yɛl Simon ye, “Da zɔt dabiem, ka nannanna wa'ae sa, fʋ na
mɔr nidib na ka ba dɔl mam nwɛnɛ fʋn daa gban'ad zimi si'em la.”
11 Ka ba mɔr anrima la dʋ'ʋs gʋʋr, ka bas si'el wʋsa ka dɔl Yesu.
Yesu ti'eb kʋkɔm la yɛla
(Mat 8:1-4; Mak 1:40-45)
12 Yesu da nam bɛ teŋ si'a la, ka dau onɛ an kʋkɔm kɛɛn anina na. Ka on nyɛ Yesu la, o luu vanbin teŋin sɔs o, ka yɛl o ye, “M Zugsɔba, fʋ ya'a bɔɔd, fʋ na tun'e kɛ ka m nyɛ laafi ka lieb nyain.”
13 Ka Yesu tiɛn o nu'ugʋ si'is o ka ye, “M bɔɔd, nyɛm laafi ka an nyain.” Ka wiim la bas o anina yim.
14 Ka Yesu yɛl o ye, “Mid ka fʋ yɛl sɔ', amaa kem nɔki fʋ mɛŋi pa'al Wina'am maanmaan, ka maal maannɛ tis Wina'am wʋʋ Moses n da sɔb ye ba niŋ si'em la, ka li pa'al nidib ye fʋ yʋ'ʋn mɔr laafi.”
15 Amaa Yesu labaar la daa lɛn yadig bɛdegʋ ka nidib bɛdegʋ kena ye ba kɛlis o pian'ad ka o ti'ebi ba wiim la.
16 Amaa o ɛɛnti ken zin'ikan ka nidib kae la sɔsid Wina'am.
Yesu ti'eb pɔn'ɔr
(Mat 9:1-8; Mak 2:1-12)
17 Ka daar yinne ka o pa'an nidib ka Farisii dim nɛ wada pa'annib banɛ bɛ Galile nɛ Juda nɛ Jerusalem kɛɛn o san'an na. Ka Zugsɔb paŋ bɛɛ o ni ka o ti'ebid ban'adnam.
18 Ka dap sieba zi dau na ka o an pɔn'ɔr ka dig sɔŋin ka ba kpɛ'ɛŋid ye ba mɔr o kpɛn' yin la digil o Yesu tuon.
19 Ka nidib la muk la zug ka ba pʋ nyaŋi nyɛ paalʋ mɔr o kpɛn'ɛɛ, ka zii o dʋ mɔpil la zugin kibig vɔɔnri sigis o nɛ o sɔŋ la nidib la sʋʋgini digil o Yesu tuon.
20 Ka Yesu nyɛ banɛ ziid pɔn'ɔr la niŋ o yadda si'em la, ka yɛl pɔn'ɔr la ye, “M zua, m kɛɛ fʋ tʋʋmbɛ'ɛd taali bas.”
21 Ka wada pa'annib la nɛ Farisii dim pin'ili bu'osid taaba ye, “Anɔ'ɔnɛ nwa' pian'adi san'amid Wina'am yʋ'ʋrɛ? Anɔ'ɔnɛ na nyaŋi kɛ nidib tʋʋmbɛ'ɛdi basɛ? Li ka'anɛ Wina'am gʋllim nɛ?”
22 Amaa Yesu baŋ ban tɛn'ɛsid si'el la ka bu'osi ba ye, “Bɔ ka ya tɛn'ɛsid nɛ'ɛnama?
23 Bɔɔ an na'ana? Man na yɛl ye, ‘M kɛɛ fʋ tʋʋmbɛ'ɛd taali bas, bɛɛ duom keŋɛ?’
24 Ala ka ya na baŋ ye Ninsaal Biig mɔr paŋ dunia nwa' ni na kɛ tʋʋmbɛ'ɛd taali bas.” Ka o yɛl pɔn'ɔr la ye, “Duom zaŋi fʋ sɔŋ la kul.” 25 Anina yim ka pɔn'ɔr la duoe ba wʋsa tuon, ka nɔk o sɔŋ kanɛ ka o diginɛ li zug la kun ka zun'od Wina'am.
26 Ka ba wʋsa lidig ka dabiem kpɛn' ba ka ba zun'od Wina'am yɛt ye, “Ti nyɛ yɛl nyalima zina.”
Yesu buol Levi la yɛla
(Mat 9:9-13; Mak 2:13-17)
27 Nɛ'ɛŋa nya'aŋ ka Yesu yi ka nyɛ lampɔdi'es ka o yʋ'ʋr buon Levi ka o zin' lampɔ di'esʋg dɔɔgin. Ka Yesu yɛl o ye, “Dɔl man.” 28 Ka o duoe ka bas si'el wʋsa ka dɔl o.
29 Ka Levi maal diib o yinne tis Yesu ka onɛ lampɔdi'esidib nɛ nidib bɛdegʋ zin' dit.
30 Ka Farisii dim sieba nɛ ba wada pa'annib nyɔnnɛ tisid Yesu nya'andɔlib la ye, “Bɔ ka ya la'an dit ka nuud nɛ lampɔdi'esidib nɛ tʋʋmbɛ'ɛd dima?”
LUK 5–6
31 Ka Yesu lɛbis ye, “Nimbanɛ mɔr laafi pʋ bɔɔd du'ataa. Asɛɛ banɛ bɛn'ɛd ma'aa bɔɔd. 32 M pʋ kena ye m buol pʋpielim dima, amaa m kena ye m buol tʋʋmbɛ'ɛd dim ka ba tiak.”
Nɔɔr lɔɔb yɛla
(Mat 9:14-17; Mak 2:18-22)
33 Ka sieba yɛl o ye, “Joon nya'andɔlib lɔɔd nɔɔr saŋa wʋsa ka pʋ'ʋsid Wina'am la'an nɛ Farisii dim nya'andɔlib, amaa fʋ nya'andɔlib ditnɛ ka nuud.”
34 Ka o lɛbis ye, “Ya tɛn'ɛs ye banɛ keŋ pu'adiir di'ema na tun'e lɔ nɔɔr ban nam bɛ nɛ pu'a saan la sid laa?
35 Amaa saŋa na kena ka ba na zaŋ pu'a daan la yisi ba san'an. Ka li saŋa ka ba mɛ na lɔ nɔɔr.”
36 Ka Yesu yɛli ba siiliŋ ye, “Sɔ' pʋ zaŋid fupaali ligid fukʋdʋgɔ. O ya'a niŋ ala o na san'am fupaalig la. Ka pien paal la kʋ di'e nɛ fukʋdʋg laa.
37 Sɔ' mɛ pʋ lied danpaal waa kʋdig nii. O ya'a niŋ ala danpaal la na kɛ ka waa la tans, ka daam la mɛ kpa'ae ka waa la mɛ san'am.
38 Danpaal liednɛ wapaalisin.
39 Sɔ' pʋ nuud dankʋdʋg ka lɛm bɔɔd danpaalɛ. O na yɛl ye, dankʋdʋg la an sʋ'ʋŋa.”
LUK 6
Vʋ'ʋsʋm dabisir la yɛla
(Mat 12:1-8; Mak 2:23-28)
| 6 |
Vʋ'ʋsʋm dabisir yinne ka Yesu buŋid ki pɔɔg ka o nya'andɔlib gisid ki la nwɛ'ɛmi ɔnbid.
2 Ka Farisii dim sieba yɛl ye, “Bɔ ka ya tʋm linɛ ka ti wada kis Vʋ'ʋsʋm Daarɛ?”
3 Ka Yesu lɛbisi bu'osi ba ye, “Ya pʋ karim David nɛ dap banɛ da bɛ nɛ o ka ba kɔ'ɔm da zabid ka David niŋ si'em laa?
4 O da kpɛn' Wina'am pʋ'ʋsim dɔɔgini ɔnb bodobodo linɛ pʋ sʋ'ʋm ye nidib ɔnbid yɔɔg, yɔɔgɔ, asɛɛ Wina'am maanmaan gʋllim.”
5 Ka o yɛli ba ye, “Ninsaal Biig la sʋ'oe Vʋ'ʋsʋm Daar la.”
Dau kanɛ ka o nu'ug kpi la yɛla
(Mat 12:9-14; Mak 3:1-6)
3 Vʋ'ʋsʋm Daar yinne ya'as ka Yesu kpɛn' la'asʋg dɔɔgini pa'an nidib. Ka dau bɛ anina ka o datiuŋ nu'ug kpi.
7 Ka gbauŋmi'idib nɛ Farisii dim gɔsid dau la kii ye Yesu na ti'eb nidib Vʋ'ʋsʋm Daar la, bɛɛ o kʋ ti'ebɛ. Ba da bɔɔdnɛ suokanɛ ka ba na ye o tʋm taal on san'am Vʋ'ʋsʋm Daar la.
8 Ka Yesu baŋi ba tɛn'ɛsa ka yɛl dau kanɛ ka o nu'ug kpi la ye, “Duom zi'en nidib la sʋʋgin.” Ka o duoe zi'en anina.
9 Ka Yesu yɛli ba ye, “Kɛl ka m bu'osi ya, suor bɛ ka sɔ' na maal sʋ'ʋm bɛɛ bɛ'ɛd Vʋ'ʋsʋm Daarɛ?” Ka lɛm bu'os ye, “Li an sʋm ka ti tilig nidib bɛɛ ti kʋ?”
10 Ka o gɔsi ba wʋsa gilig ka yɛl dau la ye, “Tiɛnmi fʋ nu'ug la.” Ka o tiɛn ka nu'ug la lɛbi niŋ sʋ'ʋŋa wʋʋ nu'ug kaŋa la.
11 Ka ba sʋnya pɛlig hali ka ba gban'ad ban na niŋ o si'em.
Yesu gaans o tʋmtʋmnib pii nɛ ayi'
(Mat 10:1-4; Mak 3:13-19)
12 Dabisban la ni ka Yesu da yi teŋin dʋ zuor zug ye o sɔs Wina'am, ka bɛɛ ani yʋ'ʋŋ kan wʋsa sɔsid Wina'am.
13 Ka bɛogʋ nie la, ka o buol o nya'andɔlib la gaans bam pii nɛ ayi', ka buoli ba ye o tʋmtʋmnib. Li gbin anɛ banɛ ka o tʋm la.
14 Ba da anɛ Simon onɛ ka o tis o yʋ'ʋr ya'as ye Pita, nɛ Andrew onɛ an Pita ba'abiig, nɛ Jemes nɛ Joon nɛ Filip nɛ Bartolomew
15 nɛ Mateo nɛ Tomas nɛ Jemes onɛ an Alfeus biig la, nɛ Simon onɛ ka ba buon ye Zeelot la,
16 nɛ Judas onɛ an Jemes biig la, nɛ Judas Iskariot onɛ da lieb zam sɔb la.
Yesu pa'an ka ti'ebid ban'adnam
(Mat 4:23-25)
17 Ka Yesu nɛ o tʋmtʋmnib la naan zuor la zugʋ sig na la, o nya'andɔlib bɛdegʋ la'as o san'an na nɛ nidib bɛdegʋ banɛ yi Juda nɛ Jerusalem nɛ atɛuk nɔɔrin linɛ bɛ Taya nɛ Sidon sʋ'ʋlim.
18 Ba kena ye ba kɛlis o pian'ad la ka o lɛm ma'ae ba ban'as. Ka banɛ ka kikiris daamidi ba daa nyɛ laafi.
LUK 6
19 Ka nidib bɛdegʋ bɔɔd ye ba si'is o, bɔzugɔ paŋ yitnɛ o ni tisidi ba wʋsa laafi.
Yɛlsʋm nɛ yɛltɔɔg la yɛla
(Mat 5:1-12)
20 Ka Yesu gɔdig o nini gɔs o nya'andɔlib la ka ye,
Albareka bɛ nɛ yanam banɛ an nɔŋ dim la, bɔzugɔ Wina'am na'am la anɛ ya din.
21 Albareka bɛ nɛ yanam banɛ kɔ'ɔm zabid nannanna. Ya na ti dii tig. Albareka bɛ nɛ yanam banɛ kaasid. Ya na ti la'ad.
22 “Albareka bɛ nɛ yanam banɛ ka nidib kisi ya ka zan'asi ya ka tʋ'ʋdi ya nwɛnɛ ya anɛ tʋʋmbɛ'ɛd dim Ninsaal Biig la zug la.
23 “Li ya'a niŋ ala yanam maalimi sumalisim dabiskan, ka wa'a nɛ sumalisim, ya nyɔɔd tita'ari bɛ arezana ni la zug. Ala mɛn ka ba yaanam da niŋi tis Wina'am nɔdi'esidib la.
24 “Woo! Li na tɔi tis yanam kpan'am dim, bɔzugɔ yanam pʋn nyɛ yanamɛ bɔɔd si'el la.
Woo! Li na tɔi tis yanam banɛ tig nannanna, bɔzugɔ ya na ti ken nɛ kɔ'ɔm.
25 Woo! Li na tɔi tis yanam banɛ la'ad nannanna, bɔzugɔ ya sʋnya na ti san'am ka ya kaasid.
26 Woo! Li na tɔi tis yanam ban ka nidib wʋsa na pian'adi ya yɛla sʋ'ʋŋa;
ba yaanam da niŋnɛ ala tis ziri nɔdi'esidib la.
Bi'emnam nɔŋir la yɛla
(Mat 5:38-48; 7:12)
27 “Amaa m yɛt yanam banɛ wʋmi m pian'ad la ye, nɔŋimi ya bi'emnam, ka tʋmi sʋ'ʋm tisid banɛ kisi ya.
28 Ka tis banɛ kaanb bɛ'ɛdi tisidi ya la bareka. Ka sɔs Wina'am tisid banɛ tʋ'ʋdi ya.
29 Sɔ' ya'a nwɛ' fʋ LUK 6
yier yinne fʋn kɛl ka o nwɛ' linɛ kpɛlim la mɛn. Ka sɔ' ya'a faaɛn fʋ banaa fʋn kɛl ka o zaŋi fʋ dansiki paas.
30 Ka onɛ wʋsa sɔsif si'el fʋn tisim o. Ka sɔ' ya'a zaŋ linɛ aan fʋ bʋn fʋn da di'e ya'asɛ.
31 Niŋim bam wʋʋ fʋn bɔɔd ye ba niŋif si'em la.”
32 “Ya ya'a nɔŋ banɛ nɔŋi ya ma'aa li sʋ'ʋm an bɔ? Hali tʋʋmbɛ'ɛd dim nɔŋ banɛ nɔŋi ba.
33 Ka ya ya'a maal sʋ'ʋm tis banɛ maal sʋ'ʋm tisi ya ma'aa, li sʋ'ʋm an bɔ? Hali tʋʋmbɛ'ɛd dim niŋid ala.
34 Ka ya ya'a pɛ'ɛŋi tis banɛ gʋllim ka ya mi' ye ya na lɛn di'e lii ba san'anɛ, li sʋ'ʋm an bɔ? Hali tʋʋmbɛ'ɛd dim pɛ'ɛŋid tʋʋmbɛ'ɛd dim ka di'ed ya'as.
35 Amaa nɔŋimi fʋ bi'emnam, ka maal sʋ'ʋm tisi ba. Pɛ'ɛŋim tis ka da tɛn'ɛsid ye fʋ di'e ya'asɛ, ka ya nyɔɔd na niŋ bʋntita'ar. Ka ya na an Wina'am onɛ gaad bʋn wʋsa la biis. Bɔzugɔ o an sʋm tis banɛ zi' bareka pʋ'ʋsim hali nɛ bugusim dim.
36 Zɔm nimbaanlig wʋʋ ya Ba' Wina'am zɔt nimbaanlig si'em la.”
Taaba saria kadib la yɛla
(Mat 7:1-5)
37 “Da kati nidib sariaa ka Wina'am mɛ kʋ kadi ya saria. Da yɛl ye nidib ka' bʋʋdɛ, ka ba kʋ ye ya ka' bʋʋdɛ. Dimi taaba suguru, ka ba na niŋ ala tisi ya.
38 Tisimi bam, ka Wina'am mɛ na tisi ya. O na mak, ka din'is, ka dam-dam ka li pɛ'ɛli badigi yaam, ka o kpa'ae tisi ya. Yanamɛ mak si'em tisi ya taaba la, ala ka Wina'am mɛ na maki tisi ya.”
39 Ka Yesu yɛli ba siiliŋ kaŋa ye, “Zʋnzɔŋ na nyaŋi vɛ' o zʋnzɔŋ tiraan ka ba wʋsa kʋ lu bʋmbɔkinɛɛ?
40 Zamis pʋ gat o pa'anna amaa zamis onɛ wʋsa naae o zamisʋg, o na nwɛnɛ o pa'an nɛ.
41 “Bɔ ka fʋ nyɛ sauk bil kanɛ bɛɛ fʋ zua nifin ka lɛɛ pʋ nyɛ datita'ar kanɛ bɛ fʋ mɛŋ nifi nɛ?
42 Fʋ na niŋ wala yɛli fʋ zua ye, ‘Kɛl ka m yis sauk la fʋ nifin,’ amaa ka lɛɛ pʋ nyɛ datita'ar kanɛ bɛ fʋ mɛŋ nifi nɛ? Zam daana, yisim datita'ar la fʋ mɛŋ nifin yiiga ka nyaan nyaŋi nyɛ sʋ'ʋŋa yis sauk bil kanɛ bɛɛ fʋ zua nifin la.”
Tiig nɛ li wala la yɛla
(Mat 7:16-20; 12:33-35)
43 Tisʋŋ kae wan walbɛ'ɛdɛ. Tibɛ'ɛd mɛ kae wan walsʋmaa.
44 Ba baŋid tiis wʋsa nɛ ba wala ni. Gɔn'ɔs kʋ wal kekamaa, ka zaaŋ mɛ kʋ wal ganyaa.
LUK 6–7
45 Ninsʋŋ niŋid tʋʋm sʋma ka li yit nɛ o pʋpielim nɛ pʋtɛn'ɛsʋŋ linɛ yit o sʋnfʋn na. Ka nimbɛ'ɛd mɛ tʋm tʋʋmbɛ'ɛd ka li yi pʋtɛn'ɛbɛ'ɛd linɛ bɛɛ o sʋnfʋn la. Ninsaal nɔɔr pian'adnɛ bʋn lin wʋsaa bɛɛ o sʋnfʋn.
Tammɛɛdib ayi' la yɛla
(Mat 7:24-27)
46 “Bɔ ka ya buon man ye, ‘Zugsɔba, Zugsɔba,’ ka lɛɛ pʋ tʋm linɛ ka m yɛti ya la?
47 On wʋsa kɛɛn m san'an na ka kɛlisi m pian'ad ka tʋmi li, m na pa'ali ya on nwɛnɛ sɔ'.
48 O nwɛnɛ dau onɛ bɔɔd ye o mɛɛ o yir ka tuu paae tampiing zugʋ mɛ'. Ka saa ni ka ku'om pɛ'ɛl kɔlisi badigi dʋ na gɛɛl yir la, ka li pʋ luu, lin mɛ' sʋ'ʋŋa la zug.
49 Amaa onɛ wʋmi m pian'ad la ka pʋ tʋmi lii, on sɔb nwɛnɛ dau onɛ uusi mɛɛ o yir ka pʋ tu ka naan ɛɛnb ɛɛnbir la. Ka saa ni ka ku'om pɛ'ɛl kɔlisi badigi dʋ na gɛɛl yir la, ka li lu yimmʋ san'am hali.”
9 LUK 7
Yesu ti'eb Room soogia kpɛɛm tʋmtʋm
(Mat 8:5-13)
| 7 |
Yesu n tu'as nidib la nɛ'ɛnam wʋsaa naae la, ka keŋ paae Kapeenum.
2 Ka Room soogia kpɛɛm bɛɛ anina mɔr o tʋmtʋm onɛ ka o nɔŋ ka o bɛn'ɛdi bɔɔd kum.
3 Ka o wʋm Yesu labaar ka tʋm Jew dim kpɛɛm sieba o san'anɛ sɔs o ye o kena ti'eb o tʋmtʋm la.
4 Ka ba kɛn Yesu san'an naa bɛllim o hali yɛl ye, “Li nar ka fʋ sʋŋ dau kaŋa,
5 bɔzugɔ o nɔŋi ti buudi ka mɛ' la'asʋg dɔɔgʋ tisi ti.”
6 Ka Yesu dɔlli ba wa'ae, ti li'el yir la, ka soogia kpɛɛm la tʋm o zuanam ye ba yɛl o ye, “Zugsɔba, da namisi fʋ mɛŋa. M pʋ nar nɛ fʋn na kɛɛn m yin naa,
7 dinzug ka m tɛn'ɛs ye mam mɛŋ pʋ nar nɛ mam na kɛɛn fʋ san'an naa. Kʋdim pian'am nɛ nɔɔr ma'aa ka m tʋmtʋm la nyɛ laafi.
8 Ka man mɛŋ anɛ soogia, ka mɔri soogianam kpɛɛmnam banɛ sʋ'oe man, ka mam mɛ sʋ'oe sieba. Ka m ya'a yɛl ɔŋa ye o kem, o kennɛ, ka m ya'a yɛl o ye kem na, ka o kena. Ka m ya'a yɛli m tʋmtʋm ye o niŋim nɛ'ɛŋa, o niŋidnɛ.”
10 Yesu wʋm nɛ'ɛŋa la o daa lidig nɛ ka fɛndigi yɛl nimbanɛ dɔl o la ye, “M nam pʋ nyɛ yadda daan ka o nwɛnɛ dau kaŋaa, hali baa Israel teŋinɛ.”
11 Ka banɛ ka o tʋm la lɛbi ba soogia kpɛɛm la yinne nyɛ ka tʋmtʋm la mɔr laafi.
Yesu vʋ'ʋg pʋkɔɔnr biig
12 Ka bɛog nie ya'as ka Yesu keŋ Nain teŋin ka o nya'andɔlib nɛ nidib bɛdegʋ dɔl o.
12 Ka on paae teŋ la yaŋirin la o nyɛ ka ba ziid kum yit na. Biig onɛ kpi la da anɛ pʋkɔɔnr la biyimmir ka teŋ la nidib bɛdegʋ bɛɛ o san'an. 13 Ka Zugsɔb nyɛ pʋkɔɔnr la ka nimbaanlig gban'e o ka o yɛl o ye, “Da kaasida.”
14 Ka Yesu keŋ si'is sɔnduoya la. Ka nimbanɛ ziid la zi'en ka o ye, “Dasambila, m yɛtif ye, duom.”
15 Ka onɛ kpi la vʋ'ʋgi duoe zin'in ka pin'ili pian'ad. Ka o zaŋ o tis o ma.
16 Ka dabiem kpɛn' sɔ' mɛkama ka ba zun'e Wina'am ka yɛl ye, “Wina'am nɔdi'es tita'ar nie ti san'an na.” Ka lɛn ye, “Wina'am kena kaae o nidib.”
17 Ka labakaŋa widig Juda teŋgbauŋʋn nɛ tɛɛns banɛ kpi'e la wʋsa.
Joon da tʋm o nya'andɔlib Yesu san'an
(Mat 11:2-19)
18 Ka Joon nya'andɔlibi tu'as Joon nɛ'ɛŋanam wʋsa la, ka o buol o nya'andɔliba ayi'
19 tʋmi ba Zugsɔb la san'an ye ba bu'os o ye, “Fʋnɛ la an on ka ba da ye o na kena laa, bɛɛ ti gur sɔ' nya'aŋa?”
20 Ka ba paae Yesu san'an naa yɛl o ye, “Joon onɛ sʋʋd nidib Wina'am ku'om la tʋmi ti na ye ti bu'osif ye, ‘Fʋnɛ la an on ka ba da ye o na kena laa, bɛɛ ti gur sɔ' nya'aŋa?’”
21 Saŋkan la ka Yesu ti'eb ban'adnam bɛdegʋ banɛ mɔr wiim buudi-buudi nɛ banɛ ka kikiris dɔlli ba la, ka kɛ ka zʋnzɔɔs bɛdegʋ nini yʋ'ʋn nyɛt.
22 Ka o lɛbis ban ka Joon tʋm na la ye, “Lɛm yɛli Joon yanamɛ nyɛ si'el ka la'am wʋm si'el la. Zʋnzɔɔs nini nyɛt, ka waba ken, ka kʋkɔma nyɛt laafi, ka tʋbkpida wʋm, ka banɛ kpi vʋ'ʋg kumin, ka labasʋŋ la mɔɔli tis tadimnam.
23 Albareka bɛ nɛ onɛ pʋ bi'esid nɛ man yɛlaa.”
Yesu tu'as Joon onɛ sʋʋd nidib Wina'am ku'om la yɛla
24 Banɛ ka Joon daa tʋm na la lɛb la, ka Yesu pin'ili bu'os nidib Joon yɛla ye, “Ya daa yii keŋ mɔɔgin la bɔɔd ye ya nyɛ bɔ? Ya daa keŋ ye ya nyɛ mɔɔg kanɛ ka pɛbisʋg da'ad ka li dɛl bɛɛ?
25 Ya'a ka' ala, bɔ ka ya daa keŋ ye ya nyɛ? Ya daa keŋ ye ya nyɛnɛ dau ka o yɛ na'am fuudɛɛ? Ayei, nidib banɛ yɛɛd na'am fuud ka ba la'ad wʋsa an sʋm bɛ nɛ na'ayin.
26 Yɛlimini ma, ya daa keŋ ye ya nyɛnɛ Wina'am nɔdi'es bɛɛ? Asida ka m yɛti ya ye, ya daa nyɛ onɛ gat nɔdi'es.”
27† Dau kaŋa yɛla ka li da sɔb ye, “M na tʋmi m tʋmtʋm ka o dɛŋi fʋ tuonnɛ maal suosʋŋi fʋ zug la.”
28 Ka Yesu yɛl ye, “Pu'abi du'a sieba la wʋsa, sɔ' kae gat Joon nɛ, amaa onɛ kpɛlim kpaanr Wina'am sʋ'ʋlimin la gat Joon.”
29 Nidib la wʋsa nɛ lampɔdi'esidib la wʋm nɛ'ɛŋa la, ba daa siak ye Wina'am anɛ sida sɔb. Ba anɛ banɛ ka Joon daa pʋn sʋʋ ba ku'om.
30 Amaa Farisii dim nɛ gbauŋmi'idib la daa zan'as Wina'am zi'el si'em tisi ba la. Alazug, ba pʋ siak ka Joon sʋʋ ba ku'om.
31 Ka Yesu bu'os ye, “Dinzugɔ bɔ ka m na nɔki mak nɛ zʋmaʋŋ kaŋa nwa' nidiba? Ba nwɛnɛ bɔ? 32 Ba nwɛnɛ biisi di'em da'an ka yɛl taaba ye, ‘Ti zaŋ wiigi pieb ka ya pʋ wa'ada. Ka ti kumis kʋʋr ka ya pʋ kaasida.’ 33 Joon onɛ sʋʋd nidib Wina'am ku'om la daa kena lɔɔd nɔɔr ka pʋ nuud daam ka ba yɛl ye, kikirigi dɔl o.
34 Ka Ninsaal Biig la kena dit ka nuud ka ba yɛl ye, ‘Gɔsima, dau kaŋa anɛ dindiis nɛ danuud, ka an lampɔdi'esidib nɛ tʋʋmbɛ'ɛd dim zua.’
35 Amaa banɛ dɔl ya'am suor la pa'al ye ba mɔr ya'am.”
Yesu bɛ Simon onɛ an Farisii nid la yin
36 Farisii dim nid yinne da buol Yesu ye, o kɛɛn o yin na, ka ba di. Ka o keŋ yin la zin'in ye o di.
37 Ka teŋ la dim pu'a onɛ an tʋʋmbɛ'ɛd sɔb wʋm ye Yesu bɛ Farisii nid la yinne dit diib, ka mɔr tudaari ka li bɛ kɔlibvɛnligin ka li nyuug malis, 38 ka o kena zi'e kpi'e Yesu nɔba babaa kum ka o ninta'am luti mad Yesu nɔba. Ka pu'a la duus Yesu nɔba la nɛ o zuobid, ka muak o nɔba, ka kpa'ae tudaari la niŋi ba.
39 Ka Farisii nid onɛ buol Yesu la nyɛɛ li la, o yɛl o sʋʋnrin sa ye, “Dau kaŋa ya'a sid anɛ Wina'am nɔdi'es, o naan baŋin pu'a kanɛ si'is o la an sɔ',
† 7:27 Mal 3:1
LUK 7–8
bɔzugɔ pu'a nwa' anɛ tʋʋmbɛ'ɛd sɔb.”
40 Ka Yesu yɛl dau la ye, “Simon, m mɔr si'el ye m yɛlif.”
Ka o lɛbisi bu'os ye, “Pa'anna, li an bɔ?”
41 Ka Yesu yɛl o ye, “Dau da bɛ, ka mɔr o samditib ayi'. Ka yinne sam an yɔn kɔbisnu. Ka yinne la mɛ an yɔn pisnu. 42 Ka ban pʋ nyaŋi yɔ la zug, o bas ligidi la tisi ba. Babayi' la, anɔ'ɔn na nɔŋ ligidi daan la bɛdegʋ?”
43 Ka Simon lɛbis o ye, “M tɛn'ɛs ye, onɛ ka o sam zu'oe la.”
Ka Yesu yɛl o ye, “Fʋ sid baŋ ya.”
44 Ka o gi'e gɔs pu'a la, ka bu'os Simon ye, “Fʋ nyɛ pu'a nwaa?” Ka yɛl o ye, “Man kpɛn' fʋ yin na la, fʋ pʋ tisim ku'om ye m pie m nɔbaa. Amaa pu'a la pie m nɔba nɛ o ninta'am, ka duusi ba nɛ o zuobid.
45 Fʋ pʋ na'asimi muaki m kpɛnda wʋʋ ti malima nar si'em. Amaa man kpɛn' na la hali nɛ anwa, pu'a nwa' pʋ basi m nɔba babiligɔ.
46 Fʋ pʋ tisim kpaam ye m niŋim zugɔɔ, amaa o kpa'ae tudaari niŋim nɔba.
47 Dinzugɔ m yɛtif ye, Wina'am yis o tʋʋmbɛ'ɛd banɛ zu'oe la bas, ka o nɔŋilim linɛ zu'oe la pa'annɛ li. Amaa on ka Wina'am yis o tʋʋmbɛ'ɛd bi'ela bas la, o nɔŋilim anɛ bi'ela mɛn.”
48 Ka Yesu yɛl pu'a la ye, “Fʋ tʋʋmbɛ'ɛd la yi ya ka basif.”
49 Ka banɛ daa dit nɛ o la pian'ad nɛ taaba bu'osid ye, “Anɔ'ɔn nwaa yisid nidib tʋʋmbɛ'ɛdi basida?”
50 Ka Yesu yɛl pu'a la ye, “Fʋ yadda niŋir la faanf. Kem nɛ sumbʋgʋsʋm.”
LUK 8
Pu'abanɛ dɔl Yesu la yɛla
| 8 |
Nɛ'ɛŋa nya'aŋ ka Yesu keŋ tempʋʋsin nɛ teŋkpɛmisin mɔɔn Wina'am na'am labasʋŋ la yɛla. Ka o nya'andɔlib pii nɛ ayi' la dɔl o,
2 la'an nɛ pu'ab banɛ ka o kad kikirisi yisi ba ni ka ti'ebi ba wiim la. Pu'a yinne yʋ'ʋri buon Mɛɛri Magdalen, on ka kikiris ayɔpɔi da yii o ni la,
3 nɛ Joanna onɛ an Kuza pu'a. Kuza da anɛ kpɛɛm kanɛ gɔsid Na'ab Herod la'ad. Ka Susaana nɛ pu'ab bɛdegʋ mɛ paas banɛ mɔri ba mɛŋ la'adi sʋŋid Yesu nɛ o nya'andɔlib la.
Onɛ yi ye o waal o bʋmbʋʋda la siiliŋ
(Mat 13:1-9; Mak 4:1-9)
4 Ka nidib kpɛn yit tɛɛns kɔn'ɔb, kɔn'ɔbi ken Yesu san'an na. Ka ban la'as bɛdegʋ na la, ka o siilim siiliŋ ye,
5 “Dau daa yi ye o waal o bʋmbʋʋda. On waan la ka sieba lu suor zug ka nidib nɔɔ li ka niimis kena di,
6 ka sieba lu tampiing zug ka bul, ka ma'asim kae la zug ka li zɛndigi kpi.
7 Ka bʋmbʋʋdsieba lu gɔn'ɔs sʋʋgin duoe nɛ gɔn'ɔs la ka gɔn'ɔs la sianki ba.
8 Ka sieba lu teŋ sʋŋin ka duoe wal biili bɛdegʋ.” On yɛl nwa' la ka tans ye, “Onɛ mɔr tʋba na wʋm, on wʋm!”
Wina'am yɛlsu'ada la yɛla
(Mat 13:10-17; Mak 4:10-12)
9 Ka o nya'andɔlib la bu'os o siiliŋ la gbin.
10 Ka o yɛl ye, “Yanam anɛ banɛ baŋ Wina'am sʋ'ʋlim yɛlsu'ada. Amaa banɛ kpɛlim la wʋmmi li nɛ siilima pʋʋgin, ka ba na gɔs ka kʋ nyɛɛ, ka na wʋm ka kʋ baŋi li gbinnɛ.”
Bʋmbʋʋda siiliŋ la gbin
(Mat 13:18-23; Mak 4:13-20)
11 Siiliŋ la gbin anɛ anwa. Bʋmbʋʋda la anɛ Wina'am pian'ad la.
12 Ka bʋmbʋʋda banɛ lu suor zug la anɛ banɛ wʋm pian'ad la amaa ka Sʋntaana kena li' ba sʋnya ka ba kʋ nyaŋi siak ka tiligɛ.
13 Ka bʋmbʋʋda banɛ lu tampiing zug la anɛ banɛ wʋm pian'ad la ka di'e li nɛ sumalisim, amaa ka li pʋ kpɛn' ba sʋnya ni sʋ'ʋŋaa, ka ba siaki li bi'ela. Ka makir saŋa ya'a kena ka ba bas.
14 Ka bʋmbʋʋda banɛ lu gɔn'ɔs sʋʋgin la anɛ banɛ wʋm pian'ad la, ka dunia yɛla nɛ dunia bɔɔdim nɛ areza'as ya'amlɛog kpɛn' ba sianki ba ka ba pʋ nyaŋi wal walaa.
15 Ka bʋmbʋʋda banɛ lu teŋ sʋŋin la anɛ banɛ wʋm pian'ad la ka gban'e li sʋ'ʋŋa nɛ ba sʋnya wʋsa ka mɔdigi wal wala la.
Ba pʋ la'aŋid fitiri pibin na
(Mak 4:21-25)
16 “Sɔ' pʋ nyu'od fitir ka nɔkid si'eli pibini li, bɛɛ su'a li dʋg lɛuŋʋ nɛ. O na su'unli li si'el zug, ka banɛ kpɛn'ɛd la nyɛ nɛɛsim.
17 Si'el kae na su'a ka kʋ yi paalʋ naa, ka si'el kae na ligil ka ba kʋ baŋɛ, bɛɛ ba mɔri li yi paalʋ nii.
18 Dinzugɔ, baŋimi yanamɛ kɛlisid si'em la sʋ'ʋŋa. Ka on wʋsa mɔr si'el ba na paas o, amaa onɛ ka' si'ela hali on tɛn'ɛs ye o mɔr bi'ela la ba na di'e li o san'an.”
Yesu ma nɛ o pitib la yɛla
(Mat 12:46-50; Mak 3:31-35)
19 Ka Yesu ma nɛ o pitib kena ka pʋ nyaŋi paae o san'anɛ, nidib la zu'oe la zug.
20 Ka sɔ' yɛl o ye, “Fʋ ma nɛ fʋ pitib bɛ samannin bɔɔdif.”
21 Ka o lɛbisi ba wʋsa ye, “Banɛ an m ma nɛ m pitib la anɛ banɛ wʋm Wina'am pian'ad ka siaki li la.”
Yesu nɛ sisi'em la yɛla
(Mat 8:23-27; Mak 4:35-41)
22 Ka daar yinne, ka Yesu nɛ o nya'andɔlib kpɛn' anrʋŋʋn, ka o yɛli ba ye, “Kɛlli ka ti lɔ'ɔŋ bɛuŋ la gbɛog.” Ka ba duoe ken.
23 Ka ban lɔ'ɔŋid la, ka gbɛɛm zɛɛg Yesu ka o gbisid. Ka sisi'etita'ar duoe ku'om la zug, ka ku'om kpɛn'ɛd anrʋŋ la pʋʋgin, ka li lieb tɔɔgʋ tisi ba.
24 Ka ba keŋ nie Yesu yɛl o ye, “Pa'annaa, pa'annaa, ku'om bɔɔdi dii ti.” Ka on nie la, o yɛl sisi'em la nɛ ku'opila la ye, “Niŋimi fɔɔn.” Ka li kpɛn lɛbi fɔn baanlimm.
25 Ka o bu'osi ba ye, “Bɔ ka ya pʋ niŋ man yadda?” Ka dabiem kpɛn' ba. Ka ba lidigi bu'os taaba ye, “Abɔ dau nwaa pian'ad sisi'em nɛ ku'om ka ba siakid o nɔɔrɛ?”
Yesu nɛ kikirig sɔb la yɛla
(Mat 8:28-34; Mak 5:1-20)
26 Ka ba paae Gerasene teŋgbauŋʋn linɛ kpi'e Galile sʋ'ʋlim la.
27 Ka Yesu n yi anrʋŋ pʋʋgin la. Ka teŋ la nid yinne tʋ'ʋs o, onɛ ka kikiris dɔl o. O pʋ yɛɛd fuugɔ, hali ka li yuug, ka o mɛ pʋ gbɛɛnd yinnɛ, ka bɛ nɛ yaad zin'igin.
28–29 Nɔɔr bɛdegʋ ka kikirig la ɛɛnti duo o, ka ba lɔɔ o nɔba nɛ o nu'us wʋsa nɛ bana ka gur o. Ka o kɛns bana la. Ka kikirig la kad o kpɛn'ɛs mɔɔgin. Ka Yesu yɛl kikirig la ye, “Yim ka bas dau la.” Ka dau la nyɛ Yesu la, ka igin o tuonnɛ tansid nɛ kʋkɔtita'ari bu'osid ye, “Yesu, Wina'am onɛ ka' tiraan la biiga, bɔɔ bɛ man nɛ fʋn sʋʋginɛ? M sɔsidif ye fʋ da daami ma.”
30 Ka Yesu bu'os o ye, “Fʋ yʋ'ʋrɛ?” Ka o lɛbis ye, “M yʋ'ʋri buon Babiga.” Bɔzugɔ kikiris bɛdegʋ dɔl o.
31 Ka ba bɛllim Yesu nɛ nimmua ye, o da kadi ba ka ba keŋ bʋmbɔk zulʋŋ la nii.
32 Ka kukurnam bɛdegʋ bɛ zuor zugin tuud si'elnam. Ka kikiris la sɔs Yesu ye o tisi ba nɔɔr, ka ba kpɛn' kukurnam la ni. Ka o siaki tisi ba.
33 Ka kikiris la bas dau la ka keŋ kpɛn' kukurnam la ka ba wʋsa zɔɔ sig bɛuŋ pʋʋgin, ka ku'om dii ba.
34 Ka banɛ guri ba la nyɛ bʋn linɛ maal la, ba zɔɔ keŋ tempʋʋsin nɛ teŋkpɛmisinɛ pian'ad linɛ maal la wʋsa.
35 Ka nidib keŋ ye ba gɔs bʋn linɛ pa'a maal la, ka kɛn Yesu san'an na nyɛ dau kanɛ ka kikiris yi ka bas o la. Ka o yɛ fuudi zin' Yesu tuon ka yʋ'ʋn mɔr ya'am sʋ'ʋŋa. Ka dabiem kpɛn' ba.
36 Ka banɛ nyɛ la tu'asi ba Yesu niŋ si'em ti'eb dau kanɛ ka kikiris pa'a dɔl o la.
37 Ka Gerasene teŋ gbauŋ nidib la wʋsa sɔs Yesu ye, o yimi ba teŋin, bɔzugɔ dabiem bɛdegʋ kpɛn' ba. Ka Yesu kpɛn' anrʋŋ ye o lɛbi kul.
38 Ka dau kanɛ ka kikiris la yi ka bas o la, sɔs Yesu nɔɔr ye o dɔl o. Ka Yesu zan'as ka yɛl o ye,
39 “Lɛm kuli fʋ mɛŋ yinnɛ pa'al bʋn linɛ wʋsa ka Wina'am maali tisif la.” Ka o keŋ tempʋʋsin wʋsa mɔɔn Yesu niŋ si'el bɛdegʋ tis o la.
Jairus pu'ayua nɛ pu'a onɛ si'is Yesu fuug la yɛla
(Mat 9:18-26; Mak 5:21-43)
40 Ka Yesu lɛn lɔ'ɔŋ bɛuŋ la gʋʋr yinne la, ka nidib bɛdegʋ pʋn la'asi zi'e gur o.
41 Ka dau yinne onɛ an la'asʋg dɔɔg kpɛɛm ka o yʋ'ʋr buon Jairus kena igin Yesu tuonnɛ sɔs o ye, o kem o yin na;
42 ka o pu'ayua yimmir onɛ an yʋma pii nɛ ayi' bɔɔdnɛ kum. Yesu n dɔl o wa'ae la, ka nidib bɛdegʋ dɔl ka mik o.
43 Ka pu'a sɔ' daa bɛɛ anina bɛn'ɛd ka ziim yuod o yʋma pii nɛ ayi', ka o san'am on mɔr si'el wʋsa tiim dim san'an, amaa sɔ' pʋ nyaŋi ti'eb oo.
44 Ka o kena kaae Yesu nya'aŋi si'is o fuug nɔɔr ka o ziim yuob la gu'oe.
45 Ka Yesu bu'os ye, “Anɔ'ɔnɛ si'isi ma?” Ka sɔ' wʋsa ki'is. Ka Pita yɛl ye, “Zugsɔba, nidib la wʋsa la'asi giligi mikif si'em nwa'.”
46 Ka Yesu yɛl ye, “Sɔ' si'isim, bɔzugɔ paŋi yii m san'an la zug ka m baŋ.”
47 Pu'a la baŋ ye o kʋ nyaŋi su'a nɛ Yesu la ka o kena nɛ kikirʋgʋ luu vanbin o tuon, ka pian' pa'al ka nimbanɛ bɛ anina wʋsa wʋm linɛ zug ka o si'is Yesu, nɛ on paam laafi vuguri la yɛla.
48 Ka Yesu yɛl o ye, “M pu'ayua, fʋ yadda niŋir kɛ ka fʋ nyɛ laafi. Kem nɛ sumbʋgʋsʋm.”
49 Ka on nam kpɛm pian'ad la ka nid yi la'asʋg dɔɔg kpɛɛm la yin naa, yɛl Jairus ye, “Fʋ pu'ayua la kpiya. Dinzug da lɛn daam Pa'an la ya'asɛ.”
50 Ka Yesu wʋm ka yɛl Jairus ye, “Da zɔt dabiem, kʋdim niŋim yadda ka fʋ pu'ayua la na paam laafi.”
51 Ka Yesu keŋ paae yin la ka pʋ kɛ ka sɔ' dɔl o kpɛn yin laa, asɛɛ Pita nɛ Jemes nɛ Joon nɛ biig la saam nɛ o ma.
52 Ka onɛ wʋsa bɛ yin la kum ka fabin biig la yɛla. Ka Yesu yɛli ba ye, “Da kaasidi ya, ka biig la gbisidnɛ ka o pʋ kpii.”
53 Ka ba la' o, ban mi' ye biig la kpinɛ la zug.
54 Ka Yesu gban'e biig la nu'ug ka buol o ye, “M biiga duom.”
55 Ka o nyɔvʋr lɛb na, ka o duoe tɔ'ɔtɔ. Ka o yɛli ba ye, “Tisimi biig la si'el ka o di.”
56 Ka o ba' nɛ o ma lidig hali, amaa ka Yesu yɛli ba ye ba da yɛl sɔ' linɛ maalɛ.
LUK 9
Yesu tʋm o nya'andɔlib pii nɛ ayi' la
(Mat 10:5-15; Mak 6:7-13)
| 9 |
Yesu daa buol o nya'andɔlib pii nɛ ayi' la la'as, ka tisi ba paŋ nɛ kpi'euŋ ye ba nyaŋi kad kikiris ka ma'ae ban'as,
2 ka tʋmi ba ye ba mɔɔl Wina'am na'am ka ti'eb ban'adnam.
3 Ka yɛli ba ye, “Da zaŋi si'eli ya ken la zugɔ. Da zaŋ dansaar bɛɛ kɔlʋg bɛɛ diib bɛɛ ligidii, hali baa fuud ayi'.
4 Zin'ikanɛ wʋsa ka ba di'e ya, yanam zin'inim yikan nii ti paae yanamɛ na ti yi teŋin la
5 Ka zin'ikanɛ wʋsa ka nidib pʋ di'e ya, yanam yim teŋ kan ni ka kpa'asi ya nɔba titani bas anina. Dinɛ na pa'ali ba ye ba pʋ tʋm tʋʋm sʋmaa.”
6 Ka nya'andɔlib la yii keŋ teŋkpɛmis wʋsa nii mɔɔn labasʋŋ la ka ti'ebid ban'adnam.
Herod zi' Yesu an sɔ'
(Mat 14:1-12; Mak 6:14-29)
7 Na'ab Herod daa wʋm linɛ wʋsa niŋid la, ka li pak o hali bɛdegʋ, bɔzugɔ ninsieba daa yɛl o ye Joon onɛ daa sʋʋd nidib ku'om la vʋ'ʋg kumin.
Ka sieba ye Elaja kena, ka sieba ye Wina'am nɔdi'es kʋdig yinne vʋ'ʋg kumin.
9 Ka Herod yɛl ye, “Man daa fi'ig Joon zug, ka ɔŋa aan anɔ'ɔn ka m wʋm o yɛla nwa'?” Ka o kpɛ'ɛŋid ye o nyɛ Yesu.
Yesu diis dap tusa anu
(Mat 14:13-21; Mak 6:30-44; Jon 6:1-14)
10 Ka tʋmtʋmnib la lɛb na ka tu'as Yesu ban tʋm si'el wʋsa. Ka o dɔl ban ma'aa yii keŋ teŋ si'a ka li yʋ'ʋr buon Besaida.
11 Ka nidib la baŋ la, ka kad o bugir. Ka o di'e ba ka pian' Wina'am yɛla tisi ba ka ti'eb ban'adnam.
12 Ka winnigi bɔɔd kpɛn'ɛb la ka nya'andɔlib pii nɛ ayi' la kɛɛn o san'an na yɛl o ye, “Kɛl ka nidib la keŋ teŋkpɛmisin nɛ tempʋbanɛ kpi'e ba san'an
la nyɛ diib nɛ gbɛɛnsa; ka zin'ikaŋa nwa' ka' si'ela.”
13 Amaa ka Yesu yɛli ba ye, “Yanam mɛŋ tisimi ba diib ka ba di.”
Ka ba lɛbis ye, “Tinamɛ mɔr si'el wʋsa la anɛ bodobodo bibis anu nɛ zimi ayi'. Fʋ bɔɔd ye ti keŋ da' diib na tis nimbama wʋsa?”
14 Dap kal daa anɛ wʋʋ tusa anu. Ka Yesu yɛl nya'andɔlib la ye, “Kɛlli ka nidib la zin'in, pisnu nu.”
15 Ka ba kɛ ka ba zin'in ala.
16 Ka Yesu zaŋ bodobodo gbila anu nɛ zimi ayi' la ka gɔdigi gɔs saazugʋ pʋ'ʋs Wina'am bareka, ka gbin'es bodobodo la tis o nya'andɔlib la ka ba tɔnd nidib la.
17 Ka ba wʋsa dii tig ka nya'andɔlib la vaae linɛ kpɛlim la ka li pɛ'ɛl pɛɛd pii nɛ ayi'.
Pita yɛl Yesu an sɔ' la yɛla
(Mat 16:13-19; Mak 8:27-29)
18 Daar yinne ka Yesu bɛ zin'isi'a o kɔn'ɔkɔn' sɔsid Wina'am ka o nya'andɔlib la bɛɛ o san'an, ka o bu'osi ba ye, “Nidib yɛt ye m aan anɔ'ɔnɛ?”
19 Ka ba lɛbis ye, “Sieba ye fʋ anɛ Joon onɛ sʋʋd nidib ku'om la ka sieba ye, fʋ anɛ Elaja, ka sieba ye fʋ anɛ Wina'am nɔdi'es kʋdig yinne onɛ vʋ'ʋg kumin na.”
20 Ka o bu'osi ba ye, “Ka yanam on ye mam aan anɔ'ɔnɛ?” Ka Pita lɛbis ye, “Fʋ anɛ Kristo la.”
Yesu tu'as o namisʋg yɛla
(Mat 16:20-28; Mak 8:30–9:1)
21 Ka Yesu yɛli ba nɛ kpi'euŋ ye ba da yɛl sɔ',
22 ka ye, “Li nar ye Ninsaal Biig la namis bɛdegʋ ka teŋgbauŋ kpɛɛmnam nɛ maanmaannib kpɛɛmnam nɛ gbauŋmi'idib zan'as o, ka kʋʋ o, ka daba atan' daar ka o vʋ'ʋg kumin.”
23 Ka o yɛli ba wʋsa ye, “Sɔ' ya'a ye o dɔl man, asɛɛ o ki'is o mɛŋ ka zaŋ o kum dapuudir daar wʋsa dɔl mam.
24 Ninkanɛ wʋsa bɔɔd ye o gu' o nyɔvʋr on daana na kɔ'ɔŋi li, amaa ninkanɛ kɔ'ɔŋ o nyɔvʋr man zug o na gu' li.
25 Ninsaal ya'a nyɛ dunia bʋna wʋsa ka kɔ'ɔŋ o nyɔvʋrɛ, li nyɔɔd an bɔ?
26 On mɛkama zɔ mam nɛ m pian'ad la nyan, Ninsaal Biig la mɛ na ti zɔɔ o nyan, o ya'a ti kena nɛ o girima nɛ o Ba' nɛ maliaksʋma girima la. 27 M yɛti ya nɛ sida ye, ya sieba bɛ kpɛla kʋ kpii asɛɛ ba ti nyɛ Wina'am na'am la.”
Yesu tiakir la yɛla
(Mat 17:1-8; Mak 9:2-8)
28 Yesu pian' nɛ'ɛŋa la, li daba anii nya'aŋ ka o zaŋ Pita nɛ Jemes nɛ Joon dʋ zuor zug ye o sɔs Wina'am.
29 On nam sɔsid Wina'am la ka o nindaa tiak ka o fuud pɛligi nyɛɛn. 30 Ka dapa ayi' nie o san'an vuguri naa pian'ad nɛ o. Ba da anɛ Moses nɛ Elaja
31 banɛ nie nyɛɛn hali pian'ad nɛ Yesu on na kpi Jerusalem wʋʋ Wina'am da yɛl si'em la.
32 Ka Pita nɛ o taaba la gbisid, ka duoe nyɛ Yesu nyɛɛn si'em nɛ nidib ayi' banɛ la'am zi'e o san'an la.
33 Ka nidib ayi' la da bɔɔd ken la, Pita yɛl Yesu ye, “M Zugsɔba, li an sʋm ye ti kpɛlim kpɛla. Kɛl ka ti ti' sʋga atan', fʋn din yinne, Moses din yinne, Elaja mɛn din yinne.” O da kʋdim pian'anɛ ka zi' on yɛt si'ela.
34 On nam pian'ad la ka saŋgbauŋ ma'asim kena lusi ba. Ka dabiem gban'e nya'andɔlib la saŋgbauŋ la lusi ba la zug.
35 Ka kʋkɔr yi saŋgbauŋ la ni na yɛl ye, “Oŋa aan m Biig, on ka m gaŋ. Kɛlisimi nɛ o.”
36 Kʋkɔr la pian' naae la ka ba nyɛ ka Yesu gʋllim zi'e. O nya'andɔlib la daa zaŋ lina wʋsa niŋi ba pʋtɛn'ɛrin ka pʋ yɛl sɔ' ban nyɛ si'el saŋkan la.
Yesu ti'eb bikan ka kikirig mɔr o la
(Mat 17:14-18; Mak 9:14-27)
37 Ka bɛogʋ daa nie ka ba sig zuor la zug na la, nidib bɛdegʋ daa tʋ'ʋs Yesu.
38 Ka dau sɔ' kpɛn tans nidib la sʋʋgini yɛl ye, “Pa'anna, m bɛlimif nɛ, gɔsimi m biig nwaa tisim bɔzugɔ o anɛ m biyimmir.
39 Ka kikirig ɛɛnti kpɛn' o ka o kaasid ka lut kpisiŋkpi'ir, ka nintɔɔnd yit o nɔɔrin, ka kʋdim pʋ siak ye li yi ka bas o
40 Ka m bɛlimi fʋ nya'andɔlib ye ba kadi li yis ka ba pʋ nyaŋɛ.”
41 Ka Yesu lɛbis ye, “Aba! Yanam an bɔnam nidibi kʋdim pʋ mɔr yadda ka mɛ pʋn zi' linɛ nar ye ya tʋm. Nɔɔr ala ka m ye m mɔdig nɛ ya?” Ka Yesu yɛl dau la ye, “Mɔr biig la na.”
42 Ka biig la kenna la, ka kikirig la lug o ka o nwi'e. Ka Yesu tans kikirig la ye, “Basim biig la!” Ka kikirig la bas o ka o paam laafi, ka Yesu zaŋ o lɛbisi tis o saam.
43 Ka Wina'am paŋ tita'ar tʋʋma la lidigi ba wʋsa.
Yesu tu'as o kum la yɛla
(Mat 17:22-23; Mak 9:30-32)
Nidib la wʋsa daa nan kpɛn lidig nɛ Yesu niŋid si'el la, ka o yɛl o nya'andɔlib la ye,
44 “Kɛlli ka pian'abama kpɛn' ya tʋba ni ka da tamiyaa. Ba na zaŋ Ninsaal Biig la niŋ ninsaalib nu'usin.”
45 Amaa ka pian'ad la ligili ba, ka ba pʋ baŋi li gbinnɛ. Ka dabiem mɔri ba nɛ ban na bu'os o.
Kpi'euŋ nwa'asʋg la yɛla
(Mat 18:1-5; Mak 9:33-37)
46 Ka ba nwa'asid taaba kpi'euŋ yɛla.
47 Ka Yesu baŋ linɛ bɛɛ ba sʋnya ni ka nɔk biigi zi'el o san'an,
48 ka ye, “Onɛ wʋsa di'e bikaŋa m yʋ'ʋr zug di'enɛ man, ka onɛ mɛ di'e man di'enɛ onɛ tʋm man la na, bɔzugɔ onɛ wʋsa an biigi ya san'an la aan ya kpɛɛm.”
Onɛ aan ti tʋmtʋm tiraan la yɛla
(Mak 9:38-40)
49 Ka Joon yɛl ye, “Zugsɔba, ti nyɛ dau ka o kad kikirisi yisidi fʋ yʋ'ʋr zug, ka on ka' tinam nid yinne la zug ka ti yɛl o ye o basim.”
50 Ka Yesu lɛbis ye, “Da kati nɛ o, ka on mɛkama pʋ kisi ti anɛ ti nid.”
Samaria teŋ si'a zan'as Yesu la yɛla
51 Saŋa la da li'el nɛ ban na zaŋ Yesu keŋ agɔl la, ka o gban'e ye asɛɛ ka o keŋ Jerusalem. O da tʋm nidib ka ba gaad o tuonnɛ
52 keŋ kpɛn' Samaria tembilin ye ba ti'ebi gur o.
53 Ka nimbanɛ bɛ anina la pʋ di'e o, on ken Jerusale
54 Ka o nya'andɔlib Jemes nɛ Joon nyɛ nɛ'ɛŋa la, ba bu'os o ye, “Zugsɔba, fʋ bɔɔd ye ti buol bugum ka li yi agɔl na dii baa?” 55 Ka Yesu fɛndig tansi ba ye ba kɛl,
56 ka ba tɔɔm teŋ.
LUK 9–10
Banɛ bɔɔd Yesu dɔllim la yɛla
(Mat 8:19-22)
57 Ka ban ken suor zug la ka dau sɔ' yɛl Yesu ye, “Man na dɔlli keŋ fʋn na keŋ zin'isi'a wʋsa.”
58 Ka Yesu lɛbis ye, “Teŋinbʋmis mɔri ba vɔnt, ka niimis mɔr tɛɛd, amaa Ninsaal Biig la pʋ mɔr zin'ikan ka o na diginɛ vʋ'ʋsɛ.”
59 Ka o yɛl dau sɔ' mɛn ye, “Dɔllim.” Amaa ka dau la yɛl o ye, “Kɛl ka m keŋ mumi m saam yiiga.”
60 Ka Yesu lɛbis o ye, “Kɛl ka banɛ kpi mumi ba mɛŋ kum. Amaa fʋn kem mɔɔl Wina'am na'am labaar la.”
61 Ka dau yinne yɛl ye, “Zugsɔba, m na dɔllif, amaa kɛl ka m keŋ kɛɛsim yidim.”
62 Ka Yesu lɛbis o ye, “Onɛ wʋsa gban'e na'akuoda kʋʋnr ye o kua ka gɔsid nya'aŋ, o pʋ sʋ'ʋm ye o tʋm Wina'am sʋ'ʋlim tʋʋmaa.”
LUK 10
Yesu tʋm o nya'andɔlib pisyɔpɔi la
10
Nɛ'ɛŋa nya'aŋ ka Yesu lɛn gaŋ dap pisyɔpɔi sieba tʋmi ba ayi', yi' ye ba gaad tuonnɛ keŋ tɛɛns nɛ zin'ibanɛ wʋsa ka o mɛŋ bɔɔd ye o keŋ la.
2 Ka yɛli ba ye, “Pɔɔg la zʋʋd zu'oya, amaa ka tʋmtʋmnib la pɔɔd. Dinzug sɔsimi pɔɔg la sɔb ka o bɔ tʋmtʋmnib na paas pɔɔgin la.
3 Kemi, ka m tʋmi ya nɛ nwɛnɛ pɛbibisi bɛ kunduna sʋʋgin nɛ.
4 Da zaŋ pɔtmaan bɛɛ kɔlʋg bɛɛ ta'adaa, mɛ da zi'eni pʋ'ʋs sɔ' suor zugɔ.
5 “Ka ya ya'a kpɛn' yisi'a ni, yiiga, yanam yɛlim ye, ‘Sumbʋgʋsʋm bɛ nɛ yikaŋa!’
6 Ka sumbʋgʋsʋm nid ya'a bɛ anina, ya sumbʋgʋsʋm na bɛɛ o zugin. Ka sumbʋgʋsʋm nid ya'a kae, li na lɛbi ya san'an.
7 Sigimi yikan ni nuud ka dit ban tisi ya si'el, bɔzugɔ li nar ye tʋmtʋm di'e o yɔɔd. Ka da lɔmisidi yaa gbɛɛnda.
8 “Ya ya'a ɛɛnti kpɛn teŋ si'a ni ka ba di'e ya, yanam dim linɛ ka ba tisi ya,
9 ka ti'eb ban'adnam teŋ kan ni ka yɛl nidib la ye, ‘Wina'am na'am la li'eli ya san'an.’
10 Ka ya ya'a kpɛn' teŋ si'a ni ka ba pʋ di'e ya, yanam yim suorin ka yɛl ye,
11 ‘Hali ya teŋ uusʋg linɛ taae ti nɔba la, ti kpa'asi li ka li aan ya zugin yɛl. Amaa baŋimi ye Wina'am na'am la li'el ya.’
12 M yɛti ya nɛ ye, sariakadib daar la li na tɔi tis teŋ kan dimi gat Sodom teŋ dim.” LUK 10
Tɛɛns banɛ pʋ niŋ Yesu yadda la yɛla
(Mat 11:20-24)
13 “Woo, Korazin nɛ Besaida dima, li na tɔi tisi ya. Tʋʋm titada linɛ daa niŋi ya san'an la, ya'a daa niŋin Taya nɛ Sidon tɛɛnsin ba naanɛ tiakini ba tʋʋmbɛ'ɛd ka yɛɛn bɔto fuudi zin'in tampɛligimini pa'al ye ba tiakya.
14 Amaa sariakadib daar la li kʋ tɔi tis Taya nɛ Sidon dimi paae yanama.
15 Ka yanam Kapeenum dima, ya tɛn'ɛs ye ya na dʋʋ ti paae saazugɔ? Ayei, ya na sig kum zin'igin.”
16 Ka Yesu yɛl o nya'andɔlib la ye, “Onɛ wʋmi ya pian'ad wʋmnɛ man pian'ad, ka onɛ ki'isi ya, ki'isnɛ man. Ka onɛ ki'is man la ki'isnɛ onɛ tʋm man la na.”
Nya'andɔlib pisyɔpɔi la lɛb na
17 Ka dap pisyɔpɔi la yʋ'ʋn lɛb na nɛ sumalisim yɛt ye, “Zugsɔba, hali ti nyaŋ kikirisi fʋ yʋ'ʋr la zug.”
18 Ka Yesu lɛbisi yɛli ba ye, “M nyɛ ka Sʋntaana naan arezana nii lu nwɛnɛ saa ɛɛnti iank si'em la.
19 Gɔsimiya, m tisi ya paŋ ye ya nɔ namis nɛ wiigi hali ka nyaŋ dataa a nɛ o paŋ wʋsa ka si'el-si'el kae na daami yaa.
20 La'an nɛ wala da kɛ ka ya sʋnya malis yanamɛ nyaŋ kikiris la zugɔ, amaa kɛlli ka ya sʋnya malis nɛ ya yʋda sɔb arezana ni la zug.”
Yesu maal sumalisim la yɛla
(Mat 11:25-27; 13:16-17)
21 Saŋkan la ka Siig Kasi la kɛ ka Yesu sʋnf pɛ'ɛl nɛ sumalisim ka o yɛl ye, “M Ba', fʋn kanɛ sʋ'oe arezana nɛ dunia la, m pʋ'ʋsif bareka nɛ fʋn su'a yɛlbama ka gbauŋmi'idib nɛ mi'ilim dim zi' li, ka lɛɛ nie lii pa'al bibibis la. Asida, m Ba', nɛ'ɛŋa aan fʋ bɔɔdim linɛ an sʋ'ʋm tisif.”
22 “M Ba' tisim si'el wʋsa. Ka sɔ' zi' Biig la an sɔ', asɛɛ Ba' la, ka sɔ' mɛ zi' Ba' la an sɔ', asɛɛ Biig la nɛ banɛ ka Biig la bɔɔd ye o nie pa'ali ba la.”
23 Ka Yesu fɛndigi gɔs o nya'andɔlib la ka yɛli ba baanlimm ye, “Albareka bɛ nɛ banɛ ka ba nini nyɛt yanamɛ nyɛt si'el la.
24 Ka m yɛti ya ye, Wina'am nɔdi'esidib nɛ na'anam bɛdegʋ da bɔɔd hali ye ba nyɛɛ li ka pʋ nyɛɛ, ka bɔɔd ye ba wʋm linɛ ka ya wʋm la ka pʋ wʋm.”
Samaritan ninsʋŋ la siiliŋ
25 Ka wada pa'an sɔ' duoe zi'en ye o mak Yesu, ka yɛl ye, “Pa'anna, m na niŋ wala ka nyɛ nyɔvʋr linɛ ka' naarɛ?”
26 Ka Yesu lɛbisi yɛl o ye, “Bɔ ka ba sɔb Wina'am wada la ni? Fʋ karim ka li gbin an bɔ?”
27 Ka o lɛbis o ye, “Nɔŋim Wina'am onɛ aan fʋ Zugsɔb la nɛ fʋ sʋnf wʋsa, nɛ fʋ siig wʋsa, nɛ fʋ paŋ wʋsa, nɛ fʋ ya'am wʋsa, ka nɔŋi fʋ tiraan nwɛnɛ fʋn nɔŋi fʋ mɛŋ si'em la.”
28 Ka Yesu lɛbis o ye, “Fʋ yɛl sʋ'ʋŋa. Niŋim wala, ka fʋ na vʋe.”
29 Ka on bɔɔd ye o pa'al ye o anɛ ninvʋsʋŋ la, o bu'os Yesu ye, “Anɔ'ɔnɛ aan m kpi'a?”
30 Ka Yesu lɛbis o ye, “Dau sɔ' daa yi Jerusalem teŋin ken Jeriko teŋin. Ka faandib gi' o ka yɛɛs o fuud, ka bʋ' o kʋʋsir, ka bas o ka keŋ.
31 Ka li niŋ nyalima ka Wina'am maanmaan dɔl suokan la. Ka on nyɛɛ o la, o bienɛ gaad ka bas o.
32 Ala mɛn ka Levi nid kena nyɛɛ o ka bie gaad ka bas o. 33 Amaa Samaritan nid daa kena nyɛɛ o, ka zɔɔ o nimbaanlig,
34 ka kɛɛn o san'an na ka zaŋ kpaam nɛ daam bu'oe niŋ o fɛn'ɛd la ka viligi ba, ka zaŋ o ban'al o bʋŋ zugʋ mɔr o keŋ saam yiri gɔs o yɛla.
35 Ka bɛog nie, ka o yis anzurifa ligidi ayi' tis onɛ gur saam yir la, ka yɛl o ye, ‘Gɔsim o yɛla. Ka ligidi la ya'a pɔ'ɔg, m ya'a ti lɛb na, m na yɔɔf.’”
36 Ka Yesu bu'os o ye, “Nidib atan' nwa', anɔ'ɔn ka fʋ tɛn'ɛs ye o niŋ dau kan ka faandib gi' la wʋʋ o anɛ o kpi'a?”
37 Ka wada pa'an la lɛbis ye, “Onɛ zɔɔ o nimbaanlig la.” Ka Yesu yɛl o ye, “Kem, ka mɛ niŋ ala.”
Mɛɛri nɛ Marta la yɛla
38 Ka ban daa ken la, Yesu daa ti kpɛn' tembil si'a ni. Ka pu'a onɛ ka o yʋ'ʋr buon Marta di'e ba o yin. 39 Ka o mɔr pitʋ, ka o yʋ'ʋr buon Mɛɛri. Ka Mɛɛri zin' Zugsɔb la tuonnɛ kɛlisid o pa'ala.
40 Amaa tʋʋma la daa galisi tis Marta bɛdegʋ, ka o keŋ Yesu san'anɛ yɛl o ye, “M Zugsɔba, li pʋ daamif nɛ m pitʋ la kɛ ka man tʋmmi m kɔn'ɔkɔn' la? Yɛlim o ka o kena sʋŋim.”
LUK 10–11
41 Ka Zugsɔb la lɛbisi yɛl o ye, “Marta, Marta, si'elnam bɛdegʋ daami fʋ sʋʋnr,
42 amaa bʋn yinne ma'aa an sʋm nar ye fʋ paam. Mɛɛri gaŋ bʋnsʋŋ, din ka ba kʋ maligim di'e o nii.”
LUK 11
Yesu pa'al winsɔsʋg yɛla
(Mat 6:9-13; 7:7-11)
11
Yesu daa sɔsid Wina'am zin'isi'a, ka on ti naae la, o nya'andɔlib la yinne yɛl o ye, “Zugsɔba, pa'alimi ti tinamɛ na sɔs Wina'am si'em nwɛnɛ Joon n pa'al o nya'andɔlib si'em la.”
2 Ka o yɛli ba ye, ya ya'a sɔsid, yanam yɛlim ye, “Ti Ba' onɛ bɛ arezana ni, ka fʋ yʋ'ʋr mɔr girima, fʋ na'am na kena.
3 Tisimi ti dabisir wʋsa nɛ li diib,
4 ka yisi ti taali bas, nwɛnɛ tinamɛ kɛt banɛ tʋmmi ti taali basid si'em la. Ka da kɛ ka ti kpɛn' makir pʋʋginɛ.”
5 Ka o yɛli ba ye, “Anɔ'ɔnɛ bɛɛ ya san'anɛ mɔr o zua, ka o na keŋ o san'an yʋ'ʋŋ tisʋʋsi yɛl o ye, ‘M zua, tisim sa'apɛla atan'
6 ka m zua yi suor zugʋ sigim na, ka m ka' si'eli na tis o ka o dii.’
7 “Ka o na bɛ dɔɔgin sa ka lɛbisi yɛl o ye, ‘Da daamidi ma, ka m yɔɔm za'anɔɔr nɛ ka dig nɛ m biis, ka kʋ nyaŋi duoe tisif fʋn bɔɔd si'ela.’
8 Amaa m yɛti ya ye, o ya'a pʋn kʋ duoe tis o si'el ban an zuod la zugɔ, o na duoe tis o on bɔɔd si'el wʋsa, on sɔsid nɛ nimmua la zug.
9 “Ka m yɛti ya ye, sɔsimi, ka ya na di'e. Ieemi, ka ya na nyɛ. Kabirimi, ka ba na siak ka yɔ'ɔgi tisi ya.
10 Bɔzugɔ, on wʋsa sɔs na di'e. Ka onɛ ieed na nyɛ. Ka onɛ kabirid, ba na yɔ'ɔgi tis o.
11 “Anɔ'ɔnɛ bɛɛ ya sʋʋgin nwa', ka o biig ya'a sɔs ziiŋ, ka o zaŋ waafʋ tis o?
12 Bɛɛ o ya'a sɔs gɛl, ka o na zaŋ naŋi tis o?
13 Yanam banɛ an nimbɛ'ɛdnam la ya'a baŋ ye li an sʋm ye ya zaŋ piinsʋma tisi ya biisɛ, ya Ba' onɛ bɛ arezana nii niŋid linɛ an sʋm gat ala la kʋ zaŋ o Siig Kasi la tis nimbanɛ sɔsid o la?”
Yesu nɛ Beelzebul
(Mat 12:22-30; Mak 3:20-27)
14 Yesu da kad kikirig kanɛ da an giki yis, ka dau gik la yʋ'ʋn pin'ili pian'ad ka li pak nidib la.
15 Ka nidib la sieba yɛl ye, “O kad kikiris la nɛ Beelzebul onɛ an kikiris na'ab la paŋ.”
16 Ka sieba bɔɔd ye ba mak o gɔs, ka ye o maalim tʋʋm nyalʋŋ si'a linɛ yi arezana ni na ka ba nyɛ.
17 Ka Yesu baŋ ban tɛn'ɛsid si'el la, ka yɛli ba ye, “Sʋ'ʋlim kanɛ wʋsa ka wɛligir bɛɛ li ni la na san'am. Ka yikanɛ ka nɔɔr yinne kae, li wa'ae nɛ san'auŋʋn.
18 Ka wɛligir ya'a bɛ Sʋntaana na'am sʋ'ʋliminɛ, li ye li niŋ wala zi'enɛ? M yɛt lina nɛ yanamɛ yɛl ye mam kad kikiris nɛ Beelzebul paŋ la.
Ka mam ya'a kad kikiris nɛ Beelzebul paŋa, yanam nya'andɔlib la mɔr bɔ paŋi kati ba? Dinzugɔ, ya nya'andɔlib la na kadi ya pian'ad la saria.
20 Ka li ya'a anɛ Wina'am paŋ ka m mɔri kad kikiris, alaa Wina'am sʋ'ʋlim la paae ya.
21 “Ka dau kanɛ mɔr paŋ ya'a ti'eb sʋ'ʋŋa nɛ o bʋraalim la'adi gur o yir la'ad, si'el-si'el kʋ bɔdigɛ. 22 Amaa onɛ mɔr paŋi gat o ya'a kena zabi nyaŋ o, o na faaɛn o zaba la'abanɛ ka o ti'eb la yiiga, ka nyaan faaɛn o yir la'ad la keŋ ka ba pʋdig.
23 “Ka on mɛkama pʋ bɛ nɛ ma, kisim nɛ ka on mɛkama pʋ la'asid nɛ m la, widigidnɛ.”
Kikirig yiib nɛ o lɛbig la yɛla
(Mat 12:43-45)
24 Ka Yesu lɛn ye, “Kikirig ya'a yi nid san'an, o dɔlisidnɛ pipirigini ieed zin'ig ye o bɛ, ka o ya'a ie zin'ig la gʋ'ʋŋ, o yɛtnɛ ye, ‘M na lɛbi m yikʋdʋg kanɛ ka m yina la.’
25 O ya'a lɛb na nyɛnɛ ka li piis nyain maal vɛnliŋaa digil,
26 o kennɛ mɔr kikiris ayɔpɔi banɛ tʋʋmbɛ'ɛdi gat on mɛŋ din la na ka ba kpɛn' pɛ'ɛs o anina; saŋkan la, dau kaŋa bɛllim yʋ'ʋn na maligim an bɛ'ɛdi gaad o yiigin bɛllim la.”
Sida albareka la yɛla
27 Ka Yesu yɛl ala naae la, ka pu'a sɔ' tans bɛdegʋ nidib la sʋʋgin ye, “Albareka bɛ nɛ pu'a kanɛ du'af ka mu'asif la.”
28 Ka Yesu lɛbisi yɛl ye, “Albareka lɛɛ na bɛ nɛ banɛ wʋm Wina'am pian'ad ka siaki di'e li la.”
Banɛ bɔɔd tʋʋmnyalima la yɛla
(Mat 12:38-42)
29† Ka nidibi maligim paasid la, ka Yesu yɛl ye, “Zʋmaaŋ bɛ'ɛd nwa' dim anɛ banɛ ieed tʋʋmnyalima, amaa ba kʋ lɛn nyɛ tʋʋm nyalʋŋ si'a, asɛɛ Wina'am nɔdi'es Jona tʋʋm nyalʋŋ la ma'aa.
30 Ka nwɛnɛ lin da niŋ Jona si'em ka li lieb zabinnɛ tis Ninive teŋ dim la, ala mɛn ka Ninsaal Biig la mɛ an zabinnɛ tis zʋmaʋŋ kaŋa dim.
31 Ka sariakadib daar la, pu'ana'ab onɛ da yi Seba teŋin na la, na duoe zɛrig zʋmaʋŋ kaŋa nwa' dimi ba tʋʋmbɛ'ɛd yɛla. Bɔzugɔ o da yinɛ hali lallisa na ye o kɛlis na'ab Solomon ya'am pian'ad, amaa onɛ gat Solomon bɛ kpɛla.
32 Ninive dim mɛ sna duoe sariakadib daar la zɛrig zʋmaʋŋ kaŋa nwa' dimi ba tʋʋmbɛ'ɛd yɛla. Bɔzugɔ Jona da mɔɔl Wina'am pian'ad la ba da tiaki ba sʋnya ka bas tʋʋmbɛ'ɛd. Ka gɔsima, sɔ' bɛ kpɛla gat Jona.
Niŋgbina an nyain la yɛla
(Mat 5:15; 6:22-23)
33 “Sɔ' kʋ nyu'oe fitir ka zaŋi su'a bɛɛ nɔki lii pibil nɛ pɛɛgɔ, amaa o nɔkidnɛ sʋn'ʋn si'el zug ka li nie nyain tis banɛ kpɛn'ɛd la.
34 Ya nini aan ya niŋgbina fitir, alazug, ya nini ya'a an sʋ'ʋŋa, ya niŋgbina wʋsa anɛ nyain, ka ya nini ya'a ka' sʋ'ʋŋa, ya anɛ lik biridi.
35 Dinzugɔ mid ka ya kɛ ka nɛɛsim linɛ bɛɛ ya nii nie nyain la lieb lik. 36 Ka fʋ niŋgbina wʋsa ya'a nie nyain ka lɔ si'a ka' lika, li wʋsa na nie nyain, wʋʋ fitiri nie si'em tisid nidib la.”
Yesu zɛrig Farisii dim nɛ wada pa'annib la
(Mat 23:1-36; Mak 12:38-40)
37† Ka Yesu da nam pian'ad la, ka Farisii dim nid yinne buol o ye o kena ka ba la'am di. Ka o kpɛn' zin'in ye ba di.
38 Ka li pak Farisii nid la on nyɛ ka Yesu pʋ pie o nu'us ka nyaan di la.
† 11:29 Mak 8:12 † 11:37 Luk 20:46
39 Ka Zugsɔb la yɛl o ye, “Yanam Farisii dim piesidnɛ ya nwama nɛ ya laas nya'aŋ, amaa ka ba pʋʋgin lɛɛ pɛ'ɛl nɛ dian'ad nwɛnɛ ya sʋnya pɛ'ɛl nɛ faaung nɛ tʋʋmbɛ'ɛd si'em la.
40 Zɔnna! Li ka'anɛ Wina'am onɛ maannɛ li nya'aŋ la mɛ maannɛ li pʋʋginɛɛ?
41 Nɔkimi linɛ bɛ nwama la nɛ laas la pʋʋgin la tis nɔŋ dim ka si'el wʋsa na lieb nyain tisi ya.”
42 “Woo! Farisii dima, li na tɔi tisi ya. Bɔzugɔ zɛnvaand linɛ la'am pʋ nar la, hali nɛ dinɛ ka ya nyɛ wʋsa ya pʋdigid zin'is piiga ka zaŋid yinne tisid Wina'am ka lɛɛ pʋ tʋm yɛlsida nɛ Wina'am nɔŋ si'el la. Bama narin ye ya niŋin hali nɛ tʋʋm sʋma sieba.
43 “Woo! Farisii dima, li na tɔi tisi ya. Ya bɔɔd zin'isʋma la'asʋg dɔɔdin hali ka bɔɔd na'asi pʋ'ʋsim da'asin.
44 “Woo! Li na tɔi tisi ya, yanam banɛ nwɛnɛ yaad linɛ naalim nɛ teŋ ka nidib nɔɔdi ba zuti gat ka zi' ye yaad bɛɛ anina.”
45 Ka wada pa'an yinne yɛl o ye, “Pa'anna, fʋ ya'a pian'ad ala, fʋ la'am pɔ'ɔgidnɛ ti wʋsa.”
46 Ka Yesu lɛbis ye, “Woo! Yanam banɛ an wada pa'annib la, li na tɔi tisi ya. Ya pa'an wada la ka li nwɛnɛ zitɛbisa ka ya ziil nidib, ka yanam mɛŋ lɛɛ pʋ si'isidi li nɛ ya nu'ubila.
47 “Woo! Li na tɔi tisi ya. Yanamɛ mɛɛd nɔdi'esidib banɛ ka ya yaanam da kʋ la yaad la.
48 Yanamɛ mɛɛd ban kʋ sieba la yaad la pa'al ye ya siaknɛ ye ya yaanamɛ da tʋm si'el la an sʋ'ʋm.
49 Dinzug ka Wina'am onɛ mɔr ya'am la yɛl ye, ‘M na tʋm nɔdi'esidib nɛ tʋmtʋmnibi tisi ya, ka ya na kʋ sieba ka namis sieba.’
50 Zʋmaaŋ kaŋa nwa' dim na di'e ba tʋʋmbɛ'ɛd namisʋg ban da kʋ nɔdi'esidib hali dunia pin'ilʋgʋn sa la.
51 Li da pin'ilnɛ Abɛl kʋʋbin la ti paae Zakaria onɛ ka ba da kʋ o maan bimbim nɛ Wina'am Kasi Wʋsa Kasi zin'ig teŋsʋk saŋa la. Asida ka m yɛti ya ye, zʋmaʋŋ kaŋa dim na nyɛ namisʋgʋ li wʋsa yɛla.
52 “Woo! Yanam banɛ an wada pa'annib la, li na tɔi tisi ya. Bɔzugɔ ya kpiank baŋir saafi la ya san'an, ka yanam mɛŋ pʋ kpɛn'ɛda, ka mɛ giŋ nimbanɛ mɔɔd ye ba kpɛn' la.”
53 Ka Yesu tɔɔm anina ka gbauŋmi'idib nɛ Farisii dim pin'ili bɔɔd o nɔɔrin ka bu'osid o bu'osa bɛdegʋ. 54 Ka bɔɔd ye ba bɛnd o, ka o nɔɔr ti faan pian' pian'abɛ'ɛd ka ba gban'e o.
LUK 12
Zam dim sa'alʋg
(Mat 10:26-27)
12
Ka saŋkan la ka nidib maligim la'asi zu'oe hali ka nɔɔd taaba nɔba, ka Yesu yɛl o nya'andɔlib la ye, “Gu'usimi ya mɛŋ nɛ Farisii dim danbin linɛ an zam tʋʋma la.
2 Linɛ wʋsa ka ba pibil la na ti pibig, ka linɛ wʋsa mɛ su'a la na ti nie paalʋ.
3 Ka linɛ wʋsa ka ya pian' likin, ba na wʋmi li nintaŋin, ka linɛ ka ya nya'am dɔɔdin, ba na ti pian' li nidib bɛdegʋ sʋʋgin.”
Onɛ ka ya na zɔt la yɛla
(Mat 10:28-31)
4 “M zuanama, m yɛti ya ye, da zɔti dabiem nɛ banɛ kʋʋdi ya niŋgbina ma'aa ka lɛɛ kʋ nyaŋi niŋ si'eli paas laa.
5 Amaa m na pa'ali ya onɛ ka ya na zɔt. Li anɛ Wina'am onɛ na nyaŋi kʋ, ka li nya'aŋ ka o lɛm mɔr paŋ kanɛ na tun'e kpɛn'ɛsi ya bugum teŋin la. Ɛɛn, asida zɔmini Wina'am.
6 Ba pʋ kuosid niimis anu nɛ kɔbayi'? La'an nɛ wala, Wina'am pʋ tammid yinne yɛllɛ.
7 Hali Wina'am mi' ya zuobid wʋsa kalli an si'em. Dinzugɔ da zɔti dabiem; ka Wina'am nɔŋi yaa gat niimis la babiga.”
Kristo siakir nɛ o ki'isʋg la yɛla
(Mat 10:19-20, 32-33; 12:32)
8 “M yɛti ya ye, onɛ mɛkama siaki yɛl nidibin ye o dɔlnɛ man onɛ an Ninsaal Biig la, m mɛ na niŋ o ala Wina'am maliaknam la tuon.
9 Ka onɛ mɛkama ki'isim nidibin, m mɛ na ki'is o Wina'am maliaknam la tuon.
10 Ka onɛ mɛkama pian' pɔ'ɔg man Ninsaal Biig la, Wina'am na di suguru nɛ o ka yis o tʋʋmbɛ'ɛdi bas, amaa onɛ mɛkama san'am Wina'am Siig Kasi la yʋ'ʋr, Wina'am kʋ yis o tʋʋmbɛ'ɛdi basɛ.
11 “Ba ya'a gban'e ya keŋ la'asʋg dɔɔdin nɛ na'anam nɛ kpi'emnam tuon na, yanam da kɛ ka yanamɛ na lɛbis si'el bɛɛ pian' si'el yɛla paki yaa.
12 Bɔzugɔ Wina'am Siig Kasi na pa'ali ya yanamɛ na pian' si'el saŋkan la.”
Arezak daan onɛ ka' ya'am la yɛla
13 Ka nid yinne onɛ bɛ wʋrʋg la sʋʋgin, yɛl Yesu ye, “Pa'anna, yɛlimim bier la, ka o pʋdig faar la tisimi m din.”
14 Ka Yesu lɛbisi bu'os o ye, “Anɔ'ɔn tisim nɔɔr ye m aan ya sariakat bɛɛ onɛ pʋdigi ya faarɛ?”
15 Ka Yesu yɛli ba ye, “Baŋimi, ka gu'usi ya mɛŋ nɛ linɛ wʋsa an fufum, bɔzugɔ li ka' nidi na mɔr areza'as bɛdegʋ zug ka o na mɔr nyɔvʋrɛ.”
16 Ka o siilimi ba siiliŋ nwa' ye, “Dau daa bɛ, an arezak daan. Ka o pɔɔg zʋʋd maal bɛdegʋ.
17 Ka o tɛn'ɛs o pʋtɛn'ɛrin ye, ‘Paalʋ kae ka m na suu m zʋʋd laa. Dinzugɔ m na niŋ wala?’
18 “Ka o yɛl o mɛŋ ye, ‘M mi' mam na niŋ si'em. M na nwa'ae m bʋya la maligim mɛ' bʋya banɛ yalimme sʋʋ m ki nɛ m la'ad la wʋsa,
19 ka yʋ'ʋn na yɛlim mɛŋ ye, m sʋnf ma'aya. M na di ka nu, bɔzugɔ m mɔr diib bɛdegʋ dinɛ na diisim yʋma pamm.’
20 “Ka Wina'am yɛl o ye, ‘Zɔlʋga, yʋ'ʋŋ kaŋa nwa' m na di'e fʋ nyɔvʋr ka gɔs ye anɔ'ɔnɛ na sʋ'oe la'abanɛ ka fʋ maali digili fʋ mɛŋ la?’”
21 Ka Yesu lɛn yɛl ye, “Ala mɛn ka li na niŋ nɛ banɛ bɔɔd areza'asi diginɛ ba mɛŋ yɛla, ka lɛɛ pʋ mɔr areza'as Wina'am yirɛ.”
Niŋim Wina'am yadda
(Mat 6:25-34)
22 Ka Yesu yɛl o nya'andɔlib la ye, “Dinzugɔ m yɛti ya ye, da kɛ ka ya bɛllim yɛla paki ya, nɛ linɛ ka ya na di bɛɛ fuud linɛ ka ya na lusi ya niŋgbinaa.
23 Nyɔvʋr gat diib ka niŋgbiŋ mɛ gat fuud.
24 Tɛn'ɛsimi niimis yɛla; ba pʋ bʋt bɛɛ bunna, ka mɛ pʋ su'ad diib zin'isi'a bɛɛ sʋʋd bʋya nii, la'an nɛ wala Wina'am diisidi ba. Ka yanam pʋ gat niimis hali bɛdegʋ?
25 Ka anɔ'ɔnɛ bɛɛ ya sʋʋgin ka o nyɔvʋr yɛla pak o ka o na nyaŋi tʋgis o nyɔvʋr dabisir pʋʋgin bi'ela?
26 Ka o ya'a kʋ nyaŋi niŋ bʋn linɛ pʋ tɔi nwa', o ye o niŋ wala nɛ banɛ kpi'em la?
27 “Gɔsimi na'apu'a-kʋ-si'is-ku'om nɔbigid si'em. Ba pʋ tʋm bɛɛ ʋgʋd fuudi yɛɛda, amaa m yɛti ya ye, hali baa na'ab Solomon na'am la'adi vɛnl si'em la wʋsa, li pʋ vɛnli paae tipuum la yinne mɛnɛ.
28 Ka Wina'am ya'a kɛt ka mɔɔd vɛnl hali nwɛnɛ fuvɛnla nɛ, ka li bɛ zina ma'aa ka bɛog ka ba kanbisi li bugum, O kʋ yɛɛli ya fuvɛnla banɛ an sʋ'ʋŋa gaad alaa? Yanam yadda pɔɔdim dima.
29 Da ieedi linɛ ka ya na di bɛɛ linɛ ka ya na nu, bɛɛ mɔri pʋtɛnda ka li yɛla paki yaa.
30 Dunia dim wʋsa ieed nɛ'ɛnam, ka ya Ba' Wina'am mi' ye ya bɔɔdi ba. 31 Linɛ gaad wʋsa, ieminɛ Wina'am na'am sʋ'ʋlim la, ka o na zaŋ bʋn dinɛ kpɛlim la paasi ya.
Kpan'am linɛ bɛ arezana ni la yɛla
(Mat 6:19-21)
32 “Yanam yadda niŋidiba, da zɔti dabiem, ka li anɛ ya Ba' bɔɔdim ye o tisi ya o sʋ'ʋlim la.
33 Kuosimi yanamɛ mɔr si'el wʋsa tɔnd banɛ an nɔŋ dim. Ya ya'a niŋ ala, li pa'al ye ya bɔɔd Wina'am sʋ'ʋlim la gaad si'el woo. Ka lina an kpan'am kanɛ kʋ san'am. Bɔzugɔ, na'ayiig kʋ nyaŋi kpɛn' anina zuu bɛɛ muak kpɛn' anina san'ami lii.
34 Bɔzugɔ, ya kpan'am bɛ si'el la, anina ka ya pʋtɛn'ɛr mɛ bɛ.
Tʋmtʋmnib banɛ gu'usid
35 “Ti'ebim nyu'oe ya fita zi'el,
36 nwɛnɛ dap banɛ gur ye ba zugdaan naan pu'adiir di'ema zin'igin kul na buol ka ba yɔ'ɔg gam tɔ'ɔtɔ si'em la.
37 Yɛlsʋm na bɛ nɛ tʋmtʋmnib banɛ ka ba zugdaan paae na ka ba nan zi'e gur o la. Asida ka m yɛti ya ye, o na kɛ ka ba zin'in ka o mɛŋ kena tɔndi ba diib.
38 O ya'a ti kul na hali ka li anɛ yʋ'ʋntisʋʋs, bɛɛ bɛogʋn ka nyɛ ka o tʋmtʋmnib la kpɛn gur o, ba na nyɛ yɛlsʋm.
39 Gban'ami nwa' gbin, yidaan ya'a mi'in saŋa kanɛ ka na'ayiig naan zuun o, o naan ti'ebin hali gur o yir ka kʋ gbisɛ ka na'ayiig la kʋ nyaŋi kpɛn' zuun oo.
40 Yanam mɛŋ mɛ ti'ebimi ka zi'e sʋ'ʋŋa, ka Ninsaal Biig la kennɛ saŋa kanɛ ka sɔ'ɔsɔ zi'isigɛ.”
Sida bɛɛ ziri tʋmtʋm yɛla
(Mat 24:45-51)
41 Ka Pita bu'os o ye, “Zugsɔba, fʋ siilim nɛ tinam bɛɛ sɔ' mɛkama wʋsa?”
42 Ka Zugsɔb la lɛbis ye, “Ka anɔ'ɔnɛ an yisɔb tʋmtʋm kpɛɛm ka an ya'am nɛ sida sɔba? Li anɛ onɛ ka o zugdaan na zaŋ o yir wʋsa gu'ul o ye o tis tʋmtʋmnib la ba diib, saŋa kanɛ nar wʋsa.
43 Yɛlsʋm na bɛ nɛ tʋmtʋm kpɛɛm kanɛ ka o zugdaan la kul na nyɛ ka o tʋm nwɛnɛ on yɛl o si'em la.
44 Asida ka m yɛti ya ye, o zugdaan la na kɛ ka o tʋmtʋm la lieb kpɛɛm guri linɛ wʋsa ka o sʋ'oe la.
45 Amaa tʋmtʋm kpɛɛm kan ya'a yɛl o sʋnfʋn ye, o zugdaan kʋ kul tɔ' naa, ka pin'ili bʋ'ʋd dap nɛ pu'ab banɛ an tʋmtʋmnibi bɛ yin la, ka dit ka nuud hali kʋʋn,
46 o zugdaan la na kul saŋkanɛ ka o zi' ka li na libig o. Ka o zugdaan la na tɛɛg o tʋbir hali ka zaŋ o la'as nɛ banɛ pʋ niŋ yadda la.
47 “Ka tʋmtʋm kanɛ mi' o zugdaan bɔɔdim ka pʋ dɔlis o bɔɔdim la ka mɛ pʋ ti'ebɛ, ba na bʋ' o hali.
48 Amaa tʋmtʋm onɛ pʋ baŋ o zugdaan bɔɔdim ka lɛɛ tʋm linɛ pʋ nara ba na bʋ' o nɛ bi'ela. Onɛ ka ba tis o ka li zu'oe, ba mɛ mɔr pʋtɛn'ɛr ye o na lɛbis linɛ zu'oe, ka onɛ ka ba gʋ'ʋl bɛdegʋ, ba mɛ na mɔr pʋtɛn'ɛr ye o na lɛbis bɛdegʋ mɛn.”
Yesu mɔri wɛligir na
(Mat 10:34-36)
49 “M kena ye m zaŋ nɛ bugum lɔb dunia nwa' zugin, hali ka bɔɔdin ye li pʋn ditin sa.
50 Amaa yiiga, asɛɛ m namis hali ti paae li bɛn ka nyaan paam sumalisim.
51 Ya tɛn'ɛs ye m mɔri sumbʋgʋsʋm kɛn dunia ni naa? Ayei, m yɛti ya ye, m lɛɛ mɔri wɛligir na.
52 Ka nannanna kʋdim wa'ae sa, yir yinne ni, nidiba anu ya'a bɛ, wɛligir na bɛ. Ka nidiba atan' na kis nidib ayi', ka nidib ayi' na kis nidiba atan' la.
53 Ka dau na kis o dakɔɔnr, ka o dakɔɔnr mɛ na kis o saam. Ka pu'a na kis o pu'ayua, ka pu'ayua mɛ na kis o ma. Ka bipu'a na kis o dayaam, ka o dayaam mɛ na kis o bipu'a la.”
Saŋa baŋir la yɛla
(Mat 16:2-3; Mak 8:11-13)
54 Ka Yesu yɛl nidib la ye, “Ya ya'a nyɛ saŋgbauŋ ya-tuona ka li sɔbig, ya yɛtnɛ ye saa na ni, ka li sid ni.
55 Ka ya ya'a lɛn nyɛ ka pɛbisʋg da'ad ya-dagɔbʋg baba na ya yɛtnɛ ye walʋsʋg na kena, ka li sid niŋ ala.
56 Zam dima! Ya mak nɛ dunia nɛ saŋgbauŋ, ka mi' saa bɛllim nɛ li ka'alim saŋa, ka lɛɛ niŋ wala zi' nannanna nwa' yɛla?”
LUK 12–13
Dɛŋim maali fʋ yɛla
(Mat 5:25-26)
57 “Bɔɔ kɛ ka ya mɛŋ kʋ tun'e baŋ ye nɛ'ɛŋa nwa' dɔl suorɛ?
58 Sɔ' ya'a mɔr antu'a nɛf ka ya dɔl taaba wa'ae kɔɔtʋ ni, kpɛ'ɛŋimi fʋ mɛŋ ka ya kʋʋs yɛl la suorin, ya'a ka' ala ya ya'a paae sariakat la san'an, o na zaŋi fʋ niŋ pʋlʋŋ nu'ugin ka on mɛ mɔri fʋ keŋ kpar sanrega ni.
59 Asida ka m yɛtif ye, fʋ kʋ nyaŋi yi naa, asɛɛ ka fʋ yɔɔ fʋ sam la wʋsa hali ka kɔbir kʋ kpɛlim, ka fʋ naan nyɛ suor.”
LUK 13
Tʋʋmbɛ'ɛd tiakir yɛla
13
Ka saŋkan la ninsieba bɛɛ ani ka yɛl Yesu Galile dimi da maan maannɛ tisid Wina'am ka Pailet da kʋʋ ba ka ba ziim gɛndig nɛ maana la si'em.
2 Ka o lɛbisi ba ye, “Ya tɛn'ɛs ye on daa kʋ Galile dim ban la pa'al ye banɛ an tʋʋmbɛ'ɛd dimi gat Galile dim banɛ kpɛlim la?
3 Ayei, m yɛti ya ye, asɛɛ ka ya tiaki ya sʋnya tʋʋmbɛ'ɛdin, ka ya'a ka' alaa, ya mɛ na bɔdig.
4 Ya mɛ tɛnri Jerusalem nidib pii nɛ ayi' la yɛla, banɛ ka girimbisa linɛ bɛ Siloam la da luu diinli ba kʋ si'em la. Ya tɛn'ɛs ye ban da anɛ tʋʋmbɛ'ɛd dimi gat banɛ da kpɛlim Jerusalem laa?
5 Ayei, m yɛti ya ye, asɛɛ ka ya tiaki ya sʋnya tʋʋmbɛ'ɛdin, ka li ya'a ka' alaa, ya mɛ na san'am.”
Kekaŋ kanɛ pʋ wan la siiliŋ
6 Ka o yɛli ba siiliŋ kaŋa ye, “Dau sɔ' mɔri kekaŋ o tiis lɔmbɔn'ɔgin, ka kena ye o pɔn' kekama ka pʋ nyɛɛ.
7 Ka yɛl lɔmbɔn'ɔgur la ye, ‘Gɔsima, yʋma atan' nwana ka m kena ka pʋ nyɛ hali baa kekaŋ wal yinne tiig nwa' nii. Nwaamɛ li bas, ka li san'amidnɛ teŋ zaalim.’
8 “Ka o lɛbis o ye, ‘M zugdaana, kɛlli li yʋʋm kaŋa ma'aa, ka m na kua li gbinnin ka bɔ bʋgʋlʋm bas,
9 ka yʋʋm ya'a paae ka li wal, li an sʋm; ka li ya'a pʋ lɛn wal ya'asɛ, fʋn yʋ'ʋn kʋʋ li.’”
Yesu ti'eb pu'a Vʋ'ʋsʋm Daar
10 Li da anɛ Vʋ'ʋsʋm Daar yinne ka Yesu bɛ la'asʋg dɔɔgini pa'an nidib.
11 Ka pu'a bɛɛ anina ka kikirig kɛ ka o pɔnd yʋʋm pii nɛ ayi' ka pʋ nyaŋidi duod o mɛŋi zi'e sappinɛ.
12 Ka Yesu buol pu'a la ka yɛl o ye, “Pu'a, fʋ ban'a la basif.”
13 Ka nɔk o nu'usi pa'al pu'a la zugin, ka anina yim ka ban'a la bas pu'a la ka o kpɛn tiɛn sappi ka zun'od Wina'am yʋ'ʋr.
14 Ka la'asʋg dɔɔg la kpɛɛm sʋʋnr pɛlig nɛ Yesu ti'eb pu'a la Vʋ'ʋsʋm Daar la zug ka o yɛl nidib la ye, “Daba ayuobʋ ka ya na tun'e tʋmi ya tʋʋma, alazug, kemi dabisban na ti'ebinɛ ya mɛŋ ka da kennɛ Vʋ'ʋsʋm Daar naa.”
15 Ka Zugsɔb la lɛbisi ba ye, “Zam dimaa! Vʋ'ʋsʋm daarɛ ya yinne-yinne pʋ idigidi ya lɔlis bɛɛ ya bʋmisi ba dɔɔdin kennɛ nulisidi ba ku'om?
16 Ka pu'a kaŋa onɛ an Abraham yaaŋ ka Sʋntaana lɔ yʋma pii nɛ anii nwa' la, li pʋ nar ye m idig o Vʋ'ʋsʋm Daarɛɛ?”
17 Ka on yɛl nɛ'ɛŋa nwa' la, ka li kpɛn'ɛs banɛ ki'isid o la nyan, amaa nimbanɛ kpɛlim la sʋnya ma'ae nɛ o tʋʋmnyalima banɛ ka o tʋm la.
Kansiing biili la siiliŋ
(Mat 13:31-32; Mak 4:30-32)
18 Ka Yesu bu'os ye, “M na zaŋ bɔɔ mak nɛ Wina'am sʋ'ʋlim la?
19 Li nwɛnɛ kansiing bielif ka dau sɔ' bʋdi li o lɔmbɔn'ɔgin ka li nɔbigi kilim tiig ka niimis kena tɛɛ ba tɛɛdi li wila ni nɛ.”
Danbin siiliŋ
20† Ka o lɛn yɛl ya'as ye, “Bɔ ka m na zaŋi mak nɛ Wina'am na'am?
21 Li nwɛnɛ pu'a mak bodobodo zɔ'ɔm taslabɛda atan' gɛndig danbin ka li uk si'em la.”
† 13:20 Mat 13:33
Za'anɔɔr kanɛ pɔɔd la yɛla
(Mat 7:13-14, 21-23)
22 Yesu n ken Jerusalem la o daa buŋid teŋ titada nɛ tembibisini pa'an nidib.
23 Ka sɔ' bu'os o ye, “Zugsɔba, ka nidib bi'ela ma'aa ye ba nyɛ faangir bɛɛ?” Ka o lɛbisi ba ye,
24 “Kpɛ'ɛŋimini ya mɛŋi dɔlli za'anɔɔr kanɛ pɔɔd la kpɛn', ka m yɛti ya ye, nidib bɛdegʋ na zigid kpɛn'ɛb ka kʋ nyaŋɛ.
25 Ka saŋa ya'a paae, yisɔb la na duoe keŋ yɔ yaŋir la, ka ya na kena zi'e yiŋi kabiridi yɛt ye, ‘Zugsɔba, yɔ'ɔgim ka ti kpɛn'!’ “Ka o na yɛl ye, ‘M zi' yanamɛ yi si'el naa.’
26 “Ka ya yʋ'ʋn na pin'ili yɛt ye, ‘Li ka' tinam nɛ fʋnɛ daa la'an dit ka nuudaa, ka fʋ kennɛ ti teŋin pa'annaa?’
27 “Amaa o na lɛn yɛli ya ye, ‘M zi' yanamɛ yi zin'isi'a naa, dinzugɔ tɔɔmini m san'an yanam banɛ an tʋʋmbɛ'ɛd dim la.’
28 “Ka ya ya'a yʋ'ʋn ti nyɛ ka Abraham nɛ Isaak nɛ Jakob nɛ Wina'am nɔdi'esidib la bɛ Wina'am na'amin, ka ba lɛɛ kad yanamɛ bas ka ya na kum ka ga'adi ya nyina.
29 Ka nidib na yit tɛɛns banɛ bɛ lallisa na kena zin' dit diib Wina'am sʋ'ʋlimin la.
30 Gɔsimiya, banɛ an yiiga dim la na yuolim, ka banɛ yuolim la na an yiiga dim.”
Yesu nɔŋ Jerusalem la yɛla
(Mat 23:37-39)
31 Ka saŋkan la ka Farisii dim sieba kena yɛl Yesu ye, “Tɔɔmim kpɛla, ka Herod bɔɔd ye o kʋʋf.”
32 Ka o lɛbisi ba ye, “Kemi yɛli ya'ambɛ'ɛd sɔb la ye, ‘Gɔsima, m na kad kikirisi yis nidibin ka lɛn ti'eb nidib zina nwa' nɛ bɛog ma'aa, ka daba atan' daar la ka m naae m tʋʋma la wʋsa.’
33 Amaa nɛ wala sa m kʋdim kʋ gʋ'ʋŋi m ken la zina, nɛ bɛog nɛ daarɛ, bɔzugɔ li pʋ nar ye ba namis Wina'am nɔdi'esi kʋʋ o zin'isi'a ka li ya'a ka' Jerusalem nii.
34 “Woo Jerusalem dima, Jerusalem dima, ya kʋʋd Wina'am nɔdi'esidib ka lɔbid banɛ ka Wina'am tʋmi baa ya san'an la nɛ kuga. Nɔɔrim babiga sa ka m bɔɔd ye m la'asi ya gumm wʋʋ nɔnya'aŋi um o biis o kpʋkpama ni si'em la ka ya pʋ siakida.
35 Gɔsimiya, m kɛ ka ya yir lieb dabɔɔg. M LUK 14 yɛti ya ye ya kʋdim kʋ lɛn nyɛɛ ma, asɛɛ ka ya ti yɛl ye, ‘Albareka bɛ nɛ onɛ kenna nɛ Zugsɔb la yʋ'ʋr zug la!’”
LUK 14
Yesu ti'eb dau Vʋ'ʋsʋm Daar
14
Li da anɛ Vʋ'ʋsʋm Daar yinne ka Yesu keŋ ye o di nɛ Jew dim kpɛɛmnam yinne onɛ an Farisii nid, ka ba gɔsid o.
2 Ka ba nyɛ ka dau sɔ' bɛ anina ka o niŋgbiŋ mɔd.
3 Ka Yesu pian'ad nɛ wada pa'annib nɛ Farisii dim la ka bu'osi ba ye, “Li dɔl suor ye ba ti'eb nidib Vʋ'ʋsʋm Daar bɛɛ li pʋ dɔl suorɛ?”
4 Ka ba lɛbi fɔn baanlimm. Ka o ti'eb dau la ka kɛ ka o keŋ kul.
5 Ka o bu'osi ba ye, “Anɔ'ɔnɛ bɛ ya ni ka o biig o bɛɛ o lɔlig na lu buligin Vʋ'ʋsʋm Daar ka o kʋ zɔ tɔ'ɔtɔ keŋ yaae o?”
6 Ka ba mak ye ba lɛbis o gʋ'ʋŋ.
Mɛŋ sier yɛla
7 Ka on nyɛ ka sieba gaŋ ninsʋma zin'isa zin'in la, ka o yɛl nimbanɛ dit la siiliŋ ye,
8 “Sɔ' ya'a mɔr pu'adiir di'ema ka buolif, fʋn da paae kpɛn zin'inid ninsʋma zin'isa nii, ka daasi'erɛ o mɛ buol sɔ' ka o gatif.
9 Ka on kanɛ buoli ya wʋsa la na kena yɛl ye, ‘Duom ka nya'al zin'ikaŋa.’ Saŋkan la ka fʋ yʋ'ʋn duoe nɛ nyannɛ keŋ zin'in tadimnam zin'igin la.
10 Amaa sɔ' ya'a buolif, kem zin'in nya'aŋ ka onɛ buolif la ya'a kena nyɛɛf, ka yɛl ye, ‘M zua, zin'inim tuon.’ Anina ka fʋ yʋ'ʋn na nyɛ zʋn'or nɛ na'asi, nimbanɛ ka fʋ la'am zin' la tuon.
11 On mɛkama ye o dʋ'ʋs o mɛŋ ba na sie o, ka on mɛkama sie o mɛŋ, ba na dʋ'ʋs o.”
12 Ka Yesu yɛl onɛ buol o diibin la ye, “Fʋ ya'a maal nintaŋ bɛɛ yʋ'ʋŋ diib, fʋn da buoni fʋ zuanam bɛɛ fʋ ba'abiis bɛɛ fʋ nidib bɛɛ fʋ kpan'a taab banɛ aan fʋ kpi'esɛ, bɔzugɔ ba mɛ na ti maal ala daasi'er ka mɛ buoli fʋ lɛbisi li sam.
13 Amaa ya ya'a maal di'ema, yanam buolimi nɔŋ dim nɛ pɔnda nɛ waba nɛ zʋnzɔɔs,
14 ka ya na nyɛ bareka, bɔzugɔ ba kʋ nyaŋi yɔɔ li sammɛɛ. Ba na yɔɔ ya sam pʋpielim dim kum vʋ'ʋgir daar.”
Di'em tita'ar la siiliŋ
(Mat 22:1-10)
15 Ka ban la'asi zin' diibin nɛ Yesu la, ba wʋm on yɛl si'el la, ka nid
yinne yɛl o ye, “Yɛlsʋm bɛ nɛ onɛ na di diib Wina'am sʋ'ʋlimin la.”
16 Ka o lɛbis o ye, “Dau da bɛ saŋsi'a ka maal diib bɛdegʋ ka yɛl nidib bɛdegʋ ye ba kena di.
17 Ka diib la saŋa paae ka o tʋm o tʋmtʋm la ye o kem yɛl nimbanɛ ka o yɛl la ye, ‘Kemi na, ka m ti'eb diib la guri ya.’
18 “Ka li nwɛnɛ ba niŋnɛ nɔɔr yinne nɛ, yɛt lin paki ba si'em ka ba kʋ nyaŋi kenaa. Ka yiiga sɔb la yɛl o ye, ‘M da'anɛ kariyauŋ ka sɔsid suor ye m keŋ gɔs lin an si'em.’
19 “Ka yinne yɛl o ye, ‘M da'anɛ na'akuoda piiga ka bɔɔd ye m maki ba kuobʋ gɔs, dinzugɔ tisimim suor ka m keŋ.’
20 “Ka nya'al ka ɔŋa la mɛ ye, ‘M dinɛ pu'asaan, lin ka m kʋ nyaŋi kenaa.’
21 “Ka tʋmtʋm la lɛbi nɔk nɛ'ɛŋa tu'as o zugdaan la. Linɛ an o sʋnf pɛlig ya hali ka o yɛl o tʋmtʋm la ye, ‘Yim tɔ'ɔtɔ keŋ tempʋʋgin la suoya ni nɛ pal yalima nii dɔl nɔŋ dim nɛ pɔnda nɛ zʋnzɔɔs nɛ waba na.’
22 “Ka tʋmtʋm la yɛl ye, ‘M zugdaana, fʋn ye m niŋim si'em la m niŋ
ya, amaa ba pʋ zu'oe sia'alɛɛ.’
23 “Ka o zugdaan la yɛl o tʋmtʋm la ye, ‘Yim keŋ suobibisin nɛ suoraadin kpɛ'ɛŋi fʋ mɛŋ ka nidib la sia'al.
24 Asida ka m yɛti ya ye, nimbanɛ ka m dɛŋin yɛli ba ka ba zan'as la, ba sɔ'ɔsɔ kʋdim kʋ lɛn dii m diib laa.’”
Nya'andɔl liebʋg la yɛla
(Mat 10:37-38)
25 Ka on ken la ka nidib bɛdegʋ dɔl o ka o gi'e yɛli ba ye,
26 “Sɔ' ya'a ye o dɔl man ka pʋ zan'as o mɛŋ saam nɛ o ma nɛ o pu'a nɛ o ba'abiis nɛ o tanpa, hali ka pʋ zan'as o mɛŋ nyɔvʋr yɛllɛ, o kʋ nyaŋi liebi m nya'andɔlla.
27 Ka on mɛkama pʋ zii o mɛŋ kum dapuudir la, ka dɔlli ma, o kʋ nyaŋi liebi m nya'andɔlla.”
28 “Ka anɔ'ɔnɛ bɛɛ ya sʋʋgin bɔɔd ye o mɛ' girimbisa ka kʋ dɛŋin zin'in yiiga gɛlig o samme na an si'em ka baŋ ye o na nyaŋi mɛɛ li naae bɛɛ o kʋ nyaŋɛ?
29 Li ya'a ka' alaa, o ya'a ɛɛnb ɛɛnbir ka pʋ nyaŋi naae lii, banɛ wʋsa nyɛɛ li la na la' o
30 ka ye, ‘Dau kaŋa pin'il nɛ mɛ' yir ka gʋ'ʋŋ naar.’
31 “Bɛɛ na'ab bɛ yaanɛ wa'ae ye o zab nɛ o na'atiraan, ka pʋ dɛŋim gban'e yiiga gɔs ye o na zaŋ nidib tusa piiga keŋ zab nɛ Na'akanɛ mɔr nidib tusa pisi la?
32 Ka o ya'a baŋ ka o kʋ nyaŋɛ, on dɛŋin tʋm nu'ug ka ba nan lal hali la bɔ sumbʋgʋsʋm suor.
33 Li anɛ ala mɛn, ya sɔ' kʋ nyaŋi liebim nya'andɔlla, asɛɛ ka o bas lin wʋsa ka o mɔr.”
Yaarim linɛ ka' tʋʋm la yɛla
34† “Yaarim an sʋm, amaa li mimilim ya'a yi, li mimilim la ye li lɛn niŋ wala lɛb na ya'asɛ?
35 Li kʋdim ka' sʋm tis teŋ la, ka mɛ kʋ kilim bʋgʋlʋm; ba lɔbigidi linɛ basid.
“Onɛ mɔr tʋba na wʋm, on wʋm.”
LUK 15
Pɛ'og kanɛ bɔdig la yɛla
(Mat 18:12-14)
15
Lampɔdi'esidib nɛ tʋʋmbɛ'ɛd dim daa kɛn Yesu san'an na, ye ba kɛlis o pian'ad.
2 Ka Farisii dim nɛ gbauŋmi'idib la nyɔn ye, “Dau kaŋa di'esid tʋʋmbɛ'ɛd dim, ka dit nɛ ba.”
3 Ka o siilimi ba siiliŋ nwaa bu'os ye,
4 “Dau kanɛ bɛɛ ya sʋʋgini mɔr pɛ'ɛs kɔbiga ka yinne ya'a bɔdig, ka o kʋ kɛ pɛ'ɛs piswai nɛ awai la mɔɔgin la, ka keŋ iee yinne kanɛ bɔdig la hali ti nyɛɛ o?
5 Ka o ya'a nyɛɛ o, o na buk o nɛ sumalisim.
6 Ka o ya'a kul yin, o na buol o zuanam nɛ o kpi'esi yɛli ba ye, ‘Kɛlli ka ti di'em nɛ sumalisim, bɔzugɔ m nyɛ m pɛ'og kanɛ bɔdig la.’
7 Ala mɛn ka m yɛti ya ye, tʋʋmbɛ'ɛd sɔb yinne ya'a tiak o sʋʋnr, sumalisim na bɛ arezana ni gaad pʋpielim dim piswai nɛ awai banɛ pʋ bɔɔdi ba sʋnya tiakirɛ.”
La'af kanɛ bɔdig la yɛla
8 Ka o lɛm bu'osi ba ye, “Pu'a kanɛ bɛ ka o ya'a mɔr anzurifa ligidi piiga, ka yinne bɔdig, ka o kʋ nyu'oe fitiri piis yir la iee la'af la sʋ'ʋŋa, hali ti nyɛ lii?
9 O ya'a nyɛɛ li, o na buol o zuanam nɛ o kpi'esi yɛli ba ye, ‘Kɛlli ka ti di'em nɛ sumalisim, bɔzugɔ m nyɛɛm la'af kanɛ bɔdig la.’
10 Ala mɛn ka m yɛti ya ye, tʋʋmbɛ'ɛd daan yinne ya'a tiak o sʋʋnr, sumalisim na bɛ Wina'am maliaknam san'an.”
Biribiŋ onɛ di'e o faar la yɛla
11 Ka o yɛl ye, “Dau daa bɛ, ka mɔr o biribis ayi'.
12 Ka pit la yɛl ye, ‘M ba', pʋdigimi ti fʋ faar la ka tis manɛ m din.’ Ka o ba' pʋdig o la'ad wʋsa tisi ba.
13 “Li pʋ yuugɛ ka pit la la'as o la'ad wʋsa yii keŋ teŋ lalli saa san'am o la'ad la yɔri-yɔri.
14 Ka on san'am la'ad la wʋsa naae la, kɔ'ɔmtita'ar lu teŋ la ni, ka fara yʋ'ʋn kpɛn' o.
15 Ka o keŋ kpɛn' teŋin biig yinne sankpan'asim. Ka o zaŋ o niŋ pɔɔgin ye o gur kukurnam.
16 Hali ka o kʋdim bɔɔd ye o pʋʋr pɛ'ɛl nɛ kukurnam diib la. Amaa sɔ' pʋ tis o si'ela.
17 “Ka o ya'am ti zɔɔ lɛb na la, ka o yɛl o mɛŋ ye, ‘M ba' mɔr tʋmtʋmnib ala ka ba diti tigid ka basid ka m bɛ kpɛla kpiid nɛ kɔ'ɔm!’
18 Ka o yɛl ye, ‘M na duoe keŋi m ba' san'anɛ yɛl o ye, m tʋm tʋʋmbɛ'ɛdi pɔ'ɔg Wina'am nɛ fʋn,
19 ka pʋ lɛn sʋ'ʋm ye ba buolim ye fʋ biiga. Kɛl ka m liebi fʋ tʋmtʋm yinne.’ 20 Ka o duoe keŋ o ba' san'an. “Ka on nam bɛ lalli la, ka o ba' nyɛɛ o, ka zɔɔ o nimbaanlig, ka zɔɔ
bibig o, ka sɛnlim o.
21 “Ka biig la yɛl o saam ye, ‘M tʋm tʋʋmbɛ'ɛdi pɔ'ɔg Wina'am nɛ fʋ, ka pʋ sʋ'ʋm ye ba lɛm buolim ye fʋ biiga.’
22 “Ka o ba' yɛl o tʋmtʋmnib ye, ‘Kemi tɔ'ɔtɔ zaŋ fusʋŋ na yɛɛl o, ka pid o baŋ o nu'ubilin, ka pid o ta'ada,
23 ka gban'e na'arazɔl naa kɔdig, ka ti ɔnb, ka di'em di'ema.
24 Bɔzugɔ m biig nwa' nwɛnɛ o kpinɛ, ka lɛn vʋ'ʋg. O daa bɔdignɛ, ka ti lɛn nyɛɛ o ya'as.’ Ka ba pin'ili maan sumalisim.
25 “Ka o bikpɛŋ la yi pɔɔginɛ kunna. Ka on li'el yin na la o wʋm ka duundis nwɛ'ɛd, ka ba wa'ad.
26 Ka o buol o ba' tʋmtʋm yinne bu'os o ye, ‘Bɔɔ maalɛ?’
27 Ka tʋmtʋm la lɛbis o ye, ‘Fʋ pitʋ kul na. Ka fʋ ba' kʋ na'arazɔl, on nyɛɛ o nɛ laafi la zug.’
28 “Ka kpɛɛm la sʋʋnr pɛlig hali. Ka o zan'as ye o kʋ kpɛn' yin laa. Ka o ba' yina bɛllim o ye, o kpɛn'ɛm na.
29 Ka o lɛbis o ba' ye, ‘Gɔsima, yʋma bɛdegʋ ka m tʋmmi fʋ tʋʋma, ka pʋ zan'asi fʋ nɔɔr baa daar yinnee. Amaa baa daar yinne fʋ pʋ tisim bʋʋg ye m kʋ ka man nɛ m zuanam maal LUK 15–16 sumalisim.
30 Amaa fʋ bikanɛ san'ami fʋ la'ad nɛ pu'agɔɔnda la kul na la, ka fʋ kʋ na'arazɔlli tis o.’
31 “Ka o ba' lɛbis o ye, ‘M biiga, man nɛ fʋn la'am bɛ saŋa wʋsa. Ka man mɔr si'el wʋsa la anɛ fʋ din.
32 Li sʋ'ʋm ye ti di'em di'ema, ka maal sumalisim, bɔzugɔ fʋ pitʋ la nwɛnɛ o kpinɛ, ka vʋ'ʋg. O daa bɔdignɛ. Ka ti lɛn nyɛɛ o ya'as.’”
LUK 16
Yigur onɛ an ya'am sɔb la yɛla
16
Ka Yesu lɛn yɛl o nya'andɔlib la ye, “Bʋndaan sɔ' daa bɛ, ka zaŋ dau sɔ' ka o gɔsid o yir la'ad wʋsa. Ka ba kena yɛl bʋndaan la ye dau la san'amid o la'ad la nɛ.”
2 Ka o buol o yɛl ye, “Bɔɔ nwa' ka m wʋmi fʋ yɛla? Gɛligim pa'alim fʋn niŋ si'em nɛ m la'ad la. Fʋ kʋ lɛn gɔsidi m yir la ya'asɛ.”
3 Ka tʋmtʋm kpɛɛm la tɛn'ɛs o pʋtɛn'ɛrin ye, “M yʋ'ʋn na niŋ wala nannanna? M zugdaan la faandi m tʋʋma la. Ka m mɛ ka' paŋ kanɛ na kuaa, ka nyan mɛ bɛ nɛ mam na sɔsid.
4 M mi' mam na niŋ si'em ka m ya'a kɔ'ɔŋi m tʋʋma la, nidib na di'emi ba yaan.”
5 Ka o buol o zugdaan samditib la yinne-yinne, ka bu'os yiiga sɔb la ye, “M zugdaan sam an wala dɔlli fɔ?”
6 Ka o lɛbis ye, “O sam anɛ olif kpaam gariwatitada kɔbiga dɔllim.” Ka o lɛbis o ye, “Zaŋimi fʋ gbauŋʋ gɛligi gɔs ka sɔb ye, pisnu.”
7 “Ka o bu'os oŋa la ye, ‘Ka fʋn sam an wala?’ Ka o lɛbis ye, ‘O sam anɛ ki bɔtnam kɔbiga dɔllim.’ “Ka o yɛl o ye, ‘Zaŋimi fʋ gbauŋʋ gɛlig ka sɔb ye pisnii.’”
8 “Tʋmtʋm kan ka sɔ' kʋ baŋ o pʋʋg nwa', o zugdaan pian' o bɔzugɔ o tʋm nɛ ya'am gɔnlʋŋ. Ka dunia kaŋa nwa' dim mɔr ya'am gɔnlʋŋʋ tʋmmi gat banɛ dɔl Wina'am la.”
9 Alazug man yɛti ya ye, “Nɔkimi ya dunia areza'as la maal zuanam, ka li ya'a ti naae ba na di'e ya kpɛn'ɛs yikanɛ ka' san'auŋɔ.
10 “Ka onɛ mɛkama an yɛlsida sɔb nɛ bʋn linɛ an bi'ela mɛ na an sida sɔb nɛ bʋn linɛ zu'oe mɛn. Ka onɛ pʋ mɔr yɛlsida nɛ bʋn linɛ an bi'ela mɛ pʋ mɔr yɛlsida nɛ bʋn linɛ zu'oe.
11 Ka ya ya'a pʋ niŋ sida nɛ dunia nwa' kpan'am la, anɔ'ɔnɛ na gu'uli ya nɛ kpan'am linɛ an sʋm amɛŋa la?
12 Ka ya ya'a pʋ an sida dim nɛ sɔ' mɔrim, anɔ'ɔnɛ na nɔki ya mɛŋ bʋnnɛ gu'uli ya?
13 “Tʋmtʋm kae na nyaŋi dɔl zugdaannam ayi', bɔzugɔ o na kis yinne ka nɔŋ yinne bɛɛ o na na'as yinne ka pɔ'ɔg yinne. Ya kʋ tun'e dɔl Wina'am ka lɛm bɔɔd dunia la'adɛ.”
Yesu pian'asieba
(Mat 11:12-13)
14 Ka Farisii dimi an banɛ nɔŋ ligidi hali la wʋmi li la, ka pin'ili pɔ'ɔgid o ka la'ad o.
15 Ka Yesu yɛli ba ye, “Ya anɛ nimbanɛ bɔɔd ye saalib tɛn'ɛs ye ya an sʋm. Amaa Wina'am mi' ya sʋnya nii an si'em. Bʋn lin ka saalib gɔs ka li an bʋnsʋŋ hali la, li anɛ bʋnyaalis Wina'am san'an.
16 “Wada nɛ Wina'am nɔdi'esidib da pʋn dɛŋim bɛ nɛ ti paae saŋkan ka Joon da mɔɔn Wina'am na'am labasʋŋ la, ka sɔ' mɛkama zigid ye o kpɛn' ani.
17 Arezana nɛ dunia gaadʋg pʋ tɔiyaa, amaa Wada la bʋmbil baa yinne kʋ niŋ zaalim.
18 “Ka onɛ mɛkama lɛbis o pu'a ka tɔɔm di pu'a, o daana niŋ pu'asan'auŋ, ka onɛ mɛkama di pu'a kan ka o sid lɛbis la mɛ niŋ pu'asan'auŋ.”
Arezak daan nɛ Lazarus yɛla
19 Ka Yesu yɛl ye, “Arezak daani daa bɛ yɛɛd fuvɛnla banɛ ligidi zu'oe, ka dit disʋma hali nɛ sumalisim daar wʋsa.
20 Ka nɔŋdaan yinne mɛ daa bɛ. Ka o yʋ'ʋr buon Lazarus. Ka o niŋgbina wʋsa an fɛn'ɛd. Ka ba ɛɛnti mɔr o keŋ zin'il arezak daan la za'anɔɔrin.
21 Ka mɔr ya'amlɛog ye o na di dizɔra banɛ lut arezak daan la tuon. Ka baas kennɛ lien o fɛn'ɛd la.
22 “Ka o ti kpi, ka Wina'am maliaknam zaŋ o keŋ Abraham san'an. Ka arezak daan la mɛ kpi, ka ba mum o.
23 Ka arezak daan la daa bɛ bugum teŋin ka dit fara la, ka gɔdigi nyɛ Abraham lalli sa, ka Lazarus zin' o tuon.
24 Ka arezak daan la buol Abraham ye, ‘M ba' Abraham zɔmim nimbaanlig, ka tʋm Lazarus ka o zaŋ o nu'ubili tin'e ku'om ma'alim zilim,
bɔzugɔ m bɛ nɛ bugum pʋʋgin dit fara.’”
25 Amaa ka Abraham yɛl o ye, “M biiga tiɛnm ye fʋn daa bɛ dunia ni saŋsi'a la fʋ daa mɔr bʋnsʋma, ka Lazarus mɛ daa mɔr bʋmbɛ'ɛdnam. Amaa nannanna o mɔr sumalisim kpɛla, ka fʋ mɛ dit fara.
26 Ka linɛ paas la, bʋmbɔk zulʋŋ bɛ tinam nɛ fʋn sʋʋgin. Ka sɔ' ya'a bɔɔd ye o yi kpɛla LUK 16–17 keŋi fʋ san'an, o kʋ nyaŋɛɛ. Ka sɔ' mɛ kʋ nyaŋɛ yii fʋ san'an la kɛn tinam san'an naa.”
27 Ka o yɛl ye, “M ba' Abraham, li ya'a aan ala, m sɔsidif ye fʋ tʋm Lazarus m ba' yin,
28 ka m ba'abiis anu bɛɛ anina. Kɛl ka o keŋ sa'ali ba ka li ya'a ka' alaa, ba mɛ na ti kɛn fara nwa' zin'igin na.”
29 Ka Abraham yɛl o ye, “Moses nɛ Wina'am nɔdi'esidib bɛɛ ba san'an. Kɛl ka ba di'e ba sa'alʋg la.”
30 Ka o lɛbisi yɛl ye, “Ayei, m saam Abraham, li ka' alaa. Amaa sɔ' ya'a vʋ'ʋg kumin ka keŋi ba san'an, ba na tiaki ba sʋnya.”
31 Ka o yɛl o ye, “Ba ya'a kʋ siak Moses nɛ Wina'am nɔdi'esidib la nɔɔrɛ, ba mɛ kʋ tun'e siak onɛ vʋ'ʋg kumin la nɔɔrɛ.”
LUK 17
Tʋʋmbɛ'ɛd la yɛla
(Mat 18:6-7, 21-22)
16
Ka Yesu yɛl o nya'andɔlib la ye, “Linɛ na pan'as nidibi kpɛn'ɛs tʋʋmbɛ'ɛdin na kena, amaa li na tɔi hali tis onɛ kɛ ka li kena la.
2 Li naan aan sʋ'ʋm nɛ ban na nɔk nɛtita'ari lɔɔ kɔl o niŋgɔɔnr ka lɔb o bas atɛuk zuluŋin, li naan sɔn'ɔn on na kɛ ka yadda niŋidib bama nwa' tʋm tʋʋmbɛ'ɛd.
3 Gu'usiminɛ ya mɛŋ. “Fʋ ba'abiig ya'a tʋm bɛ'ɛd, fʋn sa'al o, ka o ya'a tiak o tʋʋmbɛ'ɛd la, fʋn kɛl o taali bas.
4 Ka o ya'a tʋmif nɛ bɛ'ɛd nɔɔra ayɔpɔi daar yinne, ka lɛb na yɛl ye, ‘M tʋm taal, kɛlli m taali bas,’ asɛɛ ka fʋ kɛɛ o taali bas.”
Yadda niŋir la yɛla
5 Ka tʋmtʋmnib la yɛl Zugsɔb la ye, “Kɛl ka ti yadda niŋir zu'oe.”
6 Ka Zugsɔb la yɛli ba ye, “Ya yadda niŋir ya'a zu'oe zɛmin wʋʋ kansiing bielif, ya naan tun'e yɛlin titita'akaŋa nwa' ye, ‘Vuom nɛ fʋ nya'a la wʋsa keŋ lu mu'arin la sa,’ ka li na siaki ya nɔɔr.
Tʋmtʋmi nar ye o tʋm si'em la yɛla
7 “Ya nid yinne ya'a mɔr tʋmtʋm ka o kuod bɛɛ gur o kɔnbid ka naan pɔɔgin nɛ paae na o na yɛl o ye, ‘Kem na ka ti la'an dii?’
8 Ayei, o na yɛl o nɛ ye, ‘Maalimi m diib ka yɛ fukanɛ an nyain mɔr na tisim, ka gurim ka m di ka nuu naae, ka li nya'aŋ ka fʋ mɛ kena di ka nu.’ Li ka' alaa?
9 O na pʋ'ʋs tʋmtʋm la bareka on yɛl o ye o tʋm si'el ka o tʋm la zugɔ?
10 Li anɛ ala mɛnɛ tisi ya. Ya ya'a niŋ linɛ ka ya Zugsɔb yɛli ya ye ya niŋim, yanam yɛlimi ye, ‘Ti anɛ tʋmtʋm banɛ pʋ nar ye ba pʋ'ʋsi tii, bɔzugɔ li anɛ ti tʋʋma.’”
Yesu ti'eb kʋkɔma piiga
11 Ka on da wa'ae Jerusalem la, o da dɔlnɛ Samaria nɛ Galile teŋsʋkʋ gaad.
12 Ka paae teŋkpɛŋ si'a ni ka kʋkɔma piiga tʋ'ʋs o ka zi'e lalli sa
13 kaasidi yɛt ye, “Ti Zugdaan Yesu, zɔmi ti nimbaanlig.”
14 Ka on nyɛɛ ba la, ka yɛli ba ye, “Kemi maanmaannib la san'anɛ pa'ali ya mɛŋ.” Ka ban ken la ka wiim la basi ba, ka ba an nyain.
15 Ka ba yinne nyɛ ka o kʋkɔm la bas o la, o fɛndigi zun'od Wina'am yʋ'ʋr nɛ kʋkɔtita'ar
16 ka kena igin Yesu tuonnɛ pʋ'ʋsid o bareka. O mɛ da anɛ Samaria nid.
17 Ka Yesu yɛl ye, “Ba ka'anɛ piiga nyɛ laafii? Ka awai la bɛ yaanɛ?
18 Bɔ ka onɛ an saan la ma'aa lɛb na ye o pʋ'ʋs Wina'am bareka?”
19 Ka o yɛl o ye, “Duom gaadi fʋ gaadʋg, ka fʋ yadda niŋir tisif laafi.”
Wina'am na'am ken la na yɛla
(Mat 24:23-28, 37-41)
20 Ka Farisii dim bu'os Yesu saŋa kan ka Wina'am na'am la na kena. Ka o lɛbisi ba ye, “Wina'am na'am la pʋ kenna nɛ pa'al si'a ka nidib na baŋɛ.
21 Ka sɔ' kʋ yɛl ye, ‘Gɔsima, linɛ nwa' kpɛla bɛɛ linɛ bɛ kpɛ'ɛsa la.’ Baŋimi, ka Wina'am na'am la bɛ nɛ ya sʋʋgin.”
22 Ka Yesu yɛl o nya'andɔlib la ye, “Dabisa kenna ka ya na bɔɔd hali ye ya nyɛ Ninsaal Biig la dabisa la yinne, ka kʋ nyɛɛ lii.
23 Ka ba na yɛti ya ye, ‘Gɔsimi kpɛ'ɛsa, bɛɛ, gɔsimi kpɛla.’ Mid ka ya keŋ, bɛɛ ya dɔlli ba.
24 Nwɛnɛ saa ɛɛnti iank saŋgbauŋin ka li nie nyain si'em la, ala mɛn ka Ninsaal Biig la na ti nie o lɛbig dabisir la na.
25 Asɛɛ ka o lɛɛ dɛŋin namis bɛdegʋ hali ka zʋmaʋŋ kaŋa nwa' dim za'as o.
26 “Wʋʋ Noa saŋa ka li da niŋ si'em la, ala mɛn ka li na niŋ Ninsaal Biig la ken dabisa la.
27 Ba da ditnɛ, ka nuud, ka dit pu'ab, ka pu'ab kun LUK 17–18 sidib hali ti paae dabiskan ka Noa kpɛn' anrʋŋʋn la, ka ku'om kena dii ba wʋsa.
28 “Li mɛ na anɛ ala wʋʋ Lot dabisa da an si'em la, ba da ditnɛ, ka nuud, ka da'ad, ka kuosid, ka bʋd, ka mɛɛd,
29 ka dabiskan ka Lot yi Sodom teŋin la ka bugum nɛ kidibir naan saazugʋ lu teŋin na kʋʋ ba wʋsa.
30 “Ala mɛn ka li na aaɛn Ninsaal Biig nier dabisa la.
31 Ka dabisban ni, onɛ bɛ mɔpil zug ka o la'ad bɛ dɔɔgin, o sɔb da sig na ye o zaŋ o la'ad la. Ka ala mɛn ya'as, onɛ bɛɛ o pɔɔgin da lɛb naa.
32 Tɛn'ɛsimi linɛ da niŋ Lot pu'a la.
33 Ka onɛ mɛkama mɔɔd ye o faaɛn o nyɔvʋr, o na bɔdigi li, ka onɛ bas o nyɔvʋr, na faaɛn li.
34 M yɛti ya ye, yʋ'ʋŋ kan ni, nidib ayi' na la'asi gbisid sɔŋ yinne zug, ka ba na nɔk yinne ka bas yinne la.
35 Ka pu'aba ayi' na la'am bɛ nɛɛrin ka ba na nɔk yinne ka bas yinne. 36 Dapa ayi' na la'am bɛ pɔɔgin ka ba na nɔk yinne ka bas yinne.”
37 Ka nya'andɔlib la bu'os Yesu ye, “Zugsɔba, yaanɛ?” Ka o yɛli ba ye, “Zin'ikan wʋsa ka ni'im pɔn'ɔsir bɛ la, zin'ikan la ka zʋʋnd mɛ na la'as taaba.”
LUK 18
Pʋkɔɔnr nɛ sariakat la yɛla
18
Ka Yesu siilimi ba siiliŋ dinɛ na pa'ali ba ye ba sɔsim Wina'am saŋa wʋsa, ka da gɛɛn basɛ.
2 Ka o yɛli ba ye, “Sariakati daa bɛ teŋ si'a ka pʋ zɔt Wina'am ka mɛ pʋ na'asid nidiba.
3 Ka pʋkɔɔnr bɛ teŋ la nii ken o san'anɛ sin'igid o saŋa wʋsa ye, ‘Sʋŋim maali m yɛl la tisim.’
4 “Ka pʋkɔɔnr la kɛn saŋa bɛdegʋ na. Ka o pʋ bɔɔd ye o sʋŋ oo. Amaa ka sariakat la ti yɛl o pʋtɛn'ɛrin ye, ‘Baa mam pʋ zɔt Wina'am, ka pʋ na'asid nidib la,
5 pʋkɔkaŋa sin'igim si'em la zug m na duoe sʋŋ o ka li ya'a ka' alaa, o na sin'igim ka m yaama ti yii mɛŋ.’”
6 Ka Zugsɔb la yɛl ye, “Ya wʋm onɛ an sariakat bɛ'ɛd la yɛl si'em laa?”
7 Ka bu'osi ba ye, “Wina'am kʋ tis o nimbanɛ sɔsid o yʋ'ʋŋ nɛ nintaŋ la bʋʋdɛɛ? O na yuug ka sʋŋi ya bɛɛ?
8 M yɛti ya nɛ ye, o na sʋŋi ya tɔ'ɔtɔ. Amaa Ninsaal Biig la ya'a ti lɛb dunia nwa' na, o na nyɛ nimbanɛ nan kpɛn mɔr yaddaa?”
Farisii nɛ lampɔdi'es la siiliŋ
9 Ka o siilim siiliŋ kaŋa tis nimbanɛ gban'e ba pʋtɛn'ɛrin ye ban anɛ pʋpielim dim ka nɛ'ɛsid sieba la ye,
10 “Dapa ayi' daa keŋ Wina'am Pʋ'ʋsim Yin ye ba sɔs Wina'am, ka yinne an Farisii nid ka oŋa la mɛ an lampɔdi'es.
11 Ka Farisii la duoe zi'en ka pin'ili sɔsid o mɛŋ yɛla yɛt ye, ‘Wina'am, m pʋ'ʋsif bareka nɛ mam pʋ nwɛnɛ nimbanɛ an zam dim nɛ pʋʋs ayi' dim nɛ pu'asan'auŋ dim, bɛɛ ka pʋ nwɛnɛ lampɔdi'es kaŋaa.
12 Daba ayɔpɔi wʋsa pʋʋgin man lɔɔd nɔɔr daba ayi', ka tisid Wina'am linɛ mɛkama ka m kua nyɛ yinne, pʋdigir piiga pʋʋgin.’
13 “Amaa lampɔdi'es la on zi'enɛ lalli sa, ka pʋ siaki gɔdig o nindaa kpa' saazugɔ. O kʋdim nwɛ'ɛdnɛ o mɛŋ ka fabinnɛ yɛt ye, ‘Wina'am, zɔmi m nimbaanlig ka m anɛ tʋʋmbɛ'ɛd sɔb.’”
14 Ka Yesu ye, “M yɛti ya nɛ ye, dau kaŋa nwa' kul yin nɛ pʋpielim, ka Farisii la kul nɛɛm, bɔzugɔ, onɛ mɛkama dʋ'ʋs o mɛŋ ba na sie o, ka onɛ mɛkama sie o mɛŋ ba na dʋ'ʋs o.”
Yesu niŋ biis zut bareka la yɛla
(Mat 19:13-15; Mak 10:13-16)
15 Ninsieba da mɔri ba biisi kena ye Yesu nɔk o nu'usi pa'ali ba zutin. Ka o nya'andɔlib la nyɛ la, ka kad nidib la.
16 Ka Yesu buol o baa yɛt ye, “Kɛlli ka biis la kɛɛn m san'an na ka da katinɛ baa, bɔzugɔ Wina'am sʋ'ʋlim la anɛ bamanam taaba din.
17 Asida ka m yɛti ya ye, on mɛkama pʋ di'e Wina'am na'am la wʋʋ biigi di'edi li si'em la, o kʋ nyaŋi kpɛn' li nii.”
Kpan' la yɛla
(Mat 19:16-30; Mak 10:17-31)
18 Ka Jew dim kpɛɛm yinne bu'os ye, “Pa'an sʋ'ʋŋɔ, m na niŋ wala ka nyɛ nyɔvʋr linɛ ka' naarɛ?”
19 Ka Yesu bu'os o ye, “Bɔ ka fʋ buolim ye onɛ an sʋ'ʋm? Sɔ' kae an sʋ'ʋm, asɛɛ Wina'am gʋllim.
20 Fʋ mi' Wina'am nɔɔr yɛlʋg la yɛl si'em ye, ‘Mid ka fʋ kʋ nid bɛɛ san'am pu'a bɛɛ dau. Mid ka fʋ zu bɛɛ di ziri kasɛt bɛɛ zam sɔ'. Tisimi fʋ saam nɛ fʋ ma girima.’”
21 Ka o lɛbis o ye, “Mam pʋn dɔl nɔɔr yɛlʋg la wʋsa m biilimin sa.”
22 Ka Yesu wʋmi li la, ka yɛl o ye, “Yɛl yinne ma'aa kpɛlim ka fʋ pʋ niŋɛ. Kuosim fʋn mɔr si'el wʋsa ka zaŋ ligidi la tɔnd nɔŋ dim ka fʋ na mɔr kpan'am arezana ni, ka kena dɔllim.”
23 Ka dau la wʋm nɛ'ɛŋa la ka o sʋnf san'am, bɔzugɔ o da mɔr kpan'am hali.
24 Ka Yesu gɔs o kii ka yɛl ye, “Li tɔi hali nɛ banɛ mɔr kpan'am na kpɛn' Wina'am na'amin.
25 Li an na'ana nɛ yʋgʋme na kpɛn' furipiim vɔɔnrin gaad kpan'a na ye o kpɛn' Wina'am na'amin la.”
26 Ka banɛ wʋmi li la yɛl ye, “Ka anɔ'ɔnɛ na nyɛ faangir yʋ'ʋsɛ?”
27 Ka o yɛli ba ye, “Lin ka saalib kʋ nyaŋi maal la anɛ na'ana Wina'am san'an.”
28 Ka Pita yɛl o ye, “Gɔsima, ti basi ti ya' ka dɔllif.”
29 Ka Yesu lɛbisi ba ye, “Asida ka m yɛti ya ye, onɛ bas o yir bɛɛ o pu'a bɛɛ o ba'abiis bɛɛ o ba' nɛ o ma bɛɛ o biis, Wina'am na'am la yɛla,
30 o na di'e ka li gaad bama zʋmaʋŋ kaŋa nwa' ni, ka mɛ lɛn di'e nyɔvʋr dinɛ ka' naar saŋkanɛ ken la na.”
Yesu lɛn tu'as o kum la yɛla
(Mat 20:17-19; Mak 10:32-34)
31 Ka o dɔl o nya'andɔlib pii nɛ ayi' la yi kpɛŋi yɛli ba ye, “Kɛlisimi, ti kennɛ Jerusalem, ka linɛ mɛkama ka Wina'am nɔdi'esidib da sɔb gbauŋʋn Ninsaal Biig la yɛla la na niŋ amɛŋa.
32 Ba na gban'e o tis banɛ ka' Jew dima, ka ba na la' o, ka yaal o, ka tʋbis nintɔɔndi mad o.
33 Ba na bʋ' o ka kʋʋ o, amaa li daba atan' daar o na vʋ'ʋg kumin.”
34 Ka ba pʋ baŋ on yɛt si'el la gbinnɛ. O da pian' pian'ad la ka li ligili ba ya'am ka ba pʋ gban'e li gbinnɛ.
Yesu ti'eb zʋnzɔŋ la yɛla
(Mat 20:29-34; Mak 10:46-52)
35 Ka Yesu ti pɔnr Jeriko la, ka nyɛ zʋnzɔŋ ka o zin' suor kpikpɛŋi sɔsid,
36 ka on wʋm nidib la gat la ka bu'os ye, “Bɔɔ maana?”
37 Ka ba yɛl o ye, “Yesu onɛ an Nazaret nid la gat.”
38 Ka o tans agɔla gɔla ye, “Yesu onɛ an David yaaŋa, zɔmi m nimbaanlig.”
39 Ka nimbanɛ bɛɛ o tuon la tans o ye, “Kɛl vuud.” Ka o maligim tansid agɔla gɔla ye, “David yaaŋa, zɔmi m nimbaanlig.”
40 Ka Yesu zi'en ka yɛli ba ye ba dɔl o kɛɛn o san'an na. Ka on ti li'el Yesu la ka Yesu bu'os o ye,
41 “Fʋ bɔɔd ye m niŋ bɔɔ tisi fɔ?” Ka o lɛbis o ye, “Zugsɔba, m bɔɔd ye m nyɛt.”
42 Ka Yesu yɛl o ye, “Nyɛm ya'as, ka fʋ yadda niŋiri tisif laafi.” 43 Ka o nini kpɛn lak ka o dɔl Yesu zun'od Wina'am yʋ'ʋr. Ka nidib la wʋsa nyɛɛ li la, ka mɛ tisid Wina'am na'asi.
LUK 19
Yesu nɛ Zakeyɔs yɛla
19
Yesu da dɔl Jeriko sʋʋginɛ gat,
2 ka dau sɔ' bɛɛ anina, ka o yʋ'ʋr buon Zakeyɔs. O da anɛ lampɔdi'es kpɛɛm, ka mɔr ligidi bɛdegʋ.
3 O da bɔɔd ye o baŋ Yesu an sɔ', amaa ka kʋ nyaŋɛ, bɔzugɔ nidib la da galis nɛ, ka o mɛ an niŋgiŋ.
4 Dinzug ka o zɔɔ gaad tuonnɛ keŋ dʋ tiig ye o nyɛ Yesu, bɔzugɔ o mi' ye o na dɔl suokan.
5 Ka Yesu ti paae zin'ikan la, ka gɔs agɔla, ka nyɛɛ o ka ye, “Zakeyɔs, sigim tɔ'ɔtɔ na, bɔzugɔ m ye gbɛnnɛ fʋ yin zina.”
6 Ka o sig tɔ'ɔtɔ na, ka di'e o nɛ sumalisim.
7 Ka ban nyɛɛ li la, ba pin'ili nya'amidi nyɔnnɛ tisid taaba ye, “O keŋ ye o sig tʋʋmbɛ'ɛd la sɔb yin.”
8 Ka Zakeyɔs duoe zi'en, ka yɛl ye, “M Zugsɔba, m na zaŋi m arezak pʋsʋkʋ tis nɔŋ dim. Ka m ya'a zamnɛ sɔ' si'el, m na lɛbisi tis o nɔɔra anaasi.”
9 Ka Yesu yɛl o ye, “Faangir la kpɛn' yikaŋa zina na, bɔzugɔ Zakeyɔs mɛ anɛ Abraham yaaŋ.
10 Ninsaal Biig la kena ye o ie banɛ bɔdig la faaɛn ba.”
Sanlima ligidi la siiliŋ
(Mat 25:14-30)
11 Ka ban daa nan kpɛn kɛlisid la, ka Yesu siilimi ba siiliŋ. O da pʋ lal nɛ Jerusalem ka nidib la tɛn'ɛsid ye Wina'am sʋ'ʋlim na nie saŋkan la.
12 Dinzug ka o yɛl ye, “Na'abiigi daa bɛ, ka keŋ teŋ lalli ye o di na'am lɛb na.
13 Ka o buol o tʋmtʋmnib piiga tisi ba sanlima la'af yinne-yinne, ka yɛli ba ye, ‘Nɔkimi ligidi la tɔlim, ka m keŋ ka lɛb na.’
14 “Amaa o sʋ'ʋlim nidib la da kis o nɛ, ka on gaad la ka ba tʋm tʋmtʋmnib ye ba yɛl ye, ‘Ti pʋ bɔɔd ye dau kaŋa aan ti na'aba.’
15 “Ka on di na'am la, ka lɛbi kul na ka kɛ ka ba buol tʋmtʋmnib banɛ ka o daa tis ligidi la ka ba kena, ka o bu'osi ba ye o baŋ nid wʋsa tɔlim nyɛ nyɔɔd si'em.
16 “Ka onɛ daa dɛŋ tuonnɛ kɛɛn o san'an na la yɛl o ye, ‘M zugdaana, fʋ ligidi la nyɔɔd du'alnɛ nɔɔr piiga.’
17 “Ka o zugdaan la yɛl o ye, ‘M tʋmtʋm sʋŋɔ, fʋ mɔya! Fʋn tʋm pʋʋg yinne nɛ bʋn linɛ an bi'ela la zug, fʋ na sʋ'oe tɛɛns piiga.’
18 “Ka onɛ paas ayi' la mɛ kena yɛl ye, ‘M zugdaana, fʋ ligidi la nyɔɔd du'alnɛ abʋnu.’
19 “Ka o yɛl o mɛn ye, ‘Fʋn na sʋ'oe tɛɛns anu.’
20 “Ka onɛ paas la mɛ kena yɛl ye, ‘M zugdaana, fʋ la'af la nwa'. M daa zaŋi li nɛ vilig nɛ pienni su'a,
21 bɔzugɔ m zɔtif nɛ. Fʋ anɛ zukpi'euŋ sɔb onɛ nɔkid bʋn linɛ ka fʋ pʋ digilɛ, ka bun linɛ ka fʋ pʋ bʋdɛ.’
22 “Ka o yɛl o ye, ‘Tʋmtʋm bɛ'og nwa', fʋ nɔɔr pian'ad la gban'af. Fʋn baŋ ye m anɛ zukpi'euŋ sɔb ka nɔkid bʋn linɛ ka m pʋ digilɛ, ka bʋn linɛ ka m pʋ bʋd la,
23 bɔzug ka fʋ pʋ zaŋi m ligidi la niŋ banki ni? Man lɛb na la, m naan kʋ di'enɛ m ligidi nɛ nyɔɔdɛɛ?’
24 “Ka o yɛl banɛ zi'e anina la ye, ‘Di'emin o la'af yinne la tis onɛ mɔr ligidi piiga la.’
25 “Ka ba yɛl o ye, ‘Naa, o pʋn mɔr ligidi piiga sa!’
26 “Ka o lɛbisi ba ye, ‘On mɛkama mɔr la, ba na lɛn tis o. Ka onɛ pʋ mɔr la, hali on mɔr si'el la ba na di'e li.
27 Amaa m bi'emnam banɛ pʋ bɔɔd ye m an na'abi sʋ'oe ba la, mɔri nɛ ba na kʋʋ ba m tuon.’”
Yesu daa kpɛn' Jerusalem teŋin la yɛla
(Mat 21:1-11; Mak 11:1-11; Jon 12:12-19)
28 Yesu daa pa'al nidib la naae la, o daa nɔk suori ken Jerusalem.
29 Ka on daa paad Betfage nɛ Betani tembanɛ kpi'e Olif tiis zuorin la, o daa tʋm o nya'andɔlib ayi'
30 ye, “Kemi teŋ kanɛ bɛ tuon la. Ya ya'a paae, ya na nyɛ bʋŋsia'asiŋ kanɛ ka ba lɔɔ zi'el ka sɔ' nan zi' ban'a o. Yidigimi nɛ o mɔr na.
31 Ka sɔ' ya'a bu'osi ya ye wala ka ya yidigid o, yanam lɛbisim ye, Zugsɔb la bɔɔd o.”
32 Ka banɛ ka o tʋm la paae nyɛ ka li an wʋʋ on yɛli ba si'em la.
33 Ka ban yidigid bʋŋsia'asiŋ la, banɛ sʋ'oe o la bu'osi ba ye, “Bɔ ka ya yidigid bʋŋ la?”
34 Ka ba lɛbisi ba ye, “Zugsɔb la bɔɔd o.”
35 Ka ba mɔr o kɛn Yesu san'an na, ka zaŋi ba fuudi pa'al bʋŋ la zug ka gban'e o ka Yesu ban'.
36 Ka on ken la, ba yadigi ba fuud suor la zug.
37 Ka on daa paad suokanɛ naan Olif zuorin sigid na la, o nya'andɔlib la wʋsa daa pin'ili maan sumalisim dʋ'ʋsi ba kʋkɔya pian'ad Wina'am yʋ'ʋr nɛ o tʋʋm titada banɛ ka ba nyɛ la zug.
38 Ba daa yɛt ye, “Albareka bɛ nɛ na'akanɛ kenna nɛ Zugsɔb la yʋ'ʋr zug. Sumalisim bɛ arezana ni, ka Wina'am yʋ'ʋr sʋŋ la nyɛ dʋ'ʋsʋg.”
39 Ka Farisii dim sieba bɛ nidib sʋʋgin anina, ka yɛl o ye, “Pa'anna, tansimi fʋ nya'andɔlib la, ka ba bas vuud.”
40 Ka o lɛbisi ba ye, “M yɛti ya ye, bama ya'a bas vuud, kuga gba na pian' man.”
Yesu kum Jerusalem nidib la yɛla
41 Ka on daa li'el ka nyɛ Jerusalem teŋ la, o daa kumnɛ teŋ la zug 42 ka yɛl ye, “Ya ya'a mi'in linɛ na tisi ya sumbʋgʋsʋm zina nwa' li naan aan sʋ'ʋm! Amaa li su'anɛ, ka ya nini kʋ nyɛɛ li.
43 Bɔzugɔ saŋa kenna, ka ya bi'emnam na ti tuu maal zaŋguommi giligi ya teŋ la, ka ya nidib kʋ tun'e yii.
44 Ba na fanb yanam nɛ ya biis banɛ ka zaŋguom giligi ya la teŋin, ka kʋ kɛ ka kugir baa yinne sʋn'e li tiraan zugɔ, bɔzugɔ, ya pʋ baŋ saŋa kanɛ ka Wina'am kena ye o faaɛn ya la.”
Yesu daa kpɛn' Wina'am Pʋ'ʋsim Yin la yɛla
(Mat 21:12-17; Mak 11:15-19; Jon 2:13-22)
45† Ka Yesu kpɛn' Wina'am Pʋ'ʋsim Yin la pin'ili kad banɛ kuosid kuosim la yisid, 46 ka yɛti ba ye, “Li sɔbnɛ Wina'am gbauŋʋn ye, Wina'am ye, ‘M yir na anɛ Pʋ'ʋsim Yir.’ Amaa yanam zaŋi lii maal na'ayiis yir.”
47 Ka daar wʋsa ka o bɛ Wina'am Pʋ'ʋsim Yin la pa'an nidib. Ka maanmaannib kpɛɛmnam la nɛ gbauŋmi'idib la nɛ teŋ la kpɛɛmnam daa ieed suoya ye ba kʋʋ o.
48 Amaa ba da gʋ'ʋŋnɛ, bɔzugɔ nidib la wʋsa daa kɛlisid o pian'ad la sʋ'ʋŋa.
LUK 20
Yesu paŋ nyɛɛb la yɛla
(Mat 21:23-27; Mak 11:27-33)
20
Daar yinne ka Yesu bɛ Wina'am Pʋ'ʋsim Yinnɛ pa'an nidib ka mɔɔn labasʋŋ la tisidi ba, ka maanmaannib kpɛɛmnam nɛ gbauŋmi'idib nɛ kpɛɛmnam sieba
2 kena yɛl o ye, “Yɛlimi ti fʋn nyɛ paŋ kaŋa zin'isi'a. Ka anɔ'ɔnɛ tisif suor ka fʋ niŋid nɛ'ɛnama?”
3 Ka o lɛbisi ba ye, “Mam mɛ na bu'osi ya bu'osʋg yinne. Yɛliminim,
4 Joon Wina'am ku'om sʋʋb la da yinɛ Wina'am san'an na bɛɛ saalib san'anɛ?”
5 Ka ba pin'ili nwɛ'ɛd taaba sɔɔra yɛt ye, “Ti ya'a ye li yinɛ Wina'am san'an na, o na yɛli ti ye, ka bɔ ka ti pʋ siak o?
6 Ka ti mɛ ya'a ye li yinɛ saalibin na, nidib la wʋsa na lɔbi ti nɛ kuga, bɔzugɔ nidib la siak ye Joon da anɛ Wina'am nɔdi'es.”
7 Ka ba gʋ'ʋŋ ka lɛbis o ye, “Ti zi' lin yi zin'isi'a naa.”
8 Ka Yesu mɛ yɛli ba ye, “Mam mɛ kʋ yɛli ya mam nyɛ paŋ kanɛ ka m mɔri tʋm nɛ'ɛnam la yi zin'isi'a naa.”
Lɔmbɔn'ɔg sɔb tʋmtʋmnib la siiliŋ
(Mat 21:33-44; Mak 12:1-12)
9 Ka Yesu yɛli ba siiliŋ kaŋa ye, “Dau sɔ' da maal o lɔmbɔn'ɔgʋ sɛ tiis, ka nwiɛn keŋ teŋ si'a saa yuug ka nɔk o lɔmbɔn'ɔg la niŋ pɔgu'udib nu'usin.
10 Ka bunib saŋa paae ka o tʋm tʋmtʋm ye o keŋ pɔgu'udib la san'anɛ di'e o din na. Ka ba bʋ' o lɛbis o nɛ nu'uzaalis.
11 Ka o lɛn tʋm yinne ba san'an na ka ba bʋ' o bɛ'ɛd bɛ'ɛdi kad o bas nɛ nu'uzaalis mɛn.
12 Ka o sin ka maligim tʋm yinne paas atan', ka ba pu'alim o ka yis o lɔmbɔn'ɔgin la bas.
13 “Ka lɔmbɔn'ɔg sɔb la yɛl ye, ‘M yʋ'ʋn na niŋ wala? M ya'a na zaŋ nɛ m mɛŋ biigi tʋm ka li ya'a an onɛ ba na na'as o.’
14 “Ka pɔgu'udib la nyɛɛ o mɛŋ biig la, ba yɛl ye, ‘Ehɛɛn! Oŋa sʋ'oe faar la, kɛlli ka ti kʋʋ o ka faar la liebi ti din.’
15 Ka ba gban'e o vɛ'ɛgi yi lɔmbɔn'ɔgin la kʋʋ o.” Ka Yesu bu'osi ba ye, “Ya tɛn'ɛs ka lɔmbɔn'ɔg la sɔb na niŋ nimbama wala?
16 O na kena kʋ nidib la ka tɔɔm nimpaala kɛ ka ba gur lɔmbɔn'ɔg la.” Ka nidib la wʋm ala la, ka ye, “Win da kɛ ka nwa' maalɛ.”
17 Ka Yesu gɔsi ba ka yɛl ye, “Ka nɛ'ɛŋa gbin an bɔ ka ba sɔb Wina'am gbauŋʋn la ye, “‘Tampigkanɛ ka tanmɛɛdib daa nɛ'ɛs la lieb lɔdigin tampigirɛ’?
18 Ka onɛ pansigi lu kugkan zug na bɛnnim-bɛnnim, ka li ya'a lu diinl sɔ' zug, li na mɛdig o.”
Lampɔ yɔɔb la yɛla
(Mat 21:45-46; 22:15-22; Mak 12:12-17)
19 Ka gbauŋmi'idib nɛ maanmaan kpɛɛmnamɛ baŋ ye o siilim siiliŋ kaŋa nɛ tis ban la, ka bɔɔd ye ba gban'e o saŋkan, amaa ka zɔt nidib la dabiem.
20 Ka ba maligim mɔdigi ba mɛŋi kpansid o ka tʋm nimbi'es banɛ ma' ye ba anɛ sida dim ye ba maal ya'am nɛ ya'am gban'e o, o pian'adin, ka mɔr o keŋ niŋ gɔmena nu'usin.
21 Linɛ an ban bu'os o ye, “Pa'anna, ti mi' ye, fʋ pian'ad ka pa'an linɛ dɔl suor ka pʋ mɔr baregaŋaa, ka pa'an Wina'am yɛla nɛ sida.
22 Li dɔl suor ye ti yɔ lampɔɔ tis na'ab Siiza bɛɛ li pʋ dɔl suorɛ?”
23 Ka o baŋi ba zam la ka yɛli ba ye,
24 “Mɔr la'af yinne na.” Ka ba mɔr na. Ka o bu'osi ba ye, “Anɔ'ɔn footo nɛ anɔ'ɔn yʋ'ʋri sɔbi tabili li ni?”
25 Ka ba lɛbis ye, “Li anɛ
26 Siiza din.” Ka Yesu yɛli ba ye, “Tisimi na'ab Siiza linɛ aan o din ka mɛ tisi Wina'am linɛ aan o din.”
27 Ka ban ye ba zam o ka gban'e o nidibin la, ba maki gʋ'ʋŋ nɛ. On lɛbisi ba si'em la paki ba nɛ ka ba lɛbi an baanlimm.
Kum vʋ'ʋgir la yɛla
(Mat 22:23-33; Mak 12:18-27)
28 Ka Sadusii dim la sieba banɛ ye kum vʋ'ʋgir kae la kɛn o san'an na
28 bu'os o ye, “Pa'anna, Moses da sɔb ye nid ba'abiig ya'a kpi ka bas o pu'a ka o ka' biisɛ, on dim o pʋkɔɔnr la du'a biisi tis ba'abiig la.”
29 Tɔ', ba'abiis ayɔpɔi da bɛ. Ka onɛ an kpɛɛm la di pu'a ka kpi ka pʋ bas biiga.
30 Ka onɛ tia'al la mɛ di pʋkɔɔnr la ka kpi mɛn.
31 Ka onɛ paas atan' la mɛ niŋ ala. Ka ba di pʋkɔɔnr la yinne-yinne kaligi ba wʋsa ka mɛ kpii babayɔpɔi la wʋsa ka ba sɔ' san'an pʋ du'a biiga.
32 Ka li nya'aŋ la ka pu'a la mɛ kpi.
33 Nannanna, ba ya'a ti vʋ'ʋg kuminɛ, anɔ'ɔn na an pu'a nwa' sida? Bɔzugɔ babayɔpɔi la wʋsa di pu'a la.
34 Ka Yesu lɛbisi ba ye, “Zʋmaaŋ kaŋa dim sieba dit pu'ab ka kun sidib, 35 amaa banɛ ka Wina'am gɔs ka li nar ye ba ti vʋ'ʋg kumin ka kpɛn' dunia kanɛ ken la na, kʋ ti dit pu'ab bɛɛ kun sidiba.
36 Ba kʋ nyaŋi lɛn kpii, bɔzugɔ ban nɛ maliaknam zemnɛ ka ba an Wina'am biis ka an nimbanɛ vʋ'ʋg kumin.
37 Li ya'a anɛ kum vʋ'ʋgir yɛla, Moses da sɔbi li yɛla pa'al nyain zin'ikan ka bugum da dit tituug la, ka buol Zugsɔb la ye, ‘Abraham Wina'am nɛ Isaak Wina'am nɛ Jakob Wina'am la.’
