Wp/kus/Wina'am Gbauŋ:Nɔnaar Kʋdʋg:Amos
| Part of | Twelve Minor Prophets  |
|---|---|
| Short name | Am |
| Title | עָמוֹס |
| Follows | Book of Joel, Book of Hosea |
| Followed by | Obadiah, Book of Micah |
| Genre | religious text, Isaias |
| Characters | Amos |
| Published in | Bible of Kralice |
| Entry in abbreviations table | Amos |
| Stack Exchange tag | https://hermeneutics.stackexchange.com/tags/amos |
Gbauŋ nwa' yɛla
Amos da yinɛ Juda teŋin na amaa o da mɔr Wina'am labaar la na tis Israel nidib banɛ bɛ ya-datiuŋ la. Saŋkan la teŋ la da dignɛ baanlimm ka kpan'am bɛ ka ba dɔl pʋ'ʋsim suoya. Amos da yɛli ba ye ya'a an sida ba nɛ'ɛsid nɔŋ dim ka pʋ kad saria nɛ sidaa, dinzug Wina'am sʋnf pʋ malis nɛ ba. O da pʋ gi'igɛ ka yɛli ba nyain ye Israel n niŋid si'em la ka' li kɔn' nɛ teŋ banɛ gilig o la, dinzug Wina'am na tɛɛgi ba tʋba bɔzugɔ o bɔɔd ye ba tʋm nɛ sida (5:21-24).
Amos 1
1† Labakaŋa yinɛ Amos onɛ da gʋ'ʋn kɔnbid ka yi Tekoa tempʋʋg linɛ bɛ Juda sʋ'ʋlimin la ni na. Li pa'annɛ on da nyɛ si'el Israel yɛla la, li yʋma ayi' nya'aŋ ka teŋ nyaan dam la, saŋkan ka Uzia da an Juda† na'ab ka Jeroboam onɛ saamme da an Jehoas la an Israel Na'ab la. Wina'am da nie yɛlbama Israel yɛla tis Amos.
2 Ka Amos yɛl ye, “Zugsɔb la nwa'am Zion zuorin, ka o kʋkɔr yi Jerusalem tempʋʋgin na. Yaama bɛ zin'isi'a ka kɔnbkemnib kemmi ba kɔnbid la kʋdignɛ, ka mɔɔd banɛ bɛ Kaamel Zuor zug la kanb.
Wina'am na kad Israel kpi'es saria
3 Zugsɔb la yɛl ye, ‘Damaskus teŋ tʋm tʋʋmbɛ'ɛd ka li paae zin'is atan', hali li paae anaasi, m kʋ lɛn nyaŋi mɔdig nɛ m sʋnpɛɛn laa. Bɔzugɔ, ba da mɔr kʋnt kanɛ mɔr nyina m bʋ'ʋd Gilead nidib wʋʋ ban bʋ'ʋd ki si'em la.
4† M na kɛ ka bugum di Na'ab Hazael yir nɛ Na'ab Ben-Hadad kpi'euŋ zin'is la, ka san'ami li wʋsa.
5 M na nwa'ae Damaskus za'anɔya la; ka san'am nimbanɛ bɛ Aven Bɔn'ɔgin la nɛ onɛ zin' na'am gbauŋ la zug la. Ka lɛn kʋ onɛ an na'ab Beteden teŋin la. Aram nidib la na lɔ'ɔŋ Kir teŋinɛ kpɛn' sankpan'asim.’ Zugsɔb la yɛl si'em la.
6 “Zugsɔb la yɛl si'eli nwa': “Gaza teŋ tʋm tʋʋmbɛ'ɛd ka li paae zin'is atan', hali li paae anaasi m kʋ lɛn nyaŋi mɔdig nɛ m sʋnpɛɛn laa. Bɔzugɔ ba gban'e tɛɛns la nidibi kuosi tis Edom teŋ dim.
7 M na kɛ ka bugum kanb Gaza zaŋguoma la; li na kanbi dii ba kpi'euŋ zin'is la wʋsa san'am.
8 M na san'am Asdod na'ab, nɛ onɛ mɔr na'am kpi'euŋʋ bɛ Askɛlon la. M mɛ na zab nɛ Ekron teŋ, hali ka Filistia dim la wʋsa ti kpii naae.” Zugsɔb onɛ an Paŋtita'ar Sɔb la yɛl.
9† Zugsɔb la yɛl si'eli nwa' ye, “Taya dim tʋm tʋʋmbɛ'ɛd ka li paae zin'is atan'; hali li paae anaasi ka m kʋ lɛn nyaŋi mɔdig nɛ m sʋnpɛɛn la. Bɔzugɔ, ba gban'e tɛɛns la nidibi kuosi tis Edom teŋ dim, ka ba ba'a kae nɛ nɔnaar linɛ kɛ ka ba an ba'abiis la.
10 M na kɛ ka bugum kanb Taya teŋ zaŋguoma la; li na kanbi ba kpi'euŋ zin'is la wʋsa.”
11 Zugsɔb la yɛl si'eli nwa' ye, “Edom dim tʋm tʋʋmbɛ'ɛd ka li paae zin'is atan', hali li paae anaasi m kʋ lɛn nyaŋi mɔdig nɛ m sʋnpɛɛn la. Bɔzugɔ ba kadi ba ba'abiis Israel dim la nɛ zaba sʋ'ʋg, ka pʋ zɔɔ ba nimbaanliga ba sʋnya pɛligi galis ka dit wʋʋ bugum pielim ka pʋ ma'ad la zug.
