Wp/kus/AZAYA 30
AZAYA 30
Tɔɔg na paae m nidib banɛ naal nɔɔr nɛ Egipt la 1 Zugsɔb la yɛl ye, “Tɔɔg na paae m nimbanɛ pʋ tiakid la, banɛ gban'adi ba mɛŋ gban'ar ka li ka' man din la, ka maan nɔɔr yinne nɛ ninsieba amaa ka li pʋ dɔlnɛ m siig bɔɔdim la. Ala ka ba tʋmid bɛ'ɛdi paasid tʋʋmbɛ'ɛd zug la. 2 Ba ken Egipt ka pʋ bɔɔdi m nɔɔr yɛlʋgɔ, ba zɔti ken Na'ab Faaro san'an ye o guri ba, ka yɛt ye ba na kpɛn' Egipt dim ma'asimin. 3 Amaa Faaro san'an suak la na anɛ nyannɛ tisi ba, Egipt dim ma'asim la na diisi ba nyan. 4 La'an nɛ ba tuongatibi bɛ Zoan teŋin ka banɛ zi'e ba teŋ yɛla paae Hanes teŋin la, 5 ba wʋsa na di nyan, bɔzugɔ ba anɛ nimbanɛ ka' vɔɔnrɛ ka mɛ pʋ mɔr sʋŋ si'a ken naa, amaa nyan nɛ pɔ'ɔgir ma'aa ka ba na zi na.” 6 Labakaŋa anɛ Negef bʋnkɔnbid la yɛla. “Ba mɔri bʋmis nɛ yʋgʋma ziidi ba kpan'am dɔl suokanɛ dɔllim tɔi; ka gbigima buudi wʋsa zu'oe ani ka wa'abɛ'ɛdnam banɛ ian'ad agɔla galis ani. 7 Ba keŋ paad Egipt n bɔɔd sʋŋir zin'ikanɛ ka sʋŋir kae. Dinzug ka m buon Egipt ye, ‘Rahab, Bʋnkɔnbbɛ'og onɛ ka' tʋmmirɛ.’” 8 Kem sɔb bʋn bama dalammirin tisi ba,
2 sɔm niŋ gbauŋʋn
ka ba na nɔki li zi'eli tis bɛog sa dim la ka li na an kasɛt saŋa wʋsa tisi ba. 9 Bama anɛ banɛ tʋba pʋ wʋmma, bibanɛ an ziri dim, bibanɛ pʋ siakid ye ba kɛlis Zugsɔb la nɔɔr yɛlʋgɔ. 10 Ba yɛt banɛ nyɛt bɛog sa yɛla la ye, “Da lɛn nyɛti nier linɛ an bɛog yɛllɛ!” Ka yɛt nɔdi'esidib ye, “Da lɛn yɛli ti linɛ dɔl suorɛ! Yɛlimi ti linɛ na malisi ti, yɛlimi ti ya mɛŋ pʋtɛn'ɛr. 11 Basimi suokaŋa, tɔɔmi suokan ni, da lɛn tu'asidi ti Israel Dim Wina'am Onɛ An Kasi la yɛlaa.” 12 Dinzugɔ, Israel Dim Wina'am Onɛ An Kasi la yɛl ye, “Yanamɛ sadigim zan'as labakaŋa ka dɔl linɛ an mugusʋg nɛ ziri la, 13 li bɛ'ɛd nwɛnɛ zaŋguom kanɛ wa'am ka mugilim tansi paae teŋin,
\q2 ka li na kpɛn lu vuguri. \q1 \v 14 Li na nwa'ae nwɛnɛ dʋk bɛɛ yʋʋr nɛ;
li na nwa'ae yaam-yaam, ka ba kʋ nyaŋi nyɛ li yaama baa yinne ka li siak ban na nɔki li mu'oe bugum, bɛɛ ba nɔki li kabig ku'om buliginɛ.” 15 Zugsɔb onɛ an Paŋtita'ar Sɔb ka an Israel Dim Wina'am Onɛ An Kasi la yɛl ye, “Viigimini ya tʋʋmbɛ'ɛd ka nyɛ faangir ka vʋ'ʋs, ya ya'a an baanlimm ka niŋ yadda linɛ na aan ya paŋ, amaa ka ya zan'as ka pʋ siak ye ya tʋmmi lii. 16 Ya zan'as ka yɛl ye, ‘Ayei, ti na ban' widi zɔ.’ Dinzugɔ ya sid na zɔ! Ya yɛl ye, ‘Ti na ban' widi banɛ zɔt hali la.’ Alazugɔ, banɛ kati ya la na zɔt tɔ'ɔtɔ gaadi ya! 17 Ba nid yinne na kad nidib tusir, ka nidiba anu kadi ya wʋsa,
ali ka ya ti kpɛlim bi'ela nwɛnɛ tuuta bɛ li kɔn' zuor zug,