38 Zugsɔb la ka' kpi'imnam Wina'am amaa o anɛ banɛ vʋe Wina'am, bɔzugɔ o san'an ka nidib wʋsa mɔr nyɔvʋr.”
39 Ka gbauŋmi'idib la sieba lɛbis o ye, “Pa'anna, fʋ pian' sʋ'ʋŋa.”
40 Ba yʋ'ʋn da zɔt nɛ ban na lɛm bu'os o si'el ya'as.
Kristo la yɛla
(Mat 22:41-46; Mak 12:35-37)
41 Ka Yesu yɛli ba ye, “Wala ka ba yɛl ye, Kristo anɛ David yaaŋa?
42 David da pʋn dɛŋin yɛl Wina'am yʋʋma gbauŋʋn ye, “‘Zugsɔb la yɛli m Zugsɔb ye, “Zin'inimi m datiuŋ,
43 hali ka m ti kɛ ka fʋ bi'emnam bɛɛ fʋ nɔba teŋir.”’
44 Ka David mɛŋi sadigim buol o ye, ‘Zugsɔba’ la, li niŋ wala ka o an David yaaŋa?”
Gbauŋmi'idib la yɛla
(Mat 23:1-36; Mak 12:38-40)
45 O da yɛl o nya'andɔlib la nidib la wʋsa tʋba ni ye,
46 “Gu'usimi ya mɛŋ nɛ gbauŋmi'idib banɛ giligid nɛ fubɛda, ka bɔɔd ye nidib pʋ'ʋsidi ba da'an, ka zin' zin'isʋma la'asʋg dɔɔdin nɛ zin'ibanɛ an na'asi zin'is di'ema zin'isin,
47 ka faand pʋkɔnya ya' ka ma' sɔsid Wina'am nɛ pian'atɔɔg la. Ba na nyɛ kʋʋsbɛ'ɛd bɛdegʋ.”
LUK 21
Pʋkɔɔnr piini la yɛla
(Mak 12:41-44)
21
Ka o gɔdigi gɔs ka nyɛ kpan'am dim la mɔri ba piini sʋʋd Pʋ'ʋsim Yir ligidi daka ni la,
2 ka nyɛ pʋkɔɔnr nɔŋdaan ka o kena niŋ kɔnba ayi'.
3 Ka o ye, “Asida ka m yɛti ya ye, pʋkɔɔnr nɔŋdaan nwa' niŋ ligidi bɛdegʋ gaad nidib la wʋsa.
4 Bama la yis nɛ ba kpan'am linɛ an bɛdegʋ la kena niŋ. Amaa on onɛ an nɔŋdaan la nɔknɛ o zan'a-zan'a tis ka kɛ zaalim.”
Wina'am Pʋ'ʋsim Yir la san'auŋ yɛla
(Mat 24:1-2; Mak 13:1-2)
5 Ka sieba pian' ban nɔk kugsʋma maal Pʋ'ʋsim Yir la ka li vɛnl hali, la'an nɛ piini linɛ ka ba tisid la yɛla.
6 Ka Yesu yɛli ba ye, “Dabisir kenna ka bʋn banɛ ka ya nyɛt la, baa kugir yinne kʋ kpɛlimmi li tiraan zuginɛɛ. Ba na lɔbi ba wʋsa bas teŋin.”
Daamʋg nɛ namisʋg la yɛla
(Mat 24:3-14; Mak 13:3-13)
7 Ka ba bu'os ye, “Pa'anna, saŋkan ka lina ye li niŋɛ? Ka lin ti ye li niŋ saŋa si'a la, zanbin bɔɔ na ti pa'alɛ?”
8 Ka Yesu yɛl ye, “Gu'usimi ka da kɛ ka ba ma' ya ka ya yidigɛ; ka nidib bɛdegʋ na ti nɔki m yʋ'ʋri kena yɛt ye, ‘Manɛ la,’ bɛɛ yɛt ye, ‘Saŋa la li'el ya.’ Da dɔlli nimbamanam taaba.
9 Ka ya ya'a ti wʋm tanp nɛ zaba yɛla, yanam da zɔti dabiem, ka li anɛ ye nɛ'ɛnam wʋsa niŋ yiiga, amaa naar la lɛɛ kʋ kpɛn dɔlli lii.”
10 Ka yɛli ba ye, “Tɛɛns na zabid nɛ taaba, ka na'ab sʋ'ʋlim zabid nɛ na'ab sʋ'ʋlim mɛn,
11 ka tɛɛns na mi'im hali ka kɔ'ɔm na lu zin'is bɛdegʋ ka wibɛ'ɛdnam linɛ lɔmisid nidib la na bɛ, ka ya na nyɛ bʋnnyalima linɛ mɔr dabiem saazug.
12 “Ka nɛ'ɛŋanamɛ ti ye li niŋ la, ba na gban'e ya namisi ya mɔri ya keŋ la'asʋg dɔɔdin nɛ sanreganamin, ka mɔri ya kɛn na'anam nɛ gɔmenanam tuon man yʋ'ʋr zug.
13 Saŋa kan ka ya yʋ'ʋn na nyɛ suori pian' m yɛla.
14 Li ya'a ti an ala, yanam gban'aminɛ ya mɛŋ ka da kɛ ka yanamɛ na lɛbis si'em la paki yaa.
15 Ka m na tisi ya pian'ad nɛ ya'am linɛ ka ya dataas la kʋ nyaŋi lɛbisi ya, bɛɛ ki'isi yaa.
16 Ya saamnam nɛ manam nɛ ya ba'abiis nɛ ya teŋin dim nɛ ya zuanam na gban'e ya tis kpi'euŋ dim ka ba na kʋʋ ya sieba,
17 ka nidib wʋsa na kisi ya mam yɛla. 18 Ka ya zuobʋg baa yinne kʋ bɔdigɛ.
19 Ka ya mɔdigir la zug ka ya na faaɛn ya nyɔvʋr.
Yesu tu'as Jerusalem san'auŋ la yɛla
(Mat 24:15-21; Mak 13:14-19)
20 “Ya ya'a ti nyɛ ka soogianam giligid Jerusalem, yanam baŋim ka li san'auŋ li'el ya.
21 Kɛlli ka banɛ bɛ Juda teŋin zɔɔ dʋ zuoya, ka kɛ ka banɛ bɛ tempʋʋgin la widig ka bas tempʋʋg la, ka banɛ bɛ teŋ la teŋkpɛmis da kena kpɛn'ɛɛ.
22 Ka nɛ'ɛŋa an tʋʋmbɛ'ɛd namisʋg dabisir la, ye li kɛ ka linɛ da sɔb Wina'am gbauŋʋn la niŋ sida.
23 Woo! Li na tɔi tis pu'a banɛ mɔr pʋʋs nɛ banɛ mɔr bilies saŋkan la. Namistita'ar na paae teŋ kan la ni ka Wina'am sʋnf na pɛlig nɛ nimbama.
24 Ka ba na zaŋ zaba sʋ'ʋsi kʋʋ ba, ka buudbanɛ ka' Jew dim na gban'e ba wʋʋ sanrega dim nɛ mɔri keŋ tɛɛns wʋsa ni ka san'am Jerusalem yɔri-yɔri hali ka ba saŋa nyaan ti paae.
Ninsaal Biig la ken la na yɛla
(Mat 24:29-31; Mak 13:24-27)
25 “Nyalima na bɛ winnigin nɛ nwadigin nɛ nwadbibisin. Dunia ni, teŋgbana na nyɛ yɛlpakir ka li lidigi ba, atɛuk nɛ ku'opilaa na lɛ'ɛd hali ka maan tʋkpiidʋg la zug.
26 Dabiem na kɛ ka nidib lidigi ga'aŋ ban na ti nyɛ yɛlbanɛ maan dunia ni la. Bɔzugɔ, Wina'am na ti dam ka mi'im bʋn linɛ wʋsa mɔr kpi'euŋ saazug.
27 Saŋkan la ka ba na nyɛ ka Ninsaal Biig la kenna nɛ saŋgbana, nɛ o paŋ tita'ar nɛ na'am pipilim.
28 Ka nɛ'ɛnam ya'a ti pin'ili naamid, duom zi'en, ka gɔdigi gɔs agɔl; ka ya yɔlisim la pʋ lalla.” LUK 21–22
Tiis siiliŋ
(Mat 24:32-35; Mak 13:28-31)
29 Ka Yesu yɛli ba siiliŋ ye, “Gɔsimi kekaŋ nɛ tiis wʋsa.
30 Ya ya'a ti nyɛ ka ba busid vanpɔla ya mi' ye sigir li'el ya.
31 Ala mɛn ya ya'a ti nyɛ nɛ'ɛnam wʋsa ya na baŋ ye Wina'am na'am la pɔnri.
32 “Asida ka m yɛti ya ye, zʋmaʋŋ kaŋa nwa' nidib kʋ gaadɛ, asɛɛ nɛ'ɛnam wʋsa niŋ.
33 Saazug nɛ dunia na gaad, amaa man pian'ad la kʋ maligim gaadɛ.
Mɛŋ gu'usig la yɛla
34 “Gu'usimi ka ya'a ka' alaa, ya ya'am na pɛ'ɛl nɛ di'ema nɛ danuur nɛ si'elnam linɛ paki ya yɛla, ka daakan la libigi ya
35 wʋʋ baŋi gban'ad si'el si'em la. Ala mɛn li na ti libig nimbanɛ bɛ dunia ni la wʋsa.
36 Gu'usimi ka sɔsidi Wina'am saŋa wʋsa, ka linɛ na kɛ ka ya nyɛ paŋ kanɛ ka ya na ti nyaŋi yi yɛlbama nwa' ni, ka mɛ nyaŋi zi'en Ninsaal Biig la tuon.”
37 Ka daar mɛkama ka o pa'annɛ ba Wina'am Pʋ'ʋsim Yin, ka zaam ɛɛnti ma'ae ka o keŋ gbɛn zuokanɛ ka ba buon ye Olif zuor la zug.
38 Ka bɛkɛung asuba ka nidib wʋsa la'asid o san'an Wina'am Pʋ'ʋsim Yin la kɛlisid o pian'ad.
LUK 22
Judas n zam Yesu la yɛla
(Mat 26:1-5, 14-16; Mak 14:1-2, 10-11; Jon 11:45-53)
22
Malʋŋ kanɛ buon ye Kum Maliak Gaadʋg ka ba ɔnbid bodobodo kanɛ ka danbin pʋ gɛndig la da pɔnri.
2 Ka maanmaannib kpɛɛmnam nɛ gbauŋmi'idib la makid ban na nyɛ suosi'a kʋ Yesu ka lɛɛ zɔt nidib la dabiem.
3 Ka Sʋntaana kpɛn' Judas onɛ ka ba buon ye Iskariot ka o an Yesu nya'andɔlib la yinne sʋnfʋn.
4 Ka o keŋ maanmaan kpɛɛmnamin nɛ kpi'emnam banɛ gur Wina'am Pʋ'ʋsim Yir la san'an, yɛli ba on na niŋ si'em zam Yesu ka ba gban'e o.
5 Ka ba sʋnya ma'ae hali ka ba ye ba na tis o ligidi.
6 Ka o siak ka ieed suokanɛ ka o na zam Yesu saŋa kanɛ ka nidib kae la.
Yesu ye o di malʋŋ tiɛnr la yɛla
(Mat 26:17-25; Mak 14:12-21; Jon 13:21-30)
7 Ka Bodobodo Linɛ Kae Danbin malʋŋʋ paae la, dabiskanɛ ka ba na kʋ Kum Maliak Gaadʋg pɛ'og la,
8 ka o tʋm Pita nɛ Joon ka yɛli ba ye, “Kem ti'ebi malʋŋ la diibi digil ka ti kena di.”
9 Ka ba bu'os o ye, “Yaanɛ ka ti na keŋ ti'ebi li digilɛ?”
10 Ka Yesu yɛli ba ye, “Gɔsimi yanamɛ kpɛn'ɛd tempʋʋgin la, ya na nyɛ dau ka o ziid yʋʋr nɛ ku'om, yanam on dɔl o kpɛn' on kpɛn'ɛd yisi'a la,
11 ka yɛl yisɔb la ye, ‘Pa'an la bu'osid ye, saam dɔkan ka o na di malʋŋ la diib nɛ o nya'andɔlib la bɛ yaanɛ?’
12 Ka o na pa'ali ya dɔkanɛ bɛ girimbisa ni. Ti'ebimi anina guri ti.”
13 Ka ba keŋ, ka on yɛli ba si'em la, li sid niŋ ala, ka ba ti'eb Kum Maliak Gaadʋg malʋŋ la yɛla.
Zugsɔb diib la yɛla
(Mat 26:26-30; Mak 14:22-26; 1Ko 11:23-25)
14 Ka li saŋa paae la ka Yesu zin'in nɛ o tʋmtʋmnib la,
15 ka yɛli ba ye, “M pʋn bɔɔd hali ye man nɛ yanam di Maliak Gaadʋg dikaŋa ka m nyaan namis.
16 Ka m yɛti ya ye, m kʋ lɛn dii li ya'asɛ, asɛɛ ka li niŋ sida Wina'am sʋ'ʋlimin la.”
17 Ka zaŋ nwam, ka on pʋ'ʋs Wina'am bareka naae la, o yɛl ye, “Zaŋimi nɛ'ɛŋa pʋdigi tisi taaba;
18 ka m yɛti ya ye nannanna kʋdim wa'ae sa, m kʋ lɛn nu tiwala daam ti paae Wina'am sʋ'ʋlim la ken saŋa.”
19 Ka o nɔk bodobodo, ka on tis Wina'am bareka pʋ'ʋsim naae la, ka gbin'esi li tisi ba yɛt ye, “Nɛ'ɛŋa aan m niŋgbiŋ linɛ ka m zaŋi tisi ya. Niŋimi nɛ'ɛŋa ka tɛnri m yɛla.”
20 Ka ala mɛn ban di diib la naae la, o zaŋ nwam la yɛl ye, “Nwam kaŋa nwa' anɛ m ziim linɛ kpa'ae maal nɔnapaali ya yɛla la.
21 Amaa gɔsimi ka onɛ ye o zam man la nu'ug nɛ mam nu'ug la'am bɛ diibin kpɛla.
22 Ninsaal Biig la na kpi wʋʋ Wina'am pʋn dɛŋi gban'e si'em la, amaa onɛ na zam o la, li na tɔi hali tis o.”
23 Ka ba yʋ'ʋn pin'ili bu'osid taaba onɛ na niŋi li.
Ninvʋsʋŋ nwa'asʋg la yɛla
24 Ka nɔŋgbannwa'ar duoe ba sʋʋgin hali, onɛ na an ba ninvʋsʋŋ yɛla.
25 Ka o yɛli ba ye, “Dunia kaŋa na'anam pa'an nidibi ba paŋ, ka kpi'euŋ dim la kɛ ka nidib buoni ba ye, ‘Nidib la zuanam.’
26 Da kɛ ka li aan ala ya nii, amaa kɛlli ka ya kpi'euŋ dim lɛɛ lieb wʋʋ biig ka ya kpɛɛm lieb onɛ tʋmi tisidi ya.
27 Ka anɔ'ɔnɛ an kpi'euŋ sɔba, onɛ zin' dit diib bɛɛ onɛ tʋmi tisid o? Li ka' bi'esʋgɔ, li anɛ onɛ zin' dit la. Amaa mam bɛɛ ya sʋʋgin nwa' nɛ tʋmi tisidi ya.
28 “Yanamɛ an banɛ mɔdig ka la'am bɛ nɛ m saŋa kan ka m bɛ makir pʋʋgin la.
29 M Ba' Wina'am tisim suor ka m sʋ'oe sʋ'ʋlim si'em la, ala mɛn ka m tisidi ya suor ka ya na sʋ'oe sʋ'ʋlim.
30 Ya na dit ka nuud nɛ man, ka zin'in na'am gbana zuti kad Israel dim dɔɔd pii nɛ ayi' la saria.”
Yesu n yɛl Pita na ki'is o la yɛla
(Mat 26:31-35; Mak 14:27-31; Jon 13:36-38)
31 Ka Yesu yɛl ye, “Simon, Simon, gu'usim ka Sʋntaana sɔsid suor ye o yɛligi ya wʋʋ pu'a yɛligid ki si'em la,
32 amaa m sɔs Wina'am tisif ye fʋ yadda niŋir da sie. Ka fʋ ya'a ti lɛn tiaki dɔllim, fʋn on kpɛmisi fʋ ba'abiis la.”
33 Ka Pita lɛbisi yɛl o ye, “Zugsɔba, mam ti'eb nɛ ye m dɔllif, hali baa ba ya'a kpɛn'ɛsidif sanrega bɛɛ kʋʋb zin'igi nɛ.”
34 Ka o yɛl ye, “Pita, m yɛtif nɛ ye, yʋ'ʋŋ kaŋa nwa', nɔraug kʋ kaasɛ ka fʋ na ki'is nɔɔra atan' ye fʋ zi' ma.”
Buorig nɛ kɔn nɛ zaba sʋ'ʋg la yɛla
35 Ka o bu'osi ba ye, “Mam tʋmi ya ka ya pʋ mɔr buoris nɛ kɔn ka pʋ pid ta'ada la, si'el pɔ'ɔgi yaa?” Ka ba lɛbis ye, “Ayei.”
36 Ka o yɛli ba ye, “Amaa nannanna, kɛl ka onɛ mɔr buorig zaŋi li ka onɛ mɛ mɔr kɔlʋg mɛ zaŋi li. Ka kɛ ka onɛ ka' zaba sʋ'ʋg la kuos o kparibi da'.
37 M yɛti ya ye lin sɔb si'em Wina'am gbauŋʋn ye ba la'an kaalimi pɛ'ɛs tʋʋmbɛ'ɛd dimin la na ba'asi niŋ asida mam bɛlimin. Ɛɛn, li anɛ tilas ye linɛ da sɔbi m yɛla la niŋ amɛŋa.”
38 Ka ba yɛl ye, “Zugsɔba, gɔsima zaba sʋ'ʋs ayi' nwa'.” Ka o yɛli ba ye, “Li sia'al ya.”
Yesu sɔs Wina'am Olif zuorin la yɛla
(Mat 26:36-46; Mak 14:32-42)
39 Ka o yi dɔɔgin la tɔɔm wʋʋ on ɛɛnti niŋid si'em la ken Olif zuor zug ka o nya'andɔlib dɔl o.
40 Ka o paae zin'igin la ka yɛli ba ye, “Sɔsimi Wina'am ye ya da kpɛn' maksi'a nii.”
41 Ka o vurigi ba san'an bi'ela igini sɔsid Wina'am ye,
42 “M Ba'a, li ya'a anɛ fʋ bɔɔdim, nɔkim nwam kaŋa linɛ an namisʋg la m san'an sa. Amaa ka'anɛ ye m sʋnf bɔɔdim, amaa kɛl ka fʋ bɔɔdim maal.”
43 Ka Wina'am maliak yi arezana ni na kpɛmis o.
44 Ka o bɛ anina namisid ka maligim sɔsid hali ka o ɔnsir yʋ'ʋn nwɛnɛ ziim tuadi lut teŋ kɔra-kɔra.
45 Ka on duoe Winsɔsʋgin la ka lɛb o nya'andɔlib la san'an ka nyɛ ka ba gbisidnɛ ka li anɛ ba sʋʋnri san'am ka ba tadig la zug,
46 ka o bu'osi ba ye, “Bɔ ka ya gbisida? Niemi ka sɔsi Wina'am ka ya da kpɛn' makirinɛ.”
Ban gban'e Yesu si'em la yɛla
(Mat 26:47-56; Mak 14:43-50; Jon 18:3-11)
47 Ka on da nam bɛɛ anina pian'ad la, ka nidib bɛdegʋ kpɛn kena ka o nya'andɔlib yinne onɛ yʋ'ʋr buon Judas la bɛɛ ba tuon. Ka o tʋ'ʋs Yesu ka pʋ'ʋs o.
48 Ka Yesu yɛl o ye, “Judas, fʋ ye fʋ zam Ninsaal Biig la nɛ pʋ'ʋsʋgɔɔ?”
49 Ka o nya'andɔlib banɛ la'am zi'e nɛ o ka nyɛ linɛ naamid la yɛl ye, “Zugsɔba, ti zaŋi ti sʋ'ʋs la zab bɛɛ?”
50 Ka yinne kie maanmaan kpɛɛm yammʋg datiuŋ tʋbiri fi'ig.
51 Ka Yesu yɛl ye, “Ayei, da lɛn niŋ nɛ' ya'asɛ.” Ka si'is dau la tʋbir ka li lɛbi tug.
52 Ka Yesu yɛl maanmaan kpɛɛm nɛ Wina'am Pʋ'ʋsim Yir kpi'emnam nɛ kpɛɛmnam sieba banɛ ye ba gban'e o la ye, “Ya ken na nɛ sʋ'ʋraad nɛ balaya ye ya gban'e m wʋʋ m anɛ na'ayiig bɛɛ?
53 Mam daa ɛɛnti bɛ nɛ ya daar mɛkama Pʋ'ʋsim Yin la, ya pʋ gban'e ma. Amaa zina anɛ ya dabisir ka ya tʋm. Bɔzugɔ saŋa kaŋa ka Sʋntaana onɛ tʋm likin la mɔr paŋ.” LUK 22
Pita ki'is Yesu la yɛla
(Mat 26:57-58, 69-75; Mak 14:53-54, 66-72; Jon 18:12-18, 25-27)
54 Ka ba gban'e Yesu mɔr o keŋ maanmaan kpɛɛm yin, ka Pita bɛ nya'aŋi labisidi dɔl bi'el-bi'el lalli sa.
55 Ka ba nyu'oe bugum zak la teŋsʋk ka la'asi zin' ka Pita mɛ zin' nɛ ba.
56 Ka Pita la'am zin' nɛ ba ka bugum la nie ka pu'asadbil yinne onɛ an tʋmtʋm nyɛɛ o ka yɛl ye, “Dau kaŋa mɛ dɔl Yesu.”
57 Ka Pita ki'is nyain yɛt ye, “Pu'aa, man kʋdim zi' o.”
58 Ka li lɛn niŋ bi'ela ya'as ka ninsɔ' nyɛɛ o ka yɛl ye, “Fʋ mɛ anɛ ba nid yinne.” Ka Pita yɛl ye, “Dau, mam ka' ba yinnee.”
59 Ka li lɛn niŋ bi'ela pɛ'ɛs ya'as ka yinne lɛm mudigidi yɛt ye, “Asida mɛnɛ, dau kaŋa ɛɛnti la'am bɛ nɛ o, bɔzugɔ o anɛ Galile nid.”
60 Ka Pita yɛl ye, “Dau, mam zi' fʋn pian'ad si'el la gbinnɛ.” Ka on nam kpɛm bɛɛ anina pian'ad la ka nɔraug kpɛn kaas.
61 Ka Zugsɔb la gi'e gɔs Pita. Ka Pita tiɛn Zugsɔb la pa'a yɛl o si'em ye, “Nɔraug kʋ ti kaas zina nwaa, ka fʋ na ki'isim nɔɔra atan'.” 62 Ka o yi yiŋi kaas hali.
Ban la' Yesu ka fieb o la yɛla
(Mat 26:67-68)
63† Ka dap banɛ gur Yesu la la' o ka bʋ' o,
64 ka zaŋ fuugʋ vilig o nindaa ka ɛɛnti nwɛ' o ka yɛl o ye, “Kɛl ka Wina'am yɛlif onɛ nwɛ'ɛf la.”
65 Ka tʋ' o hali yaal o.
Yesu bɛ kɔɔtʋ ni la yɛla
(Mat 26:59-66; Mak 14:55-64; Jon 18:19-24)
66 Ka bɛog nie ka maanmaannib kpɛɛmnam nɛ gbauŋmi'idib nɛ kpɛɛmnam wʋsa la'as na ka ba mɔr Yesu keŋi ba kɔɔtʋ ni, ka yɛl o ye,
67 “Yɛlimi ti, fʋnɛ an Kristo laa?” Ka o yɛli ba ye, “M ya'a yɛli ya, ya kʋ siakɛ,
68 ka m ya'a bu'osi ya, ya mɛ kʋ lɛbisɛ.
69 Amaa nannanna nwa' kʋdim wa'ae sa, Ninsaal Biig la na zin' Wina'am onɛ an paŋ tita'ar sɔb la datiuŋ.”
70 Ka ba wʋsa bu'os o ye, “Fʋ sid anɛ Wina'am Biigaa?” Ka o lɛbisi ba ye, “Li an sida ye ya yɛl manɛ la.”
71 Ka ba yɛl ye, “Ti lɛm bɔɔd kasɛtib ye ti niŋ bɔ? Ti mɛŋ wʋmi li o mɛŋ nɔɔrin.”
LUK 23
Yesu bɛ Pailet tuon la yɛla
(Mat 27:1-2, 11-14; Mak 15:1-5; Jon 18:28-38)
23
Ka nidib la wʋsa mɔr o keŋ Pailet san'an
2 ka tu'asi o taali an si'em ye, “Ti nyɛ dau kaŋa nɛ ka o pa'an nidib suokanɛ ka' sʋ'ʋm, ka yɛt ye ti da yɔɔd lampɔɔ tisid na'ab Siiza, ka ye onɛ an Kristo ka mɛ an na'ab la.”
3 Ka Pailet bu'os o ye, “Fʋnɛ an Jew dim na'ab laa?” Ka o lɛbis ye, “Fʋnɛ yɛl ala.”
4 Ka Pailet yɛl maanmaannib nɛ nidib la ye, “M pʋ nyɛ gba'asi'a dau nwa' nii.”
5 Ka ba kpɛm mudigid ye, “O pin'il o pa'alʋg la nɛ Galile mɔri keŋ Juda teŋin hali yʋ'ʋn paae kpɛla na, ka li kɛ ka nidib la duoe taawai nɛ taaba.”
Yesu bɛ Herod tuon la yɛla
6 Ka Pailet wʋmi li ka bu'os ye, “Dau kaŋa anɛ Galile nidaa?”
7 On daa baŋ ye Yesu bɛ nɛ Na'ab Herod sʋ'ʋlimin la, ka kɛ ka ba mɔr o keŋ tis o. Li mɛ da sia'al ka Herod bɛ Jerusalem saŋkan la nɔɔ.
8 Ka Herod nyɛ Yesu la, ka o sʋnf ma'ae hali bɔzugɔ o wʋm o yɛla ka li yuug ka o mɔr pʋtɛn'ɛr ye o ya'a nyɛ Yesu o na tʋm tʋʋmnyalʋŋ si'a.
9 Ka Herod bu'os o bu'osa bɛdegʋ amaa o pʋ lɛbisɛ.
10 Ka maanmaannib nɛ gbauŋmi'idib duoe zi'en o tuon ka pian'ad nɛ kpi'euŋ ye o tʋm bɛ'ɛd.
11 Ka Herod nɛ o soogianam la' o ka tʋm o tʋʋmyaalis, ka bɔ fuvɛnliŋi yɛɛl o mɔr o lɛbis Pailet san'an.
12 Na'ab Herod nɛ Pailet da mɔri dataadim amaa lin yi daakan la, ba da lɛn lɛb nɛ maal taaba zuod.
Pailet kʋʋs Yesu ye o kpi la yɛla
(Mat 27:15-26; Mak 15:6-15; Jon 18:39–19:16)
13 Ka Pailet buol maanmaannib kpɛɛmnam nɛ teŋin kpɛɛmnam nɛ nidib la
14 ka yɛli ba ye, “Ya mɔr dau kaŋa na tisim, ka yɛl ye o pa'annɛ nidib la linɛ pʋ dɔl suorɛ ka li bɔɔdi zi' taawai na. Amaa man vɛɛns o ya sʋʋgin kpɛla la, m pʋ nyɛ ka tʋm yanamɛ ye o tʋm si'el la.
15 Ka Na'ab Herod mɛ pʋ nyɛɛ o gba'asi'a ka lɛn lɛbis o tisi ti na. Dau nwa' pʋ tʋm taal kanɛ nar nɛ kum.
16 M na kɛ ka ba bʋ' o sʋ'ʋŋa ka bas o ka o keŋ.”
[17 Ka Kum Maliak Gaadʋg malʋŋ di'ema saŋa, asɛɛ ka Pailet yis sanrega nid yinne bas.]
18 Ka ba wʋsa kpɛn tansid hali ye, “Kʋʋmi dau kaŋa ka yisi Barabbas n tisi ti.”
19 Barabbas da zabid nɛ teŋ la gɔmena la ka mɛ kʋ nid ka ba kpɛn'ɛs o sanrega.
20 Ka Pailet lɛm pian' ba ya'as ka mɔr pʋtɛn'ɛr ye o bas Yesu.
21 Ka ba kpɛn zan'as ka tansid buŋ-buŋ ye, “Kpan'am o dapuudir zugʋ kʋ! Kpan'am o!”
22 Ka o lɛm bu'osi ba paas nɔɔr atan' ye, “Dau kaŋa tʋm taal bɔ? M pʋ nyɛ gba'ar kanɛ ka o tʋm ka li siak kʋʋbɔ. M na kɛ ka ba bʋ' o sʋ'ʋŋa ka zaŋ o bas.”
23 Ka ba kpɛm mudigidi tansid agɔla gɔla ye ba kpan'am o. Ka Pailet gʋ'ʋŋi siak.
24 Ka Pailet kʋʋs ye ba niŋim o ban bɔɔd ye ba niŋ o si'em.
25 Ka o yis dau kanɛ daa bɛ sanrega ni ka li anɛ on da zabid nɛ gɔmena ka kʋ nid la bas, ka nɔk Yesu tisi ba ye ba niŋi ba ya'am bɔɔdim.
Ban wa'ae ye ba kpa' Yesu la yɛla
(Mat 27:32-44; Mak 15:21-32; Jon 19:17-27)
26 Ka ban gban'e o mɔri ken la, ba tʋ'ʋs dau sɔ' ka o yʋ'ʋr buon Simon ka o an Sairene nid ka ken tempʋʋgin la na, ka ba mugus o ka o zi dapuudir la dɔl Yesu nya'aŋ.
27 Ka nidib bɛdegʋ dɔl o, ka pu'ab la'am gɛndigi kaasid ka kum o yɛla.
28 Ka Yesu fɛndigi yɛli ba ye, “Jerusalem pu'aba, da kummi man yɛllɛ, amaa lɛɛ kummi ya mɛŋ nɛ ya biis yɛla.
29 Gu'usimi ka dabisa kenna ka ba na yɛl ye, ‘Albareka bɛ nɛ banɛ an kʋnduada, nɛ banɛ bin'isa ka biis pʋ mu'a.’
30 Ka nidib na pin'ili yʋ'ʋn yɛt zuoya nɛ zuobibis ye, ‘Lim diinlini ti ka su'a ti.’”
31 Ka o siilim ye, “Ba ya'a niŋid tima'asir anwa, ba na niŋ tikpi'euŋ wala?”
Ba kpa' Yesu dapuudir zug
32 Ka ba mɔr tʋʋmbɛ'ɛd dima ayi' na ye ba la'am kʋ o nɛ ba.
33 Ka ban paae zin'ikanɛ ka ba buon ye, “Zuwauŋ la,” ba kpa' Yesu tabil dapuudir zug anina nɛ tʋʋmbɛ'ɛd dim la, ka yinne bɛɛ o datiuŋ ka yinne bɛɛ o dagɔbʋg.
34 Ka Yesu yɛl ye, “M Ba', yisimi ba tʋʋmbɛ'ɛdi bas ka ba zi' ban niŋid si'ela.” Ka ba vaae o fuud la maal bʋgʋlʋm-bʋgʋlʋm pʋdig taaba.
35 Ka nimbanɛ zi'e kpi'e la gɔsid o, ka kpɛɛmnam la la' o ka yɛt ye, “O faaɛn sieba, o faanm o mɛŋ, o ya'a sid anɛ Kristo onɛ ka Wina'am gaŋ la.”
36 Ka soogianam la mɛ la' o, ka zaŋ danmi'isʋgʋ tis o
37 ka ye, “Fʋ ya'a anɛ Jew dim na'ab fʋn faanmi fʋ mɛŋ.”
38 Ka ba sɔbi tabil o zug baba ye, “Oŋa nwa' an Jew dim na'ab la.”
39 Ka tʋʋmbɛ'ɛd dim banɛ ka ba kpa' kpi'el Yesu la yinne tʋ'ʋd o ye, “Ka' fʋnɛ an Kristo laa?
40 Faanmi fʋ mɛŋ nɛ tinam.” Ka oŋa la tans o tiraan la ye, “La'an nɛ fʋn kpiid la, fʋ pʋ zɔt Wina'am? 41 Li ya'a an yɛlsida pʋʋginɛɛ, tinam namisʋg la anɛ sam yɔɔb, amaa dau kaŋa kʋdim pʋ tʋm tʋʋmbɛ'ɛsi'aa.”
42 Ka yɛl Yesu ye, “Fʋ ya'a ti kpɛn' fʋ sʋ'ʋlimin la fʋn tɛnri m yɛla.”
43 Ka Yesu yɛl o ye, “Asida ka m yɛtif ye, zina nwa' fʋ na bɛ nɛ m arezana ni.”
Yesu kum la yɛla
(Mat 27:45-56; Mak 15:33-41; Jon 19:28-30)
44 Li da anɛ wʋʋ nintaŋ tisʋʋs ka teŋ la wʋsa lieb lik biridi ti paae zaamnɔɔr kɛrefa atan',
45 hali ka nintaŋ daa pʋ lɛn nie. Ka fugɔbʋg linɛ bɛŋ gɔn Wina'am pʋ'ʋsim dɔɔgin la aaɛn buak zin'isa ayi'.
46 Ka Yesu tansi agɔla gɔla yɛl ye, “M Ba'a, m nɔki m siigi niŋi fʋ nu'usin.” Ka on yɛl nɛ'ɛŋa naae la ka kpɛm bas o mɛŋ.
47 Ka Room soogia kpɛɛm la nyɛ linɛ niŋ la wʋsa, o zun'e Wina'am yʋ'ʋr, ka ye, “Asida, dau nwa' anɛ pʋpielim sɔb.”
48 Ka nimbanɛ wʋsa daa la'as ye ba gɔs linɛ na niŋ la nyɛ linɛ niŋ la, ka lɛbidi kun ka li paki ba ka ba mɔr sʋnsa'aŋ bɛdegʋ.
49 Ka o nimmi'idib la wʋsa nɛ pu'a sieba banɛ dɔl o Galile la na zi'e kpikpɛŋ ka gɔsid linɛ niŋ la.
Ban mum Yesu la yɛla
(Mat 27:57-61; Mak 15:42-47; Jon 19:38-42)
50 Dau da bɛ ka o yʋ'ʋr buon Josef. O da anɛ Arimatea teŋ nid, ka an Jew dim kɔɔtʋ la nid yinne, ka an ninsʋŋ nɛ pʋpielim daan hali,
51 ka pʋ dɔlli ba tʋʋma nɛ ba gban'arɛ, ka gurnɛ Wina'am na'am la.
52 Dau nwa' da keŋ Pailet san'an sɔs Yesu niŋgbiŋ la,
53 ka nɔk o niŋgbiŋ la sigis naa bɔbigi li nɛ kasiŋ n su'a o yaʋg kanɛ ka ba kibig tampiingin ka mɛ nam pʋ mum nid anii.
54 Li da anɛ Arezumdaar zaam ka Vʋ'ʋsʋm Daar la na pin'il.
55 Ka pu'a banɛ dɔl Yesu yi Galile na la dɔl Josef n keŋ nyɛ yaʋg la nɛ ban digil Yesu niŋgbiŋ la si'em,
56 ka lɛbi kuli ti'ebi bɔ bʋnnyubisa nɛ tudaari. Ka Vʋ'ʋsʋm Daar la ka ba vʋ'ʋs wʋʋ wada la zi'el si'em la.
LUK 24
Yesu kum vʋ'ʋgir la yɛla
(Mat 28:1-10; Mak 16:1-8; Jon 20:1-10)
24
Ka Alasid daar linɛ an bakuai la pin'ilʋg daar la, bɛkɛung asuba, ka ba isigi keŋ yaʋgʋn la ka mɔri ba bʋnnyubisa linɛ ka ba ti'eb la.
2 Ban paae la ba nyɛ ka kugir la biligi dig lɔsi'a sa ka bas yaʋg la,
3 ka ba kpɛn' pʋʋgini gɔs ka pʋ nyɛ Zugsɔb Yesu niŋgbiŋ la.
4 Ka lin paki ba ka ba nan zi'e bʋra la, ba nyɛnɛ ka nidib ayi' zi'e kpi'e ba ka yɛ fuud ka li nyɛɛn hali.
5 Ka dabiem gban'e pu'ab la hali, ka ba zaŋi ba zuti kpa' teŋ. Ka dap la bu'osi ba ye, “Bɔ ka ya ieed onɛ vʋe la banɛ kpi la zin'iginɛ?
6 O ka' kpɛla. O vʋ'ʋg kumin. Tɛnri on daa nam bɛ Galile ka yɛli ya si'em la ye,
7 ‘Ba na gban'e Ninsaal Biig la tis tʋʋmbɛ'ɛd dim, ka ba kpa' o dapuudir zug, ka li daba atan' daar la, o na vʋ'ʋg kumin.’”
8 Ka ba tiɛn o pian'ʋk la,
9 ka naan yaʋgʋn la lɛbidi kun ka yɛl o nya'andɔlib pii nɛ yinne la nɛ nimbanɛ kpɛlim la wʋsa linɛ niŋ la.
10 Li da anɛ Mɛɛri Magdalen nɛ Joanna nɛ Jemes ma Mɛɛri nɛ pu'a sieba da yɛl tʋmtʋmnib la nɛ'ɛŋa.
11 Ka ba tɛn'ɛs ye pu'ab la yɛli ba si'el la anɛ pian'ayaalis ka pʋ siakɛ.
12 Ka Pita duoe zɔɔ keŋ yaʋgʋn la kunni gɔsi nyɛ kasiŋ la ma'aa, ka lɛbi kuli tɛn'ɛsid linɛ niŋ la yɛla.
Nya'andɔlib ayi' banɛ daa keŋ Emaus teŋin la yɛla
(Mak 16:12-13)
13 Daakan la ka Yesu nidib ayi' daa ken teŋ kan ka li yʋ'ʋr buon Emaus la. Li anɛ wʋʋ maila ayɔpɔi nɛ Jerusalem.
14 Ka ba pian'ad nɛ taaba bʋn linɛ wʋsa maal la.
15 Ka ban nam kpɛm pian'ad ka sɔnsidi li yɛla la, ka Yesu mɛŋ li'eli ba, ka ba la'am ken.
16 Ka li ligili ba ya'am, ka ba pʋ baŋ oo.
17 Ka o bu'osi ba ye, “Bɔ sɔnsig ka ya sɔnsid nɛ taaba?” Ka ba zi'e baanlimm nɛ sʋnsa'aŋ.
18 Ka nid yinne onɛ yʋ'ʋri buon Kleopas la bu'os o ye, “Fʋn gʋllim an saanne kɛn Jerusalem na, ka pʋ baŋ bʋn linɛ maal dabisa nwa' la bɛɛ?”
19 Ka o bu'osi ba ye, “Bɔɔ maalɛ?” Ka ba yɛl o ye, “Li anɛ Yesu onɛ yi Nazaret na la, onɛ daa an Wina'am nɔdi'es la, ka tʋm tʋʋmnyalima, ka pian'ad nɛ paŋ, Wina'am nɛ nidib san'an la yɛla.
20 Ka ti maanmaannib kpɛɛmnam nɛ na'anam daa kɛ ka ba kad o saria, ka kʋʋs ye asɛɛ ba kpa' o tabil dapuudir zugʋ kʋ o.
21 Ka ti daa mɔr pʋtɛn'ɛr ye onɛ na faaɛn Israel dim la. Amaa li anɛ daba atan' zina, ka yɛl kaŋa nwa' maal.
22 Ka pu'a sieba banɛ bɛɛ ti san'an la, kɛ ka ti lidig hali. Ba isigi keŋ yaʋgʋn la,
23 ka pʋ nyɛ niŋgbiŋ laa, ka lɛb na yɛl ye, ba nyɛ maliaknam banɛ yɛli ba ye, o vʋ'ʋgya.
24 Ka ti ninsieba mɛ keŋ yaʋgʋn la, ka nyɛ ka li anɛ wʋʋ pu'ab la yɛl si'em la. Ka ba mɛ pʋ nyɛ oo.”
25 Ka Yesu yɛli ba ye, “Zɔn nɛ ya'am pɔɔdim dima, bɔ ka ya pʋ niŋ Wina'am nɔdi'esidib la da yɛl si'el la wʋsa yadda?
26 Li pʋ nar ye Kristo namis nɛ yɛlbama nwa' wʋsa, ka naan yʋ'ʋn dii o na'am laa?”
27 Ka o pin'ili pa'annɛ ba o mɛŋ yɛla, wʋʋ Moses nɛ Wina'am nɔdi'esidib wʋsa da sɔb Wina'am gbauŋ pʋʋgin si'em la.
28 Ka ban daa ti li'el teŋ kan ka ba wa'ae la, o daa maal wʋʋ o bɔɔd ye o gaadnɛ.
29 Ka ba sɔs o ye, “Dɔlli ti keŋ gbɛn, bɔzugɔ zaam ma'anɛ ka yʋ'ʋŋ bɔɔd sɔb.” Ka o siak, ka dɔlli ba.
30 Ka ban daa zin'in ye ba di la, o daa zaŋ bodobodo pʋ'ʋs Wina'am bareka, ka gbin'esi tisi ba.
31 Ka ba ya'am yʋ'ʋn nie, ka ba baŋ on an sɔ'. Ka o kpɛm mɛlimi ba tuon.
32 Ka ba bu'os taaba ye, “On pa'a pian'ad nɛ ti ka tu'asid linɛ bɛ Wina'am gbauŋ la suorin la, li pʋ niŋi ti sʋnya malisim hali?”
33 Ka ba duoe saŋkan la lɛb Jerusalem nyɛɛ o nya'andɔlib pii nɛ yinne nɛ banɛ bɛɛ ba san'an la, ka ba pʋn la'as taaba sa,
34 ka yɛt ye, “Amɛŋa, Zugsɔb la vʋ'ʋgya, ka nie o mɛŋi pa'al Simon.”
35 Ka ba nidib ayi' la mɛ tu'asi ba bʋn linɛ maal suorin la nɛ on gbin'es bodobodo la si'em, ka ba baŋ o la.
Yesu nie o mɛŋ o nya'andɔlib san'an la yɛla
(Mat 28:16-20; Mak 16:14-18; Jon 20:19-23; Tʋm 1:6-8)
36 Ka ban nam bɛ anina pian'ad nɛ'ɛŋa la, ka Yesu mɛŋ zi'eni ba sʋʋgin ka yɛli ba ye, “Sumalisim bɛ nɛ ya!”
37 Ka ba yirig hali ka li lidigi ba ka ba tɛn'ɛs ye, ba nyɛnɛ silinsiiug.
38 Ka o yɛli ba ye, “Bɔ ka li paki ya ka ya mɔri bi'esʋg pʋtɛnda ya sʋnya ni?
39 Gɔsimini m nu'us nɛ m nɔbpansimpana, ka baŋ ye manɛ la. Si'isiminimɛ gɔsi, silinsiiug mɔr niŋgbiŋ nɛ kɔnba wʋʋ yanamɛ nyɛɛm ka m an si'em laa?”
40 Ka on pian' nɛ'ɛŋa naae la ka nɔk o nu'us nɛ o nɔbpansimpana pa'ali ba.
41 Ka ban nam bi'esid bʋnnyalima linɛ ka ba nyɛ ka li lidigi ba ka mɛ ma'ae ba sʋnya la zug, ka o bu'osi ba ye, “Ya mɔr si'eli na dii?”
42 Ka ba zaŋ ziiŋdʋgida tis o,
43 ka o nɔki lii ɔnbi ba nini ni.
44 Ka o yɛli ba ye, “Pian'abama nwa' aan m pian'ʋk ka m daa pian' tisi ya mam daa nam bɛ nɛ ya la ye, lin wʋsa sɔbi m yɛla ka bɛ Moses wada gbana ni nɛ Wina'am nɔdi'esidib gbana ni nɛ yʋʋma gbana ni la niŋ sida.”
45 Ka o kɛ ka ba pʋtɛnda yɔ'ɔg ye ba baŋ linɛ bɛ Wina'am gbauŋʋn la gbin.
46 O yɛli ba ye, “Ala ka li sɔb ye, Kristo la na namis ka daba atan' daar ka o vʋ'ʋg kumin.
47 Ka ye o yʋ'ʋrin ka mɔɔnmɔɔnib na pin'il Jerusalem mɔɔli tis buudi wʋsa ye ba tiakim ka Wina'am na yisi ba tʋʋmbɛ'ɛdi bas.
48 Ya nyɛ nɛ'ɛnam wʋsa ka na dii li kasɛt.
49 M na tʋmi m Ba' zi'el nɔɔr sɔ' yɛla la tisi ya, amaa bɛɛi tempʋʋgin la ti paae saŋa kan ka ya na pɛ'ɛl nɛ onɛ bɛ saazug la paŋ.”
Yesu kpɛn' arezana ni la yɛla
(Mak 16:19-20; Tʋm 1:9-11)
50 Ka o dɔlli ba laligi paae wʋʋ Betani, ka ʋk o nu'us agɔla ka niŋi ba bareka.
51 Ka on niŋidi ba bareka la ka kpɛn dʋt arezana ni ka basi
1898
ba. 52 Ka ba pʋ'ʋs o ka lɛb Jerusalem nɛ sumalisim bɛdegʋ,
53 ka kpɛm bɛ Wina'am Pʋ'ʋsim Yin la daar wʋsa tisid Wina'am bareka pʋ'ʋsim.
Joon
Gbauŋ nwa' yɛla
Joon da anɛ nya'andɔl kanɛ li'el nɛ Yesu. O da bɔɔd ye nidib baŋ Yesu sid an sɔ', nɛ o tʋʋmnyalima nɛ linɛ ka o da pa'an la yɛla. O pa'an ye Yesu anɛ Wina'am biig ka da bɛ nɛ Wina'am hali pin'ilʋgʋn sa, ka lieb ninsaali bɛ nɛ dunia nidib. Joon zaŋnɛ pian'ad kɔn'ɔb, kɔn'ɔbi pa'an Yesu an sɔ'. Nwɛnɛ: O anɛ nyɔvʋr diib ka an dunia nɛɛsim nɛ kɔnbkem sʋŋ nɛ vain tiig amɛŋa. Joon bɔɔd ye nidib niŋ Yesu yadda ka paam nyɔvʋr dinɛ ka' naarɛ (20:31).
JOON 1
Pian'ad la yɛla
| 1 |
Pin'ilʋgʋn sa ka Pian'ad la da pʋn dɛŋim bɛ, Pian'ad la da bɛnɛ nɛ
Wina'am, ka an Wina'am.
2 Hali pin'ilʋgʋn sa Pian'ad la da bɛnɛ nɛ Wina'am.
3 Ka li yii o san'an na ka Wina'am maal si'el wʋsa, ka li ya'a ka'an onɛ, bʋn linɛ naam la wʋsa kʋ naaminɛ.
4 O san'an ka nyɔvʋr bɛ, ka nyɔvʋr la tis saalib nɛɛsim.
5 Ka nɛɛsim la nie nyain likin ka lik la pʋ nyaŋi kpiisi lii.
6 Wina'am da tʋm dau sɔ' ka o yʋ'ʋr buon Joon.
7 O da kena ye o tu'as nidib nɛɛsim la yɛla. Ka li na yinɛ o san'an na ka nidib wʋsa niŋ Pian'ad la yadda.
8 Ka' onɛ da an nɛɛsim laa, amaa o tʋʋma da anɛ ye o kena di nɛɛsim la kasɛt.
9 Yɛlmɛŋir nɛɛsim linɛ nied nyain tisid saalib wʋsa la da ken dunia nwa' ni na.
10 O da bɛ dunia ni, ka an onɛ maal dunia la, hali la'an nɛ wala dunia dim da pʋ baŋ oo.
11 O kenɛ o mɛŋ teŋin na ka o mɛŋ teŋ dim pʋ di'e oo.
12 Amaa banɛ wʋsa di'e o ka niŋ o yadda la, o tisi ba paŋ kanɛ ka ba na lieb Wina'am biis.
13 Ba da lieb Wina'am biis ka li pʋ nwɛnɛ ninsaalibi du'ad si'em bɛɛ ninsaal bɔɔdim an si'em, amaa Wina'am mɛŋi aan ba Ba'.
14 Ka Pian'ad la da lieb ninsaal ka bɛ nɛ ti. Ka ti nyɛɛ o na'am girima linɛ nie ti san'an ka nar nɛ on kanɛ aan ti Ba' Wina'am biyimmir la. O ni ka yɛlsʋm nɛ sida bɛ.
15 Joon yɛl o yɛla, ka mɔɔli yɛl ye, “Sɔ' bɛ mam nya'aŋ ka mɔr kpi'euŋʋ gat man. Bɔzugɔ o da bɛ ka man nan kae.”
16 Ka li yinɛ o albareka tita'arin ka ti wʋsa di'e o pʋpielim piini la yinne-yinne.
17 Wina'am da kɛ ka Moses tis nidib wada ka lɛɛ kɛ ka pʋpielim piini nɛ sida yi Yesu san'an naa tisi ti.
18 Sɔ' kae nan mi' nyɛ Wina'am. Wina'am biyimmir onɛ bɛɛ o Ba' san'an la kɛ ka ti baŋ o.
Joon onɛ sʋʋd nidib Wina'am ku'om la mɔɔlʋg
(Mat 3:1-12; Mak 1:1-8; Luk 3:1-18)
19 Saŋkan la ka Jew dim banɛ bɛ Jerusalem da tʋm maanmaannib nɛ Levi dim Joon san'an ye ba bu'os o ye, “Fʋ aan anɔ'ɔnɛ?”
20 Ka Joon lɛbisi ba nyain ye, “Li ka' manɛ an Kristo la.”
21 Ka ba bu'os o ye, “Ka fʋ aan anɔ'ɔnɛ? Fʋ anɛ Elaja bɛɛ?” Ka o lɛbis ye, “Ayei.” Ka ba lɛm bu'os o ye, “Ka fʋ anɛ Wina'am nɔdi'es la bɛɛ?” Ka o lɛn lɛbis ye, “Ayei.”
22 Ka ba lɛm bu'os o ya'as ye, “Ka fʋ aan anɔ'ɔn bɛ? Tisimi ti lɛbiskan ka ti na tis banɛ tʋmi ti la na. Fʋ aan anɔ'ɔn kimm nɛ?”
23† Ka Joon lɛbisi ba nwɛnɛ Wina'am nɔdi'es Azaya da sɔb si'em la ye, “Manɛ an onɛ bɛ mɔɔgini mɔɔn ye, ‘Maalimi suor la ka li an sappi tis Zugsɔb la.’”
24 Banɛ bu'os o la yinɛ Farisii dimin na,
25 ka bu'os o ye, “Fʋ ya'a ka' Kristo la, ka ka' Elaja, ka ka' Wina'am nɔdi'es la, ka bɔ ka fʋ sʋʋd nidib la Wina'am ku'om?”
26 Ka Joon lɛbis ye, “Mam sʋʋdi ya nɛ Wina'am ku'om, amaa sɔ' bɛɛ ya sʋʋgin ka ya zi' o.
27 O anɛ onɛ dɔlli m nya'aŋ na ka lɛɛ gatim, hali ka li pʋ nar ye m pidig o ta'adaa.”
28 Linɛ sɔb nwa' da niŋnɛ Betani teŋin Joodan mu'ar nya'aŋ, zin'ikanɛ ka Joon da sʋʋd nidib Wina'am ku'om la.
Wina'am Pɛbil
29 Ka bɛog nie ka Joon nyɛ ka Yesu kenna, ka o yɛl ye, “Gɔsimi Wina'am Pɛbil onɛ yisid dunia tʋʋmbɛ'ɛdi basid la.
30 Oŋa ka m yɛl ye, ‘Sɔ' bɛɛ m nya'aŋi kenna, ka onɛ mɔr kpi'euŋʋ gatim la, bɔzugɔ, o da bɛ ka m kae.’
31 M da pʋ baŋ on an sɔ', amaa linɛ yɛla ka m da sʋʋd nidib Wina'am ku'om la anɛ ye li nie pa'al Israel dim ka ba baŋ o.”
32 Ka Joon yɛl ye, “M nyɛ ka Wina'am Siig Kasi naan arezana ni sigid na nwɛnɛ dawan nɛ zuon o zugin ka kpɛlim o ni.
33 M daa zi' o, amaa Wina'am onɛ tʋmim na ye m sʋ nidib Wina'am ku'om la pa'alim ye, ‘Onɛ ka fʋ nyɛ ka Wina'am Siig Kasi la sig o ni na ka kpɛlim la an onɛ sʋʋd nidib nɛ Wina'am Siig Kasi la.’
34 M nyɛɛ li ka dii li kasɛt ye onɛ an Wina'am Biig la.”
Yesu yiiga nya'andɔlib la yɛla
35 Ka bɛog lɛn nie ka Joon da zi'e nɛ o nya'andɔlib ayi' ya'as.
36 Ka on nyɛ Yesu gat la ka o gɔs o ka ye, “Gɔsimi, oŋa an Wina'am Pɛbil la.”
37 Ka nya'andɔliba ayi' la wʋm la, ka dɔl Yesu.
38 Ka Yesu gi'e nyɛ ban dɔl o la ka bu'osi ba ye, “Ya bɔɔd bɔ?” Ka ba lɛbis o ye, “Rabbi,” (li gbin anɛ ye, pa'anna,) “Fʋ gbɛɛnd yaa ni?”
39 Ka o lɛbis ye, “Kemi na gɔsi.” Ka ba keŋ nyɛ on bɛ si'el, ka gbɛɛn o san'an daakan, bɔzugɔ li da anɛ winkɔɔr.
40 Nidiba ayi' banɛ wʋm Yesu pian'ad ka dɔl o la yinne yʋ'ʋri buon Andrew ka an Simon Pita ba'abiig.
41 Ka linɛ ka Andrew da niŋ yiiga anɛ, o keŋnɛ ie Pitaa ka yɛl o ye, “Ti nyɛ Mazaya la” (Li gbin anɛ Kristo, onɛ ka Wina'am gaŋ la.)
42 Ka o dɔl o kɛn Yesu san'an na, ka Yesu gɔs o ka ye, “Fʋ anɛ Joon biig Simon. Ba na buonif ye Kefas.” (Li anɛ Pita, ka li gbin an Tampiing).
Yesu buol Filip nɛ Nataniel
43 Ka bɛog nie ka Yesu bɔɔd ye o keŋ Galile teŋin ka nyɛ Filip ka yɛl o ye, “Dɔllim.”
44 Filip da yinɛ Besaida, teŋ kanɛ ka Andrew nɛ Pita mɛ yina la.
45 Ka Filip nyɛ Nataniel ka yɛl o ye, “Ti nyɛ onɛ ka Moses da sɔb o yɛla, ka Wina'am nɔdi'esidib mɛ da sɔb la, onɛ an Josef biig Yesu onɛ yi Nazaret la.”
46 Ka Nataniel bu'os o ye, “Bʋnsʋŋ si'a na nyaŋi yi Nazaret teŋin naa?” Ka Filip lɛbis o ye, “Kem na gɔs.”
47 Ka Yesu nyɛ Nataniel ka o kenna la, ka o yɛl ye, “Gɔsimi, oŋa anɛ Israel nid amɛŋa ka pʋ mɔr taalɛ.”
48 Ka Nataniel yɛl ye, “Fʋ niŋ wala baŋi ma?” Ka Yesu lɛbis o ye, “Saŋa kan ka fʋ pa'a bɛ kekaŋ gbinnin ka Filip buolif la, ka mam pʋn nyɛɛf.”
49 Ka Nataniel yɛl ye, “Pa'anna, fʋ anɛ Wina'am biig, ka an Israel dim Na'ab.”
50 Ka Yesu yɛl o ye, “Mam yɛl ye, m nyɛɛf ka fʋ bɛ kekaŋ gbinnin la zug ka fʋ niŋim yaddaa? Fʋ na nyɛ nyalim banɛ gat nɛ'ɛŋa.”
51 Ka lɛn yɛl o ye, “Asida ka m yɛtif ye, fʋ na nyɛ ka arezana yɔ'ɔg ka Wina'am maliaknam dɔl Ninsaal Biig la san'anɛ dʋt ka sigid na.”
JOON 2
Pu'adiir di'ema Kana teŋin
| 2 |
Ka daba atan' daar la ka pu'adiir di'ema daa bɛ Kana teŋin Galile sʋ'ʋlimin. Ka Yesu ma bɛɛ anina.
2 Ka ba buol Yesu nɛ o nya'andɔlib ye ba kɛn di'ema la na.
3 Ka ban nu daam pɔ'ɔg la, ka Yesu ma yɛl o ye, “Ba daam la naae nɛ.”
4 Ka Yesu lɛbis o ye, “M ma, bɔ ka fʋ yɛt man linɛ ka m na maalɛ? M saŋa nam pʋ paae.”
5 Ka o ma yɛl tʋmtʋmnib la ye, “Niŋimi on yɛli ya si'el wʋsa.”
6 Jew dim malʋŋ linɛ an nu'ug pier la zug, ka ba mɔr kuga siins ayuobʋ anina ka siŋ wʋsa mɔr galamnam pisi bɛɛ pistan'.
7 Ka Yesu yɛli ba ye, “Pɛ'ɛlimi siins la nɛ ku'om.” Ka ba pɛ'ɛli ba hali ti paae nɔya bɛn.
8 Ka o yɛli ba ye, “Kabigim tisi onɛ gɔsid di'ema yɛla la.” Ka ba kabigi tis o.
9 Ka onɛ gɔsid di'ema yɛla la pʋ baŋ lin yi si'el naa, amaa tʋmtʋmnib banɛ wik ku'om la mi'. Ka on lɛm daam la, ka buol pu'apaal sid la
10 yɛl o ye, “Sɔ' wʋsa tisidnɛ damalisiŋ di'ema pin'ilʋgʋn, ka ba ya'a ti nuu tig la ka ba yʋ'ʋn tisid danbɛ'ɛd. Amaa fʋn kpiank nɛ damalisiŋ la, hali ti paae nannanna.”
11 Nwa' an Yesu nyalima tʋʋm kanɛ ka o dɛŋin tʋm Kana teŋ kanɛ bɛ Galile sʋ'ʋlimin la. O da nie o paŋi pa'al ka o nya'andɔlib la niŋ o yadda.
12† Ka nɛ'ɛŋa nya'aŋ ka o keŋ Kapeenum teŋin nɛ o ma nɛ o mabiis nɛ
o nya'andɔlib. Ka ba zin'in anina dabisa bi'ela.
Yesu kpɛn' Wina'am Pʋ'ʋsim Yin
(Mak 11:15-17; Luk 19:45-46)
13 Ka Jew dim malʋŋ linɛ an Kum Maliak Gaadʋg la da li'el ka Yesu keŋ Jerusalem
14† ka kpɛn' Wina'am Pʋ'ʋsim Yin la ka nyɛ ban kuosid niigi nɛ pɛ'ɛs nɛ dawana ka nidib bɛɛ anina tia'asid ligidi.
15 Ka o nɔk nwiisi ʋgi li maal kpa'asiri kadi ba wʋsa nɛ ba pɛ'ɛs nɛ niigi yis Pʋ'ʋsim Yin la. Ka kpa'as nimbanɛ tia'asid ligidi la la'abaanlʋgʋ widig, ka lɛbigi ba teebulnam la.
16 Ka yɛl banɛ kuosid dawana la ye, “Nɔkimi bama nwaa tɔɔmi sa. Ya niŋ wala nɔki m Ba' yir la ka li liebi ya da'a!”
17 Ka o nya'andɔlib la tiɛn ye li sɔb Wina'am gbauŋʋn ye, “M nini mu'oe nɛ Wina'am yir si'em la nwɛnɛ bugum dit man nɛ.”
18 Ka Jew dim bu'os o ye, “Tʋʋmnyalima zanbin bɔ ka fʋ na maal ka li pa'al ye fʋ mɔr suori na niŋ anwa?”
19 Ka Yesu lɛbisi ba ye, “San'ami Wina'am Pʋ'ʋsim Yir kaŋa nwa' ka dabisa atan' daar ka m na duoe li zi'el.”
20 Ka Jew dim yɛl ye, “Li nɔknɛ yʋma pisnaasi nɛ ayuobʋ ka ba mɛ yikaŋa ka fʋ na nyaŋi duoe li zi'el dabisa atan' daarɛɛ?”
21 Amaa Yesu daa pian'adnɛ Wina'am Pʋ'ʋsim Yir kanɛ aan o niŋgbiŋ la yɛla.
22 Dinzug, on da kpi ka vʋ'ʋg kumin la o nya'andɔlib la da tiɛnya ye o da dɛŋi yɛl nɛ'. Ka ba niŋ Wina'am gbauŋ la yadda nɛ pian'akanɛ ka Yesu pian' la.
Yesu n mi' linɛ bɛ saalib sʋnya ni la yɛla
23 Yesu daa bɛ Jerusalem Kum Maliak Gaadʋg malʋŋ saŋa ka nidib bɛdegʋ nyɛ tʋʋmnyalima banɛ ka o tʋm la, ba daa niŋ o yadda.
24 Yesu daa pʋ pɛsig o mɛŋi tisi baa, 25 bɔzugɔ o mi' saalib wʋsa. O mi' linɛ bɛ saalib wʋsa sʋnya ni ka pʋ bɔɔd ye sɔ' yɛl o saalib yɛlaa.
JOON 3
Yesu nɛ Nikodemus yɛla
| 3 |
Farisii dim nid yinne da bɛ, ka o yʋ'ʋr buon Nikodemus. O da anɛ Jew dim kpɛɛm.
2 Dau kaŋa da kɛn Yesu san'an yʋ'ʋŋ na yɛl ye, “Pa'anna, ti mi' ye fʋ anɛ pa'an onɛ yi Wina'am san'an na, bɔzugɔ sɔ' kʋ nyaŋi tʋm tʋʋm banɛ ka fʋ tʋm la ka li ya'a ka' Wina'am bɛɛ o sɔb nii.”
3† Ka Yesu lɛbisi yɛl o ye, “Amɛŋa mɛŋa ka m yɛtif ye, li ya'a ka' ba maligim du'af ya'asɛ, fʋ kʋ kpɛn' Wina'am sʋ'ʋlim la nii.”
4 Ka Nikodemus bu'os o ye, “Ba ye ba niŋ wala lɛn du'a ninkanɛ kʋdig ya'asɛ. O na lɛn tun'e kpɛn' o ma pʋʋgin, ka o lɛn du'a o ya'asɛɛ?”
5 Ka Yesu lɛbis o ye, “Amɛŋa mɛŋa ka m yɛtif ye, ninkanɛ pʋ du'a nɛ ku'om nɛ Siiga, o kʋ nyaŋi kpɛn' Wina'am sʋ'ʋlimin laa.
6 Bʋn kanɛ du'a nɛ niŋgbiŋ anɛ niŋgbiŋ, ka bʋnkanɛ du'a nɛ Siig la anɛ siig.
7 Da kɛ ka li lidigif nɛ man yɛl ye, li sʋ'ʋm ka fʋ lɛn du'a la zugɔ.
8 Pɛbisim da'adi kennɛ lin bɔɔd si'el, ka fʋ wʋm lin vuud la, ka zi' lin yi zin'isi'a bɛɛ lin ken zin'isi'a. Onɛ du'a nɛ Siig mɛ anɛ ala.”
9 Ka Nikodemus lɛbisi bu'os o ye, “Bʋn kaŋa na niŋ wala maalɛ?”
10 Ka Yesu lɛbisi bu'os o ye, “Fʋn anɛ Israel kpɛɛm onɛ pa'an nidib, ka zi' nwa'?
11 Amɛŋa mɛŋa ka m yɛtif ye, ti pian'adnɛ tinamɛ mi' si'el, ka di kasɛta tis tinamɛ nyɛ si'el. Amaa ya pʋ siaki ti pian'ad la.
12 M ya'a yɛli ya dunia nwa' yɛla, ka ya pʋ siakɛ, wala ka m na yɛli ya arezana yɛla, ka ya siakɛ?
13 Sɔ' nan zi' dʋ arezana nii, asɛɛ onɛ yi arezana nii sig na la, onɛ an Ninsaal Biig la.
14 Nwɛnɛ Moses n da bɛ mɔɔgin ka zaŋ waafʋ ʋk agɔl si'em la, ala mɛn ka ba na ʋk Ninsaal Biig la.
15 Ka onɛ niŋ o yadda na nyɛ nyɔvʋr dinɛ ka' naarɛ.”
16 Wina'am nɔŋ dunia hali ka tʋm o biyimmir la na. Ka onɛ niŋ o yadda la, kʋ bɔdigɛ, amaa o na nyɛ nyɔvʋr dinɛ ka' naarɛ.
17 Alazug Wina'am pʋ tʋm o Biig dunia ni na ye o kʋʋs dunia dim bɛ'ɛdɛ, amaa ye dunia nyɛ faangir o ma'asim zug.
18 Ka onɛ niŋ o yadda la, ba kʋ kʋʋs o bɛ'ɛdɛ. Amaa onɛ pʋ niŋ o yadda la, Wina'am pʋn kʋʋs o nɛ bɛ'ɛd, on pʋ niŋ Wina'am biyimmir yadda la zug.
19 Ka antu'a kaŋa nwa' yɛt ye, onɛ kɛ ka dunia an nyain la kena, ka nidib bɔɔd liki gaad o, ba tʋʋmbɛ'ɛd la zug.
20 On mɛkama tʋm tʋʋmbɛ'ɛd kisnɛ nɛɛsim la bɛllim ka pʋ kennɛ li nii, o tʋʋma la na ti nie yɛla.
21 Amaa on mɛkama tʋm linɛ aan amɛŋa kennɛ nɛɛsim la ni na, ye o tʋʋm sʋma nie ka nidib baŋ ye li anɛ Wina'am tʋʋma.
Yesu nɛ Joon la yɛla
22 Nɛ'ɛŋa nya'aŋ ka Yesu nɛ o nya'andɔlib la keŋ Juda teŋin ka kpɛlim anina ka sʋ nidib Wina'am ku'om.
23 Ka Joon mɛ da bɛ Anon teŋin linɛ kpi'e Salim teŋin sʋʋd nidib Wina'am ku'om, bɔzugɔ ku'om da bɛɛ ani bɛdegʋ. Ka nidib bɛdegʋ kena ka o sʋʋ ba.
24 Saŋkan la ba da nam pʋ kpɛn'ɛs o sanrega nii.
25 Ka nɔŋgbannwa'ar yi Joon nya'andɔlibin nɛ Jew dim nid yinne Wina'am ku'om sʋʋb yɛla.
26 Ka ba kɛn Joon san'an na yɛl o ye, “Pa'anna, onɛ ka fʋ daa pian'ad o yɛla ka o daa kɛɛn fʋ san'an Joodan mu'ar gbɛogʋn la na bɛɛ anina sʋʋd nidib Wina'am ku'om, ka nidib bɛdegʋ ken o san'an.”
27 Ka Joon lɛbis o ye, “Sɔ' kʋ nyaŋi di'e si'ela asɛɛ linɛ ka Wina'am tis o.
28 Ya mɛŋ na di kasɛt ye m yɛl ye, ‘Li ka' manɛ an Kristo laa. Amaa ba tʋmimnɛ ka m gaad o tuon na.
’ 29 Pu'adaane sʋ'oe o pu'apaal ka pu'adaan la zua zi'e ka wʋm o pian'ad la, ka mɔr sumalisim bɛdegʋ, bɔzugɔ on wʋm pu'adaan la kʋkɔr la zug. M mɔr sumalisim bɛdegʋ.
30 Li nar ka on dʋ ka man sie.”
Onɛ yi arezana ni na la yɛla
31 Onɛ yi agɔl na la gat si'el wʋsa, ka onɛ bɛ dunia ni anɛ dunia nid ka pian'ad dunia yɛla. Onɛ yi arezana ni na la gat si'el wʋsa
32 ka pian'ad on wʋm ka nyɛ si'el, amaa sɔ' pʋ di'e o pian'ad la.
33 Onɛ di'e o pian'ad la pa'al ye Wina'am an yɛlsida daan.
34 Onɛ ka Wina'am tʋm na la pian'adnɛ Wina'am labaar ka li anɛ Wina'am tis o Siig Kasi linɛ ka' makir la zug.
35 Ti Ba' Wina'am nɔŋ o Biig la ka zaŋ si'el wʋsa niŋ o nu'usin.
36 Onɛ niŋ o Biig la yadda mɔr nyɔvʋr linɛ ka' bɛnnɛ. Ka onɛ pʋ siak Biig la nɔɔrɛ, o kʋ nyɛ nyɔvʋrɛ, ka Wina'am sʋnpɛɛn lɛɛ na bɛ on sɔb zugin.
JOON 4
Yesu nɛ Samaria dim pu'a la yɛla
| 4 |
Yesu daa ti baŋ ye Farisii dim wʋm ya ye, on Yesu sʋʋd nidib Wina'am ku'om gaad Joon.
2 Amaa Yesu nya'andɔlib la daa sʋʋdi ba ku'om, ka ka' Yesu mɛŋa.
3 On wʋm ban yɛt si'el la, o daa yi Juda sʋ'ʋlimin keŋ Galile sʋ'ʋlimin.
4 Li daa anɛ tilas ye o dɔlli yi Samaria sʋ'ʋlim;
5 ka o keŋ paae Samaria teŋ si'a ka ba buon ye Sikar, linɛ kpi'e pɔkanɛ ka Jakob da tis o biig Josef la.
6 Ka Jakob bulig bɛɛ anina, ka Yesu paae ani ka gɛɛnlis mɔr o ka o zin'in bulig la zug, ka li an nintaŋ tisʋʋs.
7 Ka Samaria dim pu'a sɔ' kena ye o wik ku'om. Ka Yesu yɛl o ye, “Tisim ku'om ka m nu.”
8 (Bɔzugɔ o nya'andɔlib la gaadnɛ tempʋʋgin ye ba da' diib na.)
9 Ka pu'a la lɛbisi bu'os o ye, “Bɔ ka fʋn onɛ an Jew nid, sɔsid man onɛ an Samaria dim pu'a ye, m tisif ku'om.” (Bɔzugɔ Jew dim nɛ Samaria dim nɛ'ɛsidnɛ taaba.)
10 Ka Yesu yɛl o ye, “Fʋ ya'a mi' Wina'am piini an si'el, ka lɛm mi' onɛ yɛtif ye tisim ku'om la, fʋ naan sɔsin o ka o tisi nɛf vʋm ku'om.”
11 Ka pu'a la lɛbisi yɛl ye, “M Zugsɔba, fʋ pʋ mɔr lɔbidiŋ ye fʋ wikɛ, ka bulig la mɛ zulim. Yaanɛ ka fʋ na paam vʋm ku'okaŋa?
12 Fʋ gat tinam yaab Jakob onɛ tis tinam bulig la, ka mɛ nu bulig la ku'om nɛ o biis nɛ o bʋnkɔnbid laa?”
13 Ka Yesu lɛbisi yɛl o ye, “Onɛ wʋsa nu bulkaŋa ku'om la, ku'onuud na lɛm gban'e o.
14 Amaa onɛ wʋsa na nu ku'okanɛ ka m na tis o la, ku'onuud kʋ maligim gban'e on sɔba. Amaa ku'okanɛ ka m na tis o la na ti nwɛnɛ bulig on sɔb pʋʋgin, ka li na buli tis o nyɔvʋr kanɛ ka' naarɛ.”
15 Ka pu'a la lɛbisi yɛl o ye, “M Zugsɔba, tisim ku'okan ka m nu, ka ku'onuud kʋ lɛm gban'e ma, ka m kʋ lɛn kɛn kpɛla na wikid ku'om.”
16 Ka Yesu yɛl o ye, “Kem buoli fʋ sid na.”
17 Ka pu'a la lɛbisi yɛl o ye, “M pʋ mɔr sida.” Ka Yesu yɛl o ye, “Fʋ pian' yɛlsida, fʋn yɛl ye fʋ ka' sid la.
18 Fʋ kulnɛ sidib anu nwa'. Ka onɛ ka fʋ bɛ nɛ o nannanna la ka' fʋ sida. Li anɛ yɛlmɛŋir ka fʋ yɛl.”
19 Ka pu'a la yɛl Yesu ye, “M Zugsɔba, m baŋ ka fʋ anɛ Wina'am nɔdi'es.
20 Ti yaanam da pʋ'ʋsid Wina'am zuokaŋa zug. Ka yanam Jew dim yɛt ye, li sʋ'ʋm ka ti pʋ'ʋs Wina'am nɛ Jerusalem.”
21 Ka Yesu yɛl o ye, “Pu'aa, siakim m ye, saŋa kenna, ka ya kʋ pʋ'ʋs zuokaŋa zug bɛɛ Jerusalem pʋʋgini tisidi ti Ba' Wina'am ya'asɛ.
22 Yanam pʋ'ʋsidnɛ tisid bʋnkanɛ ka ya zi'. Tinam pʋ'ʋsidnɛ tisid bʋnkanɛ ka ti mi', bɔzugɔ faangir la yitnɛ Jew dim san'an na.
23 Amaa saŋa kenna, ka li paae ya, ka banɛ pʋ'ʋsid amɛŋa tisidi ti Ba' Wina'am la na pʋ'ʋs nɛ siig nɛ yɛlmɛŋir. Ti Ba' Wina'am bɔɔdnɛ banɛ pʋ'ʋsid pʋ'ʋskan la buudi.
24 Wina'am anɛ siig, Ka li sʋ'ʋm ye banɛ pʋ'ʋsid o la pʋ'ʋsim o nɛ siig nɛ yɛlmɛŋir.”
25 Ka pu'a la lɛbisi yɛl o ye, “M mi' ye Mazaya, onɛ ka Wina'am gaŋ la kenna, onɛ ka ba buon ye Kristo la. O ya'a ti kena, o na pa'ali ti si'el wʋsa.”
26 Ka Yesu yɛl o ye, “Man onɛ pian'adi tisidif la, an on sɔb.”
27 Ka ban sɔnsi naae la, ka o nya'andɔlib la kena, ka li lidigi ba, on sɔnsid nɛ pu'a la, amaa ka sɔ' pʋ bu'os pu'a la ye, “Bɔ ka fʋ bɔɔda?” Bɛɛ bu'os Yesu ye, “Bɔ ka fʋn nɛ pu'a la sɔnsida?”
28 Ka pu'a la bas o yʋʋr la, ka keŋ tempʋʋgin la yɛl nidib la ye,
29 “Kemi na gɔs dau kanɛ yɛl man zugin yɛla wʋsa. Onɛ pa'ati an Kristo la bɛɛ?”
30 Ka ba yi tempʋʋgin la kɛɛn o san'an na.
31 Saŋkan la ka o nya'andɔlib la sɔs o ye, “Pa'anna, dim diib.” 32 Ka o yɛli ba ye, “M mɔr diibi na di, amaa ya zi'.”
33 Ka o nya'andɔlib la yɛl taaba ye, “Sɔ' mɔr diib na tis o bɛɛ?”
34 Ka Yesu yɛli ba ye, “M diib anɛ ye m tʋm onɛ tʋmi m la na bɔɔdim naae.
35 Ya pʋ yɛt ye, ‘Li kpɛlim nwadis anaasi ka ki bunib saŋa paae?’ Gɔsimi, m yɛti ya ye, gɔdigimi ya nindaasi gɔs pɔɔd la. Ba sid pɛlignɛ gur bunib.
36 Onɛ bʋn di'ednɛ yɔɔd, ka vaad zʋʋd la ka li nwɛnɛ nimbanɛ niŋ yadda kpɛn'ɛd nyɔvʋr linɛ ka' naarin si'em la. Bɔzugɔ onɛ bʋd nɛ onɛ bʋn na la'asi nyɛ sumalisim.
37 Ala ka pian'ʋk la niŋ amɛŋa ye, ‘Yinne bʋd nɛ. Ka yinne mɛ bʋn.’
38 M tʋmi ya nɛ ye ya keŋ bʋn dinɛ ka ya pʋ kuaa. Sieba daa kua. Amaa yanam di'enɛ tʋʋma la nyɔɔd.”
39 Samaria dim bɛdegʋ banɛ bɛ teŋ kan la pʋʋgin daa niŋ Yesu yadda, pu'a la yɛl si'el la zug, ye, “O yɛl man zugin yɛla wʋsa.”
40 Ka Samaria dim la kɛɛn o san'an na la, ba sɔs o ye, o bɛ nɛ ba. Ka o kpɛlimmi ba san'an daba ayi'.
41 Nidib bɛdegʋ daa niŋ o yadda ya'as, o yɛlʋg la zug,
42 ka yɛl pu'a la ye, “Di lɛn ka' fʋn yɛl si'el la zug ka ti niŋ o yadda. Amaa tinam mɛŋ-mɛŋ wʋm o yɛlʋg la, ka baŋ ye dau kaŋa sid anɛ dunia la faangid.”
Yesu ti'eb na'ayikpɛɛm biig
43 Yesu daa bɛ Samaria daba ayi' ka tɔɔm anina keŋ Galile;
44† ka Yesu mɛŋ da yɛl ye, “Wina'am nɔdi'es kʋ nyɛ na'asi o mɛŋ teŋinnɛ.”
45 Ka on paae Galile la ba di'e o sʋ'ʋŋa, ban nyɛ on tʋm si'el Jerusalem teŋin Kum Maliak Gaadʋg malʋŋʋn la, bɔzugɔ ban mɛ daa keŋ.
Yesu ti'eb gɔmena kpɛɛm biig
(Mat 8:5-6; Luk 7:1-2)
46 Ka o paae Kana linɛ bɛ Galile sʋ'ʋlimin; zin'ikanɛ ka o daa tiak ku'om ka li lieb daam la. Ka Kapeenum teŋin ka gɔmena kpɛɛm yinne bɛɛ ani ka o biig bɛn'ɛd.
47 Ka on wʋm ye Yesu naam Juda n kɛn Galile na la, o keŋ bɛlim o ye o kena ti'eb o biig la ka o bɔɔdi kum.
48 Ka Yesu yɛl o ye, “Ya ya'a pʋ nyɛ zanbina nɛ bʋnnyalimaa, ya kʋ niŋ m yaddaa.”
49 Ka na'ayikpɛɛm la yɛl o ye, “M Zugsɔba, kem tɔ'ɔtɔ na ka biig la nam pʋ kpii.”
50 Ka Yesu yɛl o ye, “Kem, ka fʋ biig la na paam laafi.” Ka dau la niŋ pian'ʋk kanɛ ka Yesu pian' tis o la yadda ka keŋ.
51 Ka on gban'e suori kun la, ka tʋmtʋmnib tʋ'ʋs o ka yɛl o ye, “Fʋ biig la tiligya.”
52 Ka o bu'osi ba saŋkanɛ ka o biig la ban'as la pin'ili sɔn'oe. Ka ba lɛbis ye, “Su'os nintaŋ winkɔɔr saŋa ka o nintʋʋlim la bas o.”
53 Ka o ba' la baŋ ye li anɛ saŋa kan ka Yesu sa yɛl o ye, “Fʋ biig la na paam laafi la.” Ka on nɛ o yidim wʋsa niŋ Yesu yadda.
54 Nɛ'ɛŋa da an Yesu tʋʋmnyalima linɛ paas ayi' ka o da tʋm on da yi Juda keŋ Galile la.
JOON 5
Yesu n ti'eb nid bɛuŋ san'an la yɛla
| 5 |
Nɛ'ɛŋa gaad la, Yesu da keŋ Jerusalem ka Jew dim malʋŋ yinne bɛ.
2 Zaŋguom kanɛ gilig Jerusalem la mɔr za'anɔya, ka yinne bɛ ka ba buon ye Pɛ'ɛs Za'anɔɔr. Li baba ka bɛuŋbil bɛ ka ba buon Betesda nɛ Jew dim pian'ad ka sʋga anu bɛɛ ani.
3 Ka ban'adnam bɛdegʋ digi ba ni, ka sieba an zʋnzɔɔs, ka sieba an waba ka sieba an pɔnda (ka ba gur ku'om la dammʋg saŋa.
4 Ka saŋa bɛ nɛ ka Zugsɔb maliak sigid kɔlʋgin la dammi dam ku'om la, ka onɛ mɛkama sig yiiga on daana na nyɛ laafi.)
5 Ka dau yinne da bɛ anina bɛn' yʋma pistan' nɛ anii.
6 Ka Yesu nyɛɛ o ka baŋ ye o dig anina ka li yuug la, ka bu'os o ye, “Fʋ bɔɔd ye fʋ nyɛ laafi?”
7 Ka ban'ad la lɛbis ye, “M Zugsɔba, m ka' sɔ' onɛ na zaŋimi sigis ku'omin la li dammʋg saŋa la, ka man ti ye m sig la, ka sɔ' pʋn dɛŋi sig sa.”
8 Ka Yesu yɛl o ye, “Duom zaŋi fʋ sɔŋ la keŋ.”
9 Ka anina yim ka dau la nyɛ laafi ka nɔk o sɔŋ la keŋ. Daakan da anɛ Jew dim Vʋ'ʋsʋm Daar.
10 Linzug ka Jew dim la yɛl dau la ye, “Zina anɛ Vʋ'ʋsʋm Daar. Ti wada ni, li anɛ kisʋg ye fʋ zi sɔŋ daakaŋa.”
11 Ka o lɛbisi ba ye, “Dau kanɛ ti'ebim la yɛlim ye, ‘Zaŋimi fʋ sɔŋ la keŋ.’”
12 Ka ba bu'os o ye, “Dau kan aan anɔ'ɔnɛ yɛlif ye, ‘Zaŋimi fʋ sɔŋʋ keŋɛ?’”
13 Ka dau kanɛ nyɛ laafi la pʋ baŋ lin an sɔ' bɔzugɔ Yesu daa tɔɔm kpɛn' nidib la sʋʋgin.
14 Ka lin nya'aŋ la ka Yesu nyɛ pɔn'ɔr kanɛ ka o daa ti'eb la Wina'am Pʋ'ʋsim Yin ka sa'al o ye, “Gɔsima, fʋ nyɛ laafi. Da lɛn tʋm tʋʋmbɛ'ɛd ya'as ka si'el ti niŋif ka li an bɛ'ɛdi gaad yiigin la.”
15 Ka dau la keŋ yɛl Jew dim la ye Yesu ti'eb o la.
16 Yesu da ti'eb dau la Vʋ'ʋsʋm Daar la zug ka Jew dim la pin'ili mugusid o pamm.
17 Ka Yesu lɛbisi ba ye, “M Ba' tʋmnɛ saŋa wʋsa, ka mam mɛ tʋm.”
18 Ka Jew dim la mɔ nɛ nimmua hali ye ba kʋʋ o, bɔzugɔ li ka'anɛ Vʋ'ʋsʋm Daar wada san'auŋ la yɛla ma'aanɛ, amaa on buon Wina'am ye, o Ba', ka pa'asim o mɛŋ nɛ Wina'am la.
Biig la mɔr paŋ si'em la yɛla
19 Ka Yesu lɛbisi ba ye, “M yɛti ya nɛ linɛ an sida ye, Biig la kʋ nyaŋi niŋ si'el nɛ o mɛŋ paŋa. O niŋid nɛ linɛ ka o nyɛ ka o Ba' niŋid la ma'aa. Ka o Ba' la niŋid si'em la ka o mɛ niŋid.
20 Bɔzugɔ Ba' la nɔŋ Biig la ka pa'al o linɛ wʋsa ka o niŋid. O na pa'al o tʋʋm kanda ka li gat bama ka li na lidigi ya.
21 Ka nwɛnɛ Ba' la vʋ'ʋgid kum ka tisid nyɔvʋr la, ala mɛn ka Biig la tisid banɛ ka o bɔɔd la nyɔvʋr.
22 Ka Ba' la pʋ kad sɔ' saria amaa o bas sariakadib la tis nɛ Biig la,
23 ye nidib wʋsa na'as o wʋʋ ban na'asid o Ba' la si'em la. Onɛ pʋ na'asid Biig la, mɛ pʋ na'asid o Ba' kanɛ tʋm o la naa.
24 “Asida ka m yɛti ya nɛ'ɛŋa ye, onɛ niŋim pian'ad la yadda ka mɛ niŋ onɛ tʋmi m la yadda, mɔr nyɔvʋr linɛ ka' naarɛ. Ba kʋ kad o saria; o yinɛ kumin kpɛn' nyɔvʋrin.
25 Asida ka m yɛti ya ye saŋa la li'elnɛ, li sid paae na, ka banɛ kpi la na wʋm Wina'am Biig la kʋkɔr, ka banɛ wʋm la na vʋe.
26 Ka ti Ba' Wina'am n sʋ'oe nyɔvʋr si'em la, ala mɛn ka o kɛ ka o Biig la mɛ sʋ'oe nyɔvʋr,
27 ka tis o paŋ ye o kad saria, on an Ninsaal Biig la zug.
28 “Da kɛ ka li lidigi ya. Saŋa la li'el ya ka banɛ wʋsa bɛ yaadin na wʋm o kʋkɔr
29 ka yina. Banɛ tʋm sʋ'ʋm na vʋ'ʋg kumin ka nyɛ nyɔvʋr, amaa banɛ tʋm bɛ'ɛd na vʋ'ʋg ka Wina'am mɔŋi ba bʋʋd.
Yesu kasɛt la yɛla
30 “M kʋ nyaŋi niŋ si'el nɛ m mɛŋ paŋa. M kad saria ka li dɔlnɛ mam wʋm si'el Wina'am san'an la. M bɔɔd ye m niŋnɛ onɛ tʋmi m la na bɔɔdim ka ka'anɛ m mɛŋ bɔɔdim, dinzugɔ m sariakadib anɛ yɛlsida.
31 M ya'a dii m mɛŋ kasɛt, li ka' sidaa,
32 amaa sɔ' bɛɛ diti m kasɛt ka m mi' ye li anɛ sida.
33 “Ya daa tʋm sɔ' Joon san'an ka o tu'as sida la yɛla tisi ya.
34 Li ka'anɛ ye li nar ye saal di kasɛti tisi ma, amaa m yɛl nɛ'ɛŋa ye ya nyɛ faangir.
35 Joon daa anɛ wʋʋ fitir linɛ tisid nɛɛsim ka ya siak ye ya bɛ nɛɛsim la ni nɛ sumalisim saŋa bi'ela.
36 “Kasɛt linɛ pa'alim yɛla la gat linɛ ka Joon di la. Tʋʋm banɛ ka m Ba' tʋmim ye m tʋm, ka m sid tʋm la pa'an ye m Ba' Wina'am tʋmim na.
37 Ka m Ba' onɛ tʋm mam na la, o mɛŋ di kasɛti m yɛla. Yanam pʋ wʋmm o kʋkɔrɛ, ka mɛ nam pʋ nyɛ on an si'em,
38 ka pʋ mɔr o pian'ad la ya sʋnya nii, yanamɛ pʋ niŋ onɛ ka o tʋmi ya san'an na yadda la zug.
39 Ya tɛn'ɛs ye nyɔvʋr kanɛ ka' bɛn la bɛ Wina'am gbauŋʋn, ka linzug ka ya ieed ye ya baŋi li gbin. Gbauŋ la diti m kasɛt,
40 ka la'an nɛ wala ya zan'as ka pʋ kɛɛn m san'an na ye ya nyɛ nyɔvʋrɛ.
41 “M pʋ bɔɔd na'asi saalib san'anɛ,
42 amaa m mi' ya pʋʋs ka ya pʋ mɔr Wina'am nɔŋiri ya sʋnya nii.
43 Mam nɔknɛ m Ba' yʋ'ʋri kena, ka ya pʋ di'e ma. Amaa sɔ' ya'a nɔk o mɛŋ yʋ'ʋri kena ya na di'e o.
44 Ya na niŋ wala niŋ Wina'am yadda, yanam banɛ di'esid na'asi ya taaba ni ka pʋ bɔɔd na'asi kanɛ yit Wina'am yinne ma'aa la ni na la?
45 “Da tɛn'ɛsi ye m na nɔki ya yɛlbɛ'ɛdi keŋi m Ba' la san'anɛ. Amaa Moses onɛ ka ya nɔki ya ti'iri niŋ o ni la na pɔ'ɔgi ya. 46 Ya ya'a siakin Moses ya naan siakin man mɛn, on sɔbi m labaar la zug. 47 Ka ya ya'a pʋ siak o sɔb la, ya na niŋ wala siaki m pian'ad la?”
JOON 6
Yesu diis nidib bɛdegʋ
(Mat 14:13-21; Mak 6:30-44; Luk 9:10-17)
| 6 |
Ka Yesu lɔ'ɔŋ Galile bɛuŋ linɛ an Tiberias bɛuŋ la.
2 Ka nidib bɛdegʋ dɔl o, bɔzugɔ ba nyɛɛ o tʋʋmnyalima banɛ ka o maali tis ban'adnam la.
3 Ka Yesu dʋ zuor zugʋ zin'in anina nɛ o nya'andɔlib la.
4 Kum Maliak Gaadʋg malʋŋ dabisir saŋa daa li'elnɛ.
5 Ka Yesu gɔdig o zug, ka nyɛ nidib bɛdegʋ banɛ kennɛ o san'an la na ka bu'os Filip ye, “Ya ka ti na nyɛ diibi da'a tis nidib nwa', ka ba di?”
6 O yɛla nwa' nɛ ye o mak o gɔs, bɔzugɔ o mɛŋ mi' on na niŋ si'em.
7 Ka Filip lɛbis o ye, “Ligidi ya'a pʋn zu'oe si'em wʋsa, li kʋ nyaŋi da' diib ka nidib nwa' nyɛ bi'el bi'eli nyi'igɛ.”
8 Ka Yesu nya'andɔl yinne, onɛ yʋ'ʋri buon Andrew, Simon Pita ba'abiig la, yɛl o ye,
9 “Biribiŋ bɛ kpɛla mɔr bodobodo anu nɛ zimbibis ayi'. Ka nɛ' na niŋ nidib bɛdegʋ nwa' bɔ?”
10 Ka Yesu yɛl ye, “Kɛlli ka nidib la zin'in.” Mɔɔd bɛdegʋ daa bɛ zin'ikan la. Ka dap la zin'in. Ba kal daa anɛ wʋʋ tusa nu.
11 Ka Yesu di'e bodobodo la pʋ'ʋs Wina'am bareka, ka pʋdigi tis nimbanɛ zin' la, ka niŋ ala nɛ zimi la mɛn. Ka ba wʋsa dii tig.
12 Ka ban dii tig la, ka o yɛl o nya'andɔlib la ye, “La'asimi bodobodo linɛ kpɛlim la, ka da kɛ ka si'el san'am.”
13 Ka ba vaae dizɔris la wʋsa ka li pɛ'ɛl pɛɛd pii nɛ ayi'. Li anɛ bodobodo anu la dizɔris ka ba da vaae, nidib la dii naae la nya'aŋ.
14 Dinzugɔ nidib bama nwa' nyɛ Yesu tʋʋmnyalima la, ka ba yɛl ye, “Amɛŋa, o sid anɛ Wina'am nɔdi'es onɛ ka ba da yɛl ye, o na kɛn dunia ni na la.”
15 Ka Yesu baŋ ye ba na gban'e o, diis o na'am la, o lɛbi keŋ zuoya baba o kɔn'ɔkɔn'.
Yesu ken ku'om zug
(Mat 14:22-23; Mak 6:45-52)
16 Ka zaamnɔɔr ka o nya'andɔlib la sig bɛuŋin na
17 ka kpɛn' anrʋŋʋn lɔ'ɔŋid bɛuŋ la tu'ae Kapeenum teŋin. Ka yʋ'ʋŋ sɔbid ka Yesu nam pʋ keŋi ba san'anɛ.
18 Ka sisi'etita'ar da'ad ka ku'opila dʋt agɔla hali bɛdegʋ.
19 Ka ba daa gaad anrʋŋ la keŋ wʋʋ mail atan' nɛ pʋsʋk ka nyɛ ka Yesu ken ku'om la zugʋ li'en anrʋŋ la ka li lidigi ba.
20 Ka Yesu yɛli ba ye, “Li anɛ man. Da zɔti dabiem.”
21 Ka ba mɔr sumalisim ka siak ye o kpɛn' anrʋŋ la. Ka tɔ'ɔtɔ yim ka ba kpɛm paae zin'ikan ka ba da wa'ae la.
Nidibi ieed Yesu la yɛla
22 Ka bɛog nie ka nimbanɛ kpɛlim bɛuŋ la gbɛkaŋa la nyɛ ka anrʋŋ yinne ma'aa bɛ, ka ba mɛ mi' ye Yesu sa pʋ kpɛn' anrʋŋ nɛ o nya'andɔlib la, amaa ba bas o nɛ ka keŋ.
23 Ka anrima yi Tiberias n keŋ zi'e kpi'e zin'ikanɛ ka Zugsɔb la sa pʋ'ʋs Wina'am bareka ka nidib la di diib la.
24 Ka nidib la pʋ nyɛ Yesu bɛɛ nya'andɔlib la ka ba bɛɛ anina, dinzug ba kpɛn' anrima keŋ Kapeenum ieed o.
Yesu an dikanɛ tisid nyɔvʋr la
25 Ka nidib la nyɛ Yesu ka o bɛ gbɛkaŋa la ka bu'os o ye, “Pa'anna, saŋkanɛ ka fʋ kɛn kpɛla na?”
26 Ka o lɛbisi ba ye, “Asida ka m yɛti ya ye, ya ieedim nɛ yanamɛ sa ɔnb bodobodo tig la zug ka li ka'anɛ m tʋʋmnyalima zanbina banɛ ka ya nyɛ la zugɔ.
27 Da tʋm ye ya di'e dikanɛ na san'am, amaa lɛɛ tʋmmi ye ya di'e dikanɛ yuugid ka tisid nyɔvʋr kanɛ ka' naar la. Mam Ninsaal Biig la na tisi ya dikaŋa, bɔzugɔ m Ba' Wina'am gaŋim ka li pa'al ye m paae o ya'am.”
28 Ka ba bu'os ye, “Ti na niŋ wala ka tʋm Wina'am tʋʋma?”
29 Ka Yesu lɛbisi ba ye, “Tʋʋm kanɛ ka Wina'am bɔɔd anɛ ye ya siak onɛ ka o tʋm la na.”
30 Ka ba bu'os o ye, “Ka tʋʋmnyalʋŋ bɔ ka fʋ maal ka li an zanbin ka ti na nyɛ ka niŋif yadda?
31 Ti yaanam da di dikanɛ ka ba buon ye manna la mɔɔgin wʋʋ lin sɔb si'em ye, ‘O tisi ba dikanɛ yi arezana ni na ka ba di la.’”
32 Ka Yesu lɛbisi ba ye, “Asida ka m yɛti ya ye, li ka' Moses n da tisi ya dikanɛ yi arezana ni na laa, amaa li anɛ m Ba' Wina'am tisidi ya diib amɛŋa linɛ yi arezana ni na la.
33 Ka dikanɛ ka Wina'am tisi ya la anɛ linɛ yi arezana nii sig na, ka li tisid dunia dim nyɔvʋr.”
34 Ka ba yɛl o ye, “Zugsɔba, tisimi ti dikaŋa saŋa wʋsa.”
35 Ka Yesu lɛbisi ba ye, “Manɛ an nyɔvʋr diib la. Onɛ mɛkama kɛɛn m san'an na, kɔ'ɔm kʋ gban'e oo, ka onɛ mɛ lɛn niŋim yadda, ku'onuud kʋ mɔr oo.
36 M dɛŋin yɛli ya ye ya nyɛɛm, amaa la'an nɛ wala ya pʋ niŋim yaddaa.
37 Banɛ wʋsa ka m Ba' tisim la na kɛɛn m san'an na. Ka onɛ kɛɛn m san'an na m kʋ kad o basɛ;
38 M yi arezana nii sig na ye m tʋmnɛ onɛ tʋm man la bɔɔdim ka ka' m mɛŋ bɔɔdim.
39 Ka onɛ tʋm man la bɔɔdim anɛ anwa, ye on tisim ninsieba wʋsa la, ye m da kɛ ka baa yinne bɔdigɛ. Amaa o lɛɛ bɔɔd ye m vʋ'ʋgi ba wʋsa dunia naar daar la.
40 Ka m Ba' la bɔɔdim anɛ anwa ye onɛ mɛkama nyɛ Biig la ka niŋ o yadda na nyɛ nyɔvʋr kanɛ ka' bɛnnɛ, ka m na vʋ'ʋg o dunia naar daar.”
41 Ka Jew dim nyɔn o, on yɛl ye, “Manɛ an dikanɛ yi arezana sig na la zug.”
42 Ka ba bu'os taaba ye, “Dau kaŋa nwa' ka'anɛ Josef biig Yesu, onɛ ka ti mi' o ba' nɛ o ma laa? Ka li niŋ wala ka o yʋ'ʋn yɛl ye o yinɛ arezana ni na?”
43 Ka Yesu yɛli ba ye, “Da nyɔnnɛ nɛ taaba.
44 Sɔ' kae na nyaŋi kɛɛn m san'an naa li ya'a ka' ye m Ba' onɛ tʋmi m na la niŋi li. Ka m na vʋ'ʋg on sɔb dunia naar daar.
45 Wina'am nɔdi'esidib da sɔb ye, ‘Wina'am na pa'al nidib wʋsa.’ On mɛkama wʋm ka zamisi m Ba' yɛla kennɛ m san'an na.
46 Sɔ' kae nyɛɛm Ba' la ka li ya'a ka' onɛ yi Wina'am san'an na la gʋllim nɛ.
47 Asida sida ka m yɛti ya ye, onɛ niŋim yadda mɔr nyɔvʋr kanɛ ka' bɛnnɛ.
48 Manɛ an nyɔvʋr diib la.
49 Ya yaanam da di dikanɛ ka ba buon ye manna la mɔɔgin, la'an nɛ wala ba da kpiya.
50 Amaa dikanɛ ka saal na di ka kʋ kpi anɛ linɛ yi arezana ni la na.
51 Manɛ an nyɔvʋr dikanɛ yi arezana nii sig na la ka sɔ' ya'a di dikaŋa o na vʋe saŋa mɛkama. Ka dikaŋa anɛ m niŋgbiŋ linɛ ka m na tis dunia dim nyɔvʋr yɛla.”
52 Ka Jew dim la nwa'as taaba yɛt ye, “Dau kaŋa na niŋ wala tisi ti o niŋgbiŋ ka ti di?”
53 Ka Yesu yɛli ba ye, “Asida sida ka m yɛti ya ye, asɛɛ ka ya di Ninsaal Biig la niŋgbiŋ ka nuu o ziim, ka ya'a ka' alaa ya pʋ mɔr nyɔvʋrɛ.
54 Onɛ dii m niŋgbiŋ ka nuu m ziim mɔr nyɔvʋr linɛ ka' naarɛ, ka m na vʋ'ʋg o dunia naar daar la.
55 Ka m niŋgbiŋ anɛ diib amɛŋa ka m ziim an bʋnnuudir amɛŋa.
56 Onɛ dii m niŋgbiŋ ka nuu m ziim kpɛn anɛ yinne nɛ mam ka mam mɛ an yinne nɛ on.
57 M Ba' sʋ'oe nyɔvʋr ka tʋmi m na ka on zug ka m vʋe, ala mɛn ka onɛ di mam niŋgbiŋ na vʋe man zug .
58 Nɛ'ɛŋa an dikanɛ yi arezana ni sig na, ka li ka'anɛ wʋʋ dikanɛ ka ya yaanam da di ka kpi laa. Amaa onɛ di dikaŋa la, na vʋe saŋa wʋsa.”
59 On daa pa'an nidib Kapeenum la'asʋg dɔɔgin la ka o yɛl nɛ'ɛŋa.
Pian'ad linɛ tisid nyɔvʋr la yɛla
60 Ka o nya'andɔlib la bɛdegʋ wʋmi li la, ba yɛl ye, “Pa'alkaŋa tɔi. Anɔ'ɔn na tun'e di'e li?”
61 Ka Yesu baŋ o pʋtɛn'ɛrin ye o nya'andɔlib la nyɔnnɛ li yɛla la ka yɛli ba ye, “Ya nɔki li ka li anɛ pɔ'ɔgirɛɛ?
62 Ka ya ya'a nyɛ ka Ninsaal Biig la dʋti lɛbid zin'ikanɛ ka o daa pʋn bɛ la!
63 Onɛ tisid nyɔvʋr la anɛ Wina'am Siig Kasi, ka niŋgbiŋ la anɛ zaalim. Pian'akanɛ ka m pian' tisi ya la tisid Siig nɛ nyɔvʋr.
64 Amaa ya sieba bɛ ka pʋ siakɛ.” Yesu da dɛŋim baŋ pin'ilʋgʋn sa banɛ pʋ niŋ o yadda nɛ onɛ na ti zam o la yɛla ka o yɛl nwa'.
65 Ka o lɛn yɛl ye, “Nɛ'ɛŋa yɛla ka m daa yɛl ye, sɔ' kʋ nyaŋi kɛɛn m san'an na asɛɛ m Ba' la na tis suor.”
66 Ka nɛ'ɛnam nya'aŋ o nya'andɔlib tita'am sa buaki keŋ ka pʋ lɛn dɔl o ya'asɛ.
67 Yesu bu'os o nya'andɔlib pii nɛ ayi' la ye, “Yanam mɛ na bɔɔd ye ya keŋɛ?”
68 Ka Simon Pita lɛbisi bu'os o ye, “Zugsɔba, ti ye ti keŋ anɔ'ɔn san'anɛ? Fʋnɛ mɔr pian'akanɛ tisid nyɔvʋr kanɛ ka' bɛn la.
69 Ka ti siaki li ka baŋ ye, fʋn ma'aa an ninkanɛ an sʋm nyain ka yi Wina'am san'an na.”
70† Ka Yesu lɛbisi bu'osi ba ye, “Ka' manɛ gaŋ yanam pii nɛ ayi' laa? La'an nɛ wala ka ya yinne anɛ Sʋntaana!”
71 O da pian' nɛ'ɛŋa Judas onɛ an Simon Iskariot biig la yɛla. O da anɛ nya'andɔlib pii nɛ ayi' la nid yinne onɛ da na ti zam o.
JOON 7
Yesu nɛ o pitib la yɛla
| 7 |
Ka nɛ'ɛŋa nwa' nya'aŋ la ka Yesu giligid Galile teŋin ka pʋ bɔɔd ye o giligid Juda teŋinɛ, Jew dimi bɔɔd ye ba kʋʋ o la zug.
2 Jew dim di'em kanɛ an Sʋga Gbɛɛnb Malʋŋ la da li'el la,
3 ka Yesu pitib yɛl o ye, “Basim kpɛla ka keŋ Juda teŋin ka fʋ nya'andɔlib la nyɛ tʋʋmnyalima banɛ ka fʋ tʋm la.
4 Sɔ' ya'a bɔɔd ye o yʋ'ʋr yi paalʋ, o pʋ su'adi tʋmm o tʋʋmaa. Fʋ ya'a tʋm tʋʋm bama fʋn kɛ ka nidib bɛdegʋ baŋ.”
5 O pitib la pʋ niŋ o yadda, linzug ka ba yɛl o ala.
6 Ka Yesu yɛli ba ye, “Mam saŋa nam pʋ paae, amaa saŋa mɛkama yanam mɔr ya'a.
7 Dunia dim kʋ nyaŋi kis yanama, amaa ba kisnɛ man, bɔzugɔ man yɛti banɛ saŋa wʋsa ye ban bɛ bɛllim si'a la anɛ bɛ'ɛd.
8 Yanam kem di'ema la. M nan kʋ keŋ di'em kaŋaa; bɔzugɔ m saŋa nam pʋ paae.”
9 On yɛl wala la ka kpɛlim Galile teŋin.
Yesu bɛ Sʋga Gbɛɛnb Malʋŋ la ni
10 Ka o pitib la gaadi naae la, ka o mɛ yuolim keŋ, ka pʋ nɛɛl o mɛŋa.
11 Ka Jew dim ieed o di'ema la ni ka bu'osid ye, “O bɛ yaanɛ?”
12 Ka nidib la bɛdegʋ nya'am, ka sieba ye, “O anɛ ninsʋŋ.” Ka sieba ye, “Ayei, o pa'annɛ nidib la linɛ an suobɛ'ɛd.”
13 Ka ban zɔt Jew dim la zug ka sɔ' pʋ nyaŋi pian' nɛɛlɛ.
14 Ka di'ema la ti paae pʋsʋk ka Yesu duo kpɛn' Wina'am Pʋ'ʋsim Yin la pa'an nidib.
15 Ka li lidig Jew dim la ka ba yɛt ye, “Dau kaŋa niŋ wala mɔr baŋir ka lɛɛ pʋ zamisɛ?”
16 Ka Yesu lɛbisi ba ye, “M pa'ala ka' m mɛŋ dinnɛ, amaa li anɛ onɛ tʋmim la na din.
17 Onɛ bɔɔd ye o tʋm Wina'am bɔɔdim, o na baŋ ye m pa'ala yinɛ Wina'am san'an na, bɛɛ m pian'adnɛ, nɛ m mɛŋ paŋa.
18 Onɛ pian'ad nɛ o mɛŋ paŋ la bɔɔdnɛ o mɛŋ yʋ'ʋr. Amaa onɛ bɔɔd ye onɛ tʋm o la na di'e yʋ'ʋr la, anɛ sida sɔb ka pʋ mɔr zirii.
19 Ya pʋ di'e wada Moses san'anɛɛ? Ka la'an nɛ wala ya sɔ' pʋ dɔlli li suorɛ. Bɔ ka ya ieed suoya ye ya kʋʋ ma?”
20 Ka nidib la lɛbis o ye, “Kikirigi dɔllif. Anɔ'ɔnamɛ bɔɔd ye ba kʋʋ fɔ?”
21 Ka Yesu lɛbisi ba ye, “M daa tʋm tʋʋmnyalʋŋ yinne ka li lidigi ya.
22 Moses da yɛl ye, ya kpɛn'ɛm baŋʋ, (amaa li da ka'anɛ Moses n da pin'ili lii, li da yinɛ ya yaanamin na). Amaa ya kpɛn'ɛsid biribis baŋʋ Vʋ'ʋsʋm
Daar.
23 Ka ya ya'a kpɛn'ɛsid biribiŋ baŋʋ Vʋ'ʋsʋm Daar ka li pʋ san'am Moses wada la, bɔ ka ya sʋnya pɛlig nɛ mam daa ti'eb dau Vʋ'ʋsʋm Daar la?
24 Da gɔs sɔ' nindaa ka pin'ili kad o saria, amaa kadimi saria nɛ sida.”
25 Dinzug ka Jerusalem ninsieba bu'os ye, “Li ka'anɛ dau kaŋa ka ba bɔɔd ye ba kʋ laa?
26 Ka gɔsimi ya, o pian'adnɛ paalʋ ni ka ba pʋ niŋ o si'ela. Kpɛɛmnam sid siak ye o anɛ Kristo onɛ ka Wina'am gaŋ la bɛɛ?
27 Amaa ti mi' dau kaŋa yi si'el na, ka Kristo la ya'a ti nie sɔ' kʋ baŋ on yi si'el naa.”
28 Ka Yesu da nan bɛ Pʋ'ʋsim Yin la pa'an nidib la, o da pian' nɛ kʋkɔtita'ar ye, “Ɛɛn, ya sid mi'im ka mi' man yi zin'isi'a na. Li ka' m mɛŋ paŋ ka m nɔki kenaa. Amaa onɛ tʋm mam na la anɛ sida sɔb, ka ya zi' oo.
29 Ka man lɛɛ mi' o, bɔzugɔ onɛ tʋm man, ka o san'an ka m yina.”
30 Dinzug ka ba ieed suor ye ba gban'e o, ka sɔ' pʋ si'is oo, bɔzugɔ o saŋa daa nam pʋ paae.
31 La'an nɛ wala nidib la tita'am da niŋ o yadda, ka yɛl ye, “Kristo la ya'a ti kena o na tʋm tʋʋmnyalima gaad dau kaŋa tʋm si'el laa?”
Farisii dim tʋm nidib ye ba gban'e Yesu
32 Ka Farisii dim wʋm nidib la nya'am Yesu yɛla si'em la, ka ban nɛ Wina'am maanmaannib kpɛɛmnam tʋm nidib ye ba gban'e o na.
33 Ka Yesu yɛl ye, “M na bɛ nɛ ya yuug bi'ela ka lɛn lɛb onɛ tʋm mam na la san'an.
34 Ya na ti ieedim ka kʋ nyɛɛ ma, ka mam na bɛ zin'isi'a la ya kʋ nyaŋi kɛɛn ani naa.”
35 Ka Jew dim yɛl taaba ye, “Dau kaŋa gban'e ye o keŋ yaanɛ ka ti kʋ nyɛ oo? O gban'e nɛ ye o keŋ Girik dim tɛɛnsin, zin'ikanɛ ka Jew dim bɛ la pa'al Girik dim laa?
36 Ka on yɛl ye, ti na ti ieed o ka kʋ nyɛɛ o, ka ye on bɛ zin'isi'a la ti kʋ nyaŋi kena la, li gbin an bɔ?”
Wina'am Siig Kasi la yɛla
37 Ka di'ema la naar dabisir linɛ an dabistita'ar la, ka Yesu duoe zi'en ka pian'ad nɛ kʋkɔtita'ar ye, “Ku'onuud ya'a mɔr sɔ', on kemi m san'an na nu.
38 Li dɔlnɛ Wina'am gbauŋʋ sɔbi siilim si'em la ye, ‘Onɛ niŋim yadda, nyɔvʋr ku'om na zɔti yit o san'an na.’”
39 O yɛl nɛ'ɛŋa ka li gbin pa'alnɛ Wina'am Siig Kasi la yɛla, ka banɛ niŋ o yadda la na ti di'e o. Saŋkan la Wina'am da nam pʋ tisi ba o Siig Kasi la, bɔzugɔ Yesu da nam pʋ nyɛ girima o kum vʋ'ʋgir la nya'aŋa.
Bakir bɛ nidibin Yesu yɛla
40 Ka ban wʋm pian'akan la, nidib la sieba yɛl ye, “Oŋa sid an Wina'am nɔdi'es la.”
41 Ka sieba ye, “Oŋa an Kristo la.” Amaa ka sieba bu'os ye, “Kristo la na niŋ wala yi Galile na?
42 Wina'am gbauŋ pʋ yɛl ye Kristo la na yinɛ David gbinnin na ka ba du'a o Betilehem teŋ kanɛ ka David da bɛ la naa?”
43 Ka bakir bɛ nidibin la o yɛla.
44 Ka sieba bɔɔd ye ba gban'e o amaa sɔ' pʋ si'is oo.
Jew dim kpɛɛmnam pʋ niŋ Yesu yadda
45 Ka nimbanɛ keŋ ye ba gban'e o la lɛb maanmaannib kpɛɛmnam nɛ Farisii dim la san'an ka ba bu'os ye, “Bɔ ka ya pʋ gban'e o na?”
46 Ka ba lɛbis ye, “Sɔ' nan zi' pian' nwɛnɛ dau kaŋaa.”
47 Ka Farisii dim la bu'osi ba ye, “Ka yanam mɛ yidig nɛ dɔl suobɛ'ɛd la bɛɛ?
48 Ka kpɛɛmnam la bɛɛ Farisii dim la sieba niŋ o yaddaa?”
49 Nɔpɔɔr bɛ nidib bɛdegʋ banɛ zi' wada la zug.
50 Ka Nikodemus onɛ daa dɛŋin kɛn Yesu san'an na ka aan ba nid yinne la bu'osi ba ye,
51 “Ti wada la tis suor ye ti kʋʋs sɔ' bɛ'ɛd ka pʋ wʋm o antu'a ka baŋ on tʋm si'elaa?”
52–53 Ka ba lɛbis o ye, “Fʋ yinɛ Galile na mɛnɛɛ? Lɛm Wina'am gbana ni ka fʋ na baŋ ye nɔdi'es kʋdim kʋ yi Galile naa.”
JOON 8
Ban kuk pu'a nɛ dau la yɛla
| 8 |
Ka Yesu keŋ Olif zuorin.
2 Ka bɛkɛung ka o lɛb Wina'am Pʋ'ʋsim Yin la na ya'as ka nidib la wʋsa kɛɛn o san'an na ka o zin' pa'annɛ ba.
3 Ka gbauŋmi'idib nɛ Farisii dim mɔr pu'a onɛ ka ba kuk ka o san'am dau, ka zi'el o nidib la sʋʋgin,
4 ka yɛl Yesu ye, “Pa'anna, ti kuknɛ pu'a kaŋa nɛ dau.
5 Ka Moses wada la da zi'el ye, ti lɔb nimbamanam taaba nɛ kugaa kʋ. Ka fʋn ye wala?”
6 Ba yɛl o ala ye ba kpans o gɔs, ka kpɛn'ɛs o yɛla ni. Ka Yesu sʋn ka nɔk o nu'ubili sɔbid teŋin.
7 Ka ban nam kpɛm bu'osid o la, ka o gɔdigi yɛli ba ye, “Onɛ bɛɛ ya sʋʋgin kpɛ' ka nan zi' tʋm bɛ'ɛdɛ on nɔkim kugiri lɔbig o yiiga.”
8 Ka lɛn su'un ya'asi nɔk o nu'ubili sɔbid teŋin.
9 Ka ban wʋm ala la, ka pin'ili yit yinne-yinne. Bʋnkʋd la dɛŋi yi yiiga hali ka li ti kpɛlim Yesu nɛ pu'a la ma'aa.
10 Ka Yesu gɔdigi bu'os pu'a la ye, “Banɛ mɔrif la na bɛ yaanɛ? Sɔ' pʋ kʋʋsif bɛ'ɛdɛɛ?”
11 Ka pu'a la lɛbis o ye, “Ayei, m Zugsɔba.” Ka Yesu yɛl o ye, “Mam mɛ kʋ kʋʋsif bɛ'ɛdɛ. Kem ka da lɛn tʋm tʋʋmbɛ'ɛd ya'asɛ.”
12 Ka Yesu lɛn yɛl nidib la ye, “Manɛ an dunia nɛɛsim la. Onɛ dɔlli m kʋ ken likinɛ, amaa o na bɛ nɛ nyɔvʋr linɛ an nɛɛsim la ni.”
13 Ka Farisii dim yɛl o ye, “Fʋ pian'adnɛ fʋ mɛŋ yɛla. Fʋ pian'ad la ka' sidaa.”
14 Ka Yesu lɛbisi ba ye, “Hali baa m ya'a pian'adi m mɛŋ yɛla m pian'ad la anɛ sida; ka m mi' mam yi si'el na nɛ mam ken si'el, amaa ya zi' mam yi si'el na nɛ mam ken si'ela.
15 Ya kad nidib saria ka li dɔlnɛ ninsaalib ya'am, amaa mam pʋ kad sɔ' saria.
16 Amaa m ya'a kad sɔ' saria, m kadnɛ nɛ sida; ka li ka'anɛ mam ma'aanɛɛ amaa mam nɛ onɛ tʋmim la na.
17 Ya wada la ni li sɔb ye, nidib ayi' ya'a di kasɛt, li anɛ amɛŋa.
18 Man dit kasɛti tisidim mɛŋ, ka m Ba' onɛ tʋm mam na la mɛ diti m kasɛt.”
19 Ka ba bu'os o ye, “Fʋ Ba' bɛ yaanɛ?” Ka Yesu lɛbisi ba ye, “Ya zi' man nɛ m Ba' la wʋsaa. Ya ya'a baŋin man, ya naan baŋini m Ba' la mɛn.”
20 O pian' nɛ'ɛnam nɛ on daa pa'an nidib la Wina'am Pʋ'ʋsim Yin ka li kpi'e ligidi la'asʋg zin'igin la. Ka sɔ' pʋ gban'e oo, bɔzugɔ, o saŋa daa nam pʋ paae.
Yesu ken si'el la yɛla
21 Ka o yɛli ba ya'as ye, “M na yii ya san'an, ka ya na ti ieedim, amaa ya kʋ nyɛɛ ma. Ya na kpii ya tʋʋmbɛ'ɛd la ni. Man ken si'el la ya kʋ nyaŋi keŋ anina.”
22 Ka Jew dim bu'os ye, “O ye o kʋnɛ o mɛŋ bɛɛ? On yɛl ye, on ken si'el la, ti kʋ nyaŋi keŋ la.”
23 Ka Yesu yɛli ba ye, “Yanam yinɛ teŋin na, ka man yii agɔl na. Ya anɛ dunia nwa' nidib, ka mam ka' dunia nwa' nida.
24 Linzug ka m yɛli ya ye, ya na kpii ya tʋʋmbɛ'ɛdin la. Ya ya'a pʋ niŋ yadda nɛ man yɛl ye m an sɔ' laa, ya sid na kpii ya tʋʋmbɛ'ɛdin la.”
25 Ka ba bu'os o ye, “Fʋ aan anɔ'ɔnɛ?” Ka o lɛbisi ba ye, “M anɛ onɛ ka m yɛli ya pin'ilʋgʋn sa la.
26 M mɔr yɛla bɛdegʋ linɛ ka m na pian' ka kadi ya saria. Onɛ tʋm man la an sida sɔb ka linɛ ka m wʋm o san'an la, lin ka m mɔɔnnɛ tisid dunia dim.”
27 Ka ba pʋ baŋ ye on pian' si'el la anɛ o Ba' Wina'am yɛlaa.
28 Dinzug ka Yesu yɛl ye, “Ya ya'a ʋk mam onɛ an Ninsaal Biig la agɔl ya na baŋ man yɛl ye m an sɔ' la. Ka lɛm baŋ ye m pʋ tʋm si'el nɛ m mɛŋ paŋa, amaa m pian'ad nɛ'ɛŋa wʋʋ m Ba' Wina'am pa'alim si'em la.
29 Ka onɛ tʋm man la bɛ nɛ man ka pʋ basi ma, bɔzugɔ m maan linɛ ma'ad o sʋʋnr daar wʋsa.”
30 Ka on pian' nɛ'ɛŋa la, ka nidib bɛdegʋ niŋ o yadda.
Yammis nɛ yɔlisim dim
31 Ka Yesu yɛl Jew dim banɛ niŋ o yadda la ye, “Ya ya'a kpɛm mɔri m pian'ad la, ya na anɛ m nya'andɔlib amɛŋa.
32 Ala ka ya na baŋ yɛlmɛŋir la, ka yɛlmɛŋir la na tisi ya yɔlisim.”
33 Ka ba lɛbisi yɛl o ye, “Tinam anɛ Abraham yaas, ti ka' nid sɔ' yammisɛ. Ka wala ka fʋ yɛl ye, ti na nyɛ yɔlisim?”
34 Ka Yesu lɛbisi ba ye, “Amɛŋa ka m yɛti ya ye, ninkanɛ wʋsa tʋm tʋʋmbɛ'ɛd anɛ tʋʋmbɛ'ɛd yammʋg.
35 Yammʋg kʋ zin' yin saŋa wʋsaa, amaa yisɔb biribiŋ la zin'inɛ yin saŋa wʋsa.
36 Dinzugɔ yisɔb biribiŋ la ya'a tisi ya yɔlisim, ya sid mɔr yɔlisim amɛŋa.
37 M mi' ye ya anɛ Abraham yaas, amaa ya bɔɔd man ye ya kʋ, bɔzugɔ m pian'ad la pʋ kpɛn'ɛdi ya sʋnya nii.
38 Man nyɛ si'eli m Ba' san'an la, lin ka m tu'asid. Ka yanam mɛ niŋidnɛ bʋn linɛ ka ya wʋmi ya ba' san'an la.”
39 Ka ba lɛbisi yɛl o ye, “Abraham anɛ ti yaab.” Ka Yesu lɛbisi yɛli ba ye, “Ya ya'a aan Abraham yaas, ya naan tʋmin Abraham tʋʋma la.
40 Amaa ya bɔɔdnɛ man ye ya kʋ, man onɛ tu'asidi ya yɛlmɛŋir kanɛ ka m wʋm Wina'am san'an la. Abraham da pʋ niŋ alaa.
41 Ya tʋmnɛ ya ba' la tʋʋma.” Ka ba yɛl o ye, “Ti ka' pu'agɔɔnda biisɛ. Ti mɔri ti Ba' yinne onɛ an Wina'am.”
42 Ka Yesu lɛbisi yɛli ba ye, “Wina'am ya'a aannɛ ya Ba', ya naan nɔŋin man, bɔzugɔ m yinɛ Wina'am san'anɛ kena. Li ka'anɛ m mɛŋ-mɛŋ paŋ ka
m kenaa.
43 Bɔɔ niŋ ka ya pʋ baŋ man yɛt si'el la gbinnɛ? Li anɛ ye yanam kʋ tun'e siaki m pian'ad la zug.
44 Ya Ba' anɛ Sʋntaana. Ka ya tʋmnɛ ya ba' bɔɔdim an si'em la. O daa pʋn anɛ ninkʋʋd hali pin'ilʋgʋn sa. O zi' yɛlmɛŋirɛ, bɔzugɔ yɛlmɛŋir ka' o san'anɛ. O ya'a ma'ad ziri la, o pian'adnɛ nwɛnɛ o mɛŋi an si'em la, bɔzugɔ o anɛ ziri sɔb nɛ ziri wʋsa ba'.
45 Amaa man tu'asidi ya yɛlmɛŋir la, ya pʋ siakɛ.
46 Anɔ'ɔnɛ na tun'e pa'al ye m tʋm tʋʋmbɛ'ɛdɛ? Ka man ya'a tu'asid amɛŋa, wala ka ya pʋ siaki ma?
47 Onɛ an Wina'am nid la kɛlisidnɛ Wina'am pian'ad. Yanamɛ ka' Wina'am nidib la zug, ka ya pʋ wʋmma.”
48 Ka Jew dim la lɛbisi yɛl o ye, “Tinamɛ yɛl ye, fʋ anɛ Samaria nid ka kikirig dɔllif la, ti ma'aanɛɛ?”
49 Ka Yesu lɛbisi ba ye, “Kikirig pʋ dɔlli ma, amaa m dʋ'ʋsidnɛ m Ba' yʋ'ʋr sʋ'ʋŋa, ka yanam pɔ'ɔgid man.
50 Mam pʋ ieed girima tisidi m mɛŋa. Amaa sɔ' bɛɛ ieedi li, onɛ an sariakat la.
51 Amɛŋa ka m yɛti ya ye, ninkanɛ siakim nɔɔr la, kʋ nyɛ kum baa bi'elaa.”
52 Ka Jew dim yɛl o ye, “Nannanna ti baŋ ya ye kikirig dɔllif. Abraham nɛ Wina'am nɔdi'esidib la kpiya. Ka fʋ yɛt ye, ninkanɛ siaki fʋ nɔɔr la, kʋ kpi baa bi'elaa.
53 Fʋ gaadi ti yaab Abraham onɛ kpi la nɛɛ? Bɛɛ fʋ gati Wina'am nɔdi'esidib banɛ kpi la? Fʋ tɛn'ɛs ye fʋ aan anɔ'ɔnɛ?”
54 Ka Yesu lɛbisi yɛli ba ye, “Man ya'a tisidi m mɛŋ girima, li anɛ zaalim. M Ba' onɛ ka ya ye o anɛ ya Wina'am la tisidim girima.
55 Amaa yanam zi' on an sɔ'. Ka man mi' on an sɔ'. Man ya'a yɛlin ye, m zi' on an sɔ', m naanɛ aan ziri sɔb nwɛnɛ yanam nɛ. Amaa m mi' on an sɔ', ka siak o nɔɔr.
56 Ya ba' Abraham da mɔr ti'ir ye o na ti nyɛ man saŋa nwa'. Ka o nyɛ ka mɔr sumalisim.”
57 Dinzug ka Jew dim la yɛl Yesu ye, “Fʋ nam pʋ paae yʋʋm pisnuu, ka niŋ wala nyɛ Abraham?”
58 Ka Yesu yɛli ba ye, “Amɛŋa ka m yɛti ya ye, Abraham da nan kae saŋsi'a la, ka man pʋn bɛ.”
59 Alazug ka ba zaŋ kuga ye ba lɔb o. Ka Yesu su'a o mɛŋ, ka yi Wina'am Pʋ'ʋsim Yin la.
JOON 9
Yesu n ti'eb zʋnzɔŋ la yɛla
| 9 |
Ka on da ken la, o nyɛ dau ka o zu'om o biilimin sa.
2 Ka o nya'andɔlib bu'os o ye, “Pa'anna, dau kaŋa tʋʋmbɛ'ɛd bɛɛ o ba' nɛ o ma tʋʋmbɛ'ɛd zugʋ kɛ ka ba du'a o ka o an zʋnzɔŋɔ?”
3 Ka Yesu lɛbis ye, “O zu'oŋ la ka' ye o tʋmnɛ bɛ'ɛd bɛɛ o ba' nɛ o maa tʋm bɛ'ɛdɛ. Amaa li anɛ ye Wina'am bɔɔdi pa'al o paŋ tʋʋma zʋnzɔŋ la ni.
4 Lin nan an nintaŋ la, asɛɛ ti tʋm onɛ tʋm mam na la tʋʋma. Yʋ'ʋŋ na sɔb ka sɔ' kʋ nyaŋi tʋm ya'asɛ.
5 Man nan bɛ dunia ni la, manɛ an dunia nɛɛsim.”
6 Ka Yesu yɛl nɛ'ɛŋa la, ka tʋbis nintɔɔndi bu tanni bʋlig zu'om la nini,
7 ka yɛl o ye, “Kem Siloam buligini pie fʋ nini.” (Siloam gbin anɛ Atʋm sɔ'). Ka o keŋ pie o nini ka lɛb na ka yʋ'ʋn nyɛt.
8 Ka o kpi'es nɛ banɛ dɛŋi mi' o ka o an sɔs la yɛl ye, “Ka' dau zʋnzɔŋ kaŋa daa ɛɛnti sɔsid laa?”
9 Ka sieba yɛl ye, “Li anɛ on la.” Ka sieba mɛ yɛl ye, “Ayei, li nwɛnɛ on nɛ, ka li ka' onɛ.” Ka o mɛŋ yɛl ye, “Manɛ la.”
10 Ka ba bu'os o ye, “Li niŋ wala ka fʋ yʋ'ʋn nyɛta?”
11 Ka o lɛbisi ba ye, “Dau onɛ ka ba buon Yesu la bu tanni bʋligim nini ka yɛlim ye m kem Siloam buligin pie. Ka m keŋ pie ka yʋ'ʋn nyɛt.”
12 Ka ba bu'os ye, “O bɛ yaanɛ?” Ka o lɛbis ye, “M zi'.”
13 Ka ba dɔl onɛ daa an zu'om la keŋ Farisii dim san'an.
14 Daakanɛ ka Yesu bu tanni bʋlig zu'om la nini ka o nyɛt la daa anɛ Jew dim Vʋ'ʋsʋm Daar.
15 Ka Farisii dim la bu'os o ya'as ye, “Li niŋ wala ka fʋ nyɛta?” Ka o lɛbisi ba ye, “O bunɛ tanni bʋligi m nini, ka m pie ka nyɛt.”
16 Ka Farisii dim sieba yɛl ye, “Dau kaŋa nwa' pʋ dɔl Vʋ'ʋsʋm Daar la wadaa, linzug ka ti baŋ ye o pʋ yi Wina'am san'an naa.” Ka sieba ye, “Dau kanɛ an tʋʋmbɛ'ɛd sɔb na niŋ wala tʋm tʋʋmnyalim bama?” Ka bakir kɛn Farisii dim la ni na.
17 Ka ba lɛm bu'os dau la ye, “Fʋ na yɛl onɛ kɛ ka fʋ nyɛt la yɛla ye bɔ?” Ka o lɛbisi ba ye, “O anɛ Wina'am nɔdi'es.”
18 Ka Jew dim la pʋ siak ye o daa zu'om nɛ ka yʋ'ʋn nyɛta, ka ye asɛɛ ba buol o ba' nɛ o maa bu'os.
19 Ka ba bu'osi ba ye, “Ya biigi nwaa? Oŋa ka ya ye ya du'a o ka o an zu'om la? Ka li niŋ wala ka o yʋ'ʋn nyɛta?”
20 Ka ba lɛbis ye, “Ti mi' ye o anɛ ti biig, ka lɛm mi' ye, ti du'a o ka o anɛ zu'om,
21 amaa lin niŋ si'em ka o nyɛt la, ti kʋ baŋɛ, ka ti mɛ lɛn zi' onɛ kɛ ka o nyɛta. Bu'osimi nɛ o, ka o anɛ dau, o lɛn ka' biiga. O mɛŋ na pian'.”
22 Ban zɔt Jew dim kpɛɛmnam dabiem la zugʋ kɛ ka ba yɛl ala. Jew dim daa pʋn dɛŋi gban'e ye sɔ' ya'a siak ye Yesu anɛ Kristo la, ba na kad
o ba la'asʋg dɔɔgin la.
23 Linzug, ka o ba' nɛ o ma la yɛli ba ye, “Bu'osimi nɛ o, ka o ka' biiga.”
24 Ka ba lɛn buol dau onɛ daa an zu'om la yɛl o ye, “Pian'am Wina'am yʋ'ʋri fʋ laafi nyɛɛb la yɛla. Amaa tinam mi' ye dau kaŋa anɛ tʋʋmbɛ'ɛd sɔb.” 25 Ka o lɛbis ye, “O ya'a anɛ tʋʋmbɛ'ɛd sɔb bɛɛ o ka' tʋʋmbɛ'ɛd sɔba m zi'. Mam mi' si'el anɛ ye, m daa anɛ zu'om ka yʋ'ʋn nyɛt.”
26 Ka ba bu'os o ye, “O niŋif bɔ? O niŋ wala laki fʋ nini la?”
27 Ka o lɛbisi ba ye, “M pʋn dɛŋin yɛli ya ka ya pʋ bɔɔd ye ya kɛlisɛ, ka bɔ ka ya bɔɔd ye ya wʋm ya'asɛ? Ya mɛ bɔɔd ye ya lieb o nya'andɔliba?”
28 Ka ba tʋ'ʋd o ye, “Fʋnɛ aan o nya'andɔl, ka tinam anɛ Moses nya'andɔlib.
29 Ti mi' ye Wina'am da pian' tisnɛ Moses, amaa dau kaŋa nwa', ti zi' on yi zin'isi'a naa.”
30 Ka dau la yɛl ye, “Nwa' anɛ lidigir. Ya zi' on yi si'el naa; la'an nɛ wala o laki m nini ka m nyɛt.
31 Ti mi' ye Wina'am kʋ kɛlis onɛ an tʋʋmbɛ'ɛd sɔb sɔsʋgɔ, amaa sɔ' ya'a pʋ'ʋsid Wina'am ka niŋid o bɔɔdim, o na wʋm o sɔsʋg.
32 Dunia pin'ilʋgʋn sa sɔ' nan zi' wʋm ye ba kɛ ka onɛ ka ba du'a o ka o an zu'om nini nyɛta.
33 Dinzugɔ dau kaŋa ya'a pʋ yiin Wina'am san'an naa, o kʋ nyaŋi niŋin si'el-si'el la.”
34 Ka ba lɛbis o ye, “Ba du'af nɛ tʋʋmbɛ'ɛdin, ka fʋ lɛɛ bɔɔd ye fʋ pa'ali tii?” Ka ba kad o yis.
35 Ka Yesu wʋm ye ba kad dau la yis la, ka nyɛɛ o la, o bu'os o ye, “Fʋ niŋ Ninsaal Biig la yaddaa?”
36 Ka o lɛbis ye, “M Zugsɔba, Ninsaal Biig la aan anɔ'ɔn ka m na niŋ o yadda?”
37 Ka Yesu yɛl o ye, “Fʋ nyɛɛ o ka li anɛ onɛ pian'ad nɛf la.”
38 Ka dau la yɛl ye, “M Zugsɔba, m niŋif yadda.” Ka na'as Yesu.
39 Yesu yɛl ye, “Sariakadib yɛla ka m kɛn dunia ni na, ka zʋnzɔɔs na nyɛt, ka banɛ nyɛt la na lieb zʋnzɔɔs.”
40 Ka Farisii dim sieba banɛ kpi'e nɛ o la wʋm nɛ'ɛŋa la, ba bu'os o ye, “Dinzugɔ tinam mɛ anɛ zʋnzɔɔsɛɛ?”
41 Ka Yesu lɛbisi ba ye, “Ya ya'a aan zʋnzɔɔs ya kʋ mɔrin taalɛ. Ka yanamɛ sadigim yɛl ye ya nyɛt la, ya taal kpɛm bɛ.”
JOON 10
Kɔnbkem nɛ o kɔnbid siiliŋ
10
Ka Yesu ye, “Asida ka m yɛti ya ye, onɛ pʋ dɔl pɛ'ɛs za'anɔɔrin la kpɛn' bʋlʋʋgin laa ka dʋ zaŋguommi kpɛn', o sɔb anɛ faand bɛɛ na'ayiig.
2 Amaa onɛ dɔl za'anɔɔr la kpɛn' anɛ pɛ'ɛs la kɔnbkem.
3 Ka onɛ gur za'anɔɔr la na yɔ'ɔgi tis o. Ka o pɛ'ɛs la mi' o kʋkɔr la zug, o buoni ba yʋda ka gaad tuon ka ba dɔl o.
4 Ka o ya'a mɔr o pɛ'ɛs wʋsa yina, o gati ba tuon ka ba dɔl o, bɔzugɔ ba mi' o kʋkɔr.
5 Ba kʋ dɔl saanna, ba na zɔ ka bas o, bɔzugɔ ba zi' o kʋkɔrɛ.”
6 Siiliŋ kaŋa ka Yesu zaŋi siilimi ba, amaa ba pʋ gban'e o pian'ad la gbinnɛ.
Yesu n an kɔnbkem sʋŋ la yɛla
7 Ka Yesu yɛli ba ya'as ye, “Asida ka m yɛti ya ye, manɛ an pɛ'ɛs la za'anɔɔr.
8 Banɛ wʋsa dɛŋi m tuon na la anɛ banɛ faand bɛɛ na'ayiis, ka pɛ'ɛs la pʋ kɛlisidi baa.
9 Manɛ an za'anɔɔr la. Ka onɛ dɔl za'anɔɔr kan la kpɛn' na nyɛ faangir. O na kpɛn' ka yina nyɛ diibi di.
10 Na'ayiig la kena ye o zu ka kʋ, ka san'am ma'aa, ka man kena ye ba nyɛ nyɔvʋr linɛ ka' naarɛ.”
11 “Manɛ an kɔnbkem sʋŋ la. Kɔnbkem sʋŋ la pɛsig o nyɔvʋr pɛ'ɛs la yɛla.
12 Amaa niŋ kanɛ ka ba yɔɔd o ligidi ye o kem kɔnbid pʋ sʋ'oe kɔnbid la. Alazug, o ya'a nyɛ ka kunduŋ kenna o na bas pɛ'ɛs la ka zɔ ka kunduŋ la gban'e ba ka widigi ba.
13 Bɔzugɔ, ban yɔɔd o ligidi la zug ka o gur pɛ'ɛs la, amaa o ba'a kae nɛ baa.
14 “Manɛ lɛɛ an kɔnbkem sʋŋ la, ka mi' m kɔnbid ka ba mɛ mi' man
15 nwɛnɛ m Ba' Wina'am mi' man ka mam mɛ mi' o si'em la. Manɛ pɛsigi m nyɔvʋri tisim pɛ'ɛs la.
16 M mɔr pɛsieba banɛ ka' bʋlʋʋg nwa' nii. Li nar ka m mɛ mɔri ba na ka ba kɛlisi m kʋkɔr, ka la'asi ba wʋsa gumm ka ba mɔr kɔnbkem yinne.
17 Ka man pɛsigi m nyɔvʋr la zug ka m Ba' la nɔŋim. Ka m na lɛn di'e li ya'as.
18 Sɔ' kʋ nyaŋi zaŋi m nyɔvʋrɛ. M mɛŋ lɛɛ pɛsigi m nyɔvʋr. M mɔr paŋi na pɛsigi m nyɔvʋri kpi, ka lɛm mɔr paŋi na di'e li ya'as. M Ba' tisim nɔzi'elkaŋa.”
19 Ka pian' bama zug ka bakir lɛm bɛ Jew dim la sʋʋgin.
20 Ka ba tita'am sa yɛl ye, “Bɔ ka ya kɛlisid o, o anɛ gɛɛŋ ka kikirig dɔl o.”
21 Ka sieba yɛl ye, “Li ka' onɛ ka kikirig dɔl o pian'adi nwaa. Kikirig na nyaŋi kɛ ka onɛ zu'om nyɛtaa?”
Jew dim zan'as Yesu
22 Ka di'ema saŋa linɛ ka ba tiɛnd Wina'am Pʋ'ʋsim Yir pier Jerusalem teŋin la paae. Li da anɛ sapal,
23 ka Yesu ken Wina'am Pʋ'ʋsim Yir zin'ikanɛ ka ba buon Solomon za'ambɛŋ la.
24 Ka Jew dim la'asi gilig o ka yɛl o ye, “Bɔ ka fʋ kɛ ka ti bi'esidi fʋ yɛla hali nɛ anwa? Fʋ ya'a anɛ Kristo onɛ ka Wina'am gaŋ la, fʋn yɛlimi ti nyain-nyain.”
25 Ka Yesu lɛbisi ba ye, “M daa yɛli ya, ka ya pʋ niŋim yaddaa. Tʋʋm banɛ ka m tʋmmi m Ba' yʋ'ʋrin la pa'al mam an sɔ'.
26 Amaa yanamɛ ka' m pɛ'ɛs la zug ka ya pʋ niŋim yaddaa.
27 M pɛ'ɛs wʋmmi m kʋkɔr, ka m mi' ba, ka ba dɔllim,
28 ka m tisidi ba nyɔvʋr linɛ ka' bɛnnɛ, ka ba kʋdim kʋ bɔdigɛ, ka sɔ' kae na nyaŋi faaɛn ba m nu'uginɛ.
29 M Ba' onɛ nɔki ba tisim la mɔr paŋ hali gaad si'el wʋsa, ka sɔ' kae na nyaŋi faaɛn ba m Ba' la nu'uginɛ.
30 Mam nɛ m Ba' la anɛ yinne.”
31 Ka Jew dim lɛn ye ba lɔb o nɛ kuga kʋ.
32 Ka Yesu yɛli ba ye, “M pa'ali ya tʋʋm sʋma bɛdegʋ linɛ yii m Ba' la ni, ka tʋʋm sʋŋ ban yɛla ka ya lɔbidim nɛ kugaa?”
33 Ka Jew dim la lɛbis o ye, “Li ka'anɛ tʋʋm sʋma yɛlaa amaa Wina'am yʋ'ʋsan'auŋ la yɛla, bɔzugɔ fʋ anɛ ninsaal amaa fʋ ye fʋ anɛ Wina'am.”
34 Ka o lɛbisi ba ye, Li sɔbi ya wada ni ye, Mam, Wina'am, yɛl ye, “Ya anɛ Wina.”
35 Ti mi' ye Wina'am gbauŋ la anɛ sida saŋa wʋsa, ka banɛ ka o zaŋ o labaar la tis la, o buoni ba ye ba anɛ wina.
36 Ka la'an nɛ wala ka ya yɛt ye, mam kanɛ ka Wina'am gaŋ ka tʋmim dunia nwa' ni la san'amid Wina'am yʋ'ʋr, man yɛt ye, m anɛ Wina'am Biig la zug.
37 M ya'a pʋ tʋmmi m Ba' tʋʋmaa, yanam da niŋinim yadda.
38 Amaa m ya'a tʋm ka ya pʋn pʋ niŋim yadda, yanam siakimi m tʋʋma la, ka ya na nyɛ ka baŋ ye, m Ba' la anɛ yinne nɛ mam ka m mɛ an yinne nɛ o.
39 Ka ba lɛn zigid ye ba gban'e o, ka o tɔɔmi ba ni.
40 Ka o tɔɔm anina keŋ lɔ'ɔŋ Joodan mu'ari paae zin'ikanɛ ka Joon da dɛŋin sʋʋd nidib Wina'am ku'om la kpɛlim ani.
41 Ka nidib bɛdegʋ kɛɛn o san'an na ka yɛl ye, “Joon pʋ tʋm tʋʋmnyalima, ka linɛ wʋsa ka o da pian' dau kaŋa yɛla la anɛ sida.”
42 Ka nidib bɛdegʋ niŋ o yadda anina.
JOON 11
Yesu vʋ'ʋg Lazarus kumin
11
Dau da bɛ Betani teŋin ka o yʋ'ʋr buon Lazarus, ka o ka' laafii. Teŋ kan ni ka Mɛɛri nɛ o bier Marta da bɛ la.
2 Mɛɛri onɛ daa kpa'ae kpasɔɔndim walig Yesu nɔba ka zaŋ o zuobidi ɛɛnsi ba la taʋn an Lazarus onɛ ka' laafi la.
3 Dinzug o tanp la daa tʋm yɛl Yesu ye, “Zugsɔba, fʋ zua nɔŋir la ka' laafii.”
4 Ka Yesu n wʋmi li la, ka yɛl ye, “Ban'akan kʋ kʋʋ o, amaa li anɛ ye Wina'am yʋ'ʋr nyɛ girima, ka linzug ka Wina'am Biig la yʋ'ʋr mɛ nyɛ girima.”
5 La'an nɛ Yesu nɔŋ Marta nɛ o pitʋ nɛ ba taʋn Lazarus hali la, 6 on wʋm ye Lazarus ka' laafi la, o kpɛlim on daa bɛ zin'isi'a la daba ayi'.
7 Ka lin nya'aŋ la ka o yɛl o nya'andɔlib la ye, “Kɛlli ka ti keŋ Juda ya'as.”
8 Ka o nya'andɔlib la yɛl o ye, “Pa'anna, ka' ani ka Jew dim daa bɔɔd ye ba lɔbif nɛ kuga la. Ka wala ka fʋ yɛl ye, fʋn na lɛn keŋi anina ya'asɛ?”
9 Ka Yesu lɛbisi bu'osi ba ye, “Li ka' daar yinne an nintaŋ tansib nɛ zaam ma'arɛ? Nid ya'a ken nintaŋ o kʋ tu'ugɛ, bɔzugɔ dunia nɛɛsim bɛ. 10 Amaa nid ya'a ken yʋ'ʋŋ o tu'ugidnɛ, bɔzugɔ nɛɛsim kae.”
11 Ka on yɛli ba nwa' naae la, o yɛli ba ye, “Ti zua Lazarus gbisidnɛ. Amaa m na keŋ nie o gbɛɛmin la.”
12 Ka o nya'andɔlib la yɛl o ye, “Zugsɔba, o ya'a gbisidnɛ, o na nyɛ laafi.”
13 Amaa Yesu yɛti ba nɛ Lazarus kum yɛla ka ba tɛn'ɛsid ye o yɛti ba nɛ o gbɛɛm yɛla.
14 Ka Yesu yɛli ba nyain ye, “Lazarus kpinɛ.
15 Yanam zug ka m mɔr sumalisim man daa ka' o san'an la, bɔzugɔ, ya na niŋim yadda. Amaa kɛlli ka ti keŋ o san'an.”
16 Ka Tomas, onɛ an liiba yinne la, yɛl o nya'andɔltaab la ye, “Kɛlli ka ti la'am keŋ nɛ o. Ka li ya'a an kum, tinam la'am kpi nɛ o.”
17 Ka Yesu paae la, o nyɛ ka Lazarus pʋn bɛ yaʋgʋn la daba anaasi sa.
18 Ka Betani teŋ daa pʋ lal nɛ Jerusalem. Li anɛ wʋʋ maila ayi' nɛ.
19 Ka Jew dim bɛdegʋ kena ye ba bɛlis Marta nɛ Mɛɛri ba taʋn kum la zug.
20 Ka Marta n wʋm ye Yesu kenna la, o duoe yi ye o tʋ'ʋs o. Ka Mɛɛri kpɛlim zin' yin.
21 Ka Marta yɛl Yesu ye, “Zugsɔba, fʋ ya'a daa bɛɛn kpɛla, man taʋn nwa' naan kʋ kpii nɛ.
22 Amaa m mi' ye linɛ mɛkama ka fʋ sɔs Wina'am, hali baa nannanna o na maal ala tisif.”
23 Ka Yesu yɛl o ye, “Fʋ taʋn la na vʋ'ʋg ya'as.”
24 Ka Marta yɛl o ye, “M mi' ye o na ti vʋ'ʋg kumin dunia kaŋa naar daar.”
25 Ka Yesu yɛl o ye, “Manɛ an kum vʋ'ʋgir nɛ nyɔvʋr. Onɛ niŋim yadda, hali o ya'a kpinɛ, o na vʋ'ʋg.
26 Ka onɛ mɛkama vʋe ka niŋim yadda, o kʋdim kʋ kpii. Fʋ niŋ nwa' yadda bɛɛ?”
27 Ka Marta yɛl o ye, “M Zugsɔba, m niŋif yadda ye fʋ anɛ Kristo, Wina'am Biig, onɛ ka ba da ye o na kɛn dunia ni na la.”
28 Ka on yɛl nwa' naae la, o su'a keŋ buol o pitʋ Mɛɛri yɛl o ye, “Ti Pa'an la bɛ kpɛla ka buonif.”
29 Ka on wʋm la ka duoe tɔ'ɔtɔ keŋ o san'an.
30 Yesu da nam pʋ kpɛn' teŋin laa, amaa ka kpɛm bɛ zin'ikanɛ ka Marta tʋ'ʋs o la.
31 Ka Jew dim banɛ bɛ yinnɛ bɛlisid Mɛɛri la nyɛ ka o duoe tɔ'ɔtɔ yi la, ka ba dɔl o tɛn'ɛsid ye, o kennɛ yaʋgʋn la ye o kaas.
32 Ka Mɛɛri paae Yesu bɛ zin'isi'a la, ka nyɛɛ o, ka igin Yesu tuon ka yɛl o ye, “M Zugsɔba, fʋ ya'a daa bɛɛn kpɛla man taʋn nwa' naan kʋ kpii nɛ.”
33 Yesu daa nyɛ ka Mɛɛri kum ka Jew dim banɛ dɔl o la mɛ kum la, ka o sʋʋnr san'am hali, ka o sin'im bɛdegʋ,
34 ka bu'osi ba ye, yaanɛ ka ya su'a kum la? Ka ba yɛl o ye, “Ti Zugsɔba, kem na gɔs.”
35 Ka Yesu kum.
36 Ka Jew dim la yɛl ye, “Gɔsimi on nɔŋ o si'em.”
37 Ka sieba bu'os ye, “Dau kaŋa daa niŋ si'em nie zʋnzɔŋ nini la kʋ nyaŋi kɛɛn ka dau kaŋa tiliginɛɛ?”
38 Ka Yesu sʋʋnr maligim san'am pamm ka o kɛn yaʋgʋn la na. Yaʋg la da anɛ tampinlɛuŋ vɔɔnr, ka kugir ligili li nɔɔr.
39 Ka Yesu yɛl ye, “Lakimi kugir la.” Ka Marta onɛ an Lazarus taʋn la yɛl o ye, “M Zugsɔba, o bɛ nɛ yaʋgʋn daba anaasi nwa'. Anwaa o pun'oe ya.”
40 Ka Yesu bu'os o ye, “M pʋ yɛl ye, fʋ ya'a niŋim yadda, fʋ na nyɛ Wina'am paŋaa?”
41 Ka ba lak kugir la ka bas yaʋg la nɔɔr. Ka Yesu gɔdigi gɔs agɔl, ka yɛl ye, “M Ba', man pʋ'ʋsidif bareka fʋn wʋmi m sɔsʋg la.
42 M mi' ye saŋa wʋsa fʋ wʋmmi m sɔsʋg. Amaa li anɛ nimbanɛ zi'e kpɛla nwa' la zug ka m yɛl ala ye ba niŋ yadda ye fʋnɛ tʋmim na.”
43 Ka on yɛl nwa' wʋsa naae la, ka dʋ'ʋs o kʋkɔri tans ye, “Lazarus, yim na.”
44 Ka onɛ daa kpi la duoe. Ka o nɔba nɛ o nu'us vilig nɛ pien. Ka pien bil lɔɔ o nindaa. Ka Yesu yɛli ba ye, “Yidigim pien la ka bas o ka o keŋ.”
Jew dim kpɛɛmnam gban'e ye ba kʋ Yesu
(Mat 26:1-5; Mak 14:1-2; Luk 22:1-2)
45 Ka Jew dim bɛdegʋ banɛ la'am dɔl Mɛɛri kena ka nyɛ Yesu tʋm si'em la ba niŋ o yadda.
46 Ka sieba keŋ Farisii dim san'an yɛli ba Yesu tʋm si'em la.
47 Ka maanmaannib kpɛɛmnam nɛ Farisii dim la'asi ba kpɛɛmnam ka yɛl ye, “Ti na niŋ wala? Dau kaŋa tʋmmi tʋʋmnyalima bɛdegʋ.
48 Ti ya'a kɛ ka o kpɛn niŋid ala nidib wʋsa na niŋ o yadda, ka Room dim kena san'ami ti zin'isʋŋ nɛ ti sʋ'ʋlim wʋsa.”
49 Ka ba nid yinne, onɛ yʋ'ʋri buon Kaifas, onɛ da an maanmaan kpɛɛm yʋʋm kan la, yɛli ba ye, “Ya zi' si'el si'ela.
50 Ya pʋ baŋ ye li an sʋm ye dau yinne naan kpi nidib la yɛla gaadi ti buudi la wʋsa san'auŋɔ?”
51 O pʋ yɛl nɛ'ɛŋa nɛ o mɛŋ ya'am, amaa on da an maanmaan kpɛɛm yʋʋm kan la kɛ ka o di'e Wina'am pian'adi tis nidib la, ye Yesu na kpi tis Jew dim buudi la.
52 Li ka'anɛ buudkaŋa yɛla ma'aanɛɛ, amaa ye o la'as Wina'am biis banɛ widig la. 53 Dinzug daakan la ka ba pin'ili gban'e ban na niŋ si'em kʋ o.
54 Lin yɛla ka Yesu pʋ lɛn nɛɛli o mɛŋ Jew dim sʋʋginɛɛ, ka tɔɔm anina keŋ teŋ kanɛ kpi'e mɔɔgin, ka kpɛn' teŋ kanɛ buon Efiram la gbɛɛn anina nɛ o nya'andɔlib la.
55 Ka Jew dim di'ema linɛ ka ba buon Kum Maliak Gaadʋg la da li'elnɛ, ka ba bɛdegʋ naam tɛɛsin la keŋ Jerusalem ye ba maal malʋŋ kanɛ na kɛ ka ba an nyain la, ka dabisir la nyaan paae.
56 Ka ba ieed Yesu. Ka banɛ bɛ Wina'am Pʋ'ʋsim Yin la bu'os taaba ye, “Ya tɛn'ɛsid wala? Ya tɛn'ɛs ka o kʋ kɛn la'asʋg la naa?”
57 Ka maanmaannib kpɛɛmnam nɛ Farisii dim la daa dɛŋin tis nɔɔr ye sɔ' ya'a baŋ on bɛ zin'isi'a, on yɛlimi ba ka ba gban'e o.
JOON 12
Mɛɛri kpa'ae tudaari siɛn Yesu
(Mat 26:6-13; Mak 14:3-9)
11
Ka li kpɛlim daba ayuobʋ ka Kum Maliak Gaadʋg dabisir la paae, ka Yesu keŋ Betani, teŋ kanɛ ka Lazarus onɛ ka o daa vʋ'ʋg kumin la bɛ la.
2 Ka ba maal diibi tis o, ka Marta pʋdig diib la, ka Lazarus paas banɛ dit nɛ o la.
3 Ka Mɛɛri zaŋ tudaari kpaam linɛ ka ba buon naad la ka li na pɛ'ɛl kɔlibir ka li ligidi zu'oe bɛdegʋ na kpa'ae siɛn Yesu nɔba ka nɔk o zuobidi duusi li, ka yir la wʋsa taae nɛ tudaari kpaam la nyuug.
4 Ka Judas Iskariot onɛ an Yesu nya'andɔlib la yinne, onɛ na ti zam o la, yɛl ye,
5 “Bɔ ka o pʋ kuos tudaari kpaam la mɔr ligidi la na ka ti tis nɔŋ dima? Ligidkan na paae nid yinne yʋʋm yɔɔd.”
6 Li ka'anɛ on nɔŋ nɔŋdim la yɛla ka o yɛl nɛ'ɛŋaa, amaa li anɛ on da mɔri ba ligidi kɔlʋg ka an na'ayiig la yɛla, ka ɛɛn ti su'a yis linɛ bɛɛ anina la.
7 Ka Yesu yɛl ye, “Basimi pu'a la baanlimm. Kɛl ka o tɛnr linɛ ka o maal la gur daakanɛ ka ba na mumim.
8 Nɔŋ dim na bɛ nɛ ya saŋa wʋsa, amaa man lɛɛ kʋ bɛ nɛ ya saŋa wʋsaa.”
9 Ka Jew dim nidib tita'am wʋm ye o bɛɛ ani la, ba kena ka li ka'anɛ Yesu yɛla ma'aanɛɛ, amaa ba mɛ bɔɔd ye ba nyɛ Lazarus onɛ ka Yesu vʋ'ʋg o kumin la.
10 Ka maanmaannib kpɛɛmnam la gban'e ye ba kʋ Lazarus mɛn,
11 bɔzugɔ on yɛla ka Jew dim la bɛdegʋ tiak ka niŋid Yesu yadda.
Yesu n kpɛn' Jerusalem la yɛla
(Mat 21:1-11; Mak 11:1-11; Luk 19:28-40)
12 Ka li yimbɛog ka nidib bɛdegʋ banɛ keŋ malʋŋ dabisir la ni wʋm ye Yesu ken Jerusalem na la,
13 ka zaŋ kpʋkparig vaandi yii tʋ'ʋsid o ka yɛt nɛ kʋkɔtita'ar ye, “Hosaana,” albareka bɛ nɛ onɛ kenna nɛ Zugsɔb la yʋ'ʋr zug “Albareka bɛ nɛ Israel dim na'ab la.”
14 Yesu da nyɛ bʋŋsia'asiŋ ka ban' o ka li dɔlnɛ lin da sɔb si'em Wina'am gbauŋʋn ye,
15 “Jerusalem nidiba, da zɔti dabiem. Gɔsimiya, ya na'ab kenna ka ban'ad bʋŋsia'asiŋ.”
16 O nya'andɔlib la da nam pʋ baŋi li gbinnɛ, amaa Yesu n ti nyɛ zʋn'or la, ba tiɛn ye nɛ'ɛŋa da sɔbnɛ o yɛla ka ba sid niŋ o ala.
17 Ka nidib bɛdegʋ banɛ da bɛɛ o san'an saŋkanɛ ka o vʋ'ʋg Lazarus kumin ka o yi yaʋgʋn na la, pin'ili mɔɔn Yesu daa niŋ si'el la.
18 Ka on tʋm tʋʋmnyalʋŋ kaŋa ka nidib bɛdegʋ wʋm la zug ba keŋ tʋ'ʋs o.
19 Ka Farisii dim yʋ'ʋn yɛt taaba ye, “Ti kʋ nyaŋi niŋ si'el si'ela. Gɔsimiya, nidib la wʋsa dɔl o nɛ!”
Girik dim sieba bɔɔd ye ba nyɛ Yesu
20 Ka Girik dim sieba mɛ daa bɛ banɛ keŋ Jerusalem ye ba pʋ'ʋs Wina'am malʋŋ dabisir daar la.
21 Ka ba kɛn Filip onɛ yi Besaida linɛ bɛ Galile sʋ'ʋlim la san'an na yɛl o ye, “Ti bɔɔd ye ti nyɛ Yesu.”
22 Ka Filip keŋ yɛl Andrew ka ba dɔl taaba mɛ keŋ yɛl Yesu.
23 Ka Yesu lɛbisi ba ye, “Saŋa la paae ya ye Ninsaal Biig la nyɛ zʋn'or.
24 Asida ka m yɛti ya ye kief ya'a pin' teŋin ka pʋ kpii, li kpɛn anɛ yinne, amaa li ya'a bul li na du'a ki bɛdegʋ.
25 Onɛ nɔŋ o nyɔvʋr na kɔ'ɔŋi li, amaa onɛ bas o nyɔvʋr dunia nwa' ni la na nyɛ nyɔvʋr linɛ ka' naarɛ.
26 Onɛ bɔɔd ye o tʋm tisim, asɛɛ ka o dɔllim, ka mam bɛ zin'isi'a la o mɛ na bɛ ani. Sɔ' ya'a tʋm tis man, m Ba' na zun'e o daana yʋ'ʋr.
27 “Nannanna m sʋnf san'amnɛ, ka m na yɛl ye bɔ? M Ba' faanmim namiskaŋa pʋʋgin saŋkaŋa nwaa? Ayei, li anɛ nɛ'ɛŋa yɛla ka m kena paae saŋkaŋa nwa'.
28 M Ba'a, zun'omi fʋ yʋ'ʋr.” Ka kʋkɔr yi saazug na yɛl ye, “M zun'e m yʋ'ʋr ka na lɛn zun'e li ya'as.”
29 Ka nimbanɛ zi'e kpi'e la wʋmi li la ka yɛl ye, “Saa dam,” ka sieba ye, “Maliaki pian' tis o.”
30 Ka Yesu lɛbis ye, “Kʋkɔr kaŋa pian'anɛ ya yɛla, ka ka' mam yɛlaa.
31 Dunia nwa' sariakadib paae ya, ka ba na kad onɛ sʋ'oe li la bas.
32 Ka ba ya'a dʋ'ʋs man agɔl, m na buol nidib wʋsa kɛɛn m san'an na.”
33 Yesu yɛl nɛ'ɛŋa nɛ ye o pa'al kum kanɛ buudi ka o na ti kpi.
34 Ka nidib la lɛbis o ye, “Ti wʋm wada gbauŋʋn ka li yɛl ye Kristo la kpɛm bɛ nɛ saŋa wʋsa, ka bɔ ka fʋ yɛl ye, ba na dʋ'ʋs Ninsaal Biig la agɔllɛ? Ka Ninsaal Bikaŋa aan anɔ'ɔnɛ?”
35 Ka Yesu yɛli ba ye, “Ya na mɔr nɛɛsim saŋa bi'ela nwa'. Dinzugɔ, nɛɛsim la nam bɛ la, kemi nɛɛsim la ni ka da kɛ ka yʋ'ʋŋ sɔbi ya. Onɛ ken likin zi' on ken si'ela.
36 Nɛɛsim la nam bɛ la, niŋimin o yadda ka ala ka ya na lieb nɛɛsim la biis.”
Jew dim pʋ niŋ Yesu yadda
Ka on yɛl nɛ'ɛŋa naae la ka tɔɔm su'a o mɛŋi ba san'an.
37 Hali baa on tʋm tʋʋmnyalima bɛdegʋ ka ba nyɛ la, la'an nɛ wala ba pʋ niŋ o yaddaa.
38† Li da niŋ ala ye Wina'am nɔdi'es Azaya da pian' si'el la niŋ amɛŋa ye,“Ti Zugsɔba, anɔ'ɔn niŋi ti labaar la yadda? Ka anɔ'ɔn san'an ka Zugsɔb la nie o paŋi pa'alɛ?”