12 M na tud bugum Teman teŋin ka li na kanb Bozira kpi'euŋ zin'is la.”
13 Zugsɔb la yɛl si'eli nwa' ye, “Ammon dim tʋm tʋʋmbɛ'ɛd ka li paae zin'is atan', hali li paae anaasi m kʋ lɛn nyaŋi mɔdig nɛ m sʋnpɛɛn laa. Bɔzugɔ ban da bɔɔd ye ba yaligi ba teŋ titɔndis la, ba da zab nɛ Gilead teŋ la ka lati ba pu'apʋʋs.
10 M na nyu'oe Rabba teŋ zaŋguoma la bugum ka li na kanbi ba kpi'euŋ zin'is la; saŋkan la ba na nyɛ yɛltɔɔg tanp nwɛ'ɛb daar, ka zaba la daar la na nwɛnɛ sisi'etita'ari da'adnɛ.
11 Na'ab nɛ o na'ayikpɛm wʋsa na lɔ'ɔŋ teŋ zʋŋʋ kilim yammis.” Mam Zugsɔb la yɛl.
Amos 2
1† Zugsɔb la yɛl si'eli nwa' ye, “Moab dim tʋm tʋʋmbɛ'ɛd ka li paae zin'is atan', hali li paae anaasi, m kʋ lɛn nyaŋi mɔdig nɛ m sʋnpɛɛn laa. Bɔzugɔ ba nyu'oe Edom na'ab kɔnba, ka li dii kilim tampɛligim ka ba mɔri gɛndigid bʋmbɔni taad.
2 M na tud bugum Moab teŋin la ka li kanb teŋ la ka san'am linɛ wʋsa bɛ Keriof kpi'euŋ zin'isin la. Ba na san'am Moab dim zabtita'arin, saŋkanɛ ka ba ki'ed zaba kuŋ ka piebid na'atana la.
3 M na san'am Moab na'ab la ka kʋʋ o na'ayikpɛm la wʋsa.” Zugsɔb la yɛl.
4 Zugsɔb la yɛl si'eli nwa' ye, “Juda dim tʋm tʋʋmbɛ'ɛd zin'is atan', hali li paae anaasi ka m kʋ lɛn nyaŋi mɔdig nɛ m sʋnpɛɛn laa. Bɔzugɔ ba zan'as Zugsɔb la wada ka pʋ dɔl o zi'ela la. Li anɛ ziri wina nɛ bada banɛ ka ba yaanam da dɔl la mɔri ba kpɛn'ɛs mɔɔg la zug.
5 M na tud bugum Juda teŋin na, ka li na kanb Jerusalem kpi'euŋ zin'is la.”
Israel sariakadib yɛla
6 “Zugsɔb la yɛl si'eli nwa' ye, “Israel dim tʋm tʋʋmbɛ'ɛd ka li paae zin'is atan', hali li paae anaasi ka m kʋ lɛn nyaŋi mɔdig nɛ m sʋnpɛɛn laa. Ba nɔkid pʋpielim dimi kuosidi di'esid anzurifa, ka kuosid nɔŋ dim la di'esid ta'ada.
7 Ba nɔɔd nɔŋ dim la zug wʋʋ titan linɛ bɛ teŋin nɛ ka mɔŋ banɛ ka ba namisid la bʋʋd. Dau nɛ o biig la'asi bɔ bipuŋ yinne ala ka ba san'amidi m yʋ'ʋr kanɛ an kasi la.
4 Ba mɔr fubanɛ ka ba di'esidi ba samdaannam san'an la bɔbigi digi ba maana bimbima la baba. Ba nuud daam kanɛ ka ba di'e ba samdaannam san'anɛ ba wina bɛ yisi'a la ni.
9† M da san'am Ammon dim banɛ bɛɛ ba tuon la, la'an nɛ ban wa'am wʋʋ na'aziinr ka kpi'emi nwɛnɛ kʋk daad la. M san'ami ba wala linɛ bɛɛ agɔla la nɛ ba nya'a linɛ bɛ teŋin la.
10 Manɛ mɔri ya yi Egipt teŋin na, ka gaadi ya tuon mɔɔgin la yʋma pisnaasi ka faaɛn Amor dim la teŋi tisi ya.
11† M gaansi ya biribis la sieba ka ba an nɔdi'esidib ka sieba an Naazirnam banɛ pʋ nuud daam. Nwa' ka' sidaa, Israel dima?” Zugsɔb la pian'ʋkʋ la.
12 Amaa ya kɛ ka Naazirnam la nu daam ka muk nɔdi'esidib la ye ba da di'es Zugsɔb pian'ad ya'asɛ.
13 “M na muki ya ka ya kɔ' wʋʋ tɛreko na zi la'ad bɛdegʋ ka kɔ' si'em la.
14 Yanam banɛ mi' zɔɔg hali la kʋ pɔnsɛ, ka ya paŋ dim la paŋ na naae, ka zabzabidib la kʋ nyaŋi faaɛn ba mɛŋa.
15 Banɛ mi' tiraug tɔɔnb la kʋ tun'e zi'en kiŋ-kiŋ zabɛ, ka soogianam banɛ ken nɔba la kʋ pɔnsɛ, ka banɛ ban'ad widi zabid la kʋ nyaŋi faaɛn ba nyɔvʋrɛ.
16 Zabzabidib banɛ mɔr sʋnkpi'euŋ hali la na zɔt biel daakan la.” Man Zugsɔb la yɛl.
Amos 3
Kasɛtibi zi'enɛ pɔ'ɔg Israel la yɛla
1 Amos da lɛn yɛl ye, “Kɛlisimi labakanɛ ka Zugsɔb la pian' pɔ'ɔg, yanam Israel dim wʋsa banɛ ka o yis Egipt na la ye,
2 “Buudbanɛ bɛ dunia ni wʋsa sʋʋgin, yanam ma'aa ka m gaŋ. Dinzugɔ m na tɛɛgi ya tʋbiri ya tʋʋmbɛ'ɛd la wʋsa zug.”
