Wp/kus/AZAYA 37

AZAYA 37

Jerusalem dim wʋmi ba faangir yɛla 
( 2Na 19:1-7) 
1 Na'ab Hezekia da wʋm la, o da aans o fuud ka yɛ bɔtkɛɛnd ka kpɛn' Zugsɔb Pʋ'ʋsim Yin. 2 O da tʋm Eliakim onɛ an na'ayikpɛɛm la nɛ Siebna onɛ an gbansɔbid la nɛ maanmaannib kpɛɛmnam la ka ba wʋsa yɛ bɔto fuudi keŋ nɔdi'es Azaya onɛ an Amoz biig la san'an. 3 Ba da yɛl o ye, “Na'ab Hezekia yɛl si'eli nwa': zina anɛ tɔɔg nɛ zɛligir nɛ nyan dabisir, nwɛnɛ pu'a na sa'ae ka biig zug tʋm na ka paŋ lɛn kae unsid ka o yit na la. 4 Daasi'erɛ Zugsɔb onɛ aan fʋ Wina'am la wʋm Asiria na'ayikpɛɛm onɛ ka o zugdaan Asiria Na'ab tʋm ye o kena tʋ' ka la' Wina'am Kanɛ Vʋe la; ka na zɛrig o zaŋi keŋ pian'akanɛ ka Zugsɔb onɛ aan fʋ Wina'am wʋm la. Alazugɔ sɔsim tis banɛ kpɛlim bi'ela ka nan vʋe la!” 5 Na'ab Hezekia kpi'emnam la da paae Azaya san'an na la, 6 Azaya da yɛli ba ye, “Yɛlimi ya zugdaan la ye, Zugsɔb la yɛl si'eli nwa': ‘Da zɔti dabiem nɛ yanamɛ wʋm pian'abanɛ ka Asiria Na'ab na'ayikpɛɛm kena pian' nɛ'ɛs mam la. \v 7 Kɛlisimi! M na fɛndig o ya'am ka o ya'a wʋm labasi'a o na lɛb o mɛŋ teŋin, ani ka m na kɛ ka ba kie o nɛ sʋ'ʋgʋ kʋ.’” 
8 Asiria kpɛɛm la da wʋm ye Asiria Na'ab yi Lakis la, o da yii keŋ nyɛnɛ Na'ab la zabid nɛ Libna teŋ dim. 9 Saŋkan la Senakɛrib da wʋm labaar ye Tirhaka onɛ an Kus Na'ab la yit ye o zab nɛ o la, o da lɛn tɔlim labaari yɛl Hezekia ye, 10 “Yɛlim Hezekia onɛ an Juda Na'ab la ye, ‘Da kɛ ka teŋgban kanɛ ka fʋ dɛl la ma'af ye, “Ba kʋ nyaŋi di'e Jerusalem tis Asiria Na'ab laa.” 11 Fʋ mɛŋ wʋm Asiria Na'abi tʋm si'el tembama la ni san'ami ba nyain-nyain. Ka fʋn tɛn'ɛs ka fʋ na paam faangirɛɛ? 12 M yaanamɛ da san'am Gozan, nɛ Haran nɛ Rezef teŋgbana la nɛ Eden nimbanɛ da bɛ Telasa la, ba teŋgbana da nyaŋi faaɛn baa? 13 Hamat Na'ab la bɛɛ Apad Na'ab, bɛɛ na'ab onɛ an Sefaavam tempʋʋg Na'ab la, bɛɛ banɛ an Hena, bɛɛ Iva Na'anam la bɛ yaanɛ?’” 
Hezekia winsɔsʋg 
14 Hezekia da di'e gbauŋ la ban tʋm sieba o san'an na la nu'ugin karim. Ka duoe keŋ Zugsɔb Pʋ'ʋsim Yinnɛ fuoe gbauŋ la digil Zugsɔb la tuon, 15 ka pian' tis Zugsɔb la ye, 16 “M Zugsɔb onɛ an Israel Wina'am, fʋnɛ zin' Kerubnam teŋsʋk. Fʋn ma'aa an Wina'am sʋ'oe sʋ'ʋlim banɛ bɛ dunia wʋsa. Fʋnɛ maal agɔl nɛ teŋ. 17 Yɔ'ɔgimi fʋ tʋba, Zugsɔba, ka wʋm, lakimi fʋ nini, Zugsɔba, ka nyɛ; kɛlisim Senakɛrib n tɔlim pian'asi'a tis na ye o tʋ' fʋn Wina'am Onɛ Vʋe la. 18 Zugsɔba, li anɛ sida ye Asiria na'anam san'am teŋgbana nɛ li nidib la wʋsa. 19 Ba nɔki ba bada la wʋsa lɔb bugumini san'ami ba. Bɔzugɔ ba daa ka' winaa, amaa daad nɛ kuga linɛ ka nidib maali kpi'a nɛ ba nu'us la. 20 M Zugsɔb onɛ aan ti Wina'am, faanmi ti yii o nu'ugin ka sʋ'ʋlim linɛ bɛ dunia kaŋa wʋsa baŋ ye fʋn ma'aa an Wina'am, m Zugsɔba.” 
Senakɛrib ba'as bɛ'ɛd 
( 2Na 19:20-37) 
21 Azaya onɛ an Amoz biig la da tɔlim labaari tis Na'ab Hezekia ye, Zugsɔb onɛ an Israel Wina'am la yɛl ye, Mam wʋmi fʋ sɔsʋg Asiria Na'ab Senakɛrib yɛla. 22 Pian'akanɛ ka Zugsɔb la pian' zɛrig o nwa': 
“Zion Pu'asadir onɛ nan zi' dau nɛ'ɛsidif ka la'adif. 
Jerusalem pu'ayua lɔbid o zugʋ fʋ zɔɔg la yɛla. 
23 Anɔ'ɔn ka fʋ tʋ'ʋd ka nɛ'ɛsida? 
Anɔ'ɔn ka fʋ tansid nɛ kʋkɔtita'ar 
Ka ʋki fʋ nindaa nɛ nyɛɛsim la? 
Ka'anɛ Israel Dim Wina'am Onɛ An Kasi laa? 
24 Fʋ tʋmi fʋ kpɛɛmnam 
ka ba kenna tʋ' Zugsɔb la bɛ'ɛd bɛ'ɛdi. 