39† Ba da pʋ niŋ o yaddaa, bɔzugɔ Azaya da lɛn yɛl ya'as ye,
40† “O zu'omi ba nini ka digilimi ba sʋnya, ka ba kʋ nyɛt bɛɛ ba sʋnya baŋ ka ba lɛb mam Wina'am san'an na ka m ti'ebi ba.”
41 Azaya yɛl ala bɔzugɔ o da nyɛ Yesu na'am paŋ ka pian' o yɛla.
42 Ka la'an nɛ wala hali Jew dim tuongatib bɛdegʋ niŋ o yadda ba sʋnya ni, ka Farisii dim zɔtim la yɛla ka ba pʋ nɛɛli li ye ba na ti yisi ba la'asʋg dɔɔgin bas,
43 ban nɔŋ saalib zun'ori gat Wina'am zʋn'or la zug.
Yesu pian'ad na kad nidib saria
44 Ka Yesu pian' nɛ kʋkɔtita'ar ye, “Onɛ niŋid man yadda la pʋ niŋid mam yadda ma'aanɛɛ, amaa o la'an niŋid nɛ onɛ tʋm mam na la yadda mɛn.
45 Ka onɛ nyɛ man la mɛ nyɛ onɛ tʋm man la na. 46 M anɛ nɛɛsim kɛn dunia ni na, ka onɛ niŋim yadda kʋ kpɛlim likinɛ.
47 “Ka sɔ' ya'a wʋmi m pian'ad la ka pʋ dɔlli li suoyaa, m kʋ kad o saria, bɔzugɔ m pʋ kena ye m kadnɛ dunia dim saria amaa ye m faaɛn ba. 48 Onɛ zan'as ka pʋ di'e m pian'ad la mɔr sariakadib. Ka pian'abanɛ ka m pian' la na ti kad o saria naar daar la.
49 Ka m pʋ pian'ad nɛ m mɛŋ paŋa. Amaa m Ba' onɛ tʋm m la na mɛŋi tisim nɔɔr mam na pian' si'em wʋsa.
50 Ka m mi' ye o nɔzi'ela tisid nyɔvʋr linɛ ka' naarɛ. Dinzugɔ m Ba' yɛlim si'el la, lin ka m pian'ad.”
JOON 13
Yesu pie o nya'andɔlib nɔba
13
Ka Kum Maliak Gaadʋg malʋŋ dabisir la da li'el ka Yesu baŋ ye o saŋa paae ya ye o yi dunia kaŋa ni ka keŋ o Ba' san'an la, o da nɔŋ o mɛŋ nimbanɛ bɛ dunia ni la. O yʋ'ʋn da pa'ali ba nɔŋilim linɛ ka' makirɛ.
2 Yesu nɛ o nya'andɔlib daa ditnɛ ba yʋ'ʋŋ diib, ka Sʋntaana daa pʋn dɛŋi kpɛn' Judas, Simon Iskariot biig la sʋnfʋn, ye o zam Yesu.
3 Yesu daa mi' ye o Ba' la zaŋ si'el mɛkama niŋ o nu'ugin la, ka mi' ye o yinɛ Wina'am san'an na, ka lɛbid Wina'am san'an.
4 Ka o duoe diibin la yɛɛg o fuug, ka zaŋ pienni lɔɔ o siaa,
5 ka kpa'ae ku'om niŋ si'iuŋʋn ka pin'ili piesid o nya'andɔlib la nɔba, ka duusidi ba nɛ pien kanɛ ka o lɔ o siaa la.
6 O daa pie paae Simon Pita. Ka Pita bu'os o ye, “M Zugsɔba, fʋ ye fʋ pie m nɔbaa?”
7 Ka Yesu lɛbis o ye, “Fʋn nan zi' man niŋid si'ela, amaa, nwa'a nya'aŋ fʋ na baŋi li.”
8 Ka Pita yɛl o ye, “Fʋ kʋdim kʋ pie m nɔbaa.” Ka Yesu lɛbis o ye, “M ya'a pʋ pie fʋ nɔbaa, fʋ lɛn ka' m nya'andɔlla.”
9 Ka Simon Pita yɛl o ye, “M Zugsɔba, alazugɔ piemim nu'us nɛ m zug, ka ka' m nɔba gʋllimnɛɛ.”
10 Yesu yɛl o ye, “Onɛ pʋn sʋ sa, o nɔba pier gʋllim siakya, ka li maal o niŋgbiŋ wʋsa ka li an nyain. Ya anɛ nyain, amaa ka' ya wʋsaa.”
11 Ka Yesu daa pʋn mi' onɛ ye o zam o la zug, ka o yɛl ye ka' ya wʋsa an nyainnɛ.
12 Ka on pie ba nɔba naae la, o lɛn yɛɛ o fuug, ka lɛbi zin'in, ka bu'osi ba ye, “Ya baŋ man niŋ si'el la gbinnɛɛ?”
13 “Ya buon man ye, Pa'an nɛ Zugsɔb. Li anɛ amɛŋa. M anɛ ala.
14 Man aan ya Zugsɔb nɛ ya Pa'an ka pie ya nɔba la, li sʋ'ʋm ye yanam mɛ pie ya taaba nɔba.
15 M maal nwa' nɛ ye m pa'ali ya, ye yanam mɛ na maal wʋʋ mam maali ya si'em la.
16† Amɛŋa ka m yɛti ya ye, tʋmtʋm kʋ gaad o zugdaana. Ka ban tʋm sɔ' la kʋ gaad onɛ tʋm o la.
17 Yanam mɛ ya'a baŋ nwa', ka niŋ ala, albareka bɛɛ ya zugin.
18 “Li ka' ya wʋsa yɛla ka m yɛta. M mi' man gaŋ sieba la. Amaa asɛɛ Wina'am gbauŋ la sɔb si'em la niŋ amɛŋa ye, ‘Onɛ ka man nɛ on la'am dit la yii m nya'aŋi zi'e m yɛla.’
19 “M yɛti ya nɛ nannanna ka li nam pʋ maalɛ. Ka li ya'a ti maal, ya na niŋim yadda ye manɛ la.
20† Amɛŋa ka m yɛti ya ye, onɛ di'e onɛ ka m tʋm la di'enɛ man. Ka onɛ di'ed man la di'ednɛ onɛ tʋm mam na la.”
Yesu yɛl ye sɔ' na zam o
(Mat 26:20-25; Mak 14:17-21; Luk 22:21-23)
21 Ka Yesu n pian' nɛ'ɛŋa la ka o sʋnf san'am ka o yɛl ye, “Asida ka m yɛti ya ye, ya yinne na zam man.”
22 Ka o nya'andɔlib la gɔsid taaba ka ya'amisid onɛ yɛla ka Yesu pian'ad la.
23 Ka Yesu nya'andɔl yinne onɛ ka o nɔŋ hali la zin' kpi'e nɛ o.
24 Ka Simon Pita ɛnbig nya'andɔl la ka yɛl o ye, “Bu'osim o onɛ yɛla ka o pian'ad la.”
25 Ka onɛ zin' kpi'e nɛ Yesu la, gbɛligi bu'os o ye, “Zugsɔba, li aan anɔ'ɔnɛ?”
26† Ka Yesu lɛbis ye, “Li anɛ onɛ ka m na zaŋ bodobodo nwaa suk laan tis o la na zam man.” Ka on suk diib la laan la ka zaŋi li tis Judas Iskariot.
27 Ka Judas n di diib la naae la ka Sʋntaana kpɛn' o ni. Ka Yesu yɛl o ye, “Fʋn gban'e ye fʋ niŋ si'el la, niŋimi li tɔ'ɔtɔ.”
28 Ka banɛ wʋsa la'am dit nɛ o la pʋ baŋ linɛ yɛla ka o yɛl o alaa.
29 Ka sieba tɛn'ɛs ye Judas n da mɔri ba ligidi kɔlʋg la yɛla ka Yesu yɛt o ye o da'am la'abanɛ ka ba bɔɔd malʋŋ diib dabisir la yɛla, bɛɛ o sʋŋim nɔŋdim la.
30 Li daa anɛ yʋ'ʋŋ, ka Judas di'e diib la naae la, ka kpɛn yi.
Nɔzi'elpaal la yɛla
31 Judas n daa yi la, ka Yesu yɛl ye, “Ninsaal Biig la yʋ'ʋr na nyɛ zʋn'or nannanna, ka on ni ka Wina'am yʋ'ʋr mɛ na nyɛ zʋn'or.
32 Wina'am yʋ'ʋr ya'a nyɛ zʋn'or o Biig la zug, Wina'am mɛŋ na zun'e o Biig la yʋ'ʋr, ka li kʋ yuugɛ.
33 “M biisɛ, m na bɛ nɛ ya saŋa bi'ela nwa'. Ya na ti ieedim, amaa m yɛti ya nwɛnɛ man daa yɛl Jew dim si'em la ye, man ken zin'isi'a la ya kʋ tun'e kɛɛn ani naa.
34 “Nɔzi'elpaal nwa' ka m tisidi ya: Nɔŋimi taaba. Nwɛnɛ man nɔŋi ya si'em la, ala mɛn ka ya na nɔŋ taaba.
35 Ya ya'a nɔŋ taaba, nidib wʋsa na baŋ ye ya anɛ m nya'andɔlib.”
Yesu tu'as Pita na ti ki'is o si'em
(Mat 26:31-35; Mak 14:27-31; Luk 22:31-34)
36 Ka Simon Pita bu'os o ye, “M Zugsɔba, fʋ ken yaanɛ?” Ka Yesu lɛbis o ye, “Man ken zin'isi'a la, fʋ kʋ nyaŋi dɔl man nannanna. Amaa fʋ na ti yuolim dɔl mam keŋ.”
37 Ka Pita bu'os o ye, “M Zugsɔba, bɔɔ niŋ ka m kʋ nyaŋi dɔllif nannanna? M na tun'e kpii fʋ zug.”
38† Ka Yesu lɛbis o ye, “Fʋ na kpi man zugɔɔ? Amɛŋa ka m yɛtif ye, fʋ na ki'is man nɔɔr atan' ka nɔraug nyaan kaas.”
JOON 14
Yesu n an suor linɛ ken Wina'am san'an la yɛla
14
Ka Yesu yɛli ba ye, “Da kɛ ka si'el daami ya sʋnyaa. Niŋimi Wina'am yadda, ka niŋ man yadda mɛn.
2 M Ba' yir mɔr dɔɔd bɛdegʋ. Ya'a ka'anɛ alaa, m naan kʋ yɛlinɛ ya ye, m kennɛ ye m maal zin'igi ya zugɔ.
3 Ka m ya'a keŋ maal zin'ig la naae, m na lɛn kena di'e ya lɛbi m san'an, ka ya na bɛ zin'ikanɛ ka m bɛ la.
4 Ka man ken zin'isi'a la ya mi' ani, ka lɛm mi' li suor mɛn.”
5 Ka Tomas yɛl o ye, “M Zugsɔba, ti zi' fʋn ken zin'isi'a la. Ti na niŋ wala baŋi li suorɛ?”
6 Ka Yesu lɛbis o ye, “Manɛ an suor nɛ yɛlmɛŋir nɛ nyɔvʋr. Sɔ' kae na nyaŋi keŋi m Ba' Wina'am san'anɛ, asɛɛ o paae man.
7 Ya ya'a baŋin man, ya naan baŋini m Ba' Wina'am mɛn. Ka lin pin'il nannanna ken sa, ya baŋ o ka nyɛt o.”
8 Ka Filip yɛl o ye, “M Zugsɔba, pa'alimi ti Ba' la, ka tinamɛ bɔɔd si'eli la.”
9 Ka Yesu lɛbis o ye, “Filip, man bɛ nɛ ya ka li yuug, ka fʋn nan kpɛn zi' maa? Bɔzugɔ onɛ wʋsa nyɛt man la nyɛti m Ba' mɛn. Ka bɔzug ka fʋ lɛn yɛt ye, ‘Pa'alimi ti Ba' la’?
10 Fʋ pʋ siak ye m anɛ yinne nɛ m Ba' la, ka m Ba' la an yinne nɛ manɛɛ? Pian'abanɛ ka m pian'adi tisidi ya la ka' m mɛŋ pian'adɛ, amaa m Ba' kanɛ bɛ m ni la, onɛ tʋmm o tʋʋma.
11 Niŋimim yadda ye m anɛ yinne nɛ m Ba' la, ka m Ba' la mɛ an yinne nɛ man. Ka li ya'a ka' alaa, niŋim man yadda m tʋʋma la zug.
12 Yɛlmɛŋir ka m yɛti ya ye, onɛ niŋ man yadda la na tʋm tʋʋm banɛ ka man tʋm la. Hali o na tʋm tʋʋm titada ka di gaad ala, bɔzugɔ m kennɛ m Ba' san'an.
13 Linɛ wʋsa ka ya sɔs man yʋ'ʋrin la, m na maali li, ye m Ba' la yʋ'ʋr na nyɛ zʋn'or o Biig la zug.
14 Ya ya'a sɔs si'el nɛ man yʋ'ʋr, m na maali li.”
Wina'am Siig Kasi la kenna yɛla
15 “Ya ya'a nɔŋ man, ya na siaki m nɔzi'elʋg la.
16 Ka m na sɔsi m Ba', ka o na tisi ya Sʋŋid sɔ'. Ka o na bɛ nɛ ya saŋa wʋsa.
17 Onɛ an yɛlmɛŋir Siig la. Ka dunia dim kʋ nyaŋi di'e o, bɔzugɔ ba pʋ nyɛt o, ka mɛ pʋ baŋ oo. Yanam mi' o, bɔzugɔ o kpɛlimmi ya san'an, ka na bɛ ya ni.
18 “M kʋ basi ya wʋʋ kpiibisɛ. M na lɛbi ya san'an na.
19 Li kpɛlim bi'ela ka dunia nidib kʋ lɛn nyɛɛm ya'asɛ, amaa yanam na nyɛtim. Man vʋe la zug, yanam mɛ na mɔr nyɔvʋr.
20 Daakan la ka ya na baŋ ye m anɛ yinne nɛ m Ba' la, ka yanam mɛ an yinne nɛ m, ka m an yinne nɛ ya.
21 “Onɛ di'e man nɔzi'ela, ka siaki li, onɛ an onɛ nɔŋim. Ka onɛ nɔŋ man la, m Ba' Wina'am mɛ na nɔŋ o. Ka mam na nɔŋ o, ka nie m mɛŋi pa'al o.”
22 Ka Judas, (ka' Judas Iskariot la), bu'os o ye, “M Zugsɔba, wala ka fʋ na nie fʋ mɛŋi pa'al tinam, ka ka'anɛ dunia nidiba?”
23 Ka Yesu lɛbis o ye, “Nid ya'a nɔŋ man, o na di'e m nɔɔr, ka m Ba' na nɔŋ o, ka tinam na kɛɛn o san'an naa kpɛlim o ni.
24 Onɛ pʋ nɔŋim pʋ di'edi m nɔɔrɛ. Ka pian'akanɛ ka ya wʋm la ka' m mɛŋ pian'adɛ, amaa li anɛ m Ba' onɛ tʋm mam na la pian'ad.
25 “Pian'abama nwa' ka m pian'adi tisidi ya, man nam bɛ nɛ ya la.
26 Amaa Sʋŋid onɛ an Wina'am Siig Kasi ka m Ba' la na ti tʋm o ya san'an na nɛ m yʋ'ʋr la, onɛ na pa'ali ya si'el wʋsa, ka tɛɛnsi ya linɛ ka m daa pian' tisi ya la wʋsa.
27 “M basi m sumbʋgʋsʋm tisi ya, ka li anɛ m mɛŋ sumbʋgʋsʋm ka m tisi ya, ka li pʋ nwɛnɛ dunia tisidi ya si'em la. Da kɛ ka ya sʋnya san'am bɛɛ dabiem kpɛn' yaa.
28 Ya daa pʋn wʋm ka m yɛli ya ye, m na yii ya san'an, ka na lɛbi ya san'an na. Ya ya'a nɔŋinim, ya naan maalin sumalisim, man kennɛ m Ba' san'an la, bɔzugɔ m Ba' la gatim.
29 Ka nannanna m dɛŋi yɛti ya nɛ ka li nam pʋ paae. Ka li ya'a ti paae ya na niŋ man yadda.
30 Ka lin yi nannanna ken la, m kʋ lɛm pian' nɛ ya yuugɛ, bɔzugɔ Sʋntaana onɛ an dunia na'ab la kenna. Amaa o paŋ kʋ nyaŋi ma.
31 Amaa li anɛ tilas ye dunia dim baŋ ye m nɔŋi m Ba' la, ka dɔl o nɔzi'ela la.” “Duomi ka ti yi kpɛla keŋ.”
JOON 15
Vain tiig nɛ wila la siiliŋ
15
Ka Yesu pa'al o nya'andɔlib la nɛ siiliŋ ye, “Manɛ an vain tiig la amɛŋa. Ka m Ba' an onɛ gur tiig la.
2 Wilkanɛ bɛɛ m ni ka pʋ wanna, m Ba' nwaadi li nɛ basid. Ka wilkanɛ wʋsa wan la, o pɛsidi li nɛ maali li sʋ'ʋŋa ka li maligim wan bɛdegʋ.
3 Pian'akanɛ ka m pian' tisi ya la zug, ya anɛ nyain.
4 Kpɛm bɛ man ni ka mam mɛ na bɛɛ ya ni. Tiig wil kʋ tun'e walɛ, asɛɛ o kpɛm bɛ tiigin la. Ala mɛn ka ya kʋ tun'e niŋ si'ela asɛɛ ya kpɛm bɛ man ni.
5 “Manɛ an tiig la, ka yanam an wila la. Onɛ kpɛm bɛ man ni ka mam mɛ bɛɛ o ni la, on sɔb na wal bɛdegʋ, bɔzugɔ ya kʋ tun'e niŋ si'ela asɛɛ ya kpɛm bɛ man ni.
6 Onɛ pʋ bɛ man ni nwɛnɛ wilkanɛ ka ba nwaae bas, ka li kʋdig la. Ba na la'as wilbanɛ lɔb bugumin, ka bugum dii ba.
7 Ya ya'a kpɛm bɛ man ni, ka m pian'ad bɛɛ ya ni, ya na sɔs yanamɛ bɔɔd si'el wʋsa ka li na niŋ ala tisi ya.
8 Ya tʋʋm sʋma bɛdegʋ dʋ'ʋsidi m Ba' Wina'am yʋ'ʋr. Ka ala mɛn ka li na pa'al ye ya anɛ m nya'andɔlib.
9 “M Ba' nɔŋim si'em la, ala mɛn ka man nɔŋi ya. Kpɛm bɛɛ nɛ m nɔŋir la pʋʋgin.
10 Ya ya'a siaki m nɔzi'elʋg la, ya na kpɛlimmi m nɔŋilimin la, wʋʋ man siaki m Ba' nɔɔr ka kpɛlim o nɔŋilimin si'em la.
11 “M yɛli ya yɛlbama ye ya di'e m sumalisim. Ka ya sʋnya na pɛ'ɛl nɛ sumalisim.
12 M nɔɔr zi'elʋgʋ nwa' ka m yɛti ya ye, ‘Nɔŋimi taaba, wʋʋ man nɔŋi ya si'em la.’
13 Nɔŋir lɛn kae gaad nidi na kpi o zuanam zugɔ.
14 Ya ya'a siaki m nɔzi'ela, ya anɛ m zuanam.
15 M ɛɛnti buoni ya nɛ ye, m tʋmtʋmnib. Amaa m kʋ lɛm buoli ya ala ya'asɛ, bɔzugɔ tʋmtʋm zi' o zugdaani niŋid si'ela. Amaa m buoni ya nɛ ye, m zuanam, bɔzugɔ m yɛli ya m Ba' yɛlim si'el la wʋsa.
16 Ka' yanamɛ gaŋi ma. Amaa manɛ gaŋi ya ye ya tʋm tʋʋm sʋma wʋʋ tisʋŋi wan walsʋma si'em la. Ka ya tʋʋm sʋma na kpɛlim. Ka ya ya'a sɔsi m Ba' Wina'am si'el man yʋ'ʋr zug o na tisi ya.
17 M nɔzi'elʋg anɛ ye, ya nɔŋimi taaba.
Dunia dim kisʋg la yɛla
18 “Dunia dim ya'a kisi ya, yanam baŋimi ye ba dɛŋi kisignɛ man yiiga.
19 Ya ya'a bɛɛn dunia dim sʋ'ʋlimin, ba naan nɔŋini ya wʋʋ ba mɛŋ nidib nɛ. Amaa ya ka' dunia dim sʋ'ʋlim nii. M gaŋi ya nɛ wɛligi yis dunia dim sʋ'ʋlim ni. Dinzug ka dunia dim kisi ya la.
20† Tiɛnmi yɛlkanɛ ka m yɛli ya la ye, ‘Tʋmtʋm pʋ gat o zugdaana.’ Ba ya'a namis man, ba na namisi ya mɛn. Ka ba ya'a daa siak mam pa'alʋg, ba mɛ na siaki ya pa'alʋg mɛn.
21 Ba na niŋi ya nɛ'ɛnam wʋsa man zug, bɔzugɔ ba zi' onɛ tʋmi m la naa.
22 Man ya'a pʋ kɛɛn na tu'asini ba, ba naan kʋ mɔrin taalɛ. Amaa lin an si'em la linɛ na ligili ba taal la kae.
23 Onɛ kis man la, o kisi m Ba' la mɛn.
24 M ya'a pʋ tʋmin tʋʋm kanɛ ka sɔ' nan zi' tʋmi ba san'an la, ba naan kʋ mɔrin taali ba tʋʋmbɛ'ɛd zugɔ. Amaa ba nyɛ tʋʋmnyalima bama wʋsa ka la'an zan'as ka kis man nɛ m Ba' la wʋsa.
25 Lin na niŋ si'em la anɛ ye ban da dɛŋi sɔb si'el Wina'am gbauŋʋn la lieb amɛŋa ye, ‘Ba kisim zaalim-zaalim.’
26 “Sʋŋid onɛ ka m na tʋm o ya san'an na la na kena; onɛ an yɛlmɛŋir Siig ka na yii m Ba' Wina'am san'an na. O na dii m kasɛt.
27 Ka yanam mɛ na di man kasɛt, bɔzugɔ pin'ilʋgʋn sa ka ya bɛɛ m san'an.”
JOON 16
16
“M yɛli ya nɛ'ɛnam wʋsa ye ya da yi yadda la nii.
2 Ba na kadi ya yis la'asʋg dɔɔdin, ka saŋa la sid kenna ka sɔ' ya'a kʋʋ ya, o na tɛn'ɛs ye o tʋmnɛ linɛ ka Wina'am bɔɔd.
3 Ban zi' m Ba' nɛ mam la zug ka ba na niŋ nɛ'ɛnam.
4 Ka m yɛli ya nɛ'ɛnam ye li saŋa ya'a paae ya na tɛnr ye m daa yɛli ya li yɛla.
Wina'am Siig Kasi tʋʋma la yɛla
“Man daa bɛɛ ya san'an la zug ka m pʋ yɛli ya nɛ'ɛnam pin'ilʋgʋnɛ,
5 amaa nannanna m kennɛ onɛ tʋmim la san'an, ka ya sɔ' pʋ bu'osim ye, fʋ wa'ae yaanɛ?
6 Ka man yɛli ya nɛ'ɛŋa la zug ka ya sʋnya san'am bɛdegʋ.
7 Ka la'an nɛ wala li anɛ sida ka m yɛti ya ye, li anɛ ya sʋ'ʋm zug ka m ye m yi kpɛla, ka m ya'a pʋ keŋɛ, Sʋŋid la kʋ kɛɛn ya ni naa.
8 Amaa o ya'a kena o na nie pa'al dunia nidibi yidig tʋʋmbɛ'ɛd yɛla si'em, nɛ ban yidig pʋpielim yɛla si'em, nɛ ban yidig sariakadib yɛla si'em la.
9 Ba yidig tʋʋmbɛ'ɛd yɛla, bɔzugɔ ba pʋ niŋ man yadda.
10 Ba yidig pʋpielim yɛla, bɔzugɔ man kennɛ m Ba' Wina'am san'an ka ba kʋ nyɛ man la zug.
11 Ba yidig sariakadib yɛla, bɔzugɔ Wina'am mɔŋ dunia nwa' na'ab la bʋʋd.
12 “M mɔr yɛla bɛdegʋ na pian' tisi ya amaa ya kʋ nyaŋi baŋi li gbin nannannaa.
13 Ka onɛ an yɛlmɛŋir Siig la ya'a kena, o na sʋŋi ya ka ya baŋ yɛlsida la wʋsa; ka o kʋ pian' nɛ o mɛŋ yɛlaa, amaa o na pian' linɛ ka o wʋm la, ka mɛ na pa'annɛ ya yɛlbanɛ na ti kena.
14 O na zun'e man yʋ'ʋr; ka zaŋ man yɛla yɛli ya.
15 M Ba' la sʋ'oe si'el wʋsa la anɛ man din. Linzug ka m yɛl ye, o na zaŋ man yɛla yɛli ya la.”
Sʋnsa'aŋ nɛ sumalisim la yɛla
16 Ka Yesu yɛl ye, “Li kpɛlim saŋa bi'ela ka ya kʋ lɛn nyɛɛ ma, ka li na niŋ bi'ela ya'as ka ya na nyɛɛm.”
17 Ka nya'andɔlib sieba yɛt taaba ye, “Nwa' gbin an bɔ ka o yɛt ye li kpɛlim saŋa bi'ela ka ti kʋ nyɛɛ o, ka li ya'a niŋ bi'ela ya'as ka ti na nyɛɛ o la, ka lɛn ye, bɔzugɔ m kennɛ m Ba' san'an la?”
18 Ka ba lɛm bu'osid ye, “On yɛl ye saŋa bi'ela la, li gbin an bɔ? Ti pʋ gban'e on yɛt si'el la gbinnɛ.”
19 Ka Yesu baŋ ye ba bɔɔd ye ba bu'os o li gbin la, ka yɛli ba ye, “Ya bu'osidnɛ taaba man yɛl ye, saŋa bi'ela ka ya kʋ nyɛɛ ma, ka saŋa bi'ela ya'as ka ya na nyɛɛm la gbinnɛɛ?
20 Asida ka m yɛti ya ye, ya na kum ka fabin, ka dunia dim sʋnya lɛɛ na malis. Ya sʋnya na san'am, ka ya sʋnsa'aŋ la na lieb sumalisim.
21 Pu'a ya'a sa'ae ye o du'a, li zabidnɛ, o saŋa paae la zug, ka o ya'a du'a naae o sʋnf malis nɛ, on du'a biig la zug ka tam zabir la.
22 Ala mɛn ya sʋnya san'am nannanna amaa m na lɛn nyɛɛ ya ya'as, ka ya na mɔr sumalisim, ka sɔ' kʋ kɛ ka ya sʋnya lɛn san'am.
23 Saŋkan la ka ya kʋ lɛm bu'osim bu'osa ya'asɛ. Asida ka m yɛti ya ye, ya ya'a sɔs si'eli m Ba' la san'an man yʋ'ʋr zug, o na tisi ya.
24 Ya nam pʋ sɔs si'el nɛ man yʋ'ʋr zugɔ. Sɔsimi ka ya na di'e ka ya sʋnya na pɛ'ɛl nɛ sumalisim.
Yesu n nyaŋ dunia la yɛla
25 “M pian'adi ya nɛ siilima. Amaa saŋa kenna ka m kʋ lɛm pian'adi ya nɛ siilimaa, ka lɛɛ na pian'adi ya m Ba' la yɛla nyain-nyain.
26 Saŋkan la ka ya na sɔs Wina'am nɛ man yʋ'ʋr zug. M pʋ yɛt ye, m na sɔs o ya yɛlaa,
27 bɔzugɔ o mɛŋi nɔŋi ya la zug. O nɔŋi ya, yanamɛ nɔŋi m ka siak ye m yinɛ m Ba' la san'an na la zug.
28 M sid naan nɛ m Ba' la ni kɛn dunia ni na, ka na lɛn naam dunia nii lɛbi m Ba' la san'an.”
29 Ka o nya'andɔlib la yɛl ye, “Ehɛɛn, nannanna fʋ yʋ'ʋn pian'ad nɛ nyain-nyain, ka ka' siilimaa.
30 Ka ti yʋ'ʋn baŋ ye fʋ mi' si'el wʋsa, ka li pʋ nar ye sɔ' bu'osif bu'osaa. Nɛ'ɛŋa zug ka ti siak ye fʋ yinɛ Wina'am san'an na.”
31 Ka Yesu lɛbisi ba ye, “Ya yʋ'ʋn siak yaa?
32† Saŋa la kenna, ka li sid paae ya ka ya na widigi kul sɔ' nɛ o yin o yin ka bas manɛ m kɔn'ɔkɔn', amaa m ka' m kɔn'ɔɔ, m Ba' bɛ man san'an la zug.
33 “M yɛli ya nɛ'ɛŋa ye ya mɔr sumbʋgʋsʋm man san'an. Dunia kaŋa ni ya mɔr namisʋg, amaa mɔri sʋnkpi'euŋ; ka m nyaŋ dunia.”
JOON 17
Yesu pʋ'ʋs Wina'am tis o nidib
17
Yesu pian' pian'abama naae la, o gɔdigi gɔs saazug ka yɛl ye,
“M Ba'a, saŋa la paae ya. Zun'omi fʋ Biig la yʋ'ʋr, ka o mɛ na zun'e fʋ yʋ'ʋr;
2 ka fʋ tis o paŋ ka o sʋ'oe saalib wʋsa ka zaŋ nyɔvʋr linɛ ka' naar la tis banɛ wʋsa ka fʋ tis o la.
3 Ka nyɔvʋr linɛ ka' naar la anɛ ye ba baŋ fʋn onɛ sid an Wina'am yinne ma'aa la, nɛ man Yesu Kristo onɛ ka fʋ tʋm na la.
4 M tʋm tʋʋm linɛ ka fʋ tisim la naae ka zun'e fʋ yʋ'ʋr dunia ni.
5 M Ba'a, fʋn mɛ zu'omi m yʋ'ʋri fʋ mɛŋ tuon nannanna nɛ zʋn'or kanɛ ka m mɔri fʋ san'an ka dunia nan kae la.
Yesu sɔsi tis o nya'andɔlib
6 “M pa'ali fʋ yʋ'ʋri tis nimbanɛ ka fʋ gaŋ dunia nwa' nii tisim la. Ba da anɛ fʋ din ka fʋ zaŋi ba tisim ka ba siaki fʋ nɔɔr,
7 ka baŋ ye fʋn tis man si'el la wʋsa yinɛ fʋ san'an na,
8 bɔzugɔ pian'abanɛ ka fʋ tisim la, m mɛ tisi ba, ka ba di'e ka sid baŋ ye m yinɛ fʋ san'an na, ka lɛn siak ye fʋnɛ tʋmim na.
9 M sɔsidif nɛ ba yɛla. Amaa m pʋ sɔsid dunia dim yɛlaa, amaa banɛ ka fʋ tisim la yɛla, ban aan fʋ din la zug.
10 Man din wʋsa anɛ fʋ din, ka fʋ din mɛ aan m din, ka ba ni ka m yʋ'ʋr nyɛt zʋn'or.
11 Ka nannanna m kennɛ fʋ san'an na ka kʋ lɛm bɛ dunia nii, ka ban lɛɛ na kpɛm bɛɛ li ni. M Ba'asʋŋɔ, guri ba nɛ fʋ paŋ kanɛ ka fʋ tisim la, ka li na kɛ ka ba ti an yinne wʋʋ tinamɛ an yinne si'em la.
12 Man daa bɛ nɛ ba la, m daa guri ba nɛ yʋ'ʋr kanɛ mɔr paŋ ka fʋ tisim la. M gɔsi ba ka ba sɔ' pʋ bɔdigɛ asɛɛ onɛ ka li yɛli zi'el ye o san'am la, ye Wina'am gbauŋʋ sɔb si'em la niŋ amɛŋa.
13 “M yʋ'ʋn kennɛ fʋ san'an na ka pian' pian'abama dunia ni ye sumalisim wʋsa na bɛɛ ba sʋnya ni.
14 M tisi ba fʋ pian'ad ka dunia dim kisi ba, ban ka' dunia din la zug, wʋʋ mam mɛ ka' dunia din si'em la.
15 M pʋ sɔsidif ye fʋ yisi ba dunia nwa' nii, amaa m sɔsid ye fʋ da kɛ ka ba kpɛn' yɛlbɛ'ɛdi nɛ.
16 Ka man ka' dunia din si'em la, ala ka ba mɛ ka' dunia dinnɛ.
17 Kɛl ka yɛlsida la maali ba ka ba liebi fʋ mɛŋ nidibi an nyain, bɔzugɔ fʋ pian'ad la anɛ sida.
18 Fʋn tʋmim dunia ni na si'em la, ala mɛn ka m mɛ tʋmmi ba dunia ni.
19 Ka ban yɛla ka m pɛsigi m mɛŋi tisif, ye fʋ yɛlsida la kɛ ka ba mɛ pɛsigi ba mɛŋi tisif.
Yesu sɔsi tis yadda niŋidib wʋsa
20 “Li ka'anɛ bama yɛla ma'aa ka m sɔsidi fɔ, amaa la'an nɛ banɛ na ti niŋ man yadda, ka li dɔlli ba labasʋŋ mɔɔlʋg zug la.
21 M Ba' m sɔsidif ye ba wʋsa an yinne wʋʋ fʋn nɛ mam an yinne si'em la, ala mɛn ka ba mɛ an yinne nɛ ti. Ka dunia dim na siak ye fʋnɛ tʋmim na.
22 Ka zʋn'or kanɛ ka fʋ tisim la, m zaŋi lii tisi ba ye ba an yinne wʋʋ tinamɛ an yinne si'em la.
23 M na bɛɛ ba sʋnya ni ka fʋ bɛɛ m ni, ye ba sid an yinne, ka dunia na baŋ ye fʋnɛ tʋm mam na ka nɔŋi ba wʋʋ fʋn nɔŋ man si'em la.
24 “M Ba'a, m bɔɔd ye banɛ ka fʋ tisim la bɛ nɛ m ka nyɛɛm zʋn'or linɛ ka fʋ da tisimi fʋ nɔŋir zug, saŋa kanɛ ka dunia da nan kae la.
25 “M Ba' onɛ an pʋpielim sɔba, dunia nam pʋ baŋi fɔ, ka man lɛɛ baŋif, ka nimbama baŋ ye fʋnɛ tʋm mam na.
26 “Man kɛ ka ba baŋi fʋ yʋ'ʋr ka na kpɛn niŋid ala, ye nɔŋir kanɛ ka fʋ mɔri m yɛla la na bɛɛ ba ni, ka mam mɛ bɛ nɛ ba.”
JOON 17
Yesu pʋ'ʋs Wina'am tis o nidib
17
Yesu pian' pian'abama naae la, o gɔdigi gɔs saazug ka yɛl ye,
“M Ba'a, saŋa la paae ya. Zun'omi fʋ Biig la yʋ'ʋr, ka o mɛ na zun'e fʋ yʋ'ʋr;
2 ka fʋ tis o paŋ ka o sʋ'oe saalib wʋsa ka zaŋ nyɔvʋr linɛ ka' naar la tis banɛ wʋsa ka fʋ tis o la.
3 Ka nyɔvʋr linɛ ka' naar la anɛ ye ba baŋ fʋn onɛ sid an Wina'am yinne ma'aa la, nɛ man Yesu Kristo onɛ ka fʋ tʋm na la.
4 M tʋm tʋʋm linɛ ka fʋ tisim la naae ka zun'e fʋ yʋ'ʋr dunia ni.
5 M Ba'a, fʋn mɛ zu'omi m yʋ'ʋri fʋ mɛŋ tuon nannanna nɛ zʋn'or kanɛ ka m mɔri fʋ san'an ka dunia nan kae la.
Yesu sɔsi tis o nya'andɔlib
6 “M pa'ali fʋ yʋ'ʋri tis nimbanɛ ka fʋ gaŋ dunia nwa' nii tisim la. Ba da anɛ fʋ din ka fʋ zaŋi ba tisim ka ba siaki fʋ nɔɔr,
7 ka baŋ ye fʋn tis man si'el la wʋsa yinɛ fʋ san'an na,
8 bɔzugɔ pian'abanɛ ka fʋ tisim la, m mɛ tisi ba, ka ba di'e ka sid baŋ ye m yinɛ fʋ san'an na, ka lɛn siak ye fʋnɛ tʋmim na.
9 M sɔsidif nɛ ba yɛla. Amaa m pʋ sɔsid dunia dim yɛlaa, amaa banɛ ka fʋ tisim la yɛla, ban aan fʋ din la zug.
10 Man din wʋsa anɛ fʋ din, ka fʋ din mɛ aan m din, ka ba ni ka m yʋ'ʋr nyɛt zʋn'or.
11 Ka nannanna m kennɛ fʋ san'an na ka kʋ lɛm bɛ dunia nii, ka ban lɛɛ na kpɛm bɛɛ li ni. M Ba'asʋŋɔ, guri ba nɛ fʋ paŋ kanɛ ka fʋ tisim la, ka li na kɛ ka ba ti an yinne wʋʋ tinamɛ an yinne si'em la.
12 Man daa bɛ nɛ ba la, m daa guri ba nɛ yʋ'ʋr kanɛ mɔr paŋ ka fʋ tisim la. M gɔsi ba ka ba sɔ' pʋ bɔdigɛ asɛɛ onɛ ka li yɛli zi'el ye o san'am la, ye Wina'am gbauŋʋ sɔb si'em la niŋ amɛŋa.
13 “M yʋ'ʋn kennɛ fʋ san'an na ka pian' pian'abama dunia ni ye sumalisim wʋsa na bɛɛ ba sʋnya ni.
14 M tisi ba fʋ pian'ad ka dunia dim kisi ba, ban ka' dunia din la zug, wʋʋ mam mɛ ka' dunia din si'em la.
15 M pʋ sɔsidif ye fʋ yisi ba dunia nwa' nii, amaa m sɔsid ye fʋ da kɛ ka ba kpɛn' yɛlbɛ'ɛdi nɛ.
16 Ka man ka' dunia din si'em la, ala ka ba mɛ ka' dunia dinnɛ.
17 Kɛl ka yɛlsida la maali ba ka ba liebi fʋ mɛŋ nidibi an nyain, bɔzugɔ fʋ pian'ad la anɛ sida.
18 Fʋn tʋmim dunia ni na si'em la, ala mɛn ka m mɛ tʋmmi ba dunia ni.
19 Ka ban yɛla ka m pɛsigi m mɛŋi tisif, ye fʋ yɛlsida la kɛ ka ba mɛ pɛsigi ba mɛŋi tisif.
Yesu sɔsi tis yadda niŋidib wʋsa
20 “Li ka'anɛ bama yɛla ma'aa ka m sɔsidi fɔ, amaa la'an nɛ banɛ na ti niŋ man yadda, ka li dɔlli ba labasʋŋ mɔɔlʋg zug la.
21 M Ba' m sɔsidif ye ba wʋsa an yinne wʋʋ fʋn nɛ mam an yinne si'em la, ala mɛn ka ba mɛ an yinne nɛ ti. Ka dunia dim na siak ye fʋnɛ tʋmim na.
22 Ka zʋn'or kanɛ ka fʋ tisim la, m zaŋi lii tisi ba ye ba an yinne wʋʋ tinamɛ an yinne si'em la.
23 M na bɛɛ ba sʋnya ni ka fʋ bɛɛ m ni, ye ba sid an yinne, ka dunia na baŋ ye fʋnɛ tʋm mam na ka nɔŋi ba wʋʋ fʋn nɔŋ man si'em la.
24 “M Ba'a, m bɔɔd ye banɛ ka fʋ tisim la bɛ nɛ m ka nyɛɛm zʋn'or linɛ ka fʋ da tisimi fʋ nɔŋir zug, saŋa kanɛ ka dunia da nan kae la.
25 “M Ba' onɛ an pʋpielim sɔba, dunia nam pʋ baŋi fɔ, ka man lɛɛ baŋif, ka nimbama baŋ ye fʋnɛ tʋm mam na.
26 “Man kɛ ka ba baŋi fʋ yʋ'ʋr ka na kpɛn niŋid ala, ye nɔŋir kanɛ ka fʋ mɔri m yɛla la na bɛɛ ba ni, ka mam mɛ bɛ nɛ ba.”
JOON 18
Ban gban'e Yesu la yɛla
(Mat 26:47-56; Mak 14:43-50; Luk 22:47-53)
18
Yesu da sɔs Wina'am naae la, o dɔl o nya'andɔlib la yii keŋ lɔ'ɔŋ Kidron bɔn'ɔg, ka olif tiis bɛ zin'ikan la ka on nɛ o nya'andɔlib keŋ ani.
2 Ka Judas onɛ zam o la mi' zin'ig la, bɔzugɔ Yesu nɛ o nya'andɔlib la ɛɛnti la'asid anina.
3 Ala ka Judas dɔl soogianam nɛ maanmaannib kpɛɛmnam nɛ Farisii dim la kɛn lɔmbɔn'ɔgin la na. Ba da mɔri fita nɛ mɔɔd bugum nɛ zaba la'ad.
4 Ka Yesu mi' linɛ wʋsa na niŋ o la, o yi tuon na ka bu'osi ba ye, “Anɔ'ɔn ka ya ieeda?”
5 Ka ba lɛbis o ye, “Ti ieednɛ Yesu onɛ yi Nazaret na la.” Ka Yesu ye, “Manɛ nwa'.” Ka Judas, onɛ zam o la, la'am zi'e nɛ ba.
6 Ka Yesu yɛl ye, “Manɛ nwa'” la, ka ba lɛb nya'aŋi lu teŋin.
7 Ka Yesu lɛm bu'osi ba ye, “Anɔ'ɔn ka ya ieeda?” Ka ba lɛbis ye, “Ti ieednɛ Yesu onɛ yi Nazaret teŋin na la.”
8 Ka Yesu lɛbisi ba ye, “M pʋn yɛli ya ye manɛ la. Dinzugɔ ya ya'a ieednɛ mam, kɛlli ka nimbama keŋ.”
9 Nɛ'ɛŋa kɛ ka pian'akanɛ ka o pian' la niŋ amɛŋa ye, “Nimbanɛ ka fʋn Wina'am tisim la, m pʋ kɛ ka sɔ' bɔdigɛ.”
10† Ka Simon Pita fuoe sʋ'ʋgʋ kie maanmaan kpɛɛm tʋmtʋm onɛ ka o yʋ'ʋr buon Malkus la tʋbiri fi'ig.
11† Ka Yesu yɛl Pita ye, “Lɛbisimi fʋ sʋ'ʋg la li tɛɛngʋn. Nwam kanɛ an namisʋg ka m Ba' tisim la, m da di'e lii?”
Ba mɔr Yesu keŋ Annas san'an
12† Ka soogianam nɛ ba kpɛɛm la nɛ Jew dim tʋmtʋmnib gban'e Yesu lɔɔ o,
13† ka mɔr o keŋ Annas onɛ an Kaifas diem dau la san'an yiiga. Kaifas n da an maanmaan kpɛɛm yʋʋm kan la.
14 Li anɛ Kaifas onɛ da sa'al Jew dim ye, li anɛ ba sʋ'ʋm ye nid yinne kpi nidib wʋsa zug la.
Pita ki'is Yesu la yɛla
(Mat 26:69-70; Mak 14:66-68; Luk 22:55-57)
15 Simon Pita nɛ nya'andɔl yinne da bɛ nya'aŋi dɔl Yesu. Ka maanmaan kpɛɛm la mi' nya'andɔl yinne la zug ka nya'andɔl la la'am dɔl Yesu kpɛn' maanmaan kpɛɛm la zakin.
16 Ka Pita on zi'e za'anɔɔr la yiŋ, ka nya'andɔl oŋa la, onɛ ka maanmaan kpɛɛm la mi' la, yii yɛl pu'a kanɛ gur za'anɔɔr la ka dɔl Pita kpɛn'.
17† Ka pu'a kanɛ gur za'anɔɔr la bu'os Pita ye, “Ka' fʋnɛ an dau kaŋa nya'andɔlib yinne laa?” Ka o lɛbis ye, “Ayei, li ka' manɛ.”
18 Ka waad bɛ, ka tʋmtʋmnib la nɛ yammis nyu'oe bugum ka ba zi'e giligi li ʋʋsid. Ka Pita mɛ keŋ la'as nɛ ba mɛ ʋʋsid.
Maanmaan kpɛɛm bu'os Yesu bu'osa
(Mat 26:59-64; Mak 14:55-64; Luk 22:66-71)
19 Ka maanmaan kpɛɛm la bu'os Yesu o nya'andɔlib la nɛ o pa'ala yɛla.
20 Ka Yesu lɛbis o ye, “M pian'anɛ paalʋ nɛɛli tis nidib la. Saŋa mɛkama m pa'an la'asʋg dɔɔdin nɛ Wina'am Pʋ'ʋsim Yin ka Jew dim wʋsa la'asid na. M pʋ su'a pian' si'ela.
21 Bɔ ka fʋ bu'osidi ma? Bu'osim banɛ wʋmi m pian'ad la. Banɛ mi' mam yɛl si'el.”
22 Ka on pian' nɛ' la ka tʋmtʋmnib la yinne zi'e kpi'e o ka nwɛ' Yesu nɛ tampiank ka yɛl ye, “Li anɛ ala ka fʋ lɛbisid maanmaan kpɛɛm?”
23 Ka Yesu lɛbis o ye, “Ka m ya'a pian'anɛ bɛ'ɛd, fʋn dimi li kasɛt, ka m ya'a pian'anɛ linɛ dɔl suor, wala ka fʋ nwɛ'ɛdi ma?”
24 Ka Annas kɛ ka o lɔɔb la kpɛn aan ala ka ba mɔr o keŋ maanmaan kpɛɛm Kaifas san'an.
Pita lɛn ki'is Yesu
(Mat 26:71-75; Mak 14:69-72; Luk 22:58-62)
25 Ka Simon Pita nam kpɛn zi'e ʋʋsid bugum la, ka ba bu'os o ye, “Fʋ mɛ ka'anɛ o nya'andɔlib la yinnee?” Ka o ki'is ka yɛl ye, “Li ka' manɛ.”
26 Ka maanmaan tʋmtʋm yinne onɛ kpin nɛ onɛ ka Pita pa'a fi'ig o tʋbir la bu'os Pita ya'as ye, “M pʋ nyɛɛnif ka fʋ bɛɛn o san'an olif tiisin laa?”
27 Ka Pita lɛn ki'is ya'as. Ka nɔraug kpɛn kaas.
Yesu n bɛ Pailet tuon la yɛla
(Mat 27:1-2, 11-14; Mak 15:1-5; Luk 23:1-5)
28 Ka bɛkɛung ka ba mɔr Yesu n yi Kaifas yinnɛ keŋ gɔmena onɛ zi'e Room na'ab nɔba zug la yin. Ka Jew dim banɛ mɔr o na la pʋ kpɛn' gɔmena la yinne, bɔzugɔ ba pʋ bɔɔd ye ba san'ami ba malʋŋ laa. Ban bɔɔd ye ba saa di Kum Maliak Gaadʋg malʋŋ diib la.
29 Ka Pailet yii ba san'an na yɛl ye, “Tʋʋmbɛ'ɛd bɔ ka dau nwa' tʋm ka ya mɔr o na?”
30 Ka ba lɛbis o ye, “O ya'a ka'an nɛ tʋʋmbɛ'ɛd sɔba, ti naan kʋ gban'an o naa.”
31 Ka Pailet yɛli ba ye, “Dɔlli nɛ o keŋ kad o saria nɛ ya wada suorɛ dɔl si'em.” Ka Jew dim la yɛl o ye, “Li pʋ dɔl suor ye ti kʋ sɔ'ɔɔ.”
32 Nɛ'ɛŋa da niŋnɛ ye pian'akanɛ ka Yesu da pian' pa'al kum kanɛ buudi ka o na kpi la niŋ amɛŋa.
33† Ka Pailet kpɛn' zakin la ya'as ka bu'os Yesu ye, “Fʋnɛ an Jew dim na'ab laa?”
34 Ka Yesu lɛbis o ye, “Bu'oskaŋa yinɛ fʋ mɛŋ san'an na bɛɛ sieba yɛli fʋ m yɛla?”
35 Ka Pailet lɛbisi bu'os o ye, “M anɛ Jew nida? Fʋ mɛŋ buudi nɛ ba maanmaan kpɛɛmnamɛ gban'e fʋ tisim. Bɔ ka fʋ maalɛ?”
36 Ka Yesu lɛbis o ye, “M na'am ka' dunia nwa' dinnɛ. Li ya'a aannɛ ala m tʋmtʋmnib naanɛ zanbin nɛ Jew dim la ka ba kʋ gban'e ma.”
37 Ka Pailet bu'os o ye, “Alaa fʋ anɛ na'aba?” Ka Yesu lɛbis ye, “Fʋnɛ yɛl ye, m anɛ na'ab. Nɛ'ɛŋa zug ka m kɛn dunia nwa' ni na ka ba du'am ye m pa'al yɛlsida la. Onɛ mɛkama an yɛlsida sɔb wʋmmi m kʋkɔr.”
38 Ka Pailet bu'os o ye, “Yɛlsida an bɔ?”
Pailet kʋʋs Yesu ye o kpi
(Mat 27:15-31; Mak 15:6-20; Luk 23:13-25)
Ka Pailet yɛl ala naae la, o lɛn yii keŋ Jew dim la san'an yɛli ba ye, “M pʋ nyɛ dau nwa' taalɛ.
39† Ya mɔr malʋŋ ka yʋʋm-yʋʋm Kum Maliak Gaadʋg la saŋa ka li an ye m yis sanrega nid yinne tisi ya. Ya bɔɔd ye m yis Jew dim na'ab laa?”
40 Ka ba tansid nɛ kʋkɔtita'ar ye, “Ka' onɛ. Ti bɔɔdnɛ Barabbas.” Barabbas da anɛ na'ayiig kanɛ faand.
Ba kʋʋs ye ba kpan'am Yesu
19 Ka Pailet kɛ ka ba fieb Yesu.
2† Ka soogianam zaŋ gɔn'ɔsi ʋg na'am zupibigi pid o ka yɛɛl o fuzɛn'ug, 3 ka kɛɛn o san'an na yɛl o ye, “Naa, Jew dim na'aba,” ka nwɛ' o tampiank.
4 Ka Pailet lɛn yi nidibin la na ya'asi yɛli ba ye, “Gɔsimi ya, m na mɔr o kɛɛn ya san'an na ka ya baŋ ye m pʋ nyɛ taal o san'anɛ.”
5 Ka Yesu pid gɔn'ɔs zupibig ka yɛ fuzɛn'ugʋ yina. Ka Pailet yɛli ba ye, “Dau la nwa'.”
6† Ka maanmaannib kpɛɛmnam nɛ ba tʋmtʋmnib la nyɛɛ o la, ba tans
ye, “Kpa'ami nɛ o dapuudir zugʋ kʋ. Kpa'ami nɛ o.”
Ka Pailet yɛli ba ye, “Ya mɛŋ zaŋim o kpa', bɔzugɔ mam pʋ nyɛɛ o
taalɛ.”
† 18:39 Mat 27:15; Mak 15:6 † 19:2 Mat 27:28-29; Mak 15:17-18 † 19:6 Mat 27:22; Mak 15:12-13; Luk 23:20-23
JOON 19
7 Ka Jew dim la yɛl o ye, “Ti mɔr wada, ka li pa'al ye, li nar ka o kpi,
bɔzugɔ o maal o mɛŋ ye o anɛ Wina'am Biig.”
8 Ka Pailet n wʋm pian'abama la, ka dabiem maligim kpɛn' o.
9† Ka o lɛm kpɛn' zakin la ya'as ka bu'os Yesu ye, “Fʋ yi yaa ni na?” Ka Yesu pʋ lɛbis oo.
10 Ka Pailet bu'os o ye, “Fʋ kʋ lɛbisi maa? Fʋ zi' ye m mɔr paŋ kanɛ na basif, bɛɛ kpa'af dapuudir zugɔɔ?”
11 Ka Yesu lɛbis o ye, “Wina'am ya'a pʋ tisi nɛf paŋa fʋ naan kʋ nyɛɛn paŋi nyaŋini ma. Dinzug onɛ mɔrim na niŋi fʋ nu'usin la, tʋm tʋʋmbɛ'ɛdi gaad fʋ.”
12 Pian'akaŋa yɛla ka Pailet ieed suor ye o bas o, amaa Jew dim da tansidi yɛt ye, “Fʋ ya'a bas dau kaŋa, fʋ ka' Room na'ab Siiza zuaa. Bɔzugɔ on mɛkama nɔk o mɛŋi maal na'ab bɔɔd ye o zab nɛ Siiza.”
13 Ka Pailet n wʋm pian'abama la, o mɔr Yesu n yina ka zin'in sariakadib gbauŋ la zug linɛ bɛ zin'ikan ka Jew dim buon ye Gabbata la, ka li gbin an kuglamma la.
14† Daakan, ka ba ti'ebid Kum Maliak Gaadʋg daar la ka li an nintaŋ tisʋʋs.
Ka Pailet yɛl Jew dim la ye, “Ya na'ab la nwa'.” 15 Ka ba tansidi yɛt ye, “Mɔr o keŋ kpa' o.”
Ka Pailet bu'osi ba ye, “M kpa'ami ya na'ab laa?”
Ka maanmaannib kpɛɛmnam la lɛbis ye, “Ti pʋ mɔr na'aba, asɛɛ Siiza.” 16 Ka o yʋ'ʋn kɛɛs o tisi ba ye ba kpa' o dapuudir zugʋ kʋ.
Ban kpa' Yesu dapuudir zug la yɛla
(Mat 27:32-44; Mak 15:26-43)
17 Ka ba mɔr Yesu yi teŋin la ka kɛ ka o ziid o mɛŋ dapuudiri keŋ zin'ikan ka Jew dim buon ye Golgota la, ka li gbin an ye zunwana zin'ig. 18 Ka ba kpa' o tabil dapuudir zug. Ka mɛ kpa' nidib ayi' tabil dapuuda zug, ka yinne bɛɛ o dagɔbʋg ka yinne bɛɛ o datiuŋ. Ka Yesu bɛɛ ba sʋʋgin.
19† Ka Pailet sɔb o yɛlaa tabil dapuudir la zug ka sɔbir la yɛl ye,
“Yesu onɛ yi Nazaret,ka an Jew dim na'ab la.”
20 Zin'ikanɛ ka ba da kpa' Yesu la da kpi'enɛ tempʋʋgin la ka Jew dim bɛdegʋ karim sɔb la. Ka sɔb la da sɔb nɛ Jew dim pian'ad nɛ Room dim
pian'ad nɛ Girik dim pian'ad.
21 Ka Jew dim maanmaannib kpɛɛmnam yɛl Pailet ye o da sɔb ye, “Dau kaŋa anɛ Jew dim na'aba, amaa ye o sɔm ye, dau kaŋa yɛl ye, o anɛ Jew dim na'ab.”
22 Ka Pailet lɛbis ye, “Mam sɔb si'em la linɛ kpɛm bɛ.”
23 Ka soogianam la kpa' Yesu naae la, ba zaŋ o fuudi pʋdigi li zin'is anaasi tis taaba. Amaa fukanɛ ka o daa yɛ pʋʋgin la daa anɛ mummi ka ba sɛɛn li zuginɛ sig teŋir.
24 Ka ba yɛl taaba ye, “Da kɛ ka ti aaɛn lii, kɛlli ka ti bʋgʋlʋm gɔs onɛ
na di.”
Nɛ'ɛŋa da niŋnɛ ala ye Wina'am gbauŋ la sɔb si'em la niŋ amɛŋa ye,
“Ba pʋdigim fuudi tis taaba ka maal bʋgʋlʋm-bʋgʋlʋm m fuug la yɛla.” Soogianam la niŋ si'em la.
25† Ka Yesu ma nɛ o mapit, nɛ Kleopas pu'a nɛ Mɛɛri Magdalen, zi'e kpi'e apuudir la.
26 Ka Yesu nyɛɛ o ma nɛ o nya'andɔl kanɛ ka o nɔŋ la ka ba zi'e kpi'e o la, o yɛl o ma la ye, “M ma, fʋ biigi nwa'.”
27 Ka mɛ yɛl o nya'andɔl la ye, “Fʋ maa nwa'.” Ka lin yi saŋkan la nya'andɔl la dɔl Yesu ma la kul o yin.
Yesu kum la yɛla
(Mat 27:45-56; Mak 15:33-41; Luk 23:44-49)
28 Ka Yesu yʋ'ʋn baŋ ye si'el wʋsa naae ya la ka yɛl ye, “Ku'onuudi mɔrim.” O yɛl ala ye Wina'am gbauŋʋ sɔb si'em la niŋ amɛŋa.
29 Ka nwam zi'e nɛ danmi'isʋg. Ka ba zaŋ sʋʋsʋ lɔs danmi'isʋgʋn la lɔ kikan'arini niŋ o nɔɔrin.
30 Ka on nu danmi'isʋg la ka ye, “Li naae ya,” ka su'un o zug ka kpi.
31 Li da anɛ Vʋ'ʋsʋm Daar ti'ebʋg, ka bɛog kanɛ nied la an dabistita'ar, linzug ka Jew dim la pʋ bɔɔd ye niŋgbina la kpɛm bɛ dapuuda zugʋ li daarɛ, ka ba sɔs Pailet ye o kɛ ka ba kɔɔ ba nɔba, ka sigisi ba dapuuda la ni.
32 Ka soogianam keŋ kɔ' yiiga daan la nɔba, nɛ o tiraan onɛ ka ba daa la'am kpa' kpi'el Yesu la nɔba.
33 Ka ban kɛn Yesu san'an na nyɛ ka o kpi la, ba pʋ kɔɔ o nɔbaa.
34 Ka soogia yinne zaŋ kpan nɛ kʋns o lʋgir ka ziim nɛ ku'om kpɛn yina.
35 Dau onɛ nyɛɛ li la dii li kasɛt, ka on tis kasɛt si'a la an sida. O mɛŋ mi' ye o pian'adnɛ sida ye ya mɛ siaki li.
36 Ka nɛ'ɛŋa da niŋnɛ ye Wina'am gbauŋ la sɔb si'em la lieb amɛŋa ye, “Baa o kɔnbir yinne, kʋ kɔ'ɔgɛ.”
37† Ka Wina'am gbauŋ lɛn sɔb zin'isi'a ya'as ye, “Ba na gɔs onɛ ka ba kʋns la.”
Ban mum Yesu la yɛla
(Mat 27:57-61; Mak 15:42-47; Luk 23:50-56)
38 Nɛ'ɛŋa nya'aŋ ka Josef onɛ yi Arimatea teŋin ka an Yesu nya'andɔl la keŋ sɔs Pailet ye o zaŋim Yesu niŋgbiŋ la tis o. Josef da anɛ Yesu nya'andɔl amaa on da zɔt Jew dim la zug ka o pʋ nɛɛl o mɛŋa. Ka Pailet siak ka o zaŋ niŋgbiŋ la keŋ.
39 Ka Nikodemus, onɛ da keŋ Yesu san'an yʋ'ʋŋ la, mɛ dɔl Josef ka mɔr bʋnnyubisa linɛ buon mir nɛ aloes ka ba gɛndig taaba, ka li zu'oe bɛdegʋ.
40† Ka ba zaŋ Yesu niŋgbiŋ la bɔbig nɛ fuud nɛ bʋnnyubisa la, wʋʋ Jew dim kum malʋŋʋ an si'em la.
41 Ka lɔmbɔn'ɔg bɛ zin'ikanɛ ka ba kpa' o la baba, ka Jew dim yaʋg bɛɛ li pʋʋgin, ka ba nam pʋ mum sɔ' li nii. 42 Ka dabisir la sadigim an Vʋ'ʋsʋm Daar ti'ebʋg ka yaʋg la mɛ pʋ lal la, ka ba mum Yesu anina.
JOON 20
Yesu ka' yaʋgʋn la
(Mat 28:1-8; Mak 16:1-8; Luk 24:1-12)
20
Ka Alasid daar ka Mɛɛri Magdalen isigi keŋ yaʋgʋn la, ka li nam pʋ nie naae, ka o nyɛ ka kugir linɛ ligil yaʋg la bilig.
2 Ka o zɔɔ keŋ Simon Pita nɛ nya'andɔl onɛ ka Yesu nɔŋ la san'an, ka yɛli ba ye, “Ba yis Zugsɔb la yaʋgʋn la ka ti zi' ban niŋ o si'ela.”
3 Ka Pita nɛ nya'andɔl yinne la zɔɔ keŋ yaʋgʋn la,
4† ka yinne la zɔɔ gaad Pita paae yaʋgʋn la yiiga,
5 ka kunnɛ gɔs ka nyɛ fuud la, ka lɛɛ pʋ kpɛn' anii.
6 Ka Simon Pita paae kpɛm kpɛn', ka nyɛ fuud la digi,
7 nɛ pien linɛ ka ba vilig o zug la ka li pʋ bɛ nɛ fuud la, amaa li mɛŋi kpilim ken dig zin'isi'a sa.
8 Ka nya'andɔl onɛ paae yiiga la mɛ kpɛn' yaʋgʋn la nyɛɛ li ka siak sida.
9 Linɛ sɔb Wina'am gbauŋʋn ye, asɛɛ ka o vʋ'ʋg kumin la, ba da nam pʋ gban'e li gbinnɛ.
10 Ka nya'andɔlib la lɛbi kuli ba yaan.
Yesu nie o mɛŋ Mɛɛri Magdalen san'an
(Mat 28:9-10; Mak 16:9-11)
11 Ka Mɛɛri zi'e yaʋg la yiŋi kum, ka sʋ'ʋnnɛ gɔs yaʋg la pʋʋgin,
12 ka nyɛ maliaknam ayi' ka ba yɛ fupiela zin' zin'ikanɛ ka Yesu daa bɛ la. Ka yinne bɛ zug baba ka yinne mɛ bɛ nɔba baba.
13 Ka ba bu'os o ye, “Pu'aa, bɔ ka fʋ kaasida?” Ka o lɛbisi ba ye, “Ba nɔki m Zugsɔb la ka m zi' ban niŋ o si'ela.”
14 On pian' nɛ'ɛŋa la ka gi'e nyɛ Yesu ka o zi'e ka o lɛɛ pʋ baŋ ye li anɛ onɛ.
15 Ka Yesu bu'os o ye, “Pu'aa, bɔ ka fʋ kaasida? Ka anɔ'ɔn ka fʋ ieeda?” Ka o tɛn'ɛs ye o anɛ onɛ gur lɔmbɔn'ɔg la ka yɛl o ye, “M diemaa, li ya'a anɛ fʋnɛ zaŋ o niŋgbiŋ la, fʋn yɛlim fʋn niŋ li si'el, ka m keŋ nɔki li.”
16 Ka Yesu buol o ye, “Mɛɛri.” Ka o gi'e gɔs o ka pian' o nɛ Jew dim pian'ad ye, “Rabboni!” Li gbin anɛ ye, “Pa'anna.”
17 Ka Yesu yɛl o ye, “Da si'isi ma; ka m nam pʋ dʋʋ m Ba' la san'anɛ. Amaa kemi m ba'abiis la san'anɛ yɛli ba ye, m dʋtnɛ onɛ aan m Ba' nɛ ya Ba' ka aan m Wina'am nɛ ya Wina'am la san'an.”
18† Linzug ka Mɛɛri Magdalen keŋ yɛl Yesu nya'andɔlib la ye, “M nyɛ Zugsɔb la.” Ka yɛli ba linɛ wʋsa ka Yesu yɛl o la.
Yesu nie o mɛŋi pa'al o nya'andɔlib
(Mat 28:16-20; Mak 16:14-18; Luk 24:36-49)
19 Ka daakan yʋ'ʋŋ sisɔbir, linɛ an Alasid daar, ka Yesu nya'andɔlib la la'as taaba dɔɔgin, ka kpar za'anɔya, bɔzugɔ ba da zɔtnɛ Jew dim la dabiem. Ka Yesu kena zi'e ba sʋʋgin, ka yɛli ba ye, “Sumalisim na bɛ nɛ ya.”
20† Ka on daa yɛli ba wala la, ka pa'ali ba o nu'us nɛ o lʋgir. Ka nya'andɔlib la mɔr sumalisim ban nyɛ Zugsɔb la zug.
21 Ka Yesu lɛn yɛli ba ya'as ye, “Sumalisim na bɛ nɛ ya! Nwɛnɛ m Ba' tʋm man si'em la, ala mɛn ka mam mɛ tʋmmi ya.”
22 Ka on yɛl ala naae la, ka vʋ'ʋsi niŋi ba ni, ka yɛli ba ye, “Di'emi Wina'am Siig Kasi.
23 Ninkanɛ wʋsa ka ya niŋ suguru nɛ o ka yis o tʋʋmbɛ'ɛdi bas la, Wina'am mɛ na yisi li bas. Ka niŋkan wʋsa ka ya pʋ niŋ o suguru ka yis o tʋʋmbɛ'ɛdi basɛ, Wina'am mɛ kʋ yis o tʋʋmbɛ'ɛdi basɛ.”
Yesu nɛ Tomas la yɛla
24 Ka Tomas onɛ ka ba buon Liibir ka an Yesu nya'andɔlib pii nɛ ayi' la nid yinne la da ka' ba san'an Yesu da kena laa.
25 Ka nya'andɔlib la sieba yɛl o ye, “Ti nyɛ Zugsɔb la.” Ka o yɛli ba ye, “M ya'a pʋ nyɛ ban kpa' o nu'ug la isa ka si'isi li nɛ m nu'ubil, ka si'is o lʋgirɛ, mam kʋ siakɛ.”
26 Ka daba anii lɛm paae, ka nya'andɔlib la la'as dɔɔgin ya'as, ka Tomas bɛ nɛ ba. Ka la'an nɛ ban kpar za'anɔya la Yesu kena zi'eni ba sʋʋgin, ka yɛli ba ye, “Sumalisim bɛ nɛ ya.”
27 Ka o yɛl Tomas ye, “Zaŋimi fʋ nu'ubili si'isi m nu'us, ka zaŋi fʋ nu'ugʋ si'isi m lʋgir. Da bi'esida amaa niŋim yadda.”
28 Ka Tomas lɛbisi yɛl o ye, “Fʋ anɛ m Zugsɔb nɛ m Wina'am.”
29 Ka Yesu bu'os o ye, “Fʋn nyɛ man la zug ka fʋ niŋ yaddaa? Albareka
bɛ nɛ banɛ pʋ nyɛɛ, amaa ka lɛɛ niŋ yadda la.”
Linɛ yɛla ka ba sɔb gbauŋ kaŋa nwa'
30 Yesu da tʋm tʋʋmnyalima sieba bɛdegʋ o nya'andɔlib la nini ni. Ka tʋʋmnyalima ban pʋ sɔb gbauŋ kaŋa nii.
31 Ka m sɔb nɛ'ɛnam ye ya siak ye Yesu an Kristo la, onɛ an Wina'am Biig la, ka ya ya'a niŋ o yadda, ya na nyɛ nyɔvʋr o yʋ'ʋr zug.
JOON 21
Yesu nie o mɛŋi pa'al o nya'andɔlib ayɔpɔi
21
Lin nya'aŋ ka Yesu nie o mɛŋ ya'asi pa'al o nya'andɔlib la Tiberias bɛuŋ baba, ka lin niŋ si'em anɛ anwa.
2 Simon Pita nɛ Tomas onɛ ka ba buon Liibir la nɛ Nataniel, onɛ yi Kana linɛ bɛ Galile sʋ'ʋlim la, nɛ Zebedee biis, nɛ Yesu nya'andɔl sieba ayi' da la'am bɛ nɛ taaba.
3 Ka Simon Pita yɛli ba ye, “M wa'anɛ ye m gban'e zimi.” Ka ba lɛbis ye, “Ti mɛ na keŋ.” Ka ba keŋ kpɛn' anrʋŋ, ka yʋ'ʋŋ kan wʋsa ba pʋ gban'e si'el si'ela.
4 Ka bɛogʋ yiligid la, ka Yesu zi'e bɛuŋ gbɛog, amaa o nya'andɔlib la pʋ baŋ ye li anɛ onɛ.
5 Ka Yesu bu'osi ba ye, “M biisɛ, ya mɔr zimii?” Ka ba lɛbis o ye, “Ayei.”
6 Ka o yɛli ba ye, “Lɔmminɛ ya sau la anrʋŋ la datiuŋ baba ka ya na gban'e.” Ka ba lɔbi li ka zimi pɛ'ɛli galis ka ba mak ye ba tɛɛgi niŋ anrʋŋʋn la gʋ'ʋŋ.
7 Ka nya'andɔl onɛ ka Yesu nɔŋ la yɛl Pita ye, “Li anɛ Zugsɔb la.” Pita daa yɛɛgnɛ o fuugʋ digil ka tʋm o tʋʋma; ka on wʋm ye li anɛ Zugsɔb la, o zaŋ o fuug tɔ'ɔtɔ yɛ ka ianki li ku'omin la keŋ Yesu san'an.
8 Anrʋŋ la da pʋ lal nɛ bɛuŋ la gbɛogɔ; li da nwɛnɛ nɔba yakir kɔbisyi'. O nya'andɔl taaba la bɛnɛ anrʋŋʋn la vɛ'ɛd sau kanɛ ka zimi pɛ'ɛl la.
9 Ka ban dʋ gbɛog la ba yi anrʋŋʋn la na ka nyɛ ka bugumsaana dit, ka zimi pa'ae ka bodobodo mɛ bɛ.
10 Ka Yesu yɛli ba ye, “Mɔri zimbanɛ ka ya gban'e la sieba na.”
11 Ka Simon Pita kpɛn' anrʋŋʋn la vɛ'ɛg sau la dʋ'ʋs gbɛog. Ka zimbɛda pɛ'ɛli li, ka ba kal an kɔbiga nɛ pisnu nɛ atan'. La'an nɛ ban zu'oe la sau la pʋ aaɛn.
12 Ka Yesu yɛli ba ye, “Kemi na di.” Ka nya'andɔlib la sɔ'ɔsɔ pʋ mɔr sʋnkpi'euŋʋ na bu'os o ye, “Fʋ aan anɔ'ɔnɛ?” Bɔzugɔ ba baŋ ye onɛ an Zugsɔb la.
13 Ka Yesu zaŋ bodobodo nɛ zimi la tisi ba, ka ba ɔnb.
14 Nɛ'ɛŋa da an nɔɔra atan' daan ka Yesu nie o mɛŋi pa'al o nya'andɔlib la on da vʋ'ʋg kumin la.
Yesu sɔnsid nɛ Pita la yɛla
15 Ka ban dii naae la, ka Yesu bu'os Simon Pita ye, “Simon, Joon biiga, fʋ sid nɔŋ mam gat bamaa?” Ka o lɛbis o ye, “Ɛɛn, m Zugsɔba, fʋ pʋn mi' ye m nɔŋif.” Ka Yesu yɛl o ye, “Guri m pɛbibis la.”
16 Ka Yesu lɛm bu'os o nɔɔr ayi' daan ye, “Simon, Joon biiga, fʋ nɔŋi maa?” Ka o lɛbis o ye, “Ɛɛn, m Zugsɔba fʋ mi' ye m nɔŋif.” Ka o yɛl o ye, “Gurim pɛ'ɛs la.”
17 Ka Yesu lɛm bu'os o nɔɔr atan' daan ya'as ye, “Simon, Joon biiga, fʋ
nɔŋi maa?” Ka Pita sʋnf san'am, on bu'os o nɔɔr atan' daan ye, “Fʋ nɔŋi maa la?” Ka o lɛbis ye, “M Zugsɔba, fʋ mi' si'el wʋsa, ka mi' ye m nɔŋif.” Ka Yesu yɛl o ye, “Guri m pɛ'ɛs la.”
18 Ka Yesu lɛn yɛl o ye, “Asida ka m yɛtif ye, fʋn da an dasaŋ la, fʋ da lɔɔd viligi ken fʋn bɔɔd si'el, ka fʋ ya'a ti lieb bʋnkʋdʋg, fʋ na tiɛn fʋ
nu'us ka sɔ' na lɔɔ fʋ vilig ka mɔri fʋ keŋ zin'ikanɛ ka fʋ pʋ bɔɔda.”
19 Yesu yɛl nɛ'ɛŋa nɛ ye o pa'al kum kanɛ buudi ka Pita na kpi, ka li an zun'ori tis Wina'am. Ka nɛ'ɛŋa nwa' nya'aŋ ka Yesu yɛl o ye, “Dɔl man.”
Nya'andɔl kanɛ ka Yesu nɔŋ la yɛla
20 Ka Pita gi'e ka nyɛ ka nya'andɔl kanɛ ka Yesu nɔŋ la dɔlli ba nya'aŋ, (Ban daa dit la, onɛ daa zin' kpi'e nɛ Yesu ka gbɛligi bu'os o ye, “M Zugsɔba, anɔ'ɔnɛ ye o zamif la?”)
21 Ka Pita nyɛɛ o la ka bu'os Yesu ye, “Ka dau kaŋa mɛnɛ?”
22 Ka Yesu lɛbis o ye, “Li ya'a anɛ m bɔɔdim ye o kpɛm bɛ ka m ti lɛb na, fʋ ba'a bɔɔ bɛɛ li ni? Fʋn ya'a dɔl man.”
23 Ka pian'ad la yadigi paae yadda niŋidib la ye nya'andɔl kan la kʋ kpii, amaa Yesu mɛŋ pʋ yɛl ye o kʋ kpii, ka lɛɛ ye, “Li ya'a anɛ m bɔɔdim ye o kpɛm bɛ ka m ti lɛb na, fʋ ba'a bɔɔ bɛɛ li ni?”
24 Nya'andɔl kaŋa di kasɛt yɛlbama nwa' yɛla, ka sɔbi li. Ka ti baŋ ye o kasɛt la anɛ yɛlsida.
Li naari nwa'
25 Si'elnam bɛdegʋ bɛ ka Yesu da maal. Ka ba ya'a ye ba sɔbini li wʋsa gbana ni, m tɛn'ɛs ka ti kʋ nyɛɛn dɔɔd dunia nwa' ni digilinɛ lii.
TƲƲMA 22
22
“M saamnam nɛ m ba'abiisɛ, kɛlisimi ka m yisi m nɔɔri ya tuon.”
2 Ban wʋm ka o pian'adi tisidi ba nɛ Hibiru pian'ad la ka ba sin baanlimm, ka o ye,
3 “Mam anɛ Jew nid ka ba du'am Tarsus linɛ bɛ Silisia teŋgbauŋʋn la. Amaa ba ugus man nɛ teŋ kaŋa ni. Ka Gamaliel zamisim
ka m zamisi ti yaanam wada la sʋ'ʋŋa. M sʋnf lɔnɛ Wina'am yɛla sʋ'ʋŋa nwɛnɛ yanamɛ niŋid si'em zina la.
4 M da namis banɛ dɔl suokaŋa hali kʋʋdi ba, ka gban'ad dap nɛ pu'abi kpɛn'ɛsidi ba sanrega ni.
5 Wina'am maanmaan kpɛɛm nɛ kpɛɛmnam wʋsa na nyaŋi di man kasɛt ye m pian'ad la anɛ sida. M da di'e gbana ba san'anɛ tis Jew dim banɛ bɛ Damaskus, ka wa'ae anina ye m gban'e suokaŋa nya'andɔlib banɛ bɛ anina lɔɔ ba nɛ bana mɔri ba lɛb Jerusalem na namisi ba.”
Paul tu'as o tiakir la yɛla
(Tʋm 9:1-19; 26:12-18)
6 “Man da kennɛ paad Damaskus nintaŋ tisʋʋs saŋa la, ka nɛɛsim tita'ar yi saazug na nie nyain giligim.
7 Ka m li teŋin ka wʋm ka kʋkɔr buolim ye, ‘Saul, Saul, bɔ ka fʋ namisidi ma?’”
8 Ka m bu'os o ye, “Naa, fʋ aan anɔ'ɔnɛ m Zugsɔba?” Ka o lɛbis ye, “M anɛ Yesu, onɛ an Nazaret nid onɛ ka fʋ namisid la.”
9 Ka nimbanɛ daa bɛɛ m san'an la nyɛ nɛɛsim la, amaa ka pʋ gban'e kʋkɔr kanɛ pian'ad la gbinnɛ.
10 Ka m bu'os ye, “Zugsɔba, m na niŋ wala?” Ka m Zugsɔb la yɛlim ye, “Duom kpɛn' Damaskus, ka anina ka ba na yɛlif linɛ wʋsa ka Wina'am zi'eli tisif ye fʋ tʋm.”
11 Ka m pʋ nyɛta, nɛɛsim la kɛ ka m zu'om la zug. Ka banɛ dɔllim la vɛ'ɛm, ka ti keŋ kpɛn' Damaskus.
12 “Dau da bɛ anina, ka o yʋ'ʋr buon Ananias. O da anɛ onɛ dɔlisidi ti wada la ka Jew dim banɛ bɛ Damaskus wʋsa pian'ad o yɛla sʋ'ʋŋa.
13 Ka o kɛɛn m san'an na ka yɛl ye, ‘M ba'abiig Saul, lakim.’ Saŋkan yim ka m nini lak ka m nyɛt.
14 Ka o yɛlim ye, ‘Wina'am onɛ ka ti yaanam da pʋ'ʋsid la gaŋif ye fʋ baŋ o bɔɔdim ka nyɛ on an pʋpielim sɔb si'em, ka wʋm ka o pian'ad nɛ o mɛŋ kʋkɔr.
15 Fʋ na yɛl nidib wʋsa fʋn nyɛ ka wʋm si'el la.
16 Fʋ gur bɔ? Duom ka di'e Wina'am Ku'om sʋʋb, ka buol Yesu yʋ'ʋr ka o pie fʋ tʋʋmbɛ'ɛdi bas.’”
17–18 “Man lɛb Jerusalem la ka bɛ Wina'am Pʋ'ʋsim Yinnɛ pʋ'ʋsid. Ka Zugsɔb la nie o mɛŋi m san'an na nwɛnɛ zaansʋŋ nɛ, ka yɛlim ye, ‘Niŋim tɔ'ɔtɔ ka yi Jerusalem; ka nimbanɛ bɛ kpɛla nwa' kʋ siak labaar kanɛ ka fʋ ye fʋ mɔɔl man yɛla la.’
19 “Ka m lɛbis ye, ‘M Zugsɔba, nimbama mi' sʋ'ʋŋa ye m daa ken la'asʋg dɔɔdin wʋsa gban'ad banɛ niŋif yadda la bʋ'ʋdi ba ka kpɛn'ɛsidi ba sanrega
ni.
20 Saŋkan ka ba da kʋ Sitivin onɛ tu'asid nidibi fʋ yɛla la, m da bɛɛ anina ka tɛn'ɛsid ye ban niŋid si'el la anɛ sʋm, ka gur banɛ kʋʋ o la fuud.’
21 “Ka Zugsɔb yɛlim ye, ‘Kem, ka m ye m tʋmif nɛ banɛ ka' Jew dim ka bɛ lalli la san'an.’”
Nidibi bɔɔd ye ba kʋ Paul la
22 Ka nidib la kɛlis Paul hali ka o ti pian' nɛ'ɛŋa, ka ba pin'ili tansid ye, “Kʋʋminɛ o ka o pʋ nar ye o bɛ dunia nii.”
23 Ka ba tansid ka mɔri ba fuudi yuulim agɔla ka gbɛn'ɛsid titani yaaridi agɔla.
24 Ka soogia kpɛɛm la tis soogianam la nɔɔr ye ba nɔkim Paul n kpɛn'ɛsi ba yin la ka fieb o ka bu'os o baŋ linɛ kɛ ka nidib la tansid o wala la.
25 Amaa ban lɔɔ o ye ba fieb o la, ka o bu'os soogia kpɛɛm onɛ zi'e anina la ye, “Suor bɛɛ ya wada ni ye ya fieb Room nid ka ba nam pʋ kad o saria?”
26 Ka soogia kpɛɛm la wʋm ala la, ka o keŋ onɛ sʋ'oe ba wʋsa la san'anɛbu'os o ye, “Bɔ ka fʋ ye fʋ maal ala? Dau nwa' anɛ Room teŋ nid.”
27 Ka soogianam la kpɛɛm keŋ Paul san'anɛ bu'os o ye, “Fʋ anɛ Room nida?”Ka o lɛbis ye, “Ɛɛn.”
28 Ka soogia kpɛɛm la yɛl ye, “Mam mɛ anɛ Room nid, amaa m daa yɔnɛ ligidi bɛdegʋ ka nyaan lieb teŋ la nid.”
29 Ka Paul ye, “Amaa ba du'a man nɛ Room teŋin ka m an Room nid.”
30 Ka banɛ pa'a ye ba fieb o la lɛb nya'aŋ tɔ'ɔtɔ. Ka soogianam kpɛɛm la zɔ dabiem, on baŋ ye Paul anɛ Room nid ka o kɛ ka ba lɔɔ o la zug.
Paul zi'e Jew dim kpɛɛmnam tuon
31 Ka bɛog nie ka kpɛɛm la bɔɔd ye o baŋ linɛ zug kimm ka Jew dim la zi'e Paul yɛla, ka o yidig Paul, ka tis nɔɔr ye Wina'am maanmaan kpɛɛmnam nɛ teŋ kpɛɛmnam wʋsa la'asim na. Ka ba la'as. Ka o mɔr o keŋ zi'eli ba tuon.
TƲƲMA 23
Ka Paul gɔsid kpɛɛmnam la kii ka yɛl ye, “M ba'abiisɛ, man pʋtɛn'ɛr anɛ nyain Wina'am san'an m biilimin sa paae zina.”
2 Ka maanmaan kpɛɛm Ananias tis nɔɔr ye banɛ zi'e kpi'e Paul la nwɛ'ɛm o nɔɔr.
3 Ka Paul yɛl o ye, “Wina'am na nwɛ'ɛf. Fʋ nwɛnɛ zaŋguom kʋdig kanɛ ka ba taae. Ka yiŋ vɛnl, ka pʋʋgin ka' sʋm la. Fʋ zin' kad man saria, wada la yɛla, amaa fʋ san'am wada la, fʋn tis nɔɔr ye ba nwɛ' man la.”
4 Ka banɛ zi'e kpi'e Paul la yɛl o ye, “Fʋ tʋ'ʋdnɛ Wina'am maanmaan kpɛɛm?”
5 Ka o lɛbis ye, “M ba'abiisɛ, m zi' ye o anɛ Wina'am maanmaan kpɛɛm. Bɔzugɔ Wina'am gbauŋʋn li sɔb ye, ‘Mid ka fʋ pɔ nɔɔri niŋ tuongat onɛ guri fʋ nidib la.’”
6 Ka Paul baŋ ye sieba an Sadusii dim, ka sieba an Farisii dim la, ka yɛl kpɛɛmnam la'asʋgʋn la ye, “M ba'abiisɛ, mam nɛ m yaanam anɛ Farisii dim. Mam mɔr ti'ir ye banɛ kpi la na lɛn vʋ'ʋg la zug ka m bɛ yɛla ni la.”
7 On yɛl nɛ'ɛŋa la ka Farisii dim nɛ Sadusii dim la pin'ili nwa'asid nɛ taaba, ka nidib la wɛlig.
8 Sadusii dim la pʋ siak ye kum vʋ'ʋgir nɛ maliaknam nɛ siis bɛɛ, amaa Farisii dim siaki li wʋsa.
9 Ka tʋkpiidʋg duoe Paul yɛla. Ka gbauŋmi'idib sieba banɛ an Farisii dim duoe nwa'as nɛ paŋ ye, “Ti pʋ nyɛ dau kaŋa nwa' tʋʋmbɛ'ɛdɛ. Daasi'erɛɛ li anɛ siig bɛɛ maliaki pian' tis o.”
10 Ka nɔŋgbannwa'ar la kena galis, ka soogia kpɛɛm la zɔ dabiem ye ba na aans Paul zɔra-zɔra, ka tis soogianam nɔɔr ye ba kem faaɛn o nidib la san'anɛ mɔr o kpɛn' soogianam yin la.
11 Yʋ'ʋŋ kan la ka Zugsɔb la kɛn Paul san'an na yɛl o ye, “Kpɛ'ɛŋimi fʋ sʋnf; ka li nar ka fʋ tu'asi m yɛla Room teŋin, wʋʋ fʋn tu'asi m yɛla
Jerusalem teŋin kpɛla si'em la.”
Paul gban'ar la yɛla
12 Ka bɛog nie ka Jew dim sieba la'as taaba pɔ nɔɔr ye ba kʋ di diib bɛɛ nu ku'om asɛɛ ban na ti kʋ Paul.
13 Banɛ da la'asi gban'e nɛ'ɛŋa la da gaad nidib pisnaasi.
14 Ka ba keŋ maanmaan kpɛɛmnam nɛ kpɛɛmnam san'anɛ yɛl ye, “Ti la'asi pɔ nɔɔr ye ti kʋ di si'ela asɛɛ tinamɛ na ti kʋ Paul.
15 Dinzug fʋn nɛ kpɛɛmnam la'asim ka tʋm soogia kpɛɛm la san'an ye o mɔr Paul n kɛɛn ya san'an na, ka niŋ nwɛnɛ ya bɔɔd ye ya wʋm o yɛla sʋ'ʋŋa; ka tinam ti'eb ye ti kʋ o hali ka o nam pʋ paae naa.”
16 Ka Paul taʋn biig wʋm ban gban'e si'em la ka keŋ soogianam yin la yɛl Paul.
17 Ka Paul buol soogia kpɛɛmnam la yinne yɛl o ye, “Dasaŋ kaŋa mɔr si'el ye o yɛli ya kpɛɛm la. Dinzugɔ dɔl o keŋ.”
18 Ka soogia kpɛɛm la mɔr biig la keŋi ba kpɛɛm la san'anɛ yɛl ye, “Paul onɛ an sanrega nid la, buolim ye m mɔr dasaŋ kaŋa kɛɛn fʋ san'an na; ka o mɔr si'el ye o yɛlif.”
19 Ka kpɛɛm la gban'e o nu'ugʋ mɔr o yi kpikpɛŋi bu'os o ye, “Fʋ mɔr bɔ ye fʋ yɛli ma?”
20 Ka o lɛbis ye, “Jew dim gban'aya ye bɛog ba na sɔsif ye fʋ mɔr Paul n kɛɛn ba kpɛɛmnam la'asʋgʋn la na. Ka niŋ nwɛnɛ ba bɔɔd ye ba wʋm o yɛla sʋ'ʋŋa.
21 Amaa da siakɛ; ka ba nidib gaad pisnaasi su'a gur Paul. Ba wʋsa pɔ nɔɔr ye ba kʋ di diib bɛɛ nu ku'om, asɛɛ ban na ti kʋ Paul. Ba ti'eb nɛ gur fʋn na lɛbis si'em.”
22 Ka kpɛɛm la yɛl dasaŋ la ye, “Da yɛl sɔ' ye fʋ yɛlɛ m si'ela.” Ka kɛ ka o keŋ.
Soogia kpɛɛm zaŋ Paul tis gɔmena Felik
23 Ka o buol o soogia kpɛɛmnama ayi' yɛli ba ye, “La'asim soogianam kɔbisyi', nɛ wiedban'adib pisyɔpɔi nɛ kpantɔɔndib kɔbisyi', ka ba ti'eb yʋ'ʋŋ kaŋa kɛrefa awai keŋ Sizerea.
24 Ka tis Paul widi ka o ban', ka mɔr o baanlimm keŋ gɔmena Felik san'an.”
25 Ka o sɔb gbauŋʋ yɛl ye,
26 Naa, gɔmena sʋŋ Felik, man Klaudius Lisias n sɔb gbauŋ kaŋa tisidif. M pʋ'ʋsidif.
27 Jew dim daa gban'e dau kaŋa nwa' ka bɔɔd ye ba kʋ o, ka mam wʋm ye o anɛ Room nid, ka keŋ nɛ soogianamɛ faaɛn o,
28 ka bɔɔd ye m baŋ lin yɛla ka ba tu'ad o yɛla bɛ'ɛd, ka mɔr o keŋi ba kpɛɛmnam la'asʋgʋn.
29 M daa nyɛ ka ba nwa'asid o yɛla ka li anɛ Jew dim wada yɛla, ka o pʋ niŋ si'el ka li nar nɛ kum bɛɛ ba yɔɔ o sanrega nii.
30 Ka ba yɛlim ye Jew dim gban'e yɛlbɛ'ɛd o yɛla la, dinzug ka m tʋm o tɔ'ɔtɔ fʋ san'an na, ka tis nɔɔr ye banɛ zi'e o yɛla la kemi fʋ san'an na yisi ba nɔɔr pian'ad.
31 Ka soogianam la niŋ wʋʋ on yɛli ba si'em la, ka mɔr Paul yʋ'ʋŋ kanɛ paae Antipatris teŋin.
32 Ka bɛog nie ka soogianam banɛ ken nɛ nɔba la lɛb Jerusalem na ka wiedban'adib la dɔl Paul n keŋ.
33 Ka ba mɔr o paae Sizerea teŋin nɔk gbauŋ la tis gɔmena ka nɔk Paul n tis o.
34 Ka o karim gbauŋ la ka bu'os on yi sʋ'ʋlim si'a na. On baŋ ye o yinɛ Silisia sʋ'ʋlimin la,
35 o yɛl o ye, “Banɛ mɔri fʋ antu'a la ya'a paae na m na kɛlisi fʋ antu'a.” Ka o tis nɔɔr ye ba kpɛn'ɛs o na'ab Herod yin ka ba gur o.
TƲƲMA 24
Jew dim antu'a nɛ Paul
24
Ka daba anu daar ka maanmaan kpɛɛm Ananias kena nɛ kpɛɛmnam sieba nɛ kpɛɛm kanɛ mi' antu'a, ka o yʋ'ʋr buon
Tertullus. Ka ba zaŋ Paul antu'a tis gɔmena la.
2 Ka ba buol Tertullus. Ka o pin'ili tu'asid Paul yɛla ye, “Naa, na'asʋŋ Felik, fʋ ya'am la tisi ti sumbʋgʋsʋm, ka tiak bʋmbɛ'ɛd bɛdegʋ ka li an sʋm.
3 Ti siak nɛ'ɛŋa zin'is wʋsa ka pʋ'ʋsidif sʋ'ʋŋa.
4 Na'aba, mam pʋ bɔɔd ye m namisif la zug ka m sɔsidif ye fʋ di suguru ka kɛlisi ti antu'a giŋ nwa' Paul yɛla.
5 “Ti nyɛ ninkaŋa ka o anɛ nimbɛ'og nɛ onɛ bɔɔd yɛla. O tugul Jew dim nidib dunia wʋsa, ka ba zab. O anɛ banɛ dɔl Nazaret nid la tuongat.
6 O zig ye o miligi ti Wina'am Pʋ'ʋsim Yir ka ti gban'e o,
7 ka gban'e ye ti kad o saria ka li dɔl nɛ tinam mɛŋ wada. Amaa ka soogia kpɛɛm Lisias kena nɛ paŋi faaɛn o ti san'an,
8 ka tis nɔɔr ye banɛ mɔr antu'a nɛ o la kemi fʋ san'an na. Fʋ ya'a bu'os o, fʋ mɛŋ na wʋm o san'an lin wʋsa ka ti pian'ad o yɛla la.”
9 Ka Jew dim mɛ paasi pian' o yɛla, ka yɛl ye, nɛ'ɛŋa wʋsa anɛ sida.
Paul tu'a yis o mɛŋ Felik tuon
10 Ka gɔmena la tis Paul suor ye o pian'am. Ka Paul yɛl ye, “M mi' ye fʋ niŋ sariakat sʋ'ʋlim kaŋa nwa' ni ka li yʋma lal. Alazug ka li niŋim malisim ye m pian' yisi m mɛŋi fʋ tuon kpɛla.
11 Li anɛ na'ana nɛ fʋn na nyaŋi baŋ ye li pʋ gaad dabis pii nɛ ayi' nwa' ka m daa keŋ Jerusalem ye m pʋ'ʋs Wina'am.
12 Ka Jew dim la pʋ nyɛ m ka m nwa'as nɛ sɔ' Wina'am Pʋ'ʋsim Yin la. Ba mɛ pʋ nyɛ ka m tugul nidib la'asʋg dɔɔdin bɛɛ zin'isi'a.
13 Ba mɛ kʋ nyaŋi nie bigisi m linɛ ka ba yɛl ye m maal yaa.
14 Amaa m siak nɛ'ɛŋa ye m dɔlnɛ suor kanɛ ka ba ye li bɛɛ li gʋnni la, m pʋ'ʋsid Wina'am onɛ ka ti yaanam da pʋ'ʋsid la. M siak linɛ wʋsa sɔb Moses wada gbauŋʋn nɛ Wina'am nɔdi'esidib gbana ni la.
15 M mɔr ti'ir Wina'am ni nwɛnɛ ban mɔr ti'ir si'em la, ye nidib wʋsa banɛ an sʋm nɛ banɛ ka' sʋm na vʋ'ʋg kumin.
16 Dinzug ka m kpɛ'ɛŋidi m mɛŋ saŋa wʋsa ye m pʋtɛn'ɛr nie Wina'am san'an nɛ nidibin.
17 “M yi Jerusalem ka li yʋma lal ka m mɔr ligidi lɛb ye m tisim mɛŋ nimbanɛ an tadimnam la, ka maal maana tis Wina'am.
18 Man daa naae pier malʋŋ la ka niŋid nɛ'ɛŋa Wina'am Pʋ'ʋsim Yin la, ka ba nyɛɛm. Nidib bɛdegʋ daa ka' anina ka daauŋ mɛ daa kae.
19 Amaa Jew dim sieba banɛ yi Asia sʋ'ʋlim daa bɛɛ anina. Ba ya'a mɔrin yɛlsi'a nɛ man, ba mɛŋ naan mɔrini m antu'a kɛɛn fʋ san'an na.
20 Nimbama ya'a daa nyɛ tʋʋmbɛ'ɛd si'a saŋkanɛ ka kpɛɛmnam la daa kati m saria la, ban yɛlimi li nannanna.
21 Li ya'a ka' yɛl yinne ma'aa ka m daa zi'enɛ ba tuon ka dʋ'ʋsi m kʋkɔri yɛli baa. M daa yɛli ba ye, ‘M zi'e ya tuon zina ka ya kati m saria ka li anɛ man niŋ yadda ye kum vʋ'ʋgir bɛ la.’”
22 Gɔmena Felik n daa mi' labasʋŋ la suor sʋ'ʋŋa la zug, o bas pian'ad la, ka yɛli ba ye, “Soogia kpɛɛm Lisias ya'a paae na, m na gban'e ya pian'ad la yɛla.”
23 Ka tis soogia kpɛɛm onɛ gur Paul la nɔɔr ye o gɔsim o, amaa ka tis o yɔlisim bi'ela, ka kɛ ka o zuanam tis o on bɔɔd si'el.
Paul zi'e Felik nɛ Drusilla tuon
24 Ka dabisa bi'ela nya'aŋ ka Felik nɛ o pu'a Drusilla onɛ an Jew nid la kena. Ka o buol Paul ka kɛ ka o pian' Yesu Kristo yadda niŋir yɛla.
25 Ka Paul pian'ad pʋpielim nɛ mɛŋ luakir nɛ sariakadib linɛ kenna la yɛla, ka dabiem gban'e Felik, ka o yɛl Paul ye, “Kem, ka m ya'a ti nyɛ saŋa m na buolif.”
26 O mɛ daa mɔri ti'ir ye Paul na da' o nɛ ligidi dinzug, o daa tʋmnɛ buon o tu'ombi'el-tu'ombi'el ye o sɔns nɛ o.
27 Ka yʋma ayi' gaad ka Porsius Festus yʋ'ʋn di'e Felik zin'ig. Ka Felik bɔɔd ye o maal linɛ na malis Jew dim la zug, o kɛ ka Paul kpɛm bɛ sanrega ni.
TƲƲMA 25
Paul sɔs ye o keŋ Room na'atita'ar kɔɔtʋ ni
25
Ka Festus paae teŋ kanɛ ka o sʋ'oe la ni ka zin' anina daba atan', ka naam Sizerea teŋin keŋ Jerusalem.
2 Anina ka maanmaan kpɛɛmnam nɛ Jew dim tuongatib mɔr Paul na tis Festus,
3 ka sɔs o ye o sʋŋi ba yis Paul n lɛbis Jerusalem, ka ba gban'e ye ba su'a kʋ o suorin.
4 Ka Festus lɛbis ye, “Paul bɛ sanrega ni Sizerea teŋin. Mam mɛŋ na lɛb anina daba ayi' nwa'.
5 O ya'a tʋm tʋʋmbɛ'ɛd si'a, yanam kɛl ka ya tuongatib dɔlli mɛ keŋ Sizerea ka ba pian' li yɛla.”
6 Ka Festus zin'in nɛ ba ka li pʋ gaad dabisa piigaa, ka naan keŋ Sizerea teŋin. Ka bɛog nie ka o kpɛn' kɔɔtʋ ni zin'in, ka tis nɔɔr ye ba mɔr Paul na.
7 Ka Paul kpɛn' na ka Jew dim banɛ yi Jerusalem duoe zi'eni gilig o, ka pian' ye o tʋm taal bɛdegʋ, taal banɛ ka ba kʋ nyaŋi nie li gbin nyainnɛ.
8 Ka Paul tu'a ye o yis o mɛŋ ka yɛl ye, “M pʋ niŋ si'el ka li an bɛ'ɛd Jew dim wada ni bɛɛ Wina'am Pʋ'ʋsim Yir bɛɛ pɔ'ɔg Room na'atita'ar Siiza.”
9 Ka Festus bɔɔd ye o niŋ linɛ na malis Jew dim la zug, o bu'os Paul ye, “Fʋ siak ye fʋ na keŋ Jerusalem ka m kadi fʋ saria nɛ antu'a bama yɛlaa?”
10 Amaa ka Paul lɛbis ye, “M bɛ nɛ Room na'atita'ar Siiza mɛŋ kɔɔtʋ ni; anina nar nɛ ban na kadi m saria. Fʋ mɛŋ mi' sʋ'ʋŋa ye m pʋ tʋm bɛ'ɛdi tis Jew dima.
11 Ka m ya'a san'amin wada ka niŋin si'el linɛ ka m narin nɛ kum, m naan kʋ zan'asinɛɛ. Amaa m antu'a linɛ ka ba mɔr na ye ba pian' la ya'a ka' sidaa, sɔ' kʋ nyaŋi nɔkimi tisi baa. M bɔɔd ye ba kadi m saria Room na'atita'ar Siiza kɔɔtʋ ni.”
12 Ka Festus nɛ o sʋŋidib pian' gban'e, ka o lɛbis Paul ye, “Fʋ yɛl ye, fʋ bɔɔd ye ba kadi fʋ saria Room na'atita'ar kɔɔtʋ ni. Dinzugɔ na'atita'ar la san'an ka fʋ na keŋ.”
Paul zi'e Agrippa nɛ Benis tuon
13 Dabisa bi'ela nya'aŋ ka na'ab Agrippa nɛ o taʋn Benis kɛn Sizerea na ye ba pʋ'ʋs Festus.
14 Ka ba bɛɛ anina yuug bi'ela la, ka Festus tiɛn na'ab Agrippa Paul antu'a la yɛla ye, “Dau bɛ kpɛla, ka Felik bas o ka o kpɛm bɛ sanrega ni.
15 Ka man keŋ Jerusalem la, Jew dim maanmaan kpɛɛmnam nɛ teŋ la kpɛɛmnam mɔr o antu'a kena tiɛn m, ka sɔsi m ye, m kʋʋsim ye o tʋm tʋʋmbɛ'ɛd.
16 “Amaa ka m lɛbisi ba ye, li ka' Room dim malima ye ba kɛ ka ba mɔr ninkanɛ ka ba gban'e o la keŋ niŋ o si'el la, asɛɛ on nɛ banɛ kɛ ka ba gban'e o la kpa' taaba, ka tis o suor ka o na nyaŋi ki'is ban yɛl si'eli ziil o la.
17 Banɛ kɛ ka ba gban'e dau la kena la daa kɛn kpɛla na la, m daa pʋ kɛ ka li yuugɛ, amaa bɛogʋ nie la, ka m kpɛn' zin'in kɔɔtʋ ni, ka tis nɔɔr ka ba mɔr o kpɛn' na,
18 ka tɛn'ɛs ye ba na yɛl ye o tʋm tʋʋmbɛ'ɛd. Amaa ban duoe zi'en la ba pʋ nyaŋi yɛl on tʋm tʋʋmbɛ'ɛd si'aa.
19 Amaa ban nɛ on nwa'as taaba nɛ ba pʋ'ʋsim suor yɛla ma'aa, nɛ dau sɔ' onɛ yʋ'ʋri buon Yesu, onɛ kpi ka Paul yɛl ye o vʋ'ʋg ya la yɛla.
20 Ka m pʋ nyaŋi gban'e mam na niŋ si'em baŋ yɛl bama gbinnɛ, ka bu'os Paul ye o bɔɔd ye o keŋ Jerusalem ka m kad o saria aninaa?
21 Ka Paul yɛl ye o bɔɔd ye o kpɛlim sanrega ni, ka keŋ Room na'atita'ar Siiza kɔɔtʋ ni ka o kʋʋs o pian'ad la. Ka m tis nɔɔr ye o bɛ sanrega la ni ti paae saŋkanɛ ka m na mɔr o keŋ na'atita'ar la san'an.”
22 Ka na'ab Agrippa yɛl Festus ye, “M bɔɔd ye m mɛŋ wʋm dau kaŋa nwa' pian'ad.” Ka Festus lɛbis ye, “Bɛog ya'a nie fʋ na wʋm o pian'ad.”
23 Ka bɛog nie ka Agrippa nɛ Benis kena dʋ'ʋsid na'am bɛdegʋ, ka kpɛn' antu'a dɔɔgin nɛ soogia kpɛɛmnam nɛ teŋ la tuongatib. Ka Festus tis nɔɔr ye ba mɔr Paul na,
24 ka o yɛl ye, “Naa, na'ab Agrippa, nɛ banɛ wʋsa la'as na. Ya nyɛ dau kaŋaa, Jew dim wʋsa yɛl o yɛla Jerusalem teŋin nɛ kpɛla, ka tansid ye o pʋ nar ye o kpɛn vʋeya.
25 Amaa mam pʋ nyɛ on niŋ si'el ka li nar nɛ on na kpii. Ka o mɛŋ yɛl ye o bɔɔd ye ba ta'as o pian'ad la na'atita'ar san'an. Ka m gban'e ye m na kɛ ka o keŋ.
26 Amaa m pʋ mɔr antu'a zugʋ o yɛla na sɔbi tis na'atita'ar laa. Alazug ka m kɛ ka ba mɔr o ya san'an na, fʋn na'ab Agrippa mɛŋ-mɛŋ ya'a bu'os o bu'osa naae, m na nyɛ yɛl si'a o ni sɔb.
27 Ka m tɛn'ɛs ka li ka' sʋm tisim nɛ mam na zaŋ sanrega nidi tis na'atita'ar ka pʋ pa'al sʋ'ʋŋa ban gban'e o si'el yɛlaa.”
TƲƲMA 26
Paul tu'a yis o mɛŋ Agrippa tuon
26
Ka Agrippa yɛl Paul ye, “Suor bɛ ka fʋ yisi fʋ nɔɔr pian'ad.” Ka Paul ʋk o nu'ug, ka tu'a ye o yis o mɛŋ,
2 Ka yɛl ye, “Na'ab Agrippa, m tɛn'ɛs ka li malis man ka m na tu'a yisi m mɛŋi fʋ tuon zina nwa' nɛ lin wʋsa ka Jew dim la yɛl ye m tʋm ya ka kɛ ka ba gban'e m na la.
3 Fʋn sadigim mi' Jew dim malima nɛ ba gban'ar sʋ'ʋŋa la zug, m sɔsidif ye fʋ maal suguru ka kɛlisi m pian'ad la.
4 “Jew dim wʋsa mi' man an si'em m biilimin sa, ka mi' m bɛllim an si'em m mɛŋ teŋin nɛ Jerusalem.
5 Ba baŋ ya ka li yuug. Ba ya'a bɔɔd, ba tun'e zi'eni di kasɛt ye m anɛ Farisii dim nid yinne banɛ ti'e ba pʋ'ʋsim yɛla hali la.
6 Nannanna m zi'e sariakadib zin'igin kpɛla, mam mɔr ti'ir nɛ nɔzi'elkanɛ ka Wina'am da yɛli zi'eli ti yaanam la zug.
7 Kaanb kaŋa ka ti buudi pii na ayi' banɛ pʋ'ʋsid Wina'am nintaŋ nɛ yʋ'ʋŋ la mɔr ti'ir ye ba na nyɛɛ li. Naa, li anɛ ti'ir kaŋa zug ka Jew dim kɛ ka ba gban'am.
8 Bɔ ka li tɔi tisi ya ye Wina'am na nyaŋi vʋ'ʋg kum?
9 “Mam mɛŋ da tɛn'ɛs ye li nar ka m niŋ si'el wʋsa linɛ na san'am Yesu onɛ an Nazaret nid la yʋ'ʋr.
10 Man tʋm nɛ'ɛŋa Jerusalem teŋin. Maanmaan kpɛɛmnam da tisim paŋ ka m gban'e Wina'am nidib bɛdegʋ kpɛn'ɛs sanrega ni. Ka banɛ ka ba da kadi ba saria ye ba nar nɛ kum la, mam mɛŋ da siaki ba kʋʋb yɛla.
11 Saŋa bɛdegʋ ka m namisi ba la'asʋg dɔɔdin kpɛ'ɛŋi fɛndigi ba ka ba basi ba pʋ'ʋsim la. Ka m sʋnf da pɛlig nɛ ba hali ka m keŋ tɛɛns banɛ ka' Jew dim sʋ'ʋlim la ni, ye m namisi ba.
Paul tu'as o tiakir yɛla
(Tʋm 9:1-19; 22:6-16)
12 “Li da anɛ nɛ'ɛŋa zug ka m da di'e nɔɔr maanmaan kpɛɛmnam san'anɛ keŋ Damaskus teŋin.
13 Naa, ka m bɛ suor zug nintaŋ tisʋʋs ka nyɛ nɛɛsim ka li nie gaad nintaŋi yi saazug na giligim nɛ banɛ dɔllim la.
14 Ka ti wʋsa li teŋin ka m wʋm kʋkɔr ka li yɛlim nɛ Hibiru pian'ad ye, ‘Saul, Saul, bɔ ka fʋ namisidi ma? Li na an tɔɔgʋ tisif nwɛnɛ naafʋ na tɔn daug nɛ.’
15 “Ka m bu'os ye, ‘Naa, fʋ aan anɔ'ɔnɛ?’ “Ka Zugsɔb la yɛlim ye, ‘M anɛ Yesu onɛ ka fʋ namisid la.
16 Amaa duom zi'en ka m nie m mɛŋi fʋ san'an ka gaŋif ye fʋ liebi m tʋmtʋm. Fʋ na tu'as nidib fʋn nyɛ si'eli m san'an zina nɛ m yɛla lin ka m na ti pa'alif.
17 M na sʋŋif ka fʋ yi Jew dim nu'usin nɛ banɛ ka' Jew dim buudi la nu'usin, banɛ ka m tʋmmi fʋ ba san'an la.
18 M na laki ba pʋtɛnda, ka fɛndigi ba yis likinɛ lɛbisi ba nɛɛsimin, ka yisi ba Sʋntaana nu'usinɛ lɛbisi ba Wina'am san'an. M na kɛ ka ba niŋi m yadda ka Wina'am yisi ba tʋʋmbɛ'ɛdi bas, ka la'asi ba nɛ Wina'am nidib.’
Paul tu'as o tʋʋma yɛla
19 “Na'ab Agrippa. M nyɛ dau onɛ yi arezana ni nie si'eli pa'alim la, ka pʋ zan'as oo.
20 Ka m pin'il Damaskus nɛ Jerusalem nɛ Juda sʋ'ʋlim wʋsa nɛ buudbanɛ ka' Jew dim la san'anɛ mɔɔl ye ba fɛndigim keŋ Wina'am san'an, ka tʋm linɛ pa'al ye ba tiakya.
21 Nɛ'ɛŋa zug ka Jew dim daa gban'am Wina'am Pʋ'ʋsim Yinnɛ zigid ye ba kʋʋm.
22 Amaa m paam Wina'am sʋŋir hali ti paae zina, ala ka m zi'e kpɛla tu'asid man nyɛ si'eli tisidi ya, yanam banɛ an kpi'emnam nɛ tadimnam wʋsa. Man yɛl si'el wʋsa anɛ linɛ ka Wina'am nɔdi'esidib nɛ Moses da yɛl ye li na niŋ.
23 O da yɛl ye asɛɛ ka Kristo namis ka lieb onɛ vʋ'ʋg kumin yiiga, ka mɔɔl labasʋŋ la tis Jew dim nɛ banɛ ka' Jew dim buudi la.”
24 Paul n tu'ad ye o yis o mɛŋ nɛ'ɛŋanam ni la, ka Festus tans Paul ye, “Fʋ gɛɛmnɛ. Fʋ zamis galisʋg la kɛnɛ ka fʋ gɛɛm.”
25 Ka Paul lɛbis ye, “Naa, m pʋ gɛɛm. M pian'adi yɛlsida nɛ ya'am.
26 “Na'ab Agrippa, m na nyaŋi pian' tisif nɛ sʋnkpi'euŋ, fʋn mi' nɛ'ɛŋanam wʋsa la zug. M baŋ ye fʋ nyɛ nɛ'ɛŋanam wʋsa lin niŋ paalʋ la zug. Li pʋ niŋ likinɛ.
27 Na'ab Agrippa, fʋ siak Wina'am nɔdi'esidib la yɛlaa? M mi' ye fʋ siakya.”
28 Ka Agrippa yɛl Paul ye, “Fʋ tɛn'ɛs ye fʋ na zaŋ saŋa bi'ela kɛ ka m kilim Kristo nidaa?”
29 Ka Paul yɛl ye, “Li ya'a yuug bɛɛ li ya'a pʋ yuugɛ, m sɔsid Wina'am ye fʋn nɛ banɛ wʋsa kɛlisid man zina la na kilim wʋʋ man an si'em la. Amaa m pʋ bɔɔd ye ba lɔɔ ya nɛ bana wʋʋ ban lɔ man si'em laa.”
30 Ka gɔmena Festus nɛ na'ab la nɛ Benis nɛ nidib la wʋsa duoe
31 yi ka yɛl taaba ye, “Dau kaŋa pʋ niŋ si'el ka li nar ye o kpi bɛɛ ba kpɛn'ɛs o sanrega nii.”
32 Ka Agrippa yɛl Festus ye, “Dau kaŋa nwa' ya'a pʋ yɛlin ye o bɔɔd ye o keŋ na'atita'ar Siiza la san'anɛ, fʋ naan yisin o.”
TƲƲMA 27
Paul keŋ Room teŋin
27
Ka ba gban'e ye ti kpɛn' anrʋŋʋ keŋ teŋ kanɛ yʋ'ʋri buon Itali la, ka nɔk Paul nɛ sanrega nidib sieba niŋ soogia kpɛɛm yinne onɛ yʋ'ʋri buon Julius la nu'ugin, o da anɛ Ogestus soogianam kpɛɛm.
2 Ka ti kpɛn' anrʋŋ kanɛ yi Adramitium teŋin na ye ti keŋ Asia atɛuk gbɛog teŋ sieba ni. Ka ti kpɛn' wa'ae. Ka Aristarkus onɛ an Masedonia nid ka yi Tɛsalonika na la, dɔlli ti.
3 Ka bɛog nie ka ti paae Sidon teŋin, ka Julius maal Paul sʋ'ʋŋa bas o nɔɔr ka o keŋ o zuanam san'an ka ba tis o on bɔɔd si'el wʋsa.
4 Ka ti kpɛn' anrʋŋ anina. Ka pɛbisʋgʋ tʋ'ʋsidi ti la zug ka ti dɛn'ɛd Saipuros teŋ la ka dɔl zin'ikanɛ na lus pɛbisʋg la lɛbis.
5 Ka gaad atɛuk linɛ kpi'e Silisia nɛ Pamfilia tɛɛnsin la paae Mira teŋin linɛ bɛ Lisia sʋ'ʋlimin la.
6 Anina ka soogia kpɛɛm la nyɛ Alekzandria anrʋŋ ka li bɔɔd ye li keŋ Itali teŋin. Ka ti wʋsa kpɛn'.
7 Ka li ka' na'ana, ka ti ken ku'omin la bi'el-bi'el dabisa bi'ela paae Nidus teŋin na. Ka pɛbisʋg pʋ kɛ ka ti nyaŋi keŋ tuonnɛ, ka luaki dɛn'ɛn Salmone teŋ kanɛ bɛ Krete sʋ'ʋlimin la. Ka Krete teŋ lus pɛbisʋg la TƲƲMA 27
lɛbis.
8 Ka ti kennɛ dɛn'ɛnidi atɛuk gbɛog. Ka li mu'oe ka ti paae zin'ikanɛ buon “Zin'isʋŋ, zin'ikanɛ ka Anrima Zi'enid la.” Ka li kpi'e Lasea teŋin.
9 Ka dabisa la yuug ka li lieb yɛlli tisi ti nɛ tinamɛ na keŋ ku'omin la ka nɔlɔɔr linɛ an suguru sɔsʋg dabisir la gaad la zug, ka Paul sa'ali ba ye 10 “M baŋ ya ka ti ku'omin ken la na niŋ yɛlbɛ'ɛdi tisi ti. La'ad la bɛdegʋ na san'am, la'an nɛ anrʋŋ la mɛŋ nɛ nidib nyɔvʋya.”
11 Amaa ka soogia kpɛɛm la kɛlis anrʋŋ la sɔb pian'ad, ka pʋ kɛlis Paul n yɛl si'el laa.
12 Ka lin an pɛbisʋg saŋa la zug, ka zin'ig la ka' sʋ'ʋŋa ka anrʋŋ na zi'enɛ. Linzug ka nidib la bɛdegʋ yɛl ye, li an sʋm ka ti keŋ, ka li ya'a an si'em ti na paae Foenik teŋin zi'en zin'ikanɛ bɛ Krete sʋ'ʋlim tuon ka an anrima zi'enʋg zin'ig la.
Atɛukʋn sisi'etita'ar la yɛla
13 Ka pɛbisʋg yi dagɔbʋg na da'ad. Ka ba tɛn'ɛs ye ba nyɛ ba mɛŋ ka tɛɛg anrʋŋ la kʋnt linɛ kpɛn' teŋin la fuoe nɛ nwiig la. Ka ti kennɛ dɛn'ɛd atɛuk gbɛog Krete teŋin.
14 Ka li pʋ yuugɛ ka sisi'etita'ar yi Krete teŋin linɛ buon nya'aŋ sisi'em la
15 kena da'ae anrʋŋ la bɛdegʋ. Ka ba kʋ nyaŋi kɛ ka anrʋŋ la kpa' sisi'em la ka basi li mɔrim ka kɛ ka sisi'em la mɔr anrʋŋ la ken.
16 Ka ti paae tembil zin'ikanɛ ka ku'om gilig ka li buon Kauda la. Ka teŋ la lusi ti sisi'emin. Ka ti kpɛ'ɛŋi ti mɛŋ ka gban'e anrimbil la sʋ'ʋŋa
17 dʋ'ʋs anrʋŋ tita'ar la zugin. Ka ba nɔk nwiisi viligi lɔɔ li kiŋ-kiŋ nɛ anrʋŋ tita'ar la tisi li paŋ. Ka ti zɔ dabiem ye ti na ti paae zin'ikanɛ ka titanbin'isʋg bɛ ka ba buon ye Sirtis ka ku'om pʋ zulim la. Linzug ka ba sigis anrʋŋ la futita'ar la ka kɛ ka sisi'em la ziidi li ken.
18 Ka bɛog nie ka sisi'em la kpɛn da'ad. Ka ba pin'ili yisid la'abanɛ bɛ anrʋŋʋn la basid ku'omin.
19 Ka bɛog lɛn nie ka ba mɛŋ yis anrʋŋ la mɛŋ la'adi bas ku'omin.
20 Dabisa bɛdegʋ ka saŋgbana ligil winnig nɛ nwadbibis, ka sisi'em kpɛn da'ad nɛ paŋ. Ka ti pʋ lɛm mɔr pʋtɛn'ɛr nɛ vʋm.
21 Ka li yuug ka nidib la pʋ di diibɔ. Ka Paul zi'eni ba sʋʋgin yɛl ye, “Ya ya'a daa siakini m nɔɔr ka pʋ duon Krete teŋinɛ, ti naan yiin yɛlbama nwa' wʋsa ni.
22 Amaa m sɔsidi ya ye ya kpɛ'ɛŋi ya sʋnya. Ka hali baa yinne kʋ kpii ti sʋʋginɛ. Asɛɛ anrʋŋ la ma'aa na san'am.
23 Yʋ'ʋŋ ka Wina'am onɛ sʋ'oe man ka m pʋ'ʋsid o la maliak sa zi'enɛ m san'an ka
24 yɛlim ye, ‘Paul, da zɔt dabiem. Sida fʋ na zi'en na'atita'ar Siiza tuon, fʋ sariakadib la yɛla. Ka Wina'am na tis banɛ dɔllif la wʋsa vʋm.’
25 Dinzugɔ, kpɛ'ɛŋimi ya sʋnya; ka man niŋ Wina'am yadda ye li sid na niŋ wʋʋ maliak la yɛlim si'em la.
26 Amaa sisi'em na da'ae ti keŋ zin'ig kan ka ku'om gilig la fir.”
27 Dabisa pii nɛ anaasi la daar yʋ'ʋŋ ka sisi'em da'adi ti atɛukʋn la ken. Atɛuk la yʋ'ʋri buon Adria. Yʋ'ʋŋ tisʋʋs saŋa ka nimbanɛ tʋm anrʋŋ la tʋʋma la tɛn'ɛs ye ti tu'anɛ gbɛog
28 ka nɔk nwiig linɛ makid la mak ku'om la ka nyɛ ka ku'om la zulʋŋ an nɔba makir kɔbiga nɛ pisi. Ka li niŋ bi'ela ka ba lɛm maki gɔs, ka li an piswai.
29 Ka ba zɔ dabiem ye anrʋŋ la na tʋ'ʋs tampiins, ka sigis anrʋŋ la kʋnt linɛ kpɛn' teŋin la anaasi nɛ nwiis anrʋŋ la nya'aŋ ka sɔs Wina'am ye bɛog nie.
30 Ka nimbanɛ tʋm anrʋŋ la tʋʋma la ma' ye ba sigisidnɛ kʋnt la ku'omin anrʋŋ la tuon, ka sigis anrimbil la ku'omin kpɛ'ɛŋid ye ba yi anrʋŋʋn la.
31 Ka Paul yɛl soogia kpɛɛm nɛ soogianam la ye, “Nimbama nwa' ya'a pʋ zin'in anrʋŋʋn la, ti wʋsa kʋ nyaŋi tiligɛ.”
32 Ka soogianam la kɛnsig nwiis banɛ lɔ anrimbil la ka kɛɛ li ka li keŋ.
33 Ka bɛog bɔɔd nier, ka Paul bɛlimi ba wʋsa ye ba dim diib ka yɛl ye, “Zina dabis pii nɛ anaasi nwa' ka ya bi'esid kum nɛ vʋm ka pʋ di si'ela.
34 Dinzugɔ m bɛlimi ya nɛ ye ya di diib ka nyɛ paŋ; ka ya zuobʋg baa yinne kʋ bɔdigɛ.”
35 On yɛl nɛ'ɛŋa naae la, ka nɔk bodobodo pʋ'ʋs Wina'am bareka ba wʋsa tuon ka kɔ'ɔg bodobodo la di.
36 Ka ba wʋsa kpɛ'ɛŋi ba sʋnya di diib la.
37 (Ti wʋsa daa anɛ nidib kɔbisyi' nɛ pisyɔpɔi nɛ ayuobʋ anrʋŋ la pʋʋgin.)
38 Ban dii siak la ka nɔk linɛ kpɛlim la lɔb ku'omin, ye anrʋŋ la fak.
Anrʋŋ la san'auŋ yɛla
39 Ka bɛog nie ka banɛ tʋm anrʋŋ la tʋʋma pʋ baŋ teŋ laa. Amaa ka ba nyɛ zin'ikanɛ an kʋkʋn ka gban'e ye ba ya'a nyaŋ, ba na kɛ ka anrʋŋ la kpa' anina.
40 Ka ba lɔdig anrʋŋ la kʋnti basi atɛukʋn la ka lɔdig daad banɛ kɛt ka anrʋŋ la ken ban bɔɔd zin'isi'a la, ka dʋ'ʋs fuug linɛ bɛ anrʋŋ la tuon la ye pɛbisʋg da'ae anrʋŋ la keŋ tuon.
41 Ka anrʋŋ la tʋ'ʋs titanbin'isdʋʋr. Ka li tuon firi gʋ'ʋŋ ken. Ka ku'opila nwɛ'ɛdi li nya'aŋ, ka li san'am.
42 Ka soogianam la gban'e ye ba kʋ sanrega nidib la wʋsa ka sɔ' da nyaŋi su'a lug ku'om la dʋ gbɛogɔ.
43 Amaa ka soogia kpɛɛm la bɔɔd ye o yis Paul kumin ka zan'as, ka tis nɔɔr ye banɛ mi' lugib la iankim yi anrʋŋʋn la yiiga lugi dʋ gbɛog,
44 ka banɛ kpɛlim la gban'e daad nɛ anrʋŋ la dakɔɔlima lugi dʋ. Ala ka ti wʋsa daa tiligi dʋ gbɛog.
TƲƲMA 28
Paul n bɛ Malta la yɛla
28
Nɛ'ɛŋa nya'aŋ ka ti baŋ ye teŋ la yʋ'ʋri buon Malta.
2 Ka teŋ la nidib di'e ti sʋ'ʋŋa. Ka saa pin'ili niid ka waad bɛ ka ba nyu'oe bugum tisi ti ka ti ʋʋsid.
3 Ka Paul la'asid daad ye o niŋ bugumin, ka waaf bɛɛ anina ka tʋʋlʋg wʋm o ka o yina ga' o nu'ug.
4 Nidib la nyɛ waaf la ga' o nu'ug la ka yɛli ba taaba ye, “Bi'esʋg kae, oŋa anɛ ninkʋʋd. Yɛlsida oŋa kʋ vʋ'ʋgɛ, hali la'an nɛ on nyaŋi yi ku'omin na la.”
5 Amaa ka Paul misig o nu'ug ka waaf la li bugumin ka pʋ niŋ o si'ela.
6 Ka nidib la gu'usid ye ba na nyɛ ka o niŋgbina mɔd bɛɛ o na kpɛn li teŋin kpi. Amaa lin yuug ka ba pʋ nyɛ ka si'el niŋ o la ka ba tiaki ba pʋtɛnda ye o anɛ teŋgban.
7 Ka pɔɔg kpi'e zin'ikanɛ ka ti bɛ la yammin ka an na'ab la pɔɔg. Ka na'ab la yʋ'ʋr buon Publius. Ka o di'e ti nɛ sumalisim. Ka ti bɛɛ o yinne aan o saam daba atan'.
8 Ka o saam bɛn'ɛdi digi ka o niŋ tʋl ka o saand. Ka Paul kpɛn' dɔɔgin la sɔs Wina'am ka pa'al o nu'us o ni ka o nyɛ laafi.
9 Nɛ'ɛŋa niŋ la ka nimbanɛ an ban'adnam wʋsa kena. Ka Paul sɔs Wina'am ka ba nyɛ laafi.
10 Ka ba na'asi ti bɛdegʋ ka tisi ti piini, tinamɛ bɔɔd gaadʋg la, ka ba tisi ti linɛ wʋsa ka ti na bɔɔd ken la pʋʋgin.
Paul naam Malta paae Room teŋin
11 Ka nwadis atan' nya'aŋ ka ti kpɛn' Alekzandria teŋin anrʋŋ linɛ bɛ Malta teŋin la sisi'etita'ar saŋa, ka anrʋŋ la yʋ'ʋr buon “Win Liiba.” Ka ba niŋ anrʋŋ la pʋʋgin.
12 Ka ti keŋ paae Sirakus teŋin ka zin'in anina daba atan',
13 ka naanɛ anina paae Regium teŋin na. Ka bɛog nie ka sisi'em yi ti nya'aŋ na da'adi ti. Ka daba ayi' daar ka ti paae Puteoli teŋin.
14 Anina ka ti nyɛ yadda niŋidib sieba, ka ba sɔsi ti ka ti zin'in nɛ ba daba ayɔpɔi, ka naan kɛn Room teŋin na.
15 Ka yadda niŋidib banɛ bɛ Room teŋin la wʋmi ti yɛla, ka yina. Ka sieba paae zin'ikanɛ ka ba buon ye Saam Dɔɔda Atan' teŋin na. Ka sieba paae zin'ikanɛ buon Appius Da'an la na tʋ'ʋsi ti. Ka Paul n nyɛɛ ba la ka pʋ'ʋs Wina'am ka o sʋnf kpɛ'ɛŋ.
Paul bɛ Room teŋin
16 Tinamɛ kpɛn' Room teŋin na la, ka soogia kpɛɛm la kɛ ka Paul zin'in o kɔn' ka soogia gur o.
17 Ka daba atan' nya'aŋ ka Paul buol Jew dim kpɛɛmnam banɛ bɛ teŋin la la'as ka yɛli ba ye, “M ba'abiisɛ, hali la'an nɛ mam daa pʋ niŋ si'el linɛ an bɛ'ɛdi ti nidibin bɛɛ wada banɛ ka ti di'e ti yaanam san'an la, ba daa gban'e m Jerusalem teŋin nɔki mɛ tis Room soogianam.
18 Ka ba bu'osim bu'osa ka bɔɔd ye ba basim, ban daa pʋ nyɛ ka m tʋm tʋʋmbɛ'ɛd si'a linɛ nar nɛ kum la zug.
19 Amaa ka Jew dim zan'as. Ka man kʋ tun'e niŋ si'el la zug ka m sɔs nɔɔr soogia kpɛɛm la san'an ye o tisim suor ka m keŋ Room na'atita'ar Siiza kɔɔtʋ ni, ka li ka' ye m mɔri antu'a si'a nɛ m mɛŋ nidiba.
20 Dinzug ka m buoli ya ye m nyɛɛ ya ka pian' tisi ya. Nid kan yɛla ka Israel dim mɔr ti'ir la zug ka ba lɔ m nɛ bana.”
21 Ka ba yɛl o ye, “Ti pʋ di'e gbana Juda teŋin ka li sɔbi fʋ yɛlaa. Jew dim banɛ kɛn kpɛla na la, ba sɔ' pʋ tisi ti fʋ labaar bɛɛ pian' fʋ tʋʋmbɛ'ɛd yɛlaa.
22 Amaa ti bɔɔd ye ti wʋmi fʋ san'an fʋn tɛn'ɛsid si'el pʋ'ʋsim kanɛ ka fʋ dɔl la yɛla. Ti mi' ye zin'ig wʋsa nidib pian'ad pʋ'ʋsim la pian'abɛ'ɛd.”
23 Ka ba zi'el dabisir nɛ Paul. Ka li daar paae ka nidib bɛdegʋ la'as Paul zin'igin la na. Ka Paul tu'asidi bigisidi ba Wina'am na'am yɛla, yi bɛogʋn ti ma'ae zaam. Ka o kpɛ'ɛŋi nyaŋi pa'annɛ ba Yesu yɛla Moses wada gbauŋʋn nɛ Wina'am nɔdi'esidib gbana ni.
24 Ka o pian'ad la nyaŋi kɛ ka sieba siak ka sieba pʋ siakɛ.
25 Ban nwa'as taaba hali la, Paul daa tu'asi ba nwa' ka ba nyaan widig, “Wina'am Siig Kasi da dɔlis Azaya onɛ an nɔdi'es la san'an pian' yɛlsida tisi ya yaanam ye,
26† “Kem nimbama san'an yɛli ba ye, ‘Ba na wʋm ka lɛn wʋm, amaa ka kʋ gban'e li gbinnɛ. Ba na gɔs ka lɛn gɔs, amaa ka kʋ nyɛ si'ela.’”
27† Nimbama nwa', sʋnya digilimnɛ, ka ba tʋba ziank nɛ wʋm, ka umi ba nini. Ya'a ka' ala, ba naan nyɛɛn nɛ ba nini, ka wʋmin nɛ ba tʋba, ka baŋin nɛ ba pʋtɛnda, ka tiaki lɛbi m san'an na, ka m ti'ebi ba.
28 “Dinzugɔ, baŋimi nɛ'ɛŋa ye Wina'am tʋm labaar linɛ an faangir la tis banɛ ka' Jew dim la, ka ban na kɛlis.”
29 Ka nidib la nwa'as nɛ taaba widig.
30 Ka Paul zin'in yikanɛ ka o yɔɔdi li yɛla la ni yʋma ayi', ka di'esid ban wʋsa kennɛ o san'an na, 31 ka pa'annɛ ba Wina'am na'am yɛla nɛ Zugsɔb Yesu Kristo yɛla, ka pian'ad nɛ sʋnkpi'euŋ ka sɔ' pʋ giŋid oo.
Room dim
Gbauŋ nwa' yɛla
Paul sɔb gbauŋ kaŋa tis nidib banɛ bɛ Room karindɔɔgin la ye o tu'asi pa'ali ba faangir labasʋŋ la yɛla, nɛ Wina'am di'ed nidib ka sʋŋidi ba ka ba nyaŋi bɛ bɛllim kanɛ nar si'em. Paul yɛt Siig Kasi la tʋʋmmi an si'el karimbiig bɛllimin ka tu'asi pa'al ye nɔnaar kʋdʋg gbauŋ la pʋ mɔr paŋi na tun'e faaɛn nidib nyɔvʋrɛ. Li anɛ saalib yadda niŋir Yesu ni ma'aa ka ba nyɛt yɔlisim yit tʋʋmbɛ'ɛd nɛ wada nɛ kum dinɛ daa mɔr paŋi lɔɔ ba la pʋʋgin. Paul da bɔɔd ye o kaae Room dim ka bɔɔd ye o maal suor linɛ ka o na nyaŋi kɛɛn ba karindɔɔgin la na. On da keŋ la, o da pa'ali ba ban na bɛ si'em ka li pa'al ye ba niŋ Wina'am yadda. Ka ye li nar ka ba bɛ nɛ pʋpielim ka nɔŋ taaba. On sɔb gbauŋ la naae la o pʋ'ʋs nidib banɛ ka o mi' Room teŋin la.
ROOM DIM 1
Man Paul, onɛ an Yesu Kristo tʋmtʋm, ka Wina'am buolim ye m an Yesu Kristo tʋmtʋm ka gaŋimi tʋm ye m mɔɔl o labasʋŋ la sɔbid nɛ'.
2 Wina'am da dɛŋi zi'el nɔɔr labasʋŋ la yɛla ka li lal, ka yii o nɔdi'esidibin ka li sɔb Wina'am gbauŋʋn la.
3 Labasʋŋ kan anɛ ti Zugsɔb Yesu Kristo onɛ an Wina'am Biig la yɛla. Ti ya'a tɛn'ɛs on an ninsaal la yɛla, ti mi' ye o anɛ David yaaŋ.
4 Ka ti ya'a tɛn'ɛs on an Wina'am ka an sʋm nyain la yɛla, ti nyɛ ka Wina'am vʋ'ʋg o kumin, ala ka o pa'al nɛ paŋ ye o anɛ o Biig.
5 Li yinɛ o san'an na ka Wina'am tisi ti yɛlsʋm ye ti an Yesu Kristo tʋmtʋmnib ka kɛ ka dunia buudi wʋsa niŋ o yadda ka siak o nɔɔr.
6 Ka yanam banɛ ka Wina'am gaŋi ya ye ya an Yesu Kristo nidib la mɛ paas ani.
7 M sɔbid gbauŋ kaŋa tisid yanam banɛ wʋsa bɛ Room teŋin ka Wina'am nɔŋi ya ka gaŋi ya ye ya aan o mɛŋ nidib la. Ti Ba' Wina'am nɛ ti Zugsɔb Yesu Kristo na tisi ya yɛlsʋm nɛ sumbʋgʋsʋm.
Paul mɔr nimmua ye o keŋ Room
8 Yiiga, m pʋ'ʋs Wina'am bareka Yesu Kristo nii ya wʋsa zug, ka mɛ pʋ'ʋs o dunia wʋsaa wʋmi ya yadda niŋir la zug.
9 Wina'am onɛ ka m tʋmm o tʋʋma nɛ m ya'am wʋsa mɔɔn labasʋŋ o Biig la yɛla la, na dii m kasɛt ye saŋa wʋsa m tiɛndi ya yɛla
10 m sɔsʋg pʋʋgin. M sɔsid o ye li ya'a aan o bɔɔdim on maal suor ka m nyaŋi kena kaae ya nannanna.
11 M ya'amlɛog bɛɛ ya san'an hali ka m bɔɔd ye m nyɛɛ ya, ka kɛ ka ya na di'e piini linɛ yi Wina'am Siig Kasi ni na la, ka li kɛ ka ya nyɛ paŋ.
12 Man yɛl si'el la anɛ ye, man nɛ yanam na la'an nyɛ sʋŋir. Ka yanam na sʋŋ mam, ka mam mɛ na sʋŋi ya ti Wina'am yadda niŋir pʋʋgin.
13 M ba'abiisɛ, m bɔɔd ye ya baŋ ye m mɔ nɔɔr si'em sa, ye m kena kaae ya. Ka saŋkan la sa nɛ nwa', ka yɛlsieba vi'im ka m pʋ nyaŋɛ. M bɔɔd ye m kɛ ka Room dim sieba tiaki ba sʋnya ka dɔl Zugsɔb la, nwɛnɛ mam pʋn niŋ si'em banɛ ka' Jew dim san'an si'em la.
14 Man di nidib wʋsa sam labasʋŋ la yɛla; yanam banɛ an Girik dim nɛ banɛ ka' Girik dima, nimbanɛ ka ba nini nie nɛ nimbanɛ ka ba nini pʋ nie.
15 Dinzug ka m mɛ bɔɔd hali ye m mɔɔl labasʋŋ la yanam banɛ bɛ Room teŋin la.
Wina'am labasʋŋ la mɔr paŋ
16 M pʋ zɔt nyan nɛ labasʋŋ la yɛla, bɔzugɔ li anɛ Wina'am paŋ linɛ kɛt ka nimbanɛ wʋsa niŋ o yadda la nyɛt faangir; Jew dim la yiiga nɛ banɛ ka' Jew dim la. Linzug ka nyan pʋ mɔrim labasʋŋ la yɛlaa.
17 Li pa'annɛ ti Wina'am niŋid si'em kɛ ka ti an pʋpielim dim o tuon. Ka li anɛ ti yadda niŋir Yesu Kristo ni gʋllim kɛ ka ti mɔr pʋpielim. Li dɔlnɛ lin da sɔb Wina'am gbauŋʋn ye, “Onɛ an pʋpielim daan Wina'am tuon la na vʋe nɛ o yadda niŋir Wina'am ni.”
Wina'am sʋnpɛɛn lu ninsaalib zug
18 Wina'am sʋnpɛɛn naan arezana nii lut nidib zugʋ ba tʋʋmbɛ'ɛd nɛ ba bugusim wʋsa linɛ ka ba tʋm la yɛla, bugusim linɛ ka ba tʋm ka li vi'id yɛlsida la.
19 Bʋn linɛ ka ninsaal na tun'e baŋ Wina'am yɛla la nie nyain ba san'an; ka Wina'am mɛŋ nie li pa'ali ba.
20 Din yi saŋkanɛ ka Wina'am da maal dunia la hali ti paae zina, nidib nyɛt o nyalima bɛllim nɛ o paŋ kanɛ ka' naar la ka gban'e on maal si'el la gbin. Alazug, saalib kʋ nyaŋi yɛl ye ba zi' Wina'am yɛlaa.
21 La'an nɛ ban mi' Wina'am la, ba pʋ tis o girimkanɛ nar ye o di'e laa, ka pʋ pʋ'ʋsid o bareka. Amaa ba tɛn'ɛsʋg lieb zɔlimis, ka ba ya'am an yɔɔg-yɔɔg, ka ba kʋ nyaŋidi gban'ad si'el gbinnɛ.
22 Ba yɛl ye ba anɛ ya'am dim, ka lɛɛ an zɔn,
23 ka pʋ tisid Wina'am onɛ mɔr na'am ka kʋ kpi la girimaa. Ba tiaknɛ Wina'am girima tis bʋmbanɛ ka saalib zaŋi ba nu'usi maal ka ba nwɛnɛ ninsaalib bɛɛ niis bɛɛ bʋnkɔnbid bɛɛ si'elnam banɛ vuudi ba pʋya zut la.
24 Dinzug ka Wina'am basi ba ye ba tʋm dian'ad tʋʋma linɛ ka ba ya'am bɔɔd ka diis taaba nyan nɛ ba niŋgbina.
25 Ba bas Wina'am yɛlsida la ka lɛɛ dɔl dama'am, ka na'asid dinɛ ka Wina'am maal la, ka pʋ'ʋsidi li. Onɛ nar nɛ bareka pʋ'ʋsim saŋa kanɛ ka' naarɛ. Ami.
26 Dinzug ka Wina'am basi ba ka ba tʋmmi ba ya'amlɛog tʋʋma dinɛ an dian'ad la. Ka pu'abi naan digin nɛ dap wʋʋ Wina'am bɔɔd ye li an si'em la, ka ba bas ka lɛɛ dig nɛ taaba.
27 Ala mɛn ka dap bas pu'ab ka mɔr ya'amlɛog nɛ ba dap taaba. Ba niŋid si'elnam dinɛ mɔr nyan nɛ taaba. Ka dinzug ka ba di'ed namiskanɛ nar ye ba di'e la ba mɛŋ niŋgbina ni, ban niŋid si'el la yɛla.
28 Ka ninsaalibi pʋ siak ye Wina'am sid an Wina'am la zug, ka o basi ba ka ba pɛ'ɛl nɛ pʋtɛn'ɛyɔɔd ka maan dinɛ pʋ nar ye ba maan na.
29 Ba sʋnya pɛ'ɛl nɛ bɛ'ɛd buudi wʋsa. Ka linɛ an: bugusim nɛ fufum nɛ kisidim nɛ nɛnnim nɛ ninkʋʋr nɛ zaba nɛ dama'am nɛ sʋntɔɔg. Ba kɛɛnd,
30 ka fakidi ba taaba zut, ka kis Wina'am, ka an nimpʋnannib, ka mɔr nyɛɛsim, ka nwɛ'ɛdi ba mɛŋ nyɔ'ɔg, ka ieed suopaala tʋm tʋʋmbɛ'ɛd, ka zan'asidi ba manam nɛ ba saamnam nɔya.
31 Ba anɛ ninyɔɔd, ka ya'a kaanb ye ba na tʋm si'el, ba pʋ tʋmma, ka pʋ mɔr nɔŋir nɛ ba taaba, ka mɛ pʋ zɔt nimbaanliga.
32 La'an nɛ bam mi' ye Wina'am pʋpielim zi'elʋg la anɛ ye, ninkanɛ tʋm tʋʋmbɛ'ɛd bama nar nɛ kum, ka zan'as ka kpɛn tʋm ala. Ka linɛ an bɛ'ɛdi gaad ala anɛ ban yɛl ye nimbanɛ niŋid ala la anɛ ninsʋma la.
ROOM DIM 2
Wina'am sariakadib la yɛla
| 2 |
Fʋ ya'a kati fʋ taaba saria ka kʋʋsi ba bɛ'ɛd, fʋn pʋn kʋʋs nɛ fʋ mɛŋ bɛ'ɛd bɔzugɔ fʋn mɛ tʋm nɛ ala.
2 Ti mi' ye Wina'am anɛ yɛlsida sɔb ka na kad nimbama saria ka li dɔl suor.
3 M zua, fʋ ya'a yɛt banɛ tʋm tʋʋmbɛ'ɛd bama ye ba niŋ bɛ'ɛd, ka fʋn mɛ tʋm ala, fʋ tɛn'ɛs ye fʋ na nyaŋi pɔns Wina'am sariakadib la?
4 Bɛɛ fʋ ziemnɛ Wina'am an sʋ'ʋm ka mɔr suguru nɛ summɔtir bɛdegʋ nɛ ti la zugɔ? Fʋ zi' ye Wina'am an sʋ'ʋm la, o bɔɔd ye o kɛ ka fʋ tiak ka basi fʋ tʋʋmbɛ'ɛd laa?
5 Amaa fʋn an zukpi'euŋ sɔb ka zan'as ye fʋ kʋ tiak ka bas tʋʋmbɛ'ɛd la, fʋ paasi fʋ mɛŋ nɛ namisʋg linɛ ka fʋ na ti nyɛ daakanɛ ka Wina'am na kad saria nɛ yɛlsida, ka o sʋnpɛɛn nie paalʋ ni la.
6 Wina'am na tis sɔ' mɛkama nyɔɔd wʋʋ on tʋm si'em.
7 Nimbanɛ mɔdigi tʋm tʋʋm sʋma, ka bɔɔd girima nɛ na'asi Wina'am san'an la, o na tisi ba nyɔvʋr linɛ ka' naarɛ.
8 Amaa banɛ bɔɔdi ba mɛŋ yɛla, ka zan'as sida ka siak tʋʋmbɛ'ɛd la, o sʋnpɛɛn nɛ tʋbtɛɛgir na luu ba zug.
9 O na zaŋ namisʋg nɛ daamʋgʋ tis ninsaalib banɛ wʋsa tʋm tʋʋmbɛ'ɛd. Jew dim la na nyɛɛ li yiiga, ka banɛ ka' Jew dim la mɛ tia'al.
10 Amaa o na zaŋ na'asi nɛ sumbʋgʋsʋm tis nimbanɛ wʋsa tʋm tʋʋm sʋma. Jew dim na nyɛɛ li yiiga mɛn, ka banɛ ka' Jew dim la tia'al.
11 Wina'am pʋ mɔr baregaŋ nɛ nidibaa.
12 Nimbanɛ ka' Jew dim ka pʋ mɔr wada la ya'a tʋm bɛ'ɛd, ba na ba'as yɔri ba tʋʋmbɛ'ɛd la zug. Ka Jew dim la mɔr wada la ya'a tʋm bɛ'ɛd, Wina'am na kadi ba saria nɛ wada la.
13 Li ka' banɛ wʋm wada la an pʋpielim dim Wina'am tuonnɛ, ka lɛɛ anɛ banɛ niŋid wʋʋ wada la yɛl si'em la.
14 Nimbanɛ ka' Jew dim la pʋ mɔr Moses wada laa. Ka li ya'a anɛ ba mɛŋ bɔɔdim ka ba niŋid wʋʋ wada la yɛl si'em la, ba mɛŋ tɛn'ɛsʋg anɛ wada ba san'an, la'an nɛ ban pʋ mɔr Moses wada la.
15 Ba tʋʋma pa'al ye wada la yɛl si'el la bɛɛ ba sʋnfʋn, ka ba pʋtɛn'ɛr linɛ mi' sʋ'ʋm nɛ bɛ'ɛd la mɛ pa'al ye li an sida. Ka ba mɛŋ pʋtɛn'ɛr ɛɛnti kʋʋsi ba saŋa si'a ye ba tʋm sʋ'ʋm bɛɛ bɛ'ɛd.
16 Nwɛnɛ labasʋŋ kanɛ ka m mɔɔn la yɛt si'em la, daar kenna ka Wina'am na kad yɛlsu'ada banɛ bɛ nidib pʋtɛnda ni saria Yesu Kristo yʋ'ʋr zug.
Jew dim nɛ wada la yɛla
17 Ka fʋn kanɛ buoli fʋ mɛŋ ye Jew nid la, fʋ yɛla an bɔ? Fʋn mɔr Moses wada la zug ka fʋ nwɛ'ɛd nyɔ'ɔg ye fʋ dɔl Wina'am tituaa bɛɛ?
18 Fʋ ya'a mi' Wina'am bɔɔdim, ka wada la pa'alif fʋn na gaŋ linɛ an sʋm,
19 ka fʋ lɔɔ fʋ sʋʋnrin ye fʋ anɛ onɛ na gaad zʋnzɔɔs tuonnɛ pa'ali ba, ka an nɛɛsim tis banɛ bɛ likin,
20 ka zamisid banɛ an zɔn nɛ banɛ an biis, ka pa'annɛ fʋ taaba,
21 ka bɔ ka fʋ pʋ zamisi fʋ mɛŋa ka mɔɔn ye nidib da zuuda, ka fʋ mɛŋ lɛɛ zuuda?
22 Fʋn kanɛ yɛl ye ba da san'am pu'ab la, fʋ mɛŋ san'am pu'ab bɛɛ? Ya pʋ siak ye ba maalim ba'arɛ, amaa ya mɛŋ zuud ba'ar la'ad.
23 Ka nwɛ'ɛd nyɔ'ɔg nɛ Wina'am wada, ka mɛ san'ami li ka diisid Wina'am nyan.
24 Li dɔlnɛ lin da sɔb Wina'am gbauŋʋn ye, “Yanam Jew dim zug, ka banɛ ka' Jew dim la pian'ad bɛ'ɛdi san'amid Wina'am yʋ'ʋr la.”
25 Fʋ ya'a siak wada la, fʋ baŋʋ kpɛn'ɛb linɛ pa'al ye fʋ anɛ Wina'am nid yinne la mɔr nyɔɔd. Ka fʋ ya'a san'am wada la, fʋ baŋʋ kpɛn'ɛb la anɛ zaalim.
26 Ka banɛ ka' Jew dim, ka pʋ kpɛn' baŋʋ la ya'a siak wada la nɔɔr yɛlʋg, Wina'am na gɔsi ba wʋʋ banɛ kpɛn' baŋʋ.
27 Banɛ pʋ kpɛn' baŋʋ la ya'a siaki di'e wada la, li na pa'al ye yanam Jew dim banɛ mɔr wada la ka kpɛn' baŋʋ ka lɛɛ san'am wada la tʋm taal.
28 Ka' onɛ an Jew nid paalʋ nii an Jew nid yɛlmɛŋir bɛɛ baŋʋ kpɛn'ɛb linɛ an sida anɛ niŋgbiŋin ma'aanɛ.
29 Amaa Jew nid yɛlmɛŋir anɛ onɛ an Jew nid o sʋnfʋn, ka baŋʋ kpɛn'ɛb linɛ an yɛlmɛŋir mɛ an linɛ yi ninsaal sʋnfʋn na ka Siig Kasi la tʋmi li, ka ka'anɛ linɛ sɔb gbana nii. Ninkaŋa sɔb di'ednɛ pian'asʋŋ Wina'am san'an ka ka' ninsaalibi nɛ.
ROOM DIM 3
Nyɔbɔɔ bɛɛ tis banɛ an Jew dim, bɛɛ nyɔbɔɔ bɛɛ tis banɛ kpɛn' baŋʋ la?
2 Li anɛ bɛdegʋ. Yiiga daan, Wina'am da gu'uli ba o nɔɔr pian'ad.
3 Ka ba sieba ya'a da ka'anɛ yɛlsida dima li na kɛ ka Wina'am kʋ an yɛlsida sɔb bɛɛ?
4 Ayei, baa bi'elaa! Hali nidib wʋsa ya'a an ziri dim, Wina'am na kpɛn an sida sɔb. Li dɔlnɛ lin da sɔb Wina'am gbauŋʋn si'em la ye, “Li nar ka Wina'am din dɔl suor, ka o pian'ad mɔr sida o sariakadib pʋʋgin.”
5 Ka tinam ya'a tʋm linɛ pʋ nara ka li kɛ ka Wina'am tʋʋm sʋma nie pa'al nyainnɛ, ti na yɛl ye bɔ? Ti na yɛl ye Wina'am tɛkidi ti tʋbir la o tʋm tʋʋmbɛ'ɛd bɛɛ? Ayei, baa bi'elaa!
6 Wina'am ya'a ka'annɛ sida sɔba, o naan kʋ nyaŋi kadin dunia nidib saria.
7 Ka m ya'a an ziri sɔb, ka m ziri la zug kɛ ka Wina'am yɛlsida la paasid ka o nyɛt girima, wala ka ba kad man saria ye m anɛ tʋʋmbɛ'ɛd daana?
8 Ka bɔɔ kɛ ka ti kʋ yɛl ye; “Alaa kɛl ka ti tʋm tʋʋmbɛ'ɛd ka daasi'erɛɛ bʋnsʋŋ na kena?” Ninsieba tʋ'ʋd man yɛt ye manɛ yɛl ala. Wina'am na kʋʋsi ba yɛla bɛ'ɛd wʋʋ lin nar si'em.
Sɔ' kae an pʋpiel la
9 Aa, tɔ. Tinam banɛ an Jew dim la an sʋm gat banɛ ka' Jew dim la bɛɛ? Ayei. M pʋn dɛŋim pa'al ye tʋʋmbɛ'ɛd mɔr paŋ nɛ Jew dim la'an nɛ banɛ ka' Jew dim wʋsa.
10 Li dɔlnɛ lin da sɔb Wina'am gbauŋʋn ye, “Sɔ' kae tʋm sʋm, hali baa nid yinne mɛnɛ.
11 Sɔ' kae mi' li gbinni bakida, bɛɛ ieed on Wina'am.
12 Sɔ' wʋsa fɛndignɛ; ba wʋsa yʋ'ʋn san'amnɛ. Sɔ' kae tʋm sʋm, hali baa nid yinne mɛnɛ.
13 Ba kʋkɔya nwɛnɛ yaʋg za'anɔɔr linɛ ka ba pʋ yɔɔda. Ba pian'adnɛ ziri pian'ad ma'aa. Dunduug yabidi bɛɛ ba nɔŋgbana ni.
14 Ba nɔɔr pian'ad anɛ nɔpɔɔr ma'aa ka tɔi wʋʋ yabid nɛ.
15 Ba zɔti tɔ'ɔtɔ ken ye ba kʋ nid.
16 Ka zin'ikanɛ ka ba gaad wʋsa sʋnsa'aŋ na bɛɛ anina.
17 Ba zi' sumbʋgʋsʋm suorɛ,
18 ka mɛ pʋ zɔt Wina'am ka na gu'usɛ.”
19 Ti mi' ye wada la ya'a yɛl si'el, li yɛtnɛ tisid nimbanɛ dɔlli li la. Linzug ka nidib wʋsa banɛ mɔr wada la nɛ banɛ ka' li la, na sinni ba nɔɔr. Ka ba wʋsa na tu'asi ba yɛla Wina'am tuon ka kɔ'ɔŋ bʋʋd.
20 Ninsaal kae na niŋ wada la yɛl si'em la ka an pʋpielim daan Wina'am tuonnɛ. Li anɛ wada la ni ka ninsaalib baŋ ye ba anɛ tʋʋmbɛ'ɛd dim.
Wina'am kɛt ka nidib an pʋpielim dim o tuon
21 Ka nannanna Wina'am nie pa'al on niŋid si'em kɛt ka ninsaalib an pʋpielim dim o tuon. Ka Wina'am nɔdi'esidib nɛ wada la pa'ali ti li yɛla, ka li lɛɛ pʋ yinɛ wada la dɔllim ni naa.
22 Wina'am kɛt ka ninsaalib banɛ wʋsa niŋ Yesu Kristo yadda la an pʋpielim dim o tuon. Sɔ' mɛkama anɛ yinne,
23 bɔzugɔ, saalib wʋsa tʋm tʋʋmbɛ'ɛd ka kɔ'ɔŋ Wina'am girima.
24 Amaa Wina'am piini linɛ ka o tis nidib wʋsa la zugʋ kɛ ka ti nyɛ tʋʋmbɛ'ɛd taal pɛ'ɛŋir, ka li yinɛ Yesu Kristo onɛ faaɛn ti la ni na.
25 Wina'am zaŋ o tis ye o kpi, ka an maannɛ sɔs suguru ka o kɛ nidib tʋʋmbɛ'ɛdi bas ka li yinɛ ba yadda niŋir ni. O niŋ ala ye o pa'al ye o anɛ pʋpielim sɔb. Saŋa kanɛ da gaad la, Wina'am da mɔr sumbʋgʋsʋm nɛ ninsaalib, ka pʋ gɛligidi ba tʋʋmbɛ'ɛdɛ.
26 Ka nannanna, o niŋ nɛ' ye o pa'al ye o mɛŋ anɛ pʋpielim sɔb, ka mɛ kɛ ka ninkanɛ niŋ Yesu yadda la an pʋpielim sɔb o tuon.
27 Dinzugɔ, bɔ yɛla kimm ka ti na tun'e nwɛ' nyɔ'ɔgɔ? Ti kʋ tun'e nwɛ' nyɔ'ɔg si'el-si'el yɛlaa. Li ka'anɛ ninsaalibi dɔl wada la na kɛ ka ba nyaŋi nwɛ' nyɔ'ɔgɔ. Li anɛ ban niŋ Yesu Kristo yadda la zug.
28 Ti gban'e ye sɔ' yadda niŋir Kristo ni gʋllim na kɛ ka Wina'am kɛ ka o an pʋpielim sɔb o tuon, ka ka'anɛ on dɔl wada la zugɔ.
29 Ya tɛn'ɛs ye Wina'am anɛ Jew dim la Wina'am ma'aanɛɛ? Ayei, o anɛ Jew dim nɛ banɛ ka' Jew dim la wʋsa Wina'am.
30 Wina'am anɛ yinne, ka na kɛ ka Jew dim nɛ banɛ ka' Jew dim la mɛ an pʋpielim dim o tuon, ba wʋsa yadda niŋirin.
31 Ya tɛn'ɛs ye tinam pa'al ye nidibi di'ed pʋpielim ba yadda niŋir zug la kɛt ka wada la an zaalim bɛɛ? Ayei, baa bi'elaa. Ti lɛɛ kɛ ka wada la zi'e sʋ'ʋŋa.
ROOM DIM 4
Abraham yɛla
| 4 |
Ti na yɛl Abraham onɛ an tinam banɛ an Jew dim yaab la yɛla ye bɔ? O da nyɛ bɔ?
2 Li ya'a da aan Abraham tʋʋma zugʋ kɛ ka o lieb pʋpielim sɔb Wina'am tuon, o da naan mɔrin si'eli na nwɛ' nyɔ'ɔg, ka lɛɛ kʋ nyaŋi nwɛ' nyɔ'ɔg Wina'am tuonnɛ.
3 Li sɔb Wina'am gbauŋʋn ye, “Abraham da niŋ Wina'am yadda, ka Wina'am gɔsi li ka yɛl ye o anɛ pʋpielim sɔb o tuon.”
4 Nid ya'a tʋm tʋʋma, o di'ed yɔɔd. Ka ba lɛɛ kʋ gɛligi li ye li anɛ piini, amaa li lɛɛ anɛ linɛ nar ye o di'e.
5 Ninkanɛ ti'e o yadda niŋir ka ka'anɛ o tʋʋm sʋmaa, ka niŋ yadda ye o na di bʋʋd Wina'am tuon o yadda niŋir zug, Wina'am na gɔs niŋkan yadda niŋir ka o lieb pʋpielim daan o tuon.
6 David mɛ da yɛl ninsaal sumalisim yɛla ka li bɛ Wina'am gbauŋʋn ye, Wina'am gɔs ye o anɛ pʋpielim sɔb, ka li ka'anɛ o tʋʋma zugɔ. Ka ye,
7 “Wina'am albareka bɛ nɛ banɛ ka ba kɛɛ ba taali bas ka lusi ba tʋʋmbɛ'ɛd la.
8 Wina'am albareka bɛ nɛ ninkanɛ ka Zugsɔb la pʋ kaan o tʋʋmbɛ'ɛd bɛɛ gɔsi li la.”
9 Wina'am albareka linɛ ka David pian' li yɛla la, ka'anɛ nimbanɛ kpɛn' baŋʋ la din ma'aanɛɛ. Li mɛ anɛ nimbanɛ pʋ kpɛn' baŋʋ la din. Ti dɛŋi sɔb ye, “Abraham da niŋ Wina'am yadda, ka Wina'am gɔsi li ka yɛl ye o anɛ pʋpielim sɔb o tuon.”
10 Tɛn'ɛsimi saŋkanɛ ka li da niŋ la yɛla. Li da anɛ Abraham da nam pʋ kpɛn' baŋʋ la, ka ka' li nya'aŋa.
11 Abraham da siak baŋʋ kpɛn'ɛb la, ka li anɛ zanbin, ka pa'al ye saŋkanɛ ka o da nam pʋ kpɛn' baŋʋ la, Wina'am da gɔs ka o an pʋpielim sɔb o tuon o yadda niŋir zug. Dinzugɔ, Abraham an banɛ wʋsa niŋ Wina'am yadda ka Wina'am gɔs ka ba an pʋpielim dim o tuon la yaab la'an nɛ bam pʋ kpɛn' baŋʋ la.
12 Abraham mɛ an nimbanɛ kpɛn' baŋʋ la yaab, ka li ka'anɛ baŋʋ kpɛn'ɛb la ma'aanɛɛ, ka lɛɛ anɛ ban niŋ Wina'am yadda wʋʋ Abraham da niŋ si'em, ka da nam pʋ kpɛn' baŋʋ la.
Wina'am nɔzi'elʋg di'er la yɛla
13 Wina'am da kaanbi tis Abraham nɛ o yaas, ye banɛ na ti sʋ'oe dunia ka li ka'anɛ Abraham da dɔl wada la zugɔ, amaa li anɛ on da niŋ Wina'am yadda ka o gɔs ka o an pʋpielim sɔb o tuon la zug.
14 Ka li ya'a aan banɛ dɔl wada la di'edin Wina'am yɛlsʋm la, ninsaalib yadda niŋir Wina'am ni, nɛ o kaanbʋg la na aan zaalim.
15 Wada la kɛt ka Wina'am sʋnpɛɛn luti ti zug. Ka wada la ya'a kae li ki'isʋg mɛ kʋ bɛɛ.
16 Linzug, ninsaalib banɛ niŋ Wina'am yadda la di'ed o kaanbʋg ka li yinɛ o pʋpielim ni na, ye Abraham yaas wʋsa sid na di'e o nɔzi'elʋg la. Ka li ka'anɛ o yaas banɛ dɔl wada la gʋllimnɛɛ, ka mɛ anɛ banɛ niŋ Wina'am yadda wʋʋ Abraham da niŋ si'em la. Abraham aan ti wʋsa yaab.
17 Li dɔlnɛ Wina'am da yɛl si'em o gbauŋʋn ye, “M maalif nɛ buudi bɛdegʋ yaab la.” Alazug, nɔzi'elʋg nwa' anɛ linɛ bɛɛ ti yaab Abraham onɛ daa niŋ Wina'am sɔ' yadda la san'an. Onɛ kɛt ka kpi'im nied kumin na, ka kɛt ka linɛ kae bɛ.
18 Abraham n da gɔs ka li an si'em la, ti'ir da kae nɛ biig nyɛɛbɔ. Ka o da niŋ Wina'am yadda ka mɔr ti'ir. Ka linzugʋ da kɛ ka o lieb buudi bɛdegʋ yaab. Li dɔlnɛ Wina'am da yɛl o ye, “Ala ka fʋ yaas mɛ na zu'oe la.”
19 La'an nɛ on da kʋdigi paae yʋma kɔbiga ka tadig ka o pu'a Sara mɛ an kʋndu'ar la, Abraham yadda niŋir Wina'am ni da pʋ bʋkɛ.
20 O da pʋ bas o yadda niŋir nɛ Wina'am, ka mɛ pʋ bi'esid o kaanbʋgɔ. O yadda niŋiri kɛ ka o nyɛ paŋ ka tis Wina'am na'asi,
21 ka mi' sʋ'ʋŋa ye Wina'am na nyaŋi maal si'el wʋsa o nɔzi'elʋg ni.