3 Nidib ayi' na nyaŋi la'asi ken, ka pʋ dɛŋi siak ye ba na dɔl taabaa?
4 Gbigim na nwa'am o gbɛɛnsigin ka li ka' o nyɛnɛ bʋnkɔnbʋg ye o kʋʋ? O na nyuun o buugin ka pʋ gban'e si'elaa?
5 Bɛndig na nyaŋi gban'e niiŋ teŋin zin'ikanɛ ka ba pʋ bɛndɛɛ? Ka baŋ na nyaŋi kpirig teŋin ka si'el pʋ nɔɔ lii?
6 Tanp na'atan na pieb tempʋʋgin, ka dabiem kʋ kpɛn' nidib laa? San'auŋ na li tempʋʋgin na ka li ka' nɛ Zugsɔb la maalɛɛ?
7 Sida Zugsɔb Onɛ an Paŋtita'ar Sɔb la pʋ maan si'el, ka pʋ dɛŋi nie on gban'e si'el la tis o nɔdi'esidiba.
8 Tɔ'! †Gbigim nwa'am ya ka anɔ'ɔnɛ kʋ zɔ dabiem? Zugsɔb onɛ an Paŋtita'ar Sɔb la pian' ya anɔ'ɔnɛ kʋ mɔɔl o labaar la?
9 Mɔɔlim tis banɛ bɛ Asdod dim kpi'euŋ zin'is nɛ Egipt teŋgbauŋ kpi'euŋ zin'isin la ye, “La'asimi taaba Samaria zuoya la nii gɔsi taawai kanɛ duoe anina dammid teŋ la nɛ mugusʋg kanɛ paae teŋ la nidib.”
10 Zugsɔb la lɛn yɛl ye, “Nidib la zi' tʋʋm sʋŋɔ, ba nɔk la'abanɛ ka ba fan' nidib san'an nɛ paŋ la su'a ba mɛŋ kpi'euŋ zin'isin la.”
11 Dinzugɔ, Zugsɔb onɛ an Paŋtita'ar Sɔb la yɛl ye, “Dataas na kena gilig teŋ la; ba na san'ami ya kpi'euŋ zin'is ka faaɛn dinɛ bɛɛ anina wʋsa.”
12 Zugsɔb la yɛl si'eli nwa', “Nwɛnɛ kɔnbkemi na faaɛn o kɔnbʋg gbɛya ayi' bɛɛ o tʋbir gbigim nɔɔrin si'em la, ala mɛn ka m na faaɛn Israel dim banɛ bɛ Samaria nɛ Damaskus n digi ba gadsʋma ka zin' ba kʋgis zug la.”
13 “Wʋmmi nɛ' ka di kasɛt Jakob buudi la yɛla.” Zugsɔb Wina'am Onɛ an Paŋtita'ar Sɔb la pian'ʋkʋ la.
14† “Daakanɛ ka m na tɛɛg Israel dim tʋbiri ba tʋʋmbɛ'ɛd yɛla la, m na san'am Betel teŋ malʋŋ bimbima la ka iila banɛ bɛ bimbima la zug la kɔɔ li teŋin wʋsa.
15 M na nwa'ae dɔbanɛ ka ya gbɛɛnd waad saŋa nɛ dɔbanɛ ka ya gbɛɛnd walʋsʋg saŋa la; ya' banɛ ka ya nɔk wabʋg nyina maal ye li vɛnl la nɛ ya' banɛ an ya' bɛda la wʋsa na san'am.” Zugsɔb la pian'ʋkʋ la.
Amos 4
Israel dim zan'as ka pʋ lɛb Wina'am san'anɛ
1 Amos da lɛn yɛl ye, Wʋmmi nwa', yanam pu'a banɛ bɛ Samaria Zuorin la, ya nwɛnɛ na'anya'as banɛ bɛ Basan sʋ'ʋlimin nɛ. Ya faand nɔŋ dim ka mugusid banɛ an fara dim ka yɛti ya sidib ye, “Tisimini ti daam ka ti nu!”
2 Zugsɔb onɛ an Paŋtita'ar Sɔb la pɔya nɛ on an Kasi la ye, “Saŋa na kena, bi'esʋg kae, ka ba sid na lɔɔ ya nɛ nwiisi mɔri keŋ, yanam banɛ kpɛlim la ba na gban'e ya wʋʋ zimi nɛ.
3 Ba na tɛɛgi ya yi tempʋʋg la yiŋi dɔl wɛn banɛ bɛ zaŋguoma la ni, ka basi ya ka ya dɔl suokanɛ kpa' Hamon la.”
Zugsɔb la pian'ʋkʋ la.
4 “Ɛɛn, ya'an kemi Betel teŋinɛ tʋmmini ya tʋʋmbɛ'ɛd la; ka gaad Gilgal teŋinɛ maligim tʋm bɛ'ɛd ka li gaad ala. Mɔri ya maana bɛogʋn wʋsa kena, ka mɔri ya pʋʋr piiga yʋma atan' wʋsa kena.
5 Mɔri bodobodo linɛ ka' danbin na nyu'oe maali bareka pʋ'ʋsim maan, ka mɔr linɛ an ya'amlɛog piini la na maal maan li ka' yanam Israel dimi nɔŋ si'eli laa?” Zugsɔb Wina'am la pian'ʋkʋ la.
6 “M da kɛ ka ya kɔ'ɔŋ diib tempʋʋs la ni wʋsa ka diib mɛ kae teŋkpɛmis la nii, la'an nɛ wala ya pʋ lɛb man san'an naa.” Zugsɔb la pian'ʋkʋ la.
