Wp/kus/Azaya 24

AZAYA 24

Zugsɔb na san'am teŋgbauŋ la 
1 Gɔsima, Zugsɔb la na san'am teŋgbauŋ la 
ka kɛ ka li dig zaalim. 
O na aansi li wʋsa 
ka nimbanɛ bɛ li pɔɔgin widig. 
2 Maanmaan nɛ nidib la wʋsa na anɛ yinne, 
zugdaan nɛ o sankpan'as na anɛ yinne, 
yipu'a nɛ pu'a-ɛliŋ na anɛ yinne, 
onɛ kuosid nɛ onɛ da'ad na an yinne, 
onɛ pɛmisid nidib nɛ onɛ bɔɔd pɛ'ɛm na an yinne, 
bʋndaan nɛ samdit na an yinne. 
3 Teŋgbauŋ la na san'am nyain 
ka li wʋsa lieb dabɔɔg, 
wʋʋ tanpi na kena nwɛ' gaad. 
Zugsɔb la pian' labakaŋa ka li sid na maal. 
4 Teŋgbauŋ la na kʋdigi sʋʋg, 
ka dunia la na zɛndigi sʋʋg, 
ka banɛ dʋ'ʋsi ba mɛŋ dunia zug la na tadig. 
5 Dunia nidib zan'as wada la nɛ, 
ba zan'as zi'ela la ka san'ami li, 
ka kɛ ka teŋ la an dian'ad. 
Ba san'am nɔnaar kanɛ maal ye li bɛ saŋa wʋsa la. 
6 Dinzug, Wina'am nɔpɔɔr na kanb teŋgbauŋ la, 
taal na bɛɛ li nidib la zugin. 

Dinzug, nimbanɛ bɛ teŋgbauŋ la pɔɔgin

kanb ya ka kpɛlim bi'ela. 
7 Tiwanna la na kʋdig ka daam pɔ'ɔg, 
ka banɛ maan sumalisim la wʋsa na nyɔn. 
8 Siyanwɛ'ɛdib la anɛ baanlimm, 
ka banɛ wa'adi maan tʋkpiidʋg la gu'oe; 
googi kanɛ maan sumalisim la fɔnnɛ ki'. 
9 Ba pʋ lɛn nuud daam ka yʋ'ʋma, 
daam lieb nɛ tɔɔgʋ tis banɛ nuud la. 
10 Tempʋkanɛ san'am la kpɛlim nɛ dabɔɔd ka nidib kae, 
ka ba nɔk daadi kpa' puug yir wʋsa za'anɔɔr. 
11 Suoraad la ni ba kaasidnɛ daam yɛla, 
di'ema la lieb nɛ sʋnsa'aŋ, 
sumalisim bɔdig teŋgbauŋ la zugin. 
12 Tempʋʋg la san'amnɛ ka dig zaalim, 
ba nwɛ' li za'anɔya la nwa'asi nwa'as. 
13 Ala ka li na kpɛm bɛ teŋgbauŋ la zug, 
nɛ buudi wʋsa ni. 
Li na nwɛnɛ bunib saŋa ka ba fanr olif tiig wala 
bɛɛ ban na pɔn' tiis wala naae ka lɛn wi'isid nɛ. 

1 Nidib kʋ lɛm bɛɛ, ba bi'ela na kpɛlim.

14 Ba dʋ'ʋsidi ba kʋkɔya tansid nɛ sumalisim, 
ka banɛ bɛ ya-tuona la pian'ad Zugsɔb la paŋi an si'em. 
15 Dinzugɔ, yanam banɛ bɛ ya-nya'aŋ la zun'omi Zugsɔb la, 
dʋ'ʋsimi Zugsɔb onɛ an Israel Wina'am la yʋ'ʋr, 
yanam banɛ bɛ tɛɛns banɛ ka atɛuk gilig la ni la. 
16 Dunia kpikpɛmis wʋsa na ti wʋm ka ba yʋ'ʋm ye, 
“Na'asi anɛ Pʋpielim Sɔb la din.” 
Amaa mam mɛ yɛl ye, “Yɛla paam, yɛla paam! 

Tɔɔg paam!

Ziri sɔb la gbi'idim teŋgbi'idim 
ka teŋgbi'idim sɔb la gbi'id!” 
17 Bɛndig nɛ bʋmbɔk nɛ baŋ 
digi gur yanam banɛ bɛ dunia ni la! 
18 Onɛ wʋsa nyɛ bɛndig la ka zɔ, 
o sɔb na keŋ li bʋmbɔkin la; 
onɛ wʋsa mɛ yi bʋmbɔkin la na, 
baŋ na gban'e o. 
Ku'osuoya linɛ bɛ agɔl la yɔ'ɔs ya, 
ka dunia ɛɛnbir dam. 
19 Teŋ la nwa'ae nɛ, 
teŋ la buak nɛ pʋdig, 
teŋ la wʋsa dammidnɛ. 
20 Teŋgbauŋ gɛridnɛ nwɛnɛ danuud, 
ka gbɛlisid wʋʋ laŋir ka sisi'em da'ad nɛ. 
On pʋ siakid la zug ka taal bɛɛ o zugin, 
ka li kɛ ka o na li ka kʋ lɛn duoe. 
21 Daakan la Zugsɔb la na namis 
paŋ dim banɛ bɛ agɔla saŋgbana ni, 
nɛ na'anam banɛ bɛ dunia zug la. 
22 Ba na la'asi ba wʋʋ banɛ bɛ bʋlʋʋgin, 
ka ba kpɛn'ɛsi ba bʋmbɔkin nɛ, 
ba na yɔɔ ba sanrega ni 
ka tɛɛgi ba tʋba ka li yuug hali. 
23 Nwadig la na su'ad o mɛŋ 
ka winnig la na zɔt nyan ka kʋ nie. 
Zugsɔb onɛ an Paŋtita'ar Sɔb la na di na'am 
zin' Zion zuorin nɛ Jerusalem pɔɔgin, 
ka kpɛɛmnam la na nyɛ 
ka baŋ o na'am paŋi an si'em.