22 Ka linzug ka o yadda niŋir kɛ ka Wina'am gɔs ka o an pʋpielim sɔb o tuon.
23 Lin da sɔb si'em la ye Wina'am siak ka o an pʋpielim sɔb la ka'anɛ on zug gʋllimnɛɛ,
24 ka li mɛ anɛ tinam zug mɛn. Wina'am mɛ gɔs tinam ka ti an pʋpielim dim o tuon, tinam banɛ niŋ Wina'am onɛ vʋ'ʋgi ti Zugsɔb Yesu kumin yadda la.
25 Wina'am da kɛ ka Yesu kpi ti tʋʋmbɛ'ɛd zug, ka vʋ'ʋg o kumin ye o kɛ ka ti an pʋpielim dim o tuon.
ROOM DIM 5
Pʋpielim dim Wina'am tuon
| 5 |
Dinzugɔ, Wina'am kɛ ka ti an pʋpielim dim o tuon ka li yinɛ ti yadda niŋirin la, ti mɔr sumbʋgʋsʋm Wina'am san'an, ka li anɛ ti Zugsɔb Yesu Kristo ma'asim la zug.
2 Kristo kɛ ka ti nyɛ Wina'am pʋpielim piini ka mɔri li kiŋ-kiŋ, ka mɛ mɔr ti'ir ye ti na la'am di'e na'asi nɛ Wina'am. Ka li tisi ti sumalisim.
3 Ka ti mɛ mɔr sumalisim ti namisʋg la yɛla, bɔzugɔ ti mi' ye namisʋg kɛt ka ti nyaŋi mɔdigid.
4 Ka ti ya'a mɔdig, li mɛ pa'al ye ti nyɛ kpansʋg ka an sʋm. Ka linɛ kɛ ka ti mɔr ti'ir ye ti na ti bɛ nɛ Wina'am.
5 Ka Wina'am pɛsig o nɔŋirɛ ti sʋnya ni, ka li yinɛ o Siig Kasi onɛ ka Wina'am tisi ti la ni na. Ka linzug ka ti'ir kaŋa ka' ziri ti'irɛ.
6 Tinamɛ da nan an tʋʋmbɛ'ɛd dim ka ka' paŋ kanɛ na sʋŋi ti mɛŋ la, ka Kristo kpii tisi ti.
7 Li tɔi ka sɔ' di'e pʋpielim sɔb kum kpi. Amaa daasi'erɛɛ sɔ' na siaki kpi ninsʋŋ yɛla.
8 Ka tinamɛ da nan an tʋʋmbɛ'ɛd dim la ka Kristo kpii tisi ti, ka ala ka Wina'am pa'ali ti on nɔŋi ti si'em.
9 Ka o ziim la kɛ ka Wina'am kɛ ka ti an pʋpielim dim o tuon, linzug bi'esʋg lɛn kae ye Kristo na faaɛn ti ka ti kʋ nyɛ Wina'am sʋnpɛɛnnɛ.
10 Ti da anɛ dataas nɛ Wina'am, ka o Biig la kum kɛ ka o naal nɛ ti. Ka tinamɛ naal nɛ Wina'am la, bi'esʋg lɛn kae ye Kristo nyɔvʋr na faaɛn tii.
11 Ka linɛ lɛm paas anɛ ye ti maan sumalisim nɛ Wina'am niŋ si'el la ka li anɛ ti Zugsɔb Yesu Kristo onɛ naali ti nɛ Wina'am la zug.
Adam nɛ Yesu Kristo la yɛla
12 Dau yinne da tʋm tʋʋmbɛ'ɛd, ka kɛ ka tʋʋmbɛ'ɛd kɛn dunia ni na. Ka o tʋʋmbɛ'ɛd la zug ka kum kena. Ka linzug ka kum taas ninsaalib wʋsa, ban tʋm tʋʋmbɛ'ɛd la zug.
13 Saŋkanɛ ka Wina'am da nam pʋ tis Moses o wada la, tʋʋmbɛ'ɛd da bɛ. Amaa wada ya'a kae, Wina'am pʋ gɛligid tʋʋmbɛ'ɛdɛ.
14 Ka Adam saŋa ti paae Moses saŋa, kum pʋn paae nidib wʋsa, hali nɛ banɛ tʋm tʋʋmbɛ'ɛd ka li pʋ an wʋʋ Adam da zan'as Wina'am nɔɔr yɛlʋg si'em la. Adam nɛ Yesu Kristo onɛ kɛɛn o nya'aŋ na la nwɛnɛ taaba,
15 ka lɛɛ ka' bʋn yinnee. Amaa Wina'am piini kanɛ ka o tisi ti la nɛ Adam tʋʋmbɛ'ɛd la pʋ nwɛn taaba. Nidib bɛdegʋ ya'a kpi dau yinne tʋʋmbɛ'ɛd zug, alaa linɛ gaad ala anɛ Wina'am yɛlsʋm piini linɛ yit dau yinne onɛ an Yesu Kristo la pʋpielim ni ka zu'oe tis nidib bɛdegʋ la.
16 Linɛ dɔl Wina'am piini pʋ nwɛnɛ linɛ dɔl dau yinne la tʋʋmbɛ'ɛdɛ. Sariakadib linɛ dɔl tʋʋmbɛ'ɛd yinne la anɛ kʋʋsbɛ'ɛd. Ka Wina'am piini linɛ dɔl tʋʋmbɛ'ɛd bɛdegʋ anɛ ye Wina'am kɛ ka ti an pʋpielim dim o tuon.
17 Li anɛ sida ye dau yinne onɛ an Adam la tʋʋmbɛ'ɛd zugʋ kɛ ka kum paae nidib wʋsa. Amaa dau yinne onɛ an Yesu Kristo la tʋmm gaad ala, bɔzugɔ o kum zugʋ kɛ ka ti paam yɔlisim linɛ yit Wina'am pʋpielimin na.
18 Aa tɔ. Tʋʋmbɛ'ɛd yinne la kɛ ka nidib wʋsa nyɛ sariakadib bɛ'ɛd Wina'am san'an. Ala mɛn Yesu Kristo pʋpielim tʋʋm yinne kɛ ka Wina'am kɛ ka nidib wʋsa an pʋpielim dim o tuon, ka tisi ba nyɔvʋr.
19 Nid yinne la zan'as Wina'am nɔɔr la kɛ ka nidib bɛdegʋ an tʋʋmbɛ'ɛd dim Wina'am tuon. Ala mɛn ka nid yinne la siak Wina'am nɔɔr la kɛ ka Wina'am kɛ ka nidib bɛdegʋ an pʋpielim dim o tuon.
20 Wada la da kena ye li kɛ ka tʋʋmbɛ'ɛd nɔbig. Ka tʋʋmbɛ'ɛdi nɔbig la, Wina'am pʋpielim piini mɛ nɔbig bɛdegʋ gaad ala.
21 Tʋʋmbɛ'ɛd nyaŋid nidib wʋsa ka ba kpiid. Ala mɛn Wina'am kɛ ka ti an pʋpielim dim o tuon la zug ka o pʋpielim sʋ'oe ti ka tisi ti nyɔvʋr linɛ ka' naarɛ, ka li yinɛ ti Zugsɔb Yesu Kristo ni.
ROOM DIM 6
Tʋʋmbɛ'ɛd nɛ pʋpielim yɛla
| 6 |
Dinzugɔ, ti na yɛl ye bɔ? Ti na yɛl ye ti na kpɛn tʋm tʋʋmbɛ'ɛd ye Wina'am pʋpielim piini la nɔbig bɛɛ?
2 Ayei, baa bi'elaa. Li nwɛnɛ ti da kpinɛ, ka dinzug tʋʋmbɛ'ɛd pʋ lɛn sʋ'oe tii. Dinzugɔ ti kʋ kpɛn niŋid wʋʋ tʋʋmbɛ'ɛdi nan sʋ'oe tii.
3 Bɛɛ ya zi' ye tinam banɛ di'e Wina'am ku'om sʋʋb la lieb nɛ yinne nɛ Yesu Kristo ka mɛ lieb yinne nɛ o kum la?
4 Kristo da kpiya ka ba mum o, ka Wina'am vʋ'ʋg o kumin nɛ o paŋ. Ala mɛn, ti daa di'e Wina'am ku'om sʋʋb ka li nwɛnɛ ti kpinɛ ka ba mumi ti nɛ o, ye ti vʋ'ʋg ka di'e vʋmpaal ka kpɛm bɛɛ li ni.
5 Li ya'a an sida ye ti da lieb yinne nɛ Kristo o kumin la, ala mɛn ti sid na an yinne nɛ o kum vʋ'ʋgirin la.
6 Ti mi' sʋ'ʋŋa ye ba da kpa' ti bɛllim kʋdir la nɛ Yesu kum dapuudir la zug linɛ na san'am tʋʋmbɛ'ɛd paŋ, ka tʋʋmbɛ'ɛd kʋ lɛn sʋ'oe ti.
7 Nid ya'a kpi, o nyɛ yɔlisim nɛ tʋʋmbɛ'ɛd paŋ.
8 Ka tinamɛ sadigim kpi nɛ Kristo la, ti siak ye ti mɛ na vʋe nɛ o.
9 Ti mi' ye Wina'am sadigim vʋ'ʋg Kristo kumin la, o kʋdim kʋ lɛn kpii. Kum lɛn ka' paŋ o san'anɛ.
10 O da kpi vuguri ka nyaŋ tʋʋmbɛ'ɛd ka li kʋ lɛn daam o; ka vʋm kanɛ ka o yʋ'ʋn vʋe la, o vʋenɛ tis Wina'am.
11 Ala mɛn, yanam mɛ gɔsimi ya mɛŋ ka li nwɛnɛ ya kpinɛ ka tʋʋmbɛ'ɛd pʋ lɛn tun'e yaa, ka lɛɛ vʋe Wina'am ni ka li anɛ Yesu Kristo zug.
12 Da kɛ ka tʋʋmbɛ'ɛd lɛn sʋ'oe ya niŋgbina ye ya siak ya'amlɛog bɛ'ɛd banɛ ka ya niŋgbina bɔɔd la.
13 Da pɛsigi ya niŋgbina luosi tis tʋʋmbɛ'ɛd ka li mɔri ba tʋm bɛ'ɛdɛ, ka lɛɛ pɛsigi ya mɛŋi tis Wina'am; ka ya anɛ nimbanɛ ka o mɔri ya yi kumin keŋ vʋmin. Pɛsigimi ya niŋgbina luos wʋsa tis Wina'am ye o mɔri ba tʋm pʋpielim tʋʋma.
14 Wada la pʋ sʋ'oe yaa, amaa li anɛ Wina'am pʋpielim sʋ'oe ya. Linzug tʋʋmbɛ'ɛd pʋ lɛn sʋ'oe yaa.
15 Aa tɔ. Wada la pʋ sʋ'oe tii, ka Wina'am pʋpielim lɛɛ sʋ'oe ti. Linzug ti na kpɛn tʋm tʋʋmbɛ'ɛd bɛɛ? Ayei, baa bi'elaa.
16 Ya ya'a pɛsigi ya mɛŋ ka an sɔ' yammis ka siak o nɔɔr, ya sid anɛ onɛ ka ya siak la yammis. Alazug, ya ya'a siaki tʋm tʋʋmbɛ'ɛd, ya anɛ tʋʋmbɛ'ɛd yammis ka li mɔri ya ken kumin. Ka ya ya'a siak Wina'am nɔɔr, ya anɛ o yammis, ka lin mɛ kɛ ka ya an pʋpielim dim Wina'am tuon.
17 Ti pʋ'ʋs Wina'am bareka ye ya da anɛ tʋʋmbɛ'ɛd yammis amaa ka yʋ'ʋn siaki di'e pa'alʋg kanɛ ka ba tisi ya la nɛ ya sʋnya wʋsa.
18 Wina'am da kɛ ka ya sʋ'ʋgi ya mɛŋ tʋʋmbɛ'ɛd san'an, ka mɛ kɛ ka ya an pʋpielim yammis.
19 M mɔri ya ninsaalib bɛllim an si'em pa'annɛ ya, bɔzugɔ ya pʋ tun'e bakid pian'ad gbinnɛ. Ya daa ɛɛnti pɛsigi ya mɛŋi tis tʋʋmyɔɔd nɛ tʋʋmbɛ'ɛd ka li nɔbigid bɛdegʋ. Ala mɛn, nannanna pɛsigimi ya mɛŋi tis pʋpielim, ye ya niŋ linɛ an sʋm nyain.
20 Yanamɛ da an tʋʋmbɛ'ɛd yammis la, ya ba' da kae nɛ pʋpielim tʋʋma.
21 Ka tʋʋm banɛ ka ya da tʋm ka li mɔr nyannɛ ya san'an nannanna la da tisi ya bɔ nyɔɔdɛ? Tʋʋm ban la ba'asʋg anɛ kum.
22 Ka nannanna Wina'am kɛ ka ya sʋ'ʋgi ya mɛŋ tʋʋmbɛ'ɛd san'an, ka lieb o yammis. Ka li nyɔɔd anɛ ye ya yʋ'ʋn bɛnɛ kasi, ka li ba'asʋg anɛ nyɔvʋr dinɛ ka' naarɛ.
23 Tʋʋmbɛ'ɛd yɔɔd anɛ kum. Ka Wina'am piini an nyɔvʋr dinɛ ka' naarɛ. Ka ti di'e li tinamɛ an yinne nɛ ti Zugsɔb Yesu Kristo la.
ROOM DIM 7
Dap nɛ pu'ab wada la pa'ali ti si'el la yɛla
| 7 |
M ba'abiisɛ, ya wʋsa mi' wada la yɛla, dinzugɔ ya na gban'e man ye m yɛl si'el la gbin. Wada la sʋ'oe nid nɛ o vʋm saŋa ma'aa.
2 Dinzugɔ, wada la pʋʋgin, li anɛ tilas ye pu'a la'as nɛ o sid, o sid vʋm saŋa. Ka o sid ya'a kpi, pu'a la sʋ'oe o mɛŋ nɛ sid kulug wada la.
3 Alazug, o ya'a la'as nɛ dau sɔ' ka o sid la nan vʋe, ba na yɛl ye o san'am dau. Amaa o sid ya'a kpi, o sʋ'oe o mɛŋ nɛ sid kulug wada la. Ka o ya'a kul dau sɔ', o pʋ san'am dau.
4 M ba'abiisɛ, yanam mɛ anɛ ala. Yanamɛ an Kristo niŋgbina luos la zug, ya daa kpi ka wada la pʋ lɛn sʋ'oe yaa. Ka nannanna Kristo onɛ ka Wina'am vʋ'ʋg o kumin ye ti niŋ linɛ ma'ae Wina'am sʋnf la yʋ'ʋn sʋ'oe ya.
5 Saŋkanɛ ka ti da dɔlli ti ninsaalib bɔɔdim la, wada la da kɛ ka ti ya'amlɛog linɛ an bɛ'ɛd duoe ti niŋgbina ni ka ti tʋm bʋn linɛ ziid kum na.
6 Ka nannanna ti sʋ'oe ti mɛŋ wada la san'an. Ti daa kpi, ka wada la pʋ lɛn sʋ'oe tii. Linzug ti dɔl Wina'am nɛ vʋmpaal linɛ ka o Siig Kasi tisi ti la, ka li ka'anɛ wada kʋdig linɛ da sɔb la kɛ ka ti dɔl oo.
Wada nɛ tʋʋmbɛ'ɛd la yɛla
7 Ti na yɛl ye bɔ? Ti na yɛl ye wada la anɛ bʋmbɛ'ɛd bɛɛ? Ayei, baa bi'elaa. La'an nɛ lin an sida ye wada la anɛ bʋnsʋŋ la, wada la ya'a da ka'anɛ, m naan kʋ baŋin tʋʋmbɛ'ɛdi an si'ela. Wada la ya'a da pʋ yɛlin ye, “Da mɔr fufummɛ,” m naan kʋ baŋin fufummi an si'ela.
8 Ka tʋʋmbɛ'ɛd nyɛɛ li suor nɔɔr yɛlʋg la ni, ka kɛ ka fufum buudi bɛdegʋ duoe m sʋnfʋn. Wada la ya'a ka'anɛ, ti naan kʋ mi'in tʋʋmbɛ'ɛdɛ. 9 Kʋdimin sa ka m da vʋe, ka da zi' wada la gbinnɛ, ka yʋ'ʋn baŋ nɔɔr yɛlʋg la gbin, ka tʋʋmbɛ'ɛd yʋ'ʋn duoe m sʋnfʋn ka m kpi.
10 Ka wada kanɛ da an ye di mɔr vʋm na la, m nyɛ ka li mɔr nɛ kum na.
11 Tʋʋmbɛ'ɛd nyɛ suor wada la ni, ka ma'ami kpɛn'ɛsim kumin.
12 Alazug, wada la anɛ kasi; ka nɔɔr yɛlʋg la mɛ an kasi, ka an sʋm nyain.
13 Ka bʋn linɛ an sʋm la mɔr kum na tisim bɛɛ? Ayei, baa bi'elaa. Li anɛ tʋʋmbɛ'ɛd la niŋi li, ka nɔk nɔɔr yɛlʋg linɛ an sʋm la kʋʋm ye li nie
pa'al ye li sid anɛ tʋʋmbɛ'ɛd. Ka linzug ka tʋʋmbɛ'ɛd yʋ'ʋn maligin zu'oe galis hali la.
Bɔɔdim ayi' linɛ bɛ ninsaalin la yɛla
14 Ti mi' ye wada la anɛ Wina'am Siig Kasi din. Ka man anɛ ninsaal, ka nwɛnɛ yammʋg onɛ ka ba kuosi tis tʋʋmbɛ'ɛd.
15 Mam pʋ gban'e man niŋid si'el la gbinnɛ. Mam bɔɔd ye m niŋ si'el la, m pʋ niŋidi lii, amaa linɛ ka m kis la, din ka m niŋid.
16 M ya'a tʋm mam pʋ bɔɔd si'el la, li pa'al ye m siak ye wada la an sʋm.
17 Dinzugɔ, li ka'anɛ manɛ niŋid nɛ'ɛŋa, ka lɛɛ anɛ tʋʋmbɛ'ɛd linɛ bɛɛ m ni la.
18 M mi' ye bʋn linɛ an sʋm ka' m nii. M ye m yɛl ye, bʋn linɛ an sʋm ka' man ninsaal bɔɔdim san'anɛ. La'an nɛ tʋʋm sʋma ya'amlɛogʋ bɛɛ m san'an la, m pʋ nyaŋidi tʋmmi lii,
19 ka pʋ niŋid sʋ'ʋm wʋʋ man bɔɔd ye m niŋ si'em laa, ka lɛɛ tʋm tʋʋmbɛ'ɛd linɛ ka m pʋ bɔɔd ye m tʋm la.
20 M ya'a tʋm linɛ ka m pʋ bɔɔda, li pa'al ye li ka'anɛ manɛ niŋidi lii, ka lɛɛ anɛ tʋʋmbɛ'ɛd linɛ bɛɛ m ni la.
21 Dinzugɔ, m nyɛt ka mugusʋg kaŋa bɛ. Li anɛ ye, m ya'a bɔɔd ye m niŋ dinɛ an sʋm, m kʋ nyaŋɛ. Asɛɛ linɛ an bɛ'ɛd ma'aa ka m na tun'e niŋ. 22 Wina'am wada la kɛt ka m sʋnf ma'ad.
23 Ka m nyɛt wada si'a linɛ tʋm m niŋgbina ni ka zabid nɛ wada linɛ ka m pʋtɛn'ɛr bɔɔd la, ka lɔɔm wʋʋ m anɛ sanrega nid ye m siak tʋʋmbɛ'ɛd linɛ kuli m niŋgbina la.
24 Oi, bɔ sʋnsa'aŋʋ nwa' ka m nyɛta! Anɔ'ɔnɛ na faanm ka m niŋgbina nwa' kʋ dɔllimi keŋ kuminɛ?
25 Wina'am gʋllim na faanm, ka li yiti ti Zugsɔb Yesu Kristo ni na. M pʋ'ʋs Wina'am bareka. M mi' ye li an sʋm ye m tʋm Wina'am bɔɔdim, amaa m niŋgbina bɔɔdim nyaŋim ka m tʋm linɛ ka' sʋ'ʋm.
ROOM DIM 8
Bɛllim linɛ dɔl Wina'am Siig Kasi bɔɔdim
| 8 |
1-2 Wina'am Siig Kasi onɛ tisidi ti vʋm ka li yit Yesu Kristo ni la na, sʋ'oe m, ka kɛ ka tʋʋmbɛ'ɛd nɛ kum pʋ lɛn sʋ'oe ma. Dinzugɔ, nannanna nimbanɛ an yinne nɛ Yesu Kristo kʋ nyɛ kʋʋs bɛ'ɛdɛ.
3 Wina'am tʋm o mɛŋ Biig, ka o lieb ninsaal, ka nwɛnɛ ninsaalib banɛ an tʋʋmbɛ'ɛd dim, ka kpii ti tʋʋmbɛ'ɛd zug. Ka o kum pʋʋgin Wina'am kad tʋʋmbɛ'ɛd saria ka san'ami li paŋ linɛ tʋmmi ti ninsaal bɔɔdim ni la. Ti ninsaal bɔɔdim kɛt ka wada la ka' paŋ la zug, wada la kʋ nyaŋi san'am tʋʋmbɛ'ɛd paŋa.
4 Wina'am niŋi li ye, tinam banɛ bɛllim dɔl Wina'am Siig Kasi bɔɔdim ka ka' ti ninsaalib bɔɔdim la na siaki niŋ wada la nɔɔr yɛlʋg linɛ an sida la sʋ'ʋŋa.
5 Nimbanɛ bɛllim dɔlli ba ninsaalib bɔɔdim la nɔki ba ya'am niŋ ninsaalib bɔɔdim ni. Ka nimbanɛ bɛllim dɔl nɛ Wina'am Siig Kasi bɔɔdim la nɔki ba ya'am niŋ Siig Kasi la bɔɔdim ni.
6 Fʋ ya'a nɔki fʋ ya'am niŋ ninsaalib bɔɔdimin, li anɛ kum. Ka fʋ ya'a nɔki fʋ ya'am niŋ Siig Kasi la bɔɔdimin, li anɛ nyɔvʋr nɛ sumbʋgʋsʋm.
7 Fʋ ya'a nɔki fʋ ya'am niŋ ninsaalib bɔɔdimin, fʋ anɛ Wina'am dataa ka pʋ siakid Wina'am wada laa, ka sid kʋ nyaŋi siaki lii.
8 Nimbanɛ dɔlli ba ninsaalib bɔɔdim la kʋ nyaŋi ma'ae Wina'am sʋnfɔ.
9 Wina'am Siig Kasi sadigim bɛɛ ya san'an la, ya bɛllim pʋ dɔlli ya ninsaalib bɔɔdim, ka lɛɛ dɔl nɛ Siig Kasi la bɔɔdim. Onɛ pʋ mɔr Kristo Siig Kasi la, ka' Kristo nida.
10 Ka Kristo ya'a bɛɛ ya san'an, ya siis mɔr nyɔvʋr yanamɛ lieb pʋpielim dim Wina'am tuon la zug, hali nɛ ya niŋgbina na kpi tʋʋmbɛ'ɛd zug la.
11 Ka Wina'am onɛ vʋ'ʋg Yesu kumin la Siig Kasi ya'a bɛɛ ya san'an, on onɛ vʋ'ʋg Yesu Kristo kumin la mɛ na tisi ya ninsaalib niŋgbina nyɔvʋr paal, ka li yinɛ o Siig Kasi linɛ bɛɛ ya san'an la.
12 Aa tɔ, m ba'abiisɛ, ti di Wina'am sam, ka pʋ di ninsaalib bɔɔdim sam ye ti bɛllim dɔlli lii.
13 Ya ya'a dɔl ninsaalib bɔɔdim ya na kpi. Ka ya ya'a kʋʋ ya tʋʋmbɛ'ɛd tʋʋma ka basi li nɛ Siig Kasi paŋ, ya na vʋe.
14 Nimbanɛ dɔlisid Wina'am Siig Kasi la anɛ Wina'am biis.
15 Siig Kasi kanɛ ka Wina'am tisi ya pʋ kɛ ka ya an yammis ka zɔt dabiem, ka lɛɛ kɛ ka ya an Wina'am biis ka buon Wina'am ye, “Ti Ba'.”
16 Wina'am Siig Kasi mɛŋ kɛ ka ti mɛŋ siis mi' sʋ'ʋŋa ye ti anɛ Wina'am biis.
17 Tinamɛ sadigim aan o biis la, ti na di'e yɛlsʋm banɛ ka o digil ye o tis o nidib la, ka mɛ na di'e li nɛ Kristo. Tinamɛ sadigim namis nɛ Kristo la, ti mɛ na di'e na'asi nɛ o arezana ni.
Na'asi linɛ na ti bɛ la yɛla
18 M mi' ye namisʋg linɛ ka ti nyɛt nannanna la anɛ bi'ela, ka ti kʋ nyaŋi maki li nɛ na'asi linɛ na ti nie ka ti nyɛ laa.
19 Bʋmbanɛ ka Wina'am maal dunia nwa' wʋsa gur nɛ nimmua bɔɔd saŋa kanɛ ka Wina'am na kɛ ka o biis la nie na.
20 Wina'am da kɛ ka dunia kʋ nyaŋi niŋ linɛ ka o pʋn da maali li ye li niŋ laa, ka li ka' dunia mɛŋ bɔɔdim, ka lɛɛ anɛ Wina'am bɔɔdim ka li aan ala. Hali nɛ ala, ti'ir da nan kpɛm bɛ
21 ye daar kenna ka Wina'am na faaɛn dunia wʋsa ka li kʋ ba'as yɔrii, ka na tis o biis yɔlisim linɛ mɔr girima.
22 Ti mi' ye saŋkan sa ti paae zina, dunia wʋsa ʋʋnsidi nɛ tɔɔg nwɛnɛ pu'a ɛɛnti sa'ae bɔɔd du'am si'em la.
23 Ka li ka' dunia la ma'aanɛ, ka mɛ anɛ tinam banɛ mɔr Wina'am Siig Kasi linɛ aan o piini yiiga la. Tinam mɛ ʋʋnsidnɛ ti sʋnya ni, gur saŋkanɛ ka Wina'am na nie pa'al paalʋ ni ye ti aan o biis, ka kɛ ka ti niŋgbina nyɛ yɔlisim.
24 Ti'ir kaŋa ni ka ti nyɛ faangir. Amaa ti ya'a nyɛ linɛ ka ti mɔr ti'iri li yɛla, lin ka' ti'ir ya'asɛ. Anɔ'ɔn mɔr ti'ir nɛ linɛ ka o pʋn nyɛ?
25 Ka ti ya'a mɔr ti'ir nɛ linɛ ka ti pʋ nyɛɛ, ti mɔdigidnɛ ka guri li.
26 Ala mɛn, Wina'am Siig Kasi la kena ye o sʋŋi ti, ti tadimisin. Ti zi' lin nar ye ti sɔs Wina'am si'em amaa Wina'am Siig Kasi mɛŋ sɔsid Wina'am tisidi ti ka kɛ ka ti ʋʋnsid ka sɔsidi ti sʋnya ni ka zi' tinamɛ yɛt si'ela.
27 Ka Wina'am onɛ mi' ninsaalib sʋnya la mi' Siig Kasi la pʋtɛn'ɛr, on sɔsid Wina'am tisid o nidib ka li dɔl nɛ Wina'am bɔɔdim la zug.
28 Ti mi' ye si'el mɛkama ya'a ti niŋ, Wina'am tʋmmi li ni ka maan sʋ'ʋm tisid nimbanɛ nɔŋ o ka o gaŋi ba nɛ o mɛŋ bɔɔdim la.
29 O da gaŋ ninsieba ka ba na aan o nidib ka dunia nam pʋ maalɛ ka o da gban'e ye o na kɛ ka ba nwɛnɛ o Biig nɛ, ka li kɛ ka o Biig la na an kpɛɛm o pitib bɛdegʋ san'an.
30 Ka buol nimbanɛ ka o da gban'e ye o na kɛ ka ba nwɛnɛ o Biig la o san'an, ka kɛ ka ba an pʋpielim dim o tuon, ka mɛ tisi ba girima.
Wina'am nɔŋir la yɛla
31 Dinzugɔ, bɔ ka ti na yɛlɛ? Wina'am ya'a bɛ nɛ ti, anɔ'ɔnɛ na nyaŋi niŋi ti si'ela?
32 Ka Wina'am ya'a pʋ kɛ ka o mɛŋ Biig la pɔns kum, ka zaŋ o ka o kpii ti wʋsa zugɔ, o mɛ kʋ tisi ti si'el wʋsa zaalim bɛɛ?
33 Anɔ'ɔn na nyaŋi pian' nimbanɛ ka Wina'am gaŋ la yɛla bɛ'ɛdɛ? Li anɛ Wina'am mɛŋi kʋʋs ye ba mɔr bʋʋd.
34 Anɔ'ɔn na nyaŋi kadi ba saria ka kʋʋsi ba yɛla bɛ'ɛdɛ? Li ka' Yesu Kristo onɛ da kpi ka vʋ'ʋg kumin ka zin' Wina'am datiuŋ, ka nwɛ'ɛd nu'ugʋ ti yɛla la na kʋʋsi ti yɛla bɛ'ɛdɛ.
35 Bɔɔ na nyaŋi baki ti Kristo nɔŋilimi nɛ? Daamʋg bɛɛ yɛlpakir bɛɛ namisʋg bɛɛ kɔ'ɔm bɛɛ nɔŋ bɛɛ yɛltɔɔg bɛɛ kum na nyaŋi baki ti? Ayei.
36 Li niŋnɛ wʋʋ lin da sɔb Wina'am gbauŋʋn si'em ye, “Fʋn zug, ka ba kʋʋdi ti saŋa wʋsa. Ka maannɛ ti nwɛnɛ pɛ'ɛs ka ba ye ba kɔdig nɛ.”
37 Ayei, ti anɛ nyaŋir dim yɛlbama wʋsa ni ka li yinɛ Kristo onɛ nɔŋi ti la ni.
38 M mi' sʋ'ʋŋa ye si'el kae na nyaŋi baki ti Kristo nɔŋir nii. Kum bɛɛ nyɔvʋr bɛɛ maliaknam bɛɛ si'elnam linɛ sʋ'oe nidib bɛɛ si'elnam linɛ mɔr paŋ bɛɛ linɛ niŋid nannanna bɛɛ linɛ na ti niŋ kʋ nyaŋi baki tii.
39 Hali si'elnam linɛ bɛɛ agɔl bɛɛ teŋin bɛɛ si'el mɛkama linɛ bɛ dunia nwa' wʋsa kʋdim kʋ nyaŋi baki ti Wina'am nɔŋilim linɛ yiti ti Zugsɔb Yesu Kristo ni la.
ROOM DIM 9
Israel dim la yɛla
| 9 |
Asida mɛnɛ, m pʋ ma'ada; man anɛ Kristo nid. Wina'am Siig Kasi onɛ bɛɛ m ni la dit kasɛti m pʋtɛn'ɛrin ye m pʋ ma'ada.
2 M mɔri sʋnsa'aŋ nɛ fabʋlʋg linɛ ka' makiri m sʋʋnrin.
3 Man naan siakin ye Wina'am lɛɛ pɔɔn nɔɔri tisin mam ka bakim Kristo ni m ba'abiis banɛ aan m buudi la yɛla.
4 Banɛ an buudkanɛ ka Wina'am da gaŋ la. O da kɛ ka ba aan o biis ka nyɛɛ o na'am paŋ. Ka o naal nɔɔr nɛ ba ka tisi baa o wada la nɛ o suor ye ba dɔlli li ka zun'e o. Ka ba di'e o kaanbʋg la,
5 ka an Abraham nɛ Isaak nɛ Jakob yaas. Ka Kristo onɛ daa lieb ninsaal la anɛ ba buudi. Wina'am onɛ sʋ'oe si'el wʋsa la, na nyɛ zʋn'or linɛ ka' naarɛ. Ami.
6 Lina pʋ pa'al ye, Wina'am pʋ dɔl on yɛt si'el laa. Li ka' Israel dim wʋsa an nimbanɛ ka Wina'am gaŋɛ.
7 Li mɛ ka' banɛ wʋsa yii ti yaab Abraham tuŋʋn na an Abraham yaas amɛŋaa. Amaa Wina'am da yɛl ye, “Li anɛ Isaak tuŋʋn ka fʋ yaas amɛŋa na yina.”
8 Dinzug, bibanɛ ka Abraham du'a wʋʋ ninsaalibi ɛɛnti du'a biis si'em la ka' Wina'am biisɛ. Ka banɛ ka ba du'a ka li yinɛ Wina'am kaanbʋg la ni nwɛnɛ Isaak la, banɛ sid an Abraham yaas nɛ Wina'am biis.
9 Wina'am da kaanbi yɛl ye, “Saŋkanɛ ka m na lɛb na la, Sara na du'a biribiŋ.”
10 Li ka' lin ma'aanɛ, ti yaapu'a Rebɛka da du'anɛ liiba ka ba saam aan ti yaab Isaak.
11–12 Ka saŋkanɛ ka ba da nam pʋ du'a ba la, ban da nam pʋ niŋ si'el ka li an sʋm bɛɛ bɛ'ɛd la, ka Wina'am da yɛl ye, “Kpɛɛm la na lieb o pitʋ la tʋmtʋm.” Ka yɛl ala ye o bɔɔdim la na keŋ tuon. Alazug, Wina'am gaŋir daa yinɛ o bɔɔdimin na, ka ka' ye ba niŋnɛ si'el ka li nar ye ba aan o nidiba.
13 Li sɔb Wina'am gbauŋʋn ye Wina'am yɛl ye, “M da nɔŋ Jakob ka kis Esau.”
14 Dinzugɔ, ti na yɛl ye bɔ? Ti na yɛl ye, Wina'am ka' sida daan bɛɛ? Ayei, baa bi'elaa.
15† Wina'am da yɛl Moses ye, “Man na zɔ nimbanɛ ka m gban'e ye m zɔɔ ba nimbaanlig, ka zʋ'ʋs nimbanɛ ka m gban'e ye m zʋ'ʋsi ba.”
16 Ka li pʋ dɔl ninsaalib bɔɔdim bɛɛ on niŋ si'em zugɔ, ka lɛɛ dɔlnɛ Wina'am nimbaanlzɔɔr.
17† Li da sɔb Wina'am gbauŋʋn ye, Wina'am yɛl Egipt na'ab Faaro ye, “M kɛ ka fʋ an na'ab ye m pa'alim paŋi zem si'em, ka li kɛ ka m yʋ'ʋr tiig dunia wʋsa.”
18 Dinzugɔ, Wina'am bɔɔd ye o zɔ sɔ' nimbaanlig la, on ka o zɔt o nimbaanlig ka on bɔɔd ye sɔ' an zukpi'euŋ sɔb la, o mɛ kɛt ka o aan ala.
Wina'am sʋnpɛɛn nɛ o nimbaanlzɔɔr la yɛla
19 Aa tɔ. Ya yinne na bu'osim ye, “Li ya'a an wala, bɔ ka Wina'am nyɛt nidib taalɛ? Anɔ'ɔn na nyaŋi zan'as Wina'am bɔɔdim?”
20 M zua, fʋ aan anɔ'ɔn na nyaŋi lɛbis Wina'am pian'adɛ? Dʋk kʋ bu'os onɛ ya'ab o la ye, “Bɔ ka fʋ ya'ab man wala?”
21 Onɛ ya'abid la mɔr suor ka o na nɔk ya'agbilli ya'ab on bɔɔd si'el ka mɛ mɔr suori na ya'ab dʋk kanɛ ligidi zu'oe nɛ onɛ ligidi pʋ zu'oe nɛ ya'agbil yinne.
22 Ala mɛn ka Wina'am da tʋm. O da bɔɔd ye o pa'al o sʋnpɛɛn ka kɛ ka nidib wʋsa baŋ o paŋ. Dinzugɔ o da gban'e o mɛŋ ka mɔdig nɛ banɛ ka o sʋnpɛɛn na luu ba zug ka nar ye o san'ami ba la.
23 O daa lɛm bɔɔd ye o nie o girima linɛ galis la pɛsig tinam banɛ ka o zɔɔ ti nimbaanlig ka da pʋn ti'ebi ti ye ti di'e o girima la.
24 Li anɛ tinam banɛ ka o gaŋ la, ka ka' Jew dim la ma'aanɛ, amaa banɛ ka' Jew dim la mɛn.
25 Li dɔlnɛ Hosea da sɔb Wina'am gbauŋʋn si'em la ye, Wina'am yɛl ye, “Nimbanɛ da ka' m nidib la, m na nɔki ba ka ba aan m nidib. Ka buudkanɛ ka m pʋ nɔŋ la, m na gaŋi ba ka ba lieb buudkanɛ ka m nɔŋ.”
26 “Ka zin'ikanɛ ka ba yɛli ba ye, ‘Ya ka' m nidib la,’ ba na buoli ba anina ye, ‘Wina'am onɛ vʋe la biis.’”
27† Wina'am nɔdi'es Azaya da yɛl paalʋ ni Israel dim yɛla ye,“La'an nɛ Israel dimi zu'oe wʋʋ titanbin'isʋg linɛ dig atɛuk nɔɔrin la, ba bi'ela ma'aa na nyɛ faangir.
28 Zugsɔb na kad dunia saria tɔ'ɔtɔ nɛ vuguri.”
29 Li dɔlnɛ Azaya mɛ da dɛŋi yɛl si'em la ye, “Ya'a ka' Zugsɔb Paŋtita'ar Sɔb la bas yaasi tisi ti la zugɔ, ti teŋ la wʋsa naan nwɛnɛ Sodom teŋ nɛ, ti naan nwɛnɛ Gomora dim nɛ.”
Israel dim nɛ labasʋŋ la yɛla
30 Aa tɔ. Bɔ ka ti na yɛlɛ? Buudbanɛ ka' Jew dim la da pʋ mɔɔd ye ba an pʋpielim dim Wina'am tuonnɛ, ka Wina'am lɛɛ kɛ ka ba an pʋpielim dim o tuon ka li anɛ ban niŋ o yadda la zug.
31 Ka Israel dim banɛ bɔɔd wada kanɛ na kɛ ka ba an pʋpielim dim Wina'am tuon la, lɛɛ pʋ nyɛɛ lii.
32 Bɔ ka ba pʋ nyɛɛ li? Li anɛ ban daa pʋ bɔɔdi li nɛ yadda, ka tɛn'ɛs ye ba na di'e li nɛ ba tʋʋma zug la. Ba tu'ug kugiri lu, kugkanɛ ka ba sɔbi li yɛla Wina'am gbauŋʋn ye,
33 Wina'am yɛl ye, “Gɔsima, m digil kugir Zion Zuor zug. Kugkanɛ na kɛ ka nidib tu'usid, ka an tampinkanɛ na kɛ ka ba lu. Ka onɛ niŋ o yadda la, kʋ di nyan o zugɔ.”
ROOM DIM 10
M ba'abiisɛ, m bɔɔd nɛ m sʋnf wʋsa ka sɔsid Wina'am ye m mɛŋ buudi nyɛ faangir.
2 Man tun'e dii ba kasɛt ye ba dɔl Wina'am nɛ ba sʋnf wʋsa, amaa ba dɔllim la lɛɛ pʋ yi sida mi'iliminɛ.
3 Ba zi' suokanɛ ka Wina'am kɛt ka nidib an pʋpielim dim o tuonnɛ, ka bɔɔdi ba mɛŋ suoya, ka linzug ba pʋ nɔki ba mɛŋi lɔ nɛ Wina'am suorɛ.
4 Kristo da kena kɛ ka wada la naae, ka Wina'am kɛ ka on mɛkama niŋ o yadda an pʋpielim daan o tuon.
Buudi wʋsaa na tun'e nyɛ faangir la yɛla
5 Moses da sɔb pʋpielim linɛ yi wada dɔllim ni la yɛla ye, “Onɛ siak wada nɔɔr yɛlʋg la na nyɛ nyɔvʋri li dɔllim pʋʋgin.”
6 Ka ba da sɔb pʋpielim linɛ yi yadda niŋir Wina'am ni la yɛla ye, “Da yɛli fʋ mɛŋ ye, ‘Anɔ'ɔnɛ na dʋ arezana ni?’” (Li gbin anɛ ye, anɔ'ɔnɛ na dʋ arezana ni ye o kɛ ka Kristo sig na?)
7 Bɛɛ da yɛli fʋ mɛŋ ye, anɔ'ɔnɛ na sig kpi'imnam teŋinɛ? (Li gbin anɛ ye o keŋi kɛ ka Kristo vʋ'ʋg kumin na.)
8 Ka li mɛ sɔb ye, Wina'am pian'ʋk la kpi'enif ka bɛɛ fʋ nɔɔrin nɛ fʋ sʋnfʋn. Li anɛ Wina'am yadda niŋir labaar linɛ ka ti mɔɔn la.
9 Fʋ ya'a yɛl nɛ fʋ nɔɔr paalʋ ni ye Yesu anɛ Zugsɔb la, ka siaki fʋ sʋnfʋn ye Wina'am da vʋ'ʋg o kumin, fʋ na nyɛ faangir.
10 Ti siaki ti sʋnfʋn ye Yesu anɛ Zugsɔb la, linzug ka ti lieb pʋpielim dim Wina'am tuon, ka yɛli li nɛ ti nɔɔr, ka linzug ka ti nyɛ faangir.
11 Li sɔbnɛ Wina'am gbauŋʋn ye, “Onɛ mɛkama niŋ Kristo yadda la, kʋ di nyannɛ.”
12 Gaŋir kae Jew dim nɛ banɛ ka' Jew dim la nii. Zugsɔb la anɛ Jew dim Zugsɔb, ka mɛ an banɛ ka' Jew dim la Zugsɔb, ka niŋid banɛ wʋsa sɔsid sʋŋir la zug bareka.
13† Li sɔb Wina'am gbauŋʋn ye, “Onɛ wʋsa buol Zugsɔb la yʋ'ʋr, o na nyɛ faangir.”
14 Nidib ya'a pʋ niŋ o yaddaa, ba na niŋ wala sɔs sʋŋir o san'anɛ? Ka ba ya'a pʋ wʋm labaar o yɛlaa, ba na niŋ wala niŋ o yadda? Sɔ' ya'a kae na mɔɔn labaar la, nidib na niŋ wala wʋmi li?
15 Ka wala ka nidib na tun'e mɔɔl labasʋŋ la, ka ya'a ka' ba tʋmi ba nɛ? Li sɔb Wina'am gbauŋʋn ye, “Banɛ mɔɔn labasʋŋ la ken malisi ti sʋnf pamm.”
16 Ka li ka' nidib wʋsa siak labasʋŋ laa. Azaya da sɔb Wina'am gbauŋʋn ye, “Zugsɔba, anɔ'ɔn niŋi ti labaar la yadda.”
17 Yadda niŋir yitnɛ labaar la wʋmmʋg ni. Ka labaar la wʋmmʋg yit Kristo pian'ʋk la ni.
18 Amaa m ye m bu'osi ya nɛ'ɛŋa ye, ya tɛn'ɛs ye nidib pʋ wʋm labaar laa? Sida ba wʋmya. “Ba tiig teŋ wʋsa, ka ba labaar paae dunia bɛn wʋsa.”
19 M na lɛm bu'osi ya ye, ya tɛn'ɛs ye, Israel dim pʋ gban'e Moses n sɔb si'el la gbin bɛɛ? Sida ba da gban'aya. Moses da dɛŋin yɛl ye, Wina'am yɛl Israel dim ye, “M na kɛ ka ba mɔr fufum nɛ nimbanɛ ka' ba buudii, ka kɛ ka ba sʋnf duoe nɛ buudbanɛ an yalimnam ka pʋ gban'ad yɛla gbinnɛ.”
20 Ka Azaya yɛl nɛ sʋnkpi'euŋ ye, “Wina'am yɛl ye, ‘Nimbanɛ pʋ ieedim la nyɛɛm, ka m mɛ nie m mɛŋi pa'al banɛ pʋ bu'osidi m yɛla la.’”
21† Amaa zaŋi ken Israel dim la yɛla, o yɛl ye, “Daar wʋsa m tiɛn m nu'us ye m di'e nimbanɛ tʋba zian'as ka ba pʋ siakidi m nɔɔrɛ.”
ROOM DIM 11
Wina'am n zɔt Israel dim nimbaanlig si'em
11
M ye m bu'osi ya ye, ya tɛn'ɛs ye Wina'am bas o mɛŋ nidib nɛ bɛɛ? Ayei, baa bi'elaa. M mɛŋ anɛ Israel nid, ka an Abraham yaaŋ, ka an Benjamin dɔɔg nid, ka Wina'am pʋ basi ma.
2 Wina'am pʋ bas o nimbanɛ ka o dɛŋin gaŋ la. Ya mi' linɛ sɔb Wina'am gbauŋʋn ye Elaja da pɔ'ɔg Israel dim Wina'am tuon ye,
3† “Zugsɔba, ba kʋʋ fʋ nɔdi'esidib, ka san'ami fʋ maan zin'ig la, ka mam ma'aa kpɛlim, ka ba mɔɔd ye ba kʋ mam mɛn.”
4 Ka Wina'am da lɛbisi yɛl o ye, “Mam kpɛm mɔr nidib tusa ayɔpɔi ka ba dɔllim, ka pʋ dɔl Baal linɛ an ba'ar la.”
5 Li anɛ ala nannanna. Nidib bi'ela bɛ ka Wina'am gaŋi ba o pʋpielim zug.
6 O gaŋir yinɛ o pʋpielim ni, ka ka' ba tʋʋma zugɔ. Wina'am gaŋir ya'a yiin nidib tʋʋma ni, o pʋpielim la kʋ aan sida pʋpielim.
7 Aa, tɔ. Israel dim pʋ nyɛ ban bɔɔd si'ela. Li anɛ ba bi'ela banɛ ka Wina'am gaŋ la da nyɛɛ li. Ka banɛ kpɛlim la pʋ siak Wina'am ka lieb tʋbpʋwʋmnib.
8 Li dɔlnɛ lin da sɔb Wina'am gbauŋʋn si'em la ye, “Hali ti paae zina, Wina'am kɛ ka ba ya'am an yɔɔg-yɔɔg, ka ba nini pʋ nyɛta, ka ba tʋba pʋ wʋmma.”
9 Ka David daa yɛl ye, “Wina'am na kɛ ka ba mɛŋ-mɛŋ diib lieb bɛndigʋ tisi ba ka ba na li ka nyɛ namisʋg.
10 Kɛl ka ba nini zu'om ka ba kʋ nyɛta, ka kɛ ka ba tadigi ku'usid teŋin saŋa wʋsa.”
11 Dinzugɔ, m bu'osi ya ye, ya tɛn'ɛs ye Israel dimi da yidig la, lin pa'al ye ba da ba'asnɛ yɔri bɛɛ? Ayei, baa bi'elaa. Ban yidig ka tʋm tʋʋmbɛ'ɛd la zugʋ kɛ ka banɛ ka' Jew dim la nyɛ faangir. Wina'am niŋ ala ye Israel dim na mɔr fufum nɛ banɛ ka' Jew dim la.
12 Ka Israel dimi tʋm bɛ'ɛd la zug ya'a kɛ ka dunia dim banɛ kpɛlim la nyɛ yɛlsʋm bɛdegʋ; ka ban kɔ'ɔŋ si'el nyɛɛb la ya'a kɛ ka banɛ ka' Israel dim la nyɛ Wina'am yɛlsʋŋɔ, alaa Israel dim bɛdegʋ ya'a lieb Wina'am nidiba, o na niŋi ba yɛlsʋm kanɛ galis hali pamm!
Banɛ ka' Jew dim la nyɛt faangir la yɛla
13 Nannanna nwa', m pian'adnɛ tisid yanam banɛ ka' Jew dim la. Ye Wina'am sadigim kɛ ka m an Kristo Tʋmtʋm ka tʋm yanam banɛ ka' Jew dim san'an la, m na'asid tʋʋm kanɛ ka Wina'am tisim la
14 ye li kɛ ka m mɛŋ buudi mɔr fufum nɛ banɛ ka' Jew dim la. Ka ala ka m na faanm mɛŋ buudi sieba.
15 Bɔzugɔ, Wina'am da zan'as ye Jew dim lɛn ka' o nidib la zugʋ da kɛ ka o naal nɛ dunia dim. Ka o ya'a lɛn di'e ba, li yʋ'ʋn na an wala? Li na nwɛnɛ kpi'imi lɛn vʋ'ʋg kumin na.
16 Fʋ ya'a nɔk bodobodo kanɛ ka fʋ gbin'e yiiga la tis Wina'am, linɛ kpɛlim la mɛ anɛ o din. Ka tiig nya'a ya'a an Wina'am din, tiig la wila mɛ anɛ o din.
17 Jew dim la nwɛnɛ Olif tiig linɛ bɛ yin nɛ. Ka Wina'am kɔ'ɔg tikaŋa wila sieba, ka nɔk mɔɔgin Olif tiig willi tɔ'ɔŋ yin tiig la, ka li lieb yinne. Yanam banɛ ka' Jew dim la nwɛnɛ mɔɔgin Olif tiig wil la, ka ya di'ed Wina'am yɛlsʋm linɛ yi Jew dim san'an na nwɛnɛ mɔɔgin Olif tiig wil la di'ed sʋn'um linɛ yi yin olif tiig la ni na la.
18 Dinzugɔ, da nwɛ'ɛdi nyɔ'ɔg ka nɛ'ɛs banɛ ka Wina'am kɔ'ɔgi ba bas nwɛnɛ yin tiig wila la. Da mɔr tita'alim; ka fʋ anɛ wil ma'aa. Nya'a maannif sʋ'ʋm, ka ka' fʋʋ maan nya'a sʋ'ʋm.
19 Fʋ na lɛbis ye, “Sida, Wina'am da kɔ' wila la bas la zugʋ kɛ ka paalʋ bɛɛ tis mam.”
20 Li anɛ sida. Ban pʋ niŋ Wina'am yadda la zug ka o kɔ'ɔgi ba. Ka fʋn niŋ o yadda la zug ka fʋ kpɛn tɔ'ɔŋ nɛ o. Dinzugɔ, da mɔr tita'alim, amaa zɔm dabiem.
21 Wina'am ya'a pʋ kɛ ka yin tiig wila banɛ pʋ niŋ o yadda la kpɛn tɔ'ɔŋ nɛ yin tiig la, fʋ tɛn'ɛs ye fʋn ya'a pʋ niŋ o yaddaa, o na kɛ ka fʋ kpɛn tɔ'ɔŋ bɛɛ?
22 Gɔsim Wina'am nimbaanlzɔɔr nɛ o nimmua sariakadib la an si'em. O da kad banɛ lu la saria nɛ nimmua, amaa fʋn kanɛ kpɛn niŋ o yadda la, o na kpɛn zɔti fʋ nimbaanlig. Li ya'a ka' walaa, o mɛ na kɔ'ɔgi fʋ bas.
23 Ka Jew dim ya'a tiak ka lɛn niŋ Wina'am yadda, o na kɛ ka ba mɛ lɛn tɔ'ɔŋ nɛ yin tiig la; ka Wina'am na nyaŋi niŋ ala.
24 Wina'am ya'a daa nwaae fʋn onɛ an mɔɔgin olif tiig la wil la tug pɔɔgin olif tiig la, baŋim ye li kʋ tɔi nɛ on Wina'am na zaŋ pɔɔgin olif tiig la willi lɛn lɛbisi tugi li mɛŋ-mɛŋ olif tiig la ya'asɛ.
Wina'am n zɔt nidib nimbaanlig si'em la yɛla
25 M ba'abiisɛ, m bɔɔd ye ya baŋ yɛlsu'adir kanɛ ka ya nan zi' wʋm. Ala ka ya kʋ tɛn'ɛs ye ya anɛ ya'am dim hali. Li anɛ ye Israel dim zuk
pi'euŋ la mɔri bɛn. Li na aan ala ti paae saŋkan ka banɛ ka' Jew dim wʋsa ka Wina'am gaŋ la kpɛn' Wina'am sʋ'ʋlimin.
26 Ka ala ka Israel dim wʋsa na nyɛ faangir. Li dɔlnɛ lin da sɔb Wina'am gbauŋʋn si'em la ye, “Faangid la na yi Zion zuorini kena, ka na yis Jakob yaas tʋʋmbɛ'ɛd wʋsa.
27 Ka nɛ'ɛŋa na aan m nɔnaar nɛ ba, m ya'a yisi ba tʋʋmbɛ'ɛdi bas la.”
28 Jew dim la da zan'as labasʋŋ la zug, ka ba lieb Wina'am dataas, ka li anɛ yanam banɛ ka' Jew dim la sʋ'ʋm nyɛɛb la zug. Wina'am n gaŋ Jew dim buudi nɛ ba yaanam la zug ka ba mɛ an nimbanɛ ka o nɔŋ.
29 Wina'am pʋ gaŋid nidib ka tisidi ba o piini ka lɛn tiakid o ya'am.
30 Nwɛnɛ yanam banɛ ka' Jew dimi da zan'as Wina'am, ka o yʋ'ʋn zɔɔ ya nimbaanlig ka li anɛ Jew dim la zan'as o la zug,
31 ala mɛn ka Jew dim la zan'as Wina'am nannanna ka li kɛ ka ba paam nimbaanlzɔɔr nwɛnɛ yanamɛ paam si'em la.
32 Nidib wʋsa zan'as Wina'am, ka Wina'am kɛ ka li lɔɔ ba wʋʋ ba bɛ nɛ sanrega ni, ye o na zɔ nidib wʋsa nimbaanlig.
33 Wina'am yɛlsʋm nɛ o ya'am nɛ mi'ilim galis nɛ pamm! Anɔ'ɔn na nyaŋi baŋ o pʋtɛn'ɛr bɛɛ baŋ o suoya?
34 Li dɔlnɛ lin da sɔb Wina'am gbauŋʋn la ye,
“Sɔ' kae mi' Zugsɔb pʋtɛn'ɛrɛ, bɛɛ na nyaŋi sa'al oo,
35 bɛɛ na tis o si'el ye o ti lɛbisi yɔɔ.”
36 Wina'am maal si'el wʋsa. Ka on zug ka si'el wʋsa kpɛm bɛ ye li tis o na'asi. Wina'am na nyɛ na'asi ka li ka' naarɛ. Ami.
ROOM DIM 12
Tinamɛ na tʋm Wina'am tʋʋma si'em la yɛla
12
Dinzugɔ, m ba'abiisɛ, Wina'am zɔɔ ti nimbaanlig ka li yʋ'ʋn zu'oe la zug, ka m san'anɛ ya ye ya nɔki ya mɛŋ, ka kɛ ka li an maan linɛ vʋe tis Wina'am an sʋm nyain ka ma'ae Wina'am sʋnf. Nɛ'ɛŋa an sida zun'ori tis Wina'am.
2 Da tu'asidi linɛ wʋsa ka dunia dim niŋid laa. Kɛlli ka Wina'am tisi ya ya'am paal, ka li na tiaki ya bɛllim. Ka ya na nyaŋi baŋ Wina'am bɔɔdim, bʋn linɛ an sʋm nɛ linɛ ma'ad Wina'am sʋnf.
3 Wina'am pʋpielim piinkanɛ ka o tisim la zug, ka m yɛti ya wʋsa ye ya da ʋki ya mɛŋi gaad yanamɛ an si'em laa, ka lɛɛ tɛn'ɛs nɛ sida ye ya anɛ yanamɛ kpɛn an si'em la, ka li dɔlnɛ yadda niŋir linɛ ka Wina'am tisi ya la.
4 Nwɛnɛ ti saalibi mɔr niŋgbiŋ yinne, ka li mɔr luos bɛdegʋ, ka luos wʋsa mɔri ba tʋʋma gʋn-gʋn,
5 ala mɛn, ti anɛ yinne nɛ Kristo ka nwɛnɛ niŋgbiŋ yinne nɛ, la'an nɛ tinamɛ an bɛdegʋ la. Ka ti wʋsa tɔ'ɔŋ taaba wʋʋ niŋgbiŋ yinne luosi tɔ'ɔŋ taaba si'em la.
6 Ti di'ed piini kɔn'ɔb-kɔn'ɔb, ka li yinɛ Wina'am pʋpielim ni. Dinzugɔ, ti nɔkim piini la sʋŋ taaba. Onɛ piini an nɔdi'esʋg, on di'em Wina'am nɔɔr pian'adi tis nidib ka li dɔlnɛ ti yadda niŋiri zem si'em.
7 Onɛ piini an ye o sʋŋ nidib, on sʋŋim,,, bɛɛ onɛ piini an ye o pa'al nidib Wina'am yɛla, on pa'alim.
8 Ka onɛ piini an ye o kpɛmis nidib, on kpɛmisimi ba sʋnya. Onɛ piini an tisib, on tisim nɛ o sʋnf wʋsa. Ka onɛ piini an ye o an tuongat, on tʋmmi li sʋ'ʋŋa. Ka onɛ piini an nimbaanlzɔɔr, on maalimi li nɛ sumalisim.
9 Kɛlli ka ya nɔŋir an sida nɔŋir, ka kisi bʋmbɛ'ɛd, ka gban'e linɛ an sʋm nɛ ya nu'us ayi'.
10 Ka nɔŋ taaba sʋ'ʋŋa yanamɛ an ba'abiis nɛ taaba Kristo san'an la, ka ti'e ye ya tis taaba na'asi,
11 ka tʋm bɛdegʋ tis Wina'am ka da zɔti gbanya'am, ka pɛsigi ya mɛŋi tʋm Wina'am tʋʋma nɛ nimmua.
12 Ka ya ti'ir kɛ ka ya mɔr sumalisim, ka mɔdigi ya yɛltɔɔd pʋʋgin, ka pʋ'ʋsi Wina'am saŋa wʋsa,
13 ka sʋŋ Wina'am nimbanɛ bɔɔd sʋŋir, ka di'e saamme ya yaan.
14 Sɔsim Wina'am ye o tis banɛ namisidi ya la albareka. Sida, sɔsim o ka o tisi ba albareka, ka da tisi ba nɔpɔɔrɛ.
15 Maalim sumalisim nɛ banɛ mɔr sumalisim. Ka mɔr sʋnsa'aŋ nɛ banɛ mɛ mɔr sʋnsa'aŋ.
16 Mɔri pʋtɛn'ɛr yinne nɛ taaba, ka da mɔri tita'alim, ka lɛɛ siaki la'as nɛ tadimnam. Ka da tɛn'ɛs ye ya nini nienɛɛ.
17 Da lɛbis bɛ'ɛd nɛ bɛ'ɛdɛ. Kpɛ'ɛŋimi ya mɛŋi tʋm linɛ ka nidib wʋsa gɔs ka li an sʋm.
18 Li ya'a na nyaŋ, yanam mɔɔmi ka bɛ nɛ sumbʋgʋsʋm nɛ nidib wʋsa.
19 M ba'abinɔŋa, kʋdim da lɛbis bɛ'ɛd nɛ bɛ'ɛdɛ, ka lɛɛ kɛ ka Wina'am sʋnpɛɛn niŋi li. Bɔzugɔ, li sɔb Wina'am gbauŋʋn ye, “Manɛ na yɔ tʋʋmbɛ'ɛd sam.”
20† Niŋimi wʋʋ lin sɔb Wina'am gbauŋʋn si'em la ye, “Fʋ dataa kɔ'ɔm ya'a zabid, fʋn tisim o diib ka o di, ka ku'onuud ya'a mɔr o, fʋn tisim o ku'om ka o nu; ka fʋ ya'a niŋ ala, li nwɛnɛ fʋn na vaae bugumsaana linɛ diti pa'al o sɔb zug.”
21 Da kɛ ka tʋʋmbɛ'ɛd sʋ'ʋgi yaa, ka lɛɛ nɔki tʋʋm sʋma nyaŋi tʋʋmbɛ'ɛd.
ROOM DIM 13
Tinamɛ na niŋ si'em siak paŋ dim nɔɔr la yɛla
13
Nid wʋsa siakim nimbanɛ sʋ'oe teŋ la nɔɔr. Bɔzugɔ sɔ' pʋ mɔr paŋa, asɛɛ linɛ yi Wina'am san'an na. Li anɛ Wina'am kɛ ka nimbanɛ sʋ'oe teŋ la mɔr paŋ.
2 Ka on mɛkama zan'as nimbanɛ sʋ'oe teŋ la nɔɔr, o zan'asnɛ linɛ ka Wina'am zi'el la. Ka onɛ wʋsa niŋid ala, ieednɛ tʋbtɛɛgiri tisid o mɛŋ.
3 Nimbanɛ tʋm bɛ'ɛdi zɔt paŋ dim, ka ka' nimbanɛ tʋm sʋ'ʋm laa. Ya ya'a pʋ bɔɔd ye ya zɔ nimbanɛ mɔr paŋ la, yanam tʋm linɛ nar, ka o pian' ya,
4 bɔzugɔ o anɛ Wina'am nidi ya sʋŋir zug. Ya ya'a tʋm bɛ'ɛd yanam zɔm o; ka o sid mɔr paŋ kanɛ na tisi ya namisʋg. O anɛ Wina'am tʋmtʋm, ka di'ed Wina'am sʋnpɛɛnni namisid nimbanɛ tʋm bɛ'ɛd la.
5 Alazug, li nar ye ya siak nimbanɛ mɔr paŋ la nɔɔr, ka ka'anɛ ye ya luak Wina'am sʋnpɛɛn ma'aanɛɛ, ka mɛ anɛ ye ya mi' ye linɛ an sʋm.
6 Ka li mɛ anɛ dinzug ka ya yɔɔd lampɔ la. Nimbanɛ tʋʋma an ye ba sʋ'oe nidib la tʋmnɛ Wina'am tʋʋma.
7 Tisimi ba wʋsa linɛ nar ye ba di'e. Li ya'a nar ye ba di'e lampɔ bɛɛ areza'as lampɔ, yanam yɔɔm tisi ba. Ka li ya'a nar ye ba di'e na'asi, yanam na'asimi ba.
Tinamɛ na nɔŋ taaba si'em la yɛla
8 Da mɔri sɔ' sammɛ. Yanamɛ na mɔr sam si'a anɛ ye ya nɔŋ taaba. Onɛ mɛkama nɔŋ o tiraan siak Wina'am wada la wʋsa.
9 Wina'am nɔyɛlʋgʋ nwa', “Mid ka ya san'am pu'ab. Mid ka ya kʋ nid. Mid ka ya zu. Mid ka ya mɔr fufum” Nɔɔr yɛlʋg bama nɛ banɛ kpɛlim la wʋsa la'as nɛ bʋn yinne ni, ka linɛ an ye, “Nɔŋimi fʋ tiraan wʋʋ fʋn nɔŋi fʋ mɛŋ si'em la.”
10 Onɛ nɔŋ o tiraan kʋ tʋm o bɛ'ɛdɛ. Dinzugɔ ya ya'a nɔŋ taaba, ya siak wada la wʋsa.
11 Li nar ye ya niŋ ala yanamɛ mi' saŋa la an si'em la zug. Saŋa paae ya ye ya duoe gbɛɛmin. Ti faangir saŋa yɔe, ka pʋ lal wʋʋ tinamɛ da nam pin'ili niŋ Yesu Kristo yadda si'em la.
12 Yʋ'ʋŋ bɔɔd gaadʋg, ka bɛog bɔɔd nier. Dinzugɔ ti basim lik tʋʋma linɛ an bɛ'ɛd la, ka nɔk Wina'am zaba la'ad linɛ an tʋʋm sʋma la.
13 Kɛlli ka ti bɛllim an sʋ'ʋŋa nwɛnɛ nimbanɛ bɛ nɛɛsimin, ka ti da nu daam kʋʋl bɛɛ san'am pu'ab bɛɛ zabid nɛ nidib bɛɛ mɔr fufummɛ.
14 Dɔlli ti Zugsɔb Yesu Kristo ka niŋidi wʋʋ on niŋid si'em la, ka bas ka da lɛn tɛn'ɛsid yanamɛ na niŋidi ya niŋgbiŋ bɔɔdim si'em la ya'asa.
ROOM DIM 14
Di'em ninkanɛ yadda pɔɔd, ka da nwa'asid nɛ o, o tɛn'ɛsʋg la yɛlaa.
2 Ninsɔ' yadda niŋir tun'e kɛ ka o di si'el wʋsa, ka onɛ yadda pɔɔd la kis ni'im.
3 Ka ninkanɛ dit si'el wʋsa la da nɛ'ɛs ninkanɛ kis ni'im laa. Ka onɛ kis ni'im da yɛl onɛ pʋ kis si'el la ye o niŋ linɛ ka' sʋ'ʋm; bɔzugɔ Wina'am di'e o.
4 Fʋ aan anɔ'ɔnɛ na kad sɔ' tʋmtʋm saria? O ya'a mɔr bʋʋd bɛɛ o ka' bʋʋdɛ, li anɛ o mɛŋ Zugsɔbi na yɛl o ye o di bʋʋd bɛɛ o luya. Ka o sid na di bʋʋd ka zi'e kiŋ-kiŋ, bɔzugɔ, Zugsɔb la na tun'e kɛ ka o zi'e kiŋ-kiŋ.
5 Nid yinne gɔs ka dabis-si'a an sʋm gaad dabis-sieba. Ka sɔ' gɔs ka dabisa wʋsa zem nɛ. Sɔ' wʋsa kɛl ka o pʋtɛn'ɛr an yinne.
6 Onɛ mɛkama gɔs ka dabis-si'a bɛɛ li kɔn', o sɔb niŋid ala ye o na'as Zugsɔb la. Ka onɛ dit si'el wʋsa ditnɛ tisid Zugsɔb la girima, on pʋ'ʋsid Wina'am bareka diib la yɛla la zug. Ka onɛ mɛ kis disieba diib la, niŋid ala ye o mɛ na'as Zugsɔb la, ka mɛ pʋ'ʋsid Wina'am bareka.
7 Sɔ' kae vʋe o mɛŋ yɛla, bɛɛ kpiid o mɛŋ bɔɔdim ma'aanɛɛ.
8 Ti ya'a vʋe, ti vʋnɛ tis Zugsɔb la. Ka ti ya'a kpi, ti kpinɛ tis Zugsɔb la. Aa tɔ, ti ya'a vʋe bɛɛ ti ya'a kpinɛ, ti anɛ Zugsɔb la nidib.
9 Kristo da kpi ka lɛn vʋ'ʋg kumin la ye o an banɛ kpi nɛ banɛ vʋe la Zugsɔb.
10 Ka fʋnɛ, bɔ ka fʋ kati fʋ ba'abiig saria? Bɛɛ bɔ yɛla ka fʋ nɛ'ɛsidi fʋ ba'abiiga? Ti wʋsa na zi'en Wina'am tuon ka o kadi ti saria.
11 Li sɔb Wina'am gbauŋʋn ye, “Zugsɔb yɛl ye, ‘Hali nɛ man vʋe nwa', nidib wʋsa na igin man tuon, ka zilim wʋsa na tu'asi tis Wina'am.’”
12 Aa tɔ, ti yinne-yinne na tu'as o mɛŋ yɛla wʋsa tis Wina'am.
13 Dinzugɔ, kɛlli ka ti bas ka da kati ti ba'abitaaba saria, ka lɛɛ gban'e ka da nɔk si'eli niŋi ti ba'abiig suorin linɛ ta'asid o luuga.
14 Mam an yinne nɛ ti Zugsɔb Yesu la kɛ ka m baŋ sida ye diib kae an dian'adɛ. Amaa sɔ' ya'a tɛn'ɛs ye diib bɛɛ an dian'ad, li anɛ dian'adi o sɔb san'an.
15 Fʋ ba'abiig sʋnf ya'a san'am fʋn dit disi'a la zug, fʋ pʋ tʋm nɔŋilim tʋʋmaa. Da kɛ ka dikanɛ ka fʋ di la san'ami fʋ ba'abiig onɛ ka Kristo kpii o zug laa.
16 Da kɛ ka linɛ ka fʋ gɔs ka li an sʋm la lieb bɛ'ɛd nidib pian'adinɛ.
17 Ka' diib bɛɛ nuub yɛla pak Wina'am sʋ'ʋlim la nii. Linɛ pak lɛɛ anɛ pʋpielim nɛ sumbʋgʋsʋm kanɛ ka Wina'am Siig Kasi tisid la.
18 Wina'am nini na tig banɛ wʋsa dɔl Kristo anwa, ka saalib mɛ na dii ba kasɛt sʋŋ.
19 Dinzugɔ ti mɔɔmi ka ɛɛnti niŋ linɛ na mɔr sumbʋgʋsʋm ka na sʋŋi ti ba'abitaaba.
20 Da kɛ ka diib zug kɛ ka fʋ san'am linɛ ka Wina'am maal la. Diib wʋsa nari ba di, amaa li ka' sʋ'ʋm ka fʋ di linɛ na kɛ ka fʋ taaba lu tʋʋmbɛ'ɛdinɛ.
21 Linɛ an sʋm ye fʋ niŋ anɛ ye fʋ da di ni'im bɛɛ nu daam bɛɛ niŋ si'el linɛ na kɛ ka fʋ ba'abiig luu.
22 Kɛl ka fʋn niŋ yadda si'em zaŋi ken bʋmbama ni, kpɛlim fʋn nɛ Wina'am san'an ma'aa. Albareka bɛ nɛ ninkanɛ tʋm linɛ an sʋm, ka pʋ kʋʋs o mɛŋ bɛ'ɛd la zug.
23 Onɛ bi'esid si'el yɛla ka dii li la, tʋm taal; bɔzugɔ, o pʋ dii li nɛ yadda. Ka linɛ wʋsa pʋ dɔl nɛ yadda anɛ tʋʋmbɛ'ɛd.
ROOM DIM 15
15
Li nar ka tinam banɛ yadda niŋir Yesu Kristo ni kpi'em la sʋŋ nimbanɛ ka ba yadda niŋir pɔɔd la, ka ala ka ba na nyɛ sʋnkpi'euŋʋ ba yadda niŋir ni. Ti da mɔɔd ye ti ma'ae ti mɛŋ sʋnfɔ.
2 Amaa kɛlli ka ti wʋsa niŋi dinɛ an sʋm ka ma'adi ti ba'abiig sʋnf, ka li na sʋŋ o ka o yadda niŋir kpi'em.
3 Ka Kristo da pʋ niŋ dinɛ ma'ad o mɛŋ sʋnfɔ, ka lɛɛ niŋ ka li dɔlnɛ lin sɔb Wina'am gbauŋʋn si'em la ye, “Banɛ tʋ'ʋdif la tʋ'ʋdnɛ mam.”
4 Linɛ wʋsa sɔb Wina'am gbauŋʋn la da sɔbnɛ ye li zamisi ti, ka ti mɔr ti'ir linɛ yit summɔtirin nɛ kpɛmisʋg linɛ ka Wina'am gbauŋ la yɛti ti la.
5 M sɔsid Wina'am onɛ tisidi ti summɔdigir nɛ kpɛmisʋg la ye o na kɛ ka yanamɛ dɔl Yesu Kristo la kɛ ka ya mɔr pʋtɛn'ɛr yinne,
6 ka dinzug ka ya wʋsa na mɔr nɔɔr yinne zun'e Wina'am onɛ aan ti Zugsɔb Yesu Kristo Ba' la.
Banɛ ka' Jew dim la zun'od Wina'am
7 Gban'ami nɔɔr yinne nɛ taaba ka na'as Wina'am, wʋʋ Kristo da di'e yanam si'em la.
8 M yɛli ya ye Kristo da lieb Jew dim la tʋmtʋm ye o pa'al ye Wina'am an sida sɔb, ka mɛ ye o kɛ ka Wina'am n da kaanbi ti yaanam yɛla la lieb sida,
9 ka mɛ ye banɛ ka' Jew dim la na zun'e Wina'am on zɔti ba nimbaanlig la zug. Li da sɔb Wina'am gbauŋʋn ye, “Alazugɔ, m na na'asif banɛ ka' Jew dim tuon; m na yʋʋm wɔ'ɔgi fʋ yʋ'ʋr.”
10 Ka li lɛn sɔb ye, “Yanam banɛ ka' Jew dim la la'an nɛ Jew dim la, mɔri sumalisim.”
11 Ka lɛn sɔb ye, “Nimbanɛ ka' Jew dim la wʋsa, zun'omi Zugsɔb la. Buudi wʋsa, zun'omin o bɛdegʋ.”
12 Ka Wina'am nɔdi'es Azaya mɛ sɔb ye, “Nya'ar kanɛ yi Jese gbinnin la na bul na ka Wina'am kɛ ka o sʋ'oe buudi wʋsa. Ka banɛ ka' Jew dim la na mɔr ti'ir o ni.”
13 M sɔs Wina'am onɛ tisidi ti ti'ir la, ye o na kɛ ka ya mɔr sumbʋgʋsʋm bɛdegʋ ya yadda niŋir Kristo ni la zug. Ka Wina'am Siig Kasi paŋ na kɛ ka ya ti'ir nɔbig bɛdegʋ.
Linɛ kɛ ka Paul sɔb nɛ sʋnkpi'euŋ la yɛla
14 M ba'abiisɛ, m mi' sʋ'ʋŋa ye ya anɛ banɛ an tʋʋm sʋma dim, ka mɔr mi'ilim sʋ'ʋŋa ka na nyaŋi pa'al taaba linɛ nar.
15–16 Mam mɔr sʋnkpi'euŋ ka dɛŋi sɔb yɛlsieba ye m tiɛn ya li yɛla, Wina'am tisim pʋpielim piini si'a ka m an Yesu Kristo Tʋmtʋm ye m tʋm o tʋʋma banɛ ka' Jew dimin la zug. M tʋm wʋʋ maanmaannibi ɛɛnti tisid Wina'am piini si'em la ka mɔɔn Wina'am labasʋŋ la ye banɛ ka' Jew dim la na an piini tis Wina'am linɛ na malis o, ka o Siig Kasi kɛ ka ba an sʋm nyain.
17 Mam an yinne nɛ Yesu Kristo la kɛ ka m nyaŋidi nwɛ'ɛd nyɔ'ɔg nɛ tʋʋm kanɛ ka m tʋmmi tisid Wina'am la.
18 M kʋ pian' si'eli gaad Kristo zaŋimi kɛ ka banɛ ka' Jew dim la siak Wina'am ka li anɛ m pian'ad nɛ m tʋʋma
19 nɛ paŋ kanɛ kɛ ka m nyaŋidi tʋm nyalima tʋʋma nɛ Siig Kasi paŋ la. Alazug, din yi Jerusalem giligi keŋ paae Illirikum teŋin m mɔɔl Kristo labasʋŋ la zin'ibama wʋsa.
20 Ka ɛɛnti bɔɔd nɛ m sʋnf wʋsa ye m mɔɔl Kristo labasʋŋ zin'ibanɛ ka ba nam pʋ wʋm o yɛla la, ka ka' ye m dɔlis sɔ' nɔbaa, ka anɛ manɛ pin'ili li pa'alʋg.
21 Li dɔlnɛ lin da sɔb Wina'am gbauŋʋn si'em la ye, “Nimbanɛ ka ba pʋ yɛli ba o yɛla la, na baŋi li. Ka banɛ nam pʋ wʋm o yɛla la na gban'e li gbin.”
Paul gban'e ye o keŋ kaae Room dim
22 Lina giŋim saŋa bɛdegʋ ka m pʋ nyaŋi kɛɛn ya san'an naa.
23 Ka nannanna ka m yʋ'ʋn naae m tʋʋma tembama ni, ka mɛ da bɔɔd yʋma bɛdegʋ ye m kena kaae ya,
24 ka linzug ka m mɔr pʋtɛn'ɛr ye m na nyɛɛ ya, saŋkanɛ ka m ti gati ken Spain teŋin la, ka m na bɛ ya san'an saŋa bi'ela ka li na malisim, ka ya nyaan sʋŋim ka m gaad.
25 Ka nannanna m ye m keŋnɛ Jerusalem sʋŋ Wina'am nimbanɛ bɛɛ anina la.
26 Wina'am nimbanɛ bɛ Masedonia nɛ Akaia tɛɛnsin, tɛn'ɛs ye li an sʋm ka nɔk piini tɔlim tis tadimnam banɛ an Wina'am nidib ka bɛ Jerusalem la.
27 Ba mɛŋi tɛn'ɛs ye li an sʋm ka niŋ ala. Ka li mɛ nar ye ba sid niŋ ala. Jew dim la da kɛ ka banɛ ka' Jew dim la la'am di'e Wina'am albareka linɛ sʋŋidi ba siis. Ka linzug ka li an sʋm ka banɛ ka' Jew dim la sʋŋ Jew dim ka ba di'e albareka linɛ na sʋŋi ba niŋgbina.
28 M ya'a tɔlis ligidkanɛ ka Wina'am nimbanɛ bɛ Masedonia nɛ Akaia la'as la wʋsa tis Wina'am nimbanɛ bɛ Jerusalem la naae, m na kena kaae ya ka nyaan gaadi keŋ Spain.
29 Ka m mi' ye m ya'a paae ya san'an na m na mɔr Kristo albareka bɛdegʋ na.
30 M ba'abiisɛ, m bɛlimmi ya nɛ ti Zugsɔb Yesu Kristo yʋ'ʋr nɛ Siig Kasi nɔŋilim zug ye, ya la'an nɛ mam mɔɔ sɔs Wina'am man yɛla.
31 Sɔsimi Wina'am ka o yisim banɛ ka' Wina'am nidiba ka bɛ Juda teŋin la nu'usin, ka tʋʋm kanɛ ka m ye m tʋm Jerusalem ni la malis Wina'am nimbanɛ bɛɛ anina la.
32 Alazugɔ, li ya'a an Wina'am bɔɔdim, m na kɛɛn ya san'an na nɛ sumalisim, ka nyɛ nimma'asim ya san'an.
33 Wina'am onɛ tisid sumbʋgʋsʋm na bɛ nɛ ya wʋsa. Ami.
ROOM DIM 16
Pʋ'ʋsʋg
16
M pian'adi ti taʋn Foebe onɛ tʋm Wina'am tʋʋma Senkiria karindɔɔgin la.
2 Alazug, o ya'a ti kena yanam di'em o nwɛnɛ lin nar ye Wina'am nidib di'ed taaba si'em ti Zugsɔb yʋ'ʋr zug, ka sʋŋ o nɛ on bɔɔd si'el wʋsa nwɛnɛ on sʋŋid nidib bɛdegʋ si'em la; hali nɛ mam mɛŋ.
3 Pʋ'ʋsimi Prisila nɛ Akuila, m tʋmtʋm taaba banɛ tʋm Yesu Kristo tʋʋma la.
4 Ba da siak ye ba kpi man zug . M pʋ'ʋsidi ba pamm li zug, ka li ka' mam ma'aanɛɛ, amaa la'an nɛ banɛ ka' Jew dim ka an Wina'am nidib la wʋsa mɛ pʋ'ʋsidi ba.
5 Ka pʋ'ʋs Wina'am nimbanɛ la'asidi ba yin la. Ka pʋ'ʋs m zua sʋŋ Epenetus onɛ bɛ Asia teŋin la. Onɛ daa dɛŋi siaki dɔl Yesu Kristo yiiga.
6 Ka pʋ'ʋs Mɛɛri onɛ da tʋm hali tisidi ya la.
7 Ka pʋ'ʋs Andronikus nɛ Junias banɛ aan m du'adib ka da la'am bɛ sanrega ni nɛ mam la. Kristo tʋmtʋmnib la mi' ba sʋ'ʋŋa; ka ba mɛ da dɛŋi dɔl Kristo man yiiga.
8 Pʋ'ʋsimi m zua sʋŋ Ampliatus onɛ ka m nɔŋ Kristo zug la.
9 Ka pʋ'ʋs Urbanus, ti tʋmtʋm tiraan onɛ tʋm Kristo tʋʋma la, nɛ m zua sʋŋ Stakis.
10 Ka pʋ'ʋs Apelles onɛ ka nidib bɛdegʋ baŋ ye o dɔl Kristo nɛ sida la. Ka pʋ'ʋs Aristobulus yidim.
11 Ka pʋ'ʋsi m du'ad Herodion. Ka pʋ'ʋs Narkissus yidim banɛ niŋ Zugsɔb yadda la.
12 Ka pʋ'ʋs Trifaena nɛ Trifosa banɛ tʋm Zugsɔb tʋʋma la. Ka pʋ'ʋsi m zua sʋŋ Persis onɛ tʋm bɛdegʋ tisid Zugsɔb la.
13 Ka pʋ'ʋs Rufus onɛ ka nidib bɛdegʋ mi' o tʋʋma Kristo zug la, nɛ on daa nɔŋim wʋʋ o biig la.
14 Ka pʋ'ʋs Asinkritus nɛ Flegon nɛ Hermes nɛ Patrobas, nɛ Hermas nɛ m ba'abiis wʋsa banɛ bɛ nɛ ba la.
15 Ka pʋ'ʋs Filologus nɛ Julia nɛ Nereus nɛ o taʋn nɛ Olimpas nɛ Wina'am nidib wʋsa banɛ bɛ nɛ ba la.
16 Pʋ'ʋsimi taaba nɛ nɔŋir. Kristo nidib wʋsa pʋ'ʋsidi ya.
Sa'alʋg
17 M ba'abiisɛ, m sa'ali ya ye ya gu'us nɛ nimbanɛ mɔr wɛligiri kennɛ ya san'an na ka maan si'elnam linɛ lugid nidib la, ba zan'as ka pʋ dɔl pa'alʋg kanɛ ka ya di'e laa. Luakimini ya mɛŋ nɛ ba.
18 Banɛ niŋid ala la pʋ tʋmmi ti Zugsɔb Kristo tʋʋmaa ka lɛɛ tʋm nɛ ba mɛŋ ya'amlɛog tʋʋma. Ba ma'ad nimbanɛ pʋtɛnda pʋ kpi'em la pian'ad nɛ nɔmalisiŋ.
19 Nidib bɛdegʋ wʋm yanamɛ siak labasʋŋ la si'em la, ka linzug ka m mɔr sumalisim ya yɛla. Ka m bɔɔd ye ya mɔr ya'am nɛ linɛ an sʋm, ka da mɔri pʋtɛn'ɛr nɛ linɛ an bɛ'ɛdɛ.
20 Li kpɛlim bi'ela ka Wina'am onɛ tisidi ti sumbʋgʋsʋm na san'am Sʋntaana paŋ ka kɛ ka ya nyaŋ o. Ti Zugsɔb Yesu Kristo yɛlsʋm na bɛ nɛ ya.
Pʋ'ʋsʋg ya'as
21 M tʋmtʋm tiraan Timoti pʋ'ʋsidi ya. Ka m du'adib Lukius nɛ Jason nɛ Sosipata mɛ pʋ'ʋsidi ya.
22 Man Tertius, onɛ sɔbid linɛ ka Paul pian' gbauŋ kaŋa ni la, pʋ'ʋsidi ya ti Zugsɔb yʋ'ʋr zug.
23 Gaius onɛ an m yisigidir daan nɛ onɛ yin ka Wina'am nidib la'asid la pʋ'ʋsidi ya. Erastus onɛ gur teŋ kaŋa ligidi la nɛ ti ba'abiig Kuatus, pʋ'ʋsidi ya.
24 Ti Zugsɔb Yesu Kristo yɛlsʋm bɛ nɛ ya wʋsa, Ami.
Wina'am na'asi la yɛla
25 Zun'omi Wina'am onɛ kɛt ka ya mɔr paŋi ya yadda niŋir ni la. Ala ka labasʋŋ kanɛ ka m pa'ali ya, nɛ linɛ ka m mɔɔli tisi ya Yesu Kristo yɛla la, nɛ yɛlsu'adir linɛ yʋ'ʋn nie paalʋ ni la yɛli ti. Yɛlsu'adir la da su'aya ka li yʋma lal,
26 ka Wina'am nɔdi'esidib sɔb ka li yʋ'ʋn nie paalʋ. Ka Wina'am onɛ vʋe ka ka' naar la tis nɔɔr ka buudi wʋsa baŋi li, ye nidib bɛdegʋ siak Wina'am ka niŋ o yadda.
27 Wina'am onɛ mɔr ya'am gaad sɔ' wʋsa la di'em na'asi saŋa linɛ ka' naarɛ Yesu Kristo yʋ'ʋr zug. Ami.
Yiiga Korint dim
Gbauŋ nwa' yɛla
Paul n sɔb gbauŋ kaŋa tis karimbiis banɛ bɛ Korint karindɔɔgin la ye o maal yɛlsieba banɛ da bɛ karimbiis la sʋʋgin. Korint da anɛ teŋ tita'ar ka nidib yi zin'is bɛdegʋ kena zin' ani kpiisid. Nidib la da dɔlnɛ pʋ'ʋsim kɔn'ɔb-kɔn'ɔb ka tʋʋmbɛ'ɛd mɛ bɛ bɛdegʋ. Paul da maal yɛla la nɛ yinne-yinne, ka tu'asi pa'al karimbiisi nar ye ba la'asid ka wɔ'ɔgid Wina'am si'em. O sɔb la ni, o pa'al piini kɔn'ɔb-kɔn'ɔb banɛ ka Siig Kasi la tisid nidib ye li kɛ ka karindɔɔg la kpi'em ka bɛ bɛllim sʋŋ. O lɛn pa'ali ba nimbanɛ kpi la na ti vʋ'ʋg kumin si'em.
1 KORINT DIM 1
Man Paul onɛ ka Wina'am da buolim ka m an Yesu Kristo Tʋmtʋm la, nɛ ti ba'abiig Sostenes
2 n sɔbid gbauŋ kaŋa nwa' tisid yanam banɛ an Wina'am nidibi bɛ karindɔɔg kanɛ bɛ Korint teŋin la; yanam banɛ ka o maali ya bɛ nyain ti Zugsɔb Yesu Kristo ka buoli ya ye ya an kasi la, hali nɛ banɛ bɛ zin'is wʋsa ka buonnɛ ti Zugsɔb Yesu Kristo ye o anɛ ba Zugsɔb nɛ tinam Zugsɔb la.
3 Ti Ba' Wina'am nɛ ti Zugsɔb Yesu Kristo na tisi ya yɛlsʋm nɛ sumbʋgʋsʋm.
Bareka pʋ'ʋsim
4 M pʋ'ʋsid Wina'am bareka saŋa wʋsa ya yɛla, o pʋpielim kanɛ ka ya di'e Yesu Kristo ni la zug.
5 Yanamɛ an nɔɔr yinne nɛ Kristo la zug, Wina'am tisi ya mi'ilim buudi wʋsa, ka kɛ ka ya tun'e pian'ad o yɛla sʋ'ʋŋa.
6 Kristo labaar kpɛn' ya sʋnya ni kiŋ-kiŋ.
7 Dinzugɔ, yanamɛ gur saŋkanɛ ka ti Zugsɔb Yesu Kristo na ti nie o mɛŋ na la, ya pʋ gʋ'ʋŋ piini yinne di'erɛ.
8 Wina'am na guri ya ala sʋ'ʋŋa paae dunia naar bɛn. Ka ti Zugsɔb Yesu Kristo lɛbig daar na ka o kʋ nyɛ yɛlbɛ'ɛsi'a ya nii.
9 Wina'am onɛ buoli ya ka ya niŋ nɔɔr yinne nɛ ti Zugsɔb onɛ aan o Biig Yesu Kristo la anɛ sida sɔb.
Bakir Wina'am nidib sʋʋgin la yɛla
10 M ba'abiisɛ, m sɔsidi ya nɛ ti Zugsɔb Yesu Kristo yʋ'ʋr zug ye ya wʋsa siakim taaba nɔɔr, ka bakir da bɛɛ ya sʋʋginɛ. Niŋimi nɔɔr yinne nɛ taaba ka mɔri pʋtɛn'ɛr nɛ gban'ar yinne.
11 M ba'abiisɛ, Kloe yidim sieba kena tu'asim nyain ye nɔŋgbannwa'ar bɛɛ ya sʋʋgin.
12 Li anɛ anwa: sɔ' yɛt ye, “Man dɔlnɛ Paul,” ka sɔ' mɛ yɛt ye, “Man dɔlnɛ Apollos,” ka sɔ' mɛ yɛt ye, “Man dɔlnɛ Pita,” ka sɔ' mɛ yɛt ye, “Man dɔlnɛ Kristo.”
13 Kristo wɛlig nɛ zin'is kɔn'ɔb kɔn'ɔbaa? Li da ka'anɛ Paul n da kpi dapuudir zugʋ tisi yaa, li da anɛ Kristo. Ba pʋ sʋʋ ya Wina'am ku'om ye ya an Paul nya'andɔliba, amaa ye ya dɔlnɛ Kristo.
14 M pʋ'ʋs Wina'am bareka ye m pʋ sʋʋ ya yinne Wina'am ku'om asɛɛ Krispus nɛ Gaius.
15 Dinzugɔ sɔ' kʋ nyaŋi yɛl ye, ba da sʋʋ o Wina'am ku'om ka o an Paul nya'andɔl la.
16 Ɛɛn sida, m mɛ da sʋ Stefanas nɛ o yidim Wina'am ku'om. Amaa m pʋ lɛm baŋ man sʋ sɔ' ya'asɛ
17 Kristo pʋ gaŋim ye m sʋ nidib Wina'am ku'om, amaa ye m mɔɔl Wina'am labasʋŋ la tis nidib, ka li ka'anɛ wʋʋ ninsaalib mi'ilim; bɔzugɔ li ya'a anɛ saalib mi'ilim pian'ad yɛla, alaa Kristo kum dapuudir zug la na lieb zaalim.
Kristo kum pa'an Wina'am paŋ nɛ o ya'am si'em
18 Nimbanɛ bɔdig la nɔk Kristo kum dapuudir zug labaar la ka li anɛ yalimis. Ka tinam banɛ paam faangir la mi' ye li anɛ Wina'am paŋ.
19 Bɔzugɔ li sɔb Wina'am gbauŋʋn ye, “Mam na san'am ya'am dim la ya'am, ka kɛ ka mi'ilim dim mi'ilim mɛlim.”
20 Anɔ'ɔnɛ an ya'am daana? Anɔ'ɔnɛ an gbauŋmi'ida? Dunia nwa' nɔŋgbannwa'ar daan bɛ yaanɛ? Wina'am kɛ ka dunia kaŋa nwa' ya'am anɛ yalimis.
21 Wina'am ya'am pʋʋgin ka o kɛ ka nidib kʋ baŋ o nɛ ba mɛŋ ya'am, ka lɛɛ gban'e ye o zaŋ yalimis labakanɛ ka ti mɔɔl la tilig banɛ niŋ o yadda la.
22 Jew dim bɔɔd ye bʋnnyalima maal ka ba niŋ o yadda, ka Girik dim bɔɔd ya'am.
23 Amaa tinam mɔɔnnɛ Kristo kum dapuudir zug la yɛla, labaar kanɛ ka Jew dim nɔk ka li an sisin, ka banɛ ka' Jew dim la nɔk ka li an yalimis.
24 Amaa Jew dim nɛ banɛ ka' Jew dim ka Wina'am gaŋ la, mi' ye Kristo kum labaar la anɛ Wina'am paŋ nɛ ya'am.
25 Bʋn linɛ ka Wina'am maal ka ninsaalib nɔki li ka li an yalimis la, mɔr ya'am gaad ninsaalib ya'am. Ka bʋn linɛ ka Wina'am niŋ, ka li kɛ ka ninsaalib tɛn'ɛs ye o ka' paŋ la mɔr paŋi gaad ninsaalib paŋ.
26 M ba'abiisɛ, tɛnri yanamɛ daa an si'em saŋkan ka Wina'am daa buoli ya la. Li ya'a anɛ dunia nwa' yɛla, ya pamm daa ka' banɛ mɔr ya'am bɛɛ paŋ bɛɛ an nintitada.
27 Wina'am gaŋ dinɛ ka dunia dim tɛn'ɛs ka li an yalimis ye o diis ya'am dim nyan ka mɛ gaŋ linɛ ka dunia dim tɛn'ɛs ka li ka' paŋ la, ye o diis paŋ dim nyan,
28 ka gaŋ dinɛ ka dunia dim pʋ gɔsi lii, nɛ dinɛ ka ba nɛ'ɛs, nɛ dinɛ ka ba tɛn'ɛs ka li an zaalim la, ye o san'am dinɛ ka dunia dim tɛn'ɛs ka li an nimmua bʋn la.
29 O niŋ nɛ'ɛŋa ye nid kʋ nyaŋi dʋ'ʋs o mɛŋ Wina'am tuonnɛ.
30 Amaa Wina'am kɛya ka ya an nɔɔr yinne nɛ Yesu Kristo, ka on zug ka ti mɔr ya'am, ka an pʋpielim dim Wina'am tuon, ka lieb o nidib, ka yi tʋʋmbɛ'ɛd sʋ'ʋlim ni.
31 Alazug ka li sɔb Wina'am gbauŋʋn ye, “Onɛ bɔɔd ye o nwɛ' nyɔ'ɔg, on nwɛ'ɛm nyɔ'ɔg nɛ linɛ ka Zugsɔb la tʋm la.”
1 KORINT DIM 2
Kristo kum dapuudir zug labaar la yɛla
| 2 |
M ba'abiisɛ, man daa kɛɛn ya san'an na la, m daa pʋ mɔɔl Wina'am labaar la tisi ya nɛ nɔmi'ilim nɛ ninsaalib ya'am
2 ka daa gban'e ye m kʋ mɔɔl si'el yɛla asɛɛ Yesu Kristo yɛla gʋllim, nɛ on kpi dapuudir zug la.
3 Man daa bɛɛ ya san'an la, m daa ka' paŋa, ka dabiem nɛ kikirʋg daa mɔrim.
4 M daa pʋ tu'as labaar la nɛ mi'ilim pian'ad linɛ malis nidib ka li kɛ ka ba siaki lii, ka lɛɛ daa tu'asi li nɛ ka Wina'am Siig Kasi pa'al o paŋ,
5 ye ya yadda niŋir Yesu Kristo ni pʋ yi ninsaalib ya'amin naa, ka lɛɛ yinɛ Wina'am paŋin na.
Wina'am ya'am an si'em la yɛla
6 Ka la'an nɛ lin an sida la, ti mɛ pian'ad nɛ ya'am tisid banɛ mi' Wina'am sʋ'ʋŋa. Li ka' dunia nwa' nidib ya'am bɛɛ banɛ sʋ'oe dunia nwa' ya'am. Nimbama nwa' paŋ na lieb zaalim.
7 Amaa ya'am kanɛ ka mam mɔri tu'asid nwa' anɛ Wina'am ya'am linɛ daa su'a ka nidib pʋ baŋi lii. Li anɛ bʋnkanɛ ka o da pʋn gaŋ hali ka nam pʋ maal dunia la, ye ti kpɛn' Wina'am na'am la ni.
8 Banɛ sʋ'oe dunia kaŋa nwa' sɔ' pʋ gban'e li gbinnɛ. Ba ya'a daa mi'inɛ li, ba naan kʋ kpa'an Zugsɔb onɛ an na'atita'ar la dapuudir zugɔ.
9 Ka li dɔlnɛ lin sɔb Wina'am gbauŋʋn si'em la ye, “Linɛ ka tʋbir nam pʋ wʋm, ka nif mɛ nam pʋ nyɛ la, linɛ ka nid nam pʋ tɛn'ɛs ye li na maal la, lin ka Wina'am maali ti'ebi gur banɛ nɔŋ o la.”
10 Ka Wina'am kɛ ka ti baŋi li, ka li yinɛ o Siig Kasi ni na. Siig Kasi la baŋid si'el kam zan' hali nɛ Wina'am yɛlsu'ada.
11 Anɔ'ɔnɛ lɛɛ na tun'e baŋ linɛ bɛ ninsaal pʋtɛn'ɛrin ka li ya'a ka' o siig kanɛ bɛɛ o ni la? Ala mɛn sɔ' mɛ zi' Wina'am pʋtɛn'ɛrɛ, asɛɛ Wina'am Siig la ma'aa.
12 Ti pʋ di'e dunia kaŋa siiga, amaa ti di'enɛ Siig kanɛ yi Wina'am san'an na ye li kɛ ka ti baŋ piinkanɛ ka Wina'am tisi ti zaalim-zaalim la.
13 Ka ti pʋ pian'ad nɛ pian'abanɛ ka ninsaalib pa'ali ti nɛ ba ya'am la, ka lɛɛ pian'ad nɛ pian'abanɛ ka Wina'am Siig Kasi pa'ali ti, ka bigisid Wina'am yɛlsida tisid nimbanɛ ka Wina'am Siig bɛɛ ba ni la.
14 Amaa ninkanɛ ka Wina'am ka' o ni kʋ nyaŋi di'e piini banɛ yit Wina'am Siig la ni naa, lin an yalimis o san'an la zug. Ka banɛ ka Wina'am Siig Kasi la bɛɛ ba ni la ma'aa baŋi li yɛla.
15 Onɛ ka Wina'am Siig bɛɛ o ni na nyaŋi baŋ linɛ an sʋm nɛ linɛ an bɛ'ɛdi bak. Amaa sɔ' kʋ nyaŋi kad on daana saria.
16 Li dɔlnɛ lin sɔb Wina'am gbauŋʋn si'em la ye, “Anɔ'ɔnɛ mi' Zugsɔb la pʋtɛn'ɛr ka na nyaŋi sa'al o?” Amaa tinam yadda niŋidib mɔr Kristo pʋtɛn'ɛr.
1 KORINT DIM 3
tʋmtʋmnib la yɛla
| 3 |
M ba'abiisɛ, sida, m daa pʋ tun'e pian' tisi ya wʋʋ man pian'adi tisid nimbanɛ mɔr Wina'am Siig Kasi si'em laa. M daa pian' tisi ya nwɛnɛ dunia kaŋa nidib ka nwɛnɛ bilies Kristo ni.
2 M daa tisidi ya nɛ bin'isim ka ka' sa'abɔ, bɔzugɔ ya daa nam pʋ siak sa'ab diibɔ. Hali nannanna ya nan kʋ tun'e dii lii,
3 yanamɛ nan kpɛn tʋm nwɛnɛ dunia kaŋa nidib la zug. Fufum ya'a bɛɛ ya sʋʋgin ka ya nwa'asid nɛ taaba, li pʋ pa'al ye ya anɛ dunia kaŋa nwa' nidib ka tʋm nwɛnɛ ba nɛɛ?
4 Ka ya yinne ya'a yɛl ye, “Man dɔlnɛ Paul,” ka yinne ye, “Man dɔlnɛ Apollos,” ya pʋ nwɛnɛ dunia nidiba?
5 Man aan anɔ'ɔn ka Apollos aan anɔ'ɔnɛ? Ti kʋdim anɛ tʋmtʋmnib banɛ daa kɛ ka ya di'e Wina'am. Ti yinne-yinne tʋmnɛ tʋʋm kanɛ ka Zugsɔb la tisi ti ye ti tʋm la.
6 Man daa tʋmnɛ nwɛnɛ m bʋtnɛ biili nɛ, ka Apollos dɔn'ɔsidi li, ka Wina'am kɛ ka li nɔbig.
7 Onɛ bʋt nɛ onɛ dɔn'ɔsid anɛ zaalim. Wina'am ma'aa kɛt ka biili la nɔbigid.
8 Baregaŋ ka' onɛ bʋt nɛ onɛ dɔn'ɔsid san'anɛ. Wina'am na yɔ sɔ' mɛkama wʋsa on tʋm si'em.
9 Ti anɛ tʋmtʋmnib nɛ taaba. Yanam nwɛnɛ Wina'am pɔɔg nɛ, ka mɛ lɛn nwɛnɛ Wina'am yir nɛ.
10 Man zaŋ piinkanɛ ka Wina'am tisim la tʋm nwɛnɛ tanmɛɛd sʋŋʋ na ɛɛnb ɛɛnbir, ka sɔ' mɛ sʋn'ʋli li zug. Amaa sɔ' mɛkama gu'usim o mɛŋ on mɛɛd si'em.
11 Wina'am da zaŋ Yesu Kristo ka o an ɛɛnbir la. Ɛɛnbir si'a lɛn kae ka sɔ' na nyaŋi ɛɛnbɛ.
12 Ninsieba na zaŋ sanlima bɛɛ anzurifa bɛɛ kuga banɛ ka ba ligidi zu'oe la sʋn'ʋl ɛɛnbir la zug. Ka sieba mɛ na zaŋ daad bɛɛ mɔɔdi sʋn'ʋl.
13 Yesu Kristo ken daar la na, sɔ' wʋsa tʋʋma an si'em la na nie paalʋ. Bugum na pa'ali li. Ka bugum la na mak nid wʋsa tʋʋma ka pa'al lin an si'em.
14 Bugum ya'a pʋ di sɔ' tʋʋma, o na dii li nyɔɔd.
15 Ka bugum ya'a di sɔ' tʋʋma, o kʋ dii li nyɔɔdɛ. Amaa ninkan na tilig nwɛnɛ onɛ zɔɔ pɔns bugumin nɛ.
16 Ya zi' ye ya anɛ Wina'am yir ka o Siig Kasi bɛɛ ya nii?
17 Sɔ' ya'a san'am Wina'am yir, Wina'am mɛ na san'am o. Wina'am yir anɛ o mɛŋ din gʋllim, ka yanamɛ an yikan la.
18 Sɔ' da ma' o mɛŋa. Sɔ' ya'a bɛɛ ya sʋʋgin ka tɛn'ɛs ye o anɛ ya'am sɔb dunia kaŋa nwa' ni, li an sʋm ka o kilim yalim dunia nwa' ni, linɛ na kɛ ka o lieb ya'am sɔb.
19 Linɛ ka dunia dim tɛn'ɛs ka li an ya'am la, anɛ yalimis Wina'am san'an. Li dɔlnɛ lin sɔb Wina'am gbauŋʋn si'em la ye, “Wina'am bɛnt ya'am dimnɛ gban'adi ba, ba mi'ilim pʋʋgin.”
20 Ka lɛn sɔb zin'isi'a ye, “Zugsɔb mi' ye ya'am dim tɛn'ɛsa anɛ zaalim.” 21 Dinzugɔ sɔ' da nwɛ' nyɔ'ɔg nɛ linɛ ka nidib na nyaŋi tʋm. Si'el wʋsa anɛ ya din;
22 li ya'a anɛ mam bɛɛ Apollos bɛɛ Pita bɛɛ dunia kaŋa nwa' bɛɛ nyɔvʋr bɛɛ kum bɛɛ linɛ bɛ nannanna bɛɛ saŋa linɛ na ti kena la, yanamɛ sʋ'oe bama wʋsa.
23 Ka Kristo mɛ sʋ'oe ya, ka Wina'am sʋ'oe Kristo.
1 KORINT DIM 4
Kristo tʋmtʋmnib
| 4 |
Li sʋm ye saalib gɔsidi ti ka ti sid anɛ Kristo tʋmtʋmnib banɛ ka
Wina'am gu'uli ti nɛ yɛlsu'adir linɛ aan amɛŋa la.
2 Li sʋ'ʋm ye onɛ ka ba zaŋ tʋʋma niŋ o nu'usin an yɛlsida sɔb.
3 Li pʋ daam man baa bi'ela ye yanam bɛɛ ninsieba pian'adi m yɛla wʋʋ ya anɛ sariakatib la. Hali m pʋ pian'adi m mɛŋ yɛla wʋʋ sariakata.
4 Man pʋtɛn'ɛr anɛ nyain, amaa li pʋ pa'al ye m pʋ maal bɛ'ɛdɛ. Zugsɔb la an onɛ kad man saria.
5 Dinzugɔ, da nwɛnɛ sariakatibi dɛŋi kʋʋs sɔ' ye o maal bɛ'ɛd ka Zugsɔb la nam pʋ kenaa. O ya'a ti kena, o na ti yis linɛ su'a likin paalʋ ni na, ka nie linɛ bɛ ninsaalib wʋsa pʋtɛnda ni. Saŋkan la Wina'am na pian' sɔ' wʋsa pian'asʋŋ linɛ nar o.
6 M ba'abiisɛ, yanam sʋ'ʋm yɛla ka m nɔk nɛ'ɛŋa wʋsa mak nɛ mam mɛŋ nɛ Apollos ye ya zamis tinam san'an yɛlʋg linɛ ye, “Dɔl Wina'am gbauŋ la yɛl si'em la tituaa.” Di na kɛ ka ya kʋ nwɛ' nyɔ'ɔg nɛ nid yinne ka gɔs yinne zaalim.
7 Anɔ'ɔnɛ maali ya ka ya bɛɛ ya kɔn' nɛ sieba? Bɔ ka ya mɔr ka li ka' ye Wina'am tisi ya? Ka ya ya'a di'e li, wala ka ya dʋ'ʋsidi ya mɛŋi nwɛnɛ ya pʋ di'e li?
8 Ya pʋn mɔr yanamɛ bɔɔd si'el wʋsa, ka pʋn kilim bʋndaannam! Ka mɛ lieb na'anam hali ka tinam pʋ paasɛ. M naan bɔɔdin ye ya sid aan na'anam, ka ti wʋsa la'an di na'am.
9 Man san'an, m tɛn'ɛsya ka Wina'am gaŋ tinam banɛ an tʋmtʋmnib la ka ti an tadimnam, nwɛnɛ nimbanɛ ka ba kʋʋd paalʋ ni, ka dunia dim wʋsa nɛ maliaknam la'am gɔsidi ti la.
10 Tinam anɛ zɔn Kristo zug, amaa yanam anɛ ya'am dim Kristo ni. Tinam ka' paŋa, amaa yanam mɔr paŋ. Nidib nɛ'ɛsid tinam amaa ba na'asid yanam.
11 Lin paae saŋkaŋa nwa', tinam giligid nɛ kɔ'ɔm nɛ ku'onuud ka yɛɛd kparikɛɛndi giligid zin'ig-zin'ig ka ba bʋ'ʋdi ti,
12 Ti tʋm bɛdegʋ diisidi ti mɛŋ. Ba ya'a pɔ nɔɔri tisi ti, ti lɛbisidnɛ bareka pʋ'ʋsʋg. Ba ya'a namisi ti, ti mɔdigidnɛ.
13 Ba ya'a pian' ti pian'abɛ'ɛd, ti lɛbisidnɛ pian'amalisiŋ. Ti lieb nɛ tadimnam ka nwɛnɛ dunia tampʋʋr nɛ dunia sa'ad nɛ, hali paae nannanna.
14 M pʋ sɔb nɛ'ɛŋa tisi ya ye m diisi ya nyannɛ, amaa ye m pa'ali ya nwɛnɛ ya anɛ man mɛŋ binɔŋa.
15 Hali baa ya ya'a mɔr sʋŋidib tusa piiga yanamɛ dɔl Kristo la zug, ya mɔri ba' yinne ma'aa. Bɔzugɔ ya nyɔvʋr bɛllim nɛ Yesu Kristo nɔɔr yinne la'asʋg la, manɛ liebi ya saam, mam mɔr labasʋŋ la kena tisi ya la zug.
16 Dinzugɔ m bɛlimmi ya ye ya dɔlli man maan si'em la.
17 Nɛ'ɛŋa yɛla ka m tʋm Timoti ya san'an na. O anɛ m mɛŋ binɔŋir, on an yɛlsida sɔb Zugsɔb ni la zug. Onɛ na tiɛn ya mam bɛ bɛllim si'a Kristo ni ka li dɔl nɛ bʋn linɛ wʋsa ka m pa'an yadda niŋidib banɛ bɛ zin'is wʋsa la.
18 Ya sieba mɔr nyɛɛsim tɛn'ɛsid ye m kʋ kena kaae yaa.
19 Ka Zugsɔb la ya'a bɔɔd, li kʋ yuugɛ ka m na kɛɛn ya san'an na, ka baŋ linɛ ka nyɛɛsim dim nwa' na tun'e maal, ka ka' ba pian'ad la ma'aanɛɛ.
20 Wina'am sʋ'ʋlim ka'anɛ nɔɔr pian'adɛ, amaa li lɛɛ mɔri paŋ.
21 Ya bɔɔd dinɛ? M kena fiebi ya nɛ kpa'asa bɛɛ m kena nɛ nɔŋilim nɛ sumbʋgʋsʋm?
1 KORINT DIM 5
Pu'asan'auŋ Wina'am nidib sʋʋgin la yɛla
| 5 |
Nidib yɛt ye pu'asan'auŋ bɛɛ ya sʋʋgin. Lina anɛ bʋn linɛ ka hali banɛ pʋn pʋ dɔl Yesu Kristo kis. M wʋm ye nid yinne bɛɛ ya sʋʋgin dig nɛ o saam pu'a.
2 Ka li ya'a sid aan ala, wala ka ya bɛɛ anina dʋ'ʋsidi ya mɛŋa? Li pʋ sʋ'ʋm ka ya sʋnya san'aminɛɛ? Li sʋ'ʋm ka ya yisin dau onɛ maal yɛlbɛ'ɛd kaŋa la ya kallin.
3 Hali man lalli ya san'an niŋgbiŋin la, m pʋtɛn'ɛr nam kpɛm bɛɛ ya san'an. Mam pʋn kad dau kanɛ maal yɛlbɛ'ɛd kaŋa nwa' saria
4 nɛ ti Zugsɔb Yesu paŋ, ka li nwɛnɛ m bɛ nɛ anina nɛ yanam nɛ. Yanamɛ la'asid taaba ka m pʋtɛn'ɛr bɛɛ ya san'an ka ti Zugsɔb Yesu bɛ nɛ ya nɛ o paŋ la,
5 zaŋimi dau kaŋa niŋ Sʋntaana nu'usin ka o san'am ninkaŋa niŋgbina, ka ti Zugsɔb la ken daar na, ka o siig lɛɛ paam faangir.
6 Li pʋ sʋ'ʋm ka ya mɔr nyɛɛsim. Ya pʋ baŋ ye danbin fiin nwa' kɛt ka bodobodo zɔ'ɔm ukidaa?
7 Yisim tʋʋmbɛ'ɛd banɛ ka ya maal ka li nwɛnɛ danbin kʋdig la ya san'an, ka ya na lieb nyain, ka nwɛnɛ bodobodo zɔ'ɔm kanɛ ka danbin kae. Sida m baŋya ye ya nwɛnɛ bodobodo kanɛ ka' danbinnɛ. Bɔzugɔ, ba daa kʋ Kristo ka o nwɛnɛ Wina'am Kum Maliak Gaadʋg malʋŋ pɛbili ti yɛla.
8 Dinzugɔ ti yisim pʋtɛn'ɛbɛ'ɛd nɛ tʋʋmbɛ'ɛd linɛ nwɛnɛ danbin kʋdig la, ka tʋm sida nɛ linɛ an nyain tʋʋma, ka li nwɛnɛ ti maalnɛ tiɛnr malʋŋ ka ɔnb bodobodo kanɛ ka' danbinnɛ.
9 Man daa sɔb gbauŋ si'a la, m daa yɛli ya ye ya da la'asid nɛ banɛ san'amid pu'ab bɛɛ dapa.
10 Amaa Ka'anɛ banɛ pʋ dɔl Wina'am ka an pu'asan'auŋ dima, pu'abɔɔdib bɛɛ fufum dim bɛɛ na'ayiis bɛɛ banɛ maan bada la ka m ye ya da la'as nɛ baa, ka li ya'a an ala, ya ya'a na yinɛ dunia kaŋa ni.
11 M daa sɔbi tisi ya ye ya da dɔl nɛ onɛ yɛl o mɛŋ ye o anɛ Wina'am nid, ka an pu'abɔɔd bɛɛ fufum daan bɛɛ maan ba'ar bɛɛ an nintʋ'ʋs bɛɛ onɛ nuud daam kʋʋn bɛɛ onɛ faand nidib la'adɛ. Hali da zin'in ye fʋ di nɛ niŋkan sɔba.
12 M ba'a bɔɔ bɛ nɛ banɛ pʋ pʋ'ʋsid Wina'am la ni ka m kati ba saria. Wina'am na kadi ba saria. Li anɛ ya taaba banɛ pʋ'ʋsid Wina'am ka li nar ye ya kad saria.
13 Kadimi tʋʋmbɛ'ɛd daan la ya sʋʋgin.
1 KORINT DIM 6
Antu'a mɔrim kɔɔtʋ ni la yɛla
| 6 |
Ya yinne ya'a mɔr antu'a nɛ o ba'abiig, ka pʋ mɔri keŋ banɛ an
Wina'am nidib san'an ka ba la'asi maalɛ, ka mɔri keŋ banɛ ka' Wina'am nidib kɔɔtʋ ni maal, li pʋ mɔr nyannɛɛ?
2 Ya zi' ye Wina'am nidib na ti kad dunia dim sariaa? Ka ya ya'a na ti kad dunia dim saria, ya kʋ nyaŋi tu'a antu'abibis yɛla nannannaa?
3 Ya zi' ye tinamɛ na ti kad maliaknam saria, ka kɛti dunia kaŋa nwa' yɛlaa?
4 Ka ya ya'a mɔr antu'a bama, bɔ ka ya mɔri ken banɛ pʋ dɔl Wina'am san'anɛ?
5 Nɛ'ɛŋa anɛ nyannɛ tisi ya. Wina'am nidib sʋʋgin sieba ya'a nwa'as nɛ taaba, nid sɔ' ka' ya sʋʋgini mɔr ya'am na tun'e maali ba pian'ad la?
6 Amaa yadda niŋid yinne mɔr o tiraanɛ ken sariakatib banɛ ka' yadda niŋidib la kɔɔtʋ ni ka ba tu'ad!
7 Li ya'a an sida ye ya mɔri taaba ken sariakatib banɛ ka' yadda niŋidib san'an, ya diisnɛ ya mɛŋ nyannɛ la. Hali ba ya'a pɔ'ɔgi ya bɛɛ filimmi ya li pʋ sɔn'oe yaa?
8 Amaa ya tulignɛ maan taaba bɛ'ɛd ka filim banɛ aan ya ba'abiis, Wina'am suorin la.
9 Ya pʋ baŋ ye tʋʋmbɛ'ɛd dim kʋ ti kpɛn' Wina'am sʋ'ʋlim la nii? Da ma' ya mɛŋa; nimbanɛ an pu'asan'auŋ dim bɛɛ banɛ maan bada bɛɛ dap banɛ dig nɛ ba dap taaba la,
10 bɛɛ na'ayiis bɛɛ banɛ mɔr fufum, bɛɛ banɛ nuud daam kʋʋn bɛɛ banɛ tʋ'ʋd nidib bɛɛ faandib, baa ba nid yinne kʋ kpɛn' Wina'am sʋ'ʋlimin laa.
11 Ya sieba daa anɛ ala. Ka Wina'am daa pie ya tʋʋmbɛ'ɛd ka ya lieb o mɛŋ nidib, ka o kɛ ka ya an pʋpielim dim o tuon, yanamɛ an yinne nɛ ti Zugsɔb Yesu Kristo nɛ Wina'am Siig Kasi la zug.
Tisimi Wina'am girima nɛ ya niŋgbina
12 Sɔ' na yɛl ye, “M mɔr suori na maal man bɔɔd si'el wʋsa.” Sida. Amaa li ka' si'el wʋsa an sʋm tisid oo. O na yɛl ye, “M mɔr suori na maal man bɔɔd si'el wʋsa.” Sida. Amaa m kʋ siaki lieb si'el yammʋgɔ.
13 “Diib bɛ nɛ pʋʋr yɛla, ka pʋʋr mɛ bɛ diib yɛla.” Sida! Amaa Wina'am na san'ami babayi' la wʋsa. Niŋgbiŋ la pʋ bɛ nɛ dausan'auŋ bɛɛ pu'asan'auŋ yɛllɛ, amaa li bɛnɛ Zugsɔb la yɛla ka onɛ mɛ sʋ'oe li.
14 Wina'am vʋ'ʋg Zugsɔb la kumin nɛ o paŋ, ka o paŋ la mɛ na vʋ'ʋgi ti.
15 Ya zi' ye Kristo sʋ'oe ya niŋgbina luos wʋsaa? Dinzugɔ li na an sʋm ye m zaŋ Kristo niŋgbina la'as nɛ pu'agɔɔnda niŋgbina bɛɛ? Ayei baa bi'elaa.
16 Ya zi' ye onɛ la'as o mɛŋ nɛ pu'agɔɔndir on nɛ pu'agɔɔndir la lieb nɛ niŋgbiŋ yinnee? Li sɔb Wina'am gbauŋʋn dau nɛ o pu'a yɛla ye, “Babayi' la na lieb niŋgbiŋ yinne.”
17 Amaa onɛ la'as o mɛŋ nɛ Zugsɔb la on nɛ Zugsɔb la anɛ yinne siig la pʋʋgin.
18 Luakim dausan'auŋ nɛ pu'asan'auŋ. Bɔzugɔ tʋʋmbɛ'ɛd wʋsa banɛ ka ninsaal maan pʋ bɛɛ o niŋgbina pʋʋginɛ, amaa tʋʋmbɛ'ɛd dinɛ an pu'asan'auŋ bɛ nɛ ninsaal niŋgbina ni.
19 Ya zi' ye ya niŋgbina la anɛ Siig Kasi onɛ ka Wina'am tisi ya ka o bɛɛ ya san'an la yirɛɛ? Ya pʋ sʋ'oe ya mɛŋa.
20 Wina'am da' ya nɛ. Dinzugɔ na'asimi Wina'am nɛ ya niŋgbina.
1 KORINT DIM 7
Dau nɛ o pu'a bɛllim yɛla
| 7 |
Nannanna, yanamɛ daa sɔb gbauŋ si'a la ka m sɔbidi lɛbisidi ya. Li sʋ'ʋm ka dau da di pu'a
. 2 Amaa pu'asan'auŋ bɛdegʋ bɛɛ ya teŋin la zug, dau mɛkama sʋ'ʋm ye o mɔr o mɛŋ pu'a ka pu'a mɛ mɔr o mɛŋ sid.
3 Li sʋ'ʋm ye dau tʋm o daulim tʋʋma tis o pu'a, ka pu'a mɛ niŋ ala tis o sid.
4 Bɔzugɔ pu'a pʋ sʋ'oe o mɛŋ niŋgbinaa. Li anɛ o sidi sʋ'oe li. Ka dau mɛ pʋ sʋ'oe o mɛŋ niŋgbinaa. Li anɛ o pu'a sʋ'oe li.
5 Pu'a nɛ o sid da zan'as taabaa. Asɛɛ ban na gban'e ye ba lɔ nɔɔr ka zaŋ saŋa bi'ela sɔs Wina'am, ka naan lɛn la'as nɛ taaba, ka Sʋntaana da maki ba, bɔzugɔ ba kʋ tun'e gban'e ba mɛŋa.
6 Nɛ' anɛ m mɛŋ tɛn'ɛsʋg ka ka'anɛ wadaa.
7 M tɛn'ɛsʋg anɛ ye li naan aan sʋ'ʋm ka dau wʋsa an wʋʋ man an si'em la. Amaa ninsaal mɛkama mɔr o mɛŋ piinkanɛ ka Wina'am tis o. Ti wʋsa yinne-yinne mɔr piini kɔn'ɔb-kɔn'ɔb.
8 M yɛt nɛ'ɛŋa tisidnɛ nimbanɛ ka' pu'ab bɛɛ ka' sidib la nɛ pʋkɔnya, ye li an sʋm tisi ba ka ba kpɛm bɛɛ ba gʋllim wʋʋ man bɛ si'em la.
9 Amaa ba ya'a kʋ nyaŋi gban'e ba mɛŋa, dap on dim pu'ab ka pu'ab mɛ kul sidib. Li an sʋ'ʋŋa ka ya niŋ ala gaad yanamɛ na ti mɔri li ya'amlɛog ka li zabid wʋʋ bugum.
10 M mɔr nɔyɛlʋgʋ na tis nimbanɛ mɔr pu'ab bɛɛ mɔr sidib la. Ka li anɛ Zugsɔb la din ka ka' man dinnɛ. Li anɛ ye pu'a da bas o sida.
11 Amaa o ya'a bas o sid, on zin', ka da tɔɔm kul sida, bɛɛ onɛ o sid la naalim taaba. Ka dau mɛ da bas o pu'a.
12 Nɛ'ɛŋa anɛ man mɛŋ nɔɔr yɛlʋg ka m yɛt nimbanɛ kpɛlim la. Li ka' Zugsɔb la yɛlʋgɔ. Li anɛ ye onɛ siak Wina'am ya'a mɔr pu'a sa, ka pu'a la ka' yadda niŋida, ka siak ye ba la'am bɛ, on da bas oo.
13 Pu'a onɛ siak Wina'am ya'a kul sid sa, ka dau la ka' yadda niŋida, ka siak ye ba la'am bɛ, on da bas oo.
14 Bɔzugɔ, pu'a kanɛ an Wina'am nid la tun'e kɛ ka o sid an nyain, ka dau kanɛ an Wina'am nid la tun'e kɛ ka o pu'a an nyain. Nɛ'ɛŋa ya'a ka'an ala, ba biis naan aan dian'ad dim. Ka lin an si'em la, biis la mɛ anɛ nyain.
15 Amaa onɛ ka' yadda niŋid ya'a bɔɔd ye o bas onɛ an yadda niŋid, on niŋim ala. Li ka' mugusʋg ye pu'a bɛɛ dau onɛ an yadda niŋid la'as nɛ onɛ ka' yadda niŋida. Wina'am buoli ti ye ti bɛ nɛ sumbʋgʋsʋm.
16 “Pu'a onɛ an yadda niŋida, fʋ niŋ wala baŋ ye fʋ kʋ tun'e faaɛn fʋ sida? Ka dau onɛ an yadda niŋida, fʋ niŋ wala baŋ ye fʋ kʋ tun'e faaɛn fʋ pu'a?”
Bɛ nwɛnɛ fʋn da an si'em ka Wina'am buolif la
17 Sɔ' mɛkama dɔl bɛllim kanɛ ka Wina'am tis o, nɛ on daa an si'em ka Wina'am buol o la. Nɛ'ɛŋa an linɛ ka m tisid nɔɔr Wina'am nimbanɛ bɛ zin'is wʋsa.
18 Onɛ kpɛn' baŋʋ, ka Wina'am nyaan buol o, on da mɔɔd ye o yis baŋʋ la isiri basɛ. Onɛ mɛ pʋ kpɛn' baŋʋ ka Wina'am buol o, on da kpɛn'ɛ.
19 Ka onɛ kpɛn' baŋʋ nɛ onɛ pʋ kpɛn' baŋʋ wʋsa anɛ zaalim. Linɛ pak anɛ Wina'am nɔɔr yɛlʋg la siakir.
20 Sɔ' mɛkama kpɛm bɛ on daa an si'em ka Wina'am buol o la.
21 Fʋ ya'a daa anɛ yammʋg saŋkanɛ ka Wina'am buolif, fʋn da kɛ ka li paki fɔ. Amaa fʋ ya'a na nyɛ yɔlisim suor fʋn di'em.
22 Ka onɛ ka Zugsɔb la buol, ka o an yammʋg, anɛ Zugsɔb la yɔlisim nid. Ala mɛn, yɔlisim nid on ka Kristo buol, anɛ o yammʋg.
23 Wina'am da' ya nɛ. Dinzugɔ, da liebi wʋʋ yammisi tis nidiba.
24 Alazug, m ba'abiisɛ, sɔ' mɛkama daa an si'em ka Wina'am buol o la, on bɛɛ ala nɛ Wina'am nɔɔr yinne.
Paul lɛbisa sieba pu'adiir yɛla
25 Li ya'a anɛ bipumis banɛ pʋ kul sidib la yɛla, m pʋ di'e nɔɔr Zugsɔb la san'anɛ, amaa m tu'asidnɛ m pʋtɛn'ɛri mɔr si'el linɛ ka m paam Zugsɔb la san'an o nimbaanlzɔɔr la yɛla ye ya na siak ye man yɛl si'el la anɛ yɛlsida.
26 Tɔɔgʋ an si'em nannanna la zug, man tɛn'ɛs ye li sʋ'ʋm ka nid na kpɛn an wʋʋ on pʋn an si'em la.
27 Fʋ ya'a mɔr pu'a, fʋn da mɔɔd ye fʋ bas oo. Ka fʋ ya'a an dakɔɔnr mɛn fʋn da ieed ye fʋ di pu'a.
28 Ka fʋ ya'a li'a pu'a ka o kulif, fʋ pʋ tʋm tʋʋmbɛ'ɛdɛ. Ka onɛ mɛ pʋ mɔr sid ya'a kul sid, o pʋ tʋm tʋʋmbɛ'ɛdɛ. Mam bɔɔd ye ya luak yɛlbanɛ paad dap banɛ mɔr pu'ab bɛɛ pu'a banɛ mɔr sidib dunia nwa' ni la.
29 M ba'abiisɛ, linɛ ka m yɛl la gbin anɛ ye, saŋa kanɛ ka Wina'am zi'eli tisi ti la pʋ lɛn zu'oe. Nannanna wa'ae sa, li an sʋm ka banɛ mɔr pu'ab la bɛ nwɛnɛ ba ka' pu'aba,
30 ka banɛ kaasid nwɛnɛ ba sʋnya pʋ san'am, ka banɛ la'ad nwɛnɛ ba ka' sumalisim, ka banɛ da'ad nwɛnɛ ba pʋ sʋ'oe lii,
31 ka banɛ mɔr dunia la'adi maan ban bɔɔd si'em da kɛ ka li yɛla lɔɔ ba zutɛ. Ka dunia kaŋa an si'em nannanna la, ye li gaadnɛ.
32 M pʋ bɔɔd ye si'elnam daami yaa. Dakɔɔnr gɔsidi on na niŋ si'em tʋm Zugsɔb la tʋʋma, ka niŋ si'em ka li na malis Zugsɔb la.
33 Ka pu'a daan gɔsid dunia yɛla nɛ on na niŋ si'em ka li malis o pu'a. 34 Dinzugɔ o ya'am bɔɔdim pʋdignɛ. Ka pu'a onɛ ka' sid gɔsidnɛ Zugsɔb la tʋʋma yɛla, on na niŋ si'em ka o niŋgbina nɛ o siig na ti an Wina'am din. Ka onɛ mɔr sid gɔsidnɛ dunia la'ad nɛ on na niŋ si'em ka li malis o sid.
35 Yanam sʋ'ʋm zug ka m yɛl nɛ'ɛŋa ye m sʋŋi ya. M pʋ kpɛ'ɛŋid ye m vi' ya suor nɛ linɛ aan ya bɔɔdim. Amaa m bɔɔd ye ya tʋm linɛ an sʋm nɛ dinɛ nar, ka zaŋi ya mɛŋ wʋsa pɛsig Zugsɔb la.
36 Nid ya'a mɔr o bipuŋ ka o bii tʋʋg sid kulig, ka li mɔr pɔ'ɔgir, on kɛl ka o kul sid nwɛnɛ on tɛn'ɛs si'em o sʋʋnrin la. O ya'a zaŋ o bipuŋ la tis sid, o maal sʋ'ʋŋa.
37 Ka ninkanɛ sʋʋnri kpi'em nɛ yɛlkaŋa, ka o tɛn'ɛs o pʋtɛn'ɛrin ka gban'e o ya'amin ye o na mɔr o bipuŋ la ka o da kul sida, ka mugusʋg kae, o ya'a mɔr paŋi na maal nwa', o maal sʋ'ʋŋa.
38 Alazugɔ, onɛ tisid o bipuŋ sid maal sʋ'ʋŋa. Ka onɛ mɛ pʋ tisid o bipuŋ sid maal sʋ'ʋŋa gaad ala.
39 Pu'a onɛ kul sid, ka o nam vʋe, o pʋ sʋ'oe o mɛŋa. Ka o sid ya'a kpi, suor bɛ ka o na tun'e kul onɛ ka o bɔɔd, amaa li sʋm ye o an onɛ pʋ'ʋsid Zugsɔb la.
40 Ka man tɛn'ɛs ya ka o ya'a kpɛm bɛ wʋʋ on an si'em la, li na malis o gaad on na kul dau. Man mi' ye m mɔr Wina'am Siig ka pa'annɛ ya.
1 KORINT DIM 8
Ba'ar diib la yɛla
| 8 |
Nannanna m sɔbidnɛ yɛti ya bada diib yɛla. Ti mi' ye yanamɛ yɛl si'em ye, ti wʋsa mɔr mi'ilim la, anɛ sida. Mi'ilim kɛtnɛ ka ninsaal dʋ'ʋsid o mɛŋ, amaa nɔŋir kpɛmisidi nidib.
2 Sɔ' ya'a tɛn'ɛs ye on mi' si'el, o mi'ilim la nam pʋ paae wʋʋ lin sʋ'ʋm ye o mi'in si'em laa.
3 Amaa nid ya'a nɔŋ Wina'am, Wina'am mi' o, ka gɔsid o.
4 Aa tɔ, m yɛti ya nɛ bada diib yɛla. Ti mi' ye ba'ar anɛ bʋn linɛ pʋ vʋeya, ka mɛ mi' ye Wina'am yinne ma'aa bɛ.
5–6 Hali si'elnam ya'a bɛɛ agɔl bɛɛ teŋin, ka ninsaalib buon ye wina'amnam, tinam mi' ye Wina'am yinne bɛ. Hali la'an nɛ lin an sida ye si'elnam bɛdegʋ bɛ ka ninsaalib buon ye wina'amnam nɛ zugsɔbnam la, amaa Wina'am yinne bɛ, ka anɛ ti Ba' onɛ maal si'el wʋsa ka on zug ka ti vʋe. Ka ti lɛm mi' ye Zugsɔb yinne ma'aa bɛ. O anɛ Yesu Kristo, ka ti nyɔvʋr nɛ si'el wʋsa yinɛ o ni na.
7 Ka li ka' sɔ' wʋsa mi' nɛ'ɛŋa. Ninsieba miilim bada hali ka ba ya'a di ba'ar diib ba kpɛn tɛn'ɛsidi li yɛla ye li sid anɛ ba'ar diib. Ba pʋtɛnda pʋ kpi'ema, ka ba tɛn'ɛs ye diib la miligi ba nɛ.
8 Diib pʋ kɛt ka ti li'en Wina'am; ti ya'a pʋ dii, li mɛ pʋ kɛt ka ti lal nɛ oo, ka ti ya'a di, li pʋ kɛt ka ti gat tuonnɛ.
9 Amaa gu'usimi ka ya yɔlisim kanɛ ka ya mɔri na di bada diib la da kɛ ka nimbanɛ yadda pʋ kpi'em Wina'am ni la kpɛn' tʋʋmbɛ'ɛdinɛ.
10 Dau kanɛ yadda pʋ kpi'em nɛ'ɛŋa yɛla ya'a nyɛ fʋn onɛ mɔr mi'ilim, ka fʋ bɛ ba'a maalʋg zin'igin dit diib, nɛ'ɛŋa kʋ kɛ ka o di ba'ar diibɔɔ?
11 Ka fʋ mi'ilim la zug na kɛ ka fʋ ba'abiig onɛ yadda pʋ kpi'ema ka Kristo kpii o zug la san'am.
12 Fʋ ya'a niŋid wala tʋm tʋʋmbɛ'ɛdi san'ami fʋ ba'abiig onɛ yadda pʋ kpi'em la, fʋ tʋmnɛ tʋʋmbɛ'ɛdi pɔ'ɔg Kristo.
13 Dinzugɔ, man ya'a na di si'el ka li kɛ ka m ba'abiig tʋm tʋʋmbɛ'ɛd m mɛ kʋdim kʋ ɔnb ni'im ya'asa, linɛ na kɛ ka m ba'abiig da kpɛn' tʋʋmbɛ'ɛdinɛ.
1 KORINT DIM 9
Wina'am tʋmtʋmi mɔr suosieba
| 9 |
Mam pʋ mɔr yɔlisim? M ka' Kristo tʋmtʋmma? M pʋ nyɛ Yesu onɛ aan ti Zugsɔb la? Ka li ka'anɛ m tʋʋma Zugsɔb la nii kɛ ka ya lieb yadda niŋidiba?
2 Hali sieba ya'a pʋ siak ye m anɛ Kristo Tʋmtʋmma, li nar ka yanam siak. Yanamɛ an yadda niŋidib la, nie pa'al ye m anɛ Kristo Tʋmtʋm.
3 Nidib ya'a yɛl ye m ka' Kristo Tʋmtʋmma, mam na lɛbisi ba si'em nwa'.
4 Man nɛ Barnabas pʋ mɔr suor ye ba tisi ti diib nɛ ku'om ti tʋʋma zugɔɔ?
5 Ti pʋ mɔr suori na kɛ ka pu'a kanɛ mɛ pʋ'ʋsid Wina'am dɔlli ti gɔɔnd nwɛnɛ ti Tʋmtʋm taaba la nɛ Zugsɔb pitib la nɛ Pita niŋid si'em la bɛɛ?
6 Ya tɛn'ɛs ye man nɛ Barnabas ma'aa nar ye ti tʋmmi diisidi ti mɛŋaa?
7 Soogia bɛ yaanɛ tʋm zaalim ka pʋ di'ed yɔɔdɛ? Anɔ'ɔnɛ sɛɛd tiis ka kʋ dii li wala? Ka anɔ'ɔn kimm kem niigi ka kʋ nuu ba bin'isim.
8 M pʋ yɛt nɛ'ɛŋa nɛ, nɛ ninsaalib paŋa, Wina'am wada la mɛ yɛl ala.
9 Li sɔb wada banɛ ka Wina'am da tis Moses gbauŋʋn la ye, “Mid ka ya li'a na'araad banɛ kuod la nɛ yʋgʋd.” Li anɛ niigi ka Wina'am daa yɛt bɛɛ?
10 Ayei, li anɛ tinam yɛla, bɛɛ ka' alaa? Ɛɛn nwa' sɔbnɛ ti zug. Bɔzugɔ onɛ kuod ki la kuodnɛ ka onɛ bʋ'ʋdi li la mɛ bʋ'ʋd, ka babayi' la wʋsa mɔr ti'ir ka mɔr pʋtɛn'ɛr ye ba na pʋdigi lii di.
11 Tinamɛ daa tu'asi ya labasʋŋ la, li daa nwɛnɛ ti bʋtnɛ siig bʋmbʋʋda nɛ, alazug ti mɔr suor ka ti na di'e la'abanɛ an sʋm ya san'an ka li nwɛnɛ ti bunnɛ nɛ.
12 Sieba ya'a mɔr suokanɛ ka ba na di'e la'asʋma ya san'an, tinam mɔr suor hali ka li gaad ala.
Amaa ti pʋ zaŋ suokan la ye ti di'e si'eli ya san'anɛ. Amaa ti siak ye ti kʋ maal si'el linɛ na giŋ Kristo labasʋŋ la mɔɔlʋgɔ.
13 Ya mi' ye banɛ tʋm Wina'am Pʋ'ʋsim Yin la, ba diib bɛ nɛ anina. Ka banɛ maan maana tisid Wina'am ka tʋm maan maalʋg zin'igin tʋʋma la, mɛ di'edi ba diib anina.
14 Ala mɛn, Zugsɔb la tis nɔɔr ye banɛ mɔɔn labasʋŋ la na paamidi ba si'el wʋsa nɛ anina.
15 Amaa mam pʋ zaŋ suoya banɛ ka m mɔr la yinne di'e si'ela, ka mɛ pʋ sɔbid nɛ'ɛŋa ye ya tisim si'ela. Hali m ya'a kpi, sɔn'oe sɔ' na kɛ ka m kʋ nyaŋi nwɛ' nyɔ'ɔgɔ.
16 M pʋ mɔr suori na nwɛ' nyɔ'ɔg mam mɔɔn labasʋŋ la zugɔ. Bɔzugɔ, li anɛ tilas ye m niŋid ala. M ya'a pʋ mɔɔl labasʋŋ la, yɛltɔɔg na bɛɛ m zugin.
17 M ya'a mɔɔl labasʋŋ la nɛ m mɛŋ bɔɔdim, m na di'e li yɔɔd. Amaa m ya'a pʋ mɔɔli li nɛ m mɛŋ bɔɔdim, li anɛ ye m kʋdim mɔɔnnɛ sa.
18 Ka nɛ' ya'a an sida bɔɔ an man yɔɔdɛ? Li anɛ sumalisim kanɛ ka m nyɛti yit mam mɔɔn labasʋŋ la zaalim ka pʋ di'ed si'el sɔ' san'anɛ la'an nɛ mam mɔr suori na di'e la.
19 Hali baa man mɔr yɔlisim ka sɔ' pʋ sʋ'oe m la, m zaŋi mɛŋi lieb yammʋgʋ tis nidib wʋsa ye m mɔri ba bɛdegʋ kɛn Kristo san'an na.
20 M ya'a bɛ Jew dim san'an, m liebidi wʋʋ Jew nid nɛ ye m mɔri ba kɛn Kristo san'an na. Ka m ya'a bɛ nɛ banɛ dɔl wada banɛ ka Wina'am da tis Moses la san'an, m liebidnɛ wʋʋ ba nid yinne baa nɛ mam pʋ dɔl wada la, ye m mɔri ba kɛn Kristo san'an na.
21 Ka banɛ pʋ dɔl wada la san'an ka m mɛ daa lieb wʋʋ ba nid yinne, ye m mɔri ba kɛn Kristo san'an na. Ka nɛ'ɛŋa pʋ pa'al ye m pʋ dɔl Wina'am wada laa. M dɔlnɛ Kristo wada.
22 Ka banɛ yadda pʋ zu'oe la san'an, ka m daa mɛ lieb wʋʋ ba yinne ye m sʋŋi ba. M dɔlnɛ suoya kɔn'ɔb-kɔn'ɔb nidib buudi wʋsa san'an, ye m tiligi ba sieba.
23 Labasʋŋ la zug m niŋid nɛ'ɛŋa wʋsa ye m ti di'e li bareka.
24 Ya mi' ye zɔɔgin, zɔtzɔtib wʋsa zɔtnɛ, amaa ba yinne ma'aa dit ka di'ed piini. Dinzugɔ kpɛ'ɛŋimi ya mɛŋ bɛdegʋ, wʋʋ zɔtzɔtibi zɔt si'em la, ye ya ti di'e piini Wina'am san'an.
25 Zɔtzɔtib wʋsa gban'adi ba mɛŋ si'el wʋsa ni ye ba di'e piinkanɛ kʋ yuug ka san'am. Ka tinam gban'adi ti mɛŋ ye ti di'e piinkanɛ ka' naarɛ.
26 Dinzug mam pʋ zɔt yɔɔg, yɔɔgɔ. M mɛ pʋ zabid yɔɔg-yɔɔg wʋʋ onɛ zabidi nwɛ'ɛd sisi'em la.
27 Amaa mugusidi m mɛŋi tʋm nwɛnɛ yammʋg nɛ, bɔzugɔ, m pʋ bɔɔd ye mɔɔn labasʋŋ la tisid nidib ka mam mɛŋ ti kɔ'ɔŋ yɔɔd Wina'am san'anɛ.
1 KORINT DIM 10
Ba'a dɔllim la yɛla
10
M ba'abiisɛ, m bɔɔd ye ya tɛn'ɛs linɛ da niŋi ti yaanam banɛ da dɔl Moses la. Wina'am da nɔk saŋgbauŋʋ guri ba wʋsa, ka ba wʋsa lɔ'ɔŋ atɛuk linɛ buon atɛuk Zɛn'ug la.
2 Saŋgbauŋʋn nɛ atɛukʋn la ka ba wʋsa da di'e Wina'am ku'om sʋʋb ka li pa'al ye ban nɛ Moses anɛ yinne. 3 Ba wʋsa da di nɛ siig diib yinne,
4 ka nu siig ku'om yinne; bɔzugɔ, ba da nunɛ ku'okanɛ yi tampinkanɛ ka Wina'am kɛ ka li dɔlli ba la. Tampinkan da anɛ Kristo mɛŋ.
5 Amaa nɛ wala wʋsa, Wina'am sʋnf da pʋ malis nɛ ba nidib bɛdegʋ, ka o kɛ ka ba kpi, ka ba niŋgbina dig zin'is kɔn'ɔb-kɔn'ɔb mɔɔgin la.
6 Nɛ'ɛŋanam wʋsa da anɛ zanbina nɛ sa'alʋgʋ tisi ti ye ti da bɔɔd tʋʋmbɛ'ɛd nwɛnɛ ban da niŋid si'em laa.
7 Da maannɛ bada wʋʋ ba sieba da niŋ si'em, ka li sɔb Wina'am gbauŋʋn ye, “Nidib da zin'ini di ka nu ka duoe wa'a ba'amaannib wa'a.” 8 Ti mɛ da ginnɛ yuod dap nɛ pu'ab yɔri-yɔri wʋʋ ba sieba da niŋ si'em ka daar yinne pʋʋgin ka ba tusa pisi nɛ atan' kpi la.
9 Ti mɛ da mak ye ti kpans Zugsɔb la wʋʋ ba sieba da niŋ si'em, ka wiigi da kʋʋ ba la.
10 Ka mɛ da nyɔn Wina'am wʋʋ ba sieba da nyɔn si'em, ka kum maliak da kʋʋ ba la.
11 Nɛ'ɛŋa wʋsa da niŋnɛ, ye li sa'ali ba. Ka ba sɔbi li ka li an nimmua sa'alʋgʋ tis tinam banɛ bɛ saŋa kanɛ ka dunia naar li'el la.
12 Dinzugɔ, onɛ tɛn'ɛs ye o niŋid sʋ'ʋm, ka zi'e sʋ'ʋŋa, on gu'usim, ka ya'a ka' ala, o na lu.
13 Baŋimi ye makir banɛ buudi paadi ya la nan mi' paae sieba mɛn. Amaa Wina'am anɛ yɛlsida sɔb, ka kʋ kɛ ka makir kanɛ gaadi ya paŋ la paae yaa. Ya makir pʋʋgin, o na maal suor ka tisi ya paŋ ka ya nyaŋi li.
14 Dinzugɔ, m ba'abiisɛ, luakimi nɛ bada maalʋg.
15 M pian'adi tisidi ya nwɛnɛ ya anɛ nimbanɛ mɔr ya'am. Alazug, baŋimi man yɛt si'el la gbin.
16 Nwam kanɛ ka ti yiiti zaŋi pʋ'ʋs bareka tis Wina'am la, ti ya'a nu nwam kaŋa ni, ti pʋ naalimnɛ nɛ Kristo ziim bɛɛ? Ka bodobodo kanɛ ka ti gbɛn'ɛsid la, ti ya'a ɔnb bodobodo kaŋa, ti pʋ naalimnɛ nɛ Kristo niŋgbiŋ bɛɛ?
17 Tinamɛ pʋdigid bodobodo gbil yinne dit la zug, ti anɛ niŋgbiŋ yinne la'an nɛ tinamɛ zu'oe la.
18 Gɔsimi Israel dimi niŋid si'em la. Banɛ dit diib banɛ ka ba maali tis Wina'am maan maalʋg zin'ig la, ba anɛ yinne nɛ Wina'am onɛ sʋ'oe maan maalʋg zin'ig la.
19 Bɔ ka m yɛt nwa'? Ya tɛn'ɛs ye man yɛl ye ba'ar bɛɛ diib linɛ ka ba maannɛ tisidi li la anɛ si'el bɛɛ?
20 Ayei, m yɛt ye, linɛ ka ba'amaannib maannɛ tisid bada la, ba maannɛ tisidnɛ kikiris, ka pʋ maannɛ tisid Wina'am. M pʋ bɔɔd ye ya an yinne nɛ kikirisɛ.
21 Ya kʋ nyaŋi nu Zugsɔb nwam la ni, ka lɛn nu kikiris nwam la nii, ka mɛ kʋ nyaŋi di Zugsɔb la diib, ka lɛn di kikiris diibɔ.
22 Ti bɔɔd ye fufum kpɛn' Zugsɔb la bɛɛ? Ya tɛn'ɛs ye ti mɔr paŋi gaad o?
23 Ba ye, “Suor bɛ ka ti na maal si'el wʋsa.” Ɛɛn, sida. Amaa li ka' si'el wʋsa mɔr nyɔɔdɛ. “Suor bɛ ka ti na maal si'el wʋsa.” Amaa li ka' si'el wʋsa kpɛmisid nidiba.
24 Sɔ' da tɛn'ɛsid o mɛŋ yɛlsʋm ma'aanɛ, amaa o mɛ tɛn'ɛsim o taaba yɛla.
25 Ɔmmi ni'im kanɛ wʋsa ka ba kuosid da'an. Ka da kɛ ka ya pʋtɛnda kɛ ka ya bu'osid bu'osaa.
26 Li sɔb Wina'am gbauŋʋn ye, “Teŋgbauŋ la anɛ Zugsɔb la din, nɛ linɛ bɛɛ li pʋʋgin wʋsa.”
27 Fʋ ya'a keŋ onɛ ka' yadda niŋid yin ka o tisif diib, fʋn dim linɛ ka o mɔra zi'eli fʋ tuon la, ka da bu'os ye bɔ ni'imi nwaa.
28 Amaa sɔ' ya'a yɛlif ye, “Dikaŋa nwa' anɛ ba'ar diib” fʋn da dii. Ka li na sʋŋ fʋn nɛ onɛ yɛlif la pʋtɛnda.
29 Li ka'anɛ fʋn mɛŋ pʋtɛn'ɛr yɛlaa, amaa li anɛ sɔ' pʋtɛn'ɛr yɛla. Bɔzug ka m mɔr yɔlisim ka sɔ' pʋtɛn'ɛr kati m saria?
30 M ya'a pʋ'ʋs Wina'am bareka ka di diib, bɔ ka sɔ' na pɔ'ɔg mam nɛ bʋn linɛ ka m pʋ'ʋs Wina'am bareka li yɛla la?
31 Ya ya'a di bɛɛ nu bɛɛ niŋ si'el mɛkama, yanam niŋimi li wʋsa ka li dʋ'ʋs Wina'am yʋ'ʋr.
32 Da niŋ si'el Jew dim bɛɛ Girik dim bɛɛ Wina'am nidib san'an ka li daami baa.
33 Niŋimi wʋʋ man niŋid si'em la. Hali m mɔɔd ye m tʋm linɛ malis sɔ' mɛkama si'el wʋsa pʋʋgin. Bɔzugɔ m pʋ bɔɔd man mɛŋ sʋ'ʋm yɛla ma'aanɛ, amaa nidib wʋsa sʋ'ʋm yɛla, ye ba paam faangir.
1 KORINT DIM 11
Zugpilib Wina'am pʋ'ʋsʋgin la yɛla
11
Tu'asimi man tʋʋma wʋʋ man tu'asid Kristo tʋʋma si'em la.
2 M pian'adi ya ka li anɛ yanamɛ tiɛndi m yɛla si'el wʋsa ni ka mɔr pa'alʋg kanɛ ka m tɔlisi tisi ya la zug.
3 Amaa m bɔɔd ye ya baŋ ye Kristo an dau wʋsa zugdaan, ka dau mɛ aan o pu'a zugdaan, ka Wina'am mɛ an Kristo zugdaan.
4 Dinzugɔ, dau onɛ pʋ'ʋsid Wina'am bɛɛ di'ed Wina'am pian'adi tisid nidib, ka si'el pil o zug, o sɔb diis nɛ Kristo nyan.
5 Ka pu'a onɛ pʋ'ʋsid Wina'am bɛɛ di'ed Wina'am pian'adi tisid nidib, ka si'el pʋ pil o zugɔ, o diis nɛ o sid nyan. Li nwɛnɛ o pʋn o zug la nɛ.
6 Pu'a ya'a zan'as ka pʋ pil o zugɔ, on kiesim o zuobid. Ti mɛ mi' sʋŋa ye pu'a ya'a pʋn o zug bɛɛ kies o zuobid, li anɛ nyannɛ tis o, alazug, o ligilim o zug.
7 Wina'am maal dau nwɛnɛ o mɛŋ ye o tis o girima la zug, lin ka li pʋ nar ye o zaŋ si'eli pil o zugɔ. Alazug, pu'a la mɛ mɔr girima tisid dau.
8 Wina'am da pʋ zaŋ pu'a kɔnbiri maal dau, amaa o da zaŋ nɛ dau kɔnbiri maal pu'a.
9 Wina'am mɛ da pʋ maal dau pu'a zugɔ, amaa o da maalnɛ pu'a dau zug.
10 Maliaknam la zug, li sʋ'ʋm ka pu'a zaŋ si'eli ligil o zugʋ pa'al ye o bɛ nɛ o sid la nu'usin.
11 Amaa Zugsɔb nidib la pʋʋgin, pu'a bɛ nɛ dau nu'usin, ka dau mɛ bɛ pu'a nu'usin.
12 Wina'am da zaŋ dau maal pu'a. Ala mɛn ka pu'ab mɛ du'ad dap. Ka si'el wʋsa yit nɛ Wina'am san'an na.
13 Yanam mɛ tɛn'ɛsim gɔsɛ. Li sʋm ye pu'a pʋ'ʋs Wina'am paalʋ ni ka si'el ka' o zuginɛɛ?
14 Ti malima pʋn pa'ali ya ye dau ya'a bas o zuobid ka li wa'am, o diisidnɛ o mɛŋ nyan,
15 amaa zuobid anɛ vɛnlim tis pu'a. Wina'am maal o zuobid ka li wa'am ye li an o zupibig.
16 Amaa sɔ' ya'a bɔɔd ye o nwa'asi li yɛla, mam na lɛbis si'el anɛ ye, tinam bɛɛ Wina'am nidib pʋ mɔr malʋŋ si'a linɛ bɛ zugpilib pʋʋginɛ.
Zugsɔb nɔnaar diib la yɛla
17 M pʋ zun'odi ya yɛlkanɛ ka m ye m yɛli ya laa, bɔzugɔ ya ɛɛnti la'as taaba ka ya tʋʋmbɛ'ɛd gati ya tʋʋm sʋma.
18 Yiiga zin'igin, m wʋmya ye ya ya'a ɛɛnti la'as taaba ye ya pʋ'ʋs Wina'am, wɛligir bɛɛ ya sʋʋgin. M mɛ siak ye labaya la sieba anɛ sida.
19 Bi'esʋg kae, ye wɛligir na bɛɛ ya sʋʋgin ye ba baŋ banɛ dɔl sida suor la paalʋ nii.
20 Hali baa yanamɛ ɛɛnti la'as taaba ye ya ditnɛ Zugsɔb Diib la, li pʋ dɔl suorɛ.
21 Bɔzugɔ ya ya'a la'as, sɔ' mɛkama ditnɛ o mɛŋ diib, ka sieba kɔ'ɔm zabid ka sieba nuu kʋʋl.
22 Ya pʋ mɔr yaa na di ka nuu? Bɛɛ ya kʋdim bɔɔd ye ya nɛ'ɛs Wina'am nidib ka diis nɔŋ dim nyannɛ? M na yɛli ya ye bɔ? M zun'e ya nɛ' zug bɛɛ? Ayei, m kʋ zun'e yaa.
23 Man daa di'e pa'al si'a Zugsɔb la san'an, linɛ nwa' ka zaŋi tɔlisidi tisidi ya: Yʋ'ʋŋ kanɛ ka ba zammi ti Zugsɔb la, ka o zaŋ bodobodo
24 pʋ'ʋs Wina'am bareka, ka gbin'esi li, ka ye, “Nɛ'ɛŋa anɛ m niŋgbiŋ kanɛ ka m tisi ya. Niŋimini ala ka li tiɛndi ya m yɛla.”
25 Ka ban dii naae la, ka o zaŋ nwam, ka yɛl ye, “Nwam kaŋa anɛ Wina'am nɔnapaal linɛ an man ziim. Ya ya'a ɛɛnti nuu li, yanam niŋimi li ka li tiɛn m yɛla.”
26 Alazug, ya ya'a ɛɛnti ɔnb bodobodo la ka nu nwam kaŋa ni, ya mɔɔnnɛ Zugsɔb la kum yɛla gur o lɛbig na.
27 Alazugɔ, onɛ mɛkama ɔnb Zugsɔb la bodobodo ka nu o nwam la ni, ka li pʋ sʋ'ʋm ye o di ka nuu, o tʋm nɛ tʋʋmbɛ'ɛdi tis Zugsɔb la niŋgbiŋ nɛ o ziim la.
28 Sɔ' wʋsa tɛn'ɛsim sʋ'ʋŋa ka nyaan ɔnb bodobodo kaŋa ka mɛ nu nwam kaŋa ni.
29 Onɛ mɛkama pʋ baŋ Zugsɔb la niŋgbiŋ la gbinnɛ, ka mɛ di ka nu, o na nyɛ kʋʋsbɛ'ɛd on di ka nu la zug.
30 Dinzug ka ya bɛdegʋ an ban'adnam, ka sieba ka' paŋa, ka sieba kpi la.
31 Ti ya'a maki ti mɛŋ yiiga sʋ'ʋŋa, ti kʋ kpɛn' Wina'am sariakadib nii.
32 Amaa Zugsɔb la kad tinam saria ka namisidi ti ye ti zamis ka da ti la'as nɛ dunia nidibi nyɛ kʋʋsbɛ'ɛdɛ.
33 Dinzugɔ, m ba'abiisɛ, ya ya'a la'as taaba ye ya di Zugsɔb diib la, yanam on gur taaba.
34 Onɛ kɔ'ɔm zabid, on dim o yin ka nyaan kena, ka da kpɛn' Zugsɔb la sariakadib nii. Li ya'a anɛ yɛl banɛ kpɛlim la, m ya'a ti kena, m na sa'ali ya li yɛla.
1 KORINT DIM 12
Wina'am Siig Kasi piini la yɛla
12
M ba'abiisɛ, nannanna m yɛti ya nɛ piini linɛ yit Wina'am Siig Kasi ni na la yɛla. M bɔɔd ye ya baŋi li yɛla an sida si'em.
2 Ya mi' ye yanamɛ daa nan ka' yadda niŋidib la, ba'a kpiilima daa mɔri ya dɔl suobɛ'ɛdin.
3 Dinzugɔ, m bɔɔd ye ya baŋ ye Wina'am Siig Kasi la ya'a bɛ sɔ' ni, o kʋ tun'e pian' Yesu yɛla bɛ'ɛdɛ. Ka sɔ' mɛ kʋ tun'e yɛl ye Yesu anɛ Zugsɔba, ya'a ka' ye Wina'am Siig Kasi la bɛɛ o sɔb nii.
4 Siig Kasi la tisid piini kɔn'ɔb-kɔn'ɔb. Amaa li wʋsa yitnɛ Siig Kasi yinne la ni.
5 Tʋʋma kɔn'ɔb kɔn'ɔbi bɛ. Amaa li anɛ Zugsɔb yinne ka ti tʋmmi tisid.
6 Tʋʋma kɔn'ɔb kɔn'ɔbi bɛ. Amaa li anɛ Wina'am yinne tisid nidib ya'am ka ba tʋmmi li.
7 Wina'am Siig Kasi la tisid yadda niŋidib wʋsa piini si'a linɛ pa'an Siig Kasi la paŋ ye li sʋŋ Wina'am nidib wʋsa.
8 Siig Kasi la tisid ninsieba piini ka ba pian'ad ya'am pian'ad, ka tisid sieba mi'ilim pian'ad,
9 ka tisid sieba yadda tita'ar Wina'am ni, ka tisid sieba piini linɛ na ti'eb ban'adnam,
10 ka tisid sieba paŋ ka ba na nyaŋi tʋm tʋʋmnyalima, ka tisid sieba piini ka ba di'ed Wina'am nɔɔri tisid nidib, ka tisid sieba ya'am ka ba na nyaŋi baŋ linɛ yi Siig Kasi la san'an na nɛ linɛ pʋ yii o san'an naa, ka tisid sieba piini ka ba na tun'e pian' pian'azʋna, ka tisid sieba ka ba na tun'e tu'as pian'azʋna la gbinnɛ an si'el.
11 Li anɛ Siig Kasi yinne la niŋid nɛ'ɛnam wʋsa. O tisid sɔ' mɛkama nɛ piini gʋn-gʋn wʋʋ on bɔɔd si'em.
Niŋgbiŋ yinne nɛ luos bɛdegʋ la yɛla
12 Kristo nidib nwɛnɛ niŋgbiŋ yinne mɔr luos bɛdegʋ si'em la. Hali nɛ lin mɔr luos buudi kɔn'ɔb-kɔn'ɔb la li kpɛn anɛ niŋgbiŋ yinne.
13 Tinam wʋsa banɛ an Jew dim nɛ banɛ ka' Jew dim, yammis nɛ banɛ ka' yammis la wʋsa, Kristo tisi ti wʋsa Wina'am Siig Kasi yinne ka kɛ ka ti lieb niŋgbiŋ yinne. Wina'am tʋm o Siig Kasi yinne la tisi ti wʋsa.
14 Niŋgbiŋ la pʋ mɔr luaa yinne ma'aanɛ. Li mɔri luos bɛdegʋ.
15 Nɔbir ya'a yɛlin ye, “Man ka' nu'ug la zug, m ka' niŋgbiŋ la nii,” lin kʋ nyaŋi kɛ ka o ka' niŋgbiŋ la nii.
16 Tʋbir mɛ ya'a yɛlin ye, “Man ka' nif la zug, m ka' niŋgbiŋ la nii,” lin kʋ nyaŋi kɛ ka o ka' niŋgbiŋ la nii.
17 Niŋgbiŋ la wʋsa ya'a aannɛ nifɔ, li ye li niŋin wala wʋm pian'adɛ? Ka li ya'a aannɛ tʋbirɛ, li ye li niŋin wala wʋm nyuugɔ?
18 Lin an si'em la, Wina'am maal niŋgbiŋ luos wʋsa tɔ'ɔŋ wʋʋ on bɔɔd si'em.
19 Li wʋsa ya'a aannɛ luaa yinne ma'aa, niŋgbiŋ naan kʋ bɛɛnɛ.
20 Lin an si'em la, luos bɛdegʋ bɛ, amaa li anɛ niŋgbiŋ yinne.
21 Dinzugɔ, nif kʋ nyaŋi yɛl nu'ug ye, “M pʋ bɔɔdi fʋ sʋŋirɛ.” Zug mɛ kʋ nyaŋi yɛl nɔba ye, “M pʋ bɔɔdi ya sʋŋirɛ.”
22 Ka ti niŋgbiŋ la luos banɛ nwɛnɛ ba ka' paŋ la ya'a kae, niŋgbiŋ la kʋ tʋm.
23 Ti gɔsid niŋgbina luos banɛ ka ti nɛ'ɛs la sʋ'ʋŋa, ka na'asid nyan luos banɛ ka ti pʋ bɔɔd ye nidib nyɛ la liginnɛ ba.
24 Ka li pʋ nar ka ti ligin luosʋma laa. Wina'am mɛŋ maali ti niŋgbina ka tis luos banɛ ka ti gɔs ka ba nyɔɔd pʋ zu'oe la na'asi gaad luaa mɛkama.
25 Dinzugɔ wɛligir kae ti niŋgbina la nii. Luos kɔn'ɔb-kɔn'ɔb la bɔɔd taaba sʋŋir.
26 Dinzugɔ luaa yinne ya'a namisid, luos la wʋsa mɛ namisidnɛ. Luoa yinne ya'a nyɛ na'asi, luos la wʋsa mɔri sumalisim.
27 Ya wʋsa nwɛnɛ Kristo niŋgbiŋ nɛ. Ka sɔ' kam wʋsa mɛ nwɛnɛ o niŋgbiŋ la luaa sieba.
28 Wina'am gaŋnɛ tʋmtʋmnib o nidib sʋʋgin ka ba an kpɛɛmnam, ka gaŋ nɔdi'esidib ka ba tia'ali ba, ka nyaan gaŋ pa'annib, ka yʋ'ʋn gaŋ banɛ maan tʋʋmnyalima, ka lɛn gaŋ sieba ka ba na tun'e ma'ae ban'as, ka gaŋ sieba ka ba sʋŋid nidib ka gaŋ sieba ka ba gɔsid ka bigisid nidib tʋʋma an si'em, ka gaŋ sieba ka ba pian'ad pian'azʋna.