7 “Manɛ da lɛn gu'oe saa saŋkan ka bunib nan kpɛlim nwadis atan' la. M da kɛ ka saa ni teŋ yinne ni amaa ka pʋ ni teŋ yinne nii. Saa da ni pɔɔg yinne ni ka pʋ ni yinne nii ka li kʋdig.
8 Ku'onuud da wʋm nidib ka ba gɛrid tempʋʋsini ieed ku'om amaa ka pʋ nyɛɛ nu ka li sia'ali baa, la'an nɛ wala ba pʋ lɛb man san'an naa.” Zugsɔb la pian'ʋkʋ la.
9 “Saŋa bɛdegʋ ka m da kɛ ka wauŋ kpɛn' ya lɔmbɔn'ɔd nɛ ya tiis pɔɔd la ka li zɛndig, ka kɛ ka wiim gban'e ba. Na'azɔmnam ɔnbi ya kekama nɛ ya olif tiis la, la'an nɛ wala, ya pʋ lɛbi m san'an naa.” Zugsɔb la pian'ʋkʋ la.
10 “Manɛ da kɛ ka ban'abɛ'ɛd lii ya sʋʋgin wʋʋ man da niŋ Egipt teŋin si'em la. M da kʋʋ ya na'akim zaba ni, nɛ ya widi banɛ ka ba faaɛn la. Manɛ da kɛ ka ya ninkpiilima nyuug kpɛn' ya nyɔnya ni, la'an nɛ wala ya pʋ lɛbi m san'an naa.” Zugsɔb la pian'ʋkʋ la.
11† “Manɛ da san'ami ya sieba wʋʋ man da san'am Sodom nɛ Gomora dim si'em la. Ya da nwɛnɛ daug kanɛ ka bugum dit ka ba yaae li bugumin la yis na, la'an nɛ wala ya pʋ lɛbi m san'an naa.” Zugsɔb la pian'ʋkʋ la.
12 “Dinzugɔ, mam na maali ya si'em nwa', yanam Israel dima. Man ye m niŋi ya anwa la zugɔ, ti'ebimi ka tʋ'ʋsi ya Wina'am la.”
13 Zugsɔb onɛ maal zuoya la, onɛ mɛ maal sisi'em, o nie o pʋtɛn'ɛri pa'al ninsaal. On kanɛ kɛ ka nɛɛsim lieb lik, ka ken dunia zuoya zug la: o yʋ'ʋri buon Zugsɔb Wina'am Onɛ an Paŋtita'ar Sɔb la.
Amos 5
Ba kaasidi buon ye ba tiakim
1 Amos da lɛn yɛl, ye, Kɛlisimi labakaŋa, Israel dima, nɛ'ɛŋa ka m fabinnɛ ya yɛla:
2 “Israel kanɛ nwɛnɛ pu'asadir la luya, ka kʋ lɛn duoe ya'asɛ. Ba da'ae o bas o mɛŋ teŋin ka sɔ' kae na duo oo.”
3 Zugsɔb Onɛ an Paŋtita'ar Sɔb la yɛl si'eli nwa' ye, “Tempʋkanɛ yi nɛ soogianam tusir Israel teŋin keŋ zaba ni na mɔr nidib kɔbiga ma'aa lɛb na; ka tempʋkanɛ mɛ yi nɛ soogianam kɔbiga keŋ nidib piiga ma'aa na lɛb na.”
4† Zugsɔb la yɛl Israel dim si'em nwa' ye, “Ieemi mam ka lin ka ya na vʋe.
5 Da ieedi kennɛ Betel ye ya pʋ'ʋsi ba winaa, mɛ da kennɛ Gilgal bɛɛ Beerseba teŋinɛɛ. Bɔzugɔ, bi'esʋg kae ye ba na mɔr Gilgal dimi lɔ'ɔŋ teŋ zʋŋɔ, ka Betel mɛ na lieb zaalim.”
6 Ieemi Zugsɔb la, kemin o san'an na ka ya na vʋe, ka ya'a ka' ala o na piis Josef yaas sʋ'ʋlimin la wʋʋ bugum di nɛ, li na dii kanb ka sɔ' kʋ bɛ Betel teŋin na kpiisɛ.
7 Ya nɔk sida ka li lieb tɔɔg, ka nwɛ' pʋpielim bas teŋin.
8 (Wina'am maal nwadbibis, Nɔnya'aŋ-nɛ-o-biis nɛ A-kidigim-bu'os nam wʋsa. On kanɛ tiakid lik ka kɛt ka bɛog nied, ka kɛt ka nintaŋ liebid yʋ'ʋŋ; on kanɛ buon na atɛuk ku'om la'asid ka kɛt ka li liebid saa niid teŋgbauŋ zug la: o yʋ'ʋri buon Zugsɔb la.
9 O ian'asid wʋʋ saa nɛ san'am kpi'euŋ zin'ig la ka kɛ ka tempʋkanɛ ka ba mɛ' zaŋguoma gur la lieb dabɔɔg.)
10 Ya kis onɛ kad saria nɛ sida kɔɔtʋ ni ka nɛ'ɛsid onɛ pian'ad yɛlmɛŋir.
11 Ya nɔɔd nɔŋ dim la ka mugusidi ba di'esidi ba zʋʋd. Dinzugɔ, la'an nɛ yanamɛ mɛɛ ya ya-bɛda nɛ kuga la, ya kʋ gbɛɛn li nii; la'an nɛ yanamɛ sɛ tiis pɔɔdin la, ya kʋ nuu li daam.