Ka yɛl ye, ‘Mam mɔr zaba tɛrekonam bɛdegʋ la zug

ka m nyaŋi dʋ zuor zug, 
zin'ikanɛ dʋʋ gaad zin'is wʋsa Lebanon teŋin. 
Mam nwa' na'aziinr tiwa'a la wʋsa digil teŋin 
nɛ tibanɛ ka li daad vɛnl la. 
Man dʋʋ paae li zugin sa, 
ka keŋ paae sian'anr la bɛn. 
25 Man tu bulis teŋ zʋna ni ka nuu li ku'om, 
ka mam mɛŋ nɔbpansimpana ka m nɔki 
kɛ ka Egipt ku'osuoya kpiɛn.’ 
26 Fʋ pʋ wʋm ye kʋdimin sa ka m gban'e lii? 
Ɛɛn, yʋʋm pʋkʋdʋg la sa ka mam da pʋn gban'e li yɛla! 
Nannanna ka m yʋ'ʋn kɛ ka li maal. 
Ka fʋ nɔk tɛɛns banɛ da mɔr kpi'euŋ la 
ka kɛ ka li lieb zin'ikanɛ ka kuga dig kuda-kuda. 
27 Ba nimbanɛ paŋi naae la lidig nɛ ka di nyan. 
Ba nwɛnɛ bʋmbʋta linɛ nam bun pɔɔgin, 
ka nwɛnɛ mɔbiili linɛ nan tansid, 
ka lɛn nwɛnɛ mɔɔdi naanɛ tansid mɔpil zug 
ka nintaŋ tʋʋlʋg nyaŋi ba ka ba pʋ nyaŋi nɔbigɛ. 

28 Amaa mam mi' fʋn bɛ zin'isi'a, 
nɛ fʋn ken ka lɛbid suosi'a; 
nɛ fʋn kis mam si'em la. 
29 Fʋn kisim si'em la, nɛ fʋ tʋ'ʋd la kpɛn' m tʋba ni, 
m na nɔk m gu'a la ga' fʋ Nyɔnya, 
ka li'a fʋ nɔɔr nɛ salibir, 
ka kɛ ka fʋ lɛb wʋʋ fʋn kɛn si'em na la. 
30 Na'ab Hezekia, nɛ' na an zanbinnɛ tisif: dʋnna ya ye ya dinɛ ki linɛ yi ka sɔ' pʋ bʋdɛ. Ka yʋʋm kanɛ pɛ'ɛs ayi' la ya na di linɛ yii li mɛŋ. Amaa yʋʋm kanɛ paasida atan' la, bʋdim ka bun. Bʋdim tiis pɔɔd ka dii li wala. 31 Linɛ lɛm paas, nidib na kpɛlim Juda dɔɔgin la ba'a nya'a teŋin yina wal wala agɔl. 32 Jerusalem pʋʋgin nidib bi'ela na kpɛlim ka Zion zuor zug banɛ kpɛlim ka pʋ kpi la na la'as ani ka yina. Zugsɔb la nyɛlʋgʋ na kɛ ka nɛ' maal. 
33 “Ala zugɔɔ Zugsɔb la yɛt si'eli nwa' zaŋi ken Asiria Na'ab la yɛla ye: 
“O kʋ kpɛn' teŋ kaŋa pʋʋga, 
bɛɛ tɔn piim kpɛla. 
O kʋ nyaŋi kpɛn' ani ka zanl gbanti'edʋg 
bɛɛ nyaŋi mɛ' gu'ub zaŋguommi giŋi li. 
34 On dɔl suosi'a kena la o na dɔl ani lɛb, 
o kʋ kpɛn' teŋ kaŋa pʋʋginɛ.” Zugsɔb la yɛl ala. 
35 Ka yɛl ye, “Mam na sʋŋ teŋ kaŋa ka faaɛn li bas 
mam mɛŋ yɛla, nɛ David onɛ an man tʋmtʋm la yɛla.” 
36 Yʋ'ʋŋ kan la Zugsɔb maliak da keŋi kʋ dap tusa kɔbiga nɛ pisnii nɛ anu Asiria dim la'asʋgʋn la. Bɛog da nie ya, ka nidib la duoe nyɛ nidibi kpii digi dig. 37 Dinzug Na'ab Senakɛrib da basi ba gu'ub zin'ig la ka duoe tɔɔm ka lɛb Ninive tempʋʋgin zin'inɛ ani. 
38 Daar yinne ka o bɛ teŋ kanɛ buon Nisirok la dɔɔgin maan malʋŋ ka o biis Adiramelek nɛ Siareza ki'e o nɛ sʋ'ʋgʋ kʋ ka zɔɔ keŋ Ararat teŋin. Ka Esaraddon onɛ aan o biig la di na'am.