29 Ti wʋsa ka' tʋmtʋmnib bɛɛ nɔdi'esidib bɛɛ pa'anniba. Li ka' ti wʋsa mɔr paŋi na tʋm tʋʋmnyalima
30 bɛɛ ti'eb ban'adnam bɛɛ pian' pian'azʋna, bɛɛ nyaŋi tu'as pian'azʋna la gbinnɛ.
31 Bɔɔmi piintitada gaad bʋn wʋsa. Ka m na pa'ali ya suor linɛ gati ba wʋsa.
1 KORINT DIM 13
Nɔŋilim yɛla
13
M ya'a pian'ad ninsaalib pian'ad buudi nɛ maliaknam pian'ad, ka pʋ mɔr nɔŋilim, m kʋdim nwɛnɛ lʋmmir bɛɛ binnir linɛ vuudnɛ.
2 Ka m ya'a mɔr nɔdi'esʋg piini linɛ ka Wina'am tisid ka m nyaŋi baŋ yɛlsu'ada wʋsa, ka mɔr mi'ilim wʋsa, ka m yadda kpi'em Wina'am ni ka na nyaŋi yɛl zuor ka li viki tɔɔm, ka pʋ mɔr nɔŋilim, m anɛ zaalim.
3 Ka m ya'a zaŋ man mɔr si'el wʋsa tis nɔŋ dim, hali ka zaŋi m niŋgbiŋi tis ka ba nyu'oe nɛ bugum, ka pʋ mɔr nɔŋilim, m ka' nyɔɔdɛ.
4 Nimbanɛ mɔr nɔŋilim, mɛ mɔr suguru, ka sʋŋid nidib, ka pʋ mɔr fufum bɛɛ dʋ'ʋsi-m-mɛŋa.
5 Ba ka' nyɛɛsim bɛɛ tita'alim bɛɛ bɔɔdi ba mɛŋ sʋŋir ma'anɛ, bɛɛ sɔ' ya'a maali ba bɛ'ɛd ba pʋ mɔri lii ba sʋʋnrinɛ.
6 Nɔŋilim pʋ mɔr sumalisim nɛ tʋʋmbɛ'ɛdɛ, amaa li mɔr sumalisim nɛ bʋnsʋma.
7 Nɔŋilim dit suguru nɛ si'el wʋsa. Yadda nɛ ti'ir nɛ mɔdigir ka' sierɛ.
8 Nɔŋilim pʋ naada. Nɔdi'esʋg nɛ pian'azʋna nɛ mi'ilim na gaad.
9 Ti mi'ilim nɛ ti nɔdi'esʋg pʋ paae Wina'am mi' si'em la.
10 Amaa linɛ an nyain ka ka' gba'ar la ya'a ti kenna, linɛ kae nyain ka mɔr gbada la na gaad.
11 Man daa an biig la, m daa pian'ad ka tɛn'ɛsid ka gban'ad yɛla gbin nwɛnɛ biig nɛ. Ka man yʋ'ʋn nɔbig la ka bas biilim tʋʋma.
12 Tinamɛ mi' si'el nannanna la anɛ bi'ela nwɛnɛ tinamɛ gɔsid gɔtiŋin ka li an zibisʋg si'em la. Amaa saŋkan la ti na nyɛ si'el wʋsa nyain. Man mi' si'el nan anɛ bi'ela. Amaa m na ti baŋi li sʋ'ʋŋa nyain nwɛnɛ Wina'am mi' man nyain si'em la.
13 Yadda nɛ ti'ir nɛ nɔŋilim, bʋnama atan' nwa', na bɛ saŋa wʋsa. Amaa nɔŋilim gati ba wʋsa.
1 KORINT DIM 14
Wina'am Siig Kasi piini la yɛla ya'as
14
Kɛlli ka nɔŋilim aan ya bʋmbɔɔdim gaad si'el wʋsa, ka bɔɔe Siig Kasi piini la bɛdegʋ. Linɛ gaadi li wʋsa anɛ nɔdi'esʋg piini linɛ yi Wina'am san'an na la. 2 Onɛ pian'ad pian'azʋna o pʋ pian'adi tisid nidiba, amaa o pian'adnɛ tisid Wina'am, ka sɔ' kʋ baŋ on yɛt si'el laa, bɔzugɔ o pian'adnɛ yɛlsu'ada nɛ Siig la paŋ.
3 Ka onɛ di'esid Wina'am pian'adi tisid nidib, pian'adnɛ sʋŋid nidib ka mɛ kpɛmisidi ba, ka bɛlisidi ba.
4 Onɛ pian'ad pian'azʋna sʋŋidnɛ o mɛŋ. Ka onɛ di'esid Wina'am nɔɔri pian'adi tisid nidib sʋŋidnɛ Wina'am nidib.
5 M bɔɔd ye ya wʋsa pian'ad pian'azʋna, ka bɔɔd ye ya di'esid Wina'am nɔɔr pian'ad la tisid nidibi gat ala. Onɛ di'esid Wina'am nɔɔr pian'ad la tisid nidib gat onɛ pian'ad pian'azʋna. Amaa o ya'a tu'as pian'azʋŋ la gbin ka li sʋŋ nidib, ba pʋ gat taabaa.
6 M ba'abiisɛ, m ya'a kɛɛn ya san'an na pian'ad pian'azʋna, m na niŋ wala sʋŋi ya? M kʋ sʋŋi yaa, asɛɛ ka m nie linɛ yi Wina'am san'an na pa'ali ya, bɛɛ tisi ya baŋir, bɛɛ m di'e Wina'am nɔɔr pian'ad bɛɛ pa'al si'a tisi ya.
7 Bʋn linɛ ka' nyɔvʋr ya'a maan vuud nwɛnɛ wiigi piebid bʋra-bʋra ka li ka' gbinnɛ, fʋ ye fʋ niŋ wala baŋ lin piebid si'el yɛla?
8 Na'atan ya'a piebid ka pʋ pieb tanp piebʋgɔ, anɔ'ɔnɛ na ti'ebi yi tanpɔ?
9 Ala mɛnɛ ya ya'a pian'ad pian'azʋŋ ka li gbin ka' nyainnɛɛ, sɔ' na niŋ wala baŋ yanamɛ yɛt si'ela. Ya pian'ad la na anɛ zaalim.
10 Pian'ad buudi bɛdegʋ bɛ dunia ni, ka baa yinne kae pʋ mɔr gbinnɛ.
11 M ya'a zi' pian'ad gbinnɛ, m anɛ saanne tis onɛ pian'ad la, ka onɛ pian'ad la mɛ an saanne tisim.
12 Yanamɛ sadigim bɔɔd Siig Kasi piini la, bɔɔmi piini linɛ na kpɛmis Wina'am nidib bɛdegʋ.
13 Dinzugɔ, onɛ pian'ad pian'azʋŋ, on sɔsim Wina'am ka o kɛ ka o nyaŋi tu'asi li gbin.
14 M ya'a pʋ'ʋs Wina'am nɛ pian'azʋŋ, m siigi pʋ'ʋsid, amaa m ya'am ka' li nii.
15 Ka bɔ ka m na niŋ yʋ'ʋsɛ? M na pʋ'ʋs nɛ m siig ka mɛ lɛm pʋ'ʋs nɛ m ya'am, ka yʋ'ʋm nɛ m siig ka mɛ yʋ'ʋm nɛ m ya'am.
16 Fʋ ya'a pʋ'ʋs Wina'am bareka nɛ fʋ siig, nid onɛ la'as nɛf ka zi' fʋn yɛt si'el la, na niŋ wala siaki fʋ pʋ'ʋsim ye, “Ami?”
17 Hali fʋ Wina'am pʋ'ʋsim la ya'a an sʋ'ʋŋa gba, li ka' sʋŋiri tis ninkanɛ.
18 M pʋ'ʋs Wina'am bareka man pian'ad pian'azʋna gat yanam wʋsa la.
19 Amaa Wina'am nidib la'asʋgʋn m bɔɔd ye m pian' ya'am pian'ad anu pa'al nidibi gaad mam na pian' pian'ad tusa piiga nɛ pian'azʋŋ.
20 M ba'abiisɛ, da nwɛnɛ biisi ya pʋtɛnda nii. Amaa aaɛn wʋʋ biisi ya tʋʋmbɛ'ɛd pʋʋgin. Kɛl ka ya pʋtɛnda nwɛnɛ kpɛɛmnam pʋtɛnda nɛ.
21 Li sɔb Wina'am gbauŋʋn ye, M na kɛ ka nimbanɛ pian'ad pian'azʋna nɛ teŋ zʋŋ nidib, M na pian' tis nimbama, la'an nɛ wala Zugsɔb la yɛl si'em la.
22 Dinzug, pian'azʋna anɛ zanbinnɛ tis banɛ ka' yadda niŋidib, ka ka' banɛ an yadda niŋidiba. Ka nɔdi'esʋg an yadda niŋidib din ka ka' banɛ ka' yadda niŋidiba.
23 Yadda niŋidib wʋsa ya'a la'as taaba, ka sɔ' wʋsa pin'ili pian'ad nɛ pian'azʋna, ka yiŋ dim kpɛn' na, ba kʋ yɛl ye ya gɛɛmnɛɛ?
24 Amaa yadda niŋidib wʋsa ya'a la'as taaba ka sɔ' wʋsa di'esid Wina'am nɔɔr pian'adi tisid nidib ka yiŋ nid kpɛn' na, on wʋm si'el wʋsa la na kɛ ka o baŋ o tʋʋmbɛ'ɛd, ka kad o mɛŋ saria.
25 Yɛlsu'ada banɛ bɛ o sʋʋnrin na nie paalʋ ni, ka o na igini pʋ'ʋs Wina'am ka pɛlig o pʋʋgʋ yɛl ye, “Asida, Wina'am bɛɛ ya ni.”
Yadda niŋidib la'asʋg suoya dɔllim la yɛla
26 Dinzugɔ m ba'abiisɛ, ya ya'a la'as taaba ye ya pʋ'ʋs Wina'am, sɔ' mɔri yʋʋm, ka sɔ' mɛ mɔr pa'alʋg, ka sɔ' mɔr si'el linɛ ka Wina'am nie pa'al o, ka sɔ' mɔr pian'azʋŋ, ka sɔ' mɛ mɔr pian'azʋŋ la gbinni na tu'asi tis nidib. Niŋimi si'el wʋsa ka li sʋŋ Wina'am nidib.
27 Ninsieba ya'a pian' pian'azʋna, nidib ayi' bɛɛ nidiba atan' gʋllim pian'am yinne-yinne, ka sɔ' mɛ tu'as ban yɛl si'el la gbin.
28 Amaa sɔ' ya'a kae na nyaŋi tu'as pian'azʋna la gbinnɛ, onɛ pian'ad pian'azʋŋ la da pian' yadda niŋidib la'asʋgʋn nɛ, ka lɛɛ pian' tis o mɛŋ nɛ Wina'am.
29 Kɛlli ka nɔdi'esidiba ayi' bɛɛ atan' pian'. Ka banɛ kpɛlim la gɛligi gɔs ye li an sʋ'ʋŋa bɛɛ.
30 Ka nid yinne ya'a pian'ad ka Wina'am Siig Kasi nie si'eli pa'al sɔ' la'asʋgʋn la, onɛ dɛŋim pian'ad la na bas pian'ad.
31 Ya wʋsa yinne-yinne na nyaŋi di'e Wina'am nɔɔr pian'adi tis nidib, ka ya wʋsa zamis ka paam kpɛmisʋg.
32 Nimbanɛ mɔr Wina'am Siig nɔdi'esʋg piini la tun'e gban'e ba mɛŋ nɛ nɔdi'esʋg piini la yɛla.
33 Bɔzugɔ Wina'am pʋ tʋm yɔɔg, yɔɔgɔ amaa o tʋmnɛ nɛ sumbʋgʋsʋm. Nwɛnɛ lin tʋm si'em Wina'am nidibi la'asid zin'is wʋsa si'em la,
34 kɛlli ka pu'ab sinni ba nɔɔr baanlimm karindɔɔd wʋsa ni, bɔzugɔ ba ka' suori na pian'ad la'asʋgʋnɛ. Amaa ba siemi ba mɛŋ wʋʋ Jew dim wada la yɛl si'em la.
35 Si'el ya'a bɛ ka ba bɔɔd ye ba baŋ, ban on bu'osimi ba sidibi ba yaan. Li anɛ nyan nɛ pu'abi na pian'ad yadda niŋidib la'asʋgʋn.
36 Ya tɛn'ɛs ye li anɛ yanam ni ka Wina'am labaar la pin'ilɛɛ? Ka anɛ yanam gʋllim ni ka li kenaa?
37 Onɛ tɛn'ɛs ka o an Wina'am nɔdi'es bɛɛ o anɛ onɛ ka Wina'am Siig Kasi bɛɛ o ni, on siakim ye linɛ ka m sɔbidi tisidi ya nwa' anɛ Zugsɔb la nɔɔr yɛlʋg.
38 Amaa sɔ' ya'a pʋ kɛlis nɛ'ɛŋa, yanam on da kɛlisi nɛ oo.
39 Dinzugɔ m ba'abiisɛ, bɔɔmi Wina'am nɔdi'esʋg, ka da zan'asi pian'azʋnaa.
40 Maalimi si'el wʋsa sʋ'ʋŋa, ka da kɛ ka li an yɔri-yɔri.
1 KORINT DIM 15
Kristo kum vʋ'ʋgir la yɛla
15
M ba'abiisɛ, nannanna m bɔɔd ye m tiɛn ya labasʋŋ kanɛ ka m da mɔɔli tisi ya, ka ya di'e li mɔr kiŋ-kiŋ la yɛla.
2 Ya ya'a mɔri li kiŋ-kiŋ, li na faaɛn ya. Ka li ya'a ka' alaa, ya yadda niŋir anɛ zaalim.
3 Alazug, yɛlkpan linɛ ka m daa di'e la, m zaŋi tii ya. Ka linɛ an ye Kristo kpii ti tʋʋmbɛ'ɛd zug, ka li dɔlnɛ lin da sɔb Wina'am gbauŋʋn si'em la.
4 Ka ba da mum o, ka Wina'am vʋ'ʋg o kumin daba atan' daar, ka li mɛ dɔlnɛ lin da sɔb si'em la.
5 Ka o da nie o mɛŋi pa'al Pita, ka nyaan nie o mɛŋi pa'al tʋmtʋmnib pii nɛ ayi' la.
6 Ka lin nya'aŋ ka o nie o mɛŋ saŋa yinne o nya'andɔlib banɛ gaad kɔbisnu la san'an. Ba sieba bɛdegʋ nan vʋe, ka sieba kpi.
7 Ka o nie o mɛŋ Jemes san'an, ka yʋ'ʋn nie o mɛŋ tʋmtʋmnib la wʋsa san'an.
8 Lin wʋsa nya'aŋ ka o nyaan nie o mɛŋi pa'al man onɛ nwɛnɛ onɛ ka ba yuolim du'a la.
9 Manɛ an kpaanr tʋmtʋmnib la wʋsa san'an, ka pʋ nar ka ba buolim ye Tʋmtʋmma, man da namisid Wina'am nidib la zug.
10 Wina'am pʋpielim zug ka m kilim man an si'em nannanna nwa' la. Ka pʋpielim kanɛ ka Wina'am tisim la ka' zaalim, ka man tʋm gaad bama wʋsa. Ka li daa ka' m mɛŋi tʋmi lii. Wina'am pʋpielim zug ka m daa nyaŋi tʋmi li.
11 Dinzugɔ, li ya'a daa anɛ man onɛ mɔɔn labaar la bɛɛ banɛ; ti wʋsa mɔɔn labaar linɛ ka m pʋn tiɛn ya li yɛla la, nɛ linɛ ka ya daa siak la.
Ti kum vʋ'ʋgir la yɛla
12 Ka ti labaar ya'a an ye Kristo vʋ'ʋg kuminɛ, wala ka ya sieba yɛl ye, banɛ kpi kʋ vʋ'ʋg kuminɛ?
13 Ka li ya'a an sida ye banɛ kpi kʋ vʋ'ʋg kuminɛ, alaa li pa'al ye Kristo da pʋ vʋ'ʋg kuminɛ.
14 Ka Kristo ya'a da pʋ vʋ'ʋg kuminɛ, alaa ti labasʋŋ la mɔɔlʋg anɛ zaalim, ka yanam yadda la mɛ an zaalim.
15 Li ya'a an sida ye banɛ kpi pʋ vʋ'ʋgid kuminɛ, alaa Wina'am da pʋ vʋ'ʋg Kristo kuminɛ, ka lin pa'al ye tinam ma'adi ziri Wina'am yɛla, tinamɛ yɛl ye Wina'am vʋ'ʋg Kristo kumin la zug.
16 Banɛ kpi ya'a pʋ vʋ'ʋg kuminɛ, alaa Wina'am da pʋ vʋ'ʋg Kristo kuminɛ.
17 Ka Kristo ya'a pʋ vʋ'ʋg kuminɛ, ya yadda niŋir la anɛ zaalim, ka ya tʋʋmbɛ'ɛd kpɛm bɛɛ ya ni.
18 Li mɛ na pa'al ye banɛ an Kristo yadda niŋidib ka kpi la bɔdignɛ.
19 Ka li ya'a anɛ dunia nwa' yɛla ma'aa ka ti mɔr ti'ir Kristo ni, alaa ti mɔr nimbaanligi gat sɔ' mɛkama dunia ni.
20 Amaa nɛ'ɛŋa anɛ sida ye Wina'am vʋ'ʋg Kristo kumin, ka o sid an onɛ vʋ'ʋg kumin yiiga.
21 Nwɛnɛ lin yi ninsaal yinne ni na ka kum kɛn dunia ni na la, ala mɛn ka li yi ninsaal yinne ni na kum vʋ'ʋgir bɛ mɛn.
22 Adam zug ka nidib wʋsa kpiid. Ala mɛn ka banɛ an Kristo nidib na vʋ'ʋg kumin.
23 Amaa sɔ' mɛkama mɔr o saŋa, ka Kristo vʋ'ʋg kumin yiiga la, ala mɛn ka banɛ aan o nidib mɛ na ti vʋ'ʋg o lɛbig daar la na.
24 Dunia naar na kena, ka Kristo na san'am banɛ sʋ'oe dunia nwa' paŋ nɛ kpi'euŋ dim nɛ na'anam wʋsa paŋ, ka zaŋ sʋ'ʋlim la yʋ'ʋn lɛbisi tis o Ba' Wina'am.
25 Bɔzugɔ li anɛ tilas ye Kristo di na'am hali ti paae saŋkanɛ ka o dataas wʋsa na bɛ o nu'usin.
26 Kum anɛ dataa kanɛ ka o na ti yuolim san'am.
27 Li yɛl Wina'am gbauŋʋn ye, “O zaŋ si'el wʋsa niŋ o nu'usin.” Amaa li pʋ pa'al ye si'elnam wʋsa la paas Wina'am onɛ lɛɛ zaŋ si'el mɛkama wʋsa niŋ Kristo nu'usin laa.
28 Si'elnam wʋsa ya'a ti bɛ Kristo nu'usin, on onɛ an Wina'am Biig la mɛ na niŋ o mɛŋ Wina'am onɛ zaŋ si'el wʋsa niŋ o nu'usin la. Ka Wina'am na an si'el wʋsa ka sʋ'oe wʋsa.
29 Nidib ya'a kʋ vʋ'ʋg kuminɛ, bɔ ka ninsieba di'ed ku'om sʋʋbi tisid banɛ pʋn kpi la? Kum ya'a kʋdim kʋ vʋ'ʋgɛ, bɔ ka ba niŋid nɛ'ɛŋa?
30 Ka bɔ ka ti kpɛn'ɛsidi ti mɛŋ yɛla ni saŋa wʋsa?
31 M ba'abiisɛ, m nwɛ'ɛd nyɔ'ɔgʋ ya yɛla, yanamɛ bɛ si'em Zugsɔb Yesu Kristo ni la zug. Nɛ'ɛŋa zug ka m yɛti ya ye m pʋ lal nɛ kum daar wʋsa la.
32 M daa nyɛ yɛla Efesus teŋin nwɛnɛ onɛ zab nɛ gbigima nɛ, ka lin ya'a an dunia nwa' yɛla ma'aa, li nyɔɔd an bɔ? Kum ya'a pʋ vʋ'ʋgida, siiliŋ la yɛl si'el la anɛ sida ye,
“Kɛlli ka ti di ka nu, ka bɛog ti saa na kpi.” 33 Da kɛ ka sɔ' ma'aa yaa: “Dɔllimtaa bɛ'ɛd san'amid ninvʋsʋŋ.”
34 Kɛlli ka ya ya'am lɛb na nwɛnɛ din nar si'em, ka basi tʋʋmbɛ'ɛd; bɔzugɔ, ya sieba nan zi' Wina'am. Li anɛ nyan nɛ yanamɛ kɛ ka li kpa' tilas ye m sɔb anwana la.
Niŋgbiŋ kum vʋ'ʋgir la yɛla
35 Ka sɔ' na bu'os ye, “Wala ka banɛ kpi la na ti vʋ'ʋg kuminɛ? Niŋgbiŋ bɔ buudi ka ba na ti mɔra”
36 Zɔlʋga! Fʋ zi' ye fʋ ya'a bʋd si'el bielif ka li ye li bul, asɛɛ pak la pun'oe ka bul la yʋ'ʋn vʋ'ʋgɛɛ?
37 Fʋn bʋd si'el la kʋdim anɛ bielif. Li tun'e an ki bielif bɛɛ biel sieba. Ka linɛ ka fʋ bʋd la niŋgbiŋ kʋ nwɛnɛ linɛ na ti yina laa.
38 Amaa Wina'am tisid bielif kanɛ ka fʋ bʋd la nɛ on Wina'am bɔɔd niŋgbiŋ si'a, ka mɛ tisid bielif buudi wʋsa niŋgbiŋ kɔn'ɔb-kɔn'ɔb.
39 Li ka' niŋgbina wʋsaa nwɛn na. Ninsaalib mɔri niŋgbiŋ buudi yinne, ka bʋnkɔnbid niŋgbina mɛ bɛɛ li kɔn', ka niis niŋgbina mɛ bɛɛ li kɔn', ka zimi niŋgbina mɛ bɛɛ li kɔn'.
40 Saazug bʋnam mɔri ba mɛŋ niŋgbina, ka dunia bʋnam mɛ mɔri ba mɛŋ niŋgbina. Vɛnlim bɛ saazug bʋnam niŋgbina la ni, ka vɛnlim mɛ bɛ dunia bʋnam niŋgbina la ni.
41 Winnig mɔr o mɛŋ vɛnlim, ka nwadig mɛ mɔr vɛnlim si'a. Ka nwadbibis vɛnlim mɛ bɛɛ li gʋnni. Hali nwadbibis la sʋʋgin ba vɛnlim bɛ gʋn-gʋn.
42 Ala ka li mɛ na ti an kum vʋ'ʋgir saŋa. Niŋgbiŋ ya'a sig teŋin, li pun'odnɛ. Amaa Wina'am ya'a ti vʋ'ʋgi li, li pʋ pun'oda.
43 Kum mumnɛ nɛ ziemis, ka na ti vʋ'ʋg nɛ vɛnlim. Li mumnɛ nɛ tadimis ka na ti vʋ'ʋg nɛ paŋ.
44 Li ya'a sig teŋin, li anɛ dunia ni niŋgbiŋ. Amaa Wina'am ya'a ti vʋ'ʋgi li, li anɛ arezana ni niŋgbiŋ. Ti mɔr niŋgbina linɛ an dunia ni din. Ala mɛn ti na ti mɔr niŋgbina linɛ an arezana ni din.
45 Li sɔb Wina'am gbauŋʋn ye, “Adam onɛ da an yiiga sɔb ka Wina'am maal la da lieb ninsaal ka vʋ'ʋsid.” Yesu onɛ an ninkanɛ kpɛlim nya'aŋ la anɛ siig onɛ tisid nyɔvʋr.
46 Li ka' arezana ni niŋgbina la ka ti di'ed yiiga. Ti di'edi dunia ni din la yiiga, ka nyaan di'ed arezana ni din.
47 Wina'am da maal yiiga dau, Adam la, nɛ teŋ titan. Amaa dau onɛ tia'al la yinɛ arezana ni na.
48 Dunia nidib wʋsa nwɛnɛ nid onɛ ka Wina'am da zaŋ teŋ titani maal la. Ka Wina'am nidib mɛ nwɛnɛ nid onɛ da yi arezana ni na la.
49 Tinamɛ nwɛnɛ nid onɛ ka Wina'am maal nɛ teŋ titan la, ala mɛn ti na ti nwɛnɛ nid onɛ yi arezana ni na la.
50 M ba'abiisɛ, nɛ'ɛŋa ka m sɔbidi yɛti ya ye, ninsaal niŋgbina anɛ dunia ni din, ka kʋ nyaŋi kpɛn' Wina'am sʋ'ʋlim la nii. Niŋgbiŋ linɛ pun'od la kʋ nyaŋi di'e nyɔvʋr linɛ ka' naarɛ.
51 Kɛlisimi yɛlsu'adir kaŋa. Sieba na kpi, amaa li ka' wʋsaa.
52 Ka dunia naar, na'atan ya'a ti pieb, ti wʋsa na tiak yimmʋ, nwɛnɛ nini amisid si'em la. Na'atan na pieb, ka banɛ kpi na vʋ'ʋg nɛ niŋgbina linɛ kʋdim kʋ kpii, ka Wina'am na tiaki ti niŋgbina.
53 Li anɛ tilas ye dunia ni niŋgbiŋ kanɛ pun'od la na gaad, ka ti na di'e niŋgbiŋ kanɛ pʋ pun'oda. Ka niŋgbiŋ kanɛ mɛ kpiid na gaad, ka ti na di'e niŋgbiŋ linɛ pʋ kpiida.
54 Dinzugɔ nɛ'ɛŋa ya'a ti niŋ, ala ka linɛ sɔb Wina'am gbauŋʋn ye, “Wina'am vɔl kum ka nyaŋi li, ka kum kʋ lɛm bɛɛ” la na niŋ amɛŋa. Li lɛn sɔb ye,
55 “Akum, fʋ paŋ kanɛ nyaŋid la bɛ yaanɛ? Akum fʋn ɛɛnti tɔɔndi nwɛnɛ naŋ la bɛ yaanɛ?”
56 Li anɛ tʋʋmbɛ'ɛdi kɛt ka kum nyɛt paŋi tɔɔnd nidib. Ka li anɛ wada la kɛt ka tʋʋmbɛ'ɛd nyɛt paŋ.
57 Ka ti pʋ'ʋs Wina'am bareka on tisi ti kum nyaŋir paŋi ti Zugsɔb Yesu Kristo ni la.
58 Dinzugɔ m ba'abinɔŋa, yanamɛ sadigim mi' ye bʋn linɛ ka ya niŋid Zugsɔb yɛla ka' zaalim la, mɔdigim zi'eni kiŋ-kiŋ ka kpɛ'ɛŋi ya mɛŋ saŋa wʋsa ya tʋʋma nii tis Zugsɔb la.
1 KORINT DIM 16
Ban la'as ligidi tis Jerusalem yadda niŋidib la
16
M sɔbid nɛ'ɛŋa nɛ ye m yɛli ya ligidi kanɛ ka ya la'asid ye ya sʋŋ
Wina'am nimbanɛ bɛ Juda teŋin la yɛla. Niŋimi wʋʋ man daa yɛl Wina'am nimbanɛ bɛ Galatia teŋin ye ba niŋ si'em la.
2 Alasid daar wʋsa, sɔ' wʋsa yisim zemis on tʋm nyɛ ligid si'a digil, ka m ya'a ti paae na ligidi la'asʋg kʋ lɛm bɛɛ.
3 M ya'a ti paae na, m na sɔb gbauŋʋ tʋm nimbanɛ ka ya mɛŋ na ti gaŋ la, ka ba mɔr piini la keŋ Jerusalem.
4 Ka li ya'a lɛn nar ye m keŋ, ban on dɔllim ka ti keŋ.
Paul gban'ar la yɛla
5 M gban'e ye m dɔlli yi Masedonia teŋin, ka lin nya'aŋ m na kena kaae ya.
6 Daasi'erɛ m na yuugi ya san'an bi'ela bɛɛ bɛ nɛ ya ka waad saŋa ti gaad, ka ya sʋŋim ka m gaadi keŋ zin'ig kanɛ wʋsa ka m na keŋ.
7 M pʋ bɔɔd ye m kaae ya ka li nwɛnɛ m gatnɛ ka yina, amaa m mɔr ti'ir ye m na bɛɛ ya san'anɛ yuug, Zugsɔb la ya'a maal suori tisim.
8 Amaa m na kpɛm bɛ Efesus teŋinɛ paae Pentekost daar.
9 Suor yɔ'ɔg kpɛla tisim, ka m na tʋm Wina'am tʋʋma kanɛ mɔr nyɔɔd, amaa dataas la zu'oya.
10 Timoti ya'a kɛɛn ya san'an na, yanam di'em o ka o bɛɛ ya san'an, ka da kɛ ka o sʋnf san'am. Bɔzugɔ o tʋmnɛ Zugsɔb la tʋʋma nwɛnɛ man tʋm si'em la.
11 Mid ka ya sɔ' nɛ'ɛs o, amaa sʋŋimin o ka o gaadi kɛɛn m san'an na nɛ sumbʋgʋsʋm. Bɔzugɔ, m gur o nɛ ye o dɔlli ti ba'abibanɛ lɛbid na la.
12 Li ya'a anɛ ti ba'abiig Apollos yɛla, m kpɛmisid o saŋa wʋsa ye on nɛ ti ba'abibama la kena kaae ya. Ka o kʋdim pʋ bɔɔd ye o kɛn nannanna naa. O ya'a paam suor, o na kena.
Sa'alʋg nɛ pʋ'ʋsʋg
13 Gu'usimi, ka zi'e kiŋ-kiŋ ka da basi ya yadda niŋir Wina'am nii. Mɔri sʋnkpi'euŋ nɛ paŋ.
14 Tʋmmini ya tʋʋma wʋsa nɛ nɔŋilim.
15 Ya mi' ye Stefanas nɛ o yidimi da dɛŋi lieb yadda niŋidib Akaia teŋin yiiga, ka pɛsigi ba mɛŋi tʋmmi tisid Wina'am nidib. M ba'abiisɛ, m bɛlimi ya nɛ
16 ye ya pɛsigi ya mɛŋi tis nimbama, nɛ ya tʋmtʋm taaba wʋsa nɛ banɛ tʋm bɛdegʋ sʋŋid Wina'am nidib la.
17 M mɔr sumalisim Stefanas nɛ Fortunatus nɛ Akaikus n daa paae na la, bɔzugɔ ba daa sʋŋim nɛ sʋŋir kanɛ ka yanam pʋ nyaŋi sʋŋim la.
18 Ba kpɛ'ɛŋ man nɛ yanam sʋnya alazug, na'asimi nimbanɛ nwɛnɛ bama.
19 Wina'am nimbanɛ bɛ Asia sʋ'ʋlimin la pʋ'ʋsidi ya. Akuila nɛ Prisila nɛ Wina'am nimbanɛ la'asidi ba yin la pʋ'ʋsidi ya sʋ'ʋŋa, yanam wʋsaa an yinne nɛ ti Zugsɔb la zug.
20 Ba'abiis la wʋsa pʋ'ʋsidi ya. Pʋ'ʋsimi taaba nɛ nɔŋilim.
21 Man mɛŋ nu'ug ka m sɔbid nɛ'ɛŋa, ye man Paul n pʋ'ʋsidi ya.
22 Onɛ mɛkama pʋ nɔŋ Zugsɔb la, kaanb bɛ'ɛd bɛ on sɔb zugin. Ti sɔsidi ti Zugsɔb ye o kena.
23 Ti Zugsɔb Yesu yɛlsʋm bɛ nɛ ya. M nɔŋilim bɛ nɛ ya wʋsa, tinamɛ an yinne nɛ Yesu Kristo la zug. Ami!
Ayi' Korint dim
Gbauŋ nwa' yɛla
Paul sɔb gbauŋ kaŋa tis Korint karindɔɔg la ye o sʋŋi ba ka ba lɛbi zi'enɛ ba karimbiidʋg la pʋʋgin sʋ'ʋŋa. Karimbisieba da pin'ili ki'isid Paul, amaa o da pa'al ye o nɔŋi ba hali ka bɔɔd ye ba wʋsa naal nɔɔr ka mɔr sumalisim. O kpɛmisid karindɔɔg la ye ba di'esim ligidkanɛ ka ba daa pin'ili di'esid ye ba sʋŋ Jerusalem karimbiis la naae. Paul pa'al ye o anɛ Yesu tʋmtʋm amɛŋa ka pʋ bɔɔd ye Korint karimbiis la kɛ ka banɛ ye ba anɛ tʋmtʋmnib ka ka' tʋmtʋmnib la ma' baa. O bɔɔd ye ba maal si'elnam tituaa ka o nyaan lɛb na kaae ba ya'as.
2 KORINT DIM 1
Man Paul, onɛ ka Wina'am gaŋim nɛ o bɔɔdim ye m an Yesu Kristo Tʋmtʋm la, nɛ ti ba'abiig Timoti, sɔbid gbauŋ kaŋa tisid Wina'am nimbanɛ wʋsaa bɛ Korint nɛ Akaia tɛɛnsin la wʋsa.
2 Ti Ba' Wina'am nɛ ti Zugsɔb Yesu Kristo na tisi ya yɛlsʋm nɛ sumbʋgʋsʋm.
Yɛltɔɔg pʋʋgin sʋŋir yɛla
3 Kɛlli ka ti pʋ'ʋs Wina'am onɛ aan ti Zugsɔb Yesu Kristo Ba' la bareka, on onɛ aan ti Ba' ka zɔti ti nimbaanlig, ka an Wina'am ka sʋŋir wʋsa yit o san'an na la.
4 O sʋŋidi tii ti yɛltɔɔd wʋsa pʋʋgin, ye ti nyaŋidi nɔkid sʋŋir kanɛ ka ti di'ed Wina'am san'an la sʋŋid banɛ wʋsa mɔr yɛltɔɔd.
5 Tinamɛ sadigim nyɛt namisʋg bɛdegʋ Kristo zug la, ala mɛn ka ti na di'e sʋŋir bɛdegʋ yit Kristo san'an na.
6 Ti ya'a nyɛ yɛltɔɔg, li anɛ yanam sʋŋir nɛ ya faangir yɛla. Ka tinam ya'a nyɛ sʋŋir Wina'am san'an, yanam mɛ na nyɛ sʋŋir, ka li na yinɛ lin ni, ka ya na di'e paŋi nyaŋi mɔdigi ya namisʋg pʋʋgin nwɛnɛ tinamɛ nyɛ namisʋg si'em la.
7 Ti ti'ir kanɛ ka ti mɔri ya yɛla la ka' bi'esʋgɔ. Bɔzugɔ, ti mi' ye yanamɛ sadigim namisid wʋʋ tinamɛ namisid si'em la, ya na di'e sʋŋir wʋʋ tinamɛ di'ed si'em la mɛn.
8 M ba'abiisɛ, ti bɔɔd ye ya baŋ yɛltɔɔg kanɛ ka ti daa nyɛ Asia teŋin la yɛla. Yɛltɔɔg la daa daami ti bɛdegʋ ka gaadi ti paŋ bɛn, ka ti daa pʋ lɛn tɛn'ɛsid vʋm yɛlaa.
9 Li ya'a an sida, ti tɛn'ɛs ka li nwɛnɛ ba kadi ti saria kʋʋs kɔɔtʋ ni ka li an kum. Nɛ'ɛŋa niŋnɛ ye ti da ti'e ti mɛŋ paŋa, amaa ka lɛɛ ti'enɛ Wina'am onɛ vʋ'ʋgid nidib kumin la.
10 O faaɛn ti yɛltɔɔg tita'ar dinɛ an kum la ni, ka ti mi' ye o na lɛn faaɛn ti, ka mɔr ti'ir o san'an ye o na lɛn faaɛn ti ya'as,
11 wʋʋ yanamɛ sɔsid Wina'am tisidi ti si'em la. Dinzugɔ nidib bɛdegʋ na pʋ'ʋs Wina'am bareka on niŋ si'eli tisi ti la zug.
Bʋn dinɛ kɛ ka Paul tiak o suor la yɛla
12 Tinam nwɛ'ɛd nyɔ'ɔg nɛ'ɛŋa yɛla bɔzugɔ ti pʋtɛnda dit kasɛt ye ti nyaŋi gban'e ti mɛŋ dunia nwa' ni. Linɛ gaadi li wʋsa anɛ tinam nɛ yanam bɛllim an sʋ'ʋŋa si'em la, ka li yinɛ Wina'am an sʋm nyain ka an yɛlsida daan la ni. Li anɛ Wina'am pʋpielim zug ka li ka'anɛ ninsaalib ya'am kɛ ka ti nyaŋi tʋm alaa.
13 Ti ɛɛnti pʋ sɔbid dinɛ ka ya na karim ka kʋ nyaŋi gban'e li gbinnɛ.
14 Yanamɛ daa gban'e li gbin bi'ela la, m mɔr ti'ir ye ya na gban'e linɛ ka ti sɔb la gbin sʋ'ʋŋa ye Yesu Kristo lɛbig daar la na, ya na nwɛ' nyɔ'ɔg tinam yɛla wʋʋ tinamɛ na nwɛ' nyɔ'ɔgʋ ya yɛla si'em la.
15 M daa mi' nɛ' yɛla sʋ'ʋŋa, linzug ka m daa gban'e ye m na kena kaae ya yiiga ka ya di nyɔɔd nɔɔr ayi' la.
16 M daa gban'e ye m na kɛɛn ya san'an na ka nyaan gaadi keŋ Masedonia teŋin, ka m ya'a ti lɛbid na m na lɛn kaae ya ka ya sʋŋim ka m gaadi keŋ Juda teŋin.
17 Ya tɛn'ɛs ye m gban'ar la ka' sʋ'ʋŋa? Bɛɛ ya tɛn'ɛs ye m gban'ar la dɔlnɛ ninsaalib bɔɔdim dinɛ ka m na siak ye ɛɛn ka lɛn yɛl ye ayei nɛɛ?
18 Wina'am anɛ yɛlsida sɔb, ala mɛn ka li an sida ye tinamɛ yɛti ya si'el la, ti kʋ kpanbidi siakid ye ɛɛn nɛ ayei nɛɛ.
19 Yesu Kristo onɛ an Wina'am Biig, ka mam Paul nɛ Timoti nɛ Silvanus daa mɔɔl o yɛla ya san'an la pʋ mɔr bi'esʋgɔ. Li anɛ ɛɛn o san'an saŋa wʋsa.
20 Li yinɛ Yesu Kristo ni na ka Wina'am siak ye ɛɛn, ye o na niŋ linɛ ka o kaanbi li yɛla la wʋsa. Ka linzug ka ti pʋ'ʋsʋg pʋʋgin ka li yinɛ Yesu Kristo ni ka ti yɛl ye, “Ami” ka li tisid Wina'am na'asi.
21 Li anɛ Wina'am kɛt ka tinam nɛ yanam zi'e kiŋ-kiŋ Kristo san'an, ka gaŋi ti ye ti tʋm o tʋʋma,
22 ka nɔk o zanbinnɛ zanbili ti ka li pa'al ye onɛ sʋ'oe ti ka tisi ti o Siig Kasi ka li bɛɛ ti sʋnya ni, ka kɛ ka ti mi' sʋ'ʋŋa ye o na ti tisi ti o piini wʋsa.
23 Wina'am aan m kasɛt ye mam pʋ lɛb Korint la, m faaɛn ya nɛ yak.
24 Ti pʋ bɔɔd ye ti mugusi ya ka ya siak dinɛ ka ya pʋ niŋ yaddaa; ti mi' ye ya zi'e sʋ'ʋŋa ya yadda niŋir la ni. Ti lɛɛ tʋm nɛ taaba ye ya nyɛ sumalisim.
2 KORINT DIM 2
M daa gban'e m sʋʋnrin ye man ye m kena kaae ya kaasi'a la kʋ kɛ ka ya sʋnf san'am.
2 Ka m ya'a kɛt ka ya sʋnf san'amid, anɔ'ɔnɛ bɛɛ na tisim sumalisim? Sɔ' kae, asɛɛ yanam banɛ ka m kɛ ka ya sʋnf san'am la.
3 M daa pʋ bɔɔd ye nimbanɛ na tisim sumalisim la kɛ ka m mɔr sʋnsa'aŋa, ka linzug ka m daa sɔb gbauŋ kan la. M mi' ya sʋ'ʋŋa ka mi' ye m ya'a mɔr sumalisim, yanam mɛ na mɔr sumalisim.
4 Man daa sɔbid ye m tisi ya la m daa mɔr sʋnsa'aŋ nɛ daamʋg m sʋnfʋn bɛdegʋ, ka li kɛ ka m kaasid, ka li ka' ye m bɔɔd ye m kɛ ka ya sʋnf san'am, ka anɛ ye m kɛ ka ya baŋ man nɔŋi ya si'em bɛdegʋ.
Lin nar ye ba bas tʋʋmbɛ'ɛd sɔb taal si'em
5 Nid yinne ya sʋʋgin ya'a kɛ ka sɔ' sʋnf san'am, li ka' ye o san'amnɛ man sʋnfɔ, amaa o san'amnɛ yanam wʋsa sʋnf. M pʋ bɔɔd ye ya sʋnf san'am bɛdegʋʋ.
6 Namisʋg kanɛ ka ya bɛdegʋ tis o daana la, zemisya.
7 Nannanna li nar ka ya dii o suguru ka kpɛmis o sʋnf, ka li kɛ ka o sʋnf da san'am bɛdegʋ ka o luu.
8 M bɛlimi ya nɛ ye ya kɛ ka o lɛm baŋ ye ya sid nɔŋ o.
9 M daa sɔb gbauŋ kaŋa nɛ ye m kpansi ya gɔs ye ya na siak man yɛti ya si'el la bɛɛ ya kʋ siakɛ.
10 Ya ya'a di sɔ' suguru, mam mɛ na dii o daana suguru. Ka si'el ya'a bɛɛ an ye m di suguru ka kɛɛ bas, m na kɛɛ li bas Kristo tuon yanam zug
11 ka li kɛ ka Sʋntaana da nyaŋi tii. Bɔzugɔ ti mi' o gban'abɛ'ɛd la yɛla.
Paul sʋnsa'aŋ Troas teŋin la yɛla
12 Man daa paae Troas teŋin ye m mɔɔl Kristo labasʋŋ la, ka nyɛ ka Zugsɔb la pʋn ti'eb suosʋŋʋ digil.
13 Amaa ka m daa pʋ mɔr sumbʋgʋsʋm mam pʋ nyɛɛm ba'abiig Titus anina la zug. Dinzug ka m kɛɛs nidib la ka gaadi keŋ Masedonia teŋin.
Tinamɛ kɛt ka nidib baŋid Kristo la yɛla
14 Amaa ti pʋ'ʋs Wina'am bareka bɔzugɔ, onɛ dɔlisid Kristo san'ani tisidi ti nyaŋir ka dɔlisidi ti san'ani kɛt ka ti mɔɔn Kristo labaar la ka li tiigid zin'ig wʋsa wʋʋ tudaar linɛ nyuugʋ malis nɛ.
15 Ti nwɛnɛ tudaar ka Kristo nyu'oe li tis Wina'am, ka nimbanɛ nyɛ faangir nɛ banɛ bɔdig la na wʋmmi li nyuug.
16 Banɛ bɔdig la san'an ti nwɛnɛ nyuug bɛ'ɛd dinɛ an kum tisi ba. Amaa ti anɛ nyuug dinɛ an sʋm ka an nyɔvʋri tis banɛ nyɛ faangir la. Anɔ'ɔnɛ na nyaŋi tʋm tʋʋm kaŋa?
17 Tinam pʋ nwɛnɛ nidib bɛdegʋ banɛ mɔɔn Wina'am labaar wʋʋ ba kuosid la'adi bɔɔd nyɔɔd la. Amaa ti anɛ banɛ ka Wina'am gaŋi tii tʋm, ka ti pian'ad sida Wina'am tuon ka an yinne nɛ Kristo.
2 KORINT DIM 3
Ti tʋʋma dinɛ dɔl Wina'am Siig Kasi la yɛla
| 3 |
Ya tɛn'ɛs ye ti lɛm pin'ili pian'adnɛ tinamɛ an sʋm si'em bɛɛ? Bɛɛ ya tɛn'ɛs ye ti nwɛnɛ nimbanɛ bɔɔd gbana dinɛ na pa'al tinamɛ an sʋm si'em tisi ya bɛɛ yiti ya san'an na?
2 Yanam mɛŋ nwɛnɛ gbauŋ ka ti sɔbi ti sʋnya ni, ka sɔ' wʋsa baŋ ka karimi li.
3 Ya pa'ali ya mɛŋ ye ya anɛ gbauŋ ka Kristo mɛŋ sɔb ka li yinɛ tinam tʋʋma la ni. O pʋ nɔk si'eli sɔb kuglammir zugɔ, ka lɛɛ nɔk Wina'am onɛ vʋe la Siig Kasi la sɔb ninsaalib sʋnya ni.
4 Ti yɛt nɛ' nɛ kpi'euŋ ka li anɛ tinamɛ mɔr Wina'am ti san'an ka li yinɛ Yesu Kristo ni na la.
5 Si'el ka' ti san'anɛ pa'al ye tinam mɛŋ tɛn'ɛs ye ti na nyaŋi tʋm tʋʋm kaŋaa. Amaa li anɛ Wina'am kɛ ka ti nyaŋidi tʋmmi li.
6 O tisi ti paŋ kanɛ ka ti na nyaŋi tʋm nɔnapaal la tʋʋma. Nɔnaar Paal la ka'anɛ wada ka ba sɔbɛ, amaa li yinɛ Wina'am Siig Kasi la ni na. Bɔzugɔ, wada linɛ ka ba sɔb la ziidi kum na, amaa ka Siig Kasi la tisid nyɔvʋr.
7 Wina'am da tis wada dinɛ ta'asid kum la na ka li sɔb kuglammir kanɛ ka ba kpi'a la zug, ka o na'am pipilim nie nyain li tisibin la. Ka Moses nindaa pɛlig ka nyɛɛn pil-pil, ka Israel dim pʋ nyaŋi gɔsi lii, la'an nɛ pipilim la da sied la. Wada dinɛ ta'asid kum la ya'a da mɔr pipilim anwa,
8 ka labasʋŋ dinɛ tisid Wina'am Siig Kasi la kʋ mɔr pipilim gaad ala?
9 Ka wada dinɛ kɛ ka nidib nyɛt kʋʋsbɛ'ɛd la ya'a da mɔr pipilim, labasʋŋ dinɛ kɛ ka ti an pʋpielim dim Wina'am tuon la kʋ pɛligi gaad alaa?
10 Sida, pipilim dinɛ bɛ nannanna nwa' gaad pipilim dinɛ da bɛ la bɛdegʋ, ka dinzug ka pipilim dinɛ da bɛ la lieb zaalim.
11 Linɛ kʋ ya'as naar la ya'a da mɔr pipilim, dinɛ bɛ nannanna nwa' ka kʋ naae la, kʋ mɔr pipilim bɛdegʋ gaad alaa?
12 Tinamɛ mɔr ti'ir kaŋa la zug, ka ti sʋnf kpi'em,
13 ka ti pʋ nwɛnɛ Moses onɛ da nɔk pienni lus o nindaa ye Israel dim da nyɛɛ o nindaa pipilim dinɛ sied la naarɛ.
14 Amaa li da ligil Israel dim la ya'am nɛ. Ka lin yi saŋkan la ti paae zina, ba ya'a karim nɔnaar kʋdʋg gbauŋ la, li nwɛnɛ pien la nan kpɛm bɛnɛ, ka ba pʋ gban'ad ban karim si'el la gbinnɛ. Li anɛ onɛ di'e Kristo ma'aa ka pien la na pilig.
15 Sida, saŋkan la ti paae zina, ba ya'a karim Moses gbauŋ la, pien la nan kpɛn ligili ba ya'am nɛ.
16 Amaa sɔ' ya'a siak ka dɔl Zugsɔb la, pien la na bɔdig o ni.
17 Zugsɔb onɛ ka ba dɔl la anɛ Wina'am Siig Kasi. Ka Zugsɔb Siig Kasi la bɛ si'el la, yɔlisim mɛ bɛ anina.
18 Pien pʋ ligil tinam banɛ wʋsa dɔl Zugsɔb la nindaasɛ. Ka Zugsɔb la na'am pipilim nie ti ni, ka tiakidi ti ye ti nwɛnɛ on an si'em la. Ka o na'am pipilim bɛɛ ti ni nɔbigid bɛdegʋ paasid. Ka li wʋsa yinɛ Zugsɔb onɛ an Siig Kasi la ni na.
2 KORINT DIM 4
Wina'am zɔti ti nimbaanlig la zug ka o tisi ti tʋʋm kaŋa, dinzug ka ti pʋ sin'igida.
2 Ti zan'asnɛ ye ti kʋ dɔl nyan tʋʋma nɛ dinɛ ka nidib su'adi tʋm la wʋsa, ka mɛ pʋ ma'ad nidib bɛɛ tiakid Wina'am pian'ad ye li dɔl ziri suoyaa, ka lɛɛ pian'ad yɛlsida paalʋ ni, ka niŋidi li Wina'am tuon. Ti pa'ali ti mɛŋ nimbanɛ mɔr ya'am mi' dinɛ an sʋm nɛ bɛ'ɛd la ye ba baŋ ye ti niŋid dinɛ an sʋm.
3 Ka hali labasʋŋ kanɛ ka ti mɔɔn la ya'a ligilnɛ, li ligilnɛ tis banɛ bɔdig la.
4 Sʋntaana onɛ sʋ'oe dunia nwa' la kɛ ka banɛ pʋ niŋ Wina'am yadda la ya'am an lik, ka ba kʋ nyaŋi baŋ labasʋŋ linɛ yit Kristo onɛ nwɛnɛ Wina'am an si'em la girima la.
5 Ti pʋ mɔɔnnɛ ti mɛŋ yɛlaa, ka lɛɛ mɔɔn ye Yesu Kristo an Zugsɔb la, ka tinam lɛɛ aan ya tʋmtʋmnib Yesu zug.
6 Bɔzugɔ, Wina'am onɛ da yɛl ye, “Kɛl ka nɛɛsim nie nyain likin la,” onɛ kɛ ka o nɛɛsim nie ti sʋnfʋn nyain ye li tisi ti baŋir dinɛ an Wina'am na'am pipilim dinɛ ka ti nyɛ Kristo san'an la.
Ti paŋ ka'alim pa'an Wina'am paŋi an si'em
7 Amaa kpan'am linɛ ka ti mɔr la kɛ ka ti nwɛnɛ dʋgid banɛ ka ba su'a si'el dinɛ ligidi zu'oe bɛdegʋ, ye li pa'al ye paŋ tita'ar dinɛ ka ti mɔr la ka' tinam dinnɛ, ka lɛɛ anɛ Wina'am bʋn.
8 Ti nyɛt mugusʋg si'el wʋsa ni amaa ti giinla pʋ pu'asida, ka pʋtɛnda yutim saŋa si'a ka ti kpɛn mɔr pʋtɛn'ɛr ye 2 KORINT DIM 4–5
ti na yii li ni,
9 ka mɔr dataas bɛdegʋ, la'an nɛ la ti pʋ kɔ'ɔŋ zuaa, ka nyɛt dɛmis ka pʋ kpii,
10 ka mɛ nyɛt namisʋgʋ ti niŋgbina ni wʋʋ Yesu da kpi si'em la ye nidib na nyɛ o nyɔvʋri ti niŋgbina ni.
11 Ti vʋm saŋa wʋsa ka ti nyɛt namisʋg dinɛ zemis nɛ kum Yesu zug, ye nidib na nyɛ o nyɔvʋri ti niŋgbina dinɛ na kpi la ni.
12 Aa tɔ, kum tʋm tinam san'an, amaa ka vʋm lɛɛ tʋm yanam san'an.
13 Li sɔb Wina'am gbauŋʋn ye sɔ' yɛl ye, “Man niŋ Wina'am yadda la zug ka m pian'ad.” Tinamɛ mɛ niŋ o yadda wʋʋ on niŋ si'em la zug ka ti mɛ pian'ad.
14 Ka mi' ye Wina'am onɛ vʋ'ʋgi ti Zugsɔb Yesu kumin la mɛ na vʋ'ʋg tinam mɛn nɛ Yesu, ka la'asi ti nɛ yanamɛ mɔri ti keŋ o tuon.
15 Li wʋsa anɛ yanam sʋ'ʋm nyɛɛb zug ka Wina'am pʋpielim yadigid ka nidib nyɛɛ li ka paasid, ala ka ba bareka pʋ'ʋsʋg la mɛ paasidi tisid Wina'am na'asi.
16 Alazugɔ, ti giinla pʋ pu'asida. Hali la'an nɛ ti ninsaal niŋgbina tadigid la, Wina'am kɛt ka ti nyɛt vʋmpaali ti siigin daar wʋsa.
17 Namisʋg dinɛ ka ti nyɛt la anɛ bi'ela ka na gaad, ka lɛɛ kɛ ka ti na nyɛ na'asi tita'ar dinɛ ka' naarɛ, ka li gati ti namisʋg la bɛdegʋ, ka ti kʋ nyaŋi maki li nɛ ti namisʋg laa.
18 Ti nɔki ti sʋnfʋ lɔ nɛ bʋn dinɛ ka ti pʋ nyɛtaa, amaa ka'anɛ bʋn dinɛ ka ti nyɛta. Bʋn dinɛ ka ti nyɛt la kʋ ya'as naarɛ, ka dinɛ ka ti pʋ nyɛt la na bɛ yʋma dinɛ ka' naarɛ.
2 KORINT DIM 5
Ti arezana ni niŋgbina la yɛla
| 5 |
Ti mi' ye ti niŋgbina dinɛ nwɛnɛ fuug dɔɔg la ya'a ti san'am, ti na paam niŋgbiŋ si'a arezana ni ka li nwɛnɛ dɔkanɛ ka Wina'am mɛŋ mɛ' ka ka' ninsaaliba. Niŋgbiŋ kan la na bɛ yʋma dinɛ ka' naarɛ.
2 Ti mɔr sʋnsa'aŋ dunia nwa' ni ka bɔɔd nɛ ti sʋnf wʋsa ye Wina'am na nɔki ti arezana niŋgbiŋ la yɛɛli ti wʋʋ fuug nɛ.
3 Bɔzugɔ ti ya'a yɛ arezana fuug la ti kʋ ken biellɛ.
4 Tinamɛ bɛɛ ti dunia niŋgbiŋin la, ka ti mɔr daamʋgʋ ti sʋnfʋn ka sin'immi li zug. Li ka'anɛ ye ti pʋ bɔɔd ye ti mɔri ti dunia niŋgbiŋ laa; li lɛɛ anɛ ye ti bɔɔd ye Wina'am nɔki ti arezana niŋgbiŋ la yɛɛli ti bɔzugɔ vʋm na nyaŋ niŋgbiŋ dinɛ na kpi la.
5 Li anɛ Wina'am ti'ebi ti ye ti nyɛ tiakir kaŋa, ka tisi ti o Siig Kasi ye li pa'al ye ti na di'e on ye o tisi ti si'el la wʋsa.
6 Dinzugɔ ti ɛɛnti mɔr sʋnkpi'euŋ bɛdegʋ, ka mi' ye ti ya'a bɛɛ ti dunia niŋgbiŋin, ti ka' Zugsɔb san'an arezana nii.
7 Ka li ka'anɛ tinamɛ nyɛt o la kɛ ka ti dɔl oo, ka anɛ ti yadda niŋir yɛla.
8 Ti mɔr sʋnkpi'euŋ bɛdegʋ ka na bɔɔdin ye ti basini ti dunia niŋgbiŋ la ka mɔrini ti arezana niŋgbiŋ la bɛ Zugsɔb san'an.
9 Ti gban'e nɛ ti sʋnf wʋsa ye ti ma'ae Zugsɔb la sʋnf ti ya'a vʋe ti niŋgbiŋ dinɛ an dunia nwa' yir la, bɛɛ ti ya'a ti kae niŋgbiŋin la ka bɛ arezana nii.
10 Li anɛ tilas ye ti wʋsa na ti zi'en Kristo tuon ka o kadi ti saria. Sɔ' mɛkama na ti di'e linɛ nar o; li ya'a an sʋm bɛɛ bɛ'ɛd, li dɔlnɛ on tʋm si'em dunia nwa' ni.
Yesu Kristo san'an ka ti naalim nɛ Wina'am
11 Dinzugɔ tinamɛ zɔt Zugsɔb la dabiem nɛ ti sʋnf wʋsa la zug ka ti mɔɔd ye ti kɛ ka nidib siak Wina'am. O mi' tinamɛ an si'em sʋ'ʋŋa. Ka m mɔr pʋtɛn'ɛr ye yanam mɛ mi' ya sʋnfʋn tinamɛ an si'em la.
12 Ti pʋ lɛm mɔɔd ye ti yɛli ya tinam sʋ'ʋm yɛla ya'asa. Ti lɛɛ mɔɔd ye ti kɛ ka ya mɔr si'eli na nwɛ' nyɔ'ɔgʋ ti yɛla. Ka mɔr si'eli na yɛl nimbanɛ nwɛ'ɛd nyɔ'ɔg ban an si'em ka nidib nyɛti li paalʋ la, ka ka' ban an si'em ba sʋnfʋnɛ.
13 Ti sid anɛ gɛɛmisɛ? Li ya'a aan ala, li anɛ Wina'am yɛla. Ka ti ya'a pʋ gɛɛm li anɛ yanam mɛŋ zug.
14 Kristo nɔŋiri sʋ'oe ti, ka ti baŋ sʋ'ʋŋa ye dau yinne da kpii tis nidib wʋsa, ka dinzug ka nidib wʋsa da la'am kpi nɛ o.
15 Ka mɛ baŋ ye o da kpii tisi ba ye banɛ mɔr vʋmpaal o zug la kʋ lɛn vʋe ye ba niŋi ba mɛŋ bɔɔdim, ka lɛɛ vʋe ye ba niŋ on, onɛ kpi ka vʋ'ʋg kuminɛ tisi ba la bɔɔdim.
Wina'am kɛ ka ti tiaki an nimpaala la
16 Tinamɛ tɛn'ɛs nidibi an si'em la, pʋ lɛn dɔlnɛ ti ninsaalib pʋtɛndaa. Hali ti ya'a daa tɛn'ɛs Kristo an si'em la ka li dɔlnɛ ti ninsaalib pʋtɛnda, ti pʋ lɛn niŋid alaa.
17 Sɔ' ya'a an yinne nɛ Kristo, Wina'am maal o ka o an nimpaal. Ka o bɔɔdim kʋdig la gaad ya, ka o yʋ'ʋn mɔr bɔɔdim paal.
18 Wina'am niŋi li wʋsa ka naali ti nɛ o mɛŋ, ka li yinɛ Kristo ni na, ka tisi ti tʋʋma ye ti kɛ ka nidib mɛ naal nɛ o.
19 Ti labaar anɛ ye Wina'am da bɛ Kristo ni ka da naal dunia dim nɛ o mɛŋ ka yisi ti tʋʋmbɛ'ɛdi bas, ka gu'uli ti o naalʋŋ labaar la.
Tinamɛ di'e Kristo zin'igi tʋm si'em la yɛla
20 Dinzug ti anɛ Kristo tʋmtʋmnib banɛ zi'e o zi'esim ka Wina'am dɔlisidi ti nii buon nidib. Alazug, ti sɔsidi ya nɛ Kristo yʋ'ʋr zug ye ya naal nɔɔr nɛ Wina'am.
21 Kristo pʋ mɔr tʋʋmbɛ'ɛdɛ. Ka Wina'am da kɛ ka o di'e ti tʋʋmbɛ'ɛd wʋsa ye tinam lieb yinne nɛ o la, ka ti na di'e Wina'am pʋpielim.
2 KORINT DIM 6
Tinamɛ tʋm nɛ taaba Wina'am ni la, ti bɛlimi ya ye yanam banɛ di'e
Wina'am pʋpielim piini la da kɛ ka li an zaalim ya san'anɛ.
2 Bɔzugɔ Wina'am da yɛl o gbauŋʋn ye, “Saŋkanɛ ka m siak ye m tisi ya m yɛlsʋm la, ka m wʋmi ya sɔsʋg. Ka faangir daar la ka m sʋŋi ya.” M na yɛli ya ye saŋkanɛ ka Wina'am siak ye o tisi ya o yɛlsʋm la anɛ nannanna nwa', ka faangir daar la an zina.
3 Ti pʋ niŋid si'el dinɛ na vi' sɔ' suor ka o luu, ka sɔ' da nyɛ taalɛ ti tʋʋma nii.
4 Tinamɛ tʋm si'el wʋsa, ti niŋidi li pa'an ye ti anɛ nimbanɛ an Wina'am tʋmtʋm sʋma. Ti daa nyɛt daamʋg nɛ fara nɛ yɛltɔɔd.
5 Ba daa bʋ'ʋdi ti ka kpɛn'ɛsidi ti sanrega ni. Ka nidib bɛdegʋ giligi ti kisi ti. Ti daa tʋm tʋʋm kpi'ema bɛdegʋ, ka pʋ gbisida. Ka kɔ'ɔm daa mɔri ti, ka ti mɔdig yɛlbama ni wʋsa.
6 Ti niŋid dinɛ wʋsa an nyain, ka gban'ad si'elnam gbin nɛ mɔdigir nɛ ti tʋʋm sʋma nɛ Wina'am Siig Kasi la paŋ nɛ sida nɔŋilim
7 nɛ ti sida pian'ad nɛ Wina'am paŋ la wʋsa pa'al ye ti anɛ nimbanɛ tʋm o tʋʋma sʋ'ʋŋa. Ti mɔr pʋpielim ka li an ti zaba la'ad ka li bɛ datiuŋ nɛ dagɔbʋg,
8 ka nyɛt na'asi nɛ nyan nɛ tʋ'ʋd nɛ zʋn'or. Ba niŋidi ti wʋʋ dama'anam ka ti lɛɛ an sida dim,
9 ka niŋidi ti wʋʋ ba zi' tii amaa nidib bɛdegʋ mi' ti, ka niŋidi ti wʋʋ ti kpinɛ ka ti lɛɛ mɔr nyɔvʋr, ka namisidi ti ka ti lɛɛ pʋ kpii.
10 Ti nyɛt sʋnsa'aŋ ka lɛɛ mɔr sumalisim, ka an wʋʋ nɔŋ dim ka lɛɛ kɛ ka nidib bɛdegʋ di'ed yɛlsʋm bɛdegʋ, ka pʋ mɔr si'el dunia nwa' nii, ka lɛɛ mɔr si'el wʋsa Wina'am tuon.
11 M zua sʋma banɛ bɛ Korint teŋinɛ, ti pian'adi ya nɛ nyain-nyain ka pie ti pʋʋgʋ tisi ya, ka yɔ'ɔgi ti sʋnf wʋsa tisi ya.
12 Tinam nɔŋi ya hali amaa yanam pʋ nɔŋi tii.
13 M pian'adi tisidi ya wʋʋ ya anɛ m biis nɛ, yanam mɛ niŋimi ala ka yɔ'ɔgi ya sʋnya tisim mɛn.
Da naal nɔɔr nɛ banɛ zi' Wina'am
14 Da mɔr nɔɔr yinne nɛ banɛ ka' yadda niŋidib la ye ya niŋ si'ela. Pʋpielim nɛ bɛ'ɛd kʋ nyaŋi la'as taabaa. Bɛɛ lik na nyaŋi an yinne nɛ nɛɛsim?
15 Kristo nɛ Sʋntaana kʋ nyaŋi siak taaba nɔɔrɛ. Ka onɛ an yadda niŋid kʋ nyaŋi mɔr nɔɔr yinne nɛ onɛ ka' yadda niŋida.
16 Ka Wina'am Pʋ'ʋsim Yir kʋ nyaŋi an yinne nɛ badaa. Tinam mɛŋ anɛ Wina'am onɛ vʋe la yir. Li dɔlnɛ Wina'am da yɛl o gbauŋʋn si'em la ye, “M na bɛɛ ba sʋʋgin ka la'am ken nɛ ba. M na aan ba Wina'am. Ka ba na aan m nidib.”
17 Ka dinzug ka Zugsɔb Wina'am onɛ mɔr paŋi gat si'el wʋsa la da yɛl o nidib ye, “Yimi banɛ ka' m nidib la sʋʋgin, ka baki ya mɛŋ nɛ ba. Da si'is bʋn dinɛ an dian'adɛ, ka m na di'e ya.” “M na aan ya Ba' ka yanam mɛ aan m biribis nɛ m bipumis, Zugsɔb onɛ an Paŋtita'ar Sɔb la yɛl si'em la.”
2 KORINT DIM 7
M zuanɔŋa, kaanb bama anɛ ti din. Dinzugɔ kɛlli ka ti bas si'el wʋsa dinɛ kɛt ka ti niŋgbina nɛ ti siis an dian'ad la, ka lieb nyain. Kɛlli kati na'asid Wina'am ka aan o nimbanɛ an kasi ka an nyain.
Paul n mɔr sumalisim nɛ Korint dim la yɛla
2 Kɛlli ka ya nɔŋilim an bɛdegʋ ti san'an. Ti pʋ tʋm sɔ' bɛ'ɛdɛ, ka pʋ san'am sɔ' yadda niŋirɛ, ka pʋ nɔki ti tʋʋma zugʋ di'e si'el sɔ' san'anɛ.
3 Man pian' nɛ'ɛŋa la, m pʋ yɛl ye ya tʋm bɛ'ɛdɛ; m pʋn dɛŋi yɛl ye, tinam nɔŋi ya nɛ hali. Ka ti ya'a vʋe bɛɛ ti kpinɛ ti kʋ basi ti nɔɔr yinne laa.
4 Mam mi' ya pʋʋg sʋ'ʋŋa la zug ka m nwɛ'ɛd nyɔ'ɔgʋ ya yɛla. Ti yɛltɔɔd wʋsa pʋʋgin m nam mɔr sʋnkpi'euŋ; ka mɔr sumalisim bɛdegʋ.
5 Hali nɛ tinamɛ daa paae Masedonia teŋin la, ti daa pʋ nyɛ vʋ'ʋsʋm. Yɛltɔɔd daa bɛ zin'is wʋsa ka zaba mɛ bɛ. Ka ti mɛŋ mɔr dabiem ti sʋnfʋn.
6 Amaa Wina'am onɛ kɛt ka banɛ mɔr sʋnsa'aŋ nyɛt kpɛmisʋg la daa kɛ ka Titus kena, ka ti sʋnf kpɛ'ɛŋ,
7 ka li ka' o ken la na ma'aanɛɛ, amaa on daa yɛli ti yanamɛ daa kpɛ'ɛŋ o sʋnf si'em la. O yɛli ti yanamɛ bɔɔd hali ye ya nyɛɛm, ka mɔr sʋnsa'aŋ si'em nɛ dinɛ daa niŋ la, Ka sɔ' ya'a pian' bɛ'ɛd man yɛla, yanam ɛɛnti kpɛ'ɛŋi ya mɛŋi lɛbis sʋ'ʋm man yɛla. Ka dinzug ka m sumalisim maligim paas bɛdegʋ.
8 Hali gbauŋ kanɛ ka m daa sɔb la ya'a daa san'ami ya sʋnya, m sʋnf pʋ san'am man sɔbi li laa. M nyɛ ka m gbauŋ la daa san'ami ya sʋnya, amaa li anɛ saŋa bi'ela.
9 M mɔr sumalisim nannanna, ka li ka'anɛ man daa kɛ ka ya sʋnf san'am la yɛlaa, ka lɛɛ anɛ ya sʋnsa'aŋ la daa kɛ ka ya tiaki ya suoya la zug. Sʋnsa'aŋ kaŋa anɛ dinɛ ka Wina'am tisi ya, ka dinzug ka gbauŋ kanɛ ka ti daa sɔb la pʋ kɛ ka ya nyɛ bɛ'ɛdɛ.
10 Sʋnsa'aŋ dinɛ ka Wina'am kɛt ka li paad nidib la tiakidi ba sʋnya ka linzug ka ba na nyɛ faangir. Li pʋ mɔr ye m ya'a daa baŋinɛ, amaa dunia sʋnsa'aŋ dɔlli kum.
11 Ya nyɛ Wina'am kɛ ka ya sʋnsa'aŋ dɔl suosi'a. Li daa kɛ ka ya tɛn'ɛs dinɛ daa niŋi ya san'an la yɛla nɛ nimmua, ka kɛ ka ya mɔɔd bɛdegʋ ye ya pa'al ye ya ka' taal yɛlkaŋa nii, ka ya sʋnya duoe, ka ya zɔt dabiem, ka bɔɔd nɛ ya sʋnya wʋsa ye ya nyɛɛm ka mɔɔd ye ya niŋ dinɛ an sʋm, ka kpɛ'ɛŋi ya mɛŋ ye ya namis onɛ tʋm tʋʋmbɛ'ɛd kaŋa la. Ya pa'alya ye ya ka' taal yɛlkaŋa wʋsa nii.
12 Hali nɛ man daa sɔbi tisi ya si'em la, m daa pʋ sɔbi li onɛ tʋm tʋʋmbɛ'ɛd kaŋa bɛɛ onɛ ka o maal bɛ'ɛdi tis o la zugɔ, ka lɛɛ sɔbi li ye li kɛ ka ya baŋ sʋ'ʋŋa Wina'am tuon yanamɛ nɔŋi ti bɛdegʋ si'em.
13 Ka dinzugʋ kɛ ka ti sʋnya kpɛ'ɛŋ. Li ka'anɛ lin ma'anɛ, li mɛ malisi ti tinamɛ nyɛ ka Titus mɔr sumalisim bɛdegʋ la. Bɔzugɔ ya kɛya ka o sʋnsa'aŋ la naae, dinɛ kɛ ka ti sumalisim paas bɛdegʋ. 14 M daa nwɛ'ɛd nyɔ'ɔgʋ ya yɛla Titus san'an ka ya mɛ pʋ diisim nyannɛ. Ti ɛɛnti pian'ad sida tisidi ya.
14 Ala ka tinamɛ daa pian'ad si'eli nwɛ'ɛd nyɔ'ɔg Titus ni la daa sid an sida.
15 Titus tɛnri ya wʋsaa kpɛ'ɛŋi ya mɛŋi siak o nɔɔr ka di'e o nɛ zɔtim si'em la. Dinzug ka o nɔŋilim ya san'an nɔbigid bɛdegʋ.
16 M mi' ye ya na niŋ man yɛli ya si'el la wʋsa dinzug ka m mɔr sumalisim.
2 KORINT DIM 8
Wina'am nidibi nar ye ba sʋŋ taaba si'em
| 8 |
Ti ba'abiisɛ, ti bɔɔd ye ya baŋ Wina'am tis o nimbanɛ bɛ Masedonia teŋin la pʋpielim si'em.
2 Ba daa nyɛ makir nɛ yɛltɔɔd bɛdegʋ ka o pʋpielim la lɛɛ kɛ ka ba mɔr sumalisim bɛdegʋ, ka sumalisim la kɛ ka ba 2 KORINT DIM 8
nɔk ligidi bɛdegʋ tis nɛ ba sʋnf wʋsa ye ba sʋŋ Wina'am nidib, la'an nɛ ban daa an nɔŋ dim la.
3 M yɛli ya ye ba daa tis ka li zemisi ba paŋi na tun'e si'em, hali ba tis ka li gaadi ba paŋ bɛn.
4 Ba daa sɔsi ti nɛ nimmua ye ba bɔɔdim anɛ ye ti tisi ba suor ka ba mɛ sʋŋ Wina'am nidib la.
5 Ba daa niŋ ka li gaad tinamɛ tɛn'ɛs si'em la. Ba daa zaŋi ba mɛŋ yiiga tis Zugsɔb la la'an nɛ tinam mɛn, ka li dɔl Wina'am bɔɔdim an si'em.
6 Dinzugɔ ti kpɛ'ɛŋ Titus onɛ pin'il ligidi la'asʋg tʋʋma ya san'an la ye o sʋŋi ya ka ya naae pʋpielim tʋʋm kaŋa.
7 Amaa nwɛnɛ yanamɛ nyaŋidi maan si'el wʋsa si'em la, ya yadda niŋir Kristo ni, ya pian'ad Wina'am yɛla sʋ'ʋŋa ka mɔr Wina'am mi'ilim bɛdegʋ ka mɔɔd ye ya sʋŋ nidib ka nɔŋi ti bɛdegʋ. Kpɛ'ɛŋimi ya mɛŋi mɛ tʋm pʋpielim tʋʋm kaŋa.
8 M pʋ yɛt nwa' nɛ paŋa. Amaa m zaŋ nɛ ninsieba tʋm si'el la ye m mak ka baŋi ya sida nɔŋilim la zem si'em.
9 Ya mi' ti Zugsɔb Yesu Kristo pʋpielim an si'em. Hali la'an nɛ on da an yɛlsʋm wʋsa daan la, o da lieb nɔŋdaan yanam sʋ'ʋm nyɛɛb zug. Li anɛ on lieb nɔŋdaan la kɛ ka yanam lieb kpan'am dim.
10 Mam mɔr sa'alsi'a tisidi ya yɛlkaŋa nwa' ni anɛ ye, yʋʋm kanɛ gaad la yanamɛ da dɛŋ yiiga tis, ka li ka' din ma'aanɛ, amaa ya da mɔr ya'amlɛog ye ya tʋmi li.
11 Nannanna naami tʋʋm kanɛ ka ya daa mɔɔd nɛ ya'amlɛog ye ya tʋm naae li la, ka li zemisi ya paŋ bɛn. Kɛlli ka ya tisib la zemis yanamɛ mɔr si'em.
12 Sɔ' ya'a mɔr ya'amlɛog ye o tis piini, Wina'am na di'e o piini la ka li dɔlnɛ on tis ka li zemis on mɔr si'em bɛn la, ka ka'anɛ dinɛ ka o pʋ mɔra.
13 Ti bɔɔdim ka' ye ti yis sieba ba namisʋgʋn ka li lieb mugusʋgʋ tisi yaa. Amaa li sʋ'ʋm ye li zem taaba.
14 Ka yanamɛ mɔr bɛdegʋ nannanna la, sʋŋimi banɛ an nɔŋ dim la. Ban mɛ na ti mɔr bɛdegʋ ka sʋŋi ya, ya bɔɔdim saŋa. Ala ka ya wʋsa na zem taaba.
15 Li dɔlnɛ lin da sɔb Wina'am gbauŋʋn si'em la ye, “Ninkanɛ vaae bɛdegʋ la pʋ mɔr ka li zu'oe galisɛ. Ka ninkanɛ vaae bi'ela la pʋ mɔr ka li pɔɔdi galisɛ.”
16 Ti pʋ'ʋs Wina'am bareka on kɛ ka Titus mɔr pʋtɛn'ɛr ye o sʋŋi ya wʋʋ tinamɛ mɔr pʋtɛn'ɛr si'em la.
17 O daa pʋ siaki ti kpɛmisʋg ma'aanɛ, amaa o mɛ daa mɔr pʋtɛn'ɛr ye o sʋŋi ya, ka gban'e nɛ o mɛŋ bɔɔdim ye o kɛɛn ya san'an na.
18 Ti ye ti tʋm nɛ ti ba'abiig sɔ' ka on nɛ Titus kena. O anɛ on ka Wina'am nidib wʋsa na'asid o on tʋm si'em ka mɔɔn labasʋŋ la zug.
19 Karindɔɔd la mɛ daa lɛn gaŋ o ye o giligid nɛ ti ka sʋŋidi ti nɛ pʋpielim tʋʋm kaŋa. Ti tʋm pʋpielim tʋʋm kaŋa ye ti na'as Zugsɔb la, ka sid pa'al ye ti bɔɔd ye ti sʋŋ.
20 Ti gu'usidi ti mɛŋ ye sɔ' da pian' bɛ'ɛd nɛ piintita'ar kanɛ ka ti tʋm la yɛlaa,
21 ka bɔɔd ye ti niŋ dinɛ an sʋm Wina'am tuon nɛ ninsaalib san'an mɛn.
22 Ti mɛ lɛn tʋmnɛ ti ba'abiig sɔ' ya'as ye o paasi ba. Ti daa nyɛ on tʋm si'em saŋa bɛdegʋ ka baŋ ye o ti'e ye o sʋŋ. Nannanna o mɔr pʋtɛn'ɛr bɛdegʋ ye o sʋŋi ya, on mi' sʋ'ʋŋa ye ya na niŋ tinamɛ yɛli ya si'em la zug.
23 Li ya'a anɛ ti ba'abiig Titus yɛla, o anɛ m tʋmtʋm tiraan onɛ tʋm nɛ man ye ti sʋŋi ya. Ka li ya'a anɛ ti ba'abibanɛ ye ba dɔl o la yɛla, ba anɛ banɛ ka Wina'am nidib tʋmi ba na, ye li kɛ ka Kristo nyɛ na'asi.
24 Pa'alimini ba ya nɔŋilim, nɛ dinɛ kɛ ka ti nwɛ'ɛd nyɔ'ɔgʋ ya yɛla la, ka Wina'am nidib nyɛ ka baŋ ye li anɛ sida.
2 KORINT DIM 9
Li pʋ lɛn nar ye m sɔbi yɛli ya piini dinɛ ka ya na tis Wina'am nidib la yɛlaa.
2 M mi' ye ya mɔr pʋtɛn'ɛr ye ya sʋŋ, ka nwɛ'ɛd nyɔ'ɔgʋ tisid Masedonia nidib la. M yɛti ba ye yʋʋm sa ka Wina'am nimbanɛ bɛ Akaia teŋin la da ti'eb ye ba sʋŋ. Yanamɛ mɔr pʋtɛn'ɛr ye ya sʋŋ si'em la, kpɛmisimini ba bɛdegʋ sa.
3 Amaa m tʋmnɛ ti ba'abibama ye li pa'al ye man nwɛ'ɛd nyɔ'ɔgʋ ya yɛla yɛlkaŋa nwa' ni la da lieb zaalim, amaa ka lɛɛ an sida, ka ya sid ti'eb nɛ ya piini la wʋʋ man yɛl si'em la.
4 Bɔzugɔ Masedonia dim la sieba ya'a dɔllimi kena ka nyɛ ka ya pʋ ti'ebɛ, nyan na dii ti bɛdegʋ, ka m pʋ lɛn yɛt yanam yɛlaa. Nyan na dii ti, tinamɛ daa tɛn'ɛs ye ya na ti'eb nɛ ya piini la zug.
5 Ka dinzug ka m gɔs ka li nar ye m tʋmi ti ba'abiis la ka ba gaad tuon na kɛ ka ya dɛŋi ti'eb piinkanɛ ka ya zi'el nɔɔr ye ya tis la. Ala ka m ya'a ti paae na, ka ya pʋn ti'eb nɛ ya piini la, li na pa'al ye ya tisidnɛ nɛ ya bɔɔdim ka ka' sɔ' mugusi ya.
6 Tɛnri ye ninkanɛ bʋd bi'ela na bun bi'ela, ka onɛ bʋd bɛdegʋ na bun bɛdegʋ.
7 Kɛlli ka ya sɔ' mɛkama niŋ wʋʋ on gban'e si'em la, ka ka'anɛ sʋnsa'aŋ bɛɛ sɔ' mugusidi yaa. Wina'am nɔŋ onɛ tisid piini nɛ sumalisim,
8 Wina'am na nyaŋi tisi ya ka li gaad yanamɛ bɔɔd si'em. Ka ya na mɔr yanamɛ bɔɔd si'el wʋsa, ka ya na nyaŋi tis piini ka li sʋŋ tʋʋm sʋma wʋsa.
9 Li dɔlnɛ lin da sɔb Wina'am gbauŋʋn pʋpielnam yɛla si'em la ye, “O nɔk piini bɛdegʋ tis nɔŋ dim, ka o pʋpielim la na bɛ yʋma dinɛ ka' naarɛ.”
10 Wina'am onɛ tisid kpaad bʋmbʋta ka tisid nidib diib ka ba dit la, o mɛ na tisi ya yɛlsʋm ka li zemisi ya bɔɔdim ka kɛ ka li nɔbig, ka mɛ kɛ ka yanamɛ tisid si'el nɛ yamlɛog la nɔbig.
11 O na kɛ ka ya na mɔr arezak bɛdegʋ ka na kpɛn ken tuonnɛ tisid piini saŋa wʋsa. Ka li kɛ ka li dɔlisi ti ni ka ya piini la an bareka pʋ'ʋsim tis Wina'am.
12 Sʋŋir kanɛ ka ya tisid Wina'am nidib la pʋ sʋŋid ban ma'aanɛ, amaa li mɛ kɛt ka nidib bɛdegʋ pʋ'ʋsid Wina'am bareka.
13 Sʋŋir kaŋa pa'an yanamɛ an si'em ka kɛ ka nidib nyɛt ka ya siaki dɔl Kristo labasʋŋ la. Dinzug ka ba na zun'e Wina'am ka pʋ'ʋs o bareka yanamɛ mɔr nɔɔr yinne nɛ ba ka tisidi ba piintitada, ka mɛ mɔr nɔɔr yinne nɛ Wina'am nidib wʋsa la.
14 Ban sɔsid Wina'am tisidi ya la, ba sʋnf na bɛɛ ya san'an, yɛlsʋm tita'ar dinɛ ka Wina'am tisi ya la zug.
15 Kɛlli ka ti pʋ'ʋs Wina'am bareka o piintita'ar dinɛ zu'oe gat tinamɛ na nyaŋi pian' li yɛla la.
2 KORINT DIM 10
Paul lɛbisʋg banɛ pʋ bɔɔd o la yɛla
10
Man Paul, onɛ ka ya yɛl ye m ya'a bɛɛ ya san'an m zɔtnɛ dabiem, amaa m ya'a ka' ya san'anɛ, m mɔri sʋnkpi'euŋʋ pian'ad la, m bɛlimidi ya nɛ Kristo sumbʋgʋsʋm,
2 ka sɔsidi ya ye m ya'a ti kena, m kʋ lɛm pian'ad nɛ sʋnkpi'euŋɔ. M mi' ye m na nyaŋi mɔr sʋnkpi'euŋʋ sa'al banɛ yɛl ye ti tʋʋma dɔlli ti ninsaalib bɔɔdim la.
3 Hali la'an nɛ tinamɛ bɛ dunia ni la ti pʋ nwɛ'ɛd tanp nwɛnɛ dunia nidibi niŋid si'em laa.
4 Zaba la'abanɛ ka ti mɔri zabid la ka'anɛ dunia nwa' dinnɛ. Ti lɛɛ mɔri Wina'am zaba la'ad dinɛ gaad zaba la'ad wʋsa la san'amid kpi'euŋ zin'is wʋsa.
5 Ka san'amid ziri nɔŋgbannwa'ar wʋsa nɛ dinɛ wʋsa na dʋ'ʋsi li mɛŋ nɛ nyɛɛsim ye li gu' nidib ka ba da baŋ Wina'am la. Ti nyaŋ pʋtɛn'ɛbɛ'ɛd wʋsa ka ba siaki an Kristo din.
6 Ti ti'eb ye ti ya'a kɛɛn ya san'an na, ka ya pa'ali ti ye ya sid siak Wina'am nɔɔr, ti na tɛɛg onɛ wʋsa pʋ siak Wina'am nɔɔr la tʋbir.
7 Ya gɔsidi si'elnam yiŋ ma'aa ka gban'adi ya gban'ar. Sɔ' ya'a bɛ ka tɛn'ɛs ye o anɛ Kristo nid, on tɛn'ɛsim ye tinam mɛ anɛ Kristo nidib wʋʋ on an si'em la.
8 M nwɛ'ɛd nyɔ'ɔg nɛ paŋ kanɛ ka Wina'am tisi ti la yɛla, dinɛ kɛ ka ti kpɛmisidi ya, ka ka'anɛ dinɛ na san'ami ya yaddaa. Hali m pʋ zɔti li nyan nɛ man nwɛ'ɛd nyɔ'ɔg laa.
9 M pʋ bɔɔd ye m niŋ ka li nwɛnɛ m kpɛn'ɛsidi ya nɛ dabiem nɛ m gbana laa.
10 Sieba yɛt ye, “O gbana la kpi'emnɛ ka tɛbis hali. Amaa o ya'a bɛɛ ti san'an o mɔr dabiem ka o pian'ad ka' gbinnɛ.”
11 Ninkan daana baŋim ye lin ka ti yɛt gbana ni la, ti ya'a kɛɛn ya san'an na, ala ka ti mɛ na niŋ.
12 Ti pʋn kʋ yɛl ye ti an sʋm wʋʋ banɛ tɛn'ɛs ye ba an sʋm hali si'em laa. Ba ya'a makidi ba mɛŋ nɛ taaba ka mamisidi ba mɛŋ nɛ ba taaba, ba ka' ya'am.
13 Ti lɛɛ kʋ nwɛ' nyɔ'ɔg ka li gaad Wina'am tisi ti si'el la bɛnnɛ, amaa ti na nwɛ' nyɔ'ɔgʋ zemis tʋʋm kanɛ ka o tisi ti la bɛn. Ka ti tʋʋma ya san'an la zemis on tisi ti si'em la ka ya mɛ paasi li ni.
14 Ti pʋ nwɛ'ɛd nyɔ'ɔgʋ gati li bɛn lin sadigim an sida ye tinamɛ daa an yiiga dim banɛ kɛɛn ya san'an na nɛ Kristo labasʋŋ la.
15 Dinzugɔ ti pʋ nwɛ'ɛd nyɔ'ɔg nɛ tʋʋm banɛ ka sieba tʋm la nwɛnɛ tinamɛ tʋmi lii, ka lɛɛ mɔr pʋtɛn'ɛr ye ya yadda niŋir Wina'am ni na nɔbig ka ti na nyaŋi tʋm ya san'an ka li gaad tinamɛ daa ɛɛnti tʋm si'em la, ka li zemis nɛ Wina'am tisi ti si'em la bɛn.
16 Ala ka ti yʋ'ʋn na mɔɔl labasʋŋ la tɛɛns banɛ bɛ ya tuon la. Bɔzugɔ, ti pʋ bɔɔd ye ti nwɛ' nyɔ'ɔg nɛ tʋʋm kan ka sɔ' dɛŋi tʋm o sʋ'ʋlim kanɛ ka Wina'am tis o ye o tʋm la nii.
17 Li dɔlnɛ lin da sɔb Wina'am gbauŋʋn si'em la ye, “Onɛ bɔɔd ye o nwɛ' nyɔ'ɔg on nwɛ'ɛm nyɔ'ɔg nɛ linɛ ka Zugsɔb la tʋm.”
18 Li ka'anɛ ninkanɛ pian' o mɛŋ yɛla sʋ'ʋŋa la an ninsʋŋɔ, amaa li anɛ ninkanɛ ka Wina'am pian' o yɛla sʋ'ʋm la an ninsʋŋ.
2 KORINT DIM 11
Paul nɛ ziri tʋmtʋmnib la yɛla
11
M mɔr ti'ir ye ya na di suguru nɛ m zɔlimis la bi'ela, amaa ya pʋn di suguru nɛ li.
2 M mɔr fufummɛ ya yɛla wʋʋ Wina'am mɔr fufummɛ ya yɛla si'em la, li nwɛnɛ pu'a-ɛliŋ kanɛ nan zi' dau ka ba gur o, ka ti kɛ ka o kul sid si'em la. Ya nwɛnɛ pu'a-ɛliŋ nɛ, ka dau yinne ma'aa ka m nɔki ya tis ye ya kul o, onɛ an Kristo la.
3 Amaa m zɔti dabiem ye ba na ti ma' ya fɛndigi ya pʋtɛnda ka ya bas ka kʋ dɔl Kristo sʋ'ʋŋa nɛ ya sʋnf wʋsaa, nwɛnɛ Hawa ka waaf la da ma' o nɛ ya'ambɛ'ɛd si'em la.
4 Sɔ' ya'a kɛɛn ya san'an na mɔɔn Yesu sɔ' yɛla, ka li ka' Yesu onɛ ka ti mɔɔl la yɛlaa, bɛɛ ya di'e siig kanɛ bɛɛ li kɔn' nɛ dinɛ ka ya pʋn di'e sa la, bɛɛ ya di'e labasʋŋ dinɛ bɛɛ li kɔn' nɛ dinɛ ka ya siak la, ya siakidi di'ed o sɔba nɛ na'ana.
5 M pʋ tɛn'ɛs ka banɛ ka ya gɔs ka ba an Yesu Kristo tʋmtʋmnib hali la gat mam nɛ.
6 Hali nɛ mam pʋ zamis nɔmi'ilim pian'ad la, m mɔr baŋir. Ti yɛli ya nɛ' wʋsa yɛla nyain si'el wʋsa pʋʋgin.
7 M daa mɔɔl Wina'am labasʋŋ la ya san'an, ka daa pʋ kɛ ka ya yɔ si'ela; ka siem mɛŋ ye yanam lɛɛ dʋ. Ya tɛn'ɛs ye man daa tʋm si'el la, anɛ bɛ'ɛdi tisi ya?
8 M daa di'e ligidi Wina'am nidib sieba san'an ye m sʋŋim mɛŋ ka lɛɛ tʋm tisi ya.
9 Man daa bɛɛ ya san'an la, m ya'a daa bɔɔd si'el wʋsa, m daa pʋ daamidi yaa. Amaa li daa anɛ ti ba'abiis banɛ yi Masedonia na la daa tisidim man bɔɔd si'el wʋsa. Man daa pʋ daami ya si'el yɛla la, m na kpɛn aan ala nɛ dabisbanɛ bɛ tuon la.
10 Li anɛ sida ye Kristo yɛlsida bɛɛm ni. Alazug, li anɛ sida ye sɔ' kae Akaia tɛɛnsin la na vi'im ka kɛ ka m an baanlimm nɛ m nyɔ'ɔg nwɛ'ɛb la yɛlaa.
11 Bɔ ka m yɛl anwa? Mam pʋ nɔŋi ya la zug bɛɛ? Ayei. Wina'am mi' ye m nɔŋi ya.
12 M na kpɛn niŋ man niŋid si'em nannanna la ka li kɛ ka ziri dim la kʋ nyɛ suori nwɛ' nyɔ'ɔgʋ yɛl ye ba tʋm wʋʋ tinamɛ tʋm si'em laa.
13 Nimbama nwa' buudi anɛ nimbanɛ ma'ad ye ba anɛ tʋmtʋmnib, ka ma'ad ziri ba tʋʋma yɛla, ka tiaki ba mɛŋ wʋʋ ba anɛ Kristo tʋmtʋmnib banɛ an sida dim.
14 Li ka' yɛlsaaŋa. Hali Sʋntaana tun'e tiak o mɛŋi tu'as wʋʋ o anɛ maliak sʋŋ nɛ.
15 Dinzugɔ, Sʋntaana tʋmtʋmnib ya'a tiaki ba mɛŋi tu'as wʋʋ nimbanɛ tʋm pʋpielim tʋʋma la, li ka' bʋnnyalimaa. Ba daar ya'a ti paae, ba na di'e dinɛ nari ba wʋʋ ba tʋʋma an si'em la.
Paul namisʋg la yɛla
16 Dinɛ ka m pʋn dɛŋi yɛli ya la ka m yɛti takid, sɔ' da tɛn'ɛs ye m anɛ zɔlʋgɔ. Amaa ya ya'a tɛn'ɛs ye m sid anɛ zɔlʋg, yanam dim suguru ka kɛlisim pian'ad wʋʋ yanamɛ kɛlisid zɔn pian'ad si'em la, ka m nyaŋi nwɛ' nyɔ'ɔg bi'ela.
17 Man yɛl si'el nannanna la pʋ yit Zugsɔb san'an naa. Li ya'a anɛ m nyɔ'ɔg nwɛ'ɛb yɛla, m pian'adi wʋʋ zɔlʋg nɛ.
18 Nidib bɛdegʋ sadigim nwɛ'ɛd nyɔ'ɔg dinɛ an dunia bʋn yɛla la, mam mɛ na nwɛ' nyɔ'ɔg.
19 Yanamɛ sadigim an ya'am dim la, dimi suguru nɛ banɛ an zɔn la!
20 Sɔ' ya'a tansi ya wʋʋ ya anɛ o yammis, bɛɛ di'e si'eli ya san'an yanamɛ na'asidi ba la yɛla, bɛɛ mɔri ya ba nu'usin, bɛɛ ziemi ya, bɛɛ nwɛ' ya tampian'as, ya mɔdigid ka dit suguru nɛ ba.
21 Linɛ kpɛn'ɛsim nyan la anɛ ye m daa siak ye ti tadignɛ li ni.
Sɔ' ya'a mɔr sʋnkpi'euŋʋ na nwɛ' nyɔ'ɔg nɛ si'el yɛla, mam mɛ mɔr sʋnkpi'euŋʋ na nwɛ' nyɔ'ɔgʋ li yɛla. M pian'ad nɛ wʋʋ zɔlʋg nɛ.
22 Ba ya'a nwɛ'ɛd nyɔ'ɔg ye ba anɛ Hibiru dimaa, mam mɛ anɛ Hibiru nid, ba ya'a anɛ Israel dimaa, mam mɛ anɛ Israel nid, ba ya'a ye ba anɛ Abraham yaasɛɛ, mam mɛ tun'e lɛbis ye m anɛ ba yinne.
23 Ba ya'a yɛl ye ba anɛ Kristo tʋmtʋmnib, m tun'e lɛbis ye man anɛ Kristo tʋmtʋm sʋŋɔ gaadi ba. M pian'ad nɛ wʋʋ onɛ ka' ya'am nɛ. Mam tʋm bɛdegʋ gaad ban tʋm si'em la. Ba kpɛn'ɛsim sanrega nɔɔr bɛdegʋ gaad bam kpɛn'ɛsi ba si'em la. Ba fiebim nɔɔr bɛdegʋ gaad bam fiebi ba si'em la. Hali saŋa bɛdegʋ ka m pʋ lal nɛ kum.
24 Nɔɔr anu ka Jew dim fieb mam nɛ kpa'asa nɔɔr pistan' nɛ awai wai.
25 Nɔɔr atan' ka Room dim bʋ'ʋm. Nɔɔr yinne ka nidib lɔb man nɛ kuga. Nɔɔr atan' ka m bɛ anrʋŋʋn ka li tʋ'ʋs tampiins ka san'am atɛukʋn. Ka nɔɔr yinne ka m bɛ ku'omin dabis mum.
26 M daa nyɛ yɛltɔɔd m gɔɔndim pʋʋgin. Ku'om daa ye li diim, ka faandib giŋim ye ba faanm la'ad. Ka m Jew dim taaba nɛ banɛ ka' Jew dim mɔ ye ba san'am man. Ka m nyɛ yɛltɔɔd atɛuk pʋʋgin. Ka banɛ an zam dim mɔ ye ba san'amim.
27 M daa tʋm tʋʋm kpi'ema. Ka ken nɔɔr bɛdegʋ ka pʋ gbisida. M mi' dinɛ an kɔ'ɔm nɛ ku'onuud. Ka m ken ka pʋ nyɛ diib bɛɛ gbɛɛnsir bɛɛ fuudi na pil waadɛ.
28 Linɛ paas la, daar wʋsa m sʋnf mu'oe nɛ, nɛ Wina'am nidibi bɛ zin'isieba la wʋsa yɛla.
29 Sɔ' ya'a pʋ kpi'em nɛ o Wina'am dɔllim la nii, li nwɛnɛ manɛ pʋ kpi'ema. Ka sɔ' ya'a kɛ ka o tiraan tʋm tʋʋmbɛ'ɛd, m sʋnf ɛɛnti san'amnɛ.
30 Li ya'a nar ye m nwɛ' nyɔ'ɔg, m na nwɛ' nyɔ'ɔg nɛ dinɛ pa'annɛ m tadimis la.
31 Wina'am onɛ aan ti Zugsɔb Yesu saam ka o yʋ'ʋr nyɛt zʋn'or ka li ka' naar la, mi' ye m pʋ ma'ada.
32 Man daa bɛ Damaskus teŋin la, ninkanɛ ka Na'ab Aretus kɛ ka o sʋ'oe Damaskus la daa kɛ ka ba gu'ud teŋ la za'anɔɔrin ye ba gban'am.
33 Ka sieba daa nɔk nwiigi lɔ pɛog ka kɛ ka m zin'in pɛogʋn la, ka ba nɔki li tud takoro ni sigisim yiŋ ka m zɔ.
2 KORINT DIM 12
Yɛlsu'ada dinɛ nie Paul san'an la yɛla
12
Li nar ka m nwɛ' nyɔ'ɔg, hali la'an nɛ nyɔ'ɔg nwɛ'ɛb la ka' nyɔɔd la. M na pian' dinɛ ka Zugsɔb la niedi pa'annim ka li nwɛnɛ zaansʋŋ nɛ, nɛ yɛlsu'ada banɛ ka o kɛ ka li nied ka m baŋi ba.
2 M mi' sɔ' onɛ an Kristo nid, ka yʋma pii nɛ naasi dinɛ gaad la sa, ka Wina'am da nɔk o dʋ arezana nii agɔl. Man zi', m mi' o sid da dʋnɛ, nɛ o niŋgbinaa, bɛɛ li anɛ Wina'am nie pa'al o ka o nyɛɛ li ka li nwɛnɛ o zaansimnɛ, Wina'am ma'aa mi'.
3–4 Ka m mi' ye ninkaŋa da dʋ Wina'am sumalisim teŋin agɔl, ka lɛɛ zi' ye o sid da dʋnɛ nɛ o niŋgbina bɛɛ o zaansimnɛ nyɛɛ lii, Wina'am ma'aa mi'. Ka dau la wʋm si'elnam anina, dinɛ ka o kʋ nyaŋi yɛlɛ, li anɛ dinɛ ka ninsaal pʋ mɔr suori na yɛlɛ.
5 M na nwɛ' nyɔ'ɔg dau kaŋa yɛla ka lɛɛ kʋ nwɛ' nyɔ'ɔgʋ m mɛŋ yɛlaa. Asɛɛ bʋn dinɛ pa'al ye m anɛ tadim la yɛla ma'aa ka m na nwɛ' nyɔ'ɔg.
6 M ya'a bɔɔdin ye m nwɛ' nyɔ'ɔg m naan kʋ aan zɔlʋgɔ, m naan pian'adin dinɛ an sida la yɛla. Amaa m kʋ niŋi lii, m 2 KORINT DIM 12 pʋ bɔɔd ye sɔ' ti tɛn'ɛsi m sʋ'ʋm yɛla gaad on nyɛ ka m niŋid si'el nɛ on wʋm ka m yɛl si'el la.
7 Si'el bɛ m niŋgbiŋinɛ kɛ ka laafi pɔ'ɔgim, dinɛ kɛ ka m pʋ nyaŋidi nwɛ'ɛd nyɔ'ɔg nɛ yɛlsu'adtitada dinɛ ka Wina'am niedi tisidim la. Ka dinɛ zabidim niŋgbiŋin la yinɛ Sʋntaana san'an na daamidim ye li kɛ ka m kʋ nyaŋi nwɛ' nyɔ'ɔgɔ.
8 Nɔɔra atan' ka m sɔs Zugsɔb la ye o yisimi li m san'an.
9 Amaa ka o lɛbisim ye, “Man yɔlisim la siakif, fʋ tadʋŋ saŋa ka m pa'annɛ m paŋi zem si'em.” Dinzug m mɔr sumalisim ka nwɛ'ɛd nyɔ'ɔg nɛ mam pʋ kpi'em la ye Kristo paŋ na bɛɛm san'an.
10 Dinzugʋ kɛ ka m ya'a pʋ kpi'ema, bɛɛ nidib ya'a tʋ'ʋdim bɛɛ m ya'a nyɛt yɛltɔɔd bɛɛ namisʋg bɛɛ daamʋg Kristo zug, m mɔr sumalisim. Saŋkanɛ ka m tadig la, ka m mɔr paŋ!
Paul ba'a bɛ nɛ Korint dim la yɛla
11 M maali m mɛŋ wʋʋ yalim nɛ. Ka li anɛ yanamɛ kɛ ka m aan ala. Yanamɛ naan pa'alin mam an sʋm si'em. Hali baa m ya'a an zaalim, li pʋ pa'al ye m sʋ'ʋm pʋ paae nimbanɛ ka ya tɛn'ɛs ye ba anɛ tʋmtʋmnib ka an sʋm galis laa.
12 M daa mɔdigi tʋm bʋnnyalima nɛ tʋʋm titada ya san'an ka li pa'al ye m sid anɛ Kristo tʋmtʋm.
13 Ya di'e yɛlsʋm ka li zemis nɛ Wina'am nidib sieba di'e si'em la. Yɛlsʋm kanɛ ka ya pʋ di'e anɛ, mam pʋ kɛ ka m yɛla daami ya la ma'aa. M bɛlimmi ya ye ya di suguru m taal kaŋa yɛla.
14 Nannanna m ti'eb ye m kena kaae ya linɛ paasid nɔɔra atan'. M nɔŋi ya ka bɔɔd ye ya mɛ nɔŋim, ka pʋ bɔɔd ye m di'e ya ligidii, ka mɛ pʋ bɔɔd ye m yɛla daami yaa. Ya nwɛnɛ m biis nɛ. Li pʋ nar ye biis diisi ba saamnama, amaa li anɛ saamnamɛ na diisi ba biis.
15 M na mɔr sumalisim nɛ mam na nɔk mam mɔr si'el nɛ m mɛŋ wʋsa tis, ka li sʋŋi ya. M ya'a nɔŋi ya bɛdegʋ, yanam na nɔŋim bi'elaa?
16 Ya sieba yɛt ye, li an sida ye m yɛla pʋ daami yaa. Ka ye m lɛɛ mɔri ya'am, ka nyaŋi ya nɛ dama'am.
17 M daa pʋ kɛ ka nimbanɛ ka m tʋmi ya san'an la sɔ'ɔsɔ zammi ya di'e si'eli ya san'anɛ tisi ma.
18 M daa bɛllim Titus ye o kɛɛn ya san'an na, ka kɛ ka ti ba'abiig sɔ' la'am dɔl o. Titus daa pʋ zammi ya di'e si'ela. Bɛɛ m ma'aanɛɛ? Ka mam nɛ Titus tʋm nɛ pʋtɛn'ɛr yinne, ka dɔl suor yinne.
19 Ya ɛɛnti tɛn'ɛsid ye tinamɛ yɛt nɛ'ɛŋa wʋsa la, ti mɔɔdi ye ti pian' yisi ti mɛŋi ya san'an bɛɛ? Ayei, li ka' alaa. Ti pian'ad gbauŋʋn nwa' nɛ Wina'am tuon anɛ linɛ ka Kristo bɔɔd ye ti pian' la. Ka li wʋsa anɛ ye ti sʋŋ yanam banɛ aan ti ba'abinɔŋa la.
20 M zɔt dabiem ye m ya'a kɛɛn ya san'an na, m pa'ati nyɛ ka ya pʋ nwɛnɛ man bɔɔd ye ya aan si'em laa, ka ya mɛ na nyɛ ka mam mɛŋ kʋ niŋ wʋʋ yanamɛ bɔɔd ye m niŋin si'em la mɛnɛ. M ya'am ian'adnɛ ye m pa'ati nyɛ ka ya zabid nɛ taaba ka nyuun, ka ya sʋnf duod nɛ taaba, ka ya wɛligid nɛ taaba, ka san'ami ya taaba zut, ka kɛɛnd taaba, ka niŋid yɔɔd yɔɔdi, ka mɔr nyɛɛsim.
21 M mɛ lɛn zɔt ye m ya'a kena Wina'am na diisim nyannɛ ya tuon, ka m sʋnf na san'amnɛ ya sieba banɛ daa tʋm tʋʋmbɛ'ɛd ka nam pʋ tiaki ba sʋnya nɛ tʋʋmbɛ'ɛd nɛ dian'ad tʋʋma nɛ yalimis dinɛ ka ba daa tʋm la yɛlaa.
2 KORINT DIM 13
Sa'alʋg nɛ pʋ'ʋsʋg
13
Nɛ'ɛŋa paasid nɔɔr atan' ka m na kena kaae ya. “Sɔ' ya'a mɔr taal nɛ o tiraan ka li an antu'a, asɛɛ ka o daana mɔr kasɛtib ayi' bɛɛ atan'.”
2 M daa pʋn dɛŋi sa'ali ya nɛ nimmua man daa bɛɛ ya san'an nɔɔr ayi' daan la. La'an nɛ man ka' ya san'an la, m lɛn takidi li. M ya'a ti lɛb na, m kʋ bas banɛ daa dɛŋi tʋm bɛ'ɛd bɛɛ banɛ yuulim tʋm laa,
3 bɔzugɔ, ya bɔɔd ye ya baŋ ye li sid anɛ Kristo tisim suor ka m pian'ad nɛ'. Li ka' o kɔ'ɔŋi paŋ nɛ on na maali ya si'ela, amaa o mɔr paŋ hali ya ni.
4 Li anɛ sida ye on da bɛ dapuudir zug la o da ka' paŋa, ka kpi. Ka li lɛɛ anɛ Wina'am paŋ la kɛ ka o vʋe. Ka tinam an yinne nɛ Kristo la ti mɛ ka' paŋa, ka Wina'am paŋ la kɛ ka ti la'an vʋe nɛ Kristo ka tʋm nɛ o paŋi ya san'an.
5 Pɛligimini ya pʋʋgʋ gɔs ye ya sid niŋ Kristo yadda. Kpansimini ya mɛŋi gɔs ye Kristo bɛɛ ya ni? Li ya'a ka' alaa ya lunɛ.
6 M mɔr pʋtɛn'ɛr ye ya na baŋ ye tinam ka' nimbanɛ bas Wina'am dɔllim.
7 Ti sɔsid Wina'am ya zug ye ya da tʋm dinɛ an bɛ'ɛdɛ. Ka' ye ti dʋ'ʋsidi ti mɛŋ ye nidib nyɛ tinamɛ nyaŋ makir la zugɔ, amaa ye li kɛ ka ya maal dinɛ an sʋm, hali baa li ya'a nwɛnɛ ti lunɛ gba.
8 Ti kʋ nyaŋi niŋ si'el dinɛ pʋ dɔl Wina'am sida suor laa, amaa asɛɛ dinɛ an yɛlsida la ma'aa.
9 Tinam ya'a tadig ka yanam lɛɛ mɔr paŋ, ti mɔr sumalisim. Ka sɔsid Wina'am ye ya bɛllim wʋsa na an sʋm.
10 Man ka' ya san'an la zug ka m sɔbid nɛ'ɛŋa tisidi ya, m ya'a ti kena li pʋ nar ye m zaŋ Zugsɔb la tisim paŋ si'a la tʋm nɛ sʋntɔɔgɔ. O tisim o paŋ la ye m sʋŋi ya ka ka' m san'ami yaa.
11 Ba'asʋgɔ, m ba'abiisɛ, mɔɔm tʋmi dinɛ an sʋm, kɛlisimi man yɛt si'el la, ka mɔri pʋtɛn'ɛr yinne, ka bɛ nɛ sumbʋgʋsʋm, ka Wina'am onɛ tisid nɔŋilim nɛ sumbʋgʋsʋm la, na bɛ nɛ ya.
12 Pʋ'ʋsimi taaba nɛ nɔŋilim pʋ'ʋsʋg.
13 Wina'am nidib wʋsa pʋ'ʋsidi ya.
14 Ti Zugsɔb Yesu Kristo yɛlsʋm nɛ Wina'am nɔŋilim na bɛ nɛ ya wʋsa, ka ya mɛ na an yinne nɛ Wina'am Siig Kasi la. Kpɛlimmi sʋ'ʋm.
Galatia dim
Gbauŋ nwa' yɛla
Paul n sɔb gbauŋ kaŋa tis nidib banɛ bɛ Galatia teŋ karindɔɔgin la ye o sʋŋi ba ka ba tiak ka di'e faangir labasʋŋ la pa'alʋg, linɛ na kɛ ka ba kʋ dɔl ziri pa'alʋgɔ. Ninsieba da pa'an ye li nar ka karimbiis siaki dɔl nɔnaar kʋdʋg gbauŋ la wada la ka li na kɛ ka Wina'am faaɛn ba. Paul tu'asi pa'al ye fʋn na niŋ si'em ka an sʋ'ʋŋa Wina'am tuon anɛ fʋn na niŋ Yesu nɛ o kum dapuudir zug la yadda. Wina'am wada la kɛya ka ti baŋid tʋʋmbɛ'ɛdi an si'el nɛ paŋ kanɛ ka li mɔri ti ni, amaa li kʋ nyaŋi faaɛn ti. Li anɛ Siig Kasi la tʋʋm ye o mɔri ti kɛn Yesu san'an na ka sʋŋi ti ka ti siaki niŋ o yadda ka tʋm tis oo ti nyɔvʋr bɛllimin.
GALATIA DIM 1
Man Paul onɛ an Kristo Tʋmtʋm la sɔbid gbauŋ kaŋa. Li ka' nidib bɛɛ nidi daa gaŋim ka m an Kristo Tʋmtʋm laa, amaa li anɛ Yesu Kristo nɛ ti Ba' Wina'am onɛ vʋ'ʋg o kumin la gaŋim.
2 Ti ba'abiis banɛ wʋsa la'am bɛ nɛ mam kpɛla la pʋ'ʋsid yanam banɛ an Wina'am nidib ka bɛ Galatia tɛɛnsin la.
3 Ti Ba' Wina'am nɛ ti Zugsɔb Yesu Kristo na tisi ya yɛlsʋm nɛ sumbʋgʋsʋm.
4 Kristo da pɛsig o mɛŋi tis ye ba kʋʋ o tinam tʋʋmbɛ'ɛd zug, wʋʋ ti Ba' Wina'am bɔɔdim an si'em la, ye o faaɛn ti dunia bɛ'og nwa' ni.
5 Wina'am na nyɛ zʋn'or ka li ka' naarɛ. Ami.
Labasʋŋ yinne gʋllim la yɛla
6 Li pakim nɛ lin pʋ yuugɛ ka ya ta'am bas Wina'am onɛ buoli ya Kristo pʋpielim zug la, ya bas o ka tɔɔm di'e labasi'a,
7 la'an nɛ lin ka' labasʋŋ la. Amaa ninsieba bɛ fɛntidi ya pʋtɛnda ye ba tiak Kristo labasʋŋ la.
8 Hali baa tinam bɛɛ maliak ya'a yi arezana ni na mɔɔl labasi'a linɛ bɛɛ li kɔn' nɛ tinamɛ mɔɔl si'eli ya san'an la, Wina'am nɔpɔɔr na bɛ on sɔb zug.
9 Ti daa pʋn yɛli li, ka m lɛn yɛti li ya'as ye, sɔ' ya'a mɔɔl labasi'a ka li bɛɛ li kɔn' nɛ yanamɛ di'e si'el la, Wina'am nɔpɔɔr na bɛ on sɔb zug.
10 Ya tɛn'ɛs ye m mɔɔdi ye m kɛ ka nidib pian' m yɛla sʋ'ʋm bɛɛ? Ayei, m bɔɔd ye Wina'am pian' m yɛla sʋ'ʋm. Ka ya tɛn'ɛs ye m mɔɔdi ye m ma'ae nidib sʋnya bɛɛ? Ayei, m ya'a mɔɔdin ye m ma'an nidib sʋnya, m naan kʋ aan Kristo tʋmtʋmma.
Paul n lieb tʋmtʋm la yɛla
11 M ba'abiisɛ, m bɔɔd ye ya baŋ ye labasʋŋ linɛ ka m mɔɔn la pʋ yi ninsaalib pʋtɛnda ni naa.
12 Ka m mɛ daa pʋ di'e li sɔ' san'anɛ, ka sɔ' mɛ daa pʋ yɛli lii pa'ali ma. Li lɛɛ daa anɛ Yesu Kristo mɛŋi daa nie lii pa'alim.
13 Ya pʋn wʋm man daa dɔl Jew dim malima la ka daa ɛɛnti niŋid si'em la. M daa namisid Wina'am nidib bɛdegʋ, ka mɔɔd ye m san'ami ba suor la.
14 M daa anɛ onɛ mɔr mi'ilim ka ken tuon hali nɛ ti Jew dim malima ni la gaadi m Jew taaba banɛ zem nɛ mam la. Ka m pʋtɛn'ɛr daa gban'e ye m dɔlli ti yaanam malima la sʋ'ʋŋa.
15 Ka Wina'am lɛɛ daa gaŋim ka ba nam pʋ du'a ma, ka buolim o san'an o pʋpielim zug.
16 Saŋkanɛ ka Wina'am daa gban'e ye o nie o Biig la pa'alim ye o kɛ ka m mɔɔl o Biig la labaari tis banɛ ka' Jew dim la, m daa pʋ keŋ sɔ' san'an ye o zamisi ma.
17 M mɛ daa pʋ keŋ Jerusalem banɛ pʋn dɛŋ man an tʋmtʋmnib la san'anɛɛ. Amaa m daa keŋ nɛ Arabia sʋ'ʋlimin, ka lin nya'aŋ ka m lɛb Damaskus teŋin.
18 Yʋma atan' nya'aŋ ka m nyaan keŋ Jerusalem ye m kaae Pita, ka daa bɛɛ o san'anɛ paae dabis pii nɛ anu,
19 ka pʋ nyɛ tʋmtʋm sɔ' ya'asa, asɛɛ Jemes onɛ an Zugsɔb pitʋ la ma'aa.
20 Wina'am mi' ye linɛ ka m sɔbid o tuon nwa' la anɛ sida, ka ka' dama'am.
21 Lin nya'aŋ ka m nyaan yi Jerusalem keŋ zin'isieba banɛ bɛ Siriya nɛ Silisia tɛɛnsin la.
22 Ka Wina'am nimbanɛ bɛ Juda teŋin la wʋmi m yɛla ka lɛɛ nam pʋ nyɛɛm nɛ ba ninii.
23 Ba lɛɛ daa wʋm nɛ ka sieba yɛti m yɛla ye, “Onɛ daa namisidi ti la yʋ'ʋn mɔɔnnɛ yadda niŋir yɛla pa'an linɛ ka o daa mɔɔd ye o san'am la.” 24 Ka man zug ka ba zun'e Wina'am.
GALATIA DIM 2
Paul nɛ o Tʋmtʋm taab la yɛla
| 2 |
Yʋma pii nɛ anaasi nya'aŋ, ka mam nɛ Barnabas nyaan lɛb Jerusalem ka Titus mɛ la'am dɔlli ti.
2 Wina'am n daa nie pa'alim ye o bɔɔd ye m keŋ la zug ka m daa keŋ. Ka mam nɛ Wina'am nimbanɛ an kpɛɛmnam la la'asi gban'e gban'ar. Ka li anɛ mam nɛ ban ma'aa ka ka' nidib sʋʋginɛɛ. Ka m yɛli ba labasʋŋ kanɛ ka m mɔɔnnɛ tisid banɛ ka' Jew dim la an si'em; ka pʋ bɔɔd ye tʋʋm kanɛ ka m daa tʋm ka nan kpɛn tʋmmi li la an zaalim.
3 Hali la'an nɛ m dɔllim taa Titus onɛ an Girik nid la, ba daa pʋ mugus o ye o kpɛn' baŋʋʋ.
4 Yɛlkaŋa daa duonɛ ka li anɛ ninsieba banɛ daa ma' ye ba anɛ Wina'am nidib ka su'a kpɛn' ti sʋʋgin ye ba baŋ tinamɛ an yinne nɛ Yesu Kristo la ka li kɛ ka ti sʋ'oe ti mɛŋ Jew dim malima la ni si'em. Ba daa bɔɔd ye ba kɛ ka ti dɔl malima la, ka aan li yammis.
5 Ti daa pʋ siaki ba bɔɔdim la baa bi'ela, bɔzugɔ, ti daa pʋ bɔɔd ye labasʋŋ la tiakɛ ka lɛɛ nam kpɛm bɛɛ ya san'an nwɛnɛ din nar si'em.
6 Ka nimbanɛ ka ya tɛn'ɛs ye ba anɛ tuongatib la; m yɛt nwa'anɛ, bɔzugɔ ban an si'em la pʋ paki ma. Wina'am n nyɛt ninsaal ka o an si'em la, ninsaal pʋ gɔsid o tiraan ka o aan alaa.
7 Amaa ba yʋ'ʋn siakya ye Wina'am gu'ulim labasʋŋ la ye m mɔɔli li tis banɛ ka' Jew dim la, wʋʋ on mɛ gu'ul Pita labasʋŋ la ye o mɔɔli li tis Jew dim si'em la.
8 Ka Wina'am paŋ kɛ ka Pita an Kristo Tʋmtʋmi tʋm Jew dim la san'an, ka mɛ kɛ ka mam mɛ tʋm banɛ ka' Jew dim la san'an.
9 Ka Jemes nɛ Pita nɛ Joon, banɛ ka ya gɔs ka ba an kpɛɛmnam la, baŋ ye Wina'am gu'ulim tʋʋm sʋŋ kaŋa, ka gban'e mam nɛ Barnabas nu'usi pa'al ye ti mɔr nɔɔr yinne ka na tʋm Wina'am tʋʋma, ka ti siaki tis taaba ye tinam na tʋm banɛ ka' Jew dim la san'an, ka ban mɛ na tʋm Jew dim la san'an.
10 Yɛl yinne ma'aa ka ba daa sɔsi ti, ka lin anɛ ye ti tɛnr ka sʋŋi ba tadimnam la. Ka mam mɛ daa pʋn gban'e m sʋʋnrin ye man tʋm si'em la.
Paul daa yɛl Pita o tʋʋmbɛ'ɛd la yɛla
11 Man daa bɛ Antiok teŋin ka Pita kɛɛn anina na la m daa yɛl o nidib sʋʋgin ye o pʋ niŋ sʋ'ʋm, lin daa nie nyain ye o tʋm taal la zug.
12 Saŋkanɛ ka nimbanɛ ka Jemes tʋm la daa nam pʋ kena la, Pita daa la'asidi dit nɛ banɛ ka' Jew dim la. Ka ban daa yʋ'ʋn ti paae na la, o daa wɛlig o mɛŋ ka pʋ lɛn dit nɛ baa, bɔzugɔ o daa zɔti dabiem nɛ nimbanɛ yɛl ye li nar ye ti ba'abiis banɛ ka' Jew dim la kpɛn' baŋʋ la zug.
13 Ka ti ba'abiis banɛ an Jew dim la daa paas Pita biriku'anim la ni, ka ba biriku'anim la daa mɛ vɛ'ɛg Barnabas ka o yidigi dɔl ban niŋid si'el la.
14 Ka man daa nyɛ ka ban tʋm si'em la pʋ dɔl nɛ labasʋŋ la yɛla la, ka m yɛl Pita ba wʋsa tuon ye, “Fʋ anɛ Jew nid, bɔ ka fʋ tʋm wʋʋ onɛ ka' Jew nida? Wala ka fʋ bɔɔd ye fʋ mugus banɛ ka' Jew dim la ye ba dɔl Jew dim malima?”
Yadda niŋir zug ka ti nyɛ faangir
15 Tinam banɛ ka ba du'a ti ka ti an Jew dim la, ka' wʋʋ banɛ ka' Jew dim, ka an tʋʋmbɛ'ɛd dim laa.
16 Hali ti mi' ye sɔ' yadda niŋir Kristo ni ma'aa ka Wina'am na kɛ ka o an pʋpielim sɔb o tuon, ka ka' on na niŋ wada la yɛl si'em laa. Ka tinam mɛ niŋ Yesu Kristo yadda ye Wina'am kɛ ka ti an pʋpielim dim o tuon, ka li yinɛ ti yadda niŋir Kristo ni na, ka ka' tinamɛ niŋ wada la yɛl si'em laa. Sɔ' ya'a siak wada la lin kʋdim kʋ kɛ ka o an pʋpielim sɔb Wina'am tuonnɛ.
17 Ka ti ya'a kpɛ'ɛŋidi ti mɛŋ ye ti lieb pʋpielim dim Kristo san'an, amaa ka nyɛ ka ti anɛ tʋʋmbɛ'ɛd dim nwɛnɛ banɛ ka' Jew dim la, li pa'al ye Kristo anɛ onɛ zi'e tʋʋmbɛ'ɛd nya'aŋ bɛɛ? Ayei baa bi'elaa.
18 M ya'a daa dɔl Jew dim wada ka basi li, ka ti lɛm pin'ili dɔlli li, li pa'al ye m san'amid wada la nɛ.
19 Wada la paŋ zugɔɔ, m kpinɛ tis wada la, ka li kɛ ka m na tun'e vʋe tis Wina'am.
20 Ba da la'am kpa'am dapuudir zug nɛ Kristo ka m kpi, ka li lɛn ka' ye m vʋe nɛ m mɛŋ vʋm, amaa li anɛ Kristo vʋm bɛɛ m san'an. Ka man yʋ'ʋn bɛ bɛllim si'a la anɛ yadda kanɛ ka m niŋ Wina'am Biig onɛ daa nɔŋim, ka kpii m yɛla la ni.
21 M pʋ kɛ ka Wina'am pʋpielim la an zaalim. Sɔ' ya'a an pʋpielim daan Wina'am tuon, ka li yinɛ o wada siakir ni, Kristo kum la anɛ zaalim.
GALATIA DIM 3
Wada siakir bɛɛ yadda niŋir la yɛla
| 3 |
Yanam Galatia dim anɛ zɔn! M pa'ali ya Kristo kum dapuudir la zug yɛla sʋ'ʋŋa, ka li nie nyain ya nini ni. Anɔ'ɔnɛ ma'aa ya?
2 M bɔɔd ye m bu'osi ya yɛl yinne ma'aa, ya daa di'e Wina'am Siig Kasi la ka li yinɛ yanamɛ dɔl wada la yɛl si'el la bɛɛ yanam wʋm labasʋŋ la ka niŋ Kristo yadda la?
3 Ya anɛ zɔn bɛɛ? Ya daa pin'ili anɛ Wina'am nidib, ka li yinɛ Wina'am Siig Kasi paŋ la ni. Ka nannanna ka ya yʋ'ʋn bɔɔd ye ya naae li nɛ ya mɛŋ paŋ bɛɛ?
4 Ya namisʋg la wʋsa anɛ zaalim bɛɛ? Ayei, li ka' zaalim.
5 Wina'am tisi ya o Siig Kasi ka tʋm tʋʋmnyalima ya san'an la anɛ yanamɛ dɔl wada la bɛɛ yanamɛ wʋm labasʋŋ la ka niŋ Kristo yadda la zugɔ?
6 Li dɔlnɛ lin da sɔb Wina'am gbauŋʋn Abraham yɛla si'em la ye, “On da niŋ Wina'am yadda la zug, ka Wina'am gɔsi li ka siak ka o an pʋpielim sɔb o tuon.”
7 Baŋimi ye nimbanɛ niŋ Wina'am yadda la sid anɛ Abraham yaas.
8 Wina'am gbauŋ da pʋn yɛl ye Wina'am na kɛ ka banɛ ka' Jew dim la lieb pʋpielim dim o tuon ba yadda niŋir zug, ka dinzug ka ba da pʋn dɛŋi yɛl Abraham labasʋŋ la mɔɔlʋg yɛla hali ka li nam pʋ paae, ye on zug ka dunia buudi wʋsa na paam albareka.
9 Abraham da niŋ Wina'am yadda ka di'e albareka. Ala mɛn banɛ niŋ Wina'am yadda la na di'e albareka wʋʋ on da di'e si'em la.
10 Nɔpɔɔr bɛ nimbanɛ ti'e wada ma'aa la zugin, bɔzugɔ li sɔbnɛ ye, “Nɔpɔɔr bɛ banɛ wʋsa pʋ dɔl wada la yɛl si'em nwɛnɛ din sɔb Wada Gbauŋʋn si'em la zugin.”
11 Li anɛ nyain ye sɔ' kae na di bʋʋd wada la dɔllim yɛla ma'aanɛ, bɔzugɔ “Pʋpielim sɔb na vʋe nɛ o yadda niŋir yɛla.”
12 Ka li lɛn sɔb ye, “Onɛ niŋ wada la yɛl si'el wʋsa la; on siak la zug li na kɛ ka o vʋe.” Dinzugɔ wada la siakir pʋ yinɛ Wina'am yadda niŋiri nɛɛ.
13 Li sɔb ye, “Nɔpɔɔr bɛ nɛ onɛ mɛkama kpi ka ba ya'al o tiig zug.” Dinzugɔ, Kristo n da kpi dapuudir zug la, o da kpɛn' nɔpɔɔr la ni, ka faaɛn ti yis nɔpɔɔr linɛ ka wada la mɔr la nu'usin.
14 O faaɛn ti ye yɛlsʋm kanɛ ka Wina'am zi'el nɔɔr ye o na tis Abraham la mɛ na an banɛ ka' Jew dim la din, ban an yinne nɛ Yesu Kristo la zug, ka lin mɛ na kɛ ka tinam banɛ niŋ yadda la di'e Wina'am Siig Kasi linɛ ka o kaanb ye o na tisi ti la.
Wada la nɛ nɔzi'ela yɛla
15 M ba'abiisɛ, m ye m zaŋ nɛ nidib bɛllim an si'em la pa'ali ya si'el. Nidib ayi' ya'a siaki pian' si'el yɛla ka sɔbi li, ka tik nu'ug, sɔ' kae na tiaki lii, bɛɛ paas si'ela.
16 Tɛnri ye Wina'am da kaanbi tis nɛ Abraham nɛ o yaaŋ. Li da pʋ sɔb ye o zi'el nɔɔri tis on nɛ yaas ka li pa'al ye li anɛ nimbabiga. Amaa li lɛɛ sɔb nɛ ye o yaaŋ, ka li pa'al ye nid yinne; ka ninkanɛ an Kristo la.
17 Man yɛt si'el la anɛ ye, Wina'am da maal nɔnaar nɛ Abraham ka o na kɛ li bɛ saŋa wʋsa. Yʋma kɔbisnaasi nɛ pistan' nya'aŋ ka wada la nyaan kena, amaa li pʋ nyaŋi san'am nɔzi'ela laa.
18 Bɔzugɔ faar la ya'a anɛ wada la dɔllim yɛla, li kʋ lɛn dɔlnɛ kaanbʋg laa. Amaa li anɛ Wina'am da kaanb la zug ka o tis Abraham yɛlsʋm kan la.
19 Amaa ya na bu'osim ye, ka bɔzug ka Wina'am mɛ da lɛn tis wada la? O da tisi li ye li pa'ali ti tʋʋmbɛ'ɛdi an si'em, ka bɔɔd ye li bɛɛ ala ti paae saŋa kanɛ ka Abraham yaaŋ onɛ ka o da kaanbi tis la kena. Maliaknam da di'e wada la Wina'am san'anɛ tis Moses, ka o tɔlisi li tis nidib la, ka an nu'unwɛ'ɛd Wina'am nɛ nidib la sʋʋgin.
20 Nu'unwɛ'ɛd pʋ zi'e nid yinne ma'aa yɛllɛ. Amaa Wina'am onɛ an yinne la da tʋmi li o kɔn'ɔkɔn'.
Wina'am wada tisib la gbin yɛla
21 Ya tɛn'ɛs ye wada la nɛ Wina'am kaanbʋg la ki'isidnɛ taaba bɛɛ? Ayei baa bi'elaa. Wina'am ya'a da tisin wada linɛ nyaŋidi kɛt ka nidib vʋe, nidib naan sid aan pʋpielim dim o tuon ban siak wada la zug.
22 Amaa li da sɔb Wina'am gbauŋʋn ye dunia dim wʋsa bɛ nɛ tʋʋmbɛ'ɛd nu'usin. Ka linzug banɛ niŋ Yesu Kristo yadda la na di'e Wina'am nɔzi'elʋg linɛ ka o tisid banɛ niŋ yadda la.
23 Saŋa kanɛ ka nidib na niŋ Yesu Kristo yadda da nam pʋ kena la, wada la da lɔɔ ti zi'el, wʋʋ ti bɛ nɛ sanrega ni nɛ, ti paae saŋa kanɛ ka li nie nyain ye nidib na nyaŋi niŋ Yesu Kristo yadda la.
24 Dinzugɔ, wada la da sʋ'oe ti ka aan ti tuongati ti paae saŋa kanɛ ka Kristo kena ka ti lieb pʋpielim dim Wina'am tuon tinamɛ niŋ o yadda la zug.
25 Nannanna ka yadda niŋir saŋa paae la, wada la pʋ lɛn sʋ'oe ti ya'asa.
26 Ya wʋsa anɛ Wina'am biis, ka li yinɛ ya yadda niŋir Yesu Kristo ni la.
27 Banɛ wʋsa di'e Wina'am ku'om sʋʋb la pa'al ye ba anɛ Kristo nidib, ka Kristo bɛɛ ba san'an ka nwɛnɛ o mɛŋ nɛ.
28 Alazug, bakir lɛn kae Jew dim nɛ banɛ ka' Jew dim, bɛɛ yammis nɛ banɛ sʋ'oe ba mɛŋ, bɛɛ dap nɛ pu'ab sʋʋginɛ.
29 Fʋ ya'a an Kristo nid fʋ anɛ Abraham yaaŋ ka na di'e linɛ ka Wina'am da kaanb ye o na tis la.
GALATIA DIM 4
Man yɛt si'el la anɛ ye, ba gɔsid bikanɛ na ti dii o saam faar la wʋʋ o anɛ yammʋg nɛ, o biilim saŋa, hali la'an nɛ on sid sʋ'oe si'el wʋsa la.
2 Ka on nan an biig la, nidib bɛɛ na pa'an o si'el wʋsa hali ti paae saŋa kanɛ ka o saam zi'el o la.
3 Ala mɛn tinamɛ da nan an biisi zaŋi ken Wina'am yɛla ni la, ti da anɛ yammis ka dunia la sʋ'oe ti.
4 Amaa Wina'am zi'el saŋsi'a la da paae la, Wina'am da tʋm o mɛŋ Biig na ka pu'a du'a o, ka o bɛ Jew dim wada la nu'usin.
5 O da tʋm o ye o faaɛn banɛ ka wada la sʋ'oe ba la, ka tisi ba suor amɛŋa linɛ na kɛ ka ba lieb o biis.
6 Yanamɛ an Wina'am biis la zug ka o da kɛ ka siig kanɛ bɛɛ o biig la ni la mɛ kɛɛn ya sʋnfʋn na, onɛ na kɛ ka ti nyaŋi buol Wina'am ye, “M Ba'.”
7 Dinzug fʋ lɛn ka' yammʋgɔ, amaa fʋ anɛ Wina'am biig. Ka fʋn sadigim aan o biig la, o na tisif on zi'el si'el wʋsa ye o tis o biis la.
Galatia dim yɛlaa pak Paul si'em
8 Saŋa linɛ gaad ka ya da nan zi' Wina'am la, ya da dɔlli si'elnam linɛ ka' Wina'am, ka aan li yammis.
9 Amaa nannanna ka ya yʋ'ʋn mi' Wina'am la, (li ka' yanamɛ mi' oo, ka lɛɛ anɛ Wina'am mi' ya,) wala ka ya lɛm bɔɔd ye ya lɛbi dɔl linɛ ka' paŋ bɛɛ mɔr gban'arɛ? Bɔ ka ya bɔɔd ye ya lɛn liebi li yammis ya'asɛ?
10 Ya dɔlnɛ dabis-sieba nɛ nwadsieba nɛ saŋa sieba nɛ yʋʋm sieba malima!
11 M zɔti dabiem ye m tʋʋm kanɛ ka m daa tʋmi ya san'an la na lieb zaalim.
12 M ba'abiisɛ, m bɛlimmi ya ye ya an wʋʋ mam an si'em la; ka mam mɛ an wʋʋ yanam nɛ. Ya pʋ tʋm mam bɛ'ɛdɛ.
13 Ya mi' ye saŋkanɛ ka m daa mɔɔl labasʋŋ la ya san'an yiiga la, m daa ka' laafi sʋ'ʋŋaa.
14 La'an nɛ m niŋgbina la daa an si'em la, ya daa pʋ nɛ'ɛsim bɛɛ gɔsim yɔrii, amaa ya daa di'e m sʋ'ʋŋa wʋʋ m anɛ Wina'am maliak bɛɛ Yesu Kristo nɛ.
15 Ya daa mɔr sumalisim man zug . Ka bɔɔ lɛn niŋ ka ya tiakɛ? M tis sida ye, li ya'a nyaŋidin, ya daa naan kpigi ya mɛŋ nini tisinim.
16 M yʋ'ʋn liebnɛ ya dataa man yɛti ya linɛ an sida la bɛɛ?
17 Nimbama la bɔɔdi ya yɛla, amaa ba mɔri pʋtɛn'ɛr bɛ'ɛd. Ba bɔɔd ye ba baki ya nɛ tinam ka ya lɛɛ bɔɔd ban yɛla.
18 Sɔ' ya'a tɛn'ɛs sʋ'ʋŋa o taaba yɛla, li sʋ'ʋm ye o bɔɔdi ba yɛla. Nɛ'ɛŋa anɛ sida, baa m ya'a bɛɛ ya san'an bɛɛ m ya'a ka' ya san'anɛɛ.
19 M binɔŋa, m lɛm mɔr tɔɔgʋ m san'an ka li anɛ ya zug, sɛɛ li ti paae saŋkanɛ ka ya na tiaki an wʋʋ Kristo an si'em la, tɔɔg la nwɛnɛ pu'a ɛɛnti sa'ae bɔɔd du'am la.
20 M naan bɔɔdin ye m bɛɛn nɛ ya san'an nannanna, ka nyaŋi tiakin mam pian'ad si'em nɛ ya la. Ya yɛla pakim nɛ hali ka m zi' mam na niŋ si'em.
Haga nɛ Sara yɛla
21 M ye m bu'os yanam banɛ bɔɔd ye wada la sʋ'oe ya la ye, ya pʋ wʋm wada la yɛl si'el laa?
22 Li yɛl ye Abraham da du'anɛ biis ayi'. Ka yinne an yammʋg biig, ka yinne an pu'a kanɛ ka' yammʋg la biig.
23 Ba da du'a bikanɛ an pu'a yammʋg biig la nɛ wʋʋ ban ɛɛnti du'ad si'em la. Amaa ba GALATIA DIM 4–5 da du'a bikanɛ an pu'a kanɛ ka' yammʋg biig la ka li dɔl wʋʋ Wina'am kaanbi zi'el si'em la.
24 Pu'ab ayi' nwa' nwaasnɛ nɔnaar nam ayi' la; nɔnaar yinne yinɛ Sinai zuor zug na ka ba du'a bibanɛ na kilim yammis la. Pu'a kan yʋ'ʋri buon Haga.
25 Haga nwaasnɛ Sinai zuor linɛ bɛ Arabia teŋin la, ka mɛ nwaasnɛ Jerusalem nɛ Jew dim wada linɛ bɛ nannanna nwa' la. Ka Jerusalem nɛ nimbanɛ dɔlli li malima la anɛ yammis wʋʋ Haga nɛ o yaas la an si'em la.
26 Amaa Jerusalem linɛ bɛ arezana ni la mɔr yɔlisim ka aan ti ma.
27 Li sɔb Wina'am gbauŋʋn ye, “Pu'a kundu'arɛ, mɔr sumalisim. Ka pu'a kanɛ mɛ pʋ nyɛ du'am tɔɔg la maalim vuud nɛ sumalisim. Pu'a kanɛ an kʋndu'ar ka o sid bas o la na mɔr biis bɛdegʋ gaad pu'a kanɛ ka o sid mɔr o la. Dinzug kʋndu'ar la na mɔr sumalisim.”
28 M ba'abiisɛ, ya anɛ Wina'am biis wʋʋ Isaak nɛ, ka li yinɛ Wina'am kaanbʋgʋn la na.
29 Abraham saŋa la, bikanɛ ka ba da du'a wʋʋ ban yiti du'ad si'em la, da namisid bikanɛ ka ba du'a o ka li yi Wina'am Siig Sʋŋin na la. Li mɛ anɛ ala nannanna.
30 Tɛn'ɛsimi Wina'am gbauŋ la yɛl si'em la ye, “Kadim pu'a kanɛ an yammʋg la nɛ o biig la; ka o biig la nɛ pu'a kanɛ ka' yammʋg la biig la kʋ ti la'am pʋdigi ba saam faar laa.”
31 Ala, m ba'abiisɛ, tinam nwɛnɛ pu'a kanɛ ka' yammʋg la biis nɛ, amaa pu'a kanɛ mɔr yɔlisim la biis.
GALATIA DIM 5
Yɔlisim linɛ ka ti mɔr Kristo
| 5 |
Kristo da faaɛn ti ye ti sʋ'oe ti mɛŋ wada la san'an. Dinzugɔ, zi'enimi kiŋ-kiŋ ka da siaki lieb yammis ya'asɛ.
2 Kɛlisimi sʋŋa, mam Paul yɛti ya ye, ya ya'a siak ka ba kpɛn'ɛsi ya baŋʋ, li pa'al ye ya Kristo dɔllim la ka' nyɔɔdɛ.
3 Ka lɛn yɛt onɛ mɛkama siak ka ba kpɛn'ɛs o baŋʋ ye, on kpɛn' baŋʋ la zug, li anɛ tilas ye o dɔl wada la wʋsa.
4 Yanam banɛ bɔɔd ye ya an pʋpielim dim Wina'am tuon ya wada dɔllim zug la, baŋimi ye ya baki ya mɛŋ nɛ Kristo ka yisi ya mɛŋ Wina'am na'amin.
5 Amaa ti yadda niŋir Kristo ni la zug ka ti mɔr ti'ir ye Wina'am na kɛ ka ti an pʋpielim dim o tuon. Wina'am Siig Kasi la paŋi kɛ ka ti guri li.
6 Ka tinamɛ an yinne nɛ Yesu Kristo la zug, li yɛla pʋ pak ye ti kpɛn' baŋʋ bɛɛ ti pʋ kpɛn'ɛɛ. Linɛ pak anɛ tinamɛ na niŋ Yesu yadda ka li yiti ti nɔŋilimin.
7 Ya da tʋm sʋ'ʋŋa, ka anɔ'ɔnɛ kɛ ka ya pʋ lɛn dɔl sida?
8 Linɛ ka ba nɔki pan'asi ya ka ya bas sida la pʋ yi Wina'am onɛ buoli ya la san'an naa.
9 Ala ka ba ye, “Li anɛ danbin bi'ela kɛt ka bodobodo gbil ukid la.”
10 M mɔr kpi'euŋ nɛ Zugsɔb la ni ye ya tɛn'ɛsa kʋ bɛɛ li kɔn' nɛ man pa'ali ya si'el laa. Ka onɛ yutimi ya pʋtɛndaa kʋdim an sɔ' wʋsa Wina'am na namis o sɔba.
11 M ba'abiisɛ, m ya'a kpɛm mɔɔn baŋʋ kpɛn'ɛsʋg yɛla, bɔ ka Jew dim namisidi ma? Li ya'a aan sida, Jew dim naan kʋ tɛn'ɛsidin ye man mɔɔn Kristo kum dapuudir zug yɛla la ka' sʋ'ʋm.
12 M naan bɔɔdin ye nimbanɛ daamidi ya tɛn'ɛsa yɛt ye li nar ka ya kpɛn' baŋʋ la maligim san'ami ba mɛŋ niŋgbiŋi paas.
13 M ba'abiisɛ, Wina'am gaŋi ya ye ya mɔr yɔlisim. Dinzugɔ da kɛ ka ya yɔlisim la kɛ ka ya tʋm ya ninsaalib ya'amlɛog bɔɔdim, ka lɛɛ sʋŋ taaba nɛ nɔŋilim.
14 Wada la wʋsa la'as nɛ an yinne ye; “Nɔŋimi fʋ tiraan nwɛnɛ fʋn nɔŋi fʋ mɛŋ si'em la.”
15 Ya ya'a zabid nɛ taaba wʋʋ ya anɛ bʋnyuos, yanam gu'usimi ka ya na san'am taaba.
Wina'am Siig Kasi bɔɔdim nɛ ninsaalib bɔɔdim
16 Man yɛti ya si'el anɛ ye, kɛlli ka ya bɛllim dɔlnɛ Wina'am Siig Kasi la bɔɔdim, ka da niŋi ninsaalib ya'amlɛogʋ bɔɔd si'ela.
17 Linɛ ka ninsaalib ya'amlɛog bɔɔd bɛɛ li kɔn' nɛ Wina'am Siig Kasi la bɔɔdim. Bama ayi' la anɛ dataas. Ka dinzug ya kʋ nyaŋi niŋ yanamɛ bɔɔd si'em la.
18 Wina'am Siig Kasi ya'a sʋ'oe ya, wada la pʋ lɛn sʋ'oe yaa.
19 Ti ninsaalib bɔɔdim niŋid si'el la nie paalʋ, ka kɛt ka nidib mɔr pu'asan'auŋ nɛ dian'ad tʋʋma nɛ tʋʋmyaalis
20 nɛ bada maalʋg nɛ sɔntʋʋma nɛ datatʋʋma nɛ zabtaasim nɛ nyuur nɛ sʋnpɛɛn nɛ dindiisim nɛ nɔŋgbannwa'ar.
21 Nɛ fufum dim nɛ banɛ nuud daam kʋʋn nɛ di'emyaalis nɛ tʋʋmbɛ'ɛd banɛ nwɛnɛ bama buudi, m yɛti ya wʋʋ man daa yɛli ya si'em la ye, onɛ mɛkama niŋid bama kʋ di Wina'am sʋ'ʋlim la faarɛ.
22 Ka nyɔɔd linɛ ka Wina'am Siig Kasi la kɛt ka li nɔbigid nidib sʋnfʋn, anɛ nɔŋilim nɛ sumalisim nɛ summɔdigir nɛ pʋpielim nɛ yɛlsida
23 nɛ sumbʋgʋsʋm nɛ mɛŋ gban'ar. Wada la kʋ yɛl nid ye o da niŋ bamaa.
24 Ka nimbanɛ an Yesu Kristo nidib la, ba ninsaalib bɔɔdim nɛ li ya'amlɛog la kpiya nɛ Kristo, ka li pʋ lɛn sʋ'oe baa.
25 Wina'am Siig Sʋŋʋ sadigim tisi ti vʋm paal la, kɛlli ka ti bɛllim dɔlnɛ o bɔɔdim.
26 Da kɛ ka ti mɔr nyɛɛsim bɛɛ kɛt ka ti taaba sʋnf duod bɛɛ mɔr nyʋʋr nɛ taabaa.
GALATIA DIM 6
Taaba sʋŋir yɛla
| 6 |
M ba'abiisɛ, tʋʋmbɛ'ɛd ya'a kɛ ka sɔ' lu, yanam banɛ ka Siig Kasi la bɛɛ ya ni bɛdegʋ la sʋŋim o nɛ sumbʋgʋsʋm, ka o duoe ka lɛn an sʋm. Ka mɛ gu'usi ya mɛŋ ka ya pa'ati nyɛ makir. 2 Sʋŋimi taaba ya yɛl tɔɔd pʋʋgin, ka ala ka ya na dɔl Kristo wada la.
3 Sɔ' ya'a tɛn'ɛs ye o anɛ sʋ'ʋm hali, ka lɛɛ pʋ kpi'ema, o ma'ad o mɛŋ.
4 Sɔ' mɛkama kpansim omɛŋ bɛllim an si'em. Ka li ya'a an sʋm, o tun'e nwɛ' nyɔ'ɔg nɛ o mɛŋ yɛla. Ka li lɛɛ ka' ye o mak o mɛŋ nɛ o tiraana.
5 Sɔ' wʋsa mɔɔm o mɛŋ yɛla.
6 Onɛ zamis Kristo labaar la on pʋdigim bʋnsʋŋ linɛ ka o mɔr la nɛ onɛ zamis o la.
7 Da ma'aa ya mɛŋa. Sɔ' kʋ nyaŋi ma' Wina'am wʋʋ o anɛ zɔlʋgɔ. Nid na bʋn on bʋd si'el la buudi. Li mɛ anɛ ala nidib bɛllim ni.
8 Sɔ' bɛllim ya'a dɔl ninsaalib bɔɔdim, li nyɔɔd anɛ kum. Ka sɔ' bɛllim ya'a dɔl Wina'am Siig Kasi la bɔɔdim, lin nyɔɔd mɛ anɛ nyɔvʋr linɛ ka' naarɛ.
9 Dinzugɔ, da kɛ ka ti gɛn ka basi tʋʋm sʋma tʋʋmaa. Ka ti ya'a pʋ basɛ ka li saŋa paae, ti na nyɛɛ li nyɔɔd.
10 Alazug ti ya'a nyɛ suor, yanam on kɛl ka ti tʋm tʋʋm sʋma tis sɔ' mɛkama, ka li kas-kas anɛ ti ba'abiis banɛ niŋ Kristo yadda la ka ti na tʋm tisi gaad sɔ' wʋsa.
Sa'alʋg nɛ pʋ'ʋsʋg
11 Gɔsimi mam sɔb ka li an sɔb bɛda si'em, li anɛ man mɛŋ Paul nu'ugʋ sɔb.
12 Nimbanɛ pa'annɛ ba mɛŋ la bɔɔd ye ba mugusi ya ka ya kpɛn' baŋʋ la. Ba kʋdim niŋidi lin ye li kɛ ka ba da nyɛ Kristo kum dapuudir namisʋg laa.
13 Hali nimbanɛ malima an baŋʋ kpɛn'ɛb la, ba pʋ niŋid wada la yɛl si'el laa, ka bɔɔd ye yanam lɛɛ kpɛn' baŋʋ ka ba na nyaŋi nwɛ' nyɔ'ɔg nɛ yanamɛ siaki di'e bʋn linɛ an niŋgbina malima la.
14 Li ya'a anɛ mam, man kʋdim kʋ nwɛ' nyɔ'ɔg nɛ si'el yɛlaa, asɛɛ ti Zugsɔb Yesu Kristo kum dapuudir la yɛla ma'aa. Li anɛ o kum dapuudir la zugʋ kɛ ka dunia yɛla pʋ lɛn sʋ'oe ma, ka li nwɛnɛ m kpinɛ, ka m ba'a lɛn kae nɛ li yɛlaa.
15 Li pʋ pak ye sɔ' kpɛn' baŋʋ bɛɛ o pʋ kpɛn'ɛɛ, linɛ pak anɛ tinamɛ na mɔr vʋmpaal la.
16 Wina'am na tis nimbanɛ dɔl suokaŋa la sumalisim ka zɔɔ ba nimbaanlig, la'an nɛ Wina'am nimbanɛ bɛ zin'isi'a wʋsa.
17 Man ye m naae nɛ si'eli nwa'. Sɔ'ɔsɔ da lɛn daami ma; ka isa banɛ bɛɛ m niŋgbina ni mam dɔl Yesu yɛla la zug pa'al ye m anɛ o nid.
18 M ba'abiisɛ, ti Zugsɔb Yesu Kristo yɛlsʋm na bɛ nɛ ya siis. Ami.
EFESUS DIM
Gbauŋ nwa' yɛla
Paul n sɔb gbauŋ kaŋa pa'an ye Wina'am mɔr gban'atita'ari tis dunia la wʋsa. Dinzug ka li nar ye karindɔɔg la mɔr nɔɔr yinne Kristo ni, ka karimbiis mɛ bɛ bɛllim kanɛ pa'an ye Kristo sʋ'oe ba. Paul sɔbi pa'al ye Wina'am tisi ti Siig Kasi la ka li bigis ye ti na ti sʋ'ʋg o bʋnsʋma banɛ ka o gban'e ti yɛla la daar yinne. Paul pa'al ye karindɔɔd banɛ gilig dunia wʋsa la nwɛnɛ niŋgbiŋ yinne nɛ, ka Yesu an zug. Li mɛ nwɛnɛ mɛɛb nɛ, ka Yesu an kugtita'ar kanɛ kɛ ka ɛɛnbir la zi'e ka kpi'em. Li mɛ lɛn nwɛnɛ pu'a na nɔk Yesu ka o aan o sid nɛ. Paul da sɔb gbauŋ kaŋa nɛ bɔɔd ye ba karim gbauŋ la zin'is bɛdegʋ ka ka' Efesus teŋin ma'aanɛ.
EFESUS DIM 1
Mam Paul onɛ ka Wina'am gaŋ ka m an Yesu Kristo Tʋmtʋm la sɔbid gbauŋ kaŋa tisid Wina'am nimbanɛ bɛ Efesus teŋin ka an yadda
niŋidib Yesu Kristo ni la.
2 Ti Ba' Wina'am nɛ ti Zugsɔb Yesu Kristo yɛlsʋm nɛ sumbʋgʋsʋm na bɛ nɛ ya.
Wina'am bareka linɛ bɛ Kristo san'an la
3 Wina'am onɛ aan ti Zugsɔb Yesu Kristo Ba' la di'em zʋn'or, onɛ tisi ti albareka linɛ aan o piini wʋsa ka yii o san'an arezana ni na nɛ siig piini wʋsa linɛ bɛ Kristo ni la.
4 Dunia da nam pʋ pin'il la, Wina'am da pʋn dɛŋin gaŋi ti ye ti aan o nidib ka an yinne nɛ Kristo ka an nyain o tuon ka gbada kae.
5 On nɔŋi ti la zug ka o gban'e ye o zaŋi ti ka ti lieb o biis, ka li yinɛ Yesu Kristo mɛŋ ni na. O gban'anɛ ala nɛ o mɛŋ ya'ambɔɔdim,
6 ye li kɛ ka o pʋpielim piintita'ar linɛ ka o tisi ti, tinamɛ an yinne nɛ o Binɔŋir la zug nyɛ zʋn'or.
7 Yesu ziim zug ka ti paam yɔlisim. Ka lina gbin anɛ ye o yisi ti tʋʋmbɛ'ɛdi bas. Ka li wʋsa dɔl o pʋpielim tita'ar
8 kanɛ ka o tisidi ti ka kɛ ka ti mɔr ya'am nɛ baŋir wʋsa la.
9 Ka o kɛ ka ti baŋ yɛlsu'adir linɛ aan o bɔɔdim sʋŋ kanɛ ka o gban'e ti yɛla ka li yinɛ Kristo ni la.
10 Wina'am gban'e saŋsi'a la ya'a ti paae li bɛn o na la'as bʋnam banɛ wʋsa bɛ arezana nɛ dunia ni la ka Kristo an Zugsɔb.
11–12 Wina'am onɛ kɛ ka si'el wʋsa niŋid wʋʋ o bɔɔdim an si'em la gaŋi ti ye ti aan o nidib ka an yinne nɛ Kristo. Ka li dɔl o pʋtɛn'ɛr kanɛ ka o dɛŋi gban'e ye tinam banɛ dɛŋi mɔr ti'ir nɛ Kristo la na kɛ ka nidib dʋ'ʋs o yʋ'ʋtita'ar la.
13 Yanamɛ wʋm sida labasʋŋ linɛ kɛ ka ya nyɛ faangir la, ya siak Kristo ka an yinne nɛ o, ka Wina'am tisi ya o Siig Kasi wʋʋ on zi'el si'em. Ka Siig Kasi la an zanbin
14 ka li pa'al ye ti na nyɛ linɛ wʋsa ka o zi'eli tisi ti la, ti paae saŋa kanɛ ka ti na di'e li wʋsa.
Paul Wina'am sɔsʋg
15 Nɛ'ɛnam zug, nɛ mam wʋm ye ya niŋi ti Zugsɔb Yesu Kristo yadda ka mɔr nɔŋir nɛ Wina'am nidib wʋsa la,
16 m pʋ gu'oe ka kpɛm pʋ'ʋsid Wina'am bareka ya zug ka tɛnri sɔsid Wina'am ya yɛla.
17 M kpɛn sɔsid ye ti Zugsɔb Yesu Kristo Wina'am onɛ aan ti Ba' kanɛ an girima sɔb la na tisi ya Siig la ya'am ka nie pa'ali ya Wina'am an si'em ka ya baŋ o.
18 Ka nie ya pʋtɛnda ka ya baŋ yɛlsida nɛ ti'ir linɛ yɛla ka o gaŋi ya la. Ka lɛn baŋ zi'elsʋŋ kanɛ ka o tis o nidib la malisim an si'em,
19 ka mɛ baŋ o paŋ linɛ galis ka ka' makir ka bɛ tinam banɛ siak o la ni la. Paŋ kanɛ bɛ tinam ni la nwɛnɛ paŋ tita'ar kanɛ
20 ka o zaŋi vʋ'ʋg Kristo kumin ka zin'il o, o datiuŋ arezana ni la.
21 Kristo na'am gat na'anam wʋsa na'am nɛ paŋ dim wʋsa, ka mɔr yʋ'ʋri gat sɔ' wʋsa, ka li ka'anɛ dunia kaŋa ma'aanɛ, amaa la'an nɛ dunia kanɛ na ti kena la.
22 Wina'am gaŋ Kristo ka o an Wina'am nidib la Zugsɔbi sʋ'oe si'el wʋsa, ka kɛ ka o na an si'el wʋsa zugdaan.
23 Wina'am nidib la anɛ Kristo niŋgbiŋ, ka o ni ka si'el wʋsa maali naae.
EFESUS DIM 2
Wina'am mɔri tii yi kumin keŋ vʋmin la
| 2 |
Saŋa kanɛ gaad la, ya da ka' nyɔnvʋrɛ, ka li anɛ ya tʋʋmbɛ'ɛd nɛ ya taal linɛ ka ya da niŋid la zug,
2 Li saŋa la, ya daa dɔlnɛ dunia nwa' suoya nɛ Sʋntaana onɛ sʋ'oe banɛ mɔr paŋ agɔla la. Onɛ an sibɛ'ɛd kanɛ bɛ banɛ zan'as Wina'am nɔɔr la nii tʋm nɛ ba la.
3 Ti wʋsa mɛ da la'am bɛ nɛ ba saŋa linɛ gaad la mɔɔd ye ti ma'ae ti niŋgbiŋ nɛ ti ya'am bɔɔdim. Wina'am nɔpɔɔr da tun'e lu tinam zug na mɛn wʋʋ dunia dim wʋsa nɛ.
4 Amaa Wina'am nɔŋi ti bɛdegʋ la zug ka o zɔɔ ti nimbaanlig bɛdegʋ,
5 hali baa la'an nɛ ti tʋʋmbɛ'ɛdi da kɛ ka ti nwaas wʋʋ ti kpinɛ siigin la, o la'am vʋ'ʋgi ti nɛ Kristo. Li anɛ o pʋpielim zug ka o faaɛn ya.
6 Ka tinamɛ la'as nɛ Yesu Kristo la zug ka Wina'am la'am vʋ'ʋgi ti nɛ Kristo ka kɛ ka ti zin'in nɛ o arezana ni,
7 ye saŋa linɛ na ti kena la, o na nie pa'al o pʋpielim linɛ ka' bɛn la an si'em, nɛ on tisidi ti yɛlsʋm tinamɛ an yinne nɛ Kristo la zug.
8 Ka o pʋpielim zug ka o tisi ya faangir ka li yinɛ ya yadda niŋir Kristo ni na, ka li ka'anɛ ya mɛŋ tʋʋma zugɔ. Li wʋsa anɛ Wina'am piini la niŋ ala,
9 ka ka'anɛ ninsaal tʋʋma yɛla ka sɔ' na nwɛ'ɛd nyɔ'ɔgɔ.
10 Li anɛ Wina'am maali ti ka ti an yinne nɛ Yesu Kristo ye ti tʋm tʋʋm sʋma linɛ ka o pʋn dɛŋi ti'ebi digil ye ti tʋm la.
Tinamɛ la'asi an yinne nɛ Kristo la yɛla
11 Li ya'a anɛ ninsaalib du'am pʋʋgin, ya da anɛ banɛ ka' Jew dim buudii, ka Jew dim banɛ kpɛn'ɛd baŋʋ la buonnɛ ya ye Apʋ-kpɛn'-baŋʋ dim, (ka li anɛ linɛ ka ba maan niŋgbiŋin ka ka' sʋʋnrinɛ).
12 Dinzugɔ, tɛnri ye saŋa linɛ gaad la ya da ka' yinne nɛ Kristo. Ya da anɛ teŋ zʋŋ nidib ka pʋ pɛ'ɛs Israel teŋgbauŋ nɛ nɔnaar kanɛ ka Wina'am da kaanbi tisi ba la. Ya da bɛ dunia nwa' ni ka pʋ mɔr ti'irɛ, ka mɛ zi' Wina'am.
13 Amaa nannanna, nɛ Yesu Kristo yʋ'ʋr zug, yanam banɛ daa lal nɛ o la yʋ'ʋn liel o ka li yinɛ Kristo ziimin na.
14 Kristo aan ti zabpansid ka nɔki ti buudi ayi' la la'as ka ti lieb yinne, ka nwa'ae zaba zaŋguom
15 linɛ an Jew dim malʋŋ nɛ ba wada la. O kum la kpiis malʋŋ la ye o kpanb buudi ayi' la o san'an ka ba an buudi yinne ka mɔr sumbʋgʋsʋm nɛ taaba.
16 Ka o kum dapuudir zug la kɛ ka buudi ayi' la naal nɔɔr nɛ Wina'am ka ti lieb buudi yinne ka zabir naae.
17 Dinzug ka Kristo kena mɔɔl sumbʋgʋsʋm labasʋŋ la tis yanam banɛ lal nɛ banɛ bɛ yamma la.
18 Ka o zug ka ti buudi ayi' la wʋsa mɔr suor nɛ Siig Kasi yinne la ni ye ti li'eli ti Ba' Wina'am san'an.
19 Linzug ka ya kʋdim lɛn ka' teŋ zʋŋ dim bɛɛ saama, ka lɛɛ anɛ Wina'am nidib ka bɛɛ o sʋ'ʋlimin la ka aan o yidim.
20 Ka ba nɔki ya mɛɛ sʋn'ʋl ɛɛnb kanɛ ka Yesu tʋmtʋmnib nɛ nɔdi'esidib da ɛɛnb la zug. Ka Yesu Kristo an dɔɔg la ɛɛnbir kugir la,
21 onɛ kɛ ka yir la wʋsa la'asi tɔ'ɔŋ taaba ka li gban'e kiŋ-kiŋ, ka yaligidi liebid Wina'am Pʋ'ʋsim Yir linɛ an nyain ka pɛsigi tis Zugsɔb la.
22 Ka yanamɛ an yinne nɛ o la zug ka Wina'am Siig Kasi mɛɛ yaa maal ka ya an Wina'am yir ye o bɛɛ anina.
EFESUS DIM 3
Paul onɛ tʋm Wina'am tʋʋma banɛ ka' Jew dimin la
| 3 |
Man Paul anɛ sanrega nid Kristo ni ka li anɛ yanam banɛ ka' Jew dim la zug.
2 Bi'esʋg kae ye ya pʋn wʋm ye Wina'am yɛlsʋm zug ka o zaŋ tʋʋm nwa' tisim ye m tʋm ya sʋŋir zugɔ.
3 Wina'am nie yɛlsu'adir kaŋa pa'al mam wʋʋ man pʋn sɔbi li giŋa si'em la.
4 Ya ya'a karim gbauŋ nwa', ya na gban'e yɛlsu'adir kanɛ ka mam mi' Kristo yɛla la gbin.
5 Saŋa linɛ gaad la Wina'am da pʋ nie lii tis kʋdimin dima, amaa ka o Siig la yʋ'ʋn nie li pa'al o tʋmtʋmnib nɛ o nɔdi'esidib.