12 M mi' ya pɔ'ɔgiri an si'em wʋsa nɛ ya tʋʋmbɛ'ɛdi zu'oe si'em. Ya mugusid pʋpielim dim ka di'esid ligidi ka mɔŋ nɔŋ dim la sida kɔɔtʋ ni.
13 Dinzugɔ, saŋkan la buudi, ya'am sɔb la anɛ baanlimm bɔzugɔ li anɛ bɛ'ɛd saŋa.
14 Ieemi linɛ an sʋm, da bɔɔd bɛ'ɛdɛ, ka ala ka ya na vʋe. Ka Zugsɔb Wina'am Onɛ an Paŋtita'ar Sɔb la na bɛ nɛ ya wʋʋ yanamɛ yɛl ye o sid bɛ nɛ ya si'em la.
15† Kisigimi bɛ'ɛd, ka nɔŋ linɛ an sʋm. Kɛl ka yɛlsida bɛ sariakadib zin'igin, ka daasi'erɛ Zugsɔb Wina'am Onɛ an Paŋtita'ar Sɔb la na zɔ Josef yaas banɛ kpɛlim la nimbaanlig.
16 Dinzugɔ Zugsɔb la, Zugsɔb Wina'am Onɛ an Paŋtita'ar Sɔb la yɛl si'eli nwa': “Nidib na bɛ suoraad la wʋsa ni kaasid ka na kaasid nɛ sʋnsa'aŋ nidibi bɛ zin'isi'a wʋsa. Ba na buol kpaadib ye ba kena kum ka buol banɛ kum kʋya ni la ye ba kena kaas.
17 Nidib na kaasid vain tiis pɔɔd la wʋsa ni bɔzugɔ m na gaadi ya sʋʋgin ka tɛɛgi ya tʋbir.” Zugsɔb la yɛl si'em la.
Zugsɔb Dabisir la
18 Tɔɔg bɛ yanam banɛ bɔɔd ye Zugsɔb la dabisir kɛn tɔ'ɔtɔ na la zug! Bɔ ka ya ieed Zugsɔb dabisir la? Daakan la na anɛ lik; nɛɛsim kʋ bɛɛ.
19 Li na nwɛnɛ sɔ' na nyɛ gbigim ka zɔɔ keŋ tʋ'ʋs wɛbaa, bɛɛ o kpɛn' nɛ o yinnɛ nɔk o nu'ugʋ tik dɔkpin ka waaf dum o.
20 Zugsɔb dabisir la pʋ ye li anɛ lik ma'aa, ka nɛɛsim kʋ bɛɛ? Li pʋ ye li anɛ lik biridi, ka nɛɛsim kae?
21† Zugsɔb la lɛn yɛl, ye, “M pʋ bɔɔdi ya di'ema malima la baa bi'elaa. M ba'a mɛ kae nɛ yanamɛ la'asidi ya malima zin'igin la.
22 La'an nɛ yanamɛ mɔr nyu'or maana nɛ zʋʋd maana na tisidim la, m kʋ siaki di'e li. La'an nɛ yanamɛ mɔr bʋnkɔnbid banɛ nɔbi kena maal maan la m pʋn kʋ gi'e gɔsi lii.
23 Isigimi nɛ tʋkpiidʋg linɛ ka ya maan ka ye yʋʋma la! M kʋ kɛlis yanamɛ nwɛ'ɛd kɔna si'em la.
24 Amaa kɛlli ka yɛlsida pʋbid wʋʋ kɔldaug ku'om nɛ, ka pʋpielim nwɛnɛ bulig kanɛ ka li ku'om pʋ kpiɛnda!
25 Israel dima, yʋma pisnaasi pʋʋgin linɛ ka ya da bɛ sian'arin la, ya da mɔr maana nɛ piini na tisi maa?
26 Ya da ziidi ya teŋgban kanɛ ka ya buon ye, ‘Na'ab’ la, nɛ ya bada banɛ ka ya ziidi ken nɔba, nɛ win kanɛ an nwadbil linɛ ka ya mɛŋ maal la.
27 Dinzugɔ, m na kɛ ka ba gban'e ya mɔri keŋ teŋ zʋŋ, ka ya lalig hali tʋʋg Damaskus tempʋʋgin.” Zugsɔb onɛ ka o yʋ'ʋr buon Wina'am Paŋtita'ar Sɔb la yɛl nwa'.
Amos 6
Israel san'auŋ yɛla
1 Amos da lɛn yɛl ye, Tɔɔg na paae yanam banɛ bɛ Zion tempʋʋgin ka tɛn'ɛs ye si'el wʋsa anɛ na'ana la, nɛ banɛ bɛ Samaria zuoya ni ka tɛn'ɛs ye si'el kʋ daami ba la. Yanam banɛ an tuongat-kpi'ema bɛ teŋ tita'arin nwa' la, li anɛ yanam san'an ka Israel dim kennɛ bɔɔd sʋŋir.
2 Kem gɔsi Kalnɛ teŋ la; ka naan ani keŋ gɔs Hamat teŋ la, ka yʋ'ʋn keŋ gɔs Gaf linɛ bɛ Filistia sʋ'ʋlimin la. Ba an sʋm gati ya tempʋʋs ayi' laa? Ba tɛɛns la yalimme gati ya tɛɛns laa?
3 Ya pʋ siak ye dabisbɛ'og na kenaa, amaa yanamɛ niŋid si'el la an linɛ kɛt ka dabisir la vurisid tɔ'ɔtɔ li'ennɛ ya na.
4 Ya dig gadbanɛ ka ba maal nɛ wabʋg nyina nɛ kugsʋma banɛ yalim la zug. Ya gaansid pɛ'ɛs nɛ na'abanɛ mɔr kpaam la kɔtidi ɔnbidi ya ya'amin.
