Wp/kus/AZAYA 22
AZAYA 22
Zugsɔb la pian' Jerusalem yɛla 1 Labakaŋa anɛ Nier Bɔn'ɔg la yɛla. Bɔɔ daamidi ya nannanna ka ya dʋʋ bɛ dɔɔd zugɔ? 2 Tempʋʋg la pɛ'ɛli nɛ tʋkpiidʋg. Tempʋʋg la anɛ di'ema nɛ kuŋ. Ya nimbanɛ kpi la, ba da pʋ zabnɛ kʋʋ ba bɛɛ ba mɛŋi keŋ tanp nwɛ'ɛbi kpii ani. 3 Ya tuongatib la wʋsa la'asi zɔ. Ba dataas gban'e ba, hali ka pʋ tɔn piim yinne. Yanam banɛ ka ba gban'e ya la liebnɛ yammis, la'an nɛ yanamɛ dɛŋi zɔ ka ya dataas nam bɛ lalli la. 4 Dinzug ka m yɛl ye, “Tɔɔmi m san'an; kɛl ka m kaasi tig. Da bɔɔd ye ya bɛlis mam m nimbanɛ kpi la zugɔ.” 5 Zugsɔb onɛ an Paŋtita'ar Sɔb la mɔr dabisir, ka li an tʋkpiidʋg nɛ kikirʋg nɛ dabiem ka li bɛ Nier Bɔn'ɔgin la, dabisir kanɛ ka ba na kaas ka fabin zuoya la ni. 6 Elam teŋ dim la pianki ba lu'ad ka yina nɛ widi nɛ zaba tɛrekonam. Kir dim mɛ ti'eb ya nɛ zaba gbanti'edis. 7 Ya bɔn'ɔsʋma la pɛ'ɛl nɛ zaba tɛrekonam, ka ba zi'el wiedban'adib tempʋʋg la za'anɔya ni. 8 Juda dim sʋŋir wʋsa naae ya. Daakan la ka ya yʋ'ʋn pin'ili gɔsidi ya zaba la'ad linɛ ka ba su'a Lebanon Tiis Yin la. 9 Ya nyɛya ka David tempʋʋg zaŋguoma la mɔr wɛn bɛdegʋ, ka ya' pɛ'ɛl Teŋir Bɛuŋ la nɛ ku'om. 10 Ya kaal Jerusalem dɔɔd nɛ ya' la wʋsa baŋi li kal, ka nwa'ae sieba yis kuga la ye ya maal zaŋguoma la ka li mɔr paŋ. 11 Ya tu zin'ikanɛ ka ku'om na digi zaŋguoma ayi' la teŋsʋk, ye Bɛuŋ Kʋdig la ku'om pʋbigi sig anina. Amaa ya pʋ gɔsi nyɛ Wina'am onɛ maali li wʋsa kʋdimin sa la, bɛɛ Zugsɔb onɛ gban'e li yɛla ka li yʋma zulim la. 12 Zugsɔb la, Zugsɔb onɛ an Paŋtita'ar Sɔb la da buoli ya daakan la ye ya kaasim ka kum, ka pʋni ya zut, ka yɛ bɔto fuud, ka li anɛ sʋnsa'aŋ nɛ nyan zug. 13 † Gɔsimiya, ya maan sumalisim tʋkpiidʋg, kɔtid niigi ka kʋʋd pɛ'ɛs, ɔnbid ni'im ka nuud daam! Ya yɛt ye, “Kɛlli ka ti di ka nu, ka bɛog anwa ka ti kpinɛ!” 14 Zugsɔb onɛ an Paŋtita'ar Sɔb la nie nɛ'ɛŋa pa'alim ka kɛ ka m wʋm “Ya'a ka' ya kum saŋa, ya tʋʋmbɛ'ɛd la taal ka' basibɔ.” Zugsɔb la pian', Zugsɔb onɛ an Paŋtita'ar Sɔb la yɛl. Zugsɔb pian' Siebna nɛ Eliakim yɛla 15 Zugsɔb la yɛl si'eli nwa', Zugsɔb onɛ an Paŋtita'ar Sɔb la yɛl ye, Kem yɛl tʋmtʋm kaŋa, Siebna onɛ gɔsid na'ayir la ye, 16 Fʋ tʋm bɔ kpɛla? Anɔ'ɔn tisif suor ye fʋ tuu fʋ mɛŋ yaʋg kpɛla? Wala ka fʋ tuudi fʋ yaʋg kʋkʋn zug ka kpi'ed tampiing ye fʋ maali fʋ vʋ'ʋsʋm zin'iga? 17 Baŋim ka Zugsɔb la bɔɔd ye o zaŋi fʋ lɔbig, la'an nɛ fʋn an nintita'ar la. 18 O na gbilimif wʋʋ piennɛ lɔbigi bas teŋ kanɛ ka si'el-si'el kae ka fʋ kpii ani ka basi fʋ widi tɛreko sʋma la; fʋn onɛ diisidi fʋ zugdaan yir la nyan la! 19 M na yisi fʋ, fʋ tʋʋma ni, ka fʋ kʋ lɛm bɛɛ fʋ zin'igin la. 20 Daakan la, m na buoli m tʋmtʋm Eliakim onɛ an Hilkia biig la. 21 M na nɔki fʋ fuug la yɛɛl o, ka nɔki fʋ sɛnbidiŋ la lɔɔ o siaa, ka nɔki fʋ kpi'euŋ la tis o. O na an saamme tis banɛ bɛ Jerusalem la nɛ Juda yidim wʋsa. 22 M na nɔk Na'ab David yir saafinam la niŋ o nu'usin. On yɔ'ɔg si'el, sɔ' kae na nyaŋi yɔɔ; ka on yɔ' si'el, sɔ' kae na nyaŋi yɔ'ɔgɛ. 23 M na zi'el o kiŋ-kiŋ wʋʋ kpa'ar nɛ, ka o zi'esim la na mɔr na'asi kɛɛn o saam yin na. 24 Yin la kpi'euŋ nɛ ba biis nɛ ba yaas wʋsa yɛla na ziil nɛ on, nwɛnɛ la'abibis nɛ la'abɛda ya'ae ba'a zug si'em la. 25 Zugsɔb yɛl ya ye, “Saŋkan la ya'a ti paae, ba'akanɛ ka ba ba' zi'el kiŋ-kiŋ la na vuoɛn, ba na dam viki li, ka ziid linɛ ya'ae li zugin la na sʋʋgi li teŋin.” Zugsɔb la pian' li.