6 Ka yɛlsu'adir la yɛla anɛ ye labasʋŋ la mɔɔlʋg kɛt ka banɛ ka' Jew dim buudi wʋsa la'asid nɛ Jew dimi pʋdigid Wina'am piini ka la'an di'ed linɛ ka o zi'el nɔɔri tisi ti, tinamɛ an yinne nɛ Yesu Kristo la zug, ka di'e o kaanbʋg la yit Yesu Kristo ni.
7 Li da anɛ Wina'am yɛlsʋm piini zug ka o gaŋim ka tisim o paŋ la ye m lieb onɛ mɔɔnnɛ o labasʋŋ la.
8 Manɛ an Wina'am nidib la wʋsa kpaanr, la'an nɛ wala, o tisim suor ye m mɔɔl labasʋŋ linɛ ka' makir Yesu Kristo ni la tis buudbanɛ ka' Jew dim la.
9 Ka kɛ ka nidib wʋsa nyɛ yɛlsu'adir suor linɛ ka Wina'am onɛ maal bʋn wʋsa la da su'a yʋʋm pʋkʋdʋgin la.
10 Ka li na yinɛ yadda niŋidibin la na ka na'anam nɛ paŋ dim banɛ bɛ saazug baŋ Wina'am ya'am linɛ ka' bɛn la.
11 Wina'am niŋ nɛ'ɛnam ka li dɔlnɛ on gban'e si'em, saŋa kanɛ ka dunia da nam pʋ pin'il la, ka li yinɛ ti Zugsɔb Yesu Kristo san'an ka li niŋ sida.
12 Tinamɛ an yinne nɛ Kristo nɛ ti yadda niŋir la zug ka ti mɔr sʋnkpi'euŋʋ na nyaŋi keŋ Wina'am tuon.
13 Dinzug ka m sɔsidi ya ye ya da kɛ ka ya sʋnya san'am man namisidi ya yɛla la zugɔ, ka m namisʋg la anɛ ya sumalisim.
Paul Wina'am sɔsʋg
14 Dinzug ka m igini m duma zugʋ ti Ba' Wina'am tuon,
15 on kanɛ tisid buudi wʋsa banɛ bɛ saazug nɛ dunia ni ba yʋda la.
16 M sɔsid ye Wina'am onɛ girima nɛ o mɔrim galis la na tisi ya paŋ kanɛ na kpɛmisi ya sʋnya ka yit o Siig Kasi la ni na.
17 Ka sɔsid ye Kristo na bɛɛ ya sʋnya ni, yanamɛ niŋ o yadda la, ka o kɛ ka ya ba'a nya'a o nɔŋilimin la.
18 Ala ka yanam nɛ Wina'am nidib wʋsa na paam Siig paŋi nyaŋi baŋ Yesu nɔŋilim wa'am ka labis ka dʋ ka zulim si'em.
19 Asida, ya sid na baŋ o nɔŋilim linɛ gat nidibi na tun'e baŋi li si'em, la'an nɛ din tɔi nɛ yanamɛ na nyaŋi baŋi li wʋsa ka li kɛ ka ya pɛ'ɛl nɛ Wina'am bɔɔdim la.
20 Nannanna onɛ na nyaŋi maal si'elnam bɛdegʋ, hali ka li gat tinamɛ na tun'e sɔs bɛɛ tɛn'ɛs si'em yit o paŋ linɛ tʋmmi ti ni la;
21 onɛ nar nɛ girima karindɔɔgin nɛ Kristo nidib san'an, saŋa linɛ ka' naarɛ. Ami.
EFESUS DIM 4
Wina'am nidibi na an yinne Kristo ni si'em
| 4 |
Mam onɛ an sanrega nid Zugsɔb la yɛla la sɔsidi ya ye ya dɔl suor linɛ nar nɛ Wina'am gaŋi ya si'em la.
2 Li an sʋm ka ya sie ya mɛŋ ka an baanlimm ka mɔr suguru nɛ sumbʋgʋsʋm linɛ yi nɔŋirin,
3 ka kpɛ'ɛŋi ya mɛŋ ka mɔr nɔɔr yinne linɛ yi Wina'am Siig Kasi la ni na, ka mɔri li nɛ sumbʋgʋsʋm ka li la'asidi ya gumm.
4 Niŋgbiŋ yinne bɛ, ka Wina'am Siig Kasi yinne ma'aa mɛ bɛ. Ka Wina'am buoli ya ye ya mɔr ti'ir yinne.
5 Zugsɔb yinne bɛ, nɛ yadda yinne nɛ Wina'am ku'om sʋʋb yinne
6 nɛ Wina'am yinne onɛ aan ti wʋsa Ba', onɛ gat si'el wʋsa, ka o paŋ dɔlisidi ti wʋsa ni tʋm, ka o lɛm bɛɛ ti wʋsa ni.
7 Ka ti wʋsa yinne-yinne di'e pʋpielim piini linɛ dɔl Kristo bɔɔdim la.
8 Dinzug ka li sɔb Wina'am gbauŋʋn ye, “On daa dʋʋ agɔl la, o daa mɔr banɛ an yammis bɛdegʋ keŋ, ka tis nidib piini.”
9 Linɛ sɔb ye, “O dʋʋ agɔl la” gbin an bɔ? Li anɛ ye o daa dɛŋin sig na hali ti paae dunia teŋir.
10 Ka on kanɛ sig na la an onɛ mɛ dʋʋ agɔla sa, gaad dunia nɛ saazug wʋsa ye o tiig dunia zin'ig wʋsa la.
11 Li daa anɛ on mɛŋi tis nidib piinsieba ye sieba lieb o tʋmtʋmnib, ka sieba aan o nɔdi'esidib, ka sieba an labasʋŋ la mɔɔnmɔɔnib, ka sieba an karinsaamnam, ka sieba an pa'annib.
12 Ka ba pa'al Wina'am nidib ka ba na tʋmm sʋŋid taaba ken tuon, ka Kristo niŋgbiŋ linɛ aan o nidib la nɔbigidi
13 ti paae saŋa kanɛ ka ti wʋsa mɔr nɔɔr yinne linɛ dɔlli ti nɔɔr siakir nɛ tinamɛ baŋ Wina'am Biig la yɛla, ti bi' paae wʋʋ Kristo zemis si'em la.
14 Ala ka ti kʋ lɛn an wʋʋ bibibis banɛ ka' ya'am, ka ba mɔri ti yutim yɔri-yɔri ka pa'annɛ ti pa'al yaalis linɛ yit dama'anam nɛ bibi'es san'anɛ.
15 Amaa lɛɛ pian'ami sida la tis taaba nɛ nɔŋilim, ka li anɛ tilas ye ti wʋsa bɛ wʋʋ labasʋŋ la pa'al si'em la ka nɔbig yɛla wʋsa ni ti paae Kristo,
16 onɛ nwɛnɛ zug linɛ kɛ ka niŋgbiŋ la wʋsa la'asi tɔ'ɔŋ taaba nɛ li duta wʋsa la. Ka li yinne-yinne ya'a niŋid linɛ nar, niŋgbiŋ la wʋsa nɔbigidnɛ sʋ'ʋŋa, ka li yinɛ nɔŋirin na ka li biid.
Ti bɛllim paal la yɛla
17 Dinzug ka m yɛti ya nɛ' ka mudigidi sa'annɛ ya nɛ Zugsɔb la yʋ'ʋr zug ye ya da lɛn niŋid wʋʋ banɛ ka' Wina'am nidibi niŋid si'em nɛ ba ya'am linɛ pʋ dɔl suor la.
18 Ba pʋtɛnda pʋ nie, ka ba pʋ paas nyɔvʋr kanɛ ka Wina'am tisid la nii, ba zi'ilim nɛ ba kpaana la zug
19 ka ba sʋnya digilim ka ba ba'a kae nɛ nyannɛ, ka bɔɔd tʋʋmyɔɔd nɛ li buudi wʋsa.
20 Li ka' ala ka ya zamis Kristo yɛlaa.
21 Yanamɛ sadigim wʋm o yɛla ka zamis yɛlsida o san'an la,
22 basimi yanamɛ da an si'em ya bɛllim kʋdirin linɛ kɛ ka dama'am ya'amlɛog kɛ ka ya san'am la,
23 ka tiaki ya pʋtɛnda bɔɔdim ka li lieb bʋmpaala.
24 Kɛlli ka ya bɛllim an bɛllim paala linɛ ka Wina'am maal ka li nwɛnɛ o la, ka yanamɛ niŋid si'el an sida nɛ pʋpielim linɛ dɔl Wina'am suor.
25 Dinzugɔ, basimi dama'am ka pian'adi sida tisidi ya kpi'es; ka ti la'asi an niŋgbiŋ yinne nɛ taaba.
26 Fʋ sʋnf ya'a duoe fʋn da tʋm bɛ'ɛdɛ, ka mɛ da kɛ ka zaam ma'ae ka fʋ nan mɔr sʋnpɛɛnnɛ.
27 Ka da tis Sʋntaana suor hali baa bi'elaa.
28 Onɛ daa zuud on da lɛn zu ya'asɛ, amaa li sʋm ye o tʋm ka nyɛɛ o mɛŋ nu'ug tʋʋma bʋn, ka na tun'e sʋŋ nɔŋ dim.
29 Da kɛ ka ya nɔya pian'ad bɛ'ɛdɛ, amaa kɛlli ka linɛ yiti ya nɔɔrin an pian'asʋŋ, ka li sʋŋ banɛ kɛlisid la, ka ba bii ba bɛllim pʋʋgin.
30 Da niŋi linɛ na kɛ ka Wina'am Siig Kasi la sʋnf san'amnɛ yaa, bɔzugɔ onɛ dɛŋi zanbili ya gur daakanɛ ka o na tisi ya yɔlisim wʋsa la.
31 Basimi sʋntɔɔg nɛ sʋnpɛɛn nɛ ɛndʋg nɛ nɔŋgbannwa'ar, nɛ yʋ'ʋsan'auŋ nɛ pʋtɛn'ɛbɛ'ɛd wʋsa,
32 ka sʋŋidi taaba nɛ nimbaanlzɔɔr ka tis taaba suguru nwɛnɛ Wina'am dɔlis Kristo ni si'em yisi ti tʋʋmbɛ'ɛdi bas la.
EFESUS DIM 5
Nyain bɛllim la yɛla
| 5 |
Wina'am an si'em la, ya mɛ aan ala, wʋʋ biis banɛ ka ba saam nɔŋ.
2 Ka mɔri nɔŋir wʋʋ Kristo nɔŋi ti si'em, ka pɛsig o mɛŋi maal maan sʋŋʋ tis Wina'am ti yɛla la.
3 Yanamɛ sadigin an Wina'am nidib la, mid ka ya kɛ ka pu'asan'auŋ nɛ dausan'auŋ nɛ dian'ad buudi wʋsa nɛ ya'amlɛog bɛɛ ya ni.
4 Mɛ da pian'adi pian'ayɔɔd nɛ galim yɔɔd linɛ pʋ dɔl suorɛ, amaa lɛɛ pʋ'ʋsimi Wina'am bareka.
5 Baŋimi ye pu'asan'auŋ sɔb bɛɛ dausan'auŋ sɔb bɛɛ dian'ad sɔb bɛɛ fufum sɔb kʋ di faar Kristo nɛ Wina'am sʋ'ʋlim la nii. Onɛ mɔr fufum nwɛnɛ ba'amaan nɛ.
6 Nɛ'ɛnam zug, ka Wina'am sʋnf pɛlig nɛ banɛ zan'as o nɔɔr la. Dinzugɔ, da kɛ ka sɔ' ma' ya nɛ pian'ayaalisɛ.
7 Alazug da la'asidi nɛ baa.
8 Saŋsi'en la, ya da bɛ nɛ likin, amaa ya yʋ'ʋn bɛ nɛ nɛɛsim ni ka an yinne nɛ Zugsɔb la. Linzug, niŋimi wʋʋ banɛ bɛ nɛɛsiminɛ niŋid si'em la.
9 Bɔzugɔ, nɛɛsim bɛllim nyɔɔd anɛ pʋpielim nɛ yɛlsida nɛ yɛlsʋm wʋsa.
10 Kpɛ'ɛŋimi ya mɛŋi baŋi linɛ ma'ad Zugsɔb la sʋʋnr.
11 Da kɛ ka ya ba'a bɛ nɛ lik tʋʋma linɛ ka' nyɔɔdɛ, amaa viigimi tʋʋm yaalis la paalʋ.
12 Li anɛ nyan hali nɛ sɔ' na pian'ad banɛ ki'isid la su'adi tʋm si'el la.
13 Nɛɛsim ya'a viig si'el gbin nyain yis paalʋ na, fʋ na baŋi li bʋn gbin nyain-nyain.
14 Ka linɛ nied wʋsa liebidnɛ nyain. Dinzug ka li sɔb ye, “Gbɛɛm sɔba, duom ka vʋ'ʋg kumin, ka Kristo na kɛ ka li nie fʋ san'an.”
15 Alazug, gu'usimi nɛ yanamɛ bɛ bɛllim si'a la. Da bɛɛi nwɛnɛ nimbanɛ ka' ya'am, amaa bɛɛi wʋʋ banɛ mɔr ya'am nɛ.
16 Saŋa kanɛ ka ya nyɛ suor wʋsa, yanam niŋim linɛ an sʋm, ka dabisa la anɛ tʋʋmbɛ'ɛd saŋa.
17 Dinzugɔ da aaɛn zɔnnɛ, amaa baŋimi Zugsɔb la bɔɔdim an si'em.
18 Da nuud daam kʋʋnɛ nyaa, ka li anɛ tʋʋm yaalis. Amaa kɛlli ka Wina'am Siig Kasi sʋ'ʋgi ya.
19 Pian'am tisi taaba nɛ yʋʋma banɛ sɔb Wina'am gbauŋʋn, nɛ yʋʋma banɛ ka Wina'am nidib sɔb, nɛ yʋʋma banɛ ka Wina'am Siig Kasi tis, ka yʋ'ʋm yʋʋma kɔn'ɔb, kɔn'ɔbi zun'od Wina'am yʋ'ʋr nɛ ya sʋnf wʋsa.
20 Ka si'el mɛkama ni, pʋ'ʋsimini ti Ba' Wina'am bareka nɛ ti Zugsɔb Yesu Kristo yʋ'ʋrin saŋa mɛkama.
Pu'ab nɛ ba sidib la yɛla
21 Siakimi taaba nɔya, yanamɛ na'asid Kristo la zug.
22 Pu'aba, siakimini ya sidib nɔya wʋʋ yanamɛ siakid Zugsɔb la nɔɔr si'em la.
23 Ka sid la an pu'a la zugdaan wʋʋ Kristo an Wina'am nidib la zugdaan si'em la, banɛ aan o niŋgbiŋ linɛ ka o faaɛn la.
24 Ka Wina'am nidibi sadigim siak Kristo nɔɔr la, pu'ab mɛ niŋim ala mɛnɛ tisi ba sidib yɛla mɛkama wʋsa ni.
25 Sidiba, nɔŋimini ya pu'ab wʋʋ Kristo nɔŋ Wina'am nidib ka pɛsig o mɛŋi tisi ba yɛla si'em la.
26 O niŋ ala ye o gaŋi ba ka ba an Wina'am din ka sʋʋ ba Wina'am ku'om ka ba an nyain labasʋŋ la ni,
27 ye o zaŋi ba ka ba an yinne kɛɛn o mɛŋ tuon na ka ba an nyain ka gbada kae wʋʋ pu'a kun sid nɛ vɛnlim pipilim ka si'el kae san'amid o vɛnlim la.
28 Ala mɛnɛ, sidiba, nɔŋimini ya pu'ab wʋʋ ya mɛŋ niŋgbina nɛ. Onɛ nɔŋ o pu'a nɔŋ o mɛŋ.
29 Ka sɔ' kae kis o mɛŋ niŋgbinaa. O lɛɛ diisidi li nɛ ka gɔsidi li wʋʋ Kristo niŋid si'em tisid Wina'am nidib la,
30 tinamɛ aan o niŋgbiŋ wila la zug.
31 “Dinzug, dau na bas o ba' nɛ o ma ka la'as nɛ o pu'a ka babayi' la lieb niŋgbiŋ yinne.”
32 Nɛ'ɛŋa anɛ yɛlsu'adir tita'ar ka man zaŋi li mak nɛ Kristo nɛ karindɔɔg yɛla.
33 Kɛlli ka ya wʋsa yinne-yinne nɔŋ o pu'a wʋʋ o mɛŋ nɛ. Ka pu'a la mɛ na'asim o sid.
EFESUS DIM 6
Biis nɛ ba du'adib la yɛla
| 6 |
Biisɛ, siakimini ya du'adib nɔya, Zugsɔb la ni, ka ala dɔl suor.
2 Wina'am nɔɔr yɛlʋg yiiga linɛ mɔr kaanb sʋŋ la anɛ ye, “Tisimi fʋ saam nɛ fʋ ma girima,
3 ka ala ka si'el wʋsa na an sʋm tisif, ka fʋ nyɔvʋr na wa'am dunia nwa' ni.”
4 Saamnama, da kɛ ka ya biis sʋnya pɛlig nɛ sa'al galisʋgɔ, amaa zaŋimi
zamisʋg linɛ dɔl Zugsɔb suor la sʋŋi ba.
Yammis nɛ ba zugdaannam la yɛla
5 Yammisɛ, siakimini ya zugdaannam nɔya dunia nwa' ni nɛ na'asi zɔtim nɛ sʋnf yinne, wʋʋ ya dɔlli Kristo nɛ.
6 Li ka'anɛ ban na bɛ nɛ ya gʋllim ka li kɛ ka ba tɛn'ɛs ye ya an sʋm, amaa niŋimi wʋʋ ya anɛ Kristo yammis ka tʋm Wina'am bɔɔdim nɛ ya sʋnya wʋsa.
7 Tʋmmi ya tʋʋma nɛ sumalisim wʋʋ ya tʋmnɛ tisid Zugsɔb la ka ka' nidiba,
8 ka mɔri pʋtɛn'ɛr ye onɛ tʋm tʋʋm sʋŋ wʋsa na dii li nyɔɔd Zugsɔb Kristo la san'an, o ya'a an yammʋg bɛɛ o ka' yammʋgɔ.
9 Yanam banɛ an zugdaannama, niŋimin ala mɛnɛ tisidi ba, ka da mugusidi baa, ka mɔri pʋtɛn'ɛr ye yanam nɛ ban wʋsa mɔri Zugsɔb yinne arezana ni, onɛ pʋ mɔr baregaŋa.
Zaba la'abanɛ ka Wina'am tisid la yɛla
10 Linɛ kpɛlim anɛ ye, ya mɔr sʋnkpi'euŋ Zugsɔb la ni la'an nɛ o paŋ tita'arin la.
11 Yɛɛmi Wina'am zaba la'ad la wʋsa ka ya na nyaŋi zi'en kiŋ-kiŋ, ka ala ka Sʋntaana bibi'elim ya'am kʋ nyaŋi lugi yaa.
12 Bɔzugɔ, ti pʋ zabid nɛ saaliba, amaa ti zabidi nɛ sibɛ'ɛdnam kpi'emnam banɛ an paŋ dim nɛ na'anam banɛ sʋ'oe dunia linɛ an lik tʋʋmbɛ'ɛd yɛla la, nɛ sibɛ'ɛdnam wʋsa banɛ bɛ saazug.
13 Dinzugɔ, nɔkimi Wina'am zaba la'ad la wʋsa bɔbigi wʋʋ Room dim soogianamɛ niŋid si'em la, ka dabisbɛ'og ya'a kena ya na nyaŋi ya dataas. Ka zaba la ya'a ti naae ya na kpɛn zi'e yanamɛ zi'e si'el la kiŋ-kiŋ.
14 Dinzugɔ, ti'ebim zi'en ka nɔk sida lɔ wʋʋ sɛnbidiŋ nɛ, ka bɔbig pʋpielim wʋʋ gbanti'edʋgʋ lusi ya nyɔ'ɔg.
15 Ka pid ta'ada linɛ an sumbʋgʋsʋm yit labasʋŋin la ka li ti'ebi ya ka ya keŋ mɔɔl labasʋŋ la.
16 Ka linɛ lɛm paas anɛ ye, ya zanli gbanti'edis linɛ an yadda ka na tun'e kpiis piema linɛ dit nwɛnɛ bugum pielim, linɛ ka Sʋntaana tɔɔnd la.
17 Ka pidi kʋnt zupibis linɛ an faangir, ka nɔki Wina'am Siig Kasi zaba sʋ'ʋg linɛ an Wina'am pian'ad la.
18 Niŋimi nɛ'ɛnam ka sɔsidi nɛ Wina'am Siig Kasi la saŋa wʋsa nɛ winsɔsʋg buudi wʋsa. Kpɛn sɔsidi Wina'am tisid nidib wʋsa,
19 ka mɛ sɔs Wina'am tis mam, ye Wina'am na kɛ ka m nyaŋi pian' sʋ'ʋŋa nɛ paŋi kɛ ka labasʋŋ linɛ su'a la nie.
20 Labaar la yɛla ka m liebi li tʋmtʋm ka ba lɔɔm nɛ bana. Sɔsimi Wina'am ye m na tun'e pa'ali li ka dabiem kae wʋʋ lin sʋm ye m pian'an si'em la.
Pʋ'ʋsʋg
21 Tikikus onɛ aan ti ba'abinɔŋir nɛ onɛ an Zugsɔb tʋmtʋm amɛŋa la, na kena ka yɛli ya si'el wʋsa, ka ya baŋ linɛ maannim, la'an nɛ m tʋʋma wʋsa an si'em.
22 Lin yɛla ka m tʋm o ya san'an na ye ya baŋi ti yɛla ka ya sʋnya kpɛ'ɛŋ.
23 Wina'am onɛ aan ti Ba' la nɛ ti Zugsɔb Yesu Kristo na tisi ti ba'abiis la wʋsa nɔŋir nɛ sumalisim nɛ yadda niŋir.
24 Yɛlsʋm na bɛ nɛ banɛ nɔŋi ti Zugsɔb Yesu Kristo nɛ nɔŋir linɛ ka' bɛnnɛ.
FILIPI DIM
Gbauŋ nwa' yɛla
Paul da sɔb gbauŋ kaŋa nɛ on da bɛ sanrega ni la. O da sɔb ye o pʋ'ʋsnɛ Filipi karimbiis la nɛ ba piini kanɛ ka ba sʋŋ o la. O da kpɛmisi ba ye ba mɔr sumalisim nɛ ban dɔl Yesu la ka da kɛ ka ba giinla pu'as tɔɔg zugɔ. Ka ye ba kpansim Yesu da sie o mɛŋ ka namis si'em, hali ka zaŋ o nyɔvʋri tis kum dapuudir zug la. Gbauŋ kaŋa pa'an lin malis Paul si'em, hali la'an nɛ on daa namisid ka ninsieba mɛ ki'isid o la. Li anɛ Wina'am yɛlsʋm zugʋ kɛ ka Paul mɔr sumalisim ka tɛn'ɛsid ye Wina'am na kpɛn sʋŋid o.
FILIPI DIM 1
Mam Paul nɛ Timoti banɛ an Yesu Kristo tʋmtʋmnib la sɔbid gbauŋ kaŋa tisid Wina'am nidib banɛ an yinne nɛ Yesu Kristo ka bɛ Filipi
teŋin la, la'an nɛ Wina'am nimbanɛ an tuongatib nɛ sʋŋidib la.
2 Ti Ba' Wina'am nɛ ti Zugsɔb Yesu Kristo na tisi ya yɛlsʋm nɛ sumbʋgʋsʋm.
Paul bareka pʋ'ʋsim nɛ winsɔsʋg yɛla
3 M ya'a ɛɛn tɛn'ɛsi ya yɛla, li kɛtnɛ ka m pʋ'ʋsid Wina'am bareka saŋa wʋsa.
4 Ka m ya'a ɛɛnti sɔsid Wina'am tisidi ya wʋsa m sɔsidnɛ nɛ sumalisim,
5 tinamɛ an tʋmtʋm taaba hali pin'ilʋgʋn sa ti paae zina la.
6 M mi' hali ye Wina'am onɛ pin'il tʋʋm sʋŋʋ ya sʋnya ni la, na tʋmi lii naae Yesu Kristo ken dabisir la na.
7 Li an sʋm ka m tɛn'ɛsi ya wʋsa yɛla ala, mam mɔri ya pʋtɛn'ɛr sʋŋ la zug. Dinzugɔ ba ya'a lɔɔm nɛ bana bɛɛ ti la'am pa'annɛ nidib ye labasʋŋ la an sida ya na la'an di'ed Wina'am pʋpielim piini la nɛ man.
8 Ka Wina'am baŋ ye m ya'am bɔɔdi ya wʋsa nɛ nɔŋilim linɛ yi Yesu Kristo ni na.
9 Ka m sɔsid Wina'am ye ya nɔŋilim na pɛ'ɛs hali nɛ mi'ilim nɛ baŋir amɛŋa,
10 ye ya gaŋ linɛ an sʋm ka an nyain ka dian'ad kae la gur Yesu Kristo lɛbig dabisir na.
11 Ka pɛ'ɛl nɛ pʋpielim wala linɛ yi Yesu Kristo san'an naa tisid Wina'am yʋ'ʋr zʋn'or nɛ na'asi la.
Paul sanrega ni bɛllim la yɛla
12 M ba'abiisɛ, m bɔɔd ye ya baŋ ye linɛ niŋi m la sid sʋŋ ka labasʋŋ la ken tuon.
13 Li kɛ ka gɔmena yin soogianam wʋsa nɛ sɔ' mɛkama baŋ ye ban lɔɔm nɛ bana la, li anɛ Kristo yɛla.
14 Ka ban lɔɔm nɛ bana zug kɛ ka ti ba'abiis la tita'am pamm kpɛmisʋg ka pian'ad Wina'am labaar la yɛla nɛ kpi'euŋ ka dabiem kae.
15 Sieba mɔɔn Kristo yɛla la nɛ fufum nɛ nɛnnim ka sieba tʋm nɛ pʋtɛn'ɛsʋŋ.
16 Ka pʋtɛn'ɛsʋŋ dim la mɔɔnnɛ linɛ nɛ nɔŋilim ka baŋ ye Wina'am zi'el man ye m gu' banɛ zan'as labasʋŋ la.
17 Ka sieba pʋ mɔɔn Kristo yɛla nɛ pʋpielim, amaa ba mɔɔnnɛ nɛ nɛnnim ka bɔɔd ye m namiskanɛ ka m nyɛt sanrega ni la paas.
18 Li pʋ pakɛ. Linɛ gaadi li wʋsa anɛ Kristo labaar la mɔɔlʋg; hali li ya'a dɔlnɛ pʋtɛn'ɛsʋŋin bɛɛ pʋtɛn'ɛbɛ'ɛdinɛ, li kpɛm malis man.
19 Ka m mi' ye li yitnɛ ya Wina'am pʋ'ʋsim nɛ Yesu Kristo Siig Kasi la sʋŋir ni na, ka linɛ maal la na tisim faangir.
20 Linɛ ka man bɔɔd hali ka mɔr ti'iri li yɛla anɛ ye m ya'a kpi bɛɛ m ya'a vʋe m kʋ di nyannɛ amaa m lɛɛ na mɔr sʋnkpi'euŋ ka li kɛ ka Kristo nyɛ na'asi man ni nannanna, wʋʋ on nyɛti ya san'an si'em saŋa wʋsa la.
21 Ya'a kpɛlim nɛ mam, m ya'a vʋe, m vʋe nɛ Kristo zug, ka m ya'a lɛn kpi nɛ, li anɛ nyɔɔdi tisim.
22 Ka m ya'a vʋe ka na tʋm tʋʋm sʋma li an sʋm. Amaa mam bɔɔd ba' nɛ ma la zug, m kʋ nyaŋi gban'e linɛ ka m na gaŋɛ.
23 M bɔɔd ye m yi bɛllim kaŋa nwa' nii keŋ bɛ nɛ Kristo; bɔzugɔ linɛ an sʋm hali.
24 Amaa yanam yɛla, li an sʋm ka m kpɛn vʋe.
25 M mɔr sʋnkpi'euŋ nɛ man yɛl si'el la ka linzug ka m mi' ye m na kpɛm bɛ nɛ ya wʋsa, ka ya yadda niŋir Yesu Kristo ni na keŋ tuon nɛ sumalisim.
26 Ka m ya'a ti bɛ nɛ ya ya'as, ya na tun'e nwɛ' nyɔ'ɔg hali Yesu Kristo ni.
27 Lin an si'em wʋsa kɛlli ka ya bɛllim dɔl nɛ Kristo labasʋŋ la, ka m ya'a kɛɛn ya san'an na bɛɛ m ya'a pʋ kenaa, m na wʋm ye ya gban'e pʋtɛn'ɛr yinne kiŋ-kiŋ, ka mɔɔd nɛ yadda yinne nɛ nɔɔr yinne ye labasʋŋ la siakir na keŋ tuon.
28 Da zɔti ya dataas dabiem baa bi'elaa, ka ya sʋnkpi'euŋ na pa'ali ba ye ba na ba'as bɛ'ɛd. Amaa ka lɛɛ pa'al ye yanam na nyɛ faangir linɛ yi Wina'am san'an na la.
29 Wina'am tisi ya suor ye ya dɔl Kristo, ka li ka'anɛ ye ya niŋ o yadda ma'aanɛ, amaa ye ya siaki namis o zug.
30 Ka ya namisʋg nwɛnɛ yanamɛ da nyɛ man namisid si'em la, ka nan kpɛn wʋmid ye m bɛɛ li pʋʋgin nannanna la.
FILIPI DIM 2
Kristo mɛŋsier la yɛla
| 2 |
Ya bɛllim Kristo ni ya'a sadigim kpɛmisi ya, ka o nɔŋilim la bɛlisi ya, ka ya an banɛ la'am di'e Wina'am Siig Kasi la, ka mɔr nɔŋilim nɛ nyɔɔg nɛ taaba,
2 alazugɔɔ mɔɔmi ka mɔri pʋtɛn'ɛr yinne, nɛ nɔŋilim yinne ka an yinne Siig pʋʋgin, ka mɔr gban'ar yinne. Ya ya'a niŋ ala, li na kɛ ka m sumalisim la pɛ'ɛl.
3 Da niŋɛ si'el linɛ yi nɛnnim nɛ tita'aliminɛ amaa lɛɛ siemi ya mɛŋ ka tɛn'ɛsi ye ya taaba an sʋm gati ya.
4 Kɛlli ka ya wʋsa pʋtɛn'ɛr gban'e ye ya sʋŋ taaba, ka ka'anɛ ya mɛŋ yɛla ma'aanɛ.
5 Pʋtɛn'ɛr kanɛ nar ye ya mɔr anɛ Yesu Kristo pʋtɛn'ɛr.
6 La'an nɛ on an nwɛnɛ Wina'am an si'em la, o da pʋ tɛn'ɛs ye li sʋ'ʋm ye o dʋ'ʋs o mɛŋi pa'al ye on nɛ Wina'am zem nɛ.
7 Ka lɛɛ sie o mɛŋ ka lieb wʋʋ yammʋgʋ an si'em la, ka ba du'a o ka o lieb ninsaal.
8 Ka on nie wʋʋ ninsaali an si'em la, o sie o mɛŋ ka siak kum wʋʋ tʋʋmbɛ'ɛd sɔb nɛ hali kpi dapuudir zug.
9 Linzug ka Wina'am dʋ'ʋs o hali, ka tis o yʋ'ʋr linɛ gat yʋda wʋsa.
10 Dinzug, nɛ Yesu yʋ'ʋr zug, linɛ wʋsa bɛ saazug bɛɛ teŋin bɛɛ teŋ teŋir, na igin o tuon ka dʋ'ʋs o yʋ'ʋr.
11 Ka sɔ' mɛkama na yɛl ye, Yesu Kristo an Zugsɔb la, ka li zun'e ti Ba' Wina'am la yʋ'ʋr.
Ti anɛ nɛɛsim dunia nwa' ni
12 Dinzugɔ, yanam banɛ aan m zuasʋma nwa'; mam daa bɛ nɛ ya ka ya siakidi m sa'alʋg si'em la, niŋimi ka li gaad ala la'an nɛ man ka' ya san'an la, ka tʋmmi tʋʋma linɛ aan ya faangir yɛla la sʋ'ʋŋa nɛ kikirʋg nɛ dabiem.
13 Bɔzugɔ, Wina'am tʋmmi ya ni daar wʋsa ka kɛt ka ya mɔr ya'amlɛog ye ya siak o nɔɔr, ka tʋm linɛ na ma'ae o sʋʋnr.
14 Niŋimi si'el mɛkama ka nyunyɔlis nɛ nɔŋgbannwa'ar da bɛɛ,
15 ye ya an nyain ka taal ka'asigɛ, ka an Wina'am bibanɛ bɛ zʋmaʋŋ bɛ'ɛd nɛ ninyɔɔdnam sʋʋgin ka lɛɛ pʋ mɔr gba'arɛ, ka nie nyain wʋʋ nwadbibis banɛ bɛ saŋgbana ni la,
16 ka gban'e nyɔvʋr pian'ad la kiŋ-kiŋ. Ya ya'a niŋ ala, m na nwɛ' nyɔ'ɔgʋ ya yɛla Yesu Kristo ken daar na, ye m zigib nɛ m tʋʋma la wʋsa pʋ niŋ zaalim.
17 Hali baa m ya'a zaŋi m nyɔvʋri tis ka li nwɛnɛ maan nɛ yanam yadda niŋir zug, li na malis mam ka m na maal sumalisim nɛ ya wʋsa.
18 Ala mɛnɛɛ, li sʋ'ʋm ka ya sʋnya ma'ae ka ya mɔr sumalisim nɛ mam.
Timoti nɛ Epafroditus yɛla
19 M mɔr ti'iri ti Zugsɔb Yesu Kristo ni ye ti kʋ yuugɛ ka na tʋm Timoti ya san'an na ka o na tisi ya m labaar ka m sʋnf ma'ae.
20 On ma'aa mɔr pʋtɛn'ɛr yinne nɛ mam ka on ba' sid bɛ nɛ ya yɛla hali.
21 Sɔ' mɛkama zigidnɛ o mɛŋ yɛla ka ka'anɛ Yesu Kristo yɛlaa.
22 Ka ya mi' Timoti an sʋm si'em ka mi' ye mam nɛ on tʋm labasʋŋ tʋʋma la nwɛnɛ dau nɛ o biigi niŋid si'em.
23 Dinzugɔ m mɔr pʋtɛn'ɛr ye mam ya'a baŋi m yɛla la na naae si'em m na tʋm o ya san'an na tɔ'ɔtɔ.
24 M mɛ mɔr ti'ir Zugsɔbin la ye li kʋ yuugɛ ka m mɛ na kena.
25 M tɛn'ɛs ka li nar ye m tʋmi m ba'abiig, Epafroditus onɛ aan m tʋmtʋm tiraan ka lɛn aan m soogia tiraan ka an onɛ ka ya tʋm o ye o sʋŋim la.
26 O bɔɔd nɛ o sʋʋnr wʋsa ye o nyɛɛ ya, bɔzugɔ, o sʋnf san'amnɛ yanamɛ wʋm o ban'as yɛla la.
27 Sida, o daa bɛn'ɛdnɛ ka nwaas kum, ka Wina'am zɔɔ o nimbaanlig, ka li ka'anɛ on ma'aa nimbaanliga, amaa la'an nɛ mam mɛn, ka m sʋnsa'aŋ da lɛm pɛ'ɛsɛ.
28 Dinzug ka m mɔɔd nɛ nimmua hali ye m tʋm o ya san'an na, ka ya ya'a nyɛɛ o, ya sʋnya na malis, ka m ya'am na digin mɛn.
29 Di'emin o nɛ sumalisim on aan ya ba'abiig Zugsɔb la ni la zug. Ka na'asidi nimbanɛ mɛ nwɛn o la,
30 bɔzugɔ li da kpɛlim bi'ela ka o kpi Kristo tʋʋma la yɛla, ka kɛɛs o nyɔvʋr ye o sʋŋ mam nɛ linɛ ka ya mɛŋ pʋ nyaŋi sʋŋim la.
FILIPI DIM 3
Sida pʋpielim la yɛla
| 3 |
Linɛ naad wʋsa anɛ ye, m ba'abiisɛ, mɔri sumalisim Zugsɔb la ni. Li pʋ daam man ye m lɛn sɔb bʋn kan yɛla ya'asɛ, bɔzugɔ li anɛ sʋŋiri tisidi ya.
2 Gu'usimi ya mɛŋ nɛ nimbɛ'ɛdnam la, banɛ tʋm tʋʋmbɛ'ɛd la, la'an nɛ banɛ kpɛn'ɛsid nidib baŋʋ ka pa'an ye ba anɛ Wina'am nidib la.
3 Tinam banɛ pʋ'ʋsid Wina'am nɛ o Siig Kasi paŋ la an banɛ kpɛn' baŋʋ linɛ nar la. Ti pʋ nwɛ'ɛd nyɔ'ɔg nɛ ninsaalib tʋʋma amaa ti lɛɛ nwɛ'ɛdnɛ nyɔ'ɔg nɛ Yesu Kristo tʋm si'el la.
4 M ya'a bɔɔdin, m naan tun'e nwɛ'ɛdin nyɔ'ɔg nɛ bʋmbama ni. Sɔ' ya'a tɛn'ɛs ye o mɔr suokanɛ na kɛ ka o nwɛ' nyɔ'ɔg nɛ saalib tʋʋma, manɛ lɛɛ gat.
5 Ban du'a mam la daba anii daar ka ba kpɛn'ɛsim baŋʋ. Man anɛ Israel nid yinne ka an Benjamin dɔɔg nid ka an Hibiru nid amɛŋa, ka Jew dim wada la dɔlisʋg yɛla ka m an Farisii nid.
6 Ka li ya'a anɛ nimmua yɛla m da namisid Wina'am nimbanɛ niŋ Yesu yadda. Ka liya'a anɛ pʋpielim linɛ an wada siakir la yɛla la, m da ka' gba'arɛ.
7 Ka yɛlbanɛ wʋsa ka m naan nɔkin ka li an nyɔɔdi tisim la, Kristo yɛla, ka m nɔki li ka li an zaalim.
8 Asida, m tɛn'ɛs ye si'el mɛkama anɛ zaalim. Ka Yesu Kristo baŋir yɛla an sʋm gati li wʋsa. On yɛla ka m lu si'el mɛkama ni ka nɔki li ka li an sa'ad, ye Kristo lɛɛ na aan m nyɔɔd,
9 ka man nɛ on lieb yinne. M pʋ lɛm mɔr pʋpielim linɛ aan m mɛŋ din linɛ an wada suor dɔllimm. M yʋ'ʋn mɔri pʋpielim linɛ yi Yesu Kristo yadda niŋirin ka an Wina'am din linɛ ka ti di'ed nɛ yadda niŋir.
10 Mam bɔɔd si'el anɛ mam na baŋ Kristo nɛ o kum vʋ'ʋgir la paŋ, ka la'am namis nɛ o ka nwɛnɛ o nɛ, o kum pʋʋgin,
11 ka mɔr ti'ir ye m mɛ na ti vʋ'ʋg kumin.
Wina'am piini di'er nyidigir la yɛla
12 Li ka' ye m pʋn dɛŋi nyɛ piini la nɛ, bɛɛ lieb sʋ'ʋm naae, amaa m nyidigidnɛ ye m gban'e piini kanɛ yɛla ka Yesu Kristo gaŋim la.
13 M ba'abiisɛ, m pʋ tɛn'ɛs ye m nyaŋi paam nannɛ. Linɛ zug ka m nyidigid la anɛ ye m tam linɛ gaad la ka lɛɛ mɔɔd ye m paam linɛ bɛ tuon la.
14 M zɔtnɛ hali ye m paae zɔɔg la naar bɛn, ka di'e piini la. Ka piini la anɛ ye Wina'am buol mam arezana ni ka li yi Yesu Kristo ni na.
15 Kɛlli ka tinam banɛ yadda bi' la mɔr pʋtɛn'ɛr kan mɛn, ka sɔ' ya'a mɔr pʋtɛn'ɛsi'a, Wina'am na nie li ka ya baŋ.
16 Kɛlli ka ti gban'e linɛ ka ti dɛŋi siak la kiŋ-kiŋ.
17 M ba'abiisɛ, la'asimi nɛ ya taaba tu'asi mam tʋʋma, ka kpansid banɛ bɛllim tu'asi ti bɛllim an si'em la.
18 M dɛŋi yɛli ya nɔɔr bɛdegʋ, ka lɛn yɛti ya nɛ ninta'am ye nidib bɛdegʋ bɛ ka an dataas nɛ Yesu Kristo dapuudir la yɛla.
19 Ba ba'asʋg anɛ san'auŋ, ka ba niŋgbiŋ bɔɔdim aan ba Wina'am. Ba nɔkid linɛ an nyan la nwɛ'ɛdi ba nyɔ'ɔg, ka ba ya'am kpɛn' linɛ an dunia bʋn ma'aa.
20 Amaa tinam anɛ arezana nidib, zin'ikanɛ ka ti guri ti faangid Yesu Kristo yiib na la.
21 Onɛ na tiaki ti tadʋŋ niŋgbiŋ la ka li nwɛnɛ o niŋgbiŋ linɛ vɛnl pil-pil la. O na niŋ ala nɛ o paŋ kanɛ kɛ ka o nyaŋ ka sʋ'oe si'el mɛkama wʋsa la.
FILIPI DIM 4
Sa'alʋg
| 4 |
Alazugɔ m ba'abibanɛ ka m nɔŋ hali ka bɔɔd ye m nyɛɛ ya la, linɛ na ma'ae m sʋnf ka tisim nyɔɔd anɛ yanamɛ na nyaŋi zi'en Zugsɔb la san'an kiŋ-kiŋ. 2 M bɛllim Yuodia nɛ Sintike ye ban an yinne nɛ Zugsɔb la, ba niŋim nɔɔr yinne nɛ taaba.
3 M zɔɔng amɛŋa, m mɛ sɔsidif ye fʋ sʋŋ pu'ab la. Ba daa la'as nɛ mam tʋm Kristo labasʋŋ la tʋʋma nɛ Klemen nɛ o tʋmtʋm taaba banɛ kpɛlim ka ba yʋda sɔb nyɔvʋr paal dim gbauŋʋn la.
4 Mɔri sumalisim saŋa wʋsa yanamɛ an yinne nɛ Zugsɔb la, m na lɛn yɛl ya'as ye, mɔri sumalisim.
5 Kɛlli ka nidib wʋsa nyɛ yanamɛ bɛ bɛllim sʋŋ si'em. Tɛnri ye Zugsɔb la kenna li'elnɛ.
6 Da kɛ ka si'el yɛla paki yaa, amaa ya pʋ'ʋsim wʋsa pʋʋgin yɛlimi Wina'am yanamɛ bɔɔd si'el ka pʋ'ʋs o bareka.
7 Wina'am na tisi ya sumbʋgʋsʋm linɛ galis ka ninsaalib kʋ nyaŋɛ gban'e li gbinnɛ, ka na guri ya sʋnya nɛ ya tɛn'ɛsa Yesu Kristo ni.
8 M Ba'abiisɛ, li ba'asʋg anɛ anwa. Kɛlli ka ya ya'am kpɛn' si'el mɛkama linɛ an sida nɛ linɛ mɔr na'asi nɛ linɛ dɔl suor nɛ linɛ an nyain nɛ linɛ vɛnl nɛ linɛ wʋsa tigid nini. Si'el ya'a bɛɛ an sʋm hali bɛɛ nar nɛ wɔ'ɔgir, yanam tɛn'ɛsim bʋmbama yɛla.
9 Niŋimi linɛ wʋsa ka ya zamis bɛɛ di'e, bɛɛ wʋm, bɛɛ nyɛɛm san'an la, ka Wina'am onɛ tisidi ti sumbʋgʋsʋm la na bɛ nɛ ya.
Piini bareka pʋ'ʋsʋg yɛla
10 Mam mɔr sumpielim pamm Zugsɔb la san'an, ya ba'a lɛm bɛɛ m ni la zug. M mi' ye ya ba'a sid daa bɛɛ ni, amaa ya daa ka' suosi'a na pa'ali lii.
11 Man yɛt nɛ'ɛŋa la pʋ pa'al ye si'eli pɔ'ɔgi ma. Bɔzugɔ, m pʋn zamis ye m bɛllim ya'a an si'em wʋsa li kʋ paki ma.
12 M mi' tadʋŋʋ an si'em ka lɛm mi' mɔrim an si'em. M zamis ye m tun'e bɛ hali baa li ya'a bɔɔd lin an si'em wʋsa, li ya'a an tigir bɛɛ kɔ'ɔm bɛɛ kpan'am bɛɛ nɔŋɔ.
13 M tun'e tʋm si'el mɛkama wʋsa nɛ paŋ kanɛ ka Kristo tisidim la.
14 Ka la'an nɛ wala sa ya maal sʋ'ʋm yanamɛ la'an sʋŋim nɛ m namisʋgʋn la.
15 Yanam Filipi dim mi' labasʋŋ la mɔɔlʋg pin'ilʋgʋ ya teŋin la yɛla, mam daa yi Masedonia ka tɔɔm la, Wina'am nidib pʋ naan teŋ si'a tisim bɛɛ di'e si'eli m san'anɛ asɛɛ yanam ma'aa.
16 Bɔzugɔ man daa bɛ Tɛsalonika teŋin la, ya daa tɔlim sʋŋim nɔɔr bɛdegʋ.
17 Li ka' piini ka mam bɔɔda, amaa m bɔɔd ye ya nyɔɔd linɛ digi guri ya la paas.
18 M di'e piinbanɛ wʋsa ka ya tis Epafroditus ye o mɔri kena la ka li siaki m bɔɔdim. Li anɛ wʋʋ bʋn linɛ ka li nyuug malis ka ba nyu'oe tis Wina'am ka o di'ed nɛ sumalisim nɛ.
19 Ka m Wina'am onɛ ka m siak ka dɔl la na tisi ya linɛ mɛkama nar nɛ ya, ka li dɔlnɛ o kpan'am tita'ar linɛ bɛ Yesu Kristo ni la.
20 Ti Ba' Wina'am na nyɛ zʋn'or saŋa kanɛ ka' bɛnnɛ. Ami.
Pʋ'ʋsʋg
21 Pʋ'ʋsim Wina'am nimbanɛ an yinne nɛ Yesu Kristo la wʋsa. Ti ba'abiis banɛ la'am bɛ nɛ m la pʋ'ʋsidi ya.
22 Wina'am nidib wʋsa pʋ'ʋsidi ya; hali linɛ gat anɛ na'ab Siiza yidim la.
23 Ti Zugsɔb Yesu Kristo yɛlsʋm na bɛ nɛ ya.
KOLOSAE DIM
Gbauŋ nwa' yɛla
Paul sɔb gbauŋ kaŋa pa'an Yesu Kristo sid an sɔ' sʋ'ʋŋa, bɔzugɔ pa'annib sieba da bɛ Kolosae teŋin ma'ad karimbiis la ka ye li mɛ bɔɔd ye ba pʋ'ʋsid sibɛ'ɛd sieba banɛ mɔr paŋ. Ba mɛ da pa'an ye karimbiis la siakim dɔlis wada sieba nɛ malimsieba ka li kɛ ka Wina'am faaɛn ba. Paul pa'an gbauŋ nwa' ni ye li yinɛ Yesu Kristo ni ka Wina'am maal si'el wʋsa ka Yesu kan ma'aa mɔr paŋi na faaɛn ti. Ti ya'a dɔl suosi'a li na kɛ ka ti lal nɛ Wina'am, ka kɔ'ɔŋ sʋŋir linɛ ka o ye o tisi ti la.
KOLOSAE DIM 1
Mam, Paul onɛ ka Wina'am gaŋ ka m an Yesu Kristo Tʋmtʋm nɛ ti ba'abiig Timoti
2 sɔbid gbauŋ kaŋa tisid yanam banɛ an Wina'am nidib, ka an yinne nɛ Kristo ka bɛ Kolosae teŋin ka aan ti ba'abitaaba banɛ an yadda niŋidib la.
Ti Ba' Wina'am na tisi ya yɛlsʋm nɛ sumbʋgʋsʋm.
Paul bareka pʋ'ʋsim nɛ winsɔsʋg yɛla
3 Ti ya'a ɛɛnti sɔsidi ya yɛla, ti pʋ'ʋsid Wina'am onɛ aan ti Zugsɔb Yesu Kristo ba' la bareka.
4 Bɔzugɔ ti wʋm yanamɛ niŋ Yesu Kristo yadda ka nɔŋ Wina'am nidib la wʋsa si'em,
5 ka li anɛ yadda nɛ nɔŋilim linɛ ka ya mɔri zaŋi ken ti'ir kanɛ ka ya mɔr nɛ linɛ ka Wina'am digil arezana ni guri ya la zug. Ya pʋn dɛŋi wʋm ti'ir kanɛ bɛ Wina'am sida labasʋŋ linɛ
6 ka ba mɔɔli tisi ya la ni. Dunia zin'ig wʋsa nidib bɛdegʋ siakid Wina'am labasʋŋ la, ka ba kal paasid wʋʋ lin mɛ niŋidi ya san'an si'em saŋa kanɛ ka ya wʋm Wina'am pʋpielim yɛla ka sid baŋi li ti paae nannanna la
7 Ya zamis nɛ'ɛŋa Epafras onɛ aan ti tʋmtʋm tiraan Yesu Kristo ni, ka lɛn an Kristo tʋmtʋm amɛŋa ka zi'e ti nɔba zugʋ ya yɛla la.
8 O yɛli ti yanamɛ mɔr nɔŋilim Wina'am Siig Kasi la ni si'em.
9 Dinzug ka lin yi daakanɛ ka ti wʋmmi ya labaar la ti paae nannanna, ti pʋ basɛ ka kpɛn sɔsid Wina'am tisidi ya. Ti sɔsid Wina'am ye ya baŋ o
pʋtɛn'ɛri bɔɔd si'em sʋ'ʋŋa, nɛ ya'am nɛ baŋir linɛ ka Wina'am Siig la tisid.
10 Ti sɔsid ye o kɛ ka ya tʋʋma an wʋʋ Zugsɔb la bɔɔd ye li an si'em la, ka ma'ae o sʋʋnr bɛdegʋ, ka ya tʋm tʋʋm sʋŋ wʋsa, ka ya baŋir Wina'am yɛla maligim pɛ'ɛs.
11 Ka Wina'am paŋ tita'ar la zug ka ya na mɔr paŋ bɛdegʋ mɛn, ye ya tun'e mɔdig sʋ'ʋŋa nɛ sumalisim
12 ka na pʋ'ʋsidi ti Ba' Wina'am bareka, on maali ya ka ya nar ye yanam nɛ ya Wina'am nidib taaba di'e linɛ aan ya din ka bɛ Wina'am sʋ'ʋlim linɛ an nyain la ni la.
13 Bɔzugɔ, onɛ faaɛn ti Sʋntaana sʋ'ʋlim linɛ an lik la nii kpɛn'ɛs o Binɔŋir la sʋ'ʋlimin.
14 On zug ka ti nyɛ yɔlisim ka Wina'am yisi ti tʋʋmbɛ'ɛdi bas la.
Kristo an si'em la yɛla
15 Wina'am onɛ ka ba pʋ nyɛt la an si'em la Yesu mɛ sid anɛ ala. O anɛ bʋnkanɛ maal la wʋsa kpɛɛm.
16 Ka li yinɛ o san'an na ka Wina'am maali li wʋsa, bʋn banɛ bɛ dunia ni bɛɛ saazug, bɛɛ bʋn nyɛta, bɛɛ banɛ ka ti pʋ nyɛtaa bɛɛ banɛ mɔr na'am bɛɛ sʋ'ʋlim, bɛɛ paŋ bɛɛ kpi'euŋ la. Ka bʋn wʋsa maalʋg yinɛ o san'an ka anɛ o mɛŋ yɛla.
17 O pʋn dɛŋim bɛ ka si'el-si'el nan kae, ka o paŋ kɛ ka li wʋsa an gumm.
18 Onɛ an Wina'am nidib kpɛɛm wʋʋ zugʋ an yiiga si'em niŋgbiŋin la, ka lɛn an yiiga sɔb banɛ vʋ'ʋg kumin la, ye o an si'el wʋsa kpɛɛm.
19 Ka li malis Wina'am ye on an si'em la wʋsa Yesu mɛ anɛ ala.
20 Li yinɛ o san'an ka Wina'am zaŋ o ziim kanɛ yi kum dapuudir zug la maal sumbʋgʋsʋm nɛ bʋn linɛ bɛ saazug nɛ dunia ni wʋsa la.
21 Saŋa kanɛ gaad la ya daa anɛ bi'emnam nɛ Wina'am, ka mɔr pʋtɛn'ɛbɛ'ɛd nɛ tʋʋmbɛ'ɛd.
22 Amaa Yesu Kristo kum yɛla ka o naal nɔɔr nɛ ya ka na zi'eli ya ka ya an kasi Wina'am tuon ka ya kʋ lɛm mɔr gba'ar bɛɛ taalɛ.
23 Alazug ya ya'a kpɛm mɔri ya yadda la kiŋ-kiŋ wʋʋ ɛɛnb sʋŋ nɛ, ka pʋ bas ti'ir linɛ ka ya wʋm labasʋŋin laa, li na niŋ ala. Nwa' anɛ labasʋŋ kanɛ ka ba daa mɔɔli tis sɔ' wʋsa onɛ bɛ dunia ni. Labakan la ka mam Paul liebi li tʋmtʋm la.
Paul n tʋm si'em tis Wina'am nidib la yɛla
24 Ka nannanna nwa', m mɔr sumalisim nɛ man namisidi ya yɛla la. Namiskanɛ ka m namisid la ye li niŋnɛ paae li bɛn nwɛnɛ Kristo daa yɛl ye m na namis la. Ka li anɛ o niŋgbiŋ linɛ aan o karindɔɔg la yɛla ka m namisid.
25 Ya yɛla ka Wina'am gaŋi m ye m lieb o nidib la sʋŋid ka mɔɔn o labaar la sʋ'ʋŋa.
26 Labaar la da anɛ yɛlsu'adir saŋa kanɛ gaad la, amaa nannanna li yʋ'ʋn nie tis o nidib.
27 Ka Wina'am gban'e ye o kɛ ka o nidib baŋ ye yɛlsu'adir la anɛ yɛlsʋm tita'ari mɛ tis buudi wʋsa. Yɛlsu'adir la anɛ ye Kristo anɛ yinne nɛ ya ka tisi ya ti'ir ka ya na bɛ nɛ Wina'am.
28 Ti mɔɔn Kristo yɛla, ka sa'an sɔ' mɛkama, ka pa'annɛ ya nɛ ya'am ye ya bi' Kristo ni ka ti zaŋi yaa pa'al Wina'am.
29 Linzug ka m kpɛ'ɛŋi m mɛŋ ka mɔ hali nɛ paŋ tita'ar linɛ ka Kristo tisim ka li tʋmmi m ni la.
KOLOSAE DIM 2
M bɔɔd ye ya baŋ mam kpɛ'ɛŋidi m mɛŋ si'em ya yɛla nɛ banɛ bɛ
Laodisea nɛ banɛ pʋ nyɛɛm nɛ nif nan la.
2 M niŋid ala ye li kpɛmisi ba sʋnya ka ba la'as taaba nɛ nɔŋilim ka li kɛ ka ba baŋ Wina'am yɛlsu'adir linɛ an Kristo la nyain-nyain ka da bi'esidi li yɛla baa bi'elaa.
3 Ka Kristo san'an ka baŋir nɛ mi'ilim wʋsa bɛ.
4 M yɛli ya nwa' nɛ ka sɔ' da ma'aa ya nɛ ya'am gɔnlʋŋɔ.
5 Baŋimi ye hali baa man ka' ya san'an la, m ba'a bɛ nɛ ya ka m sʋnf malis nɛ ya suor la dɔllim nɛ yanamɛ siaki gban'e Kristo kiŋ-kiŋ la.
Tinamɛ an yinne nɛ Kristo ti bɛllimin la yɛla
6 Dinzugɔ yanamɛ sadigim siak ye Yesu Kristo an Zugsɔb la, kɛlli ka yanam nɛ on la'am bɛ nɛ nɔɔr yinne,
7 ka gban'e o nwɛnɛ tiig nya'a ba'a teŋ kiŋ-kiŋ si'em la, ka ya yadda niŋir nɔbig, ka kɛ ka ya bɛllim Yesu ni an wʋʋ tinamɛ pa'ali ya si'em la, ka tisidi Wina'am bareka pʋ'ʋsim bɛdegʋ.
8 Gu'usimi, ka sɔ' da pan'asi ya nɛ pa'al zaala linɛ nwɛnɛ ya'am pa'ala ka an dama'am nɛ pa'al kʋda nɛ saalib yiiga pa'ala ka pʋ yi Kristo ni na laa.
9 Ka Wina'am an si'em wʋsa la, Kristo mɛ da anɛ ala o niŋgbiŋin.
10 Ka yanamɛ an yinne nɛ o la zug ka ya nyɛ nyɔvʋr bɛdegʋ. Kristo anɛ kpɛɛm ka sʋ'oe linɛ wʋsa mɔr paŋ nɛ kpi'euŋ.
11 Yanam anɛ Wina'am nidib ka an yinne nɛ Kristo, ka zanbin linɛ pa'al ye ya anɛ o nidib la, ka'anɛ baŋʋ Kpɛn'ɛsʋg niŋgbiŋinɛ, ka anɛ ye Kristo yisi ya niŋgbiŋ bɔɔdim ya ni.
12 Yanamɛ daa di'e Wina'am ku'om sʋʋb la, li nwaasnɛ wʋʋ ba la'am mumi ya nɛ Kristo. Ka yanamɛ niŋ Wina'am yadda on vʋ'ʋg Kristo kumin si'em la, li mɛ nwaasnɛ wʋʋ ya la'am vʋ'ʋgi nɛ o.
13 Ya tʋʋmbɛ'ɛd nɛ ya saalib bɔɔdim linɛ pʋ dɔl suor la da kɛ ka ya zi' Wina'am ka nwɛnɛ banɛ kpinɛ. Ka Wina'am kɛ ka ya la'am vʋ'ʋg nɛ o. O da yisi ti tʋʋmbɛ'ɛd wʋsa bas.
14 Yesu yis wada kanɛ daa sɔb ka li kati ti saria, ka mɔŋidi ti bʋʋd la kpa' tabil o dapuudir la zug.
15 Kristo kum dapuudir la yɛla kɛ ka o san'am sibɛ'ɛdnam banɛ mɔr paŋ nɛ kpi'euŋ wʋsa ka diisi ba nyan paalʋ ni, on nyaŋi ba la zug.
16 Dinzugɔ, da kɛ ka sɔ' zɛrigi ya nɛ yanamɛ dit bɛɛ nuud si'el yɛla, bɛɛ yʋʋm-yʋʋm malima bɛɛ nwadpaalis malima bɛɛ daba ayɔpɔi Vʋ'ʋsʋm Daar yɛlaa.
17 Bʋmbama da nwaasnɛ linɛ na ti kena la, ka li mɛŋ-mɛŋ an Kristo.
18 Da kɛ ka ninkanɛ ma' ye o sikid o mɛŋ ka pʋ'ʋsid maliaknam nyaŋi pan'asif ka fʋ kɔ'ɔŋ yɔɔd la. Ninkan sɔb ma'adnɛ ye Wina'am nie si'eli pa'al o, ka o niŋgbiŋ ya'am la kɛ ka o dʋ'ʋsid o mɛŋ ka li gbin kae.
19 Ninkan pʋ tɔ'ɔŋ nɛ Yesu Kristo onɛ an zug niŋgbiŋin la. Li anɛ Kristo paŋ la kɛt ka niŋgbiŋ la giinla nɛ duta tɔ'ɔŋ taaba gumm ka nɔbigid wʋʋ Wina'am bɔɔd si'em la.
Tinamɛ kpi ka vʋ'ʋg nɛ Kristo la yɛla
20 Yanamɛ sadigim nwɛnɛ ya la'am kpinɛ nɛ Kristo ka bas saalib yiiga pa'ala la, da niŋidi wʋʋ ya bɛllim kʋdig la ka siak wada banɛ buudi ye,
21 “Da di nɛ'ɛnam bɛɛ da lɛmmi li bɛɛ da si'isi li laa!”
22 Banɛ maan bʋmbama wʋsa na ba'as yɔri, bɔzugɔ ba anɛ ninsaalib zi'ela nɛ pa'ala.
23 Wadbama nwɛnɛ ya'am pa'alʋg linɛ kɛt ka nidib namisid ka li ka' gbinnɛ nɛ ba zam sikimmɛŋ nɛ niŋgbina namisʋg, amaa ka ka' paŋ ye li kad yuob bɛɛ ya'amlɛog bɔɔdim.
KOLOSAE DIM 3
Yanamɛ sadigim vʋ'ʋg kumin nɛ Kristo la, kɛlli ka ya sʋnf bɔɔdim bɛ nɛ bʋn linɛ bɛ arezana ni, zin'ikanɛ ka o zin' Wina'am datiuŋ la.
2 Kɛlli ka ya pʋtɛn'ɛr gban'e nɛ bʋn linɛ bɛ arezana ni, ka ka'anɛ bʋn linɛ bɛ dunia nii;
3 ka ya kpinɛ ka vʋm kanɛ ka ya mɔr la yʋ'ʋn su'a nɛ Kristo onɛ bɛ Wina'am san'an la.
4 Ka Kristo onɛ aan ya nyɔvʋr la ya'a nie, ya na la'am bɛ nɛ o, ka bɛɛ o girima la ni.
Bɛllim kʋdir nɛ bɛllim paal la yɛla
5 Basimi ya niŋgbiŋ bɔɔdim linɛ an pu'asan'auŋ bɛɛ dian'ad tʋʋma bɛɛ ya'amlɛog galisʋg bɛɛ pʋtɛn'ɛbɛ'ɛd bɛɛ fufum la. Bɔzugɔ, fufum anɛ bɛ'ɛdi
nwɛnɛ ba'ar maalʋg nɛ.
6 Li anɛ tʋʋm bama yɛla ka Wina'am sʋnpɛɛn lut banɛ zan'asid o nɔɔr la zug na.
7 Ya da niŋid ala mɛn saŋkanɛ ka ya da la'am bɛ nɛ ba la.
8 Amaa nannanna, basimi sʋnpɛɛn nɛ ɛndʋg nɛ pʋtɛn'ɛbɛ'ɛd nɛ yʋ'ʋsan'auŋ nɛ pian'ayaalis wʋsa.
9 Yanamɛ basi ya bɛllim kʋdir la, da ma'adi tisidi taaba,
10 ka lɛɛ tiaki bɛllim paal linɛ ka Wina'am maannɛ tisidi ya saŋa mɛkama, ka ya nwɛnɛ o mɛŋ ka baŋid o yɛla paasid sʋ'ʋŋa si'em la.
11 Bɛllim paallin la, li ba'a kae ye oŋa anɛ Girik nid bɛɛ Jew nid bɛɛ o kpɛn' baŋʋ bɛɛ o pʋ kpɛn' bɛɛ o anɛ saan bɛɛ o yinɛ mɔɔgin na, bɛɛ o anɛ yammʋg bɛɛ o ka' yammʋgɔ, amaa Kristo ma'aa an si'el wʋsa ka bɛɛ o nidib wʋsa ni.
12 Yanamɛ an banɛ ka Wina'am gaŋ ye ya aan o nimbanɛ an nyain ka o nɔŋ la, aaɛn banɛ zɔt nimbaanlig, ka sʋŋidi nidib, ka siedi ya mɛŋ, ka an pʋtɛn'ɛsʋŋ dim, ka an suguru dim
13 nɛ banɛ gban'adi ba mɛŋ ka kɛt taaba tʋʋmbɛ'ɛdi basid wʋʋ Zugsɔb la yisi ya tʋʋmbɛ'ɛdi bas si'em la; yanam mɛ niŋimin ala mɛn.
14 Ka linɛ gaadi li wʋsa anɛ ye ya mɔr nɔŋilim ka linɛ la'asid si'el wʋsa ka li an gumm.
15 Kɛlli ka Kristo sumbʋgʋsʋm la sʋ'oe ya sʋnya ka li anɛ sumbʋgʋskan yɛla ka Wina'am buoli ya, ka ya an niŋgbiŋ yinne la. Ka pʋ'ʋsidi Wina'am bareka.
16 Mɔri Kristo labaar la sʋ'ʋŋa ya sʋnya nii zamisid ka sa'an taaba nɛ ya'am ka yʋ'ʋm yʋʋma linɛ bɛ Wina'am gbauŋʋn la, nɛ Wina'am nidib yʋʋma nɛ yʋʋm banɛ ka Wina'am Siig Kasi tisi ya la, ka kpɛm pʋ'ʋsidi Wina'am bareka saŋa wʋsa ya sʋnya ni.
17 Linɛ wʋsa ka ya maan; li ya'a anɛ tʋʋma bɛɛ pian'adɛ, yanam on niŋimini li Zugsɔb Yesu Kristo yʋ'ʋrin, ka pʋ'ʋsidi ti Ba' Wina'am bareka nɛ Yesu Kristo yʋ'ʋr zug.
Ti bɛllim nɛ taaba la yɛla
18 Pu'aba, siakimini ya sidib nɔya, ka li nar ka pu'a banɛ dɔl Zugsɔb la niŋid ala.
19 Sidiba, nɔŋimini ya pu'ab, ka da tɔi bɛɛ nyiidi baa.
20 Biisɛ, siakimini ya saamnam nɛ ya manam nɔya si'el wʋsa ni ka linɛ malis Zugsɔb la.
21 Du'adiba, da nyiidi ya biisɛ, ka ba na sin'ig.
22 Yammisɛ, siakimini ya zugdaannam nɔya si'el wʋsa ni ka da tʋmmi ban na bɛ nɛ ya ma'aa ka ba tɛn'ɛs ye ya anɛ tʋʋm sʋma dima, amaa ka lɛɛ tʋm nɛ pʋʋg yinne, Zugsɔb la na'asi yɛla.
23 Linɛ wʋsa ka ya tʋm, yanam on tʋmmi li nɛ pʋʋg yinne wʋʋ ya tʋmnɛ tisid Zugsɔb la, ka ka' ninsaaliba.
24 Ya mi' ye Zugsɔb la na tisi ya faar linɛ ka o da yɛli zi'el ye o na tis o nidib la. Li anɛ Kristo onɛ an Zugsɔb la ka ya tʋmmi tisid.
25 Tʋʋmbɛ'ɛd sɔb la na di'e o tʋʋmbɛ'ɛd la yɔɔd bɔzugɔ Wina'am pʋ mɔr baregaŋa. Zugdaannama, niŋimi linɛ an sʋm nɛ linɛ zemisi tisi ya yammis. Ka baŋi ya pʋtɛnda ni ye ya mɛ mɔr Zugsɔb onɛ bɛ arezana ni.
KOLOSAE DIM 4
Sa'alʋg
2 Kpɛn sɔsimi Wina'am saŋa wʋsa ka gu'usidi ka pʋ'ʋsid o bareka.
3 La'an sɔsi tisinɛ ti ye Wina'am na tisi ti suor ka ti mɔɔl o labaar la, ka nie o yɛlsu'adir linɛ an Kristo yɛla la tis nidib; ka li yɛla, ka ba lɔɔm nɛ bana.
4 Sɔsimi Wina'am ye m nyaŋi pian' nie li nyain wʋʋ lin nar ye m niŋ si'em la.
5 Mɔri ya'am nɛ yanamɛ niŋid si'em tisid banɛ ka' yadda niŋidib la, kanɔki ya saŋa la tʋm linɛ an sʋm.
6 Kɛlli ka ya nɔɔr pian'ad mɔri mimilim wʋʋ yaarim nɛ, ka baŋ yanamɛ na lɛbis lin nar si'em tis sɔ' mɛkama.
Pʋ'ʋsʋg
7 Tikikus onɛ aan ti ba'abinɔŋir nɛ ti sʋŋid amɛŋa nɛ ti tʋmtʋm tiraan onɛ an yinne nɛ ti Zugsɔb la na yɛli ya m yɛla.
8 Lin yɛla ka m tʋm o ya san'an na, ye ya baŋ tinamɛ an si'em, ka kpɛ'ɛŋi ya sʋnya.
9 On nɛ Onesimus onɛ aan ti ba'abinɔŋir asida ka aan ya teŋ nid la ka m tʋm o ya san'an na. Ba na yɛli ya linɛ wʋsa maan kpɛla.
10 Aristarkus onɛ ka tinam nɛ on la'am bɛ sanrega ni la pʋ'ʋsidi ya. Mak onɛ an Barnabas ansiŋ la mɛ pʋ'ʋsidi ya. M pʋn dɛŋi pa'ali ya o yɛla, ka o ya'a kena yanam on di'em o nɛ nu'us ayi'.
11 Josua onɛ ka ba buon Justus la mɛ pʋ'ʋsidi ya. Nidib atan' bama ma'aa an Jew dim banɛ la'an tʋm nɛ mam ye Wina'am sʋ'ʋlim la yɛla keŋ tuon. Ban niŋid si'em la bʋgʋnnɛ m sʋʋnr.
12 Epafras onɛ aan ya teŋ nid ka an Yesu Kristo tʋmtʋm la mɛ pʋ'ʋsidi ya. O tɛn'ɛsidi ya yɛla saŋa mɛkama ka sɔsid Wina'am nɛ nimmua, ye ya zi'en kiŋ-kiŋ ka bi' ka baŋ linɛ ka Wina'am bɔɔd sʋ'ʋŋa.
13 M nyɛ on tʋm namis yanam nɛ Laodisea dim nɛ Hierapolis dim wʋsa yɛla si'em.
14 Luk onɛ an du'ata kanɛ ka ti nɔŋ la nɛ Demas pʋ'ʋsidi ya.
15 Pʋ'ʋsimi ti ba'abiis banɛ bɛ Laodisea teŋin, nɛ Nimfa nɛ Wina'am nimbanɛ la'asid o yin la.
16 Ya ya'a karim gbauŋ kaŋa naae, yanam kɛlli ka ba karimi lii tis Wina'am nimbanɛ bɛ Laodisea la mɛn. Ka yanam mɛ karim Laodisea dim gbauŋ la.
17 Yɛlim Arikipus ye, “Mɔɔm ka naae tʋʋm kanɛ ka fʋ di'e Zugsɔb san'an la.”
18 Mam Paul n sɔb pʋ'ʋs kaŋa nɛ m mɛŋ nu'ug. Tɛn'ɛsimi ban lɔɔm nɛ bana la yɛla. Wina'am yɛlsʋm na bɛ nɛ ya.
YIIGA TɛSALONIKA DIM
Gbauŋ nwa yɛla
Paul sɔb gbauŋ kaŋa ye o kpɛmis karimbiis banɛ bɛ Tɛsalonika la. O pʋ'ʋsid Wina'am bareka nɛ ban niŋ Yesu yadda si'em la, ka tiɛndi ba on (Paul) bɛllim da an si'em on da bɛ nɛ ba teŋin la. O yɛti ba ye ba mɔr ti'ir nɛ Wina'am ka da kɛ ka ba bɛog yɛla paki baa. O kpɛmisidi ba ye ba bɛ bɛllim sʋŋ linɛ na kɛ ka ba ti'ebi gur Yesu Kristo lɛbig la na, ka li da ti libigi baa.
1 TƐSALONIKA DIM 1
Man Paul nɛ Silvanus nɛ Timoti sɔbid gbauŋ kaŋa tisid yanam banɛ an Wina'am nidib ka bɛ Tɛsalonika teŋin ka bɛɛ ti Ba' Wina'am nɛ Zugsɔb Yesu Kristo ni la.
Wina'am na tisi ya yɛlsʋm nɛ sumbʋgʋsʋm.
Tɛsalonika dim bɛllim nɛ ba yadda niŋir la yɛla
2 Ti pʋ'ʋsid Wina'am bareka saŋa wʋsa ya zug, ka tiɛndi ya yɛla ti winsɔsʋgin.
3 Ti mɛ tɛnri ya yɛla ti Ba' Wina'am tuon yanamɛ niŋ yadda ka mɔr nɔŋilim linɛ kɛ ka ya tʋm bɛdegʋ ka mɛ mɔr ti'ir kanɛ kɛt ka ya kpi'em ka mɔdigi bɛɛ ti Zugsɔb Yesu Kristo ni la.
4 Ti ba'abiis banɛ ka Wina'am nɔŋa, ti mi' ye onɛ gaŋi ya,
5 bɔzugɔ tinamɛ daa mɔr labasʋŋ la na tisi ya la, li daa ka'anɛ pian'ad ma'aanɛ, amaa li daa mɔri paŋ nɛ Wina'am Siig Kasi nɛ paŋ kanɛ tiakid sʋnya. Tinamɛ daa bɛ nɛ ya la, ya daa mi' ti bɛllim daa an si'em. Li daa anɛ yanam sʋ'ʋm zug.
6 Ya anɛ banɛ daa tu'asid tinam nɛ Zugsɔb la bɛllim an si'em, ka hali baa yanamɛ paam namisʋg bɛdegʋ la, ya di'e labaar la nɛ sumalisim linɛ yit Wina'am Siig Kasi la ni na.
7 Linzug ka yadda niŋidib banɛ bɛ Masedonia nɛ Akaia sʋ'ʋlimin mɛ an banɛ tu'asidi ya.
8 Nidib bɛdegʋ wʋm Zugsɔb la labaari ya san'an. Ka li ka'anɛ nimbanɛ bɛ Masedonia nɛ Akaia la ma'aanɛɛ, amaa la'an nɛ banɛ bɛ zin'is wʋsa mɛ wʋmi ya yadda niŋir Wina'am ni la yɛla. Ka si'el kae ka ti na lɛn yɛli baa.
9 Nimbama wʋsa pian'ad yanamɛ daa di'e ti sʋ'ʋŋa si'em, ka bas bada ka dɔl Wina'am onɛ vʋe ka sid an Wina'am la,
10 ka gur o Bikanɛ ka o da vʋ'ʋg o kumin la na ti yi arezana ni na. Yesu onɛ faaɛn ti Wina'am sʋnpɛɛn kanɛ na ti kena la ni.
1 TƐSALONIKA DIM 2
Paul tʋʋma Tɛsalonika teŋin
| 2 |
Ti ba'abiisɛ, ya mi' ye tinamɛ daa kena kaae ya la, li daa pʋ niŋ zaalim,
2 ya mi' ye ba daa namisi ti, ka diisi ti nyan hali Filipi teŋin, ka ti nyaan kɛɛn ya san'an Tɛsalonika teŋin na. Wina'am daa tisi ti sʋnkpi'euŋ ka ti tu'as labasʋŋ dinɛ yii o ni na la tisi ya, hali la'an nɛ sieba daa daami ti bɛdegʋ la.
3 Tinamɛ daa tu'asidi ya antu'a si'a la pʋ yi dama'amin bɛɛ pʋtɛn'ɛbɛ'ɛdinɛ; li mɛ ka' ye ti bɔɔdnɛ ye ti zam nidiba.
4 Wina'am gɔsi ti ka ti nar ka o gu'uli ti o labasʋŋ la zug, ka ti pian'ad wʋʋ on bɔɔd si'em la. Ti pʋ mɔɔd ye ti ma'ae ninsaalib sʋnya, ka lɛɛ mɔɔd ye ti ma'ae Wina'am onɛ kpansidi ti sʋnya la.
5 Ya mi' sʋ'ʋŋa ye ti daa pʋ tu'as dama'am pian'ad bɛɛ su'a maal si'el linɛ an fufummɛ. Wina'am aan ti kasɛt.
6 Ti daa pʋ ieed suor ye ti di'e zun'ori ya san'an bɛɛ sieba san'anɛ. La'an nɛ tinamɛ an Kristo tʋmtʋmnib ka di nar ye ya gɔsi ti la, ti daa pʋ lieb ziidi tisi yaa,
7 Ti daa bɛ nɛ baanlimm ya san'an, wʋʋ bimaa gɔsid o biis si'em la.
8 Tinamɛ nɔŋi ya la zug, ka ti daa siak ye ti tisi ya labasʋŋ linɛ yi Wina'am ni na la, ka la'am pɛsigi ti mɛŋi tisi ya. Ti daa nɔŋi ya bɛdegʋ.
9 M ba'abiisɛ, ya tɛnr ye tinamɛ daa mɔɔn Wina'am labasʋŋ la tisidi ya la, ti daa tʋmnɛ yʋ'ʋŋ nɛ nintaŋ wʋsa ye ti yɛla da daami yaa.
10 Yanam nɛ Wina'am anɛ kasɛtib tinamɛ daa niŋid si'em yanam yadda niŋidib san'an la. Ti daa bɛ nɛ ya nɛ kasi nɛ pʋpielim pʋʋgin ka gba'ar kae.
11 Ya mi' ye ti daa sa'ali ya yinne-yinne wʋʋ dau sa'an o biis si'em la,
12 ka kpɛ'ɛŋi ya sʋnf ka yɛli ya ye ya dɔl suor kanɛ na ma'ad Wina'am sʋnf. Onɛ buoli ya ye ya kpɛn' o sʋ'ʋlimin nɛ o na'amin la.
13 Tinamɛ daa mɔr labaar linɛ yi Wina'am ni na tisi ya la, ya daa wʋm ka di'e li ka baŋ ye li anɛ labaar linɛ pʋ yi ninsaalib ni naa, ka baŋ ye li anɛ labaar linɛ yi Wina'am ni na. Ka li sid tʋm, yanam banɛ an yadda niŋidib la sʋnya ni. Dinzug ka ti pʋ'ʋsid Wina'am bareka saŋa wʋsa.
14 Ti ba'abiisɛ, ya daa nyɛ namisʋg, wʋʋ Wina'am nimbanɛ bɛ Juda teŋin ka dɔl Yesu daa nyɛ namisʋg si'em la. Ya nyɛ namisʋgʋ ya mɛŋ buudi ni wʋʋ
ban nyɛ Jew dim san'an si'em la.
15 Ba da kʋ Zugsɔb Yesu nɛ Wina'am nɔdi'esidib, ka mɛ kadi ti yis, ka li duoe Wina'am sʋnf,
16 ka vi' ti ye ti da pian' tis banɛ ka' Jew dim la ka ba nyɛ faangirɛ. Tʋʋmbɛ'ɛd kaŋa kena paasi ba tʋʋmbɛ'ɛd banɛ ka ba tʋm la wʋsa ni ka li yʋ'ʋn zu'oe galis. Ka Wina'am sʋnpɛɛn yʋ'ʋn luu ba zug.
Paul daa bɔɔd ye o kaae ba ya'as
17 Ti ba'abiisɛ, tinamɛ daa yii ya san'an saŋa bi'ela la, ti daa baknɛ nɛ niŋgbina ka ka'anɛ sʋʋnrin bakirɛ. Dinzug ka ti daa mɔɔd hali ye ti kena kaae ya ya'as.
18 Ti daa bɔɔd ye ti lɛbi ya san'an na. Man Paul daa mɔ nɔɔr si'em ye m lɛbi ya ni na, amaa ka Sʋntaana vi' ti.
19 Saŋkanɛ ka ti Zugsɔb Yesu na ti lɛb na ka ti bɛɛ o tuon la, ya yɛla ka ti na nwɛ'ɛd nyɔ'ɔg ka mɔr ti'ir nɛ sumalisim. Ka' ala bɛɛ?
20 Yanam zug ka ti na nyɛ na'asi nɛ sumalisim.
1 TƐSALONIKA DIM 3
Dinzugɔ, tinamɛ zi' yanamɛ an si'em la kɛ ka ti kʋ lɛn nyaŋi mɔdig ya'asa, ka siak ye ti bɛ Atens teŋinɛ ti kɔn'ɔkɔn',
2 ka tʋmi ti pitʋ Timoti onɛ aan ti tʋmtʋm tiraan Wina'am ni ka pa'an Kristo labasʋŋ la, ye o kena sʋŋi ya, ya yadda niŋir pʋʋgin, ka kpɛ'ɛŋi ya sʋnya
3 ka namisʋg bama da kɛ ka ya sɔ' bas Wina'am suor la dɔllim. Ya mi' ye li anɛ Wina'am bɔɔdim ye ti namis.
4 Tinamɛ daa nam bɛ nɛ ya la, ti daa dɛŋi yɛli ya ye ti wʋsa na nyɛ namisʋg. Ka li sid niŋ ala wʋʋ yanamɛ mi' li si'em la.
5 Dinzugɔ, man daa kʋ nyaŋi mɔdig la kɛ, ka m tʋm Timoti ye o kena ka m baŋi ya yadda niŋiri an si'em. Bɔzugɔ m zɔti dabiem ye Sʋntaana pa'ati pan'asi ya, ka ti tʋʋma ya san'an la lieb zaalim.
6 Amaa nannanna Timoti yii ya san'anɛ lɛb na, ka mɔr labasʋŋʋ ya nɔŋilim nɛ ya yadda niŋir la yɛla na, ka yɛli ti ye ya tɛn'ɛsidi ti yɛla sʋ'ʋŋa saŋa wʋsa, hali ka bɔɔd ye ya nyɛɛ ti, wʋʋ tinamɛ bɔɔd ye ti nyɛɛ ya si'em la.
7 Dinzugɔ m ba'abiisɛ, tinamɛ wʋmi ya yadda niŋiri an si'em la yɛla kɛ ka ti sʋnya kpi'emi ya yɛla ti daamʋg nɛ ti namisʋg pʋʋgin.
8 Yanamɛ zi'e kiŋ-kiŋ ka dɔl Zugsɔb la, ka ti bɛllim sid na an sʋ'ʋŋa.
9 Nannanna ti na niŋ wala nyaŋi pʋ'ʋs Wina'am bareka ya zug, ka li zemis nɛ sumalisim linɛ ka ti sid mɔri ya yɛla la Wina'am tuonnɛ?
10 Yʋ'ʋŋ nɛ nintaŋ wʋsa ti sɔsid o nɛ ti sʋnya wʋsa, ye ti nyɛɛ ya nɛ nif ya'as, ka sʋŋi ya nɛ dinɛ pansigi ya, ya yadda niŋirin.
11 Ti sɔsidi ti Ba' Wina'am, nɛ ti Zugsɔb Yesu Kristo ye o maal suori tisi ti, ka ti kɛɛn ya san'an na.
12 Ti sɔsid Zugsɔb la ye o kɛ ka ya taaba nɔŋilim nɛ nimbanɛ bɛ kpɛla wʋsa nɔŋilim an si'em la na nɔbig bɛdegʋ wʋʋ tinamɛ nɔŋi ya si'em la,
13 ye o kpɛ'ɛŋi ya sʋnya ka saŋkanɛ ka ti Zugsɔb Yesu na kena nɛ o nidib wʋsa la, ya na di bʋʋd ka kʋ mɔr gba'arɛ ka an kasi ti Ba' Wina'am la tuon.
1 TƐSALONIKA DIM 4
Bɛllim sʋŋ linɛ ma'ad Wina'am sʋnf la yɛla
| 4 |
Tɔ', ti ba'abiisɛ, ya daa zamisi ti san'an yanamɛ na bɛ si'em ka li ma'ae
Wina'am sʋnf. Ya kpɛn aan ala. Ti san'anɛ ya ka bɛlimmi ya nɛ ti Zugsɔb Yesu yʋ'ʋr ye ya niŋ ka li gaad ala.
2 Ya mi' nɔɔr yɛlʋg banɛ ka ti daa tisi ya nɛ Zugsɔb Yesu paŋ la,
3 ye Wina'am bɔɔd ye ya bɛllim an sʋm ka an nyain, ka ya luak dian'ad tʋʋma,
4 ka baŋ yanamɛ na niŋ si'em di pu'a nɛ na'asi, ka ya sʋnya an nyain.
5 Ka li ka'anɛ ya'amlɛog linɛ an bɛ'ɛd wʋʋ ba'amaannib banɛ pʋ dɔl Wina'am niŋid si'em laa.
6 Ka nɛ'ɛŋa pʋʋgin, mid ka sɔ' tʋm tʋʋmbɛ'ɛd bɛɛ pɔnbil o ba'abiig. Ti daa dɛŋin yɛli ya, ka sa'ali ya nɛ paŋ ye, Zugsɔb na namis banɛ tʋm tʋʋmbɛ'ɛbama.
7 Wina'am daa pʋ gaŋi ti ye ti tʋm dian'ad tʋʋma, amaa ye ti bɛ nyain.
8 Dinzugɔ onɛ zan'as pa'alkaŋa, o pʋ zan'as ninsaala, o zan'asnɛ Wina'am onɛ tisi ti o Siig Kasi la.
9 Li lɛn kae ye ti sɔbi tisi ya, ya ba'abiis nɔŋilim yɛlaa. Wina'am pʋn zamisi ya ye ya nɔŋ taaba.
10 Li anɛ sida ye ya nɔŋi ya ba'abiis wʋsa banɛ bɛ Masedonia sʋ'ʋlimin la. Ti ba'abiisɛ, ti bɛlimmi ya ye ya kɛ ka nɔŋilim la gaad lin an si'em la,
11 ka ya kpɛ'ɛŋi ya mɛŋi an baanlimm, ka gɔsi ya mɛŋ tʋʋma, ka bɔɔ ya mɛŋ nu'ug tʋʋma diisidi ya mɛŋ wʋʋ tinamɛ daa yɛli ya si'em la.
12 Ala ka ya na nyɛ na'asi banɛ ka' yadda niŋidib la san'an ka kʋ ti'e ye sɔ' tisi ya yanamɛ bɔɔd si'ela.
Zugsɔb lɛbig la na yɛla
13 Ti ba'abiisɛ, ti bɔɔd ye ya baŋ yɛlsida zaŋi ken banɛ kpi la yɛla, ka li kɛ ka ya sʋnya da san'am wʋʋ banɛ pʋ mɔr ti'irɛ.
14 Ti siak ye Yesu kpiya ka lɛn vʋ'ʋg kumin, ka mɛ siak ye banɛ daa an Yesu nidib ka kpi la, Wina'am na vʋ'ʋgi ba nɛ Yesu.
15 Nɛ'ɛŋa anɛ Zugsɔb la pa'alʋg ka ti yɛti ya ye, saŋkanɛ ka Zugsɔb la na ti kena la, tinam banɛ nan kpɛn vʋe la kʋ dɛŋ banɛ kpi la yiiga la'as nɛ Zugsɔb la.
16 Zugsɔb la mɛŋ na ti yi arezana nii sig na ka tans nɛ kpi'euŋʋ tis nɔɔr; ka maliak kpɛɛm la mɛ mɔɔl nɛ kʋkɔtita'ar ka Wina'am na'atan pieb. Ka banɛ pʋn kpi Kristo suorin la na vʋ'ʋg kumin yiiga.
17 Ka Wina'am yʋ'ʋn na nɔk tinam banɛ nan kpɛn vʋe la la'as nɛ ba tʋ'ʋs Zugsɔb la saŋgbana ni. Ka ti yʋ'ʋn na bɛ Zugsɔb la san'an saŋa wʋsa.
18 Dinzugɔ, kpɛmisimi taaba sʋnya nɛ pian'abama.
1 TƐSALONIKA DIM 5
Ti ba'abiisɛ, li lɛn kae ye ti sɔb si'eli tisi ya Zugsɔb ken la saŋa nɛ dabisa la yɛlaa.
2 Bɔzugɔ, ya pʋm mi' sʋ'ʋŋa ye Zugsɔb dabisir la na kena wʋʋ na'ayiigi ken yʋ'ʋŋ si'em na la.
3 Nidib ya'a ti yɛt ye, “Laafi nɛ nimma'asim bɛ,” saŋkan la ka tɔɔg na kpɛn luu ba zugin, wʋʋ pu'a ɛɛnti sa'ae du'am si'em la, ka ba kʋ nyaŋi yii li nii.
4 Ti ba'abiisɛ, ya ka' lik dim ka Zugsɔb la dabisir na kpɛn libigi ya wʋʋ na'ayiiga.
5 Ya wʋsa anɛ nɛɛsim nidib, ka bɛ linɛ an nyain la ni, ti ka' banɛ an yʋ'ʋŋ bɛɛ lik nidiba.
6 Dinzugɔ, ti da an nwɛnɛ banɛ gbisid la, amaa ti nɛi ka da an wʋʋ onɛ nu daam kʋʋlɛ.
7 Banɛ gbisid la gbisidnɛ yʋ'ʋŋ. Ka banɛ nuud daam kʋʋn la mɛ kʋʋn yʋ'ʋŋ.
8 Amaa tinamɛ an nɛɛsim nidib la zug, kɛlli ka ti gban'anɛ ti mɛŋ, ka nɔk yadda nɛ nɔŋilim yɛ wʋʋ nyɔ'ɔgin gbanti'edʋg nɛ, ka pid kʋnt balaŋir linɛ an ti'ir linɛ an faangir la gu' ti zut.
9 Wina'am pʋ gaŋi ti ye ti nyɛɛ o sʋnpɛɛnnɛ, amaa ye ti di'e faangir linɛ yiti ti Zugsɔb Yesu Kristo ni na la.
10 O da kpii ti zug, ye saŋkanɛ ka o ti kenna la, ti ya'a vʋe bɛɛ ti ya'a kpinɛ, ti na la'am bɛ nɛ o.
11 Dinzugɔ, kpɛmisimi taaba sʋnya, ka sʋŋ taa
ba ya yadda niŋirin wʋʋ yanamɛ niŋid si'em la.
Sa'alʋg nɛ pʋ'ʋsʋg
12 Ti ba'abiisɛ, ti bɛlimmi ya ye ya na'as banɛ ka Zugsɔb la gaŋi ba ye ba guri ya ka tʋm o tʋʋma ya sʋʋgin ka pa'annɛ ya la.
13 Tisimini ba na'asi bɛdegʋ, ka nɔŋi ba, ba tʋʋma la zug, ka mɔri sumbʋgʋsʋm nɛ taaba.
14 Ti ba'abiisɛ, ti kpɛmisidi ya sʋnya ye ya sa'al banɛ mɔr gbanya'am la, ka kpɛmis banɛ pʋ mɔr sʋnkpi'euŋ la sʋnya, ka sʋŋ banɛ ka' paŋi ba yadda niŋir pʋʋgin la, ka mɔr sumbʋgʋsʋm nɛ ba wʋsa,
15 ka gu'us ka ya sɔ' da lɛbis o tiraan bɛ'ɛd on tʋm bɛ'ɛd la zugɔ, ka kpɛ'ɛŋi ya mɛŋi tʋm tʋʋm sʋma tis taaba nɛ nidib wʋsa.
16 Mɔri sumalisim daar wʋsa,
17 ka sɔsidi Wina'am saŋa wʋsa,
18 ka pʋ'ʋs o bareka si'el mɛkama ni; ka li anɛ Wina'am bɔɔdim linɛ yi Yesu Kristo ni na ye ya niŋid ala.
19 Da zan'asi Wina'am Siig Kasi laa,
20 ka mɛ da nɛ'ɛs pian'ad linɛ ka sɔ' di'e Wina'am nii tisi yaa.
21 Kpansimi si'el wʋsa, ka gban'e dinɛ an sʋm,
22 ka luak bʋmbɛ'ɛd buudi wʋsa.
23 Ti sɔsid Wina'am onɛ tisidi ti sumbʋgʋsʋm la ye o kɛ ka ya an sʋm nyain. Ka lɛn sɔs o ye o na mɔri ya sʋ'ʋŋa, ka Zugsɔb Yesu Kristo la ya'a ti lɛb na, ka ya siis nɛ niŋgbina an sʋm ka gba'ar kae.
24 Wina'am onɛ gaŋi ya la anɛ sida sɔb, ka na tʋm ala.
25 Ti ba'abiisɛ, sɔsimi Wina'am tisi ti,
26 ka pʋ'ʋsi ya ba'abiis wʋsa sʋ'ʋŋa.
27 M yɛti ya, nɛ Zugsɔb paŋ ye ya karim gbauŋ kaŋa tisi ya ba'abiis wʋsa.
28 Ti Zugsɔb Yesu Kristo yɛlsʋm na bɛɛ ya san'an. Ami.
AYI' TɛSALONIKA DIM
Gbauŋ nwa' yɛla
Paul sɔb gbauŋ kaŋa pa'an karimbiis banɛ bɛ Tɛsalonika Yesu Kristo na lɛb dunia ni na la yɛla. O sɔb la ni, o pa'al ye ba pʋtɛnda nwɛ'ɛnɛ yutim. Ka kpɛmisi ba ye li nar ye ba zi'en kiŋ-kiŋ nɛ yadda ka kpɛn tʋm tʋʋm sʋma ka gur Yesu lɛbig la na.
2 TƐSALONIKA DIM 1
Man Paul nɛ Silvanus nɛ Timoti sɔbid gbauŋ kaŋa tisid yanam banɛ an Wina'am nidibi bɛ Tɛsalonika teŋin, ka bɛ ti Ba' Wina'am nɛ Zugsɔb Yesu Kristo ni la.
2 Ti Ba' Wina'am nɛ ti Zugsɔb Yesu Kristo na tisi ya yɛlsʋm nɛ sumbʋgʋsʋm.
Kristo na lɛb na kad saria
3 Ti ba'abiisɛ, ya yadda niŋir nɛ ya nɔŋilim nɛ taabaa nɔbigid bɛdegʋ la zug, ka li nar ka an sʋm ye ti pʋ'ʋs Wina'am bareka saŋa wʋsa ya zug.
4 Ka linzug ka tinam mɛŋ nwɛ'ɛd nyɔ'ɔgʋ ya yɛla Wina'am nidibi la'asid zin'isi'a wʋsa. Ti nwɛ'ɛd nyɔ'ɔgʋ ya mɔdigir nɛ ya Wina'am yadda niŋir nɛ mugusʋg nɛ namisʋg linɛ paadi ya la zug.
5 Nɛ'ɛŋa wʋsa pa'al ye Wina'am kad saria nɛ yɛlsida, o maali ya ka ya nar nɛ yanamɛ na bɛɛ o sʋ'ʋlimin la, ka li anɛ yanamɛ bɛɛ o sʋ'ʋlimin la zug ka nidib namisidi ya.
6 Wina'am anɛ sida daan ka na namis banɛ namisidi ya la,
7 ka kɛ ka tinam nɛ yanam banɛ namisid la vʋ'ʋs, saŋkanɛ ka Zugsɔb Yesu na ti yi arezana nii lɛb na nɛ o maliaknam banɛ mɔr paŋ tita'ar nɛ bugum pielim la.
8 O na ti namis banɛ zi' Wina'am nɛ banɛ pʋ siaki ti Zugsɔb Yesu labasʋŋ la.
9 Daakanɛ ka o na kena la ba na, paam namisʋg linɛ ka' naarɛ, ka ba na yisi ba Zugsɔb la nɛ o na'am paŋ tita'ar la ni.
10 Saŋkan la ka ti na nyɛɛ o, ka o na bɛɛ o mɛŋ nidib nɛ banɛ wʋsa niŋ o yadda la ni, ka ti na tis o na'asi. Yanam mɛ na ti paas, bɔzugɔ ya mɛ daa siak Wina'am labaar kanɛ ka ti daa kena tu'asi tisi ya la.
11 Linzug ka ti sɔsid Wina'am tisidi ya saŋa wʋsa ye o na kaali ya pɛ'ɛs banɛ nar ye ba bɛɛ o sʋ'ʋlimin la. Ka mɛ sɔs o ye o paŋ la na kɛ ka yanamɛ gban'e si'eli ya pʋtɛn'ɛrin nɛ ya yadda linɛ tʋm tʋʋma la paae li bɛn.
12 Ti sɔsid Zugsɔb Yesu ye o bɛɛ ya ni ka yanam mɛ bɛɛ o ni. Ka ya wʋsa na nyɛ zʋn'or. Li wʋsa yinɛ Wina'am nɛ Zugsɔb Yesu Kristo ni na.
2 TƐSALONIKA DIM 2
Tʋʋmbɛ'ɛd daan la yɛla
| 2 |
Man ye m yɛli si'el nannanna la anɛ ti Zugsɔb Yesu Kristo lɛbig na nɛ tinamɛ na ti la'as taaba tʋ'ʋs o la yɛla. Ti ba'abiisɛ, ti bɛlimi ya
2 ye ya ya'a wʋm labaar ye Zugsɔb la pʋn lɛb na, yanam da kɛ ka li daami ya bɛɛ li kpɛn'ɛsi ya dabiem ka ya mɔr pʋtɛnda ayi', yi'. Li ya'a anɛ sɔ' yɛl ala ka ba tɛn'ɛs ye li yinɛ Wina'am Siig Kasi la ni, bɛɛ sɔ' pa'al ala, bɛɛ sɔ' karim gbauŋ ka ya tɛn'ɛs ye li yinɛ ti san'an na,
3 yanam da kɛ ka sɔ' ma' ya nɛ'ɛnam wʋsa nii. Daakan la kʋ kena, asɛɛ ka saŋkanɛ ka nidib bɛdegʋ la'asi zan'as Wina'am la kena, ka tʋʋmbɛ'ɛd sɔb onɛ ka li zi'el ye o keŋ bugum teŋ la nie na.
4 O na kisig dinɛ wʋsa ka ba buon ye Wina'am la, la'an nɛ bʋn linɛ wʋsa ka nidib zun'odi li la, ka dʋ'ʋs o mɛŋi gaadi ba wʋsa. Hali o na kpɛn' Wina'am Pʋ'ʋsim Yinɛ zin'in ka yɛl ye o anɛ Wina'am.
5 Ya pʋ tɛnr ye man daa nan bɛɛ ya san'an la, m daa yɛli ya nɛ' wʋsa?
6 Ka nannanna yɛl si'a bɛɛ vi' tʋʋmbɛ'ɛd daan la ka ya mi' li, ka li saŋa ya'a ti paae, tʋʋmbɛ'ɛd daan la na nie na.
7 Tʋʋmbɛ'ɛsu'ada la pʋn pin'ili tʋm sa. Ka onɛ nam vi' tʋʋmbɛ'ɛd daan la suor la na kpɛn niŋid ala ti paae saŋkanɛ ka ba na yis o suorin la ka bas paal
8 Ka tʋʋmbɛ'ɛd daan la yʋ'ʋn na nie na. Ka Zugsɔb Yesu nɔɔr pɛbisim na kʋʋ o. Ka o ken la nɛɛsim na san'am o.
9 Sʋntaana na kɛ ka tʋʋmbɛ'ɛd daan la kena. O na mɔr paŋ tita'ar, ka maan ziri bʋnnyalima,
10 ka ma' nimbanɛ ka san'auŋ bɔɔdi paae ba la dama'am buudi wʋsa. Bam pʋ nɔŋ sida linɛ na kɛ ka ba paam faangir la zug ka ba na san'am.
11 Linzug ka Wina'am na tisi ba ziri pʋtɛn'ɛr, ka ba siak linɛ an ziri,
12 ala ka nimbanɛ wʋsa pʋ siak linɛ an sida ka bɔɔd tʋʋmbɛ'ɛd la, na nyɛ kʋʋsbɛ'ɛd.
Ya faangir zug ka Wina'am gaŋi ya
13 Ti ba'abiis banɛ ka Zugsɔb nɔŋa, li nar ka ti pʋ'ʋs Wina'am bareka saŋa wʋsa on gaŋi ya pin'ilʋgʋn sa la zug. Yanamɛ niŋ yadda nɛ linɛ an
sida la zug ka o Siig Kasi la kɛ ka ya an o nimbanɛ an sʋm ka an nyain ka nyɛ faangir.
14 Tinamɛ daa mɔɔl labasʋŋ la tisi ya la zug ka Wina'am buoli ya ye ya nyɛ faangir ka yanam nɛ Zugsɔb Yesu Kristo ti la'an di'e o girima.
15 Dinzug ti ba'abiisɛ, zi'enimi kiŋ-kiŋ, ka dɔlli yɛlsida linɛ ka ti pian' tisi ya bɛɛ linɛ ka ti sɔb gbauŋʋn tisi ya la.
16 Ti pʋ'ʋsidi ti Zugsɔb Yesu Kristo mɛŋ nɛ ti Ba' Wina'am onɛ nɔŋi ti ka tisi ti sʋnkpi'euŋ kanɛ ka' naarɛ nɛ pʋpielim nɛ ti'ir linɛ an sʋm la.
17 Ka sɔs o ye o na kpɛ'ɛŋi ya sʋnya, ka tisi ya paŋ ka ya na tʋm linɛ an sʋm ka mɛ pian'ad linɛ an sʋm.
2 TƐSALONIKA DIM 3
Sɔsimi Wina'am tisi ti
| 3 |
Ti ba'abiisɛ, li ba'asʋg anɛ ye ya sɔsimi Wina'am tisi ti, ye ti Zugsɔb labaar la na kpɛn yadigid tɔ'ɔtɔ ka nyɛ na'asi wʋʋ lin daa niŋi ya ni si'em la.
2 Ka sɔs o ye o faaɛn ti nimbɛ'ɛdnam san'an ka li ka' nidib la wʋsa siak Wina'am labaar la.
3 Zugsɔb la anɛ onɛ an yɛlsida daan, ka na tisi ya paŋ ka guri ya, ka Sʋntaana da nyaŋi yaa.
4 Zugsɔb la kɛya ka ti niŋi ya yadda, ka mi' ye ya niŋid tinamɛ yɛli ya si'el la, ka na kpɛn niŋid ala.
5 Ti sɔsid Zugsɔb la ye o na kɛ ka ya baŋ Wina'am nɔŋilim la an si'em, ka mɔdigi wʋʋ Kristo mɔdig si'em la.
Sa'alʋg
6 Ti ba'abiisɛ, ti yɛti ya nɛ ti Zugsɔb Yesu Kristo yʋ'ʋr zug ye ya baki ya mɛŋ nɛ ya ba'abiis banɛ an gbanya'anam ka pʋ dɔl pa'alʋg kanɛ ka ti tisi ya la.
7 Yanam mɛŋ mi' sʋ'ʋŋa ye li nar ka ya tu'as tinamɛ daa tʋm si'em la. Tinamɛ daa bɛ nɛ ya la, ti daa ka' gbanya'anama,
8 ka pʋ dit sɔ' diib zaalim, ka lɛɛ tʋm bɛdegʋ nintaŋ nɛ yʋ'ʋŋ wʋsa, ye ti yɛla da daami ya.
9 Li ka'anɛ ye ti daa pʋ mɔr suokanɛ na di'e sʋŋiri ya san'anɛ, amaa ti daa tʋmnɛ ala ye ya nyɛ ka tu'as.
10 Tinamɛ daa nam bɛ nɛ ya la, ti daa yɛli ya ye, “Onɛ pʋ tʋm, on da dii.”
11 Ti wʋm ye sieba bɛɛ ya sʋʋgin zin' ka mɔr gbanya'am ka kpɛn'ɛd nidib yɛla ni, ka pʋ tʋmma.
12 Linzug ka ti yɛt nimbama, ka san'anɛ ba nɛ Zugsɔb Yesu Kristo paŋ ye ba tʋmmi ba tʋʋma baanlimm, diisi ba mɛŋ.
13 Ti ba'abiisɛ, da gɛn ka basi linɛ an tʋʋm sʋmaa.
14 Sɔ' ya'a zan'as ka pʋ siak linɛ ka ti yɛli ya gbauŋ kaŋa ni laa, yanam kpansim o, ka luak o ka kɛ ka nyan dii o.
15 Da niŋin o wʋʋ o anɛ ya dataa, ka lɛɛ sa'al o wʋʋ ya ba'abiig nɛ.
16 Ti Zugsɔb onɛ an sumbʋgʋsʋm daan la na tisi ya sumbʋgʋsʋm saŋa wʋsa nɛ si'el wʋsa ni, ka na bɛ nɛ ya wʋsa.
17 Man Paul n sɔbid nɛ m mɛŋ nu'ugʋ pʋ'ʋsidi ya. Anwa ka m sɔbid ka zanbinnɛ m gbana wʋsa.
18 Ti Zugsɔb Yesu Kristo yɛlsʋm na bɛ nɛ ya wʋsa.
YIIGA TIMOTI
Gbauŋ nwa' yɛla
Timoti da anɛ karimbipaal, ka Paul da gaŋ o ye o gɔsid Efesus karindɔɔg la. O da sɔb gbauŋ kaŋa ye o kpɛmis Timoti ka sa'al o nɛ nimmua ye o da siak ka sɔ' pa'an ziri pa'alʋgɔ. O kpɛmis Timoti ye di nar ye o tʋm o tʋʋma sʋ'ʋŋa ka li sʋŋ karimbiis ka mɛ tiɛn ye o anɛ Yesu Kristo tʋmtʋm.
1 TIMOTI 1
Man Paul, onɛ an Yesu Kristo tʋmtʋm ka li anɛ Wina'am onɛ aan ti faangid nɛ Yesu Kristo onɛ aan ti ti'ir la tisim nɔɔr;
2 ka m sɔbid gbauŋ kaŋa tisid fʋn Timoti onɛ niŋ Yesu Kristo yadda ka liebim biig amɛŋa la. Ti Ba' Wina'am nɛ ti Zugsɔb Yesu Kristo na tisif yɛlsʋm nɛ nimbaanlzɔɔr nɛ sumbʋgʋsʋm.
Ziri pa'alʋg dim la sa'alʋg
3 Man daa wa'ae Masedonia teŋin la, m daa tisif nɔɔr ye fʋ kpɛm bɛ Efesus teŋin ka sa'al ninsieba ye ba da pa'an ziri pa'ala la.
4 Ka da dɔl teŋkʋdʋgin sɔlima nɛ yaanam yʋda kaalʋg linɛ ta'asid nɔŋgbannwa'ar ka pʋ sʋŋid ka Wina'am tʋʋma linɛ an yadda niŋir la ken tuonnɛ.
5 Dinɛ kɛ ka m yɛla anwa la anɛ ye nɔŋilim linɛ an nyain la yitnɛ pʋtɛn'ɛr sʋŋin nɛ pʋpielim nɛ yadda niŋir linɛ an amɛŋa ni na.
6 Ninsieba bas nɛ nɛ'ɛnam ka pian'ad pian'ayaalis.
7 Ba sʋnya lɔnɛ ye ba an banɛ pa'an Wina'am wada la, amaa ba zi' ba mɛŋi pian'ad si'el la gbinnɛ, bɛɛ pʋ mi' ban bʋmbanɛ ka pian'ad nɛ kpi'euŋ la gbinnɛ.
8 Ti mi' ye ti ya'a nɔk wada la tʋm lin nar si'em, li an sʋ'ʋŋa.
9 Ti mɛ mi' ye ba pʋ zi'el wada la nɛ pʋpielim dim yɛlaa, amaa banɛ pʋ dɔl wada suor la, nɛ banɛ pʋ siakid linɛ an yɛlsida nɛ banɛ pʋ dɔl Wina'am suorɛ nɛ tʋʋmbɛ'ɛd dim nɛ bugusim dim nɛ banɛ pʋ dɔl pʋ'ʋsim suorɛ nɛ banɛ kʋʋdi ba saamnam nɛ ba manam nɛ banɛ an ninkʋʋdib
10 nɛ pu'ab nɛ dap banɛ san'amid taaba nɛ dap banɛ dig nɛ ba dap taaba wʋʋ pu'ab nɛ, nɛ banɛ zuud nidibi gban'ad, nɛ dama'anam, nɛ ziri kasɛtib, nɛ banɛ niŋid linɛ mɛkama pʋ dɔl pa'alsʋŋɔ.
11 Pa'alʋg la dɔlnɛ labasʋŋ linɛ niedi pa'an Wina'am onɛ an albareka nɛ girima sɔb ka o niŋi m nu'usin ye m mɔɔl la.
Wina'am n zɔ Paul nimbaanlig la yɛla
12 M pʋ'ʋsidi ti Zugsɔb Yesu Kristo bareka on tisim paŋ la. M pʋ'ʋsid o nɛ on baŋim pʋʋg ka gaŋim ye m tʋm tʋʋm kaŋa nwa' la.
13 Hali baa saŋsi'en ka m da san'amid o yʋ'ʋr, ka namisid o, ka tʋ'ʋd o la, o la'am zɔɔm nimbaanlig, bɔzugɔ man da nam pʋ niŋ Yesu yadda la, m da pʋ baŋ man niŋid si'ela.
14 Ka Zugsɔb la tisim pʋpielim piini ka li galis, nɛ Yesu Kristo yadda niŋir nɛ nɔŋilim linɛ bɛɛ o san'an la.
15 Nwa' anɛ yɛlmɛŋir ka m yɛt, ka li nar ye sɔ' mɛkama di'e li sʋ'ʋŋa, “Yesu Kristo kɛn dunia ni na ye o faaɛn tʋʋmbɛ'ɛd dim,” ka man tʋʋmbɛ'ɛdi gat sɔ' wʋsa.
16 Mam onɛ an tʋʋmbɛ'ɛd dim kpɛɛm la, paam nimbaanlzɔɔr Yesu Kristo ni ka li pa'al nidib la o suguru linɛ ka' bɛn la an si'em, ka an zanbinnɛ tis banɛ na ti yuolim niŋ o yadda la ka ba di'e nyɔvʋr linɛ ka' naarɛ.
17 Na'akanɛ sʋ'oe zʋmaana wʋsa la, o pʋ kpiida, nidib mɛ pʋ nyɛt o nɛ ninii, o anɛ Wina'am kanɛ an yinne, zʋn'or nɛ na'asi anɛ o din, saŋa linɛ ka' naarɛ. Ami.
18 M biig Timoti, nɔzi'elkaŋa ka m tisidif, ka li dɔl linɛ ka Wina'am nɔdi'es da pian' fʋ yɛla la. Kɛl ka nɛ'ɛŋa kpɛmisif ka fʋ zab zabsʋŋ linɛ na kad yɛlbɛ'ɛd la.
19 Kpɛm mɔr yadda niŋir nɛ pʋpielim ya'am. Ninsieba pʋ siak pʋpielim ya'am linɛ bɛɛ ba san'an la, ka li san'amidi ba yadda niŋir.
20 Ba sieba anɛ Himeneus nɛ Alekzanda, banɛ ka m kɛɛsi ba niŋ Sʋntaana nu'usin ye ba zulig ya'am ka da san'am Wina'am yʋ'ʋrɛ.
1 TIMOTI 2
Pa'alʋgʋ zaŋi ken Wina'am pʋ'ʋsim yɛla
| 2 |
Linɛ an yiiga ka m kpɛmisidif anɛ ye winsɔsʋg wʋsa ni, sɔsimi
Wina'am linɛ aan ya bɔɔdim ka sɔsi tis nidib ka pʋ'ʋs o bareka nidib wʋsa yɛla.
2 M bɔɔd ye ya sɔs Wina'am tis na'anam nɛ kpi'emnam ka ti bɛ nɛ laafi ka daamʋg kae, ka ti dɔl Wina'am suor nɛ nimmua yɛla wʋsa ni.
3 Nɛ'ɛŋa an sʋm ka malisi ti faangid Wina'am sʋʋnr 4 onɛ bɔɔd ye nidib wʋsa nyɛ faangir ka lɛm baŋ yɛlsida suor la.
5 Wina'am yinne ma'aa bɛ. Ka nu'unwɛ'ɛd yinne ma'aa mɛ bɛ nidib nɛ Wina'am sʋʋgin, onɛ an Yesu Kristo la,
6 onɛ pɛsig o mɛŋi tis ye nidib wʋsa nyɛ yɔlisim la. Ka li saŋa paae la banɛ nyɛɛ li la, dii li kasɛt.
7 Nɛ'ɛŋa zug ka Wina'am da gaŋim ye o tʋmim ka m mɔɔnnɛ li, ka pa'al banɛ ka' Jew dim la ye ba niŋim Wina'am yadda ka baŋ linɛ an sida. M yɛtnɛ yɛlsida, ka pʋ ma'ada.
8 M bɔɔd ye zin'ig wʋsa, dap pʋ'ʋsid ka ʋki ba nu'us linɛ an nyain la, pʋ'ʋs Wina'am. Ka sʋnpɛɛn nɛ nɔŋgbannwa'ar kae.
9 Ka pu'ab mɛ yɛɛd fuud linɛ nar ka na su'a ba nyan sʋ'ʋŋa, ka ka'anɛ zuobid lɔɔb yɛla bɛɛ sanlima la'ad bɛɛ kugvɛnla linɛ buon pɛɛl ka li ligidi zu'oe la, nɛ fuud ban ka ba ligidi zu'oe laa.
10 Amaa ba lɛɛ tʋm tʋʋm sʋma linɛ nar nɛ pu'ab banɛ pʋ'ʋsid Wina'am.
11 Li sʋm ye pu'ab an baanlimm ka zamis ka siak banɛ sʋ'oe ba la nɔɔr.
12 M pʋ siak ye pu'ab pa'an dapa, bɛɛ mɔr kpi'euŋ ka sʋ'oe baa. Ba an baanlimm;
13 ka Wina'am da dɛŋi maalnɛ Adam ka nyaan maal Hawa.
14 Sʋntaana da pʋ ma' Adam, amaa o nyaŋi ma' Hawa, ka o san'am Wina'am nɔɔr.
15 Amaa pu'ab na paam faangir ka li yitnɛ ba biis du'am pʋʋgin, ba ya'a kpɛn zi'e ba yadda niŋirin nɛ nɔŋilim ka an nyain ka mɔr ya'am sʋ'ʋŋa.
1 TIMOTI 3
Banɛ sʋ'oe Wina'am nidib la yɛla
| 3 |
Nwa' anɛ yɛlmɛŋir ka m yɛti ya ye, sɔ' ya'a bɔɔd ye o an karindɔɔg kpɛɛm, o gaŋ tʋʋm sʋŋ.
2 Onɛ an Karindɔɔg kpɛɛm asɛɛ ka o an onɛ ka' gba'arɛ, ka an pu'ayiŋdaan ka gban'ad o mɛŋ, ka mɔr ya'am, ka an onɛ tʋm linɛ dɔl suor sʋ'ʋŋa, nɛ onɛ di'esid saam nɛ sumalisim, ka an onɛ na tun'e pa'al nidib sʋ'ʋŋa.
3 O sɔb da an danuud bɛɛ onɛ bɔɔd zabaa, amaa o bɛ baanlimm, ka an onɛ pʋ mɔr nɔŋgbannwa'arɛ, ka da nɔŋ ligidi galisɛ,
4 ka tun'e gɔsid o yidim wʋsa sʋ'ʋŋa, ka o biis siakid o nɔɔr ka mɔr na'asi o yɛla wʋsa ni.
5 Ka sɔ' ya'a pʋ nyaŋi gɔs o yidima, o na niŋ wala guri Wina'am nidiba?
6 Ka da an ninkanɛ niŋ yadda paalim nannɛ. Li ya'a ka' ala o na mɔr nyɛɛsim ka ba kad o saria ka li an bɛ'ɛd wʋʋ Sʋntaana nɛ.
7 Asɛɛ ka yiŋ dim baŋ ye o an ninsʋŋ, ya'a ka' ala o na di nyan ka lu Sʋntaana bɛndigin.
8 Tuongatib banɛ mɛ sʋŋid Karindɔɔg kpɛɛmnam nar ye ba an nimmua dim, ka da mɔr pian'ad ayi', yi, bɛɛ kɛ ka daam kuli baa, bɛɛ dɔl zam suoya ye ba nyɛ nyɔɔdɛ.
9 Li nar ka ba gban'e yɛlsu'adir linɛ ka Wina'am pa'ali ti ka ti siak la sʋ'ʋŋa, ka ba pʋtɛnda an nyain.
10 Asɛɛ ba kpansi ba yiiga, ka ba ya'a sid anɛ yɛlsida dim, ban on nyaan tʋm Karindɔɔg kpɛɛm tʋʋma.
11 Ka ba pu'ab la mɛ an banɛ tʋm nɛ nimmua, ka da yɛɛsida, ka gban'adi ba mɛŋ, ka an yɛlsida dim si'el wʋsa ni.
12 Asɛɛ ka tuongat an pu'ayiŋ daan ka na nyaŋi gɔsi ba biis nɛ ba yidim wʋsa sʋ'ʋŋa.
13 Tuongatib banɛ sid tʋm sʋ'ʋŋa la nyɛt na'asi, ka na nyaŋi pian' Yesu Kristo yadda niŋir yɛla nɛ sʋnkpi'euŋ.
Yɛlsu'adtita'ar la yɛla
14 La'an nɛ man mɔr pʋtɛn'ɛr ye li kʋ yuugɛ ka m na kɛɛn fʋ san'an na la, m sɔbid sa'al bama ye
15 daasi'erɛɛ, m ya'a yuug ka nyaan kena, di na kɛ ka fʋ baŋ fʋn na niŋ si'em ka Wina'am nidib la baŋ din nar ye ba bɛ bɛllim si'a, ka li pa'al ye ba sid anɛ Wina'am onɛ vʋe la la'asʋg nimbanɛ zi'e yɛlsida la zug kiŋ-kiŋ wʋʋ zan'antɔlig nɛ zaŋguoma sʋŋid dɔɔg si'em la.
16 Sɔ' kae na bi'es yɛlsu'adir linɛ an bʋntita'ari bɛɛ ti Wina'am dɔllim ni laa. O da nie na nɛ niŋgbiŋ. Ka Wina'am Siig bigis ye o an sʋm. Ka maliaknam nyɛɛ o. Ka ba mɔɔl o yɛla tɛɛns wʋsa ni. Ka dunia nidib siaki li. Ka Wina'am di'e o lɛb o na'am zin'igin.
1 TIMOTI 4
Ziri pa'annib la yɛla
| 4 |
Wina'am Siig Kasi la nie pa'al nyain ye, dunia naar saŋa la, ninsieba na basi ba yadda niŋir ka dɔl siis banɛ ma'ad nidib la, nɛ sibɛ'ɛdnam pa'alʋg.
2 Pa'al bama yitnɛ banɛ an biriku'an nɛ ziri dim banɛ ka ba pʋtɛnda digilim wʋʋ kʋnt tʋʋli nyɛligi li nɛ.
3 Nimbama pa'an ye pu'ab da kul sidib bɛɛ dap da di pu'aba, ka lɛn kisig nidib disieba linɛ ka Wina'am maal ye banɛ niŋ o yadda ka baŋ yɛlsida suor la na tun'e dii li nɛ bareka pʋ'ʋsim la.
4 Bʋn linɛ wʋsa ka Wina'am maal la anɛ sʋ'ʋŋa ka ba ya'a di'e li nɛ Wina'am bareka pʋ'ʋsim si'el-si'el pʋ kisa.
5 Bɔzugɔ Wina'am labaar la nɛ ti winsɔsʋg la kɛ ka li lieb kasi ka ti na nyaŋi dii li.
Paul kpɛmisid Timoti
6 Fʋ ya'a pa'ali fʋ ba'abitaaba la nɛ'ɛŋa fʋ na an Yesu Kristo tʋmtʋm sʋŋ, bɔzugɔ fʋ di'e Wina'am labaar la nɛ sida nɛ yadda niŋir nɛ pa'al sʋŋ linɛ ka fʋ dɔl la.
7 Zan'asimi pu'anya'as sɔlima linɛ pʋ dɔl Wina'am suor ka ka' gbinnɛ, ka mɛ zan'as linɛ an yalim tʋʋma, amaa kpɛ'ɛŋimi fʋ mɛŋi zamis Wina'am suor nɛ li tʋʋma.
8 Fʋ ya'a tʋm linɛ na tis niŋgbiŋ paŋ li nyɔɔd bɛ bi'ela, amaa Wina'am suor dɔllim lɛɛ mɔr nyɔɔd bɛdegʋ tisid bɛllim kanɛ bɛ nannanna la nɛ bɛllim linɛ na ti kena la ni.
9 Nɛ'ɛŋa anɛ yɛlmɛŋir ka li nar ye sɔ' mɛkama di'e li.
10 Nɛ' yɛla ka ti kpɛ'ɛŋid hali nɛ tʋʋm kpi'ema, ka mɔr ti'ir nɛ Wina'am onɛ vʋe ka an nidib wʋsa faangid la; li kas-kas anɛ banɛ niŋ o yadda la.
11 Pa'alim ka sa'ali ba nɛ'ɛnam.
12 Da kɛ ka sɔ' ziemif fʋn an dasaŋ la zugɔ, amaa niŋim linɛ an sʋm ka ba mɛ tu'asif, ka mɛ tu'asi fʋ pian'ad nɛ fʋ tʋʋma nɛ fʋ nɔŋilim nɛ fʋ yadda niŋir nɛ bɛllim linɛ an nyain.
13 Karim Wina'am gbauŋ la tis nidib la, ka pa'annɛ ba, ka lɛn san'anɛ ba hali nɛ mam na ti kena.
14 Da bas piini linɛ ka nɔdi'esidib da di'e Wina'am san'anɛ tisif saŋkanɛ ka kpɛɛmnam da nɔki ba nu'usi pa'ali fʋ zug la.
15 Tʋm tʋʋm bama ka nɔki fʋ mɛŋi pɛsig tʋʋma la, ka ba nyɛ fʋn kpɛ'ɛŋidi fʋ mɛŋ si'em.
16 Gu'usimi fʋ mɛŋ sʋ'ʋŋa ka mɛ gu'us fʋn pa'an si'el la sʋ'ʋŋa. Mɔdigim tʋm ala, ka linɛ na kɛ ka fʋn nɛ banɛ kɛlisidi fʋ pian'ad la paam faangir.
1 TIMOTI 5
Yadda niŋidib tʋʋma an si'em la yɛla
| 5 |
Bʋnkʋdʋg ya'a tʋm linɛ pʋ nara, fʋn da tans oo, amaa sa'alim o baanlimm wʋʋ fʋ mɛŋ saam nɛ, ka niŋid dasam wʋʋ fʋ ba'abiis nɛ.
2 Niŋim pu'anya'as wʋʋ fʋ manam nɛ ka niŋ pu'a banɛ pʋ kʋdig la wʋʋ fʋ tanp nɛ. Niŋim ala nɛ pʋpielim.
3 Na'asim pʋkɔnya banɛ sid an pʋkɔnya la ka sʋŋi ba.
4 Ka pʋkɔɔnr ya'a mɔr biis bɛɛ yaas, ban on niŋim wʋʋ banɛ pʋ'ʋsid Wina'am niŋid si'em, ka sʋŋi ba mɛŋ yidim. Ala ka ba na yɔɔ ba ugusʋg la sam ka linɛ ma'ad Wina'am sʋʋnr.
5 Ka pʋkɔnkanɛ bɛɛ o kɔn' ka bɔɔd sʋŋir zaŋid o ti'iri niŋid Wina'am ni ka sɔsid Wina'am nintaŋ nɛ yʋ'ʋŋ wʋsa bɔɔd sʋŋir.
6 Ka pʋkɔnkanɛ gɔɔndi tʋm o mɛŋ bɔɔdim yɔri-yɔri la pʋn dɛŋi kpinɛ, hali la'an nɛ on vʋe la.
7 Sa'alimi ba nɛ'ɛŋa ka ba da mɔr gbadaa.
8 Ka sɔ' ya'a
pʋ gɔsid o du'adiba, on sɔb zan'as linɛ ka ti siak la nɛ; li kas-kas anɛ o mɛŋ yidim. Hali on sɔb anɛ tʋʋmbɛ'ɛd sɔbi gat banɛ ka' yadda niŋidib la.
9 Pʋkɔɔnr ya'a pʋ gaad yʋma pisyuobʋ, ka mɛ pʋ an onɛ da kul sid yinne ma'aanɛ, ban da paas o pʋkɔnya la kallinɛ.
10 Asɛɛ ka nidib pian' o tʋʋm sʋma yɛla sʋ'ʋŋa, ka o an onɛ ugusid o biis, ka an onɛ di'esid saam, ka piesid Wina'am nidib nɔba, ka an onɛ sʋŋid banɛ namisid, ka an onɛ pɛsig o mɛŋi tis tʋʋm sʋma wʋsa.
11 Da paasid pʋkɔnya banɛ nam pʋ kʋdig la kallinɛ, ka dapbɔɔdim tun'e kɛ ka ba bas ban zaŋi ba mɛŋi pɛsig Kristo tʋʋma la ka kul sidib,
12 ka san'ami ba yiiga nɔzi'elʋg la ka kpɛn'ɛsi ba mɛŋ sariakadibin.
13 Ka linɛ paas la, ba anɛ gbanya'anam ka giligid yaan. Li ka'anɛ lin ma'aanɛɛ, amaa ba yɛɛsid ka nwɛ'ɛdi ba mɛŋi gɛntid nidib yɛla ni, ka pian'ad linɛ pʋ nara.
14 Dinzugɔ m bɔɔd ye pʋkɔnya banɛ pʋ kʋdig kul sidib, ka du'a biis, ka gɔsidi ba yidim. Ala ka dataas kʋ nyaŋi nyɛɛ ti gbadaa,
15 Bɔzugɔ, pʋkɔnsieba pʋn tiaki dɔl Sʋntaana.
16 Pu'a sɔ' ya'a an yadda niŋid ka mɔr pʋkɔnya o du'adibin on gɔsimi ba, ka da nɔk yɛlbama niŋ Wina'am nidib nu'usinɛɛ; ala ka karindɔɔg la na tun'e sʋŋ pʋkɔnbanɛ sid bɔɔd sʋŋir la.
17 Na'asimi karindɔɔg kpɛɛmnam banɛ tʋmmi ba tʋʋma sʋ'ʋŋa la, li kas-kas anɛ banɛ mɔɔn Wina'am labaar nɛ banɛ pa'an la.
18 Wina'am gbauŋ sɔb ye, “Mid ka ya li'a na'araad banɛ kuod la nɛ yʋgʋd.” Ka lɛn sɔb ye, “Li nar ka onɛ tʋm di'e o yɔɔd.”
19 Sɔ' ya'a yɛl ye kpɛɛm sɔ' tʋm tʋʋmbɛ'ɛd, yanam da kɛlisɛ, asɛɛ ka kasɛtib paae ayi' bɛɛ atan'.
20 Zɛrigim banɛ zan'as tʋʋmbɛ'ɛd basib la yadda niŋidib wʋsa tuon, ka banɛ kpɛlim la na zɔ dabiem.
21 M tisif nɔkaŋa Wina'am tuon nɛ Yesu Kristo tuon nɛ maliaknam tuon ye fʋ tʋm tʋʋm bama nɛ sida, ka da mɔr baregaŋa.
22 Da gbirigi pa'annɛ fʋ nu'us nidib zutin ye fʋ sɔs Wina'am tisi baa, da la'as nɛ sieba tʋm tʋʋmbɛ'ɛdɛ. Kɛl ka fʋ bɛllim an nyain.
23 Da nuud ku'om gʋllimnɛɛ, amaa num daam bi'ela, fʋ pʋʋgʋ ɛɛnti zabid la zug; ka fʋ nɔŋ ban'as hali.
24 Ninsieba tʋʋmbɛ'ɛd nie paalʋ ka li paae ban na kadi ba saria. Ka sieba tʋʋmbɛ'ɛd mɛ niedi dɔlli ba nya'aŋ mɛn.
25 Ala mɛn ka tʋʋm sʋma mɛ nied paalʋ. Hali banɛ su'a ka nam pʋ nie la na ti nie.
1 TIMOTI 6
Kɛl ka banɛ an yammis la baŋ ye li nar ka ba na'asi ba zugdaannam la sʋ'ʋŋa, ka sɔ' da san'am Wina'am yʋ'ʋr nɛ ti pa'alʋg la.
2 Ka yammis banɛ ka ba zugdaannam an yadda niŋidib la da zan'as ye ba kʋ na'asi ba, ban an ba'abiis la zugɔ, amaa ba tʋmmi ba tʋʋma sʋ'ʋŋa bɔzugɔ banɛ tʋʋma ka ba tʋm la anɛ yadda niŋidib nɛ banɛ ka ba nɔŋ. Pa'alim ka kpɛmisi ba ka ba tʋm nɛ'ɛnam.
Sida kpan'am la yɛla
3 Sɔ' ya'a pa'an ziri pa'ala, ka pʋ siaki di'e ti Zugsɔb Yesu Kristo pian'ad linɛ an yɛlsida ka dɔl Wina'am suor laa,
4 o sɔb anɛ tita'al, ka zi' si'el si'ela. O mɔri pʋtɛn'ɛbɛ'ɛd ka nɔŋ nɔŋgbannwa'ar nɛ antu'a yaalis linɛ ta'asid zaba nɛ fufum nɛ yʋ'ʋsan'auŋ nɛ tɛn'ɛsbɛ'ɛd nɛ
5 a-pʋ-siakid taaba pian'ad linɛ fɛndigid nidib ya'am ka pʋ mɔr yɛlsida, ka tɛn'ɛsid ye Wina'am suor dɔllim anɛ linɛ na kɛ ka ba paam ligidi.
6 Fʋ ya'a dɔl Wina'am nɛ sida ka fʋ nif tig fʋn mɔr si'el, li anɛ nyɔɔd dinɛ galis.
7 Ti pʋ mɔr si'eli kɛn dunia ni naa, ka mɛ kʋ nyaŋi zaŋ si'el dunia nwa' ni keŋɛ.
8 Ti ya'a mɔr diib nɛ fuud, li siaki ti.
9 Banɛ bɔɔd ye ba an kpan'am dim la na kpɛn' makirin, ka lu Sʋntaana bɛndigin, ba bɔɔdim la anɛ bɛ'ɛd, ka na mɔri ba kpɛn'ɛs san'auŋ nɛ kum pʋʋgin.
10 Bɔzugɔ ligidi nɔŋilim anɛ tʋʋmbɛ'ɛd buudi wʋsa nya'ar. Ninsieba nini mu'oe nɛ ligidi yɛla hali ka li kɛ ka ba yi yadda niŋirin, ka namisidi ba mɛŋ nɛ sʋnsa'aŋ bɛdegʋ.
Paul kpɛmis Timoti
11 Amaa fʋn, onɛ an Wina'am nid la, zan'asim nɛ'ɛnam wʋsa, ka dɔl Wina'am pʋpielim suor la sʋ'ʋŋa nɛ yadda niŋir nɛ nɔŋilim nɛ mɔdigir nɛ suguru.
12 Zam zabsʋŋ linɛ an yadda niŋir yɛla la. Kpɛ'ɛŋimi fʋ mɛŋi gban'e nyɔvʋr linɛ ka' naar ka Wina'am daa buolif ka fʋ pɛligi fʋ pʋʋgʋ pian' pian'asʋŋ nidib bɛdegʋ tuon la kiŋ-kiŋ.
13 M tisif nɔkaŋa Wina'am onɛ tisid si'el wʋsa nyɔvʋr la tuon, nɛ Yesu Kristo onɛ da di kasɛt ka pian' nie nyain Pontus Pailet tuon la,
14 ye fʋ di'e sa'alʋg la, ka guri li sʋ'ʋŋa nɛ pʋpielim ka gba'ar kae, ti paae Yesu Kristo onɛ aan ti Zugsɔb la lɛbig saŋa na.
15 O lɛbig la na anɛ Wina'am zi'el saŋa si'a la. On ma'aa an na'ab, o mɔr albareka ka an na'anam na'ab, nɛ Zugsɔbnam Zugsɔb.
16 On ma'aa pʋ kpiida ka bɛ nɛɛsim linɛ nie nyain galis ka sɔ' kʋ nyaŋi li'el ani, ka sɔ' kae nyɛɛ o bɛɛ na nyaŋi nyɛɛ o. Na'asi nɛ paŋ anɛ o din saŋa linɛ ka' naarɛ. Ami.
17 Sa'alim banɛ mɔr kpan'am dunia kaŋa nwa' la ye ba da mɔr nyɛɛsim, bɛɛ mɔr ti'ir nɛ ba kpan'am linɛ pʋ ya'asid naar la, ka ba zi' lin na an si'em, amaa mɔr ti'ir nɛ Wina'am onɛ tisi ti si'el wʋsa linɛ na malisi ti sʋnya la.
18 Sa'alimi ba ka ba tʋm tʋʋm sʋma, ka kɛ ka ba tʋʋm sʋma an bɛdegʋ ka tisid piini ka an banɛ pʋdigid bam mɔr si'el nɛ ba taaba.
19 Nɛ' an suor kanɛ ka ba na su'a ba mɛŋ kpan'am linɛ an ɛɛnb kpi'euŋʋ gur bɛog sa. Ala ka ba na paam nyɔvʋr linɛ sid an sida la.
20 Timoti, gur linɛ ka ba gu'ulif la. Luakim pian'ayɔɔd linɛ pʋ dɔl Wina'am suorɛ nɛ ziri nɔŋgbannwa'ar linɛ ka sieba gɔs ka li an baŋir la.
21 Sieba gɔs ka ba mɔri li, dinzug ka ba yidig ka yii ba yadda niŋir la pʋʋgin. Wina'am na tisi ya wʋsa yɛlsʋm.
AYI' TIMOTI
Gbauŋ nwa' yɛla
Paul da sɔb gbauŋ kaŋa nɛ tisid Timoti ye o sa'al o din nar ye o an tuongat si'em Efesus karindɔɔgin la, la'an nɛ on da nan an dasaŋ la. O Kpɛmis Timoti ye o zi'enim kiŋ-kiŋ nɛ Yesu sida pa'alʋg la yɛla ka da gɛɛn basɛ. Paul da kpɛmis Timoti ye o da kɛ ka nɔŋgbannwa'ar linɛ an zɔlimis kɛ ka o yidig ka pʋ sʋŋ nidib ka ba dɔl Wina'am sʋ'ʋŋa; amaa o tɛn'ɛsim on mɛŋ Paul onɛ dɔl Wina'am ka pʋ gɛɛn bas la yɛla.
2 TIMOTI 1
Man Paul onɛ ka li an Wina'am bɔɔdim ka o kɛ ka m an Yesu Kristo Tʋmtʋm la sɔb linɛ dɔl o kaanbʋg linɛ an nyɔvʋr ka bɛ Yesu Kristo ni la.
2 M sɔbid gbauŋ kaŋa tisid Timoti onɛ aan m binɔŋir la. Ti Ba' Wina'am nɛ ti Zugsɔb Yesu Kristo na tisif yɛlsʋm nɛ nimbaanlzɔɔr nɛ sumalisim.
Pʋ'ʋsʋg nɛ kpɛmisʋg la yɛla
3 M pʋ'ʋsid Wina'am onɛ ka m dɔl nɛ pʋpielim nwɛnɛ m yaanamɛ da dɔl si'em la bareka. Saŋa wʋsa m tɛn'ɛsidi ya yɛla m winsɔsʋgin.
4 M kpɛn tɛnri fʋ sʋnsa'aŋ la yɛla ka bɔɔd hali ye m nyɛɛf ka m sʋnf ma'ae.
5 M mɛ tiɛn fʋ yadda niŋir amɛŋa linɛ da dɛŋi bɛɛ fʋ yaapu'a Lois ni ka mɛ bɛɛ fʋ ma Yunis ni la. M mi' ye li mɛ bɛɛ fʋ ni.
6 Nɛ'ɛŋa zug ka m tiɛndif ye fʋ kɛ ka Wina'am piini linɛ ka m daa pa'alim nu'usi fʋ zugin ka fʋ di'e li ka li bɛɛ fʋ ni la maligim nie.
7 Bɔzugɔ Wina'am pʋ tisi ti dabiem Siiga, amaa Siig kanɛ mɔr paŋ nɛ nɔŋilim nɛ mɛŋ gban'ar.
8 Dinzugɔ da zɔt nyan nɛ fʋn na yɛl linɛ ka fʋ mi' ti Zugsɔb yɛla la, ka mɛ da zɔt nyan nɛ mam onɛ an sanrega nid o yɛla laa, amaa mɛ siakim namisʋg linɛ aan fʋ din labasʋŋ la yɛla nɛ Wina'am paŋ.
9 Onɛ faaɛn ti ka buoli ti ye ti bɛ bɛllim linɛ an sʋm, ka li ka'anɛ ti tʋmnɛ si'el zugɔ, amaa li anɛ o mɛŋ bɔɔdim nɛ o pʋpielim piini zug ka o tisi ti Yesu Kristo ni yʋma banɛ gaad ka dunia nam pʋ pin'il la.
10 Amaa Yesu Kristo ken la ni na ka o pʋpielim piini la yʋ'ʋn nie nyain ka o faaɛn ti ka san'am kum paŋ, ka kɛ ka ti nyɛ nyɔvʋr linɛ ka' naarɛ ka li yinɛ Wina'am labasʋŋin la na.
11 Labasʋŋ la yɛla ka o gaŋim ye m an Kristo Tʋmtʋm nɛ onɛ pa'an ka lɛm mɔɔnnɛ li yɛla la.
12 Li anɛ lina zugʋ kɛ ka m namisid amaa m pʋ zɔti li nyannɛ. M mi' onɛ ka m niŋ o yadda la, ka mɛ mi' ye o na nyaŋi gur linɛ ka m gu'ul o la sʋ'ʋŋa ti paae Wina'am sariakadib daar.
13 Dɔl pa'alsʋŋ linɛ ka m pa'alif la nɛ nɔŋilim nɛ yadda niŋir linɛ bɛ Yesu Kristo ni la.
14 Gur yɛlsida linɛ ka ba gu'ulif la nɛ Wina'am Siig Kasi onɛ bɛɛ ti ni la sʋŋir.
15 Fʋ pʋn mi' ye banɛ bɛ Asia la wʋsa basim nɛ, la'an nɛ Pigelus nɛ Hermogenes.
16 Ti Zugsɔb na zɔ Onesiferus yidim nimbaanlig bɔzugɔ o kaadim ka bʋgʋnnɛ m sʋnf, ka pʋ zɔt nyan nɛ ban lɔɔm nɛ bana laa.
17 On paae Room na la, o ie mam nɛ nimmua ti nyɛɛm.
18 Zugsɔb la na zɔɔ o nimbaanlig sariakadib daar. Fʋ pʋn mi' sʋŋir kanɛ ka o sʋŋim Efesus teŋin la.
2 TIMOTI 2
M biiga, kpɛ'ɛŋimi fʋ mɛŋ nɛ pʋpielim piini linɛ bɛ Yesu Kristo ni la.
2 Ka fʋn wʋm si'el mam san'an nidib bɛdegʋ tuon la, tɔlisimi li tis yɛlsida dim banɛ na tun'e pa'al sieba mɛn.
3 Di'em namisʋg linɛ aan fʋ din, fʋn an Yesu Kristo soogia sʋŋ la zug.
4 Onɛ tʋm soogia tʋʋma ba'a kae nɛ banɛ ka' soogianam yɛla nii, amaa on bɔɔd si'el anɛ o ma'ae o kpɛɛm la sʋnf.
5 Ka sɔ' ya'a bɔɔd ye o di ya'an di'ema zin'igin, o kʋ nyaŋi di'e piini asɛɛ ka o dɔlis di'ema la wada suor.
6 Li nar ka kpaad onɛ tʋm tʋʋma hali la dɛŋi dii o zʋʋd la nyɔɔd.
7 Tɛn'ɛsim man yɛt si'el la, ka Zugsɔb na kɛ ka fʋ baŋ si'el wʋsa gbin.
8 Tɛn'ɛsim Yesu Kristo yɛla, onɛ da vʋ'ʋg kumin la, o anɛ na'ab David yaaŋ. Nɛ'ɛŋa an labasʋŋ kanɛ ka m mɔɔn la.
9 Labasʋŋ kaŋa zug ka m namisid ka ba lɔɔm nɛ bana wʋʋ tʋʋmbɛ'ɛd sɔb nɛ. Amaa Wina'am pian'ad la pʋ lɔ nɛ banaa.
10 Nɛ'ɛŋa zug ka m mɔdigid si'el wʋsa ni ye banɛ ka Wina'am gaŋ la mɛ nyɛ faangir linɛ bɛ Yesu Kristo ni la, nɛ na'asi linɛ ka' naarɛ.
11 Nɛ'ɛŋa anɛ yɛlmɛŋir ye, “Ti ya'a la'am kpi nɛ o, ti mɛ na vʋe nɛ o.
12 Ka ti ya'a mɔdig nɛ o, ti mɛ na di na'am nɛ o. Ti ya'a zan'as o, o mɛ na zan'asi ti.
13 Ti ya'a ka' yɛlsida dima, o na kpɛn an yɛlsida sɔb, bɔzugɔ o kʋ zan'as o mɛŋa.”
Tʋmtʋm kanɛ ka Wina'am tis sida
14 Tiɛnmi fʋ nidib la nɛ'ɛŋa, ka sa'ali ba Wina'am tuon, ka ba da mɔr nɔŋgbannwa'ar linɛ pʋ mɔr nyɔɔdɛ. Li san'amidnɛ banɛ wʋmi li la.
15 Kpɛ'ɛŋim ka nɔki fʋ mɛŋi tis Wina'am ka fʋ tʋʋma paae Wina'am ya'am, ka mɛ an onɛ pʋ zɔt nyan nɛ o tʋʋmaa, ka pa'an pian'ad linɛ an yɛlsida la.
16 Zan'asim pian'ayɔɔd linɛ pʋ dɔl Wina'am suorɛ bɔzugɔ, banɛ niŋid ala la na maligim bie ka ba bas Wina'am suor la dɔllim.
17 Ba pa'alʋg la nwɛnɛ fɛn'ɛkʋdʋgʋ ɔnbid niŋgbiŋi yaligid si'em la. Pa'aniba ayi' bɛɛ ba sʋʋgin, ka banɛ an Himeneus nɛ Piletus,
18 banɛ bas yɛlsida suor ka yɛt ye kum vʋ'ʋgir la gaad ya sa, ka mɛ san'amid ninsieba yadda niŋir.
19 Amaa Wina'am ɛɛnbkpi'euŋ la zi'enɛ kiŋ-kiŋ, ka o zanbin la sɔb anina ye, “Zugsɔb la mi' banɛ aan o nidib.” Ka lɛn sɔb ye, “Banɛ wʋsa sid ye ba anɛ Wina'am nidib la, basimi ba tʋʋmbɛ'ɛd.”
20 Yitita'ar pʋ mɔr sanlima bɛɛ anzurifa la'ad ma'aanɛ, amaa daad nɛ ya'ad la'ad mɛ bɛ, ka ba yisid sieba dabis-sʋma daar, ka sieba mɛ an daar wʋsa tʋʋma la'ad.
21 Ka sɔ' ya'a pie o mɛŋ nyain ka yis o mɛŋ tʋʋmbɛ'ɛdin, o na lieb tʋʋm sʋma lauk linɛ an kasi, ka li nar ye yidaan nɔki li tʋm tʋʋm sʋma.
22 Zan'asim dasam bɔɔdim linɛ an bɛ'ɛd ka kpɛ'ɛŋ nɛ nimmua ye fʋ an yɛlsida sɔb ka mɔr yadda niŋir nɛ nɔŋilim nɛ sumbʋgʋsʋm, la'an nɛ banɛ pʋ'ʋsidi ti Zugsɔb nɛ pʋpielim la.
23 Zan'asim yalim bu'os yaalis ka fʋ mi' ye li mɔri zaba kenna.
24 Mid ka Zugsɔb tʋmtʋm an onɛ nɔŋ zaba. Amaa o na'asim nidib wʋsa ka an pa'an sʋŋ ka mɛ mɔr suguru,
25 ka nɔk ya'am san'anɛ o dataas ka daasi'erɛɛ Wina'am na kɛ ka ba tiak ka baŋ yɛlsida la,
26 ka luak Sʋntaana bɛndig linɛ ka o dɛŋi bɛnd ye ba tʋm o bɔɔdim la.
2 TIMOTI 3
Naar saŋa la yɛla
| 3 |
Baŋim nɛ'ɛŋa. Li na tɔi hali tis Wina'am nidib dunia naar saŋa,
2 nidib na an banɛ nɔŋi ba mɛŋ nɛ banɛ nɔŋ ligidi hali nɛ banɛ nwɛ'ɛdi ba nyɔ'ɔg nɛ banɛ mɔr nyɛɛsim nɛ banɛ tʋ'ʋd nidib nɛ banɛ pʋ siakidi ba
saamnam nɛ manam nɔya nɛ banɛ pʋ mɔr bareka pʋ'ʋsim nɛ banɛ pʋ dɔl Wina'am suorɛ
3 nɛ banɛ pʋ nɔŋ ban kpin sieba nɛ banɛ pʋ mɔr sɔ' nyɔɔgɔ nɛ banɛ san'ami ba taaba yʋda nɛ banɛ pʋ gban'adi ba mɛŋa nɛ banɛ ka ba taaba zɔti ba dabiem nɛ banɛ kis linɛ an sʋm
4 nɛ filim-filim dim nɛ haya dim nɛ tita'alnam nɛ banɛ bɔɔd linɛ na ma'adi ba mɛŋ sʋnya gat Wina'am.
5 Ba niŋidnɛ wʋʋ ba dɔlnɛ Wina'am suor, amaa ka pʋ pa'annɛ li paŋa. Luakim nimban buudi.
6 Ka ba sieba su'adi kpɛn'ɛd yaanɛ ma'ad pu'a banɛ ka' ya'am, ka tʋʋmbɛ'ɛd pɛ'ɛli ba, ka ba ya'amlɛog nyaŋidi ba,
7 ka ba kɛlisid sɔ' mɛkama ka kʋ nyaŋi baŋ linɛ an sidaa.
8 Nwɛnɛ Jannes nɛ Jambres n da zan'as Moses si'em la, ala mɛn ka nimbama mɛ zan'asid sida la. Ba anɛ banɛ pʋ mɔr pʋtɛn'ɛsʋŋɔ, ka pʋ niŋ Yesu Kristo yadda nɛ sida.
9 Amaa ba tʋʋma kʋ keŋ tuonnɛ, bɔzugɔ nidib wʋsa na nyɛ ka ba anɛ zɔn wʋʋ Jannes nɛ Jambres n daa an si'em la.
Paul kpɛmis Timoti
10 Fʋ mi' m pa'alʋg la wʋsa nɛ m tʋʋma nɛ m bɛllim an si'em nɛ m pʋtɛn'ɛri gban'e si'el nɛ m yadda niŋir, nɛ m suguru nɛ m nɔŋilim nɛ m mɔdigir,
11 nɛ m namisʋg nɛ m fara, Yesu dɔllim la yɛla. Fʋ mi' ban daa namisim Antiok nɛ Ikonium nɛ Listra tɛɛnsin Yesu yɛla ka m mɔdig si'em. Ka Zugsɔb la faanm nɛ'ɛŋa wʋsa ni.
12 Asida ka m yɛt ye banɛ wʋsa bɔɔd ye ba dɔl Wina'am ka an yinne nɛ Yesu Kristo la, ba na namisi ba.
13 Nimbɛ'ɛdnam nɛ zam dim tʋʋmbɛ'ɛd la na kpɛm paasid bɛdegʋ, hali ba na ma'ad nidib ka ma'adi ba mɛŋ.
14 Amaa ya'a an fʋn, kpɛn tɛnr linɛ ka fʋ zamis ka siak la sʋ'ʋŋa;
15 bɔzugɔ fʋ mi' fʋn zamisi li sieba san'an. Fʋ biilimin sa fʋ baŋ Wina'am gbauŋ sʋ'ʋŋa linɛ na nyaŋi tisif ya'am ka fʋ niŋ Yesu Kristo yadda ka nyɛ faangir.
16 Pian'ad linɛ wʋsa bɛ Wina'am gbauŋʋn la yinɛ o san'an na ka an sʋm nɛ pa'alʋg nɛ sa'alʋg ka bigisid bɛ'ɛd nɛ sʋ'ʋm nɛ zamisʋg linɛ yit pʋpielimin na,
17 ka na sʋŋ Wina'am tʋmtʋm ka o tʋm linɛ wʋsa an sʋm.
2 TIMOTI 4
M zi'enɛ Wina'am nɛ Yesu Kristo onɛ na ti lɛb na nɛ o na'am sʋ'ʋlim kad banɛ vʋe nɛ banɛ kpi saria la tuonnɛ tisidif nɔkaŋa ye:
2 Fʋ mɔɔlim Wina'am pian'ad la saŋa kanɛ an sʋm nɛ saŋa kanɛ ka' sʋ'ʋm. Sa'alimi ba ka zɛrigi ba ka kpɛmisi ba ka pa'ali ba nɛ suguru saŋa wʋsa.
3 Bɔzugɔ, saŋa kenna ka nidib kʋ mɔdigi kɛlis linɛ an sida pa'alʋgɔ, amaa ka na dɔlli ba mɛŋ ya'amlɛog bɔɔdim. Saŋkan la, ba na la'as pa'annib bɛdegʋ banɛ na pa'annɛ ba linɛ malisi ba tʋba ma'aa.
4 Ba na fɛndig ka kʋ kɛlis sida laa ka lɛɛ kɛlisid linɛ an sɔlima.
5 Amaa fʋn kʋdim gban'ami fʋ mɛŋ ka mɔdigi di fara, ka an onɛ mɔɔn Wina'am labasʋŋ la, ka tʋmmi fʋ tʋʋma la wʋsa.
6 Saŋa paaeya ye m vʋm naae. M kum la na nwɛnɛ maan ka ba maali tis Wina'am.
7 M zab zabsʋŋ la nyaŋ, ka zɔɔ paae zɔɔg la bɛn, ka nan kpɛn zi'e sida la ni.
8 Ka nannanna, pʋpielim na'am zupibig linɛ ka Zugsɔb onɛ kad saria nɛ pʋpielim la digi gurim; o na ti yɔɔm dabiskan la daar, ka li ka'anɛ mam ma'aanɛ amaa la'an nɛ banɛ wʋsa mɔr o lɛbig na ti'ir la.
Paul tɔlim n tis Timoti mɛŋ
9 Kpɛ'ɛŋi fʋ mɛŋi kɛɛn m san'an nannanna na.
10 Bɔzugɔ Kresens keŋ Galatia, ka Titus keŋ Dalmatia, ka Demas nɔŋ dunia kaŋa ka basim ka keŋ Tɛsalonika.
11 Ka Luk gʋllim kpɛlim bɛɛ m san'an. Dɔl Mak na ka o mɔr sʋŋiri m tʋʋma la zin'igin.
12 M tʋm Tikikus Efesus teŋin.
13 Fʋ ya'a kenna, fʋn on mɔrim waad fukanɛ ka m daa bas Kaapus san'an Troas teŋin la, nɛ m gbana la, ka li kas-kas anɛ gbauŋ banɛ ka ba nɔk gbauŋʋ maali sɔb la.
14 Alekzanda onɛ kʋnt si'elnam la niŋi m bɛ'ɛd hali, ka Wina'am na yɔɔ o li sam wʋʋ on niŋ si'em la.
15 Fʋn mɛ gu'usimi fʋ mɛŋ nɛ o, bɔzugɔ o daa ki'isi ti pian'ad la hali nɛ kpi'euŋ.
16 Man daa dɛŋi tu'ad kɔɔtʋ ni ye m yisi m mɛŋ la, sɔ' daa pʋ zi'enim nya'aŋi sʋŋi ma; ba wʋsa daa basim nɛ. M sɔsid Wina'am ye o basi ba taali tisi ba.
17 Amaa Zugsɔb la daa zi'em nya'aŋ ka tisim paŋ ye m mɔɔl pian'ad la sʋ'ʋŋa ka banɛ ka' Jew dim la bɛdegʋ wʋm. O daa faanmi yi gbigim nɔɔrin.
18 Zugsɔb la na faanm linɛ wʋsa an bɛ'ɛd zin'igin ka mɔrimi kpɛn'ɛs o na'amin la. O na nyɛ na'asi dinɛ ka' bɛnnɛ. Ami.
Pʋ'ʋsʋg
19 Pʋ'ʋsim Prisila nɛ Akuila, nɛ Onesiferus yidim.
20 Erastus kpɛlim Korint teŋin, ka Trofimus bɛn'ɛd ka m kɛ ka o kpɛlim Miletus teŋin.
21 Kpɛ'ɛŋimi fʋ mɛŋi kena, ka sapal nyaan paae. Yubulus nɛ Pudens nɛ Linus nɛ Klaudia nɛ ti ba'abiis wʋsa pʋ'ʋsidif.
22 Ti Zugsɔb na bɛ nɛ fʋ siig. Wina'am yɛlsʋm na bɛ nɛf.
TITUS
Gbauŋ nwa' yɛla
Titus da anɛ onɛ niŋ Yesu yadda, amaa o da ka' Jew dim buudi. Paul da gaŋ o ye o gɔsid Krete karindɔɔg la. O da sɔb gbauŋ kaŋa tiɛnd Titus ye karindɔɔg kpɛɛmnam nar ye ba bɛ bɛllim sʋŋ. O da sa'al Titus on na pa'an nidib banɛ an bʋnkʋd bɛɛ biis bɛɛ dap bɛɛ pu'ab sʋ'ʋŋa si'em.
TITUS 1
Mam Paul onɛ an Wina'am yammʋg nɛ Yesu Kristo Tʋmtʋm la sɔbid gbauŋ kaŋa ye m kɛ ka banɛ ka Wina'am gaŋ la yadda niŋir keŋ tuon ka nɔbig, ka ba baŋ Wina'am yɛlsida, linɛ kɛt ka ba dɔl Wina'am suor la.
2 Ti mɔr ti'ir ye ti na nyɛ nyɔvʋr linɛ ka' naarɛ, ka Wina'am onɛ ka' ziri sɔb la, da zi'el nɔɔri tisi ti saŋkanɛ ka dunia da nam pʋ maal la.
3 Li saŋa paae la, Wina'am onɛ aan ti faangid la nie nyɔvʋr linɛ ka' naar la yɛla o pian'ad pʋʋgin tisim ye m mɔɔl.
4 M sɔbid gbauŋ kaŋa tisid Titus onɛ ka tinam nɛ on la'an niŋ Yesu Kristo yadda ka o liebi m biig amɛŋa la. Ti Ba' Wina'am nɛ ti faangid Yesu Kristo na tisif yɛlsʋm nɛ sumbʋgʋsʋm.
Titus tʋʋma Krete teŋin la yɛla
5 Linɛ yɛla ka m kɛ ka fʋ kpɛlim Krete teŋin la anɛ ye, fʋ naae linɛ pʋ naae la, ka gaŋ kpɛɛmnam yadda niŋidibin la teŋ-teŋ wʋʋ man daa yɛlif si'em la.
6 Kpɛɛm pʋ sʋm ye o mɔr gba'arɛ, li sʋm ka o an pu'ayiŋ daan, ka o biis niŋ Yesu Kristo yadda, ka ka' ninyɔɔd bɛɛ nimbɛ'ɛdnama.
7 Kpɛɛm onɛ sʋ'oe Wina'am nidib nar ka o ka' gba'arɛ, ka da mɔr nyɛɛsim bɛɛ sʋnpɛɛn bɛɛ an danuud bɛɛ zaba sɔb bɛɛ nɔŋ ligidi hali tʋʋgi li bɛnnɛ.
8 Asɛɛ ka o an onɛ di'esid saam nɛ sumalisim, ka an onɛ tʋm linɛ an sʋm, ka mɔr pʋtɛn'ɛsʋŋ, ka dɔl Wina'am suor sʋ'ʋŋa ka o bɛllim an kasi ka gban'ad o mɛŋ sʋ'ʋŋa.
9 Asɛɛ ka o siaki dɔl yɛlmɛŋir pa'alʋg linɛ ka ba zamis o la, ka na nyaŋi zaŋ yɛlsida pa'alʋg la kpɛmis sieba, ka na nyaŋi pa'al banɛ ki'isid la ban gbɛlig zin'isi'a.
10 Nidib bɛdegʋ bɛɛ an banɛ ki'isidi ti pa'alʋg la, ba anɛ ziri dim ka ba pian'ad ka' gbinnɛ. Li kas-kas anɛ banɛ dɔl Jew dim malima linɛ an baŋʋ kpɛn'ɛb yɛla la.
11 Li nar ka fʋ kɛ ka ba an baanlimm, bɔzugɔ ba nwa'ad nidib ya', ban pa'an linɛ pʋ nar ye ba pa'al la zug, ye ba di'e nyɔɔd linɛ pʋ nari ba la.
12 Hali ba mɛŋ nɔdi'es yinne da ye, “Krete dim anɛ ziri dim saŋa wʋsa, ba nwɛnɛ mɔɔgin bʋnyuos nɛ, ka an gbanya'anam nɛ dindiisnam.”
13 Yɛl kaŋa anɛ sida, dinzugɔ, sa'alimi ba nɛ kpi'euŋ, ka ba na zi'e ba yadda la ni kiŋ-kiŋ,
14 ka zan'asi Jew dim sɔlima nɛ nɔzi'ela linɛ yit nimbanɛ ki'isid yɛlsida la san'an na.
15 Bʋn wʋsa anɛ nyain tisid onɛ an nyain la, amaa banɛ an dian'ad dim, ka pʋ siakid Wina'am la, si'el-si'el ka' an nyain tisi baa, bɔzugɔ ba ya'am nɛ ba pʋtɛnda wʋsa anɛ dian'ad.
16 Ba yɛt nidib ye ba mi' Wina'am, amaa ba tʋʋma pa'an ye ba zan'as Wina'am. Ba anɛ nimbɛ'ɛdnam, ka pʋ siakid Wina'am nɔɔrɛ, ka pʋ nar nɛ ban na nyaŋi tʋm tʋʋm sʋŋ si'aa.
TITUS 2
Pa'alsʋŋ la yɛla
| 2 |
Li anɛ tilas ye fʋ pa'ali ba linɛ dɔl suor ka an pa'alsʋŋ.
2 Pa'alim dap kʋda la ye ba an nimmua dim nɛ banɛ mɔr pʋtɛn'ɛsʋŋ, ka an banɛ siakid pian'ad sʋ'ʋŋa, ka mɛ mɔr nɔŋilim nɛ mɔdigir sʋ'ʋŋa.
3 Ka mɛ pa'an pu'anya'as ka ba mɔr na'asi ba bɛllim pʋʋgin, ka da bɔɔd bayɛʋg bɛɛ ba kɛ ka daam kuli baa, amaa ka pa'an linɛ an sʋ'ʋŋa.
4 Ala ka ba na sa'al pu'a banɛ pʋ kʋdig la, ka ba nɔŋi ba sidib nɛ ba biis,
5 ka gban'adi ba mɛŋ ka da an dian'ad dima, ka an yipu'a sʋma, ka zɔt nidib nimbaanlig, ka siakidi ba sidib nɔya; ala ka nidib kʋ nɛ'ɛs Wina'am labasʋŋ laa.
6 Ala mɛn, sa'alim dasam la ka ba gban'adi ba mɛŋ
7 si'el wʋsa ni. Kɛl ka fʋ mɛŋ an zanbinnɛ tisi ba ka li yii fʋ tʋʋm sʋma ni. Mɔr nimmua nɛ yɛlsida fʋ pa'alʋg pʋʋgin,
8 nɛ pian'asʋŋ linɛ ka ba kʋ nyaŋi zɛrigi fɔ. Ala ka banɛ ki'isidif la di nyan, bɔzugɔ ba kʋ nyɛ taal si'a fʋ san'anɛ.
9 Kɛl ka yammis siakidi ba zugdaannam nɔya ka da ki'isidi baa, ka tʋm si'el wʋsa linɛ na ma'ae ba sʋnya,
10 ka da zuudi ba la'adɛ, ka lɛɛ pa'al ye ba sid anɛ sida dim ka tʋm dinɛ nar. Ala ka nidib na baŋ ye Wina'am onɛ aan ti faangid la pa'ala an sʋ'ʋŋa.
11 Bɔzugɔ Wina'am yɔlisim la nie tis nidib wʋsa ye ba nyɛ faangir.
12 Li pa'annɛ ti ye ti zan'as linɛ pʋ dɔl Wina'am suorɛ, nɛ dunia bɔɔdim, ka gban'e ti mɛŋ ka bɛ bɛllim linɛ ka' gba'arɛ ka dɔl Wina'am suor dunia nwa' ni.