5 Ya yʋ'ʋm yʋʋm paala nwɛ'ɛd bʋnnwɛ'ɛda wʋʋ David n da niŋid si'em la.
6 Ya nuud daam nɛ nwama pɛ'ɛli-pɛ'ɛli ka sɔɔndi ya niŋgbina nɛ kpanyubisa, amaa ya ba'a kae nɛ Josef yaas san'auŋ la yɛlaa.
7 Dinzugɔ yanam ka ba na mɔri lɔ'ɔŋ teŋ zʋŋ la yiiga; yanamɛ dit ka nuudi gbia'ad si'em la, li bɛn paae ya.
Zugsɔb la kis Israel dim nyɛɛsim la yɛla
8 Zugsɔb Wina'am la pɔ nɛ o mɛŋ yʋ'ʋr. Zugsɔb Wina'am Paŋtita'ar Sɔb la yɛl ya ye, “M kisʋg anɛ Jakob yaas la tʋm si'el la.
M nɛ'ɛsi ba kpi'euŋ zin'is la; m na nɔki ba tempʋʋg la nɛ linɛ bɛɛ li pʋʋgin la wʋsa tisi ba dataas.”
9 Dap piiga ya'a pʋn kpɛlim yir yinne ni, ba wʋsa na kpi.
10 Ka ba sizua ya'a kena ye o vaae banɛ kpi la mum ka bu'os ye, “Sɔ' kpɛlim yir la pʋʋginɛɛ?” Ba na yɛl ye, “Ayei, sɔ' lɛn kae!” Ka ba sizua la na lɛn yɛl ye, “Hei, sinni! Gu'usimi ka da kɛ ka ti pʋdig Zugsɔb la yʋ'ʋrɛ.”
11 Bɔzugɔ Zugsɔb la zi'el nɔɔr ye, o na nwa'ae yitita'ar la ka li lieb tandia'ana ka nwa' yibil la sɔɔm-sɔɔm.
12 Widi na zɔti yigin taaba tampiinsinɛɛ? Sɔ' na nwɛ' niigi vugusi atɛukʋnɛɛ? Amaa ya tiak sida ka li lieb yabid ka gɔs ka bʋʋd sɔb an onɛ ka' bʋʋdɛ.
13 Ya maan sumalisim ye ya nyaŋ Lodebaa teŋ, ka yɛt ye, “Ti nyaŋ Karinam teŋ nɛ ti mɛŋ paŋ”
14 “M na kɛ ka teŋ si'a dim sʋnf duoe ka ba zabnɛ ya! Ba na mugusi ya hali lin yi Hamat teŋ za'anɔɔrin la ti paae Araba bɔn'ɔgin la.” Zugsɔb Wina'am Onɛ an Paŋtita'ar Sɔb la pian'ʋkʋ la.
Amos 7
Na'azɔmnam nɛ bugum nɛ makir nwiig la yɛla
1 Amos da yɛl ye, “Zugsɔb Onɛ an Paŋtita'ar Sɔb la nie si'eli pa'alimi nwa': o daa ti'ebidnɛ na'azɔmnam, saŋa kan ka Na'ab la ki'e o widi yamme naae ka li lɛm pin'ili busid na la.
2 Ka na'azɔmnam la ɔnb si'el wʋsa naae la, ka m kaasi yɛl Zugsɔb la ye, ‘Zugsɔb Onɛ an Paŋtita'ar Sɔba, kɛlli ti taali bas; Jakob yaas la na niŋ wala vʋ'ʋgɛ? Ba pɔɔdnɛ galis!’
3 Ala ka Zugsɔb la tiak o pʋtɛn'ɛr ka yɛl ye, ‘Tɔ', nɛ'ɛŋa kʋ niŋɛ.’
4 “Zugsɔb Onɛ an Paŋtita'ar Sɔb la nie si'eli pa'alimi nwa': Zugsɔb Onɛ an Paŋtita'ar Sɔb la ti'ebid ye o kad saria nɛ bugum; ka li na dii atɛuk nɛ li teŋir la wʋsa la'an nɛ teŋgbauŋ la.
5 Ka m kaasi yɛl Zugsɔb la ye, ‘Zugsɔb Onɛ an Paŋtita'ar Sɔba, m bɛlimnɛ, guomi li! Jakob yaas la na niŋ wala vʋ'ʋgɛ? Ba pɔɔdnɛ galis!’
6 Ala ka Zugsɔb la tiak o pʋtɛn'ɛr ka yɛl ye, ‘Nɛ'ɛŋa kʋ niŋɛ.’
7 “On lɛm pa'alim si'eli nwa': makir nwiig daa bɛ Zugsɔb la nu'ugin ka o zi'e kpi'e zaŋguom kanɛ ka ba nɔk makir nwiigi maki li mɛ' la.
8 Ka Zugsɔb la bu'osim ye, ‘Amos, fʋ nyɛ bɔ?’ Ka m lɛbis ye, ‘Makir nwiig.’ Ka Zugsɔb la yɛlim ye, ‘Gɔsima, m ye m maknɛ Israel dim banɛ aan m nidib la; m kʋ lɛm basi ba ya'asɛ.
9 “‘Ba na san'am Isaak yaasi pʋ'ʋsid zin'isieba la Ka Israel dimi maannɛ ba maana zin'isi'a la na lieb dabɔɔd; m na zaŋ zaba sʋ'ʋgʋ zab nɛ Jeroboam yidim la.’”
Amos nɛ Amazaya
10 Amazaya onɛ an Betel teŋ maanmaan kpɛɛm la da tʋm yɛl Israel na'ab Jeroboam ye, “Amos gban'adi fʋ yɛla bɛ'ɛd Israel dim sʋʋgin. O pian'ad la na san'am teŋ la wʋsa.