bɛɛ pien ka ba lɔɔ li kʋkʋn zug.” 18 La'an nɛ wala Zugsɔb la bɔɔd ye o pa'ali ya pʋpielim, o gban'e ya ye o pa'ali ya o nimbaanlzɔɔr. Zugsɔb la anɛ yɛlsida sɔb. Banɛ wʋsa gu'usid Zugsɔb la tuon na paam albareka! 19 Zion nidibaa, yanam banɛ bɛ Jerusalem la, ya kʋ lɛn kum ya'asɛ. Ya ya'a ti kaasi bɔɔd suor, o anɛ pʋpielim sɔb ka na sʋŋi ya. O ya'a ti wʋm ka ya kaasi buol o, o na siak. 20 La'an nɛ Zugsɔb la na mɔri ya dɔlis tɔɔg nɛ mugusʋg pɔɔgin la, ya pa'annib la kʋ lɛn su'adi ba mɛŋ ya'asɛ, ya na nyɛ ba nɛ ya nini. 21 Ya ya'a fɛndig datiuŋ bɛɛ dagɔbʋg, ya tʋba na wʋm ka li pian'adi ya nya'aŋi yɛti ya ye, “Suori nwa', dɔlli li!” 22 Ya na san'ami ya bada banɛ ka ya buligi li nɛ anzurifa nɛ sanlima, ka nɔki li lɔbi bas nwɛnɛ pu'a pier kparikɛɛung nɛ, ka yɛl ye kem sa! 23 Yanamɛ bʋd si'el teŋin la wʋsa o na kɛ ka saa nii li zug, ka dikanɛ na yi teŋin la na zu'oe ka mɔr tɛbisim. Saŋkan la ya bʋnkɔnbid na nyɛ yam sʋma ɔnb. 24 Hali niigi nɛ bʋmis banɛ ka ya mɔri ba tʋm la na ɔnb yamkpi'emis ka mu'a dʋʋsa nɛ bisi. 25 Daakanɛ ka ya na ti nyaŋi ya bi'emnam ka kʋʋ ba la, ba zin'ikpi'ema na li, ka ku'om na pʋbid zuotitada nɛ kʋkʋna zugʋ sigid na. 26 Nwadig la na nie nwɛnɛ winnig nɛ, ka winnig la nie gaad ala nɔɔr ayɔpɔi, li na nwɛnɛ daba ayɔpɔi nɛɛsim ka ba la'asi li dabisir yinne. Saŋkan la, Zugsɔb la na vil fɛn'ɛd linɛ bɛɛ o nidib niŋgbiŋin la nɛ piena, ka ma'ae apu'ad linɛ ka o kɛ ka ba paam la. 27 Gɔsima! Zugsɔb la naanɛ lalli kenna, ka o sʋnf pɛlig nwɛnɛ bugum dit nɛ, ka nyɔ'ɔs duoe gilig o. O nɔɔr pian'ad pɛ'ɛl nɛ sʋnpɛɛn ka diti nwɛnɛ bugum nɛ. 28 O ya'a vʋ'ʋs, li nwɛnɛ ku'om linɛ pɛ'ɛl kɔlʋg ka paad nidib kʋkɔya bɛn. O mɔr gu'odiŋ linɛ an san'auŋ la gu'osid tɛɛns wʋsa, ka nɔk salibiri li'a nidib nɔya mɔri ba ken san'auŋ zin'ig. 29 Ya na yʋ'ʋm nwɛnɛ yʋ'ʋŋ kanɛ ka ya maan di'ema tiɛnd Wina'am malʋŋ la yɛla la, ka ya sʋnya na malis nwɛnɛ nidibi na piebid na'akpa'as ka ken ye ba maal sumalisim Zugsɔb zuor zug, Zugsɔb onɛ an Israel Tampiingin la. 30 Zugsɔb la na kɛ ka nidib wʋm o pian'ad linɛ mɔr paŋ la, ka ba nyɛɛ o nu'ug ka li sigid na nwɛnɛ bugum ka dit nɛ sʋnpɛɛn kanbidi kenna, ka saŋgbana tansid nɛ sisi'em nɛ satansʋg nɛ sakuga. 31 Zugsɔb la na widig Asiria dim; o na bʋ' ba nɛ o balaar la. 32 Zugsɔb la ya'a bʋ' ba nɛ balaar, o nidib na yʋ'ʋmmi nwɛ'ɛd siyada nɛ kɔna, ka o zabid nɛ ba zabbɔn'ɔgin ka nwɛ'ɛdi ba nɛ kpisinkpila nɛ o mɛŋ nu'ug. 33 Ba pʋn ti'eb Tofet nɛ gur, ba ti'ebi li nɛ gur na'ab la. Li bugum bʋmbɔk la zulimnɛ ka yalim, ka bugum nɛ daad dinɛ bɛɛ ani la zu'oe; Zugsɔb la vʋ'ʋsʋm, dinɛ nwɛnɛ kidibir bugum la, na nyu'oe li.