13 Tinamɛ nan gu'usid ka mɔr albareka ti'ir nɛ ti Wina'am tita'ar nɛ ti faangid Yesu Kristo na'am dabistita'ar la nier la,
14 o nɔk o mɛŋi tisi ti ye ti nyɛ yɔlisim ti tʋʋmbɛ'ɛd pʋʋgin, ka kɛ ka ti lieb o mɛŋ nimbanɛ an nyain, ka mɔɔd ye ba tʋm tʋʋm sʋma.
15 Pa'alim nɛ'ɛnam ka sa'ali ba, ka kpɛmisi ba sʋnya nɛ fʋ paŋ wʋsa. Da kɛ ka sɔ'ɔsɔ pɔ'ɔgi fɔ.
TITUS 3
Wina'am nidib tʋʋma la yɛla
| 3 |
Tiɛnmi nidib la ka ba siak na'anam nɛ gɔmena kpi'emnam nɔya, ka niŋ ban yɛl si'el, ka ti'eb ye ba siaki tʋm tʋʋm sʋma nɛ linɛ wʋsa ka ba yɛli ba.
2 Ba da pian'ad sɔ' yɛla bɛ'ɛdɛ, ka da bɔɔd zabaa, ka an suguru dim banɛ na'asid nidib wʋsa.
3 Bɔzugɔ, saŋa kanɛ gaad la, tinam mɛ da anɛ zɔn, ka pʋ di'ed sa'aligɔ, ka ba ma' ti ka ya'amlɛog nɛ li buudi kɛ ka ti lieb yammis, ka mɔr pʋtɛn'ɛbɛ'ɛdi ti bɛllim wʋsa ni ka nɛn nidib, ka nidib kisi ti ka ti mɛ kis taaba.
4 Amaa Wina'am onɛ aan ti faangid la sʋŋir nɛ o nɔŋilim nie la,
5 o faaɛn ti ka li ka' ti tʋʋm sʋma zugɔ, amaa li anɛ o mɛŋ nimbaanlzɔɔr la yɛla. O faaɛn ti nɛ o Siig Kasi linɛ pie ti ka li an du'am-paal nɛ nyɔvʋpaal la.
6 O tisidi ti o Siig Kasi la bɛdegʋ ka li yi Yesu Kristo onɛ aan ti faangid la ni,
7 ye ti an bʋʋd dim o tuon ka li yii o mɛŋ yɔlisim la ni ka ti mɔr ti'ir ye ti na di faar linɛ an nyɔvʋr linɛ ka' naar la.
8 Pian'akaŋa anɛ yɛlsida. M bɔɔd ye fʋ pa'ali ba yɛlbama nɛ kpi'euŋ, ka banɛ niŋ Wina'am yadda la na gu'usid ka tʋm tʋʋm sʋma saŋa wʋsa. Yɛlbama anɛ sʋm hali ka mɔr nyɔɔdi tisid sɔ' wʋsa.
9 Amaa basimi yalim bu'osa nɛ yaanam yʋda la yɛla nɛ nɔŋgbannwa'ar nɛ zaba linɛ an Jew dim wada la yɛla, bɔzugɔ lin wʋsa anɛ zaalim ka ka' nyɔɔdɛ.
10 Ka sɔ' ya'a bɔɔd ye o wɛligi ya yanam bɔɔm saŋa sa'al o nɔɔr yinne bɛɛ ayi', ka o ya'a zan'as yanam kɛl o bas.
11 Fʋ mi' ye ninkaŋa buudi tiaknɛ an nimbɛ'ɛd ka pʋ dɔl suosʋŋɔ. O pʋn kad o mɛŋ saria bɛ'ɛd.
Paul tɔlʋŋ linɛ ka o yuolim tis Titus la yɛla
12 M ya'a tʋm Atemas bɛɛ Tikikus fʋ san'an na, fʋn kpɛ'ɛŋi fʋ mɛŋi kɛɛn m san'an Nikopolis teŋin na, ka m gban'e ye m bɛɛ anina sapal saŋa.
13 Kpɛ'ɛŋimi fʋ mɛŋi sʋŋ Zenas onɛ an lɔya ka pa'an wada la, nɛ Apollos ka ba nyaŋi keŋi ba ken la ka si'el da pɔ'ɔgi baa.
14 Kɛl ka ti nidib la zamis ka tʋm tʋʋma linɛ nar ye ba tʋm ka li sʋŋi ba, ka ba da bɛ zaalim-zaalim.
15 Banɛ wʋsa bɛ nɛ m la pʋ'ʋsidif. Pʋ'ʋsimi ti taaba banɛ an yadda niŋidib ka nɔŋi ti la. Wina'am yɛlsʋm na bɛ nɛ ya wʋsa.
FILIMON
Gbauŋ nwa' yɛla
Filimon da anɛ karimbiig ka mɔr sankpan'as ka o yʋ'ʋr buon Onesimus. Daar yinne ka Onesimus zɔ ka bas o zugdaan la. O da sia'al Paul ka tiaki niŋ Yesu yadda, ka Paul tʋm o ye o lɛm o zugdaan Filimon san'an tis o gbauŋ kaŋa. Paul da yɛl Filimon ye on nɛ Onesimus naalim nɔɔr, ka baŋ ye ba yʋ'ʋn anɛ ba'abiis nɛ taaba Yesu ni.
FILIMON 1
Man Paul onɛ an sanrega nid Yesu Kristo yɛla la, nɛ ti ba'abiig Timoti sɔbid gbauŋ kaŋa tisidi ti zua sʋŋ Filimon onɛ aan ti tʋmtʋm tiraan la,
2 nɛ ti taʋn Afia nɛ Akipus onɛ aan ti soogia tiraan Yesu Kristo tʋʋma ni la, nɛ Wina'am nimbanɛ la'asidi fʋ yin la.
3 Ti Ba' Wina'am nɛ ti Zugsɔb Yesu Kristo na tisif yɔlisim nɛ sumbʋgʋsʋm.
Filimon nɔŋilim nɛ o yadda niŋir
4 M pʋ'ʋsid Wina'am bareka saŋa mɛkama ka tiɛndi fʋ yɛla m winsɔsʋgin,
5 bɔzugɔ m wʋm fʋn niŋi ti Zugsɔb Yesu yadda si'em la'an nɛ nɔŋilim linɛ ka fʋ mɔr nɛ yadda niŋidib la.
6 M sɔsid Wina'am ye tinamɛ an yadda niŋidib nɛ taaba la, na kɛ ka ti gban'e bʋnsʋŋ kanɛ wʋsa ka ti mɔr Kristo ni la gbin.
7 M ba'abiiga, fʋ nɔŋilim la tis man sumalisim ka li kpɛ'ɛŋi m sʋnf hali, bɔzugɔ fʋ ma'ae yadda niŋidib la wʋsa sʋnya.
Onesimus yɛla
8 La'an nɛ mam mɔr suor Kristo nii na tun'e tisif nɔɔr nɛ kpi'euŋ ye fʋ niŋ linɛ nar la,
9 tinamɛ nɔŋ taaba la zug ka m bɛlimif. Man Paul onɛ an Yesu Kristo ninkʋdʋg ka bɛ sanrega ni Yesu Kristo zug la,
10 sɔsidi fʋ m biig Onesimus onɛ ka m lieb o saam man daa bɛ sanrega ni la yɛla (Onesimus gbin anɛ onɛ mɔr tʋmmir).
11 O daa ka' tʋmmir saŋa linɛ gaad la, amaa o yʋ'ʋn mɔr tʋmmir mam nɛ fʋn san'an.
12 Nannanna nwa', m lɛbisid on kanɛ aan m nyɔɔrin kɔnbʋg la tisidif.
13 Li naan bɔɔdin bɛdegʋ ye o kpɛlimmi m san'an ka zi'enɛ fʋ nɔba zugʋ sʋŋinim, man nam bɛ sanrega ni Wina'am pian'ad yɛla la.
14 Amaa m pʋ bɔɔd ye m tʋm si'el ka fʋ zi' li ti'irɛ, ka fʋn gban'e ye fʋ maal si'el na an fʋ mɛŋ bɔɔdim ka ka' mugusʋgɔ.
15 Daasi'erɛ, linɛ kɛ ka o daa yii fʋ san'an saŋa bi'ela la, anɛ ye fʋ lɛn di'e o ya'as ka o bɛɛ fʋ san'an saŋa wʋsa,
16 ka lɛn ka' fʋ yammʋga, amaa o gat yammʋg; o yʋ'ʋn anɛ fʋ ba'abinɔŋir. M nɔŋ o bɛdegʋ, amaa fʋn na nɔŋ o gaad ala, bɔzugɔ o anɛ fʋ yammʋg ka mɛ aan fʋ ba'abiig, Zugsɔb la ni.
17 Ka fʋ ya'a sid anɛ m dɔllim taa, fʋn di'em o wʋʋ fʋn naan di'enim si'em la.
18 Ka o ya'a daa tʋmif nɛ bɛ'ɛd bɛɛ mɔri fʋ si'el, fʋn gi'elimi li, ka li aan m sam.
19 Man Paul n sɔb nɛ'ɛŋa nɛ m mɛŋ nu'ug, ye m na yɔɔ li wʋsa. Hali tun'e yɛl ye m sam dɔlli fʋ zaŋi keŋi fʋ mɛŋ-mɛŋ nyɔvʋr pʋʋgin.
20 Ɛɛn, m ba'abiiga, m bɔɔd nyɔɔdi fʋ san'an tinamɛ an yinne nɛ Zugsɔb la zug. Bʋgʋlimi m sʋʋnr nɛ bʋn linɛ dɔl Kristo ni.
21 Mam baŋ ye fʋ na tʋmi m bɔɔdim la zug, ka m sɔbi tisif ka mi' ye fʋ pʋn na tʋm ka li gaad mam yɛlif si'em la.
22 M bɔɔd ye fʋ ti'eb saam dɔɔgʋ digilim, bɔzugɔ m mɔr ti'ir ye Wina'am na di'e ya wʋsa winsɔsʋg ka yisim kpɛla lɛbisi ya san'an na.
Pʋ'ʋsʋg
23 Epafras onɛ ka ti la'am bɛ sanrega ni Yesu Kristo yɛla la, pʋ'ʋsidif.
24 M tʋmtʋm taaba Mak nɛ Aristarkus nɛ Demas nɛ Luk mɛ pʋ'ʋsidif. Zugsɔb Yesu Kristo yɔlsim la na bɛ nɛ ya wʋsa.
HIBIRU DIM
Gbauŋ nwa' yɛla
Ti pʋ baŋ onɛ sɔb gbauŋ kaŋa tituaa nɛ. (Li tun'e an Wina'am tʋmtʋm Paul). Onɛ sɔb la kpɛmisidnɛ karimbiis ye ba kpɛn niŋ Yesu yadda, bɔzugɔ on ka Wina'am da nie pa'al ye o na tʋm o na ka o faaɛn ti yis tʋʋmbɛ'ɛdin nɛ kumin la. O sɔbi pa'al ye Yesu gat nɔdi'esidib nɛ maliaknam nɛ Moses onɛ da dɛŋi bɛ kʋdimin la. Wina'am kɛ ya ka ti baŋ ye Yesu lɛdig nɔnaar kʋdʋg maanmaannib la, bɔzugɔ o nɔk o mɛŋi pɛsigi maal maan kanɛ ka' tiraana. Alazug ti ya'a niŋ Yesu yadda, Sʋntaana paŋ nɛ kum dabiem kʋ lɛm mɔri ti. Onɛ sɔb gbauŋ la pa'al ye nɔnaar kʋdʋg malima la nɛ bʋnkɔnbid kʋʋb maana la da nwɛnɛ siig ma'asim hali ti paae saŋkanɛ ka maanmaan kpɛɛm Yesu kena maal maan kanɛ ka' tiraan la. O mɛ sɔbi pa'al Israel nidib banɛ ka ba yʋda da yi hali ba yadda niŋir zug; ye li sʋŋi ti ka ti kpɛn ken tuonnɛ mɔr ti'ir nɛ Wina'am la'an nɛ tɔɔg saŋa, ka da gɛn ka basɛ.
HIBIRU DIM 1
Wina'am mɔr o Biig la tu'asidi ti si'em
| 1 |
Wina'am da kɛ ka o nɔdi'esidib pian'ad o yɛla kʋdimin la tisidi ti yaanam, saŋa bɛdegʋ nɛ suoya kɔn'ɔb-kɔn'ɔb. 2 Amaa nannanna Wina'am pian'adi tisid ti ka li yit o Biig la san'an na. O Biig la ka o gaŋ o ye o sʋ'oe si'el wʋsa, ka li yinɛ o san'an na ka Wina'am maal dunia nɛ linɛ bɛ saŋgbauŋin la wʋsa.
3 Wina'am na'am girima la nienɛ nyain o Biig la ni, ka Wina'am an si'em la, o mɛ anɛ ala. Ka li yinɛ o pian'ad linɛ mɔr paŋ la ni ka o gɔsid bʋn wʋsa. Ka on pie ninsaal tʋʋmbɛ'ɛd la, ka yʋ'ʋn zin' Wina'am onɛ an kpi'euŋ sɔbi gat si'el wʋsa la datiuŋ.
Wina'am Biig la gat maliaknam
4 Wina'am dʋ'ʋs o ka o gat maliaknam. Ka yʋ'ʋr kanɛ ka o di'e la gat maliaknam yʋda.
5 Bɔzugɔ, Wina'am nan zi' yɛl maliak ye, “Fʋ anɛ mam Biig; zina ka m liebi fʋ Saam.” Ka mɛ pʋ yɛl maliak ye, “Man na aan o saam ka o na aan m Biiga.”?
6 Ka on tʋm o bikpɛŋ dunia ni na la, o lɛn yɛl ye, “Kɛl ka Wina'am maliaknam wʋsa na'as o.”
7 Ka yɛl maliaknam banɛ aan o tʋmtʋmnib la yɛla ye, “O kɛ ka o maliaknam la an wʋʋ pɛbisim nɛ, ka o tʋmtʋmnib la mɛ an wʋʋ bugum pielim nɛ.”
8 Amaa o Biig la yɛla, o yɛl ye, “O Wina'am, fʋ na'am la na bɛ saŋa kanɛ ka' bɛnnɛ; ka pʋpielim na aan fʋ sʋ'ʋlim la dansaar.
9 Fʋ nɔŋ pʋpielim, ka kis linɛ an bɛ'ɛd. Dinzug ka Wina'am, onɛ aan fʋ Wina'am la, na dʋ'ʋsi fʋ gaadi fʋ taaba ka kpa'ae sumalisim kpaam niŋif wʋʋ tudaar nɛ.”
10 Ka lɛn ye, “Zugsɔba, pin'ilʋgʋn ka fʋ da digil teŋgbauŋ la ɛɛnbir, ka fʋ nu'us maal saŋgbana la wʋsa.
11 Ba na bɔdig, amaa ka fʋ na kpɛm bɛ; ba wʋsa na ti kpi nwɛnɛ fuug nɛ, amaa fʋn na kpɛm bɛ.
12 Ba nwɛnɛ fuud ka fʋ na kpilim, ka tiaki ba wʋʋ fupaala. Amaa fʋn anɛ fʋ naŋ-naŋ, ka fʋ yʋma kʋdim kʋ naae.”
13 Ka maliak kanɛ ka Wina'am nam mi' yɛl o ye, “Zin'inimi m datiuŋ, hali ka m ti kɛ ka fʋ bi'emnam bɛɛ fʋ nɔba teŋirɛ?”
14 Ka maliaknam an bɔ? Ba anɛ wʋʋ siis nɛ, ka tʋmnɛ tisid Wina'am. Ka o tʋmi ba ye ba sʋŋ banɛ na ti paam faangir la.
HIBIRU DIM 2
Faangir tita'ar la yɛla
| 2 |
Dinzugɔ li nar ka ti gban'e tinamɛ wʋm yɛlsida si'a la sʋ'ʋŋa, ka da basi lii.
2 Ka pian'akanɛ ka maliaknam da yɛl la ya'a sadigim an sida, onɛ zan'as ka pʋ dɔlli li na di'e namisʋg linɛ nar o.
3 Ka ti ya'a nɛ'ɛs Wina'am faangir tita'ar kaŋa, ti na niŋ wala pɔns namisʋg la? Zugsɔb la da dɛŋi pian' faangir la yɛla yiiga, ka banɛ wʋmi li la pa'ali ti ye li anɛ sida.
4 Ka Wina'am mɛ pa'al ye li anɛ sida, nɛ tʋʋmnyalima nɛ tʋʋm kpi'ema buudi-buudi nɛ o Siig Kasi piini linɛ ka o pʋdigidi li o ya'am bɔɔd si'em.
Faangir la sʋ'ʋd la yɛla
5 Ka Wina'am pʋ kɛ ka maliaknam sʋ'oe dunia linɛ ka o da nan ye o maal ka ti pian'adi li yɛla laa.
6 Li sɔb Wina'am gbauŋʋn zin'isi'a ka sɔ' yɛl ye, “Ninsaal an bɔ, ka fʋ tɛnr o yɛla ala? Bɛɛ ninsaal biig an bɔ, ka fʋ ba'a bɛɛ o ni?
7 Fʋ maal o ka maliaknam gaad o nɛ bi'ela, amaa ka fʋ tis o girima nɛ na'asi,
8 ka ye fʋ zaŋ si'el wʋsa niŋ o nu'usin.” Ka on zaŋ si'el wʋsa niŋ o nu'usin la zug, li pa'al ye si'el kae ka ninsaal pʋ sʋ'oe lii. Amaa lin an si'em la, ti nam pʋ nyɛ ka o sʋ'oe si'el mɛkamaa.
9 Amaa ti nyɛ Yesu, onɛ ka Wina'am da sie o gaad maliaknam saŋa bi'ela, ye on Wina'am ka o yʋ'ʋn pid o na'am zupibig nɛ na'asi, kum namisʋg la yɛla. Ka li anɛ Wina'am pʋpielim kɛ ka o kpii tis sɔ' wʋsa yɛla ka nyɛ na'asi.
10 Li sʋ'ʋm ye Wina'am onɛ maan ka gɔsid si'el wʋsa la, kɛ ka Yesu onɛ aan ti faangid la an sʋ'ʋŋa on namis la yɛla, ye Wina'am ti zaŋ o biis bɛdegʋ ka ba kpɛn' o nyɔvʋr linɛ ka' naar la ni.
11 Ka onɛ an kasi la nɛ nimbanɛ ka o maal ka ba an kasi la, wʋsa anɛ Ba' yinne. Dinzug ka Yesu pʋ zɔt nyan nɛ on na buoli ba ye o ba'abiisɛ.
12 O yɛl ye, “M na yɛli m ba'abiis fʋn tʋm si'eli tisim la, m na yʋ'ʋm dʋ'ʋsi fʋ yʋ'ʋr nidib bɛdegʋ tuon.” HIBIRU DIM 2–3
13 Ka lɛn ye, “M na ti'enɛ Wina'am.” Ka lɛn yɛl ya'as ye, “Manɛ nwa' bɛ nɛ biis banɛ ka Wina'am tisim la.”
14 Ka biis la wʋsa sadigim mɔr niŋgbiŋ nɛ ziim la, on mɛ da mɔr niŋgbiŋ kan la mɛn, ye o kum la yɛla ka o na nyaŋi san'am Sʋntaana onɛ mɔr paŋi sʋ'oe kum la
15 ka tis banɛ ka kum zɔtim yɛla kɛ ka ba lieb yammisi ba bɛllim wʋsa ni la yɔlisim.
16 Ka li an sida ye o ba'a kae nɛ maliaknama, amaa Abraham yaas la ka o ba'a bɛ nɛ ba.
17 Dinzugʋ kɛ ka o maal o mɛŋ nwɛnɛ o ba'abiis nɛ si'el mɛkama wʋsa ni, ye o lieb maanmaan kpɛɛm onɛ an nimbaanlzɔt ka an yɛlsida sɔb Wina'am tʋʋma ni, ka maan suguru sɔsʋg maan nidib tʋʋmbɛ'ɛd yɛla.
18 Sʋntaana daa mak o ka o namis pamm la zug, li kɛnɛ ka o na nyaŋi sʋŋ banɛ wʋsa ka Sʋntaana makidi ba.
HIBIRU DIM 3
Yesu n gat Moses si'em la yɛla
| 3 |
Alazugɔ, m ba'abiis banɛ ka Wina'am buol ye ya pɛ'ɛs arezana sʋ'ʋlimin la, zaŋiminɛ ya pʋtɛn'ɛr wʋsa niŋ Yesu onɛ an Wina'am tʋmtʋm nɛ maanmaan kpɛɛm ka ti pɛligi ti pʋʋgʋ tu'asidi o yɛla tisid nidib la ni.
2 O anɛ yɛlsida sɔbi tis onɛ gaŋ o la wʋʋ Moses n da an yɛlsida sɔb si'em Wina'am yidimin la.
3 Dau kanɛ mɛɛd yiri di'ed na'asi gat yir la mɛŋ si'em la, ala mɛn ka Yesu nar na'asi bɛdegʋ gat Moses.
4 Yir mɛkama, ti mi' ye sɔ' mɛɛ li, ka Wina'am an onɛ mɛɛd si'el mɛkama wʋsa.
5 Moses da anɛ tʋmtʋm ka an sida sɔb Wina'am yidimin la wʋsa, ka da yɛt nidib la bʋnkanɛ ka Wina'am ye o ti nie bɛog sa.
6 Amaa Kristo mɛ da anɛ biribiŋ onɛ an sida sɔb ka gur Wina'am yidim, dinzugɔ ti ya'a mɔr sʋnkpi'euŋ nɛ ti'ir ye ti anɛ o yidim, ti na nwɛ'ɛd nyɔ'ɔgʋ li yɛla.
Wina'am nidib vʋ'ʋsʋm la yɛla
7 Alazugɔ, nwɛnɛ Siig Kasi la yɛt si'em la ye, “Zina, ya ya'a wʋm Wina'am kʋkɔr,
8 yanam da digilimi ya sʋnya wʋʋ ya yaanamɛ da ki'is o si'em mɔɔgin ka zan'as Wina'am nɔɔr la.
9 Ani ka ya yaanam da mak mam, ye ba kpansi mɛ gɔs, la'an nɛ ban da nyɛ man da tʋm si'em yʋma pisnaasi la.
10 Dinzug ka m sʋnf da pɛlig nɛ zʋmaʋŋ kan dim la. Ka m yɛl ye, ‘Saŋa wʋsa ba ya'am pʋ dɔl mam bɔɔd si'ela, ba mɛ pʋ baŋ man suoya la an si'em.’
11 Ala ka m sʋnf pɛlig nɛ ba ka m pɔ nɔɔri zi'el ye, ‘Ba kʋdim kʋ kpɛn' m vʋ'ʋsʋm zin'igin laa.’”
12 M ba'abiisɛ, gu'usimi ka ya sɔ' da mɔr sʋnf bɛ'ɛd linɛ pʋ niŋid Wina'am yadda, ka o fɛndig ka bas Wina'am onɛ vʋe la suorɛ.
13 Amaa kpɛmisimi taaba daar wʋsa linɛ buon ye Zina la, ka baa nid yinne ya san'an da digilim o sʋʋnr nɛ tʋʋmbɛ'ɛd dama'am pʋʋginɛ.
14 Ti di'ednɛ ti pʋʋr nɛ Kristo, ti ya'a mɔri ti pin'ilʋg yadda la kiŋ-kiŋ ti paae dunia nwa' bɛn.
15 Ka Wina'am gbauŋ pʋn yɛl ye, “Zina, ya ya'a wʋm Wina'am kʋkɔr, yanam da digilimi ya sʋnya ka zan'as Wina'am wʋʋ ya yaanamɛ da niŋ si'em mɔɔgin ban da zan'as Wina'am nɔɔr la.”
16 Anɔ'ɔnamɛ da wʋm ka zan'as la? Li ka'anɛ banɛ ka Moses da gaadi ba tuonnɛ dɔlli yi Egipt la na?
17 Ka anɔ'ɔnam ka Wina'am sʋnf da pɛlig nɛ ba yʋma pisnaasi la? Li ka'anɛ banɛ da tʋm bɛ'ɛd ka kpi mɔɔgin laa?
18 Ka anɔ'ɔnam ka o da pɔ nɔɔr ye ba kʋdim kʋ kpɛn' o vʋ'ʋsʋm zin'igin la? Li da ka'anɛ banɛ da zan'as o nɔɔr laa?
19 Ala ka ti baŋ ye ba da pʋ nyaŋɛ kpɛn', ban pʋ niŋ Wina'am yadda la zug.
HIBIRU DIM 4
Dinzugɔ, Wina'am kaanbʋg linɛ ka o tis ye ti kpɛn' o vʋ'ʋsʋm zin'igin la nan zi'e la, kɛlli ka ti gu'usi ka ya sɔ' da gʋ'ʋŋ kpɛn'ɛbɔ.
2 Labasʋŋ la paae ti san'an na nwɛnɛ lin paae ba san'an si'em la, amaa labakanɛ ka ba wʋm la pʋ mɔr nyɔɔdi ba nii, bɔzugɔ ban wʋmi li la, ba pʋ di'e li nɛ yadda.
3 Ka tinam banɛ niŋ o yadda la kpɛn'ɛd o vʋ'ʋsʋm zin'igin wʋʋ on yɛl si'em la ye, “M sʋnf pɛlig nɛ ba ka m pɔ nɔɔri zi'el ye, ‘Ba kʋdim kʋ kpɛn' m vʋ'ʋsʋm zin'iginɛ.’” O yɛl nɛ'ɛŋa, la'an nɛ on da naae o tʋʋma linɛ an dunia maalʋg la.
4 Ka o gbauŋ la yɛl zin'isi'a dabiskanɛ an daba ayɔpɔi daar la yɛla ye, “Wina'am da maal dunia la naae la, o da vʋ'ʋs daba ayɔpɔi la daar.”
5 Ka lɛn yɛt kpɛla ya'as ye, “Ba kʋdim kʋ kpɛn' m vʋ'ʋsʋm zin'iginɛ.”
6 Li nan kpɛn zi'enɛ ye sieba na kpɛn' li ni, ka banɛ da dɛŋi wʋm labasʋŋ la gʋ'ʋŋ kpɛn'ɛb ba zan'asʋg la zug.
7 Alazug ka Wina'am lɛn gaŋ dabis-si'a
ya'as ka li buon ye Zina. Ka Na'ab David da pian' li yɛla yʋma bɛdegʋ linɛ gaad la nwɛnɛ lin daa dɛŋi yɛl si'em la ye, “Zina, ya ya'a wʋm Wina'am kʋkɔr, yanam da digilimi ya sʋnya.”
8 Bɔzugɔ Josua ya'a da tisini ba vʋ'ʋsʋm zin'ig, Wina'am da kʋ lɛm pian' dabis-si'a yɛla ya'asɛ.
9 Ka lin an si'em la, vʋ'ʋsʋm dabis-si'a kpɛm bɛ Wina'am nidib la yɛla.
10 Dinzugɔ onɛ kpɛn'ɛd Wina'am vʋ'ʋsʋm zin'igin la mɛ na vʋ'ʋs o mɛŋ tʋʋma ni nwɛnɛ Wina'am da vʋ'ʋs o tʋʋma ni si'em la.
11 Dinzugɔ ti kpɛ'ɛŋimi ti mɛŋ ka kpɛn' vʋ'ʋsʋm zin'igin la, ka sɔ' da tu'as banɛ da ki'is o nɔɔr ka gʋ'ʋŋ kpɛn'ɛb la.
12 Wina'am pian'ad la vʋenɛ ka tʋm. Li pʋlimnɛ ka diti gat zaba sʋ'ʋg kanɛ dit nɔya ayi', ka kunsidi paad siig nɛ vʋ'ʋsʋm bɛn, wʋʋ sʋ'ʋgʋ kɛnsid niŋgbina sʋn'ʋla nɛ kɔnba pʋʋgin biim si'em la. Ka nied ninsaal pʋtɛn'ɛr nɛ o bɔɔdim nyain pa'an.
13 Si'el kae na nyaŋi su'a Wina'am san'anɛ. Li wʋsa dignɛ paalʋ onɛ tuon ka ti wʋsa na zi'enɛ tu'asi ti tʋʋma la.
Yesu an maanmaan kpɛɛm la
14 Dinzugɔ, tinamɛ pʋn mɔr maanmaan kpɛɛm tita'ar onɛ an Wina'am biig Yesu ka o dɛŋi gaad arezana ni la, kɛlli ka ti mɔri ti yadda la kiŋ-kiŋ.
15 Ti mɔr maanmaan kpɛɛm onɛ zɔti ti nyɔɔg tinamɛ pʋ kpi'em la yɛla; o da nyɛ makir nɛ li buudi wʋsa nwɛnɛ tinamɛ nyɛt si'em la, la'an nɛ wala o pʋ tʋm tʋʋmbɛ'ɛdɛ.
16 Dinzugɔ kɛlli ka ti li'el o yɛlsʋm na'am gbauŋ la nɛ sʋnkpi'euŋ ka di'e o nimbaanlzɔɔr nɛ o yɛlsʋm la, ka li sʋŋi ti, ti yɛlpakir saŋa.
HIBIRU DIM 5
Ba gaŋid maanmaan kpɛɛm wʋsa nɛ nidib sʋʋgin ka nɔk o ka o zi'enɛ ba nɔba zug, ban nɛ Wina'am sʋʋgin, tis piini ka maal maana tis Wina'am ba tʋʋmbɛ'ɛd yɛla.
2 On pʋ kpi'ema ka na tun'e lu tʋʋmbɛ'ɛdin la zug, o na tun'e zɔ nimbaanlig nɛ banɛ bɛ zi'ilimin ka yidigid la.
3 Alazug, li anɛ tilas ye o maal maana tis Wina'am o mɛŋ tʋʋmbɛ'ɛd zug la'an nɛ nidib la tʋʋmbɛ'ɛd yɛla.
4 Ka sɔ' pʋ dʋ'ʋsid o mɛŋ ye o anɛ maanmaan kpɛɛm, asɛɛ Wina'am gaŋ o wʋʋ on da gaŋ Aaron si'em la.
5 Ala mɛn, Kristo da pʋ dʋ'ʋs o mɛŋ ye o lieb maanmaan kpɛɛm, amaa Wina'am da gaŋ o, ka yɛl o gbauŋʋn ye, “Fʋ anɛ man Biig; zina ka m liebi fʋ Saam.”
6 Ka lɛn yɛl zin'isi'a ye, “Fʋ anɛ maanmaan onɛ tʋʋma ka' naarɛ nwɛnɛ Melkizedek la.”
7 Yesu da bɛ dunia nwa' ni saŋa si'a la, o da sɔs ka bɛlim Wina'am nɛ kaasig tita'ari tis onɛ mɔr paŋi na tun'e faaɛn o kumin la. Ka on na'as Wina'am la zug ka o wʋm o sɔsʋg la.
8 La'an nɛ on aan o Biig la, o zamis nɔɔr siakir o namisʋgʋn.
9 Ka on lieb sʋ'ʋm naae la zug ka faangir linɛ ka' naar la yit o san'an na tisid banɛ wʋsa siakid o nɔɔr la,
10 ka Wina'am nɔk o pa'al ye o anɛ maanmaan kpɛɛm onɛ lɛdig Melkizedek zin'igin.
Banɛ basid Wina'am dɔllim sa'alʋg la yɛla
11 Ti mɔr pian'ad bɛdegʋ yɛlkaŋa yɛla, amaa li tɔi nɛ mam na pa'ali ya si'em ka ya baŋ nyain, bɔzugɔ ba ya'a zamisidi ya, ya pʋ gban'ad si'el gbin tɔ'ɔtɔɔ.
12 Saŋa paae ya ka li nar ye ya an pa'annib, amaa ya nan kpɛm bɔɔd ye ba lɛm pa'annɛ ya Wina'am yɛla linɛ an yiiga pa'ala la, nwɛnɛ biisi bɔɔd bin'isim ka ka' digan'alʋg si'em la.
13 Ka onɛ mɛkama mu'ad bin'isim anɛ biig ka nan ka' ya'am na baŋ yɛlsida yɛlaa. 14 Ka banɛ bi' la dit digan'ala, bɔzugɔ ba zamisnɛ mi' linɛ an sʋm nɛ bɛ'ɛd.
HIBIRU DIM 6
Dinzugɔ, kɛlli ka ti basi Kristo pa'ala banɛ ka ti da zamis pin'ilʋgʋn la, ka nɔbigi ka basi tinamɛ da lieb karimbiis ka ba pa'ali ti si'el ka ti niŋ Wina'am yadda la, ka keŋ tuonnɛ nɔbig ka da kpɛn nwɛnɛ ti pin'ilnɛ bɔɔd ye ti paam tiakiri ti tʋʋmbɛ'ɛd nɛ ti yadda niŋir Wina'am san'anɛ.
2 Ka bas Wina'am ku'om sʋʋb pa'alʋg nɛ anɔk nu'usi pa'al nidib zutin yɛla nɛ kum vʋ'ʋgir yɛla nɛ sariakadib linɛ ka' bɛn la yɛla.
3 Wina'am ya'a siak, ti na niŋ ala.
4 Li tɔi pamm tis banɛ nan mi' di'e Wina'am labasʋŋ ka baŋ arezana piini malisim an si'em ka di'e o Siig Kasi la,
5 ka mi' Wina'am labaar la an sʋm si'em nɛ tʋʋm kpi'ema linɛ na ti kena la;
6 nimban dim ya'a lu ba yadda ni, ba kʋ nyaŋi tiak ka basi ba tʋʋmbɛ'ɛd la ka lɛb na ya'asɛ, bɔzugɔ ba maligim kpa'adnɛ Wina'am Biig la kum dapuudir zug ka diisid o nyan nidib sʋʋgin.
7 Teŋ kanɛ di'ed saku'om bɛdegʋ la, du'ad zʋʋdi tisid kpaadib ka ba di'ed Wina'am yɛlsʋm. 8 Amaa teŋ kanɛ yit gɔn'ɔs nɛ natis la ka' nyɔɔdɛ, li pʋ lal nɛ nɔpɔɔrɛ, ka li ba'asʋg anɛ bugum na dii li.
8 M zuanɔŋa, la'an nɛ tinamɛ pian'ad anwa la, ti mɔr sʋnkpi'euŋʋ ya yɛla, ka mi' ye ya mɔr yɛlsʋm linɛ dɔlnɛ faangir la.
10 Wina'am anɛ onɛ niŋid linɛ nar, o kʋ tami ya tʋʋm nɛ nɔŋilim kanɛ ka ya pa'al o zaŋi keŋ yanamɛ sʋŋ o nidib si'em hali ka nam kpɛn niŋid ala la.
11 Ti bɔɔd ye ya yinne-yinne tʋm ala mɛn nɛ nimmua ti paae li bɛn ka li kɛ ka ya mɔr ti'ir ka bi'esʋg kae.
12 Ti pʋ bɔɔd ye ya mɔr gbanya'am, amaa tʋmmi nwɛnɛ ya taaba banɛ niŋ Wina'am yadda, ka mɔdig ka di'e Wina'am nɔzi'elkanɛ ka o digil la.
Wina'am kaanbʋg la yɛla
13 Wina'am da kaanbi tis Abraham, ka sɔ' kae gat on Wina'am la zug, ka o pɔ nɛ o mɛŋ,
14 ka ye, “Asida, m na niŋi fʋ zug bareka bɛdegʋ, ka kɛ ka fʋ yaas na ti an bɛdegʋ.”
15 Ka Abraham da mɔdig ka di'e Wina'am kaanbʋg la.
16 Ka ninsaal ya'a ye o pɔ nɔɔr, o pɔɔdnɛ onɛ gat o, ka li pa'al ye on yɛl si'el la anɛ amɛŋa ka li gu'oe nɔŋgbannwa'ar wʋsa.
17 Wina'am da bɔɔd ye o nie li nyain pa'al banɛ na ti di'e faar kanɛ ka o kaanbi zi'el ka li kʋdim kʋ tiak la zug, ka o pɔɔ pɛ'ɛs o kaanbʋgʋn la.
18 Ka yɛlbama ayi' nwa' pʋ tun'e tiakida, ka ban yɛla ka Wina'am kʋ ma' baa bi'ela. Dinzug ka tinam banɛ zɔɔ keŋ o san'an ye o faaɛn ti la na mɔr sʋnkpi'euŋ nɛ ti'ir linɛ digi ti tuon la.
19 Ti mɔr ti'ir kaŋa nwa' ka li tisi ti vʋm ka dabiem kae, nwɛnɛ anrʋŋ kʋnti ba' ku'omin kiŋ-kiŋ si'em la. Ti'ir kan la mɔri ti nɛ kpɛn'ɛd pʋ'ʋsʋg dɔɔg la pʋʋgin ti paae Kasi Zin'ig linɛ ka pien la bɛŋ la
20 Ka Yesu onɛ lieb maanmaan kpɛɛm saŋa kanɛ ka' bɛn la lɛdig Melkizedek zin'igin. Ka ti ti'ir bɛɛ o ni, ka o zi'e ti nɔba zugʋ gaadi ti tuonnɛ kpɛn'ɛd Wina'am zin'igin la.
HIBIRU DIM 7
Maanmaan Melkizedek la yɛla
| 7 |
Melkizedek da anɛ Salem Na'ab nɛ Wina'am Onɛ Gaad Si'el Wʋsa la maanmaan. Abraham n da keŋ tanp ka nyaŋ na'anam anaasi ka kunna la, Melkizedek da tʋ'ʋs o ka niŋ o zug albareka.
2 Ka Abraham da yis la'abanɛ ka ba fan' la yinne piiga wʋsa pʋʋgin tis o. Melkizedek yʋ'ʋr la gbin anɛ ye, “Pʋpielim Na'ab,” ka lɛn an Salem Na'ab, ka li gbin anɛ “Sumbʋgʋsʋm Na'ab.”
3 Si'el kae pa'al ye o mɔr ba' nɛ ma nɛ yaanama. Si'el kae mɛ pa'al o du'am nɛ o kum saŋaa, ka o kpɛn an maanmaan saŋa wʋsa nwɛnɛ Wina'am Biig la nɛ.
4 Gɔsimi Melkizedek n da mɔr kpi'euŋ si'em; hali ti yaayalinyak Abraham da tis o pʋdigir yinne piiga wʋsa pʋʋgin linɛ an la'ad linɛ ka ba da faaɛn zaba ni la.
5 Ka Wina'am tis nɔsi'a ye banɛ an Levi yaas ka mɛ an Abraham yaas ka an Wina'am maanmaannib la, di'es si'el wʋsa nidibin la pʋdigir yinne piiga wʋsa pʋʋgin. Ba di'esidi ba buudi la ni hali la'an nɛ ban an Abraham yaas la.
6 Melkizedek da ka' Levi yaaŋa, amaa o di'e pʋdigir yinne piiga pʋʋgin Abraham san'an ka niŋ on onɛ di'e Wina'am kaanbʋg la zug bareka.
7 Li anɛ sida ye onɛ tisid albareka gat onɛ di'edi li la.
8 Fʋ ya'a gɔs maanmaannib banɛ di'esid pʋdigir yinne piiga wʋsa pʋʋgin la, ba anɛ ninsaalib ka na ba'asi kpi; amaa ya'a an Melkizedek on gaadi ba wʋsa bɔzugɔ o vʋenɛ nwɛnɛ Wina'am gbauŋʋ yɛl si'em la.
9 Sɔ' tun'e yɛl ye hali Levi mɛŋ onɛ di'esid pʋdigir yinne piiga wʋsa pʋʋgin la da yɔ yinne piiga wʋsa pʋʋgin ka li naanɛ o yaab Abraham nu'usin keŋ Melkizedek san'an,
10 bɔzugɔ Melkizedek n da tʋ'ʋs Abraham la, Levi da nan bɛnɛ o yaab Abraham niŋgbiŋin.
11 Levi buudi la maanmaannib tʋʋma ya'a da an linɛ kɛt ka nidib bɛ bɛllim sʋŋɔ, wala ka li da lɛn kpa tilas ye maanmaan onɛ nwɛnɛ Melkizedek ka ka' onɛ nwɛnɛ Aaron kena?
12 Ka maanmaan ya'a tiak, asɛɛ ka wada la mɛ tiak.
13 Ka onɛ ka ba pian'ad o yɛla la buudi bɛɛ li kɔn', ka buud kan la nid nan zi' tʋm maanmaan tʋʋma.
14 Li anɛ sida ye Zugsɔb la anɛ Juda dɔɔg nid, amaa Moses da pʋ pʋdig dɔkaŋa yɛla on da pian'ad maanmaannib yɛla la.
Maanmaan onɛ nwɛnɛ Melkizedek la yɛla
15 Ka tinamɛ yɛl si'el la maligin nie nyain, maanmaan sɔ' kena nwɛnɛ Melkizedek nɛ.
16 Li ka'anɛ wada linɛ dɔl ninsaal du'am yɛlaa, amaa li anɛ nyɔvʋr linɛ ka' naar la paŋ yɛla ka o lieb maanmaan.
17 Ka Wina'am gbauŋ yɛl ye, “Fʋ anɛ maanmaan onɛ tʋʋma ka' naarɛ, nwɛnɛ Melkizedek nɛ.”
18 Nɔzi'elkʋdʋg la n pʋ kpi'ema ka ka' gbin la zug, ka Wina'am uugi li labil.
19 Moses nɔzi'elʋg la da pʋ nyaŋi kɛ ka si'el wʋsa an sʋ'ʋŋa. Amaa ti'ir linɛ an sʋ'ʋŋa bɛɛ tisi ti ka kɛ ka ti li'el Wina'am san'an na.
20 Linɛ lɛm paas anɛ Wina'am da zi'el nɔɔr o yɛla. Ka banɛ dɛŋi lieb maanmaannib la da pin'ili ba tʋʋma la, o da pʋ tis nɔɔrɛ.
21 Ka Wina'am maal Yesu ka o an maanmaan ka pɔ ye, “Zugsɔb la tis nɔɔr ka kʋ tiak o pʋtɛn'ɛrɛ, o yɛl ye, ‘Fʋ anɛ maanmaan onɛ tʋʋma ka' naarɛ.’”
22 Zi'el kaŋa zugʋ kɛ ka Yesu zi'en ka li pa'al ye nɔnakaŋa an sʋm gaad nɔnaar kʋdʋg la.
23 Linɛ lɛm bɛɛ li kɔn' anɛ ye, nɔnakʋdʋgin la maanmaannib bɛdegʋ da bɛ amaa ka kum kɛ ka ba pʋ kpɛm bɛɛ ba tʋʋma la nii.
24 Amaa Yesu pʋ kpiid la zugʋ kɛ ka o an maanmaan saŋa linɛ ka' naarɛ.
25 Dinzugɔ banɛ wʋsa kɛn Wina'am san'an na ka li yinɛ Yesu ma'asim zug la, o nyaŋi faandi ba wʋsa. Bɔzugɔ, o vʋe ka bɛ Wina'am tuonnɛ nwɛ'ɛd Wina'am nu'ugʋ ba zug.
26 Li nar ka ti mɔr maanmaan kpɛɛm wʋʋ oŋa nwa' an nyain ka bɛɛ o kɔn' ka gba'ar nɛ dian'ad kae la. O fuoe o mɛŋi yis tʋʋmbɛ'ɛd dim zin'igin, ka Wina'am dʋ'ʋs o gaad saŋgbauŋ.
27 O pʋ nwɛnɛ maanmaan kpɛɛm bama la, banɛ ka li nar ye ba maal maana daar wʋsa ba mɛŋ tʋʋmbɛ'ɛd yɛla yiiga, ka nyaan maal nidib la yɛla la. On lɛɛ nɔknɛ o mɛŋi maal maannɛ ba tʋʋmbɛ'ɛd la yɛla vuguri.
28 Wada la gaŋ maanmaannib kpɛɛmnam banɛ an dap ka mɔr gbɛlʋŋ la; amaa Wina'am zi'el nɔɔr linɛ yuolim kɛn wada la nya'aŋ na ka gaŋ Biig onɛ an sʋm ka ka' gbɛlʋŋ la saŋa kanɛ ka' naarɛ.
HIBIRU DIM 8
Yesu onɛ an maanmaan kpɛɛm la yɛla
| 8 |
Tinamɛ pian'ad si'el yɛla la anɛ nwa'. Ti mɔr maanmaan kpɛɛm onɛ zin' girima sɔb na'am gbauŋ datiuŋ arezana ni.
2 Onɛ tʋm Wina'am Pʋ'ʋsim Yir tʋʋma linɛ an Fuug Sʋgʋr amɛŋa ka Zugsɔb la mɛŋ maal, ka ka' ninsaala.
3 Ba gaŋid maanmaan kpɛɛm wʋsa ye o tis piini ka maal maana tis Wina'am. Alazug li mɛ nar ye ti Maanmaan Kpɛɛm kaŋa nwa' mɛ mɔr si'eli na tis Wina'am.
4 Ka o ya'a bɛɛn dunia nwa' ni, o kʋ aan maanmaan baa bi'elaa, bɔzugɔ maanmaannib banɛ tisid piini linɛ dɔl wada suor la pʋm HIBIRU DIM 8
bɛ.
5 Ba tʋʋma zin'ig nwaasnɛ wʋʋ Wina'am Pʋ'ʋsim Yir linɛ bɛ arezana ni la. Alazug ka Moses n da ye o ti' Fuug Sʋgʋr linɛ na an Wina'am zin'ig la, Wina'am da pa'al o ye, “Gu'usim ka maali li ka li nwɛnɛ mam pa'alif si'em zuor zug la dede.”
6 Amaa nɔnaar kanɛ ka Kristo an nu'unwɛ'ɛd la, an sʋm gat nɔnaar kʋdʋg la, bɔzugɔ li mɔr nɔzi'ela nɛ kaanb sʋma.
7 Ka yiiga nɔnaar la ya'a da pʋ mɔrin gbadaa, li pʋ narin ye ti mɔr nɔnaar si'a ya'asɛ.
8 Amaa Wina'am n da nyɛ ka nidib la mɔr gbada la zug, ka o yɛl o gbauŋʋn ye, “‘Dabisa kenna ka m na maal nɔnapaal nɛ Israel dim nɛ Juda dim la.
9 Li kʋ nwɛnɛ nɔnaar kanɛ ka m da maal nɛ ya yaanam saŋa kanɛ ka m da gban'e ba nu'ug ka mɔri ba yi Egipt teŋin la, bɔzugɔ, ba da san'amim nɔnaar la dinzug ka m da basi ba.’ Zugsɔb la yɛl si'em la.
10 ‘Nɛ'ɛŋa an nɔnaar kanɛ ka m na maal nɛ Israel dim dabisban la nya'aŋ’, Zugsɔb la yɛl si'em la, M na nɔki m wada la niŋi ba pʋtɛn'ɛrin ka sɔbi li ba sʋnya ni. M na aan ba Wina'am, ka ban mɛ na aan m nidib.
11 Sɔ' kʋ lɛm pa'al o tiraan bɛɛ o ba'abiig ye, ‘Baŋim Zugsɔb la,’ bɔzugɔ ba wʋsa na baŋ mam, lin yii ba biisin paae ba kpɛɛmnamin.
12 M na kɛɛ ya tʋʋmbɛ'ɛd taal wʋsa bas ka kʋ lɛn tiɛn li yɛla ya'as baa bi'ela.”
13 Ka Wina'am n buon nɔnakaŋa ye, “bʋmpaal” la zugʋ kɛ ka yiiga bʋn la an bʋnkʋdir. Ka linɛ lieb bʋnkʋdir ka lɛn ka' tʋʋm la na mɛlim.
HIBIRU DIM 9
Nɔnaar kʋdig nɛ nɔnapaal la malʋŋ yɛla
| 9 |
Nɔnaar kanɛ da maal yiiga la da mɔr maana suoya nɛ Wina'am pʋ'ʋsim zin'ig linɛ bɛ dunia ni.
2 Ba da maalnɛ Fuug Sʋgʋr ka bɛŋi li, ka fita zi'esir bɛɛ li ni, nɛ teebul nɛ bodobodo linɛ an piini tisid Wina'am la. Zin'ikan la ka ba buon ye Kasi Zin'ig la.
3 Ka fuug linɛ bɛŋ Fuug Sʋgʋr la nya'aŋ la mɔr dɔɔg linɛ buon ye Kasi Wʋsa Kasi Zin'ig.
4 Li da mɔr maan daka linɛ ka ba nɔk sanlima maal, ka nyu'od tudaari li zug. Ka Nɔnaar Daka linɛ ka ba bʋlig nɛ sanlima la mɛ bɛ, ka sanlima yubig bɛɛ li pʋʋgin, ka manna linɛ da an diib ka Wina'am da tisi ba mɔɔgin la mɛ bɛ yubig la pʋʋgin, ka Aaron dansaar linɛ da bus vaand la nɛ kuglamma banɛ ka Wina'am nɔnaar sɔbi li zug la mɛ bɛ.
5 Ka Kerubnam banɛ ka ba nɔk sanlima kud ka ba an bʋnkɔnbid linɛ pa'an Wina'am paŋ la bɛ daka la zug, ka ba kpʋkpama ma'asim pil suguru sɔsʋg liŋ la. Amaa nannanna ti kʋ nyaŋi pian' bama yɛla naae nyainnɛ.
6 Ka ban maali maal si'el wʋsa naae wʋʋ lin nar si'em la, maanmaannib la kpɛn'ɛd zin'ikanɛ bɛŋ la ni saŋa mɛkama maannɛ ba maana.
7 Amaa maanmaan kpɛɛm la ma'aa kpɛn'ɛd dɔkanɛ bɛ pʋʋgin sa la ni yʋʋm wʋsa pʋʋgin nɔɔr yinne. O pʋ kpɛn'ɛd nɛɛm, amaa o mɔri maan ziim kpɛn'ɛdi tisid Wina'am o mɛŋ yɛla nɛ nidib la tʋm tʋʋmbɛ'ɛsi'a ka zi' la yɛla.
8 Nɛ'ɛŋa ka Wina'am Siig Kasi la pa'al ye yiiga Fuug Sʋgʋr la nan kpɛn zi'e la, suor kae na kpɛn' Wina'am Kasi Wʋsa Kasi Zin'ig la nii; bɛŋir la nan bɛ la zug.
9 Nɛ'ɛŋa nwa' mamis nɛ pa'al saŋa kaŋa yɛla. Nɔnaar kʋdig saŋa la, ba da tisid piini ka kʋʋd kɔnbidi maan maana ka li kʋ nyaŋi kɛ ka banɛ pʋ'ʋsid la pʋtɛn'ɛr nie nyainnɛ.
10 Li yɛla anɛ diib nɛ nuub nɛ Wina'am ku'om sʋʋb kɔn'ɔb-kɔn'ɔb nɛ niŋgbiŋ wada ma'aa linɛ zi'e ti paae saŋkanɛ ka Wina'am yʋ'ʋn na maali li sʋ'ʋŋa la.
11 Ka Kristo da kena wʋʋ maanmaan kpɛɛm zaŋi ken bʋnsʋma banɛ pʋn bɛ la, o da kpɛn' pʋ'ʋsim dɔtita'ar linɛ an sʋm gaad Fuug Sʋgʋr linɛ ka saalib maal la. Li bɔɔdi pa'al ye li pʋ paas bʋn banɛ ka ba maal dunia nwa' zug la.
12 O da pʋ kpɛn' Kasi Wʋsa Kasi Zin'igin la nɛ bʋʋs ziim bɛɛ niigi ziim maal maana tis Wina'am. Amaa o lɛɛ zaŋ o mɛŋ ziim bɔ faangir suor linɛ ka' naari tisi ti.
13 Bʋʋs nɛ Niigi ziim nɛ na'asa'abil kanɛ ka ba nyu'oe la tampɛligim ya'a yugus banɛ ka malima pʋʋgin kɛ ka ba ka' nyain la niŋgbina, ka di nyaŋi pie ba niŋgbina ka ba an nyainnɛ,
14 Kristo ziim yʋ'ʋn na niŋ wala? Li na tʋm gaad ala bɛdegʋ, ka na pie ti tʋʋmbɛ'ɛd linɛ ta'asid kum na la, ka kɛ ka ti pʋtɛn'ɛr an nyain ka ti tʋm Wina'am onɛ vʋe la tʋʋma. Li anɛ Kristo onɛ nɔk o mɛŋi tis Wina'am ka gba'ar kae, ka li yinɛ Wina'am Siig Kasi kanɛ bɛ saŋa linɛ ka' naar la ni na.
15 Nɛ'ɛŋa zug, Kristo anɛ nu'unwɛ'ɛd nɔnaar paallin la, ye banɛ ka Wina'am buoli ba la na di'e kaanb sʋŋ kanɛ ka' naarɛ; bɔzugɔ nannanna Kristo kum tisi ba yɔlisim ba tʋʋmbɛ'ɛd banɛ ka ba da tʋm nɔnakʋdʋgin la.
16 Sɔ' ya'a yɛli zi'el onɛ na ti dii o faar, asɛɛ ka ba ti pa'al ye onɛ zi'el nɔɔr la sid kpiya.
17 Ka onɛ zi'el nɔɔr la ya'a kpɛn vʋe, pian'ʋk la pʋ kpi'ema, asɛɛ ka o ti kpi ka li yɛla duoe.
18 Ala mɛnɛ kɛ ka yiiga nɔnaar la da pʋ tʋm tʋʋma, ka li ya'a ka' ziim ti yii.
19 Moses n da mɔɔl Wina'am nɔɔr yɛlʋg la wʋsa nidib la wʋsa ni la, o da nɔk na'abibis ziim nɛ bʋʋs ziim nɛ ku'om ka nɔk pɛ'og kɔnbid nɛ nyulinnyu'us la zu'as nɔnaar gbauŋ la nɛ nidib la wʋsa,
20 ka yɛl ye, “Zikaŋa ka Zugsɔb nɔk ye o maal nɔnaar nɛ ya ka tis nɔɔr ye ya siaki li la.”
21 Ala mɛn ka Moses da zu'as ziim la Fuug Sʋgʋr la zug nɛ Wina'am malʋŋ la'ad la wʋsa zug.
22 Ya'a an sida, Wina'am wada la gban'anɛ viki ye asɛɛ ba pie si'el wʋsa nɛ ziim ka li lieb nyain. Ka ziim ya'a pʋ yii, tʋʋmbɛ'ɛd mɛ kʋ yii.
Kristo malʋŋ linɛ yis tʋʋmbɛ'ɛd la yɛla
23 Alazug ka li da nar ye ba maal malima ka bʋmbanɛ nwɛnɛ arezana bʋnam la lieb nyain, amaa li anɛ tilas ye bʋmbanɛ bɛ arezana la maana an sʋm gat ala.
24 Amaa Kristo da pʋ kpɛn' Wina'am Pʋ'ʋsim Yir linɛ ka saal nu'us maali li ka li tu'as bʋn linɛ aan amɛŋa laa, ka lɛɛ kpɛn' arezana mɛŋirin ka nie Wina'am tuonnɛ zi'e ti nɔba zug.
25 O mɛ pʋ nɔk o mɛŋi maal maannɛ tis Wina'am daar wʋsa wʋʋ maanmaan kpɛɛm kpɛn'ɛd Kasi Wʋsa Kasi Zin'igin yʋʋm-yʋʋm nɛ ziim linɛ ka' o mɛŋ ziim laa.
26 Li ya'a aan ala, o naanɛ namisidin daar wʋsa dunia pin'ilʋgʋn sa. Ka lin an si'em la, o nie vuguri yʋma naar bɛn ye o kad tʋʋmbɛ'ɛd nɛ on nɔk o mɛŋi maal maan la.
27 Li anɛ tilas ye saal wʋsa kpi vuguri ka li nya'aŋ ka sariakadib bɛ la.
28 Ala mɛn ka Kristo nɔk o mɛŋi maal maan vuguri ye o di'e nidib bɛdegʋ tʋʋmbɛ'ɛdi bas. Ka o ya'a ti lɛb na, o pʋ ye o lɛn nɔknɛ nidib taali basɛ, amaa o ye o mɔri faangir na tis banɛ gur o la.
HIBIRU DIM 10
Kristo kpi vuguri tis sɔ' wʋsa
10
Wada kanɛ ka Wina'am da tis Jew dim la nwaasnɛ bʋnsʋma linɛ aan amɛŋa ka nan kenna la, ka lɛɛ ka' yinne nɛ linɛ aan amɛŋa la. Bɔzugɔ ba da maan maana yʋʋm-yʋʋm ka li pʋ kɛ ka banɛ li'el Wina'am la lieb sʋ'ʋm nyainnɛ.
2 Ka maan bama ya'a da kɛt ka banɛ pʋ'ʋsid la liebid nyain, ba kʋ lɛm mi'in tʋʋmbɛ'ɛsi'a ba pʋtɛnda nii. Alazug, ba naan basin maana maalʋg
3 Amaa maan bama tɛɛnsidi ba tʋʋmbɛ'ɛd yɛla yʋʋm-yʋʋm;
4 bɔzugɔ na'araad nɛ bʋʋs ziim kʋ nyaŋi yis tʋʋmbɛ'ɛdi basɛ.
5 Dinzug, Kristo da kɛn dunia ni na la, o da yɛl Wina'am ye, “Fʋ pʋ bɔɔd bʋnkɔnbid nɛ zʋʋd malimaa, amaa ninsaal niŋgbiŋ linɛ ka fʋ maali tisim la.
6 Nyu'or maana nɛ tʋʋmbɛ'ɛd maana da pʋ ma'ae fʋ sʋnfɔ.
7 Ani ka m yɛl ye, ‘Manɛ nwa', m kenna; li pʋn sɔbi m yɛla Gbauŋʋn la. O Wina'am, m bɔɔd ye m tʋmi fʋ bɔɔdim.’”
8 Kristo da pʋn dɛŋi yɛl ye, “Fʋ pʋ bɔɔd bʋnkɔnbid piini linɛ nyu'od nɛ maana nɛ piini wʋsa, bɔzugɔ, li pʋ malisi fʋ sʋʋnrɛ.” O yɛl nɛ'ɛŋa la'an nɛ ban daa dɔl wada suori maannɛ li la.
9 Ka yʋ'ʋn yɛl ye, “Gɔsima, m kena ye m maali fʋ bɔɔdim.” Wina'am kpiis yiiga malima la, ka zi'el linɛ tia'al la.
10 Ka Yesu niŋ Wina'am bɔɔdim ka nɔk o mɛŋ niŋgbiŋi maal maannɛ tisi ti vuguri, ka ti lieb Wina'am nidib ka an nyain.
11 Ka maanmaannib wʋsa zi'e ba tʋʋma ni daar wʋsa maan maana pɛndigid ka li kʋ nyaŋi yis tʋʋmbɛ'ɛdɛ.
12 Amaa Kristo da nɔk o mɛŋi maal maan vuguri nidib tʋʋmbɛ'ɛd yɛla la, ka yʋ'ʋn zin'in Wina'am datiuŋʋ
13 ti paae saŋkanɛ ka o dataas na lieb o nɔba kʋk.
14 Ka maan vugur la kɛ ka banɛ ka o kɛ ka ba lieb Wina'am nidib la an kasi saŋa wʋsa.
15 Ka Wina'am Siig Kasi mɛ dii o kasɛti tisi ti ka ye,
16 “‘Nɛ'ɛŋa an nɔnaar kanɛ ka m na maal nɛ ba dabisbanɛ kenna la,’ Zugsɔb la yɛl si'em la. M na nɔki m wada la niŋi ba sʋnya ni ka sɔbi li ba pʋtɛn'ɛrin.”
17 Ka lɛm paas ye, “Ba tʋʋmbɛ'ɛd nɛ ba wada ki'isʋg la M kʋ lɛn tiɛn li yɛla ya'asɛ.”
18 Ka Wina'am sadigim yisi ba tʋʋmbɛ'ɛdi bas la, li pʋ lɛn nar ye ba maal maan tʋʋmbɛ'ɛd yɛlaa.
Tinamɛ na li'el Wina'am si'em la yɛla
19 Dinzugɔ m ba'abiisɛ, ti yʋ'ʋn mɔr sʋnkpi'euŋ ye ti na tun'e kpɛn' Kasi Wʋsa Kasi Zin'igin la Yesu ziim la zug.
20 O maal nyɔvʋr suopaalig amɛŋa ka li gat fukanɛ daa giŋ Wina'am dɔɔgin la; ka linɛ aan o niŋgbiŋ la.
21 Tinam mɔr maanmaan tita'ar onɛ gur Wina'am yidim.
22 Dinzugɔ, kɛlli ka ti li'el Wina'am nɛ ti sʋnf wʋsa nɛ yadda linɛ ka' bi'esʋgɔ, nɛ sʋnya linɛ ka ba pie ka li an nyain ka taal kae ka pie ti niŋgbina nɛ ku'osʋŋ.
23 Ka gban'e ti'ir kanɛ ka ti mɔr ka mɔɔnnɛ di yɛla paalʋ la kiŋ-kiŋ; bɔzugɔ Wina'am onɛ zi'el nɔɔr la anɛ sida sɔb.
24 Kɛlli ka ti tɛn'ɛsi tinamɛ na niŋ si'em ka kpɛmis taaba nɛ nɔŋilim nɛ tʋʋm sʋma.
25 Ka da bas taaba la'asʋg wʋʋ sieba niŋid si'em laa, amaa ya kpɛmisim taaba, sʋ'ʋŋa yanamɛ nyɛ ka Zugsɔb ken dabisir la li'el la.
26 Ti ya'a di'e Wina'am sida la ka kpɛn tʋm tʋʋmbɛ'ɛd nɛ pɔn'ɔsim, maana lɛn kae na yis tʋʋmbɛ'ɛdɛ.
27 Asɛɛ ka ti mɔr dabiem pʋtɛn'ɛr nɛ sariakadib nɛ bugum linɛ ye li di Wina'am dataas la.
28 Sɔ' ya'a da san'am Moses wada la, ka kasɛtib ayi' bɛɛ atan' bɛ, ba kʋ zɔɔ o nimbaanliga, asɛɛ o daana kpi.
29 Onɛ nɛ'ɛs Wina'am Biig la, ka nɔk nɔnaar ziim linɛ kɛt ka o an Wina'am nid la niŋid yɔri-yɔri ka tʋ'ʋd Siig Kasi onɛ pa'an Wina'am yɛlsʋm la, li namisʋg na an wala? Asida, on din na gaad ala.
30 Ti mi' Wina'am yɛl si'em ye, “Sam yɔɔb anɛ m din ka mam na yɔɔ li.” Ka lɛn yɛl ya'as ye, “Zugsɔb la na kad o nidib saria.”
31 Li mɔr dabiem nɛ nidi na kpɛn' Wina'am Onɛ Vʋe la nu'usin.
32 Tiɛnmi saŋa kanɛ ka ya da di'e Wina'am yɛlsida nɛɛsim la. Ya mɔdig nɛ sʋnkpi'euŋ ka nyɛ namisʋg bɛdegʋ ka nyaŋi zi'en kiŋ-kiŋ.
33 Ka saŋa sieba ka ba tʋ'ʋdi ya ka namisidi ya nidibin. Ka saŋa sieba mɛn ka ya siaki zi'e nɛ ya taaba banɛ ka ba namisidi ba.
34 Ya zɔ banɛ bɛ sanrega ni la nimbaanlig, ka siak nɛ sumpielim ka ba faaɛn ya la'ad bɔzugɔ ya mi' ye ya mɛŋ mɔr la'asʋma linɛ gat nɛ'ɛŋa linɛ kʋ san'am.
35 Dinzugɔ, da basi ya sʋnkpi'euŋ linɛ mɔr nyɔɔd bɛdegʋ la,
36 ka li nar ye ya mɔr summɔdigir ye ya niŋ Wina'am bɔɔdim ka di'e o nɔzi'elʋg la.
37 Ka li sɔb ye, Wina'am yɛl ye, “Li kpɛlim bi'ela, ka onɛ kenna la kena ka kʋ yuugɛ.
38 Ka pʋpielim sɔb na vʋenɛ o yadda niŋir zug. Ka o sɔb ya'a nyɔbigidi lɛbid nya'aŋ, m sʋnf kʋ malis nɛ o sɔba.” Tinam ka' banɛ nyɔbigidi lɛbid nya'aŋ ka paamid san'auŋ la, amaa ti anɛ banɛ niŋ yadda ka paam faangir.
HIBIRU DIM 11
Yadda niŋir yɛla
11
Yadda niŋir anɛ dinɛ ka ti mɔr ti'ir viki ye ti na paam ka nam pʋ nyɛ nɛ ninii.
2 Yadda niŋir zug ka Wina'am da pian' kʋdimin dim yɛla sʋ'ʋŋa.
3 Yadda niŋir zug ka ti baŋ ye Wina'am da pian'anɛ ka dunia la maal. Alazug, o da zaŋnɛ linɛ ka ti pʋ nyɛt nɛ ti nini la maal linɛ ka ti nyɛt nɛ nini.
4 Yadda niŋir zug ka Abɛl da maal maannɛ tis Wina'am, ka li an sʋm gaad Kain maan la. O yadda niŋir zug ka Wina'am di'e o piini la ka pian' o yɛla sʋ'ʋŋa ye o anɛ pʋpielim sɔb. Ka o yadda niŋir zugɔ, hali baa on kpi la, ba kpɛm tiɛnd o tʋʋma yɛla.
5 Yadda niŋir zug ka Wina'am da nɔk Enok n dʋ agɔl ka o pʋ kpii, ka li nya'aŋ ba pʋ lɛn nyɛɛ o, on da nɔk o la zug. Ka on da nam pʋ nɔk o la, ka Wina'am yɛl ye o tʋʋma ma'ad o sʋʋnr.
6 Ka yadda niŋir ya'a kae, sɔ' kʋ nyaŋi ma'ae Wina'am sʋʋnrɛ. Alazug, onɛ bɔɔd ye o li'el Wina'am, asɛɛ o siak ye o bɛ, ka mɛ siak ye o na tis banɛ ieed o nɛ yɛlmɛŋir la ba yɔɔd.
7 Yadda niŋir zug ka Wina'am da dɛŋi sa'al Noa nɛ nimmua nɛ yɛlbanɛ ka sɔ' nan zi' nyɛ la, ka o siaki maal anrʋŋ tita'ari faaɛn o yidim la. Noa yadda niŋir tʋʋma pa'al ye dunia dim ka' sʋ'ʋm. Ka o di'e nɔzi'elʋg linɛ an pʋpielim ka yi o yadda niŋirin la.
8 Abraham yadda niŋir zug ka Wina'am da buol o ka o siak Wina'am nɔɔr, ka yii keŋ teŋ kanɛ ka o na ti di'e digil o yaas ka li aan ba faar la, la'an nɛ on da zi' on ken teŋ si'a la.
9 Ka yadda niŋir zug, ka Abraham da kpɛn' teŋ kanɛ ka Wina'am da kaanbi tis o la, hali ka bɛ fuug sʋgʋrin wʋʋ o anɛ saan nɛ. Isaak nɛ Jakob mɛ da di'e faar kan la.
10 Ti yaab Abraham daa guri teŋ kanɛ ka Wina'am mɛŋ-mɛŋ na ɛɛnb ka lɛn mɛɛ li la.
11 Yadda niŋir zug ka hali baa Abraham da kʋdigi galis ka o pu'a Sara mɛ an kʋndu'ar la, o da nyaŋi du'a ka li anɛ on da niŋ yadda ye Wina'am kaanb si'el la li na niŋ ala la.
12 Dinzug ka dau onɛ da kʋdig ka pʋ lal nɛ kum la ni ka yaas bɛdegʋ yina galisi nwɛnɛ nwadbibis nɛ, ka lɛn nwɛnɛ mu'ar nɔɔrin tanbin'isi nɛ.
13 Nimbama wʋsa kpinɛ nɛ yadda ka nam pʋ di'e nɔzi'ela laa, amaa ka nyɛɛ li lalli, ka ba sʋnya malis, ka ba siak ye ba anɛ saam nɛ zɔɔma dunia ni.
14 Ka banɛ pian'ad anwa la, pa'al ye ba ieednɛ ba mɛŋ teŋ.
15 Ba ya'a da tɛn'ɛsid teŋ kanɛ ka ba yi la na, ba naan bɔɔdin suor ye ba lɛb ani.
16 Ka lin an si'em la, ba bɔɔdnɛ arezana linɛ an teŋ sʋŋ hali la. Dinzugɔ, Wina'am pʋ zɔt nyan nɛ ban na buol o ye ba Wina'am. Bɔzugɔ, o ti'eb teŋi tisi ba.
17 Ka yadda niŋir zug ka Wina'am da ye o kpans Abraham gɔs la, o siaki zaŋ o biribiŋ yimmir Isaak ye o maal maannɛ tis Wina'am. Abraham an onɛ ka Wina'am da kaanb ye o na tis o biig, amaa nɛ lin wʋsa o siak ye o zaŋ o biribiŋ yimmir la maal maan la.
18 Wina'am da yɛl o ye, “Li anɛ Isaak tuŋʋn ka fʋ na paam yaas banɛ ka m kaanbi zi'el la.”
19 Abraham da mi' ye Wina'am tun'e vʋ'ʋg Isaak kumin, alazug li sid nwɛnɛ Abraham da di'e Isaak nɛ kumin.
20 Yadda niŋir zug ka Isaak tis Jakob nɛ Esau wʋsa albareka.
21 Yadda niŋir zug ka Jakob da bɔɔd kum ka tis Josef biis ayi' albareka, ka zaŋ o mɛŋi dɛllim o dansaar ka wɔ'ɔg Wina'am.
22 Yadda niŋir zug ka Josef n da bɔɔd kum la, ka yɛl Israel dim ye ba na ti yi Egipt teŋin, ka zi'el nɔɔr ye ba ya'a ti yiti lɛbidi ba mɛŋ teŋin la, ban nɔkim o niŋgbiŋ la mum anina.
23 Yadda niŋir zug ka Moses ba' nɛ o ma da su'a o nwadis atan' ka pʋ zɔ dabiem nɛ na'ab la tis wada si'a la, bɔzugɔ ba da nyɛ ka o an bivɛnliŋ hali.
24 Yadda niŋir zug ka Moses da nɔbig, ka zan'as ye ba da buol o Na'ab Faaro pu'ayua biiga.
25 O gaŋ ye o la'am namis nɛ Wina'am nidib la gat on na nyɛ tʋʋmbɛ'ɛd malisim linɛ pʋ ya'asid naarɛ.
26 Ka siak ye ba ya'a tʋ' o Kristo yɛla, li an sʋm gat kpan'am linɛ bɛ Egipt teŋgbauŋʋn wʋsa, bɔzugɔ o mɔr pʋtɛn'ɛr ye o mɔr yɔɔd ka li bɛ tuon.
27 Yadda niŋir zug ka o bas Egipt ka pʋ zɔ dabiem nɛ Na'ab la sʋnpɛɛnnɛ ka mɔdig, bɔzugɔ o nyɛ Wina'am onɛ ka ninsaalib pʋ nyɛt nɛ ba nini la.
28 Yadda niŋir zug ka o kɛ ka ba maan Kum Maliak Gaadʋg maan, ka misidi ba yaŋa nɛ ziim la ye maliak onɛ kʋʋd bikpɛɛmnam la da kʋ Israel dim bikpɛɛmnama.
29 Yadda niŋir zug ka Israel dim da lɔ'ɔŋ Atɛuk Zɛn'ug la wʋʋ ku'om ɛɛn kpiɛn ka kɛ teŋ kpi'emis si'em la, ka Egipt dim mɛ tu'as ye ba lɔ'ɔŋ ka ku'om la dii ba.
30 Yadda niŋir zug ka Jeriko teŋ zaŋguom bɛda la da lu, saŋkanɛ ka Israel dim da keŋ gilig teŋ la daar wʋsa nɔɔr yinne keŋ paae daba ayɔpɔi la.
31 Yadda niŋir zug ka Rahab onɛ da an pu'agɔɔndir la tilig, on da di'e nimbanɛ kena ye ba labisi gɔs Jeriko teŋ la, ka pʋ kpi nwɛnɛ banɛ da zan'as la.
32 Bɔ ka m na lɛn yɛl ya'asɛ? M ka' saŋa na pian' Gideon nɛ Barak nɛ Samson nɛ Jefita nɛ David nɛ Samuel nɛ Wina'am nɔdi'esidib la yɛlaa.
33 Ba yadda niŋir zug ka ba nyaŋ na'anam sʋ'ʋlim, ka sʋ'oe nidib nɛ yɛlsida, ka di'e nɔzi'ela, ka kpar gbigima nɔya,
34 ka bʋk bugum la paŋ, ka pɔns nɛ zaba sʋ'ʋraug, ka nyɛ paŋi ba tadimisin ka lieb paŋ dim zaba ni, ka nyaŋ teŋ zʋŋ zabzabidib.
35 Yadda niŋir zug ka Wina'am da nie pu'abanɛ nidibi kpi la tisi ba. Ka sieba namisid bɛdegʋ ka zan'as yɔlisim, bɔzugɔ ba bɔɔd ye ba ti vʋ'ʋg kumin ka nyɛ nyɔvʋr paal.
36 Ba da la'adi ba sieba ka fiebid sieba, hali ka lɔ sieba kpɛn'ɛs sanrega ni,
37 ka lɔb sieba nɛ kuga kʋ, ka nɔk kampinta sʋ'ʋgʋ buak sieba zin'is ayi', ka kʋ sieba nɛ sʋ'ʋraad. Ka sieba yɛ pɛ'ɛs nɛ bʋʋs gbana yiridi gin ka pʋ mɔr si'el si'ela, ka ba namisidi ba ka niŋidi ba linɛ pʋ nara.
38 Ba da kʋdim yiridnɛ gin wʋʋ ba pʋ nar ye ba bɛ dunia nwa' nii. Ba da ginnɛ mɔɔgin nɛ zuoya ni ka gbɛɛnd bʋmbu'adin nɛ tampinlɛma ni.
39 Hali baa ba yadda niŋir yɛla kɛ ka ba nyɛ yʋ'ʋsʋŋ la, ba sɔ' da nam pʋ di'e Wina'am kaanbʋg la;
40 bɔzugɔ, Wina'am da pʋn dɛŋi gban'e ye o maal bʋnsʋma banɛ gaad ala tisi ti. Ka li anɛ tinam nɛ banɛ na lieb yinne na kɛ ka ba an nyain ka gba'ar kae.
HIBIRU DIM 12
Wina'am tʋbtɛɛgiri pa'annɛ o nɔŋilim si'em
12
Dinzugɔ nidib bɛdegʋ banɛ mɔdig namisʋgʋn sadigim giligi ti la, kɛlli ka ti mɛ basi zitɛbisa nɛ tʋʋmbɛ'ɛd linɛ gban'e ti kiŋ-kiŋ la, ka mɔdigi zɔ zɔɔs linɛ bɛɛ ti tuon la.
2 Ka gɔsid Yesu onɛ aan ti yadda la pin'ilʋg nɛ onɛ na lɛn naae li sʋ'ʋŋa la. Sumalisim linɛ daa digi gur o la HIBIRU DIM 12 zug ka o daa mɔdig dapuudir la zug, ka pʋ zɔɔ li nyannɛ, ka yʋ'ʋn zin' Wina'am na'am gbauŋ datiuŋ.
3 Tɛn'ɛsimi tʋʋmbɛ'ɛd dimi daa ki'is o ka namis o ka o mɔdig si'em, ka li sʋŋ ka ya giinla da siɛn ka ya tadigɛ.
4 Yanamɛ zabid nɛ tʋʋmbɛ'ɛd la, ya pʋn nam pʋ paae zin'ikanɛ ka ba na kʋʋ ya.
5 Da tam sa'al kanɛ bɛ Wina'am gbauŋʋn linɛ kpɛmisidi ya wʋʋ saamnamɛ san'anɛ ba biis si'em la ye,
“M biiga, da nɛ'ɛs Zugsɔb la sa'alʋgɔ; o ya'a zɛrigif, fʋn da kɛ ka fʋ sʋnf pɛligɛ.
6 Bɔzugɔ, Zugsɔb la tɛɛgidnɛ banɛ ka o nɔŋ la tʋba, ka namisid banɛ wʋsa ka o siak ye ba anɛ o biis la.”
7 Siakimi namisʋg wʋʋ saamnamɛ tɛɛgidi ba biis tʋba si'em la; bɔzugɔ, ya ya'a paam namisʋg, li pa'al ye Wina'am maannɛ ya nɛ wʋʋ o biis nɛ. Biig na tun'e ba ka o saam pʋ tɛɛgidi o tʋbirɛ?
8 Wina'am ya'a basi ya ka pʋ tɛɛgidi ya tʋba wʋʋ saamnamɛ niŋidi ba biis si'em la, li pa'al ye ya anɛ tampiinb ka ka' o mɛŋ biisɛ.
9 Li ya'a anɛ ti dunia nwa' saamnam, ba tɛɛgidi ti tʋba ka ti kpɛn tisidi ba na'asi. Ka li ya'a aan ala, wala ka ti kʋ sigisi ti mɛŋi tisi ti Ba' Wina'am onɛ sʋ'oe ti siis nɛ ti vɔm la.
10 Ti dunia nwa' saamnam tɛɛgidi ti tʋba saŋa bi'ela nwɛnɛ ban tɛn'ɛs ye li nar si'em. Amaa Wina'am ya'a tɛɛgi ti tʋba, o niŋidnɛ ti sʋ'ʋm zug ye li kɛ ka tinam nɛ on la'am bɛ kasi bɛllim.
11 Ba ya'a ti tɛɛgidi ti tʋba, li zabidi ti nɛ ka ti sʋnf san'am. Amaa li nya'aŋ ka li nyɔɔd an sumbʋgʋsʋm nɛ pʋpielim tis banɛ nyɛ sʋŋiri li pʋʋgin la.
Sa'alʋg
12 Dinzugɔ ʋgʋsimi ya nu'us banɛ an zɛla la, ka kpɛ'ɛŋi ya duma banɛ bʋk la,
13 ka maal pʋpielim suori dɔl, ka banɛ yadda niŋiri pʋ zu'oe ka nwaas wʋʋ ba anɛ waba la da pɔn'ɔlim naae ka lɛɛ nyɛ laafi.
14 Kpɛ'ɛŋimi ya mɛŋ ka bɛ nɛ sumbʋgʋsʋm nɛ nidib wʋsa ka pɛsigi ya mɛŋi tis Zugsɔb la. Ka mɛŋ pɛsigir ya'a ka'asigɛ, sɔ' kʋ nyɛ Zugsɔb laa.
15 Baŋimi ka sɔ' da gʋ'ʋŋ Wina'am pʋpielim piini la di'erɛ, ka sɔ' da mɔr pitɔɔg linɛ daamid nidib bɛdegʋ.
16 Ka sɔ' da tʋm dian'ad tʋʋma bɛɛ pʋ dɔl Wina'am suor wʋʋ Esau onɛ da zaŋ o kpɛuŋ faari kuos diib yinne yɛla laa.
17 Ya baŋ ye lin nya'aŋ la o da bɔɔd ye o di'e o kpɛuŋ faar la ka o saam zan'as, ka o pʋ nyaŋi tiak linɛ ka o gban'e laa, hali la'an nɛ on da kaasi bɔɔdi li nɛ nimmua la.
18 Ya pʋ keŋ zuokanɛ dit bugum ka ninsaal na tun'e si'is wʋʋ Israel dimi da keŋ Sinai zuorin si'em la. Ba da nyɛ bugum tita'ar nɛ lik nɛ zibisʋg nɛ sisi'em
19 ka wʋm na'atana piebʋg nɛ kʋkɔr kanɛ ka nidib wʋmi li ka bɛlim ye li da lɛm pian' tisi ba ya'asɛ.
20 Ka ba kʋ nyaŋi mɔdig nɔɔr yɛlʋg linɛ ka ba di'e ye, “Hali baa bʋnkɔnbʋg ya'a si'is zuor la, ban lɔm o nɛ kuga kʋ la.”
21 Ban nyɛ si'el la da tɔi hali, ka Moses yɛl ye, “Mam kiridnɛ nɛ dabiem.”
22 Amaa yanam kɛn Zion Zuokanɛ an Wina'am onɛ vʋe la teŋin na ka an Jerusalem amɛŋa linɛ bɛ arezana ni la. Anina ka maliaknam banɛ ka' bɛn la bɛ, ka la'asi maan sumalisim.
23 Ka bikpɛɛmnam banɛ yʋda sɔb arezana ni la mɛ la'asid anina. Ka Wina'am onɛ an si'el wʋsa sariakat ka sʋ'oe si'el mɛkama la, nɛ pʋpielim dim siis banɛ ka ba maali ba sʋ'ʋm naae la mɛ bɛɛ anina.
24 Ya mɛ kenɛ Yesu onɛ an nɔnapaal la nu'unwɛ'ɛd san'an na, ka mɛ kɛn ziim kanɛ ka ba zu'as ka li pian'ad sʋ'ʋŋa gat Abɛl ziim la san'an na.
25 Baŋimi ka da zan'as onɛ pian'ad laa. Ka banɛ zan'as onɛ san'anɛ ba dunia ni la sadigim pʋ nyaŋi luak namisʋg la, ti na niŋ wala zan'as onɛ bɛ arezana nii san'anɛ ti la ka luak namisʋgɔ?
26 O kʋkɔr la da kɛ ka teŋ mi'im, ka nannanna o nɔzi'elʋg la kpɛm bɛ ye, “M na mi'im dunia nɔɔr yinne ya'as, ka ka'anɛ dunia ma'aanɛɛ, amaa la'an nɛ saazug.”
27 On yɛl ye, “M na lɛn kɛ la” pa'annɛ ye bʋn linɛ ka Wina'am maal la na mi'im sʋʋg, ka linɛ kʋ tun'e mi'im la na kpɛlim.
28 Dinzugɔ kɛlli ka ti pʋ'ʋs Wina'am bareka nɛ na'asi nɛ dabiem; tinamɛ na di'e na'am sʋ'ʋlim linɛ kʋ tun'e mi'im la,
29 bɔzugɔ ti Wina'am la anɛ bugum kanɛ kanbid.
HIBIRU DIM 13
Kpɛn nɔŋi taaba nwɛnɛ ba'abiis nɛ.
2 Da basi saam di'esʋgɔ, ka ala ka sieba da maal maliaknam saauŋ ka pʋ baŋ ye ba anɛ maliaknama.
3 Tɛnri banɛ bɛ sanrega ni yɛla nwɛnɛ yanam nɛ banɛ la'am bɛ sanrega ni nɛ. Mɛ tɛnri banɛ ka ba namisidi ba la, nwɛnɛ yanam nɛ banɛ la'am namisid nɛ.
4 Dɔlisimi pu'adiir suor sʋ'ʋŋa, ka da kɛ ka dian'ad tʋʋma bɛ li nii, ka Wina'am na kad pu'asan'auŋ nɛ dausan'auŋ dim la saria.
5 Mɛ da kɛ ka ligid nɔŋilim kpɛn' yaa. Kɛl ka ya sʋnya malis nɛ yanamɛ mɔr si'el la; ka Wina'am yɛl ye, “M kʋdim kʋ basi yaa.”
6 Dinzugɔ, ti yinne-yinne na tun'e pian' nɛ sʋnkpi'euŋ ye, “Zugsɔb la aan m sʋŋid, m kʋ zɔt dabiem. Ninsaal na nyaŋi niŋim bɔ?”
7 Tɛnri ya tuongatib banɛ pian'ad Wina'am pian'adi tisidi ya la. Tɛn'ɛsimini ba nyɔvʋr bɛllim an si'em, ka mɛ tu'asi ba yadda niŋir la.
8 Yesu Kristo pʋ tiakida. On sa an si'em su'os la, ala mɛn ka o an zina, ka na kpɛn aan ala saŋa mɛkama.
9 Da kɛ ka nidib pa'ali ya pa'al yɔɔd kɔn'ɔb-kɔn'ɔb ka li yutimi ya pʋtɛndaa. Li nar ye ti paam sʋnkpi'euŋ linɛ yit Wina'am pʋpielim piini la ni ka ka' diib malima dɔlisʋg linɛ pʋ tisid banɛ dit la nyɔɔdɛ.
10 Ti mɔr maan zin'ikanɛ ka banɛ tʋm Jew dim maan zin'igin la pʋ mɔr suori na di maan kanɛ maal anina laa.
11 Maanmaan kpɛɛm la mɔr bʋnkɔnbid ziim kpɛn'ɛd Kasi Wʋsa Kasi Zin'ig la ni maan tʋʋmbɛ'ɛd maan, amaa ka nyu'oe bʋnkɔnbʋg la la'asʋg zin'ig la yiŋ.
12 Ala mɛn ka Yesu namis teŋ la kpikpɛŋ ye o ziim la pie nidib la ka ba lieb Wina'am nimbanɛ an nyain.
13 Dinzugɔ, kɛlli ka ti yi teŋ la kpikpɛŋi la'am di nyan kanɛ ka o di la;
14 ka dunia nwa' ni, ti pʋ mɔr teŋ kanɛ na bɛ yʋma dinɛ ka' naarɛ, amaa ti ieedi teŋ kanɛ bɛ saazug ka na kena la.
15 Nɛ ti Zugsɔb Yesu yʋ'ʋr zugɔ, kɛlli ka ti keŋi tuonnɛ maal maan kanɛ an wɔ'ɔgir maannɛ tisi ti Wina'am la. Ka linɛ an tinamɛ na ya'ae ti nɔya dʋ'ʋs o yʋ'ʋr ka tis kasɛt ye onɛ aan ti Zugsɔb la.
16 Da basi tʋʋm sʋma maalʋgɔ, mɛ da tami taaba sʋŋirɛ bɔzugɔ, tʋʋm bamanamɛ ma'ad Wina'am sʋʋnr.
17 Siakimi ya tuongatib nɔya ka tʋm ban yɛl ye ya tʋm si'el wʋsa. Banɛ gɔsidi ya yɛla, ka na ti zi'en Zugsɔb la tuonnɛ tu'asi ba tʋʋma an si'em. Siakim tisi nɛ ba, ka ba na tʋm nɛ sumalisim ka da nyɔnna. Ka ba ya'a nyɔn, li kʋ mɔr nyɔɔdi tisi yaa.
18 Sɔsimi Wina'am tisi ti; ka ti mi' ye ti pʋtɛn'ɛr anɛ nyain, ka ti bɔɔd ye ti tʋm si'el wʋsa sʋ'ʋŋa.
19 M kpɛmisidi ya bɛdegʋ sa ye ya sɔs Wina'am, ka m nyaŋi lɛbi ya san'an na tɔ'ɔtɔ.
20 Wina'am onɛ an sumbʋgʋsʋm sɔb ka vʋ'ʋgi ti Zugsɔb Yesu kumin la, onɛ an kɔnbkem onɛ gur pɛ'ɛs la ziim ka kɛ ka ti mɔr nɔnaar nɛ Wina'am saŋa kanɛ ka' bɛnnɛ.
21 Wina'am na maali ya sʋ'ʋŋa nɛ si'el mɛkama ni ye ya tʋm o bɔɔdim, ka tʋm linɛ na ma'ad o sʋʋnri ya ni ka li yi Yesu Kristo onɛ na di'e na'asi saŋkanɛ ka' bɛn la ni. Ami.
22 M ba'abiisɛ, m bɔɔd ye m kpɛmisi ya ka ya di'e sa'al kanɛ ka m sɔb la, m bɔɔd ye ya nɔki li; bɔzugɔ m sɔbi li nɛ giŋa.
23 Baŋimi ye ba yisi ti ba'abiig Timoti sanrega ni bas, ka o ya'a lɛb tɔ'ɔtɔ na, on nɛ mam na la'an kena kaae ya.
24 Pʋ'ʋsimi ya tuongatib la nɛ Wina'am nidib la wʋsa. Banɛ yi Itali teŋin la pʋ'ʋsidi ya.
25 Wina'am yɛlsʋm na bɛ nɛ ya wʋsa. Ami.
JEMES
Gbauŋ nwa' yɛla
Jemes n sɔb gbauŋ kaŋa sʋŋid karimbiis ye ba bɛ bɛllim kanɛ pa'al ye ba tis Wina'am sida. Li anɛ sida ye Kristo karimbiis anɛ banɛ nan mɔr gbɛlima ba tʋʋma nɛ bɛllimin. Alazug ka Jemes sɔb gbauŋ nwa' ye o kɛ ka ba baŋ ka tiaki bɛ din nar ye ba bɛ si'em ka li tis Wina'am yʋ'ʋr girima. Gbauŋ la pa'an karimbiisi na bɛ nɛ taaba si'em nɛ ban na tʋm si'em ka li pa'al ye ba sid niŋ Yesu yadda. Jemes mɛ pa'an karimbiisi na sɔsid Wina'am si'em-si'em ka li tʋm tʋʋma ba mɛŋ nɛ nidib bɛllimin. O pa'an yadda nɛ li tʋʋma yɛla nɛ suguru nɛ mɛŋ gban'ar nɛ makir yɛla.
JEMES 1
Man Jemes onɛ an Wina'am nɛ ti Zugsɔb Yesu Kristo tʋmtʋm la sɔbid gbauŋ kaŋa pʋ'ʋsid Wina'am nimbanɛ widig teŋ-teŋ la.
Makir nɛ kpansib yɛla
2 M ba'abiisɛ makir kɔn'ɔb-kɔn'ɔb ya'a paae ya yanam mɔr sumalisim Yesu Kristo ni,
3 bɔzugɔ ya mi' ye ya ya'a nyɛ makiri ya yadda niŋir pʋʋgin li kɛt ka ya nyaŋidi mɔdigid.
4 Kpɛ'ɛŋimi ya mɛŋ ka mɔdigi paae li bɛn ka gbada kae. Ala ka ya na bi' ya bɛllim pʋʋgin ka kʋ kɔ'ɔŋ si'el, si'ela.
5 Ya'am ya'a pansig sɔ' ya sʋʋgin, on sɔsim Wina'am ka o tis o; bɔzugɔ Wina'am anɛ onɛ tisid nidib wʋsa ka li galisid ka pʋ nyɛt sɔ' taalɛ.
6 Amaa ya ya'a sɔs o, asɛɛ ka ya niŋ o yadda ka da bi'es baa bi'elaa. Bɔzugɔ onɛ wʋsa bi'esid la nwɛnɛ mu'ar ku'opila ka pɛbisim da'ad ka li tuulim si'em la.
7 Niŋkan daana da mɔr pʋtɛn'ɛr ye o na di'e si'el Zugsɔb la san'anɛɛ.
8 Onɛ aan ala anɛ pʋtɛnda ayi' sɔb nɛ onɛ pʋ gban'ad yɛl yinnee.
Nɔŋ nɛ kpan'am yɛla
9 Li nar ka ti ba'abiig onɛ an nɔŋdaan mɔr sumalisim bɔzugɔ ba na dʋ'ʋs o.
10 Amaa kpan'am daan mɛ mɔr sumalisim ba ya'a sigis o, bɔzugɔ o kpan'am la na gaad nwɛnɛ mɔɔd puum gat si'em la.
11 Nwɛnɛ winnigi ɛɛnti dʋ ka li tʋlig ka mɔɔd ziank ka li puum sʋʋg ka li vɛnlim san'am si'em la, ala mɛn ka kpan'am daan na kpi, hali ka nan kpɛm bɛɛ o tʋʋma ni.
Makir yɛla
12 Albareka bɛ nɛ onɛ nyaŋi mɔdig makir pʋʋgin. O ya'a nyaŋ makir la, Wina'am na tis o nyɔvʋr zupibig linɛ an piinkanɛ ka o da zi'el nɔɔri tis banɛ nɔŋ o la.
13 Makir ya'a paae sɔ', on da yɛl ye, “Wina'am makidi ma.” Bɔzugɔ bʋmbɛ'ɛd kʋ nyaŋi mak Wina'am. Alazug Wina'am pʋ makid sɔ'ɔɔ.
14 Sɔ' mɛkama ya'amlɛogʋ pan'asid o ka o kpɛn'ɛd makirin.
15 Ka ya'amlɛog ya'a nɔk pʋʋg li du'adi tʋʋmbɛ'ɛd, ka li mɛ ya'a nɔbig li du'adi kum.
16 M ba'abinɔŋa, da kɛ ka sɔ' ma'aa yaa.
17 Piinkanɛ wʋsa an sʋ'ʋm ka an nyain yitnɛ ti Ba' onɛ bɛɛ agɔl ka maal winnig nɛ linɛ wʋsa kɛt ka li nied nyain la san'an na. O pʋ tiakida ka kpɛn aan o naŋnaŋin.
18 O mɛŋ bɔɔdim ka o maali ti nɛ o yɛlsida pian'ad ye ti an yiiga dim bʋn linɛ ka o maal wʋsa ni.
Onɛ wʋm ka tʋm la yɛla
19 M ba'abinɔŋa, baŋimi nɛ'ɛŋa, sɔ' mɛkama wʋsa kɛlisimi sʋ'ʋŋa ka pian'ad baanlimm, ka o sʋnf da pɛligid tɔ'ɔtɔɔ.
20 Ninsaal sʋnpɛɛn pʋ tʋm Wina'am pʋpielim tʋʋmaa.
21 Dinzug basimi linɛ an dian'ad tʋʋma wʋsa, nɛ tʋʋmbɛ'ɛd linɛ nɔbigid la, ka sie ya mɛŋi di'e Wina'am pian'ad kanɛ ka o zaŋi niŋi ya sʋnya ni la, ka linɛ na nyaŋi faaɛn ya.
22 Da ma'aa ya mɛŋi kɛlisid Wina'am pian'ad la, ka basi lii, amaa siakim tʋmi lin yɛt si'el la.
23 Onɛ wʋsa kɛlis pian'ad la ka pʋ tʋmi lii, nwɛnɛ ninsaali na gɔs gɔtiŋin nyɛɛ o mɛŋi an si'em.
24 On gɔs o mɛŋ ka keŋ la o tam on pa'a an si'em nɛ.
25 Amaa onɛ gɔs Wina'am wada linɛ an sʋm ka tisid yɔlisim la, ka mɔɔd sʋ'ʋŋa, ka pʋ tam on wʋm si'el la, ka siaki tʋmi li, Wina'am na niŋ o bareka on tʋm si'el la yɛla.
26 Onɛ wʋsa tɛn'ɛsid ye o anɛ onɛ dɔl Wina'am, ka pʋ gban'e o nɔɔrɛ, o ma'ad o mɛŋ, ka o Wina'am dɔllim la an zaalim.
27 Wina'am dɔllim linɛ an nyain ti Ba' Wina'am san'an anɛ anwa: fʋn na sʋŋ kpiibis nɛ pʋkɔnya ba fara pʋʋgin, ka da kɛ ka dunia tʋʋmbɛ'ɛd kpɛn' fɔ.
JEMES 2
Baregaŋ la yɛla
| 2 |
M ba'abiisɛ, da dɔllini ti Zugsɔb Yesu Kristo ka lɛm mɔri baregaŋa.
2 Li ya'a nwɛnɛ arezak daani pid sanlima baans ka yɛ fusʋma kpɛn' ya la'asʋgʋn na, ka nɔŋdaan mɛ yɛ kparikɛɛndi kpɛn' na,
3 ka ya tis onɛ yɛ fusʋma la na'asi ka yɛl o ye, “Naa, zin'inim kpɛla,” amaa ka yɛl nɔŋdaan la ye, “Fʋn zi'inim ani sa!” bɛɛ “Zin'inim teŋin!”
4 Ya ya'a niŋ ala, ya pʋ mɔr baregaŋ nɛ pʋtɛn'ɛbɛ'ɛd dimi ya sʋʋgin ka lieb sariakatiba?
5 M ba'abiis banɛ ka m nɔŋa, baŋimi ye ninsieba tun'e an nɔŋ dim dunia nwa' ka Wina'am gaŋi ba ka ba niŋ o yadda nɛ ba sʋnf wʋsa ka ti di'e na'am kanɛ ka o kaanbi zi'el banɛ nɔŋ o la.
6 Amaa ya nɛ'ɛsid nɔŋ dim. Li ka' areza'as dimi namisidi ya ka gban'adi ya ken sariakatib tuon laa?
7 Li ka' banɛ san'amid yʋ'ʋsʋŋ kanɛ ka Wina'am tisi ya laa?
8 Ya ya'a siaki tʋm Wina'am sʋ'ʋlim wada linɛ sɔb Wina'am gbauŋʋn ye, “Nɔŋimi fʋ tiraan wʋʋ fʋn nɔŋi fʋ mɛŋ si'em la,” ya tʋm linɛ an sʋ'ʋm.
9 Amaa ya ya'a mɔr baregaŋ, ya tʋm tʋʋmbɛ'ɛd, ka wada la na pa'ali ya ye ya tʋm taal.
10 Onɛ wʋsa siaki tʋm wada la yɛl si'el la wʋsa, ka san'am yinne, o san'ami li wʋsa.
11 Wina'am onɛ yɛl ye, “Mid ka ya san'am pu'a bɛɛ dau la,” onɛ mɛ lɛn yɛl ye, “Mid ka ya kʋ nid.” Hali baa fʋ ya'a pʋ san'am pu'a ka kʋ nid, fʋ anɛ onɛ san'am wada la.
12 Pian'ami ka tʋm wʋʋ nimbanɛ ka ba na ti kadi ba saria ka li dɔl wada suor linɛ tisid yɔlisim.
13 Wina'am ya'a ti kad saria, o kʋ zɔ nimbaanlig nɛ ninkanɛ pʋ zɔt o taaba nimbaanliga. Bɔzugɔ nimbaanlzɔɔr nyaŋid sariakadib.
Yadda niŋir nɛ li tʋʋma la yɛla
14 M ba'abiisɛ, li sʋ'ʋm an bɔɔ tis ninkanɛ yɛl ye o niŋ Wina'am yadda ka o tʋʋma pʋ pa'alɛ? Yadda niŋir kan la na tilig oo?
15 Li ya'a nwɛnɛ ya ba'abiigi bɛ ka ka' fuugɔ, ka mɛ pʋ mɔr diibi na dii,
16 li sʋ'ʋm an bɔ ka ya yinne yɛl o ye, “Kem nɛ sumalisim, di sʋ'ʋŋa ka pil fuug ka waad da kpɛn' fɔ,” ka lɛɛ pʋ tis o, o niŋgbiŋi bɔɔd si'el la. Li sʋŋir an bɔ?
17 Ala mɛn ka yadda niŋir gʋllim ka tʋʋma kae mɛ an zaalim.
18 Ka sɔ' na yɛl ye, “Fʋn mɔr yadda ka mam mɔr tʋʋma.” Pa'alim mam fʋ yadda niŋir ka li tʋʋma kae, ka mam mɛ na pa'ali fʋ m yadda niŋir nɛ m tʋʋma.
19 Ya niŋ yadda ye Wina'am yinne ma'aa bɛ. Li an sʋ'ʋm. Hali kikiris mɛ siaki li ka kirid nɛ dabiem.
20 Yalim nwa'! Fʋ bɔɔd ye fʋ baŋ ye yadda niŋir ma'aa ka tʋʋma kae pʋ mɔr nyɔɔdɛɛ?
21 Ti yaab Abraham da niŋ wala lieb pʋpielim sɔb Wina'am tuonnɛ? Li anɛ o tʋʋma pʋʋgin, on da zaŋ o biig Isaak ye o kʋʋ maal maannɛ tis Wina'am la.
22 Fʋ nyɛɛ o yadda niŋir nɛ o tʋʋma la'an tʋm nɛ taaba si'em? O tʋʋma la kɛ ka o yadda niŋir la paae li bɛn.
23 Ka linɛ sɔb Wina'am gbauŋʋn la niŋ amɛŋa ye, “Abraham da niŋ Wina'am yadda ka Wina'am gɛlig o yadda niŋir ka yɛl ye o anɛ pʋpielim sɔb o tuon.” Alazug ka Wina'am buol o ye o zua.
24 Ya nyɛ yaa, ninsaal tʋʋma na kɛ ka o lieb pʋpielim sɔb Wina'am tuon ka li ka' o yadda niŋir ma'aanɛ.
25 Li da anɛ ala mɛn, nɛ pu'agɔɔndir kanɛ ka ba buon Rahab la. O tʋʋma zug ka o da lieb pʋpielim sɔb Wina'am tuon, on da di'e Jew dim banɛ ka ba da tʋm ye ba keŋ labisi gɔs teŋ la ka o su'a ba o yin, ka yisi ba ka ba tɔɔm suori kul la.
26 Niŋgbiŋi na bɛ ka siig kae ka li an zaalim si'em la, ala mɛn ka yadda niŋir ya'a bɛ ka tʋʋma kae, li anɛ zaalim mɛn.
JEMES 3
Zilim la yɛla
| 3 |
M ba'abiisɛ, li pʋ sʋ'ʋm ye ya bɛdegʋ mɔɔd ye ya an pa'anniba. Bɔzugɔ ya mi' ye tinam banɛ an pa'annib la ba na ti kadi ti saria ka li kpi'ɛm.
2 Ti wʋsa tʋm tʋʋm linɛ pʋ dɔl suor saŋa bɛdegʋ. Sɔ' ya'a pʋ pian' linɛ pʋ tu'alɛ, o sid anɛ ninsʋŋ amɛŋa ka na nyaŋi kɛ ka o niŋgbiŋ wʋsa tʋm linɛ an sʋ'ʋm.
3 Ti ya'a li'a widi nɛ saliba ye ba niŋ tinamɛ bɔɔd si'el, ti nyaŋidi ba niŋgbina wʋsa ka ba fɛndigidi kpa'ad tinamɛ bɔɔd si'el.
4 Gɔsim anrintitada an si'em, hali la'an nɛ bam bɛdim ka pɛbisim da'adi ba ken la, onɛ dɔribid la tun'e nwɛdigi ba nɛ dabil ka ba keŋ bam bɔɔd zin'isi'a.
5 Ala mɛn ka ninsaal zilim an fiin niŋgbiŋin la, amaa ka nyaŋidi pian'ad nyɛɛsim pian'ad. Gɔsim bugum bi'ela ɛɛnti la'aŋ sian'atita'ari dii li si'em.
6 Zilim mɛ nwɛnɛ bugum nɛ. Li mɔr tʋʋmbɛ'ɛd buudi wʋsa ti niŋgbina ni, ka kɛt ka tʋʋmbɛ'ɛd san'amidi ti niŋgbiŋ wʋsa. Ka kɛ ka bugum linɛ yit Sʋntaana san'an na la la'aŋi ti, ti bɛlim pʋʋgin.
7 Ninsaal na nyaŋi milis niis nɛ bʋnkɔnbid banɛ ken nɛ nɔba, nɛ banɛ vuudi ba pʋʋr zug nɛ banɛ bɛ ku'omin wʋsa.
8 Amaa ninsaal kae na nyaŋi milis o zilimmɛ. Bʋn linɛ wʋsa yit zilimin na tɔi nɛ ka kʋʋd wʋʋ yabid nɛ.
9 Ti mɔr zilimi wɔ'ɔgid ti Zugsɔb onɛ aan ti Ba' la bareka, ka lɛm mɔri li pɔɔd nɔɔri tisidi taaba, banɛ ka Wina'am maal ka ba nwɛnɛ o mɛŋ la.
10 Nɔkanɛ ka o mɔri na'asid Wina'am la nɔkan nɔɔ ka o lɛn nɔkidi pɔɔd nɔɔri tisid o tiraan ya'as. M ba'abiisɛ, li pʋ sʋ'ʋm ka li aan ala.
11 Ku'osʋŋ nɛ ku'otɔɔg na nyaŋi yi bulnɔɔr yinne ni naa?
12 M ba'abiisɛ, ka kekaŋ na nyaŋi wal olif wala? Bɛɛ gaan tiig na nyaŋi wal kekama? Alazug bulkanɛ bʋn ku'otɔɔg mɛ kʋ nyaŋi bul ku'osʋŋɔ.
Ya'am linɛ an zin'isa ayi' la yɛla
13 Anɔ'ɔnɛ mɔr ya'am nɛ baŋiri ya sʋʋginɛ? On pa'alimi li nɛ o tʋʋm sʋŋ linɛ ka o tʋm nɛ sumbʋgʋsʋm nɛ ya'am la.
14 Amaa ya ya'a mɔr fufum nɛ nɛnnim yanam da nwɛ'ɛd nyɔ'ɔg ka ma' ziri zan'as yɛlsida la.
15 Nɛ'ɛŋa ka' ya'am kanɛ yi arezana ni naa. Li anɛ dunia nɛ Sʋntaana bʋn, ka li ka' Wina'am bʋnnɛ.
16 Fufum nɛ nɛnnim ya'a bɛ zin'isi'a, daamʋg nɛ tʋʋmbɛ'ɛd nɛ li buudi wʋsa na bɛɛ anina.
17 Amaa ya'am kanɛ yi Wina'am san'an na la anɛ nyain, ka an baanlimm, ka zɔt nidib nimbaanlig, ka sʋŋid nidib bɛdegʋ, ka tʋm tʋʋm sʋma bɛdegʋ, ka pʋ gaansida ka an pʋʋg yinne.
18 Banɛ an zabpansidib na bun sumbʋgʋsʋm nɛ pʋpielim.
JEMES 4
Dunia zuod la yɛla
| 4 |
Bɔ ka ya zabid ka nwa'asid nɛ taaba? Li ka'anɛ ya niŋgbina ya'amlɛog yɛlaa?
2 Ya bɔɔd si'elnam ka pʋ paam. Ya kʋʋd nidib ka mɔr fufum nɛ ya taaba bʋnam ka pʋ paam. Dinzug ka ya zabid ka nwa'asid nɛ taaba. Ya pʋ mɔra, yanamɛ pʋ sɔs Wina'am la zug.
3 Ya sɔsid ka pʋ paamida, bɔzugɔ yanamɛ pʋ sɔs ka li dɔl suor la zug. Ya sɔsidnɛ si'elnam linɛ aan ya ya'amlɛog bʋn ye ya di.
4 Yanam banɛ an pu'asan'auŋ nɛ dausan'auŋ dim la, ya zi' ye onɛ maal zuod nɛ dunia la anɛ Wina'am dataa? Dinzugɔ onɛ mɛkama bɔɔd ye o maal zuod nɛ dunia na lieb Wina'am dataa.
5 Bɛɛ ya tɛn'ɛs ye linɛ sɔb Wina'am gbauŋʋn ye, Wina'am Siig kanɛ ka o niŋi ti ni la guri ti nɛ dasʋŋ la anɛ zaalim?
6 Wina'am tisidi ti yɔlisim si'a la galis nɛ hali. Alazug ka li sɔb Wina'am gbauŋʋn ye, “Wina'am zan'asid nyɛɛsim dim, ka tisid banɛ siedi ba mɛŋ yɔlisim la.”
7 Dinzugɔ, zaŋimi ya mɛŋi pɛsigi tis Wina'am. Zan'asimi Sʋntaana, ka o na zɔ ka basi ya.
8 Li'elimi Wina'am san'an na ka o mɛ na li'eli ya san'an. Tʋʋmbɛ'ɛd dim nɛ pʋtɛnda ayi', yi dima! Piemi ya nu'us nɛ ya sʋnya.
9 Kaasimi ka fabil nɛ sʋnsa'aŋ. Tiakimi ya la'ab ka li lieb kaasig, ka ya sumalisim lieb sʋnsa'aŋ.
10 Sigisimini ya mɛŋ Wina'am tuon ka o na dʋ'ʋsi ya.
Taaba sariakadib yɛla
11 M ba'abiisɛ, da pian'adi bɛ'ɛdi tisid taaba. Onɛ pian' bɛ'ɛdi tis o tiraan bɛɛ kad o saria, o pian'adi bɛ'ɛdi tisid Wina'am wada la ka kati li saria. Fʋ ya'a kad wada la saria, fʋ pʋ dɔl wada laa, amaa fʋ anɛ onɛ kad wada la saria.
12 Wina'am ma'aa an onɛ tisid wada ka an sariakat. On ma'aa na nyaŋi tis nyɔvʋr ka san'ami li. Ka fʋn tɛn'ɛs ka fʋ aan anɔ'ɔnɛ na kadi fʋ tiraan saria?
Da nwɛ'ɛd nyɔ'ɔg bɛog yɛlaa
13 Kɛlisimi! Yanam banɛ yɛt ye, “Zina bɛɛ bɛog ti na keŋ teŋ kaŋa di yʋʋm anina ka tɔlim nyɛ nyɔɔd la.”
14 Hali ya zi' ya nyɔvʋri saa na an si'em bɛogɔ. Ya nwɛnɛ kpaandʋgʋ ɛɛnti yina ka li niŋ bi'ela ka li gaad la.
15 Li sʋm ka ya ɛɛnti yɛl ye, “Wina'am ya'a bɔɔd, ti na vʋe ka tʋm nɛ'ɛŋa nɛ nɛ'ɛŋa.”
16 Amaa ya pa'annɛ ya mɛŋ ka mɔr nyɛɛsim. Nyɔ'ɔg nwɛ'ɛb bama wʋsa anɛ bɛ'ɛd.
17 Onɛ mɛkama mi' linɛ an sʋm, ka pʋ tʋmi lii, o tʋm tʋʋmbɛ'ɛd.
JEMES 5
Kpan'am dim la yɛla
| 5 |
Arezak dima, kɛlisimi! Kaasimi ka fabili bɔzugɔ sʋnsa'aŋ kennɛ ya san'an na.
2 Ya areza'as pun'oe ya. Yɔɔr mu'a ya fuud. 3 Teŋinzɛn'ɛm kpɛn' ya sanlima nɛ ya anzurifa. Teŋinzɛn'ɛm la na liebi ya kasɛt, ka na dii ya niŋgbina wʋʋ bugum nɛ. Ya la'as areza'asi digili gur naar dabisa la.
4 Ya ma'ad tʋmtʋmnib banɛ tʋmmi ya pɔɔdin, ka mɔŋi ba yɔɔd ka ba kaasidi ziinnɛ ya. Ka ya bunnib la kaasig paae Zugsɔb onɛ an Paŋtita'ar Sɔb la tʋba ni.
5 Ya bɛ nɛ dunia nwa' ni maannɛ ya ya'amin. Ya maali ya mɛŋi nɔbi gur kʋʋb daar.
6 Ya kʋʋs sida dim ye ba tʋm tʋʋmbɛ'ɛd hali ka ba pʋ nwa'as nɛ yaa, ka ya la'an kʋʋ ba.
Mɔr suguru namisʋg saŋa
7 Dinzugɔ m ba'abiisɛ, mɔdigimi ka Zugsɔb la naan ti lɛb na. Gɔsimi kpaadi mɔdigid si'em gur ka sigsaa nɛ nya'aŋ saa ti ni, ka li naan ti du'a biel sʋma la.
8 Yanam mɛ mɔdigim ka gban'e ya mɛŋ ka Zugsɔb la lɛbig na li'el ya.
9 M ba'abiisɛ, da nyɔnnɛ taabaa, ka ya ya'a niŋid ala, Wina'am na kadi ya saria. Gɔsimi, sariakat la zi'e za'anɔɔrin.
10 Zaŋimi Zugsɔb nɔdi'esidib banɛ da pian'ad o yɛla la namisʋg nɛ ba mɔdigir ka li an zanbinnɛ tisi ya.
11 Ti buon nimbama ye albareka dim ka li anɛ bam mɔdig la zug. Ya wʋm Job n da mɔdig si'em ka nyɛ Wina'am da maal si'em tis o li naarin la. Zugsɔb la anɛ nimbaanlzɔt nɛ onɛ mɔr nyɔɔg.
12 M ba'abiisɛ, linɛ gaadi li wʋsa-wʋsa anɛ ye, da pɔ baa bi'elaa. Da pɔɔ mak nɛ teŋ bɛɛ saazug bɛɛ si'el si'ela. Kɛl ka ya “ɛɛn” an “ɛɛn” ka ya “ayei” an “ayei” ka li kɛ ka ya kʋ kpɛn' taalinɛ.
Yadda winsɔsʋg
13 Sɔ' ya'a bɛɛ ya san'anɛ bɛ yɛla ni, on sɔsim Wina'am. Onɛ sʋʋnri mɛ ma'ae on yʋ'ʋm yʋʋma na'as Wina'am.
14 Sɔ' ya'a bɛɛ ya san'an bɛn'ɛd on buolim Wina'am nidib kpɛɛmnam ka ba sɔs Wina'am tis o ka bu'oe malʋŋ kpaam niŋ o zugin nɛ Zugsɔb la yʋ'ʋr.
15 Ka winsɔsʋg kanɛ ka ba sɔs nɛ yadda la na tilig ban'ad la. Zugsɔb la na duoe o. Ka o ya'a tʋmnɛ tʋʋmbɛ'ɛd o na yisi li bas.
16 Pɛligimi ya pʋʋsi tu'asi ya tʋʋmbɛ'ɛdi tis taaba, ka sɔs JEMES 5 Wina'am tis taaba, ka ya na nyɛ laafi. Sida sɔb winsɔsʋg mɔr paŋ ka tʋm tʋʋma.
17 Elaja da anɛ ninsaal wʋʋ tinam nɛ, ka sɔs Wina'am hali ye saa da nii, ka saa pʋ nii yʋma atan' nɛ nwadis ayuobʋ.
18 Ka o lɛn sɔs ya'as ye saa niim ka saa ni ka zʋʋd maal.
19 M ba'abiisɛ, ya yinne ya'a yi sida la ni ka sɔ' mɔr o lɛb na, 20 tɛnri bʋnkaŋa ye, onɛ mɛkama fɛndig tʋʋmbɛ'ɛd daan o tʋʋmbɛ'ɛd suoya ni, na tilig tʋʋmbɛ'ɛd sɔb siig kumin, ka kɛ ka Wina'am yis o tʋʋmbɛ'ɛd bɛdegʋ bas.
YIIGA PITA
Gbauŋ nwa' yɛla
Pita da anɛ nya'andɔlib la tuongat, amaa o da zamis ye li nar ka tuongat tʋm tis o taaba. O da sɔb gbauŋ kaŋa ye o kpɛmis karimbiis banɛ namisid Yesu yɛla ba yadda ni la. O tiɛndi ti ye ti mɔr ti'iri ti bɛog yɛla, bɔzugɔ Yesu da kpi kum dapuudir zug ka lɛn vʋ'ʋg kumin. Yesu na lɛb daar yinne na nɛ girima ka banɛ niŋ o yadda la na di'e na'asi. Li nar ye ti bɛ bɛllim kanɛ pa'al ye ti anɛ Wina'am din, ka linɛ lɛm paas anɛ ye yɛltɔɔd banɛ paadi ti la anɛ linɛ dɔl suor ye li kpansi ti gɔs ye ti sid niŋ Wina'am yadda.
1 PITA 1
Man Pita onɛ an Yesu Kristo Tʋmtʋm la sɔbid gbauŋ kaŋa tisid
Wina'am nimbanɛ widigi bɛ tɛɛns banɛ buon Pontus nɛ Galatia nɛ Kapadosia nɛ Asia nɛ Bitinia ni ka an saam la.
2 Ti Ba' Wina'am dɛŋi baŋi ya ka gaŋi ya ye o Siig Kasi maali ya nyain ka ya siak Yesu Kristo nɔɔr ka o pie ya nɛ o ziim la.
Wina'am na paasi ya yɛlsʋm nɛ sumbʋgʋsʋm ka li galis.
Ti'ir amɛŋa la yɛla
3 Kɛlli ka ti pʋ'ʋs Wina'am onɛ aan ti Zugsɔb Yesu Kristo Ba' la bareka. Bɔzugɔ, nimbaanlzɔɔr linɛ zu'oe la zugʋ kɛ ka ti paam du'am-paalig linɛ mɔr ti'ir amɛŋa ka yi Yesu Kristo kum vʋ'ʋgirin la.
4 Wina'am digil faar linɛ ka' tiraan ye o tis o biis. Li anɛ faar kanɛ kʋ san'am ka pʋ pun'oda, ka li vɛnlim pʋ pɛligida, ka li bɛ arezana ni guri ya.
5 Ya yadda niŋir zug ka Wina'am paŋ guri ya ye ya nyɛ faangir linɛ ka o ti'eb ye li nie naar saŋa la na.
6 Nɛ'ɛŋa ni ka ya na mɔr sumalisim, hali baa nannanna ka ya na paam namisʋg kɔn'ɔb-kɔn'ɔb saŋa bi'ela la.
7 Makir banɛ paadi ya la anɛ ye li pa'al ye ya yadda la sid anɛ sida. Hali ba mɔri bugum makid sanlima linɛ na tun'e san'am la. Alazug, asɛɛ ka ba maki ya yadda linɛ an sʋ'ʋŋa gat sanlima la ka li nyaŋi zi'en kiŋ-kiŋ. Ala ka ya na di'e girima nɛ na'asi Daakanɛ ka Yesu Kristo na nie la na.
8 Ya pʋ nyɛɛ o ka la'an nɔŋ o, ka pʋ Nyɛt oo ka niŋid o yadda, ka ya sʋnf malis nɛ sumalisim linɛ ka' bɛnnɛ.
9 Ya yadda niŋir la nyɔɔd anɛ ya nyɛ faangir.
10 Li anɛ faangir kaŋa yɛla ka Wina'am nɔdi'esidib banɛ da pian' o yɔlisim linɛ na ti aan ya din la da tɛn'ɛsidi li yɛla hali ka ieedi li la.
11 Kristo Siig Kasi kanɛ daa bɛ nɔdi'esidibin la da nie pa'ali ba namisʋg kanɛ ka Kristo na nyɛ, ka nyaan nyɛ na'asi kanɛ na dɔlli li nya'aŋ la. Ba da mɔɔd ye ba baŋ saŋa la na ti an si'em nɛ lin na ti kɛn saŋa si'a na.
12 Wina'am da nie pa'ali ba ye ba pʋ tʋmmi tisidi ba mɛŋa, amaa li anɛ yanam zug ka ba da pian' yɛlbanɛ ka mɔɔnmɔɔnib da mɔɔli tisi ya ka li yinɛ Wina'am Siig Kasi onɛ ka o da tʋm o ka o yi arezana ni la na. Hali maliaknam bɔɔd ye ba gban'e bʋn kaŋa gbin.
13 Dinzugɔ ti'ebimi ka mɔr ya'am, ka gban'e ya mɛŋ, ka mɔri ti'ir sʋ'ʋŋa nɛ yɔlisim linɛ na kɛɛn ya ni na Yesu Kristo nier saŋa la.
14 Yanamɛ an banɛ siakid nɔɔr yɛlʋg la, da kɛ ka ya ya'am kpɛn' nɛ yɛlbɛ'ɛd linɛ ka ya da zi' ka bɛɛ li ni laa.
15 Amaa aaɛn kasi wʋʋ Wina'am onɛ buoli ya la an kasi si'em la ya tʋʋma wʋsa ni.
16 Bɔzugɔ li pʋn sɔb Wina'am gbauŋʋn la ye, Mam Wina'am anɛ kasi, alazug, yanam mɛ an kasi.
17 Onɛ ka ya buon ye ya Ba' la sadigim an onɛ kad saalib saria nɛ yɛlmɛŋiri ba tʋʋma ni ka baregaŋ kae la, dinzugɔ zɔmi dabiem ka bɛ wʋʋ saam nɛ dunia nwa' ni.
Bɛllim paal la yɛla
18 Ya mi' ye li ka'anɛ bʋn linɛ san'amid wʋʋ sanlima nɛ anzurifa da tisi ya yɔlisim suoyɔɔd banɛ ka ya zamisi ya yaanam ni la.
19 Amaa li anɛ Kristo onɛ an pɛbil kanɛ ka' gba'ar bɛɛ dɛŋ la ziim ka o da zaŋi maal maannɛ tisi ya yɔlisim.
20 Wina'am da gaŋ o ka dunia nam pʋ pin'ilɛ amaa o yʋ'ʋn nie naar saŋa nwa' ya yɛla.
21 Li yinɛ o san'an na ka ya niŋ Wina'am onɛ vʋ'ʋg Yesu kumin ka tis o zʋn'or la yadda. Alazug ya yadda nɛ ya ti'ir bɛ nɛ Wina'am ni.
22 Yanamɛ sadigim siak, ka pie ya pʋʋs ye ya nɔŋi ya ba'abiis nɛ sida la, nɔŋimi taaba nɛ nimmua ya sʋnya ni.
23 Ba du'a ya du'am-paal ka li ka' du'am kanɛ mɔr san'auŋɔ, amaa linɛ bɛ ka vʋe saŋa wʋsa, ka li yinɛ Wina'am pian'ad linɛ bɛ ka tisid vʋm saŋa wʋsa la ni.
24 Li sɔb ye, “Ninsaalib wʋsa nwɛnɛ mɔɔd nɛ, ka ba vɛnlim nwɛnɛ mɔpuum banɛ bɛ mɔɔgin nɛ. Mɔɔd la ziankid ka li mɔpuum la sʋʋgid,
25 amaa Zugsɔb pian'ad la kpɛm bɛ nɛ saŋa linɛ ka' bɛnnɛ. Zugsɔb pian'ad la an labasʋŋ kanɛ ka ba da mɔɔli tisi ya la.
1 PITA 2
Kugkanɛ vʋe la yɛla
| 2 |
“Dinzugɔ basimi pʋtɛn'ɛbɛ'ɛd wʋsa, nɛ dama'am nɛ zam nɛ fufum, nɛ taaba kikɛung.
2 Kɛl ka ya ya'am kpɛn' nɛ Wina'am yɛla wʋʋ bibibisi bɔɔd bin'isim si'em la. Ala ka ya na bi' ya faangir la pʋʋgin.
3 Yanamɛ sadigim nyɛ Zugsɔb la an sʋm si'em la, niŋimin ala.
4 “Yanamɛ kɛɛn o san'an na la, o anɛ kugkanɛ vʋe, ka nidib zan'as o, amaa Wina'am gaŋ o ka o an sʋm hali tis o.
5 Kɛlli ka Wina'am nɔki ya, ka ya nwɛnɛ kugbanɛ ka o mɛ' yiri tis o mɛŋ, ka mɛ maal maan sʋma linɛ ma'ad Wina'am sʋʋnr ka li yi Yesu Kristo ni na.
6 Ka li sɔb Wina'am gbauŋʋn ye, “Gɔsima, m dɛŋi gaŋi lɔdigin kugir linɛ an bʋnsʋŋ hali ka zaŋi li ɛɛnb ɛɛnbir Zion teŋin. Ka onɛ niŋ o yadda, o kʋ di nyannɛ.”
7 Yanam banɛ niŋ o yadda la, o anɛ kugsʋŋ hali tisi ya. Amaa banɛ pʋ niŋ o yadda la, li sɔbi ba yɛla ye, “Kugkanɛ ka tanmɛɛdib daa nɛ'ɛs la lieb lɔdigin kugir.”
8 Ka lɛn sɔb ye, “Li anɛ kugkanɛ na kɛ ka nidib tu'usid, ka an tampinkanɛ na kɛ ka ba lu.” Ban zan'as Wina'am pian'ad la zug, ka ba tu'usid wʋʋ on yɛli zi'el si'em la.
9 Amaa yanam anɛ nimbanɛ ka o gaŋ, ka an na'adɔɔg nɛ maanmaannib ka an sʋ'ʋlim kanɛ an kasi, ka an nimbanɛ an Wina'am mɛŋ din, ye ya wɔ'ɔg on kanɛ yisi ya likinɛ lɛbis nɛɛsim linɛ an nyalima ka ka' tiraan la ni.
10 Saŋa kanɛ gaad la ya da ka' Wina'am nidiba, amaa nannanna ya yʋ'ʋn anɛ o nidib. Ba da pʋ zɔti ya nimbaanliga, amaa ba yʋ'ʋn zɔti ya nimbaanlig.
11 M zuanɔŋa, m san'anɛ yanam banɛ an saam dunia ni la ye ya bas saalib bɔɔdim linɛ zabid nɛ ya Wina'am dɔllim la,
12 Kpɛn tʋmmi tʋʋm sʋma nimbanɛ zi' Wina'am la sʋʋgin, ka ba ya'a nwa'asid nɛ ya wʋʋ ya anɛ tʋʋmbɛ'ɛd dim, ban on nyɛɛ ya tʋʋm sʋma ka na'as Wina'am, daakanɛ ka o na ti kena la.
Siakimi tuongatib nɛ kpɛɛmnam nɔɔr
13 Ti Zugsɔb yʋ'ʋr zug, siemi ya mɛŋ Room na'ab onɛ sʋ'oe paŋ la san'an ka onɛ sʋ'oe na'anam wʋsa,
14 ka lɛn sie ya mɛŋ gɔmenanam san'an, bɔzugɔ Room na'ab la tʋmi ba ye ba tɛɛg banɛ tʋm tʋʋmbɛ'ɛd la tʋba ka zun'e banɛ tʋm tʋʋm sʋma, ka mɛ sie ya mɛŋ saalib banɛ mɔr kpi'euŋ wʋsa tuon.
15 Li anɛ Wina'am bɔɔdim ye ya tʋʋm sʋma gu'oe banɛ an zɔn ka pian'ad nɛ zi'ilim la.
16 Bɛi wʋʋ nimbanɛ mɔr yɔlisim, amaa da kɛ ka ya yɔlisim la tisi ya suor ka ya tʋm tʋʋmbɛ'ɛdɛ, ka lɛɛ bɛi wʋʋ tʋmtʋmnib nɛ.
17 Na'asimi nidib wʋsa, ka mɔri ba'abiidʋg nɔŋilim. Zɔmi Wina'am ka na'as Room na'ab la.
18 Yanam banɛ an yammis la, siakimi ya zugdaannam nɔya nɛ na'asi bɛdegʋ. Ka' zugdaan sʋma la ma'aanɛ, amaa la'an nɛ banɛ an nimbɛ'ɛdnam la.
19 Ya ya'a namisid namiskanɛ pʋ dɔl suorɛ ka mɔdig ka li anɛ yanamɛ an Wina'am nidib la zug, li na ma'ae Wina'am sʋʋnr.
20 Fʋ ya'a tʋm tʋʋmbɛ'ɛd ka ba sigisif nɛ kpisiŋkpila ka fʋ sin ka mɔr suguru, li sʋ'ʋm an bɔ? Amaa fʋ ya'a tʋm linɛ dɔl suor ka namisi li yɛla, ka niŋi li nɛ suguru, li ma'adnɛ Wina'am sʋnf.
21 Li anɛ tʋʋm bama yɛla ka Wina'am daa buoli ya ka Kristo da namisi ya yɛla ka li an zanbinnɛ tisi ya ye ya mɛ tʋm ala.
22 O da pʋ tʋm tʋʋmbɛ'ɛdɛ, ka dama'am mɛ pʋ yii o nɔɔrinɛ,
23 ka ban daa tʋ'ʋd o la, o kʋdim pʋ lɛbis ye anwa nɛ anwaa, ka ban namis o la, o mɛ pʋ vɔlisi ba, ka pɛsig o mɛŋ onɛ kad saria nɛ sida la nu'usin.
24 Kristo mɛŋ mɛŋi da zii ti tʋʋmbɛ'ɛd o niŋgbiŋin dapuudir la zug, ye ti bas tʋʋmbɛ'ɛd bɛllim ka lɛɛ bɛ nɛ pʋpielim. Ban daa pu'alim o la zugʋ kɛ ka ya paam laafi.
25 Ya da nwɛnɛ pɛ'ɛsi bɔdig ka yirid yɔri-yɔri, amaa ya yʋ'ʋn lɛbi ya kɔnbkem nɛ onɛ guri ya siis la san'an na.
1 PITA 3
Pu'ab nɛ ba sidib yɛla
| 3 |
Ala mɛn pu'aba, siakimini ya sidib nɔya, ka ala ka ba sieba ya'a pʋ siak labaar la, ba na ba'asi tiak ka li ka'anɛ ya nɔɔr pian'adɛ, amaa ba pu'ab la mɔr zʋgsʋŋ la zug.
2 Bɔzugɔ ba na kpansi nyɛ yanamɛ bɛ sida bɛllim ka mɔr na'asi si'em la.
3 Da kɛ ka ya ba'a bɛ nɛ yiŋ nak galisʋg linɛ ka ya nɔk ka li an vɛnlim, nwɛnɛ zuobid lɔɔb nɛ sanlima la'ad nɛ fusʋma yɛɛbɔ.
4 Amaa kɛlli ka ya vɛnlim aaɛn na'asi linɛ su'a ya sʋnya ni nwɛnɛ sanlima linɛ ka' san'auŋɔ, ka an sʋm Wina'am san'an.
5 Ala ka pu'a banɛ da bɛ kʋdimin ka pɛsigi ba mɛŋ ka nɔki ba ti'iri niŋ Wina'am ni la da vɛnl, amaa ka siakidi ba sidib nɔya.
6 Sara anɛ onɛ da siak o sid Abraham nɔɔr ka buon o ye o zugdaan. Ya ya'a niŋ dinɛ nar ka pʋ zɔt dabiem, ya anɛ o pu'ayuos.
7 Ala mɛnɛ yanam banɛ an pu'ab sidiba, bɛɛi nɛ ba nɛ pʋtɛn'ɛsʋŋ, ka na'asidi ba, ba tadʋŋ la zug, nɛ yanamɛ la'an di'ed nyɔvʋr linɛ an Wina'am pʋpielim piini la. Ya ya'a niŋ ala, ya Wina'am pʋ'ʋsim kʋ vi'.
Nidi na namis tʋʋm sʋŋ yɛla
8 Li naar wʋsa anɛ ye, ya wʋsa bɛ nɛ taaba nɛ nɔɔr yinne, ka mɔri nyɔɔg nɛ taaba, nɛ ba'abiidʋg nɔŋir, nɛ nimbaanlzɔɔr ka siedi ya mɛŋ.
9 Sɔ' ya'a tʋmi ya bɛ'ɛd, yanam da yɔɔni li sammɛ. Ka sɔ' ya'a tʋ' ya, yanam da lɛbisi yaa, amaa lɛɛ tim o bareka. Wina'am da buoli ya ye ya bɛllim aan ala, ka di faar linɛ aan o albareka la.
10 Ala ka li sɔb ye, “Onɛ wʋsa nɔŋ vʋm ka bɔɔd ye o vʋe yuug ka o bɛllim malis, asɛɛ o gban'e o zilim ka li da pian'ad bɛ'ɛdɛ ka mɛ da kɛ ka fʋ nɔɔr pian'ad an zirii.
11 Basim bɛ'ɛd tʋʋma ka fɛndigi tʋm linɛ an sʋm; gban'am sumbʋgʋsʋm nu'us ayi' ka da basɛ.
12 Zugsɔb la nindaa kpa'anɛ gɔsid banɛ an pʋpielim dim la, ka o tʋba yɔ'ɔgi kɛlisidi ba sɔsʋg; amaa o bid tʋʋmbɛ'ɛd dim la kudug.”
13 Ka ya ya'a mɔɔd ye ya tʋm linɛ dɔl suorɛ, anɔ'ɔnɛ na tʋmi ya bɛ'ɛdɛ?
14 Hali baa ya ya'a namis linɛ ka ya tʋm ka li dɔl suor, ya na nyɛ bareka. Alazug da mɔri dabiem ka kɛ ka li paki yaa.
15 Amaa ya sʋnya ni, gban'ami ye Kristo anɛ Zugsɔb. Ti'ebimi saŋa wʋsa ka sɔ' ya'a bu'osi ya ti'ir kanɛ ka ya mɔr la yɛla ya na nyaŋi pa'al ka o gban'e li gbin. Amaa niŋimini li ka siedi ya mɛŋ nɛ na'asi,
16 ka kɛ ka ya pʋʋs an nyain, ka ba ya'a tʋ' ya nɛ yanamɛ tʋmmi tisid Kristo la zugɔ, ban on di nyan.
17 Ya ya'a tʋm sʋ'ʋm 1 PITA 3–4
ka namis ka li an Wina'am bɔɔdim sɔn'oe yanamɛ na tʋm linɛ pʋ dɔl suorɛ ka namis.
18 Kristo da kpii ya tʋʋmbɛ'ɛd yɛla vuguri, on kanɛ an pʋpiel la kpii tis banɛ ka' pʋpielnama, ye o mɔri ya keŋ Wina'am san'an. Ba da kʋʋ o niŋgbiŋin amaa ka Siig Kasi kɛ ka o vʋe.
19 Ka Siig Kasi la ni ka o keŋ mɔɔl labasʋŋ la tis siis banɛ bɛ sanrega ni la.
20 Ban banɛ da pʋ siak Wina'am nɔɔr yɛlʋg la, saŋkan ka o da gu'usid nɛ sumbʋgʋsʋm ka Noa kpa'ad anrʋŋ tita'ar la. Nidib anii ma'aa da nyɛ faangir ku'om la pʋʋgin.
21 Ku'okaŋa nwaasnɛ Wina'am ku'om sʋʋb linɛ yʋ'ʋn tisi ya faangir la. Li ka'anɛ niŋgbiŋ dian'ad pier yɛlaa, amaa li anɛ linɛ na kɛ ka ya pʋtɛn'ɛr an nyain Wina'am ni. Li faaɛn ya ka li yinɛ Yesu Kristo kum vʋ'ʋgirin.
22 Yesu Kristo kan la keŋ arezana ni zin' Wina'am datiuŋ ka sʋ'oe maliaknam nɛ banɛ mɔr kpi'euŋ nɛ paŋ la.
1 PITA 4
Tʋʋmbɛ'ɛd basib yɛla
| 4 |
Dinzugɔɔ, Kristo sadigim namis niŋgbiŋin la, ya kpɛ'ɛŋimi ya mɛŋ nɛ pʋtɛn'ɛr kan mɛn; ka onɛ mɛkama namis niŋgbiŋin, o ba'a lɛn ka' nɛ tʋʋmbɛ'ɛdɛ.
2 Ka lin yi nannanna wa'ae sa, ya niŋgbina bɛllim pʋ dɔl ninsaal bɔɔdim amaa Wina'am bɔɔdim.
3 Saŋa kanɛ gaad la, ya da san'am saŋa tʋm linɛ ka banɛ pʋ dɔl Wina'am tʋm la. Dinɛ an: pitɔtʋʋma nɛ pu'ab bɛɛ dap bɔɔsim nɛ danuur nɛ ala'as taaba di'em, di'em yaalis nɛ bada maalʋg.
4 Ka yanamɛ pʋ lɛn la'asid nɛ ba tʋmmi ba gɛɛntʋʋma la, ka ba pʋ gban'e li gbinnɛ ka tʋ'ʋdi ya.
5 Amaa ba na ti yɛl ban tʋm si'el wʋsa tis onɛ ti'ebi gur ye o kad banɛ vʋe nɛ banɛ kpi wʋsa saria la.
6 Nɛ'ɛŋa zug ka ba da mɔɔl labasʋŋ la tis banɛ kpi la ye, hali baa Wina'am na kadi ba saria niŋgbiŋin ban an saalib la, ba tun'e vʋe nɛ siigin wʋʋ Wina'am nɛ.
Wina'am piini mɔrim yɛla
7 Bʋn wʋsa naar pʋ lalla. Dinzugɔ gban'aminɛ ya mɛŋ ka mɔr nimmua nɛ ya Wina'am pʋ'ʋsʋg.
8 Linɛ gati li wʋsa anɛ ya mɔr nɔŋilim nɛ taaba nɛ nimmua, ka onɛ mɔr nɔŋilim la sɔ' ya'a tʋm o bɛ'ɛd o kʋ gɔs ka li an si'ela.
9 Maalimi taaba saauŋ ka da nyɔnnɛ taabaa.
10 Yanam banɛ di'e Wina'am pʋpielim piini kɔn'ɔb-kɔn'ɔb la gɔsimini li sʋ'ʋŋa ka zaŋ linɛ an Wina'am yɔlisim la tʋm linɛ an sʋ'ʋm tis taaba.
11 Onɛ mɛkama pian'ad on baŋim ye o pian'adnɛ Wina'am pian'ad. Ka onɛ mɛ sʋŋid, mɛ baŋim ye Wina'am tis o paŋ kanɛ ka o mɔri sʋŋid la. Ti ya'a niŋida ala, li kɛtnɛ ka Wina'am yʋ'ʋr nyɛt dʋ'ʋsʋg ka li yinɛ Yesu Kristo onɛ nar nɛ na'asi nɛ paŋ linɛ ka' bɛn la ni. Ami.
Kristo dɔllim namisʋg yɛla
12 M zuanɔŋa, da kɛ ka namistita'ar linɛ na kpansi ya la paki ya wʋʋ li anɛ bʋnsaaŋi tisi yaa.
13 Amaa lɛɛ mɔri sumalisim yanamɛ la'am namis nɛ Yesu la zug, ala ka ya na mɔr sumalisim bɛdegʋ o na'am pipilim la nier saŋa.
14 Ba ya'a tʋ'ʋdi ya Yesu Kristo yʋ'ʋr la yɛla, ya mɔr albareka bɔzugɔ, Wina'am Siig Kasi onɛ mɔr na'asi bɛdegʋ la bɛɛ ya zug.
15 Amaa li pʋ sʋm ye ya namisid ka li anɛ ye ya anɛ ninkʋʋdib bɛɛ na'ayiis bɛɛ tʋʋmbɛ'ɛd dim bɛɛ banɛ nwɛ'ɛdi ba mɛŋi gɛntid nidib tʋʋma ni zugɔ.
16 La'an nɛ wala, sɔ' ya'a namis on niŋ Kristo yadda la zug, on da zɔti li nyannɛ. O lɛɛ zu'om Wina'am ban mɔr Kristo yʋ'ʋri buon o la.
17 Saŋa paae ya ye Wina'am kad saria, ka li na pin'il nɛ o yidim yiiga, ka li ya'a pin'il nɛ tinam banɛ aan o yidim la, banɛ pʋ siak Wina'am labasʋŋ la ba'asʋg na an wala?
18 Li sɔb Wina'am gbauŋʋn ye, “Ka li ya'a tɔi nɛ sida sɔbi na nyɛ faangirɛ, ka tʋʋmbɛ'ɛd dim banɛ pʋ dɔl Wina'am suor la na di'e yaanɛ?”
19 Dinzugɔ, kɛlli ka banɛ namisid ka li dɔl Wina'am bɔɔdim la niŋ linɛ an sʋ'ʋm ka nɔki ba mɛŋi pɛsig Wina'am onɛ maali ba ka an yɛlsida sɔb la.
1 PITA 5
Sa'alʋg
| 5 |
Mam onɛ an yadda niŋidib kpɛɛm nɛ banɛ da nyɛ Kristo ka o namis la yinne, banɛ na di'e na'asi linɛ na ti nie la yinne, sa'an yanam banɛ an m kpɛɛm taaba la, 2 ye ya guri Wina'am nimbanɛ ka o gu'uli ya wʋʋ pɛ'ɛs la, nɛ ya'amsɛug ka ka'anɛ mugusʋgɔ. Tʋmmi nɛ nimmua ka da tʋmmi nyɔɔd linɛ an ligidi yɛlaa.
3 Da wɛbigidi banɛ bɛɛ ya nu'usin laa, amaa niŋimi sʋ'ʋm ka li an zanbinnɛ tisi ba.
4 Ka kɔnbkem kpɛɛm la ya'a ti nie, ya na di'e na'am zupibig linɛ pipilim kʋ san'am.
5 Ala mɛn yanam banɛ pʋ kʋdig la, siemi ya mɛŋ kpɛɛmnam la tuon. Ya wʋsa siemini ya mɛŋi tisi taaba; ka li sɔb ye, “Wina'am zan'asid nyɛɛsim dim ka lɛɛ tisid banɛ sie ba mɛŋ la yɔlisim.”
6 Dinzugɔ siemini ya mɛŋi niŋi Wina'am onɛ an paŋ sɔb la nu'usin, ka li saŋa ya'a paae o na dʋ'ʋsi ya.
7 Zaŋimi ya yɛlpakir wʋsa ziil o; bɔzugɔ o ba'a bɛ nɛ ya.
8 Aaɛn banɛ gban'adi ba mɛŋ, ka ti'eb sʋ'ʋŋa. Ka ya dataa Sʋntaana gɔɔndnɛ giligidi nwa'am wʋʋ gbigim nɛ ieed nid ye o gban'e ɔnb.
9 Niŋimi Yesu Kristo yadda sʋ'ʋŋa ka zan'as Sʋntaana, ka ya mi' ye ya ba'abiis banɛ bɛ zin'ig wʋsa la namisidnɛ namiskanɛ ka ya namis la buudi mɛn.
10 Wina'am sʋ'oe yɔlisim wʋsa, ka buoli ya o na'asi linɛ ka' bɛn la ni, yanam banɛ an yinne nɛ Kristo la. Ka ya ya'a namis saŋa bi'ela li nya'aŋ la, Wina'am mɛŋ na maali ya sʋ'ʋm ka zi'eli ya kiŋ-kiŋ, ka kpɛ'ɛŋi ya.
11 O san'an ka na'am paŋ bɛ, saŋa linɛ ka' bɛnnɛ. Ami.
Pʋ'ʋsʋg
12 M ba'abiig Silvanus onɛ an sida sɔb la sʋŋim, ka m sɔb gbauŋ kaŋa giŋa kpɛmisidi ya ye, nwa' anɛ Wina'am yɔlisim amɛŋa, gban'aminɛ li kiŋ-kiŋ.
13 Ka Wina'am nimbanɛ bɛ Babilon, ka Wina'am mɛ da la'am gaansi ba nɛ ya la, pʋ'ʋsidi ya la'an nɛ Mak onɛ liebi m biig la.
14 Pʋ'ʋsimi taaba nɛ nɔŋilim pʋ'ʋsʋg. Sumalisim na bɛ nɛ yanam banɛ an yinne nɛ Kristo la.
AYI' PITA
Gbauŋ nwa' yɛla
Pita da sɔb gbauŋ kaŋa ye o sʋŋ karimbiis ka ba mɔr Wina'am nɛ Yesu Kristo sida pa'alʋg linɛ yit banɛ da dɛŋi bɛ nɛ Yesu dunia ni, ka wʋm o pa'alʋg la san'an na. O pian'anɛ ki'is banɛ pa'an ziri pa'alʋg ka li kɛ ka karimbiis tʋm tʋʋmfɛn'ɛsa linɛ pʋ nar la. O yɛt ye Yesu sid na lɛb saŋa kanɛ ka Wina'am gban'e la na. Wina'am tisid sɔ' wʋsa saŋa ye ba tiak ka bas tʋʋmbɛ'ɛd ka Yesu ya'a ti lɛb na ba kʋ paam san'auŋɔ.
2 PITA 1
Man Simon Pita onɛ an Yesu Kristo yammʋg nɛ o Tʋmtʋm la sɔbid gbauŋ kaŋa tisid banɛ ka ti Faangid Yesu Kristo nɛ ti Ba' Wina'am pʋpielim kɛ ka ya niŋ o yadda, linɛ an sʋ'ʋŋa nwɛnɛ tinamɛ niŋ o yadda si'em la.
2 Wina'am na pɛ'ɛsi ya yɛlsʋm nɛ sumbʋgʋsʋm bɛdegʋ, yanamɛ baŋ Wina'am nɛ ti Zugsɔb Yesu la.
Wina'am gaŋi ti ka li ka' viigirɛ
3 Wina'am paŋ la tisi ti si'el mɛkama linɛ na kɛ ka ti vʋe ka bɛ wʋʋ Wina'am bɔɔd ye ti bɛ si'em la, ka li yinɛ tinamɛ baŋ onɛ buoli ti nɛ o mɛŋ girima nɛ o sʋ'ʋm pʋʋgin la.
4 Li yinɛ nɛ'ɛnamin ka o tisi ti o kaanbʋg linɛ an sʋm hali la ye ya luak san'auŋ linɛ bɛ dunia ni ka yi saalib ya'amlɛog linɛ an bɛ'ɛd la, ka lɛɛ lieb wʋʋ Wina'am an si'em la.
5 Dinzugɔ kpɛ'ɛŋimini ya mɛŋ ka bɛ bɛllim linɛ an sʋm paasi ya yadda niŋirin, ka baŋir paasi ya bɛllim linɛ an sʋm la ni,
6 ka mɛŋ gban'ar paasi ya baŋirin, ka mɔdigir paasi ya mɛŋ gban'arin, ka Wina'am dɔllim amɛŋa paasi ya mɔdigirin,
7 ka ya yɛlsʋm maalʋg nɛ ya ba'abitaaba paasi ya Wina'am dɔllim amɛŋa ni.
8 Bɔzugɔ ya ya'a mɔr nɛ'ɛnam wʋsa ka li nɔbigid, li na kɛ ka ya kpi'em nɛ ya Wina'am tʋʋma ka baŋi ti Zugsɔb Yesu Kristo.
9 Amaa onɛ ka' nɛ'ɛnama, o nwɛnɛ zʋnzɔŋ onɛ ka zi'ilim bɛɛ o ni ka o tam ye Wina'am pʋn pie o tʋʋmbɛ'ɛd la yis ka o an nyain.
10 Dinzugɔ m ba'abiisɛ, kpɛ'ɛŋimi nɛ nimmua ka kɛ ka Wina'am buoli ya ka gaŋi ya la niŋ amɛŋa, ka ya ya'a niŋid nɛ'ɛŋa ya kʋ gʋ'ʋŋ baa bi'elaa.
11 Ala ka ya na nyɛ suor sʋ'ʋŋa kpɛn' Yesu Kristo onɛ aan ti Zugsɔb nɛ ti Faangid la sʋ'ʋlimin, saŋa linɛ ka' bɛnnɛ.
12 Linzug ka m bɔɔd ye m tiɛndi ya saŋa mɛkama yɛlbama yɛla, hali baa yanamɛ pʋn dɛŋim baŋi li ka gban'e kiŋ-kiŋ nɛ yɛlsida kanɛ ka ya di'e la.
13 M tɛn'ɛs ye mam nan vʋe la, li nar ka m tiɛn ya,
14 mam sadigim baŋ ye li kpɛlim bi'ela ka m niŋgbiŋ la bɔdig wʋʋ ti Zugsɔb Yesu Kristo pa'alim si'em la.
15 M na mɔ ka m ya'a ti kae ka ya na nyaŋi tiɛnd yɛlbama saŋa mɛkama.
Pita n nyɛ Kristo na'am la yɛla
16 Ti pʋ dɔl sɔlima linɛ yi ninsaalib mi'iliminɛ yɛti ya ti Zugsɔb Yesu Kristo paŋ nɛ o ken la na yɛlaa, amaa tinam mɛŋ nini sid nyɛɛ o na'am zu'oe si'em.
17 Bɔzugɔ o di'e na'asi nɛ zʋn'or linɛ yii ti Ba' Wina'am san'an na, saŋkan ka kʋkɔr da yi Wina'am paŋ tita'ar nɛ o girima ni na yɛl ye, “Oŋa aan m binɔŋir, onɛ ka m sʋnf ma'ae o yɛla hali.”
18 Ka tinam mɛŋ wʋm kʋkɔr kanɛ yi arezana ni na la, saŋkan ka tinam nɛ on da la'am bɛ zuor kanɛ an kasi zug la.
19 Ka li maligim kɛ ka ti baŋ ye Wina'am nɔdi'esidib pian'ad la an sida. Li an sʋm ka ya kpɛ'ɛŋi ya mɛŋ ka kɛlis yɛlbama sʋ'ʋŋa; ka li nwɛnɛ fitiri nie likinɛ ti paae bɛog yiligir ka Kristo onɛ an nwaddar la nie ya sʋnya ni.
20 Yɛlkanɛ gaadi li wʋsa anɛ ya baŋ ye, Wina'am nɔdi'esidib pian'ad linɛ sɔb Wina'am gbauŋʋn la baa yinne pʋ yi ninsaal pʋtɛn'ɛrin naa.
21 Li mɛ da pʋ yi ninsaalib san'an naa, amaa Wina'am Siig Sʋŋʋ da kɛ ka ba pian' pian'ad linɛ yi Wina'am san'an na.
2 PITA 2
Ziri pa'annib la yɛla
| 2 |
Amaa ziri nɔdi'esidib mɛ da bɛ nidib sʋʋgin, alanɔɔ ka ziri pa'annib mɛ na bɛ ya sʋʋgin. Ba na su'a mɔr ziri pa'ala linɛ ken nɛ san'auŋ la, hali ba na ti ki'is Zugsɔb onɛ da' ba la ka li kɛ ka ba nyɛ san'auŋ tɔ'ɔtɔ.
2 Yadda niŋidib bɛdegʋ na dɔlli ba tʋʋmyaalis la, ka linzug ka nidib na pian'ad sida la yɛla bɛ'ɛd.
3 Ziri pa'annib la an dasʋŋ dim la zug, ba na 2 PITA 2 pɔnrimi ya nɛ ba mɛŋ sɔlima nyɛ nyɔɔd. Kʋdimin sa ka Wina'am pʋn kʋʋsi ba bɛ'ɛd, onɛ na san'ami ba la pʋ gbisida.
4 Wina'am da pʋ di suguru nɛ maliaknam banɛ tʋm tʋʋmbɛ'ɛd la, ka lɔbi ba bas bugum teŋ bʋmbɔk zulʋŋ linɛ an zibisʋg la guri sariakadib daar.
5 Wina'am mɛ da pʋ di suguru nɛ kʋdimin dima, ka kɛ ka ku'om dii ba, ka lɛɛ tilig Noa onɛ da mɔɔn pʋpielim yɛla la nɛ o yidim nidiba ayɔpɔi.
6 Ka mɛ kʋʋs Sodom nɛ Gomora tɛɛns bɛ'ɛd ka kɛ ka bugum dii ba nyain, ka ba kilim tampɛligim ka li an sa'alʋgʋ tis banɛ pʋ dɔl Wina'am suor la.
7 O da tilig Lot onɛ an yɛlsida sɔb ka o sʋnf da san'am hali nɛ nimbanɛ da pʋ siakidi dɔl wada la.
8 Lot onɛ an pʋpielim sɔb la da bɛ nɛ ba daar wʋsa ka nyɛt ka wʋmi ba tʋʋmbɛ'ɛd la, kɛ nɛ ka li san'am o sʋnf la.
9 Li ya'a an ala, Zugsɔb la mi' on na niŋ si'em faaɛn banɛ dɔl o amɛŋa la makir pʋʋgin, ka niŋ tʋʋmbɛ'ɛd dim la namisʋgʋn gur sariakadib daar.
10 Ka li kas-kas anɛ banɛ dɔl ya'amlɛog linɛ an dian'ad ka nɛ'ɛsid Wina'am kpi'euŋ la. Ba mɔr nyɛɛsim nɛ tita'alim ka pʋ zɔt dabiem nɛ ban na tʋ'ʋd banɛ mɔr paŋ ka bɛɛ agɔla la,
11 hali ka maliaknamɛ mɔr paŋ ka kpi'emi gati ba la, ba pʋ tʋ'ʋd banɛ bɛɛ agɔl la Zugsɔb la tuonnɛ.
12 Amaa nimbama nwa' tʋ'ʋd linɛ ka ba pʋ gban'e li gbinnɛ. Ba nwɛnɛ bʋnkɔnbid bɛɛ bʋnvʋsieba, ka ba bɛllim anɛ ba gban'e ba kʋ. Ba pian'adi bɛ'ɛd nɛ linɛ ka ba zi', ka na san'am wʋʋ bʋnkɔnbid la nɛ.
13 Ba yɔɔd na anɛ bɛ'ɛd wʋʋ ban tʋm tʋʋmbɛ'ɛd si'em la. Ba sʋnya malis nɛ ya'amlɛog linɛ ka ba niŋid paalʋ ka li an dian'adi ba niŋgbina ni la. Ba anɛ dian'ad dim nɛ banɛ mɔr gbada, ba la'am dit nɛ ya ka pa'annɛ ba ya'amlɛog.
14 Ba ya'am gban'anɛ pu'asan'auŋ ka pʋ tigid nɛ tʋʋmbɛ'ɛdɛ. Ba pan'asid banɛ sʋnya pʋ kpi'em la, ka mɔr fufum linɛ an bɛ'ɛd la mi'ilim, ka Wina'am nɔpɔɔr bɛɛ ba zug.
15 Ba bas suosʋŋ la nɛ ka bɔdig, ka dɔl Balaam onɛ an Beor biig la suor, onɛ bɔɔd ye o di'ed yɔɔd linɛ an tʋʋmbɛ'ɛd la.
16 Amaa Balaam da nyɛ sa'alʋg o tʋʋmbɛ'ɛd la yɛla. O bʋŋ da pian' o nɛ ninsaal kʋkɔr ka kɛ ka o bas zɔlim tʋʋma.
17 Nimbama nwɛnɛ bulnɔya banɛ pʋ bʋn ku'om, ka nwɛnɛ kpaandʋg linɛ ka sisi'em da'adi ken. Ka Wina'am ti'eb zin'ikanɛ an lik tita'ari guri ba.
18 Ba mɔri pian' yɔɔdi nwɛ'ɛd nyɔ'ɔg ka mɔr tʋʋmyɔɔd ya'amlɛogʋ pan'asid nimbanɛ pin'ili zɔt ye ba yi ka bas nimbanɛ an tʋʋmyɔɔd dim la.
19 Ba yɛti ba ye ba na nyɛ yɔlisim amaa ka ba mɛŋ an yammisi tis itʋŋ linɛ ziid san'auŋʋ kenna la, bɔzugɔ linɛ mɛkama kul sɔ' kɛti ka o liebidi li yammʋg.
20 Ba ya'a baŋ Yesu Kristo onɛ aan ti Zugsɔb nɛ ti Faangid la ka yi linɛ kɛt ka saalib liebid dian'ad dim la ni, ka pan'asʋg lɛn nyaŋi ba ka ba kpɛn' li ni, ba bɛllim na maligim san'am hali gaad yiigin la.
21 Ba ya'a pʋ baŋin pʋpielim suorɛ, li naan aan sʋ'ʋm tisi ba, gat ban baŋi li ka lɛm bas Wina'am nɔɔr yɛlʋg kanɛ ka o tisi ba la.
22 Lin niŋi ba si'em la pa'al ye siilima la yɛl si'em la anɛ sida ye, “Baa lɛn lɛb o tiindin,” ka lɛn ye, “Kukur kanɛ ka ba sʋʋ o nyain la lɛb bian'ar nwɛ'ɛb.”
2 PITA 3
Zugsɔb ken la na yɛla
| 3 |
M zuanɔŋa, nɛ'ɛŋa an m gbauŋ kanɛ pɛ'ɛsi ayi' ka m sɔbi tisi ya. Gbana ayi' la ni ka m bɔɔd ye m tiɛn ya linɛ ka ya dɛŋi baŋ la ka li nie ya pʋtɛn'ɛr. 2 M bɔɔd ye ya tɛnr pian'abanɛ ka Wina'am nɔdi'es sʋma da dɛŋi pian' yʋʋmpʋkʋda la, nɛ ti Zugsɔb onɛ aan ti Faangid la nɔɔr yɛlʋg kanɛ ka o tʋmtʋmnib pian' tisi ya la.
3 Amaa linɛ nar ye ya baŋ yiiga anɛ ye dunia naar saŋa la, zamdim na ti kena ka pa'an dinɛ dɔlli ba mɛŋ ya'amlɛogʋ bɔɔd si'el.
4 Ba na yɛl ye, “Yesu da yɛl nɔɔri zi'el ye o na lɛb na la li bɛ yaanɛ? Hali ka ti yaanam ti kena kpi, ka si'el wʋsa ken sʋ'ʋŋa nwɛnɛ dunia pin'ilʋgʋnɛ da an si'em la.”
5 Ba anɛ banɛ mi' ka zan'as ye ba siak ye hali dunia pin'ilʋgʋn sa, Wina'am da zaŋ nɛ o nɔɔr pian'adi maal saazug nɛ dunia nwa'. Ku'om ka o da zaŋi maal teŋgbauŋ la ka kɛ ka li yi ku'omin na
6 Li anɛ ku'okan la da uaki san'am dunia kanɛ da dɛŋi bɛ la.
7 Li anɛ pian'ʋk kan la gur agɔl nɛ teŋgbauŋ la nɛ bugum na ti dii li, ka li digi gur sariakadib nɛ banɛ zan'as Wina'am la san'auŋ daar.
8 M zuanɔŋa, da tami yɛlkaŋa, ye Wina'am ni daar yinne nwɛnɛ yʋma tusir nɛ, ka yʋma tusir mɛ nwɛnɛ daar yinne nɛ
9 Zugsɔb la pʋ bʋgis nɛ linɛ ka o kaanb la wʋʋ sieba tɛn'ɛsid si'em laa, amaa o mɔri suguru nɛ ya, ka pʋ bɔɔd ye sɔ' san'am, o lɛɛ bɔɔdi ye sɔ' mɛkama tiak o tʋʋmbɛ'ɛdin.
10 Amaa Zugsɔb la ken daar na nwɛnɛ na'ayiigi ken si'em na la. Daakan la saazug na dam hali ka saŋgbana bɔdig, bugum na kanb si'el wʋsa. Dunia nɛ bʋn linɛ bɛɛ li ni wʋsa na kanb ka si'el wʋsa nie paalʋ.
11 Ka nɛ'ɛnam wʋsa sadigim na san'am la, ya bɛllim nar ye li an wala? Asɛɛ ka ya bɛllim an kasi ka ya pɛsigi ya mɛŋi dɔl Wina'am suor,
12 ka guri Wina'am ken daar na ka kpɛ'ɛŋidi ya mɛŋ ye li niŋ tɔ'ɔtɔ. Daakan la bugum na kanbi san'am saŋgbana, ka bugum la tʋʋlʋg nyɛlig si'el wʋsa.
13 Amaa ti na gur Wina'am kaanb nɔsi'a ye, “Saazug paal nɛ dunia paal na bɛ la, zin'ikan la an pʋpielim dim teŋ.”
14 Alazug, m zuanɔŋa, yanamɛ sadigim gur nɛ'ɛŋa la, kpɛ'ɛŋimi ya mɛŋ ka gba'asi'a da bɛ ya nii, aaɛn burikinnam ka mɔr sumbʋgʋsʋm Wina'am ni.
15 Mɔrini ya pʋtɛn'ɛrin ye Zugsɔb suguru la gbin anɛ ye ya nyɛ faangir. Ala mɛn ka ti ba'abinɔŋir Paul daa sɔbi tisi ya nɛ ya'am linɛ ka Wina'am tis o la.
16 O sɔbnɛ ala o gbana la wʋsa ni, pian'ad yɛlbama yɛla. Ka o pian'ad la tɔi hali nɛ tinamɛ na nyaŋi gban'e li gbin, ka banɛ zi' si'el la nɛ banɛ pʋ kpi'em nɛ ba yadda niŋirin la tiaki li ka li lieb san'auŋʋ tisi ba, nwɛnɛ ban niŋid si'em nɛ Wina'am gbana wʋsa la.
17 Alazug, m zuanɔŋa, yanamɛ pʋn dɛŋi mi' li la, gu'usimi ka tʋʋmbɛ'ɛd dim da kɛ ka ya yidig bɛɛ basi ya zi'esim ya yadda niŋir la nii.
18 Amaa kɛlli ka Wina'am yɔlisim nɛ baŋir linɛ yii ti Zugsɔb Yesu Kristo onɛ aan ti faangid la ni nɔbigi ya san'an. O yʋ'ʋr na nyɛ na'asi nannanna nɛ saŋa kanɛ ka' naarɛ! Ami.
YIIGA JOON
Gbauŋ nwa' yɛla
Joon da anɛ Yesu tʋmtʋmnib la yinne. O da bɛ nɛ Yesu ka nyɛ o bɛllim an si'em ka wʋm o pa'alʋg. O sɔb gbauŋ kaŋa kpɛmisid karimbiis ye ba bɛ bɛllim kanɛ pa'al ye ba dɔl Yesu nɛ o pa'alʋg la. Ti da kɛ ka ziri pa'alʋg linɛ yɛt ye ti ya'a dɔl Wina'am, ti bɛllim bɛɛ ti tʋʋma an si'em la yɛla pʋ pak la zii ti kpɛn'ɛs mɔɔgɔ. Yesu mɛŋ da liebnɛ ninsaal ka li nar ye ti dɔl o zanbina la ka bɛ nɛɛsim linɛ ka Wina'am tis la ni ka mɔr nɔŋilim nɛ taaba.