11 Amos n yɛl si'em nwa': “‘Na'ab Jeroboam na kpi zaba ni, ka ba mɔr Israel dimi lɔ'ɔŋ teŋ zʋŋ, ba na lal nɛ ba mɛŋ teŋ.’”
12 Amazaya da yɛl Amos ye, “Nɔdi'esaa, isigim lɛb Juda teŋin sa! Di'emi fʋ yɔɔd ani ka tʋmmi fʋ nɔdi'esʋg tʋʋma.
13 Da lɛn tʋm nɔdi'esʋg tʋʋma Betel teŋin ya'asɛ, bɔzugɔ li anɛ Na'ab la pʋ'ʋsim zin'ig ka mɛ an sʋ'ʋlim la wʋsa pʋ'ʋsim dɔɔg zin'ig.”
14 Amos da lɛbis o ye, “M da ka' nɔdi'es bɛɛ onɛ an nɔdi'es biiga. M pʋ tʋm ye m di'e yɔɔdɛ, amaa m da anɛ kɔnbkem ka mɛ sɛɛd kekama tiis.
15 Amaa Zugsɔb la daa yisi m kɔnbkem tʋʋma la pʋʋgin ka yɛlim ye, ‘Kem pian' nɔdi'esʋg pian'adi tisim nidib Israel dim la.’
16 Amaa, nannanna kɛlisim Zugsɔb la pian'ad. Fʋ yɛl ye, “Da pian'ad nɔdi'esʋg pian'adi pɔ'ɔgid Israel dima, basim fʋn pian'adi zɛrigid Israel dim si'em la.
17 “Dinzugɔ Zugsɔb la yɛl si'eli nwa': “Fʋ pu'a na lieb pu'agɔɔndiri giligid tempʋʋgin, ka ba na kʋʋ fʋ biribis nɛ fʋ bipumis zaba ni. Ba na maki fʋ paalʋ la pʋdigi tis nidib, ka mɔri fʋ mɛŋi lɔ'ɔŋ teŋ zʋŋ ka fʋ kpii anina. Bi'esʋg kae, ba na mɔr Israel dimi lɔ'ɔŋ teŋ zʋŋ, ka ba na lal nɛ ba mɛŋ teŋ.”
Amos 8
Pɛog nɛ tiis wala
1 Amos da lɛn yɛl ye, Nɛ'ɛŋa an linɛ ka Zugsɔb onɛ an Paŋtita'ar Sɔb la pa'alim, ka li an pɛog nɛ tiis wala,
2 ka o bu'osim ye, “Amos, fʋ nyɛ bɔ?” Ka m lɛbis ye,† “Pɛog nɛ walbi'ima.” Ani ka Zugsɔb la lɛn yɛlim ye, “Israel dim bɛog nieya; m kʋ lɛm basi ba ya'asɛ.”
3 Zugsɔb Paŋtita'ar Sɔb la yɛl ye, “Daakan la ya'a paae, yʋʋma linɛ ka ba yʋ'ʋm na'ayin la na lieb kaasig. Nidib na kpii widigi gilig zin'ig wʋsa digi dig! Li na fɔn baanlimm ka dammir kae!”
4 Kɛlisimi nɛ', yanam banɛ nɔɔd fara dimi namisidi ba ka kʋʋd nɔŋ dim la,
5 ya yɛt ye, “Nwadig na kpi bʋndaar ka ti kuosi ti zʋʋdɛ?” Bɛɛ “Vʋ'ʋsʋm Daar paae li bɛn ka ti kuosi ti diibɔ?” Ya sied kuriba la makir, ka dʋ'ʋsid diib la ligidi, ka mɔri ya kuribabibis la filim banɛ da'ad la.
6 Hali ya la'am kuosidnɛ kifaad, ka da' nɔŋ dim la nɛ anzurifa ligidi,
ka da' nɔŋ dim banɛ an fara dim ka kʋ nyaŋi da' ta'ada la ka ba liebi ti yammis.
7 Zugsɔb la pɔ Jakob yaas karigimbaanɛ nɛ ba nyɛɛsim la yɛla ye, “M kʋ tam linɛ ka ba niŋid la baa bi'elaa.
8 “Teŋ la mɛŋ kʋ dam nɛ'ɛŋa yɛlaa? Li na dam ka banɛ bɛ ani la wʋsa kaasid hali. Teŋ la mɛŋ na duosid wʋʋ Nail kɔldaug ku'om nɛ; li na gudigi dʋʋ agɔla ka lɛn lɛb teŋin wʋʋ Egipt kɔldaug nɛ.”
9 Zugsɔb Paŋtita'ar Sɔb la pɔya ye, “Daakan la ya'a paae, m na kɛ ka winnig kpɛn' nintaŋ tisʋʋs ka kɛ ka nintaŋ lieb lik dunia nwa' wʋsa.
10 M na kɛ ka ya winpʋ'ʋsʋm di'ema la lieb kaasig ka ya yʋʋma la lieb kukuma. M na kɛ ka ya pʋni ya zut ka yɛ bɔto fuud sʋnsa'aŋ zug. Li saŋa la, ya sʋnsa'aŋ na nwɛnɛ nid biyimmiri na kpi ka o kaasid ka li naar wʋsa, li na anɛ dabistɔɔgʋ tisi ya.
11 Zugsɔb onɛ an Paŋtita'ar Sɔb la pɔya ye, ‘Daakan ya'a paae, m na kɛ ka kɔ'ɔm tita'ar li teŋin la. Li kʋ an diib kɔ'ɔm bɛɛ ku'onuudɛ, amaa li na anɛ Zugsɔb la labaar kɔ'ɔm.
