Wp/kus/AZAYA 36

AZAYA 36

Asiria Na'ab Senakɛrib mɔɔd ye o zab nɛ Jerusalem 

\r ( 2Na 18:13-27; 2Yɛ 32:1-19)

1 Hezekia na'am la da paae yʋʋm pii nɛ anaasi la, Asiria Na'ab Senakɛrib da zab nɛ Juda teŋ kpi'ema la nyaŋi gban'e ba. 2 Asiria Na'ab da tʋm o kpɛɛm onɛ sʋ'oe zaba yɛla la ka o mɔr soogianam bɛdegʋ keŋ zaba la ni. Ba da naan Lakis teŋin keŋ Jerusalem, Na'ab Hezekia san'an. Ba da paae Jerusalem keŋ zi'en ku'osuokanɛ ka ba nwɛdig ka li kpɛn'ɛd bɛuŋ kanɛ bɛ zuginɛ kpi'e zin' kanɛ ka ba maan fuudi dɛligid la. 
3 Ka Hilkia biig Eliakim onɛ an na'ayikpɛɛm nɛ Siebna gbansɔbid la, nɛ Joa onɛ saamme an Asaf onɛ sɔbid yɛla digin la da yii tʋ'ʋsi ba. 4 Asiria na'ayikpɛm la da yɛli ba ye, “Yɛlimi Hezekia ye Asiria Na'atita'ar la yɛl si'eli nwa': Fʋ ti'e bɔ ka mɔr sʋnkpi'euŋ kaŋa?  5 Fʋ ye fʋ mɔr suoya nɛ soogianam paŋ, amaa fʋ pian'adnɛ pian'azaal. Anɔ'ɔn ka fʋ ti'e ka ki'isid man nɔɔrɛ? 6 † Gɔsima, nannanna fʋ ti'enɛ Egipt kanɛ nwɛnɛ balaari ɛɛn buak bɛɛ tuoɛn ka sɔ' ya'a zanl ka dɛllimi li ka li kʋns o nu'ugʋ pu'alim si'em la. Ala ka Egipt Na'ab Faaro aan tis onɛ wʋsa dɛllim o.” 7 Ka fʋ ya'a yɛl mam ye, “Tinam ti'enɛ ti Zugsɔb Wina'am la, ka' o maan zin'is nɛ bimbima ka Hezekia san'am, ka yɛt Juda nɛ Jerusalem dim ye, asɛɛ ka ya pʋ'ʋs bimbim kaŋa tuon, Jerusalem teŋin laa?” 8 Kem na! Kɛl ka fʋn nɛ m zugdaan Asiria Na'ab la di da'. M na tisif widi tusa ayi', fʋ ya'a na nyɛ banɛ na ban' ba!  9 La'an nɛ fʋn ti'e Egipt zaba widi tɛrekonam nɛ wiedban'adib la, fʋ ye fʋ niŋ wala nyaŋ man kpɛɛmnam la yinne; hali baa onɛ an biigi ba san'an la? 10 Linɛ lɛm paas, mam na kena zab nɛ ya ka pʋ di'e nɔɔri yi Zugsɔb la san'anɛɛ? Zugsɔb la mɛŋi yɛlim ye m kem na zab nɛ teŋ kaŋa san'ami li. 
11 Ka Hilkia biig Eliakim nɛ Siebna nɛ Joa da lɛbis o ye, “Naa, pian'am tisi ti nɛ Aram buudi pian'ad ka ti wʋm, ka da pian'adi ti nɛ Hibiru dim pian'adɛ, ka nimbanɛ bɛ zaŋguom la zug la na wʋm.” 12  Amaa kpɛɛm la da lɛbis ye, “Ya tɛn'ɛs ye li anɛ yanam nɛ ya zugdaan la yɛla ma'aa ka m zugdaan tʋmim ka m kena yɛl pian'ad la ka ka' dap banɛ zin' zaŋguom zug laa? Ban nɛ yanam wʋsa na dii ya mɛŋ bin ka nuu ya mɛŋ dʋ'ʋnim!” 13 Ka duoe zi'en ka tansi buol nɛ Hibiru pian'ad ye, “Kɛlisimi labaar kanɛ yi Na'atita'ar onɛ aan Asiria Na'ab la san'an na! 14 Na'ab la yɛl si'eli nwa': ‘Da siaki ka Hezekia ma' yaa. O kʋ nyaŋi di'e ya yis man nu'uginɛ. 15 Da siaki ka Hezekia bɛlisi ya ye ya niŋim Zugsɔb la yaddaa! On yɛti ya ye, “Zugsɔb la sid na nyaŋi faaɛn ti ka Asiria Na'ab kʋ nyaŋi zabi faaɛn tempʋkaŋa la.” 16 Da kɛlisidi Hezekia pian'adɛ!’ Asiria Na'ab la yɛl si'eli nwa': ‘Mɔri sumbʋgʋsʋm nɛ mam ka yisi ya mɛŋi kɛn mam san'an na. Din ka sɔ' wʋsa na dii o mɛŋ tiis wala ka nuu o mɛŋ buligin ku'om. 17 Hali nɛ mam na ti kena nɔki ya keŋ teŋ kanɛ nwɛnɛ ya din la, teŋ kanɛ ka ki bɛ, ka bodobodo bɛ, nɛ tiwanna pɔɔd. 18 Mid ka ya kɛlisid Hezekia yɛti ya ye, “Zugsɔb la na faaɛn ti la.” Teŋgban si'a nam mi' faaɛn o teŋ man Asiria Na'ab nu'uginɛɛ? 19 Hamat nɛ Apad tɛɛns la bɛ yaanɛ? Sefaavam teŋ la bɛ yaanɛ? Ba da nyaŋi faaɛn Samaria yisi m nu'uginɛ? 20 Tembama teŋgbana la wʋsa sʋʋgin, teŋgban kanɛ nyaŋi faaɛn o teŋi yi man nu'uginɛ? Zugsɔb la ye o niŋ wala faaɛn Jerusalem yi man nu'uginɛ?’”  21 Amaa nidib la wʋsa daa sin ka pʋ lɛbis si'ela, bɔzugɔ Na'ab la daa sa'ali ba ye, “Da gandigi si'ela.” 
22 Ka Hilkia biig Eliakim onɛ an na'ayikpɛɛm, nɛ Siebna onɛ an gbauŋ sɔbid nɛ Joa onɛ saamme an Asaf onɛ sɔbid yɛla digin la, yɛ fu-aanlima keŋ Hezekia san'an ka yɛl o Asiria na'ayikpɛm la yɛl si'em.