1 JOON 1
Onɛ tisid nyɔvʋr la yɛla
| 1 |
Ti sɔbid nɛ'ɛŋa nɛ yɛti ya pian'ad linɛ an nyɔvʋr ka da bɛ dunia pin'ilʋgʋn sa la. Ti wʋm o pian'ad, ka nyɛɛ o nɛ ti nini. Sida ti nyɛɛ o, ka ti nu'us si'is o.
2 Nyɔvʋr la da nie paalʋ ka ti nyɛɛ o nɛ ti nini ka dii li kasɛt. Onɛ an nyɔvʋr kanɛ ka' naarɛ ka ti mɔɔn o yɛla tisidi ya. O da bɛ nɛ ti Ba' Wina'am ni, ka nie ti san'an.
3 Tinamɛ nyɛ ka wʋm si'el la ka ti yɛti ya mɛn, ka ya na la'as nɛ ti nɔɔr yinne, ka mɔr nɔɔr yinne kanɛ ka ti mɔr nɛ ti Ba' Wina'am nɛ o Biig Yesu Kristo la.
4 Ti sɔbid nɛ'ɛŋa ye ti sumalisim la paae li bɛn.
Wina'am anɛ nɛɛsim
5 Labakaŋa ka ti wʋm o Biig la san'an ka mɔɔli tisi ya. Wina'am anɛ nɛɛsim, ka lik ka' o san'an baa bi'elaa.
6 Ti ya'a yɛl ye ti mɔr nɔɔr yinne nɛ o, ka lɛɛ bɛ likin, linɛ ka ti yɛt la, nɛ linɛ ka ti tʋm la anɛ dama'am.
7 Amaa ti ya'a ken nɛɛsimin, nwɛnɛ Wina'am bɛ nɛɛsimin si'em la, ti mɔr nɔɔr yinne nɛ taaba, ka o Biig Yesu ziim la pie ti tʋʋmbɛ'ɛd wʋsa, ka kɛ ka ti lieb nyain.
8 Ti ya'a yɛl ye ti ka' tʋʋmbɛ'ɛdɛ, ti ma'anɛ ti mɛŋ, ka sida ka' ti san'anɛ.
9 Ti ya'a pɛligi ti pʋʋsi tis Wina'am, o anɛ yɛlsida sɔb, ka na kɛɛ ti taali bas, ka pie ti tʋʋmbɛ'ɛd ka ti lieb pʋpielim dim.
10 Ti ya'a yɛl ye ti pʋ tʋm tʋʋmbɛ'ɛdɛ, ti buol o nɛ dama'am sɔb, ka o pian'ad ka' ti san'anɛ.
1 JOON 2
Kristo aan ti nu'unwɛ'ɛd
| 2 |
M biisɛ, m sɔbid nɛ'ɛŋa nɛ tisidi ya ye ya da tʋm tʋʋmbɛ'ɛdɛ. Amaa sɔ' ya'a tʋm bɛ'ɛd, Yesu Kristo onɛ an pʋpiel la na nwɛ' ti Ba' Wina'am nu'ugʋ tisi ti.
2 Kristo kum la kɛ ka Wina'am sʋnpɛɛn pʋ lɛm bɛɛ ti zugʋ ti tʋʋmbɛ'ɛd la yɛlaa. Li ka' tinam ma'aa tʋʋmbɛ'ɛd ka o yisɛ, amaa li anɛ dunia la wʋsa tʋʋmbɛ'ɛd.
3 Ti ya'a siak Wina'am nɔɔr yɛlʋg la li pa'al ye ti sid mi' o sʋ'ʋŋa.
4 Sɔ' ya'a yɛl ye o mi' o, ka pʋ siak o nɔɔr yɛlʋgɔ, ninkan anɛ dama'am sɔb, ka yɛlsida ka' o san'anɛ.
5 Amaa sɔ' ya'a siak o pian'ad la, ninkan sid nɔŋ o bɛdegʋ. Nɛ'ɛŋa na kɛ ka ti baŋ sʋ'ʋŋa ye ti bɛ Wina'am san'an.
6 Onɛ wʋsa yɛl ye o anɛ Wina'am nid on bɛ sʋ'ʋm nwɛnɛ Yesu Kristo da bɛ si'em la.
Nɔyɛlʋg paal la yɛla
7 M binɔŋa, nɔɔr yɛlʋg kanɛ ka m sɔbidi tisidi ya la ka' yɛl paallɛ. Li anɛ yɛlkʋdʋg kanɛ ka ya da mɔr yanamɛ da dɔl Yesu Kristo pin'ilʋgʋn sa la. Yɛlkʋdʋg la anɛ labaar kanɛ ka ya pʋn wʋm.
8 Amaa yɛlʋg kanɛ ka m sɔbidi tisidi ya la anɛ yɛl paal. Ti nyɛɛ li yɛlsida la nɛ Kristo san'an nɛ yanam san'an, bɔzugɔ lik la gaadya ka yɛlmɛŋir nɛɛsim la yʋ'ʋn nie nyɛɛn.
9 Onɛ yɛl ye o bɛ nɛɛsim la ni, ka kis o ba'abiig, o nam kpɛm bɛ nɛ likin.
10 Onɛ nɔŋ o ba'abiig bɛ nɛ nɛɛsim la ni. Dinzugɔ, si'el kae na kɛ ka o tʋm tʋʋmbɛ'ɛdɛ.
11 Amaa onɛ kis o ba'abiig la bɛ nɛ likin, ka kennɛ li ni, ka zi' on kɛn si'ela, lik la zu'om o la zug.
12 M biisɛ, m sɔbid nɛ'ɛŋa tisidi ya, bɔzugɔ Wina'am dii ya suguru ka yisi ya tʋʋmbɛ'ɛdi bas Kristo yʋ'ʋr zug la.
13 M saamnama, m sɔbid nɛ'ɛŋa tisidi ya, bɔzugɔ yanamɛ mi' onɛ da bɛ dunia pin'ilʋgʋn sa la zug. Dasamma, m sɔbid nɛ'ɛŋa tisidi ya, yanamɛ nyaŋ Sʋntaana la zug. M biisɛ, m sɔbid nɛ'ɛŋa tisidi ya, yanamɛ mi' ba' la zug.
14 M biisɛ, m sɔbid nɛ'ɛŋa tisidi ya, yanamɛ mi' ti ba' Wina'am la zug. M saamnama, m sɔbid nɛ'ɛŋa tisidi ya, yanamɛ mi' onɛ da bɛ dunia pin'ilʋgʋn sa la zug. Dasammaa, m sɔbid nɛ'ɛŋa tisidi ya, yanamɛ mɔr paŋ, ka Wina'am pian'ad bɛɛ ya ni, ka ya nyaŋ Sʋntaana la zug.
Da nɔŋi dunia la
15 Da nɔŋi dunia la bɛɛ bʋn linɛ wʋsa bɛɛ li nii. Ya ya'a nɔŋ dunia la, ya pʋ nɔŋi ya Ba' Wina'am.
16 Bʋn linɛ bɛ dunia ni, ka ka' sʋ'ʋm nwa', niŋgbina bɔɔdim linɛ an bɛ'ɛd nɛ nini gɔsig linɛ an bɛ'ɛd nɛ nidibi na dʋ'ʋsidi ba mɛŋ ban mɔr si'el bɛɛ ban na nyaŋi maal si'el yɛla, bama wʋsa pʋ yii ti Ba' Wina'am san'anɛ. Amaa li yinɛ dunia la ni na.
17 Dunia nɛ bʋn linɛ wʋsa bɛɛ li ni, ka nidib mɔr ya'amlɛog nɛ li la na gaad. Amaa onɛ tʋm Wina'am bɔɔdim la na bɛ yʋma dinɛ ka' naarɛ.
Kristo dataa la yɛla
18 M biisɛ, dunia la naar li'el nɛ. Ba daa yɛli ya ye Kristo dataa na kena; hali nannanna, Kristo dataas bɛdegʋ pʋn kena, dinzug ka ti baŋ ye dunia naar la li'el nɛ.
19 Nimbama nwa' ka' Wina'am nidib amɛŋaa, dinzug ka ba yii ti san'an. Ba ya'a aan o nidib, ba naan kpɛliminɛ ti san'an. Amaa ban basi ti la pa'al nyain ye ba ka' Wina'am nidiba.
20 Kristo tisi ya Wina'am Siig Kasi la, dinzugɔ ya wʋsa mi' yɛlsida la.
21 Man sɔbidi tisidi ya la, li ka'anɛ ya zi'inɛ yɛlsida la zugɔ, amaa li anɛ yanamɛ mi' li, ka mɛ mi' ye dama'am pʋ yit yɛlsida ni na la zug.
22 Anɔ'ɔnɛ an dama'am sɔba? Li anɛ onɛ ki'isid ye Yesu ka' Kristo la. Onɛ zan'asi ti Ba' Wina'am nɛ o Biig la, onɛ an Kristo dataa.
23 Onɛ zan'as Biig la mɛ zan'as o Ba' Wina'am. Ka onɛ siak Biig la mɛ siak o Ba' la.
24 Kɛlli ka pian'ad kanɛ ka ya wʋm ka dɔl Yesu Kristo pin'ilʋgʋn sa la kpɛm bɛɛ ya sʋnya ni. Li ya'a kpɛm bɛɛ ya sʋnya ni, ya na kpɛm bɛɛ ti Ba' la nɛ o Biig la san'an.
25 Nɛ'ɛŋa nwa' ka Kristo da yɛli zi'el ye o na tisi ti. Linɛ an nyɔvʋr kanɛ ka' naar la.
26 M sɔbid nɛ'ɛŋa tisidi ya ye m yɛli ya nimbanɛ zigid ye ba ma'aa ya kpɛn'ɛs mɔɔg la yɛla.
27 Kristo da tisi ya Wina'am Siig Kasi la, o nam bɛɛ ya san'an. Wina'am Siig Sʋŋʋ bɛɛ ya san'an la, ya pʋ ieed sɔ' ye o pa'ali yaa. Amaa o Siig Kasi la pa'annɛ ya si'el wʋsa la anɛ yɛlsida, ka ziri kae. Siakimi Siig Kasi la pa'alʋg ka kpɛlimmi Kristo ni.
28 M biisɛ, kpɛliminɛ o san'an, ka o ken la daar ti na mɔr sʋnkpi'euŋ, ka kʋ zɔt nyannɛ o ken la daarɛ.
29 Ya mi' ye Kristo anɛ pʋpiel, dinzugɔ baŋimi ye onɛ wʋsa tʋm dinɛ an sʋm la anɛ Wina'am biig.
1 JOON 3
Wina'am biis la yɛla
| 3 |
Gɔsimi Wina'am nɔŋi ti si'em. O nɔŋilim la zu'onɛ galis, ka o buonnɛ ti ye o biis. Sida ti anɛ o biis. Dunia dim la zi' Wina'am la zugʋ kɛ ka ba zi' tii.
2 M binɔŋa, nannanna ti anɛ o biis. Ka tinamɛ na ti an si'em la nam pʋ nie paalʋʋ. Amaa ti mi' ye Kristo ya'a ti kena ti mɛ na lieb wʋʋ on an si'em la, tinamɛ na ti nyɛ on an si'em la zug.
3 Onɛ wʋsa mɔr ti'ir kaŋa Kristo ni mɔɔd ye o mɛŋ an nyain, nwɛnɛ Kristo an nyain si'em la.
4 Onɛ wʋsa tʋm tʋʋmbɛ'ɛd, o san'am Wina'am wada la. Bɔzugɔ tʋʋmbɛ'ɛd san'amnɛ wada.
5 Ya mi' ye Kristo da pʋ mɔr tʋʋmbɛ'ɛdɛ, amaa ka lɛɛ kena yis tinam tʋʋmbɛ'ɛdi bas.
6 Dinzugɔ onɛ wʋsa bɛ Kristo ni pʋ tʋm tʋʋmbɛ'ɛdɛ. Ka onɛ nan kpɛn tʋm tʋʋmbɛ'ɛd la nam pʋ nyɛ oo bɛɛ baŋ oo.
7 M biisɛ, da kɛ ka sɔ' ma'aa yaa. Onɛ wʋsa tʋm dinɛ an sʋm anɛ pʋpielim sɔb wʋʋ Kristo an pʋpielim sɔb si'em la.
8 Onɛ wʋsa tʋm tʋʋmbɛ'ɛd anɛ Sʋntaana nid bɔzugɔ dunia pin'ilʋgʋn sa ka Sʋntaana pin'ili tʋm tʋʋmbɛ'ɛd. Ka onɛ wʋsa tʋm tʋʋmbɛ'ɛd anɛ o nid. Wina'am Biig la da kena ye o san'amnɛ Sʋntaana tʋʋma.
9 Onɛ wʋsa an Wina'am biig pʋ tʋm tʋʋmbɛ'ɛdɛ, Wina'am vʋm bɛɛ o ni la zug. Wina'am aan o Ba' la zug, o kʋ lɛn tʋm tʋʋmbɛ'ɛdɛ.
10 Nɛ'ɛŋa kɛ ka ti baŋ banɛ an Wina'am biis nɛ banɛ an Sʋntaana biis. Onɛ wʋsa pʋ tʋm dinɛ an sʋm, bɛɛ pʋ nɔŋ o tiraan ka' Wina'am biiga.
Nɔŋimi taaba
11 Labaar kanɛ ka ya da wʋm pin'ilʋgʋn sa la anɛ nɛ'ɛŋa, li sʋm ye ti nɔŋ taaba.
12 Da nwɛnɛ Kain onɛ an Sʋntaana nid ka da kʋʋ o mɛŋ pitʋ la. Bɔ ka o da kʋʋ o? Li anɛ o mɛŋ tʋʋma da an bɛ'ɛd, ka o pitʋ tʋʋma an sʋm la zug.
13 Dinzugɔ, m ba'abiisɛ, dunia nidib ya'a kisi ya, yanam da kɛ ka li lidigi yaa.
14 Tinam mi' ye ti yi kumin keŋ nyɔvʋrin bɔzugɔ ti nɔŋi ti ba'abiis. Onɛ wʋsa pʋ nɔŋ o ba'abiis nam bɛ nɛ kumin.
15 Onɛ wʋsa kis o ba'abiis anɛ ninkʋʋd. Ya mi' ye ninkʋʋd pʋ mɔr nyɔvʋr kanɛ ka' naar la o san'anɛ?
16 Lin niŋ si'em ka ti baŋ nɔŋilim nwa': Kristo n da kpii ti yɛla la kɛ ka ti baŋ nɔŋilim an si'em. Ka li mɛ sʋ'ʋm ye tinam mɛ kpi ti ba'abiis zug.
17 Sɔ' ya'a an arezak daan, ka nyɛ ka si'el pansig o ba'abiig, ka o pʋ zɔɔ o nimbaanliga, Wina'am nɔŋilim na niŋ wala bɛɛ o san'anɛ?
18 M biisɛ, da kɛ ka ti nɔŋilim an nɔɔrin pian'ad ma'aanɛɛ, amaa li sʋ'ʋm ka ti tʋmi li nɛ yɛlsida nɔŋilim.
Mɔr sʋnkpi'euŋ Wina'am tuon
19 Nɛ'ɛŋa kɛ ka ti baŋ ye ti anɛ yɛlsida dim, ka ti bɛ Wina'am tuon nɛ sʋnkpi'euŋ.
20 Hali ti pʋtɛnda ya'a mɔŋi ti bʋʋd, Wina'am gati ti pʋtɛnda ka mi' si'el wʋsa.
21 M binɔŋa, ti pʋtɛnda ya'a pʋ yɛl ye ti tʋm tʋʋmbɛ'ɛdɛ, ti sʋnf kpi'em Wina'am tuon,
22 linɛ wʋsa ka ti sɔs o san'an, o na tisi ti, tinamɛ siak o nɔɔr yɛlʋg ka tʋm dinɛ malis o la zug.
23 Nɔɔr yɛlʋg la anɛ nwa', ye ti niŋ o Biig Yesu Kristo yadda, ka nɔŋ taaba wʋʋ on zi'el nɔɔr si'em tisi ti la.
24 Banɛ wʋsa siak Wina'am nɔɔr yɛlʋg bɛ nɛ Wina'am ni, ka Wina'am mɛ bɛɛ ba ni. On tisi ti o Siig Kasi la, kɛ ka ti baŋ ye o bɛɛ ti ni.
1 JOON 4
Siig Kasi nɛ sibɛ'ɛd la yɛla
| 4 |
M zuanɔŋa, da siaki onɛ wʋsa yɛl ye o mɔr Wina'am Siig Kasi laa, amaa kpansimin o sɔbi gɔs ye siig kanɛ ka o mɔr la yinɛ Wina'am san'an naa. Bɔzugɔ ziri nɔdi'esidib bɛdegʋ gilig dunia la wʋsa.
2 Tinamɛ na niŋ si'em baŋ Wina'am Siig Kasi la nwa': Li anɛ onɛ wʋsa nie paalʋ yɛl ye Yesu Kristo da lieb ninsaal la, onɛ mɔr Wina'am Siig Kasi la.
3 Ka onɛ wʋsa ki'is Yesu pʋ mɔr Siig kanɛ yi Wina'am san'an naa. On sɔb mɔri sibɛ'ɛd linɛ yi Kristo dataa la san'an na. Ya da wʋm ye sibɛ'ɛd onɛ ki'isid Kristo la na kena. Nannanna o pʋn bɛ dunia la ni.
4 M biisɛ, yanam anɛ Wina'am din, ka nyaŋ ziri nɔdi'esidib la. Siig Kasi kanɛ bɛɛ ya san'an la mɔr paŋ hali gat sibɛ'ɛd kanɛ bɛ dunia ni la.
5 Ziri nɔdi'esidib la anɛ dunia la din, linzug ka ba pian'ad dunia yɛla, ka dunia dim mɛ kɛlisidi ba.
6 Amaa tinam anɛ Wina'am nidib, ka onɛ wʋsa mi' Wina'am na kɛlisi ti. Ka onɛ wʋsa zi' Wina'am kʋ kɛlisi tii. Nɛ'ɛŋa ka ti na nyaŋi baŋi bak yɛlsida Siig nɛ ziri Siig.
Wina'am anɛ nɔŋilim Sɔb
7 M zuanɔŋa, nɔŋilim yinɛ Wina'am san'an na, dinzug kɛlli ka ti nɔŋ taaba. Onɛ wʋsa nɔŋ o tiraan anɛ Wina'am biig, ka mi' o.
8 Ka onɛ wʋsa pʋ nɔŋ o tiraan zi' Wina'am, bɔzugɔ Wina'am anɛ nɔŋilim daan.
9 Wina'am nɔŋi ti si'em nwa'. O tʋm o Biyimmir dunia ni na, ka on zug ka ti na mɔr nyɔvʋr.
10 Nɔŋilim anɛ anwa. Li ka'anɛ tinamɛ dɛŋi nɔŋ Wina'am yiigaa. Wina'am lɛɛ dɛŋi nɔŋi ti, ka tʋm o Biig, ka o Biig la zug ka o yisi ti tʋʋmbɛ'ɛdi bas.
11 M zuanama, Wina'am ya'a nɔŋi ti anwana, li sʋ'ʋm ka tinam mɛ nɔŋ taaba.
12 Sɔ' nan zi' nyɛ Wina'am. Amaa ti ya'a nɔŋ taaba, Wina'am bɛɛ ti ni, ka o nɔŋilim sid bɛɛ ti ni.
13 Ti mi' ye ti bɛ nɛ Wina'am ni ka o mɛ bɛɛ ti ni, bɔzugɔ o tisi ti Siig la.
14 Ti nyɛ ya ka di kasɛt ye ti Ba' Wina'am tʋm o Biig na ka o lieb dunia dim wʋsa faangid, ka ti mɔɔli li yɛla.
15 Onɛ wʋsa nie li paalʋ yɛl ye Yesu anɛ Wina'am Biig, Wina'am bɛɛ o san'an, ka on mɛ bɛɛ o ni.
16 Tinam mɛŋ baŋ nɔŋilim kanɛ ka o mɔr nɛ ti, ka ti ti'ir bɛɛ ani. Wina'am anɛ nɔŋilim sɔb. Ka onɛ wʋsa mɔr nɔŋilim bɛ nɛ Wina'am ni ka on mɛ bɛɛ o ni.
17 Lin an si'em la, ka nɔŋilim nie ti san'an nyain, ka li kɛ ka ti pʋ mɔr bi'esʋg sariakadib daarɛ, bɔzugɔ dunia kaŋa ni ti nwɛnɛ on an si'em la nɛ.
18 Nɔŋilim pʋʋgin pʋ mɔr dabiem. Nɔŋilim linɛ aan amɛŋa la ni dabiem kae, bɔzugɔ namisʋg yɛla kɛ ka dabiem bɛ. Onɛ zɔt dabiem la pʋ mɔr nɔŋilim amɛŋaa.
19 Ti mɔr nɔŋilim, bɔzugɔ Wina'am dɛŋi nɔŋi ti.
20 Sɔ' ya'a yɛl ye, “Mam nɔŋ Wina'am,” ka kis o ba'abiig, o anɛ dama'am sɔb. O ya'a pʋ nɔŋ o ba'abiig onɛ ka o nini nyɛt o la, o na niŋ wala nɔŋ Wina'am onɛ ka o nini pʋ nyɛt o la.
21 Nɔzi'elkaŋa ka Kristo tisi ti, ye onɛ wʋsa nɔŋ Wina'am, li sʋ'ʋm ka o nɔŋ o ba'abiis mɛn.
1 JOON 5
Tinamɛ nyaŋ dunia la yɛla
| 5 |
Onɛ wʋsa siak ye Yesu an Kristo la, o anɛ Wina'am biig. Onɛ wʋsa nɔŋ dau sɔ', mɛ nɔŋ dau la biig. 2 Anwana kɛ ka ti baŋ ye ti nɔŋ Wina'am biis. Li anɛ tinamɛ nɔŋ Wina'am ka siakid o nɔɔr yɛlʋg wʋsa la zug.
3 Tinamɛ na nɔŋ Wina'am si'em nwa': asɛɛ ti siak o nɔɔr yɛlʋg la. Ka o nɔɔr yɛlʋg la pʋ tɔi galisɛ.
4 Onɛ wʋsa an Wina'am biig na tun'e nyaŋ dunia la. Linɛ kɛt ka ti nyaŋid dunia la anɛ ti yadda niŋir Yesu Kristo ni.
5 Anɔ'ɔnɛ nyaŋid dunia la? Li anɛ onɛ siak ye Yesu anɛ Wina'am Biig la ma'aa.
Yesu Kristo an si'em la yɛla
6 Yesu Kristo anɛ onɛ da kena. O da kena di'e Wina'am ku'om sʋʋb ka kpi ka o ziim yi, o da pʋ kena di'e Wina'am ku'om sʋʋb ma'aanɛɛ, o mɛ da di'e kum mɛn. Ka Siig Kasi la dii li kasɛt, bɔzugɔ Siig Kasi la an yɛlsida Sɔb.
7 Ti mɔr kasɛtiba atan' banɛ siak ye nɛ'ɛŋa anɛ sida.
8 Bʋnama atan' bama anɛ Wina'am Siig Kasi la nɛ o Wina'am ku'om sʋʋb nɛ o kum. Ka bama atan' la anɛ nɔɔr yinne.
9 Ti siak linɛ ka nidib yɛli ti Wina'am Biig la yɛla la, amaa Wina'am pa'ali ti si'el la gaad, bɔzugɔ li anɛ Wina'am mɛŋi pa'ali ti o Biig la yɛla.
10 Dinzugɔ onɛ mɛkama siak o Biig la mi' o yɛla o sʋnfʋn. Ka onɛ mɛkama pʋ siak Wina'am, o buol o nɛ ziridaan, on pʋ siak Wina'am pa'ali ti si'el o Biig la yɛla la zug.
11 Kasɛt la anɛ anwa: Wina'am tisi ti nyɔvʋr kanɛ ka' naarɛ, ka nyɔvʋr kaŋa bɛ nɛ o biig la ni.
12 Onɛ wʋsa di'e o Biig la mɔr nyɔvʋr kaŋa. Ka onɛ wʋsa pʋ di'e Wina'am Biig la, pʋ mɔr nyɔvʋr kaŋaa.
Nyɔvʋr kanɛ ka' naar la yɛla
13 M sɔbid nɛ'ɛŋa tisid yanam banɛ niŋ Wina'am Biig la yadda la ye li kɛ ka ya baŋ ye ya mɔr nyɔvʋr kanɛ ka' naarɛ.
14 Nɛ'ɛŋa zug ka ti mɔr sʋnkpi'euŋ Wina'am tuon. Ti mi' sʋ'ʋŋa ye ti ya'a sɔs si'el wʋsa ka li dɔl o bɔɔdim, o na wʋm tisi ti.
15 Ti ya'a baŋ ye o wʋm tisi ti, ti mɛ na baŋ ye tinamɛ sɔs si'el la ti na di'e li.
16 Sɔ' ya'a nyɛɛ o ba'abiig ka o tʋm tʋʋmbɛ'ɛd linɛ kʋ ta'as o kuminɛ, on sɔsim Wina'am tis o, ka Wina'am na tis o nyɔvʋr. M yɛt nɛ'ɛŋanɛ tisid banɛ
tʋʋmbɛ'ɛdi pʋ ta'asid kum na la. Amaa tʋʋmbɛ'ɛd sieba bɛ ta'asid nidib kumin. M pʋ yɛl ye ya sɔsim Wina'am din yɛlaa.
17 Ninsaalibi niŋid si'el wʋsa ka li ka' sʋ'ʋm la anɛ tʋʋmbɛ'ɛd Wina'am tuon. Amaa li ka' tʋʋmbɛ'ɛd wʋsa ta'asid nidib kuminɛ.
18 Ti mi' ye banɛ an Wina'am biis la pʋ kpɛn ken tuonnɛ tʋm tʋʋmbɛ'ɛdɛ. Wina'am Biig la mɛŋ guri ba sʋ'ʋŋa, ka Sʋntaana kʋ nyaŋi daami baa.
19 Ti mɛ mi' ye tinam anɛ Wina'am biis. Amaa dunia la wʋsa bɛ nɛ Sʋntaana nu'usin.
20 Ti mɛ lɛm mi' ye Wina'am Biig la kena ka tisi ti ya'am kanɛ gban'ad si'el gbin, linɛ na kɛ ka ti baŋ onɛ an sida sɔb la. Ka ti bɛ nɛ sida sɔb, onɛ aan o biig Yesu Kristo la. O sid anɛ Wina'am ka an onɛ tisid nyɔvʋr kanɛ ka' naarɛ.
21 M biisɛ, da dɔlli linɛ ka' Wina'am.
AYI' JOON
Gbauŋ nwa' yɛla
Joon da sɔb gbauŋ kaŋa tis teŋ si'a karindɔɔg. O kpɛmisid karimbiis ye
ba dɔl sida la ka mɔr nɔŋilim nɛ taaba ka da dɔl ziri pa'anniba.
2 JOON 1
Mam onɛ an kpɛɛm la sɔbid nɛ'ɛŋa tisid fʋn kanɛ an pu'a ka Wina'am gaŋ la nɛ fʋ biis. M sid nɔŋif ka li ka'anɛ mam ma'aanɛ amaa li anɛ banɛ wʋsa mi' sida la.
2 Bɔzugɔ li anɛ yɛlsida linɛ bɛɛ ti san'an, ka na kpɛm bɛɛ ti san'an yʋma dinɛ ka' naar la zug:
3 Ti Ba' Wina'am nɛ o Biig Yesu Kristo na tisi ti yɛlsʋm ka zɔɔ ti nimbaanlig ka tisi ti sumbʋgʋsʋm linɛ yit Wina'am onɛ an Yesu Kristo ba' la ni na. Lina wʋsa anɛ tinam banɛ mɔr sida nɛ nɔŋilim la din.
Sida nɛ nɔŋilim
4 Li malisim bɛdegʋ man nyɛ ka biis la sieba dɔl sida la nwɛnɛ ti Ba' Wina'am da zi'el nɔɔr si'em tisi ti la.
5 Nannanna, m zua sʋŋɔɔ, m pʋ sɔbid linɛ an zi'el paalɛ, amaa li anɛ linɛ ka ya pʋn wʋm pin'ilʋgʋn sa la. M sɔsidif nɛ ye ti nɔŋim taaba.
6 Nɔŋilim la gbin anɛ ye, ti siakim Wina'am nɔɔr yɛlʋg la wʋsa. Nwɛnɛ yanamɛ da wʋm pin'ilʋgʋn sa si'em la, o nɔzi'elʋg la anɛ ye, ya bɛɛ o nɔŋilim la ni.
7 Ziri dim bɛdegʋ banɛ pʋ siak ye Yesu da lieb ninsaali kɛn dunia ni na la gilig dunia la wʋsa. Nimban buudi anɛ ziri dim ka an Kristo dataas.
8 Baŋimi ya mɛŋ ka da san'am linɛ ka ti daa tʋm tisi ya la, ka ya na di'e nyɔɔd la wʋsa.
9 Onɛ mɛkama pʋ dɔl Kristo pa'alʋgɔ, ka paas o mɛŋ pa'alʋg, o pʋ dɔl Wina'am. Onɛ mɛkama dɔl pa'alʋg la, o dɔlli ti Ba' Wina'am nɛ o Biig la.
10 Sɔ' ya'a kɛɛn ya san'an na ka pʋ mɔr pa'al kaŋa naa, yanam da di'e o ya yinnɛ, hali pʋn da pʋ'ʋs oo.
11 Onɛ pʋ'ʋs o mɛ na lieb o tʋʋmbɛ'ɛd tiraan.
Pʋ'ʋsʋg
12 M mɔr pian'ad bɛdegʋ ye m yɛli ya, ka pʋ bɔɔd ye m sɔbi li gbauŋʋn tisi yaa. M tɛn'ɛs ye m na kaae ya, ka pian' tisi ya m mɛŋ. Ka ti sumalisim la an bɛdegʋ. Fʋ bier onɛ ka Wina'am gaŋ la biis pʋ'ʋsidif sʋ'ʋŋa.
ATAN' JOON
Gbauŋ nwa' yɛla
Joon da sɔb gbauŋ kaŋa nɛ tis Gaius onɛ da an karindɔɔg tuongat la. O da faas Gaius nɛ on da kpɛ'ɛŋ o mɛŋi dɔl Wina'am nɛ sida la, ka kpɛmis o ye o bɛ bɛllim kanɛ na sʋŋ o taaba.
3 JOON 1
Man onɛ an kpɛɛm la sɔbid nɛ'ɛŋa tisid fʋn Gaius, onɛ ka m sid nɔŋ amɛŋa la.
2 M zua nɔŋirɛ, m sɔs Wina'am ye fʋ si'el wʋsa na an sʋm, ka fʋ na bɛ laafi, ka mi' ye fʋ siig mɔr laafi Wina'am tuon.
3 Li malisim bɛdegʋ nɛ ti zuanam sieba paae na ka yɛl fʋn dɔl yɛlsida la sʋ'ʋŋa si'em la. Ti mi' ye fʋ bɛllim pʋʋgin fʋ dɔl yɛlsida la daar wʋsa.
4 Si'el kae na tisim malisim gaad man wʋm ye m biis la dɔl yɛlsida laa.
5 M zua nɔŋirɛ, fʋ anɛ yɛlsida sɔb nɛ fʋn niŋ si'eli sʋŋ yadda niŋidib la, hali la'an nɛ ban an saam la.
Gaius la yɛla
6 Ba tu'asi fʋ nɔŋilim la yɛla tis Wina'am nimbanɛ bɛ kpɛla la. Sʋŋimi ba ka ba keŋ tuon. Kɛl ka fʋn sʋŋi ba si'em la malis Wina'am.
7 Bɔzugɔ Kristo tʋʋma yɛla, ka ba yii ken, ka zan'as banɛ ka' Kristo nidib la sʋŋir.
8 Dinzugɔ li sʋ'ʋm ka ti sʋŋi ti tʋmtʋm taaba nwa' ka ba mɔɔl sida pian'ad la tis nidib.
Diotrefes nɛ Demetrius yɛla
9 M daa sɔb si'eli tis Wina'am nimbanɛ bɛɛ fʋ teŋin la. Ka Diotrefes onɛ bɔɔd ye o niŋi ba tuongat la pʋ siak man sɔb si'el la.
10 M ya'a ti kena m na tu'asi ya on tʋm si'el ka kɛɛndi ti ka ma'adi tisidi ti la. Ka lin pʋ sia'al oo, ka o lɛn zan'asi ti taaba di'er. O vi'id banɛ bɔɔd ye ba di'e ba la, ka kadi ba yis Wina'am nidib la sʋʋgin.
11 M zua sʋŋɔ, da tu'asidi linɛ an bʋmbɛ'ɛdɛ. Tu'asim linɛ an sʋm. Onɛ mɛkama tʋm dinɛ an sʋm anɛ Wina'am nid. Onɛ mɛkama tʋm dinɛ an bʋmbɛ'ɛd zi' Wina'am.
12 Sɔ' wʋsa pian'ad Demetrius yɛla sʋ'ʋm, hali yɛlmɛŋir dim la mɛ pian'ad o yɛla sʋ'ʋm. Ka tinam mɛ dii o yɛlsida la kasɛt. Fʋn mɛŋ mi' ye ti kasɛt la anɛ sida.
Pʋ'ʋsʋg
13 M mɔr pian'ad bɛdegʋ na yɛlif, ka pʋ bɔɔd ye m sɔbi niŋ gbauŋʋn nɛ.
14 M mɔr ti'ir ye m na kena kaaf dabisa ayi' nwa' ni, ka ti pian' tis taaba.
15 Sumalisim bɛ nɛf. Fʋ zuanam wʋsa pʋ'ʋsidif. Pʋ'ʋsimi ti zuanam la yinne-yinne tisi ti.
JUD
Gbauŋ nwa' yɛla
Jud sɔb gbauŋ kaŋa kpɛmisid karimbiis ye ba zi'enim Wina'am yɛlsʋm sida pa'alʋg la ni kiŋ-kiŋ ka da di'e banɛ zan'as Yesu Kristo nɛ o pa'alʋg la pa'alʋgɔ, hali ba ya'a ye ba anɛ banɛ dɔl Wina'am suorɛ.
JUD 1
Mam Jud onɛ an Yesu Kristo tʋmtʋm nɛ Jemes ba'abiig la, sɔbid gbauŋ kaŋa tisid banɛ ka ti Ba' Wina'am buol ka nɔŋi ba, ka Yesu Kristo guri ba la.
2 Wina'am na zɔɔ ya nimbaanlig bɛdegʋ, ka pɛ'ɛsi ya sumbʋgʋsʋm nɛ nɔŋir ka li galis.
Ziri pa'annib la yɛla
3 M zuanɔŋa, m kpɛ'ɛŋi m mɛŋ hali ye m sɔbi tisi ya faangir linɛ aan ti wʋsa din la yɛla. Li nar ye m sa'ali ya ye ya mɔ nɛ banɛ bɔɔd ye ba san'am pa'alʋg linɛ ka ti siak ka Wina'am niŋ o nidib nu'usin vuguri la.
4 Nidib banɛ ka kʋdimin dim da kʋʋsi ba yɛla bɛ'ɛd la su'a gɛndigi ya sʋʋgin. Ba anɛ banɛ zi' Wina'am ka tiak o pʋpielim piini la tʋm tʋʋmyaalis, ka ki'isid Yesu Kristo onɛ aan ti kpi'euŋ sɔb nɛ ti Zugsɔb gʋllim la.
5 La'an nɛ yanamɛ dɛŋi baŋi li sʋ'ʋŋa la, m bɔɔd ye m tiɛn ya ye Wina'am an onɛ da faaɛn o nidib Egipt teŋin, ka li nya'aŋ ka o da kʋʋ ba sieba banɛ pʋ niŋ o yadda la.
6 Maliaknam banɛ mɛ da basi ba sʋ'ʋlim ka bas linɛ sid aan ba bɛllim zin'ig la, Wina'am da lɔɔ ba nɛ bana banɛ ka' san'auŋɔ, ka niŋi ba likinɛ gur sariakadib dabistita'ar la daar.
7 Ala mɛn ka Sodom nɛ Gomora dim nɛ tɛɛns banɛ kpi'e ba la da tʋm dian'ad tʋʋma nɛ tʋʋmyaalis, ka nyɛ namisʋgʋ ba tʋʋmbɛ'ɛd la yɛla, ka banɛ namis bugum linɛ pʋ kpiigid ni la, an sa'alʋgʋ tisi ti.
8 Ala mɛn ka banɛ zi' Wina'am la kpɛn dɔl zaansima ka li kɛ ka ba dian'adi ba mɛŋ, ka zan'as kpi'euŋ dim ka tʋ'ʋd banɛ mɔr paŋi bɛɛ agɔla la.
9 Hali maliak kpɛɛm, Maikel n da nwa'asid nɛ Sʋntaana Moses onɛ da kpi la niŋgbiŋ yɛla la, da pʋ kpi'em ye o zɛrig Sʋntaanaa, amaa ka lɛɛ yɛl ye, Zugsɔb la na namis o.
10 Amaa nimbama nwa' tʋ'ʋd linɛ mɛkama zu'oe gaadi ba ya'am baŋir. Nimbama nwɛnɛ bʋnkɔnbid banɛ ka' ya'am ka mi'inɛ ban na si'isi ba niŋgbiŋ wʋʋ bʋnkɔnbid banɛ pʋ tɛn'ɛsid si'em la, ka li na kɛ ka ba san'ami ba mɛŋ.
11 Tɔɔg na paae ba! Ban tʋʋnd Kain suoya ka pɛsigi ba mɛŋi dɔl suobɛ'ɛd wʋʋ Balaam da pɔ'ɔg ka dɔl suobɛ'ɛd ye o nyɛ nyɔɔd, ka kpi mɛn wʋʋ Kora nɛ sieba da zan'as Wina'am nɔɔr ka kpi si'em la.
12 Nimbama anɛ banɛ mɔr gbada ka la'am diti ya nɔŋilim dikanɛ ka ya dit nɛ taaba la, ba mɔr nyɛɛsim ka mɔɔd ye ba sʋŋidi ba mɛŋ ma'aa. Ba nwɛnɛ saŋgbana banɛ ka saa kae ka sisi'em da'adi li ken, ka nwɛnɛ tiis banɛ pʋ mɔr wala, ba walib saŋaa. Ba kpinɛ tɔl ka ba vɔɔn ba bas.
13 Ba lɛn nwɛnɛ atɛuk ku'opila banɛ mɔr paŋ hali ka da'ad pumpuum linɛ aan ba nyan tʋʋma la, ka lɛn nwɛnɛ nwadbibis banɛ gɔɔnd ka Wina'am ti'eb lik tita'ari guri ba saŋa kanɛ ka' bɛnnɛ.
14 Enok onɛ yi Adam tuŋʋn na ka an zʋmaʋŋ kanɛ paas ayɔpɔi la, da di'e Wina'am pian'adi tis nidib la ye, “Gɔsimi, Zugsɔb la kenna nɛ o maliaknam tusa-tusa
15 ye o kad saalib wʋsa saria, ka kʋʋs tʋʋmbɛ'ɛd dim wʋsa banɛ pʋ dɔl Wina'am suorɛ, ka tʋm tʋʋmbɛ'ɛd ka pʋ mɔr ya'a nɛ Wina'am ka pian'ad pian'abɛ'ɛdi ki'isid o la.”
16 Ba anɛ banɛ nyɔn hali ka zɛrigidi ba taaba; ka niŋid bɛ'ɛd linɛ aan ba mɛŋ ya'amlɛog, ba nwɛ'ɛd nyɔ'ɔg hali, ka pian'ad nɛ nɔŋgban malisiŋ ye ba nyɛ ban bɔɔd si'el.
Sa'alʋg
17 M zuanɔŋa, tɛnri yɛl kanɛ ka ti Zugsɔb Yesu Kristo tʋmtʋmnib da dɛŋi pian' ye li na niŋ la.
18 Ba da yɛli ya ye naar saŋa la, ninla'adib na bɛ, banɛ la'ad Wina'am ka dɔl saalib ya'amlɛog bɔɔdim ka pʋ dɔl Wina'am suor la.
19 Nimbama nwa' ziidi wɛligiri kenna. Ba mɔri saalib itʋŋ ma'aa ka Wina'am Siig Kasi ka' ba nii.
20 Amaa m zuanɔŋa, yanam lɛɛ sʋŋimi taaba ka kpɛ'ɛŋi ya Wina'am yadda niŋir linɛ an kasi la ni, ka kɛ ka Wina'am Siig Kasi sʋŋi ya nɛ ya winsɔsʋgin.
21 Kpɛlimmi Wina'am nɔŋilimin la guri ti Zugsɔb Yesu Kristo nimbaanlzɔɔr linɛ ta'asid nyɔvʋr dinɛ ka' naar la.
22 Zɔm banɛ bi'esid la nimbaanlig.
23 Tɛɛgim sieba yis bugumin na ka faaɛn ba. Ka zɔ sieba nimbaanlig nɛ dabiem, amaa gu'usim ka da kpɛn' ba tʋʋmbɛ'ɛd linɛ dian'a ba la nii.
Wina'am zʋn'or
24 Wina'am an onɛ na nyaŋi guri ya ka ya kʋ lu tʋʋmbɛ'ɛdinɛ, ka na mɔri ya keŋ o tuon linɛ an o na'am paŋ zin'igin ka gbada kae, ka sumalisim bɛ bɛdegʋ la.
25 On gʋllim aan ti Wina'am nɛ ti faangid, o na nyɛ na'asi nɛ girima nɛ kpi'euŋ ka li yinɛ ti Zugsɔb Yesu Kristo san'an yʋma banɛ gaad la nɛ nannanna nɛ saŋa linɛ ka' naarɛ. Ami.
NIER PA'ALUG
Gbauŋ nwa' yɛla
Joon sɔb bʋmbanɛ ka Wina'am da nie pa'al o on da bɛ Patmos teŋ kanɛ ka ku'om lɔbi gilig la. O pa'al ye Wina'am sid na dɔlis Yesu Kristo ni ka o nyaŋ o dataas, la'an nɛ Sʋntaana wʋsa. Wina'am mɛŋ nidib na nyɛ nyɔvʋr kanɛ ka' naar zin'ikanɛ ka o maal la ni. Arezana paal nɛ dunia paal linɛ ka tɔɔg kae la ni ka Wina'am bɛ saŋa wʋsa. Dunia la tɛɛns wʋsa nidib nɛ banɛ pian'ad buudi pian'ad wʋsa la na pɛ'ɛs wʋrʋg kanɛ zun'od Wina'am zin'ikan la ni. Labakaŋa kpɛmisidi ti nɛ ye ti kpɛn niŋim Wina'am yadda, hali la'an nɛ tɔɔg saŋa.
NIER PA'ALƲG 1
Yɛlbanɛ ka Yesu Kristo da nie pa'al o tʋmtʋmnib la sɔbnɛ gbauŋ kaŋa ni. Wina'am da nie nɛ'ɛŋa ye o bigis o tʋmtʋmnib yɛlbanɛ na kena ka li kʋ yuugɛ. Kristo da tʋmnɛ maliak o tʋmtʋm Joon san'an ka o yɛl o yɛlbama.
2 Joon da yɛl bʋn linɛ ka o nyɛ la wʋsa. Ka nɛ'ɛŋa wʋsa anɛ labaar kanɛ yi Wina'am san'an na, nɛ yɛlsida linɛ ka Yesu Kristo da nie pa'al o la.
3 Albareka bɛ nɛ onɛ karim Wina'am nɔɔr pian'ʋk kanɛ ka o nɔdi'es da pian' la nɛ banɛ wʋmi li ka siak bʋn linɛ sɔb gbauŋ kaŋa nwa' ni la. Bɔzugɔ saŋa la li'el ya ka nɛ'ɛŋanam na niŋ.
Joon pʋ'ʋsid Wina'am nidib banɛ la'as tɛɛnsa ayɔpɔi la
4–5 Man Joon n sɔbid gbauŋ kaŋa tisid karindɔɔd ayɔpɔi banɛ bɛ Asia sʋ'ʋlimin la. Wina'am onɛ da bɛ, ka kpɛm bɛ, ka na ti bɛ la, nɛ siisa ayɔpɔi banɛ bɛɛ o na'am gbauŋ tuon la, nɛ Yesu Kristo onɛ dit kasɛt Wina'am yɛla nɛ sida ka an onɛ da vʋ'ʋg kumin yiiga ka an dunia na'anam na'ab la na tisi ya yɛlsʋm nɛ sumbʋgʋsʋm. Yesu Kristo nɔŋi ti ka kpi ka o ziim yisi ti, ti tʋʋmbɛ'ɛdin
6 ka kɛ ka ti an na'anam nɛ maanmaannib ka tʋmmi tisid o Ba' Wina'am. O na nyɛ zʋn'or nɛ na'am, saŋa dinɛ ka' bɛnnɛ. Ami.
7 Gɔsimi, onɛ kenna nɛ saŋgbana la. Sɔ' mɛkama na nyɛɛ o, la'an nɛ banɛ kʋns o la. O ya'a ti kena, dunia buudi wʋsa na kum o yɛla. Sida, li na niŋ. Ami.
8 Zugsɔb Wina'am la yɛl ye, “Manɛ an Paŋtita'ar Sɔb ka da bɛ, ka nam bɛ, ka na ti bɛ la. Manɛ an Alfa nɛ Omega.”
Joon n da nyɛ Kristo la yɛla
9 Man Joon anɛ ya ba'abiig onɛ la'as nɛ ya Yesu sʋ'ʋlimin, ka dit fara ka mɔdigid nɛ ya tinamɛ an yinne nɛ Yesu la zug. Man daa mɔɔn Wina'am pian'ad ka yɛt man mi' si'el Yesu Kristo yɛla la zug, ka ba daa mɔrimi keŋ Patmos teŋ kanɛ ka ku'om giligi li la.
10 Zugsɔb la dabisir la daar ka Wina'am Siig Kasi la kpɛn'ɛm, ka m wʋm kʋkɔtita'ar linɛ kum wʋʋ na'atannɛ piebidi m nya'aŋ nɛ.
11 Ka li yɛl ye, “Sɔm linɛ ka fʋ nyɛ la digil, ka zaŋ gbauŋ la tɔlim tis karindɔɔd ayɔpɔi banɛ an Efesus nɛ Smirna nɛ Pergamum nɛ Tiatira nɛ Sardis nɛ Filadelfia nɛ Laodisea dim la.”
12 Man fɛndig ye m gɔs ye anɔ'ɔnɛ pian'adi tisidim la, ka nyɛ sanlima fitazi'esa ayɔpɔi.
13 Ka sɔ' zi'e ba sʋʋgin nwɛnɛ Ninsaal Biig la yɛ fuug linɛ wa'ami paae o nɔba. Ka sanlima sɛnbidiŋ lɔɔ o nyɔ'ɔg.
14 Ka o zuobid pɛligi nwɛnɛ gungum bɛɛ sakuga nɛ. Ka o nini nwɛnɛ bugum pielim nɛ.
15 Ka o nɔba nyɛɛn nwɛnɛ kʋntzɛn'ug ka ba nyɛligi li bugumin ka duusi li ka li lieb nyain. Ka o kʋkɔr vuud nwɛnɛ ku'om na zɔt ka suugid nɛ paŋ si'em la.
16 Ka o mɔr nwadbibis ayɔpɔi o datiuŋ nu'ugin. Ka sʋ'ʋraug linɛ dit tuon nɛ nya'aŋ yi o nɔɔrin na. Ka o nindaa nyɛɛn nwɛnɛ nintaŋ tisʋʋs winnig nɛ.
17 Man daa nyɛɛ o la m igin o tuon ka nwɛnɛ ninkanɛ kpi nɛ. Ka o zaŋ o datiuŋ nu'ugʋ pa'alim zug ka ye, “Da zɔt dabiem, ka manɛ an yiiga nɛ nya'aŋ daan la.
18 Manɛ an onɛ vʋe la. M daa kpinɛ, amaa m yʋ'ʋn vʋe saŋa dinɛ ka' bɛnnɛ, ka mɔr kum nɛ kpi'im teŋ saafinam.
19 “Dinzug, sɔm bʋn linɛ ka fʋ nyɛ la, linɛ bɛ nannanna, nɛ linɛ na ti niŋ nya'aŋ.
20 Nwadbibis ayɔpɔi linɛ ka fʋ nyɛ m datiuŋ nu'ugin nɛ sanlima fitazi'esa ayɔpɔi la yɛlsu'ada la gbin anɛ anwa: Nwadbibis ayɔpɔi la anɛ Wina'am nimbanɛ la'as zin'isa ayɔpɔi la maliaknam, ka fitazi'esa ayɔpɔi la an Wina'am nimbanɛ la'as zin'isa ayɔpɔi la.”
NIER PA'ALƲG 2
Kristo tɔlʋŋ kanɛ an Efesus dim din la yɛla
| 2 |
Ka man nyɛ sɔ' la yɛlim ye, “Sɔm nɛ'ɛŋa tis maliak onɛ bɛ Efesus karindɔɔgin la. Nɛ'ɛŋa anɛ tɔlʋŋ dinɛ yi onɛ mɔr nwadbibis ayɔpɔi o datiuŋ nu'ugin la na, onɛ ken sanlima fitazi'esa ayɔpɔi sʋʋgin la.
2 Tɔlʋŋ la nwa': ‘M mi' yanamɛ tʋm si'em nɛ yanamɛ kpɛ'ɛŋidi ya mɛŋ si'em. M mi' ya summɔtiri an si'em, ka mi' ye ya pʋ siakidi di'ed nimbɛ'ɛdnama, ka mak banɛ ye ba anɛ Kristo tʋmtʋmnib amaa ka ka' ala la gɔs ka nyɛ ka ba anɛ ziri dim.
3 M mi' ye ya mɔdigid ka namisid man zug ka pʋ gɛɛn basɛ.
4 La'an nɛ wala man nyɛɛ ya taali an si'em nwa'. Ya pʋ nɔŋim wʋʋ yanamɛ daa pin'ili dɔllim ka nɔŋim si'em laa.
5 Tiɛnmi yanamɛ daa niŋid si'em ka bas la. Tiakimi ya tʋʋma ka tʋm yanamɛ daa dɛŋi tʋm si'em yiiga la. Ya ya'a pʋ tiaki ya suoya, m na kɛɛn ya san'an na nɔki ya fita zi'esir la yisi li zin'igin.
6 Amaa nɛ'ɛŋa ka ya niŋid ka li an sʋm. Ya kis linɛ ka Nikolaitan nidib la niŋid, nwɛnɛ man kisi li si'em la.
7 Onɛ mɔr tʋba na wʋm, on wʋm linɛ ka Wina'am Siig Kasi la yɛt karindɔɔd la. Onɛ nyaŋ yɛlbɛ'ɛd wʋsa, m na tis o suor ka o di tiig linɛ tisid nyɔvʋr ka bɛ Wina'am lɔmbɔn'ɔgin la wala.’”
Kristo tɔlʋŋ kanɛ an Smirna dim din la yɛla
8 Ka man nyɛ sɔ' la lɛn yɛlim ye, “Sɔm nɛ'ɛŋa tis maliak onɛ bɛ Wina'am nimbanɛ bɛ Smirna teŋin la. Nɛ'ɛŋa anɛ tɔlʋŋ linɛ yi onɛ an yiiga nɛ nya'aŋ la ni na, onɛ da kpi ka lɛn vʋ'ʋg la.
9 “Tɔlʋŋ la nwa': ‘M mi' ya namisʋg la yɛla, ka mi' ye ya anɛ nɔŋ dim, amaa sida ya anɛ kpan'am dim, ka mi' pian'abɛ'ɛd din ka banɛ yɛl ye ba anɛ Jew dim ka ka' ala la pian'adi ya yɛla. Ba anɛ Sʋntaana nidib.
10 Da zɔ yanamɛ ye ya di fara si'a la dabiem. Kɛlisimi! Sʋntaana na kɛ ka ba kpɛn'ɛsi ya sanrega ni maki ya, ka ya na nyɛ namisʋg dabpiiga. Niŋimini m yadda hali li ya'a anɛ kum, ka m na tisi ya piini linɛ an nyɔvʋr.’
11 “Onɛ mɔr tʋba na wʋm, on wʋm linɛ ka Wina'am Siig Kasi la yɛt karindɔɔd la. Onɛ nyaŋ yɛlbɛ'ɛd wʋsa la, kum kanɛ paasid ayi' la kʋ niŋ o si'ela.”
Kristo tɔlʋŋ kanɛ an Pergamum dim din la yɛla
12 Ka man nyɛ sɔ' la lɛn yɛlim ye, “Sɔm nɛ'ɛŋa tis maliak onɛ bɛ Pergamum karindɔɔgin la. Nɛ'ɛŋa anɛ tɔlʋŋ kanɛ yi onɛ mɔr sʋ'ʋraug dinɛ ka li tuon nɛ nya'aŋ wʋsa dit la ni na.
13 “Tɔlʋŋ la nwa': ‘M mi' ye yanamɛ bɛ si'el la anɛ zin'ikanɛ ka Sʋntaana na'am gbauŋ bɛ. Amaa ya dɔllim nɛ sida, hali saŋkanɛ ka ba daa kʋ Antipas onɛ daa diti m kasɛt nɛ sida tisid nidibi ya teŋin la, zin'ikanɛ ka Sʋntaana bɛ la, ya nan kpɛn niŋidim yadda.
14 Amaa ya taal anɛ anwa bi'ela. Sieba bɛɛ ya ni ka dɔl Balaam onɛ da pa'al Balak on na niŋ si'em kɛ ka Israel dim tʋm tʋʋmbɛ'ɛd la pa'alʋg. O da kɛ ka ba di ba'ar diib, ka mɛ kɛ ka dap nɛ pu'ab san'am taaba.
15 Ala mɛn, yanam mɛ mɔr nidibi ya ni ka ba dɔl Nikolaitan dim pa'alʋg.
16 Tiakimini ya suoya, ya'a ka' alaa, m na kena zab nɛ nimban dim nɛ sʋ'ʋraug linɛ yiti m nɔɔrin na la.’
17 “Onɛ mɔr tʋba na wʋm, on wʋm linɛ ka Wina'am Siig Kasi la yɛt karindɔɔd la. Onɛ nyaŋ yɛlbɛ'ɛd wʋsa, m na tis o diib linɛ yit saazug la na ka o di, ka tisi ba wʋsa yinne-yinne kugpiel linɛ zug ka yʋ'ʋpaal sɔb la, sɔ' kʋ baŋi lii, asɛɛ onɛ di'e li la.”
Kristo tɔlʋŋ kanɛ an Tiatira dim din la yɛla
18 Ka man nyɛ sɔ' la lɛn yɛlim ye, “Sɔm nɛ'ɛŋa tis maliak onɛ bɛ Tiatira karindɔɔgin la. Li anɛ tɔlʋŋ kanɛ yi Wina'am Biig onɛ nini nwɛnɛ bugum pielim, ka o nɔba nyɛɛnnɛ nwɛnɛ kʋntzɛn'ug ka ba duus la ni na.
19 “Tɔlʋŋ la nwa': M mi' ya tʋʋma nɛ ya nɔŋilim nɛ ya yadda niŋir nɛ yanamɛ niŋid si'el la'an nɛ ya summɔtir la, ka lɛm mi' ye ya tʋm nannanna gat yanamɛ daa pin'ili dɔllim ka tʋm si'em la.
20 “Amaa man nyɛɛ ya taal si'em nwa'. Ya siaki di'e Jezebɛl, pu'a kanɛ yɛl ye o anɛ Wina'am nɔdi'es la. O pa'alʋg la ma'adi m tʋmtʋmnib la kpɛn'ɛsid mɔɔg, ka pu'ab nɛ dap san'amid taaba, ka dit bada diib.
21 M tis o saŋa ye o tiak o tʋʋmbɛ'ɛd, amaa o pʋ bɔɔd ye o bas o tʋʋmbɛ'ɛd laa.
22 Dinzug m na kɛ ka o digin nɛ namisʋg. Ka banɛ la'as nɛ o tʋm tʋʋmbɛ'ɛd la ya'a pʋ basi ba tʋʋmbɛ'ɛd la, ban mɛ na namis bɛdegʋ.
23 M na kɛ ka o biis kpi. Ka karindɔɔd la wʋsa na baŋ ye manɛ an onɛ mi' nidib pʋtɛnda nɛ ba bɔɔdim la, ka yɔ sɔ' mɛkama wʋsa wʋʋ on tʋm si'em.
24 Amaa ya sieba banɛ bɛ Tiatira ka pʋ dɔl pa'alkaŋa, ka mɛ pʋ zamis linɛ ka sieba buon Sʋntaana yɛlsu'ada la, m kʋ mɔr ziid na ziili yaa.
25 Amaa gban'ami linɛ ka ya mɔr la kiŋ-kiŋ hali nɛ mam na ti kena.
26–27 Onɛ nyaŋ, ka tʋm linɛ an mam bɔɔdim paae li bɛn, m na tis o paŋ kanɛ ka m di'e m Ba' Wina'am san'an la buudi, ka na tis o paŋ ka o nyaŋ tɛɛns wʋsa. O na sʋ'oe ba nɛ paŋ.
“O na nyaŋi ba nɛ kʋnt dansaar, ka nwa'asi ba bugus wʋʋ tandʋk nɛ,”
28 ka mɛ tis o bɛkɛung nwaddar.
29 Onɛ mɔr tʋba na wʋm, on wʋm linɛ ka Wina'am Siig Kasi la yɛt karindɔɔd la.
NIER PA'ALƲG 3
Kristo tɔlʋŋ linɛ an Sardis dim din la yɛla
| 3 |
Ka man nyɛ sɔ' la lɛn yɛlim ye, “Sɔm nɛ'ɛŋa tis maliak onɛ bɛ Sardis karindɔɔgin la. Nɛ'ɛŋa an tɔlʋŋ kanɛ yi onɛ mɔr Wina'am siisa ayɔpɔi
nɛ nwadbibis ayɔpɔi la ni na. “Tɔlʋŋ la nwa': ‘M mi' ya tʋʋma an si'em; nidib tɛn'ɛsid ye ya vʋe amaa ya kpinɛ.
2 Dinzug, duomi ka kpɛmis linɛ kpɛlim ka bɔɔd kum la, ka ya tʋʋma la pʋ tig Wina'am nini.
3 Tɛnri pa'alʋg kanɛ ka ya daa wʋm ka di'e la. Siakimini li ka tiaki ya sʋnya. Ya ya'a pʋ tiakɛ, m na kɛɛn ya san'an na nwɛnɛ na'ayiig nɛ, hali ka ya kʋ baŋ saŋkanɛ ka m na kenaa.
4 “‘Amaa ya nidib bi'ela bɛ Sardis ka pʋ dian'a ba fuudɛ. Ban na yɛ fupiela dɔllim, ban nar la zug.
5 Onɛ nyaŋ yɛlbɛ'ɛd wʋsa na ti yɛ fupiela wʋʋ ban nɛ, m kʋ kpiis o yʋ'ʋr nyɔvʋpaal dim gbauŋʋn laa, ka na yɛli m Ba' nɛ o maliaknam la san'an nyain ye o anɛ man nid.’
6 “Onɛ mɔr tʋba na wʋm, on wʋm linɛ ka Wina'am Siig Kasi la yɛt karindɔɔd la.”
Kristo tɔlʋŋ linɛ an Filadelfia dim din la yɛla
7 Ka man nyɛ sɔ' la lɛn yɛlim ye, “Sɔm nɛ'ɛŋa tis maliak onɛ bɛ Filadelfia karindɔɔgin la. Nɛ'ɛŋa anɛ tɔlʋŋ dinɛ yi onɛ an kasi ka an sida sɔb la ni na, onɛ mɔr David saafi la, ka yɔ'ɔgid ka sɔ' kʋ nyaŋi yɔɔ, ka yɔɔd ka sɔ' kʋ nyaŋi yɔ'ɔgɛ.
8 “Tɔlʋŋ la nwa': ‘M mi' ya tʋʋma an si'em. Gɔsimiya, m yɔ'ɔg kʋlʋŋʋ tisi ya ka sɔ' kae na nyaŋi yɔɔ. M mi' ye ya paŋ pʋ zu'oe, la'an nɛ wala, ya siaki m pian'ad la ka pʋ ki'is ye ya zi' ma.
9 Gɔsima, banɛ an Sʋntaana nidib ka an ziri dim ka ma' ye ba anɛ Jew dim, ka ka' Jew dim la, m na kɛ ka ba kena igini ya tuon ka baŋ ye m nɔŋi ya.
10 Yanamɛ siaki m nɔzi'elʋg ka mɔdig la zug, m mɛ na mɔri ya sʋ'ʋŋa ka ya kʋ kpɛn' yɛlkanɛ na ti kɛn dunia ni na mak dunia nidib wʋsa laa.
11 M na kɛn nannanna na. Gban'ami yanamɛ mɔr si'el la sʋ'ʋŋa, ka sɔ' da nyaŋi faaɛn ya yɔɔd la.
12 Onɛ nyaŋ yɛlbɛ'ɛd wʋsa, m na maal o ka o an zan'antɔligʋ m Wina'am Pʋ'ʋsim Yir ka kʋdim kʋ lɛn yii aninaa. Ka m na sɔbi m Wina'am yʋ'ʋri tabil o zugin, nɛ m Wina'am teŋ Jerusalem Paal dinɛ na yi Wina'am san'an arezana nii sig na la yʋ'ʋr, ka mɛ na sɔbi m mɛŋ yʋ'ʋpaali tabil o.’
13 “Onɛ mɔr tʋba na wʋm, on wʋm dinɛ ka Wina'am Siig Kasi la yɛt karindɔɔd la.”
Kristo tɔlʋŋ linɛ an Laodisea dim din la yɛla
14 Ka man nyɛ sɔ' la lɛn yɛlim ye, “Sɔm nɛ'ɛŋa tis maliak onɛ bɛ Laodisea karindɔɔgin la. Li anɛ tɔlʋŋ dinɛ yi onɛ yʋ'ʋri buon Ami la ni na; onɛ an sida sɔb ka dit kasɛt linɛ an sida la, ka sʋ'oe bʋn linɛ ka Wina'am maal la wʋsa.
15 “Tɔlʋŋ la nwa': ‘M mi' ya tʋʋma an si'em ka mi' ye ya pʋ ma'asa ka mɛ pʋ tʋllaa. Man bɔɔdin nɛ yanamɛ naan aan ma'asiga bɛɛ yanamɛ naan aan tʋʋliga.
16 Amaa yanamɛ sadigim pʋ ma'as bɛɛ tʋlli m tʋʋma ni la, m na tʋbisi ya yisi m nɔɔrin.
17 Ya yɛt ye ya anɛ kpan'am dim ka mɔr dinɛ ka ya bɔɔd ka si'el pʋ pansigi yaa. Ka zi' yanamɛ mɔr sʋnsa'aŋ nɛ nimbaanlig si'em. Ya anɛ nɔŋ dim ka an sawɛnya nɛ zʋnzɔɔs.
18 Dinzugɔ m san'anɛ ya nɛ ye ya da' sanlima linɛ an sanlim sʋŋ man ni ka paam kpan'am, ka mɛ lɛn da' fupiela lusi ya sawɛnya la, ka da' tiim niŋi ya nini la ka tun'e nyɛt.
19 Banɛ ka m nɔŋ la ka m tansid ka tɛɛgidi ba tʋba. Dinzugɔ tiakimini ya suoya nɛ nimmua ka da di'emidiya.
20 Kɛlisimi. M zi'enɛ za'anɔɔrini kabirid. Ka sɔ' ya'a wʋmi m kʋkɔr ka siak, m na kpɛn' o yin na ka man nɛ on la'asi di.
21 “‘Onɛ nyaŋ yɛlbɛ'ɛd wʋsa, m na tis o suor ka o la'asi zin' nɛ mam, m na'am gbauŋ la zug, nwɛnɛ man nyaŋ yɛlbɛ'ɛd wʋsa ka la'as nɛ m Ba' Wina'am zin' o na'am gbauŋ zug si'em la.’
22 “Onɛ mɔr tʋba na wʋm, on wʋm linɛ ka Wina'am Siig Kasi la yɛt karindɔɔd la.”
NIER PA'ALƲG 4
Ban zun'od Wina'am arezana ni la yɛla
| 4 |
Nɛ'ɛŋa nya'aŋ ka m nyɛ, ka arezana kʋlʋŋ yɔ'ɔg. Ka kʋkɔr kanɛ ka m dɛŋi wʋm la pian'adi tisidim ka li vuud nwɛnɛ na'atannɛ. Ka li yɛlim ye, “Dʋm kpɛla na, ka m na pa'alif dinɛ na niŋ nɛ'ɛŋa nya'aŋ.”
2 Li pʋ yuugɛ ka Wina'am Siig Kasi la kpɛn'ɛm, ka m nyɛ ka na'am gbauŋ dig arezana ni ka sɔ' zin' li zug.
3 Ka o nindaa nyɛɛnnɛ nwɛnɛ kugvɛnla linɛ yʋ'ʋri buon jaspa nɛ kanelian la. Ka saa dindɛog buoɛn gilig na'am gbauŋ la, ka dindɛog la bɔɔnsim an dɛn'ɛm.
4 Ka na'am gbana pisi nɛ anaasi gilig na'am gbauŋ la, ka kpɛɛmnam pisi nɛ anaasi yɛ fupiela ka pid sanlima zupibisi zin' ba zug.
5 Ka sa-ian'asʋg yit gbauŋ la ni na nɛ vuud nɛ satansʋg. Ka fita ayɔpɔi la'aŋi dit na'am gbauŋ la tuon. Bama an Wina'am siisa ayɔpɔi la.
6 Ka si'el nwɛnɛ mu'ari dig na'am gbauŋ la tuonnɛ nwɛnɛ gɔtiŋi nie nyain. Ka bʋnvʋya anaasi zi'e gilig na'am gbauŋ la, ka nini pɛ'ɛli ba tuon nɛ nya'aŋ wʋsa.
7 Ka yiiga bʋnvʋr la nwɛnɛ gbigim nɛ, ka onɛ tia'al la nwɛnɛ na'araug nɛ, ka onɛ tia'al atan' la mɔr ninsaal nindaa. Ka bʋnvʋr onɛ tia'al anaasi la nwɛnɛ siltita'ar kanɛ ian'adnɛ.
8 Ka bʋnvʋya la yinne wʋsa mɔr kpʋkpama ayuobʋ, ka mɔr nini zin'ig wʋsa, hali nɛ ba kpʋkpama lɛŋʋn. Ka yʋ'ʋm yʋ'ʋŋ nɛ nintaŋ wʋsa ka pʋ basida yɛt ye, “Kasi! Kasi! Kasi! Ti Zugsɔb Wina'am onɛ an Paŋtita'ar Sɔb la anɛ kasi. Onɛ da bɛ, ka nan bɛ, ka na ti bɛ la.”
9 Ka bʋnvʋya anaasi la ya'a ɛɛnti zun'od ka na'asid onɛ bɛ saŋa dinɛ ka' bɛnnɛ ka zin' na'am gbauŋ zug ka pʋ'ʋsid o bareka la,
10 kpɛɛmnam pisi nɛ anaasi la iginidnɛ onɛ zin' na'am gbauŋ zug la tuon ka zun'e onɛ bɛ saŋa dinɛ ka' bɛn la, ka pidigi ba zupibisi digil onɛ zin' na'am gbauŋ zug la tuon ka yɛt ye,
11 “Ti Zugsɔb Wina'am fʋnɛ nar nɛ fʋn na di'e pipilim nɛ na'asi nɛ zʋn'or nɛ paŋ, bɔzugɔ fʋnɛ maal si'el wʋsa, li anɛ fʋ bɔɔdim ka fʋ maali ba ka ba bɛ la.”
NIER PA'ALƲG 5
Gbauŋ la nɛ Pɛbil la yɛla
| 5 |
Ka m nyɛ gbauŋ ka li sɔbi li tuon nɛ nya'aŋ, ka li tabil nɛ titabir zin'isa ayɔpɔi. Ka onɛ zin' na'am gbauŋ la zug mɔri li o datiuŋ.
2 Ka m nyɛ maliak kanɛ mɔr paŋ hali ka o mɔɔnnɛ tansid ye, “Anɔ'ɔnɛ nar ka na nyaŋi lak titabir la ka yɔ'ɔg gbauŋ la?”
3 Amaa sɔ' daa kae arezana ni bɛɛ dunia ni bɛɛ teŋ teŋiri na nyaŋi lak gbauŋ la gɔsi li pʋʋginɛ.
4 Ka m kaas hali, bɔzugɔ sɔ' daa kae nar nɛ on na lak gbauŋ la bɛɛ gɔsi li pʋʋgin la zug.
5 Ka kpɛɛmnam la ni yinne yɛlim ye, “Da kaasida. Gɔsima, onɛ an Juda dɔɔg gbigim ka an na'ab David yaaŋ la, nyaŋ yɛlbɛ'ɛd wʋsa ka na nyaŋi yɔ'ɔg gbauŋ la nɛ titabir linɛ tabil zin'isa ayɔpɔi la.”
6 Ka m nyɛ Pɛbil ka o zi'e na'am gbauŋ dinɛ ka bʋnvʋya anaasi nɛ kpɛɛmnam gilig la teŋsʋk. Ka Pɛbil la nwɛnɛ onɛ ka ba daa kʋ o, ka o vʋ'ʋg kumin, ka mɔr iila ayɔpɔi nɛ nini ayɔpɔi dinɛ an Wina'am siisa ayɔpɔi banɛ ka o tʋm dunia wʋsa ni na la.
7 Ka Pɛbil la keŋ di'e gbauŋ la onɛ zin' na'am gbauŋ zug la datiuŋ.
8 Ka on di'e gbauŋ la ka bʋnvʋya anaasi la nɛ kpɛɛmnam pisi nɛ anaasi la vanbin Pɛbil la tuon. Ka kpɛɛmnam la yinne wʋsa mɔr kɔn nɛ sanlima laas, linɛ pɛ'ɛl nɛ tudaari dinɛ an Wina'am nidib winsɔsʋg la.
9 Ka ba yʋ'ʋm yʋʋm paalli yɛt ye, “Fʋnɛ nar nɛ fʋn na di'e gbauŋ la, ka laki li titabir la, bɔzugɔ ba daa kʋʋf nɛ. Ka fʋ ziim la faaɛn ninsaal buudi wʋsa nɛ pian'ad gʋn-gʋn nɛ buudi gʋn-gʋn la'an nɛ sʋ'ʋlim gʋn-gʋn, ka ba lieb Wina'am din.
10 Fʋ maali ba ka ba an sʋ'ʋlim na'anam nɛ maanmaannib ye ba tʋm Wina'am tʋʋma, ka na di na'am dunia ni.”
11 Ka m gɔs ka nyɛ maliaknam tusa-tusa, ka ba zi'eni gilig na'am gbauŋ la nɛ bʋnvʋya anaasi nɛ kpɛɛmnam la.
12 Ka m wʋm ka ba dʋ'ʋsidi ba kʋkɔya yʋ'ʋmmi yɛt ye, Pɛbil onɛ ka ba da kʋ ka o vʋ'ʋg la nar ye o di'e paŋ nɛ kpan'am nɛ ya'am nɛ kpi'euŋ nɛ na'asi nɛ zʋn'or nɛ sɛn'uŋ.
13 Ka m wʋm ka bʋnvʋr mɛkama linɛ bɛ arezana ni nɛ dunia ni nɛ teŋ teŋir nɛ atɛukʋn wʋsa yɛt ye, “Bareka nɛ na'asi nɛ zʋn'or nɛ paŋ bɛ nɛ Pɛbil la nɛ onɛ zin' na'am gbauŋ zug la saŋa dinɛ ka' bɛnnɛ.”
14 Ka bʋnvʋya anaasi la siak ye, “Ami.” Ka kpɛɛmnam la vanbini zun'e Pɛbil la nɛ onɛ zin' na'am gbauŋ zug la.
NIER PA'ALƲG 6
Titabir linɛ tabil la yɛla
| 6 |
Ka m nyɛ ka Pɛbil la lak titabir linɛ tabil zin'isa ayɔpɔi la yinne. Ka m wʋm ka bʋnvʋya anaasi la yinne yɛl nɛ kʋkɔr dinɛ nwɛnɛ satansʋg nɛ ye, “Kem na.”
2 Ka m gɔsi nyɛ wiedpiel. Ka onɛ ban'ad o la mɔr tiraug. Ka ba tis o na'am zupibig. Ka o yina an paŋ daan ye o zabi nyaŋ si'el wʋsa.
3 Ka Pɛbil la lak titabir kanɛ tabili paas ayi' la. Ka m wʋm ka bʋnvʋr onɛ paas ayi' la yɛl ye, “Kem na.”
4 Ka wiedzin'a mɛ yina. Ka ba tis onɛ ban'ad o la paŋ ye o sa'as zaba dunia ni ka nidib kʋ taaba. Ka o di'e zaba sʋ'ʋtita'ar.
5 Ka Pɛbil la lak titabir kanɛ tabili paas atan' la. Ka m wʋm ka bʋnvʋr onɛ paas atan' la yɛl ye, “Kem na.” Ka m gɔs ka wiedsabilig bɛ anina. Ka onɛ ban'ad la mɔr linɛ makid la o nu'ugin.
6 Ka m wʋm ka si'el vuudi nwɛnɛ kʋkɔr linɛ yi bʋnvʋya anaasi la sʋʋgin yɛt ye, “Kia makir ligidi na zem nidi na tʋm daar yinne tʋʋma yɔɔd. Ka kizɛn'ug bʋtiŋ bibis atan' mɛ an nid daar yinne tʋʋma yɔɔd. Amaa da san'ami kpaam nɛ daam laa.”
7 Ka Pɛbil la lak titabir linɛ tabili paas anaasi la, ka m wʋm ka bʋnvʋr onɛ paas anaasi la yɛl ye, “Kem na.”
8 Ka m nyɛ ka wiedpipɛlʋg bɛɛ anina, ka onɛ ban'ad o la yʋ'ʋr buon Akum, ka bam buon zin'isi'a ye Kpi'im Teŋ la, dɔl o nya'aŋ. Ka ba tis Akum nɛ Kpi'im Teŋ dunia pʋdigir yinne pʋdigir anaasi la ni ye ba sʋ'oe, ka kʋʋd nidib nɛ zaba sʋ'ʋg nɛ kɔ'ɔm nɛ wiim nɛ bʋnyuos banɛ bɛ teŋgbauŋ zug.
9 Ka on lak titabir linɛ tabili paas anu la, ka m nyɛ banɛ ka ba kʋʋ ba, ban mɔɔn Wina'am pian'ad ka dit kasɛt linɛ an yɛlsida la zug, ka ba bɛ maan bimbim la teŋir,
10 ka tansid ye, “Zugsɔb tita'ar, onɛ an kasi nɛ sida sɔba, li na yuugi paae wala ka fʋ na kad nidib nwa' saria ka namisi ba ka tɛki ba tʋba ban kʋʋd nidib la yɛla?”
11 Ka ba tisi ba wʋsa fupiela, ka yɛli ba ye, “Vʋ'ʋsimi bi'ela ka guri ya tʋmtʋm taaba banɛ an yadda niŋidib ka kpɛlim dunia ni la, ka ba ti kʋʋ ba nwɛnɛ ban kʋ yanam si'em la, ka ba kal la bɛn paae.”
12 Ka m nyɛ ka o lak titabir linɛ tabili paas ayuobʋ la. Ka teŋ dam bɛdegʋ, ka nintaŋ kilim liki sɔbig wʋʋ vugulimnɛ, ka nwadig la wʋsa mu'oe nwɛnɛ ziim nɛ.
13 Ka nwadbibis la yi saŋgbauŋin lit teŋin na nwɛnɛ kekama ka sisi'em ɛɛnti da'adi fanrid kekaŋ kansa ka li sʋʋgidi lit teŋin si'em la.
14 Ka saŋgbauŋ la mɛlim nwɛnɛ gbauŋ ka ba kpilim nɛ. Ka zuoya nɛ tɛɛns banɛ ka ku'om gilig la wʋsa vurisi tɔɔm.
15 Ka dunia na'anam nɛ nintitada nɛ soogia kpɛɛmnam nɛ kpan'am dim nɛ paŋ dim nɛ sɔ' wʋsa, yammis nɛ banɛ ka' yammis wʋsa, na su'a tampinlɛma ni nɛ tampiins sian'asim zuoya zut,
16 ka tans zuoya la nɛ tampiins la ye, “Lim diinli ti ka su'a ti, ka onɛ zin' na'am gbauŋ zug la da nyɛɛ ti, ka Pɛbil la mɛ kʋ nyɛɛ ti nɛ o sʋnpɛɛn la.
17 Ka Pɛbil la nɛ onɛ zin' na'am gbauŋ zug la sʋnpɛɛn dabistita'ar paae na, ka anɔ'ɔnɛ na nyaŋi zi'enɛ o sʋnpɛɛn la tuonnɛ.”
NIER PA'ALƲG 7
Israel dim la yɛla
| 7 |
Nɛ'ɛŋa nya'aŋ ka m nyɛ maliaknam anaasi ka ba zi'e dunia lɔdis anaasi la ni kad dunia sisi'em linɛ yi zin'is wʋsa la lɛbisid ye sisi'em da da'ad tɛɛns bɛɛ atɛuk bɛɛ tisi'a nii.
2 Ka m nyɛ maliak si'a ka o yi winnigi tansid si'el la na ka mɔr Wina'am onɛ vʋe la zanbina, ka yɛl maliaknam banɛ ka Wina'am tisi ba teŋ nɛ atɛuk pu'alʋŋ paŋ la nɛ kʋkɔtita'ar ye,
3 “Da pu'alim teŋ la bɛɛ atɛuk la bɛɛ tiisɛ, asɛɛ ka ba ti zanbil tʋmtʋmnib la zanbina ba gbɛ'ɛdin.”
4 Ka m wʋm banɛ ka ba zanbili ba nɛ Wina'am zanbina ba gbɛ'ɛdin la kal, ka li an tusa kɔbiga nɛ tusa pisnaasi nɛ anaasi (144,000) ka yi Israel dim dɔɔd la wʋsa ni na.
5–8 Ka tusa pii nɛ ayi' daa yi nimbama yinne-yinne dɔɔdin na. Dɔɔd la anɛ Juda nɛ Reuben nɛ Gad nɛ Aser nɛ Naftali nɛ Manase nɛ Simeon nɛ Levi nɛ Isaka nɛ Zebulun nɛ Josef nɛ Benjamin.
Nidibi daa la'as bɛdegʋ la yɛla
9 Nɛ'ɛŋa nya'aŋ la ka m gɔs, ka nidib la'as bɛdegʋ, ka sɔ' kʋ nyaŋi kaal nidib la wʋsaa. Ba daa yinɛ teŋgbana wʋsa nɛ buudi wʋsa nɛ dɔɔd wʋsa nɛ pian'ad wʋsa ni na, yɛ fupiela zi'e na'am gbauŋ la nɛ Pɛbil la tuon ka mɔr kpʋkparis wila ba nu'usin,
10 ka pian'ad nɛ kʋkɔtitada ye, “Ti faangir yitnɛ ti Wina'am onɛ zin' na'am gbauŋ la zug nɛ Pɛbil la san'an na.”
11 Ka maliaknam la wʋsa zi'eni gilig na'am gbauŋ la, nɛ kpɛɛmnam la, nɛ bʋnvʋya anaasi la, ka ba vanbin na'am gbauŋ la tuonnɛ zun'od Wina'am
12 yɛt ye, “Ami, bareka nɛ zʋn'or nɛ ya'am nɛ bareka pʋ'ʋsʋg nɛ na'asi nɛ paŋ nɛ kpi'euŋ anɛ ti Wina'am din saŋa dinɛ ka' bɛnnɛ. Ami.”
13 Ka kpɛɛmnam la yinne bu'osim ye, “Anɔ'ɔnamɛ an nimbanɛ yɛ fupiela la? Ka ba yi yaanɛ na?”
14 Ka m lɛbis o ye, “Naa, fʋnɛ mi', ka man zi'.” Ka o yɛlim ye, “Nimbama yinɛ fara tita'arin na, ka piesi ba fuud Pɛbil la ziimin ka ba pɛlig.
15 Linzug ka ba zi'e “Wina'am na'am gbauŋ la tuon ka tʋmmi tisid o nintaŋ nɛ yʋ'ʋŋ o Pʋ'ʋsim Yin la. Ka onɛ zin' na'am gbauŋ zug la bɛ nɛ ba la zug, o na guri ba.
16 Ka kɔ'ɔm kʋ lɛm gban'e ba; bɛɛ ku'onuud gban'e baa, Nintaŋ tʋʋltita'ar kʋ lɛn luu ba zug bɛɛ li tʋligi baa.
17 Pɛbil onɛ bɛ na'am gbauŋ la teŋsʋk la na guri ba, ka na dɔlli ba keŋ nyɔvʋr ku'om bun zin'isi'a la. Ka Wina'am na ɛɛns ninta'am wʋsa ba nini ni.”
NIER PA'ALƲG 8
Titabir linɛ paas ayɔpɔi la yɛla
| 8 |
Ka Pɛbil la lak titabir linɛ tabili paas ayɔpɔi la, ka arezana ni an baanlimm saŋa bi'ela.
2 Ka m nyɛ maliaknam ayɔpɔi banɛ zi'e Wina'am tuon la ka ba tisi ba na'atana ayɔpɔi.
3 Ka maliak sɔ' mɔr sanlima laa dinɛ ka ba niŋid tudaari la, keŋ zi'e maan teebul la baba. Ka ba tis o tudaari bɛdegʋ ye o paasi li Wina'am nidib winsɔsʋgin niŋ sanlim bimbim linɛ zi'e na'am gbauŋ la tuon la tis Wina'am.
4 Ka tudaari dinɛ ka ba nyu'oe la nyɔ'ɔs nɛ Wina'am nidib la winsɔsʋg yi maliak onɛ zi'e Wina'am tuon la nu'usin dʋt agɔl.
5 Ka maliak la nɔk tudaari laa la mu'oe bugum bimbim la zugʋ pɛ'ɛl laa la lɔbigi li dunia ni. Ka satansʋg nɛ vuud nɛ sa-ian'asʋg nɛ teŋ dammʋg naam.
Na'atana la yɛla
6 Ka maliaknam ayɔpɔi banɛ mɔr na'atana ayɔpɔi la ti'eb ye ba piebi ba.
7 Ka yiiga maliak la pieb o na'atan. Ka sakuga nɛ bugum gɛndig nɛ ziim kpa'adi lut dunia ni na. Ka bugum di dunia pʋdigir atan' ni pʋdigir yinne, ka mɛ di tiis pʋdigir atan' ni pʋdigir yinne, ka di mɔma'asa wʋsa.
8 Ka maliak onɛ paas ayi' la pieb o na'atan. Ka ba lɔb si'el ka li nwɛnɛ zuotita'ar linɛ ka bugum dit, ka li lu atɛukʋn la. Ka ku'om la pʋdigir yinne pʋdigir atan' la ni kilim ziim.
9 Ka bʋnvʋya banɛ bɛ ku'omin la pʋdigir la yinne pʋdigir atan' la ni kpi wʋsa. Ka anrima la pʋdigir la yinne pʋdigir atan' la ni san'am wʋsa.
10 Ka maliak onɛ paas atan' la pieb o na'atan. Ka nwadbil tita'ar dit nwɛnɛ bugum nɛ yi saŋgbauŋin li kɔldaadin nɛ ku'om tansid zin'isi'a bun la pʋdigir yinne pʋdigir atan' la ni.
11 Nwadbil la yʋ'ʋri buon Tɔɔg. Ka ku'om la pʋdigir yinne kilim tɔɔg. Ka nidib bɛdegʋ nu ku'om la ka kpi, din lieb tɔɔg la zug.
12 Ka maliak onɛ paas anaasi la pieb o na'atan. Ka winnig la pʋdig zin'isa atan', ka nwadig la mɛ pʋdig zin'isa atan', ka nwadbibis la mɛ pʋdig zin'isa atan'. Ka si'el nwɛ' ba pʋdigir yinne-yinne, ka ba wʋsa pʋdigir yinne-yinne la kilim lik. Ka nintaŋ linɛ nie nyain la pʋdigir la yinne pʋdigir atan' la ni kilim lik. Ka yʋ'ʋŋ pʋdigir la yinne pʋdigir atan' la ni mɛ kilim lik.
13 Ka m gɔsi nyɛ siltita'ar onɛ ian'ad agɔl lalli, ka wʋm ka o yɛt nɛ kʋkɔtita'ar ye, “Sʋnsa'aŋ bɛ, sʋnsa'aŋ bɛ. Maliaknama atan' banɛ kpɛlim la ye ba piebi ba na'atana la, ka ba ya'a ti piebi ba, sʋnsa'aŋ na bɛ tis banɛ wʋsa bɛ dunia ni.”
NIER PA'ALƲG 9
Ka maliak onɛ paas anu la pieb o na'atan. Ka m nyɛ nwadbil ka o yi saŋgbana ni lu dunia ni na. Ka ba tis o bʋmbɔk dinɛ zulim ka ka' bɛn la saafi.
2 Ka nwadbil la yɔ'ɔg bʋmbɔk la, ka nyɔ'ɔs yina nwɛnɛ bugum tita'ar nyɔ'ɔs nɛ, ka kɛ ka winnig nɛ saŋgbauŋ la sɔbigi kilim lik.
3 Ka na'azɔmnam yi nyɔ'ɔs la nii sig dunia ni na. Ka ba tisi ba paŋ nwɛnɛ namisi mɔr paŋ dunia ni si'em la,
4 ka yɛli ba ye, ba da san'am si'elnam wʋsa linɛ nɔbigid teŋinɛɛ, amaa ba pu'alim nimbanɛ pʋ mɔr Wina'am zanbina ba gbɛ'ɛdin la gʋllim.
5 Ka na'azɔmnam la daa pʋ mɔr suori na kʋ nida, ka lɛɛ na namisidi ba nwadis anu. Ka tɔɔg kanɛ ka ba daa nyɛti ba niŋgbina ni la nwɛnɛ naŋ tɔɔnbi zabid si'em la.
6 Ka nwadis anu nwa' saŋa, nimbama na ieed kum ka kʋ nyɛɛ lii, ka mɛ na bɔɔd kum, ka kum na zɔ ka basi ba.
7 Ka na'azɔmnam la nwɛnɛ widi banɛ ti'ebi gur zaba nɛ, ka mɔr linɛ nwɛnɛ sanlima zupibisi ba zutin. Ka ba nindaas nwɛnɛ nidib nindaas nɛ.
8 Ka ba zuobid wa'ami nwɛnɛ pu'ab zuobid nɛ. Ka ba nyina nwɛnɛ gbigim nyina nɛ.
9 Ka si'el ligili ba nyɔ'ɔd la nwɛnɛ kʋnt zaba gbanti'edʋg nɛ. Ka ba kpʋkpama vuudi nwɛnɛ tanp widi tɛɛd tanp tɛrekonamɛ zɔti ken zaba ni nɛ.
10 Ka ba mɔr zʋya ka tɔɔnd nwɛnɛ namis nɛ. Ka ba zʋya la mɔr paŋi na pu'alim nidib nwadis anu.
11 Ka maliak onɛ gur bʋmbɔk la daa aan ba na'ab. Ka o yʋ'ʋr nɛ Hibiru pian'ad anɛ Abadon, ka Girik pian'ad an Apoliyon. Li gbin anɛ Asan'auŋ.
12 Yiiga sʋnsa'aŋ la gaad ya. Amaa sʋnsa'aŋ ayi' kpɛlim na kena.
13 Ka maliak onɛ paas ayuobʋ la pieb o na'atan. Ka m wʋm ka kʋkɔr yi sanlima teebul maan zin'ig dinɛ zi'e Wina'am tuon lɔdis anaasi la ni na,
14 yɛl maliak onɛ paas ayuobʋ mɔr na'atan la ye, “Yidigim maliaknam anaasi banɛ ka ba lɔ Efiritis mu'arin la.”
15 Ka ba bas maliaknam banɛ ka ba ti'ebi gur yʋʋm kaŋa nɛ nwadig kaŋa nɛ dabiskaŋa nɛ saŋa kaŋa ye ba kʋ ninsaalib pʋdigir yinne pʋdigir atan' ni la.
16 Ka m wʋm soogianam banɛ an wiedban'adib la kal. Ba kal an tusa tus-kɔbisyi' (200,000,000).
17 Ka lin nie pa'alim la ka m nyɛ widi nɛ banɛ ban'adi ba la. Ban daa an si'em nwa': Banɛ ban'ad widi la daa yɛnɛ zaba gbanti'edis linɛ mu'oe nwɛnɛ bugum ka an sabilig nɛ dɔnbʋʋlim. Ka widi la zut nwɛnɛ gbigima zut nɛ. Ka bugum nɛ nyɔ'ɔs nɛ tan linɛ nyɛligi dit wʋʋ kidibir yiti ba nɔya ni na.
18 Ka yɛltɔɔd atan' bama, bugum nɛ nyɔ'ɔs nɛ tan linɛ nyɛligi dit wʋʋ kidibir dinɛ yit widi la nɔya ni la daa kʋ ninsaalib pʋdigir la yinne pʋdigir atan' la ni.
19 Widi la paŋ daa bɛ nɛ ba nɔya nɛ ba zʋya ni. Ka ba zʋya la daa nwɛnɛ wiigi nɛ mɔr zut ka ba mɔri li pu'alim nidib.
20 Ka nimbanɛ daa kpɛlim ka yɛlbama pʋ kʋʋ ba la, daa pʋ tiak ka bas ban maan si'el nɛ ba mɛŋ nu'us la dɔllimm, ka mɛ pʋ bas kikiris nɛ sanlima bada la nɛ anzurifa nɛ kʋntzɛn'ug bada nɛ kuga bada nɛ daad bada banɛ kʋ tun'e nyɛ bɛɛ wʋm bɛɛ keŋ la pʋ'ʋsʋgɔ.
21 Ba mɛ daa pʋ basi ba ninkʋʋsim nɛ ba ba'akɔn bʋgʋb nɛ ba pu'abɔɔsim bɛɛ ba na'ayiigim la ka tiakɛ.
NIER PA'ALƲG 10
Maliak nɛ gbauŋbil la yɛla
10
Ka m nyɛ maliak tita'ar si'a ka o yi arezana ni sigid na. Ka saŋgbauŋ ligil o nwɛnɛ fuug nɛ, ka saa dindɛog buoɛn gilig o zug. Ka o nindaa nwɛnɛ winnig nɛ ka o nɔba nwɛnɛ bugum zan'antɔlis nɛ.
2 O daa mɔr gbauŋbil o nu'ugin ka li lak. Ka o datiuŋ nɔbir zi'e atɛukʋn, ka o dagɔbʋg nɔbir zi'e teŋ.
3 Ka o tans nɛ kʋkɔtita'ar linɛ nwɛnɛ gbigim kaasig nɛ. Ka on tansi naae la, ka satansida ayɔpɔi tansi siak.
4 Ka ban pian' naae la m daa bɔɔd ye m sɔb. Amaa m daa wʋm ka kʋkɔr pian' yi arezana ni na ye, m su'am dinɛ ka satansida ayɔpɔi la yɛl la. Ka ye m da sɔbi lii.
5 Ka maliak onɛ ka m nyɛ ka o zi'e atɛukʋn nɛ teŋin la ʋk o datiuŋ nu'ugʋ kpa' arezana,
6 ka pɔ nɛ Wina'am onɛ bɛ saŋa dinɛ ka' bɛnnɛ ka maal saazug nɛ dunia nɛ atɛuk nɛ bʋn linɛ wʋsa bɛɛ ba ni la ye, li kʋ lɛn yuugɛ.
7 Ka maliak onɛ paas ayɔpɔi la ya'a ti bɔɔd ye o pieb o na'atan la, Wina'am yɛlsu'ada la na tʋm naae, nwɛnɛ on da yɛl o nɔdi'esidib banɛ aan o tʋmtʋmnib la si'em la.
8 Ka kʋkɔr kanɛ ka m wʋm ka li pian' arezana nii tisim la, lɛm pian' tisim ye, “Kem di'e gbauŋ dinɛ laki bɛ maliak onɛ zi'e atɛukʋn nɛ teŋin la nu'ugin.”
9 m keŋ maliak la san'an yɛl o ye o tisim gbauŋbil la. Ka o yɛlim ye, “Nɔkimi li ɔnb. Ka ye li na kilim tɔɔgʋ m pʋʋgin, amaa li na malisi m nɔɔrin nwɛnɛ siind nɛ.”
10 Ka m di'e gbauŋbil la o nu'ugin ɔnbi li. Ka li malis nwɛnɛ siindi m nɔɔrin. Amaa man vɔl la, ka li kilim tɔɔgʋ m pʋʋgin. Ka sɔ' yɛlim ye, asɛɛ ka m lɛn di'e Wina'am pian'adi tis nidib. Ka ye Wina'am pian'ad la anɛ buudi nɛ teŋgbana nɛ pian'ad nɛ na'anam bɛdegʋ din.
NIER PA'ALƲG 11
11
Ka sɔ' tisim makir dibir, ka yɛlim ye, “Duom mak Wina'am Pʋ'ʋsim Yir la nɛ maan zin'ig la, ka kaal banɛ pʋ'ʋsid Wina'am Pʋ'ʋsim Yin la.
2 Amaa da mak zak linɛ bɛ yiŋ laa, bɔzugɔ ba zaŋi lii tis banɛ ka' Wina'am nidib la ka ba na nɔɔdi giligid Jerusalem Teŋ sʋŋ la nwadis pisnaasi nɛ ayi'.
3 M na tis kasɛtiba ayi' la paŋ ka ba na yɛ bɔto fuud, ka di'ed Wina'am pian'adi tisid nidib dabisa tusir nɛ kɔbisyi' nɛ pisyuobʋ.”
4 Nidib ayi' bama anɛ Olif tiis ayi' nɛ fitazi'esa ayi' banɛ zi'e dunia Zugsɔb la tuon la.
5 Ka sɔ' ya'a zigid ye o pu'alimi ba, bugum yitnɛ ba nɔya ni na san'amidi ba dataas la. Ala ka ba kʋʋd onɛ zigid ye o pu'alimi ba la.
6 Bama mɔr paŋ kanɛ na gban'e saa, ka saa kʋ ni saŋa kanɛ ka ba tʋmmi ba nɔdi'esʋg tʋʋma la, ka lɛm mɔr paŋi na kɛ ka ku'om kilim ziim, ka mɛ mɔr paŋi na zaŋ yɛltɔɔd buudi wʋsa pu'alim dunia dim saŋa kan ka ba bɔɔd wʋsa.
7 Ba ya'a ti naae labaar la mɔɔlʋg, bʋnkɔnbbɛ'og onɛ yi bʋmbɔk dinɛ ka' bɛn la ni la na zab nɛ ba nyaŋ ka kʋʋ ba,
8 ka ba niŋgbina na dig teŋ tita'ar la suoraugʋn, zin'ikanɛ ka ba da kpa' ba Zugsɔb dapuudir zug la. Ba buon tɛɛns la yʋda ye Sodom nɛ Egipt.
9 Ka nimbanɛ yi buudi nɛ pian'ad nɛ teŋgbana wʋsa ni na, na gɔsi ba niŋgbina la daba atan' nɛ pʋsʋk, ka kʋ kɛ ka ba mumi baa.
10 Ka dunia nidib sʋnya na ma'ae nidib ayi' nwa' kum la yɛla. Ba na maal sumalisim ka tis taaba piini, bɔzugɔ nɔdi'esidib ayi' nwaa kɛ ka nidib namis dunia ni la zug.
11 Ka daba atan' nɛ pʋsʋk la nya'aŋ, vʋ'ʋsʋm linɛ tisid nyɔvʋr la na yi Wina'am san'an kena kpɛn' ba ni ka ba vʋ'ʋg. Ka dabiem bɛdegʋ kpɛn' banɛ nyɛɛ li la.
12 Ka nidib ayi' la wʋm ka kʋkɔtita'ar yi arezana ni na yɛli ba ye, “Dʋmmi kpɛ' na.” Ka ba dataas la gɔsidi ba ka ba kpɛn'ɛd saŋgbauŋin dʋt arezana ni.
13 Saŋkan la yim, ka teŋ dam hali. Ka Jerusalem teŋ la pʋdig zin'is piiga ka yinne luu san'am. Teŋ la dam la, ka nidib tusa ayɔpɔi kpi. Ka dabiem kpɛn' nimbanɛ kpɛlim la, ka ba na'as Wina'am onɛ bɛ arezana ni la.
14 Sʋnsa'aŋ dinɛ paas ayi' la gaad ya. Amaa sʋnsa'aŋ linɛ paasida atan' la na kɛn nannanna na.
Na'atan ayɔpɔi daan la yɛla
15 Maliak onɛ paas ayɔpɔi la pieb o na'atan la, ka kʋkɔtitada vuud arezana nii yɛt ye, “Dunia sʋ'ʋlim kilimi ti Zugsɔb nɛ o Kristo la din, ka o na an na'ab saŋa dinɛ ka' bɛnnɛ.”
16 Ka kpɛɛmnam pisi nɛ anaasi banɛ zin' ba na'am gbana zut Wina'am tuon la, vanbin teŋin zun'od Wina'am yɛt ye,
17 “Ti pʋ'ʋsid Zugsɔb Wina'am tita'ar, onɛ bɛ ka da bɛ la bareka, on zaŋ o paŋ tita'ar la ka pin'il o na'am la zug.
18 Ka banɛ ka' Wina'am nidib la sʋnya duoe bɛdegʋ, amaa fʋ sʋnpɛɛn la saŋa paae na ka fʋ na kad banɛ kpi la saria, ka fʋ na yɔɔ fʋ tʋmtʋmnib banɛ aan fʋ nɔdi'esidib, nɛ nimbanɛ na'asidif la, banɛ an kpi'emnam nɛ tadimnam wʋsa, ka san'am banɛ san'am teŋgbauŋ la.”
19 Ka Wina'am Pʋ'ʋsim Yir dinɛ bɛ arezana ni la yɔ'ɔg ka ba nyɛ Wina'am Nɔnaar Daka la. Ka sa-ian'asʋg nɛ vuud nɛ satansʋg nɛ teŋ dammʋg nɛ sakuga naam bɛdegʋ.
NIER PA'ALƲG 12
Pu'a nɛ bʋnkɔnbbɛ'og la yɛla
12
Ka zanbin tita'ar linɛ an bʋnnyalʋŋ nie saŋgbana ni na: ka pu'a bɛɛ anina, ka o fuug an winnig, ka nwadig bɛɛ o nɔba teŋirin. Ka na'am zupibis linɛ an nwadbibis pii nɛ ayi' bɛɛ o zugin.
2 Ka o mɔr pʋʋg ka bɔɔd du'am ka li zabid o ka o kaasid hali.
3 Ka zanbin tita'ar nie saŋgbana ni na ya'as. Li daa anɛ bʋnyua zɛn'ug, ka o mɔr zuta ayɔpɔi nɛ iila piiga. Ka pid na'am zupibisi o zut la wʋsa ni.
4 Ka nwadbibis pʋdig zin'is atan' ka bʋnyua la ʋk o zʋʋri da'ae pʋdigir yinne yis saŋgbauŋin bas dunia ni na. Ka o zi'e pu'a onɛ bɔɔd du'am la tuonnɛ gur ye pu'a la du'a ka o ɔnb biig la.
5 Ka pu'a la du'a biribiŋ onɛ na sʋ'oe buudi wʋsa nɛ paŋ ka nyaŋi ba nɛ kʋnt dansaar. Ka ba zɛ biig la mɔr o keŋ Wina'am nɛ o na'am gbauŋ la tuon.
6 Ka pu'a la zɔɔ keŋ mɔɔgin. Anina ka Wina'am maal zin'igi digil pu'a la, zin'ikanɛ ka ba na gɔs o dabisa tusir nɛ kɔbisyi' nɛ pisyuobʋ.
7 Ka zaba kɔ' arezana ni. Ka maliak kpɛɛm Maikel nɛ o maliaknam la zab nɛ bʋnyua la, ka on mɛ la'as o maliaknam ka ba zab nɛ Maikel.
8 Amaa o paŋi daa pɔɔd la zug ka ba nyaŋi ba ka kadi ba yis arezana ni.
9 Ba da lɔb bʋnyua onɛ da bɛ kʋdimin sa ka o yʋ'ʋr buon kikiris na'ab bɛɛ Sʋntaana ka ma'ad dunia kpɛn'ɛsid mɔɔg la bas dunia ni na. On nɛ o maliaknam wʋsa ka ba da lɔbi bas dunia ni na.
10 Ka m wʋm kʋkɔtita'ar arezana ni ka li yɛl ye, “Nannanna ti Wina'am faangir nɛ o paŋ nɛ o na'am la nɛ o Kristo la paŋ mɛ paae na, bɔzugɔ ba nɔk onɛ gbi'idi ti ba'abiis Wina'am tuon nintaŋ nɛ yʋ'ʋŋ la lɔbi yis arezana ni.
11 Ka ba nɔk Pɛbil la ziim nɛ labaar kanɛ ka ba mɔɔn nɛ sida la zabi nyaŋ o, ka pʋ zɔ dabiem nɛ kum ka lɛb nya'aŋi ba nyɔvʋr yɛlaa.
12 Dinzugɔ, arezana maalim sumalisim nɛ banɛ wʋsa bɛɛ anina la. Amaa sʋnsa'aŋ na bɛ teŋgbauŋ nɛ atɛukʋn, bɔzugɔ Sʋntaana sigi ba ni na. Ka o sʋnf pɛlig hali on mi' ye o saŋa kpɛlim nɛ bi'ela la zug.”
13 Ka bʋnyua la baŋ ye ba nɔk o lɔbi bas dunia ni na la, ka o kad pu'a kanɛ du'a biig la ye o gban'e o.
14 Ka ba daa tis pu'a la niiŋ tita'ar kpʋkpama ayi' ye o ianki keŋ mɔɔgin, zin'ikanɛ ka ba maal o yɛla ka na gur o yʋma atan' nɛ pʋsʋk ka waaf la kʋ nyaŋi nyɛɛ o la.
15 Ka waaf la pʋʋs ku'om ka li yii o nɔɔrin na nwɛnɛ kɔldaug nɛ pʋbidi dɔl pu'a la ye ku'onwiis la dii o mɔri gaad.
16 Amaa ka teŋ la tans mugulim fuoɛn ku'om kanɛ yi bʋnyua la nɔɔrin na la sʋŋ pu'a la.
17 Ka bʋnyua la sʋʋnr pɛlig nɛ pu'a la hali, ka o keŋ ye o zab nɛ pu'a la yaas banɛ kpɛlim ka siak Wina'am nɔɔr ka gban'e Yesu n mɔɔl labasi'a la nu'us ayi' la.
18 Ka bʋnkɔnbbɛ'og la zi'e mu'ar la gbɛogʋ gur.
NIER PA'ALƲG 13
Bʋnkɔnbbɛ'ɛd ayi' la yɛla
13
Ka m nyɛ bʋnkɔnbbɛ'og ka o yi atɛukʋn la naa mɔr iila piiga nɛ zuta ayɔpɔi. Ka na'am zupibis piiga bɛ iila la ni. Ka yʋda linɛ san'amid Wina'am yʋ'ʋr la sɔb o zutin la.
2 Bʋnkɔnbbɛ'og kanɛ ka m daa nyɛ la daa nwɛnɛ wɛog baa nɛ. Ka o nɔb-ɛɛns an bʋntitada, ka o nɔɔr nwɛnɛ gbigim nɔɔr nɛ. Ka bʋnyua la daa tis bʋnkɔnbbɛ'og la o mɛŋ paŋ nɛ o na'am gbauŋ nɛ o kpi'euŋ.
3 Ka bʋnkɔnbbɛ'og la zug yinne daa nwɛnɛ ba pu'alim o nɛ, amaa ka sapu'ad la bin'ei. Ka li pak dunia dim wʋsa ka ba dɔl bʋnkɔnbbɛ'og la.
4 Nidib wʋsa daa zun'od bʋnyua la, on tis bʋnkɔnbbɛ'og la o paŋ la zug, ka mɛ zun'od bʋnkɔnbbɛ'og la ye, “Anɔ'ɔnɛ mɔr paŋ nwɛnɛ bʋnkɔnbbɛ'og nwa? Ka anɔ'ɔnɛ na tun'e zab nɛ o?”
5 Ka ba tis bʋnkɔnbbɛ'og la suor ka o pian'ad nyɛɛsim pian'ad ka san'amid Wina'am yʋ'ʋr, ka lɛn kɛ ka o mɔr paŋ nwadis pisnaasi nɛ ayi'.
6 Ka o tʋ'ʋd Wina'am ka san'amid Wina'am yʋ'ʋr nɛ zin'ikanɛ ka o bɛ la nɛ banɛ bɛ arezana ni la wʋsa.
7 Ka ba tis o suor ka o zab nɛ Wina'am nidib ka nyaŋi ba, ka tis o paŋ kanɛ na nyaŋ buudi nɛ dɔɔd nɛ pian'ad nɛ teŋgbana wʋsa.
8 Nidib banɛ wʋsa bɛ dunia ni ka ba yʋda pʋ sɔb nyɔvʋpaal dim gbauŋʋn la na zun'e bʋnkɔnbbɛ'og la. Asɛɛ nimbanɛ yʋda da sɔb ka dunia nam pʋ pin'il la ma'aa. Gbauŋ la anɛ Pɛbil kanɛ ka ba da kʋʋ o la din.
9 Dinzug, onɛ mɔr tʋba on wʋm.
10 Onɛ ka ba na gban'e o la, ba na gban'e o mɔri keŋ, ka onɛ ka ba na kʋʋ o nɛ sʋ'ʋraug la, ba sid na kʋʋ o. Linzug li sʋm ye Wina'am nidib mɔr mɔdigir ka niŋ Wina'am yadda.
11 Ka m nyɛ bʋnkɔnbbɛ'og ya'as ka o yit teŋin naa mɔr iila ayi' ka li nwɛnɛ pɛbil iila nɛ, ka o pian'ad nwɛnɛ bʋnyua nɛ.
12 Ka zi'e yiiga bʋnkɔnbbɛ'og la nɔba zugʋ mugusid dunia dim wʋsa ka kɛ ba zun'od yiiga bʋnkɔnbbɛ'og onɛ sapu'adi yʋ'ʋn bin'ei la.
13 Ka maal bʋnnyalimtitada nɛ zanbina hali ka kɛ ka bugum yi agɔlli sig teŋgbauŋʋn na ka nidib nyɛɛ li.
14 On daa dɛŋi maal zanbinsieba nɛ yiiga bʋnkɔnbbɛ'og la paŋ la zugʋ daa kɛ ka o ma' dunia nidib wʋsa. O daa ma' ba ye ba mɛɛm win, ka li zun'e bʋnkɔnbbɛ'og onɛ ka ba daa pu'alim o nɛ sʋ'ʋraug ka o nan vʋe la.
15 Ka ba tis bʋnkɔnbbɛ'og onɛ paas ayi' la suor ka o tis win linɛ nwɛnɛ yiiga bʋnkɔnbbɛ'og la vʋ'ʋsʋm ka o na tun'e pian' ka kɛ ka ba kʋ banɛ pʋ siak ye ba pʋ'ʋs win kanɛ ka ba maal la.
16 Ka lɛm mugus nidib wʋsa banɛ anɛ, tadimnam nɛ kpi'emnam nɛ kpan'am dim nɛ nɔŋ dim la'an nɛ yammis nɛ banɛ ka' yammisɛ, ye ba di'em zanbina ba datiuŋ nu'usin bɛɛ ba gbɛ'ɛdin.
17 Ka sɔ' daa kʋ tun'e da' bɛɛ kuos si'ela, asɛɛ ka o mɔr bʋnkɔnbbɛ'og la zanbin linɛ aan o yʋ'ʋr la, bɛɛ o yʋ'ʋr la kal.
18 Lina bɔɔd ye fʋ mɔr ya'am ka nyaŋi baki li sʋ'ʋŋa. On mɛkama mɔr ya'am na tun'e baŋ bʋnyua la kal la gbin, bɔzugɔ kal la gbin anɛ dau sɔ' yʋ'ʋr. Li kal anɛ kɔbisyuobʋ nɛ pisyuobʋ nɛ ayuobʋ (666).
NIER PA'ALƲG 14
Nidib bɛdegʋ banɛ nyɛ faangir la yɛla
14
Ka m gɔs ka nyɛ Pɛbil la zi'e Zion zuorin linɛ an Jerusalem la. Ka nidib tusa kɔbiga nɛ pisnaasi nɛ anaasi banɛ mɔr o yʋ'ʋr nɛ o Ba' yʋ'ʋr ka li sɔbi ba gbɛ'ɛdin la zi'e o san'an.
2 Ka m wʋm kʋkɔr ka li yi arezana ni na vuudi nwɛnɛ ku'osusuud tita'ar nɛ satansʋg tita'ar nɛ, ka mɛ nwɛnɛ kɔnnwɛ'ɛdibi nwɛ'ɛdi ba kɔna si'em la.
3 Ka ba zi'e na'am gbauŋ nɛ bʋnvʋya anaasi nɛ kpɛɛmnam la tuon ka yʋ'ʋm yʋʋm paal dinɛ ka sɔ' kʋ tun'e zamisɛ, asɛɛ nidib tusa kɔbiga nɛ pisnaasi nɛ anaasi banɛ ka Wina'am faaɛn ba dunia ni la ma'aa.
4 Bama anɛ dap banɛ luaki ba mɛŋ nɛ pu'ab ka an nyain, ka dɔl Pɛbil la ken on ken zin'isi'a wʋsa, ka nyɛ faangir ninsaalib sʋʋgin, ka an yiiga dim wʋʋ waldɛɛnna banɛ ka ba zaŋi tis Wina'am nɛ Pɛbil la.
5 Ziri pian'ad pʋ yiti ba nɔɔrinɛ, ka ba mɛ pʋ mɔr taalɛ.
Maliaknam atan' la yɛla
6 Ka m nyɛ maliak sɔ' ka o ian'ad agɔla sa ka mɔr labasʋŋ kanɛ ka' naar ye o mɔɔli tis nidib wʋsa banɛ bɛ dunia ni, la'an nɛ teŋgbana nɛ buudi nɛ pian'ad buudi nɛ nidib buudi wʋsa.
7 Ka o pian' nɛ kʋkɔtita'ar ye, “Zɔmi Wina'am ka zun'e o yʋ'ʋr la, bɔzugɔ saŋa kanɛ ka o na kad nidib saria la paaeya. Zun'om Wina'am onɛ maal arezana nɛ dunia nɛ mu'a nɛ ku'om bunɛ tansidi yit zin'isi'a la wʋsa.”
8 Ka maliak onɛ paas ayi' la dɔl yiiga daan la ka yɛl ye, “Babilon teŋ tita'ar la san'amya. Li sid san'amya. Teŋ la daa nwɛnɛ pu'agɔɔndir nɛ ka kɛ ka nidib buudi wʋsa tʋm tʋʋmbɛ'ɛd; o nwɛnɛ daam linɛ kpi'em ka ba nu nɛ.”
9 Ka maliak onɛ paas atan' la dɔl yiiga maliaknama ayi' la pian'ad nɛ kʋkɔtita'ar ye, “Sɔ' ya'a zun'e bʋnkɔnbbɛ'og la nɛ o win la ka di'e zanbin la o gbɛ'ogʋn bɛɛ o nu'ugin,
10 Wina'am sʋnf na pɛlig nɛ o nwɛnɛ daam linɛ kpi'em ka o kpa'ae nɛ sʋnpɛɛnni niŋ o bʋtiŋin la kɛ ka o nuu li. O na namis Maliaksʋma nɛ Pɛbil la tuon ka kpɛn' bugum linɛ nyɛligid nwɛnɛ kidibir la.
11 Ka sɔ' ya'a di'e bʋnkɔnbbɛ'og la zanbin bɛɛ zun'e li nɛ li win la, o na namis bugum dinɛ ka li nyɔ'ɔs dʋt agɔl saŋa dinɛ ka' bɛn la ni, ka kʋ nyɛ vʋ'ʋsʋm nintaŋ bɛɛ yʋ'ʋŋɔ.”
12 Linzug li an sʋm ye Wina'am nimbanɛ siak o nɔɔr ka dɔl Yesu nɛ yadda niŋir la mɔdig.
13 Ka m wʋm ka kʋkɔr yi arezana ni na ye, “Sɔm nɛ'ɛŋa: Lin yi zina ken sa, albareka bɛ nɛ banɛ dɔl Zugsɔb la ka kpii o ni la.” Ka Wina'am Siig Kasi la siak ye, “Sida, ba na vʋ'ʋs nɛ tʋʋm kpi'ema ka ba tʋʋm sʋma na dɔlli ba.”
Dunia bunib la yɛla
14 Ka m gɔsi nyɛ saŋgbauŋ piel ka sɔ' zin' li zugʋ nwɛnɛ Ninsaal Biig ka pid sanlima zupibig o zugin, ka mɔr gɔn'ɔg linɛ nɔɔri dit hali o nu'ugin.
15 Ka maliak sɔ' yi Wina'am Pʋ'ʋsim Yin la yɛl onɛ zin' saŋgbauŋ zug la nɛ kʋkɔtita'ar ye, “Nɔkim gɔn'ɔg la bʋn, bɔzugɔ saŋa la paaeya, ka dunia la bi'igi siak bunib.”
16 Ka onɛ zin' saŋgbauŋ zug la zaŋ o gɔn'ɔg la yuligi bʋn dunia la.
17 Ka maliak si'a yi arezana Pʋ'ʋsim Yin la na, mɔr gɔn'ɔg linɛ nɔɔri dit.
18 Ka maliak onɛ sʋ'oe bugum la yi maan bimbimin la na yɛl maliak onɛ mɔr gɔn'ɔg linɛ nɔɔri dit la nɛ kʋkɔtita'ar ye, “Nɔkim gɔn'ɔg la pɔn' vain tiis wala linɛ bɛ dunia ni la. Bɔzugɔ wala la bi'ig ya ka li pɔn'ɔb saŋa paae.”
19 Ka maliak la nɔk o gɔn'ɔg la yulig dunia la ni pɔn' vain wala la, ka nɔki li niŋ zin'ig kanɛ ka ba nwiakid wala la ku'om la. Li nwiakir la an Wina'am sʋnpɛɛn tita'ar la.
20 Ka ba yi teŋ la yiŋi nwiak wala la, ka ziim yi zin'ikanɛ ka ba nwiaki li la nwɛnɛ mu'ar tita'ar nɛ. Ka li wa'alim an wʋʋ mail kɔbis yi'. Ka wief ya'a sigi li ni, li zulʋŋ na paae o salibir.
NIER PA'ALƲG 15
Maliaknama ayɔpɔi nɛ yɛltɔɔd ayɔpɔi la yɛla
15
Ka m lɛn nyɛ bʋnnyalʋŋ tita'ar si'a linɛ an zanbinnɛ bɛ arezana ni. Ka li an maliaknama ayɔpɔi nɛ yɛltɔɔd ayɔpɔi. Bama an yɛltɔɔd banɛ kpɛlim nya'aŋ la, bɔzugɔ ban naari an Wina'am sʋnpɛɛn la naar.
2 Ka m nyɛ si'el linɛ nwɛnɛ mu'ar ka an nyain wʋʋ gɔtiŋ nɛ, ka bugum gɛndig. Ka m lɛn nyɛ banɛ zabi nyaŋ bʋnkɔnbbɛ'og la nɛ o win nɛ o yʋ'ʋr kal la, ka ba zi'e kpi'e mu'ar la mɔr kɔna dinɛ ka Wina'am tisi ba la ba nu'usin,
3 ka yʋ'ʋm Wina'am tʋmtʋm Moses nɛ Pɛbil la yʋʋma ye, “Zugsɔb Wina'am tita'arɛ, fʋnɛ tʋm tʋʋm titada nɛ tʋʋmnyalima. Fʋnɛ an buudi wʋsa na'ab, ka fʋ suoya an sʋm nɛ sida.
4 Zugsɔba, fʋn gʋllim an sʋm, anɔ'ɔnɛ kʋ zɔɔf ka zun'e fʋ yʋ'ʋrɛ? Buudi wʋsa na kenaa zʋn'ʋf, bɔzugɔ fʋ pʋpielim tʋʋma la nie paalʋ.”
5 Nɛ'ɛŋa nya'aŋ ka m gɔsi nyɛ ka arezana Pʋ'ʋsim Yin la yɔ'ɔg, ka Wina'am Fuug Sʋgʋr linɛ an kasi la bɛɛ anina.
6 Ka maliaknama ayɔpɔi banɛ mɔr yɛltɔɔd ayɔpɔi linɛ kpɛlim nya'aŋ la, yi Pʋ'ʋsim Yin la na yɛ fupiela banɛ an nyain, ka sanlima sɛnbidis lɔɔ ba nyɔ'ɔd.
7 Ka bʋnvʋya anaasi la, yinne nɔk sanlima laas ayɔpɔi linɛ ka Wina'am onɛ bɛ saŋa linɛ ka' bɛn la sʋnpɛɛn pɛ'ɛli ba la tis maliaknama ayɔpɔi la.
8 Ka Wina'am na'asi nɛ o paŋ pɛ'ɛl Pʋ'ʋsim Yin la nwɛnɛ nyɔ'ɔs nɛ. Ka sɔ' daa kʋ tun'e kpɛn' li nii, ti paae saŋkanɛ ka yɛltɔɔd ayɔpɔi banɛ ka maliaknama ayɔpɔi mɔr la ti naae.
NIER PA'ALƲG 16
Labanɛ ka Wina'am sʋnpɛɛn pɛ'ɛl la yɛla
16
Ka m wʋm kʋkɔtita'ar ka li pian'adi yit Pʋ'ʋsim Yin la na yɛt maliaknama ayɔpɔi la ye, “Kem kpa'ae Wina'am sʋnpɛɛn linɛ pɛ'ɛl laas ayɔpɔi la dunia zug.”
2 Ka yiiga maliak la keŋ kpa'ae o laa la dunia zug. Ka fɛn'ɛpɔn'ɔsa banɛ zabid hali kiib banɛ mɔr bʋnkɔnbbɛ'og la zanbin nɛ banɛ na'asid o win la niŋgbina.
3 Ka maliak onɛ paas ayi' la kpa'ae o laa la niŋ atɛukʋn. Ka atɛuk la ku'om tiak nwɛnɛ onɛ kpi ziim nɛ, ka bʋnvʋya banɛ bɛ atɛukʋn la wʋsa kpi.
4 Ka maliak onɛ paas atan' la kpa'ae o dinnɛ niŋ kɔlis nɛ ku'om bun zin'isieba la ni, ka ku'om la kilim ziim.
5 Ka m wʋm maliak onɛ kpa'ae o din ku'omin la ka o yɛl Wina'am ye, “Fʋnɛ an Kasi, ka da bɛ, ka kpɛm bɛ ka na ti bɛ. Fʋ dɔl sida suori fʋ sariakadib la pʋʋgin.
6 Ba kʋʋ fʋ nidib nɛ fʋ nɔdi'esidib dinzug ka fʋ tis banɛ kʋʋ ba la ziim ye ba nu. Ban nar ye ba di'e si'eli la.”
7 Ka m wʋm kʋkɔr ka li yi maan maalʋg zin'igin la na yɛl ye, “Zugsɔb Wina'am onɛ an Paŋtita'ar sɔba, fʋ sariakadib la anɛ sida ka dɔl suor.”
8 Ka maliak onɛ paas anaasi la kpa'ae o laa la winnig la zug. Ka ba tis winnig la paŋ ye o dit nidib la wʋʋ bugum nɛ.
9 Ka tʋʋltita'ar tʋlig nidib la, ka ba pɔɔd nɔɔri tisid Wina'am onɛ sʋ'oe yɛltɔɔd bama la yʋ'ʋr. Amaa ba pʋ tiaki ba sʋnya ka na'as Wina'am.
10 Ka maliak onɛ paas anu la kpa'ae o laa la niŋ bʋnkɔnbbɛ'og la na'am gbauŋ la zug. Ka bʋnyua la sʋ'ʋlim wʋsa lieb lik. Ka nidib dummi ba zilima ba niŋgbina saaɛn tɔɔg la zug,
11 ka tʋ'ʋd Wina'am onɛ bɛ arezana ni la ba niŋgbina zabir nɛ ba fɛn'ɛd la zug. Amaa ba pʋ tiaki ba sʋnya ka basi ba tʋʋmbɛ'ɛd laa.
12 Ka maliak onɛ paas ayuobʋ la kpa'ae o laa la niŋ Efiritis mu'atita'arin la, ka mu'ar la ku'om kpiɛn ka maal suori tis na'anam banɛ yi ya-nya'aŋ la.
13 Ka m nyɛ kikiris atan' ka ba nwɛnɛ lɔmisnɛ yit bʋnyua la nɔɔrin nɛ bʋnkɔnbbɛ'og la nɔɔrin nɛ ziri nɔdi'es la nɔɔrin na.
14 Ba anɛ Sʋntaana kikiris banɛ maan bʋnnyalima ka yii keŋ dunia na'anam wʋsa nii la'asi ba ye ba nwɛ' tanp, Wina'am onɛ an Paŋtita'ar Sɔb la dabistita'ar la daar.
15 Wina'am yɛl ye, “Kɛlisimi, m na kena nwɛnɛ na'ayiigi ken si'em la. Albareka bɛ nɛ onɛ nɛi ka pʋ gbisɛ, ka kɛ ka o fuud bɛɛ o san'an ka kʋ keŋ biel ka nidib nyɛɛ o nyannɛ.”
16 Ka kikiris la la'as na'anam la keŋ zin'ikanɛ ka Hibiru dim buon ye Amageddon la.
17 Ka maliak onɛ paas ayɔpɔi la kpa'ae o laa la pɛbisimin. Ka kʋkɔtita'ar yi na'am gbauŋ dinɛ bɛ Pʋ'ʋsim Yin la na yɛl ye, “Li naae ya.”
18 Ka sa-ian'asʋg nɛ vuud nɛ satansʋg bɛ ka teŋ dam bɛdegʋ. Teŋ nan zi' damm ala hali lin yi ninsaal pin'ilʋg saŋa sa. Teŋ la da damnɛ bɛ'ɛd bɛ'ɛdi.
19 Ka teŋ dammʋg la pʋdig teŋ tita'ar la zin'isa atan'. Ka dunia tɛɛns la wʋsa san'am. Ka Wina'am tiɛn Babilon teŋ tita'ar la yɛla, ka kɛ ka Babilon nu o sʋnpɛɛn tita'ar bʋtiŋ daam la.
20 Tɛɛns banɛ ka ku'om giligi ba la da mɛlimnɛ, ka zuoya wʋsa bɔdig. 21 Sakugtitada banɛ ka ba yinne wʋsa tɛbisim zem wʋʋ ku'oyʋʋr, yit agɔlli lut nidib zutin. Ka ba tʋ'ʋd Wina'am sakuga namisidi ba la zug. Li da anɛ namistita'ar.
NIER PA'ALƲG 17
Pu'agɔɔndir tita'ar la yɛla
17
Ka maliaknam ayɔpɔi banɛ mɔrin laas ayɔpɔi la yinne kɛɛn m san'an na yɛlim ye, “Kem na, ka m pa'alif ban ye ba namis pu'agɔɔndir tita'ar onɛ an teŋ tita'ar ka kpi'e kɔlis bɛdegʋ la si'em.
2 Dunia na'anam la tʋm dian'ad tʋʋma nɛ pu'agɔɔndir la, ka nimbanɛ bɛ dunia ni la mɛ niŋ ala.”
3 Ka Wina'am Siig Kasi la daa pɛ'ɛlim ka maliak la ziimɛ keŋ mɔɔgin. Ka m nyɛ pu'a ka o ban'ad bʋnkɔnbbɛ'og zin'a, ka yʋda linɛ tʋ'ʋd Wina'am sɔbi gilig bʋnyua la niŋgbiŋ wʋsa. Ka bʋnyua la mɔr zuta ayɔpɔi nɛ iila piiga.
4 Ka pu'a la yɛ fuzɛn'ug nɛ sanlima la'ad nɛ kugvɛnla bɛdegʋ, ka mɔr sanlima bʋtiŋ linɛ pɛ'ɛl nɛ dian'ad linɛ yi o tʋʋmbɛ'ɛdin la na.
5 Yʋ'ʋkaŋa da sɔb o gbɛ'ogʋn: Li anɛ yɛlsu'adir, Babilon linɛ an teŋ tita'ar la pu'agɔɔnda wʋsa ma Nɛ dunia wʋsa tʋʋmbɛ'ɛd ma.
6 Ka m nyɛ ka pu'a la nu Wina'am nidib nɛ nimbanɛ daa niŋ Yesu yadda ka ba kʋʋ ba la ziim kʋʋl. Man nyɛɛ o la, ka li lidigim hali.
7 Ka maliak la bu'osim ye, “Bɔ ka fʋ lidigɛ? M na pa'alif pu'a la nɛ bʋnkɔnbbɛ'og onɛ ka o ban'ad ka o mɔr zut a ayɔpɔi nɛ iila piiga la yɛlsu'adir la gbin.
8 Bʋnkɔnbbɛ'og onɛ ka fʋ nyɛ la da vʋe saŋsi'en ka pʋ lɛn vʋeya, ka na naam bʋmbɔk zulʋŋ la nii dʋ na. O ya'a dʋ na o na keŋ zin'ikanɛ ka ba na san'am o la ni. Ka nimbanɛ bɛ dunia ni ka ba yʋda pʋ sɔb nyɔvʋpaal dim gbauŋʋn ka dunia nyaan pin'il la, na gɔs bʋnyua la ka li lidigi ba. Bɔzugɔ bʋnyua la da vʋe ka pʋ lɛn vʋeya, amaa o na lɛn vʋ'ʋg ya'as.
9 “Nɛ'ɛŋa pa'annɛ ya'am nɛ onɛ gban'ad si'el gbin. Zuta ayɔpɔi la anɛ zuoya ayɔpɔi banɛ ka pu'a la zin' ba zut la.
10 Ba mɛ anɛ na'anama ayɔpɔi. Ka anu kpi, ka onɛ paasi ayuobʋ la an na'ab nannanna ka yinne nam pʋ di na'am. O ya'a ti di na'am o na bɛ dabisa bi'ela.
11 Ka bʋnkɔnbbɛ'og onɛ da vʋe ka pʋ lɛn vʋe la, paas anii na'anama ayɔpɔi la ni, ka na keŋ zin'ikanɛ ka ba na san'am o la.
12 “Ka iila piiga banɛ ka fʋ nyɛ la anɛ na'anam piiga, amaa ba nam pʋ di'e na'am laa. Ban nɛ bʋnkɔnbbɛ'og la na ti la'asi di'e na'am la saŋa bi'ela.
13 Ka ba piiga la na mɔr gban'ar yinne ka na tis bʋnkɔnbbɛ'og la ba paŋ nɛ ba kpi'euŋ.
14 Ba na zab nɛ Pɛbil la, ka Pɛbil la nɛ o nya'andɔlib banɛ ka o da buoli ba o san'an ka gaŋi ba ka ba an sida dim la, na zabi nyaŋ bʋnyua la nɛ na'anam la, bɔzugɔ Pɛbil la an zugsɔbnam Zugsɔb nɛ na'anam Na'ab.”
15 Ka maliak la yɛlim ye, “Kɔlis banɛ ka fʋ nyɛ ka pu'a la bɛɛ ani la, anɛ nidib nɛ tigir nɛ buudi kɔn'ɔb-kɔn'ɔb nɛ pian'ad buudi kɔn'ɔb-kɔn'ɔb.
16 Ka iila piiga banɛ ka fʋ nyɛ la nɛ bʋnkɔnbbɛ'og la na kisig pu'agɔɔndir la, ka zaŋ on mɔr si'el wʋsa ka bas o biel, ka ɔnb o niŋgbiŋ ka kɛ ka bugum dii o.
17 Wina'am nɔki niŋi ba sʋnya ni, ka kɛ ka ba niŋ o bɔɔdim ka siaki tis bʋnkɔnbbɛ'og la ba na'am paŋi ti paae saŋkanɛ ka Wina'am pian'ad la na niŋ amɛŋa.
18 Pu'a kanɛ ka fʋ nyɛ la anɛ teŋ tita'ar kanɛ sʋ'oe dunia na'anam wʋsa.”
NIER PA'ALƲG 18
Babilon teŋ san'auŋ la yɛla
18
Nɛ'ɛŋa nya'aŋ ka m lɛn nyɛ maliak sɔ' ka o yi arezana nii sigid na. O daa mɔr kpi'euŋ hali, ka o pipilim kɛ ka dunia wʋsa nie nyain.
2 Ka o tans nɛ kʋkɔtita'ar ye, “Babilon teŋ tita'ar la san'am ya. Li sid san'am ya, ka yʋ'ʋn kilim zin'ikanɛ ka sibɛ'ɛdnam nɛ kikiris nɛ bʋmbɛ'ɛdnam nɛ niimbi'es pɛ'ɛl anina.
3 Tɛɛns wʋsa daa mɔr ya'amlɛog nɛ pu'agɔɔndir la, nɛ o dian'ad tʋʋma linɛ nwɛnɛ dankpi'euŋ la. Ka dunia na'anam digin nɛ pu'agɔɔndir la. Pu'agɔɔndir la mɔr o kpan'am la dit yɔɔg-yɔɔg la zugʋ kɛ ka dunia kpikpinkpinnib nyɛ kpan'am o ni.”
4 Ka m wʋm kʋkɔr ka li yi arezana ni na yɛl ye, “M nidiba, yiminɛ o san'an na, ka da la'as nɛ o tʋm tʋʋmbɛ'ɛdɛ, ala ka ya kʋ la'as nɛ o namisɛ.
5 Bɔzugɔ o tʋʋmbɛ'ɛd la la'as nɛ dʋʋ paae saazug, ka Wina'am tɛnr o tʋʋmbɛ'ɛd la wʋsa.
6 Niŋim o wʋʋ on ɛɛnti niŋidif si'em la, ka yɔɔ o abʋyi' wʋʋ o tʋʋma an si'em. Pɛ'ɛlim o bʋtiŋ la nɛ daam kanɛ kpi'emi gaad on tisif si'el la nɔɔr ayi'.
7 Tisim o namisʋg nɛ sʋnsa'aŋ ka li zem wʋʋ on tisid o mɛŋ na'asi nɛ bʋnsʋma si'em la. Ka o yɛt o mɛŋ ye, ‘Man anɛ pu'ana'ab nwa', m ka' pʋkɔɔnrɛ, m kʋ baŋ namisʋg nɛ sʋnsa'aŋa.’
8 Alazug namisʋg na sig o zugin daar yinne na, ka sʋnsa'aŋ nɛ kɔ'ɔm nɛ kum na gban'e o, ka bugum na dii o, Zugsɔb Wina'am onɛ kad o saria la an paŋ tita'ar Sɔb la zug.”
9 Dunia na'abanɛ digin nɛ o ka dit malisim nɛ o la, ya'a ti nyɛ bugum kanɛ dit o la nyɔ'ɔs, ba na kaas ka fabil o yɛla.
10 Dabiem na ti kpɛn' ba ka ba zi'e lalli sa yɛt ye, “Wai! Wai! Fʋn kanɛ an teŋ tita'arɛ, Babilon teŋ kanɛ mɔr kpi'euŋɔ, Nannanna nwa', fʋ san'auŋ paae na!”
11 Ka dunia kpikpinkpinnib mɛ kaas ka fabil o zug, sɔ' kae na lɛn da' ba la'ad la zug.
12 Sɔ' pʋ lɛn da'adi ba sanlima nɛ anzurifa nɛ kugvɛnla, nɛ fusʋma nɛ fuzɛn'ɛs nɛ fubanɛ nyɛɛn kil-kil la, nɛ daad banɛ buudi wʋsa nyuugʋ malis la, nɛ la'abanɛ ka ba zaŋ wabʋg nyina bɛɛ daad banɛ ligidi zu'oe bɛɛ anzurifa bɛɛ kʋnt bɛɛ sanlima bɛɛ kugvɛnla maal la,
13 nɛ kakaduru nɛ pulis nɛ tudaari nɛ mir nɛ frankinsens, nɛ daam nɛ olif kpaam nɛ zɔ'ɔm nɛ ki nɛ niigi nɛ pɛ'ɛs nɛ widi nɛ widi tɛrekonam nɛ yammis nɛ ninsaalib nyɔvʋya.
14 Ka kpikpinkpinnib la yɛt o ye, “La'abanɛ ka fʋ bɔɔd ye fʋ mɔr la gaad ya, fʋ kpan'am nɛ fʋ la'avɛnla la lɛn kae, fʋ kʋ lɛn nyɛɛ ba ya'asɛ.”
15 Kpikpinkpinnib banɛ kuosid la'abama ka nyɛt kpan'am o san'an la na zɔɔ keŋ zi'e lallisa; o namisʋg la dabiem na mɔri ba. Ba na kaasid ka fabinnɛ yɛt ye,
16 “Oi, Oi, teŋ tita'ar, linɛ nwɛnɛ pu'a onɛ yɛ fusʋma nɛ fuzɛn'ɛs nɛ sanlima nɛ kugvɛnla la'ad bɛdegʋ.
17 Nannanna ka kpan'am la ta'an san'am.” Ka banɛ an anrima kpɛɛmnam nɛ nimbanɛ kpɛn'ɛd anrima duosid suor, nɛ nimbanɛ tʋm anrima tʋʋma nɛ banɛ ken nɛ anrima kpiisid la zi'e lallisa.
18 Ba ya'a nyɛ bugum la dit o ka nyɔ'ɔs duod la, ba na kaasid ka yɛt ye, “Teŋ tita'ar nam mi' bɛɛ nwɛnɛ teŋ tita'ar kaŋaa?”
19 Ka na bugi ba zut nɛ titan ka kaasidi fabinnɛ yɛt ye, “Oi, Oi, teŋ tita'ar kanɛ ka banɛ mɔr anrima kpiisid atɛukʋn ka daa nyɛt kpan'am o san'an, nannanna la ta'am san'amnɛ anwaa!”
20 Ka kʋkɔr yi arezana nii yɛl ye, “Arezana dim nɛ Wina'am nidib nɛ o tʋmtʋmnib nɛ o nɔdi'esidib la, maalim sumalisim. Bɔzugɔ Wina'am kad teŋ la saria ka namis o, on daa niŋi ba si'em la zug.”
21 Ka maliaktita'ar zaŋ kugir ka li zem wʋʋ nɛtita'ar nɛ lɔb atɛukʋn la ka yɛl ye, “Babilon teŋ tita'ar la ba na ti ʋki li lɔb anwa, ka sɔ' kʋ lɛn nyɛɛ li ya'asɛ,
22 Ba kʋ lɛn wʋm ka sɔ' nwɛ' kɔn bɛɛ yʋ'ʋm yʋʋma bɛɛ piebid wiig bɛɛ na'atan teŋ la nii. Ka nidib mɛ kʋ lɛn tʋm tʋʋm si'a aninaa, ka mɛ kʋ lɛn nɛɛm nɛɛr ka ba wʋmi li vuudɛ.
23 Fitir bugum kʋ lɛn nie aninaa, sɔ' kʋ lɛn wʋm pu'apaal nɛ o sid kʋkɔrɛ. Teŋ la kpikpinkpinnib da an kpi'emnam dunia nwa' ni, ya zaŋi ya sɔntʋʋma ma' tɛɛns wʋsa kpɛn'ɛs mɔɔg.
24 Ba da kʋ nɔdi'esidib nɛ Wina'am nidib banɛ bɛɛ ba kɔn' la nɛ Babilon teŋin, nɛ banɛ ka ba da kʋʋ ba dunia ni la wʋsa.” Dinzug ka Wina'am san'ami li la.
NIER PA'ALƲG 19
19
Nɛ'ɛŋa nya'aŋ ka m wʋm nidib bɛdegʋ kʋkɔya vuud arezana nii yɛt ye, “Zun'omi Wina'am. Ka yɔlisim nɛ na'asi nɛ paŋ anɛ o din.
2 O kad saria nɛ sida nɛ yɛlmɛŋir. Ka kad pu'agɔɔndtita'ar onɛ san'am dunia nɛ o tʋʋmbɛ'ɛd la saria, ka namis o, on kɛ ka o tʋmtʋmnib la kpi la zug.”
3 Ka nidib la lɛn tans ya'as ye, “Zun'omi Wina'am. Ka bugum dit teŋ tita'asi'a la nyɔ'ɔs dʋt nɛ agɔl saŋa dinɛ ka' bɛnnɛ.”
4 Ka kpɛɛmnam pisi nɛ anaasi la nɛ bʋnvʋya anaasi la vanbini zun'e Wina'am onɛ zin' na'am gbauŋ zug la. Ka ba siak ye, “Ami Zun'omi Wina'am.”
Pɛbil la pu'adiir la yɛla
5 Ka kʋkɔr yi na'am gbauŋ la ni na ye, “Yanam banɛ an tʋmtʋmnib nɛ tadimnam nɛ kpi'emnam banɛ zɔt Wina'am la, zun'om Wina'am.”
6 Ka m lɛn wʋm kʋkɔr dinɛ vuud nwɛnɛ nidib bɛdegʋ vuud nɛ ka nwɛnɛ ku'om suugid nɛ paŋ si'em la nɛ satansʋg tita'ar nɛ, ka li yɛl ye, “Zun'omi Wina'am, on an Zugsɔb Wina'am tita'ar ka an na'ab la zug.
7 Kɛlli ka ti maal sumalisim ka ti sʋnya malis ka ti na'as Wina'am, ka Pɛbil la pu'adiir la saŋa paaeya, ka pu'a la mɛ ti'eb.
8 Ba tis pu'a la fupielis linɛ nyɛɛn ka an nyain.” (Fupielis la anɛ Wina'am nidib pʋpielim tʋʋma.)
9 Ka maliak la yɛlim ye, “Sɔm nɛ'ɛŋa, ‘Albareka bɛ nɛ banɛ ka ba buoli ba ye ba kɛn Pɛbil la pu'adiir di'ema la na.’” Ka lɛn ye, “Dina an Wina'am pian'ad amɛŋa.”
10 Ka m vanbin o tuon ye m na'as o. Amaa ka o yɛlim ye, “Da niŋ alaa, ka man anɛ fʋ tʋmtʋm tiraan nɛ fʋ ba'abiis banɛ mɔr Yesu Kristo kasɛt sʋŋ la nid yinne. Zun'om Wina'am.” Yesu kasɛt la anɛ linɛ ka Wina'am Siig la nie pa'al.
Onɛ ban'ad wiedpiel la yɛla
11 Ka m nyɛ ka arezana yɔ'ɔg, ka wiedpiel bɛɛ anina, ka onɛ ban'ad o la yʋ'ʋr buon Yɛlsida Sɔb. Ka o kad saria ka zabid zaba nɛ sida.
12 O nini daa nwɛnɛ bugum pielim nɛ, ka o pid na'am zupibis bɛdegʋ o zugin, ka mɔr yʋ'ʋr ka li sɔb o ni ka sɔ' zi' lii, asɛɛ on gʋllim.
13 Ka o yɛ fukanɛ ka ba lɔs ziimin. Ka o yʋ'ʋr buon Wina'am Pian'ad.
14 Ka arezana zabzabidib yɛ fupielis linɛ an nyain ban'ad wiedpielisi dɔl o.
15 Ka sʋ'ʋditiŋ yii o nɔɔrin na, ka o na zaŋi li zabi nyaŋ buudi wʋsa ka sʋ'ʋgi ba nɛ paŋ, nwɛnɛ kʋnt dansaar nɛ. Ka Wina'am tita'ar la sʋnpɛɛn na luu ba zut nwɛnɛ ban nɔɔdi nwiakid vain si'em la.
16 Ka yʋ'ʋr sɔb o fuugin nɛ o gbɛrin ye, Na'anam Na'ab nɛ zugsɔbnam Zugsɔb.
17 Ka m nyɛ maliak ka o zi'e winnigin, ka yɛl niis banɛ ian'ad agɔl la nɛ kʋkɔtita'ar ye, “Kemi na la'as Wina'am di'emtita'arin la di,
18 ka di na'anam niŋgbina nɛ zabzabidib kpɛɛmnam la nɛ zabzabidib nɛ widi nɛ wiedban'adib nɛ nidib wʋsa, banɛ an yammis nɛ banɛ ka' yammisɛ nɛ
tadimnam nɛ kpi'emnam la wʋsa niŋgbina.”
19 Ka m nyɛ bʋnkɔnbbɛ'og la nɛ dunia na'anam nɛ ba zabzabidib ka ba la'as ye ba zab nɛ onɛ ban'ad wief la nɛ o zabzabidib.
20 Amaa ka ba gban'e bʋnkɔnbbɛ'og la nɛ o ziri nɔdi'es onɛ daa zi'e bʋnkɔnbbɛ'og la nɔba zugʋ tʋm tʋʋmnyalima la. O daa dɔlis nɛ tʋʋmnyalima bama ma' banɛ mɔr bʋnkɔnbbɛ'og la zanbina nɛ banɛ na'asid o win la. Ka lɔb bʋnkɔnbbɛ'og la nɛ o ziri nɔdi'es la bas bugum mu'ar kanɛ dit nɛ kidibir la ni.
21 Ka sʋ'ʋg kanɛ yi wiedban'ad la nɔɔrin na la kʋʋ o dataas banɛ kpɛlim la. Ka niis wʋsa dii ba niŋgbina tig.
NIER PA'ALƲG 20
Yʋma tusa la yɛla
20
Ka m lɛn nyɛ maliak sɔ' ka o yi arezana nii sigid na mɔr bʋmbɔk zulʋŋ la saafi nɛ baans linɛ tɔ'ɔŋ taaba ka kpi'em hali o nu'ugin,
2 ka gban'e bʋnyua onɛ daa bɛ kʋdimin sa, ka ba buon ye kikiris na'ab nɛ Sʋntaana la lɔɔ o digil yʋma tusa,
3 ka nɔk o lɔb bʋmbɔk zulʋŋin la ka kpar ka nɔk si'eli taasi li, ye o da nyaŋi ma' nimbanɛ bɛ tɛɛnsin la ka yʋma tusir la bɛn ti paae. Lin nya'aŋ, ba na yidig o ka o nyɛ yɔlisim saŋa bi'ela.
4 Ka m nyɛ na'am gbana ka ba tis banɛ zin' li zugin la paŋ ka ba na kad saria, ka lɛn nyɛ nimbanɛ ka ba da kʋʋ ba ka li anɛ ban da mɔɔn yɛlsida linɛ ka Yesu pa'al li ba la, nɛ Wina'am pian'ad la yɛla. Nimbama daa pʋ zun'od bʋnkɔnbbɛ'og la nɛ o win laa, bɛɛ di'ed o zanbina ba gbɛ'ɛdin bɛɛ nu'usinɛɛ, ka yʋ'ʋn vʋ'ʋg na ka la'as nɛ Kristo an na'anam yʋma tusir la pʋʋgin.
5 Ka nimbanɛ kpɛlim la pʋ vʋ'ʋg na, hali ka yʋma tusir la bɛn ti gaad. Yiiga kum vʋ'ʋgiri nwa'.
6 Banɛ paam yiiga kum vʋ'ʋgir la na nyɛ albareka ka an kasi. Ka kum kanɛ paas ayi' la kʋ nyaŋi baa, ba na an Wina'am nɛ Kristo maanmaannib ka na la'as nɛ Kristo di na'am yʋma tusir.
Ban nyaŋ Sʋntaana la yɛla
7 Yʋma tusir la ya'a ti gaad, ba na bas Sʋntaana
8 ka o yi sanrega la ni ka ma' buudi wʋsa banɛ bɛ dunia lʋga anaasi banɛ ka ba buonnɛ ba ye Gog nɛ Magog la. Ba na la'asi ba wʋsa keŋ zaba. Ba zan' na la'as bɛdegʋ nwɛnɛ atɛuk nɔɔrin titanbin'isʋg nɛ.
9 Ka ba yina pɛ'ɛl teŋgbauŋ la ka gilig Wina'am nidibi la'asi bɛ zin'isi'a nɛ teŋ kanɛ ka Wina'am nɔŋ la. Amaa bugum yi arezana ni na dii ba.
10 Ka maliaknam nɔk Sʋntaana onɛ ma'ad dunia nidib la lɔb o bas bugum mu'ar linɛ diti nyɛligid wʋʋ kidibir la ni, zin'ikanɛ ka ba dɛŋi lɔb bʋnkɔnbbɛ'og la nɛ ziri nɔdi'es la bas la. Anina ka ba na namisid nintaŋ nɛ yʋ'ʋŋ, saŋa linɛ ka' bɛnnɛ.
Wina'am n kad saria la yɛla
11 Ka m lɛn nyɛ na'am gbauŋ piel tita'ar ka sɔ' zin' li zug. Ka teŋgbauŋ nɛ saŋgbauŋ zɔɔ mɛlim o tuon, ka sɔ' pʋ lɛn nyɛɛ ba ya'asɛ.
12 Ka m nyɛ banɛ kpi la, banɛ an tadimnam nɛ kpi'emnam, ka ba zi'e na'am gbauŋ la tuon. Ka sɔ' lakid gbana, ka mɛ lɛn lak gbauŋ si'a linɛ an gbauŋ kanɛ ka ba sɔb banɛ mɔr nyɔvʋpaal la yʋda niŋ la. Ka Wina'am kad banɛ kpi la saria ka li dɔlli ba tʋʋma daa an si'em ka li sɔb gbana la ni.
13 Ka atɛuk bas banɛ daa kpi li pʋʋgin la. Ka kum nɛ Kpi'im Teŋ mɛ bas nimbanɛ daa kpii bɛɛ ba ni la. Ka Wina'am kadi ba wʋsa saria ka li dɔlli ba tʋʋma daa an si'em.
14 Ka maliaknam nɔk kum nɛ Kpi'im Teŋi lɔbi bas mu'ar linɛ pɛ'ɛl nɛ bugum la ni. Bugum mu'ar kaŋa anɛ kum ayi' la.
15 Ka sɔ' yʋ'ʋr ya'a pʋ sɔb nyɔvʋr paal dim gbauŋʋn laa, ba na lɔb o sɔba bas bugum mu'ar la ni.
NIER PA'ALƲG 21
Saŋgbauŋ nɛ teŋgbauŋ paal la yɛla
21
Ka m nyɛ saŋgbauŋ nɛ teŋgbauŋ paal. Ka yiiga saŋgbauŋ nɛ teŋgbauŋ nɛ atɛuk gaad ka lɛn kae.
2 Ka m nyɛ Jerusalem Teŋ Paal linɛ an kasi la ka li yi arezana ni Wina'am san'an sigid na nwɛnɛ pu'a paalli yɛ fuvɛnla ti'eb ye o kul o sid nɛ.
3 Ka m wʋm ka kʋkɔr tita'ar pian'adi yit na'am gbauŋʋn la na yɛt ye, “Wina'am yir yʋ'ʋn bɛ nidib sʋʋgin; o na bɛ nɛ ba, ka ba na aan o nidib. Ka Wina'am mɛŋ na bɛɛ ba ni ka aan ba Wina'am.
4 O na ɛɛnsi ba ninta'am wʋsa. Yɛlkʋda la wʋsa gaad ya, ka kum nɛ sʋnsa'aŋ nɛ kaasig nɛ tɔɔg kʋ lɛm bɛ ya'asɛ.”
5 Ka onɛ zin' na'am gbauŋ zug la yɛl ye, “M maan si'el wʋsa nɛ bʋmpaala.” Ka yɛlim ye, “Sɔm nɛ'ɛŋaa digil bɔzugɔ pian'ad la anɛ sida ka an yɛlmɛŋir.”
6 Ka yɛlim ye, “Li naae ya. Manɛ an Alfa nɛ Omega, ka an si'el wʋsa pin'ilʋg nɛ li naar. Ka ku'onuud ya'a kʋʋd sɔ', mam na tis o nyɔvʋr ku'om linɛ bun zaalim ka o nu.
7 Ka onɛ nyaŋ yɛlbɛ'ɛd wʋsa la na di'e nɛ'ɛŋa wʋsa. Ka mam na aan o Wina'am ka on mɛ na aan m biig.
8 Amaa dabiem dim la nɛ banɛ ka' yadda, nɛ nimbɛ'ɛdnam nɛ ninkʋʋdib nɛ banɛ tʋm dian'ad tʋʋma nɛ banɛ dit tima nɛ banɛ an ba'amaannib nɛ ziri dim la wʋsa zin'ig anɛ bugum mu'ar linɛ pɛ'ɛl nɛ bugum ka diti nyɛligid wʋʋ kidibir la. Nɛ'ɛŋa an kum linɛ paas ayi' la.”
Jerusalem Tempaal la yɛla
9 Ka maliaknam ayɔpɔi la ni yinne banɛ daa mɔr laas ayɔpɔi ka li pɛ'ɛl nɛ yɛltɔɔd ayɔpɔi linɛ kpɛlim nya'aŋ la yɛlim ye, “Kem na ka m pa'alif Pu'a Paal la, onɛ an Pɛbil la pu'a la.”
10 Ka maliak la nɔkim Siigin mɔrimi keŋ dʋ zuotita'ar kanɛ wa'am la zug, ka pa'alim Jerusalem Teŋ linɛ an Kasi, ka li yi Wina'am san'an arezana nii sigid na.
11 Ka Wina'am na'am paŋ pipilim nyɛɛn, ka teŋ la mɛ nyɛɛn wʋʋ kugvɛnla linɛ ka ba buon jaspa la ka li nyɛɛn wʋʋ gɔtiŋ la.
12 Teŋ la mɔr zaŋguom titada nɛ za'anɔya pii nɛ ayi' ka za'anɔya nɛ kʋlis pii nɛ ayi' la wa'am. Ka maliaknam pii nɛ ayi' gur za'anɔya la. Ka Israel dim dɔɔd pii nɛ ayi' la yʋda sɔb kʋlis la ni.
13 Ka za'anɔya atan' bɛ ya-nya'aŋ, ka atan' bɛ ya-datiuŋ, ka atan' bɛ ya-dagɔbʋg ka atan' bɛ ya-tuona.
14 Ka ba ɛɛnb teŋ la zaŋguoma la kuga pii nɛ ayi' zug. Ka tʋmtʋmnib pii nɛ ayi' la yʋda sɔb kuga la zug.
15 Ka maliak kanɛ pian' tisim la mɔr sanlima daug linɛ ka ba mɔri makid la ye o mak teŋ la nɛ li kʋlis nɛ li zaŋguoma la.
16 Teŋ la anɛ mauk, ka li wa'alim nɛ li yalʋŋ la zem taaba. Ka maliak la mak teŋ la nɛ daug linɛ ka ba mɔri makid la. Ka li yalʋŋ an mail tusir nɛ kɔbisnaasi. Ka li wa'alim nɛ li yalʋŋ nɛ li wa'alim teŋin dʋ zugin la wʋsa zem taaba.
17 Ka maliak la mɛ mak zaŋguoma la ka li wa'alim la an nɔbir makir kɔbisyi'. Maliak la mɔr si'eli makid la wa'alim la.
18 Ka ba nɔk kugvɛnla linɛ yʋ'ʋri buon Jaspa la mɛ' zaŋguoma la. Ka teŋ la mɛŋ an sanlima ka nyɛɛn wʋʋ gɔtiŋ nɛ.
19 Teŋ la ɛɛnbir la, ba da zaŋ nɛ kugvɛnla nɛ li buudi wʋsa ɛɛnb ɛɛnbir la ka li vɛnl hali. Kugbanɛ ka ba da ɛɛnb yiiga la da anɛ jaspa. Ka onɛ paas ayi' la an safir. Ka atan' la an agat. Ka anaasi an emeral.
20 Ka anu an onik. Ka ayuobʋ an kanelian. Ka ayɔpɔi daan la an kirisolat. Ka anii an bɛril. Ka awai an topas. Ka piiga an kirisopras. Ka pii nɛ yinne an jasin. Ka pii nɛ ayi' an ametis.
21 Ba da nɔknɛ kugvɛnla linɛ yʋ'ʋri buon pɛɛl la maal kʋlis za'anɔya pii nɛ ayi' la. Kʋlʋŋ yinne wʋsa ba da nɔknɛ pɛɛl mummi maal. Ka teŋ la suoya la an sanlima nyɛɛn wʋʋ gɔtiŋ nɛ.
22 Ka m pʋ nyɛ Wina'am Pʋ'ʋsim Yir teŋ la nii, bɔzugɔ Zugsɔb Wina'am onɛ an paŋ tita'ar Sɔb la nɛ Pɛbil la aan anina Pʋ'ʋsim Yir.
23 Ka Wina'am na'am paŋ nɛ Pɛbil la nyɛɛnnɛ li ni, ka li nie nyain. Linzug ka teŋ la pʋ bɔɔd winnig nɛ nwadig ye ba tisi li nɛɛsim.
24 Ka dunia sʋ'ʋlim wʋsa na gɔɔnd nɛɛsim la ni. Ka dunia na'anam na mɔri ba kpan'am keŋ teŋ la ni.
25 Ka teŋ la za'anɔya pʋ yɔɔd nintaŋa, bɔzugɔ yʋ'ʋŋ kae aninaa.
26 Ka ba na mɔr dunia na'am nɛ kpan'am kɛn teŋ la ni na.
27 Ka linɛ ka' nyain wʋsa nɛ onɛ tʋm nyan tʋʋma nɛ ziri dim kʋ kpɛn' teŋin laa. Nimbanɛ yʋda sɔb Pɛbil la gbauŋʋn linɛ an nyɔvʋpaal dim gbauŋ la ma'aa na kpɛn' teŋ la pʋʋgin.
NIER PA'ALƲG 22
Kɔldaug kanɛ ku'om tisid nyɔvʋr la yɛla
22
ka maliak la lɛm pa'alim kɔldaug kanɛ ku'om tisid nyɔvʋr la, ka li ian'ad wʋʋ gɔtiŋ nɛ ka yit Wina'am nɛ Pɛbil la na'am gbauŋ la ni,
2 ka bɛ teŋ la suotita'ar la sʋʋgin. Ka tiig linɛ tisid nyɔvʋr la zi'e mu'ar la gbɛɛd ayi' la ni, ka wan wala nɔɔr pii nɛ ayi' yʋʋm pʋʋgin, ka wan nɔɔr yinne nwadig pʋʋgin. Ka tiig la vaand tisid dunia sʋ'ʋlim wʋsa laafi.
3 Ka Wina'am nɔpɔɔr la kʋ lɛm bɛ ya'asɛ, bɔzugɔ Wina'am nɛ Pɛbil la na'am gbauŋ na bɛɛ li ni. Ka o tʋmtʋmnib na zun'e o,
4 ka nyɛɛ o nindaa. Ka o yʋ'ʋr na sɔbi ba gbɛ'ɛdin.
5 Ka yʋ'ʋŋ kʋ lɛm bɛɛ. Ka Zugsɔb Wina'am na kɛ ka li an nyain, ka ba kʋ lɛm bɔɔd fitir nɛ nintaŋ ani. Ka ba na di na'am saŋa linɛ ka' bɛnnɛ.
Yesu na kena la yɛla
6 Ka maliak la yɛlim ye, “Yɛlbama anɛ asida. Ka Zugsɔb Wina'am onɛ tisid o nɔdi'esidib o Siig Kasi la tʋm o maliak ye o kena pa'al o tʋmtʋmnib yɛlbanɛ kʋ yuugɛ ka niŋ la.”
7 Yesu yɛl ye, “Li kʋ yuugɛ ka m na kena. Albareka bɛ nɛ onɛ siak gbauŋ kaŋa nɔdi'esʋg la yɛt si'el la.”
8 Man Joon n an onɛ wʋm ka nyɛ yɛlbama wʋsa. Ka man daa wʋm ka nyɛ li naae la, ka vanbin maliak onɛ pa'alim yɛlbama la tuon ye m zun'e o.
9 Amaa ka o yɛlim ye, “Da niŋ alaa. Ka mam mɛ anɛ fʋ tʋmtʋm tiraan la'an nɛ fʋ ba'abiis banɛ an nɔdi'esidib nɛ nimbanɛ siak bʋn linɛ bɛ gbauŋ kaŋa ni la. Zun'om Wina'am.”
10 Ka o yɛl man ye, “Da su'a gbauŋ kaŋa nɔdi'esʋg la yɛt si'el laa, bɔzugɔ saŋa la li'el ya, ka yɛlbama wʋsa na niŋ.
11 Kɛl ka onɛ an tʋʋmbɛ'ɛd daan kpɛn aan ala. Ka onɛ tʋm dian'ad tʋʋma kpɛn niŋim ala. Ka onɛ an pʋpiel on kpɛn tʋm linɛ an sʋm. Ka onɛ sʋʋnri an nyain on kpɛn aan ala.”
12 Ka Yesu yɛl ye, “Kɛlisimi, li kʋ yuugɛ, ka m na kena. Yɔɔd la bɛɛ m san'an, ka m na tis sɔ' wʋsa o tʋʋma yɔɔdi an si'em.
13 Manɛ an Alfa nɛ Omega, ka an yiiga daan nɛ nya'aŋ daan ka an bʋn wʋsa pin'ilʋg nɛ li naar.”
14 Albareka bɛ nɛ banɛ pie ba fuud nyain la, bɔzugɔ ba na mɔr suori na di nyɔvʋr tiig la wala, ka na dɔl za'anɔɔri kpɛn' teŋ la ni.
15 Ka nimbɛ'ɛdnam nɛ banɛ dit tima la nɛ banɛ tʋm dian'ad tʋʋma la nɛ ninkʋʋdib la nɛ ba'amaannib la nɛ nimbanɛ wʋsa nɔŋ ye ba ma' ziri la kʋ kpɛn' teŋ la pʋʋginɛ, ka na bɛ nɛ teŋ la yiŋ.
16 “Man Yesu tʋmi m maliak ye o yɛli ya yɛlbama ka fʋ tu'asi tis Wina'am nidib la. Manɛ an na'ab David yaaŋ nɛ bɛogʋn nwaddar linɛ nyɛɛn la.”
17 Wina'am Siig Kasi nɛ Pɛbil Pu'apaal la yɛl ye, “Kem na.” Ka onɛ wʋmi li la mɛ yɛlim ye, “Kem na.” Onɛ wʋsa ka ku'onuud mɔr o la, kɛl ka o kena, ka onɛ mɛ bɔɔd la, kɛl ka o di'e piini linɛ an nyɔvʋr ku'om la zaalim.
Li naari nwa'
18 Man Joon san'an sɔ' mɛkama onɛ wʋm nɔdi'esʋg la yɛl si'el gbauŋ kaŋa ni la nɛ nimmua ye: Onɛ paas si'el gbauŋ kaŋa ni, Wina'am na maligim paas on sɔb yɛltɔɔd linɛ sɔb gbauŋ kaŋa ni la.
19 Ka sɔ' ya'a yis si'el nɔdi'esʋg gbauŋ kaŋa ni, Wina'am na mɔŋ on sɔb o pʋdigir linɛ bɛ nyɔvʋr tiig la sɔb gbauŋ kaŋa ni la.
20 Onɛ yɛt ye yɛlbama anɛ sida la yɛl ye, “Sida li kʋ yuugɛ, ka m na kena.” Li an sʋm. Ti Zugsɔb Yesu, kem na.
21 Ti Zugsɔb Yesu yɛlsʋm na bɛ nɛ Wina'am nidib wʋs