12 Nidib na ieed Zugsɔb la labaar; ba na naan atɛuk yinne nɔɔrin keŋ atɛuk yinne nɔɔrin, ba na yi ya-datiuŋʋ keŋ paae ya-nya'aŋ, amaa ba kʋ nyɛɛ li.’”
13 Daakan la, na'akim kpi'ema nɛ pu'asadvɛnla na vib ku'onuud.
14 Banɛ pɔɔd Samaria dim win linɛ an kisʋg la, bɛɛ pɔɔd ye, “Ti pɔya nɛ Dan ba'ar la,” bɛɛ pɔɔd nɛ Beerseba teŋgban la, ba na lu ka kʋ lɛn duoe.
Amos 9
Israel na san'am
1 Ka m daa nyɛ Zugsɔb la ka o zi'e bimbim la baba, ka yɛl ye, “Nwɛ'ɛm bʋmbuos la zug nɛ paŋ, ka li kɛ ka za'anɔɔr la ɛɛnbir dam. Kɛl ka li lu nidib la wʋsa zug; ka banɛ kpɛlim la, m na kɛ ka ba kpi zaba ni. Ba wʋsa na kpi. Ba sɔ'ɔsɔ kʋ yii.
2 La'an nɛ ban na tuu kpɛn' teŋ teŋir la, m nu'ug na paae ba ani yisi ba na. La'an nɛ ban na dʋʋ bɛ saŋgbana ni la, m na sigisi ba na.
3 Ba ya'a dʋ Kaamel zuor zugʋ su'a, m na kadi ba sigis teŋin na gban'e ba. Ba ya'a su'a atɛuk teŋir, m na kɛ ka wa'atita'ar kanɛ bɛɛ ani la dumi ba.
4 La'an nɛ dataasi na gban'e ba keŋ teŋ zʋŋ la, hali anina ka m na kɛ ka ba kʋʋ ba zaba ni M na laki m nini kpa' gɔsidi ba ka li na anɛ gɔs bɛ'ɛd ka ka' gɔs sʋŋɔ.
5 Zugsɔb onɛ an Paŋtita'ar Sɔb la ya'a nɔ teŋ la zin'isi'a li mɛdigidnɛ, ka banɛ bɛɛ ani la wʋsa kaasid kʋʋr, Teŋ la mɛŋ na duosid wʋʋ Nail kɔldaug ku'om; ka lɛn lɛbid teŋin wʋʋ Egipt kɔldaug nɛ.
6 O mɛɛ o na'am yir saŋgbana ni ka o yir la ɛɛnbir bɛ teŋgbauŋ zug, on kanɛ buon atɛuk ku'om la la'asid ka nɔkidi li dɔn'ɔsid teŋgbauŋ la, o yʋ'ʋri buon Zugsɔb.
7 Zugsɔb onɛ an paŋ tita'ar Sɔb la yɛl ye, ‘Yanam Israel dim nɛ Kus dim la, ya ka'anɛ yinne man san'anɛɛ? Ka' manɛ mɔr Israel dim la yi Egipt naa? Ka' manɛ yis Filistia dim Kafitor teŋin na, ka mɛ yis Aram dim la Kir teŋinɛɛ?
8 Sida, mam Zugsɔb Onɛ an Paŋtita'ar Sɔb la nini laknɛ gɔsid sʋ'ʋlim kanɛ an tʋʋmbɛ'ɛd dim teŋ la. M na san'ami ba wʋsa teŋgbauŋ nwa' zug. La'an nɛ wala m kʋ san'am Jakob yidim la nyainnɛ’” Zugsɔb la pian'ʋkʋ la.
9 M na tis nɔɔr, ka na yɛlig Israel dim tɛɛns la wʋsa sʋʋgin wʋʋ ki ka ba yɛligid si'em la, ka kugir baa yinne kʋ lu teŋa.
10 Banɛ an tʋʋmbɛ'ɛd dimi bɛɛ m nidib sʋʋgin la wʋsa na kpi zaba ni, nɛ banɛ wʋsa yɛt ye, “Tɔɔg kʋ paae ti la.”
Israel na lɛn nyɛ zi'esim ya'as
11 “Li saŋa ya'a ti paae m na duoe David Fuug Sʋgʋr linɛ li teŋin la. M na lɛbisi maal zin'ibanɛ san'am la, ka mɛɛ li zi'el, ka li an wʋʋ lin da an si'em la.
12 Ala ka ba na sʋ'oe Edom nimbanɛ kpɛlim la, nɛ tɛɛns banɛ wʋsa ka ba da pʋd o ba nɛ m yʋ'ʋr la.” Zugsɔb onɛ yɛl nɛ'ɛŋa ka na tʋmmi li la pian'ʋkʋ la.
13 “Zugsɔb onɛ an Paŋtita'ar Sɔb la yɛl ye ‘Daakan la ya'a ti paae, onɛ nwɛ'ɛd vugus la na gaad onɛ bʋn la ka onɛ bʋ'ʋd ki la mɛ na gaad onɛ bʋn la. Damalisiŋ na naan zuoya la ni tu'asidi sigid kʋkʋna la wʋsa zug.
14 M na mɔr zɔɔma la lɛbis na; ba na lɛbisi mɛ' tempʋbanɛ an dabɔɔd la zin'in. Ba na sɛ vain tiis pɔɔdin ka pɔn' tiis la wala ka nuu li daam; ba na maal lɔmbɔn'ɔd ka dii li nyɔɔd.
15 M na zin'il Israel dimi ba mɛŋ teŋin ka sɔ' kʋ lɛn duoe ba teŋ kanɛ ka m tisi ba la nii.’ Ya Zugsɔb Wina'am la pian' li.”